PJCW-KABUM-01-KA-019

🚧 This website is under continued development. We appreciate your patience!

Previous Text Back to Volume PageNext Text

Wylie title	dben pa'i gtam lha'i rnga sgra
Location	dpal sprul bka' 'bum Volume 1, Text 19, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Discourses - gtam

Tibetan Text

[edit]

༄༅། །དབེན་པའི་གཏམ་ལྷའི་རྔ་སྒྲ་ཞེས་བྱ་བ་བཞུགས་སོ། །

ན་མོ་གུ་རུ་ལོ་ཀཱི་ཤྭ་ར་ཡ། མཐའ་ཡས་འགྲོ་ལ་བརྩེ་བ་ལྷུར་ལེན་པའི། །མཁྱེན་དང་ནུས་པ་དཔག་དཀའི་མཛད་པ་ཅན། །རིགས་གསུམ་སེམས་དཔའ་རྒྱལ་བ་ཐམས་ཅད་ཀྱི། །རྒྱལ་ཚབ་སེམས་དཔར་གྱུར་ལ་ཕྱག་འཚལ་ལོ། །གང་ལ་བརྟེན་ན་དུས་ཀུན་མི་བསླུ་བ། །འདུལ་བ་མདོ་སྡེ་མངོན་པ་རིན་པོ་ཆེ། །བསླབ་གསུམ་ཡོངས་རྫོགས་མཚུངས་མེད་བླ་མའི་བཀའ། །མན་ངག་བདུད་རྩིའི་སྙིང་ཁུ་དེས་ཀྱང་སྐྱོངས། །སྐལ་བཟང་གང་ཞིག་ཞི་བའི་ལམ་དགྱེས་པ། །དེ་འདྲའི་ཡིད་ལ་སྤྲོ་དགའ་བསྐྱེད་པའི་ཕྱིར། །དབེན་པའི་གཏམ་འདི་ལྷ་ཡི་རྔ་སྒྲ་བཞིན། །སྒྲོགས་པར་བགྱི་ཡིས་དེ་དོན་ཡོད་བགྱིད་རིགས། །ཀྱེ་ཧོ་འཁོར་བ་སྒྱུ་མའི་གྲོང་ཁྱེར་ན། །མེད་བཞིན་སྣང་བ་ལས་ཀྱི་ཚོང་ཟོག་གིས། །སྡུག་བསྔལ་གསུམ་གྱི་མཛོད་ཁང་བསགས་པ་ལ། །མ་རིག་སེམས་ཅན་བུང་བ་བཞིན་དུ་འཁོར། །སྲིད་པའི་འགྲོ་བ་ཞིང་རྡུལ་ལས་མང་ཡང་། །བདེ་བའི་རྣམ་འགྱུར་ཉིན་སྐར་ལས་དཀོན་ན། །འགྲོ་བའི་གནས་འདིར་སུ་ཞིག་མི་སྐྱོ་སྟེ། །བདེ་གཤེགས་ཆོས་ལ་རབ་དགའ་ཅིས་མི་སྐྱེ། །སྙིགས་མའི་སྐྱེ་བོ་ཤིན་ཏུ་བསྟེན་དཀའ་བ། །སྲིན་པོ་བཞིན་དུ་ཁྲོ་བའི་ངང་ཚུལ་ཅན། །གང་དང་འགྲོགས་ན་ཉོན་མོངས་ཚོགས་འཕེལ་བ། །དུས་ངན་གྲོགས་ཀྱིས་སུ་ཞིག་སྐྱོ་མི་འགྱུར། །བསགས་ཤིང་བསགས་པའི་ལོངས་སྤྱོད་སྦྲང་རྩི་བཞིན། །རང་གིས་མི་སྤྱོད་ཆོས་ཕྱིར་ལྟ་ཅི་སྟེ། །འཆི་བའི་ཚེ་ན་ཞེན་པའི་ལྕགས་སྒྲོག་གིས། །རང་རྒྱུད་འཆིང་བའི་རྒྱུ་དེ་ཁོ་ནར་ཟད། །ཕུན་སུམ་ཚོགས་ཤིང་དྲེགས་པའི་སྙན་པ་ཀུན། །གཡེང་བའི་ངང་དུ་གསོན་པའི་ཚེ་སྤངས་ནས། །འཆི་བའི་ཚེ་ན་གདུང་བ་སྐྱེ་འགྱུར་བའི། །གནས་འདི་བསམ་ན་འབྱོར་བའི་ཅི་ཞིག་བྱ། །སྲིད་གསུམ་བདག་པོ་བསྐལ་བརྒྱར་བྱས་ན་ཡང་། །འདོད་པའི་ཡུལ་འདིས་ངོམས་པ་ལྟ་ཅི་སྟེ། །མྱང་བཞིན་མྱང་བཞིན་སླར་ཡང་སྲེད་པ་འཕེལ། །ཇི་ཙམ་སྲེད་བཞིན་སྲིད་པའི་རྒྱུ་རུ་ངེས། །ལོངས་སྤྱོད་བདེ་ཡང་འབྲས་བུ་སྡུག་བསྔལ་ཏེ། །སྲིད་པའི་འཕྲལ་བདེ་ངན་སོང་ཁོ་ནའི་རྒྱུ། །ངེས་པར་བརྟགས་ན་འཁོར་བའི་གནས་རིས་འདིར། །ཁབ་རྩེ་ཙམ་གྱི་བདེ་བ་ཡོད་མི་སྲིད། །དྲེགས་ལྡན་སྟོང་གི་སྤྱི་བོའི་ལ་ཐོད་ཀྱིས། །མངོན་པར་འདུད་བྱས་སྙེམས་པ་འཆང་རྣམས་ཀྱང་། །བྲན་གྱི་ཐ་མར་འཆི་བའི་སྐབས་ཡོད་ན། །ཁེངས་དང་རྒྱགས་པས་བདག་ལ་ཅི་ཞིག་བྱ། །སྙིགས་མའི་མཐའ་འདིར་ཐུབ་པའི་བསྟན་པ་ཡང་། །གཟུགས་བརྙན་ཙམ་གྱིས་ཚེ་འདིའི་ཆེ་ཐབས་བགྱིད། །ལུང་རྟོགས་གནས་ལ་བརྩོན་པ་མི་འོང་གིས། །རང་རྒྱུད་བསླབ་གསུམ་བསྟན་པའི་སྙིང་པོར་ཟུངས། །རང་གི་བློ་རྩེ་ཆོས་ལ་སྒྲིལ་བ་ན། །རང་དང་མཐུན་པ་སུ་ཡང་ཡོད་དཀའ་བས། །རང་སེམས་གཙང་མ་རང་གི་དབང་བྱས་ཏེ། །ཐམས་ཅད་མགུ་བའི་བློ་རྒྱ་བསྐྱུངས་ན་ལེགས། །རྒྱལ་བ་སྟོང་གིས་གདུལ་བར་མ་ནུས་པའི། །དུས་ངན་འགྲོ་ལ་སོ་སྐྱེ་བདག་ལྟས་ཅི། །དེ་སླད་གཞན་དོན་སྨོན་པའི་ཡུལ་བགྱིས་ནས། །འཕགས་པའི་ལམ་ལ་བདག་ཉིད་གཉེར་བར་རིགས། །རྣམ་གཡེང་འཁྲུལ་བ་སྤྱོད་བཞིན་སླར་ལ་འཕེལ། །བདག་གི་ཚེ་ནི་རང་བཞིན་རྒྱུན་དུ་འཛད། །ཡེངས་མ་ལམ་ལ་འཆི་བའི་དགྲས་གཏུགས་ན། །དེ་ལས་བསླུས་པ་བདག་ལ་ཇི་ལྟར་ཡོད། །གདུལ་བར་དཀའ་བའི་སེམས་ནི་གདུལ་ནུས་ན། །མཁས་པའི་ལག་རྗེས་དེ་ལས་གཞན་མེད་དེ། །གྲུབ་པའི་རྟགས་ཀྱང་དེ་ལས་ལྷག་པ་མེད། །བཙུན་པའི་ཚུལ་ཡང་འདི་ཙམ་ཁོ་ནར་ཟད། །བཅོས་ཤིང་བཅོས་པའི་ཕྱི་ཚུལ་མཛེས་མཛེས་ལྟས། །གཞན་དག་མགུ་ནས་བསྔགས་པ་སྨྲ་ན་ཡང་། །རང་གི་སེམས་ལ་ཆོས་བརྒྱད་མ་སྤངས་ན། །སོ་སྐྱེའི་རྒྱུད་འདི་འཆིང་བྱེད་མང་བ་ཡིན། །དུས་ངན་གྲོགས་ཀྱི་སྣང་བ་མགུ་ཙམ་ན། །ཅིས་ཀྱང་རང་རྒྱུད་ཆོས་ལས་རིང་བའི་རྟགས། །རྙེད་དང་བཀུར་སྟིའི་སྒོ་འཕར་ཕྱེ་ཙམ་ན། །ངན་འགྲོའི་ཁང་སྒོར་བདག་ཉིད་སླེབས་པ་ལགས། །རྨོངས་པའི་བྱིས་པ་སྨིག་རྒྱུས་རི་དྭགས་བཞིན། །སྲིད་འབྱོར་ཕྲ་མོས་བསླུས་པ་འདི་མཐོང་ནས། །མཁས་པའི་རང་བཞིན་ཞེན་པའི་སྒྲོག་དྲལ་ཏེ། །དབེན་པའི་གནས་སུ་སྒྲུབ་ལ་བརྩོན་པར་རིགས། །ཐུབ་པས་བསྔགས་པ་དབེན་པའི་རི་ཁྲོད་དུ། །རྒྱལ་དང་རྒྱལ་སྲས་དྲང་སྲོང་ཆེ་རྣམས་བསྟེན། །ཡོན་ཏན་ཀུན་གྱི་འབྱུང་གནས་རིན་པོ་ཆེ། །གནས་འདི་བསྟེན་ལ་ཐར་ལམ་ཉེ་བ་ཡིན། །མཐོ་བའི་ངོ་སྲུང་དམའ་བའི་སྐྱོང་བྲན་དང་། །མཉམ་པའི་ཆགས་སྡང་དག་གིས་འཆིང་བ་མེད། །རང་ཉིད་གཅིག་པུ་ངེས་འབྱུང་འོད་དཀར་ཅན། །དབེན་པའི་མལ་ན་ཟླ་བ་བཞིན་དུ་མཛེས། །ཆགས་མེད་མཁའ་ལ་ཉི་མའི་དཀྱིལ་འཁོར་བཞིན། །དབེན་པའི་གནས་ན་མང་ཐོས་འོད་སྟོང་ཅན། །མི་སྣང་ལྷ་བརྒྱའི་སྐར་ཚོགས་མཛེས་བསྐོར་ཀྱང་། །གཡེངས་བའི་རྒྱུ་མིན་དམ་ཆོས་སྤྱོད་པའི་གྲོགས། །རྨོངས་པའི་སྐྱེ་བོས་མཐོང་བ་སྤངས་པ་ན། །འཕགས་པ་མཆོགས་གིས་གཟིགས་པ་ལྷུང་མཛད་དེ། །རྒྱལ་དང་རྒྱལ་སྲས་སེམས་དཔའ་ཆེ་རྣམས་ཀྱིས། །སྲས་དང་སྤུན་དགོངས་བདག་གི་བཤེས་སུ་བགྱིད། །འདོད་པའི་ཡུལ་ལ་དུག་ལྟར་བྱོལ་ཙམ་ན། །དམ་ཆོས་སྨན་མཆོག་བདག་གིས་རྙེད་འགྱུར་ཏེ། །འཆི་བ་མེད་པ་ལྷ་ཡུལ་བདུད་རྩི་ལས། །ལྷག་པའི་རོ་བདའ་སྙིང་ལ་བདུད་རྩིར་འགྱུར། །འདུ་འཛིའི་དགྲ་ལས་རྒྱང་རིང་འབྲོས་པ་ན། །ལྷག་པའི་ཏིང་འཛིན་བདག་གིས་རྙེད་འགྱུར་ཏེ། །མངོན་ཤེས་རྒྱལ་སྲིད་ལག་རྩེར་སྦྱིན་ནུས་པའི། །ཡོན་ཏན་འཁོར་འདབ་རྣམ་པར་རྒྱས་པར་འགྱུར། །ཆོས་སྤྱོད་དགེ་བ་ལྷག་པར་འཕེལ་ན་ཡང་། །དབེན་པའི་གནས་སུ་རློམ་པ་མི་སྐྱེ་སྟེ། །འགྲན་ཟླའི་གནས་དང་ངོམ་པའི་ཡུལ་མེད་ལ། །སྲས་བཅས་རྒྱལ་བ་བདག་གི་དཔང་དུ་འགྱུར། །ལེ་ལོས་བཅོམ་བྱས་བག་མེད་ལུས་ན་ཡང་། །ཆགས་སྡང་ཉོན་མོངས་དབེན་པར་འཕེལ་མིན་ཏེ། །རང་གི་རྒྱུད་ལ་བརྟགས་པ་ལྷུར་ལེན་ལས། །གཞན་ལ་བསྟེན་ནས་ཁྲོ་དང་ཞེན་དུ་མེད། །རྣམ་གཡེངས་ལས་དང་འདུ་འཛིའི་གྲོགས་མང་དང་། །ཆགས་སྡང་ཡུལ་ལས་རིང་དུ་སོང་དེས་ན། །དབེན་པའི་གནས་སུ་དམ་ཆོས་ཁོ་ན་ལས། །བདག་ལ་བསམ་པར་བྱ་བ་ཅི་ཞིག་ཡོད། །ངེས་འབྱུང་བློ་དང་སྙིང་རྗེའི་སེམས་སྟོབས་དང་། །མོས་གུས་དད་པས་མཆི་མ་སློང་ནུས་པ། །དབེན་པའི་གནས་འདིར་ཤུགས་ཀྱིས་སྐྱེ་འགྱུར་ཏེ། །བསྒྲིམ་པ་མེད་པར་ཏིང་འཛིན་ལ་གནས་འགྱུར། །གང་ལ་བརྟེན་ན་གནས་སྐབས་མཐར་ཐུག་ཏུ། །ཕུང་བར་འགྱུར་བ་ཁྱིམ་དང་སྡིག་གྲོགས་དང་། །འདོད་པའི་ཡུལ་བཅས་ངེས་པར་ཐག་བསྲིང་བས། །ཉོན་མོངས་ཚོགས་ཀུན་ཤུགས་ཀྱིས་བྲི་བར་འགྱུར། །སྣ་ཚོགས་བྲག་རིའི་བ་གམ་མཛེས་པ་ནི། །ཡིད་འོང་བདེ་བའི་ངལ་སྟེགས་སྟོང་སྦྱིན་པ། །ཐུབ་བསྟན་རིན་ཆེན་ཐར་པའི་སྟེགས་བཞིན་དུ། །སྐལ་བཟང་སྐྱེ་བོའི་བསྟི་གནས་ཁོ་ན་ཡིན། །ཡལ་འདབ་དུད་པའི་འཁྲི་ཤིང་གཡོ་བའི་ཚེར། །མགྲིན་སྙན་གླུ་ཡིས་ངེས་འབྱུང་བསྐྱེད་པའི་གཏམ། །ཡང་ཡང་སྒྲོག་མཁས་ལྷ་ཡི་བྱ་ཚོགས་འདྲས། །སུམ་རྩེན་རྒྱལ་རྔའི་ཁེངས་པ་བཅོམ་མམ་སྙམ། །དཀར་དམར་ཚོན་བརྒྱའི་ལང་ཚོ་བཀྲག་འབར་བའི། །དྲི་བཟང་དབྱིབས་མཛེས་མེ་ཏོག་ཚོམ་བུའི་ཚོགས། །ཐབས་མཁས་སེམས་དཔའི་བསོད་ནམས་ཉེར་སྤྱད་དུ། །རྒྱལ་བའི་མདུན་སར་ཆས་ལ་རིངས་བ་བཞིན། །ནང་དུ་རྐང་དྲུག་སྙན་པའི་གླུ་སྒྲ་ཅན། །པདྨའི་ཚལ་དུ་རབ་དགས་ལེགས་འཇུག་པ། །ཐུབ་བསྟན་སྐྱོན་མེད་པདྨའི་སྐྱེད་ཚལ་དུ། །ཐོས་བསམ་སྒོམ་པར་འཇུག་ལ་བསྐུལ་བ་བཞིན། །བདུད་རྩིའི་ཟིལ་མངར་མྱང་ཞིང་མྱང་ནས་སླར། །མྱོས་པའི་འཕུར་ལྡིང་བར་སྣང་ལ་སྤྱོད་པ། །བསམ་དང་བསྒོམ་པའི་དམ་ཆོས་རོ་མྱོང་ནས། །ཞེན་མེད་སྤྱོད་པའི་བརྡ་སྟོན་མ་ཡིན་ནམ། །དྭངས་པའི་མཁའ་དབྱིངས་ཉི་ཟླའི་འོད་སྣང་ཅན། །ལྷུན་གྲུབ་ཐིག་ལེའི་མཛེས་པ་སྟོང་ངོམ་པ། །འོད་མིན་སྣང་བའི་མཛེས་བཀྲགས་འཕྲོག་ནས་སླར། །བདག་སྐལ་ཟོངས་སུ་འདི་ན་བཀྲམ་པ་བཞིན། །མཐིང་ཞུན་རྒྱ་མཚོ་མཛེས་པ་ལ་འགོང་བ། །སྒྲིབ་བྲལ་ལྷ་ལམ་སྟོང་པའི་རང་མདངས་ཅན། །གདོད་མའི་གཞི་ཀློང་གཉུག་མ་ངས་མཚོན་ཞེས། །གསང་ལམ་ངོ་སྤྲོད་གསང་དོན་བདག་ལ་འདོམས། །ལྷུང་ལྷུང་འབབ་པ་ཕུ་ཆུ་སྙན་པའི་སྒྲ། །རྒྱུན་རིང་བརྩོན་པས་རྣམ་མཁྱེན་རྒྱ་མཚོ་རུ། །སྙོགས་པར་བགྱི་ཞེས་གདམས་ངག་འདི་འདོམས་ཏེ། །ཞི་བསིལ་བདུད་རྩིའི་དཔལ་ཡང་ལྷག་པར་སྦྱིན། །དཔག་བསམ་དཔལ་མོའི་དྲེགས་པ་གཞོམ་པ་ལ། །ཆས་པ་མིན་ནམ་འབྲས་ལྡན་རྩ་བའི་རོ། །དཀའ་ཐུབ་ཟས་འདིས་ངོམས་པར་གང་གྱུར་དེས། །དབང་པོའི་དཔལ་འབྱོར་ལན་སྟོང་ཟིལ་གྱིས་མནན། །བྱིང་བ་བསད་དང་འབྱམས་པའི་རྣམ་རྟོག་གཅོད། །བརྟུལ་ཞུགས་རོལ་པས་ཉམས་དབྱངས་ཟང་མ་ཡང་། །དབེན་པའི་གནས་སུ་གབ་སྐྱིལ་མི་དགོས་ཏེ། །བྱུང་རྒྱལ་ཉམས་ཀྱིས་སྒེགས་པས་དགྱེས་པར་འགྱུར། །ཟང་ཐལ་རིག་པའི་རོལ་རྩལ་སྦྱངས་པའི་ཡུལ། །འཁོར་འདས་སྤྱོད་པའི་བག་ཉལ་སློང་བ་ལ། །རང་ཉམས་བག་ཡངས་དགྱེས་པའི་རྩེད་འཇོ་སྟོང་། །འགོག་པ་མེད་པའི་ཡ་མཚན་རྣམས་པར་འབར། །སྣང་བའི་ཡུལ་དང་ཞེན་པའི་རྡོས་བཅས་ལུས། །སྒྱུ་མར་སྦྱོང་བའི་ཏིང་འཛིན་ལ་འཇུག་པའི། །སྒྱུ་མའི་རྣལ་འབྱོར་ཧཱུྃ་སྒྲའི་རྒྱང་གླུ་ཅན། །སྒྱུ་མའི་ཡུལ་ན་བག་ཡངས་ཁོ་ནར་སྤྱོད། །ཟངས་མ་ཐལ་དུ་རིག་པའི་རྣམ་རོལ་བཞིན། །ཆོས་ཅན་སྣང་བ་དུམ་བུར་གཞིག་པའི་མཚོན། དྲག་པོའི་ཧཱུྃ་སྒྲས་གནམ་ས་འགེངས་པ་ཡང་། །དབེན་པའི་གནས་སུ་དོགས་པ་མེད་པར་སྒྲོགས། །མིག་སྟོང་ལྡན་པའི་ལག་ཉལ་ལ་འགྲན་པའི། །རྡོ་རྗེའི་ལུས་མཆོག་རྡོ་རྗེར་བཞེངས་པ་ཡང་། །སྐུ་གསུམ་ཡེ་ཤེས་རང་ལ་མཚོན་བགྱིད་ཀྱིས། །སྣོད་མིན་སྣང་བའི་གོ་སྐབས་འདིར་ཡོད་མིན། །རྣལ་མའི་གཤིས་སུ་རྣལ་འབྱོར་མནལ་བའི་མལ། །དབེན་པའི་གནས་སུ་རིང་ནས་བཤམས་པ་བཞིན། །སྤོང་བའི་བསམ་གཏན་མགྲོན་དུ་བོས་ནས་སླར། །ཡིད་ཀྱི་གྲོགས་སུ་བཀོལ་བ་མ་ཡིན་ནམ། །ཐོས་སྒྲོགས་ཞི་བའི་ཏིང་འཛིན་འགུགས་པའི་རྫས། །ཆོས་བདུན་མི་གཡོ་མཉམ་པའི་སྐྱིལ་ཀྲུང་དང་། །སེམས་དཔའི་གཟིགས་སྟངས་ཁྲོ་བོ་རོལ་བའི་སྟབས། །དགྱེས་པའི་གད་མོས་དབེན་པར་དགྱེས་རྣམས་དགྱེས། །གངས་རི་འཛིན་པ་གདོང་ལྔའི་དབང་པོ་བཞིན། །མི་ཞུམ་མི་སྐྲག་འཁོར་འདས་ཟིལ་གནོན་པར། །ཆོས་ཀྱི་དབྱིངས་ལ་ལྟ་བ་མི་གཡེལ་བ། །དབེན་པའི་གནས་སུ་མི་ཡི་སེང་གེ་ཡིན། །རྣམ་རྟོག་རི་དྭགས་ཟོས་པའི་ང་རོ་ཡིས། །ཐེག་དམན་ཝ་སྐྱེས་གླད་པ་འགེམ་སྤྱོད་པ། །མངོན་སུམ་གཡུ་རལ་རྒྱས་པའི་ཆེ་རྟགས་ཅན། །རྣམ་གཡེང་གྲོང་དུ་འབྱམས་པ་ཇི་ལྟར་འོས། །དབྱིངས་སྣང་ཡེ་ཤེས་རྩལ་ལ་རོལ་བའི་ཉམས། །ལྷུན་གྲུབ་སྣང་བས་དྲེགས་པའི་ཤ་ཚུགས་ཅན། །གཟུང་འཛིན་ཡན་ལག་བསྐུམ་པའི་གཉིས་འཐུང་དབང་། །དབེན་པའི་གནས་སུ་ཡང་དག་རྟོགས་པས་དགྱེས། །ཤེས་རབ་རིག་པ་རང་བྱུང་སྒྲོན་མའི་གདངས། །རང་སྣང་ལོངས་སྤྱོད་རྫོགས་པའི་འཇའ་རིས་ལ། །རྒྱང་ཞག་ཟུར་གྱིས་རོལ་བའི་གཟིགས་སྟངས་ཅན། །རྣམ་རྟོག་སྤྲོས་པས་དབེན་པའི་གནས་དེར་དགྱེས། །བདེ་དྲོད་ཡེ་ཤེས་འབར་བའི་ལུས་དབེན་དང་། །བརྗོད་བྲལ་ངག་དབེན་རྫོགས་པའི་དྲང་སྲོང་དབང་། །སྒྲོན་དྲུག་སེམས་ཀྱི་དབེན་པ་ལ་དགྱེས་པའི། །སྣང་བཞིའི་རྩེད་འཇོ་འདི་རོལ་མ་ཡིན་ནམ། །མ་དག་བག་ཆགས་ཐུར་མ་སེལ་བའི་གནད། །ཟིམ་བུར་ཐུགས་རྗེའི་གཟུགས་པ་ལྷུར་ལེན་པའི། །མངོན་ཤེས་སྤྲུལ་སྐུའི་སྤྱན་གྱིས་གཟིགས་པ་ཅན། །དབེན་པའི་གནས་སུ་ལྷ་ཡི་དྲང་སྲོང་བཞིན། །ཐུབ་པ་མཆོག་དང་ཐུབ་པའི་སྲས་རྣམ་དང་། །གྲུབ་པ་རྣམས་ཀྱིས་ལེགས་པར་བསྟེན་གྱུར་པ། །དབེན་པ་ཡིད་འོང་ལྷ་ཡི་དགའ་ཚལ་ལས། །ལྷ་ཡི་གནས་འདིར་སུ་ཞིག་སྤྲོ་མི་འགྱུར། །གནས་འདིར་གནས་ན་སྲེད་པའི་ཡིད་འབྱུང་ཞིང་། །འཁོར་བར་མི་སྐྱོ་ཞི་བའི་བསམ་གཏན་ཅན། །སྨོན་པའི་སྟོབས་ཀྱི་དོན་གཉིས་ཟུང་དུ་འཇུག །འཁོར་བ་དོང་སྤྲུག་སེམས་ཀྱིས་འགྲོ་དོན་ནི། །རྣམ་ཐར་དབྱིངས་སུ་སྤྲོས་པ་ཞི་བའི་བློ། །ཡེ་ཤེས་ངང་ལ་རང་སྣང་སྲིད་པའི་མཚང་། །རང་སར་ཞིག་ཚེ་འཁོར་བ་སྟོང་ཞེས་གྲགས། །ཟང་ཐལ་རིག་པ་བློ་ཡིས་མི་ཐུག་པ། །ཆོས་སྐུའི་གཤིས་འདི་ཡེ་ནས་གནས་པ་སྟེ། །མ་བཅོས་མ་བསྒྱུར་རང་གི་ངང་བཞག་ན། །གདོད་མའི་གཞི་ཀློང་རང་བཞིན་གསལ་བ་ཡིན། །རྒྱ་ཡན་བར་མེད་རྡོ་རྗེ་སྙིང་པོའི་ཀློང་། །མཉམ་པའི་དབྱིངས་སུ་ལྟ་སྒོམ་སྤྱོད་པ་མེད། །ས་ལམ་རྩོལ་སྒྲུབ་བྱིས་པའི་རྩེད་མོར་ཟད། །རང་བཞག་རིག་པ་རྡོ་རྗེ་སེམས་དཔའ་ལ། །རང་བཟོས་བཅོས་ན་འཁྲུལ་པའི་ལམ་དུ་ལྷུང་། །རིག་པའི་ཡེ་ཤེས་སྤྲོས་པ་དབེན་པ་ནི། །དབེན་པ་ཀུན་གྱི་སྙིང་པོ་མཆོག་ལགས་ཏེ། །དབེན་པ་འདིར་དགྱེས་བསྐལ་པ་བཟང་པོ་ནི། །གྲོང་ན་གནས་ཀྱང་ཤིན་ཏུ་དབེན་པར་སྤྱོད། །བློ་གཏད་སྙིམས་བྱེད་གདོན་གྱིས་བཅིང་བ་ན། །མ་འཁྲུལ་སེམས་ཉིད་འཁྲུལ་པའི་གཡང་ལ་སྐྱུར། །གཏད་མེད་ངང་དུ་འཛིན་མེད་གནས་པ་ན། །ཆོས་སྐུའི་ཀློང་དུ་འཁོར་འདས་རང་སར་གྲོལ། །སྣ་ཚོགས་ཐབས་ཀྱིས་བསྒྲུབ་པའི་བསམ་གཏན་ནི། །འདུས་བྱས་ཉིད་ཕྱིར་རྐྱེན་གྱིས་ངེས་པར་བསླུ། །རྩོལ་མེད་རང་བཞག་ཆོས་སྐུའི་དགོངས་པ་ནི། །འདུས་མ་བྱས་ཀློང་རྐྱེན་ངན་གྲོགས་སུ་འཆར། །འདིའོ་སྙམ་པའི་ཆེད་འཛིན་འཆིང་བའི་སྒྲོག །ཡིན་ནོ་སྙམ་པའི་ངེས་ཤེས་འཁྲུལ་པའི་རྒྱུ། །བསྒྲུབས་སོ་སྙམ་པའི་བྱ་རྩོལ་བྱས་པའི་བློ། །ཐམས་ཅད་ཆམ་གྱིས་བསྐྱུར་ན་ཆོས་ཉིད་ཡིན། །སྟོང་དང་མི་སྟོང་ལས་འདས་སྟོང་ཆེན་ཏེ། །མཐོང་དང་མི་མཐོང་མ་ཡིན་ལྟ་བའི་གནད། སྒོམ་དང་མི་སྒོམ་འཆིང་བྱེད་ཆད་པ་ན། །ཇི་ལྟར་སྤྱོད་ཀྱང་སྒྱུ་མའི་རོལ་བ་ཙམ། །རིམ་དང་རིམ་མིན་ཐེག་པའི་རྣམ་གྲངས་དང་། །བདེན་དང་མི་བདེན་གྲུབ་མཐའི་ཞེ་འདོད་ཀུན། །དྲི་ཟའི་གྲོང་ཁྱེར་བཟང་ངན་རྩོད་པ་འདྲ། །གཏན་མེད་རྟོགས་ན་སྦྲུལ་མདུད་བཞིན་དུ་འཇིག །ཟང་ཐལ་རིག་པ་བར་མེད་མཉམ་པའི་ཀློང་། །རིག་རྩལ་རྟོག་པ་ཆུ་རླབས་བཞིན་གཡོ་ཡང་། །འཛིན་པའི་སྲོག་བྲལ་ཤི་བའི་སྦྲུལ་བཞིན་དུ། །རྣལ་འབྱོར་ལྡན་པས་འདོད་དགུར་སྤྱོད་པར་འགྱུར། །ཆོས་ཉིད་གཞི་བཞག་རིག་པ་རང་མལ་ལ། །སྒོམ་པའི་མན་ངག་རྒྱ་མཚོ་ཅོག་བཞག་ཡོད། །རིག་རྩལ་གཞི་བཞེངས་ཆོས་ཉིད་རོལ་པ་ལ། །སྤྱོད་པའི་མན་ངག་སྣང་བ་དབང་བསྒྱུར་ཡོད། །ཆགས་སྡང་རྟོག་པའི་བྲག་གཡང་མཐོན་པོ་དང་། །རྣམ་རྟོག་འཁྲུལ་བའི་ནགས་ཚལ་གཟིང་བ་འདི། །རང་གྲོལ་སྤྱོད་པའི་མཁའ་ལྡིང་རྒྱལ་པོ་དང་། །རིག་སྟོང་རི་དྭགས་རྩེད་འཇོར་རོལ་པའི་གནས། །འདི་ཡིན་སྙམ་པའི་ངེས་ཤེས་མ་ཟད་ན། །ཇི་ལྟར་བསྒོམས་ཀྱང་འཁྲུལ་བའི་ལམ་ཡིན་ཏེ། །ཐམས་ཅད་མཐོང་ནས་བློ་གཏད་སྟོར་བ་ན། །བགྲོད་པའི་ས་ལམ་ད་གདོད་ཇི་ལྟར་རྙེད། །ཇི་ལྟར་བྱས་ཀྱང་དེ་ལྟར་གྲོལ་བའི་ལམ། །གང་ལྟར་བསྒོམས་ཀྱང་གཉུག་མ་ཆོས་སྐུའི་ཀློང་། །བྱིས་པའི་རྩེད་མོ་བཟང་ངན་མདོ་དོན་གཅིག །ཆེད་འཛིན་མེད་ན་བློ་བདེ་རྒྱུན་མི་ཆད། །འདུས་བྱས་ཆོས་ཀུན་སྐད་ཅིག་སྐད་ཅིག་སྟེ། །སྐད་ཅིག་སྣང་བས་སེམས་ལ་ཕན་གནོད་ཅི། །ལེགས་ཉེས་ཆུ་རིས་ཆུ་ལ་ཐོབ་ཤོར་མེད། །ཞེ་འདོད་མེད་ན་ཆོས་བརྒྱད་ངང་གིས་འཇིག །རང་གི་ངང་འདི་ཡིན་གྱིས་ཅི་ཞིག་འཚོལ། །རང་བཞག་ཆོས་སྐུ་ཡིན་གྱིས་གང་ཞིག་སྒྲུབས། །རྩོལ་སྒྲུབ་འཆིང་བ་ཡིན་པར་སུས་ཤེས་པ། །སྣ་ཚོགས་གྲུབ་མཐའི་སྒྲོག་ལས་གྲོལ་བར་འགྱུར། །བྱར་མེད་ཆོས་སྐུའི་ངང་དུ་གནས་ནས་སླར། །སྲིད་པའི་རྡུལ་ཕྲན་བགྲང་དུ་མི་ཁོམ་གྱིས། །རང་བཞག་ཡངས་པ་ཆེན་པོའི་བདེ་ཀློང་འདིར། །ཞེ་འདོད་གྲུབ་མཐའི་བཤད་ཡམ་སྤངས་ན་ལེགས། །འགའ་ཞིག་བསྟན་བཅོས་བརྩོམ་ཞིང་འགའ་ཞིག་འཆད། །ལ་ལ་རྩོད་པའི་འཁོར་ལོས་གཡེངས་གྱུར་མོད། །བརྟགས་ན་ཐམས་ཅད་བདེན་ཏེ་ཐམས་ཅད་རྫུན། །བདེན་རྫུན་གནས་སྐབས་སྣང་བས་ཅི་ཞིག་བྱ། །རང་འདོད་གྲུབ་མཐའ་བསྒྲུབས་ཀྱང་འགྲུབ་དུས་མེད། །ཐམས་ཅད་བདེན་གྱིས་དགག་སྒྲུབ་དགོས་པ་མེད། །གཞན་གཞུང་བརྒལ་བརྟགས་སྨིག་རྒྱུའི་ཆུ་དང་འདྲ། །གནོད་མེད་ཆུ་ལ་རགས་ཀྱིས་ཅི་བྱར་ཡོད། །སྣང་བའི་རང་བཞིན་བདེན་ནམ་རྫུན་ཡང་རུང་། །སེམས་ཀྱི་རང་བཞིན་ཡོད་དམ་མེད་ཀྱང་རུང་། །འཁྲུལ་བའི་རང་བཞིན་སྟོང་རུང་མི་སྟོང་རུང་། །འདི་རང་ལགས་ཀྱི་དཔྱད་དུ་ཅི་ཞིག་ཡོད། །རྟོག་དཔྱོད་ཁོ་ནས་སྔར་ཡང་འཁྲུལ་ལགས་ན། །ད་དུང་དཔྱད་ན་སླར་ཡང་འཁྲུལ་འགྱུར་གྱིས། །རྟོག་མེད་ངང་དུ་འཛིན་མེད་ཉལ་བ་ན། །ལྷུན་གྲུབ་གཞི་ལ་གཡོ་བ་ཡེ་ནས་མེད། །འཕགས་དང་སོ་སྐྱེས་སྔ་མ་བརྒྱ་དག་གིས། །རང་གི་གྲུབ་མཐའ་རྣམ་པར་བཞག་གྱུར་ཀྱང་། །བྱིས་པའི་བློ་ལ་འགལ་འདུ་ཁོ་ནར་སྣང་། །ད་དུང་བཞག་ཀྱང་དེ་འདྲ་ཁོ་ནར་ཟད། །གང་ལྟར་བྱས་ཀྱང་འགལ་འདུ་སྤང་བའི་གཤིས། །ཇི་ལྟར་སྨྲ་ཡང་གནས་སྐབས་བདེན་ཤེས་ན། །མཐར་ཐུག་དོན་ལ་ཡིན་དང་མིན་པ་མེད། །རང་འདོད་སྤང་ནས་རང་བཞག་སོས་རེ་དལ། །འཁོར་བའི་བྱ་བྱེད་འཁྲུལ་བ་སྤངས་པ་ན། །མྱ་ངན་འདས་པ་ད་གདོད་སྒྲུབ་ཏུ་ཅི། །ཡེ་སངས་རྒྱས་པའི་རང་བཞིན་དེ་ཤེས་ན། །ཡང་སངས་རྒྱས་པའི་ཞེ་འདོད་ཇི་ལྟར་སྐྱེ། །ལམ་དང་འབྲས་བུ་ལྟ་དང་སྤྱོད་པ་དང་། །ཆོས་དང་ཆོས་མིན་ཐམས་ཅད་གཞི་མཉམ་སྟེ། །སྤང་བླང་རྩོལ་མེད་རྟོག་བྲལ་དགོངས་པའི་ཀློང་། །བྱ་རྩོལ་འཛིན་ཞེན་རང་སར་དག་པ་དགོས། །ད་ནི་མི་སྨྲ་གཏམ་ལ་བདེན་རྫུན་མེད། །ད་ནི་མི་སྤྱོད་ཆོས་ལ་ཡིན་མིན་མེད། །ཐམས་ཅད་རོ་མཉམ་བདེན་ནམ་མི་བདེན་རུང་། །གང་བྱུང་བྱུང་དུ་བྱུང་རྒྱལ་སྨྲས་པར་ཟད། །བརྟགས་ཤིང་བརྟགས་ཤིང་ཐམས་ཅད་རྫུན་པ་སྟེ། །བསྒྲུབས་ཤིང་བསྒྲུབས་ཤིང་ཆོས་ལ་གཏད་སོ་མེད། །ཅི་ཙམ་སྨྲས་ཀྱང་བརྗོད་པ་མི་ཟད་དེ། །བརྗོད་མེད་རྟོགས་ན་བརྗོད་པ་ཀུན་གྱི་རྒྱུ། །རང་བཞིན་དེ་ཤེས་ཁོ་བོ་མ་ལགས་ཏེ། །ཀུན་མཁྱེན་ཡབ་སྲས་བརྒྱུད་པ་རིན་པོ་ཆེའི། །གསུང་གིས་བསྐྱེད་ལས་བྲག་ཆ་བཞིན་སྒྲོགས་ཀྱིས། །རང་གིས་བརྗོད་པ་རང་གི་རྒྱུད་ན་མེད། །གདོལ་པའི་རང་བཞིན་དམ་པའི་ཤུན་པ་ཅན། །མ་སྨིན་སྨིན་འདྲ་ཨ་བུ་ལྷོད་པོ་བདག །རྩོམ་པའི་ངག་འདི་ཀིམ་པའི་མདོག་འདྲ་སྟེ། །ཇི་ལྟར་བལྟས་ཀྱང་རང་བཞིན་མཛེས་པ་ཡིན། །ཉེས་པའི་དུག་གིས་སེམས་ལ་ཁྱབ་མོད་ཀྱིས། །སྨྲས་པའི་གཏམ་འདིར་ཅུང་ཟད་འདྲེས་པ་མེད། །ཆོས་མཐུན་ལེགས་བཤད་བྱིས་པའི་ངག་ལས་ཀྱང་། །བླང་འོས་ཡིན་ཕྱིར་དགྱེས་པ་བསྐྱེད་པར་མཛོད། །ཉོན་མོངས་མེ་ཡིས་རང་རྒྱུད་བསྲེགས་བཞིན་དུ། །ལེགས་བཤད་དྲི་བཟང་ཕྱོགས་བརྒྱར་འགྱེད་པ་ཅན། །གདོལ་སྤྱོད་ཐལ་བ་འཛིན་པའི་སྤོས་རིང་འདིས། །ནམ་ཞིག་འཕགས་པ་དགྱེས་པ་ཡོད་གྱུར་ཅིག །རང་གི་ཡོན་ཏན་ཉིན་བཞིན་ཟད་འགྱུར་ཡང་། །གཞན་གྱི་སྣང་བ་ལེགས་པར་བསྐྱེད་ནུས་པ། །ལས་ངན་མེ་ཏོག་སྨིན་པའི་སྒྲོན་མེ་བདག །ཀུན་མཁྱེན་བརྒྱུད་པའི་མཆོད་གྲལ་འཛིན་གྱུར་ཅིག །རྒྱལ་བའི་རྒྱལ་ཚབ་རྒྱལ་བ་བཞིན་བཞུགས་ཤིང་། །རྒྱལ་སྲས་འདུ་བ་རྒྱལ་བའི་དུས་བཞིན་རྒྱས། །རྒྱལ་བའི་ལམ་བཟང་སྲིད་པ་འདིར་ཁྱབ་སྟེ། །ཐམས་ཅད་རྒྱལ་བའི་གོ་འཕང་ཐོབ་གྱུར་ཅིག །བདག་ཀྱང་སྐྱེ་དང་སྐྱེ་བར་དད་པའི་ནོར། །མི་འབྲལ་ཡིད་ཆེས་གཅིག་གིས་འཁོར་ཡུག་ནས། །ཟུམ་པའི་ཐལ་མོ་སྦྱོར་བའི་སྐལ་བཟང་གིས། །རྗེ་བཙུན་བླ་མའི་ཞབས་རྡུལ་རེག་གྱུར་ཅིག །དགེའོ།། །།