JKW-KABAB-12-NA-013-wylie

🚧 This website is under continued development. We appreciate your patience!

@#/__/rdzogs pa chen po chig chod kun grol las/__dbang bzhi'i brda khrid bklag chog tu bkod pa gnas lugs gcer mthong zhes bya ba bzhugs so//_ na mo gu ru pra tha ma nA thA ya/__/rang rig rang shar gdod nas rdzogs sangs rgyas/__/rgyal kun spyi mes pad+ma 'od mi 'gyur/__/khyab bdag bla ma'i skur snang gsang gsum byin/__/sgo gsum mi shigs thig ler dbab par mdzod/__/rim dgu'i rtser phyin grol ba bzhi'i/__/khyad par chos ldan rdzogs pa che'i/__/yang bcud chig chod kun grol gyi/__/dbang bzhi'i brda khrid rnam gsal dgod/__/gang zag dbang rab rtsol med du grol ba'i zab lam/__a ti chig chod kun grol chen po'i dbang bzhi'i brda khrid bgyi ba la gnyis/__gshom bkod dang*/__cho ga'i rim pa'o/__/dang po ni/__dben pa'i gnas su stegs bu'i khar dkyil 'khor pad+ma 'dab brgyad lte ba dang bcas pa mdzes tshon can 'ja' ris sna lngas bskor ba'i steng du rin po che'i bum pa dri bzang sbyar ba'i chu dang so lnga'i rdzas kyis bkang ba/__me tog 'bras bu dang bcas pa'i shing gi kha rgyan mgul chings mthing ga can bkod/__mdun ngos su me long g.ya' med pa'i steng du shel zur brgyad pa dang rma bya'i sgro mdangs gzug__/mtha' skor du sman raka gtor gsum/__chu gnyis nyer spyod/__tshogs kyi yo byad ci 'byor bsham/__bla ma yi dam mkha' 'gro chos skyong la/__rin po che lnga/__sman lnga/__'bru lnga'i maN+Dal gsum/__ma 'dzom na 'bru gtsang ma'i maN+Dal bkod/__spos kyi dud pa rgyun mi chad pa bya bar gsungs so/__gnyis pa la gsum/__sngon 'gro/__/dngos gzhi/__rjes kyi bya ba'o/__/dang po ni/__slob dpon rdzogs pa chen po'i lta sgom dang ldan pa gzhir byas te dgongs pa'i gding bzung ba las yo ga 'og ma'i lugs ltar spros bcas kyi cho ga la ltos mi dgos kyang*/__gzhung du sngon 'gro'i rim pa bya zhing tshogs gtor 'bul bar gsungs pa dang*/__bla ma brgyud pa'i phyag bzhes ltar/__yang ti nag po las 'byung ba sogs kun bzang don phrin gang yang rung ba btang*/__tshogs mchod dang chos skyong gter srung la gtor ma 'bul/__rang gzhung gi man+Dal/__'od gsal klong yangs nam mkha'i dkyil 'khor du:__rin chen rnam pa mang pos yongs bkang bas:__yid bzhin nor bu'i ma d+hal mchod pa 'di:__bla ma rgyal ba sras bcas rnams la 'bul bar bgyi:__thugs rjes 'gro ba'i don du brtse bar dgongs te bzhes su gsol:__oM gu ru sarba ta thA ga ta rat+na ma d+ha la pU tsa ho:__lan gsum/__dpag bsam shing chen rgyas pa'i sdong po las:__bcud ldan sman gyi tshogs kyis legs spras pas:__dri med bdud rtsi'i ma rdal mchod pa 'di:__yi dam mkha' 'gro'i tshogs la mchod par 'bul:__thugs rjes 'gro ba'i don du brtse bar dgongs te bzhes su gsol:__oM d+he wa sarba ta thA ga ta a mr-i ta pU tsa hoH__lan gsum/__bdal ba chen po gser gyi sa gzhi la:__me tog rnam pa mang pos legs bkram pa'i:__yid 'ong mdzes pa'i ma d+hal mchod pa 'di:__dpa' bo mkha' 'gro chos skyong rnams la 'bul:__thugs rjes 'gro ba'i don du brtse bar dgongs te bzhes su gsol:__oM d+hA ki nI b+he ra sarba ta thA ga ta puSh+paM ma d+ha la pU tsa ho:__lan gsum/__yan lag bdun pa 'bul ba ni/__hU~M hU~M hU~M:__bla ma yi dam mkha' 'gro rnams la phyag 'tshal lo:__phyi nang gsang ba'i mchod pa rnams kyis mchod:__bdag gzhan mi dge'i las rnams ci bgyis mthol lo bshags so:__dus gsum dge ba'i yon tan tshogs la rjes yi rang :__chos kyi 'khor lo rgyun mi 'chad par bskor du gsol:__mya ngan mi 'da' bzhugs par gsol ba 'debs:__de sogs dge ba byang chub chen por bsngo:__gsol ba 'debs pa ni/__rtog med spros bral chos sku'i pho brang nas:__dngos dang brgyud pa'i bla ma thams cad la:__bdag gzhan nam mkha' mnyam pa'i sems can gsol ba 'debs:__gsol 'debs bu la chos nyid gsal ba'i sgo gcig phyes:__theg pa sna tshogs lung gcig ston:__dbang dang gdams ngag dngos grub zhu:__rang sems sangs rgyas su ngo gcig sprod:__tha mal shes pa chos skur bsgyur du gsol:__lan gsum/__'gags med rnam dag longs sku'i pho brang du:__phyi nang zhi khro'i dkyil 'khor lha tshogs la:__bdag gzhan nam mkha' mnyam pa'i sems can gsol ba 'debs:__dad can gsol 'debs bu rnams la:__longs spyod tshogs kyi sgo gcig phyes:__tshe ring nad med bde skyid spel:__mchog dang thun mong dngos grub stsol:__'gro drug kha lo gyen du sgyur:__bsam pa'i dgos 'dod char bzhin phob:__lan gsum/__phrin las rnam dag sprul sku'i pho brang du:__mkha' 'gro chos skyong dam can rgya mtsho la:__bdag gzhan nam mkha' mnyam pa'i sems can gsol ba 'debs:__dad can gsol 'debs bu rnams la:__phrin las mchog gi sgo gcig phyes:__mi mthun rkyen dang bar chad sol:__mthun pa'i lam sna chos la drongs:__log lta can gyi snang ba chos la sgyur:__gnod sbyin rnams kyi gdug rtsub thul:__lan gsum brjod/__gnyis pa la bzhi spros bcas snang ba'i brda dbang*/__spros med stong pa'i brda dbang*/__gnyis med rang grol gyi brda dbang*/__chig chod lhun grub kyi brda dbang ngo*/__dang po ni/__dbang bzhi'i brda khrid 'di nyid thun mong ma yin pa'i mtshan nyid tshang ba'i slob ma dbang po rab tu gyur pa ma gtogs gdul bya thun mong ba'i rigs can la mtshan tsam bstan par bya ba ma yin kyang*/__snying nas dad pa dang ldan cing don tu gnyer ba byung na rjes su bzung ste/__de'ang nyams len la brtson 'dod pa yin na de nyid snod ldan tu gyur pas thog mar khrus nas dbyung*/__rdzogs chen dbang bskur phal mo cher lta ba chos nyid mtshams mo che ye nas bcad pa'i dbang du mdzad nas bgegs bskrad srung 'khor dmigs su ma gsungs kyang*/__deng dus gang zag gi dbang du byas te gsang ba spyi lugs spro na spyi ltar bya/__maN+Dal bkye bsdu dang sems bskyed gsal gdab/__dbang gi spyi bshad rgyas bsdus gang lcogs dang*/__/'dir skabs su babs pa'i 'chad bya ni/__bdag cag gi ston pa mnyam med shAkya'i dbang po de nyid kyis/__rdzogs pa'i sangs rgyas phyogs bcu dus gsum du gshegs pa thams cad las kyang khyad par du mas 'phags pa'i rlabs po che'i thugs bskyed dang*/__thabs la mkhas pa'i phrin las ngo mtshar rmad du byung zhing bsam brjod kyi yul las 'das pas rgyal ba mtha' dag gi gdul bya'i yul du ma gyur pa'i mi mjed 'jig rten 'di nyid kyi rtsod dus snyigs ma lnga ldan gyi 'gro ba skal ba ches dman pa rnams 'dul ba'i phrin las thugs rje'i rtsal shugs phyungs te rdo rje theg pa'i gsang ba ma lus pa'i rtse mo rdzogs pa chen po grol ba bzhi ldan gyi bstan pa'i nyin byed snang bar mdzad nas/__theg pa thun mong gis 'dul dka' ba'i skye dgu mtha' yas pa gdod ma'i sa la dbugs chen 'byin par mdzad pa'i nang tshan/__sangs rgyas sprul pa'i sku dga' rab rdo rjes rig 'dzin shrI siM ha/__des slob dpon chen po pad+ma 'byung gnas la snyan tu brgyud pa'i rdzogs pa chen po chig chod kun grol gyi gdams pa zab mo'i skor rnams/__gu ru rin po che nyid gangs can gdul bya skal ldan rnams kyi bsod nams kyi mgron tu phebs pa'i tshe thugs sras las can rje 'bangs 'ga' zhig la thugs dam gsang ba'i mnog chos su stsal/__phyi rabs gdul bya'i don la dgongs te gsang ba'i bdag mo dbyings phyug mtsho rgyal ma sogs nyid las mi gzhan pa'i sdud pa po rnams kyis mkha' 'gro brda'i yi ger bkod nas 'phags yul rdo rje gdan gyi byang phyogs su kha ra tir pha waM ru sbal nag por mi 'jig pa'i rgyas btab pa/__phyis rgya gar mkhas pa shes rab 'byung gnas kyi yang srid mchog gi gling chen lnga'i ya gyal chos rgyal rin chen gling pas spyan drangs te gdul bya dpag tu med pa smin cing grol bar mdzad pa lags/__phyis su dpe tsam ma gtogs dbang lung gi rgyun chad pa na 'di nyid kyi lung nas bstan pa'i don mngon tu gyur te bka' babs bdun gyi mnga' bdag paN chen bi ma la dang 'jam mgon khri lde zung 'jug gi rnam rol pad+ma 'od gsal mdo sngags gling pa la gter ston nyid kyi ye shes kyi skus byin gyis brlabs shing rjes su bzung*/__chos srung ma mgon rnams kyis kyang dgyes pa'i mdangs gsol phul ba la brten smin grol gyi sgo 'phar gsar du dbye bar mdzad pa 'di nyid kyi brda bstan pas rtsol med du grol bar byed pa'i dbang rim rnam pa bzhi yod pa las/__dang po spros bcas snang ba'i brda dbang zhu ba'i yon tu dmigs te maN+Dal 'bul bar zhu/__zhes maN+Dal 'bul gzhug__/thal mo sbyor la gsol ba 'debs pa 'di'i rjes zlos mdzod/__e ma ho:__kun bzang bla ma sprul pa'i sku mchog la:__bdag nyid deng nas bzung ste gus pas gsol ba 'debs:__snang ba bde chen spros bral dkyil 'khor du:__rig pa mngon sum rtogs pa'i dbang bskur zhu:__lan gsum/__de nas spro ba dri ba lags pas snyan gtod cig__/dad ldan nges pa'i rigs kyi bu:__rdzogs chen chos la 'jug spro'am:__'khor 'das dbyer med mngon sum gyi:__dam tshig bsrung ba'i gzhung thub bam:__zhes dris pa'i lan du/__thub lags/__zhes brjod cig__/de nas de bzhin nyid la dam bcar gzhug pa ni/__bdud rtsi'i mna' chu sbyin la/__bu khyod kyis ni 'khor ba blos btang nas:__byar med mngon sum don la ma yengs par:__rang byung rig pa lta bar dam chos shig:__de las 'gal na khyod nyid brlag par 'gyur:__ji ltar bka' bsgos pa'i dam las mi 'da' bar bya'o snyam pas 'di'i rjes zlos/__de ltar bgyi bar dam bca' 'o/__/zhes brjod du gzhug__/de nas bla mas/__bu khyod su yin:__ces dris pa'i lan btab pa 'di'i rjes zlos/__nga ni skal ldan rigs kyi bu yin no:__ces dang*/__khyod kyis snang ba 'di brda'i dkyil 'khor ma mthong na ltos shig:__khyod kyi gos dang rgyan 'di rnams ci la brgyan pa yin:__ces dris pa'i lan tu/__'di lus la brgyan pa yin:__ces brjod cig:__de bzhin tu phyi rol gyi snang ba 'di rnams kyang :__sems kyi rgyan yin no:__khyod kyi gos rgyan 'di rnams dang po gang la brten nas byung :__zhes dris pa'i lan tu/__'di lus la brten nas byung :__zhes smos shig__/de bzhin tu snang ba 'di yang sems la brten nas byung :__gos dang rgyan sna tshogs kyang lus la brgyan par gcig pa bzhin:__snang ba sna tshogs kyang sems su gcig pa yin:__de bzhin du dkyil 'khor yang :__lte ba gcig la pad+ma 'dab brgyad byung ba ni:__sems nyid gcig gi 'char tshul la rnam shes tshogs brgyad byung ba'i rtags yin:__kha dog sna tshogs snang ba ma 'gags cir yang shar ba'i brda:__'ja' 'od lngas bskor ba ni:__thams cad sems kyi dkyil 'khor yin pa'i brda:__dbus su bum pa byung ba ni:__thams cad byang chub sems las bskyed pa'i brda:__nang du bum rdzas sna tshogs blugs pa ni:__snang ba thams cad sems su 'dus pa'i brda:__me tog sna tshogs kha rgyan btsugs pa ni:__rig pa sems la gsal 'grib med pa'i brda'o:__zhes pas brda'i dkyil 'khor snang ba sems su bstan pa'i don go bar gyis shig:__de nas sems la rig pa'i rtsal dbang bskur bar mos shig___/bum pa mgor bzhag la/__hU~M hU~M hU~M:__hU~M:__skye med chos sku'i dkyil 'khor klong yangs su:__'gag med bum pa rig pa'i lha tshogs kyis:__mngon sum zhal ston rdo rje lu gu rgyud:__snang ba dbang du 'dus par byin gyis rlobs:__smon lam 'di lhan cig tu lan gsum brjod par zhu/__snang sems rig pa'i dbang bskur bas:__mi yi lus la sangs rgyas thugs:__dus 'dir mngon gyur ye shes kyi:__'bral med chos sku'i don rtogs shog:__lan gsum dpon slob lhan cig brjod/__des spros bcas snang ba'i brda dbang thob pa'i gtang rag dang :__gnyis pa spros med stong pa'i brda dbang zhu ba'i yon tu maN+Dal phul/__slob mas stod gos phud la thal mo sbyar du gzhug__/gsol ba 'debs pa 'di'i rjes zlos/__e ma ho:__kun bzang bla ma longs spyod rdzogs sku la:__bdag nyid khyed la gus pas gsol ba 'debs:__chos nyid skye ba med pa'i pho brang chen po ru:__zag med ye shes 'od gsal dbang bskur zhu:__lan gsum/__de nas spro ba dri ba lags pas snyan gtod cig__/rig pa dngos med sems kyi bu:__chig chod don la 'jug spro'am:__nges don mtha' bral stong pa yi:__dam tshig bsrung ba'i gzhung thub bam:__zhes dris pa'i lan tu/__thub lags/__zhes brjod cig__/de bzhin nyid la dam bca' gzhug pa ni mna' chu sbyin la/__khyod kyis mtshan ma'i 'khrul phyir ma 'brengs par:__rtsol med chos nyid don la ma yengs par:__dmigs med sgom pa'i nyams len dam chos shig:__de las log na khyod nyid brlag par 'gyur:__ji ltar bsgos pa'i dam las mi 'da' bar bya'o snyam pas 'di'i rjes zlos/__de ltar bgyi bar dam bca' 'o:__zhes brjod du gzhug__/de nas bla mas/__bu khyod su yin:__ces dris pa'i lan btab pa 'di'i rjes zlos/__nga ni rig pa sems kyi bu yin no:__zhes dang*/__khyod kyis stong nyid ye shes kyi dkyil 'khor ma mthong na:__khyod rang gi lus la ltos shig:__khyod kyi lus 'di ci yin:__ces dris pa'i lan tu stod gcer bu:__smad gos can yin no:___zhes brjod cig__/de bzhin tu sems nyid 'di yang shes par gyis:__lus la brten nas gos byung ba bzhin sems la brten nas snang ba byung :__lus gos kyis gtum nas mi mthong ba bzhin:__sems snang ba la zhen nas stong pa'i don mi rtogs:__stod kyi gos phud pa de gcer bur mthong ba bzhin:__snang ba gang dag der chos nyid du mthong ba yin pas:__de bzhin du dkyil 'khor 'di yang shes par gyis shig:__me long la dkyil 'khor gsal bar shar yang 'dzin rgyu med pa bzhin:__snang ba sna tshogs shar yang dngos med stong pa yin pa'i brda:__shel la sgro'i 'od lnga shar ba 'di:__stong pa'i rang rtsal cir yang shar ba'i brda:__shar yang dngos por ma grub stong pa yin pa'i brda:__zhes pas dkyil 'khor gyi brda bstan pas sems nyid stong pa'i brdar bstan pa go bar gyis shig__/de nas sems stong par rtogs pa la dbang ba ye shes kyi rtsal dbang bskur bar mos shig:__slob ma'i mig la shel rdo bstan te/__hU~M hU~M hU~M:__snang ba longs sku'i dkyil 'khor mdzes pa ru:__gsal la 'dzin med shel 'od sna tshogs kyi:__sku dang ye shes stong pa'i sgron ma mchog:__sems nyid skye med grol bar byin gyis rlobs:__smon lam 'di lhan cig tu brjod par zhu/__rig stong ye shes dbang bskur bas:__sgyu lus sangs rgyas dgongs pa can:__dus 'dir rang byung ye shes su:__'dzin med chos nyid don rtogs shog:__lan gsum dpon slob lhan cig brjod/__des spros med stong pa'i brda dbang thob pa'i gtang rag dang*/__gsum pa gnyis med rang grol gyi brda dbang zhu ba'i yon tu maN+Dal phul/__slob ma rnams gos phud gcer bu 'grengs stabs su langs par gsungs pas mtshon byed byar gzhug__/phyag thal sbyar bcas gsol ba 'debs pa 'di'i rjes zlos/__e ma ho:__kun bzang bla ma chos sku rang grol la:__dus gsum dus med gus pas gsol ba 'debs:__stong gsal 'gag med spros bral dkyil 'khor du:__rang grol gnyis med chen po'i dbang bskur zhu:__lan gsum/__de nas spro ba dri ba la gsan 'tshal/__stong nyid sems kyi bu gcig po:__rang grol 'jug par spro lags sam:__'dzin med rang gsal shugs byung la:__dam tshig bsrung bar gzhung thub bam:__zhes dris pa'i lan tu:__thub lags/__zhes brjod cig__/de bzhin nyid du dam bcar gzhug pa ni/__mna' chu sbyin la/__khyod kyis snang stong zhen 'dzin spangs nas su:__stong gsal rang grol chos sku'i don la ni:__rang bzhin lhug par spyod par dam chos shig:__de las log na khyod nyid brlag par 'gyur:__ji ltar bsgos pa'i dam las mi 'da' bar bya'o snyam pas 'di'i rjes zlos/__de ltar bgyi bar dam bca' 'o:__zhes brjod du gzhug__/de nas bla mas/__bu khyod su yin:__ces dris pa'i lan btab pa 'di'i rjes zlos/__nga ni rang byung ye shes yin no:__zhes dang*/__khyod kyis rang grol dkyil 'khor ma mthong na:__nam mkha' la ltos shig:__khyod kyi lus 'di ci yin:__ces dris pa'i lan tu:__gcer bu yin no:__zhes rjod cig:__lus gcer bu gdod ma nas yin pa la:__de la gos bkon rgyan bzung 'dzin pa'i ngo tsha 'phral la bcos pa bzhin du:__sems nyid ye nas stong pa yin la:__snang bar bzung bas glo bur du 'khrul pa'i brda:__lus la gos med ngo tsha'i 'dzin pa las grol nas gcer bu ji ltar yin pa'i ngo bo gsal ba bzhin du:__snang ba'i zhen 'dzin gang yang med par grol nas:__sems kyi ngo bo gcer bu zang thal gong ltar yin pa mthong ba yin:__de bzhin dkyil 'khor 'di yang shes par gyis la ltos:__dkyil 'khor chen po nam mkha' yangs pa yin:__nam mkha' gsal yang dngos po med pa bzhin:__sems nyid stong gsal dngos po med pa'i brda:__nam mkha' stong pa dbyings nas gsal ba bzhin:__sems nyid stong pa cir yang gsal ba'i brda:__nam mkha' mtha' bral ye stong yin pa bzhin:__sems nyid stong pa ma bcos rang grol yin pa'i brda don go bar gyis shig:__de nas rang grol chos nyid kyi rtsal dbang bskur ba yin pas khyed rang mig gi sta ltangs nam mkha'i dbyings su thod cig__/hU~M hU~M:__rang grol chos sku'i dkyil 'khor rnam dag tu:__gsal stong nam mkha' don gyi lha tshogs kyis:__rang byung ye shes rtsol med kun tu bzang :__ma bcos rang sar grol bar byin gyis rlobs:__smon lam 'di lhan cig tu brjod par zhu/__gnyis med rang grol dbang bskur bas:__lus 'di sangs rgyas dgongs pa can:__dus 'dir rang grol rnam dag tu:__rtsol med chos sku'i don rtogs shog:__lan gsum dpon slob lhan cig tu brjod/__des gnyis med rang grol gyi brda dbang thob pa'i gtang rag dang bzhi pa rang grol lhun grub kyi brda dbang zhu ba'i yon tu maN+Dal phul/__slob ma sngar ltar gcer bur phyag 'tshal zhing 'greng bar gsungs pas mtshon byed byas la/__phyag thal mo sbyor la gsol ba 'debs pa 'di'i rjes zlos/__e ma ho:__kun bzang bla ma bde ba chen po la:__rang gsal chos sku'i ngang nas gsol ba 'debs:__lhun grub bde ba chen po'i dkyil 'khor du:__kun mkhyen rdzogs sangs rgyas kyi dbang bskur zhu:__lan gsum/__de nas spro ba dri ba lags pas gsan 'tshal:__rang grol lhun grub chos nyid bu gcig po:__lhun grub don la 'jug spro'am:__ma bcos 'dzin med blo 'das la:__dam tshig bsrung ba'i gzhung thub bam:__zhes dris pa'i lan tu:__thub lags/__zhes brjod cig__/de bzhin nyid du dam bcar gzhug pa ni/__mna' chu sbyin la/__khyod kyis grol bya grol 'dzin zad nas su:__zag med sangs rgyas lhun grub bde ba che:__rtog med mkhyen pa'i don la dam chos shig:__de las 'gal na khyod nyid 'tshig par 'gyur:__ji skad bsgos pa'i dam las mi 'da' bar bya'o snyam pas 'di'i rjes zlos/__de ltar bgyi bar dam bca' 'o:__zhes brjod du gzhug__/de nas bla mas/__bu khyod su yin:__ces dris pa'i lan btab pa 'di'i rjes zlos/__nga ni bdag med kun grol yin no:__zhes lan gdab/__khyod kyis ka dag lhun grub kyi dkyil 'khor ma mthong na:__khyod rang gi lus la ltos shig:__khyod kyi lus 'di ci yin:__ces dris pa'i lan tu/__nga'i lus 'di gcer bu zang thal yin:__ces brjod/__de bzhin rang gi rig pa 'di yang shes par gyis shig:__khyod lus snga phyi bar gsum du bzo ma bcos par:__rang bzhin lhun grub gcer bu zang thal 'di ka yin pa bzhin du:__sems nyid dus gsum dus med thams cad du ngo bo ma bcos rang byung chos sku yin:__gos gon phud byas pa ngo tsha'i bcos ma byung :__gos med lus la gon phud gos kyi ngo tsha med:__lus la gos gon bzang du ma song ma gon ngan du ma song :__rang byung lhun grub lus de gcer bu yin pa bzhin:__sems kyi snang stong gnyis snang bar 'dzin rgyu stong par grol rgyu 'dzin pa byas pas ma rig 'khrul pas bcings:__snang stong grol bya grol rgyu gang yang ma grub:__'dzin med rang sar ma bcos na:__ye nas yin pa'i sems nyid sku gsum lhun grub rtsal rdzogs 'gyur:__de las 'char tshul sna tshogs shar yang :__ngo bo bzang ngan gang du yang 'gyur ba med:__gsal 'grib 'dzin rtog med pas mkhyen pa'i ye shes chen po yin:__de bzhin nyid du dkyil 'khor 'di yang shes par gyis:__sgrib med ye shes ma bltas mthong ba yi:__bcos pa med pa'i lhun grub dkyil 'khor ltos:__blta ru med pa'i gsal ba 'di ka yin:__gsal la mi rtog chos sku'i dkyil 'khor la:__phyogs ris med de kun khyab gzugs ma grub:__gsal 'grib med pa'i zang thal 'di ka ru:__thams cad ngo bo nyid du rdzogs pa yi:__mnyam yangs kun mkhyen lhun grub yin:__ces chos nyid dbyings kyi dkyil 'khor du 'bras bu lhun gyis 'grub par brdas bstan pa yin no:__de nas lhun grub mkhyen pa'i rtsal dbang bskur ba yin pas/__khyed rang chos nyid ye dag ye rdzogs chen po'i ngang du mnyam par zhog cig__/hU~M:__kun grol mnyam yangs bde chen dkyil 'khor du:__kun bzang ma bcos cir mi dgongs pa'i lha:__shugs 'byung yon tan gdod nas rab rdzogs pa'i:__'bras bu lhun grub bde ba chen por byin gyis rlobs:__smon lam 'di lan gsum du lhan cig brjod par zhu:__rang grol lhun grub dbang bskur bas:__'du shes rnam rtog kun zad nas:__ma bcos kun gsal 'dzin med du:__mkhyen ldan mngon sangs rgyas par shog:__ces dpon slob lhan cig tu lan gsum brjod/__de ltar yang rgyud las/__spros bcas snang ba sems su dbang :__spros med sems nyid stong pa'i dbang :__gnyis med rig stong rang grol dbang :__rang grol lhun grub sangs rgyas dbang :__de phyir rig pa'i rtsal dbang khrid:__thos pa tsam gyis mngon sangs rgya:__zhes gsungs pa'i don/__chos rgyal rin chen gling pa'i zab gter/__chig chod kun grol chen po'i man ngag__/dbang po rab rtsol med du sangs rgya ba'i thabs/__dbang bzhi'i brda'i khrid kyis zhag bdun na chos nyid kyi bden pa mthong ba'i man ngag__/yid bzhin gyi nor bu lta bu/__rig 'dzin chen po dga' rab rdo rjes mdzad pa'i phyag bzhes ma 'khrul bar bgyis grub pa lags pas spyi dang khyad par gyi dam tshig rnams dang rang bzhin lta ba'i dam tshig chen po las 'da' bar mi bya'o snyam pas 'di'i rjes zlos/__gtso bos ji ltar sogs/__gtang rag maN+Dal/__lus 'bul dge bsngo bcas kyis grub/__slob dpon gyis kun bzang don phrin gyi rjes rim rnams dang*/__kun bzang smon lam gyis mtshon pa'i thun mong ma yin pa'i bsngo smon rgyas par bya'o/__/zab chos 'di yang thub bstan ji srid bar/__/mi nub dar zhing rgyas pa'i btsas gyur te/__/'brel bcas 'gro kun gdod ma'i grol gzhi ru/__/'bad rtsol med par dbugs dbyung thob gyur cig__/ces pa 'di'ang khyab bdag gdod ma'i mgon po bka' drin sum ldan pad+ma 'od gsal mdo sngags gling bas rjes su gnang ba stsal ba dang*/__snga 'gyur bstan 'gro'i dpal mgon 'dzar ka dang dge mang mchog sprul rnam pa gnyis nas gsung bskul gnang ba ltar 'du gsum pa pad+ma gar dbang blo gros mtha' yas kyis gter gzhung sor bzhag la kha gsal phran tshegs kyis brgyan te dpal spungs yang khrod tsA 'dra rin chen brag gi sgrub gnas su bgyis pa dge legs 'phel//