JKW-KABUM-23-'A-006-003

🚧 This website is under continued development. We appreciate your patience!

Previous Text Back to Volume PageNext Text

ཐུབ་བསྟན་དར་རྒྱས་གླིང་གི་འོག་མིན་རིག་འཛིན་ལྷ་ཁང་འཆི་མེད་པདྨོ་བཀོད་པའི་ཞིང་ཁམས་ཆེན་པོའི་གཏམ་ངོ་མཚར་དད་པའི་སྙེ་མ།

Wylie title	thub bstan dar rgyas gling gi 'og min rig 'dzin lha khang 'chi med pad+mo bkod pa'i zhing khams chen po'i gtam ngo mtshar dad pa'i snye ma
Location	mkhyen brtse'i bka' 'bum Volume 23, sde tshan 6, Text 3, Pages 321-333 (Folios 19a3 to 25a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. thub bstan dar rgyas gling gi 'og min rig 'dzin lha khang 'chi med pad+mo bkod pa'i zhing khams chen po'i gtam ngo mtshar dad pa'i snye ma. In 'jam dbyangs mkhyen brtse'i dbang po'i bka' 'bum, Vol. 23: 321-333. Khams sde dge rdzong sar dgon: Rdzong sar blo gros phun tshogs, 2020.
Genre	Catalogue of Contents - dkar chag
Colophon	།ཅེས་པའང་དད་གཏོང་སོགས་འཕགས་པའི་ནོར་གྱིས་མངོན་པར་མཐོ་བའི་དབུ་མཛད་ཆེན་མོ་ཀརྨ་ཆོས་འཕེལ་རང་ཉིད་ཀྱིས་ཇི་ལྟར་གསོལ་བ་བཏབ་པའི་ངོར། དྲི་མ་མེད་པའི་ཐུབ་བསྟན་རིན་པོ་ཆེ་མཐའ་དག་ལ་དད་པའི་པདྨོ་ལྷག་པར་རྒྱས་ཤིང་། ཡོངས་འཛིན་དམ་པ་མཁས་ཤིང་གྲུབ་མཆོག་བརྙེས་པ་དུ་མས་རྗེས་སུ་བཟུང་བའི་ཤཱཀྱའི་དགེ་སྦྱོང་སྤོང་བ་པ་བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དཔལ་བཟང་པོའམ། སངས་རྒྱས་གཉིས་པ་པདྨ་སཾ་བྷ་ཝས་བྱིན་གྱིས་བརླབས་པའི་རིག་འཛིན་གྱི་བཙུན་པ་པདྨ་འོད་གསལ་མདོ་སྔགས་གླིང་པའི་སྡེས་རབ་བྱུང་བཅོ་ལྔ་པའི་ལྕགས་ཕོ་རྟའི་ལོའི་རྒྱལ་ཟླ་བའི་དཀར་ཕྱོགས་ཀྱི་དུས་ཚེས་༡༥མཆོག་ཏུ་དགེ་བར་ཤར་མར་སྤེལ་བ་སརྦ་དཱ་ཀ་ལྱཱ་ཎཾ་བྷ་བ་ཏུ།།
	ces pa'ang dad gtong sogs 'phags pa'i nor gyis mngon par mtho ba'i dbu mdzad chen mo karma chos 'phel rang nyid kyis ji ltar gsol ba btab pa'i ngor/__dri ma med pa'i thub bstan rin po che mtha' dag la dad pa'i pad+mo lhag par rgyas shing /__yongs 'dzin dam pa mkhas shing grub mchog brnyes pa du mas rjes su bzung ba'i shAkya'i dge sbyong spong ba pa bya bral chos rje 'jam dbyangs mkhyen brtse'i dbang po kun dga' bstan pa'i rgyal mtshan dpal bzang po'am/__sangs rgyas gnyis pa pad+ma saM b+ha was byin gyis brlabs pa'i rig 'dzin gyi btsun pa pad+ma 'od gsal mdo sngags gling pa'i sdes rab byung bco lnga pa'i lcags pho rta'i lo'i rgyal zla ba'i dkar phyogs kyi dus tshes 15 mchog tu dge bar shar mar spel ba sarba dA ka l+yA NaM b+ha ba tu/

Tibetan Text

Wylie

[edit]

༄༅། །ཐུབ་བསྟན་དར་རྒྱས་གླིང་གི་འོག་མིན་རིག་འཛིན་ལྷ་ཁང་འཆི་མེད་པདྨོ་བཀོད་པའི་ཞིང་ཁམས་ཆེན་པོའི་གཏམ་ངོ་མཚར་དད་པའི་སྙེ་མ་ཞེས་བྱ་བ་བཞུགས་སོ། །ཨོཾ་སྭ་སྟི་བི་ཛ་ཡནྟུ། དགེ་ལེགས་ཐུགས་རྗེ་རྫོགས་ལྡན་སྤྲིན་ཆེན་ལས། །ཕན་བདེའི་འདོད་རྒུ་ཆར་དུ་སྙིལ་མཛད་པ། །དཀོན་མཆོག་རིན་ཆེན་རྩ་གསུམ་ཆོས་སྲུང་གིས། །རྣམ་ཀུན་ཤིས་པའི་དགའ་སྟོན་སྦྱིན་གྱུར་ཅིག །ཅེས་དགེ་ལེགས་སུ་བྱ་བའི་ཚིག་གིས་མདུན་བསུས་ཏེ། འོག་མིན་རིག་འཛིན་ལྷ་ཁང་མཐོང་གྲོལ་འཆི་མེད་པདྨོ་བཀོད་པའི་ཞིང་ཁམས་འདི་ཉིད་ལས་བརྩམས་ཏེ་འབེལ་བའི་གཏམ་ཅུང་ཟད་ཙམ་བརྗོད་ན། འཕགས་མཆོག་ཕྱག་ན་པདྨོའི་ཐུགས་རྗེའི་འཇུག་པས་ཡོངས་སུ་བཟུང་བའི་གངས་ཅན་བོད་ཀྱི་ལྗོངས་འདིར་སྐོར་གསུམ། རུ་བཞི། སྒང་དྲུག་ཏུ་གྲགས་པའི་ཕྱི་མའི་བྱེ་བྲག་སྨར་ཁམས་ཟལ་མོ་སྒང་གི་ནོར་འཛིན་གྱི་ཐིག་ལེ། གནམ་བརྐོས་དགའ་ལྡན་ཕོ་བྲང་པ་དང་། གོང་མ་ཆེན་པོ་མཆོད་ཡོན་གྱི་ལྷ་འབངས་འདབས་འབྲེལ་བའི་ས་མཚམས་རྒྱ་སྣེ་སྟེང་གི་བྱེ་བྲག །ཡུལ་ལ་གཡང་ཆགས་པས་འདོད་རྒུའི་དགེ་མཚན་ཕུན་སུམ་ཚོགས་པས་བརྒྱན་པ་འདེབས་མ་ཞབས་ཞེས་པ་འདིར། སྒྲུབ་བརྒྱུད་སྙིང་པོའི་བསྟན་པ་རིན་པོ་ཆེའི་སྒོར་ཞུགས་ཤིང་། དཀོན་མཆོག་དད་པས་འབྲས་ལ་བླ་མར་བགྱི་བའི་དད་གཏོང་ཕུན་སུམ་ཚོགས་པས་བརྒྱན་པའི་བཟོ་གནས་རྒྱ་མཚོར་བྱང་ཆུབ་པ་དབུ་མཛད་ཆེན་མོ་ཤཱཀྱའི་དགེ་སྦྱོང་ཀརྨ་དྷརྨ་བརྡྷ་ནས་ལྷག་པའི་བསམ་པ་སྟོན་ཟླ་ལྟར་དཀར་བ་དཔལ་ལྡན་བླ་མ་དམ་པ་གོང་མ་ཆོས་ཀྱི་སྤྱན་ལྡན་ཞི་བར་གཤེགས་པ་རྣམས་ཀྱི་དགོངས་རྫོགས། གོང་མ་མཆོད་ཡོན་གྱིས་གཙོས་ད་ལྟར་ཞལ་བཞུགས་པའི་བསྟན་འཛིན་གྱི་སྐྱེས་ཆེན་དམ་པ་རིས་སུ་མ་ཆད་པ་དང་། བསྟན་པའི་སྦྱིན་བདག་ཆེན་པོ་རྣམས་ཀྱི་ཞབས་བརྟན། ཕྱོགས་བཅུའི་དགེ་འདུན་གྱི་སྡེ་འཕེལ་ཞིང་འཇིག་རྟེན་དགེ་ལེགས་ཆེན་པོས་ཁྱབ་པ་དང་། རང་གཞན་འབྲེལ་ཚད་ཐམས་ཅད་སྲིད་ཞིའི་མཐའ་གཉིས་ལ་མི་གནས་པའི་བྱང་ཆུབ་ཆེན་པོར་མྱུར་དུ་དབུགས་འབྱིན་པའི་ལྷན་ཅིག་བྱེད་རྐྱེན་དུ་དམིགས་ཏེ། བསྟན་པ་ལ་དད་པའི་ཡོན་གྱི་བདག་པོ་རྣམས་དང་བཅས་བཀྲ་ཤིས་པའི་གཙུག་ལག་ཁང་དང་ཀུན་དགའ་ར་བ་བཀོད་ལེགས་སུ་བསྐྲུན། རྒྱལ་བ་སྲས་དང་བཅས་པའི་སྣང་བརྙན་གཙོ་བོར་གྱུར་པའི་སྐུ་གསུང་ཐུགས་རྟེན་རྨད་དུ་བྱུང་བ་བཞེངས། དགེ་འདུན་འདུ་བའི་སྒོ་གྱ་ནོམ་པ་སྦྱར་ཏེ་བཤད་སྒྲུབ་ཟུང་འབྲེལ་གྱི་དགོན་གནས་ཐུབ་བསྟན་དར་རྒྱས་གླིང་ཞེས་གྲགས་པའི་ཡི་གེས་མཛེས་པར་བྱས་པ་དང་ཆབ་གཅིག །སླར་ཡང་ཁོ་བོ་ཅག་ལའང་ཆོས་ཀྱི་བདུད་རྩི་ཟབ་མོ་ནོས་ཤིང་མི་ཕྱེད་པའི་དད་པས་མཚམས་སྦྱར་ཏེ། གཙུག་ལག་ཁང་གི་སྟེང་ཐོག་ཏུ་རྩ་བརྒྱུད་ཀྱི་བླ་མ་གཙོ་བོར་གྱུར་པའི་འོག་མིན་རིག་འཛིན་ལྷ་ཁང་མཐོང་གྲོལ་འཆི་མེད་པདྨ་བཀོད་པའི་ཞིང་ཁམས་ཆེན་པོ་འདི་ཉིད་བཞེངས་པའི་གཡར་དམ་ལྷུར་བཞེས་ཏེ་ཕྱག་ལེན་དུ་བཏབ་པ་ན། དཀོན་མཆོག་རིན་པོ་ཆེ་རྣམ་པ་གསུམ་དང་རྩ་གསུམ་རྒྱལ་བ་རྒྱ་མཚོའི་ཐུགས་རྗེས་གཞི་བཟུང་། རྡོ་རྗེའི་ཆོས་སྐྱོང་བའི་ཚོགས་དང་། དཀར་ཕྱོགས་ལ་མངོན་པར་དགའ་བའི་ལྷ་ཀླུ་མཐུ་བོ་ཆེ་རྣམས་ཀྱིས་ཕྲིན་ལས་སྩལ། ཕྱོགས་འདིའི་བླ་མ་དགེ་འདུན་དང་བསྟན་པ་ལ་དད་པའི་དབོན་འབངས་རྣམས་ཀྱིས་ཀྱང་རྗེས་སུ་ཡི་རང་བའི་གྲོགས་མཛད་དེ་མཐོང་ཐོས་དྲན་རེག་གི་ཡིད་ཅན་ཐམས་ཅད་གྲོལ་བ་བཞི་དང་ལྡན་པའི་སྣང་བརྙན་ལྷ་མིའི་མཆོད་སྡོང་བསྟན་འགྲོའི་བཙས་ཆེན་པོར་གྲུབ་པ་འདི་ཉིད་ཀྱི་རྟེན་གྱི་གཙོ་བོར་སྐྱབས་གནས་ཀུན་འདུས་ཀྱི་བདག་ཉིད་སངས་རྒྱས་གཉིས་པ་པདྨ་སཾ་བྷ་བའི་སྐྱེས་བུའི་ལུས་ཚད་ཉིས་འགྱུར། དེའི་གཡས་སུ་གངས་རིའི་ཁྲོད་ཀྱི་ཐུབ་དབང་གཉིས་པ་མཁན་ཆེན་བོ་དྷི་ས་ཏྭ། གཡོན་དུ་བསིལ་ལྡན་གྱི་ལྗོངས་འདིར་ཐུབ་བསྟན་ཉིན་བྱེད་འདྲེན་པའི་ཤིང་རྟ་ཆེན་པོ་འཇམ་པའི་དབྱངས་དངོས་ཆོས་རྒྱལ་ཁྲི་སྲོང་ལྡེའུ་བཙན་གཉིས་སྐྱེས་བུའི་ལུས་ཚད་ལས་ལྷག་པ་སྟེ་མཁན་སློབ་ཆོས་གསུམ་གྱི་མཚན་དཔེའི་སྣང་བརྙན་མཐོང་ན་མི་མཐུན་པ་མེད་པར་ལྷམ་མེ། ལྷན་ནེར་བཞུགས་པའི་བར་མཚམས་རྣམས་སུ་སྔ་འགྱུར་རྡོ་རྗེ་ཐེག་པའི་བླ་མ་བརྒྱུད་པ་གཙོ་བོར་བཏོན་པའི་དབང་དུ་བྱས་ཏེ། རིགས་བརྒྱའི་ཁྱབ་བདག་དཔལ་ཀུན་ཏུ་བཟང་པོ། རྒྱལ་བ་རྡོ་རྗེ་འཆང་། རྡོ་རྗེ་མི་བསྐྱོད་པ་ལ་སོགས་པའི་རྒྱལ་ཚབ་རིགས་ལྔ། ཁྱེའུ་སྣང་བ་དམ་པ་སོགས་གྲགས་ཆེན་གསལ་བའི་སྟོན་པ། དགའ་རབ་རྡོ་རྗེ། འཇམ་དཔལ་བཤེས་གཉེན། ཤྲཱི་སིཾ་ཧ། ཛྙཱ་ན་སཱུ་ཏྲ། རྒྱལ་པོ་དྷ་ན་ཏ་ལ་སོགས་སེམས་སྡེའི་མཁས་པ་ཉེར་གཅིག །བཅོམ་ལྡན་འདས་རིགས་གསུམ་མགོན་པོ། ལྷ་གྲགས་ལྡན་མཆོག་སྐྱོང་སོགས་དམ་པའི་རིགས་ཅན་དྲ་མ་ལྔ། ཆོས་རྒྱལ་ལུང་བསྟན་རྡོ་རྗེ། མདོ་མཁན་བདེ་བ་གསལ་མཛད། སློབ་དཔོན་སྒེག་པའི་རྡོ་རྗེ། མཁའ་འགྲོ་མ་ལས་ཀྱི་དབང་མོ། ཧཱུྃ་ཀ་ར་སོགས་གྲུབ་པའི་རིག་འཛིན་བརྒྱད། བྱ་རྒྱུད་ཀྱི་སློབ་དཔོན་བྱང་ཆུབ་མཆོག །སྤྱོད་རྒྱུད་ཀྱི་བཀའ་བབས་སངས་རྒྱས་གསང་བ། རྣལ་འབྱོར་རྒྱུད་ཀྱི་ཤིང་རྟ་ཆེན་པོ་ཀུན་དགའ་སྙིང་པོ། འཕགས་པ་ཀླུ་སྒྲུབ་སོགས་འཛམ་བུ་གླིང་མཛེས་པར་བྱེད་པའི་རྒྱན་དྲུག །འདུལ་བ་གསལ་བྱེད་ཡོན་ཏན་འོད་དང་ཤཱཀྱ་འོད། དཔལ་ས་ར་ཧ་སོགས་རྣལ་འབྱོར་གྱི་དབང་ཕྱུག་བརྒྱད་ཅུ་རྩ་བཞི། རྨད་དུ་བྱུང་བའི་སློབ་དཔོན་ཞི་བ་ལྷ། ཟླ་བ་གྲགས་པ། ཙནྡྲ་གོ་མི། སྤྲུལ་པའི་གུ་རུ་མཚན་བརྒྱད་མཁའ་འགྲོ་མ་གཉིས་དང་བཅས་པ། སློབ་དཔོན་བི་མ་ལ་མི་ཏྲ། ཆོས་རྒྱལ་སྲོང་བཙན་སྒམ་པོ་དང་། མངའ་བདག་ཁྲི་རལ། བཻ་རོ་ཙ་ན་སོགས་འབངས་རིགས་གྲུབ་ཆེན་ཉེར་ལྔ། སོ་ཡེ་ཤེས་དབང་ཕྱུག །ཟུར་པོ་ཆེ་ཤཱཀྱ་འབྱུང་གནས། ཟུར་ཆུང་ཤེས་རབ་གྲགས། ཟུར་གསང་བདག་སྒྲོ་ཕུག་པ་ཤཱཀྱ་སེང་གེ་སྟེ་ཟུར་པ་མེས་དབོན་གསུམ། གཏེར་ཆེན་མངའ་བདག་ཉང་། གུ་རུ་ཆོས་དབང་། རིག་འཛིན་རྒོད་ལྡེམ་སྟེ་མཆོག་གི་སྤྲུལ་སྐུ་རྣམ་གསུམ། ཀུན་མཁྱེན་ཀློང་ཆེན་རབ་འབྱམས། བོད་ཆེན་པོའི་ལྗོངས་འདིར་གསང་ཆེན་རྡོ་རྗེ་ཐེག་པའི་ཤིང་རྟ་ཆེན་པོ་དམ་གཙང་བྱམས་གསུམ་བཅས་སྔ་འགྱུར་རྙིང་མའི་བླ་མ་དམ་པ་རྣམས་དང་། གཞན་ཡང་གྲུབ་མཐའ་རིས་མེད་ཀྱི་དབང་དུ་བྱས་ཏེ། བཀའ་གདམས་བསྟན་པའི་མེས་པོ་ཇོ་འབྲོམ་རྔོག་གསུམ། བཀའ་བརྒྱུད་རིན་པོ་ཆེའི་གཙུག་རྒྱན་མར་མི་དྭགས་གསུམ། དཔལ་ས་སྐྱ་པའི་ཤིང་རྟ་ཆེན་པོ་ས་ངོར་ཚར་གསུམ། བཀའ་གདམས་གསར་མའི་སྲོལ་འབྱེད་རྗེ་ཡབ་སྲས་གསུམ་བཅས་དང་། སྦྱིན་པའི་བདག་པོ་རང་ཉིད་ལ་དངོས་སུ་ཆོས་ཀྱི་བདུད་རྩི་སྩལ་བའི་རྩ་བའི་བླ་མ་དམ་པ་ལྔ་བཅས་རྩ་བརྒྱུད་ཀྱི་བླ་མ་དམ་པ་རྣམས་དང་། ཡི་དམ་གྱི་ལྷ་རྡོ་རྗེ་སེམས་དཔའ་ཡབ་ཡུམ། ཁྲག་འཐུང་རྩ་བའི་ལྷ་ཞལ་གཅིག་ཕྱག་གཉིས་པ། ཆེ་མཆོག་ཧེ་རུ་ཀ་ཞལ་གསུམ་ཕྱག་དྲུག་པ། བཀའ་བརྒྱད་གཙོ་རྐྱང་ཞལ་གཅིག་ཕྱག་གཉིས་པ། རྣལ་འབྱོར་རྒྱུད་ཀྱི་གཙོ་བོ་དེ་བཞིན་གཤེགས་པ་རིགས་ལྔ། སྤྱོད་རྒྱུད་ཀྱི་གཙོ་བོ་རྣམ་སྣང་མངོན་བྱང་། བྱ་རྒྱུད་ཀྱི་གཙོ་བོ་རིགས་གསུམ་མགོན་པོ། སངས་རྒྱས་སྤྲུལ་པའི་སྐུ་ཤཱཀྱའི་རྒྱལ་པོ་ལ་ཕྱོགས་བཅུའི་སངས་རྒྱས་ཀྱིས་བསྐོར་བ། སངས་རྒྱས་འོད་དཔག་མེད། མགོན་པོ་ཚེ་དཔག་མེད། བཅོམ་ལྡན་འདས་སྨན་གྱི་བླ་མ། རྡོ་རྗེ་མི་འཁྲུགས་པ། བྱང་ཆུབ་སེམས་དཔའ་ཉེ་བའི་སྲས་བརྒྱད། རང་སངས་རྒྱས་ཚོགས་ན་སྤྱོད་པ་དང་། བསེ་རུ་ལྟ་བུ་གཉིས། ཉན་ཐོས་མཆོག་གཉིས། འོད་སྲུངས་ཆེན་པོ་སོགས་བསྟན་པའི་གཏད་རབས་བདུན། ཡན་ལག་འབྱུང་སོགས་གནས་བརྟན་ཆེན་པོ་བཅུ་དྲུག །ཞབས་འབྲིང་དགེ་བསྙེན་དྷརྨ་ཏཱ་སྦྱིན་བདག་དང་བཅས་པ། གནས་གསུམ་གྱི་དཔའ་བོ་མཁའ་འགྲོའི་མཚོན་བྱེད་དཔའ་བོ་ཡབ་ཡུམ་རིགས་ལྔ། རྡོ་རྗེའི་ཆོས་སྲུང་ཕོ་རྒྱུད་ཀྱི་གཙོ་བོ་ལེགས་ལྡན་ཚོགས་ཀྱི་བདག་པོ། མོ་རྒྱུད་ཀྱི་གཙོ་མོ་སྔགས་སྲུང་ཨེ་ཀ་ཛཱ་ཊི། གཉིས་མེད་རྒྱུད་ཀྱི་གཙོ་བོ་དཔལ་མགོན་མ་ནིང་ནག་པོ། ནག་པོ་ཆེན་པོ་ཕྱག་བཞི་པ། ཕྱག་དྲུག་པ། གནོད་སྦྱིན་ནོར་ལྷའི་གཙོ་བོ་རྣམ་སྲས་སེར་ཆེན། ཨཱཪྻ་ཛཾ་བྷ་ལ། ལྷ་མོ་ནོར་རྒྱུན་མ། གཙང་རིས་དཔལ་མགོན་གྱི་གཙོ་བོ་རྒྱལ་ཆེན་སྡེ་བཞི། གངས་རིའི་ལྗོངས་འདིའི་ཡུལ་བདག་ཐམས་ཅད་ཀྱི་གཙོ་མོ་བཀྲ་ཤིས་ཚེ་རིང་མ་དང་བཅས་པ་སྟེ། དེ་ལྟ་བུའི་སྣང་བརྙན་རྣམས་ཀྱང་དཔལ་སྡོམ་པ་འབྱུང་བའི་རྒྱུད་ལས། ཚད་ནི་ཚད་ལ་ཕབ་ཀྱིན་བཟང་། །ཞི་བ་ལ་སོགས་ཉམས་དང་ལྡན། །དེ་ལྟ་བུ་ནི་རབ་གནས་འགྱུར། །ཞེས་གསུངས་པ་ལྟར་རྒྱུད་སྡེ་རིན་པོ་ཆེ་རྣམས་ནས་ཇི་སྐད་གསུངས་པའི་ཚད་དང་མཚན་ཉིད་ཉམས་འགྱུར་ཐམས་ཅད་ཡོངས་སུ་རྫོགས་པ་སྟེ། ཐོག་མར་གནས་ཡུལ་དུར་ཁྲོད་དྲུག་ཅུ་རྩ་བཞིའི་ས་སྣ་གཏེར་སོན་དང་། རི་བོ་པོ་ཏ་ལའི་འབྲུ་སྨན། །པཎ་ཆེན་ཤཱ་རི་པུ་ཏྲས་བསྣམས་པའི་གནས་ཡུལ་དུར་ཁྲོད་ཐམས་ཅད་ཀྱི་ས་སྣ་ཆུ་སྣ་སྣེ་གདོང་གོང་མའི་རྟེན་སྒམ་ནས་བྱུང་བ། གྲུབ་ཆེན་ཐང་སྟོང་རྒྱལ་པོས་འཛམ་གླིང་ལན་གསུམ་བསྐོར་བའི་ས་སྣ་ཆུ་སྣས་གཙོས་འཕགས་བལ་བོད་ལྗོངས་རྒྱ་ནག་ཚུན་གྱི་གནས་ཆེན། གནས་ཕྲན། གཙུག་ལག་ཁང་སོགས་མང་པོའི་ས་སྣ་ཆུ་ཤིང་དང་། སྨན་སྣ་དང་། དཔལ་ཅན་གྱི་རྫས། རིན་པོ་ཆེ་སྣ་ཚོགས་པའི་ཕྱེ་མ་བཅས་འཇིམ་པ་དང་སྦྱར་ཏེ་ལེགས་པར་བཞེངས་པའི་གཙོ་བོ་པདྨ་སཾ་བྷ་ཝའི་ནང་དུ་རིང་བསྲེལ་རྣམ་པ་ལྔ་ཞེས་གྲགས་པ་ལས། ཡུངས་འབྲུ་ལྟ་བུའི་རིང་བསྲེལ་སངས་རྒྱས་ཀྱི་འཕེལ་གདུང་། བདེ་བར་གཤེགས་པ་ཐམས་ཅད་གྱི་གདུང་གི་རིལ་བུ་དམ་རྫས་རིན་པོ་ཆེའི་ཏོག །རིང་བསྲེལ་ཀུན་འདུས་རིལ་བུ་ནོར་བུ་ཏོག་གི་བློ་གྲོས། གུ་རུ་རིན་པོ་ཆེའི་ཚེམས་ལས་སྤྲུལ་པའི་རིང་བསྲེལ་མཐོང་གྲོལ་ཤིན་ཏུ་ཁྱད་འཕགས། ཆོས་སྐུའི་རིང་བསྲེལ་ཀུན་མཁྱེན་ཀློང་ཆེན་པའི་གདུང་ཚྭ། སྐུ་གདུང་རིང་བསྲེལ་རིག་འཛིན་དགའ་རབ་རྡོ་རྗེའི་སྤྲུལ་པའི་གདུང་རྟེན་གཏེར་བྱོན། ཨོ་རྒྱན་རིན་པོ་ཆེའི་ཤངས་མཚལ། གུ་རུ་ཡབ་ཡུམ་གྱི་བྱང་སེམས་དམ་རྫས་རོལ་པ་ཆེན་པོ། ཆོས་རྒྱལ་ཁྲི་སྲོང་གི་གདུང་རུས། སྐུ་བལ་གྱི་རིང་བསྲེལ་འོད་སྲུང་དང་ཐུབ་པའི་སྐུ་ཆོས། སློབ་དཔོན་ཀླུ་སྒྲུབ་ཀྱི་མཆིལ་ལྷྭམ། འཕགས་པ་ཐོགས་མེད་ཀྱི་ཆོས་གོས། གུ་རུ་རིན་པོ་ཆེའི་དབུ་སྐྲ། དབུ་ཞྭ། ན་བཟའ་ཟ་ཕེར། སྐུ་རེག །ཞབས་ལྷྭམ། ཡེ་ཤེས་ཀྱི་མཁའ་འགྲོ་མ་མནྡཱ་རའི་ན་བཟའ། མཚོ་རྒྱལ་གསང་གོས། མཁན་ཆེན་བོདྷི་ས་ཏྭའི་ཆོས་གོས། ཆོས་རྒྱལ་ཁྲི་སྲོང་ན་བཟའ། ལོ་ཆེན་བཻ་རོ་དང་། གནུབས་སངས་རྒྱས་ཡེ་ཤེས་དབུ་སྐྲ། ནམ་མཁའི་སྙིང་པོའི་སྐུ་ཆོས་བཅས་གཏེར་བྱོན་འཁྲུལ་མེད་དང་། ཁྱད་པར་ཆོས་ཀྱི་རིང་བསྲེལ་ཨོ་རྒྱན་རིན་པོ་ཆེའི་ཕྱག་བྲིས་གཏེར་ཤོག་མཐོང་གྲོལ་གྱིས་གཙོས་ལེ་ཚན་དུ་མ། གསར་རྙིང་གི་རྒྱུད་སྡེ་བཞི་དྲུག་དང་འབྲེལ་བའི་གསང་སྔགས། རིག་སྔགས། གཟུངས་སྔགས་ཀྱི་ཚོགས་བསམ་གྱིས་མི་ཁྱབ་པ་དང་། གཞན་ཡང་བཀའ་གཏེར་གསར་རྙིང་གྲུབ་མཐའ་རིས་བྲལ་སེལ་མེད་ཡིད་ཆེས་ཁུངས་བཙུན་གྱི་དམ་རྫས། དབུ་སྐྲ། ན་བཟའ། རིང་བསྲེལ་སོགས་ངོས་ཀྱི་ལག་ཏུ་གང་ཡོད་རྣམ་གྲངས་སྟོང་ཕྲག་ལྷག་པ་ཐམས་ཅད་ཕྱོགས་གཅིག་ཏུ་བསྡུས་པའི་རྟེན་འདུས་ཆེན་མོ་བཅས་རིང་བསྲེལ་རྣམ་པ་ལྔས་ཕྱུར་བུར་གཏམས་པའི་ཐུགས་ཀར་གུ་རུ་རིན་པོ་ཆེའི་སྐུ་ཚབ་ཀྱི་རྒྱུ་གཏེར་བྱོན་ཁྱད་འཕགས་ལས་བཏབ་པའི་སྣང་བརྙན་ཡེ་ཤེས་སེམས་དཔའི་ཚུལ་དུ་བཞུགས་ཤིང་། བོདྷི་ས་ཏྭ་དང་ཆོས་རྒྱལ་གཉིས་ལའང་རིང་བསྲེལ་རྣམ་ལྔ་གོང་དང་ཆ་མཚུངས་པ་ལས། ཁྱད་པར་བོ་དྷི་ས་ཏྭའི་ཐུགས་ཀར་དེ་ཉིད་ཀྱི་སྐུ་ཆོས་རྟེན་འདམ་བྱས་པ་ལས་བཏབ་པའི་སྣང་བརྙན་དང་། ཇོ་བོ་རྗེ་དཔལ་ལྡན་ཨ་ཏི་ཤའི་གདུང་རུས་ལས་བཏབ་པའི་སཱཙྪ། ཆོས་རྒྱལ་གྱི་ཐུགས་ཀར་དེ་ཉིད་ཀྱི་གདུང་རུས་འཁྲུལ་མེད་ལས་བཏབ་པའི་སྣང་བརྙན་དང་། འཇམ་པའི་དབྱངས་ས་སྐྱ་པཎྜི་ཏའི་གདུང་ཚྭ་བཅས་ཡེ་ཤེས་སེམས་དཔའི་ཚུལ་དུ་བཞུགས་ཤིང་། འཁོར་གྱི་སྣང་བརྙན་ཐམས་ཅད་ལའང་རིང་བསྲེལ་རྣམ་པ་ལྔ་ཡོངས་སུ་ཚང་བས་ཕྱུར་བུར་གཏམས་པས་བྱིན་རླབས་ཀྱི་གཟི་འོད་འབར་བར་གྲུབ་པ་ལ། ངོས་ནས་ཀྱང་སྐུ་རྒྱུ་དང་ནང་གཞུག་ལ་ཡེ་ཤེས་འབེབས་པའི་དམིགས་འདུན་ནན་ཏན་བགྱིས་ཤིང་། བཟོའི་བྱ་བ་ལེགས་པར་གྲུབ་བསྟུན་དགེ་སློང་རྡོ་རྗེ་འཛིན་པ་འདུས་པ་དང་བཅས་པས་ཀྱང་ལྷག་པར་གནས་པའི་ཆོ་གས་མངའ་ཕུལ་བས་དམ་ཚིག་དང་ཡེ་ཤེས་དབྱེར་མེད་པར་ལྷ་དང་བཅས་པའི་གདུལ་བྱ་རྒྱ་མཚོའི་བསོད་ནམས་ཀྱི་ཞིང་ཆེན་པོར་གྱུར་པ་ལ་བརྟེན་ནས་ཡུལ་ཕྱོགས་བཀྲ་ཤིས་ཤིང་བྱིན་ཆགས་པ་དང་། རྡོ་རྗེའི་ཞིང་ཁམས་ཆེན་པོར་འགྱུར་བ་དང་། མཐོང་ཐོས་དྲན་རེག་ཐམས་ཅད་གནས་སྐབས་སུ་ཚེ་རིང་ནད་མེད་བདེ་སྐྱིད་ཆོས་ལྡན་གྱི་འབྱོར་བ་རྒྱས་ཤིང་བར་ཆད་ཐམས་ཅད་ཞི་བ་དང་། མཐར་ཐུག་ཐར་པའི་ས་བོན་རྒྱུད་ལ་ཞུགས་ཏེ་བྱང་ཆུབ་མཆོག་གི་གོ་འཕང་མངོན་དུ་འགྱུར་བར་གདོན་མི་ཟ་བས་མཆོག་དམན་ཐམས་ཅད་ནས་དང་འདོད་ཡིད་ཆེས་ཀྱི་དད་པས་ཀུན་ནས་བསླངས་ཏེ་ཕྱག་འཚལ་བ་དང་། གསོལ་བ་འདེབས་པ་དང་། མཆོད་པ་འབུལ་བ་དང་། བསྐོར་བ་བྱ་བ་དང་། གནས་སྐབས་དང་མཐར་ཐུག་གི་ཕུན་སུམ་ཚོགས་པ་ཐམས་ཅད་ཀྱི་གཞིར་གྱུར་པ་བྱང་ཆུབ་ཀྱི་སེམས་རིན་པོ་ཆེའི་རྩིས་ཟིན་པས་སྨོན་ལམ་རྒྱ་ཆེན་པོ་གདབ་པས་མཚོན་དལ་འབྱོར་གྱི་རྟེན་ལ་སྙིང་པོ་ལེན་པའི་ཐབས་ཚུལ་ལ་མཆོག་ཏུ་བརྩོན་པར་བྱའོ། །སླར་སྨྲས་པ། ཨོཾ་སྭ་སྟི་བི་ཛ་ཡནྟུ། ཕྱོགས་དུས་དཀོན་མཆོག་རྩ་གསུམ་ཆོས་སྲུང་ཚོགས། །དད་པའི་ཡིད་མཁར་མངོན་སུམ་གསལ་བའི་མདུན། །བདག་གཞན་ལུས་ཅན་རྒྱ་མཚོ་ཐབས་གཅིག་ཏུ། །མི་ཕྱེད་གུས་པ་ཆེན་པོས་ཕྱག་འཚལ་ལོ། །དངོས་ཡིད་ཀུན་བཟང་མཆོད་པའི་སྤྲིན་གྱིས་མཆོད། །སྟོབས་བཞིས་སྡིག་ལྟུང་ཚོགས་ཀུན་སྙིང་ནས་བཤགས། །འཕགས་དང་སོ་སྐྱེའི་དགེ་བར་རྗེས་ཡི་རང་། །རྣམ་འདྲེན་སྲས་དང་སློབ་མར་བཅས་པ་ཀུན། །ཆོས་འཁོར་བསྐོར་བཞིན་རྟག་པར་བཞུགས་གསོལ་འདེབས། །འདིས་མཚོན་ལེགས་བྱས་དགེ་བ་ཇི་སྙེད་ཀུན། །འཇམ་དཔལ་གཞོན་ནུའི་མཁྱེན་པའི་རྗེས་ཞུགས་ཏེ། །བྱང་ཆུབ་སྙིང་པོར་ཡོངས་སུ་བསྔོ་བར་བགྱི། །ལྷར་བཅས་བསོད་ནམས་ཞིང་མཆོག་ཟླ་མེད་པ། །རྟེན་མཆོག་འདི་རྣམས་བཞེངས་པའི་རྒྱུ་སྦྱོར་དང་། །བྱ་བྱེད་ལག་ལེན་འབྲེལ་བར་བཅས་པ་ཀུན། །ཚེ་འདིར་ཚེ་རིང་ནད་མེད་དམ་ཆོས་སྤྱོད། །ཕྱི་མ་བདེ་བ་ཅན་གྱི་ཞིང་སྐྱེས་ནས། །འོད་དཔག་མེད་པའི་ཞལ་མཐོང་ལུང་བསྟན་ཅིང་། །ལམ་ལྔ་ས་བཅུ་དཀའ་བ་མེད་པར་བགྲོད། རྫོགས་པའི་བྱང་ཆུབ་མྱུར་དུ་ཐོབ་པར་ཤོག །གཞན་ཡང་རིས་མེད་བསྟན་འཛིན་དམ་པ་རྣམས། །བསྐལ་བརྒྱར་ཞབས་བརྟན་ཆོས་འཁོར་རྟག་ཏུ་བསྐོར། །དགེ་འདུན་སྡེ་རྣམས་ཐུགས་མཐུན་ཁྲིམས་གཙང་ཞིང་། །བཤད་སྒྲུབ་ཕྲིན་ལས་ས་གསུམ་ཁྱབ་གྱུར་ཅིག །དམྱལ་བ་ཚ་གྲང་སྡུག་བསྔལ་ཡོངས་སུ་ཞི། །ཡི་དྭགས་བཀྲེས་སྐོམ་གདུང་བ་མཐའ་དག་བྲལ། །དུད་འགྲོ་བླུན་རྨོངས་མུན་པ་ཀུན་བསལ་ཏེ། །ངན་སོང་འགྲོ་རྣམས་བདེ་བས་འཚོ་བར་ཤོག །མི་རྣམས་བདེ་སྐྱིད་ཆོས་ལྡན་དཔལ་འབྱོར་རྒྱས། །ལྷ་མིན་འཐབ་རྩོད་ཟུག་རྔུ་རྒྱུར་བཅས་སྤངས། །ལྷ་རྣམས་བག་མེད་འཕོ་ལྟུང་ལས་གྲོལ་ཏེ། །ཀུན་ཀྱང་ཕན་བདེའི་དགེ་མཚན་འཕེལ་གྱུར་ཅིག །འཆི་མེད་པདྨོ་བཀོད་པའི་ཞིང་ཁམས་ཆེ། །རྟེན་དང་བརྟེན་པར་བཅས་པ་འདི་ཉིད་ཀྱང་། །གདུལ་བྱ་རྒྱ་མཚོའི་མགོན་དུ་རྟག་བཞུགས་ནས། །གྲོལ་བ་བཞི་ལྡན་ཕྲིན་ལས་མཐའ་ཡས་ཤོག །རྨད་བྱུང་རྟེན་འདིའི་བྱིན་རླབས་ལ་བརྟེན་ནས། །གནས་སྐབས་འགྲོ་ཀུན་བདེ་འབྱོར་ཕུན་སུམ་ཚོགས། །མཐར་ཐུག་ཕྱམས་གཅིག་སངས་རྒྱས་སར་བགྲོད་ནས། །རང་གཞན་དོན་གཉིས་ལྷུན་གྱིས་གྲུབ་པར་ཤོག །རྩ་བརྒྱུད་བླ་མ་མཆོག་གསུམ་ཡི་དམ་ལྷ། །མཁའ་འགྲོ་ཆོས་སྲུང་རྒྱ་མཚོའི་བདེན་སྟོབས་ཀྱིས། །ཇི་ལྟར་སྨོན་པའི་གནས་ཀུན་མྱུར་འགྲུབ་པའི། །དགེ་མཚན་བཀྲ་ཤིས་དཔལ་དུ་འབར་གྱུར་ཅིག །ཅེས་པའང་དད་གཏོང་སོགས་འཕགས་པའི་ནོར་གྱིས་མངོན་པར་མཐོ་བའི་དབུ་མཛད་ཆེན་མོ་ཀརྨ་ཆོས་འཕེལ་རང་ཉིད་ཀྱིས་ཇི་ལྟར་གསོལ་བ་བཏབ་པའི་ངོར། དྲི་མ་མེད་པའི་ཐུབ་བསྟན་རིན་པོ་ཆེ་མཐའ་དག་ལ་དད་པའི་པདྨོ་ལྷག་པར་རྒྱས་ཤིང་། ཡོངས་འཛིན་དམ་པ་མཁས་ཤིང་གྲུབ་མཆོག་བརྙེས་པ་དུ་མས་རྗེས་སུ་བཟུང་བའི་ཤཱཀྱའི་དགེ་སྦྱོང་སྤོང་བ་པ་བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དཔལ་བཟང་པོའམ། སངས་རྒྱས་གཉིས་པ་པདྨ་སཾ་བྷ་ཝས་བྱིན་གྱིས་བརླབས་པའི་རིག་འཛིན་གྱི་བཙུན་པ་པདྨ་འོད་གསལ་མདོ་སྔགས་གླིང་པའི་སྡེས་རབ་བྱུང་བཅོ་ལྔ་པའི་ལྕགས་ཕོ་རྟའི་ལོའི་རྒྱལ་ཟླ་བའི་དཀར་ཕྱོགས་ཀྱི་དུས་ཚེས་༡༥མཆོག་ཏུ་དགེ་བར་ཤར་མར་སྤེལ་བ་སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

thub bstan dar rgyas gling gi rig 'dzin lha khang gi dkar chag/[ ] @#/__/thub bstan dar rgyas gling gi 'og min rig 'dzin lha khang 'chi med pad+mo bkod pa'i zhing khams chen po'i gtam ngo mtshar dad pa'i snye ma zhes bya ba bzhugs so/__/oM swa sti bi dza yan+tu/__dge legs thugs rje rdzogs ldan sprin chen las/__/phan bde'i 'dod rgu char du snyil mdzad pa/__/dkon mchog rin chen rtsa gsum chos srung gis/__/rnam kun shis pa'i dga' ston sbyin gyur cig__/ces dge legs su bya ba'i tshig gis mdun bsus te/__'og min rig 'dzin lha khang mthong grol 'chi med pad+mo bkod pa'i zhing khams 'di nyid las brtsams te 'bel ba'i gtam cung zad tsam brjod na/__'phags mchog phyag na pad+mo'i thugs rje'i 'jug pas yongs su bzung ba'i gangs can bod kyi ljongs 'dir skor gsum/__ru bzhi/__sgang drug tu grags pa'i phyi ma'i bye brag smar khams zal mo sgang gi nor 'dzin gyi thig le/__gnam brkos dga' ldan pho brang pa dang /__gong ma chen po mchod yon gyi lha 'bangs 'dabs 'brel ba'i sa mtshams rgya sne steng gi bye brag__/yul la g.yang chags pas 'dod rgu'i dge mtshan phun sum tshogs pas brgyan pa 'debs ma zhabs zhes pa 'dir/__sgrub brgyud snying po'i bstan pa rin po che'i sgor zhugs shing /__dkon mchog dad pas 'bras la bla mar bgyi ba'i dad gtong phun sum tshogs pas brgyan pa'i bzo gnas rgya mtshor byang chub pa dbu mdzad chen mo shAkya'i dge sbyong karma d+harma bar+d+ha nas lhag pa'i bsam pa ston zla ltar dkar ba dpal ldan bla ma dam pa gong ma chos kyi spyan ldan zhi bar gshegs pa rnams kyi dgongs rdzogs/__gong ma mchod yon gyis gtsos da ltar zhal bzhugs pa'i bstan 'dzin gyi skyes chen dam pa ris su ma chad pa dang /__bstan pa'i sbyin bdag chen po rnams kyi zhabs brtan/__phyogs bcu'i dge 'dun gyi sde 'phel zhing 'jig rten dge legs chen pos khyab pa dang /__rang gzhan 'brel tshad thams cad srid zhi'i mtha' gnyis la mi gnas pa'i byang chub chen por myur du dbugs 'byin pa'i lhan cig byed rkyen du dmigs te/__bstan pa la dad pa'i yon gyi bdag po rnams dang bcas bkra shis pa'i gtsug lag khang dang kun dga' ra ba bkod legs su bskrun/__rgyal ba sras dang bcas pa'i snang brnyan gtso bor gyur pa'i sku gsung thugs rten rmad du byung ba bzhengs/__dge 'dun 'du ba'i sgo gya nom pa sbyar te bshad sgrub zung 'brel gyi dgon gnas thub bstan dar rgyas gling zhes grags pa'i yi ges mdzes par byas pa dang chab gcig__/slar yang kho bo cag la'ang chos kyi bdud rtsi zab mo nos shing mi phyed pa'i dad pas mtshams sbyar te/__gtsug lag khang gi steng thog tu rtsa brgyud kyi bla ma gtso bor gyur pa'i 'og min rig 'dzin lha khang mthong grol 'chi med pad+ma bkod pa'i zhing khams chen po 'di nyid bzhengs pa'i g.yar dam lhur bzhes te phyag len du btab pa na/__dkon mchog rin po che rnam pa gsum dang rtsa gsum rgyal ba rgya mtsho'i thugs rjes gzhi bzung /__rdo rje'i chos skyong ba'i tshogs dang /__dkar phyogs la mngon par dga' ba'i lha klu mthu bo che rnams kyis phrin las stsal/__phyogs 'di'i bla ma dge 'dun dang bstan pa la dad pa'i dbon 'bangs rnams kyis kyang rjes su yi rang ba'i grogs mdzad de mthong thos dran reg gi yid can thams cad grol ba bzhi dang ldan pa'i snang brnyan lha mi'i mchod sdong bstan 'gro'i btsas chen por grub pa 'di nyid kyi rten gyi gtso bor skyabs gnas kun 'dus kyi bdag nyid sangs rgyas gnyis pa pad+ma saM b+ha ba'i skyes bu'i lus tshad nyis 'gyur/__de'i g.yas su gangs ri'i khrod kyi thub dbang gnyis pa mkhan chen bo d+hi sa twa/__g.yon du bsil ldan gyi ljongs 'dir thub bstan nyin byed 'dren pa'i shing rta chen po 'jam pa'i dbyangs dngos chos rgyal khri srong lde'u btsan gnyis skyes bu'i lus tshad las lhag pa ste mkhan slob chos gsum gyi mtshan dpe'i snang brnyan mthong na mi mthun pa med par lham me/__lhan ner bzhugs pa'i bar mtshams rnams su snga 'gyur rdo rje theg pa'i bla ma brgyud pa gtso bor bton pa'i dbang du byas te/__rigs brgya'i khyab bdag dpal kun tu bzang po/__rgyal ba rdo rje 'chang /__rdo rje mi bskyod pa la sogs pa'i rgyal tshab rigs lnga/__khye'u snang ba dam pa sogs grags chen gsal ba'i ston pa/__dga' rab rdo rje/__'jam dpal bshes gnyen/__shrI siM ha/__dz+nyA na sU tra/__rgyal po d+ha na ta la sogs sems sde'i mkhas pa nyer gcig__/bcom ldan 'das rigs gsum mgon po/__lha grags ldan mchog skyong sogs dam pa'i rigs can dra ma lnga/__chos rgyal lung bstan rdo rje/__mdo mkhan bde ba gsal mdzad/__slob dpon sgeg pa'i rdo rje/__mkha' 'gro ma las kyi dbang mo/__hU~M ka ra sogs grub pa'i rig 'dzin brgyad/__bya rgyud kyi slob dpon byang chub mchog__/spyod rgyud kyi bka' babs sangs rgyas gsang ba/__rnal 'byor rgyud kyi shing rta chen po kun dga' snying po/__'phags pa klu sgrub sogs 'dzam bu gling mdzes par byed pa'i rgyan drug__/'dul ba gsal byed yon tan 'od dang shAkya 'od/__dpal sa ra ha sogs rnal 'byor gyi dbang phyug brgyad cu rtsa bzhi/__rmad du byung ba'i slob dpon zhi ba lha/__zla ba grags pa/__tsan+d+ra go mi/__sprul pa'i gu ru mtshan brgyad mkha' 'gro ma gnyis dang bcas pa/__slob dpon bi ma la mi tra/__chos rgyal srong btsan sgam po dang /__mnga' bdag khri ral/__bai ro tsa na sogs 'bangs rigs grub chen nyer lnga/__so ye shes dbang phyug__/zur po che shAkya 'byung gnas/__zur chung shes rab grags/__zur gsang bdag sgro phug pa shAkya seng ge ste zur pa mes dbon gsum/__gter chen mnga' bdag nyang /__gu ru chos dbang /__rig 'dzin rgod ldem ste mchog gi sprul sku rnam gsum/__kun mkhyen klong chen rab 'byams/__bod chen po'i ljongs 'dir gsang chen rdo rje theg pa'i shing rta chen po dam gtsang byams gsum bcas snga 'gyur rnying ma'i bla ma dam pa rnams dang /__gzhan yang grub mtha' ris med kyi dbang du byas te/__bka' gdams bstan pa'i mes po jo 'brom rngog gsum/__bka' brgyud rin po che'i gtsug rgyan mar mi dwags gsum/__dpal sa skya pa'i shing rta chen po sa ngor tshar gsum/__bka' gdams gsar ma'i srol 'byed rje yab sras gsum bcas dang /__sbyin pa'i bdag po rang nyid la dngos su chos kyi bdud rtsi stsal ba'i rtsa ba'i bla ma dam pa lnga bcas rtsa brgyud kyi bla ma dam pa rnams dang /__yi dam gyi lha rdo rje sems dpa' yab yum/__khrag 'thung rtsa ba'i lha zhal gcig phyag gnyis pa/__che mchog he ru ka zhal gsum phyag drug pa/__bka' brgyad gtso rkyang zhal gcig phyag gnyis pa/__rnal 'byor rgyud kyi gtso bo de bzhin gshegs pa rigs lnga/__spyod rgyud kyi gtso bo rnam snang mngon byang /__bya rgyud kyi gtso bo rigs gsum mgon po/__sangs rgyas sprul pa'i sku shAkya'i rgyal po la phyogs bcu'i sangs rgyas kyis bskor ba/__sangs rgyas 'od dpag med/__mgon po tshe dpag med/__bcom ldan 'das sman gyi bla ma/__rdo rje mi 'khrugs pa/__byang chub sems dpa' nye ba'i sras brgyad/__rang sangs rgyas tshogs na spyod pa dang /__bse ru lta bu gnyis/__nyan thos mchog gnyis/__'od srungs chen po sogs bstan pa'i gtad rabs bdun/__yan lag 'byung sogs gnas brtan chen po bcu drug__/zhabs 'bring dge bsnyen d+harma tA sbyin bdag dang bcas pa/__gnas gsum gyi dpa' bo mkha' 'gro'i mtshon byed dpa' bo yab yum rigs lnga/__rdo rje'i chos srung pho rgyud kyi gtso bo legs ldan tshogs kyi bdag po/__mo rgyud kyi gtso mo sngags srung e ka dzA Ti/__gnyis med rgyud kyi gtso bo dpal mgon ma ning nag po/__nag po chen po phyag bzhi pa/__phyag drug pa/__gnod sbyin nor lha'i gtso bo rnam sras ser chen/__AR+Ya dzaM b+ha la/__lha mo nor rgyun ma/__gtsang ris dpal mgon gyi gtso bo rgyal chen sde bzhi/__gangs ri'i ljongs 'di'i yul bdag thams cad kyi gtso mo bkra shis tshe ring ma dang bcas pa ste/__de lta bu'i snang brnyan rnams kyang dpal sdom pa 'byung ba'i rgyud las/__tshad ni tshad la phab kyin bzang /__/zhi ba la sogs nyams dang ldan/__/de lta bu ni rab gnas 'gyur/__/zhes gsungs pa ltar rgyud sde rin po che rnams nas ji skad gsungs pa'i tshad dang mtshan nyid nyams 'gyur thams cad yongs su rdzogs pa ste/__thog mar gnas yul dur khrod drug cu rtsa bzhi'i sa sna gter son dang /__ri bo po ta la'i 'bru sman/__/paN chen shA ri pu tras bsnams pa'i gnas yul dur khrod thams cad kyi sa sna chu sna sne gdong gong ma'i rten sgam nas byung ba/__grub chen thang stong rgyal pos 'dzam gling lan gsum bskor ba'i sa sna chu snas gtsos 'phags bal bod ljongs rgya nag tshun gyi gnas chen/__gnas phran/__gtsug lag khang sogs mang po'i sa sna chu shing dang /__sman sna dang /__dpal can gyi rdzas/__rin po che sna tshogs pa'i phye ma bcas 'jim pa dang sbyar te legs par bzhengs pa'i gtso bo pad+ma saM b+ha wa'i nang du ring bsrel rnam pa lnga zhes grags pa las/__yungs 'bru lta bu'i ring bsrel sangs rgyas kyi 'phel gdung /__bde bar gshegs pa thams cad gyi gdung gi ril bu dam rdzas rin po che'i tog__/ring bsrel kun 'dus ril bu nor bu tog gi blo gros/__gu ru rin po che'i tshems las sprul pa'i ring bsrel mthong grol shin tu khyad 'phags/__chos sku'i ring bsrel kun mkhyen klong chen pa'i gdung tshwa/__sku gdung ring bsrel rig 'dzin dga' rab rdo rje'i sprul pa'i gdung rten gter byon/__o rgyan rin po che'i shangs mtshal/__gu ru yab yum gyi byang sems dam rdzas rol pa chen po/__chos rgyal khri srong gi gdung rus/__sku bal gyi ring bsrel 'od srung dang thub pa'i sku chos/__slob dpon klu sgrub kyi mchil l+h+wam/__'phags pa thogs med kyi chos gos/__gu ru rin po che'i dbu skra/__dbu zhwa/__na bza' za pher/__sku reg__/zhabs l+h+wam/__ye shes kyi mkha' 'gro ma man+dA ra'i na bza'/__mtsho rgyal gsang gos/__mkhan chen bod+hi sa twa'i chos gos/__chos rgyal khri srong na bza'/__lo chen bai ro dang /__gnubs sangs rgyas ye shes dbu skra/__nam mkha'i snying po'i sku chos bcas gter byon 'khrul med dang /__khyad par chos kyi ring bsrel o rgyan rin po che'i phyag bris gter shog mthong grol gyis gtsos le tshan du ma/__gsar rnying gi rgyud sde bzhi drug dang 'brel ba'i gsang sngags/__rig sngags/__gzungs sngags kyi tshogs bsam gyis mi khyab pa dang /__gzhan yang bka' gter gsar rnying grub mtha' ris bral sel med yid ches khungs btsun gyi dam rdzas/__dbu skra/__na bza'/__ring bsrel sogs ngos kyi lag tu gang yod rnam grangs stong phrag lhag pa thams cad phyogs gcig tu bsdus pa'i rten 'dus chen mo bcas ring bsrel rnam pa lngas phyur bur gtams pa'i thugs kar gu ru rin po che'i sku tshab kyi rgyu gter byon khyad 'phags las btab pa'i snang brnyan ye shes sems dpa'i tshul du bzhugs shing /__bod+hi sa twa dang chos rgyal gnyis la'ang ring bsrel rnam lnga gong dang cha mtshungs pa las/__khyad par bo d+hi sa twa'i thugs kar de nyid kyi sku chos rten 'dam byas pa las btab pa'i snang brnyan dang /__jo bo rje dpal ldan a ti sha'i gdung rus las btab pa'i sAts+tsha/__chos rgyal gyi thugs kar de nyid kyi gdung rus 'khrul med las btab pa'i snang brnyan dang /__'jam pa'i dbyangs sa skya paN+Di ta'i gdung tshwa bcas ye shes sems dpa'i tshul du bzhugs shing /__'khor gyi snang brnyan thams cad la'ang ring bsrel rnam pa lnga yongs su tshang bas phyur bur gtams pas byin rlabs kyi gzi 'od 'bar bar grub pa la/__ngos nas kyang sku rgyu dang nang gzhug la ye shes 'bebs pa'i dmigs 'dun nan tan bgyis shing /__bzo'i bya ba legs par grub bstun dge slong rdo rje 'dzin pa 'dus pa dang bcas pas kyang lhag par gnas pa'i cho gas mnga' phul bas dam tshig dang ye shes dbyer med par lha dang bcas pa'i gdul bya rgya mtsho'i bsod nams kyi zhing chen por gyur pa la brten nas yul phyogs bkra shis shing byin chags pa dang /__rdo rje'i zhing khams chen por 'gyur ba dang /__mthong thos dran reg thams cad gnas skabs su tshe ring nad med bde skyid chos ldan gyi 'byor ba rgyas shing bar chad thams cad zhi ba dang /__mthar thug thar pa'i sa bon rgyud la zhugs te byang chub mchog gi go 'phang mngon du 'gyur bar gdon mi za bas mchog dman thams cad nas dang 'dod yid ches kyi dad pas kun nas bslangs te phyag 'tshal ba dang /__gsol ba 'debs pa dang /__mchod pa 'bul ba dang /__bskor ba bya ba dang /__gnas skabs dang mthar thug gi phun sum tshogs pa thams cad kyi gzhir gyur pa byang chub kyi sems rin po che'i rtsis zin pas smon lam rgya chen po gdab pas mtshon dal 'byor gyi rten la snying po len pa'i thabs tshul la mchog tu brtson par bya'o/__/slar smras pa/__oM swa sti bi dza yan+tu/__phyogs dus dkon mchog rtsa gsum chos srung tshogs/__/dad pa'i yid mkhar mngon sum gsal ba'i mdun/__/bdag gzhan lus can rgya mtsho thabs gcig tu/__/mi phyed gus pa chen pos phyag 'tshal lo/__/dngos yid kun bzang mchod pa'i sprin gyis mchod/__/stobs bzhis sdig ltung tshogs kun snying nas bshags/__/'phags dang so skye'i dge bar rjes yi rang /__/rnam 'dren sras dang slob mar bcas pa kun/__/chos 'khor bskor bzhin rtag par bzhugs gsol 'debs/__/'dis mtshon legs byas dge ba ji snyed kun/__/'jam dpal gzhon nu'i mkhyen pa'i rjes zhugs te/__/byang chub snying por yongs su bsngo bar bgyi/__/lhar bcas bsod nams zhing mchog zla med pa/__/rten mchog 'di rnams bzhengs pa'i rgyu sbyor dang /__/bya byed lag len 'brel bar bcas pa kun/__/tshe 'dir tshe ring nad med dam chos spyod/__/phyi ma bde ba can gyi zhing skyes nas/__/'od dpag med pa'i zhal mthong lung bstan cing /__/lam lnga sa bcu dka' ba med par bgrod/__rdzogs pa'i byang chub myur du thob par shog__/gzhan yang ris med bstan 'dzin dam pa rnams/__/bskal brgyar zhabs brtan chos 'khor rtag tu bskor/__/dge 'dun sde rnams thugs mthun khrims gtsang zhing /__/bshad sgrub phrin las sa gsum khyab gyur cig__/dmyal ba tsha grang sdug bsngal yongs su zhi/__/yi dwags bkres skom gdung ba mtha' dag bral/__/dud 'gro blun rmongs mun pa kun bsal te/__/ngan song 'gro rnams bde bas 'tsho bar shog__/mi rnams bde skyid chos ldan dpal 'byor rgyas/__/lha min 'thab rtsod zug rngu rgyur bcas spangs/__/lha rnams bag med 'pho ltung las grol te/__/kun kyang phan bde'i dge mtshan 'phel gyur cig__/'chi med pad+mo bkod pa'i zhing khams che/__/rten dang brten par bcas pa 'di nyid kyang /__/gdul bya rgya mtsho'i mgon du rtag bzhugs nas/__/grol ba bzhi ldan phrin las mtha' yas shog__/rmad byung rten 'di'i byin rlabs la brten nas/__/gnas skabs 'gro kun bde 'byor phun sum tshogs/__/mthar thug phyams gcig sangs rgyas sar bgrod nas/__/rang gzhan don gnyis lhun gyis grub par shog__/rtsa brgyud bla ma mchog gsum yi dam lha/__/mkha' 'gro chos srung rgya mtsho'i bden stobs kyis/__/ji ltar smon pa'i gnas kun myur 'grub pa'i/__/dge mtshan bkra shis dpal du 'bar gyur cig__/ces pa'ang dad gtong sogs 'phags pa'i nor gyis mngon par mtho ba'i dbu mdzad chen mo karma chos 'phel rang nyid kyis ji ltar gsol ba btab pa'i ngor/__dri ma med pa'i thub bstan rin po che mtha' dag la dad pa'i pad+mo lhag par rgyas shing /__yongs 'dzin dam pa mkhas shing grub mchog brnyes pa du mas rjes su bzung ba'i shAkya'i dge sbyong spong ba pa bya bral chos rje 'jam dbyangs mkhyen brtse'i dbang po kun dga' bstan pa'i rgyal mtshan dpal bzang po'am/__sangs rgyas gnyis pa pad+ma saM b+ha was byin gyis brlabs pa'i rig 'dzin gyi btsun pa pad+ma 'od gsal mdo sngags gling pa'i sdes rab byung bco lnga pa'i lcags pho rta'i lo'i rgyal zla ba'i dkar phyogs kyi dus tshes 15mchog tu dge bar shar mar spel ba sarba dA ka l+yA NaM b+ha ba tu//___//___!_