JKW-KABUM-23-'A-001-040

🚧 This website is under continued development. We appreciate your patience!

Previous Text Back to Volume PageNext Text

Wylie title	phun tshogs lnga ldan gyi glu dge legs bdud rtsi'i char 'bebs
Location	mkhyen brtse'i bka' 'bum Volume 23, sde tshan 1, Text 40, Pages 82-83 (Folios 41b4 to 42a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. phun tshogs lnga ldan gyi glu dge legs bdud rtsi'i char 'bebs. In 'jam dbyangs mkhyen brtse'i dbang po'i bka' 'bum, Vol. 23: 82-83. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་པའང་རིག་འཛིན་རྒྱལ་བའི་མྱུ་གུ་གཞོན་ནུ་ཐུགས་དགྱེས་པའི་སླད་དུ་ཆོས་ཚུལ་སྣ་ཚོགས་སྨྲ་བའི་དྲང་སྲོང་རྒན་པོ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རབ་ཚེས་དཔལ་གདོང་གི་གནམ་ལོ་གསར་དུ་འཆར་བའི་ཆོ་འཕྲུལ་ཟླ་བའི་ཡར་ཚེས་བཅོ་ལྔའི་ཉི་མ་འཆར་ཀའི་དུས་དགེ་བར་གང་ཤར་བྲིས་པ་དགེ་ལེགས་སུ་གྱུར་ཅིག།
	zhes pa'ang rig 'dzin rgyal ba'i myu gu gzhon nu thugs dgyes pa'i slad du chos tshul sna tshogs smra ba'i drang srong rgan po 'jam dbyangs bla ma dgyes pa'i 'bangs mkhyen brtse'i dbang pos rab tshes dpal gdong gi gnam lo gsar du 'char ba'i cho 'phrul zla ba'i yar tshes bco lnga'i nyi ma 'char ka'i dus dge bar gang shar bris pa dge legs su gyur cig

Tibetan Text

Wylie

[edit]

ཕུན་སུམ་ཚོགས་པ་ལྔ་ལྡན་གྱི་རྡོ་རྗེའི་གླུ་དགེ་ལེགས་བདུད་རྩིའི་ཆར་འབེབས་ཞེས་བྱ་བ། ཨ་ཧོ། བཀྲ་ཤིས་དཔྱིད་ཀྱི་རྒྱལ་མོའི་ལེགས་བྱས་ཀྱི་ཤིང་རྟས། །གནས་མཆོག་འཆི་མེད་གྲུབ་པ་འོག་མིན་གྱི་དགའ་ཚལ། །ས་འདིར་མངོན་སུམ་དྲངས་པའི་ངོ་མཚར་གྱི་སྣང་བ། །ནམ་ཡང་ནུབ་པ་མེད་པའི་རྟེན་འབྲེལ་ཞིག་ཞུའོ། །སྐུ་བཞི་དབྱེར་མི་ཕྱེད་པ་བདེ་ཆེན་གྱི་ཉམས་འགྱུར། །སྟོན་པ་རྡོ་རྗེ་སློབ་དཔོན་རྣམ་རོལ་ཏུ་ཤར་བ། །ལྷར་བཅས་བསྟན་དང་འགྲོ་བའི་ཕན་བདེ་ཡི་བྱེད་པོར། །ཞབས་པད་བསྐལ་བརྒྱར་བརྟན་པའི་གསོལ་འདེབས་ཞིག་ཞུའོ། །ལས་སྨོན་ཟླ་བའི་བདུད་རྩི་ཕྱོགས་གཅིག་ཏུ་དཀར་བ། །འཁོར་ཚོགས་རིག་འཛིན་འདུས་པའི་སྐལ་བཟང་གི་ཚོམ་བུ། །ཚུལ་གནས་ཐོས་བསམ་བསྒོམ་པའི་དགའ་སྟོན་ལ་སྤྱོད་བཞིན། །རིང་འཚོའི་དགེ་མཚན་རྒྱས་པའི་དངོས་གྲུབ་ཞིག་ཞུའོ། །རྒྱལ་རྣམས་ཐུགས་ཀྱི་གསང་བ་འགོག་བདེན་གྱི་ཡེ་ཤེས། །ཆོས་ཚུལ་རྒྱ་མཚོའི་སྤྲིན་ཆེན་ལམ་བདེན་གྱི་རོལ་མོ། །འཇའ་ལུས་རྡོ་རྗེའི་ཐེམ་སྐས་ཐེག་མཆོག་གི་ཆར་ཆེན། །རྟག་པར་རྒྱུན་དུ་འབེབས་པའི་རྟེན་འབྲེལ་ཞིག་ཞུའོ། །གནས་དང་སྟོན་འཁོར་དམ་ཆོས་རྨད་བྱུང་གི་འདུ་བ། །དུས་གསུམ་ཀུན་ཏུ་ཁྱབ་པའི་དགེ་མཚན་གྱི་རྒྱལ་རྔས། །ཡིད་སྲུབ་དཔུང་བཅས་མིང་གི་ལྷག་མ་རུ་བཅོམ་ནས། །དོན་གཉིས་ཕུན་སུམ་ཚོགས་པའི་བཀྲ་ཤིས་ཞིག་ཞུའོ། །ཞེས་པའང་རིག་འཛིན་རྒྱལ་བའི་མྱུ་གུ་གཞོན་ནུ་ཐུགས་དགྱེས་པའི་སླད་དུ་ཆོས་ཚུལ་སྣ་ཚོགས་སྨྲ་བའི་དྲང་སྲོང་རྒན་པོ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རབ་ཚེས་དཔལ་གདོང་གི་གནམ་ལོ་གསར་དུ་འཆར་བའི་ཆོ་འཕྲུལ་ཟླ་བའི་ཡར་ཚེས་བཅོ་ལྔའི་ཉི་མ་འཆར་ཀའི་དུས་དགེ་བར་གང་ཤར་བྲིས་པ་དགེ་ལེགས་སུ་གྱུར་ཅིག། །།

[edit]

phun tshogs lnga ldan gyi glu dge legs bdud rtsi'i char 'bebs/__ phun sum tshogs pa lnga ldan gyi rdo rje'i glu dge legs bdud rtsi'i char 'bebs zhes bya ba/__a ho/__bkra shis dpyid kyi rgyal mo'i legs byas kyi shing rtas/__/gnas mchog 'chi med grub pa 'og min gyi dga' tshal/__/sa 'dir mngon sum drangs pa'i ngo mtshar gyi snang ba/__/nam yang nub pa med pa'i rten 'brel zhig zhu'o/__/sku bzhi dbyer mi phyed pa bde chen gyi nyams 'gyur/__/ston pa rdo rje slob dpon rnam rol tu shar ba/__/lhar bcas bstan dang 'gro ba'i phan bde yi byed por/__/zhabs pad bskal brgyar brtan pa'i gsol 'debs zhig zhu'o/__/las smon zla ba'i bdud rtsi phyogs gcig tu dkar ba/__/'khor tshogs rig 'dzin 'dus pa'i skal bzang gi tshom bu/__/tshul gnas thos bsam bsgom pa'i dga' ston la spyod bzhin/__/ring 'tsho'i dge mtshan rgyas pa'i dngos grub zhig zhu'o/__/rgyal rnams thugs kyi gsang ba 'gog bden gyi ye shes/__/chos tshul rgya mtsho'i sprin chen lam bden gyi rol mo/__/'ja' lus rdo rje'i them skas theg mchog gi char chen/__/rtag par rgyun du 'bebs pa'i rten 'brel zhig zhu'o/__/gnas dang ston 'khor dam chos rmad byung gi 'du ba/__/dus gsum kun tu khyab pa'i dge mtshan gyi rgyal rngas/__/yid srub dpung bcas ming gi lhag ma ru bcom nas/__/don gnyis phun sum tshogs pa'i bkra shis zhig zhu'o/__/zhes pa'ang rig 'dzin rgyal ba'i myu gu gzhon nu thugs dgyes pa'i slad du chos tshul sna tshogs smra ba'i drang srong rgan po 'jam dbyangs bla ma dgyes pa'i 'bangs mkhyen brtse'i dbang pos rab tshes dpal gdong gi gnam lo gsar du 'char ba'i cho 'phrul zla ba'i yar tshes bco lnga'i nyi ma 'char ka'i dus dge bar gang shar bris pa dge legs su gyur cig/__//