JKW-KABUM-23-'A-004-005

🚧 This website is under continued development. We appreciate your patience!

Previous Text Back to Volume PageNext Text

Wylie title	'od gsal 'char ba'i gsol 'debs zab don sprin gyi rol mo
Location	mkhyen brtse'i bka' 'bum Volume 23, sde tshan 4, Text 5, Pages 232-235 (Folios 4b5 to 6a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'od gsal 'char ba'i gsol 'debs zab don sprin gyi rol mo. In 'jam dbyangs mkhyen brtse'i dbang po'i bka' 'bum, Vol. 23: 232-235. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs
Colophon	།ཞེས་ལམ་ཐམས་ཅད་ཀྱི་མཐར་ཐུག་འོད་གསལ་སྙིང་པོའི་རྣལ་འབྱོར་དུ་དྲིལ་ཏེ། རྡོ་རྗེའི་ལམ་གཞན་རྣམས་ཀྱང་ཞར་ལ་ཚང་བའི་དོན་བརྗོད་བྱར་བྱས་པའི་ངེས་གསང་རྒྱུད་སྡེའི་ཡང་བཅུད་ཁྱད་པར་ཅན་འདིའང་། གྲུབ་པའི་དབང་ཕྱུག་བྱེ་བ་གཤེགས་པའི་རིང་ལུགས་ལ་མོས་པ་བརྟན་པོར་ཐོབ་པའི་རྣལ་འབྱོར་གཞོན་ནུ་འཇིགས་པ་མེད་པའི་སྡེས་སྦྱར་བ་སིདྡྷི་རསྟུ།།
	zhes lam thams cad kyi mthar thug 'od gsal snying po'i rnal 'byor du dril te/__rdo rje'i lam gzhan rnams kyang zhar la tshang ba'i don brjod byar byas pa'i nges gsang rgyud sde'i yang bcud khyad par can 'di'ang /__grub pa'i dbang phyug bye ba gshegs pa'i ring lugs la mos pa brtan por thob pa'i rnal 'byor gzhon nu 'jigs pa med pa'i sdes sbyar ba sid+d+hi rastu

Tibetan Text

Wylie

[edit]

འོད་གསལ་འཆར་བའི་གསོལ་འདེབས་ཟབ་དོན་སྤྲིན་གྱི་རོལ་མོ་ཞེས་བྱ་བ་བཞུགས་སོ། །ན་མོ་གུ་རུ་བྷྱཿ ཤིན་ཏུ་རྣམ་དག་འོད་གསལ་ཆོས་དབྱིངས་ངང་། །ཟུང་འཇུག་ལོངས་སྤྱོད་རྫོགས་སྐུའི་རྣམ་རོལ་གྱིས། །སྤྲུལ་པའི་གར་མཛད་རྩ་བརྒྱུད་བླ་མ་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །བཅོས་མིན་དད་དང་ངེས་འབྱུང་སྙིང་རྗེ་དང་། །རླབས་ཆེན་བྱང་ཆུབ་སྤྱོད་པའི་མཐར་སོན་ནས། །མཆོག་གསང་རྡོ་རྗེའི་ལམ་གྱི་སྨིན་གྲོལ་གྱིས། །དཔེ་དོན་འོད་གསལ་མཐོང་བར་བྱིན༴ ཁྱད་པར་གཟོད་ནས་སྤྲོས་པ་ཀུན་བྲལ་བའི། །སེམས་ཀྱི་རྡོ་རྗེ་གཉུག་མའི་དེ་བཞིན་ཉིད། །ཀུན་ཁྱབ་ཀུན་གྱི་རང་བཞིན་ཕྱག་རྒྱ་ཆེ། །གཞི་ཡི་འོད་གསལ་རྟོགས་པར༴ རིལ་པོར་འཛིན་དང་རྗེས་སུ་གཞིག་པ་ཡིས། །སྣང་ཆའི་ལྷ་སྐུ་ནཱ་དར་སྙོམས་འཇུག་བཞིན། །ལྷན་ཅིག་སྲོག་རྩོལ་ཁ་སྦྱོར་རྣལ་འབྱོར་གྱིས། །རླུང་སེམས་དབུ་མར་འདུས་པར༴ དེ་མཐུས་རྣམ་ཤེས་སྣང་བ་ལ་ཐིམ་ཞིང་། །དེ་ཉིད་རིམ་པར་མཆེད་དང་ཉེར་ཐོབ་ལ། །ཐིམ་ཚུལ་ངོས་ཟིན་ཐམས་ཅད་སྟོང་པའི་ངང་། །ལམ་གྱི་འོད་གསལ་གོམས་པར༴ ཉིན་སྣང་རྨི་ལམ་སྒྱུ་མར་རྗེས་དྲན་ཞིང་། །ཟབ་མོའི་ལམ་ལ་རྩེ་གཅིག་མཉམ་བཞག་པས། །སྣང་བཞིའི་ཕ་རོལ་སོན་པའི་ཡེ་ཤེས་དབྱིངས། །གཉིད་ཀྱི་འོད་གསལ་ཟིན་པར༴ གལ་ཏེ་གོམས་པ་སྟོབས་སུ་མ་གྱུར་ན། །སྙིང་དབུས་དྷཱུ་ཏིའི་པདྨོར་ངལ་འཚོ་བའི། །མི་ཤིགས་ཡི་གེའི་སྤྲིན་གྱི་སྣང་བ་ཡིས།།ཉམས་ཀྱི་འོད་གསལ་འཆར་བར༴ དེ་ཚེ་ཉིང་འཁྲུལ་སྣང་ཆ་ཐམས་ཅད་ཀུན། །གཟུང་སྤེལ་སྒྱུ་མར་སྦྱང་བའི་ཉམས་ལེན་དང་། །སྤྲུལ་བསྒྱུར་དེ་ཁོ་ན་ཉིད་རྗེས་དྲན་པས། །གཉིས་འཛིན་རང་སར་གྲོལ་བར༴ སྔོན་འགྲོ་སྦྱང་བ་རྣམ་གསུམ་མཐར་ཕྱིན་ཅིང་། །རླུང་དང་གཏུམ་མོའི་འབར་འཛག་ལ་བརྟེན་ནས། །ཞུ་བདེས་དྲངས་པའི་ཡེ་ཤེས་མངོན་གྱུར་པ། །མི་རྟོག་འོད་གསལ་འབྱོང་བར༴ ལུགས་འབྱུང་སྟོང་པ་རྣམ་བཞིའི་ལྷན་སྐྱེས་ལས། །ལུགས་ལྡོག་གཟུགས་སྐུར་བཞེངས་པའི་འཕེན་པ་ཡིས། །དག་པའི་སྒྱུ་ལུས་སྐུ་གསུམ་དབྱེར་མེད་པ། །འབྲས་བུའི་འོད་གསལ་འགྲུབ་པར༴ ཚེ་འདིར་ཟུང་འཇུག་གོ་འཕང་མ་ཐོབ་ན། །འཆི་སྲིད་འོད་གསལ་ཆོས་སྐུའི་དབྱིངས་སུ་ཐིམ། །བར་སྲིད་ལོངས་སྤྱོད་རྫོགས་སྐུའི་རྣམ་རོལ་དང་། །སྐྱེ་སྲིད་སྤྲུལ་པ་འཆར་བར༴ གཞན་ཡང་རླུང་སེམས་མི་ཕྱེད་ཐིག་ལེའི་གཟུགས། །ནང་གི་ལམ་ནས་འཕོ་བའི་རྣལ་འབྱོར་གྱིས། །འོད་གསལ་གཟུགས་སུ་ཤར་བའི་རྡོ་རྗེའི་གྲོང་། །མཁའ་སྤྱོད་ཞིང་དུ་བགྲོད་པར༴ མདོར་ན་གཏུམ་མོའི་འབར་སྣང་སྒྱུ་མར་རྫོགས། །འོད་གསལ་ངང་ལས་རྨི་ལམ་རྩལ་འབྱོངས་ཤིང་། །བར་དོའི་སྣང་བ་བསྲེ་འཕོའི་ཉམས་ལེན་གྱིས། །སྐུ་གསུམ་མངོན་དུ་འགྱུར་བར་བྱིན་གྱིས་རློབས། །དེ་ལྟར་རྩེ་གཅིག་སྨོན་པའི་གནས་སྐབས་ཀུན། །འཁོར་ལོའི་དབང་ཕྱུག་ཧེ་རུ་ཀ་དཔལ་དང་། །ཉེར་བཞིའི་ཡུལ་གྱི་དཔའ་བོ་རྣལ་འབྱོར་མས། །གེགས་མེད་མྱུར་དུ་འགྲུབ་པར་བྱིན་གྱིས་རློབས། །ཞེས་ལམ་ཐམས་ཅད་ཀྱི་མཐར་ཐུག་འོད་གསལ་སྙིང་པོའི་རྣལ་འབྱོར་དུ་དྲིལ་ཏེ། རྡོ་རྗེའི་ལམ་གཞན་རྣམས་ཀྱང་ཞར་ལ་ཚང་བའི་དོན་བརྗོད་བྱར་བྱས་པའི་ངེས་གསང་རྒྱུད་སྡེའི་ཡང་བཅུད་ཁྱད་པར་ཅན་འདིའང་། གྲུབ་པའི་དབང་ཕྱུག་བྱེ་བ་གཤེགས་པའི་རིང་ལུགས་ལ་མོས་པ་བརྟན་པོར་ཐོབ་པའི་རྣལ་འབྱོར་གཞོན་ནུ་འཇིགས་པ་མེད་པའི་སྡེས་སྦྱར་བ་སིདྡྷི་རསྟུ།། །། ༈

[edit]

'od gsal 'char ba'i gsol 'debs zab don sprin gyi rol mo/__ 'od gsal 'char ba'i gsol 'debs zab don sprin gyi rol mo zhes bya ba bzhugs so/__/na mo gu ru b+h+yaH__shin tu rnam dag 'od gsal chos dbyings ngang /__/zung 'jug longs spyod rdzogs sku'i rnam rol gyis/__/sprul pa'i gar mdzad rtsa brgyud bla ma la/_/snying nas gsol ba 'debs so byin gyis rlobs/__/bcos min dad dang nges 'byung snying rje dang /__/rlabs chen byang chub spyod pa'i mthar son nas/__/mchog gsang rdo rje'i lam gyi smin grol gyis/__/dpe don 'od gsal mthong bar byin=__khyad par gzod nas spros pa kun bral ba'i/__/sems kyi rdo rje gnyug ma'i de bzhin nyid/__/kun khyab kun gyi rang bzhin phyag rgya che/__/gzhi yi 'od gsal rtogs par=__ril por 'dzin dang rjes su gzhig pa yis/__/snang cha'i lha sku nA dar snyoms 'jug bzhin/__/lhan cig srog rtsol kha sbyor rnal 'byor gyis/__/rlung sems dbu mar 'dus par=__de mthus rnam shes snang ba la thim zhing /__/de nyid rim par mched dang nyer thob la/__/thim tshul ngos zin thams cad stong pa'i ngang /__/lam gyi 'od gsal goms par=__nyin snang rmi lam sgyu mar rjes dran zhing /__/zab mo'i lam la rtse gcig mnyam bzhag pas/__/snang bzhi'i pha rol son pa'i ye shes dbyings/__/gnyid kyi 'od gsal zin par=__gal te goms pa stobs su ma gyur na/__/snying dbus d+hU ti'i pad+mor ngal 'tsho ba'i/__/mi shigs yi ge'i sprin gyi snang ba yis//nyams kyi 'od gsal 'char bar=__de tshe nying 'khrul snang cha thams cad kun/_/gzung spel sgyu mar sbyang ba'i nyams len dang /__/sprul bsgyur de kho na nyid rjes dran pas/__/gnyis 'dzin rang sar grol bar=__sngon 'gro sbyang ba rnam gsum mthar phyin cing /__/rlung dang gtum mo'i 'bar 'dzag la brten nas/__/zhu bdes drangs pa'i ye shes mngon gyur pa/__/mi rtog 'od gsal 'byong bar=__lugs 'byung stong pa rnam bzhi'i lhan skyes las/__/lugs ldog gzugs skur bzhengs pa'i 'phen pa yis/__/dag pa'i sgyu lus sku gsum dbyer med pa/__/'bras bu'i 'od gsal 'grub par=__tshe 'dir zung 'jug go 'phang ma thob na/__/'chi srid 'od gsal chos sku'i dbyings su thim/__/bar srid longs spyod rdzogs sku'i rnam rol dang /__/skye srid sprul pa 'char bar=__gzhan yang rlung sems mi phyed thig le'i gzugs/__/nang gi lam nas 'pho ba'i rnal 'byor gyis/__/'od gsal gzugs su shar ba'i rdo rje'i grong /__/mkha' spyod zhing du bgrod par=__mdor na gtum mo'i 'bar snang sgyu mar rdzogs/__/'od gsal ngang las rmi lam rtsal 'byongs shing /__/bar do'i snang ba bsre 'pho'i nyams len gyis/__/sku gsum mngon du 'gyur bar byin gyis rlobs/__/de ltar rtse gcig smon pa'i gnas skabs kun/__/'khor lo'i dbang phyug he ru ka dpal dang /__/nyer bzhi'i yul gyi dpa' bo rnal 'byor mas/__/gegs med myur du 'grub par byin gyis rlobs/__/zhes lam thams cad kyi mthar thug 'od gsal snying po'i rnal 'byor du dril te/__rdo rje'i lam gzhan rnams kyang zhar la tshang ba'i don brjod byar byas pa'i nges gsang rgyud sde'i yang bcud khyad par can 'di'ang /__grub pa'i dbang phyug bye ba gshegs pa'i ring lugs la mos pa brtan por thob pa'i rnal 'byor gzhon nu 'jigs pa med pa'i sdes sbyar ba sid+d+hi rastu//___//___!_