PJCW-KABUM-01-KA-022

🚧 This website is under continued development. We appreciate your patience!

Previous Text Back to Volume PageNext Text

Wylie title	rtsis gzhung nyin byed snang ba'i 'das lo nges pa gsar spos dge legs snang ba'i nyi ma
Location	dpal sprul bka' 'bum Volume 1, Text 22, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Chronologies- bstan rtsis

Tibetan Text

[edit]

༄༅༎ ཀལྱཱཎཾརུཙིཏྱནཱམགཎནཱགྲནྠདི་བཱཀརབྷཱཡཱཿནིརྒཏབཪྵབཱུབཀཔྲཏིགྲསཾཙཱརླབི་ཧརཏིསྨ།

༄༅། །ཀལྱཱཎཾརུ ཙི སྶཱུ ཏྱ ནཱ མ ག ཎ ནཱ གྲ ནྠ དི་བཱ ཀ ར བྷཱ ཡཱཿ ནི རྒ ཏ བ ཪྵ བཱུ བ ཀ པྲ ཏི གྲ སཾཙཱ རླ བི ཧ ར ཏི སྨ།

༄༅། །རྩིས་གཞུང་ཉིན་བྱེད་སྣང་བའི་འདས་ལོ་ངེས་པ་གསར་སྤོས་དགེ༵་ལེ༵གས་སྣང་བའི་ཉི༵་མ༵་ཞེས་བྱ་བ་བཞུགས་སོ། །

༈ སྡེབ་སྦྱོར་རྐང་བཞི་མཉམ་པའི་པྲྀཏྟ་ལས་ཡི་གེ་བཅུ་པ་ཕྲེང་ལྡན་མ་ལ་སྤྱིར་རྣམ་གྲངས་༢༠༢༤ཡོད་པ་ལས་འདིར་ཨུདྡིཥྛ་༡༧༡ནས་ཟིན་པ་རྨ་བྱའི་འགྲོས་ཞེས་བྱ་བའི་པྲ་སྟ་རས་མཛེས་པའོ། །

༄༅༎ ནམཤྲཱིཀཱལཙཀྲཡེ།

༄། ན མ ཤྲཱི ཀཱ ལ ཙ ཀྲ ཡེ །

༄༅། །དཔལ་དུས་ཀྱི་འཁོར་ལོ་ལ་ཕྱག་འཚལ་ལོ། །

ཀཱལཙཀྲབིཤྭམཏྲིཡོགཱ

ཀཱ ལ ཙ ཀྲ བི ཤྭ མ ཏྲི ཡོ གཱ

ཁྱབ་བདག་དུས་ཀྱི་འཁོར་ལོ་སྣ་ཚོགས་ཡུམ། །

དེབམཎྜལཾཔྲབྷཱུཧིཝཱིརཿ ༎།

དེ བ མ ཎྜ ལཾ པྲ བྷཱུ ཧི ཝཱི རཿ ། །

དཔའ་བོ་རྣལ་འབྱོར་མ་ཚོགས་དཀྱིལ་འཁོར་ལྷ། །

༄༅༎ ངྷརྨརཱཛསནྟཏཾཀུལིཤྲཱི།

༄། ངྷ རྨ རཱ ཛ ས ནྟ ཏཾ ཀུ ལི ཤྲཱི།

༄༅། །ཆོས་རྒྱལ་རིགས་ལྡན་བརྒྱུད་པའི་དགེ༵་ལེ༵གས་ཀྱིས། །

ཤཱས མཎིརྫབིརུཙནྟུཿ ༎།

ཤཱ ས ནྡོ མ ཎི རྫ བི རུ ཙ ནྟུཿ ། །

བསྟན་པ་རིན་ཆེན་ཉི༵་མ༵་གསལ་གྱུར་ཅིག །

ཕྱག་བྱ་བ། དགེ༵་ལེ༵གས་མཆོག་གི་འབྱུང་གནས་རྫོགས་སངས་རྒྱས། །དག་གསལ་གཉེན་པོའི་ཉི༵་མ༵་དམ་པའི་ཆོས། །ལུང་རྟོགས་ཡོན་ཏན་གཏེར་མཛོད་འཕགས་ཚོགས་སྡེ། ། རིན་ཆེན་དཀོན་མཆོག་གསུམ་ལ་མགོས་ཕྱག་འཚལ། །དངོས་པོ་ངེས་བསྟན། སྐར་རྩིས་རི་མོའི་ལམ་འདིར་འཇུག་འདོད་ཕལ། །མང་བསགས་འདས་ལོའི་ཁུར་གྱིས་དུབ་པ་ལས། །ངེས་པ་གསར་དུ་སྤོས་པའི་དགེ༵་ལེ༵གས་ཀྱིས། །ངལ་གསོའི་ཉི༵་མ༵་འཆར་གྱིས་དགའ་བར་བྱོས། ། ༈ དེ་ཡང་རྣམ་གྲངས་མདོར་བསྡུ་ན། །བྱེད་པ་གྲུབ་པའི་ཡན་ལག་ལྔ། །ལོ་བདག་ཟླ་འཕོ་སྒྲ་གཅན་དང་། །གཟའ་ལྔའི་ཉིན་ཞག་དལ་མྱུར་ལས། །ཁྱིམ་ཚེས་དེས་མཚོན་དུ་བ་དང་། ། ཉི་ཟླར་སྒྲ་གཅན་འཇུག་པའི་ཚུལ། །རྩིས་ཕྲན་འགའ་དང་མགྱོགས་རྩིས་སྐོར། །རིམ་པ་བཞིན་དུ་བསྟན་པར་བྱ། ། ༈ དང་པོ་བྱེད་༣༦པའི་ཡན་ལག་ལྔ༥༥། །རབ་བྱུང་བཅོ་ལྔ་བའི་ནང་གི །རྣམ་གནོན་ལྕགས་འབྲུག་ལ་སོགས་པ། །འདས་ལོ་དག་པ་ཉི་༡༢མས་བསྒྱུར། །ནག་པ་ལ་སོགས་འདས་ཟླ་བསྲེ། །གནས་གཉིས་འོག་མ་ལག་༢པས་བསྒྱུར། །༣༦དུས་མེ་བསྲེས་ལ་༥༥མདའ་རོས་བགོ །རྙེད་པ་སྟེང་བྱིན་ཟླ་དག་གོ ། ༈ ཟླ་དག་གནས་གསུམ་རིམ་པ་བཞིན། །གཟུགས་དང་གཟུགས་མེ་མཁའ་མདས་བསྒྱུར།༡༡༣༥༠།དུས་དང་རྒྱལ་བ་ནམ་མཁའ་བྱིན།༦༢༤༠།མཁའ་རོ་མཁའ་རོ་ཐུབ་པ་ཡིས། ༧༦༠༦༠།གོང་དུ་སྒྲིལ་ལྷག་གཟའ་དྷྲུའོ། ། ༈ ཟླ་དག་གནས་གཉིས་སྟེང་མ་མིག༢།འོག་མ་༡གཟུགས་ཀྱིས་བསྒྱུར་བ་ལ། །མེ་མིག་༢༣དང་ནི་མཁའ་༤༠མཚོ་བྱིན། །༡༢༦དུས་ཉི་ཀླུ་ལག་གིས་༢༨སྒྲིལ་ལྷག །རིལ་བོ་དང་ནི་དེའི་ཆ་ཤས། ། ༈ ཟླ་དག་གནས་ལྔ་སྟེང་རིམ་བཞིན། །མིག་ཕྱོགས་ཀླུ་དབང་མིག་ཕྱོགས་བསྒྱུར།༢༡༠༥༨༢༡༠།དུས་མིག་གཟུགས་མཚོ་མེ་མིག་དང་། །ནམ་མཁའ་དང་ནི་བྲོ་བ་བྱིན། ། ༣༦༤༡༢༣༠༦།༡༣འདོད་༦དུས་༦༠མཁའ་རོ༦༠མཁའ་རོ་དང་། །༢༧འཁོར་ལོས་སྒྲིལ་ལྷག་ཉི་དྷྲུའོ། །སྔ་དྷྲུར་རང་རང་སྒྱུར་བྱེད་བྱིན། །ཕྱི་མ་ཕྱི་མའི་དྷྲུ་བ་འཆར། ། ༈ གཟའ་དྷྲུར་བུག་མདའི་ཆུ་ཚོད་དང་། །སྲང་མེ་དབུགས་མཚོ་༥༩༣༤ཉི་དྷྲུ་ལ། །ཆུ་ཚོད་རིག་བྱེད་སྲང་གཟུགས་མིག །དབུགས་འབྱུང་འདོད་ཆར་བུ་ག་རྣམས། ༠༤༣༡༥༩།གང་བརྩིའི་ཚེས་ཀྱིས་བསྒྱུར་ལ་བྱིན། །གཟའ་ཉི་བར་པའོ་རྣམ་དག་ཆེད། །ཟླ་རྐང་ཉི་མའི་རྐང་ཆོག་སོགས། ༠༥༩༣༤།ཞག་རེའི་ངེས་པ་བརྩི་ཚུལ་རྣམས། །འཆད་འགྱུར་གྲུབ་མཐའ་ཇི་བཞིན་ལ། །སྒོས་ཆོས་དབུགས་ཀྱི་ཆ་ཤས་དག །འདོད་པས་བརྗོད་དེ་བྱ་བ་ཉིད། ། ༈ གཉིས་པ་རྩ་རྒྱུད་རྗེས་འབྲང་ནས། །རྣམ་དག་གྲུབ་པའི་ལྔ་བསྡུས་བཤད། །རབ་ཚེས་༡༥རྣམ་གནོད་ལ་སོགས་པ། །འདས་ལོ་ཉིས་༡༢བསྒྱུར་ནག་པ་སོགས། །འདས་ཟླ་བསྲེས་ལ་གནས་གཉིས་ཀྱི། །འོག་མ་མིག་༢བསྒྱུར་སོ་ཡིས་༣༢བརྒྱན། །༦༥མདའ་རོས་རྙེད་ནོར་སྟེང་མར་བསྲེ། །ཚེས་ཟླ་རྣམ་པར་དག་པ་སྟེ། །ལྷག་མ་ཟླ་བཤོལ་ལོངས་པའི་མཚམས། ། སྟོང་ཅིང་སྒང་དབུགས་ལྡོག་གཉིས་སོགས། །དུས་གཟེར་བརྟགས་པའི་གཞིར་ཡང་བཟུང་། ། ༈ ཟླ་དག་གནས་ལྔ་སྟེང་རིམ་བཞིན། །གཟུགས་༡དང་གཟུགས་༣༡མེ་མཁའ་མདའ་༥༠ཐིག་༠ །མཁའ་ཀླུ་༤༨༠ཆུ་བོས་བསྒྱུར་བ་ལ། །བྲོ་བ་༦ཟླ་༤༡མཚོ་རི་མེ་དང་༣༧།། མེ་༣དང་དང་འབྱུང་མཁའ་རྒྱ་༢༠༥མཚོ་བྱིན། །རི་མཁའ་༠༠༧རི་དང་༦དུས་༦༠མཁའ་རོ། ། མཁའ་༦༠རོ་རིས༠དོར་གཟའ་དྷྲུའོ། ། ༈ ཟླ་དག་གནས་གཉིས་སྟེང་མ་མིག༢ །འོག་མ་གཟུགས་ཀྱིས་བསྒྱུར་བ་ལ། །སྟེང་འོག་མེ་མིག་༢༣དུས་ལག་༢༦བསྲེ། །༡༢༦དུས་ཉི་ཀླུ་ལག་༢༨གིས་སྒྲིལ་ལྷག །ཚོགས་དང་དེ་ཡི་ཆ་ཤིས་སོ། ། ༈ ཟླ་དག་གནས་ལྔ་མིག་༢དང་ཕྱོགས།༡༠ །ཀླུ་༥༨དབང་༡གཟུགས་དང་རི་༡༧ཟླ་ཡིས། །རིམ་བསྒྱུར་དེ་ཉིད་༢༥མདའ་༥༧འབྱུང་དང་། །༣༡གཟུགས་མེ་ལག་དང་༨མཚོ་༤༦བྱིན་ལ། །༦རི་༧རོ་དུས་༦དང་མཁའ་༦༠རོ་དང་། །མཁའ་རོ་༦༠རོས་སྒྲིལ་འཁོར་༢༧ལོ་ཡིས། །དོར་ལྷག་ཉི་མའི་དྷྲུ་བ་ཀ ། ༈ གཞན་ཡང་རི་མོའི་རྣམ་གྲངས་ལ། །ཟླ་དག་གནས་གཉིས་སྟེང་མ་༡གཟུགས། ། འོག་མ་གཟུགས་༣༠༠༡་མཁའ་ཐིག་མེས་བསྒྱུར། །སྟེང་མར་༦དུས་དང་འོག་མ་ལ། །ཆུ་བོ་མིག་བུག་༣༦༢༤མེ་བྱིན་པར། །དུས་མདའ་༥༦༥༦དུས་མདས་རྙེད་པའི་ནོར། །སྟེང་བྱིན་རིས་༧དོར་ལྷག་གཟའ་གནས། །འོག་མ་༦༠མཁའ་རོ་མཁའ་༦༠རོ་དང་། །དུས་དང་རི་མཁའ་༧༠༧རིས་བསྒྱུར་བར། །དུས་མདའ་དུས་༧༥༦༥༦མདས་རིམ་ཐོབ་ནོར། །སྔར་གྱི་འོག་བཀོད་གཟའ་དྷྲུའོ། ། ༈ ཟླ་དག་མེ་དབང་༡༢༥༣ལག་པའི་བསྒྱུར། །དེ་ལ་རྒྱལ་བ་༢༩༢༤བུག་མིག་བྱིན། ། ཀླུ་ལག་༣༥༢༨འབྱུང་མེས་ཐོབ་པ་དོར། །ལྷག་མ་དུས་ཉིས་༡༢༦ཐོབ་པས་ནོར། །རིལ་པོའི་དེ་ལྷག་ཆ་ཤས་ཡིན། ། ༈ ཟླ་དག་མདའ་༦༥རོས་བསྒྱུར་བ་ལ། །ལག་༧༧༢ཐུབ་རི་བྱིན་ཆུ་༨༠༤མཁའ་ཀླུས། ། ཐོབ་པ་དོར་ལྷག་གནས་གཉིས་ཀྱི། །སྟེང་མ་མིག་༢བསྒྱུར་འོག་མ་ལ། །རི་རོས་༦༧ཐོབ་པ་སྟེང་མར་བསྲེ། །སྟེང་མ་མཁའ་༦༠་རོས་བགོས་ཐོབ་པ། །སྐར་མའོ་ལྷག་མ་ཆུ་ཚོད་ཡིན། ། འོག་མའི་གནས་དེ་མཁའ་༦༠རོ་དང་། །༦དུས་བསྒྱུར་རིམ་ཐོབ་སྲང་དབུགས་ཏེ། །ལྷག་མ་རང་ཆ་ཉི་དྷྲུའོ། ། ༈ འདི་དག་བཻ་ཌཱུར་དཀར་པོ་ལས། །མི་རྗེ་སངས་རྒྱས་རྒྱ་མཚོ་ཡིས། །རྣམ་དཔྱོད་འཕྲིན་ལས་ལེགས་འོང་བའི། །ངོ་མཚར་དྷྲུ་བ་བཞིན་བྱེད་ན། །ཟླ་དག་མཁའ་ཐིག་རི་བུག་༩༧༠༠བརྒྱན། །རི་དབང་༨༦༥༧དུས་ཀླུས་བསྒྱུར་བ་ལ། །མིག་༣༩༥༩༢བུག་མདའ་རྩ་མེས་ཐོབ་པ། །དོར་ལ་ལྷག་མ་རི་༧ཡིས་བསྒྱུར། །མིག་བུག་༣༩༥༩༢མདའ་རྩ་མེས་ཐོབ་པ། ། གཟའ་ཡིན་ལྷག་མ་མཁའ་༦༠རོས་བསྒྱུར། །བགོད་བྱེད་ཀྱིས་ཐོབ་དབྱུག་བུ་སྟེ། །སླར་ཡང་༦༠མཁའ་རོས་བསྒྱུར་བ་ལ། །བགོད་བྱེད་ཐོབ་པ་སྲང་ཡིན་ལ། །༦དུས་བསྒྱུར་བགོད་བྱེད་ཐོབ་པ་དབུགས། །རི་མཁའ་༧༠༧རིས་བསྒྱུར་བགོད་བྱེད་ཀྱིས། །ཐོབ་པ་ཆ་སྟེ་གཟའ་དྷྲུ་དག ། ༈ རིལ་ཆར་ཟླ་བ་དག་པ་ལ། །ཀླུ་ལག་མཚོ་༣༤༢༨མེས་བརྒྱན་པར་བྱ། །མེ་དབང་ལག་༢༤༣པས་བསྒྱུར་བ་ལ། །ཀླུ་ལག་༣༥༢༨འབྱུང་མེས་ཐོབ་པར་དོར། །སླར་ཡང་ནོར་ལག་༢༨གིས་བསྒྱུར་ལ། །ཀླུ་ལག་༣༥༢༨འབྱུང་མེས་ཐོབ་པ་དེ། །རིལ་པོའོ་ལྷག་མ་༡༢༦དུས་ཉིས་བསྒྱུར། །ཀླུ༣༥༢༨ལག་འབྱུང་མེས་ཐོབ་པ་དེ། །ཆ་ཤས་ཡིན་ནོ་ལྷག་མེད་འཆར། ། ༈ ཉི་དྷྲུའི་དོན་དུ་ཟླ་དག་ལ། །༢༦༩༦དུས་བུག་མཚམས་མིག་བྱིན་པ་དེ། ། ༦༥མདའ་རོས་བསྒྱུར་ལ་ཆུ་མཁའ་༨༠༤ཀླུས། །དོར་ལྷག་འཁོར་༢༧ལོའི་བསྒྱུར་བ་ལ། །ཆུ་༨༠༤མཁའ་ཀླུས་ཐོབ་སྐར་གནས་ཏེ། །ལྷག་མ་༦༠མཁའ་རོས་བསྒྱུར་བ་ལ། །ཆུ་༨༠༤མཁའ་ཀླུས་ཐོབ་དབྱུག་གུ་སྟེ། །ཡང་ལྷག་མཁའ་༦༠རོས་བསྒྱུར་བ་ལ། །བགོད་བྱེད་ཀྱིས་ཐོབ་ཆུ་སྲང་སྟེ། །ལྷག་མ་༦དུས་བསྒྱུར་བགོད་བྱེད་ཐོབ། །དབུགས་སོ་སླར་ལྷག་རི༦༧རོ་ཡིས། ། བསྒྱུར་ལ་བགོད་བྱེད་ཀྱིས་ཐོབ་པ། །ཆ་སྟེ་ལྷག་མེད་རྣམ་དག་འབྱུང་། ། ༈ སྔ་མའི་དྷྲུ་ཝར་རང་རང་གི །སྒྱུར་བྱེད་བྱིན་ལ་འཁོར་ལོས་སྒྲིལ། །ཕྱི་མ་ཕྱི་མའི་དྷྲུ་ཝ་འཆར། ། ༈ ཉིན་རེའི་རྩིས་ལ་འཇུག་པའི་ཕྱིར། །གཟའ་དྷྲུར་བུག་མདའི་ཆུ་ཚོད་དང་། །སྲང་མེ་དབུགས་མཚོ་ཆ་མི་བདག༠༥༧༣༤།ཉི་དྷྲུར་ཆུ་ཚོད་རིག་བྱེད་དང་། །གཟུགས་མིག་སྲང་ལ་དབུགས་འབྱུང་བ། །མེ་མཚོའི་ཆ་རྣམས་གང་བརྩི་ཡི། ༠༤༢༡༥༤༣།ཚེས་གྲངས་ཀྱིས་བསྒྱུར་སོ་སོར་བྱིན། །དེ་ཡིས་གཟའ་ཉི་བར་པ་འགྲུབ། ། ༈ རིལ་པོར་ཚེས་བསྲེ་༡ཆུ་ཟླས་༡༧བགོ །ཐོབ་པ་༡གཟུགས་མེ་༣མི་མཉམ་ཞིང་། ། མིག༢མཚོ་༤ཐིག་ལེ་༠མཉམ་པ་ཡིན། །ལྷག་མས་ཟླ་བའི་རྐང་པ་བཟུང་། །མདའ་༥དབང་༥འབྱུང་༥མཚོ་༤མེ་༣མིག་༢གཟུགས་༡།།སྔ་རྐང་དེ་ཡིན་ཕྱི་རྐང་ལྡོག །དེ་ཡང་སྔ་རྐང་ཟོས་ཟིན་དང་། །ཕྱི་རྐང་ཟ་རྒྱུ་སྡོམ་བྱ་སྟེ། །སྟོང་ལ་སྟོང་པ་རྣམ་པར་དག །༡གཟུགས་དང་༡༣ འདོད་པར་འབྱུང་༥བ་སྟེ། །མིག་༢དང་ཉི་མ་༡༢དག་ལ་༡༠ཕྱོགས། །མེ་༣་དང་དྲག་༡༡པོར་ཚེས་༡༦ཞེས་བྱ། །༡༠ཕྱོགས་དང་ཆུ་༤གཏེར་བུ་ག་༡༩གཟུགས། །མདའ་༥དང་བུ་གར་༩ ལག་པ་༢༢མིག །དུས་༦དང་ནོར་༨ལ་རྒྱལ་༢༤བ་སྟེ། །༧ཐུབ་པ་ལ་ནི་དེ་ཉིད་༨༥སྡོམ། ། རྐང་འཛིན་ཕྱིས་ལ་རྐང་བསྡོམས་བྲི། །རྐང་བཟུང་མདུན་མས་ཆ་ཤས་བསྒྱུར། །མ་ཟིན་རྐང་པ་དང་པོ་དང་། །མཁའ་༦༠རོ་དུས་༦དང་རི་མཁའ་༧༠༧རིས། །བསྒྱུར་ལ་དུས་༡༢༦ཉིས་རིམ་ཐོབ་ནོར། །རྒྱུ་བའི་ཆུ་ཚོད་ཆུས་སྲང་དང་། །དབུགས་དང་ཆ་སྟེ་རྐང་སྡོམས་ལ། །སྔ་རྐང་དུས་སུ་དེ་བྱིན་ཞིང་། །ཕྱི་རྐང་རིམ་ཕབ་དེ་ཡིས་སྦྱང་། །ཚོགས་དེ་གཟའ་བར་ལོངས་སྤྱོད་དུ། །ནོར་མཉམ་བསྣན་ལ་མི་མཉམ་ཕྲི། །དེ་ཡིས་གཟའ་ཕྱེད་དག་པར་འགྱུར། ། ༈ གལ་ཏེ་ཟླ་རྐང་ཞིབ་བརྩིས་ཀྱིས། །འཚོལ་ན་རྐང་བསྡོམས་གྲུབ་པའི་རྗེས། །ཆ་ཤས་དྷྲུ་བ་མཁའ་མེ་ཡིས། །བསྒྱུར་ལ་གང་བརྩིའི་ཚེས་གྲངས་བསྲེ། །དེ་ཉིད་རྐང་བཟུང་མདུན་མས་བསྒྱུར། །མཁའ་༣༧༨༠ཀླུ་རི་མེས་རྙེད་པའི་ནོར། །རྒྱུ་བའི་དབྱུག་གོ་ལྷག་མ་རྣམས། །མཁའ་༦༠རོ་དུས་༦དང་རི་༧༠༧སོགས་སམ། །དཀྱིལ་འཁོར་གྱི་ནི་མཁའ་སྐྱོན་ ཆ། །གཟུགས་མིག་གིས་བསྒྱུར་རིམ་ཐོབ་ཚོགས། སྔ་རྐང་ལ་བསྲེ་ཕྱི་རྐང་དུ། །དམན་པ་གཟའ་བར་ལོངས་སྤྱོད་དུ། །ནོར་མཉམ་བསྣན་ལ་མི་མཉམ་ཕྲི། །དེ་དང་ཉི་ཆ་ཕྱེད་མཉམ་ཆེད། །གཟའ་ཡི་ཆ་ཤས་རི་༦རོས་བསྒྱུར། །རི་མཁའ་༧༠༧རིའམ་གཟུགས་མིག་༢༡གིས། ། རྙེད་པ་སྟེང་བཀོད་གནས་དྲུག་བྱ། ། ༈ དེ་ནས་གཟའ་ཉི་རྣམ་དག་ཆེད། །ཉི་བར་གནས་གཉིས་གཅིག་ལ་ནི། །སྐར་དྲུག་ཆུ་ཚོད་ཉེར་ལྔས་སྦྱང་། །མ་ལྡངས་འཁོར་༢༧ལོ་བསྣན་ལ་སྦྱང་། །སྦྱངས་ཤུལ་འཁོར་ཕྱེད་ལྷག་ན་དོར། །ལྷག་མའི་སྐར་མ་༦༠མཁའ་རོས་བསྒྱུར། །ཆུ་ཚོད་བཅུག་ལ་༡༣༥མདའ་ཡོན་ཟླས། །བགོས་ཐོབ་ནོར་གྱིས་ཉི་རྐང་བཟུང་། །༦དུས་༤མཚོ་༡ཟླ་བ་སྔ་རྐང་སྟེ། །ཕྱི་རྐང་དེ་ལྡོག་རྐང་གནས་དྲུག །སྔ་ཕྱི་ཟོས་དང་མ་ཟོས་སྡོམ། །སྟོང་ལ་སྟོང་པ་རྣམ་པར་དག ། གཟུགས་༡དང་དབང་བོ་༥བྲོ་བ་༦སྟེ། །མིག་༢དང་ཆུ་བོ་༤དག་ལ་ཕྱོགས་༡༠།།མེ་ལ་དྲག་པོ་སྡོམ་པར་བྱ། །རྐང་འཛིན་ཕྱིས་ལ་རྐང་བསྡོམ་བྲི། །རྐང་བཟུང་མདུན་མས་ལྷག་རྣམས་བསྒྱུར། །མ་ཟིན་རྐང་པ་དང་པོས་བསྒྱུར། །རང་འཁོར་སྒྲིལ་ལ་༡༣༥མདའ་ཡོན་ཟླས། །ཐོབ་པའི་ཡང་དག་རྒྱུ་ཆུ་ཚོད། །ལྷག་རྣམས་མཁའ་༦༠རོ་དུས་༦རི་༦༧རོས། །རིམ་བསྒྱུར་རང་རང་ཆ་རྣམས་བཅུག །༡༣༥མདའ་ཡོན་ཟླས་ཐོབ་རྒྱུ་བ་ཡི། །ཆུ་སྲང་དབུགས་དང་ཆ་ཤས་ཡིན། །སྔ་རྐང་ཆུ་ཚོད་གཉིས་པོ་བསྲེ། །ཕྱི་རྐང་རྒྱུ་བས་སྦྱངས་ལྷག་རྣམས། །གཟའ་ཉི་ཕྱེད་དག་ལོངས་སྤྱོད་དུ། །འཁོར་ཕྱེད་དོར་བརྣན་མ་དོར་ཕྲི། །དེ་ཡིས་གཟའ་ཉི་དག་པར་འགྱུར། ། ༈ རེས་གཟའ་གང་ཤར་ཉིན་ཞག་རེར། །སྤྱོད་པས་ད་ནངས་ནམ་ལང་དུས། ། སླེབས་ནས་སང་གི་ནམ་ལངས་འཕོ། །ལོངས་སྤྱོད་གནས་སུ་གང་ཤར་བ། །ནམ་ལངས་ནས་བརྩམས་ཟད་པའི་ཚེ། །དེ་རིང་ཚེས་རྫོགས་ཕྱི་མ་འཇུག །གཟའ་གཅིག་ལན་གཉིས་བསྡབས་གྱུར་ན། །ཆུ་ཚོད་མང་བའི་ཚེས་དེ་ཆད། །མཆོངས་ན་ཆུ་ཚོད་ཉུང་བ་ལྷག །དོན་དུ་ཚེས་ལ་ཆད་ལྷག་མེད། །དེ་ལྟར་སྣང་བའི་རྒྱུ་མཚན་ནི། །ཉིན་ཚེས་བསྟུན་ནས་བརྩི་ཕྱིར་ཏེ། །ཉིན་ཞག་གཅིག་གིས་ཚེས་ཞག་ནི། །རིལ་པོ་གཅིག་དང་སྔ་ཕྱི་ཡི། །ངོ་མཐོང་རིལ་པོ་ཆད་ཅེས་བཏགས། །ཚེས་ཞག་གཅིག་གིས་ཉིན་ཞག་ནི། །གསུམ་མཐོང་དེ་ལས་རིལ་པོ་དང་། །འགྲོགས་པའི་ཚེས་དེ་ལྷག་པར་བཏགས། །དེས་ན་རྐང་པའི་འཕེལ་འགྲིབ་ལས། ། བྱུང་བའི་ཚེས་ལྷག་ཁ་འགྲིག་སྟེ། །དེ་ནས་ཆད་པ་མང་བ་ནི། །ཉིན་ཚེས་ཞག་མི་ཐུབ་ཀྱི་ཆ། །ཉི་མའི་ལོངས་སྤྱོད་རང་ཉིད་ཀྱིས། །སྐར་གནས་དེ་སྟེང་སླེབས་པ་ནས། །བརྩམས་ཏེ་རགས་པར་དེ་ཉིད་ཀྱི། །ཚེས་ལོངས་རྫོགས་པར་སྤྱོད་པའི་གྲངས། །དེ་ནས་ཟླ་བའི་སྐར་མའི་ཆེད། །ཉི་དག་གནས་གཉིས་གཅིག་ཤོས་ལ། །ཆུ་ཚོད་མཚོ་༥༤དབང་ཚེས་བསྒྱུར་དང་། ། མཁའ་༦༠རོར་ལོངས་ཕུད་སྐར་གནས་སུ། །བཀོད་པ་ཐུན་མིན་རྟག་ལོངས་བྱིན། །རང་འཁོར་སྒྲིལ་ལྷག་ཚེས་འཁྱུད་ཅེས། །རགས་པར་དེ་རིང་ཚེས་ཟད་པར། །སྤྱད་པའི་ཟླ་སྐར་རྣམ་དག་ཡིན། །དེ་ལ་གཟའ་ཡི་ལོངས་སྤྱོད་ཀྱིས། །སྦྱངས་ལྷག་རེས་འགྲོགས་ཟླ་སྐར་ཏེ། ། སྐར་མ་དེ་སྟེང་ཟླ་བ་ཡིས། །སྔ་མའི་ཞག་ལ་སྤྱད་ཟིན་འཆར། །དེ་ཡིས་མཁའ་རོར་༦༠ཕྲི་བའི་ལྷག །ནམ་ལངས་ནས་བརྩམས་དེ་ཡུན་སྡོད། །དེ་ཟད་ཕྱི་མའི་སྐར་སྟེང་སླེབ། །ཉི་དག་རེས་འགྲོགས་ཟླ་སྐར་དག །བསྲེས་ནས་སྟེང་སྒྲིལ་འཁོར་ལོས་དོར། །སྦྱོར་བའི་རི་མོ་རྣམ་པར་དག །སྦྱོར་བ་དུས་ཀྱི་ལྷ་ཡིན་པས། །ཚེས་རེར་དབང་བྱེད་ཚུལ་དུ་འཆར། །ལོངས་སྤྱོད་གང་ཤར་ད་ནང་གི །ནམ་ལངས་ཕན་ཆད་འདས་ཟིན་ཡིན། །ཚེས་གྲངས་མིག་༢བསྒྱུར་གཟུགས་༡ཀྱིས་ཕྲི། །༧ཐུབ་པས་དོར་ལྷག་ཕྱི་བྱེད་ཡིན། །སྔ་བྱེད་དེ་ཡི་ཤུགས་ལས་རྟོགས། ། དེ་ཡང་རྐང་པར་བཅས་པ་ཡི། །གང་བརྩིའི་ཚེས་ལོངས་དེ་དང་ནི། །ཕྱེད་མར་གཏུབས་པའི་ཆ་རེ་ནི། །བྱེད་པ་རེ་ཡི་ལོངས་སྤྱོད་དེ། །བརྟགས་ཐབས་ཚེས་ལོངས་སྔ་མ་ཡིས། །མཁའ་༦༠རོའི་སྟེང་ནས་ཕྲི་བའི་ལྷག །ཉིན་ཞག་སྔ་མར་འདས་ཟིན་ཡིན། །ལྷག་དང་ད་ལྟའི་ཚེས་ལོངས་གཉིས། །བསྲེས་ལ་༢མིག་གིས་བགོས་ཐོབ་ནོར། །དུས་དེའི་བྱེད་པའི་ལོངས་སྤྱོད་དེ། ། སྔ་མར་སྔ་མའི་ཚེས་ལོངས་དག །རྫོགས་པ་དེ་ཡི་ཡུན་དུ་སྤྱོད། །ཕྱི་ཆར་ཚད་དེ་རྫོགས་པ་ནས། །བྱེད་པ་འཆར་བར་ཤེས་པར་བྱ། །གསུམ་པ་བྱེད་པའི་ལོ་བདག་ནི། །རྣམ་གནོན་ལ་སོགས་འདས་པའི་ལོར། །བསེ་རུ་༡༣༡འདོད་པ་བྱིན་པ་དེ། །གནས་གཉིས་སྟེང་མ་མཁའ་༤༠༠མཁའ་ཆུས། །བསྒྱུར་ལ་འོག་མའི་ཚོགས་ཀྱིས་ཕྲི། །རི་༣༡༧ཟླ་མེས་ཐོབ་གཟའ་གནས་བཞག །ལྷག་མ་༦༠མཁའ་རོ་༦༠མཁའ་རོ་རོས། །རིམ་བསྒྱུར་ཐོབ་པའི་ནོར་བརྩེགས་འོག ། ལྷག་མ་བཞག་པ་ཆ་ཡི་གནས། །གཟའ་དབྱུག་གནས་སུ་གཉིས་སུམ་ཅུ།༢༣༠།བྱིན་ལ་འཁོར་སྒྲིལ་བྱེད་པ་ཡི། །ལོ་འཕོ་དཀྱུས་མ་རྣམ་པར་དག །ཡང་ན་རབ་ཚེས་རྣམ་གནོན་སོགས། །འདས་ལོ་གནས་ལྔར་བཞག་ནས་ཀྱང་། །གཟུགས་ཚེས་༡༥གཟུགས་༣༡མེ་རི་པོར་༡ཅན། །༡༢༡གཟུགས་ཉིས་བསྒྱུར་ལ་སྟེང་རིམ་བཞིན། །དུས་༦དང་མེ་མིག་༢༣དྲག་༢༡པོ་གཟུགས་༡།།༡བསེ་རུ་བྱིན་ལ་མས་ནས་ཡར། །རི་ཟླ་༣༢༧ཡོན་ཏན་༦དུས་མཁའ་༦༠རོ། །མཁའ་༦༠རོ་ཐུབ་༧པས་དོར་བའི་ལྷག །ལོ་འཕོ་འགྲུབ་པ་གོང་དང་འདྲ། །ལོ་འཕོ་དེ་སྟེང་གཟའ་གནས་མིག་༢༡༩།དབྱུག་གུར་བུག་གཟུགས་བསྣན་པ་ཡིས། །སྐྱོན་བྲལ་བྱེད་པ་ལོ་འཕོ་ཡིན། །ལོ་འཕོའི་ངེས་པ་སྔ་མའི་སྟེང་། །གཟུགས༡ཚེས་༡༥་གཟུགས་༣༡མེ་གཟུགས་༡༢༡ཟླ་ཉི། །བྱིན་ལ་རང་འཁོར་བསྒྲིལ་པ་ཡིས། །ཕྱི་མ་ཕྱི་མའི་ལོ་འཕོ་འཆར། ། བཞི་པ་ཟླ་བའི་འཕོ་བ་བཤད། །བྱེད་ལོའི་གཟའ་དབྱུག་གནས་གཉིས་པོ། །བཅུ་གཉིས་བཀོད་ལ་རིམ་པ་བཞིན། །ལུག་ལ་གཟའ་གཟུགས༡་རི་འབྱུང་༥༧དབྱུག །གླང་ལ་༤མཚོ་དང་མེ་དབང་༥༣པོ། །འཁྲིགས་པར་ཟླ་༡པ་རི་གཟུགས་༡༧ཏེ། །ཀརྚར་རྒྱ་མཚོ༤ཡོན་ཏན་༥༣མདའ། །སེང་གེར་བསེ་རུ་༡དང་ལག་༢༢མིག །བུ་མོར་༤རྒྱ་མཚོ་རྒྱལ་༢༤བའོ། །སྲང་དུ་རོ་༦དང་གཟུགས་༥༡འབྱུང་བ། །སྡིག་པར་ཟླ་བ་༡དང་རི་༤༠མཚོ། །གཞུར་ནི་མེ་༣དང་དུས་༡༦གཟུགས་སོ། །ཆུ་སྲིན་རྒྱ་མཚོ་༣༧༤རི་བོ་མེ། །བུམ་པ་དུས་༦དང་ཆུ་༤གཏེར་ཏེ། ། ཉ་ལ་ཐིག་ལེ་༠མིག་འབྱུང་༥༢རྣམས། །བྱིན་ལ་མཁའ་༦༠རོ་རིས་དོར་ལྷག །ཁྱིམ་རྣམས་སོ་སོར་སླེབས་མཚམས་གཟའ། །རགས་པ་རྟོགས་པའི་མན་ངག་ཡིན། ། ༈ ལྔ་པ་སྒྲ་གཅན་ངེས་པ་ནི། །རྣམ་གནོན་ལ་སོགས་འདས་པའི་ལོར། །བསྒྲུབས་པའི་བྱེད་གྲུབ་གང་འདོད་ཀྱི། །ཟླ་དག་༦དུས་༦མཚམས་ཀྱིས་བརྒྱན་པ། ཕྱོགས་ཞག་ཟླ་བའི་ངེས་པ་གསུམ། །གང་འདོད་གཞིར་བཀོད་དང་པོའི་ཆེད། །མིག་༢་བསྒྱུར་ཉར་གཟུགས༡་སྟོང་༢མིག་བྱིན། །མཁའ་༤༦༠དུས་ཆུ་བོས་ཐོབ་པ་དོར། །ལྷག་མ་སྐར་༢༤མ་༦༠མཁའ་རོ་དང་། །༦༠མཁའ་རོ་དུས་༦དང་མེ་༢༣མིག་གིས། །བསྒྱུར་ལ་༤མཁའ་༦༠དུས་ཆུ་བོ་ཡིས། ། རིམ་ཐོབ་སྒྲ་གཅན་རྩ་བ་སྟེ། །དེ་ཡིས་འཁོར་ལོ་སྦྱང་ལྷག་གདོང་། །གདོང་ལ་འཁོར་ཕྱེད་༡༣༣༠བསྲེས་པ་མཇུག །ཟླ་བ་ཕྱེད་པའི་སྒྲ་གཅན་ནོ། ། ༈ གཉིས་པ་ཚོགས་དེ་༣༠མཁའ་མེས་བསྒྱུར། །ཚེས་བསྲེས་མཁའ་མཁའ་༦༩༠༠བུག་རོས་དོར། །ལྷག་མ་སྐར་མས་བསྒྱུར་བ་སོགས། །རྩ་གདོང་མཇུག་གི་ཆོ་ག་རྣམས། །སྔར་བཞིན་བྱས་པས་སྒྲ་གཅན་ནི། །ཚེས་གྲངས་གང་ལ་འཕོས་པ་རྟོགས། ། ༈ གསུམ་པ་མཁའ་མེ་༢༣༠ལག་དོར་ལྷག །སྐར་མས་བསྒྱུར་སོགས་སྔར་ཇི་བཞིན། ། བྱས་པས་ཟླ་རེའི་སྒྲ་གཅན་རྟོགས། །དེ་དག་རྣམས་ཀྱི་དབུགས་ལྷག་ནི། །མཁའ་༢༠་མིག་དགོས་ཐོབ་ཆར་བཞག་པས། །རི་མོའི་མདོ་དོན་འདྲ་བ་ཡིན། །གཞན་ཡང་སྒྲུབ་ཚུལ་མི་འདྲའི་ཁྱད། །ཟླ་དག་རྩིས་འཕྲོས་བརྒྱན་པ་དེ། །ཕྱོགས་ཞག་ཟླ་བ་གང་འདོད་ཀྱི། །དཀྱིལ་འཁོར་སོ་སོས་དོར་བའི་བར། །གོང་བཞིན་བྱས་པའི་ལྷག་མ་དེ། །གཟུགས་༨༡ཀླུས་བསྒྱུར་ལ་མེ་མིག་༢༣གིས། །ཐོབ་ནོར་མཁའ་༦༠རོས་བགོས་ཐོབ་པ། །སྐར་མའོ་ལྷག་མ་ཆུ་ཚོད་དེ། ། འོག་གི་ལྷག་མ་༦༠མཁའ་རོས་བསྒྱུར། །མེ་མིག་བགོས་ཐོབ་ཆུ་སྲང་སྟེ། །༧རོས་བསྒྱུར་ཐོབ་པ་དབུགས་ཀྱི་ཆ། །ལྷག་མ་རང་ཆར་བཞག་པ་ནི། །རྩ་བ་ཡིན་ཏེ་གདོང་མཇུག་གཉིས། ། གོང་ལྟར་བྱས་པས་འགྲུབ་པ་ཡིན། ། ༈ དེ་ལྟར་ཕྱོགས་ཞག་ཟླ་བ་ཡི། །ངེས་པ་དེ་སྟེང་རང་རང་གི །རྟག་ལོངས་རྩ་བ་ལ་བསྣན་ཞིང་། །གདོང་མཇུགཿགཉིས་ལ་ཕྲི་བ་ཡིས། །ཕྱི་མ་ཕྱི་མའི་ངེས་པ་འཆར། །དེ་ལ་རང་རང་རྟག་ལོངས་ནི། །མེ་དབྱུགས་གཟུགས་མེའི་སྲང་དབུགས་གཟུགས། །བུག་གཟུགས་ཆ་སྟེ་ཕྱོགས་ལོངས་ཡིན།༠༣༣༡༡༡༩།ཆུ་སྲང་མ་ནུ་ཆ་ཤས་ཉི་༠༠༤༡༡༥།སྒྲ་གཅན་ཞག་གི་རྟག་ལོངས་ཡིན། །དབྱུག་རི་སྲང་མིག་དབུགས་ཡོན་ཏན།༠༧༢༣༡༥།ཆ་ཤས་ཚེས་རྣམས་ཟླ་ལོངས་སོ། ། ༈ དྲུག་པ་ལེགས་ལྡན་གཟའ་ལྔ་བོ། །ཉིན་ཞག་དག་ལ་སྤྱོད་ཚུལ་འཆད། །གྲུབ་མཐའི་ཟླ་དག་མཁའ་༣༠མེ་ཡིས། །བསྒྱུར་ལ་གང་བརྩིའི་ཚེས་གྲང་བསྲེ། །གནས་གསུམ་བར་འོག་བུག་༡༩གཟུགས་དང་། །མེ་མིག་༤༢༣ཆུ་གཏེར་གྱིས་བརྒྱན་ལ། །འོག་མར་རི་མཁའ་༧༠༧རིས་ཐོབ་ནོར། །བར་བྱིན་དེ་ལ་ཆུ་རོ་༦༤ཡིས། །ཐོབ་པའི་ནོར་གྱིས་སྟེང་མ་ ལ། །སྦྱངས་ལྷག་སྤྱིར་བཏང་མི་གསལ་ཞག །གསལ་བའི་དོན་དུ་གནས་གཉིས་བཀོད། ། གཅིག་ལ་༦དུས་བྱིན་རིས་༧དོར་ལྷག །རེས་ཀྱི་གཟའ་དང་མཐུན་ནམ་བརྟག །མཐུན་ན་དག་མོ་མ་མཐུན་ཚེ། །ཉུང་ན་གཅིག་བྱིན་མང་ན་ཕྲི། །དེ་ལྟར་མཐུན་བྱས་གསལ་ཞག་ཡིན། །སྒོས་ཞག་དོན་དུ་སྤྱི་ཞག་དེ། །ཚར་དྲུག་བཀོད་ལ་རིམ་པ་བཞིན། །བཀྲ་ཤིས་དོན་དུ་འབྱུང་རི་༡༧༥གཟུགས། །ཕུར་བུར་འབྱུང་མེ་༤༡༣༥གཟུགས་མཚོ་དང་། །སྤེན་པ་གཟུགས་༡༠༦༦༠དུས་མཚམས་ཕྱོགས་བསྣན། །ལྷག་པའི་ཆེད་དུ་བརྒྱས་༡༠༠བསྒྱུར་ལ། །ཆུ་དབང༤༣༥༤མེ་མཚོ་པ་སངས་ལ། །༡༠བཅུས་བསྒྱུར་མཁའ་དབང་རི་༡༧༥༠ཟླས་བརྒྱན། །ཉི་མར་༡༨༣༨༢མིག་ཀླུ་མེ་སྐྱོན་གྱིས། །བསྒྱུར་ལ་ཆུ་གཏེར་༦༤༥༢༧༩༤རྩ་འཁོར་ལོ། །འབྱུང་བ་མཚོ་དུས་བརྒྱན་པར་བྱ། །དེ་ལ་རང་རང་དཀྱིལ་འཁོར་གྱིས། །དོར་བར་བྱའོ་དཀྱིལ་འཁོར་ནི། བཀྲ་ཤིས་ལ་ནི་རི་༦༨༧ཀླུ་རོ། །༤༣༣༢ཕུར་བུའི་སོ་མེ་རྒྱ་མཚོ་སྟེ། །སྤེན་པའི་༡༠༧༦༦དུས་མཚམས་རི་ཕྱོགས་སོ། །ལྷག་པའི་རི་བུག་རི་༨༧༩༧ཀླུ་དང་། །དཀར་པོར་རི་༢༢༤༧རྒྱལ་མིག་ཉི་མར། །༦༧༡༤༤༠༥མདའ་མཁའ་མཚོ་ཡིད་རི་མཚམས་ཀྱིས། །དོར་ལྷག་སོ་སོའི་སྒོས་ཞག་གོ །རང་རང་སྒོས་ཀྱི་ཉིན་ཞག་དེ། །༢༧སྐར་མ་མཁའ་༦༠རོ་མཁའ་༦༠རོ་༦དུས། ། རང་ཆ་སོ་སོས་བསྒྱུར་བ་ལ། །རིམ་བཞིན་རང་རང་དཀྱིལ་འཁོར་གྱིས། །རྙེད་ནོར་བརྩེགས་པ་ཚར་དྲུག་ལས། །དང་པོ་ལྔ་པོ་གོ་རིམ་བཞིན། །དྲག་གསུམ་དལ་བར་ཞི་གཉིས་ཀྱི། ། རྐང་འཛིན་བར་པ་སོ་སོ་སྟེ། །དྲུག་པ་དྲུག་གསུམ་རྐང་འཛིན་དང་། །ཞི་གཉིས་དལ་བར་ཐུན་མོང་འགྱུར། །དེ་ལ་རང་རང་ཆ་ཤས་ནི། །དམར་པོའི་སུམ་ཆ་བུག་མིག་༢༢༩ལག །ལྷ་ཡི་བླ་མའི་བཅུ་གཉིས་ཆ། །གཟུགས་༣༦༡དུས་མེའོ་སྤེན་པ་ཡིས། །གཉིས་༤༣༨༠ཆ་མེ་ཀླུ་མེ་འབྱུང་སྟེ། །ལྷག་པའི་རི་བུག་རི་ཀླུ་༨༧༩༧དང་། །དཀར་པོའི་སུམ་ཆ་བུག་མཚོ་༧༤༩ཐུབ། །ཉི་མའི་འབྱུང་བ་ཆུ་གཏེར་ཆ། །བུག་༡༤༩༢༠༩མཁའ་མིག་བུག་ཡིད་ཡིན་ནོ། ། ༈ དེ་ནས་དལ་དག་བསྒྲུབ་པའི་ཆེད། །དྲག་གསུམ་རང་རང་དལ་བར་དང་། །ཞི་གཉིས་ཉིན་ཞག་ཉི་བར་དག །གནས་གཉིས་བཀོད་པའི་ཕྱོགས་གཅིག་ལ། །རང་རང་སྐྱེས་ཁྱིམ་སྦྱང་བར་བྱ། །བཀྲ་ཤིས་སྐར་༩བུག་༣༠མཁའ་མེའི་དབྱུག །མི་བདག་༡༦ཕྱེད་༣༢བཅས་ཟླ་བའི་བུ། །བླ་མར་རྒྱུ་༢༧སྐར་ཉི་མ་༡༢སྟེ། །པ་ཝ་སངས་ལ་སྐར་མ་དྲུག༦།སྤེན་པར་སྐར་མ་བཅོ་བརྒྱད༡༨དོར། །མ་ལྡངས་འཁོར་ལོ་༢༧བསྣན་ལ་སྦྱང་། །སྦྱང་ཤུལ་༡༣༣༠འཁོར་ཕྱེད་ལྷག་ན་དོར། །ལྷག་མའི་སྐར་མ་མཁའ་༦༠རོས་བསྒྱུར། །ཆུ་ཚོད་བཅུག་ལ་མདའ་༡༣༥ཡོན་ཟླས། །བགོས་ཐོབ་ནོར་གྱིས་དལ་རྐང་འཛིན། ། ༈ གཟུངས་བྱའི་ཐ་དད་རྐང་པ་ནི། །ལུས་དམར་དེ་ཉིད༢༥ཉེས༡༨པ་རི༧།།ཟླ་སྐྱེས་༡༠ཕྱོགས་རི་༧རྩེ་༣མོ་ཅན། །སྒྲ་མཁན་བདེ་༡༡བྱེད་སྲིན་༩པོ་མེ༣། །དཀར་པོའི་མདའ་༥ཆུ་༤རི་བོང་ཅན། །དལ་འགྲོས་ལག་༢༢མིག་ཚེས་༡༥མཚམས་༦ཏེ། །སྔ་རྐང་དེ་ཡིན་ཕྱི་རྐང་ལྡོག །སྔ་ཕྱི་ཟོས་དང་མ་ཟོས་སྡོམ། །རྐང་བཟུང་མདུན་མས་ལྷག་རྣམས་བསྒྱུར། །མ་ཟིན་རྐང་པ་དང་པོས་བསྒྱུར། །མདའ་༡༣༥ཡོན་ཟླས་ཐོབ་ཡང་དག་རྒྱུའི། །ཆུ་ཚོད་ཡིན་དེ་ལྷག་མཁའ་༦༠རོ། །དུས་༦དང་རང་ཆ་སོ་སོ་ཡིས། །བསྒྱུར་བཅུག་ཐོབ་པ་སྲང་དབུགས་ཆ། །སྔ་རྐང་ཆུ་ཚོད་གཉིས་བསྲེ་ཞིང་། །ཕྱི་རྐང་ཕབ་ལ་རྒྱུ་བས་སྦྱང་། །དེ་དག་དལ་བ་ཅིག་ཤོས་ལ། ། འཁོར་ཕྱེད་དོར་བསྣན་མ་དོར་ཕྲི། །དེ་ཡི་དལ་བ་དག་པར་འགྱུར། ། ༈ མྱུར་བའི་ལས་ཀྱི་ཆོ་ག་ནི། །རང་རང་དལ་དག་གནས་གཉིས་བཀོད། །དྲག་གཟའི་དལ་དག་གནས་གཅིག་གིས། །ཉི་མ་བར་མ་ལ་སྦྱང་ཞིང་། །ཞི་གཟའ་གཉིས་ཀྱི་དལ་དག་གིས། །རང་རང་རྐང་འཛིན་ལོངས་སྤྱོད་སྦྱང་། །མ་ལྡང་༢༧འཁོར་ལོ་བསྣན་ལ་སྦྱང་། ། སྦྱང་ཤུལ་འཁོར་༡༢༣༠ཕྱེད་ལྷག་ན་དོར། །ལྷག་མའི་སྐར་མས་མྱུར་རྐང་འཛིན། །མ་དོར་རིམ་པ་ལུགས་འབྱུང་དང་། །དོར་ན་རིམ་མིན་ལུགས་ལྡོག་ཏུ། །བཟུང་ལ་འཛིན་བྱེད་སྐར་མ་དབྱི། །རིམ་མིན་རྐང་འཛིན་དག་པ་ལ། །སྐར་གནས་སྟོང་ཤིང་ཆུ་ཚོད་དུ། །མཁའ་༣༠མེར་ལོངས་པ་ནས་བཟུང་སྟེ། །རིམ་མིན་ཇི་སྲིད་མ་རྫོགས་པར། །རྐང་འཛིན་དབྱུག་གུར་སླ་ཐབས་སུ། །མཁའ་༣༠མེ་བསྣན་ནས་འཛིན་པ་གཅེས། ། ༈ བཟུང་བྱའི་ཐ་དད་རྐང་པ་ནི། །བཀྲ་ཤིས་རྒྱལ་༧༤བ་༢༣མེ་མིག་གསུམ། ། གཟུགས་༢༡མིག་རྣམ་གཉིས་སྐྱོན་༡༥ཚེས་༡༨དྲག༡༡།།མེའོ༣རྩ་བར་དབང་ཕྱུག་༡༡དང་། ། ༣༨ཀླུ་མེ་མཁའ་༨༠ནོར་མེ་དབང་༥༣པོ། །ཟླ་སྐྱེས་མི་༡༦བདག་༡༦རྒྱལ་པོ་༠༥ཚེས། །ཡིད་༡༤འདོད་༡༣དྲག་༡༡པོ་རི་༥འབྱུང་༠མཁའ། །རྩ་བར་རྒྱ་༤མཚོ་དབང་ཕྱུག་༡༡དང་། ། མཁའ་༢༠མིག་ནོར་༢༨ལག་༣༠ཆུ་མེའོ། །སྒྲ་མཁན་ཕྱོགས་༡༠ཕྱོགས་༡༠བུ་ག་༩ཀླུ༨།།དུས་༦རོ་༦མིག་༢གཟུགས་༡རྩ་བར་༣མེ། །བྲོ་བ་༦བུ་༡ག་དྲག་༡༡པོ་དང་། །ཆ་༡༦ཤས་ཅན་དང་༧ཐུབ་པའོ། །སྙན་ངག་མཁན་གྱི་དེ་ཉིད་༢༥གསུམ། །༢༤རྒྱལ་བ་གཉིས་དང་༢༢ལག་མིག་གཉིས། །༡༨སྐྱོན་ཚེས་༡༥ཀླུ་༨དང་རྩ་བར་༦རོ། །༣༠མཁའ་མེ་༡སྲིན་༡བུག་༧༣མེ་རིའོ། ། དལ་འགྲོའི་༦དུས་འབྱུང་༥དབང་༥པོ་ཆུ༤། །རིག་༤བྱེད་༢ལག་པ་མིག་དང་༢མཁའ༠།།རྩ་བར་མཚེ་༢མ་སྡེ་བ་༤དབང་༥། །༦དུས་དང་གདེངས་༨ཅན་༣ཡོན་ཏན་ནོ། །སྔ་ཕྱི་ཟོས་དང་མ་ཟོས་སྡོམ། །རྐང་བཟུང་མདུན་མས་ལྷག་རྣམས་བསྒྱུར། །མ་ཟིན་རྐང་པ་དང་པོས་བསྒྱུར། ། རང་འཁོར་སྒྲིལ་ལ་༦༠མཁའ་རོ་ཡིས། །ཐོབ་པ་ཡང་དག་རྒྱུའི་དུས་ཚོད། །ལྷག་མ་སྲང་དབུགས་ཆའི་དོན་དུ། །མཁའ་༦༠རོ་དུས་༦དང་ཤེད་སྙོམས་ཆས། །བསྒྱུར་བཅུག་༦༠མཁའ་༦རོས་རིམ་ཐོབ་བརྩེགས། །རིམ་པའི་ཕྱི་རྐང་ཐ་མ་དང་། །རིམ་མིན་སྔ་རྐང་དང་པོ་ལ། ། རྐང་སྔོན་ཕོག་ཚེ་མཁའ་༣༠མེས་བགོ །ཁྱད་པར་ལྷག་སྤེན་རྐང་སྔོན་དེ། །ཐིག་ལ་བབ་ཚེ་བསྒྱུར་བྱའི་ལྷག །ཕྱིས་པས་རྒྱུ་བའི་རྐང་ལོངས་མེད། །སྔ་རྐང་ཆུ་ཚོད་གཉིས་བོ་བསྲེ། །ཕྱི་རྐང་ཕབ་ལ་རྒྱུ་བས་སྦྱང་། །ལོངས་ན་སྐར་གནས་ཕུད་པ་རྣམས། །རང་རང་དལ་དག་ཅིག་ཤོས་ལ། །འཁོར་ཕྱེད་དོར་ཕྲི་མ་དོར་བྱིན། །དབྲི་བྱ་ཉུང་ན་༧༧འཁོར་བསྣན་སྦྱངས། །ཡང་ན་ལྡོག་སྟེ་སྦྱང་བ་ཡིས། །ལུགས་འབྱུང་ལུགས་ལྡོག་རི་མོ་འཆར། ། ༈ རིམ་པའི་སྔ་རྐང་མྱུར་འགྲོས་ཤར། །རིམ་པའི་ཕྱི་རྐང་དལ་འགྲོས་ལྷོ། །རིམ་མིན་སྔ་རྐང་འཁྱོག་འགྲོས་ནུབ། །རིམ་མིན་ཕྱི་རྐང་འབྱུང་འགྲོས་བྱང་། །དེ་ལྟར་འགྲོས་བཞི་ལྡན་པ་སྟེ། །གཟའ་ལྔ་མཚུངས་པར་ཉི་མ་ལ། །ནུབ་རྗེས་རང་རང་དལ་བ་ལས། །མྱུར་བའི་འགྲོས་བཞི་བརྩམས་པའི་མཐར། །དལ་དག་ལ་གནས་ཉི་མར་ནུབ། །སླར་ཡང་རིམ་པ་གཞན་མེད་པས། །སྔར་ལྟར་འགྲོས་བཞི་རྩོམས་པ་ཡིན། ། ༈ གཞན་ཡང་རི་མོའི་རྣམ་གྲངས་ལ། །གཟའ་ལྔའི་རང་རང་སྒོས་ཞག་རྣམས། ། གནས་ལྔར་བཀོད་དེ་དྲག་གསུམ་ལ། །སོ་སོའི་ཉིན་ཞག་རྟག་ལོངས་དང་། །ཞི་གཉིས་བརྒྱ་ཆ་བཅུ་ཆ་ཡི། །ཉིན་ལོངས་ཀྱིས་བསྒྱུར་རང་འཁོར་སྒྲིལ། །དྲག་གསུམ་དལ་བར་ཞི་གཉིས་ཀྱི། །མྱུར་བར་འགྲུབ་བོ་ཐུན་མོང་ཆེད། ། ༈ སྤྱི་ཞག་འཕྲོ་ཡི་རེ་བཞི་ཆ། །རི་༧༠༧མཁའ་རིས་བསྒྱུར་རང་ཆ་གཞུག །དེ་ཡང་མདའ་༥༢༦༥དུས་མིག་དབང་བསྒྱུར། །བུག་༡༤༩༢༠༩མཁའ་མིག་བུག་ཡིད་ཀྱིས་བགོ །ཐོབ་པ་དབུགས་ཡིན་ལྷག་མ་ཆ། །དེ་ཉིད་ཚེས་ཞག་ཉི་བར་གྱི། །ཆ་ཤས་འཁོར་ལོ་༢༢༢༧ལག་མིག་གིས། །བསྒྱུར་བ་བུག་སོགས་ཆ་ལ་བསྲེ། །དེ་ལ་བུག་སོགས་རང་འཁོར་གྱིས། །བསྒྲིལ་བས་ཉིན་ཞག་ཉི་བར་འགྲུབ། ། ༈ བདུན་པ་ཁྱིམ་ཚེས་ལ་སྤྱོད་པའི། །གཟའ་ལྔའི་དལ་མྱུར་རྣམ་དག་ཏུ། །སྒྱུར་བྱེད་སོ་སོའི་རྐང་ཆོག་རྣམས། །ཉིན་ཞག་དང་མཚུངས་དེས་མཚོན་པའི། །འདི་ནི་སྒོ་ཆོས་ཁྱིམ་ཚེས་ཀྱི། །དལ་མྱུར་བར་པ་སྒྲུབ་ཚུལ་བཤད། །ཐོག་མར་ཁྱིམ་ཞག་གཟའ་ལྔའི་ཆེད། །རབ་ཚེས་༡༥རྣམ་གནོན་ལ་སོགས་པ། །ལོ་དག་གནས་དྲུག་ཚར་ལྔ་བཀོད། །དེ་ཉིད་གཟའ་ལྔ་སོ་སོ་ཡི། །ལོ་ཡི་ངེས་པས་བསྒྱུར་བར་བྱ། །དེ་ལ་ལོ་ཡི་ངེས་པ་ནི། །དམར་པོའི་ཡིད་༡༤དང་༢༡གཟུགས་ལག་པ། །༢༠མཁའ་མིག་༡ཟླ་བ་ཆུ་རོ་༦༤དང་། །རི་བོ་༣༩༡༧གཟུགས་བུག་ཡོན་ཏན་ནོ། །ལྷག་པའི་༤ཆུ་བོ་༦དུས་༣༥འབྱུང་མེ། །མེ་༣དང་རོ་ཆུ་ཡོན་ཏན་༦༣༤༦དུས། ། ༧༨༤༣རྩེ་མོ་མཚོ་ཀླུ་ཐུབ་པའོ། །བླ་མ་མིག་༢དང་མི་༡༦བདག་དང་། །འབྱུང་༣༥མེ་རིག་༤བྱེད་ནོར་རི་༦༧༨མཚམས། །རྒྱ་མཚོ་དབང་༦༥༥༤འབྱུང་བྲོ་བའོ། །དཀར་པོའི་༡༦རྒྱལ་པོ་མེ་༥༣ཕུང་པོ། །འཁོར་༢༧ལོ་ཡོན་ཏན་༣བུག་༤༢༧མིག་མཚོ། །དུས་༢༤༠༦མཁའ་རིག་བྱེད་ལག་པའོ། །དལ་འགྲོའི་༠ནམ་མཁའ་ཆུ་ཕུང་༥༤པོ། །ཐུབ་པ་༥༧མདའ་དང་ཆུ་༤གཏེར་དང་། །ལག་༤༨༨༢པ་གདེངས་ཅན་ཀླུ་རྒྱ་མཚོ། །ནམ་མཁའ་༡༢༨༠ནོར་ལྷ་ཉི་མའོ། །དེ་རྣམས་ཀྱིས་བསྒྱུར་རྩིས་འཕྲོ་ནི། །བཀྲ་ཤིས་༧ཐུབ་པ་དང་དུས་མིག༢༦། །༡༡འདོད་པ་ཟུང་༢དང་༡༢༣མེ་ཉི་མ། །རི་མཚོ་ཐུབ་༥༧༤༧དབང་བྱིན་པར་བྱ། །ལྷག་པར་རི་༡༧ཟླ་དང་མེ་༤༣མཚོ། །༢༣མེ་མིག་ལག་༢དང་ཆ་གོང་མར། །རི་ཀླུ་གདེང་༦༨༨༧ཅན་བྲོ་བ་དང་། །འོག་མར་མེ་ཀླུ་མེ་༥༣༨༣དབང་བསྲེ། །སྒྲ་མཁན་དེ་༢༥ཉིད་གཟུགས་༥༡དབང་པོ། །༣༩བུག་མེ་༠མཁའ་དང་མེ་རི༤༧༣མཚོ། །བུ་ག་༧༤༦༩དུས་མཚོ་དྲང་སྲོང་བསྲེ། །དཀར་པོར་༣༢ལག་མིག་ཆུ་༤༤མཚོ་དང་། །རི་༡༧གཟུགས་ཟླ་༡༧༢༩བ་རྩ་བགྲོད་ཐུབ། །རྒྱལ་བ༢༣༢༤འཇིག་རྟེན་གཤིན་རྗེ་བསྲེ། །སྤེན་པར་༢༦དུས་མིག་དང་༤༦དུས་མཚོ། །༢༠ནམ་མཁའ་མིག་དང་ཡོན་ཏན་༣དང་། །བྲོ་བ་རྩེ་མོ་༡༣༦ལག་པ་དང་། །དེ་ཉིད་མཁའ་མཚོའི་༤༠༢༥བརྒྱན་པ་ལ། ། སོ་སོའི་འཁོར་ལོས་སྟེང་དུ་སྒྲིལ། །དེ་ཡང་ཕུར་བའི་ཆ་གོང་མ། །ལག་མིག་༧༢༢ཐུབ་པའོ་གཟའ་གཞན་རྣམས། །ཉིན་ཞག་དང་འདྲ་ཐམས་ཅད་ཀྱི། །འོག་མ་གཟུགས་༩༡༩༡བུག་གཟུགས་བུག་ཡིན། །དེ་ཡི་ལུག་གི་ཁྱིམ་ཟླ་ཡི། །དྲག་གསུམ་དལ་དྷྲུ་ཞི་གཉིས་ཀྱི། །རྐང་འཛིན་དྷྲུ་བ་རྣམ་པར་དག །སྔ་དྷྲུ་ཟླ་གཅིག་ངེས་པ་རྣམས། །རིམ་བརྩེགས་ཉ་ཁྱིམ་བར་དུ་སྤེལ། ། ༈ དེ་ལ་ཟླ་གཅིག་ངེས་པ་ནི། །བཀྲ་ཤིས་༡གཟུགས་༡༡དྲག་དུས་༤༦མཚོ་༤ཆུ། ། ༢༤རྒྱལ་བ་དུས་ཚེས་༤༡༥༦རྒྱ་མཚོའོ། །ལྷག་པའི་བུ་ག་༩༣༢མཁའ་མིག་སོ། །༥ཕུང་པོ་དུས་༧༡༢༦ཉི་རི་བོ་དང་། །དབང་པོ་གཟུགས་༦༠༡༥མཁའ་བྲོ་བའོ། །ཕུར་བའི་མཁའ་༠དྲག་༡༡ལག་༢༢མིག་༥དབང་། །གདེངས་༦༥༨ཅན་ཕུང་པོ་བྲོ་བ་དང་། །ནོར་ལྷ་དྲང་སྲོང་༢༠༧༨མཁའ་མིག་གོ །དཀར་པོའི་མེ་༣དང་བུག་༣༩ཡོན་ཏན། །༢༧སྐར་མ་བསེ་༡རུ་རི་བུག་༥༩༧དབང་། །བྲོ་བ་༤༧༩༦བུ་ག་རི་མཚོའོ། །ཉི་བུའི་༠མཁའ་ཆུ་༤རིག་བྱེད༣༤མེ། ། སྡེ་པ་༤མིག་༤༨༩༢བུག་དབྱིག་ཆུ་བོ། །མཚོ་མེ་ལག་༦༢༣༤པ་དུས་རྣམས་སོ། །ཡང་ན་འདས་ལོ་ཉི་མས༡༢བསྒྱུར། །འདས་པའི་ཁྱིམ་ཟླ་བསྲེས་པའི་ཚོགས། །རང་རང་ཟླ་གཅིག་ངེས་པས་བསྒྱུར། །རྩིས་འཕྲོ་བསྲེས་ལ་རང་འཁོར་སྒྲིལ། །སོ་སོའི་ཁྱིམ་ཟླའི་དྷྲུ་བ་འཆར། ། ༈ དེ་ནས་ཞི་དྲག་དལ་མྱུར་དྷྲུ། །ཐུན་མོང་ཁྱིམ་ཞག་ཉི་དྷྲུ་ནི། །ཁྱིམ་ཟླ་སྔ་མའི་རྫོགས་ཚད་གང་། །ཕྱི་མ་ཕྱི་མའི་ཉི་དྷྲུ་སྟེ། །དེ་ཡང་འཁོར་ལོ་རྫོགས་པ་ནི། །ལུག་གི་ཁྱིམ་ཟླའི་དྷྲུ་བ་ཡིན། །དེ་སྟེང་སྐར་མིག་༢དབྱུག་༠༥གུར་ཚེས། །རིམ་བརྩེགས་བྱིན་ལ་ཉའི་བར་སྤེལ། །དེ་ནས་ཁྱིམ་གྱི་ཟླ་ཞག་དག །གར་ཡོད་བརྟག་ཕྱིར་འདས་ཟླ་ནས། །གཅིག་ཕབ་འོག་ཏུ་རི་༦༧རོ་ཆར། །བྱས་ལ་རང་རང་ཟླ་བཤོལ་འཕྲོས། །སྦྱངས་ལྷག་༣༠མཁའ་མེས་བསྒྱུར་བ་ལ། །གང་བརྩིའི་ཚེས་གྲངས་མདའ་༦༥རོ་ཡིས། །བསྒྱུར་བ་བསྲེས་ལ་༦༧རི་རོས་བགོ །རྙེད་པ་ཞག་ཡིན་ལྷག་མ་དེ། །མཁའ་༦༠རོ་མཁའ་༦༠རོ་དུས་༦རི་༦༧རོས། །རིམ་བསྒྱུར་༦༧རི་རོས་ཐོབ་པ་བརྩེགས། །ཞག་ལ་མཁའ་༣༠མེས་ཐོབ་པའི་ནོར། །སྟེང་བསྲེས་དེ་ཡང་ཉི་༡༢མས་དོར། །རིམ་བཞིན་སྟེང་ནས་འདས་ཁྱིམ་དང་། །འདས་ཞག་དབྱུག་སྲང་དབུགས་ཆ་སྟོན། །དེ་ཚེ་ཚོད་ཟིན་བར་པའི་ཆེད། །གཟའ་ལྔ་ཉི་མར་བཅས་པ་ཡི། །རང་ཁྱིམ་ཟླ་བའི་དྷྲུ་བ་ལ། །བརྩི་བྱའི་ངོ་ཐོག་ཞག་གྲངས་ཀྱི། །རང་རང་རྟག་ལོངས་བསྒྱུར་ལ་བྱིན། ། གཟའ་ལྔའི་དལ་མྱུར་བར་པ་འགྲུབ། །དེ་ལ་རང་རང་རྟག་ལོངས་ནི། །བཀྲ་ཤིས་༠མཁའ་༢ཟུང་མེ༢༣མིག་རྩེ༣། །༧༧ཐུབ་རི་༡༣ཆུ་རོ་༦༤འདོད་པའོ། །ལྷག་པའི་༠མཁའ་༡༨སྐྱོན་གཟུགས་༤༡མཚོ་༠མཁའ། །ལག་མིག་བགྲོད་པ་༥༢༢༢དབང་པོ་དང་། །དུས་༤༧༩༦བུག་དྲང་སྲོང་ཆུ་གཏེར་རོ། །སྒྲ་མཁན་མཁའ༠མཁའ་༠ལག་༢༢མིག་༤མཚོ། །གཟུགས་མེ་༤༣༡ཆུ་དང་མིག་ཀླུ་༦༨༢དུས། །དཀར་པོར་མཁའ་༠རི་༧སྐྱོན་༡༨དབང་༥པོ། །རིག་བྱེད་སྡེ་བ་༣༤༤ཡོན་ཏན་དང་། །༤༤༤༩བུག་མཚོ་ཆུ་བོ་རྒྱ་མཚོའོ། །དལ་འགྲོར་མཁའ་༠མཁའ༠བུ་ག་༩མཁའ༠།།ཐུབ་པ་གདེངས་༥༡༨༧ཅན་གཟུགས་དབང་པོ། །དུས་མཚོན་ནམ་མཁའ་༢༠༤༦ལག་པའོ། །ཉི་མར་༠མཁའ་མཚོ་༤མཁའ་༣༠མེའོ། ། ༈ དེ་ནས་ཚེས་ཞག་གཟའ་ལྔའི་ཆེད། །སྔར་གྱི་གྲུབ་མཐའི་ཟླ་དག་དེ། །གནས་དྲུག་ཚར་ལྔ་བཀོད་པ་ལས། །དམར་པོར་༡གཟུགས་༩བུག་༣༨ཀླུ་མེ་མཁའ༠།།ཆུ་རི་༡༧༤ གཟུགས་དང་༧༨ཀླུ་རིས་བསྒྱུར། །༦བྲོ་བ་༥༡གཟུགས་འབྱུང་དུས་༥༦དབང་པོ། །མིག་༢དང་ནོར་ལྷ་བགྲོད་པ་ལག༢༢༨།ནམ་མཁའ་༡༡༠དྲག་པོས་བརྒྱན་པར་བྱ། །ལྷག་པར་༩བུག་༣ མེ་༤༨ཀླུ་མཚོ་༥དབང་། །མིག་འབྱུང་༨༧༥༢རི་ཀླུ་བུག་༦༩རོས་བསྒྱུར། །༡༣མྱོས་བྱེད་རྒྱལ་༡༦པོ་སྲིན༩པོ་དང་། །༥འབྱུང་བ་མེ་མཁའ་༦༥༠༣དབང་པོ་དུས། །ནོར་ལྷ་༤༧༨ཐུབ་པ་རིག་བྱེད་བྱིན། །སྒྲ་མཁན་མཁའ་༠དྲུག༡༡མིག་༢དང་༣མེ། །མེ་མིག་༤༢༣མཚོ་དང་བུག་མེས་༣༩བསྒྱུར། །༣༥དེ་ཉིད་༤༦དུས་མཚོ་ཉི་མ་༡༢དང་། །དབང་༥པོ་བསེ་རུ་༣༢༡གཉིས་སྐྱེས་དང་། །འབྱུང་བ་༥༥དབང་པོས་བརྒྱན་པར་བྱ། །པ་སངས་མེ་༣སོ་༣༢མཚོ་༥༤འབྱུང་༡ གཟུགས། །དུས་༣༥༦འབྱུང་ཡོན་ཏན་༧༣མེ་རིས་བསྒྱུར། །༢༠མཁའ་མིག་རྩ་༥༩འབྱུང་གདེངས་༢༨ཅན་ལག །མིག་༢དང་དྲག་༦༡༡པོ་བྲོ་བ་དང་། །འཇིག་རྟེན་སྲིན་པོ་ཡོན་ཏན་༣༩༣བྱིན། །དལ་འགྲོར་༠མཁའ་༤མཚོ་དུས་༢༦མིག་༣མེ། །མིག་མཁའ་༣༢༠༢ཐུབ་མེ་རི་༡༡དྲག་པོས༧།།བསྒྱུར་ལ་༢༦དུས་མིག༦་རིག་བྱེད་༤༤མཚོ། །སྲིན་༩པོ་དང་ནི་འོད་༡ དཀར་ཅན། །༢༧༢༠ནམ་མཁའ་གཤིན་རྗེ་འཁོར་ལོ་དང་། །༡༦༥འབྱུང་བ་རྒྱལ་པོས་བརྒྱན་པར་བྱ། །ལྔ་ཀ་འོག་མ་རི་མཁའ་༧༠༧རིའི། །ཆའོ་གོང་མ་ཁྱིམ་ཞག་དང་། །འདྲ་བར་བྱས་ལ་རང་འཁོར་སྒྲིལ། །དེ་ཡིས་སོ་སོའི་དྷྲུ་བ་ཀ །སྔ་དྷྲུར་རང་རང་སྒྱུར་བྱེད་བྱིན། །ཕྱི་མ་ཕྱི་མའི་དྷྲུ་བ་འཆར། ། ༈ དེ་ནས་སོ་སོའི་དྷྲུ་བ་ལ། །བཀྲ་ཤིས་མཁའ་༠མིག་༢བུག་༡༩གཟུགས་༡ཟླ། ། ༡༤༣མེ་ཡིད་རྒྱ་མཚོ་༡༤༤མ་ནུའོ། །སྔོ་སངས་༠མཁའ་༡༨སྐྱོན་རི༧་བོ་༣མེ། །དུས་མེ་༧༠༣༦མཁའ་ཐུབ་༩༣མེ་རིའོ། །བླ་མར་མཁའ་༠མཁའ་༠ལག་༢༢མིག་༠ཐིག །༣༧༥དབང་རི་མེ་དང་མིག་༧༢ཐུབ་པའོ། །དཀར་པོར་༠མཁའ་རི་༧དབང་༥པོ་མཚོ༤། །༦༣༦དུས་མེ་རོ་དང་མཚམས་མིག་༢༦གོ །ཉི་བུར་མཁའ་༠མཁའ་༠གདེངས་༨ཅན་༥དབང་། །༡༧༣༨ཀླུ་མེ་རི་གཟུགས་མི་བདག་༢༡༦ལག །དེ་ལྟར་རང་རང་རྟག་ལོངས་རྣམས། །གང་བརྩིའི་ཚེས་བསྒྱུར་སོ་སོར་བྱིན། །དེ་ཡིས་དྲག་གསུམ་དལ་བར་དང་། །ཞི་གཉིས་རྐང་འཛིན་བར་པ་འགྲུབ། །ཐུན་མོང་དལ་མྱུར་ཉི་བར་ནི། །གྲུབ་པའི་ལྔ་བསྡུས་ནང་བཞིན་བྱ། ། ༈ བརྒྱད་པ་དུ་མཇུག་རི་མོ་ནི། །༡༥རབ་ཚེས་རྣམ་གནོན་འདས་པའི་ལོ། །བྱས་པའི་བྱེད་པའི་ཟླ་དག་ལ། །རྩེ་༣༣མོ་མེ་བྱིན་༧༥མདའ་རིས་བསྒོ། །ལྷག་མེད་གྱུར་ཚེ་དུ་བ་མཐོང་། །རྙེད་པ་འཕར་ཏེ་མི་མཉམ་ན། །ཐོ་རངས་ཤར་གྱི་ཕྱོགས་སུ་བརྟག །རྙེད་པ་འཕར་ཏེ་མཉམ་པ་ན། །སྲོད་ལ་ནུབ་ཀྱི་ཕྱོགས་སུ་བརྟག །འདི་ལ་རྒྱུན་བཅས་ལོངས་སྤྱོད་དག ། གསུངས་ཀྱང་འདིར་ནི་མ་བྲིས་སོ། །ཤེས་པར་འདོད་ན་གཞུང་དུ་ལྟོས། ། ༈ དགུ་བ་ཉི་མ་ཟླ་བ་ལ། །སྒྲ་གཅན་འཇུག་པ་བཤད་པར་བྱ། །སྤྱིར་ནི་དཀར་ནག་ཚིགས་མཚམས་དང་། །ཁྱད་པར་ཟླ་བ་སྔར་འབུར་ཞེས། །ཟླ་ཟུག་འདས་ཤིང་ཉི་མ་ཡི། ། དུས་ཚིགས་གསུམ་འདས་ཁྱིམ་ཟླ་ནི། །ལུག་འཁྲིགས་ལ་སོགས་མི་མཉམ་པའི། །སྟོང་ལ་རྟེན་འབྲེལ་རེག་པའི་དབུས། །ཉི་རྐང་ཞུགས་པས་འཛིན་པར་གསུངས། ། ༈ དེ་ཡང་སྒྲ་གཅན་སྐར་གནས་སུ། །ནམ་མཁའ་༠དབྱུག་གུར་གཟུགས་༣༡མེ་དང་། ། སྲང་དུ་གཟུགས་༤༡ཆུ་དབུགས་རྒྱ་༤མཚོ། །མེ་མིག་ཆའི་གནས་༡༠མཁའ་ཟླ་རྣམས། །རྩ་བར་བྱིན་ཞིང་གདོང་མཇུག་ལ། །ཕྲི་བ་བསླུ་མེད་བརྟག་པའི་གཟེར། །དེ་ཕྱིར་ཉི་ཟླའི་ལོངས་སྤྱོད་དང་། །སྒྲ་གཅན་ནུར་བྱིན་གདོང་མཇུག་དག །གང་ཉེ་དེ་དང་བསྟུན་པར་བྱ། ། ༈ དེ་ལ་ཐོག་མར་ཟླ་འཛིན་ནི། །བཅོ་ལྔའི་གྲུབ་མཐའི་ཚེས་ཁྱུད་ཀྱི། །ཟླ་སྐར་དང་ནི་གདོང་མཇུག་གཉིས། །གང་ཉེ་མང་ལ་ཉུང་གིས་སྦྱངས། །ལྷག་མ་སྐར༠ཐིག་ཆུ་ཚོད་དུ། ། མཁའ་༥༠འབྱུང་མན་ཆད་ངེས་པར་འཛིན། །ཆེ་ཆུང་སྦྱངས་ལྷག་ཆུ་ཚོད་ལ། །འབྱུང་༥བས་ཐོབ་ནོར་ཐིག་ལེ་ནས། །བཞི་༤ཡི་བར་ལ་རིལ་པོར་སྒྲིབ། །༥ལྔ་ཤར་དྲུག་ཆ་མ་གཏོགས་སྒྲིབ། །༦དྲུག་ལ་སུམ་གཉིས་རི་༧ལ་ཕྱེད། །༨ཀླུ་ལ་སུམ་ཆ་དགུ་༩དྲུག་ཆ། །༡༠བཅུ་ཐོབ་བརྒྱད་ཆ་ཙམ་ཞིག་སྒྲིབ། ། ༈ སྒྲིབ་ཡུན་ཟླ་བ་བཅུ་དྲུག་ཚད། །གསུངས་ཕྱིར་གདུང་གིས་རིལ་འཛིན་ཚེ། །ཆུ་ཚོད་མི་བདག་༡༦མཇུག་འཛིན་༡༥ཚེས། །ཕྱེད་འཛིན་གདོང་༨ཀླུ་མཇུག་འཛིན་༧རི། །དེ་སོགས་རིག་པས་དཔྱད་དེ་སྨྲ། །ཕྱོགས་ནི་ཟླ་བས་གདོང་སྦྱངས་སམ། །དུས་མེས་ཟླ་བར་སྦྱངས་པའི་ཚེ། །ནམ་ཕྱེད་དབང་ལྡན་ནས་འཛིན་ཞིང་། །ནམ་སྟོད་བྱང་ཉེ་ནམ་སྨད་ལ། །དབང་ལྡན་ཤར་ཉེའི་ཕྱོགས་ནས་འཛིན། །གདོང་གིས་ཟླའམ་ཟླ་བས་མཇུག །སྦྱངས་ཚེ་ནམ་ཕྱེད་ཤར་ལྷོ་དང་། །སྲོད་དུས་ཤར་ཉེ་ཐོ་རངས་དུས། །ཤར་ལྷོ་ཤར་ཉེའི་ཕྱོགས་ནས་འཛིན། །མཉམ་ན་ནམ་ཕྱེད་ཤར་དྲང་པོ། །སྲོད་ལ་དབང་ལྡན་ཐོ་རངས་ལ། །ཤར་ལྷོར་ཉེ་བའི་ཤར་ནས་འཛིན། ། དུས་ནི་དཀར་ནག་ཚིགས་མཚམས་ཏེ། །གྲུབ་མཐའི་ཟླ་རྐང་ཞིབ་བཙལ་གྱིས། །བསྒྲུབས་པའི་ཚེས་ཀྱི་ལོངས་སྤྱོད་གྲངས། །ཟད་ཚེ་ཚེས་འཕོ་ཟླ་བ་འཛིན། །ཁྱད་པར་གནད་ཀྱི་ལག་ལེན་ནི། །ཚེས་ལོངས་སྔ་མས་༦༠མཁའ་རོ་ལ། །ཕྲི་ལྷག་ད་ལྟའི་ཚེས་ལོངས་དང་། །བསྲེས་པའི་ལོངས་སྤྱོད་གང་ཡིན་དེར། །༦༤ཆུ་རོ་ཤར་ན་དབྱུག་གུར་༥དབང་། །༦༣མེ་རོར་༤ཆུ་དབྱུག་༣༠མཁའ་མེའི་སྲང་། །མིག་དུས་༦༢ཤར་ན་དབྱུག་གུར་༤མཚོ། །༦༡གཟུགས་དུས་མེ་༣དབྱུག་སྲང་༣༠མཁའ་མེ། །༦༠མཁའ་རོར་ཆུ་ཚོད་༣རྩེ་མོ་ཅན། །བུག་འབྱུང་༥༩མིག་༢དབྱུག་མཁའ་༣༠མེ་སྲང་། །ཀླུ་དབང་༥༨ལ་ནི་དབྱུག་གུར་༢ལག །རི་༥༧དབང་གཟུགས་༡དབྱུག་སྲང་མཁའ་༣༠མེ། །དུས་༥༦འབྱུང་དབྱུག་གུར་འོད་༡དཀར་ཅན། །དབང་༥༥འབྱུང་མཁའ་༠དབྱུག་སྲང་༣༠མཁའ་མེ། །མཚོ་དབང་༥༤ཤར་ཚེ་ནམ་མཁའ་༠རྣམས། །སྦྱིན་པ་ཟད་དུས་འཛིན་པར་ངེས། །ཁ་དོག་རིལ་པོར་སྒྲིབ་པ་ན། །གདོང་ལ་དམར་ནག་མཇུག་དམར་སྐྱ། །འཛིན་ཆ་ཆུང་ན་ནག་པོ་དང་། །རིལ་འཛིན་ལ་ནི་དམར་པོ་སྣང་། །སྐར་མ་མགོ་ལག་སྟེང་བཟུང་ན། །ནམ་མཁའི་མདོག་ཏུ་སྣང་ཞེས་གསུངས། ། ༈ དེ་ནས་ཉི་འཛིན་བརྟགས་པའི་ཕྱིར། །གྲུབ་མཐའི་ནམ་སྟོང་ཉི་དག་ནི། །གནས་གཉིས་བཀོད་པའི་ཕྱོགས་གཅིག་ལ། །སྔར་གྱི་སྒྲ་གཅན་བུལ་བ་བསྲེ། །གཅིག་དང་གདུང་མཇུག་དང་ཉེ་གཉིས། །ཉུང་གིས་མང་ལ་སྦྱང་བར་བྱ། །གདོང་གིས་ཉི་མར་སྦྱང་བའི་ཚེ། ། སྐར་གནས་སྟོང་ཤིང་ཆུ་ཚོད་དུ། །མཁའ་༥༠འབྱུང་མན་ཆད་ངེས་པར་འཛིན། །གལ་ཏེ་ཉི་མས་གདོང་སྦྱངས་ལྷག །ཆུ་ཚོད་༥ལྔ་མན་འཛིན་ཟེར་ཀྱང་། །གདོང་ལ་གོ་ལོག་འཛིན་མི་སྲིད། །མཇུག་མས་ཉི་མར་སྦྱངས་པ་ན། །སྐར་ཐིག་༠ཆུ་ཚོད་ཀླུ་༨མན་ཆད། །གོ་ལོག་ཡིན་ཀྱང་འཛིན་པ་སྲིད། །ཉི་མས་མཇུག་མར་སྦྱངས་པའི་ཚེ། །སྐར་མ་སྟོང་༠ཤིང་ཆུ་ཚོད་དུ། ། ༤༠མཁའ་མཚོ་མན་ཆད་ངེས་པར་འཛིན། །མདོར་ན་མཇུག་འཛིན་མ་ངེས་ཀྱང་། །གདོང་འཛིན་ཉི་མ་མང་བ་དགོས། །དེ་ཕྱིར་ཕན་ཚུན་སྦྱངས་ལྷག་དེས། །སྔར་གྱི་ཉི་བུལ་བསྲེས་དེ་ལ། །གདོང་འཛིན་སྦྱང་ཞིང་མཇུག་འཛིན་བསྣན། །རང་འཁོར་སྒྲིལ་ལ་༡༣༣༠འཁོར་ཕྱེད་དོར། །གནས་ཀུན་སྟོང་ན་ངེས་པར་འཛིན། །གཞན་ཡང་གོང་མའི་མགྱོགས་རྩིས་དང་། ། བསྟུན་ན་བགྲོད་གཉིས་མཐར་ཉི་ཚེ། །འཆར་ཀ་ནུབ་ཀར་ཉེ་བ་དང་། །དཔྱིད་མཉམ་ཕྱེད་གོང་ཡན་ཆད་དང་། །སྟོན་མཉམ་ཕྱེད་འོག་མན་ཆད་ལ། །འཛིན་པའི་རི་མོ་ཤར་ན་ངེས། ། བར་རྣམས་རིགས་པས་དཔྱད་ཅེས་གསུངས། །ཆེ་ཆུང་ཕན་ཚུན་སྦྱངས་ལྷག་ལ། །གདོང་འཛིན་ཉེར་གཉིས་ཉེར་གསུམ་དང་། །མཇུག་འཛིན་བཅུ་དགུ་ཉི་ཤུ་ཙམ། །བྱུང་ཚེ་རིལ་པོར་སྒྲིབ་པ་སྟེ། །དེ་ལས་ཆེའམ་ཆུང་ཡང་རུང་། །རིམ་པ་ཇི་བཞིན་འཛིན་ཆ་ཆུང་། །དེ་ཕྱིར་རིག་པས་དཔྱད་དེ་སྨྲ། །ཡུན་ནི་ཆ་རེས་ཆུ་ཚོད་རེ། །ཡིན་ཕྱིར་ཕྱེད་འཛིན་ཆུ་ཚོད་༦དྲུག །རིལ་འཛིན་ཆུ་ཚོད་ཉི་མ་༡༢སྟེ། །དེ་ཡི་བར་གནས་འགྲེ་བར་བྱ། །ཕྱོགས་ནི་གདོང་དང་དུས་མེ་ཡིས། །ཉི་མར་སྦྱངས་ཚེ་ཉི་ཕྱེད་དུས། །ལྷོ་ནུབ་སྔ་དྲོ་ལྷོར་ཉེ་དང་། །ཕྱི་དྲོ་ནུབ་ཉེའི་ཕྱོགས་ནས་ཏེ། །གལ་ཏེ་ཉི་མས་དུས་མེ་ལ། །སྦྱངས་ཚེ་ཉི་ཕྱེད་ལ་ནུབ་བྱང་། །སྔ་དྲོ་བྱང་ཉེ་ཕྱི་དྲོའི་དུས། །ནུབ་ལ་ཉེ་བའི་ཕྱོགས་ནས་འཛིན། །དུས་ནི་ནམ་ལངས་ནས་བཟུང་སྟེ། །གྲུབ་མཐའི་ཚེས་ལོངས་ཟད་ཚེ་འཛིན། །དེ་ཡང་ཟླ་རྐང་ཞིབ་རྩིས་དང་། །བགྲོད་པའི་འཕེལ་འགྲིབ་ནུར་སྟེར་མཚམས། །ཟླ་བར་བཤད་བཞིན་འདིར་ཡང་དྲན། །ཁ་དོག་མཇུག་དམར་གདོང་དམར་ནག །ཆུང་འཛིན་སྔོན་ནག་རིལ་འཛིན་དམར། །ཕྱེད་འཛིན་ལ་ནི་དམར་ནག་སྟེ། །མགོ་ལག་སྟེང་བཟུང་སྔོ་སྐྱར་སྣང་། །གཞན་ཡང་ཚེས་ཀྱི་ཆད་ལྷག་དང་། །ཤར་ནུབ་རི་བོའི་མཐོ་དམའ་དང་། །ཉིན་མཚན་རིང་ཐུང་ལ་སོགས་པ། །སྒྲིན་པོའི་བློ་ཡིས་བརྟག་པ་གཅེས། །ཞར་བྱུང་དགེ་བའི་འགྱུར་ཆད་ནི། །ཇོ་བོས་མཛད་པར་གྲགས་པ་ལས། །ཉ་སྟོང་ཚེས་བརྒྱད་བརྒྱ་འགྱུར་དང་། །ཟླ་འཛིན་སྟོང་དང་ཉི་འཛིན་ཁྲི། །དུས་ཆེན་བཞི་ལ་འབུམ་འགྱུར་བཞེད། ། མྱང་འདས་སིལ་བུར་དུས་ཆེན་བཞིར། །ས་ཡ་ཕྲག་བརྒྱའི་འགྱུར་དུ་གསུངས། །འཇམ་དཔལ་རྩ་བའི་རྒྱུད་ལས་ནི། །ཉ་སྟོང་ཚེས་བརྒྱད་བྱེ་བ་དང་། །ཟླ་བཟུང་བྱེ་བ་བདུན་འགྱུར་ཏེ། །ཉི་བཟུང་བྱེ་བ་འབུམ་ཞེས་གསུངས། ། ༈ བཅུ་པ་རྩིས་ཕྲན་འགའ་ཞིག་གི །རི་མོའི་བྱ་བ་བརྗོད་པར་བྱ། །རྣམ་གནོན་ལ་སོགས་འདས་པའི་ལོ། །རྩེ༣མོས་བསྒྱུར་ལ་གནས་གཉིས་བཞག །སྟེང་༡ཟླ་འོག་མར་རྒྱ་༤མཚོས་བརྒྱན། །རི་༧ཡིས་ཐོབ་ནོར་སོ་སོར་དོར། །སྟེང་རྒྱལ་འོག་མ་བློན་པོ་སྟེ། །༤མཚོ་ཡིས་ཕྲིའམ་མེ༣བྱིན་པས། །ཕྱི་མ་ཕྱི་མའི་རྒྱལ་བློན་འཆར། ། ༈ བྱེད་པའི་ཀ་ར་མྱང་རྩིས་ནི། །གཤིན་རྗེ་ནམ་མཁའ་༡༨༠༢ཉེས་པ་ལ། །རྣམ་གནོན་ལ་སོགས་འདས་ལོ་བསྲེ། །དེ་ནི་ཤ་ཀའི་ལོ་རུ་གྲགས། །དེ་ཉིད་རྩེ་༣མོ་ཅན་གྱིས་བསྒྱུར། །༧ཐུབ་པས་བགོས་ནོར་ཟུར་དུ་བཞག །ལྷག་མ་མིག་༢བསྒྱུར་༥འབྱུང་བ་བསྲེ། ། ནོར་ལ་དེ་ལྟར་དགུ་ཡི་བར། །མེས༣བསྒྱུར་རིས་༧བགོས་ལྷག་མ་རྣམས། །མིག༢བསྒྱུར་འབྱུང་༥བསྲེས་རིམ་བཞག་པས། །ཆར་འབྲུ་རྩ་བསིལ་རླུང་དང་དྲོད། །སྐྱེ་རྒུ་འཕེལ་ཟད་རྒྱལ་པོ་འཁྲུག །བཅུ་བདུན་མང་མཐའ་ལྔ་ཉུང་མཐའ། །བཅུ་གཅིག་པར་ཡིན་མང་ཉུང་དང་། ། སྦྱར་ཏེ་གང་ཉེའི་ལུང་བསྟན་བྱ། །ཤ་ཀ་༡༡དྲག་སྦྱང་ཆུ་༤བོས་དོར། །ལྷག་མ་གཅིག་གཉིས་གསུམ་དང་ཐིག །བྱུང་ཚེ་རིམ་བཞིན་ཆར་མི་འབབ། །ལ་ལར་འབེབས་དང་ཁྱད་པར་འབེབས། །ཆར་ཆེན་ཆུ་ཐོག་འབབ་ཅེས་སྟོན། །ནཻ་པཱ་ལ་ཡི་མན་ངག་ཡིན། ། ༈ བཅུ་གཅིག་མགྱོགས་རྩིས་སྐོར་རྣམས་ལ། །བྱེད་པར་གང་བརྩིའི་ནག་ཟླ་ཡི། །ཉི་དྷྲུའམ་བཤོལ་རྗེས་དབོ་དྷྲུ་ལ། །གང་བབས་ཉི་ཚེས་རྟག་ལོངས་བྱིན། །ཞག་གཅིག་ལོངས་སྤྱོད་མ་ལོངས་ཙམ། །ཤར་བ་ལོ་དེའི་ཉི་རགས་ཡིན། །དེ་དང་ཞག་ཁྱད་མ་ཞུགས་པའི། ། གཟའ་ཚེས་རྟག་ལོངས་གཟའ་དྷྲུ་ལ། །བྱིན་པས་གཟའ་ཡི་རགས་པ་འཆར། །ཡང་ན་ཉི་དྷྲུར་རང་ཉིད་ལས། །ཅུང་ཟད་གྲངས་ཉུང་ཉི་ཚེས་ཀྱིས། །ཡུལ་ལོངས་ཀྱིས་སྦྱངས་ཉི་རགས་ཏེ། ། གཟའ་ལའང་ཤེད་སྙོམས་སྔར་ལྟར་བཙལ། ། ༈ གྲུབ་པར་འདས་ཟླ་མ་བསྲེས་པའི། །ཟླ་བཤོལ་རྩིས་འཕྲོ་༣༠མཁའ་མེས་བསྒྱུར། །མདའ་༦༥རོས་ཐོབ་ནོར་གང་ཡིན་ཏེ། །ཉིན་ཞག་ཉི་རགས་ཟིན་པའི་ཞག །ལྷག་མ་བྱུང་ཚེ་ནོར་ལ་གཅིག །བྱིན་པ་ཚེས་ཞག་ཉི་མ་ཡི། །རགས་པ་ཟིན་པའི་ཚེས་གྲངས་ཏེ། ། གང་ཟིན་ཉི་ལོང་ཉི་དྷྲུར་བསྣན། །ཉི་རགས་ཡིན་ཏེ་ཤེད་སྙོམས་ཀྱི། །གཟའ་ཡི་རགས་པ་སྔར་ལྟར་བསྒྲུབ། །སྔར་ལོའི་རགས་པ་རྣམ་དག་ལ། །བྱེད་པར་གཟུགས་དྲག་མཁའ་མཚོ་ལག༡༡༡༧༠༢༠།ཐིག་རྣམས་གཟར་བྱིན་ཉི་མ་ཡི། །སྲང་ནས་རིག་གཟུགས་ཆ་ཤས་ནས། ༠༠༡༧༠༢།མིག་ཕྲི་ཕྱི་མའི་རགས་པ་འཆར། །གྲུབ་པར་གཟུགས་དྲག་གཟུགས་མཚོ་ཆུ། ། རོ་མིག་ཀླུ་རི་རྩེ་མོ་རྣམས།༦༢༨༣༣།གཟའ་རགས་ལ་བྱིན་ཉི་རགས་ནས། །མཁའ་མིག་སྲང་དང་མཁའ་རོའི་ཆས།༢༠༠༦༠།ཕྲི་བའི་ཕྱི་མའི་རགས་པ་འཆར། །ཉི་རགས་སྟོང་པའི་ཕྱི་ལོའི་དུས། །གཟའ་ཉིའི་རྟག་ལོངས་བསྣན་པ་ལ། །དབྲི་བསྣན་བྱེད་པ་ཁྱད་པར་ཡིན། ། ༈ བྱེད་གྲུབ་གང་བྱེད་ཉི་རགས་དེ། །༡༣༥མདའ་ཡོན་ཟླ་བས་ཆ་ཤས་བར། །རིམ་བསྒོས་ཉི་རྐང་ཟླ་འབྲས་ཏེ། །གནས་གཉིས་བཀོད་ལ་༦དུས་དང་༤མཚོས། །བསྒྱུར་བས་རྐང་འབྲས་གསུམ་པོ་འགྲུབ། །གཟའ་ཉིའི་རགས་པ་སྟེང་འོག་ཏུ། །གསུམ་གསུམ་དྲུག་བཀོད་དབྲི་སྣོན་ཆེད། །ཁྱིམ་མང་གཉིས་རེའི་ཁ་བྱང་གདགས། །ལུག་དང་བུ་མོར་ཟླ་བའི་འབྲས། །དབྲི་ཞིང་ཉ་དང་སྲང་ལ་བྱིན། །གླང་སེང་གཉིས་ལ་མཚོའི་འབྲས་བུས། །སྦྱང་ཞིང་བུམ་སྡིག་གཉིས་ལ་བརྒྱན། །འཁྲིག་པ་ཀརྚར་དུས་དམན་ཞིང་། །ཆུ་སྲིན་གཞུ་ལ་བྱིན་པར་བྱ། །དེ་ཡིས་ཁྱིམ་དྲུག་སྤྱི་ནོར་དག ། ༈ དེ་ནས་རེའུ་མིག་འཛིན་ཚུལ་ནི། །འདས་ཟླ་གང་ཡིན་༣༠མཁའ་མེས་བསྒྱུར། ། གང་བརྩིས་ཚེས་གྲངས་བྱིན་པ་ལ། །ཉི་རགས་ཟིན་པའི་ཞག་གིས་ཕྲི། །མ་ལྡང་གཟུགས་༣༧༡རི་མེ་བསྣན་སྦྱང་། །ལྷག་མས་བསྐལ་ལིའི་བྱ་ར་བཟུང་། །ཡང་ན་རེའུ་མིག་བྱ་རའི་དོད། ། ཉི་བར་བཀོད་ལ་འཛིན་འདོད་ན། །གང་བརྩིའི་དུས་དེའི་ཉི་བར་ལ། །ཉི་རགས་ཀྱིས་ཕྲི་ལྷག་མས་བཟུང་། །དེ་ལྟར་ཟིན་པའི་རེའུ་མིག་གི །གཟའ་ཉི་གཡས་གཡོན་བཀོད་པ་ལ། ། ཁ་བྱང་བཞིན་དུ་རང་རང་གི །ཁྱིམ་མཐུན་གཟའ་ཉིའི་སྤྱི་ནོར་བྱིན། །ཁྱད་པར་ཉི་རགས་ཟིན་པ་ཡི། །ཞག་གྲངས་བར་དུ་སྔ་ལོ་ཡི། །ཆོ་གས་འཛིན་དང་སྤྱི་ནོར་སྟེར། །དེ་ཡི་གཟའ་བྱེད་ཉི་མ་དག །གྲུབ་པར་དབུས་གནས་རེའུ་མིག་ལ། །གང་ཟིན་ཁྱིམ་དྲུག་སྤྱི་ནོར་དང་། །ནང་མཐུན་རང་གི་སྤྱི་ནོར་ཉིད། །བྱིན་པས་དོན་གྱི་ཁྱིམ་འཕོ་སྟོན། ། ༈ ཆ་ཤས་དྷྲུ་བ་དང་མཐུན་པའི། །བྱ་རས་ཆ་ཤས་རེའུ་མིག་བཟུང་། །རིལ་པོར་ཚེས་བསྲེས་༡༤ཆུ་ཟླས་བགོ །ནོར་གྱིས་སྣོད་འབྲིད་མཚན་མ་དང་། །ལྷག་མས་རེའུ་མིག་བཅུ་བཞི་པོའི། །བྱ་ར་ཆ་དང་ནང་མཐུན་བཟུང་། །གང་ཟིན་གཟའ་བར་ལོངས་སྤྱོད་དུ། །ནོར་མཉམ་བསྣན་ལ་མི་མཉམ་ཕྲི། །དེ་ཡིས་གཟའ་ཉི་རྣམ་པར་དག །ཉི་མ་དག་པར་ཟླ་ཚེས་ཀྱི། ། ཐུན་མིན་རྟག་ལོངས་རེའུ་མིག་བྱིན། །ཚེས་ལོངས་ཀྱིས་སྦྱངས་རེས་འགྲོགས་དག ། ༈ ཉི་ཟླ་གཉིས་བསྲེས་སྦྱོར་བ་དང་། །བྱེད་པ་ཚེས་གྲངས་རེའུ་མིག་འཛིན། ། ༈ གྲུབ་མཐའི་རེའུ་མིག་རྒྱས་པ་ནི། །འཛིན་ན་རབ་ཚེས་རྣམ་གནོན་གྱི། །ཟླ་དག་མཁའ་༣༠མེས་བསྒྱུར་བ་ལ། །གང་བརྩིའི་ཚེས་གྲངས་བསྲེས་པ་ལ། །༣༦༩༦དུས་བུག་བྲོ་བ་མེ་ཡིས་བརྒྱན། །༤༨༢༤ཆུ་མིག་ཀླུ་མཚོས་ཐོབ་པའི་ནོར། །གནས་དྲུག་རིམ་བཞིན་མིག་གཟུགས་མེ། །དུས་དང་གཟུགས་དྲག་མཁའ་རྩེ་མེས། །༢༣༡༦༡༡༡༣༣༠བསྒྱུར་ལ་གཟུགས་དང་ཟླ་བ་རྩེ། །གཟུགས་མེ་ཡོན་ཏན་མིག་དུས་དང་། །འབྱུང་བ་ནོར་ལྷ་བསེ་རུ་ཡིས། །བྱིན་ལ་འཁོར་ལོས་སྒྲིལ་བ་ཡིས། །ལོ་གྲངས་༠༣འདོད་པའི་བར་རེ་ཡི། །གཟའ་རགས་རྣམ་དག་གྲུབ་པ་ཡིན། །ཡང་ན་ཉི་རགས་སྟོང་པའི་ལོའི། །གཟའ་རགས་གོང་བཞིན་བསྒྲུབས་པས་འགྲུབ། །སྔར་གྱི་ཆུ་མིག་༤༨༢༤ཀླུ་མཚོ་ཡིས། །བགོས་པའི་ལྷག་མས་རེའུ་མིག་བཟུང་། །དེ་འོག་གནས་གསུམ་དབུས་གཡོན་གྱིས། །དོན་ཁྱིམ་དང་ནི་ཉི་དག་སྟོན། ། གཡས་པར་སྔར་བཙལ་གཟའ་རགས་བྱིན། །དེ་སྟེང་རིལ་ཆའི་རེའུ་མིག་ནི། །༢༨འཛིན་སོགས་ལྷག་མ་སྔར་བཞིན་ནོ། །གཟའ་ལྔའི་མགྱོགས་རྩའི་ནག་ཟླ་ཡི། །བཅོ་ལྔའི་སྤྱི་ཞག་སྔར་སྟར་བསྒྲུབ། །དེ་ཡི་ཞག་གནས་ཆུ་རོ་དང་། །རི་མཁའ་༧༠༧རི་ཡི་ལྷག་གསུམ་གར། ། བཅོ་ལྔ་རེ་བྱིན་ཉ་དང་སྟོང་། །རེས་མོས་སྤེལ་ལ་སྟེང་འོག་བཀོད། །གལ་ཏེ་༦༤ཆུ་རོའི་ཐོབ་ནོར་གྱིས། །སྟེང་ནས་ཕྲི་ཚེ་སྤྱི་ཞག་དེ། །མི་ནོར་མཚན་མར་མཚལ་གྱིས་བྲི། །ནག་ཟླའི་ཉ་ཡི་སྤྱི་ཞག་ལ། །གཟའ་ལྔ་ཉི་མ་དང་བཅས་པའི། །སོ་སོའི་ནག་ཉའི་སྒོས་ཞག་རྣམས། །གོང་དུ་བཤད་པ་ཇི་བཞིན་བསྒྲུབ། །ཁྱད་པར་ཉི་མའི་སྒོས་ཞག་དེ། །སླར་ཡང་མིག་༡༨༣༨༢ཀླུ་མེ་སྐྱོན་གྱིས། །ཐོབ་པ་སྒོས་ཞག་གནས་སུ་བཀོད། །དེ་རྣམས་དབོ་ཟླའི་སྟོང་གི་བར། །བཅོ་ལྔ་རེ་དང་སྤྱི་ཡི་ཞག །མཚལ་གྱིས་བྲིས་པར་བཅུ་བཞི་ཉིད། །བྱིན་ལ་སྤེལ་ལོ་ཞི་གཉིས་ལ། ། ༡༥ཚེས་དང་ཡིད་༡༤གཉིས་བརྒྱ་༡༠༠དང༡༠་བཅུས། །བསྒྱུར་ནས་སྟེར་བ་ཁྱད་པར་ཡིན། ། ༈ ཉི་རགས་ཆེད་དུ་ཉི་མའི་ཞག །མིག་༠༣༨༢ཀླུ་མེ་སྐྱོན་གྱིས་དོར་བའི། །ལྷག་དེ་༣༦དུས་མེ་བསྒྱུར་བབ་ལ། །༡༤བུག་༧༢༠༧མཁའ་མིག་བུག་ཡིད་ཀྱིས་བགོ །ཐོབ་པ་ཆུ་ཚོད་ལྷག་༦༠མཁའ་རོ། །༦དུས་ཀྱིས་བསྒྱུར་ལ་རིམ་ཐོབ་ནོར། །ཆུ་སྲང་དབུགས་ཏེ་ལྷག་དང་ཆ། །སྔ་ལོའི་རགས་པ་རྣམ་དག་ལ། །གཟུགས་དབྱུག་སྲང་ཉི་དབུགས་ནམ་མཁའ། །ཆ་ཤས་ཉི་མ་ཐུབ་རི་ཟླས། ༠༡༨༠༡༧༧༡༢།ཕྲི་བས་ཕྱི་ལོའི་རག་པ་འཆར། །མ་ལྡང་རྟག་ལོངས་བསྣན་ལ་སྦྱང་། །དེ་ནས་ཉི་རགས་མདའ་ཡོན་༠༢༥ཟླས། །རིམ་པར་ཕྱེ་བའི་རྙེད་ནོར་གང་། ། ཞི་གཉིས་དལ་རྐང་གསུམ་པོ་ཡིས། །བསྒྱུར་བ་རང་རང་རྐང་འབྲས་ཡིན། །ཉི་རགས་གནས་དྲུག་ཚན་པ་གཉིས། །བཀོད་ལ་སོ་སོའི་རྐང་འབྲས་གསུམ། །སྔ་མར་བྱིན་ཞིང་ཕྱི་མར་འཕྲོག ། ནོར་དང་བུ་ལོན་ཁ་བྱང་གདགས། །དེ་ཡིས་ཞི་གཉིས་སྤྱི་ནོར་དག ། ༈ དེ་ནས་རེའུ་མིག་འཛིན་ཚུལ་ནི། །གཟའ་ལྔའི་དལ་དག་མྱུར་བར་རྣམས། །རྒྱས་པར་བྱ་ར་གང་མཐུན་པའི། །རང་རང་སྒོས་ཞག་སོ་སོས་བཟུང་། །གལ་ཏེ་རེའུ་མིག་བསྡུས་པ་ལ། །བརྟེན་ན་དྲག་གསུམ་དལ་དག་གི །རེའུ་མིག་འཛིན་ཚེ་བྱ་ར་ཡིས། །མ་ཟིན་ཅུང་ཟད་ཉུང་བ་བཟུང་། །ཀ་ཐོ་དང་བསྟུན་ཞག་རྩིས་ཀྱི། །མང་ཁྱད་གྲངས་མཚུངས་བསྒྱུར་ལ་བྱིན། ། ཞི་གཉིས་སྒོས་ཞག་༡༠༠བརྒྱ་དང་༡༠བཅུས། །ཐོབ་པས་རྐང་པའི་རེའུ་མིག་དང་། །ལྷག་མའི་སྤྱི་ནོར་རེའུ་མིག་བཟུང་། །བསྲེས་པས་སོ་སོའི་མྱུར་བར་འགྲུབ། །གང་ཟིན་དྲག་གསུམ་མྱུར་བར་ལ། །ཉི་རགས་སྟེང་ཞིང་ཞི་གཉིས་ཀྱི། །དལ་བའི་སྟེང་དུ་རེའུ་མིག་གི །ཁ་བྱང་དང་མཐུན་སྤྱི་ནོར་རྣམས། །ནོར་དང་བུ་ལོན་མ་འདྲེས་པར། །བྱིན་པས་ཞི་གཉིས་དལ་བ་དག ། སྔ་ལོའི་ཆོ་གས་བཟུང་བའི་ཚེ། །སྔ་ལོའི་རང་དང་སྤྱི་ནོར་བྱིན། །དེ་ཡིས་གཟའ་ལྔ་ཉིན་ཞག་ལ། །སྤྱོད་པའི་དལ་བ་དག་པ་དང་། །མྱུར་བའི་རྐང་འཛིན་བར་པ་འགྲུབ། ། ༈ མྱུར་རྐང་རེའུ་མིག་འཛིན་ཚུལ་བཤད། །རང་རང་དལ་དག་ཚལ་གཉིས་བཀོད།༡༣༡༠།དྲག་གསུམ་དལ་དག་གནས་གཅིག་གིས། །ཉི་མ་བར་པ་ལ་སྦྱང་ཞིང་། །ཞི་གཟའ་གཉིས་ཀྱི་དལ་དག་གིས། །རང་རང་རྐང་འཛིན་ལོངས་སྤྱོད་སྦྱང་། །མ་ལྡང་འཁོར་ལོ་༡༢བསྣན་ལ་སྦྱང་། །སྦྱངས་ཤུལ་འཁོར་ཕྱེད་ལྷག་ན་དོར། །ཆུ་སྲང་གནས་སུ་༣༠སུམ་ཅུ་ལས། །ལྷག་ན་དབྱུག་པར་༡གཅིག་བྱིན་བྱ། །སྐར་གནས་མཁའ་༦༠རོས་བསྒྱུར་དབྱུག་བཅུག །དེ་ཡིས་མྱུར་རྐང་རེའུ་མིག་ལས། །མ་དོར་རིམ་པ་ལུགས་འབྱུང་དང་། །དོར་ན་རིམ་མིན་ལུགས་ལྡོག་འཛིན། །གང་ཟིན་དལ་དག་གཅིག་ཤོས་ལ། །རིམ་པ་བསྣན་ལ་རིམ་མིན་ཕྲི། །དེ་ཡི་མྱུར་བ་རྣམ་པར་དག །རིམ་པའི་སྔ་རྐང་མྱུར་འགྲོས་ཤར། །རིམ་པའི་ཕྱི་རྐང་དལ་འགྲོས་ལྷོ། །རིམ་མིན་སྔ་རྐང་འཁྱོག་འགྲོས་ནུབ། །རིམ་མིན་ཕྱི་རྐང་འབྱུང་འགྲོས་བྱང་། ། འགྲོས་བཞི་སོ་སོའི་ཁ་བྱང་གདགས། ། ༈ ཉིན་ཞག་གཟའ་ལྔའི་ཐུན་མོང་གི །ཁྱད་པར་རེའུ་མིག་འཛིན་ཚུལ་ནི། །སྤྱི་ཞག་བསྒྲུབས་པའི་བར་འོག་གི །༦༤ཆུ་རོ་རི་མཁའ་རིའི་ལྷག་མས། །སོ་སོའི་རེའུ་མིག་བྱ་རས་བཟུང་། །གྲུབ་རྩིས་ཚེས་ཞག་ཉི་བར་གྱི། །ཆ་ཤས་ཀྱིས་ཀྱང་རི་༦༠རོའི་ཆའི། །རེའུ་མིག་བཟུང་ལ་གཅིག་ཏུ་བསྲེ། །དེ་ཉིད་གྲུབ་རྩིས་ཉི་བར་གྱི། །ཆ་ཤས་དོར་བའི་སྟེང་དུ་བསྣན། ། དེ་ཡིས་ཉིན་ཞག་ཉི་བར་འགྲུབ། ། ༈ གཞན་དུ་ཁྱིམ་ཚེས་གཟའ་ལྔ་དང་། །བྱེད་ལོ་རྒྱལ་བློན་ལ་སོགས་པ། །རེའུ་མིག་འཛིན་ཚུལ་མང་གསུངས་ཀྱང་། །འགའ་ཞིག་མང་ཆེས་དཔེ་དཀོན་ཞིང་། །འགའ་ཞིག་སླ་བས་མི་དགོས་ཕྱིར། །རེ་ཞིག་འདིར་ནི་དེ་ཙམ་མོ། ། ༈ ཞར་བྱུང་མགྱོགས་རྩིས་ལ་བསྟེན་ནས། །༡ལྀ་ཐུ་སྦྱོར་དཀྲོལ་ལ་དགོས་པའི། ། ཉེར་མཁོ་འགའ་ཞིག་བྲི་བར་བྱ། ། ༈ ཁྱིམ་ཟླ་རེ་ལ་ཞག་སུམ་ཅུ། །དེ་ལས་ཁྱིམ་ཞག་བརྒྱད་པ་དང་། །ཉེར་གསུམ་པ་དང་སུམ་ཅུ་རྣམས། རང་རང་སྒང་དང་ཕྱི་མ་ཡི། །དབུགས་ཐོབ་ཉི་རྐང་འཕོ་མཚམས་དང་། ། ཁྱད་པར་འཁྲིག་གཞུའི་ཞག་ལྔ་པས། །དབྱར་དགུན་ཉི་མ་ལྡོག་ཚིགས་སྟོན། །ཀུན་ཀྱང་རང་རང་ཁྱིམ་ཞག་གི །དུས་ལོངས་རྫོགས་པའི་ཚད་དང་བསྟུན། ། ༈ དེ་རྣམས་རི་མོས་གཏན་འབེབས་ན། །དབུགས་ཐོབ་ཟླ་བ་སྔ་མ་དང་། །ཁྱིམ་སྒང་གང་བརྩི་ལྡོག་གཉིས་ལ། །འདས་ཟླ་གཉིས་དང་བརྒྱད་བསྲེ་བའི། །ཟླ་བཤོལ་འཕྲོ་རྣམས་མཁའ་༣༠མེས་བསྒྱུར། །དེ་རྣམས་དབུགས་ཐོབ་༡༥༤༡གཟུགས་མཚོ་ཆོས། །སྒང་ལ་རོ་མེ་༥༣༦འབྱུང་བ་དང་། །ཁྱིམ་སླེབས་ལ་ནི་ནམ་༠མཁའ་བྱིན། །ལྡོག་གཉིས་ཉིན་སྣང་༣༣༥འབྱུང་ཡོན་མེ། །བཻ་ཌཱུར་ལུགས་ལ་བུག་༤༦༢དུས་མཚོ། །རང་ལུགས་ཉི་ལྡོག་མཚོ་མེ་༡༣༤གཟུགས། །བསྲེས་ལ་༦༥མདའ་རོས་ཐོབ་ནོར་གྱིས། །རང་རང་ཟིན་པའི་ཚེས་གྲངས་སྟོན། །ནོར་ལ་མཁའ་༣༠མེ་ལོང་ན་དོར། །དེ་ཚེ་ཕྱི་དྷྲུས་བསྒྲུབ་གཞི་བྱ། །༦མདའ་རོས་བགོས་ལྷག་གང་བྱུང་དེས། །རེ་ལྔ་ཆ་ཡི་རེའུ་མིག་གམ། །ཡང་ན་ལྷག་དེ་ལྔས་བགོས་པའི། ། ནོར་གྱིས་བཅུ་གསུམ་ཆ་དང་ནི། །ལྷག་གིས་ལྔ་ཆའི་རེའུ་མིག །གཟུང་ལ་གནས་མཚུངས་བསྲེས་པ་དེ། །རང་རང་གང་ཟིན་ཆོས་དེ་ཡི། །གཟའ་ཉི་བར་པའི་སྟེང་བསྣན་པས། །སོ་སོའི་ཡུལ་དུས་ཚད་རྣམས་འཆར། །གཞན་ཡང་རི་ཥི་འཆར་བའི་དུས། །ཁྲུམས་ཟླའི་དབུགས་ཐོབ་ཀྱིས་སྟོན་ཅིང་། །ཕག་ཞག་བལྟ་ན་སྣྲོན་ཟླའི་འཕྲོ། །༣༠མཁའ་མེས་བསྒྱུར་ལ་༡༡༣༩བུག་མེ་དྲག །བསྲེས་ལ་བགོ་སོགས་སྔར་བཞིན་ནོ། ། ༈ ཉི་མ་སྤར་སྨེ་ལ་སོགས་པ། །རགས་པ་གཏན་ལེའི་ནང་བཞིན་ལ། ཞིབ་པར་༤བཻ་དཀར་ནས་གསུངས་པའི། །མེར་རྒན་གསེར་རྩིས་བཞིན་བྲི་ན། །རབ་བྱུང་བཅོ་ལྔ་པའི་ནང་གི །རྣམ་གནོན་འདས་ལོ་ཉི་༢༣མས་བསྒྱུར། །དཔྱིད་ར་ཧོར་ཟླ་དང་པོ་སོགས། །འདས་ཟླ་བསྲེས་ལ་གནས་གཉིས་བཞག །འོག་མ་མིག་༢བསྒྱུར་ཐིག་༤༡མཚོ་བྱིན། །༥༦མདའ་རོས་ཐོབ་པ་སྟེང་དུ་འཕང་། །ཟླ་བ་རྣམ་པར་དག་པའོ། །ཟླ་བ་དག་པ་༣༠མཁའ་མེས་བསྒྱུར། །གང་བརྩེའི་ཚེས་བསྲེས་གནས་གསུམ་བཞག །བར་དུ་མེ་༢མིག་༣འོག་མ་ལ། །མེ་༣༦༣དུས་རྩེ་བྱིན་རི་མཁའ་༧༠༧རིས། །རྙེད་པ་བར་བྱིན་༤ཆུ་རོས་ཕྱེ། །ལྷག་མ་ཐིག་ཤར་ཟླ་བ་ཆུང་། །ཐོབ་པའི་ནོར་གྱིས་སྟེང་སྦྱངས་པ། །འདས་པའི་ཞག་མ་སྤྱི་དྷྲུ་སྟེ། །དེ་ཉིད་གནས་ལྔ་བཀོད་པ་ལ། །དང་པོ་མཚོ་བསྲེས་༧ཐུབ་པས་དོར། །ལྷག་དེས་རེས་གཟའ་གང་ཡིན་ཤེས། །གཉིས་པར་༡གཟུགས་བསྲེས་ཉི་མས་༡༢བགོ །ལྷག་དེས་ཉི་མས་ངོས་འཛིན་དེ། །འབྲུག་ནས་མགོ་བཟུང་བརྩི་བ་གཅེས། །ཐིག་ལེ་ཤར་བ་ཡོངས་ལ་བཞེད། །གསུམ་པ་དབང་༥བསྲེས་ཕྱོགས་༡༠ཀྱིས་བགོ །གཅིག་གཉིས་མེ་ལ་གསུམ་བཞི་ས། །ལྔ་དྲུག་ལྕགས་ལ་བདུན་བརྒྱད་ཆུ། །དགུ་དང་ཐིག་ལེ་ཤིང་ཁམས་ཡིན། །གནས་བཞིར་༤མཚོས་བརྒྱན་༩བུ་གས་བགོ །ལྷག་མས་ཕྱོགས་༡༥སྦྱངས་ལྷག་མེད་ན། །སླར་ཡང་བུ་༩གས་སྦྱང་བར་བྱ། ། ལྷག་མ་ཉི་མའི་སྨེ་བ་ཡིན། །ལྔ་པའི་གནས་ལ་འབྱུང་བ་བསྣན། །ཀླུ་བགོས་ལྷག་ནི་སྤར་ཁ་སྟེ། །གཅིག་འབྱུང་ལི་ལ་གཉིས་པ་ཁོན། །དེ་སོགས་རིམ་གྱིས་རྟོགས་པར་བྱ། །

༈ དེ་ལྟར་འཕྲལ་ཡུན་དགེ༵་ལེགས༵་གཞིར་གྱུར་པའི། །སྐར་ནག་རྩིས་གཞུང་རྒྱ་མཚོ་ཆེན་པོ་ལས། །ཉེར་མཁོ་རི་མོའི་བྱ་བ་ཉུང་ཤས་ཤིག །སྤྲིན་མཐོང་ཉི༵་མ༵་བཞིན་དུ་གསལ་བར་བྱས།༡།དེ་དགེ༵་རྒྱལ་དང་རྒྱལ་སྲས་རྗེས་བསླབ་སྟེ། །ངེས་ལེགས་བྱང་ཆུབ་མཆོག་གི་ས་བོན་དུ། །ཉི༵་ལྟར་ཉེ་རིང་མེད་པར་བསྔོས་དེས་མཐུས། །མ༵་རྣམས་ཀུན་མཁྱེན་གོ་འཕང་ཐོབ་པར་ཤོག༢།བདག་ཀྱང་སྒོ་གསུམ་དགེ་བའི་ལམ་ཞུགས་ཏེ། །ལེ༵གས་ལམ་དམ་ཆོས་སྤྱོད་པས་དུས་འདའ་ཞིང་། །གནས་ལྔ་རིག་པའི་ཤེས་རབ་ཉི༵་མ༵་ཡིས། །བློ་གྲོས་པདྨོའི་འདབ་བརྒྱ་གྲོལ་གྱུར་ཅིག༣།གནས་སྐབས་སུ་ཡང་འགྲོ་ཀུན་བདེ་སྐྱིད་ཀྱི། །ལོངས་སྤྱོད་རྫོགས་ལྡན་དཔལ་གྱིས་འབྱོར་བ་དང་། །ཡང་དག་དམ་པའི་ཆོས་ལ་ཀུན་དད་པས། །འཕྲལ་ཕུག་དགེ༵་ལེ༵གས་ཉི༵་མ༵་གསལ་གྱུར་ཅིག༤།