JKW-KABUM-23-'A-001-021

🚧 This website is under continued development. We appreciate your patience!

Previous Text Back to Volume PageNext Text

Wylie title	lam rim mdor bstan glu dbyangs phan bde'i rol mo
Location	mkhyen brtse'i bka' 'bum Volume 23, sde tshan 1, Text 21, Pages 39-43 (Folios 20a6 to 22a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. lam rim mdor bstan glu dbyangs phan bde'i rol mo. In 'jam dbyangs mkhyen brtse'i dbang po'i bka' 'bum, Vol. 23: 39-43. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

ལམ་གྱི་རིམ་པ་མདོར་བསྟན་པའི་གླུ་དབྱངས་ཕན་བདེའི་རོལ་མོ་ཞེས་བྱ་བ། གང་ཞིག་སྤྲོས་པའི་མཐའ་བརྒྱད་བྲལ་ཞིང་། །ཡུལ་དང་རྐྱེན་གྱི་རྙོག་པས་མ་བསྒྱུར། །རང་བབ་གཉུག་མའི་ལྷུམས་སུ་ཞུགས་པའི། །ཆོས་ཉིད་དེ་བཞིན་ཉིད་ལ་འདུད་དོ། །ལྟར་སྣང་འཇིག་རྟེན་འབྱོར་པའི་སྦྲང་རྩི། །རང་གིས་འབད་པས་ལེགས་པར་བསགས་ཀྱང་། །དེ་ཉིད་གཞན་གྱིས་སྤྱོད་པར་འགྱུར་འདི། །འཁོར་བའི་གནས་ལ་སྐྱོ་བ་སྐུལ་བྱེད། །ནམ་ཟླ་དུས་བཞི་ཕྱི་ཡི་འགྱུར་ལྡོག །བཤེས་དང་འབྱོར་སྤངས་ནང་གི་མི་རྟག །སེམས་ཀྱི་འགྱུར་ལྡོག་གསང་བའི་རང་མཚང་། །གང་ནས་བརྟག་ཀྱང་རྟག་པ་མ་མཆིས། །སྐྱེ་ནས་སྐྱེ་བར་ཐོབ་དཀའི་བྱང་ཆུབ། །མི་ལུས་རིན་ཆེན་མཆོག་ལས་བྱུང་ཕྱིར། །ནམ་ཡང་ཆུད་དུ་འཛའ་བར་མ་བྱེད། །དལ་མེད་རྣམ་དཀར་ལས་ལ་བརྩོན་ཅིག །སྲིད་གསུམ་ཁམས་འདི་ཡོངས་སུ་བཏང་ཡང་། །ལས་ཀྱི་འབྲས་བུ་ནམ་ཡང་མི་འཛད། །དེ་ཕྱིར་རྟག་ཏུ་བག་ཡོད་སྤྱོད་པས། །རྒྱུ་འབྲས་ཆོས་ལ་ཞིབ་ཏུ་གཞིག་ཅིག །འཁོར་བའི་གནས་རིས་མཐོ་དམན་གང་ཡང་། །སྡུག་བསྔལ་གསུམ་གྱིས་རྟག་ཏུ་གཟིར་བའི། །ཐར་མེད་ལས་ཀྱི་བརྩོན་རར་མཐོང་ནས། །སྙིང་ནས་སྐྱོ་ཤས་ངེས་འབྱུང་སྐྱེད་ཅིག །མཚན་ཉིད་ཀུན་ལྡན་དགེ་བའི་བཤེས་གཉེན། །ཐར་པའི་གྲོང་དུ་འཁྲིད་པའི་ས་མཁན། །མཉེས་པ་གསུམ་གྱི་བྱ་བས་བསྟེན་ནས། །སྡོམ་པ་གསུམ་གྱི་བདུད་རྩི་ནོས་ཤིག །སྐྱེས་བུ་གསུམ་གྱི་ལམ་ལ་སློབ་ནས། །གསུམ་ལ་སྐྱབས་སུ་འགྲོ་བར་བགྱིད་ཅིང་། །གཞན་དོན་ཕྱིར་ན་སྲོག་ཀྱང་བཏང་བའི། །སྨོན་འཇུག་བྱང་སེམས་རྟག་ཏུ་སྒོམས་ཤིག །ལྗོན་ཤིང་ཡལ་འདབ་འབྲས་བུས་དུད་ཅིང་། །ཅ་ཅོ་བྲལ་བའི་སྙན་སྨྲ་འདབས་ཆགས། །འབབ་ཆུ་ཚོགས་ཀྱང་ཞི་བར་རྒྱུ་བའི། །དབེན་པའི་གནས་སུ་གཅིག་པུར་ཞུགས་ཤིག །གང་བྱུང་ཆོག་ཤེས་ནོར་གྱིས་ཕྱུག་ཅིང་། །བསླབ་གསུམ་ཁྲིམས་ཀྱིས་རང་རྒྱུད་རབ་དུལ། །རང་གཞན་ཐར་པ་མཆོག་ལ་སྦྱོར་བའི། །བཟོད་པའི་གོ་ཆ་གཡོ་མེད་བསྟེན་ཅིག །ཁྱད་པར་སྡིག་དང་ལྟུང་བའི་འཕེན་པས། །ངན་སོང་གནས་ལ་ལིང་བསྐྱུར་འགྲོ་བས། །རྟག་ཏུ་སྟོབས་བཞིའི་གནད་དང་ལྡན་པས། །རྡོ་རྗེ་སེམས་དཔའི་སྒོམ་བཟླས་འབུངས་ཤིག །བསོད་ནམས་ཡེ་ཤེས་ཚོགས་གཉིས་བསགས་པས། །ཐམས་ཅད་མཁྱེན་པའི་གོ་འཕང་ཐོབ་ཕྱིར། །ཡན་ལག་བདུན་དང་མཎྜལ་ལ་སོགས། །ཟག་བཅས་ཟག་མེད་དགེ་ཚོགས་སྤེལ་ཤིག །གསང་སྔགས་འཇུག་སྒོ་སྨིན་པར་བྱེད་པ། །དབང་བཞིའི་ལམ་མཆོག་རྨད་བྱུང་ནོར་བུ། །དད་དམ་གདུགས་དཀར་གཙུག་ཏོར་རྩེ་མོར། །མཆོད་ན་གྲོལ་ལམ་དངོས་གྲུབ་སྟེར་རོ། །ཀུན་བརྟག་སྐྱེད་པའི་ཨུཏྤལ་གཞོན་ནུ། །གདན་གསུམ་མཚར་སྡུག་རྫོགས་པའི་དཀྱིལ་འཁོར། །དབྱེར་མེད་སྙིང་ལ་སིམ་པའི་མོད་ནས། །འཕྲལ་ཡུན་ཞི་བདེའི་བཅུད་ལེན་སྦྱིན་ནོ། །ཡོངས་གྲུབ་རྫོགས་རིམ་བདེ་སྟོང་ཕྱག་རྒྱ། །ཟུང་འཇུག་རྟོགས་པའི་འཁྱུད་རྒྱས་རོལ་ཏེ། །རྒྱུ་འབྲས་དགའ་བཞིའི་བདེ་བར་སྤྱོད་པས། །རྣམ་ཀུན་མཆོག་ལྡན་ངལ་གསོ་སྟེར་རོ། །ཁྱད་པར་སྤྱི་བོ་ཛ་ལནྡྷ་རར། །པད་དཀར་ཟླ་སྟེང་ཁྱབ་བདག་བླ་མ། །རྟག་ཏུ་བསྒོམ་ནས་ཁྱེད་ཤེས་གསོལ་འདེབས། །དབང་བཞི་བླངས་ཞིང་ཐུགས་ཡིད་བསྲེས་པས། །ཟབ་ཞི་སྤྲོས་བྲལ་འོད་གསལ་གཉུག་མ། ཁ་དོག་སྣང་བ་ཤར་གྲོལ་དུས་མཉམ། །ཡིད་དཔྱོད་ལས་འདས་རིག་སྟོང་རྗེན་པ། །མངོན་སུམ་རང་ཞལ་མཇལ་བར་གྱིས་ཤིག །སྣང་གྲགས་རིག་པའི་རང་བཞིན་མ་ལུས། །རྡོ་རྗེ་གསུམ་གྱི་ངོ་བོར་ཆུབ་པས། །དག་རྫོགས་སྨིན་པའི་འབྲས་བུ་ལམ་བྱེད། །འདི་ལ་རྟག་ཏུ་འདུན་པར་གྱིས་ཤིག །དངོས་སྣང་ཐ་མལ་ཡུལ་གྱིས་འབྲེལ་བར། །བསྐྱེད་རྫོགས་ཟབ་མོའི་ཏིང་འཛིན་མཐུ་ཡིས། །ཡོངས་སུ་བཅོམ་བྱེད་སྒྲུབ་པའི་སྲོག་མཁར། །བྱང་ཆེན་མཆོག་གི་བར་དུ་ཚུགས་ཤིག །ཐོས་པས་ལུང་གི་ཆོས་རྣམས་བསྙེན་ཏེ། །བསམ་པས་ལམ་བདེན་མངོན་དུ་གྱུར་ཅིང་། །བསྒོམ་པས་སྐུ་བཞིའི་འབྲས་བུ་རྫོགས་པའི། །མདོ་སྔགས་ཟབ་མོའི་དོན་ལ་འཇུག་ཅིག །དེ་སྐད་རང་གི་དེ་ཉིད་དོན་ལ། །བཤེས་པ་མིན་མོད་སྔོན་བྱོན་མཆོག་གཟིགས། །ལུང་རྟོགས་ཆོས་ཀྱི་སྒྲ་དབྱངས་སྒྲོགས་པའི། །གསུང་བཞིན་སླར་ཡང་ཟློས་ཏེ་སྨྲས་པའི། །དགེ་བས་དྲི་མེད་ཟླ་ལྟར་དཀར་བས། །མ་རིག་སྲེད་པའི་མུན་པ་བསྐྲད་དེ། །ཤེས་རབ་གསུམ་གྱི་ཀུནྡ་བཞད་ནས། །འགྲོ་ཁམས་རྒྱ་མཚོ་བདེ་ཆེན་གྱུར་ཅིག ༈ །

[edit]

lam rim mdor bstan glu dbyangs phan bde'i rol mo/__ lam gyi rim pa mdor bstan pa'i glu dbyangs phan bde'i rol mo zhes bya ba/__gang zhig spros pa'i mtha' brgyad bral zhing /__/yul dang rkyen gyi rnyog pas ma bsgyur/__/rang bab gnyug ma'i lhums su zhugs pa'i/__/chos nyid de bzhin nyid la 'dud do/__/ltar snang 'jig rten 'byor pa'i sbrang rtsi/__/rang gis 'bad pas legs par bsags kyang /__/de nyid gzhan gyis spyod par 'gyur 'di/__/'khor ba'i gnas la skyo ba skul byed/__/nam zla dus bzhi phyi yi 'gyur ldog__/bshes dang 'byor spangs nang gi mi rtag__/sems kyi 'gyur ldog gsang ba'i rang mtshang /__/gang nas brtag kyang rtag pa ma mchis/__/skye nas skye bar thob dka'i byang chub/__/mi lus rin chen mchog las byung phyir/__/nam yang chud du 'dza' bar ma byed/__/dal med rnam dkar las la brtson cig__/srid gsum khams 'di yongs su btang yang /__/las kyi 'bras bu nam yang mi 'dzad/__/de phyir rtag tu bag yod spyod pas/__/rgyu 'bras chos la zhib tu gzhig cig__/'khor ba'i gnas ris mtho dman gang yang /__/sdug bsngal gsum gyis rtag tu gzir ba'i/__/thar med las kyi brtson rar mthong nas/__/snying nas skyo shas nges 'byung skyed cig__/mtshan nyid kun ldan dge ba'i bshes gnyen/__/thar pa'i grong du 'khrid pa'i sa mkhan/__/mnyes pa gsum gyi bya bas bsten nas/__/sdom pa gsum gyi bdud rtsi nos shig__/skyes bu gsum gyi lam la slob nas/__/gsum la skyabs su 'gro bar bgyid cing /__/gzhan don phyir na srog kyang btang ba'i/__/smon 'jug byang sems rtag tu sgoms shig__/ljon shing yal 'dab 'bras bus dud cing /__/ca co bral ba'i snyan smra 'dabs chags/__/'bab chu tshogs kyang zhi bar rgyu ba'i/__/dben pa'i gnas su gcig pur zhugs shig__/gang byung chog shes nor gyis phyug cing /__/bslab gsum khrims kyis rang rgyud rab dul/__/rang gzhan thar pa mchog la sbyor ba'i/__/bzod pa'i go cha g.yo med bsten cig__/khyad par sdig dang ltung ba'i 'phen pas/__/ngan song gnas la ling bskyur 'gro bas/__/rtag tu stobs bzhi'i gnad dang ldan pas/__/rdo rje sems dpa'i sgom bzlas 'bungs shig__/bsod nams ye shes tshogs gnyis bsags pas/__/thams cad mkhyen pa'i go 'phang thob phyir/__/yan lag bdun dang maN+Dal la sogs/__/zag bcas zag med dge tshogs spel shig__/gsang sngags 'jug sgo smin par byed pa/__/dbang bzhi'i lam mchog rmad byung nor bu/__/dad dam gdugs dkar gtsug tor rtse mor/__/mchod na grol lam dngos grub ster ro/__/kun brtag skyed pa'i ut+pal gzhon nu/__/gdan gsum mtshar sdug rdzogs pa'i dkyil 'khor/__/dbyer med snying la sim pa'i mod nas/__/'phral yun zhi bde'i bcud len sbyin no/__/yongs grub rdzogs rim bde stong phyag rgya/__/zung 'jug rtogs pa'i 'khyud rgyas rol te/__/rgyu 'bras dga' bzhi'i bde bar spyod pas/__/rnam kun mchog ldan ngal gso ster ro/__/khyad par spyi bo dza lan+d+ha rar/__/pad dkar zla steng khyab bdag bla ma/__/rtag tu bsgom nas khyed shes gsol 'debs/__/dbang bzhi blangs zhing thugs yid bsres pas/__/zab zhi spros bral 'od gsal gnyug ma/__kha dog snang ba shar grol dus mnyam/__/yid dpyod las 'das rig stong rjen pa/__/mngon sum rang zhal mjal bar gyis shig__/snang grags rig pa'i rang bzhin ma lus/__/rdo rje gsum gyi ngo bor chub pas/__/dag rdzogs smin pa'i 'bras bu lam byed/__/'di la rtag tu 'dun par gyis shig__/dngos snang tha mal yul gyis 'brel bar/__/bskyed rdzogs zab mo'i ting 'dzin mthu yis/__/yongs su bcom byed sgrub pa'i srog mkhar/__/byang chen mchog gi bar du tshugs shig__/thos pas lung gi chos rnams bsnyen te/__/bsam pas lam bden mngon du gyur cing /__/bsgom pas sku bzhi'i 'bras bu rdzogs pa'i/__/mdo sngags zab mo'i don la 'jug cig__/de skad rang gi de nyid don la/__/bshes pa min mod sngon byon mchog gzigs/__/lung rtogs chos kyi sgra dbyangs sgrogs pa'i/__/gsung bzhin slar yang zlos te smras pa'i/__/dge bas dri med zla ltar dkar bas/__/ma rig sred pa'i mun pa bskrad de/__/shes rab gsum gyi kun+da bzhad nas/__/'gro khams rgya mtsho bde chen gyur cig__!__/_