JKW-KABUM-23-'A-001-019

🚧 This website is under continued development. We appreciate your patience!

Previous Text Back to Volume PageNext Text

Wylie title	rgyal dbang mtsho skyes bla ma la gsol ba 'debs pa'i rdo rje'i glu rnal 'byor gsum gyi lam rim
Location	mkhyen brtse'i bka' 'bum Volume 23, sde tshan 1, Text 19, Pages 35-36 (Folios 18a1 to 18b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rgyal dbang mtsho skyes bla ma la gsol ba 'debs pa'i rdo rje'i glu rnal 'byor gsum gyi lam rim. In 'jam dbyangs mkhyen brtse'i dbang po'i bka' 'bum, Vol. 23: 35-36. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཅེས་པའང་དབོ་ཟླ་བའི་དཀར་ཕྱོགས་ཀྱི་ཚེས་བཅུར་གྲུབ་པའི་དགའ་ཚལ་ལྷ་ལྡན་སྤྲུལ་པའི་གཙུག་ལག་ཁང་གི་ཉེ་འདབས་སུ་མཚོ་སྐྱེས་བླ་མ་དྲན་པའི་གདུང་དབྱངས་སུ་བགྱིས་པའོ།
	ces pa'ang dbo zla ba'i dkar phyogs kyi tshes bcur grub pa'i dga' tshal lha ldan sprul pa'i gtsug lag khang gi nye 'dabs su mtsho skyes bla ma dran pa'i gdung dbyangs su bgyis pa'o

Tibetan Text

Wylie

[edit]

རྒྱལ་དབང་མཚོ་སྐྱེས་བླ་མ་ལ་གསོལ་བ་འདེབས་པའི་རྡོ་རྗེའི་གླུ་རྣལ་འབྱོར་གསུམ་གྱི་ལམ་རིམ་ཞེས་བྱ་བ། ཨ་ཧོ། ཆོས་ཉིད་གཟོད་ནས་སྟོང་པའི་འོད་གསལ་གྱི་ཀློང་དུ། །ཆོས་ཅན་སྣང་བ་སྐུ་དང་ཡེ་ཤེས་སུ་ཤར་བའི། །མི་སློབ་ཟུང་འཇུག་མངོན་གྱུར་མཚོ་སྐྱེས་ཀྱི་བླ་མར། །བསྙེན་སྒྲུབ་བཞི་ལྡན་ངང་ནས་གསོལ་བ་རང་འདེབས་སོ། །བཀོད་པ་རྩ་ཁམས་རྣམ་དག་དབུ་མ་ཡི་ཀློང་དུ། །སྲོག་རྩོལ་རླུང་གི་འཁོར་ལོ་ཡི་གེ་རུ་ཤར་བ། །བདེ་ཆེན་ཐིག་ལེ་ཆེན་པོ་མཚོ་སྐྱེས་ཀྱི་བླ་མར། །རྣམ་ཀུན་མཆོག་ལྡན་ངང་ནས་གསོལ་བ་རང་འདེབས་སོ། །ཀ་དག་གཏིང་གསལ་གཉུག་མའི་ཡེ་ཤེས་ཀྱི་ཀློང་དུ། །ལྷུན་གྲུབ་འཇའ་ལུས་རྡོ་རྗེའི་རང་གཟུགས་སུ་ཤར་བའི། །ཟུང་འཇུག་ཤིན་ཏུ་རྣམ་དག་མཚོ་སྐྱེས་ཀྱི་བླ་མར། །དབྱིངས་རིག་དབྱེར་མེད་ངང་ནས་གསོལ་བ་རང་འདེབས་སོ། །སྙིང་ནས་གསོལ་བ་འདེབས་སོ་མཚོ་སྐྱེས་ཀྱི་བླ་མ། །ཐུགས་རྗེས་ཡལ་བར་མ་དོར་གངས་ཅན་གྱི་སྐྱབས་གཅིག །རེ་ས་གཞན་ན་མེད་དོ་དྲིན་ཆེན་གྱི་ཆོས་རྗེ། །མངོན་སུམ་བྱིན་གྱིས་རློབས་ཤིག་ཡེ་ཤེས་ཀྱི་སྐུ་ཅན། །འཇིག་རྟེན་འཁོར་བའི་བྱ་བཞག་དམྱལ་བ་ཡི་གཏིང་རྡོ། །ཆོས་ལྟར་བཅོས་པའི་ཀུན་སྤྱོད་རང་གཞན་གྱི་མགོ་བསྐོར། །དེ་བས་དབེན་ཞིང་ཉམས་དགའི་བསམ་གཏན་གྱི་ཁང་བུར། །རྩེ་གཅིག་བསྒྲུབ་ལ་བརྩོན་པར་བྱིན་གྱིས་རང་རློབས་ཤིག །མི་རྟག་སྡུག་བསྔལ་དྲན་པ་ཐར་ལམ་གྱི་འཇུག་སྒོ། །སྨོན་འཇུག་བྱང་སེམས་སྦྱང་བ་ཐེག་ཆེན་གྱི་སྙིང་པོ། །བདག་མེད་རྣམ་གཉིས་རྟོགས་པ་བྱང་ཆུབ་ཀྱི་ཉེ་རྒྱུ། །ཐུན་མོང་ལམ་རིམ་འབྱོངས་པར་བྱིན་གྱིས་རང་རློབས་ཤིག །སྣང་ཞེན་ལྷ་སྐུར་དག་པ་བསྐྱེད་རིམ་གྱི་དེ་ཉིད། །རྩ་རླུང་དབུ་མར་རྫོགས་པ་བདེ་དྲོད་ཀྱི་ཞིང་ས། །ཐིག་ལེ་དྷཱུ་ཏིར་སྨིན་པ་ལྷན་སྐྱེས་ཀྱི་འདྲེན་བྱེད། །ཁྱད་པར་ལམ་མཆོག་གོམས་པར་བྱིན་གྱིས་རང་རློབས་ཤིག །ཀ་དག་དོན་གྱི་གནས་ལུགས་འཕགས་ལམ་གྱི་ཆོས་ཉིད། །ལྷུན་གྲུབ་སྣང་བ་རྣམ་བཞིའི་ཉམས་ལེན་དང་སྦྱར་བས། །ཟུང་འཇུག་འདུས་མ་བྱས་པའི་ཡེ་ཤེས་ཀྱི་ཀློང་དུ། །མཐར་ཐུག་འབྲས་བུ་འགྲུབ་པར་བྱིན་གྱིས་རང་རློབས་ཤིག །ཅེས་པའང་དབོ་ཟླ་བའི་དཀར་ཕྱོགས་ཀྱི་ཚེས་བཅུར་གྲུབ་པའི་དགའ་ཚལ་ལྷ་ལྡན་སྤྲུལ་པའི་གཙུག་ལག་ཁང་གི་ཉེ་འདབས་སུ་མཚོ་སྐྱེས་བླ་མ་དྲན་པའི་གདུང་དབྱངས་སུ་བགྱིས་པའོ། ། ༈

[edit]

mtsho skyes rdo rjer gsol 'debs kyi glu rnal 'byor gsum gyi lam rim/__ rgyal dbang mtsho skyes bla ma la gsol ba 'debs pa'i rdo rje'i glu rnal 'byor gsum gyi lam rim zhes bya ba/__a ho/__chos nyid gzod nas stong pa'i 'od gsal gyi klong du/__/chos can snang ba sku dang ye shes su shar ba'i/__/mi slob zung 'jug mngon gyur mtsho skyes kyi bla mar/__/bsnyen sgrub bzhi ldan ngang nas gsol ba rang 'debs so/__/bkod pa rtsa khams rnam dag dbu ma yi klong du/__/srog rtsol rlung gi 'khor lo yi ge ru shar ba/__/bde chen thig le chen po mtsho skyes kyi bla mar/__/rnam kun mchog ldan ngang nas gsol ba rang 'debs so/__/ka dag gting gsal gnyug ma'i ye shes kyi klong du/__/lhun grub 'ja' lus rdo rje'i rang gzugs su shar ba'i/__/zung 'jug shin tu rnam dag mtsho skyes kyi bla mar/__/dbyings rig dbyer med ngang nas gsol ba rang 'debs so/__/snying nas gsol ba 'debs so mtsho skyes kyi bla ma/__/thugs rjes yal bar ma dor gangs can gyi skyabs gcig__/re sa gzhan na med do drin chen gyi chos rje/__/mngon sum byin gyis rlobs shig ye shes kyi sku can/__/'jig rten 'khor ba'i bya bzhag dmyal ba yi gting rdo/__/chos ltar bcos pa'i kun spyod rang gzhan gyi mgo bskor/__/de bas dben zhing nyams dga'i bsam gtan gyi khang bur/__/rtse gcig bsgrub la brtson par byin gyis rang rlobs shig__/mi rtag sdug bsngal dran pa thar lam gyi 'jug sgo/__/smon 'jug byang sems sbyang ba theg chen gyi snying po/__/bdag med rnam gnyis rtogs pa byang chub kyi nye rgyu/__/thun mong lam rim 'byongs par byin gyis rang rlobs shig__/snang zhen lha skur dag pa bskyed rim gyi de nyid/__/rtsa rlung dbu mar rdzogs pa bde drod kyi zhing sa/__/thig le d+hU tir smin pa lhan skyes kyi 'dren byed/__/khyad par lam mchog goms par byin gyis rang rlobs shig__/ka dag don gyi gnas lugs 'phags lam gyi chos nyid/__/lhun grub snang ba rnam bzhi'i nyams len dang sbyar bas/__/zung 'jug 'dus ma byas pa'i ye shes kyi klong du/_/mthar thug 'bras bu 'grub par byin gyis rang rlobs shig_/ces pa'ang dbo zla ba'i dkar phyogs kyi tshes bcur grub pa'i dga' tshal lha ldan sprul pa'i gtsug lag khang gi nye 'dabs su mtsho skyes bla ma dran pa'i gdung dbyangs su bgyis pa'o/___/__!