JKW-KABUM-21-ZHA-001-003

🚧 This website is under continued development. We appreciate your patience!

Previous Text Back to Volume PageNext Text

Wylie title	sngags sdom phyir bcos
Location	mkhyen brtse'i bka' 'bum Volume 21, sde tshan 1, Text 3, Pages 12-15 (Folios 6b4 to 8a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. sngags sdom phyir bcos. In 'jam dbyangs mkhyen brtse'i dbang po'i bka' 'bum, Vol. 21: 12-15. Khams sde dge rdzong sar dgon: Rdzong sar blo gros phun tshogs, 2020.
Genre	Vows - sdom pa

1 Texts in this Section (sde tshan or chos tshan)

3 12-15	སྔགས་སྡོམ་ཕྱིར་བཅོས། sngags sdom phyir bcos Vows - sdom pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

སྔགས་སྡོམ་ཕྱིར་བཅོས་ནི། བཀའ་དྲིན་སུམ་ལྡན་གྱི་བླ་མ་སོགས་ཡུལ་གཉན་པ་བཞུགས་ན། བླ་མ་རྡོ་རྗེ་འཛིན་པ་ཆེན་པོ་དང་། ཞེས་སྦྱར་བ་འོག་མ་ལའང་འགྲེ། སྤྱི་ལ། རིག་པ་འཛིན་པའི་དགེ་འདུན་པ་རྣམས་སྔགས་ཀྱི་ལྟུང་བ་ཕྱིར་བཅོས་ཀྱི་ཆོ་ག་ལ་ཐུགས་གཏད་པར་ཞུ། ཞེས་སྙན་གསན་དབབ། གཡོན་གྲལ་རྒན་པས། རྡོ་རྗེ་ཐེག་པའི་འདུལ་བ་བཞིན་མཛད་པར་ཞུ། ཞེས་གནང་བ་སྦྱིན། པུས་བཙུགས་ཐལ་སྦྱར་གྱིས་འཁོད་ལ། བླ་མ་རྡོ་རྗེ་འཛིན་པ་ཆེན་པོ་དང་། རིག་པ་འཛིན་པའི་དགེ་འདུན་པ་རྣམས་དགོངས་སུ་གསོལ། བདག་རིག་པ་འཛིན་པ་མི་བསྐྱོད་རྡོ་རྗེ་ཞེས་བགྱི་བ་ལྟ་བུ་སོ་སོའི་གསང་མཚན་སྦྱར། བྱིས་པ་ཉིད་དང་། མི་ཤེས་པ་དང་། མ་གུས་པ་དང་། བག་མ་མཆིས་པ་དང་། ཉོན་མོངས་མང་བའི་དབང་གིས་རྡོ་རྗེ་ཐེག་པའི་འདུལ་བ་དང་འགལ་བའི་ནོངས་པ་བླ་མ་ལ་སྨོད་པ་ལ་སོགས་པ་རྩ་བའི་ལྟུང་བ་དང་། སྦོམ་པོའི་རྣམ་གྲངས་བརྒྱད་ལ་སོགས་པ་ཡན་ལག་གི་ལྟུང་བ་ལས་གང་དང་གང་བྱུང་བ་དེ་དག །བླ་མ་རྡོ་རྗེ་འཛིན་པ་ཆེན་པོ་དང་། རིག་པ་འཛིན་པའི་དགེ་འདུན་པ་རྣམས་ཀྱི་མདུན་དུ་མཐོལ་ཞིང་འཆགས་སོ། །མཐོལ་ཞིང་འཆགས་ན་བདག་བདེ་བ་ལ་རེག་པར་གནས་པར་འགྱུར་གྱིས། མ་མཐོལ་མ་བཤགས་ན་ནི་མི་འགྱུར་རོ། །ཞེས་ལན་གསུམ་བརྗོད། རྒན་གྲལ་གྱི་ཐོག་མས། ཉེས་ལྟུང་དེ་དག་ལ་ཉེས་ལྟུང་དེ་དག་ཏུ་གཟིགས་ལགས་སམ། གཞོན་པ་རྣམས་ཀྱིས། མཐོང་ལགས། ཡང་རྒན་པས། ཕྱིན་ཆད་ལེགས་པར་བསྡམ་ལགས་སམ། གཞོན་པས། བསྡམ་ལགས། ཞེས་དྲི་བ་དང་ལན་བཏབ་པ་ལན་གསུམ་མཐར། བཤགས་ཡུལ་གྱིས། ཐབས་ཡིན་ནོ། །འབུལ་བ་པོས། ལེགས་སོ། །ཞེས་བརྗོད། ཕྱག་གསུམ་བྱས་ལ། བླ་མ་རྡོ་རྗེ་འཛིན་པ་ཆེན་པོ་དང་། རིག་པ་འཛིན་པའི་དགེ་འདུན་པ་རྣམས་སྔགས་ཀྱི་ལྟུང་བ་ཕྱིར་བཅོས་ཀྱི་ཆོ་ག་ལ་ཐུགས་གཏད་པ་བཀའ་དྲིན་ཆེ་ལགས། བཤགས་ཡུལ་གྱིས། རྡོ་རྗེ་ཐེག་པའི་འདུལ་བ་བཞིན་མཛད་པ་རྗེས་སུ་ཡི་རངས། ཞེས་ལན་བྱས་ལ་རང་གྲལ་དུ་འཁོད། དེ་ནས་གཡོན་གྱི་རྒན་གྲལ་བ་རྣམས་ལངས་ལ་ཚུལ་ཕྱག་གམ་ཕྱག་དབབ་གསུམ་བྱས་ལ། སྙན་གསན་དབབ་པ་ནས། རྗེས་སུ་ཡི་རང་གི་བར་བཤད་མ་ཐག་མ་ལྟར་བྱའོ། །འདི་ནི་སོ་ཐར་ལྟུང་བ་ཕྱིར་བཅོས་ཀྱི་ཚིག་ཁ་བསྒྱུར་བ་སྟེ། རྒྱུད་ཚིག་དངོས་ཀྱིས་བཤགས་པ་བྱ་བ་སྤྲོ་ན། ཕྱག་དང་སྙན་གསན་དབབ། དགོངས་གསོལ་སྔར་བཞིན་བྱས་ལ། མགོན་པོ་བདག་ནི་མི་ཤེས་རྨོངས་པ་སྟེ། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་ཀྱེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་ཆགས་ཐམས་ཅད་མཐོལ་ལོ་བཤགས་སོ་སྡིག་པ་དང་སྒྲིབ་པ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། ཅེས་ལན་གསུམ་བརྗོད་ཅིང་། མཐོང་སྡོམ་དང་ཐབས་ལེགས་སོགས་སྔར་བཞིན་བྱ་བ་ཡིན་ནོ། །གསུམ་པ་ནི། ཐམས་ཅད་ཀྱི་འདུན་པ་རྩེ་གཅིག་པས། རྒྱས་པར་སྤྲོ་ན། བླ་མ་ཡི་དམ་ལྷ་ཚོགས་དགོངས་སུ་གསོལ། །སོགས་ཚང་བར་བརྗོད་པས་མཚོན་ཐུན་མོང་མ་ཡིན་པའི་བསྔོ་སྨོན་རྣམ་དག་གི་རྒྱས་གདབ་ཅིང་། བསྡུ་ན། དེང་ནས་བྱང་ཆུབ་སྙིང་པོར་མཆིས་ཀྱི་བར། །རིག་བཟང་བློ་གསལ་ང་རྒྱལ་མེད་པ་དང་། །སྙིང་རྗེ་ཆེ་ཞིང་བླ་མ་ལ་གུས་ལྡན། །དཔལ་ལྡན་རྡོ་རྗེ་ཐེག་ལ་ངེས་གནས་ཤོག །དབང་གིས་སྨིན་ཅིང་དམ་ཚིག་སྡོམ་པ་ལྡན། །རིམ་གཉིས་ལམ་ལ་བསྙེན་སྒྲུབ་མཐར་ཕྱིན་ཅིང་། །དཀའ་བ་མེད་པ་རིག་འཛིན་གོ་འཕང་བགྲོད། །དངོས་གྲུབ་རྣམ་གཉིས་བདེ་བླག་འགྲུབ་པར་ཤོག །ཉམས་ཆགས་རྟོག་སྒྲིབ་མ་སྤངས་གནས་སུ་དག །ཕྱི་ནང་གསང་བ་དབྱེར་མེད་རྟོག་པས་བསྐང་། །གང་ཤར་རང་གྲོལ་ཀུན་བཟང་ཀློང་ཡངས་སུ། །ངན་སོང་དོང་སྤྲུགས་སྲིད་ཞི་མཉམ་གྱུར་ཅིག །ཐིག་ལེ་ཆེན་པོ་སྐུ་དང་ཞིང་ཁམས་རྫོགས། །དམ་ཚིག་ཆེན་པོ་སྤང་བླང་མཚན་མ་དག །ཁྱབ་བརྡལ་ཆེན་པོ་རེ་དོགས་མདུད་པ་གྲོལ། །རྫོགས་པ་ཆེན་པོ་ཆོས་སྐུ་མངོན་གྱུར་ཤོག །རྒྱལ་བའི་བསྟན་པ་དར་ཞིང་རྒྱས་པ་དང་། །བསྟན་འཛིན་རྣམས་ཀྱིས་བཞེད་པའི་དོན་ཀུན་འགྲུབ། །མ་ལུས་སྐྱེ་དགུའི་འགལ་རྐྱེན་ཀུན་ཞི་ཞིང་། ཕུན་ཚོགས་མཐའ་དག་ཡིད་བཞིན་འབྱོར་གྱུར་ཅིག །ཅེས་བརྗོད་པས་འགྲུབ་བོ། ། ༈

[edit]

sngags sdom phyir bcos/__ sngags sdom phyir bcos ni/__bka' drin sum ldan gyi bla ma sogs yul gnyan pa bzhugs na/__bla ma rdo rje 'dzin pa chen po dang /__zhes sbyar ba 'og ma la'ang 'gre/__spyi la/__rig pa 'dzin pa'i dge 'dun pa rnams sngags kyi ltung ba phyir bcos kyi cho ga la thugs gtad par zhu/__zhes snyan gsan dbab/__g.yon gral rgan pas/__rdo rje theg pa'i 'dul ba bzhin mdzad par zhu/__zhes gnang ba sbyin/__pus btsugs thal sbyar gyis 'khod la/__bla ma rdo rje 'dzin pa chen po dang /__rig pa 'dzin pa'i dge 'dun pa rnams dgongs su gsol/__bdag rig pa 'dzin pa mi bskyod rdo rje zhes bgyi ba lta bu so so'i gsang mtshan sbyar/__byis pa nyid dang /__mi shes pa dang /__ma gus pa dang /__bag ma mchis pa dang /__nyon mongs mang ba'i dbang gis rdo rje theg pa'i 'dul ba dang 'gal ba'i nongs pa bla ma la smod pa la sogs pa rtsa ba'i ltung ba dang /__sbom po'i rnam grangs brgyad la sogs pa yan lag gi ltung ba las gang dang gang byung ba de dag__/bla ma rdo rje 'dzin pa chen po dang /__rig pa 'dzin pa'i dge 'dun pa rnams kyi mdun du mthol zhing 'chags so/__/mthol zhing 'chags na bdag bde ba la reg par gnas par 'gyur gyis/__ma mthol ma bshags na ni mi 'gyur ro/__/zhes lan gsum brjod/__rgan gral gyi thog mas/__nyes ltung de dag la nyes ltung de dag tu gzigs lags sam/__gzhon pa rnams kyis/__mthong lags/__yang rgan pas/__phyin chad legs par bsdam lags sam/__gzhon pas/__bsdam lags/__zhes dri ba dang lan btab pa lan gsum mthar/__bshags yul gyis/__thabs yin no/__/'bul ba pos/__legs so/__/zhes brjod/__phyag gsum byas la/__bla ma rdo rje 'dzin pa chen po dang /__rig pa 'dzin pa'i dge 'dun pa rnams sngags kyi ltung ba phyir bcos kyi cho ga la thugs gtad pa bka' drin che lags/__bshags yul gyis/__rdo rje theg pa'i 'dul ba bzhin mdzad pa rjes su yi rangs/__zhes lan byas la rang gral du 'khod/__de nas g.yon gyi rgan gral ba rnams langs la tshul phyag gam phyag dbab gsum byas la/__snyan gsan dbab pa nas/__rjes su yi rang gi bar bshad ma thag ma ltar bya'o/__/'di ni so thar ltung ba phyir bcos kyi tshig kha bsgyur ba ste/__rgyud tshig dngos kyis bshags pa bya ba spro na/__phyag dang snyan gsan dbab/__dgongs gsol sngar bzhin byas la/__mgon po bdag ni mi shes rmongs pa ste/__/dam tshig las ni 'gal zhing nyams/__/bla ma mgon pos skyabs mdzod cig__/gtso bo rdo rje 'dzin pa kye/__/thugs rje chen po'i bdag nyid can/__/'gro ba'i gtso la bdag skyabs mchi/__/sku gsung thugs rtsa ba dang yan lag gi dam tshig nyams chags thams cad mthol lo bshags so sdig pa dang sgrib pa nyes ltung dri ma'i tshogs thams cad byang zhing dag par byin gyis brlab tu gsol/__ces lan gsum brjod cing /__mthong sdom dang thabs legs sogs sngar bzhin bya ba yin no/__/gsum pa ni/__thams cad kyi 'dun pa rtse gcig pas/__rgyas par spro na/__bla ma yi dam lha tshogs dgongs su gsol/__/sogs tshang bar brjod pas mtshon thun mong ma yin pa'i bsngo smon rnam dag gi rgyas gdab cing /__bsdu na/__deng nas byang chub snying por mchis kyi bar/__/rig bzang blo gsal nga rgyal med pa dang /__/snying rje che zhing bla ma la gus ldan/__/dpal ldan rdo rje theg la nges gnas shog__/dbang gis smin cing dam tshig sdom pa ldan/__/rim gnyis lam la bsnyen sgrub mthar phyin cing /__/dka' ba med pa rig 'dzin go 'phang bgrod/__/dngos grub rnam gnyis bde blag 'grub par shog__/nyams chags rtog sgrib ma spangs gnas su dag__/phyi nang gsang ba dbyer med rtog pas bskang /__/gang shar rang grol kun bzang klong yangs su/__/ngan song dong sprugs srid zhi mnyam gyur cig__/thig le chen po sku dang zhing khams rdzogs/__/dam tshig chen po spang blang mtshan ma dag__/khyab brdal chen po re dogs mdud pa grol/__/rdzogs pa chen po chos sku mngon gyur shog__/rgyal ba'i bstan pa dar zhing rgyas pa dang /__/bstan 'dzin rnams kyis bzhed pa'i don kun 'grub/__/ma lus skye dgu'i 'gal rkyen kun zhi zhing /__phun tshogs mtha' dag yid bzhin 'byor gyur cig__/ces brjod pas 'grub bo/__/_!