JKW-KABUM-23-'A-001-012

Previous Text Back to Volume PageNext Text

Wylie title
Location	mkhyen brtse'i bka' 'bum Volume 23, sde tshan 1, Text 12, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 23: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

གླུ་ཐབས་གྲོལ་སྙིང་པོ། ཟབ་མོའི་ལམ་ལས་བརྩམས་པའི་རྡོ་རྗེའི་གླུ་ཐབས་གྲོལ་སྙིང་པོ་ཞེས་བྱ་བ། ཨ་ཧོ། རང་སྣང་རྣམ་པར་དག་པ་པདྨ་འོད་ཀྱི་ཞིང་ནས། །རིག་སྟོང་གཉུག་མའི་གར་མཁན་འཆི་མེད་མཚོ་སྐྱེས་བླ་མའི། །སྐུ་གསུང་ཐུགས་ཀྱི་ཡེ་ཤེས་དེང་འདིར་མངོན་སུམ་སྣང་བས། །སྐལ་བཟང་འདུས་པའི་ཚོགས་ཀྱི་ཤེས་རྒྱུད་བྱིན་གྱིས་རློབས་ཤིག །དལ་འབྱོར་རྙེད་དཀའ་ཐོབ་པ་ད་ལན་ཁོ་ན་ལགས་ཀྱང་། །འདུས་བྱས་མི་རྟག་ཕྱིར་ན་ནམ་འཆིའི་ངེས་པ་མ་མཆིས། །འཆི་ཚེ་དཀར་ནག་ལས་ཀྱི་གཞན་དབང་ཁོ་ནའི་འཕེན་པས། །འཁོར་བ་གང་དུ་སྐྱེས་ཀྱང་སྡུག་བསྔལ་གསུམ་གྱི་རང་བཞིན། །དེ་བས་བདག་གཞན་འགྲོ་ཀུན་ཐར་པའི་གོ་འཕང་ཐོབ་ཕྱིར། །བླ་མ་དཀོན་མཆོག་རྒྱ་མཚོ་གཙུག་གི་ནོར་བུར་བསྙེན་ནས། །གཞན་ཕྱིར་སངས་རྒྱས་འདོད་པའི་སྨོན་པ་བྱང་ཆུབ་སེམས་དང་། །དེ་རྒྱུ་འཇུག་པའི་བསླབ་བྱ་ཕར་ཕྱིན་དྲུག་ལ་བསླབ་མཛོད། །གང་ཟག་ཆོས་ཀྱི་བདག་འཛིན་རྟོག་པས་བཏགས་པ་ཙམ་ལས། །ཡུལ་དང་ཡུལ་ཅན་གཉིས་ཀ་བདེན་མེད་སྤྲོས་བྲལ་གཤིས་ལུགས། །ཤེས་རབ་ཕ་རོལ་ཕྱིན་པས་ཡེ་ཤེས་ཚོགས་ཆེན་བསགས་ནས། །རྟེན་འབྱུང་སྒྱུ་མ་ཙམ་དུ་བསོད་ནམས་ཐབས་ལ་འབུངས་ཤིག །རྣམ་དག་སྨིན་བྱེད་དབང་བཞིའི་བདུད་རྩིའི་ཆུ་རྒྱུན་བཏུང་བས། །རྩ་རླུང་ཐིག་ལེའི་རྟོག་ཚོགས་སྐུ་བཞིར་བྱིན་གྱིས་བརླབས་ཏེ། །དབང་སྲོག་དམ་ཚིག་སྡོམ་པ་སྙིང་ལས་གཅེས་པར་བཟུང་ན། །ཐུན་མོང་མཆོག་གི་དངོས་གྲུབ་འབད་མེད་ལྷུག་པར་འབྱུང་ངོ་། །འགལ་རྐྱེན་སྡིག་སྒྲིབ་སྦྱོང་བྱེད་རྡོ་རྗེ་སེམས་དཔའི་བསྒོམ་བཟླས། །མཐུན་རྐྱེན་ཚོགས་བསགས་མྱུར་ལམ་སྐུ་གསུམ་མཆོད་པའི་མཎྜལ། །ལྷག་པར་ཉམས་རྟོགས་རྩོལ་མེད་སྙིང་གི་དབུས་སུ་སད་བྱེད། །མོས་གུས་བླ་མའི་རྣལ་འབྱོར་འབྲལ་མེད་རྟག་ཏུ་སྒོམས་ཤིག །གང་གི་དྲིན་ལས་བྱུང་བའི་གྲོལ་ལམ་ཕྱག་རྒྱ་ཆེན་པོ། །ནམ་མཁའི་དཀྱིལ་ལྟར་དག་པའི་རང་གདངས་རྟེན་ཅིང་འབྲེལ་འབྱུང་། །ཅིར་སྣང་ལྷ་སྐུར་ཤར་བས་སྔགས་ཀྱི་ཚོགས་ལམ་རྫོགས་པའི། །ཐབས་མཆོག་རིམ་པ་དང་པོ་བུམ་དབང་ལམ་ཁྱེར་སྐྱོང་མཛོད། །ཁྱད་པར་ཐབས་ཀྱི་མཐར་ཐུག་སྲོག་རྩོལ་རླུང་གི་རྒྱུ་བ། །སྦྱོར་བ་བཞི་ལྡན་བྱེད་པས་དབུ་མའི་དབྱིངས་སུ་བཅིངས་ནས། །ཨ་ཧཾ་འབར་འཛག་བདུད་རྩིས་རྩ་ཁམས་ཐམས་ཅད་ཁྱབ་པས། །གསལ་སྟོང་བདེ་བས་བརྒྱན་པའི་གསང་དབང་ལམ་ལ་བསྙེན་ཅིག །དངོས་ཡིད་ཕྱག་རྒྱའི་རེག་བྱར་འདུ་ཤེས་གསུམ་གྱིས་འཁྱུད་ནས། །ཐིག་ལེ་དབབ་བཟློག་དགྲམ་བསྐྱིལ་འཁོར་ལོ་རྣམ་བཞིར་སོན་པས། །མཐོང་ལམ་དངོས་སུ་སྦྱོར་བའི་དགའ་བཞི་དཔེ་ཡི་ཡེ་ཤེས། །སྣང་གསུམ་འཕོ་བ་མེད་པའི་ཤེར་དབང་རྣལ་འབྱོར་བརྩོན་མཛོད། །ཀ་དག་གཉུག་མའི་ཡེ་ཤེས་གཞི་དབྱིངས་མངོན་སུམ་མཐོང་ནས། །རིག་གདངས་རྡོ་རྗེ་ལུག་རྒྱུད་ཟུང་དུ་འབྲེལ་བར་བསྒོམ་ཞིང་། །གཟུང་འཛིན་ཞེན་པ་སྤངས་པས་མི་སློབ་ཟུང་འཇུག་ཐོབ་པའི། །དབང་བཞི་ལམ་གྱི་མཐར་ཐུག་རྫོགས་པ་ཆེན་པོའི་ཁྱད་ཆོས། །གལ་ཏེ་གདོད་མའི་གོ་འཕང་ཚེ་འདིར་མ་ཐོབ་སྲིད་ན། །འཆི་ཁར་དབྱིངས་གསུམ་གཅུན་པས་འོད་གསལ་སྦུབས་སུ་འཇུག་སྟེ། །ཆོས་ཉིད་བར་དོའི་སྣང་ཆ་རིག་རྩལ་རོལ་པར་ཤེས་ཤིང་། །སྲིད་པ་བར་དོའི་འཁྲུལ་པ་ལྷ་སྔགས་ཆོས་སྐུར་སྦྱོངས་ཤིག །དེ་ལྟར་ཟབ་མོའི་ལམ་ལ་གོམ་པ་ཕ་མཐར་སོན་པས། །མཐར་ཐུག་གཞི་ལས་འཕགས་པའི་གཞི་སྣང་ཆོས་སྐུར་གྲོལ་ཏེ། །བདེ་ཆེན་སྙིང་རྗེའི་ཐབས་ཀྱི་ཡེ་ཤེས་སྐུ་ཡི་རོལ་མོས། །ནམ་མཁའ་ཇི་སྲིད་བར་དུ་གཞན་དོན་ལྷུན་གྲུབ་འབྱུང་ངོ་། །ཨེ་མ་ཐབས་གྲོལ་ལམ་གྱི་ངེས་གསང་ཅུང་ཟད་བརྗོད་པས། །བདག་གཞན་ཡིད་ཅན་རྒྱ་མཚོས་དབེན་ཞིང་ཉམས་དགའི་གནས་སུ། །ཡོངས་རྫོགས་བསྟན་པའི་ཉམས་ལེན་སྟན་ཐོག་གཅིག་ཏུ་བསྒོམ་ནས། །འཇའ་ལུས་རྡོ་རྗེའི་གོ་འཕང་ཚེ་འདིར་འགྲུབ་པར་ཤོག་ཅིག །ཅེས་པའང་མདོ་ཁམས་ཀྱི་གཏེར་སྟོན་གར་དབང་ཉི་ཟླ་སྙིང་པོའི་རིགས་ལས་སོན་པའི་བླ་མ་དམ་པ་ཡེ་ཤེས་རྡོ་རྗེས་དྲིས་ཤིང་བསྐུལ་བ་ལས། །ཆོས་སྨྲ་བའི་གཟུགས་བརྙན་མཁྱེན་བརྩེའི་དབང་པོས་འོག་མིན་ཨོ་རྒྱན་སྨིན་གྲོལ་གླིང་དུ་གང་ཤར་སྨྲས་པའོ། ། ༈

[edit]

glu thabs grol snying po/__ zab mo'i lam las brtsams pa'i rdo rje'i glu thabs grol snying po zhes bya ba/__a ho/__rang snang rnam par dag pa pad+ma 'od kyi zhing nas/__/rig stong gnyug ma'i gar mkhan 'chi med mtsho skyes bla ma'i/__/sku gsung thugs kyi ye shes deng 'dir mngon sum snang bas/__/skal bzang 'dus pa'i tshogs kyi shes rgyud byin gyis rlobs shig__/dal 'byor rnyed dka' thob pa da lan kho na lags kyang /__/'dus byas mi rtag phyir na nam 'chi'i nges pa ma mchis/__/'chi tshe dkar nag las kyi gzhan dbang kho na'i 'phen pas/__/'khor ba gang du skyes kyang sdug bsngal gsum gyi rang bzhin/__/de bas bdag gzhan 'gro kun thar pa'i go 'phang thob phyir/__/bla ma dkon mchog rgya mtsho gtsug gi nor bur bsnyen nas/__/gzhan phyir sangs rgyas 'dod pa'i smon pa byang chub sems dang /__/de rgyu 'jug pa'i bslab bya phar phyin drug la bslab mdzod/__/gang zag chos kyi bdag 'dzin rtog pas btags pa tsam las/_/yul dang yul can gnyis ka bden med spros bral gshis lugs/__/shes rab pha rol phyin pas ye shes tshogs chen bsags nas/__/rten 'byung sgyu ma tsam du bsod nams thabs la 'bungs shig__/rnam dag smin byed dbang bzhi'i bdud rtsi'i chu rgyun btung bas/__/rtsa rlung thig le'i rtog tshogs sku bzhir byin gyis brlabs te/__/dbang srog dam tshig sdom pa snying las gces par bzung na/__/thun mong mchog gi dngos grub 'bad med lhug par 'byung ngo /__/'gal rkyen sdig sgrib sbyong byed rdo rje sems dpa'i bsgom bzlas/__/mthun rkyen tshogs bsags myur lam sku gsum mchod pa'i maN+Dal/__/lhag par nyams rtogs rtsol med snying gi dbus su sad byed/__/mos gus bla ma'i rnal 'byor 'bral med rtag tu sgoms shig__/gang gi drin las byung ba'i grol lam phyag rgya chen po/__/nam mkha'i dkyil ltar dag pa'i rang gdangs rten cing 'brel 'byung /__/cir snang lha skur shar bas sngags kyi tshogs lam rdzogs pa'i/__/thabs mchog rim pa dang po bum dbang lam khyer skyong mdzod/__/khyad par thabs kyi mthar thug srog rtsol rlung gi rgyu ba/__/sbyor ba bzhi ldan byed pas dbu ma'i dbyings su bcings nas/__/a haM 'bar 'dzag bdud rtsis rtsa khams thams cad khyab pas/__/gsal stong bde bas brgyan pa'i gsang dbang lam la bsnyen cig__/dngos yid phyag rgya'i reg byar 'du shes gsum gyis 'khyud nas/__/thig le dbab bzlog dgram bskyil 'khor lo rnam bzhir son pas/__/mthong lam dngos su sbyor ba'i dga' bzhi dpe yi ye shes/__/snang gsum 'pho ba med pa'i sher dbang rnal 'byor brtson mdzod/__/ka dag gnyug ma'i ye shes gzhi dbyings mngon sum mthong nas/_/rig gdangs rdo rje lug rgyud zung du 'brel bar bsgom zhing /__/gzung 'dzin zhen pa spangs pas mi slob zung 'jug thob pa'i/__/dbang bzhi lam gyi mthar thug rdzogs pa chen po'i khyad chos/__/gal te gdod ma'i go 'phang tshe 'dir ma thob srid na/__/'chi khar dbyings gsum gcun pas 'od gsal sbubs su 'jug ste/__/chos nyid bar do'i snang cha rig rtsal rol par shes shing /__/srid pa bar do'i 'khrul pa lha sngags chos skur sbyongs shig__/de ltar zab mo'i lam la gom pa pha mthar son pas/__/mthar thug gzhi las 'phags pa'i gzhi snang chos skur grol te/__/bde chen snying rje'i thabs kyi ye shes sku yi rol mos/__/nam mkha' ji srid bar du gzhan don lhun grub 'byung ngo /__/e ma thabs grol lam gyi nges gsang cung zad brjod pas/__/bdag gzhan yid can rgya mtshos dben zhing nyams dga'i gnas su/__/yongs rdzogs bstan pa'i nyams len stan thog gcig tu bsgom nas/__/'ja' lus rdo rje'i go 'phang tshe 'dir 'grub par shog cig__/ces pa'ang mdo khams kyi gter ston gar dbang nyi zla snying po'i rigs las son pa'i bla ma dam pa ye shes rdo rjes dris shing bskul ba las/__/chos smra ba'i gzugs brnyan mkhyen brtse'i dbang pos 'og min o rgyan smin grol gling du gang shar smras pa'o/___/__!_