JKW-KABUM-02-KHA-001-034

🚧 This website is under continued development. We appreciate your patience!

Previous Text Back to Volume PageNext Text

གྲུབ་པའི་མཐའ་རྣམ་པར་དབྱེ་བའི་གཏམ་ངེས་དོན་རྣ་ཆ།

Wylie title	grub pa'i mtha' rnam par dbye ba'i gtam nges don rna cha
Location	mkhyen brtse'i bka' 'bum Volume 2, sde tshan 1, Text 34, Pages 156-162 (Folios 78b2 to 81b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. grub pa'i mtha' rnam par dbye ba'i gtam nges don rna cha. In 'jam dbyangs mkhyen brtse'i dbang po'i bka' 'bum, Vol. 2: 156-162. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

1 Texts in this Section (sde tshan or chos tshan)

34 156-162	གྲུབ་པའི་མཐའ་རྣམ་པར་དབྱེ་བའི་གཏམ་ངེས་དོན་རྣ་ཆ། grub pa'i mtha' rnam par dbye ba'i gtam nges don rna cha Discourses - gtam	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

གྲུབ་པའི་མཐའ་རྣམ་པར་དབྱེ་བའི་གཏམ་ངེས་དོན་རྣ་ཆ་ཞེས་བྱ་བ་བཞུགས་སོ། །ཆོས་ཉིད་འདུས་མ་བྱས་པ་ཡི། །རང་བཞིན་རྣམ་ཐར་སྒོ་གསུམ་ཞལ། །སེམས་ཀྱི་རྡོ་རྗེ་བླ་མ་ལ། །བཏུད་ནས་དྲིས་ལན་མདོ་ཙམ་དབྱེ། །གཉིས་མེད་གསུང་བའི་དབང་ཕྱུག་གིས། །རིགས་ཅན་གསུམ་གྱི་གདུལ་བྱ་རྣམས། །རང་གི་བྱང་ཆུབ་ལ་འགོད་ཕྱིར། །རྒྱུ་འབྲས་ཐེག་པ་བསམ་ཡས་བསྟན། །དེ་ཉིད་མ་རྟོགས་སེམས་ཅན་ཀུན། །གནས་སྐབས་འདོད་པའི་ཕྱོགས་བཟུང་ནས། །བསྟན་པ་དཀྲུགས་པ་ལྷ་ཆེན་པོའི། །རྣམ་ཐར་ཆོས་སུ་བཅོས་པ་ཡིན། །འདི་ན་ཉན་ཐོས་བྱེ་སྨྲ་ནས། །མཆོག་གསང་རྡོ་རྗེ་སྙིང་པོའི་བར། །ཆོས་ཉིད་གཅིག་གི་དེ་ཁོ་ན། །རྟོགས་པའི་ཐབས་སུ་ཡང་དག་བསྟན། །ཅི་ཕྱིར་རྟག་ཆད་སྨྲ་བ་ལ། །མངོན་པར་དགའ་བའི་མུ་སྟེགས་ཀུན། །རྟག་གཅིག་རང་དབང་ཅན་གྱུར་པའི། །གང་ཟག་བདག་ཉིད་ཡོད་པར་མཐུན། །དེ་ལ་རང་སྡེ་སྨྲ་བ་ཡིས། །ཕུང་པོ་ཉིད་ལས་གཅིག་ཐ་དད། །དེ་ལས་གཞན་དུའང་མ་དམིགས་ཕྱིར། །མེད་པར་སྒྲུབ་པ་གཞིར་བྱས་ནས། །བྱེ་སྨྲས་གཟུང་ཡུལ་རྡུལ་ཕྲན་དང་། །འཛིན་ཤེས་སྐད་ཅིག་ཆ་མེད་དུ། །བདེན་གྲུབ་འདོད་པས་ཆོས་ཀྱི་བདག །རགས་པ་ཙམ་ཡང་སྤང་བ་མེད། །མདོ་སྡེ་པ་དག་ཕྱི་དོན་ཀུན། །སེམས་ཀྱི་སྣང་ཆ་ཡིན་མོད་ཀྱང་། །དེ་རྒྱུ་ཕྱི་དོན་ཉིད་འདོད་པས། །གཟུང་བའི་ཆོས་བདག་རགས་པ་སྤངས། །སེམས་ཙམ་གཟུགས་ཅན་ཕྱོགས་ཆ་དང་། །ཤེས་པ་དུས་ཆས་མ་གྲུབ་ཕྱིར། །གཟུང་འཛིན་བདེན་མེད་ངེས་རྙེད་ཀྱང་། །གཉིས་མེད་ཡོངས་གྲུབ་བདེན་པར་འདོད། །རང་རྒྱུད་སྨྲ་བས་རིག་ཆེན་ལྔས། །དེ་ཡང་བདེན་མེད་གཏན་དབབ་ནས། །དོན་དམ་ངོ་བོ་ཉིད་མེད་དང་། །ཀུན་རྫོབ་ཇི་ལྟར་སྣང་བཞིན་འཇོག །ཐལ་འགྱུར་བས་ནི་སྒྲོ་སྐུར་གྱི། །ཁས་ལེན་སྤྲོས་པ་ཀུན་སྤངས་ནས། །གཞན་གྱི་འདོད་པ་ནང་འགལ་བའི། །རིག་པས་བཅོམ་པའི་ཁྱད་པར་ལྡན། །དེ་དང་རྫོགས་པ་ཆེན་པོ་གཉིས། །ཆོས་ཉིད་བསམ་གྱིས་མི་ཁྱབ་པའི། །བློ་འདས་ངང་དུ་རོ་གཅིག་ཕྱིར། །ཤིན་ཏུ་མཉམ་གཞག་སེམས་ཀྱིས་ལྟོས། །སེམས་ཙམ་དྲི་མེད་དག་པ་དང་། །གཞན་སྟོང་སྨྲ་བ་མཚུངས་མིན་ཏེ། །སྔ་མས་རྣམ་ཤེས་ཕྱི་མ་ཡིས། །ཡེ་ཤེས་དོན་དམ་འདོད་ཕྱིར་རོ། །ལམ་འབྲས་པ་དག་སྣང་བ་སེམས། །སེམས་སྣང་སྒྱུ་མ་དེ་ཉིད་ཀྱང་། །རང་བཞིན་མེད་པར་སྒྲུབ་པ་ལ། །རྟེན་འབྲེལ་བརྗོད་བྲལ་གཉིས་སུ་དབྱེ། །འོན་ཀྱང་སྣང་བ་སེམས་ཙམ་དུ། །འདོད་པ་དངོས་པོར་སྨྲ་བ་དང་། །མཚུངས་སོ་སྙམ་པའི་ལོག་རྟོག་ནི། །རྣམ་དཔྱོད་ཞིབ་མོས་མ་བརྟགས་སྐྱོན། །ཅི་ཕྱིར་རྡོ་རྗེ་གུར་ལས་ཀྱང་། །རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་གང་ཟག་མེད། །རྣམ་པར་ཤེས་པའི་གནས་དོན་ནམ། །ཕྱི་རོལ་གྱུར་པ་ཅུང་ཟད་མེད། །ཅེས་དང་། སཾ་བུ་ཊི་ལས་ཀྱང་། ཕྱི་དང་ནང་གི་བདག་ཉིད་ཅན། །འདི་དག་ཐམས་ཅད་སེམས་སུ་བརྟག །སེམས་ལས་མ་གཏོགས་པ་ཉིད་ནི། །གཞན་ན་ཡོད་པ་མ་ཡིན་ནོ། །ཞེས་གསུངས་དེ་ཡི་འཐད་པ་ཡང་། །མགོན་པོ་ཀླུ་སྒྲུབ་སྐྱོབ་ཉིད་ཀྱིས། །ཕྱི་རོལ་ཡུལ་ནི་རྣམ་གཅིག་ལ། །ཤེས་པ་ཐ་དད་རབ་འཇུག་སྟེ། །ཡིད་འོང་གཟུགས་ནི་གང་ཡིན་པ། །དེ་ནི་གཞན་ལ་གཞན་དུ་སྣང་། །བུད་མེད་ལུས་ནི་གཅིག་ཉིད་ལ། །དཀའ་ཐུབ་ཆགས་ཅན་ཁྱི་རྣམས་ཀྱིས། །མི་གཙང་འདོད་བྱ་བཟའ་བྱ་ཞེས། །རྣམ་པར་འདོད་པ་གསུམ་དུ་འགྱུར། །ཞེས་སོགས་རིག་པའི་ཚུལ་གྱིས་སྒྲུབ། །ཁྱད་པར་སྣང་བ་སེམས་ཙམ་དུ། །འདོད་ཚུལ་རྣལ་འབྱོར་སྤྱོད་པ་དང་། །མཚུངས་ཀྱང་སེམས་ཉིད་བདེན་གྲུབ་ཏུ། །འདོད་མིན་སྤྲོས་བྲལ་ལ་བཞེད་ཕྱིར། །གཞན་ཡང་འོད་གསལ་རྫོགས་པ་ཆེ། །རང་ཤར་ཆེན་པོའི་རྒྱུད་སོགས་ལས། །རྟག་ཆད་སྨྲ་བའི་མུ་སྟེགས་ནས། །མཆོག་གསང་རྡོ་རྗེ་སྙིང་པོའི་བར། །ལྟ་རིམ་རྒྱས་པར་ཕྱེ་བ་ལྟར། །དགྱེས་རྡོར་རྩ་བའི་རྒྱུད་ཉིད་ལས། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །དེ་རྗེས་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་བསྟན། །ཅེས་སོགས་གསལ་བར་གསུངས་པ་བཞིན། །རྣལ་འབྱོར་དབང་ཕྱུག་བིཪྺ་པས། །གང་ཟག་རིམ་གྱིས་འཇུག་པའི་ཕྱིར། །བཀྲལ་བའི་དགོངས་དོན་སྙིང་པོ་ནི། །ཕུང་པོ་ཁམས་དང་སྐྱེ་མཆེད་དུ། །བསྟན་པས་ཉན་ཐོས་སྡེ་གཉིས་དང་། །མཚུངས་ཤིང་མུ་སྟེགས་བྱེད་ལས་འཕགས། །ཡུལ་མེད་ཡུལ་ཅན་ཤེས་པ་དང་། །དེ་ལས་གཞན་པའི་གཉིས་མེད་པའང་། །རང་བཞིན་གྲུབ་པ་མེད་སྨྲ་བས། །སེམས་ཙམ་ལས་ཀྱང་ཁྱད་པར་འཕགས། །ཀུན་རྫོབ་སྒྱུ་མ་ལྟར་སྣང་ཡང་། །དོན་དམ་འདི་ཞེས་དམ་བཅའ་བ། །འདོད་མིན་ངོ་བོ་ཉིད་མེད་པའི། །དབུ་མ་ལས་ཀྱང་ཁྱད་པར་འཕགས། །དེས་ན་གཟོད་ནས་བློས་བྱས་ཀྱི། །མཐའ་བཞིའི་སྤྲོས་པ་ལས་འདས་ཀྱང་། །ཟུང་འཇུག་ཚུལ་དུ་ཉམས་བླང་བ། །ལམ་འདིའི་དགོངས་པའི་མཐར་ཐུག་ཡིན། །དེ་ཡང་ཚིག་ཙམ་མ་ཡིན་པར། །དོན་དམ་སོ་སོར་རྟོག་པ་ཡི། །ཡེ་ཤེས་ཀློང་ནས་བརྡོལ་བའི་ཚེ། །རྫོགས་པ་ཆེན་པོར་རོ་གཅིག་གོ །མདོར་ན་ཟབ་གསང་སྙིང་ཐིག་ནས། །རིག་པ་བཙན་ཐབས་ངོ་སྤྲོད་ཚུལ། །གསུངས་འདི་དབང་པོ་རྣོན་པོ་ནི། །གཅིག་ཅར་རིགས་ཅན་རྣམས་ལ་དགོངས། །གསུང་ངག་ལམ་དང་འབྲས་བུ་ཡི། །འཆད་ཚུལ་རིམ་གྱིས་འཁྲིད་པ་སྟེ། །ཚུལ་འདི་ལེགས་པར་མཁྱེན་གྱུར་ན། །འགལ་འདུའི་སྤྲོས་པ་དབྱིངས་སུ་ཞི། །རྣལ་འབྱོར་དབང་ཕྱུག་བིཪྺ་པས། །སེམས་ཉིད་གསལ་སྟོང་ཟུང་འཇུག་ཏུ། །འཇོག་དང་གཞན་སྟོང་སྨྲ་བ་ཡི། །ཡོངས་གྲུབ་བདེ་གཤེགས་སྙིང་པོ་གཉིས། །མིང་གཅིག་ན་ཡང་དོན་མི་མཚུངས། །ཅི་ཕྱིར་འཇམ་མགོན་ས་པཎ་གྱིས། །དེས་ན་དེ་བཞིན་གཤེགས་པ་ཡི། །སྙིང་པོ་སྤྲོས་བྲལ་ཡིན་པའི་ཕྱིར། །སེམས་ཅན་རྣམས་ལ་སངས་རྒྱས་དང་། །འཁོར་བ་གཉིས་ཀ་འབྱུང་བར་འཐད། །ཅེས་སོགས་སྒྲུབ་བྱེད་དུ་མ་ཡིས། །གཤེགས་སྙིང་སྤྲོས་བྲལ་སྒྲུབ་པ་དང་། །གཅིག་ཤོས་རྟག་བརྟན་ཡོངས་གྲུབ་ཏུ། །འདོད་པ་མཚུངས་པའི་སྐབས་ཡོད་དམ། །དེས་ན་ཀུན་མཁྱེན་ཆེན་པོ་ཡིས། །རང་བཞིན་འོད་གསལ་ཤེལ་གྱི་ཁམས། །བག་ཆགས་ཚོན་གྱིས་བསྒྱུར་བ་ལས། །གནས་སྐབས་དུ་མར་སྣང་བ་ཡི། །དབྱིངས་ཉིད་འཁོར་འདས་ཀུན་གྱི་གཞི། །ཞེས་དང་དེ་དོན་གསལ་བའི་ཕྱིར། །འདིར་ནི་བྱམས་མགོན་ཀླུ་སྒྲུབ་ཀྱིས། །གསལ་ལ་རྒྱུན་ཆགས་མ་འགག་པ། །མཐའ་བཞིའི་སྤྲོས་པས་སྟོང་པ་ཡི། །ཟུང་འཇུག་འདུས་མ་བྱས་ལ་བཞེད། །ཅེས་གསུངས་ཤིང་རྟ་ཆེན་པོ་གཉིས། །དགོངས་པ་གཅིག་ཏུ་འབབས་པའི་ཚུལ། །ལུང་དང་རིགས་པས་རྒྱས་པར་བསྒྲུབས། །མཚན་གཞི་དེ་ཡི་མཚོན་བྱེད་ཀྱང་། །ཆོས་དབྱིངས་དྲི་བཅས་དེ་བཞིན་ཉིད། །འོད་གསལ་བདེ་གཤེགས་སྙིང་པོ་དང་། །སེམས་ཀྱི་རང་བཞིན་དག་པ་སོགས། །མཚན་གྱི་རྣམ་གྲངས་དུ་མས་བསྟན། །ལང་གཤེགས་སྟུག་པོ་བཀོད་པ་དང་། །རྣལ་འབྱོར་དབང་ཕྱུག་མན་ངག་དང་། །དཔལ་ལྡན་ཟླ་བའི་ཞབས་སོགས་ཀྱིས། །ཀུན་གཞིའི་སྒྲ་ཡང་འདི་ལ་བཞེད། །ཟབ་མོའི་རྒྱུད་དུ་འཇམ་དཔལ་དང་། །ཡེ་ཤེས་ཆེན་པོ་ལྷན་སྐྱེས་དང་། །རྡོ་རྗེ་རྡོ་རྗེ་སེམས་དཔའ་དཔལ། །ཀུན་བཟང་ལ་སོགས་བགྲང་ཡས་གསུངས། །ཞེས་སོགས་གསལ་བར་འཆད་པའི་ཚུལ། །འདི་ལ་ཞིབ་མོའི་བློ་ཡིས་དཔྱོད། །དེ་ལས་གཞན་དུ་སྙིང་པོ་ཉིད། །དྲི་བཅས་སེམས་ལ་རིག་པ་ཡིས། །བདེན་པས་བཀག་ཙམ་འདོད་པ་དང་། །བདེན་གྲུབ་ཁོ་ནར་དམ་བཅའ་སོགས། །སྒྲོ་སྐུར་ཕྱོགས་སུ་ལྷུང་ངོ་ཞེས། །རིག་ཚུལ་རྣམ་དག་འགོད་ན་ཡང་། །འདིར་ནི་དབུ་མའི་ལམ་ཉིད་དུ། །རེ་ཞིག་དགག་སྒྲུབ་མེད་པར་འཇོག །འབྲས་བུ་སངས་རྒྱས་ཡེ་ཤེས་ནི། །དབུ་མ་རང་རྒྱུད་སྨྲ་བ་ཡིས། །མེད་པར་འདོད་ཅིང་གཞན་སྟོང་པས། །རྟག་བརྟན་འགྱུར་བ་མེད་པར་སྨྲ། །ངེས་དོན་མཐར་ཐུག་ཐལ་འགྱུར་བས། །བློ་དང་ལྷན་ཅིག་མི་གནས་པའི། །བསམ་གྱིས་མི་ཁྱབ་སྤྱོད་ཡུལ་ཕྱིར། །ཡོད་མེད་ཁས་ལེན་བྲལ་བར་བཞེད། །མདོ་ལས་ཡེ་ཤེས་མེད་གསུངས་པ། །ཟག་པར་བཅས་པའི་ཆོས་ཁམས་དང་། །མཚུངས་ལྡན་མེད་པ་ཉིད་ལ་དགོངས། །དགོས་པ་རྟག་འཛིན་བཟློག་ཕྱིར་ཡིན། །ལ་ལར་ཡེ་ཤེས་ཡོད་གསུངས་པའང་། །བསམ་བརྗོད་ལས་འདས་ཡེ་ཤེས་ཀྱིས། །འཁོར་འདས་ཀུན་ལ་ཁྱབ་པར་དགོངས། །དགོས་པ་ཆད་མཐའ་བསལ་ཕྱིར་ཡིན། །དོན་དུ་མཐའ་གཉིས་ལས་འདས་པའི། །ཁས་ལེན་བྲལ་བའི་གནས་ལུགས་ཉིད། །མངོན་སུམ་རང་ངོར་རྟོགས་ཙ་ན། །རྟག་ཆད་སྤྲོས་པ་དབྱིངས་སུ་གྲོལ། །འདི་དོན་ལེགས་པར་མཁྱེན་འདོད་ན། །དབེན་ཞིང་ཉམས་དགའི་ནགས་ཀླུང་དུ། །རྩེ་གཅིག་མཉམ་པར་བཞག་ལས་གཞན། །རྟོག་གེའི་འགལ་འདུས་ནམ་ཡང་མིན། །དེ་ཉིད་ཕྱིར་ན་སྐལ་བཟང་ཁྱོད། །ཟབ་དོན་ཉི་གཞོན་བཅུད་འཐུངས་པས། །བློ་མཆོག་པད་དཀར་རྒྱས་པ་དང་། །སྒོམ་སྤངས་འབྲས་བུས་ཕྱུག་པར་མཛོད། །གང་གི་མཁྱེན་རབ་རྨད་བྱུང་བས། །དྲི་བ་མཐའ་ཀླས་སྩལ་མོད་ཀྱང་། །རྨོངས་དང་ལེ་ལོའི་གཞན་དབང་གིས། །རྒྱ་ཆེར་སྤྲོ་བའི་གོ་སྐབས་ཅི། །འོན་ཀྱང་མདོར་བསྡུས་ཕུལ་འདི་ལ། །ནོངས་པའི་ཚོགས་རྣམས་བསལ་བ་དང་། །དགེ་བས་ཡིད་ཅན་རྒྱ་མཚོ་ཀུན། །ཐམས་ཅད་མཁྱེན་པ་ཉིད་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

grub pa'i mtha' rnam par dbye ba'i gtam nges don rna cha/__ grub pa'i mtha' rnam par dbye ba'i gtam nges don rna cha zhes bya ba bzhugs so/_/chos nyid 'dus ma byas pa yi/_/rang bzhin rnam thar sgo gsum zhal/_/sems kyi rdo rje bla ma la/__/btud nas dris lan mdo tsam dbye/_/gnyis med gsung ba'i dbang phyug gis/_/rigs can gsum gyi gdul bya rnams/_/rang gi byang chub la 'god phyir/_/rgyu 'bras theg pa bsam yas bstan/_/de nyid ma rtogs sems can kun/_/gnas skabs 'dod pa'i phyogs bzung nas/_/bstan pa dkrugs pa lha chen po'i/_/rnam thar chos su bcos pa yin/_/'di na nyan thos bye smra nas/_/mchog gsang rdo rje snying po'i bar/_/chos nyid gcig gi de kho na/_/rtogs pa'i thabs su yang dag bstan/_/ci phyir rtag chad smra ba la/_/mngon par dga' ba'i mu stegs kun/_/rtag gcig rang dbang can gyur pa'i/_/gang zag bdag nyid yod par mthun/_/de la rang sde smra ba yis/_/phung po nyid las gcig tha dad/_/de las gzhan du'ang ma dmigs phyir/_/med par sgrub pa gzhir byas nas/_/bye smras gzung yul rdul phran dang /_/'dzin shes skad cig cha med du/_/bden grub 'dod pas chos kyi bdag__/rags pa tsam yang spang ba med/_/mdo sde pa dag phyi don kun/_/sems kyi snang cha yin mod kyang /_/de rgyu phyi don nyid 'dod pas/_/gzung ba'i chos bdag rags pa spangs/_/sems tsam gzugs can phyogs cha dang /_/shes pa dus chas ma grub phyir/_/gzung 'dzin bden med nges rnyed kyang /_/gnyis med yongs grub bden par 'dod/_/rang rgyud smra bas rig chen lngas/_/de yang bden med gtan dbab nas/_/don dam ngo bo nyid med dang /_/kun rdzob ji ltar snang bzhin 'jog__/thal 'gyur bas ni sgro skur gyi/_/khas len spros pa kun spangs nas/_/gzhan gyi 'dod pa nang 'gal ba'i/_/rig pas bcom pa'i khyad par ldan/_/de dang rdzogs pa chen po gnyis/_/chos nyid bsam gyis mi khyab pa'i/_/blo 'das ngang du ro gcig phyir/_/shin tu mnyam gzhag sems kyis ltos/_/sems tsam dri med dag pa dang /_/gzhan stong smra ba mtshungs min te/_/snga mas rnam shes phyi ma yis/_/ye shes don dam 'dod phyir ro/_/lam 'bras pa dag snang ba sems/_/sems snang sgyu ma de nyid kyang /_/rang bzhin med par sgrub pa la/_/rten 'brel brjod bral gnyis su dbye/_/'on kyang snang ba sems tsam du/_/'dod pa dngos por smra ba dang /_/mtshungs so snyam pa'i log rtog ni/_/rnam dpyod zhib mos ma brtags skyon/_/ci phyir rdo rje gur las kyang /_/rin chen sems las phyir gyur pa'i/_/sangs rgyas med cing gang zag med/_/rnam par shes pa'i gnas don nam/__/phyi rol gyur pa cung zad med/_/ces dang /_saM bu Ti las kyang /_phyi dang nang gi bdag nyid can/_/'di dag thams cad sems su brtag__/sems las ma gtogs pa nyid ni/_/gzhan na yod pa ma yin no/_/zhes gsungs de yi 'thad pa yang /_/mgon po klu sgrub skyob nyid kyis/_/phyi rol yul ni rnam gcig la/_/shes pa tha dad rab 'jug ste/_/yid 'ong gzugs ni gang yin pa/_/de ni gzhan la gzhan du snang /__/bud med lus ni gcig nyid la/_/dka' thub chags can khyi rnams kyis/_/mi gtsang 'dod bya bza' bya zhes/_/rnam par 'dod pa gsum du 'gyur/_/zhes sogs rig pa'i tshul gyis sgrub/_/khyad par snang ba sems tsam du/_/'dod tshul rnal 'byor spyod pa dang /__/mtshungs kyang sems nyid bden grub tu/_/'dod min spros bral la bzhed phyir/_/gzhan yang 'od gsal rdzogs pa che/_/rang shar chen po'i rgyud sogs las/_/rtag chad smra ba'i mu stegs nas/_/mchog gsang rdo rje snying po'i bar/_/lta rim rgyas par phye ba ltar/_/dgyes rdor rtsa ba'i rgyud nyid las/_/de la bye brag smra ba bstan/_/mdo sde pa yang de bzhin no/_/de rjes rnal 'byor spyod pa nyid/_/de yi rjes su dbu ma bstan/_/ces sogs gsal bar gsungs pa bzhin/_/rnal 'byor dbang phyug biR+Wa pas/_/gang zag rim gyis 'jug pa'i phyir/_/bkral ba'i dgongs don snying po ni/_/phung po khams dang skye mched du/_/bstan pas nyan thos sde gnyis dang /_/mtshungs shing mu stegs byed las 'phags/_/yul med yul can shes pa dang /_/de las gzhan pa'i gnyis med pa'ang /_/rang bzhin grub pa med smra bas/_/sems tsam las kyang khyad par 'phags/_/kun rdzob sgyu ma ltar snang yang /_/don dam 'di zhes dam bca' ba/_/'dod min ngo bo nyid med pa'i/_/dbu ma las kyang khyad par 'phags/_/des na gzod nas blos byas kyi/_/mtha' bzhi'i spros pa las 'das kyang /_/zung 'jug tshul du nyams blang ba/_/lam 'di'i dgongs pa'i mthar thug yin/_/de yang tshig tsam ma yin par/_/don dam so sor rtog pa yi/_/ye shes klong nas brdol ba'i tshe/_/rdzogs pa chen por ro gcig go__/mdor na zab gsang snying thig nas/_/rig pa btsan thabs ngo sprod tshul/_/gsungs 'di dbang po rnon po ni/_/gcig car rigs can rnams la dgongs/_/gsung ngag lam dang 'bras bu yi/_/'chad tshul rim gyis 'khrid pa ste/_/tshul 'di legs par mkhyen gyur na/_/'gal 'du'i spros pa dbyings su zhi/_/rnal 'byor dbang phyug biR+Wa pas/_/sems nyid gsal stong zung 'jug tu/_/'jog dang gzhan stong smra ba yi/_/yongs grub bde gshegs snying po gnyis/_/ming gcig na yang don mi mtshungs/_/ci phyir 'jam mgon sa paN gyis/_/des na de bzhin gshegs pa yi/_/snying po spros bral yin pa'i phyir/_/sems can rnams la sangs rgyas dang /_/'khor ba gnyis ka 'byung bar 'thad/_/ces sogs sgrub byed du ma yis/_/gshegs snying spros bral sgrub pa dang /_/gcig shos rtag brtan yongs grub tu/_/'dod pa mtshungs pa'i skabs yod dam/_/des na kun mkhyen chen po yis/_/rang bzhin 'od gsal shel gyi khams/_/bag chags tshon gyis bsgyur ba las/_/gnas skabs du mar snang ba yi/_/dbyings nyid 'khor 'das kun gyi gzhi/_/zhes dang de don gsal ba'i phyir/_/'dir ni byams mgon klu sgrub kyis/_/gsal la rgyun chags ma 'gag pa/_/mtha' bzhi'i spros pas stong pa yi/_/zung 'jug 'dus ma byas la bzhed/_/ces gsungs shing rta chen po gnyis/_/dgongs pa gcig tu 'babs pa'i tshul/_/lung dang rigs pas rgyas par bsgrubs/_/mtshan gzhi de yi mtshon byed kyang /_/chos dbyings dri bcas de bzhin nyid/_/'od gsal bde gshegs snying po dang /_/sems kyi rang bzhin dag pa sogs/_/mtshan gyi rnam grangs du mas bstan/_/lang gshegs stug po bkod pa dang /_/rnal 'byor dbang phyug man ngag dang /_/dpal ldan zla ba'i zhabs sogs kyis/_/kun gzhi'i sgra yang 'di la bzhed/_/zab mo'i rgyud du 'jam dpal dang /_/ye shes chen po lhan skyes dang /_/rdo rje rdo rje sems dpa' dpal/_/kun bzang la sogs bgrang yas gsungs/_/zhes sogs gsal bar 'chad pa'i tshul/_/'di la zhib mo'i blo yis dpyod/_/de las gzhan du snying po nyid/_/dri bcas sems la rig pa yis/_/bden pas bkag tsam 'dod pa dang /_/bden grub kho nar dam bca' sogs/_/sgro skur phyogs su lhung ngo zhes/_/rig tshul rnam dag 'god na yang /_/'dir ni dbu ma'i lam nyid du/_/re zhig dgag sgrub med par 'jog__/'bras bu sangs rgyas ye shes ni/_/dbu ma rang rgyud smra ba yis/_/med par 'dod cing gzhan stong pas/_/rtag brtan 'gyur ba med par smra/_/nges don mthar thug thal 'gyur bas/_/blo dang lhan cig mi gnas pa'i/_/bsam gyis mi khyab spyod yul phyir/_/yod med khas len bral bar bzhed/_/mdo las ye shes med gsungs pa/_/zag par bcas pa'i chos khams dang /_/mtshungs ldan med pa nyid la dgongs/_/dgos pa rtag 'dzin bzlog phyir yin/_/la lar ye shes yod gsungs pa'ang /_/bsam brjod las 'das ye shes kyis/_/'khor 'das kun la khyab par dgongs/_/dgos pa chad mtha' bsal phyir yin/_/don du mtha' gnyis las 'das pa'i/_/khas len bral ba'i gnas lugs nyid/_/mngon sum rang ngor rtogs tsa na/_/rtag chad spros pa dbyings su grol/_/'di don legs par mkhyen 'dod na/_/dben zhing nyams dga'i nags klung du/_/rtse gcig mnyam par bzhag las gzhan/_/rtog ge'i 'gal 'dus nam yang min/_/de nyid phyir na skal bzang khyod/_/zab don nyi gzhon bcud 'thungs pas/_/blo mchog pad dkar rgyas pa dang /_/sgom spangs 'bras bus phyug par mdzod/_/gang gi mkhyen rab rmad byung bas/_/dri ba mtha' klas stsal mod kyang /_/rmongs dang le lo'i gzhan dbang gis/_/rgya cher spro ba'i go skabs ci/_/'on kyang mdor bsdus phul 'di la/_/nongs pa'i tshogs rnams bsal ba dang /_/dge bas yid can rgya mtsho kun/_/thams cad mkhyen pa nyid gyur cig__/sarba dA ka l+yA NaM b+ha ba tu//___//__!_