JKW-KABUM-19-DZA-001-051

🚧 This website is under continued development. We appreciate your patience!

Previous Text Back to Volume PageNext Text

རྗེ་དེ་ཉིད་ཀྱི་ཐུགས་སྲས་གྲུབ་པའི་དབང་ཕྱུག་ངག་དབང་རིན་ཆེན་ནི།

Wylie title	rje de nyid kyi thugs sras grub pa'i dbang phyug ngag dbang rin chen ni
Location	mkhyen brtse'i bka' 'bum Volume 19, sde tshan 1, Text 51, Pages 393-403 (Folios 197a2 to 202a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rje de nyid kyi thugs sras grub pa'i dbang phyug ngag dbang rin chen ni. In 'jam dbyangs mkhyen brtse'i dbang po'i bka' 'bum, Vol. 19: 393-403. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

51 393-403	རྗེ་དེ་ཉིད་ཀྱི་ཐུགས་སྲས་གྲུབ་པའི་དབང་ཕྱུག་ངག་དབང་རིན་ཆེན་ནི། rje de nyid kyi thugs sras grub pa'i dbang phyug ngag dbang rin chen ni History Texts - lo rgyus   ·   Religious History Texts - chos 'byung	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྗེ་དེ་ཉིད་ཀྱི་ཐུགས་སྲས་གྲུབ་པའི་དབང་ཕྱུག་ངག་དབང་རིན་ཆེན་ནི། བོད་ཆེན་སྡེ་དགེའི་མངའ་འོག་བྱང་འབྲོག་གི་སའི་ཆ་ཡིད་ལྷུང་ཞེས་ཡུལ་གྱི་དགེ་མཚན་ཚང་བ་དེར། ཡབ་དཔའ་རྩལ་གེ་སར་ལ་འགྲན་བཟོད་ཅིང་། སྐུ་ལྷ་གེ་མཛོ་གཉན་པོའི་སྲས་སུ་གྲགས་པ་ལྷ་མི་དར་རྒྱས་དང་། ཡུམ་སོག་མོའི་སྲས་སུ་མེ་སྤྲེལ་དབྱར་ཟླ་དང་པོའི་ཚེས་གཅིག་ལ་སྐུ་འཁྲུངས། ཆུང་ངུ་ནས་ཆོས་ལ་མོས་པའི་བག་ཆགས་སད། དགུང་ལོ་བཅོ་ལྔ་པར་ཕྱོགས་དེའི་ངོར་ལུགས་ཀྱི་དགོན་སྡེ་ལྷ་རྒྱལ་སྲང་སྲིད་གསུམ་དགེ་ལེགས་ཡོངས་འདུས་སུ་ཕེབས། མཚུངས་བྲལ་ཆོས་རྗེ་བླ་མ་རིན་པོ་ཆེའི་ཞབས་ཕྱིར་གཅར་བཞུགས་ངོས་བསླབ་གཉེར་ལ་བརྩོན་པར་མཛད། དགུང་ལོ་ཉེར་ལྔ་པར་དབུས་གཙང་དུ་ཕེབས། ངོར་ཨེ་ཝྃ་ཆོས་ལྡན་གྱི་ཆོས་གྲར་མཁས་གྲུབ་ཆེན་པོ་ངག་དབང་དམ་ཆོས་ལས་སྡོམ་པ་གསུམ་གྱི་བཀའ་དྲིན་གསན་པ་ནས་བཟུང་བསླབ་བྱ་ལ་གཅེས་སྤྲས་སུ་མཛད་ཅིང་། དཔལ་ཀྱེ་རྡོ་རྗེའི་ལམ་དུས་ཀྱི་རྣལ་འབྱོར་ཆགས་མེད་ཀྱི་ཉམས་གཞེས་གནང་། གཞན་ཡང་ས་ངོར་གྱི་དམ་པ་རྣམས་ལས་ཆོས་འབྲེལ་ཅི་རིགས་པ་གསན། ཕྱིར་ཕེབས་འཕྲལ་དབེན་པའི་རི་ཁྲོད་དུ་ཟབ་མོའི་ཉམས་བཞེས་ལ་བརྩོན་པར་དགོངས་ནའང་། རེ་ཞིག་ཆོས་རྗེ་བླ་མའི་ཞབས་འགྱུར་དང་། དེ་རྗེས་ཡབ་ཀྱིས་སྐུ་དབང་བཙན་པོས་ལྷུན་གྲུབ་སྟེང་གི་ཆོས་གྲྭར་འབྱོན་དགོས་བྱུང་། སླར་མི་རིང་བར་དབེན་གནས་དྲྭ་མ་སྒང་དུ་གྲུབ་ཆེན་ཀུན་དགའ་བློ་ལྡན་པའི་ཞབས་པད་མཉེས་པ་གསུམ་གྱིས་བསྟེན། གསུང་ངག་རིན་པོ་ཆེ་ཚོགས་བཤད་ཀྱི་ཁྲིད་ཡིག་འཇམ་པའི་དབྱངས་དཀོན་མཆོག་ལྷུན་གྲུབ་ཀྱིས་མཛད་པའི་མཛེས་རྒྱན་རྣམ་གཉིས་ཐུགས་སུ་ཆུད་པ་དང་བསྟུན་ཞིབ་བཤད་ཀྱིས་མཚོན་སྨིན་གྲོལ་གྱི་གདམས་པ་མང་དུ་གསན། གཞན་ཡང་ཐར་རྩེ་རྡོ་རྗེ་འཆང་བྱམས་པ་ནམ་མཁའ་འཆི་མེད་དང། མཐུ་སྟོབས་ཀྱི་དབང་ཕྱུག་ངག་དབང་ཆོས་འབྱོར་སོགས་ལས་ཀྱང་དབང་ཁྲིད་མན་ངག་ཅི་རིགས་པ་བཞེས། གཙོ་བོར་དབེན་གནས་དེ་ཉིད་དུ་ཐོག་མར་རེ་གུར་ལ་བརྟེན་ཅིང་། ཕྱིས་ཚེ་མདོའི་སྒྲུབ་ཁང་དུ་བཞུགས་ནས། ཤ་ཆང་ཤ་གོས་སོགས་སྡིག་ཟས་དང་ལོག་འཚོའི་ཚོགས་རིང་དུ་བསྲིངས། གཞི་འདུལ་བའི་ཀུན་སྤྱོད་ཤིན་ཏུ་དག་པ་ལ་གནས་ནས་དཔལ་ཀྱེ་རྡོ་རྗེ་གཙོ་བོར་གྱུར་པའི་ལམ་ཟབ་མོའི་རྣལ་འབྱོར་ལ་བརྩོན་པ་དྲག་པོ་ལྷུར་བཞེས་པས་གེགས་སྐྱོན་རྣམས་གྲོལ། ཉམས་རྟོགས་ཀྱི་ཡོན་ཏན་སྒོ་དུ་མ་འཁྲུངས། ཞག་འགར་ཏིང་ངེ་འཛིན་གྱི་ངང་དུ་འབྱམས་པ་བྱུང་། དེ་སྐབས་ཤིག་རང་ཡུལ་དུ་ཕེབས་ནས་ལྷ་རྒྱལ་སྲང་གི་དགོན་སྡེར་ཆོས་རྗེ་རྒན་པོས་སྤྱན་དྲངས་ཤིང་གཙུག་གི་ནོར་བུར་བཀུར། རིགས་གསུམ་སྤྱི་དང་། གདུགས་དཀར་གྱི་དབང་། དཔལ་གུར་གྱི་མགོན་པོའི་དབང་རྗེས་ལུང་ཁྲིད་སོགས་ཟབ་ཆོས་ཀྱི་བདུད་རྩི་སྩལ། འདི་དུས་མཁས་དབང་བླ་མ་ཀུན་དགའ་དཔལ་ལྡན་ཀྱང་ཐོག་མར་རྗེས་སུ་བཟུང་ཞིང་། རྨི་ལམ་གྱི་རྟགས་མཚན་དགེ་བས་སླར་ཐུགས་ཀྱི་སྲས་སུ་འགྱུར་བའི་རྟེན་འབྲེལ་འགྲིགས། བཀའ་ཆོས་སྩལ་སྐབས་ཆོས་སྲུང་དགྱེས་པའི་མཚན་མར་དར་ལྕོག་གི་རྩེ་ནས་མེ་ལྕེ་འབར་བ་དང་། ཤོ་རོང་རྡོ་རྗེ་རྩེ་རྒྱལ་གྱི་བླ་མཚོ་ནས་ནོར་བུ་དབྱིག་ཏུ་གྲགས་པའི་རྡོ་གཏེར་དང་། ཡུལ་ལྷ་གེ་མཛོ་གཉེན་པོའི་མདུན་ནས་ཐུབ་དབང་གི་སྐུ་ཀླུ་འཇིམ་ལས་གྲུབ་པ་སོགས་རྫས་གཏེར་གྱི་རྣམ་པའང་ཕྱག་ཏུ་སོན། དེ་ནས་དཔལ་སའི་ཚངས་པ་སྡེ་དགེ་ཆོས་རྒྱལ་ཆེན་པོ་རིགས་ལྡན་ཚེ་དབང་རྡོ་རྗེས་དབུའི་མཆོད་གནས་སུ་བཞེས་ཤིང་། མཆོད་ཡོན་གཉིས་ཀ་དབུས་གཙང་དུ་ཆིབས་བསྐྱོད་གནང་། ཇོ་ཤཱཀ་རྣམ་གཉིས་ཀྱིས་གཙོས་པའི་རྟེན་གསུམ་རྣམས་ལ་ཕྱག་མཆོད་བསྙེན་བཀུར་དཔག་མེད་མཛད། ཁྱད་པར་སྙན་བརྒྱུད་བསྟན་པའི་འབྱུང་གནས་ཡར་ཀླུང་བཀྲ་ཤིས་ཆོས་སྡེར་གནས་གསར་དབོན་རིན་པོ་ཆེའི་མཆོག་སྤྲུལ་ནམ་མཁའ་ལེགས་པ་ལྷུན་གྲུབ་དང་མཇལ། གསུང་ངག་རིན་པོ་ཆེ་སློབ་བཤད་ཀྱི་སྨིན་གྲོལ་ཆ་ལག་དང་བཅས་པ་རྫོགས་པར་གསན་པས་སྙན་བརྒྱུད་བཞིའི་རྟེན་འབྲེལ་རང་ཤུགས་ལ་འགྲིགས། རྗེ་དེ་ཉིད་ཀྱིས་གྲུབ་པའི་དབང་ཕྱུག་སྤྲོ་ལུང་པ་བསོད་ནམས་ཆོས་འཕེལ་གྱི་རྣམ་འཕྲུལ་དུ་ལུང་བསྟན་པས་མཚོན་ཏེ། དཔལ་ས་སྐྱ་པ་ཀུན་དགའ་སྙིང་པོ། བདག་ཆེན་རྡོ་རྗེ་འཆང་བློ་གྲོས་རྒྱལ་མཚན། གྲུབ་པའི་དབང་པོ་ཐང་སྟོང་རྒྱལ་པོ་སོགས་ཀྱི་སྤྲུལ་པར་གྲགས་པའི་ཡི་གེས་མཛེས། ངོར་ཨེ་ཝྃ་ཆོས་ལྡན་དུ་ཐར་རྩེ་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལས་ཀྱང་ཟབ་ཆོས་ཀྱི་བདུད་རྩི་ཇི་སྙེད་པ་དང། དཔལ་ས་སྐྱར་གངས་ཅན་བསྟན་པའི་བདག་པོ་འཇམ་མགོན་ཀུན་དགའ་བཀྲ་ཤིས་མཆེད་ཞལ་རྣམས་ནས་ཀྱང་དགྱེས་པ་ཆེན་པོས་རྗེས་སུ་བཟུང་། དབང་ལུང་མན་ངག་ཅི་རིགས་པ་གསན། ལྷག་པར་ཁྱབ་བདག་རྡོ་རྗེ་བཙུན་མོའི་རྣམ་འཕྲུལ་རྗེ་བཙུན་རིན་པོ་ཆེ་མཁའ་སྤྱོད་དབང་མོ་འཆི་མེད་བསྟན་པའི་ཉི་མ་ལས་གྲུབ་ཆེན་ནཱ་རོ་ཏཱ་པའི་ཐུགས་བཅུད་རྗེ་བཙུན་རྡོ་རྗེ་རྣལ་འབྱོར་མའི་སྨིན་གྲོལ་ཆ་ལག་དང་བཅས་པ་ཉམས་ཁྲིད་དུ་གསན། དེ་སྐབས་རྗེ་བཙུན་རིན་པོ་ཆེ་ཉིད་སྐུ་ན་སྨིན་པས་སྤྱན་ཅུང་ཟད་མི་གསལ་བའི་ཚུལ་སྟོན་ཀྱང། རྗེ་འདི་ལ་བཀའ་ཆོས་སྩལ་བ་ནས་སྤྱན་ཇེ་གསལ་དུ་སོང་བས་སྣོད་ལྡན་གྱི་སློབ་མའི་མཆོག་ཏུ་བསྔགས་ཤིང་ཐུགས་ཡིད་གཅིག་འདྲེས་སུ་གྱུར། བྱིན་རླབས་གནང་བའི་ཚེ་ནང་མཆོད་ཀྱི་བདུད་རྩི་སྦུ་བ་དང་བཅས་ཁོལ་བའི་རྒྱུན་ལས་རྗེ་འདི་ཉིད་ཀྱིས་ཡང་ཡང་བཞེས་པས་བདེ་སྟོང་གི་ཏིང་ངེ་འཛིན་ཁྱད་པར་ཅན་ཐུགས་རྒྱུད་ལ་འཁྲུངས་པས་མཚོན་བླ་སློབ་གཉིས་ཀས་གྲུབ་པའི་རྟགས་མཚན་མངོན་སུམ་དུ་སྣང་བར་མཛད། སླར་ཡང་མཆོད་ཡོན་ཕེབས་ལམ་བདེ་བར་རྒྱལ་ཁབ་ཆེན་པོར་ཞབས་པད་བཀོད་ཅིང་དབུ་བླ་སྔར་རྒྱུན་ལྟར་གནང་། ལུགས་གཉིས་ཀྱི་མངའ་ཐང་ལྷག་པར་འཕེལ། ཐོག་མར་མཁན་ཆེན་རྡོ་རྗེ་འཆང་སངས་རྒྱས་ཕུན་ཚོགས་མྱ་ངན་ལས་འདས་པའི་སྐབས་གདུང་རུས་ཀྱི་སཱ་ཙྪ་རྣམས་ཕྱོགས་དེར་འཇོག་དགོས་པར་བཀས་གནང་ནས་མ་འོངས་པ་ན་སྒྲུབ་གྲྭ་འབྱུང་བར་དོན་གྱིས་ལུང་བསྟན། བར་དུ་གྲུབ་ཆེན་ཀུན་དགའ་བློ་ལྡན་གྱིས་སྒྲུབ་པའི་རྒྱལ་མཚན་བཟུང་ཞིང་སྣོད་ལྡན་གྱི་སློབ་མའང་ཅི་རིགས་པར་འདུས། མཐར་དམ་པ་འདི་ཉིད་ཀྱིས་མནལ་ལམ་གྱི་རྟགས་མཚན་དགེ་བ་ལ་བརྟེན་ནས་ས་དབང་ཆོས་རྒྱལ་ཆེན་པོར་སྙན་བསྐུལ་ཞུས་པ་བཞིན་དགྱེས་པ་ཆེན་པོས་ཞལ་གྱིས་བཞེས་ཏེ། ལོ་གསུམ་གྱི་ཁོངས་སུ་དབེན་རི་གྲྭ་མ་སྒང་གི་སྒྲུབ་སྡེ་སློབ་བཤད་སྨིན་གྲོལ་རབ་འཕེལ་གླིང་གི་རྟེན་དང་བརྟེན་པར་བཅས་པ་གེགས་མེད་དུ་གྲུབ། ཕྱི་ཉན་ཐོས་འདུལ་བའི་ཀུན་སྤྱོད་ཤིན་ཏུ་དག་པ་ལྷུར་ལེན་ཅིང་། ནང་དུ་དཔལ་ཀྱེ་རྡོ་རྗེའི་རིམ་གཉིས་ཀྱི་རྣལ་འབྱོར་ལ་ཉམས་བཞེས་རྩེ་གཅིག་ཏུ་མཛད་པའི་སྤོང་བ་པ་ཉི་ཤུ་རྩ་བདུན་ལ་ཆོས་ཀྱི་རྒྱལ་པོས་འཚོ་བ་བླ་ནས་སྦྱར། རྗེ་འདིས་གསུང་ངག་རིན་པོ་ཆེ་སློབ་བཤད་གཙོ་བོར་གྱུར་པའི་སྨིན་གྲོལ་གདམས་ཟབ་ལྷུག་པར་སྩལ་ཏེ་ཟབ་དོན་སྙིང་པོའི་བསྟན་པ་ཉིན་མོ་ལྟར་མཛད། དེ་སྐབས་སྒྲུབ་གྲྭའི་མཆོད་ཐེབས་བསྟན་དགྲ་གཟུར་བས་བཅོམ་པ་ལ། དཔལ་རྡོ་རྗེ་ནག་པོ་ཆེན་པོ་ཞལ་བཞི་པའི་སྒོ་ནས་ལས་སྦྱོར་མཛད་པས་འཕྲལ་དུ་རྟགས་མཚན་ཐོན་ཅིང་། ས་དབང་ཆེན་པོས་ཀྱང་གཏང་རག་གི་ཚུལ་དུ་སྒྲུབ་དུས་ཀྱི་མགོན་པོའི་སྐུ་རིན་ཆེན་གཉིས་པ་ལས་གྲུབ་པའི་ངོ་མཚར་ཅན་བཞེངས་པར་གནང་། དེ་ནས་སྔར་རྗེ་བཙུན་རིན་པོ་ཆེ་འཆི་མེད་བསྟན་པའི་ཉི་མའི་སྤྱན་སྔར་དམ་བཅས་མཛད་པ་བཞིན་དབེན་རི་གྲྭ་མ་སྒང་དུ་བྱོན། སྔོན་ཆད་སུས་ཀྱང་མཐོང་ཐོས་སུ་མ་བྱུང་ཞིང་། ཕལ་གྱིས་ཤིན་ཏུ་བགྲོད་དཀའ་བའི་ཡང་དབེན། གངས་ཅན་བྲག་དཀར་དུ་གྲགས་པའི་སྐེད་པར་ཐོགས་མེད་དུ་བྱོན་ནས་རྗེ་ཉིད་གཅིག་པུར་ཟླ་བ་བཅོ་ལྔའི་བར་རྡོ་རྗེ་རྣལ་འབྱོར་མའི་ལམ་ཟབ་མོ་ལ་རྩེ་གཅིག་ཏུ་གཞོལ་བས། དང་པོར་གནས་བདག་གི་ཆོ་འཕྲུལ་དང་སློང་ཚད་ཅི་རིགས་པ་བྱུང་ནའང་། བྱང་ཆུབ་སེམས་གཉིས་ཀྱི་ཐུགས་དམ་རྩལ་དུ་བཏོན་པས་ཆོ་འཕྲུལ་ཐམས་ཅད་རང་ཞིར་གྱུར་ཏེ་འབྱུང་པོ་རྣམས་བྲན་བཞིན་དུ་བཀའ་མཉན། ཉམས་རྟོགས་ཀྱི་ཡོན་ཏན་དབྱར་མཚོ་ལྟར་རྒྱས། གྲུབ་པའི་གྲགས་སྙན་ཆེས་ཆེར་གསལ། དམ་བཅའ་མཐར་ཕྱིན་ནས་སླར་ཡང་ཆོས་རྒྱལ་ཆེན་པོས་སྤྱན་དྲངས། ཐར་རྩེ་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལ་རྗེ་བཙུན་རྡོ་རྗེ་རྣལ་འབྱོར་མའི་སྨིན་གྲོལ་ཆ་ལག་དང་བཅས་པ་རྫོགས་པར་ཆིག་བརྒྱུད་དུ་ཕུལ་བས་ཟབ་དོན་གྱི་ཕྲིན་ལས་སྲིད་མཐར་རྒྱས་པའི་སྨན་ཡོན་དུ་གྱུར། དེས་མཚོན་སྣོད་ལྡན་རྣམས་ལ་སྨིན་གྲོལ་གྱི་གདམས་པ་དཔག་ཏུ་མེད་པས་རྗེས་སུ་བཟུང་། འདི་སྐབས་མགྲིན་པ་ཅུང་ཟད་བསྙུན་ཚུལ་བཞེས་པའི་མནལ་ལམ་དུ་སྐུ་གཅེར་བུ་རུས་རྒྱན་དང་བཅས་གྲུབ་པའི་བརྟུལ་ཞུགས་ལ་སྤྱོད་པའི་མཚན་མ་བྱུང་བ་ནི་སྐུ་ཚེ་ཕྱི་མར་སྔགས་ཀྱི་རྣལ་འབྱོར་པ་ཆེན་པོ་ཞིག་ཏུ་འཁྲུངས་ནས་ས་ལམ་གྱི་ལྷག་མ་ཐམས་ཅད་བགྲོད་ནས་མཆོག་གི་དངོས་གྲུབ་མཐར་ཕྱིན་པའི་བརྡར་མངོན། དེ་བཞིན་གནོད་སྦྱིན་བེག་ཙེ་ཁྱི་དམར་གྱི་གཟུགས་སུ་སྤྲུལ་པ་ལ་ཆིབས་ནས་ནམ་མཁར་འཕུར་བ་སོགས་སྤྱན་ལྟས་ངོ་མཚར་ཅན་མང་དུ་བྱུང་ཚོད་སྣང་ནའང་ཡོན་ཏན་སྦས་པ་ལྟ་བུར་མཛད་པས་ཞིབ་པར་མ་འཚལ། སླར་ཡང་ཆོས་བརྒྱད་ཀྱི་འཆིང་བ་བཙན་ཐབས་སུ་བཅད་ནས་གངས་ཅན་བྲག་དཀར་གྱི་སྒྲུབ་ཕུག་ཏུ་གསང་བའི་ཚུལ་གྱིས་བྱོན། ལྷ་སྔགས་ཡེ་ཤེས་ཀྱི་འཁོར་ལོར་མཉམ་པར་བཞག །སྐུ་ལ་བསྙུན་གྱི་རྣམ་པ་བཞེས་པར་འཚོ་བྱེད་མཁས་པར་གྲགས་པས་ཞག་བདུན་ཙམ་ལས་མི་བཞུགས་པར་ཐག་བཅད་པ་ན། རྗེ་ཉིད་ཀྱི་སྤྱན་ལྟས་དང་བསྟུན་ད་ལན་སྐྱོན་མེད་ཅེས་བཀའ་སྩལ་རུང་། ཞབས་གྲས་སོགས་ནས་བློས་མ་བཟོད་པར་ཐར་རྩེ་མཁན་ཆེན་རྡོ་རྗེ་འཆང་གདན་འདྲེན་ཞུས་པའི་སྟབས་ཀྱིས་ཡང་དབེན་ནས་ཕྱིར་ཕེབས། རྗེ་རྡོ་རྗེ་འཆང་དང་ཞལ་འཛོམ་གནང་། རྐྱེན་སེལ་གཙོ་བོར་གྱུར་པའི་དབང་བཀའི་རིགས་གསན་བཞེས་མཛད་པས་སྔོན་ཆད་བྱད་གཏད་ཀྱི་མཚན་ལྟས་མང་དུ་བྱུང་བ་ཀུན་དེ་ནས་བཟུང་སྟེ་མིང་ཙམ་ཡང་མ་བྱུང་གསུངས། དེ་ཚེ་སྦྱིན་བདག་དད་པ་ཅན་གྱིས་བསྙུན་འདྲིའི་མཚམས་ཞུ་གནང་བར། ད་ལྟ་བདག་ལ་འཆི་ལྟས་སོགས་ཆེར་མ་བྱུང་། སླར་དོགས་ཆ་ཆེ་བར་བྱུང་ཚེ་གསུང་འཕྲོས་གནང་ཆོག་ཚུལ་བཀའ་ཕེབས་པ་ལྟར། རེ་ཞིག་གི་ཚེ་སྙིགས་མའི་དུས་ཀྱི་སྤྱོད་པ་ལའང་ཅུང་ཟད་ཐུགས་སུན་པ་དང་། གཙོ་ཆེར་ཞིང་ཁམས་གཞན་དུ་འགྲོ་དོན་ཆེ་བར་དགོངས་ཏེ། དགུན་འབྲིང་མགོ་ཟླའི་དཀར་ཕྱོགས་ཀྱི་ཚེས་གསུམ་ལ། མ་འོངས་པ་ན་ཡར་ཀླུང་མཆོག་སྤྲུལ་རིན་པོ་ཆེ་འདིར་བྱོན་པའི་སྐལ་པ་ཡོད་པས་དེ་ལ་དངུལ་བུམ་བཟང་བ་ཆ་འདི་ཕུལ་ཞེས་ཕྱི་མཐའ་གཟིགས་པའི་ལུང་བསྟན་གྱི་རིགས་དང་། ས་དབང་ཆོས་རྒྱལ་ཆེན་པོར་དུང་དཀར་གཡས་འཁྱིལ་གྱིས་གཙོས་པའི་ཚན་གྲངས་ཤིག་ཕུལ་ནས་འོག་མིན་དག་པའི་ཞིང་དུ་མཇལ་ཞེས་བཀའི་སྤྲིང་ཡིག་གནང་བས་མཚོན། འཆི་འཕོ་དང་སྐྱེ་བ་མཁྱེན་པའི་སྟོབས་ལ་དབང་འབྱོར་བཞིན་པས། བླ་ཆེན་དང་སྦྱིན་བདག་རྣམས་ལའང་འབུལ་མཚོན། གནང་སྦྱིན། འདི་ཕྱིར་ཕན་པའི་བསླབ་བྱ་སོགས་ཤིན་ཏུ་ཞིབ་པར་སྩལ་ཏེ། ཟླ་བ་དེའི་ཚེས་བདུན་གྱི་ཉི་ཤར་གྱི་དུས་ལ་བབས་པ་ན། ཐུགས་དམ་ཆགས་མེད་ཀྱི་རིམ་པ་རྣམས་སྔར་རྒྱུན་ལྟར་གྲུབ་པར་མཛད་ནས། བཞུགས་གདན་འདི་ཕར་སྤོས་ཤིག་ཅེས་བཀའ་གནང་བ་ལྟར་བསྒྲུབས་པ་ལ་ཞབས་སྐྱིལ་ཀྲུང་དུ་བཞུགས། སྐུ་དྲང་པོར་བསྲངས། དྲན་པ་མངོན་དུ་མཛད་དེ་མཁའ་ཁྱབ་ཀྱི་ཏིང་ངེ་འཛིན་ལ་སྙོམས་པར་ཞུགས། དེའི་ཚེ་ནང་དུ་བདེ་སྟོང་མཆོག་གི་ཏིང་ངེ་འཛིན་བརྙེས་པའི་བརྡར་ཚེས་བརྒྱད་ཀྱི་ཉིན་ཡང་སྐུ་གདུང་ཚ་དྲོད་དང་ལྡན་ཅིང་སྒྲུབ་ཁང་ལ་འཇའ་དཀར་པོ་མདུང་ཚུགས་སུ་ཟུག །ཞག་གསུམ་བར་དུ་འཁྱག་རོམ་རྣམས་ཆུར་ཞུ། སྐུ་གདུང་ཇེ་ཆུང་ལ་སོང་བ་བཅས་སོ་སྐྱེ་ཀུན་གྱི་མཐུན་སྣང་དུ་ཆུབ་པས་མཚོན་རྟགས་དང་ཆོ་འཕྲུལ་མངོན་པར་འདུ་མཛད་དེ་ཞག་བདུན་གྱི་བར་འོད་གསལ་དུ་བཞུགས་རྗེས་མཁའ་སྤྱོད་རྡོ་རྗེ་བཙུན་མོའི་གྲོང་ཁྱེར་དུ་གཤེགས་པར་གྱུར་ཏེ། དེ་ནས་ཐུགས་དམ་ལས་གྲོལ་བའི་རྟགས་གསལ་བར་བྱུང་ནས། རྡོ་རྗེ་འཛིན་དབང་དཔལ་ལྡན་ཕྲིན་ལས་དང་། སྒྲུབ་སྡེའི་སློབ་དཔོན་ངག་དབང་བཟང་པོས་སྐུ་གདུང་ཆས་ཞུགས་གནང་ཞིང་། བཅོམ་ལྡན་འདས་ཐམས་ཅད་རིག་པའི་སྒོ་ནས་ཞུགས་འབུལ་མཛད་པས་དབུ་ཐོད་རིལ་པོར་བྱོན་ནའང་ལས་བྱེད་རྣམས་རྒྱུས་མེད་པས་སླར་ཞུགས་སུ་སྦྱངས་པར་གྲགས་ལ། ཞག་བདུན་གྱི་མཚམས་སྤུར་ཁང་ཞལ་དབྱེ་བས་གདུང་རུས་ལ་རིང་བསྲེལ་གྱི་ཚོགས་དང་། ཤེལ་ལྟར་དྭངས་ཤིང་བཻ་ཌཱུཪྻ་མཐོན་ཀའི་མདོག་ལྟར་སྔོ་བའི་གདུང་གི་ཆ་ཤས་ངོ་མཚར་བའང་བྱོན། ཞལ་སློབ་རྣམས་ནས་དཔལ་ཀྱེ་རྡོ་རྗེའི་སྒྲུབ་མཆོད་སོགས་ཐུགས་དགོངས་རྫོགས་པའི་ཐབས་ལྷུར་བཞེས་ཤིང་། ཁྱད་པར་ཆོས་རྒྱལ་ཆེན་པོས་གདུང་རྟེན་རིན་ཆེན་གཉིས་པ་ལས་གྲུབ་པའི་ཐོག་ཚད་དང་། སྒྲུབ་སྡེར་ལོ་བསྟར་དཔལ་ཀྱེ་རྡོ་རྗེའི་སྒྲུབ་མཆོད་ཉིན་བདུན། རབ་གནས་ཉིན་གསུམ་བཅས་ཀྱི་ཆ་རྐྱེན་སྦྱར་བ་སོགས་མཆོད་སྤྲིན་རྒྱ་ཆེར་སྤྲོས་སོ། །གསུང་ལས་སྐྱེས་པའི་ཞལ་སློབ་ཀྱང་། ཐར་རྩེ་རྡོ་རྗེ་འཆང་བྱམས་པ་ཀུན་དགའ་བསྟན་འཛིན། ས་དབང་བླ་ཆེན་བྱམས་པ་ཀུན་དགའ་སངས་རྒྱས་བསྟན་པའི་རྒྱལ་མཚན། མཁས་དབང་ཀུན་དགའ་དོན་གྲུབ། རྣམ་འདྲེན་བླ་མ་དཔལ་ལྡན་ཕྲིན་ལས་དང་། དགེ་འདུན་རྒྱ་མཚོ། གྲྭ་སྒང་སློབ་དཔོན་ངག་དབང་བཟང་པོ་དང་། མཚུངས་བྲལ་ཆོས་ཀྱི་སྤྱན་མངའ་ཀུན་དགའ་དཔལ་ལྡན་སོགས་མཐའ་ཡས་པས་བཤད་སྒྲུབ་ལས་གསུམ་གྱིས་བླ་མ་དམ་པའི་ཕྲིན་ལས་རྒྱས་པར་མཛད་དོ།། །། ༈

[edit]

rje de nyid kyi thugs sras grub pa'i dbang phyug ngag dbang rin chen ni/ rje de nyid kyi thugs sras grub pa'i dbang phyug ngag dbang rin chen ni/__bod chen sde dge'i mnga' 'og byang 'brog gi sa'i cha yid lhung zhes yul gyi dge mtshan tshang ba der/__yab dpa' rtsal ge sar la 'gran bzod cing /__sku lha ge mdzo gnyan po'i sras su grags pa lha mi dar rgyas dang /__yum sog mo'i sras su me sprel dbyar zla dang po'i tshes gcig la sku 'khrungs/__chung ngu nas chos la mos pa'i bag chags sad/__dgung lo bco lnga par phyogs de'i ngor lugs kyi dgon sde lha rgyal srang srid gsum dge legs yongs 'dus su phebs/__mtshungs bral chos rje bla ma rin po che'i zhabs phyir gcar bzhugs ngos bslab gnyer la brtson par mdzad/__dgung lo nyer lnga par dbus gtsang du phebs/__ngor e wa~M chos ldan gyi chos grar mkhas grub chen po ngag dbang dam chos las sdom pa gsum gyi bka' drin gsan pa nas bzung bslab bya la gces spras su mdzad cing /__dpal kye rdo rje'i lam dus kyi rnal 'byor chags med kyi nyams gzhes gnang /__gzhan yang sa ngor gyi dam pa rnams las chos 'brel ci rigs pa gsan/__phyir phebs 'phral dben pa'i ri khrod du zab mo'i nyams bzhes la brtson par dgongs na'ang /__re zhig chos rje bla ma'i zhabs 'gyur dang /__de rjes yab kyis sku dbang btsan pos lhun grub steng gi chos grwar 'byon dgos byung /__slar mi ring bar dben gnas drwa ma sgang du grub chen kun dga' blo ldan pa'i zhabs pad mnyes pa gsum gyis bsten/__gsung ngag rin po che tshogs bshad kyi khrid yig 'jam pa'i dbyangs dkon mchog lhun grub kyis mdzad pa'i mdzes rgyan rnam gnyis thugs su chud pa dang bstun zhib bshad kyis mtshon smin grol gyi gdams pa mang du gsan/__gzhan yang thar rtse rdo rje 'chang byams pa nam mkha' 'chi med dang/__mthu stobs kyi dbang phyug ngag dbang chos 'byor sogs las kyang dbang khrid man ngag ci rigs pa bzhes/__gtso bor dben gnas de nyid du thog mar re gur la brten cing /__phyis tshe mdo'i sgrub khang du bzhugs nas/__sha chang sha gos sogs sdig zas dang log 'tsho'i tshogs ring du bsrings/__gzhi 'dul ba'i kun spyod shin tu dag pa la gnas nas dpal kye rdo rje gtso bor gyur pa'i lam zab mo'i rnal 'byor la brtson pa drag po lhur bzhes pas gegs skyon rnams grol/__nyams rtogs kyi yon tan sgo du ma 'khrungs/__zhag 'gar ting nge 'dzin gyi ngang du 'byams pa byung /__de skabs shig rang yul du phebs nas lha rgyal srang gi dgon sder chos rje rgan pos spyan drangs shing gtsug gi nor bur bkur/__rigs gsum spyi dang /__gdugs dkar gyi dbang /__dpal gur gyi mgon po'i dbang rjes lung khrid sogs zab chos kyi bdud rtsi stsal/__'di dus mkhas dbang bla ma kun dga' dpal ldan kyang thog mar rjes su bzung zhing /__rmi lam gyi rtags mtshan dge bas slar thugs kyi sras su 'gyur ba'i rten 'brel 'grigs/__bka' chos stsal skabs chos srung dgyes pa'i mtshan mar dar lcog gi rtse nas me lce 'bar ba dang /__sho rong rdo rje rtse rgyal gyi bla mtsho nas nor bu dbyig tu grags pa'i rdo gter dang /__yul lha ge mdzo gnyen po'i mdun nas thub dbang gi sku klu 'jim las grub pa sogs rdzas gter gyi rnam pa'ang phyag tu son/__de nas dpal sa'i tshangs pa sde dge chos rgyal chen po rigs ldan tshe dbang rdo rjes dbu'i mchod gnas su bzhes shing /__mchod yon gnyis ka dbus gtsang du chibs bskyod gnang /__jo shAka rnam gnyis kyis gtsos pa'i rten gsum rnams la phyag mchod bsnyen bkur dpag med mdzad/__khyad par snyan brgyud bstan pa'i 'byung gnas yar klung bkra shis chos sder gnas gsar dbon rin po che'i mchog sprul nam mkha' legs pa lhun grub dang mjal/__gsung ngag rin po che slob bshad kyi smin grol cha lag dang bcas pa rdzogs par gsan pas snyan brgyud bzhi'i rten 'brel rang shugs la 'grigs/__rje de nyid kyis grub pa'i dbang phyug spro lung pa bsod nams chos 'phel gyi rnam 'phrul du lung bstan pas mtshon te/__dpal sa skya pa kun dga' snying po/__bdag chen rdo rje 'chang blo gros rgyal mtshan/__grub pa'i dbang po thang stong rgyal po sogs kyi sprul par grags pa'i yi ges mdzes/__ngor e wa~M chos ldan du thar rtse rdo rje 'chang byams pa kun dga' bstan 'dzin las kyang zab chos kyi bdud rtsi ji snyed pa dang/__dpal sa skyar gangs can bstan pa'i bdag po 'jam mgon kun dga' bkra shis mched zhal rnams nas kyang dgyes pa chen pos rjes su bzung /__dbang lung man ngag ci rigs pa gsan/__lhag par khyab bdag rdo rje btsun mo'i rnam 'phrul rje btsun rin po che mkha' spyod dbang mo 'chi med bstan pa'i nyi ma las grub chen nA ro tA pa'i thugs bcud rje btsun rdo rje rnal 'byor ma'i smin grol cha lag dang bcas pa nyams khrid du gsan/__de skabs rje btsun rin po che nyid sku na smin pas spyan cung zad mi gsal ba'i tshul ston kyang/__rje 'di la bka' chos stsal ba nas spyan je gsal du song bas snod ldan gyi slob ma'i mchog tu bsngags shing thugs yid gcig 'dres su gyur/__byin rlabs gnang ba'i tshe nang mchod kyi bdud rtsi sbu ba dang bcas khol ba'i rgyun las rje 'di nyid kyis yang yang bzhes pas bde stong gi ting nge 'dzin khyad par can thugs rgyud la 'khrungs pas mtshon bla slob gnyis kas grub pa'i rtags mtshan mngon sum du snang bar mdzad/__slar yang mchod yon phebs lam bde bar rgyal khab chen por zhabs pad bkod cing dbu bla sngar rgyun ltar gnang /__lugs gnyis kyi mnga' thang lhag par 'phel/__thog mar mkhan chen rdo rje 'chang sangs rgyas phun tshogs mya ngan las 'das pa'i skabs gdung rus kyi sA ts+tsha rnams phyogs der 'jog dgos par bkas gnang nas ma 'ongs pa na sgrub grwa 'byung bar don gyis lung bstan/__bar du grub chen kun dga' blo ldan gyis sgrub pa'i rgyal mtshan bzung zhing snod ldan gyi slob ma'ang ci rigs par 'dus/__mthar dam pa 'di nyid kyis mnal lam gyi rtags mtshan dge ba la brten nas sa dbang chos rgyal chen por snyan bskul zhus pa bzhin dgyes pa chen pos zhal gyis bzhes te/__lo gsum gyi khongs su dben ri grwa ma sgang gi sgrub sde slob bshad smin grol rab 'phel gling gi rten dang brten par bcas pa gegs med du grub/__phyi nyan thos 'dul ba'i kun spyod shin tu dag pa lhur len cing /__nang du dpal kye rdo rje'i rim gnyis kyi rnal 'byor la nyams bzhes rtse gcig tu mdzad pa'i spong ba pa nyi shu rtsa bdun la chos kyi rgyal pos 'tsho ba bla nas sbyar/__rje 'dis gsung ngag rin po che slob bshad gtso bor gyur pa'i smin grol gdams zab lhug par stsal te zab don snying po'i bstan pa nyin mo ltar mdzad/__de skabs sgrub grwa'i mchod thebs bstan dgra gzur bas bcom pa la/__dpal rdo rje nag po chen po zhal bzhi pa'i sgo nas las sbyor mdzad pas 'phral du rtags mtshan thon cing /__sa dbang chen pos kyang gtang rag gi tshul du sgrub dus kyi mgon po'i sku rin chen gnyis pa las grub pa'i ngo mtshar can bzhengs par gnang /__de nas sngar rje btsun rin po che 'chi med bstan pa'i nyi ma'i spyan sngar dam bcas mdzad pa bzhin dben ri grwa ma sgang du byon/__sngon chad sus kyang mthong thos su ma byung zhing /__phal gyis shin tu bgrod dka' ba'i yang dben/__gangs can brag dkar du grags pa'i sked par thogs med du byon nas rje nyid gcig pur zla ba bco lnga'i bar rdo rje rnal 'byor ma'i lam zab mo la rtse gcig tu gzhol bas/__dang por gnas bdag gi cho 'phrul dang slong tshad ci rigs pa byung na'ang /__byang chub sems gnyis kyi thugs dam rtsal du bton pas cho 'phrul thams cad rang zhir gyur te 'byung po rnams bran bzhin du bka' mnyan/__nyams rtogs kyi yon tan dbyar mtsho ltar rgyas/__grub pa'i grags snyan ches cher gsal/__dam bca' mthar phyin nas slar yang chos rgyal chen pos spyan drangs/__thar rtse rdo rje 'chang byams pa kun dga' bstan 'dzin la rje btsun rdo rje rnal 'byor ma'i smin grol cha lag dang bcas pa rdzogs par chig brgyud du phul bas zab don gyi phrin las srid mthar rgyas pa'i sman yon du gyur/__des mtshon snod ldan rnams la smin grol gyi gdams pa dpag tu med pas rjes su bzung /__'di skabs mgrin pa cung zad bsnyun tshul bzhes pa'i mnal lam du sku gcer bu rus rgyan dang bcas grub pa'i brtul zhugs la spyod pa'i mtshan ma byung ba ni sku tshe phyi mar sngags kyi rnal 'byor pa chen po zhig tu 'khrungs nas sa lam gyi lhag ma thams cad bgrod nas mchog gi dngos grub mthar phyin pa'i brdar mngon/__de bzhin gnod sbyin beg tse khyi dmar gyi gzugs su sprul pa la chibs nas nam mkhar 'phur ba sogs spyan ltas ngo mtshar can mang du byung tshod snang na'ang yon tan sbas pa lta bur mdzad pas zhib par ma 'tshal/__slar yang chos brgyad kyi 'ching ba btsan thabs su bcad nas gangs can brag dkar gyi sgrub phug tu gsang ba'i tshul gyis byon/__lha sngags ye shes kyi 'khor lor mnyam par bzhag__/sku la bsnyun gyi rnam pa bzhes par 'tsho byed mkhas par grags pas zhag bdun tsam las mi bzhugs par thag bcad pa na/__rje nyid kyi spyan ltas dang bstun da lan skyon med ces bka' stsal rung /__zhabs gras sogs nas blos ma bzod par thar rtse mkhan chen rdo rje 'chang gdan 'dren zhus pa'i stabs kyis yang dben nas phyir phebs/__rje rdo rje 'chang dang zhal 'dzom gnang /__rkyen sel gtso bor gyur pa'i dbang bka'i rigs gsan bzhes mdzad pas sngon chad byad gtad kyi mtshan ltas mang du byung ba kun de nas bzung ste ming tsam yang ma byung gsungs/__de tshe sbyin bdag dad pa can gyis bsnyun 'dri'i mtshams zhu gnang bar/__da lta bdag la 'chi ltas sogs cher ma byung /__slar dogs cha che bar byung tshe gsung 'phros gnang chog tshul bka' phebs pa ltar/__re zhig gi tshe snyigs ma'i dus kyi spyod pa la'ang cung zad thugs sun pa dang /__gtso cher zhing khams gzhan du 'gro don che bar dgongs te/__dgun 'bring mgo zla'i dkar phyogs kyi tshes gsum la/__ma 'ongs pa na yar klung mchog sprul rin po che 'dir byon pa'i skal pa yod pas de la dngul bum bzang ba cha 'di phul zhes phyi mtha' gzigs pa'i lung bstan gyi rigs dang /__sa dbang chos rgyal chen por dung dkar g.yas 'khyil gyis gtsos pa'i tshan grangs shig phul nas 'og min dag pa'i zhing du mjal zhes bka'i spring yig gnang bas mtshon/__'chi 'pho dang skye ba mkhyen pa'i stobs la dbang 'byor bzhin pas/__bla chen dang sbyin bdag rnams la'ang 'bul mtshon/__gnang sbyin/__'di phyir phan pa'i bslab bya sogs shin tu zhib par stsal te/__zla ba de'i tshes bdun gyi nyi shar gyi dus la babs pa na/__thugs dam chags med kyi rim pa rnams sngar rgyun ltar grub par mdzad nas/__bzhugs gdan 'di phar spos shig ces bka' gnang ba ltar bsgrubs pa la zhabs skyil krung du bzhugs/__sku drang por bsrangs/__dran pa mngon du mdzad de mkha' khyab kyi ting nge 'dzin la snyoms par zhugs/__de'i tshe nang du bde stong mchog gi ting nge 'dzin brnyes pa'i brdar tshes brgyad kyi nyin yang sku gdung tsha drod dang ldan cing sgrub khang la 'ja' dkar po mdung tshugs su zug__/zhag gsum bar du 'khyag rom rnams chur zhu/__sku gdung je chung la song ba bcas so skye kun gyi mthun snang du chub pas mtshon rtags dang cho 'phrul mngon par 'du mdzad de zhag bdun gyi bar 'od gsal du bzhugs rjes mkha' spyod rdo rje btsun mo'i grong khyer du gshegs par gyur te/__de nas thugs dam las grol ba'i rtags gsal bar byung nas/__rdo rje 'dzin dbang dpal ldan phrin las dang /__sgrub sde'i slob dpon ngag dbang bzang pos sku gdung chas zhugs gnang zhing /__bcom ldan 'das thams cad rig pa'i sgo nas zhugs 'bul mdzad pas dbu thod ril por byon na'ang las byed rnams rgyus med pas slar zhugs su sbyangs par grags la/__zhag bdun gyi mtshams spur khang zhal dbye bas gdung rus la ring bsrel gyi tshogs dang /__shel ltar dwangs shing bai DUR+Ya mthon ka'i mdog ltar sngo ba'i gdung gi cha shas ngo mtshar ba'ang byon/__zhal slob rnams nas dpal kye rdo rje'i sgrub mchod sogs thugs dgongs rdzogs pa'i thabs lhur bzhes shing /__khyad par chos rgyal chen pos gdung rten rin chen gnyis pa las grub pa'i thog tshad dang /__sgrub sder lo bstar dpal kye rdo rje'i sgrub mchod nyin bdun/__rab gnas nyin gsum bcas kyi cha rkyen sbyar ba sogs mchod sprin rgya cher spros so/__/gsung las skyes pa'i zhal slob kyang /__thar rtse rdo rje 'chang byams pa kun dga' bstan 'dzin/__sa dbang bla chen byams pa kun dga' sangs rgyas bstan pa'i rgyal mtshan/__mkhas dbang kun dga' don grub/__rnam 'dren bla ma dpal ldan phrin las dang /__dge 'dun rgya mtsho/__grwa sgang slob dpon ngag dbang bzang po dang /__mtshungs bral chos kyi spyan mnga' kun dga' dpal ldan sogs mtha' yas pas bshad sgrub las gsum gyis bla ma dam pa'i phrin las rgyas par mdzad do//____//_!_