JKW-KABAB-20-WA-011-wylie

🚧 This website is under continued development. We appreciate your patience!

snyan brgyud phrin las phur pa'i gnad tig gi las byang phrin las rnam rol mdzes par byed pa'i rgyan ces bya ba bi dza ha raM/_snyan brgyud phur pa'i las byang phrin las rnam rol sgrub mchod sogs kyi skabs cung zad rgyas par spro na/__byin 'bebs la/__hU~M/__gdal ba chen po chos dbyings pho brang nas/__/rdo rje 'dzin rgyal sangs rgyas 'dus pa'i rje/__/byin rlabs 'dod rgu'i char chen 'bebs mdzad pa/__/phur pa grub pa'i rig 'dzin brgyud par bcas/__/rdo rje gzhon nu'i dkyil 'khor lha tshogs kyis/__/sku gsung thugs dang yon tan phrin las kyi/__/mthu dbang byin rlabs dngos grub stsol ba'i phyir/__/dbyings nas 'dir gshegs dkyil 'khor by-in phob cig__/de nas rang gzhung gi byin 'bebs sngags bcas brjod/__mchod pa byin rlabs las byang gzhung nas 'byung ba ltar gyi rjes/__oM badz+ra ar+g+haM nas shap+da AHhU~M/__sman byin rlabs ni/__ra~M ya~M kha~M/__bdag gi thugs ka nas ra~M ya~M kha~M 'phros/__ye shes kyi me rlung chur gyur pas mchod rdzas kyi nyes skyon dngos 'dzin bag chags dang bcas pa sregs gtor bkrus te dag par byas/__slar yang thugs ka nas oM dkar po 'phros/__bdud rtsi'i steng gi nam mkha' la ye shes kyi 'od zer 'bar bas rdzas rang ga ma'i rtog pa sbyangs/__AHdmar po 'phros ye shes kyi me 'bar bas bag chags ngan pa'i gnyis rtog bsregs/__hU~M mthing ga 'phros ye shes kyi bdud rtsir zhu bas bdud rtsi ro mchog brgya dang ldan pa rigs lnga yab yum gyi byang sems dkar dmar ro gcig pa'i rang bzhin nam mkha' dang mnyam par bsam la/__oM AHhU~M sarba pany+tsa a mr-i ta hU~M hrIHThA:__zhes bdun nam gsum brjod/__yang*/__rang gi thugs ka nas ra yig dmar po 'phros rak+ta'i steng gi nam mkha' la ye shes kyi 'od zer 'bar bas 'khor ba rgyun gcod kyi rak+ta'i rgya mtsho kha zhag dang bcas pa sha chen gyi lhu dum gyis brgyan pa nam mkha' dang mnyam par bsam la/__oM ma hA rak+ta dz+wa la ni hU~M phaT/__ces bdun nam gsum/__yang*/__rang gi thugs ka nas b+h+rU~M 'phros gtor ma'i steng gi nam mkha' la ye shes kyi 'od zer 'bar bas gtor gzhong rin po che'i gzhal yas khang sa gzhi dang mnyam pa'i nang du gtor ma 'dod yon lnga'i phung po nam mkha' dang mnyam par bsam la/__oM kha ta li b+h+rU~M ma hA ba liM ta AH__zhes lan bdun nam gsum gyis byin gyis brlab par bya'o/__/mchod phreng cung zad rgyas par spro na/__hU~M:__bla med mchog gi mchod pa ni/__/lha rdzas mchod yon zhabs bsil dang*/__/me tog bdug spos mar me dri/__/bshos gtsang sgra snyan sna tshogs pa/__/so so'i lha mo'i rol par bcas/__/ye shes lnga yi 'od zer 'phro/__/yul dang dbang po gnyis med pa/__/bde chen longs spyod chen por bzhes/__oM shrI badz+ra ku mA ra sa pA ri wA ra ar+g+haM nas shap+da pU dza hoH__'dod yon lnga sogs kyi mchod pa ni/__hU~M gzugs mdzes sgra snyan dri zhim ro bda' dang*/__/reg bde 'dod yon lnga dang rgyal srid bdun/__/bkra shis rtags rdzas mtho ris 'byor pa'i tshogs/__/mi zad nam mkha'i mdzod du sbar te mchod/__oM rU pa shap+da g+han+d+he rA sa spar+she sab+ta rat+na aSh+ta mang+ga laM pra tIts+tsha swA hA/__drag po'i mchod pa ni/__hU~M/__dbang po'i me tog tshil gsur bdug pa'i sprin/__/zhun chen sgron me khrag zhag bdud rtsi'i dri/__/sha rus zhal zas dur khrod rol mo'i sgra/__/'jigs rung gshin rje'i mdun pa bzhin du mchod/__/oM ma hA sh+ma sha na puSh+pe d+hU pe a lo ke gan+d+he nai wid+ya shap+da AHhU~M/__phyag rgya gar mchod ni/__hU~M/__khrag 'thung rgyal po gar ma dgyes/__/sku mdog zhal ni rnam par 'gyur/__/sku yi gar stabs glog 'gyu ba'i/__/phyag rgya gar gyi mchod pa 'bul/__/oM badz+ra kI li kI la ya ma hA mu dra pU dza ho/__gsang mchod ni/__hU~M/__rdo rje phur bu'i lha tshogs la/__/yid 'ong lha mo'i mchod pa 'bul/__/'khril ba'i mchod chen mnyam sbyor ba'i/__/bdag nyid mnyes pas mnyes par mchod/__/ma hA su kha pU dza hoH__sman mchod ni/__hU~M/__rang byung gdod nas rnam par dag__/rtsa brgyad stong la sbyar ba'i sman/__/rtsa ba 'bum phrag yangs pa'i bcud/__/rA sa ya na la sogs sman/__/rigs lnga dam tshig lnga yi dngos/__/ye shes lnga rdzogs grub pa'i rdzas/__/rgyud drug sems can kun sgrol ba/__/dug lnga sel ba sman gyi mchog__/dpa' bo'i ro dang mnyam sbyar nas/__/rgyal ba'i dkyil 'khor yongs la 'bul/__/bla med 'phrul gyi dngos grub stsol/__/oM ma hA sarba pany+tsa a mr-i ta khA hi/__brgyud mchod ni/__gzhi dbyings gdod nas rnam dag kun tu bzang*/__/gzhi snang ye shes rol pa rdo rje'i sems/__/dbyings rig zung 'jug badz+ra ku mA rar/__/sman mchod 'bul lo mthu dbang dngos grub stsol/__/ma hA pany+tsa=__phur pa'i grub brnyes pra b+ha hasti'i zhabs/__/bdud sde tshar gcod shAkya seng ge dang*/__/bka' babs thugs kyi gzungs ma mtsho rgyal rjer/__/sman mchod=__/ma hA=__snyan brgyud byin thob pad+ma mdo sngags gling*/__/phur pa'i rig 'dzin pad+ma gar dbang dang*/__/gdams pa'i bcud 'dzin rtsa ba'i bla ma la/__/sman mchod=__/ma hA=__rdo rje gzhon nu'i khro bcu yab yum dang*/__sras mchog phra phyag sgo ma dbang phyug ma/__/dam can dge bsnyain bstan ma bcu gnyis la/__/sman mchod=__/ma hA=__bdud rtsi las mtheb srin gyis blangs nas/__oM AHhU~M/__khro bo chen po gshegs su gsol/__/khro bo chen po gshegs nas kyang*/__/rtags dang mtshan ma bstan pa dang*/__/kI la ya yi dngos grub stsol/__/kA ya sid+d+hi oM/__wAka sid+d+hi AH__tsit+ta sid+hi hU~M/__zhes gnas gsum reg cing*/__a ho ma hA su kha hoH__zhes bdud rtsi lcer myang nas sku gsung thugs kyi dngos grub thob par bsam/__rak+ta'i mchod pa tshar gsum ni rang gzhung ltar bya/__gtor mchod ni/__hU~M/__/nga ni za byed chen po ste/__khams gsum ma lus bsgral ba dang*/__/gdul dka' ma lus 'dul ba'i phyir/__/sha rus la sogs bza' bar bya/__/khyed kyi dam tshig dus la babs/__/gtor ma'i mchod pa bzhes su gsol/__oM badz+ra yak+Sha kro d+ha kha kha khA hi/__ha ha ha/__hi hi hi/__zhes 'dod yon drug gi lha mos mchod cing lhag ma bdud rtsis sha khrag tu gyur pa dam can rnams kyis longs spyad par bsam mo/__dug gsum mchod pa ni/__gti mug sha chen spungs se spung*/__/'dod chags khrag mtsho me re re/__/zhe sdang rus gram nyi li li/__/dpal chen mkha' 'gro'i tshogs la 'bul/__/ma hA mAM sa rak+ta kiM ni ri ti kha raM khA hi/__dug gsum rang gnas su dag par bsam/__sbyor sgrol gyi mchod pa las/__bsgral mchod ni/__hU~M/__rdungs shig rdo rje 'bar ba'i gtun/__/bka' las 'da' byed sdig can rnams/__/rdo rje me dbal snying sregs nas/__/lus ngag rdul phran bzhin du rlog__/rdo rje'i tho bas dgra bgegs rdul du brlag cing 'od zer me stag 'phro bas bsregs par bsam/__sbyor mchod ni/__khro mo 'bar ba'i gtun khung du/__/rdo rje tho bas brdung byas nas/__/lha yang rung ste brlag par 'gyur/__/kha taM kha taM kha taM/__hU~M hU~M hU~M/__phaT phaT phaT/__badz+ra yak+Sha kro d+ha kha kha khA hi khA hi/__ha ha hU~M hU~M phaT phaT/__ces brjod pas yum gyi mkha' gru gsum du yab kyi rdo rje gtun shing gi sbyor bas dgra bgegs sgral zhing rtog tshogs dbyings su dag par bsam mo/__de kho na nyid kyi mchod pa ni/__hU~M/__rang rig rgyal po spyod yul bral/__/'khor gsum ka dag khyab brdal che/__/spang blang med par lhun gyis grub/__/'od gsal zang thal ngang du rol/__/d+harma d+hA tu dz+nyA na pU dza hoH__bstod pa rgyas par spro na/__rang gzhung gi bstod pa'i mthar/__hU~M/__dpal ldan che ba'i che mchog lha yi lha/__/dus gsum bde bar gshegs pa thams cad kyi/__/phrin las thams cad rdzogs pa'i dpal chen po/__/he ru ka dpal khyod la phyag 'tshal bstod/__/gtum chen brjid pa 'gying zhing sgeg pa'i sku/__/bdud tshogs sder bcas 'dul ba'i dpa' bo che/__/mi sdug srin po khros pa'i cha lugs kyis/__/srid gsum gdug pa 'dul mdzad khyod la bstod/__/bzhad sgra 'brug stong ldir 'dra'i gad rgyangs can/__/drag shul chen pos ri rab thal bar rlag__/'jigs rung rtsal gyis khams gsum gcig tu sgrol/__/dpal chen khro bo'i dbang phyug khyod la bstod/__/snying rjes bsgral ba'i dam tshig chen po yis/__/'gro kun byang chub snying por 'dren mdzad cing*/__/thugs rje dbyings nas khros pa'i rngams stabs kyis/__/'khor ba gtan nas rlag byed khyod la bstod/__/gdug can drag pos 'dul bar nyer dgongs nas/__/'bar ba'i khro tshul du mas gar mdzad kyang*/__/chos dbyings zhi ba'i ngang las mi g.yo ba/__/dpal chen rdo rje gzhon nu khyod la bstod/__/gru gsum mthing nag 'bar ba'i dkyil 'khor nas/__/khro rgyal 'dus pa'i sras mchog kI la ya/__/rigs lnga khro bcu sgo ma rnam pa bzhi/__/bgegs 'dus byang chub sems kyi dngos la bstod/__/zhes spro bar bya'o/__/sgrub pa'i skabs dzaba? khang dbye ba ni/__b+h+rU~M bi shwa bi shud+d+he oM badz+ra kI li sogs 'bru bcu drug pa'i mthar/__phaT dzaH__bdag nyid kyi rtsa ba'i dkyil 'khor las ye shes kyi dkyil 'khor rten dang brten par bcas pa logs su bye nas mdun rten dang dbyer med du bzhugs par gyur/__dzaba? bskul spro na/__hU~M/__gru gsum mthing nag 'bar ba'i dkyil 'khor du/__/dbang phyug u ma bsnol ba'i gdan steng na/__/bcom ldan dpal chen rdo rje gzhon nu ni/__/sku mdog mthing nag 'jigs pa'i skur ston pa/__/yab yum thabs dang shes rab gnyis su med/__/'khor gyi phra men pho nya'i tshogs la sogs/__/yun ring dus nas bsnyen cing sgrub pa'i lha/__/drag po rang byung dbang dang dngos grub stsol/__/oM badz+ra kI li sogs sgrubs sngags brjod la bzlas dmigs la 'jug go__/dngos grub blang chog rgyas par 'dod na/__gzhung gi dngos grub bskul mthar/__hU~M/__srid pa'i phur bu sgrub pa dang*/__/dbang dang dngos grub blang ba'i phyir/__/ye shes khro bo gshegs su gsol/__/ye shes khro bo gshegs nas kyang*/__/kI la ya yi dngos grub stsol/__/rdo rje phur bu'i lha tshogs dgongs/__/dang po bsnyen pa'i dbu tshugs nas/__/do nub phan chad zhag grangs thems/__/bzlas brjod bsnyen pa'i grangs yang tshang*/__/'gro ba ma lus bsgral slad du/__/kI la ya yi dngos grub stsol/__/gsang ba byang sems=__/dbang bcu yongs rdzogs=__/khams gsum yongs grol=__/zhi rgyas dbang drag=__/tshe dbang longs spyod grub rtags rnams/__/mthu byin dregs pa'i=__/drag rtsal dngos grub rgya mtsho'i mdzod/__/phrin las yid bzhin dngos grub stsol/__/sgrub sngags mthar/__kA ya sid+d+hi oM/__wAk+ka sid+d+hi AH__tsit+ta sid+d+hi hU~M:__sarba sid+d+hi hrI:__badz+ra dz+nyA na a yu She swA hA/__mdun bskyed kyi gnas gsum nas sku gsung thugs kyi dngos grub thams cad 'od zer dang 'bru gsum dkar dmar mthing gsum char bab pa ltar 'phros nas rang gi gnas gsum du thim pas dbang dang byin rlabs dngos grub ma lus pa thob par bsam mo/__smon lam dang shis brjod rgyas par mos na 'di yang bya ste/__dge ba 'di dang ma lus dge ba'i mthus/__/ma rig mun par 'khyams pa'i 'gro 'di rnams/__/brgyud pa gsum ldan bla mas rjes bzung ste/__/byang chub sgrub byed dbang bzhis smin par shog__/ma bcos stong nyid spros bral de bzhin nyid/__/dmigs med snying rje sgom pa kun tu snang*/__/zung 'jug 'gags med 'khor 'das kun gyi rgyu/__/ting 'dzin gsum gyi nyams len mthar phyin shog__/chos sku lam byed bdag nyid rtsa ba dang*/__/longs spyod rdzogs sku lam byed khro bo'i tshogs/__/sprul sku lam byed sngags kyi dkyil 'khor te/__/rgyu 'bras dbyer med lam mchog bsgom par shog__/zhe sdang rtsad gcod phyi nang gsang ba'i sman/__/gti mug gnas su dag pa bA liM ta/__/'dod chags bsgral ba rak+ta'i rgya mtsho ste/__/mchod pa gsum gyis rgyal ba mnyes byed shog__/ma dag bden 'dzin 'khrul snang mthug po 'di/__/bskyed rim bzlas par bcas pa legs sbyangs te/__/dag pa'i ye shes rang bzhin ngo bos stong*/__/blo 'das zung 'jug mngon du 'gyur bar shog__/mngon spyod las kyis zhing bcu sgrol ba'i tshe/__/tha mal snying nang dwangs ma lnga yi dbus/__/rnam shes dang po'i dbyangs yig dkar la 'tsher/__/kun gzhi'i gnas tshul ji bzhin shes par shog__/las nyon dri ma sbyong byed khrus lung dang*/__/'chi med chos skur 'gyur ba tshe yi lung*/__/bcu gnyis gnad ldan dgongs pa rnam gsum gyis/__/bdag 'dzin dgra bgegs dbyings su sgrol bar shog__/chu bo bzhi 'dus gdams pa nyams len cing*/__/ye shes byang chub sems sogs phur bu bzhi/__/nam mkha' tsan dan lta bu'i gang zag bzhi/__/kun bzang rigs bzhi'i sa la 'god par shog__/skye ba kun tu lam mchog 'di nyid la/__/the tshom med par gus pas sgrub byed cing*/__/bar chad bgegs kyi gnod pa mi 'byung bar/__/mthun rkyen ma lus 'bad med 'grub par shog__/tshe 'dir 'chi med dpal dang tshul khrims ldan/__/byang chub sems gnyis zung 'jug thob pa'i don/__/yang dag shes shing sgrub la brtson byas te/__/lhag pa'i lha yis rjes su 'dzin par shog__/phyogs ris mu mtha' med pa'i sems can rnams/__/yang yang drin gyis skyong ba'i mar shes nas/__/tshad med snying nas brtse ba'i bsam pa yis/__/rtag tu gzhan gyi don la brtson par shog__/shAkya seng ge'i ring lugs mtha' dag dang*/__/rmad byung rdo rje theg pa'i bstan pa mchog__/khyad par bla med nang rgyud sde gsum rnams/__/nyan bshad sgrubs pas phyogs bcur rgyas par shog__/rang bzhin rnam dag dbyings kyi bden pa dang*/__/rig 'dzin yi dam lha yi byin rlabs dang*/__/chos srung dam can rgya mtsho'i nus mthu yis/__/ji ltar smon pa'i gnas rnams 'grub par shog__/bkra shis ni/__hU~M/__skye med chos sku'i rang bzhin rnam dag las/__/thugs dam dbang gis gzugs kyi skur sprul pa/__/bcom ldan dpal chen rdo rje gzhon nu'i sku/__/mi 'gyur rtag pa'i don gyi bkra shis shog__/'khor lo rgyas 'debs yum gyi bkra shis shog__/sprul pa'i khro rgyal bcu yi=__/shes rab khro mo bcu yi=__/yang sprul phyag brnyan tshogs kyi bkra=__/sras mchog phur pa'i tshogs kyi bkra=__/ye shes sgo skyong bzhi yi=__/dam can bka' sdod srung ma'i bkra shis shog__/dge legs 'bras bu smin pa'i bkra shis shog__/ces brjod la rol mo'i sgra dang me tog gi char dbab pas dge legs su bya'o/__/zhes phur pa'i sgrub mchod sogs kyi skabs spros bcas la dga' ba rnams kyi don du chos kyi blo gros pas rang gi bsgrigs pa'i las byang phrin las rnam rol gyi mdzes rgyan du rig 'dzin gong ma rnams kyi gsung las bsgrigs pa'i yi ge pa wa gin+d+ra ma tis bgyis pa dge legs 'phel/__sarba dA mang+ga laM//__//