JKW-KABUM-23-'A-001-011

🚧 This website is under continued development. We appreciate your patience!

Previous Text Back to Volume PageNext Text

གླུ་ལྔ་ལྡན་འཇའ་ཟེར།

Wylie title	glu lnga ldan 'ja' zer
Location	mkhyen brtse'i bka' 'bum Volume 23, sde tshan 1, Text 11, Pages 21-23 (Folios 11a2 to 12a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. glu lnga ldan 'ja' zer. In 'jam dbyangs mkhyen brtse'i dbang po'i bka' 'bum, Vol. 23: 21-23. Khams sde dge rdzong sar dgon: Rdzong sar blo gros phun tshogs, 2020.
Genre

Tibetan Text

Wylie

[edit]

ཨ་ཧོ། །ལྔ་ལྡན་འཇའ་ཟེར་འཁྲུགས་པའི་ཡེ་ཤེས་ཀྱི་འོད་ཀློང་། །འོག་མིན་པདྨ་དྲྭ་བའི་དགའ་ཚལ་གྱི་དབུས་ན། །ང་ཡི་བླ་མ་མཚོ་སྐྱེས་རྡོ་རྗེ་དེ་བཞུགས་ཡོད། །བྱིན་རླབས་ཆར་ཆེན་ཕོབ་ཅིག་ཨོ་རྒྱན་གྱི་ཆོས་རྗེ། །ཤར་ཕྱོགས་ཌཱ་ཀི་འདུ་བའི་པི་ཝཾ་གི་སྙན་འགྱུར། །ལྷོ་མོན་སྨྱུག་མའི་ཚལ་གྱི་ཁུ་བྱུག་གིས་བླངས་ནས། །དབྱར་སྐྱེས་མྱུ་གུ་འདྲེན་པའི་སྐྱོ་གྲོགས་ལ་ཕེབས་དང་། །ཉམས་དགའི་པདྨོ་རྒྱས་པའི་ངོ་མཚར་ཞིག་ཡོད་དོ། །མཁའ་དབྱིངས་དྭངས་པར་ཤར་བའི་དབང་པོ་ཡི་གཞུ་རིས། །སྐེད་པར་ལན་བདུན་མདུད་པའི་བཀྲག་མདངས་ཀྱི་མཚར་སྡུག །རི་བྲག་ཚང་ཚིང་ཅན་གྱི་མགུལ་པ་རུ་འཁྱུད་ན། །བྱིས་པའི་མིག་སྔར་བཀྲ་བའི་ལྟད་མོ་ཞིག་ཡོད་དོ། །དུར་ཁྲོད་འཇིགས་སུ་རུང་བའི་ནགས་ཚལ་གྱི་དོ་རར། །ཅིར་ཡང་རྒྱུ་ཞིང་སྤྱོད་པའི་མི་སྲུན་གྱི་ཅེ་སྤྱང་། །ཚིམ་མེད་རོ་ལ་ཞེན་པའི་སྣང་ཚུལ་འདི་ལྟོས་དང་། །སྐྱོ་ཤས་གཏིང་ནས་སློང་བའི་སྐྱུགས་སྨན་ཞིག་ཡོད་དོ། །ཨ་མྲ་སྙེ་མ་སྨིན་པའི་ཁ་ཟས་ཀྱི་ཡོ་ལང་། །ཀླད་མེད་ཁྭ་ཏའི་ཚོགས་ཀྱི་མཆུ་ཐོ་རུ་ཐོགས་བཞིན། །ཡིད་ལ་སྲེད་པས་བཅིང་བའི་ཡི་དྭགས་འདིར་སོམས་དང་། །གད་མོ་ཁོང་ནས་འཁྲུགས་པའི་སྙིང་སྐྲན་ཞིག་ཡོད་དོ། །སྒྱེད་པུ་གསེར་དུ་སོང་བའི་དབུལ་ཕོངས་ཀྱི་བླུན་པོ། །རིན་ཐང་གཞན་ལ་འཚོལ་བའི་ཆེ་ཐབས་ཀྱི་བྲེལ་བས། །ཚེ་གང་ཤ་ཐང་ཆད་པའི་གྱ་གྱུ་འདིར་གཟིགས་དང་། །ཅིས་ཀྱང་དགོས་མེད་སྟོན་པའི་སློབ་དཔོན་ཞིག་ཡོད་དོ། །སྟོན་གནམ་སྒྲིབ་མེད་ངོགས་སུ་སྤྲིན་དཀར་གྱི་ཉམས་འགྱུར། །གྲངས་མེད་འཁོར་བའི་རྩེད་འཇོའི་བྱུང་གནས་དང་འགྲོ་གསུམ། །ཅི་བྱས་ལག་རྗེས་མེད་པའི་སྟོང་ཆེན་འདིར་གཟིགས་དང་། །གྲུབ་པའི་དུས་ཚོད་བྲལ་བའི་བརྡ་སྟོན་ཞིག་ཡོད་དོ། །བྱེ་མའི་ཁང་བཟང་བསྐྲུན་པའི་ཅོལ་ཆུང་གི་བྱིས་པ། །འཐོར་རླུང་དྲག་པོའི་ཤུགས་ཀྱིས་རང་ས་རུ་རྡིབ་ཚེ། །ཤ་ཐང་ཆད་ཆད་གཙེར་པའི་སྨྲེ་ངག་འདི་སོམས་དང་། །དོན་མེད་དུཿཁས་མནར་བའི་མཚོན་བྱེད་ཞིག་ཡོད་དོ། །གཏན་དུ་བདེ་བའི་བྲག་སུལ་མལ་འོག་ཏུ་བཅུག་ནས། །འཕྲལ་དུ་ཉམས་དགའི་ཐང་ལ་བག་ཡངས་སུ་དཀྱུ་བས། །བཞག་ཏུ་མེད་པའི་གཅང་ཅན་རི་བོང་འདིར་སོམས་དང་། །ལྐོག་ཏུ་གྱུར་པའི་རྣམ་ཐར་རྗེས་དཔག་ཏུ་ཡོད་དོ། །ཨ་ཅང་རྩེད་མོ་ཡིན་མོད་སྟོང་པ་དང་རྟེན་འབྱུང་། །ཟུང་འཇུག་སྒྱུ་མའི་སློབ་དཔོན་མངོན་སུམ་གྱི་བཀོད་པ། །ཅི་བྱས་ཉམས་འོག་ཚུད་པའི་བློ་བདེ་འདིར་སོམས་དང་། །འཕྲལ་ཡུན་ཀུན་ཏུ་དགེ་བའི་ས་བོན་ཞིག་ཡོད་དོ། །ཨ་ཧོ་གསལ་ལ་མི་གསལ་དར་དིར་གྱི་གླིང་བུ། །བྱ་བ་བཏང་བཞག་གཉིས་མིན་འཛུབ་མོ་ཡིས་བསྒྲེང་བར། །རྩེ་གཅིག་དཀྱུས་ཐང་མ་ཆོད་རི་དྭགས་ཚོགས་ཉོན་དང་། །མཛུབ་མོས་བཙན་ས་མཚོན་པའི་བརྡ་སྤྲོད་ཞིག་ཡོད་དོ། །ཨོཾ་མ་ཎི་པདྨེ་ཧཱུྃ་ཧྲཱིཿ ༈

[edit]

glu lnga ldan 'ja' zer/_ a ho/__/lnga ldan 'ja' zer 'khrugs pa'i ye shes kyi 'od klong /__/'og min pad+ma drwa ba'i dga' tshal gyi dbus na/__/nga yi bla ma mtsho skyes rdo rje de bzhugs yod/__/byin rlabs char chen phob cig o rgyan gyi chos rje/__/shar phyogs DA ki 'du ba'i pi waM gi snyan 'gyur/__/lho mon smyug ma'i tshal gyi khu byug gis blangs nas/__/dbyar skyes myu gu 'dren pa'i skyo grogs la phebs dang /__/nyams dga'i pad+mo rgyas pa'i ngo mtshar zhig yod do/__/mkha' dbyings dwangs par shar ba'i dbang po yi gzhu ris/__/sked par lan bdun mdud pa'i bkrag mdangs kyi mtshar sdug__/ri brag tshang tshing can gyi mgul pa ru 'khyud na/__/byis pa'i mig sngar bkra ba'i ltad mo zhig yod do/__/dur khrod 'jigs su rung ba'i nags tshal gyi do rar/__/cir yang rgyu zhing spyod pa'i mi srun gyi ce spyang /__/tshim med ro la zhen pa'i snang tshul 'di ltos dang /__/skyo shas gting nas slong ba'i skyugs sman zhig yod do/__/a mra snye ma smin pa'i kha zas kyi yo lang /__/klad med khwa ta'i tshogs kyi mchu tho ru thogs bzhin/__/yid la sred pas bcing ba'i yi dwags 'dir soms dang /__/gad mo khong nas 'khrugs pa'i snying skran zhig yod do/__/sgyed pu gser du song ba'i dbul phongs kyi blun po/__/rin thang gzhan la 'tshol ba'i che thabs kyi brel bas/__/tshe gang sha thang chad pa'i gya gyu 'dir gzigs dang /__/cis kyang dgos med ston pa'i slob dpon zhig yod do/__/ston gnam sgrib med ngogs su sprin dkar gyi nyams 'gyur/__/grangs med 'khor ba'i rtsed 'jo'i byung gnas dang 'gro gsum/__/ci byas lag rjes med pa'i stong chen 'dir gzigs dang /__/grub pa'i dus tshod bral ba'i brda ston zhig yod do/__/bye ma'i khang bzang bskrun pa'i col chung gi byis pa/__/'thor rlung drag po'i shugs kyis rang sa ru rdib tshe/__/sha thang chad chad gtser pa'i smre ngag 'di soms dang /__/don med duHkhas mnar ba'i mtshon byed zhig yod do/__/gtan du bde ba'i brag sul mal 'og tu bcug nas/__/'phral du nyams dga'i thang la bag yangs su dkyu bas/__/bzhag tu med pa'i gcang can ri bong 'dir soms dang /__/lkog tu gyur pa'i rnam thar rjes dpag tu yod do/_/a cang rtsed mo yin mod stong pa dang rten 'byung /__/zung 'jug sgyu ma'i slob dpon mngon sum gyi bkod pa/__/ci byas nyams 'og tshud pa'i blo bde 'dir soms dang /__/'phral yun kun tu dge ba'i sa bon zhig yod do/__/a ho gsal la mi gsal dar dir gyi gling bu/__/bya ba btang bzhag gnyis min 'dzub mo yis bsgreng bar/__/rtse gcig dkyus thang ma chod ri dwags tshogs nyon dang /__/mdzub mos btsan sa mtshon pa'i brda sprod zhig yod do/__/oM ma Ni pad+me hU~M hrIH__!_