JKW-KABAB-20-WA-014-wylie

🚧 This website is under continued development. We appreciate your patience!

@#/__/snyan brgyud phur pa'i skong ba bdud las rnam rgyal zhes bya ba bzhugs so//__bla ma dpal chen rdo rje gzhon nu la phyag 'tshal lo/__/de la phyi nang gsang ba'i mchod gtor skong rdzas rnams rgya che bag dro gzi byin dang ldan par bshams la bdud rtsis bran/__nam mkha' mdzod kyi sngags rgya lan gsum gyis rgyas par spel zhing byin gyis brlab/__skong rdzas 'dod pa'i yon tan rnam pa thams cad pa nam mkha' mdzod kyi 'khor lo'i sprin chen por gyur/__oM badz+ra s+pha ra Na khaM/__zhes brjod la/__hU~M hrIH__'og min gsang chen rdo rje'i zhing khams che/__/phrin las rang byung grub pa'i gzhal med khang*/__/dur khrod drag po'i rgyan bkod 'jigs su rung*/__/rngams brjid lhun stugs gzi brjid bskal me 'bar/__/dpal chen bdud 'dul phur pa'i rig pa 'dzin/__/rtsa brgyud bla ma'i byin rlabs sprin phung 'khrigs/__/yi dam dngos grub sbrang char si li li/__/mkha' 'gro chos skyong phrin las thogs med sgrub/__/rtsa gsum rab 'byams rgya mtsho'i thugs dam bskang*/__hU~M hrIH__dkyil 'khor gtso mchog dpal chen he ru ka__/bdud kyi dgra chen badz+ra ku mA ra/__/gar dgu'i nyams ldan 'bar ba'i khro bo che/__/phrin las stobs 'dus rdo rje srin po dang*/__/gnyis med sku la dgyes par 'khril ba yi/__/khro mo dbyings phyug 'khor lo rgyas 'debs ma/__/yab yum thabs dang shes rab dbyer med cing*/__/rnam shes tshogs brgyad gnas su dag pa'i lha/__/snying rje khros pa'i mtshon gyis srid gsum sgrol/__/snang srid thams cad phur bus gdab pa'i phyir/__/sangs rgyas kun gyi phrin las 'dus pa'i rje/__/dpal chen rdo rje gzhon nu'i thugs dam bskang*/__/rdo rje sku yi dbyings kyi gnas lnga ru/__bud+d+ha pad+ma badz+ra rat+na dang*/__/karma kI la ya yi lha tshogs rnams/__/nyi ma dang ni 'od zer ji bzhin du/__/ma bskyed rang byung lhun gyis grub pa yi/__/dkyil 'khor lnga yi lha tshogs thugs dam bskang*/__/'dod pa'i skyon spangs khro chen hU~M kA ra/__/ngag 'khyal rnam dag khro chen rnam par rgyal/__/rdzun gyi skyon spangs khro rgyal dbyug sngon can/__/srog gcod dag pa'i gshin rje'i gshed chen po/__/log lta rtsad gcod khro bo mi g.yo mgon/__/phra ma gnas dag khro chen rta mgrin rgyal/__/ma byin len spangs gzhan gyis mi thub pa/__/tshig rtsub skyon spangs khro chen bdud rtsi 'khyil/__/gnod sems rang dag khams gsum rnam par rgyal/__/brnabs sems skyon spangs khro rgyal stobs po che/__/dbang bcu rdzogs pa'i khro chen yab rnams dang*/__/pha rol phyin bcu khro mo yum bcu ste/__/phyogs bcu khro bo'i dkyil 'khor thugs dam bskang*/__/za gsod nyi shu tshad med bzhi'i ngo bo/__/phra men sgo ma bzhi dang dbang phyug ma/__/phur srung dam can dge bsnyen nyer gcig sogs/__/phur pa'i lha tshogs rnams kyi thugs dam bskang*/__/drag po e khrom rdzas kyi da la ru/__/dpal chen sku gsung thugs yon phrin las kyi/__/sras mchog sku smad gnam lcags phur bu 'bar/__/dgra bgegs snying la 'debs mdzad thugs dam bskang*/__/hU~M hrIH__dkyil 'khor lha tshogs thugs dam bskang ba'i rdzas/__/dngos su 'byor dang yid kyis rnam sprul pa'i/__/srid dang zhi ba'i longs spyod ci mchis pa/__/kun tu bzang po'i rnam rol las byung ba'i/__/ting 'dzin sgyu 'phrul zag med rol pa ches/__/rdo rje gzhon nu'i lha tshogs thugs dam bskang*/__hU~M hrIH__thugs dam gnyen po bskang ba'i dam rdzas ni/__/phyi mchod nyer spyod 'phan gdugs lda ldi dang*/__/gzugs sgra dri ro reg bya'i 'dod yon lnga/__/khang bzang gter bum dpag bsam ljon shing che/__/bkra shis rdzas rtags rin chen rnam pa bdun/__/lha rdzas phyi yi mchod pas thugs dam bskang*/__/dur khrod rol pa'i pho brang chen po ru/__/zhing gi gdugs 'phan rgyal mtshan bla bre dang*/__/dgra bgegs bsgral ba'i khrag gi ar+g+haM dang*/__/dbang lnga'i me tog tshil chen dud pa'i sprin/__/zhun chen mar me mkhris pa'i dri yi chab/__/sha rus zhal zas rkang gling thod rngas mchod/__/rab dmar gtum mo'i gzugs dang a ha~M sgra/__/rjes chags zag med dri dang bde ba'i ro/__/bde stong reg bya las byung 'dod yon dang*/__/bcu drug rig mas bde ba'i gar stabs bsgyur/__/dur khrod dpal chas rus pa'i rgyan drug sogs/__/nang gi mchod pa kun bzang sprin chen gyis/__/dkyil 'khor lha tshogs rnams kyi thugs dam bskang*/__/rtsa brgyad stong la sbyar ba'i sman chen po/__/rgyud drug bsgral ba'i dmar chen rak+ta 'khrugs/__/bza' bca' btung ba bldag gzhib rim tshor bskyil/__/dgra bgegs sha khrag rus pa'i gtor chen po/__/sha sna snying sna'i 'dod yon bsam mi khyab/__/khyad par rmad du byung ba'i bam chen brjid/__/thabs shes ga Na tsakra'i longs spyod sogs/__/gsang ba'i mchod pa chen pos thugs dam bskang*/__/'khril ba'i mchod chen bde stong mnyam par sbyor/__/zag bral bde chen dga' bzhi'i mchod pa'i sprin/__/e sgrom 'bar ba'i mkha' klong yangs pa ru/__/bdud dgra bkug nas rdo rje'i mtshon chas gzir/__/kun gzhi rtsad gcod chos kyi dbyings su sgrol/__/dgra bgegs lnga phung rngams pa'i zhal du bstab/__/sbyor sgrol mchog gi mchod pas thugs dam bskang*/__/chos kun rang byung gdod nas mnyam pa nyid/__/snang srid thams cad bde ba chen po'i ngang*/__/rang bzhin lhan skyes ye shes chen por shar/__/mchod bya mchod yul gnyis med chen por mchod/__/zung 'jug blo 'das chen pos thugs dam bskang*/__/thugs dam bskang la dam tshig nyams chags bshags/__/bzod par bzhes la tshangs pa stsal du gsol/__/g.yar dam gnyen po rjes su dgongs nas kyang*/__/nad gdon rims dang dgra bgegs byad phur bzlog__/mtha' dmag dus 'khrugs 'byung bzhi'i g.yo 'khrugs bzlog__/sad ser btsa' than mu ge'i gnod pa bzlog__/phyi nang gsang ba'i bdud dang dam sri bzlog__/rnal 'byor bdag cag 'khor dang bcas pa la/__/mchog dang thun mong dngos grub stsal du gsol/__/snang srid rdo rje phur pa'i dkyil 'khor du/__/mkha' mnyam byang chub sems kyi bgrod pa yi/__/rig pa ye shes phur bu'i rtsal rdzogs te/__/rdzas kyi phur bu'i nus pa 'bar ba dang*/__/thal 'byin rnam bzhi'i phrin las yongs rdzogs te/__/khams gsum rdo rje gzhon nu mchog 'grub shog__/ces snyan brgyud phur par sbyor rgyu'i bskang ba 'di'ang dpal rigs mchog grub pa'i rdo rje phrin las 'dus pa rtsal gyis khrums zla'i tshes nyi shu la bris pa 'dis kyang byang chub sgrub pa'i bar chad kyi bdud thams cad las rnam par rgyal ba'i rgyur gyur cig/__//