JKW-KABUM-23-'A-001-051

🚧 This website is under continued development. We appreciate your patience!

Previous Text Back to Volume PageNext Text

དཔལ་སྐུ་བཞིའི་དབང་ཕྱུག།

Wylie title	dpal sku bzhi'i dbang phyug
Location	mkhyen brtse'i bka' 'bum Volume 23, sde tshan 1, Text 51, Pages 98-100 (Folios 49b3 to 50b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dpal sku bzhi'i dbang phyug. In 'jam dbyangs mkhyen brtse'i dbang po'i bka' 'bum, Vol. 23: 98-100. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཅེས་པའང་དད་དམ་གྱི་སྤོབས་པ་གཅིག་ཏུ་བརྟན་པའི་ཉེ་གནས་ཨཽ་ཌི་ཡཱ་ནར་གདམས་པའོ།
	ces pa'ang dad dam gyi spobs pa gcig tu brtan pa'i nye gnas au Di yA nar gdams pa'o

Tibetan Text

Wylie

[edit]

ཨ་ཧོ། དཔལ་སྐུ་བཞིའི་དབང་ཕྱུག་རྡོ་རྗེ་འཆང་། །ཚུར་མཐོང་གི་སྣང་ངོར་མི་གཟུགས་ཅན། །མགོན་དྲིན་ཆེན་བླ་མའི་ཞབས་ལ་འདུད། །ཡོངས་གྲུབ་ཀྱི་གནས་ལུགས་རྟོགས་པར་ཤོག །རྙེད་དཀའ་བའི་དལ་འབྱོར་མི་ལུས་ཐོབ། །དད་དམ་གྱི་ངང་ཚུལ་མི་དམན་ཞིང་། །མཚན་ལྡན་གྱི་བླ་མས་རྗེས་བཟུང་བའི། །སྐལ་བཟང་འདི་འདྲ་ངོ་མཚར་ཆེ། །གནད་གསང་ཆེན་ཟབ་མོའི་ཆོས་དང་འཕྲད། །དོན་ཉམས་སུ་ལེན་པའི་སྤོབས་པ་ཐོབ། །བློ་བྲལ་གྱི་རིག་པ་མཐོང་བ་འདི། །འདུན་མའི་ནང་གི་ཡང་རྩེ་ཡིན། །ད་ཟུང་འཇུག་ཉམས་སུ་ལེན་པའི་ཚེ། །དེ་ཁོ་ན་ཉིད་ལྟ་བས་གཏན་ལ་ཕབ། །ཚུལ་བཞིན་དུ་ཡེངས་མེད་ཀྱི་དྲན་པ་བསྒོམ། །ཤར་གྲོལ་དུས་མཉམ་གྱིས་སྤྱོད་པ་མཛོད། །སྐད་ཅིག་མ་ད་ལྟའི་ཤེས་པ་ལ། །དུས་གསུམ་གྱི་རྣམ་རྟོག་བྲལ་བ་ཡིས། །བརྗོད་དུ་མེད་པ་འདི་ཀ་ཉིད། །བསམ་མི་ཁྱབ་པའི་ལྟ་བ་ཡིན། །ཧྲིལ་གྱིས་བསྒྲིམས་ལ་ལྷོད་ཀྱིས་གློད། །ཆེད་འཛིན་གྱི་གཉེར་ཁ་རང་སར་ཞི། །ཡེངས་དང་མ་ཡེངས་རྩིས་གདབ་འདས། །འདི་བློ་དང་བྲལ་བའི་སྒོམ་པ་ཡིན། །ཐོལ་སྐྱེས་ཀྱི་རྣམ་རྟོག་ཤར་བའི་ཚེ། །རང་རིག་གི་ཀློང་དུ་རང་སར་ཞི། །གཉེན་པོ་ཡི་བཅོས་བསྒྱུར་དགོས་པ་མེད། །འདི་ཚུལ་འཆོས་དང་བྲལ་བའི་སྤྱོད་པ་ལགས། །འཁོར་འདས་ལ་ཐོབ་ཤོར་མ་གྲུབ་ཅིང་། །རེ་དོགས་ཀྱི་མདུད་པ་དབུ་མར་ཞིག །མྱོང་ཐོག་ཏུ་ངེས་ཤེས་བྲལ་བ་དེ། །གཞི་འབྲས་དབྱེར་མེད་ཀྱི་འབྲས་བུ་ལགས། །རང་རིག་ངོ་བོ་སྤྲོས་པ་དང་བྲལ། །རྟག་ཆད་ཀྱི་བློ་ཡིས་ཐུག་པ་མེད། །སྣང་སེམས་ཀུན་རྟེན་ཅིང་འབྲེལ་འབྱུང་ཙམ། །འདི་འོད་གསལ་དབུ་མ་མ་ལགས་སམ། །ཆོས་ཅན་གྱི་སྣང་བ་ཐམས་ཅད་ལ། །ཆོས་ཉིད་ཀྱི་རོལ་པས་གཟེར་ཐེབས་ནས། །མི་ཕྱེད་པའི་བདེ་ཆེན་ཐིག་ལེར་གྲོལ། །འདི་ཕྱག་རྒྱ་ཆེན་པོ་མ་ལགས་སམ། །འཁོར་འདས་ཀྱི་རྟོག་ཚོགས་རིག་ངོར་རྫོགས། །བཟང་ངན་གྱི་རྩིས་གདབ་དབྱིངས་སུ་ཞི། །ཀ་དག་དང་ལྷུན་གྲུབ་ཟུང་འཇུག་གཤིས། །འདི་རྫོགས་པ་ཆེན་པོ་མ་ལགས་སམ། །གཟུང་འཛིན་གྱིས་བཟོས་པའི་གཡོ་འཁྲུལ་པོ། །དོན་དམ་ལ་གྲུབ་པ་རྡུལ་ཙམ་མེད། །རྣམ་ཐར་གསུམ་ལྡན་གྱི་མངོན་རྟོགས་ཅན། །འདི་ཤེས་རབ་ཕར་ཕྱིན་མ་ལགས་སམ། །བདེ་སྡུག་གི་ཟུག་རྔུ་རང་སར་གྲོལ། །རེ་དོགས་ཀྱི་ཁེངས་སེམས་གཉུག་མར་ཐིམ། །ཕྱོགས་ལྷུང་དང་བསལ་གྲུབ་མེད་པའི་དངོས། །འདི་སྡུག་བསྔལ་ཞི་བྱེད་མ་ལགས་སམ། །སྣང་བ་ཀུན་ཐད་ཀར་ཆོད་པ་ལ། །བཟང་ངན་དུ་འཛིན་པའི་ཆེད་གཉེར་ཞིག །ཚོགས་དྲུག་གི་སྣང་བར་དགག་བསྒྲུབ་མེད། །འདི་དམ་ཆོས་གཅོད་ཡུལ་མ་ལམ་སམ། །དོན་དེ་ཕྱིར་མདོ་སྔགས་ཀྱི་ཟབ་དོན་ཀུན། །ཚིག་ཏུ་སྤྲོས་ན་ཟད་པ་མེད། །མྱོང་ཐོག་ཏུ་བཞག་ན་ཐམས་ཅད་འདུས། །འདི་བྱ་བ་བྲལ་བའི་ཉམས་ལེན་ཡིན། །ངས་གཞུང་ལུགས་ཀྱང་རྒྱ་ཆེར་མ་སྦྱངས་ཤིང་། །རྟོག་དཔྱོད་ཀྱི་ཞབས་ཏོག་མ་འགྲུབ་ཀྱང་། །བློ་འདས་ཀྱི་དོན་འདི་མངོན་དུ་མཐོང་། །ད་ཞེ་འདོད་ཀྱི་མཚན་མ་ཟད་དེ་མཆི། །ཨ་ཧོ་ཧོ་ཁ་ལྟ་ཚིག་སྐམ་གསུམ། །ལོག་རྟོག་ཅན་ལ་ཨ་ཐམ་རྒྱ། །དད་མོས་ཅན་གྱི་སྙིང་དུ་ཆོང་། །རིག་སྟོང་རྗེན་པར་གྲོལ་བར་ཤོག །ཅེས་པའང་དད་དམ་གྱི་སྤོབས་པ་གཅིག་ཏུ་བརྟན་པའི་ཉེ་གནས་ཨཽ་ཌི་ཡཱ་ནར་གདམས་པའོ། ། ༈

[edit]

dpal sku bzhi'i dbang phyug/_ a ho/__dpal sku bzhi'i dbang phyug rdo rje 'chang /__/tshur mthong gi snang ngor mi gzugs can/__/mgon drin chen bla ma'i zhabs la 'dud/__/yongs grub kyi gnas lugs rtogs par shog__/rnyed dka' ba'i dal 'byor mi lus thob/__/dad dam gyi ngang tshul mi dman zhing /__/mtshan ldan gyi bla mas rjes bzung ba'i/__/skal bzang 'di 'dra ngo mtshar che/__/gnad gsang chen zab mo'i chos dang 'phrad/__/don nyams su len pa'i spobs pa thob/__/blo bral gyi rig pa mthong ba 'di/__/'dun ma'i nang gi yang rtse yin/__/da zung 'jug nyams su len pa'i tshe/__/de kho na nyid lta bas gtan la phab/__/tshul bzhin du yengs med kyi dran pa bsgom/__/shar grol dus mnyam gyis spyod pa mdzod/__/skad cig ma da lta'i shes pa la/__/dus gsum gyi rnam rtog bral ba yis/__/brjod du med pa 'di ka nyid/__/bsam mi khyab pa'i lta ba yin/__/hril gyis bsgrims la lhod kyis glod/__/ched 'dzin gyi gnyer kha rang sar zhi/__/yengs dang ma yengs rtsis gdab 'das/__/'di blo dang bral ba'i sgom pa yin/__/thol skyes kyi rnam rtog shar ba'i tshe/__/rang rig gi klong du rang sar zhi/__/gnyen po yi bcos bsgyur dgos pa med/__/'di tshul 'chos dang bral ba'i spyod pa lags/__/'khor 'das la thob shor ma grub cing /__/re dogs kyi mdud pa dbu mar zhig__/myong thog tu nges shes bral ba de/__/gzhi 'bras dbyer med kyi 'bras bu lags/__/rang rig ngo bo spros pa dang bral/__/rtag chad kyi blo yis thug pa med/__/snang sems kun rten cing 'brel 'byung tsam/__/'di 'od gsal dbu ma ma lags sam/__/chos can gyi snang ba thams cad la/__/chos nyid kyi rol pas gzer thebs nas/__/mi phyed pa'i bde chen thig ler grol/__/'di phyag rgya chen po ma lags sam/__/'khor 'das kyi rtog tshogs rig ngor rdzogs/__/bzang ngan gyi rtsis gdab dbyings su zhi/__/ka dag dang lhun grub zung 'jug gshis/__/'di rdzogs pa chen po ma lags sam/__/gzung 'dzin gyis bzos pa'i g.yo 'khrul po/__/don dam la grub pa rdul tsam med/__/rnam thar gsum ldan gyi mngon rtogs can/__/'di shes rab phar phyin ma lags sam/__/bde sdug gi zug rngu rang sar grol/__/re dogs kyi khengs sems gnyug mar thim/__/phyogs lhung dang bsal grub med pa'i dngos/__/'di sdug bsngal zhi byed ma lags sam/__/snang ba kun thad kar chod pa la/__/bzang ngan du 'dzin pa'i ched gnyer zhig__/tshogs drug gi snang bar dgag bsgrub med/__/'di dam chos gcod yul ma lam sam/__/don de phyir mdo sngags kyi zab don kun/__/tshig tu spros na zad pa med/__/myong thog tu bzhag na thams cad 'dus/__/'di bya ba bral ba'i nyams len yin/__/ngas gzhung lugs kyang rgya cher ma sbyangs shing /__/rtog dpyod kyi zhabs tog ma 'grub kyang /__/blo 'das kyi don 'di mngon du mthong /__/da zhe 'dod kyi mtshan ma zad de mchi/__/a ho ho kha lta tshig skam gsum/__/log rtog can la a tham rgya/__/dad mos can gyi snying du chong /__/rig stong rjen par grol bar shog__/ces pa'ang dad dam gyi spobs pa gcig tu brtan pa'i nye gnas au Di yA nar gdams pa'o/___/__!_