JKW-KABUM-23-'A-001-053

🚧 This website is under continued development. We appreciate your patience!

Previous Text Back to Volume PageNext Text

རྫོགས་པ་ཆེན་པོ་རང་གྲོལ་རྣམ་ལྔའི་སྔོན་འགྲོའི་ཁྲིད་རིམ་བདེན་གཉིས་རང་གྲོལ།

Wylie title	rdzogs pa chen po rang grol rnam lnga'i sngon 'gro'i khrid rim bden gnyis rang grol
Location	mkhyen brtse'i bka' 'bum Volume 23, sde tshan 1, Text 53, Pages 101-104 (Folios 51a6 to 52b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdzogs pa chen po rang grol rnam lnga'i sngon 'gro'i khrid rim bden gnyis rang grol. In 'jam dbyangs mkhyen brtse'i dbang po'i bka' 'bum, Vol. 23: 101-104. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

རྫོགས་པ་ཆེན་པོ་རང་གྲོལ་རྣམ་ལྔའི་སྔོན་འགྲོའི་ཁྲིད་རིམ་བདེན་གཉིས་རང་གྲོལ་ཞེས་བྱ་བ། ན་མོ་གུ་ར་ཝེ། རང་རིག་འོད་གསལ་གཉུག་མའི་ཡེ་ཤེས་ལ། །བསལ་བཞག་ཆེད་འཛིན་དམིགས་གཏད་ལས་འདས་ཕྱིར། །རྟག་ཏུ་ཡེངས་མེད་དྲན་པས་མཇལ་བའི་ཕྱག །མཉམ་རྗེས་མཐའ་གྲོལ་ཆེན་པོའི་ཀློང་ནས་བཙལ། །གང་ཞིག་རྣམ་གྲོལ་ལམ་མཆོག་དོན་གཉེར་བའི། །སྐལ་བཟང་སྐྱེས་བུའི་ཚོགས་ཀྱིས་ཐོག་མ་ནས། །འཇུག་པའི་ཡུལ་ནི་འདི་ཉིད་ཁོ་ན་ཞེས། །གསལ་བར་མཚོན་ཕྱིར་བདེན་གཉིས་རང་གྲོལ་བསྟན། །དེ་ཡང་དལ་བརྒྱད་འབྱོར་བཅུའི་རང་བཞིན་ཅན། །དཔེ་གྲངས་རྒྱུ་ཡི་སྒོ་ནས་རྙེད་དཀའ་བའི། །རྟེན་ལ་ཐར་པའི་སྙིང་པོ་ལེན་པའི་ཕྱིར། །བླ་མེད་རིན་ཆེན་གསུམ་ལ་སྐྱབས་སུ་འགྲོ། །སྤང་བླང་བསླབ་བྱ་ཆ་མཐུན་འབད་པས་བསྒྲུབ། །ཉིན་མཚན་རྟག་ཏུ་དཀོན་མཆོག་ཡོན་ཏན་བསམ། །དེ་ཡི་ཕན་ཡོན་ནང་པའི་གྲལ་ཚུད་ཅིང་། །འོག་མའི་གཞི་རྟེན་ཡོན་ཏན་དཔག་ཏུ་མེད། །དེ་སླད་རྙེད་དཀའི་དལ་བ་ཐོབ་གྱུར་ཀྱང་། །བརྟན་གཡོ་མི་རྟག་འཇིག་པའི་ངང་ཚུལ་ལ། །ཡང་ཡང་བསམས་ནས་བློ་སྣ་བསྟུང་བའི་ངང་། །སྨོན་དང་འཇུག་པའི་བྱང་ཆུབ་སེམས་མཆོག་བསྐྱེད། །ནམ་ཞིག་འཆི་ཚེ་དཀར་ནག་ལས་ཀྱི་འབྲས། །མི་བསླུ་ངེས་པར་རྗེས་སུ་འབྲང་བའི་ཕྱིར། །སྡིག་པའི་ཚོགས་ཀུན་སྟོབས་བཞི་ལྡན་པ་ཡིས། །བཤགས་སྡོམ་དྲག་པོས་རྡོར་སེམས་སྒོམ་བཟླས་འབད། །འཁོར་བ་གར་སྐྱེས་སྡུག་བསྔལ་རྣམ་གསུམ་གྱི། །ཞགས་པས་མ་བཅིངས་འགའ་ཡང་ཡོད་མིན་ཕྱིར། །ངེས་ལེགས་གོ་འཕང་བརྙེས་སླད་ཚོགས་གཉིས་པོ། །ཟུང་འཇུག་སྐུ་གསུམ་མཎྜལ་ཅི་ནུས་དབུལ། །གང་ཞིག་ཐོབ་ན་ཞི་བསིལ་བདུད་རྩིའི་གཏེར། །ཐར་པ་དམ་པའི་གོ་འཕང་བསྒྲུབ་པ་ལ། །ལམ་གྱི་གཙོ་བོ་བླ་མའི་རྣལ་འབྱོར་ནི། །ཕུར་ཚུགས་མོས་གུས་དྲག་པོས་གནད་དུ་བསྣུན། །དེ་ཡང་ཁྱབ་བདག་རྡོ་རྗེ་སེམས་དཔའ་ནི། །རིགས་དང་དཀྱིལ་འཁོར་ཀུན་གྱི་གཙོ་བོ་སྟེ། །དྲན་པས་སྲིད་དང་ཞི་བའི་གདུང་སེལ་ཕྱིར། །རང་གི་ངོས་ནས་སངས་རྒྱས་ཀུན་ལས་ལྷག །དང་པོའི་ལས་ཅན་རྣམས་ཀྱིས་སྤྱི་བོ་དང་། །དད་པ་བརྟན་པས་སྙིང་གི་དབུས་སུ་གསལ། །སྐྱིད་སྡུག་ལེགས་ཉེས་བཟང་ངན་ཅི་བྱུང་ཡང་། །དེ་ཁོ་ན་ལས་སྐྱབས་གཞན་འཚོལ་བ་མིན། །ཚུལ་འདིར་འབད་པས་གནས་སྐབས་ཕྲིན་ལས་བཞི། །རྩོལ་མེད་འགྲུབ་ཅིང་འཆི་བའི་འོད་གསལ་ཟིན། །བར་དོར་རང་གྲོལ་རང་བཞིན་སྤྲུལ་པའི་ཞིང་། །མིག་འཕྲུལ་བཞིན་བགྲོད་མཆོག་གི་གོ་འཕང་ཐོབ། །དེ་ལྟར་བསྒོམས་པའི་རྗེས་ཐོབ་འཁོར་གསུམ་གྱི། །རྟོགས་པས་མ་བཅིངས་རང་བཞིན་གཉུག་མའི་དབྱིངས། །བསྔོ་བས་རྒྱས་གདབ་དགེ་ཚོགས་གོང་འཕེལ་ཞིང་། །མྱུར་དུ་བྱང་ཆུབ་ས་ལ་རེག་པར་འགྱུར། །འོད་གསལ་རྫོགས་པ་ཆེན་པོའི་ལྟ་སྒོམ་སྤྱོད། །མངོན་སུམ་ཅར་ཕོག་ཉམས་སུ་ལེན་པ་ཡི། །སྔོན་དུ་འགྲོ་བའི་རིམ་པ་འདི་ཉིད་ཀྱང་། །གཏད་མེད་རྣལ་འབྱོར་པདྨ་དགྱེས་པས་བཀོད། །སརྦ་མངྒ་ལཾ། ། ༈

[edit]

rang grol skor lnga'i sngon 'gro'i glu/__ rdzogs pa chen po rang grol rnam lnga'i sngon 'gro'i khrid rim bden gnyis rang grol zhes bya ba/__na mo gu ra we/__rang rig 'od gsal gnyug ma'i ye shes la/__/bsal bzhag ched 'dzin dmigs gtad las 'das phyir/__/rtag tu yengs med dran pas mjal ba'i phyag__/mnyam rjes mtha' grol chen po'i klong nas btsal/__/gang zhig rnam grol lam mchog don gnyer ba'i/__/skal bzang skyes bu'i tshogs kyis thog ma nas/__/'jug pa'i yul ni 'di nyid kho na zhes/__/gsal bar mtshon phyir bden gnyis rang grol bstan/__/de yang dal brgyad 'byor bcu'i rang bzhin can/__/dpe grangs rgyu yi sgo nas rnyed dka' ba'i/__/rten la thar pa'i snying po len pa'i phyir/__/bla med rin chen gsum la skyabs su 'gro/__/spang blang bslab bya cha mthun 'bad pas bsgrub/__/nyin mtshan rtag tu dkon mchog yon tan bsam/__/de yi phan yon nang pa'i gral tshud cing /__/'og ma'i gzhi rten yon tan dpag tu med/__/de slad rnyed dka'i dal ba thob gyur kyang /__/brtan g.yo mi rtag 'jig pa'i ngang tshul la/__/yang yang bsams nas blo sna bstung ba'i ngang /__/smon dang 'jug pa'i byang chub sems mchog bskyed/__/nam zhig 'chi tshe dkar nag las kyi 'bras/__/mi bslu nges par rjes su 'brang ba'i phyir/__/sdig pa'i tshogs kun stobs bzhi ldan pa yis/__/bshags sdom drag pos rdor sems sgom bzlas 'bad/__/'khor ba gar skyes sdug bsngal rnam gsum gyi/__/zhags pas ma bcings 'ga' yang yod min phyir/__/nges legs go 'phang brnyes slad tshogs gnyis po/__/zung 'jug sku gsum maN+Dal ci nus dbul/__/gang zhig thob na zhi bsil bdud rtsi'i gter/__/thar pa dam pa'i go 'phang bsgrub pa la/__/lam gyi gtso bo bla ma'i rnal 'byor ni/__/phur tshugs mos gus drag pos gnad du bsnun/__/de yang khyab bdag rdo rje sems dpa' ni/__/rigs dang dkyil 'khor kun gyi gtso bo ste/__/dran pas srid dang zhi ba'i gdung sel phyir/__/rang gi ngos nas sangs rgyas kun las lhag__/dang po'i las can rnams kyis spyi bo dang /__/dad pa brtan pas snying gi dbus su gsal/__/skyid sdug legs nyes bzang ngan ci byung yang /__/de kho na las skyabs gzhan 'tshol ba min/__/tshul 'dir 'bad pas gnas skabs phrin las bzhi/__/rtsol med 'grub cing 'chi ba'i 'od gsal zin/__/bar dor rang grol rang bzhin sprul pa'i zhing /__/mig 'phrul bzhin bgrod mchog gi go 'phang thob/__/de ltar bsgoms pa'i rjes thob 'khor gsum gyi/__/rtogs pas ma bcings rang bzhin gnyug ma'i dbyings/__/bsngo bas rgyas gdab dge tshogs gong 'phel zhing /__/myur du byang chub sa la reg par 'gyur/__/'od gsal rdzogs pa chen po'i lta sgom spyod/__/mngon sum car phog nyams su len pa yi/__/sngon du 'gro ba'i rim pa 'di nyid kyang /__/gtad med rnal 'byor pad+ma dgyes pas bkod/__/sarba mang+ga laM/___/__!_