JKW-KABUM-19-DZA-001-004

🚧 This website is under continued development. We appreciate your patience!

Previous Text Back to Volume PageNext Text

ལོ་རྒྱུས་དང་དཀའ་གནད་ལུང་བཏུས་ཚན་མང་སྦྲེལ་བ།

Wylie title	lo rgyus dang dka' gnad lung btus tshan mang sbrel ba
Location	mkhyen brtse'i bka' 'bum Volume 19, sde tshan 1, Text 4, Pages 43-61 (Folios 22a5 to 31a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. lo rgyus dang dka' gnad lung btus tshan mang sbrel ba. In 'jam dbyangs mkhyen brtse'i dbang po'i bka' 'bum, Vol. 19: 43-61. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

4 43-61	ལོ་རྒྱུས་དང་དཀའ་གནད་ལུང་བཏུས་ཚན་མང་སྦྲེལ་བ། lo rgyus dang dka' gnad lung btus tshan mang sbrel ba History Texts - lo rgyus   ·   Collections of Scriptural Citations - lung btus	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྒྱལ་དབང་ལྔ་པ་ལ། ནུབ་ཕྱོགས་མཆོག་ཏུ་དགེ་བའི་ཞིང་གི་རྒྱལ་དབང་ས་སྟེང་གི་རྒྱལ་བསྟན་ཡོངས་ཀྱི་བདག་པོ་ཐམས་ཅད་མཁྱེན་པ་ཏ་ལའི་བླ་མ་བཛྲ་དྷཱ་ར། ཞེས་པའི་འཇའ་ས་དང་ཤེལ་ཐམ་ཕུལ། གོང་མ་གཡུང་ཊིང་གིས་ཕོ་བྲང་དུ་དགའ་ལྡན་སྲིད་ཆགས་གླིང་ཞེས་པའི་ཆོས་སྡེ་གསར་དུ་བཙུགས། མདོ་སྔགས་རིག་གནས་ཀྱི་གྲ་ཚང་ཁག་རྣམས་ཡོད། ཞེའུ་ཧོའུ་ཞེས་པའི་ས་ཆར་ཡང་གཙུག་ལག་ཁང་དང་གྲྭ་ཚང་ཁག་མང་པོ་བཙུགས།། །། ༈

པཎ་ཆེན་བློ་བཟང་ཆོས་རྒྱན་གྱི་ཕྱག་ཆེན་གྱི་འགྲེལ་པར། ལྷན་ཅིག་དྭགས་པོ། སྐྱེས་སྦྱོར་ནི། སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །རྣམ་རྟོག་ལྷན་ཅིག་སྐྱེས་པ་ཆོས་སྐུའི་རླབས། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། །སྣང་སེམས་དབྱེར་མེད་ལྷན་ཅིག་སྐྱེས་པའོ། །ཞེས་པའི་དོན། མོས་གུས་དང་། ཞེན་ལོག་གཙོ་བོར་བྱས་པའི་ངོས་ནས་སྔོན་འགྲོ་སྦྱོར་བ་བཞི་ལྡན། དངོས་གཞི་ངོ་སྤྲོད་རྣམ་གཉིས། ཞི་ལྷག །རྗེས་ཉམས་མྱོང་སྣང་ཐོག་ཏུ་སྐྱོང་བ་གསུམ་གྱིས་འཆད། གའུ་མ་ནི་ཁྱུང་པོའི་བཀའ་སྲོལ་ཏེ། སྔོན་འགྲོ་རང་བབས་རྣམ་གསུམ། དངོས་གཞི་སྐྱོན་བཞི་རང་གྲོལ། འབྲས་བུ་སྐུ་གསུམ་རང་ཤར་གྱི་སྒོ་ནས་སྟོན་ཞིང་། དངོས་གཞི་ལ་རྐུན་པོའི་ངོ་སྤྲོད་ཅེས་གསུངས་སོ། །ནི་གུ་ཆོས་དྲུག་ནི། གཏུམ་མོ་ལམ་གྱི་རྨང་རྡོ། སྒྱུ་ལུས་ཆགས་སྡང་རང་གྲོལ། རྨི་ལམ་ཉིང་འཁྲུལ་རང་སངས། འོད་གསལ་མ་རིག་མུན་སེལ། འཕོ་བ་མ་བསྒོམ་སངས་རྒྱས། བར་དོ་རྒྱལ་བ་ལོངས་སྐུ་ཞེས་པ་སྟེ། གྭའུ་མའི་གཙོ་བོ་ཡང་ཆོས་དྲུག་གི་འོད་གསལ་བསྒོམ་ཚུལ་ལོ། །ཆོས་རྗེ་རྒྱ་རས་པ་ནས་བརྒྱུད་པ་རྣམས་ཁྲིད་ཆེན། རོ་སྙོམས་སྐོར༦། རི་ཆོས་ཐུགས་ཉམས་སུ་ལེན་ཞིང་། དེ་ཡང་བླ་མ་སྐུ་གསུམ་གྱི། བྱམས་སྙིང་རྗེའི། རྒྱུ་འབྲས་རྟེན་འབྲེལ་གྱི། ལྔ་ལྡན་བདུད་རྩི་ཐིགས་པའི། ལྷན་ཅིག་སྐྱེས་སྦྱོར་གྱི། ནཱ་རོ་ཆོས་དྲུག་གི། ཆོས་བརྒྱད་མགོ་སྙོམས་ཀྱི། གསང་སྤྱོད་བཟློག་བསྒོམ་གྱི་ཁྲིད་རྣམས་སོ། །རྣམ་རྟོག །ཉོན་མོངས། ན་ཚ། ལྷ་འདྲེ། སྡུག་བསྔལ། འཆི་བ་ལམ་ཁྱེར། རི་ཆོས་ལ་ཟབ་ཆོས་རྒྱན་བཞི་ཞེས། རི་ཆོས་ཡོན་ཏན་ཀུན་འབྱུང་། གསང་བ་དབང་གི་གྲུ་བོ་ཆེ། རྡོ་རྗེ་ལས་ཀྱི་སྦས་བཤད། བར་དོའི་ཁྲིད་དང་བཞི། སྐོར་གསུམ་ཞལ་གདམས་གྱི་རྒྱན་ཞེས། དམར་ཁྲིད་གེགས་སེལ་གྱི་རྒྱན། མགུར་འབུམ་དཀར་ཆག་གི་རྒྱན། སིལ་བུའི་སྡེ་ཚན་ཕྲན་ཚེགས་ཀྱི་རྒྱན་རྣམས་སོ། །ཡི་གེ་བཞི་པ་ནི། ཨ་མ་ན་སེའི་སྒྲ་ལས། དང་པོ་སེམས་ཀྱི་གཞི་རྩ་བཅད། །གཉིས་པ་སེམས་ཀྱི་བཞག་ཐབས་བསྟན། །གསུམ་པ་སེམས་ཀྱི་གོལ་ས་བཅད། །བཞི་པ་སེམས་ཀྱི་ལམ་ཁྱེར་བསྟན་པའོ། །རྫོགས་ཆེན་མན་ངག་ལྟ་བའི་ཕྲེང་བ་སོགས་སློབ་དཔོན་པདྨའི་ཐུགས་ཀྱི་བཅུད་ཕྱུང་བ་རྣམས་དང་ཞེས་སོགས་གསུངས། ། ༈ ཞང་རིན་པོ་ཆེས། ཀུན་གྱི་ས་བོན་རང་སེམས་གནས་ལུགས་ནི། །རྒྱལ་བ་སྲས་བཅས་ཀུན་གྱི་ཐུགས་དང་ནི། །ཡེ་ནས་ཁྱད་མེད་ཡེ་ཤེས་ཆོས་སྐུར་སྣང་། །བེམ་པོར་མ་ཡིན་རང་བཞིན་ངང་གིས་གསལ། །དངོས་པོ་མ་གྲུབ་ཁ་དོག་ཚད་ཀྱིས་སྟོང་། །ཞེས་སོ། །གླིང་གིས། མ་བཅོས་སོ་མར་བཞག་ན་རྟོགས་པ་འཆར། །ཆུ་བོའི་རྒྱུན་བཞིན་བསྐྱངས་ན་ཡོངས་ཀྱང་འཆར། །དམིགས་གཏད་མཚན་མ་ཐམས་ཅད་ཡོངས་སྤངས་ལ། །རྟག་ཏུ་མཉམ་པར་ཞོག་ཅིག་རྣལ་འབྱོར་པ། །ཞེས་སོ། །ཞང་གིས། དེ་ལྟར་བཞག་པའི་ངང་ཉིད་ལས། །རྣམ་རྟོག་ཐོལ་གྱིས་བྱུང་གྱུར་ན། །དེ་ཉིད་འོད་གསལ་ཆོས་སྐུ་ལས། །གཞན་ཞིག་སྙམ་དུ་མ་སེམས་ཤིག །དེ་ཕྱིར་རྣམ་རྟོག་འཕྲོ་བ་དེ། །སྟོང་ཉིད་ལས་ནི་སྟོང་ཉིད་འཕྲོ། །ཆོས་སྐུ་ལས་ནི་ཆོས་སྐུ་འཕྲོ། །ཟུང་འཇུག་ལས་ནི་ཟུང་འཇུག་འཕྲོ། །ཞེས་གསུངས་སོ། ། ༈ འཕགས་པ་ཡབ་སྲས་ཀྱི་བཞེད་པའི་ལྟ་བ་ཕྱག་རྒྱ་ཆེན་པོའི་གོ་དོན་མཐར་ཐུག་པ་ནི་བཏགས་ཡོད་མིང་རྐྱང་ཞེས་པ་འདི་ཡིན་ནོ། ། ༈ འཕགས་པ་ཀླུ་སྒྲུབ་ཀྱིས་དངོས་བསྟན་སྟོང་ཉིད་ཀྱི་རིམ་པ་གཏན་ལ་འབེབས་པ། མདོ་ཀུན་བཏུས་དང་། རིགས་ཚོགས་དྲུག་མཛད། དེ་ལ་འགྲེལ་པ། ཇི་སྐད་དུ། རྒྱན་སྣང་ལས། འཕགས་པ་གསལ་བའི་བློ་མངའ་དེས་ནི་རྒྱལ་ལ་མངོན་སུམ་ཉིད་ཞུས་ནས། ཞེས་པའི་དོན་འཕགས་པ་གྲོལ་སྡེ་དེ་ཤེར་ཕྱིན་གྱི་མདོའི་དོན་ཐེ་ཚོམ་དང་སོམ་ཉི་སྤངས་པའི་ཐེག་ཆེན་འཕགས་པ་གྲོལ་སྡེ། གཉིས་པ་སློབ་དཔོན་སེང་བཟང་དེ་རྩོམ་པའི་རྒྱུ་གསུམ་ཕུན་སུམ་ཚོགས་པ་སྟེ། མན་ངག་རྒྱུན་མ་ཆད་པ་དང་། བསྟན་བཅོས་ཀྱི་དོན་ལ་མཁས་པ་དང་། ཡི་དམ་གྱི་ལྷ་ལ་མངོན་སུམ་དུ་གནང་བ་ཐོབ་པ་སྟེ། དེ་ཡང་མཁན་པོ་རྣམ་སྣང་མཛད་ལ་རྗེ་བཙུན་གྱི་སྒྲུབ་ཐབས་ཞུས་ནས་བསྒྲུབས་པས། ཤར་ཕྱོགས་ཁ་སཪྤཱ་ཎིར་སྤྲིན་གསེབས་ནས་རྗེ་བཙུན་གྱིས་ཞལ་གཟིགས་པར་ཁྱེད་ཀྱི་བསྟན་བཅོས་དེ་ལ་འགྲེལ་པ་དུ་མ་ཞིག་སྣང་བས་གང་གི་རྗེས་སུ་འབྲང་ཞུས་པས། ཐམས་ཅད་ལེགས་པར་རྟོགས་ལ་དོན་འདྲིལ་བའི་འགྲེལ་པ་རྩོམས་ཤིག །ཅེས་གསུང་གི་གནང་བ་ཐོབ་པའི་ཕྱིར། བཤད་བྱ་རྩ་བའི་མདོ་རྒྱས་འབྲིང་བསྡུས་གསུམ་མདོ་སྡུད་པ་དང་བཞི། འཆད་བྱེད་མངོན་པར་རྟོགས་པ་རྒྱན་ནོ། །ཞེས་སོ། །དེ་ཡི་ཉན་ཐོས་ཞི་བ་སོགས་ཀྱི་དོན། གཞི་ཤེས་ཀྱི་ཡོན་ཏན་བརྗོད་པས། ཉེར་ཞིར་འཁྲིད་ཚུལ་འཆད་པ་ལ་རྐང་པ་དང་པོ་གསུངས། ལམ་ཤེས་ཀྱི་དོན་འཆད་ཚུལ་བརྗོད་པས་རིགས་ཅན་གསུམ་གྱི་དོན་བསྒྲུབ་ཚུལ་འཆད་པ་ལ་རྐང་པ་གཉིས་པ་གསུངས། རྣམ་མཁྱེན་གྱི་ཡོན་ཏན་བརྗོད་དེ་ཆོས་འཁོར་བསྐོར་ཚུལ་འཆད་པ་ལ་རྐང་པ་གསུམ་པ་གསུངས། འཕགས་བཞིའི་ཡུམ་བྱེད་ཚུལ་འཆད་པ་ལ་བཞི་པ་གསུངས་སོ། །དོན་ནི། རྗེ་བཙུན་གྱིས་རྩོམ་པའི་ཐོག་མར་མཁྱེན་གསུམ་ལ་བསྟོད་ཕྱག་མཛད་དེ། རྟེན་གྱི་གང་ཟག་ཉན་ཐོས་དང་། རང་སངས་རྒྱས་སྡུག་ཀུན་ཉེ་བར་ཞི་བ་འཚོལ་བ་རྣམས་ཕུང་ཁམས་སྐྱེ་མཆེད་ཀུན་གང་ཟག་གི་བདག་མེད་པར་ཤེས་པ་ཉིད་ཀྱིས་འབྲས་བུ་ལྷག་མ་ཡོད་མེད་ཉེར་ཞིར་འཁྲིད་མཛད་གང་ཡིན་པ་དེ་ལ་འདུད་པའི་ཕྱིར་དང་། རྟེན་གྱི་གང་ཟག་འགྲོ་ལ་ཕན་པར་བྱེད་པའི་བྱང་སེམས་ལམ་ཤེས་ཉིད་ཀྱི་འབྲས་བུ་འཇིག་རྟེན་གསུམ་གྱི་དོན་སྒྲུབ་པར་མཛད་པ་གང་ཡིན་པ་དང་། ཐུབ་པ་སངས་རྒྱས་བཅོམ་ལྡན་འདས་རྣམས་ཐབས་གང་དང་ཡང་དག་པར་ལྡན་པས། བརྗོད་བྱ་རྣམ་པ་ཀུན་དང་ལྡན་པའི་རྗོད་བྱེད་སྡེ་སྣོད་སྣ་ཚོགས་པ་འདི་དག་གསུངས་བའི་བདག་རྐྱེན་རྣམ་མཁྱེན་ལ་འདུད་པའི་ཕྱིར། བཤད་བྱ་འཆད་བྱེད་མདོར་བསྟན་པ། འཆད་བྱེད་ཀྱི་རྐང་གྲངས་བཤད་པ་གཉིས། དང་པོ་ནི། ཤེས་རབ་ཕ་རོལ་ཕྱིན་པ་ནི། །ཞེས་པ་གཉིས་ལ་བསྟན་བཅོས་འདི་ཆོས་ཅན། ཁྱོད་ཀྱི་གཞུང་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱས་འབྲིང་བསྡུས་གསུམ་ནི་ཡང་དག་པ་སྟེ། ཕྱིན་ཅི་མ་ལོག་པར་བཤད་དེ་རྗོད་བྱེད་ལ་སྐབས་བརྒྱད་དང་། བརྗོད་བྱའི་དངོས་པོ་ལ་ཡང་བརྒྱད་དུ་ཕྱེ་བ་ཉིད་ཀྱིས་བཤད་པའི་ཕྱིར། འཆད་བྱེད་གཞུང་ཤེར་ཕྱིན་ལ་སྐབས་བརྒྱད་ཡོད་དེ། རབ་འབྱོར་གྱི་ལེའུས་རྣམ་མཁྱེན། མཐའ་གཉིས་རྣམ་དག་གི་ལེའུས་ལམ་ཤེས། སྤྱོད་པ་ཁྱད་པར་ཅན་གྱི་ལེའུས་གཞི་ཤེས། དེ་བཞིན་ཉིད་ཀྱི་ལེའུས་རྣམ་རྫོགས་སྦྱོར་བ། བསླབ་པ་ཡོངས་སུ་དག་པའི་ལེའུས་རྩེ་སྦྱོར། བསླབ་པ་ལ་རིམ་གྱིས་འཇུག་པའི་ལེའུས་མཐར་གྱིས་སྦྱོར་བ། བསླབ་པ་ཡོངས་སུ་རྫོགས་པའི་ལེའུས་སྐད་ཅིག་སྦྱོར་བ། བསླབ་པའི་འབྲས་བུའི་ལེའུས་ཆོས་སྐུ་འཆད་པའི་ཕྱིར། གཉིས་པ་ལ་མཁྱེན་གསུམ། སྦྱོར་བཞི། ཆོས་སྐུ་གསུམ་ལས། དང་པོ་ནི། རྣམ་ཀུན་མཁྱེན་ཉིད་ལམ་ཤེས་ཉིད། །ཅེས་སོགས་གཉིས་ལ། མཁྱེན་གསུམ་སོ་སོའི་ངོ་བོ་ཡོད་དེ། སེམས་བསྐྱེད་སོགས་ཆོས་བཅུ་དང་། གཞི་གཉེན་རྣམ་པ་ཀུན་མཁྱེན་པའི་མཐར་ཕྱིན་པའི་ཡེ་ཤེས་ཉིད་རྣམ་མཁྱེན་གྱི་ངོ་བོ། ཐབས་ཤེས་ཁྱད་པར་ཅན་གྱིས་ཟིན་པའི་ཐེག་ཆེན་འཕགས་པའི་མངོན་རྟོགས་ལམ་ཤེས་ཀྱི་ངོ་བོ་དང་། ཐེག་དམན་གྱི་མཁྱེན་པའམ། ཐེག་དམན་གྱི་རྟོགས་རིགས་སུ་གནས་པས་རབ་ཏུ་ཕྱེ་བའི་འཕགས་རྒྱུད་ཀྱི་མཁྱེན་པ་དེ་ནས་ཐམས་ཅད་ཤེས་པ་ཉིད་ཀྱི་ངོ་བོར་འཇོག་པའི་ཕྱིར། རྣམ་མཁྱེན་གྱི་མཚན་ཉིད་དེ་ལྟར་འཇོག་པ་ནི། ཐོབ་བྱ་རྣམ་མཁྱེན་དེ་བསྟན་པ་ཉིད་ཀྱིས་ལམ་སྤྱིའི་གོ་ཡུལ་བློ་ལ་འཆར་བའི་ཆེད་དུ་ཡིན་ནོ། །རྣམ་མཁྱེན་ལ་དབྱེ་ན། ཇི་ལྟ་ཇི་སྙེད་དང་། ཤེས་བྱའི་རྣམ་པ་མ་ལུས་པ་མཁྱེན་པའི་རྣམ་མཁྱེན་དང་། རྒྱུ་འབྲས་གཙོ་བོའི་དོན་བཅུ་མངོན་སུམ་དུ་རྟོགས་པའི་རྣམ་མཁྱེན་གཉིས། ས་མཚམས་སངས་རྒྱས་ཀྱི་ས་ཁོ་ནའོ། །ལམ་ཤེས་ཀྱི་དབྱེ་བ་ལ་རྟོགས་རིགས་ཀྱི་སྒོ་ནས་གསུམ་དང་། རྒྱུ་ལམ་ཤེས། འབྲས་བུ་ལམ་ཤེས། དམན་ལམ་སྔོན་དུ་སོང་མ་སོང་གི་དབྱེ་བ་དུ་མ་ཡོད། ས་མཚམས་ཐེག་ཆེན་འཕགས་པ་མཐའ་དག་ལའོ། །གཞི་ཤེས་ལ་འཕགས་པ་གསུམ་གྱི་དབྱེ་བས་གསུམ། མི་མཐུན་ཕྱོགས་དང་མཐུན་ཕྱོགས་ཀྱི་དབྱེ་བ་སོགས་ཡོད། ས་མཚམས་འཕགས་པ་ཐམས་ཅད་ལའོ། །གཉིས་པ་སྦྱོར་བཞི་འཆད་པ་ལ། རྣམ་ཀུན་སོགས་གསུངས། སོ་སོའི་ངོ་བོ་ཡོད་དེ། མཁྱེན་གསུམ་གྱི་རྣམ་པ་བསྡུས་ནས་སྒོམ་པར་བྱེད་པའི་ཤེས་རབ་ཀྱིས་ཟིན་པ་སེམས་པའི་མངོན་རྟོགས། རྣམ་ཀུན་མངོན་རྫོགས་རྟོགས་པའི་སྦྱོར་བའི་ངོ་བོ་དང་། སྟོང་ཉིད་དམིགས་པའི་སྒོམ་བྱུང་གི་ཤེས་རབ་ཀྱིས་ཟིན་པའི་སྒོ་ནས་མཁྱེན་གསུམ་བསྡུས་ཏེ་བསྒོམ་པ། ཐེག་ཆེན་ཚོགས་ལམ་ལས་རབ་ཏུ་གྱུར་པའི་རྣལ་འབྱོར་རྩེ་སྦྱོར་གྱི་ངོ་བོ་དང་། མཁྱེན་གསུམ་གྱི་རྣམ་པ་ལ་བརྟེན་པ་ཐོབ་ཕྱིར་དུ་མཁྱེན་གསུམ་གྱི་རྣམ་པ་རིམ་ཅན་དུ་བསྒོམས་པའི་ཤེས་རབ་ཀྱིས་ཟིན་པའི་སེམས་པའི་རྣལ་འབྱོར་མཐར་གྱིས་པའི་སྦྱོར་བའི་ངོ་བོ་དང་། རང་གི་ཉེར་ལེན་དུ་གྱུར་པའི་མཐར་གྱིས་སྦྱོར་བའི་སྟོབས་ལས་བྱུང་བའི་སེམས་པའི་རྣལ་འབྱོར་མཐར་ཐུག་སྐད་ཅིག་མ་གཅིག་གིས་མངོན་པར་རྫོགས་པར་བྱང་ཆུབ་ཀྱི་སྦྱོར་བའི་ངོ་བོ་ཡིན་པའི་ཕྱིར། དབྱེ་ན་རྣམ་པ་བརྒྱ་བདུན་ཅུ་རྩ་གསུམ་བསྒོམས་པའི་སེམས་པའི་རྣལ་འབྱོར་བརྒྱ་དོན་གསུམ་ཡོད། གཉིས་པའི་ས་མཚམས། ཐེག་ཆེན་གྱི་སྦྱོར་ལམ་དྲོད་ནས་རྒྱུན་མཐའི་བར་དང་། རྒྱས་པར་དབྱེ་ན་བརྒྱ་དོན་གསུམ། བསྡུ་ན་བཞི་ཡོད། གསུམ་པའི་ས་མཚམས། ཐེག་ཆེན་ཚོགས་ལམ་ནས་རྒྱུན་མཐའི་སྔ་ལོགས་ན་དང་། དབྱེ་ན་བཅུ་གསུམ། བཞི་པའི་ས་མཚམས་རྒྱུན་མཐའ་ཁོ་ན་དང་། དབྱེ་ན་བཞི་ཡོད་དོ། །གསུམ་པ་ཆོས་སྐུ་འཆད་པ་ལ། ཆོས་སྐུ་དང་། ཞེས་པས། འབྲས་བུ་ཆོས་སྐུའི་ངོ་བོ་ཡོད་དེ། རང་ཐོབ་བྱེད་ཀྱི་ཐབས་སུ་གྱུར་པའི་མཁྱེན་གསུམ་གྱི་རྣམ་པ་བསྒོམ་སྟོབས་ཀྱིས་ཐོབ་པའི་ཡོན་ཏན་མཐར་ཐུག་པ་དེ་ཡིན་པའི་ཕྱིར། དབྱེ་ན་བཞི། ས་མཚམས་སངས་རྒྱས་ཀྱི་སའོ། །དེ་རྣམས་ཀྱི་གྲངས་བསྡུ་བ་ལ། དེ་རྣམ་བརྒྱད། ཅེས་གསུངས་སོ། ། ༈ རྡོ་རྗེ་འཛིན་པ་གྲགས་རྒྱལ་གྱིས། ཚེ་འདི་ལ་སོགས་ཀྱིས། རྣམ་བཅད་ལ་བཟློག་ཕྱོགས་བཞི་དངོས་སུ་བསྟན་ནས། ཡོངས་གཅོད་ལ་བསྒྲུབ་ཕྱོགས་གཉེན་པོ་བཞི་ཤུགས་ཀྱིས་བསྟན་ཏོ། ། ༈ འཕགས་པའི་སྐྱེ་བོ་རྣམས་ཀྱི་མཛད་པ་སོ་སོ་སྐྱེ་བོ་རྣམས་ཀྱི་ཡུལ་ལས་འདས་ཤིང་ཆོས་དང་། སྐྱེས་བུ་དམ་པ་ལ་བརྟེན་པའི་སྡིག་པ་ཤིན་ཏུ་མི་བཟད་པས་ཕྱོགས་འཛིན་གྱི་སྡང་ཞུགས་དོར་ནས་དག་སྣང་ནོར་བུའི་འོད་ཀྱིས་ཁྱབ་པར་མཛད་དུ་གསོལ་ཞེས་ཆོས་ཀྱི་རྒྱལ་མཚན་གསོལ་བ་འདེབས་སོ། །ཞེས་སྣང་། ། ༈ སྒྱུ་ལུས་འོད་གསལ་གཉིས་འདུས་པ། འཕོ་བ་གྲོང་འཇུག་གཉིས་གདན་བཞི་དང་ཁ་སྦྱོར། གཏུམ་མོ་དགྱེས་རྡོར་ལ་བརྟེན་ནོ། ། ༈ གྲུབ་ཐོབ་མི་ཏྲ་ཛོ་ཀིའི་གདམས་པ་སྙིང་པོ་དོན་གསུམ་ལ། ཚེ་འདིའི་ཉམས་ལེན་བསྐྱེད་རྫོགས། འཆི་བའི་ཉམས་ལེན་འཕོ་བ། བར་དོའི་ཉམས་ལེན་ཏེ་གསུམ་དུ་བསྡུས་སོ། །ནམ་མཁའ་སྒོ་འབྱེད་ཀྱི་དབང་ལ། དབུས་སུ་མ་དཀར་པོ། གཅིག སངས་རྒྱས་རིགས། ཕྱོགས་བཞིར་རིགས་བཞི། མདུན་ནས་གཡས་སྐོར། ལུས་ལ་རུས་རྒྱན། ལག་ལ་ཌཱ་མ་རུ། ཡིད་གཏད་མེད་རྐང་གླིང་། ངག་ལ་གསུང་སྐད་ཕཊ་ཀྱིས་དབང་བསྐུར། བཟླས་ལུང་བྱ། ནམ་མཁའ་རྣམ་པར་ལྟ་བའི་ཏིང་འཛིན་སེམས་ལ་ཆོས་ཉིད་དོན་གྱི་དབང་བསྐུར་བ་ནི། སློབ་མའི་རྩ་གསུམ་འཁོར་ལོ་བཞི་གསལ་གདབ། རྐང་འོག་གི་རྣམ་ཤེས་ཐིག་ལེ་དཀར་པོ། སྤྱི་བོའི་སྟེང་མཁར་ཡུམ་ཆེན་མོ་དམིགས། རིགས་ཀྱི་བུ་ཡར་ཤོག་ཅེས་གསུངས་པས། ཌཱ་མ་རུ་དཀྲོལ། དཔོན་སློབ་གཉིས་ཀས་ཕཊ་ཅེས་བརྗོད་ལ་འཁོར་ལོ་བཞི་རིམ་པར་སྤར། མཐར་ནམ་མཁའ་དང་འདྲེས་ཏེ་རང་སེམས་བདེན་སྟོང་ནམ་མཁའ་དང་རོ་གཅིག་པར་བསམས་ལ་མཉམ་པར་བཞག །དེ་ལས་ལངས་པའི་ཚེ་གཏོར་མ་མགོར་བཞག་ལ་བཀའ་བསྒོ་བྱའོ། ། ༈ སྟག་ལོའི་རྩོད་པར། གང་དག་དཔལ་ལྡན་ཟླ་བའི་རྗེས་འབྲངས་ནས། །མ་དག་འཁྲུལ་པའི་སྣང་བ་ཚད་གྲུབ་ཏུ། །རིགས་པ་དུ་མས་དཔྱད་ནས་ཁས་ལེན་པ། །འདི་ལ་འགལ་བའི་ཁུར་ཆེན་འདི་ལྟར་ཡོད། ༡ །འཕགས་མཆོག་ཀླུ་སྒྲུབ་ཟླ་བའི་རྗེས་འབྲངས་ནས། །གཞི་ཡི་བདེན་གཉིས་ལམ་མཆོག་ཐབས་ཤེས་ཟུང་། །འབྲས་བུ་སྐུ་གཉིས་མེད་ཅེས་ཁས་ལེན་པ། །འདི་ལ་འགལ་པའི་ཁུར་ཆེན་བརྒྱ་ཕྲག་འབབས། ། ༈ ཡུལ་ཀུན་བརྫུན་དང་ཡུལ་ཅན་བསླུ་མེད་འགལ། ༡ །རྗེ་བཙུན་བླ་མ་བཞེད་པ་མ་ཡིན་པའི། །ཡུལ་ཅན་བསླུ་མེད་འདོད་ཅེས་སྨྲ་བ་ཡང་། །ལོག་རྟོག་སེར་བུས་བརྫུན་པའི་སྦུན་འཕྱར་ཏེ། །འབྲས་མེད་རང་གི་དེ་ཉིད་སྟོན་པར་ཟད། ། ༈ ཡུལ་དེར་འཁྲུལ་དང་དེ་ལ་ཚད་མ་འགལ། ༢ །སོ་སྐྱེའི་དབང་ཤེས་འཁྲུལ་དང་གཡོ་མེད་ཀྱིས། །དབང་ཤེས་གཟུགས་སོགས་རྣམ་པར་འཇོག་པ་ཡིས། །ཚད་མར་གསུངས་ལ་འགལ་ཁུར་ཡོད་ཅེས་པ། །འཇུག་པར་གནོད་པ་མེད་པའི་དབང་པོ་ཡིས། །གཟུང་འཛིན་འཇིག་རྟེན་གྱིས་རྟོགས་གསུངས་པ་དང་། །ཚིག་དོན་གསལ་བར་ཚད་མ་གཞལ་བྱ་གཉིས། །ཕན་ཚུན་བལྟོས་ནས་འཇོག་པར་གསུངས་བའི་ཕྱིར། །འཇིགས་བྲལ་ཟླ་བའི་ཞབས་ལའང་ཁུར་བོར་ཅིག ། ༈ རྗེས་དཔག་ཡོད་དང་སྒྲུབ་ངག་མེད་པ་འགལ། ༣ །ཐལ་འགྱུར་ལུགས་ལ་རྗེས་དཔག་སྒྲུབ་ངག་དག །ཡོད་མེད་འགལ་བར་སྨྲ་ན་རང་ཉིད་ཀྱིས། །མ་ངེས་སྐྱོན་ཡིན་ཟླ་བས་ཚིག་གསལ་དུ། །སྒྲུབ་ངག་ཡན་ལག་ལྔ་ལྡན་གསུངས་ཕྱིར་རོ། ། ༈ མཐུན་སྣང་མེད་དང་ཆོས་ཅན་ཚད་གྲུབ་འགལ། ༤ །མཐུན་སྣང་མེད་དང་ཆོས་ཅན་ཚད་གྲུབ་གཉིས། །མི་ཤེས་འགལ་སེམས་མཁས་ལ་འགལ་མིན་ཏེ། །གཟུགས་སོགས་རང་བཞིན་ཡོད་མེད་རྩོད་པའི་ཚེ། །ཆོས་ཅན་མཐུན་སྣང་མེད་ཅེས་ཟླ་བས་གསུངས། །རྟེན་འབྲེལ་རྟགས་ཀྱིས་མྱུ་གུ་བདེན་མེད་དུ། །བསྒྲུབས་པའི་ཚུལ་གསུངས་ཚད་མས་གྲུབ་པ་ནི། །ཀླུ་སྒྲུབ་ཟླ་བའི་ཞབས་ཀྱི་རྗེས་འབྲངས་པའི། །ལུང་རིགས་སྨྲ་བའི་མཁས་རྣམས་བཞེད་པ་ཡིན། །ཅེས་སོ། ། ༈ ཕྱི་དོན་ཚད་གྲུབ་རྡུལ་ཕྲན་ཆ་བཅས་འགལ། ༡ །ཕྱི་དོན་རྡུལ་ཕྲན་ཆ་བཅས་འགལ་ཅེས་པ། །མྱོས་ཆུས་རང་དབང་འཕྲོགས་འདྲའི་གཏམ་ཡིན་ཏེ། །དབུ་མ་འཇུག་པར་སེམས་ཙམ་འགོག་པའི་སྐབས། །ཕྱི་དོན་ལན་གཅིག་མིན་པར་གསུངས་ཕྱིར་དང་། ཆོས་རྣམས་ཆ་དང་བཅས་པས་ཁྱབ་པའི་ཕྱིར། །བྱེ་མདོ་བཞིན་དུ་ཕྱི་དོན་འདོད་མཚུངས་པས། །དེ་ཉིད་རྩོམ་རྒྱུ་རྡུལ་ཕྲན་ཆ་མེད་ཀྱང་། །དེ་དག་བཞིན་དུ་ངེས་པར་འདོད་དགོས་ན། །བདེན་པ་གཉིས་ཀྱང་འདོད་པར་མཚུངས་པའི་ཕྱིར། །བདེན་པ་གཉིས་ཀྱང་དེ་ལྟར་འདོད་པར་གྱིས། །ཞེས་སོ། ། ༈ རིགས་དྲུག་ཚད་མ་གདོས་བཅས་ཚད་གྲུབ་འགལ། །རིགས་དྲུག་བཅུད་དང་རི་གླིང་གདོས་བཅས་སྣོད། །ཚད་མ་ཚད་གྲུབ་བཞེད་མོད་ཡང་དང་ཡང་། །འགལ་ཅེས་གཞན་ངོར་གྲངས་ཙམ་འདྲེན་པ་ཡིས། །རྨོངས་པ་མགུ་བྱེད་མཁས་པའི་བཞད་གད་གནས། །རྣམ་པ་སྣ་ཚོགས་ལས་ཀྱིས་བསྐྱེད་པ་ཡི། །འགྲོ་རྣམས་སོ་སོའི་རྒྱུད་ཀྱི་ཚད་མ་དང་། །དེ་དག་ཡུལ་ཀུན་ཐམས་ཅད་མཁྱེན་པ་ཡིས། །ཇི་བཞིན་གཟིགས་ཕྱིར་བསམ་མི་ཁྱབ་ཅེས་གསུངས། ། ༈ སྐྲ་ཤད་མེད་དང་ཀླུང་རྣག་ཡོད་པ་འགལ། ། ༈ རྫས་གྲུབ་མེད་དང་དངོས་པོ་ཡོད་པ་འགལ། །གཞན་སྐྱེ་མེད་དང་ས་མྱུག་རྫས་གཞན་འགལ། ། ༈ བདེན་རྫུན་མེད་དང་ཡང་ལོག་ཡོད་པ་འགལ། ། ༈ ཡན་ལག་ལ་དཔྱད་བུམ་པ་མི་རྙེད་དང་། །སྐད་ཅིག་ལ་དཔྱད་ཞིག་པ་རྙེད་པ་འགལ། ། ༈ རང་རྒྱུད་སྨྲ་བས་རང་བཞིན་སྨྲས་པ་དང་། །རང་བཞིན་མེད་བློ་དེ་ངོར་གྲུབ་པ་འགལ། ། ༈ ཉོན་མོངས་ཅན་མིན་མ་རིག་ཡོད་པ་དང་། །ཤེས་པར་གྱུར་པའི་ཤེས་སྒྲིབ་མེད་པ་འགལ། ། ༈ གཞུང་གཞན་ནས་ཀྱང་ཀུན་གཞི་རང་རིག་སོགས། །འགོག་ན་དེ་དག་རང་ལུགས་མི་འདོད་དང་། །སྡེ་བདུན་ནས་གསུངས་ཚད་མ་མི་འདོད་ཀྱང་། །རང་ལུགས་ཚད་མའི་རྣམ་གཞག་ཤེས་པ་འགལ། ། ༈ མི་རྟག་སོགས་རྟོགས་རྣལ་འབྱོར་མངོན་སུམ་དང་། །དེ་ཡིས་སྦྱོར་ལམ་རྟོགས་པར་མི་སློབ་འགལ། ། ༈ གཞན་སེམས་ཤེས་པ་ཡིད་མངོན་ཤེས་པ་དང་། །བདེན་བཞི་ཤེས་པ་རྣལ་འབྱོར་མངོན་སུམ་འགལ། ། ༈ ཀུན་མཁྱེན་ཡེ་ཤེས་ཆོས་ཀུན་འཇལ་བ་དང་། །ཤེས་བྱ་ཕྱེད་ལ་ཚད་མ་མིན་པ་འགལ། ། ༈ རྫས་ཡོད་བདག་སྨྲ་གནས་མ་བུར་ངེས་དང་། །རྣམ་ཤེས་བདག་སྨྲའི་དབུ་སེམས་ཡོད་པར་འགལ། །ཅེས་སོ། ། ༈ རྗེ་བླ་མ་འཕགས་པ་ཡབ་སྲས་ཀྱི་དགོངས་པ་ལྟར། གཟུགས་ནས་རྣམ་མཁྱེན་བར་གྱི་ཆོས་ཐམས་ཅད། དོན་དམ་པར་རང་གི་ངོ་བོས་གྲུབ་པ་རྡུལ་ཙམ་ཡང་མེད་ཅིང་། ཀུན་རྫོབ་སྒྱུ་མ་རྨི་ལམ་ཆུ་ཟླ་ལྟ་བུར་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་གཟིགས་ཤིང་། གཟིགས་པ་ལྟར་ཡོད་པར་ཞལ་གྱིས་བཞེས་སོ། ། ༈ འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་འགྲེལ་པ་རྗེ་བཙུན་འཇམ་དཔལ་དབྱངས་ཀྱི་བྱིན་རླབས་ཀྱི་ཆར་མྱུར་དུ་འབེབས་བྱེད་བསྟོད་སྤྲིན་གྱི་སྒྲ་དབྱངས། །མཐའ་བྲལ་ལྟ་བས་ཆོས་ཀུན་སྟོང་པར་གཟིགས། །ཡང་དག་རིག་པས་རྒོོལ་ངན་དྲེགས་པ་འཇོམས། །དམིགས་མེད་ཐུགས་རྗེས་འགྲོ་ལ་བུ་ལྟར་བརྩེ། །འཕགས་མཆོག་ཀླུ་སྒྲུབ་ཡབ་སྲས་ལ་ཕྱག་འཚལ། །རྣམ་བཀྲའི་གཟུགས་ལ་མིག་གིས་ལྟ་བ་བཞིན། །རྣམ་མང་རྒྱལ་བའི་གསུང་རབ་ཇི་སྙེད་ལ། །རྣམ་དག་མཁྱེན་པ་ཐོགས་པ་མེད་འཇུག་པ། །ཐོགས་མེད་སྐུ་མཆེད་ཞབས་ལ་ཕྱག་འཚལ་ལོ། །གནས་གསུམ་གཞལ་བྱའི་དེ་ཉིད་མ་ལུས་པ། །ཚད་མ་གསུམ་གྱིས་གཏན་ལ་ཕབ་པའི་དོན། །སྒྲུབ་དང་སུན་འབྱིན་ངག་གིས་འདོམས་མཛད་པ། །རིག་པའི་དབང་ཕྱུག་གཉིས་ལ་ཕྱག་འཚལ་ལོ། །ཚུལ་ཁྲིམས་རྒྱ་མཚོའི་དབུས་ན་གནས་བཅས་ཤིང་། །འབུམ་ཕྲག་འདུལ་བའི་གཞུང་གི་གདེངས་ཀས་བརྗིད། །རྣམ་གྲོལ་ཐར་པའི་ནོར་བུས་གཙུག་ན་མཛེས། །མཆོག་གཉིས་ཀླུ་ཡི་དབང་པོ་ལ་ཕྱག་འཚལ། །ཞེས་པ་འདི་ནི་རིགས་རུས་ཕུན་སུམ་མཚོགས་པའི་མངའ་བདག་གྲགས་པ་རྒྱལ་མཚན་པས་བསྐུལ་བའི་དོན་དུ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་སྦྱར་བའོ། །ས་སྟེང་འགྲན་ཟླ་བྲལ་བ་ཆོས་ཀྱི་རྗེ། །ཤེས་བྱ་ཀུན་ལ་ཐོགས་མེད་འཇམ་པའི་དབྱངས། །གནས་ལྔ་མངོན་དུ་གྱུར་པའི་པཎྜི་ཏ། །གངས་ཅན་འགྲོ་བའི་སྐྱབས་གཅིག་ས་སྐྱ་པ། །ཞེས་སོགས་དང་། །འཇམ་མགོན་བློ་བཟང་གྲགས་པའི་ཞལ་ནས། ཁྱད་པར་དུ་རྒྱལ་བ་སྲས་དང་བཅས་པའི་དགོངས་པའི་གནད་འདྲིལ་པའི་མན་ངག་འཕགས་པ་ལག་ན་རྡོ་རྗེའི་གསང་ཚིག །ཞུས་ལན་སྨན་མཆོག་བདུད་རྩིའི་ཕྲེང་བ་གསང་བདག་གི་ཞལ་སྔ་ནས་ཇི་ལྟར་གནང་བ་བཞིན་ལྷག་ཆད་ནོར་གསུམ་དང་བྲལ་བ་ཡི་གེར་བཀོད་པ་གནང་བ་འཕྲོད་པ་ན། གསང་བདག་གསུང་གི་བདུད་རྩི་ཡིས། །ཡིད་ཀྱི་རེ་བ་རྫོགས་པར་བྱས། །ཉོན་མོངས་ནད་ལས་རྒྱལ་བར་འགྱུར། །ལྕང་ལོ་ཅན་དུ་ཕྱིན་པ་སྙམ། །ཞེས་སོགས་ཆེད་དུ་བརྗོད། ། ༈ དལ་འབྱོར་རྙེད་དཀའ། རྙེད་ན་དོན་ཆེ་བ། དེའང་མྱུར་དུ་འཇིག་པའི་ཚུལ་ཆེས་ཆེར་བསམ་པ་ནི། །དང་པོ་སྒྲུབ་པའི་སྐུལ་མ། བར་དུ་སྒྲུབ་པ་མི་ཉམས་པའི་རྒྱུ། ཐ་མ་སྒྲུབ་པ་མཐར་ཕྱིན་པར་བྱེད་པ་ཡིན་པས་གནད་ཤིན་ཏུ་ཆེ་བ་ཡིན། ཞེས་སོ། ། ༈ རྟེན་འབྱུང་རྒྱུ་འབྲས་མི་བསླུ་བའི་ངེས་པ་རྙེད་པས་ཆད་ལྟ་འགོག་ཅིང་། མཚན་མར་འཛིན་པའི་དམིགས་གཏད་རྡུལ་ཙམ་ཡང་མ་གྲུབ་པའི་རང་བཞིན་མེད་པའི་སྟོང་ཉིད་ལ་ངེས་པ་རྙེད་པས་རྟག་མཐའ་ལས་གྲོལ་བའི་ཕྱིར་རོ། །དེས་ན་ངོ་བོ་ཉིད་ཀྱིས་སྟོང་བཞིན་དུ་རྒྱུ་འབྲས་མི་བསླུ་བའི་ངེས་པ་རྙེད་པའི་ལྟ་བ་ནི་རྟག་ཆད་གཉིས་ཀའི་གོལ་ས་ཆོད་པ་ཡིན་པས་རྨད་དུ་བྱུང་བའི་གོ་བ་ཡིན་ནོ། །ཐོག་མར་ལྟ་བ་བཙལ་བའི་དགོས་པའང་ངེས་པའི་དོན་བསྒོམ་པའི་དོན་དུ་ཡིན་ལ། དེ་ཡང་བདག་འཛིན་ལྡོག་པའི་ཆེད་ཡིན་པས་བསྒོམ་པའི་དུས་སུ་ཡང་བདག་ཏུ་འཛིན་པ་གཉིས་ཀྱི་ཡུལ་ལ་སོ་སོར་རྟོག་པའི་ཤེས་རབ་ཀྱིས་ལེགས་པར་དཔྱད་པས་བདག་གཉིས་ཀྱི་མཚན་མ་ཅིར་ཡང་མ་གྲུབ་པའི་ངེས་པ་རྙེད་པའི་ཚེ་ལྟ་ཐོག་དེར་བཞག་ནས་ངེས་པའི་རྒྱུན་སྐྱོང་དགོས་ཀྱི་ལྟ་བའི་ངེས་པ་དོར་བའི་ཞི་གནས་ཙམ་བསྐྱངས་ཀྱང་འཁོར་བའི་རྩ་བ་བདག་འཛིན་ལ་ཅི་ཡང་མི་གནོད་དོ། །དོན་གྱི་དབང་གིས་འདི་གཟིགས་ནས། རིག་པའི་དབང་ཕྱུག་གིས། འདི་ཡུལ་སུན་དབྱུང་མེད་པར་ནི། །དེ་སྤང་བར་ནི་ནུས་མ་ཡིན། །ཞེས་དང་། འཕགས་པ་ལྷས་ཀྱང་། ཡུལ་ལ་བདག་མེད་མཐོང་བ་ན། །སྲིད་པའི་ས་བོན་འགག་པར་འགྱུར། །ཞེས་གསུངས་ལ། ཏིང་ངེ་འཛིན་རྒྱལ་པོ་ལས་ཀྱང་། གལ་ཏེ་ཆོས་ལ་བདག་མེད་སོ་སོར་རྟོགས། །སོ་སོར་དེ་རྟོགས་གལ་ཏེ་བསྒོམས་པ་ནི། །འབྲས་བུ་མྱང་འདས་ཐོབ་པའི་རྒྱུ་དེ་ཡིན། རྒྱུ་གཞན་གང་ཡིན་དེར་ནི་ཞི་མི་འགྱུར། །ཞེས་རྗེས་སུ་འགྲོ་ལྡོག་གཉིས་ཀ་ངེས་པའི་སྒོ་ནས་བདག་མེད་པའི་དོན་ལ་སོ་སོར་རྟོག་པའི་ཤེས་རབ་ཐར་པའི་སྒོ་དམ་པར་གསུངས་སོ། །གནས་ལུགས་སྒྲ་དང་རྟོགས་པའི་ཡུལ་མིན་པར་གསུངས་པ། དཔེར་ན་བུ་རམ་གྱི་རོ་འདི་འདྲ་ཞིག་ཡོད་ཅེས་བཤད་ཀྱང་ལྕེས་མྱོང་བ་ཇི་བཞིན་པར་ཚིག་ལ་བརྟེན་ནས་གོ་མི་ནུས་པ་བཞིན་དུ་འཕགས་པའི་མཉམ་གཞག་གིས་ཐུགས་སུ་ཆུད་པ་ཇི་བཞིན་པ་སྟོང་ཉིད་སྟོན་པའི་ཚིག་གིས་མཚོན་མི་ནུས་པ་ལ་བཞེད་མཆི་པས་དེ་ལྟར་ན་ལེགས་སོ། །འོན་ཀྱང་སྒྲ་རྟོག་གི་ཡུལ་གཏན་མི་རུང་བ་བྱར་མི་རུང་སྟེ། གཞན་དུ་ཚོགས་སྦྱོར་བའི་དེ་ཁོ་ན་ཉིད་དོན་སྤྱིའི་སྒོ་ནས་རྟོགས་པར་གསུངས་པ་མི་འཐད་པར་འགྱུར་ཞིང་། གོ་བར་མི་ནུས་པའི་དོན་ལ་འདིའི་དོན་ཡིན་ཞེས་རྟོག་ལྡན་སློབ་མ་ལ་འཆད་པར་ཡང་མི་རིགས་ཏེ། ཅི་ཙམ་བཤད་ཀྱང་གོ་མི་ནུས་པའི་ཕྱིར་རོ། །ཞེས་གསུངས་སོ།། །། ༈

པཎ་ཆེན་བློ་བཟང་ཆོས་རྒྱན་གྱི་རྣམ་ཐར་ནོར་བུའི་ཕྲེང་བ་ལས། འགལ་བྱེད་ཀྱི་ལོ་དེ་ཁའི་ནང་དུ་དགོས་པའི་དབང་གིས་གསང་བའི་སློབ་དཔོན་ཞིག་ལ། རྙིང་ལུགས། གཤེད་དམར། ཚེ་བདག །བཀའ་བརྒྱད་གསང་བ་ཡོངས་རྫོགས་དང་། བདེ་འདུས་ཀྱི་དབང་ལུང་སོགས་རྙིང་མའི་ཆོས་སྐོར་མང་པོ་ཞུས། ཞེས་སྣང་ངོ་། ། ༈ བོད་འདྲེ་སྲིན་གདུལ་དཀའ་འདུལ་མཛད་པའི། །དཔལ་མཐུ་སྟོབས་དབང་ཕྱུག་པདྨ་འབྱུང་། །མགོན་ཁྱོད་ཀྱི་ཡེ་ཤེས་སྒྱུ་མའི་འཕྲུལ། །ཐུགས་བརྩེ་བས་གཟིགས་ཤིག་ཨ་ཏི་ཤ །ཞེས་དང་། ། ༈ དུས་དེར་བསྙེན་རྫོགས་སྒྲུབ་མི་བརྒྱ་ཕྲག་ཏུ་ཉེར་བར་བྱུང་བས། དུ་མ་མཁན་པོ་གཅིག་པ་གསུམ་པ་མན་ཆད་གཅིག་གིས་གཅིག་བསྙེན་པར་རྫོགས་པར་བྱར་རུང་ངོ་། །ཞེས་མདོ་རྩ་ལས་གསུངས་པ་བཞིན། ཁང་པ་ལྷོ་བྱང་གཉིས་སུ་དཀྱིལ་འཁོར་པ་སོ་སོར་བཅད་པའི་མཚམས་སུ་འདུག་སྟེ། དུ་མ་མཁན་པོ་གཅིག་པའི་ཚོགས་བསྙེན་པར་རྫོགས་པ་སྒྲུབ་དགོས་པ་འགའ་ཞིག་བྱུང་། ཞེས་སོ། ། ༈ གསང་སྔགས་རྙིང་མའི་གདམས་པ་བདུད་རྩིའི་ཆུས། །སྐལ་བཟང་བྱས་པ་གྲུབ་བའི་ཡ་མཚན་གྱིས། །སྣང་སྲིད་ཟིལ་གནོན་དམ་ཅན་བྲན་དུ་ཁོལ། །རྣལ་འབྱོར་དབང་ཕྱུག་ཞབས་ལ་གསོལ་བ་འདེབས། ། ༈ ཞིང་མཆོག་བདེ་བ་ཅན་གྱི་འདྲེན་པ་མཆོག །སྣང་བ་མཐའ་ཡས་ཡེ་ཤེས་ཟློས་གར་ལས། །མཚོ་ལས་སྐྱེས་པའི་རྡོ་རྗེའི་སྤྲུལ་པའི་སྐུ། །བསྟན་པའི་ཉི་མ་མཆོག་ལ་གསོལ་བ་འདེབས། །དེ་ཉིད་ཐུགས་རྗེ་ཆེན་པོའི་རྣམ་རོལ་ནི། །བློ་བཟང་ཆོས་ཀྱི་རྒྱལ་མཚན་འཛིན་པའི་དཔལ། །ཞེས་གསུངས། ། ༈

[edit]

lo rgyus dang dka' gnad lung btus tshan mang sbrel ba/ rgyal dbang lnga pa la/__nub phyogs mchog tu dge ba'i zhing gi rgyal dbang sa steng gi rgyal bstan yongs kyi bdag po thams cad mkhyen pa ta la'i bla ma badz+ra d+hA ra/__zhes pa'i 'ja' sa dang shel tham phul/__gong ma g.yung Ting gis pho brang du dga' ldan srid chags gling zhes pa'i chos sde gsar du btsugs/__mdo sngags rig gnas kyi gra tshang khag rnams yod/__zhe'u ho'u zhes pa'i sa char yang gtsug lag khang dang grwa tshang khag mang po btsugs//____//_!_ paN chen blo bzang chos rgyan gyi phyag chen gyi 'grel par/__lhan cig dwags po/__skyes sbyor ni/__sems nyid lhan cig skyes pa chos kyi sku/__/rnam rtog lhan cig skyes pa chos sku'i rlabs/__/snang ba lhan cig skyes pa chos sku'i 'od/__/snang sems dbyer med lhan cig skyes pa'o/__/zhes pa'i don/__mos gus dang /__zhen log gtso bor byas pa'i ngos nas sngon 'gro sbyor ba bzhi ldan/__dngos gzhi ngo sprod rnam gnyis/__zhi lhag____/rjes nyams myong snang thog tu skyong ba gsum gyis 'chad/__ga'u ma ni khyung po'i bka' srol te/__sngon 'gro rang babs rnam gsum/__dngos gzhi skyon bzhi rang grol/__'bras bu sku gsum rang shar gyi sgo nas ston zhing /__dngos gzhi la rkun po'i ngo sprod ces gsungs so/__/ni gu chos drug ni/__gtum mo lam gyi rmang rdo/__sgyu lus chags sdang rang grol/__rmi lam nying 'khrul rang sangs/__'od gsal ma rig mun sel/__'pho ba ma bsgom sangs rgyas/__bar do rgyal ba longs sku zhes pa ste/__gwa'u ma'i gtso bo yang chos drug gi 'od gsal bsgom tshul lo/__/chos rje rgya ras pa nas brgyud pa rnams khrid chen/__ro snyoms skor6/_ri chos thugs nyams su len zhing /__de yang bla ma sku gsum gyi/__byams snying rje'i/__rgyu 'bras rten 'brel gyi/__lnga ldan bdud rtsi thigs pa'i/__lhan cig skyes sbyor gyi/__nA ro chos drug gi/__chos brgyad mgo snyoms kyi/__gsang spyod bzlog bsgom gyi khrid rnams so/__/rnam rtog__/nyon mongs/__na tsha/__lha 'dre/__sdug bsngal/__'chi ba lam khyer/__ri chos la zab chos rgyan bzhi zhes/__ri chos yon tan kun 'byung /__gsang ba dbang gi gru bo che/__rdo rje las kyi sbas bshad/__bar do'i khrid dang bzhi/__skor gsum zhal gdams gyi rgyan zhes/__dmar khrid gegs sel gyi rgyan/__mgur 'bum dkar chag gi rgyan/__sil bu'i sde tshan phran tshegs kyi rgyan rnams so/__/yi ge bzhi pa ni/__a ma na se'i sgra las/__dang po sems kyi gzhi rtsa bcad/__/gnyis pa sems kyi bzhag thabs bstan/__/gsum pa sems kyi gol sa bcad/__/bzhi pa sems kyi lam khyer bstan pa'o/__/rdzogs chen man ngag lta ba'i phreng ba sogs slob dpon pad+ma'i thugs kyi bcud phyung ba rnams dang zhes sogs gsungs/___/__!_ zhang rin po ches/__kun gyi sa bon rang sems gnas lugs ni/__/rgyal ba sras bcas kun gyi thugs dang ni/__/ye nas khyad med ye shes chos skur snang /__/bem por ma yin rang bzhin ngang gis gsal/__/dngos po ma grub kha dog tshad kyis stong /__/zhes so/__/gling gis/__ma bcos so mar bzhag na rtogs pa 'char/__/chu bo'i rgyun bzhin bskyangs na yongs kyang 'char/__/dmigs gtad mtshan ma thams cad yongs spangs la/__/rtag tu mnyam par zhog cig rnal 'byor pa/__/zhes so/__/zhang gis/__de ltar bzhag pa'i ngang nyid las/__/rnam rtog thol gyis byung gyur na/__/de nyid 'od gsal chos sku las/__/gzhan zhig snyam du ma sems shig__/de phyir rnam rtog 'phro ba de/__/stong nyid las ni stong nyid 'phro/__/chos sku las ni chos sku 'phro/__/zung 'jug las ni zung 'jug 'phro/__/zhes gsungs so/___/__! 'phags pa yab sras kyi bzhed pa'i lta ba phyag rgya chen po'i go don mthar thug pa ni btags yod ming rkyang zhes pa 'di yin no/___/__!_ 'phags pa klu sgrub kyis dngos bstan stong nyid kyi rim pa gtan la 'bebs pa/__mdo kun btus dang /__rigs tshogs drug mdzad/__de la 'grel pa/__ji skad du/__rgyan snang las/__'phags pa gsal ba'i blo mnga' des ni rgyal la mngon sum nyid zhus nas/__zhes pa'i don 'phags pa grol sde de sher phyin gyi mdo'i don the tshom dang som nyi spangs pa'i theg chen 'phags pa grol sde/__gnyis pa slob dpon seng bzang de rtsom pa'i rgyu gsum phun sum tshogs pa ste/__man ngag rgyun ma chad pa dang /__bstan bcos kyi don la mkhas pa dang /__yi dam gyi lha la mngon sum du gnang ba thob pa ste/__de yang mkhan po rnam snang mdzad la rje btsun gyi sgrub thabs zhus nas bsgrubs pas/__shar phyogs kha saR+pA Nir sprin gsebs nas rje btsun gyis zhal gzigs par khyed kyi bstan bcos de la 'grel pa du ma zhig snang bas gang gi rjes su 'brang zhus pas/_thams cad legs par rtogs la don 'dril ba'i 'grel pa rtsoms shig__/ces gsung gi gnang ba thob pa'i phyir/__bshad bya rtsa ba'i mdo rgyas 'bring bsdus gsum mdo sdud pa dang bzhi/__'chad byed mngon par rtogs pa rgyan no/__/zhes so/__/de yi nyan thos zhi ba sogs kyi don/__gzhi shes kyi yon tan brjod pas/__nyer zhir 'khrid tshul 'chad pa la rkang pa dang po gsungs/__lam shes kyi don 'chad tshul brjod pas rigs can gsum gyi don bsgrub tshul 'chad pa la rkang pa gnyis pa gsungs/__rnam mkhyen gyi yon tan brjod de chos 'khor bskor tshul 'chad pa la rkang pa gsum pa gsungs/__'phags bzhi'i yum byed tshul 'chad pa la bzhi pa gsungs so/__/don ni/__rje btsun gyis rtsom pa'i thog mar mkhyen gsum la bstod phyag mdzad de/__rten gyi gang zag nyan thos dang /__rang sangs rgyas sdug kun nye bar zhi ba 'tshol ba rnams phung khams skye mched kun gang zag gi bdag med par shes pa nyid kyis 'bras bu lhag ma yod med nyer zhir 'khrid mdzad gang yin pa de la 'dud pa'i phyir dang /__rten gyi gang zag 'gro la phan par byed pa'i byang sems lam shes nyid kyi 'bras bu 'jig rten gsum gyi don sgrub par mdzad pa gang yin pa dang /__thub pa sangs rgyas bcom ldan 'das rnams thabs gang dang yang dag par ldan pas/__brjod bya rnam pa kun dang ldan pa'i rjod byed sde snod sna tshogs pa 'di dag gsungs ba'i bdag rkyen rnam mkhyen la 'dud pa'i phyir/__bshad bya 'chad byed mdor bstan pa/__'chad byed kyi rkang grangs bshad pa gnyis/__dang po ni/__shes rab pha rol phyin pa ni/__/zhes pa gnyis la bstan bcos 'di chos can/__khyod kyi gzhung shes rab kyi pha rol tu phyin pa rgyas 'bring bsdus gsum ni yang dag pa ste/__phyin ci ma log par bshad de rjod byed la skabs brgyad dang /__brjod bya'i dngos po la yang brgyad du phye ba nyid kyis bshad pa'i phyir/__'chad byed gzhung sher phyin la skabs brgyad yod de/__rab 'byor gyi le'us rnam mkhyen/__mtha' gnyis rnam dag gi le'us lam shes/__spyod pa khyad par can gyi le'us gzhi shes/__de bzhin nyid kyi le'us rnam rdzogs sbyor ba/__bslab pa yongs su dag pa'i le'us rtse sbyor/__bslab pa la rim gyis 'jug pa'i le'us mthar gyis sbyor ba/__bslab pa yongs su rdzogs pa'i le'us skad cig sbyor ba/__bslab pa'i 'bras bu'i le'us chos sku 'chad pa'i phyir/__gnyis pa la mkhyen gsum/__sbyor bzhi/__chos sku gsum las/__dang po ni/__rnam kun mkhyen nyid lam shes nyid/__/ces sogs gnyis la/__mkhyen gsum so so'i ngo bo yod de/__sems bskyed sogs chos bcu dang /__gzhi gnyen rnam pa kun mkhyen pa'i mthar phyin pa'i ye shes nyid rnam mkhyen gyi ngo bo/__thabs shes khyad par can gyis zin pa'i theg chen 'phags pa'i mngon rtogs lam shes kyi ngo bo dang /__theg dman gyi mkhyen pa'am/__theg dman gyi rtogs rigs su gnas pas rab tu phye ba'i 'phags rgyud kyi mkhyen pa de nas thams cad shes pa nyid kyi ngo bor 'jog pa'i phyir/__rnam mkhyen gyi mtshan nyid de ltar 'jog pa ni/__thob bya rnam mkhyen de bstan pa nyid kyis lam spyi'i go yul blo la 'char ba'i ched du yin no/__/rnam mkhyen la dbye na/__ji lta ji snyed dang /__shes bya'i rnam pa ma lus pa mkhyen pa'i rnam mkhyen dang /__rgyu 'bras gtso bo'i don bcu mngon sum du rtogs pa'i rnam mkhyen gnyis/__sa mtshams sangs rgyas kyi sa kho na'o/__/lam shes kyi dbye ba la rtogs rigs kyi sgo nas gsum dang /__rgyu lam shes/__'bras bu lam shes/__dman lam sngon du song ma song gi dbye ba du ma yod/__sa mtshams theg chen 'phags pa mtha' dag la'o/__/gzhi shes la 'phags pa gsum gyi dbye bas gsum/__mi mthun phyogs dang mthun phyogs kyi dbye ba sogs yod/__sa mtshams 'phags pa thams cad la'o/__/gnyis pa sbyor bzhi 'chad pa la/__rnam kun sogs gsungs/__so so'i ngo bo yod de/__mkhyen gsum gyi rnam pa bsdus nas sgom par byed pa'i shes rab kyis zin pa sems pa'i mngon rtogs/__rnam kun mngon rdzogs rtogs pa'i sbyor ba'i ngo bo dang /__stong nyid dmigs pa'i sgom byung gi shes rab kyis zin pa'i sgo nas mkhyen gsum bsdus te bsgom pa/__theg chen tshogs lam las rab tu gyur pa'i rnal 'byor rtse sbyor gyi ngo bo dang /__mkhyen gsum gyi rnam pa la brten pa thob phyir du mkhyen gsum gyi rnam pa rim can du bsgoms pa'i shes rab kyis zin pa'i sems pa'i rnal 'byor mthar gyis pa'i sbyor ba'i ngo bo dang /__rang gi nyer len du gyur pa'i mthar gyis sbyor ba'i stobs las byung ba'i sems pa'i rnal 'byor mthar thug skad cig ma gcig gis mngon par rdzogs par byang chub kyi sbyor ba'i ngo bo yin pa'i phyir/__dbye na rnam pa brgya bdun cu rtsa gsum bsgoms pa'i sems pa'i rnal 'byor brgya don gsum yod/__gnyis pa'i sa mtshams/__theg chen gyi sbyor lam drod nas rgyun mtha'i bar dang /__rgyas par dbye na brgya don gsum/__bsdu na bzhi yod/__gsum pa'i sa mtshams/__theg chen tshogs lam nas rgyun mtha'i snga logs na dang /__dbye na bcu gsum/__bzhi pa'i sa mtshams rgyun mtha' kho na dang /__dbye na bzhi yod do/__/gsum pa chos sku 'chad pa la/__chos sku dang /__zhes pas/__'bras bu chos sku'i ngo bo yod de/__rang thob byed kyi thabs su gyur pa'i mkhyen gsum gyi rnam pa bsgom stobs kyis thob pa'i yon tan mthar thug pa de yin pa'i phyir/__dbye na bzhi/__sa mtshams sangs rgyas kyi sa'o/__/de rnams kyi grangs bsdu ba la/__de rnam brgyad/__ces gsungs so/___/__!_ rdo rje 'dzin pa grags rgyal gyis/__tshe 'di la sogs kyis/__rnam bcad la bzlog phyogs bzhi dngos su bstan nas/__yongs gcod la bsgrub phyogs gnyen po bzhi shugs kyis bstan to/___/__!_ 'phags pa'i skye bo rnams kyi mdzad pa so so skye bo rnams kyi yul las 'das shing chos dang /__skyes bu dam pa la brten pa'i sdig pa shin tu mi bzad pas phyogs 'dzin gyi sdang zhugs dor nas dag snang nor bu'i 'od kyis khyab par mdzad du gsol zhes chos kyi rgyal mtshan gsol ba 'debs so/__/zhes snang /___/__!_ sgyu lus 'od gsal gnyis 'dus pa/__'pho ba grong 'jug gnyis gdan bzhi dang kha sbyor/__gtum mo dgyes rdor la brten no/___/__!_grub thob mi tra dzo ki'i gdams pa snying po don gsum la/__tshe 'di'i nyams len bskyed rdzogs/__'chi ba'i nyams len 'pho ba/__bar do'i nyams len te gsum du bsdus so/__/nam mkha' sgo 'byed kyi dbang la/__dbus su ma dkar po/__gcig__sangs rgyas rigs/__phyogs bzhir rigs bzhi/__mdun nas g.yas skor/__lus la rus rgyan/__lag la DA ma ru/__yid gtad med rkang gling /__ngag la gsung skad phaT kyis dbang bskur/__bzlas lung bya/__nam mkha' rnam par lta ba'i ting 'dzin sems la chos nyid don gyi dbang bskur ba ni/__slob ma'i rtsa gsum 'khor lo bzhi gsal gdab/__rkang 'og gi rnam shes thig le dkar po/__spyi bo'i steng mkhar yum chen mo dmigs/__rigs kyi bu yar shog ces gsungs pas/__DA ma ru dkrol/__dpon slob gnyis kas phaT ces brjod la 'khor lo bzhi rim par spar/__mthar nam mkha' dang 'dres te rang sems bden stong nam mkha' dang ro gcig par bsams la mnyam par bzhag__/de las langs pa'i tshe gtor ma mgor bzhag la bka' bsgo bya'o/___/__!_ stag lo'i rtsod par/__gang dag dpal ldan zla ba'i rjes 'brangs nas/__/ma dag 'khrul pa'i snang ba tshad grub tu/__/rigs pa du mas dpyad nas khas len pa/__/'di la 'gal ba'i khur chen 'di ltar yod/__1__/'phags mchog klu sgrub zla ba'i rjes 'brangs nas/__/gzhi yi bden gnyis lam mchog thabs shes zung /__/'bras bu sku gnyis med ces khas len pa/__/'di la 'gal pa'i khur chen brgya phrag 'babs/___/__!_yul kun brdzun dang yul can bslu med 'gal/__1__/rje btsun bla ma bzhed pa ma yin pa'i/__/yul can bslu med 'dod ces smra ba yang /__/log rtog ser bus brdzun pa'i sbun 'phyar te/__/'bras med rang gi de nyid ston par zad/___/__!_yul der 'khrul dang de la tshad ma 'gal/__2__/so skye'i dbang shes 'khrul dang g.yo med kyis/__/dbang shes gzugs sogs rnam par 'jog pa yis/__/tshad mar gsungs la 'gal khur yod ces pa/__/'jug par gnod pa med pa'i dbang po yis/__/gzung 'dzin 'jig rten gyis rtogs gsungs pa dang /__/tshig don gsal bar tshad ma gzhal bya gnyis/__/phan tshun bltos nas 'jog par gsungs ba'i phyir/__/'jigs bral zla ba'i zhabs la'ang khur bor cig__/_!_rjes dpag yod dang sgrub ngag med pa 'gal/__3__/thal 'gyur lugs la rjes dpag sgrub ngag dag__/yod med 'gal bar smra na rang nyid kyis/__/ma nges skyon yin zla bas tshig gsal du/__/sgrub ngag yan lag lnga ldan gsungs phyir ro/___/__!_mthun snang med dang chos can tshad grub 'gal/__4__/mthun snang med dang chos can tshad grub gnyis/__/mi shes 'gal sems mkhas la 'gal min te/__/gzugs sogs rang bzhin yod med rtsod pa'i tshe/__/chos can mthun snang med ces zla bas gsungs/__/rten 'brel rtags kyis myu gu bden med du/__/bsgrubs pa'i tshul gsungs tshad mas grub pa ni/__/klu sgrub zla ba'i zhabs kyi rjes 'brangs pa'i/__/lung rigs smra ba'i mkhas rnams bzhed pa yin/__/ces so/___/__!_phyi don tshad grub rdul phran cha bcas 'gal/__1__/phyi don rdul phran cha bcas 'gal ces pa/__/myos chus rang dbang 'phrogs 'dra'i gtam yin te/__/dbu ma 'jug par sems tsam 'gog pa'i skabs/__/phyi don lan gcig min par gsungs phyir dang /__chos rnams cha dang bcas pas khyab pa'i phyir/__/bye mdo bzhin du phyi don 'dod mtshungs pas/__/de nyid rtsom rgyu rdul phran cha med kyang /__/de dag bzhin du nges par 'dod dgos na/__/bden pa gnyis kyang 'dod par mtshungs pa'i phyir/__/bden pa gnyis kyang de ltar 'dod par gyis/__/zhes so/___/__!_rigs drug tshad ma gdos bcas tshad grub 'gal/__/rigs drug bcud dang ri gling gdos bcas snod/__/tshad ma tshad grub bzhed mod yang dang yang /__/'gal ces gzhan ngor grangs tsam 'dren pa yis/__/rmongs pa mgu byed mkhas pa'i bzhad gad gnas/__/rnam pa sna tshogs las kyis bskyed pa yi/__/'gro rnams so so'i rgyud kyi tshad ma dang /__/de dag yul kun thams cad mkhyen pa yis/__/ji bzhin gzigs phyir bsam mi khyab ces gsungs/___/__!_skra shad med dang klung rnag yod pa 'gal/___/__!_rdzas grub med dang dngos po yod pa 'gal/__/gzhan skye med dang sa myug rdzas gzhan 'gal/___/__!_bden rdzun med dang yang log yod pa 'gal/___/__!_yan lag la dpyad bum pa mi rnyed dang /__/skad cig la dpyad zhig pa rnyed pa 'gal/___/__!_rang rgyud smra bas rang bzhin smras pa dang /__/rang bzhin med blo de ngor grub pa 'gal/___/__!_nyon mongs can min ma rig yod pa dang /__/shes par gyur pa'i shes sgrib med pa 'gal/___/__!_gzhung gzhan nas kyang kun gzhi rang rig sogs/__/'gog na de dag rang lugs mi 'dod dang /__/sde bdun nas gsungs tshad ma mi 'dod kyang /__/rang lugs tshad ma'i rnam gzhag shes pa 'gal/___/__!_mi rtag sogs rtogs rnal 'byor mngon sum dang /__/de yis sbyor lam rtogs par mi slob 'gal/___/__!_gzhan sems shes pa yid mngon shes pa dang /__/bden bzhi shes pa rnal 'byor mngon sum 'gal/___/__!_kun mkhyen ye shes chos kun 'jal ba dang /__/shes bya phyed la tshad ma min pa 'gal/___/__!_rdzas yod bdag smra gnas ma bur nges dang /__/rnam shes bdag smra'i dbu sems yod par 'gal/__/ces so/___/__!_rje bla ma 'phags pa yab sras kyi dgongs pa ltar/__gzugs nas rnam mkhyen bar gyi chos thams cad/__don dam par rang gi ngo bos grub pa rdul tsam yang med cing /__kun rdzob sgyu ma rmi lam chu zla lta bur rnam pa thams cad mkhyen pa'i ye shes kyis gzigs shing /__gzigs pa ltar yod par zhal gyis bzhes so/___/__!_'phags pa 'jam dpal gyi mtshan yang dag par brjod pa'i 'grel pa rje btsun 'jam dpal dbyangs kyi byin rlabs kyi char myur du 'bebs byed bstod sprin gyi sgra dbyangs/__/mtha' bral lta bas chos kun stong par gzigs/__/yang dag rig pas rgo+ol ngan dregs pa 'joms/__/dmigs med thugs rjes 'gro la bu ltar brtse/__/'phags mchog klu sgrub yab sras la phyag 'tshal/__/rnam bkra'i gzugs la mig gis lta ba bzhin/__/rnam mang rgyal ba'i gsung rab ji snyed la/__/rnam dag mkhyen pa thogs pa med 'jug pa/__/thogs med sku mched zhabs la phyag 'tshal lo/__/gnas gsum gzhal bya'i de nyid ma lus pa/__/tshad ma gsum gyis gtan la phab pa'i don/__/sgrub dang sun 'byin ngag gis 'doms mdzad pa/__/rig pa'i dbang phyug gnyis la phyag 'tshal lo/__/tshul khrims rgya mtsho'i dbus na gnas bcas shing /__/'bum phrag 'dul ba'i gzhung gi gdengs kas brjid/__/rnam grol thar pa'i nor bus gtsug na mdzes/__/mchog gnyis klu yi dbang po la phyag 'tshal/__/zhes pa 'di ni rigs rus phun sum mtshogs pa'i mnga' bdag grags pa rgyal mtshan pas bskul ba'i don du shar tsong kha pa blo bzang grags pa'i dpal gyis sbyar ba'o/__/sa steng 'gran zla bral ba chos kyi rje/__/shes bya kun la thogs med 'jam pa'i dbyangs/__/gnas lnga mngon du gyur pa'i paN+Di ta/__/gangs can 'gro ba'i skyabs gcig sa skya pa/__/zhes sogs dang /__/'jam mgon blo bzang grags pa'i zhal nas/__khyad par du rgyal ba sras dang bcas pa'i dgongs pa'i gnad 'dril pa'i man ngag 'phags pa lag na rdo rje'i gsang tshig__/zhus lan sman mchog bdud rtsi'i phreng ba gsang bdag gi zhal snga nas ji ltar gnang ba bzhin lhag chad nor gsum dang bral ba yi ger bkod pa gnang ba 'phrod pa na/__gsang bdag gsung gi bdud rtsi yis/__/yid kyi re ba rdzogs par byas/__/nyon mongs nad las rgyal bar 'gyur/__/lcang lo can du phyin pa snyam/__/zhes sogs ched du brjod/___/__!_dal 'byor rnyed dka'/__rnyed na don che ba/__de'ang myur du 'jig pa'i tshul ches cher bsam pa ni/__/dang po sgrub pa'i skul ma/__bar du sgrub pa mi nyams pa'i rgyu/__tha ma sgrub pa mthar phyin par byed pa yin pas gnad shin tu che ba yin/__zhes so/___/__!_rten 'byung rgyu 'bras mi bslu ba'i nges pa rnyed pas chad lta 'gog cing /__mtshan mar 'dzin pa'i dmigs gtad rdul tsam yang ma grub pa'i rang bzhin med pa'i stong nyid la nges pa rnyed pas rtag mtha' las grol ba'i phyir ro/__/des na ngo bo nyid kyis stong bzhin du rgyu 'bras mi bslu ba'i nges pa rnyed pa'i lta ba ni rtag chad gnyis ka'i gol sa chod pa yin pas rmad du byung ba'i go ba yin no/__/thog mar lta ba btsal ba'i dgos pa'ang nges pa'i don bsgom pa'i don du yin la/__de yang bdag 'dzin ldog pa'i ched yin pas bsgom pa'i dus su yang bdag tu 'dzin pa gnyis kyi yul la so sor rtog pa'i shes rab kyis legs par dpyad pas bdag gnyis kyi mtshan ma cir yang ma grub pa'i nges pa rnyed pa'i tshe lta thog der bzhag nas nges pa'i rgyun skyong dgos kyi lta ba'i nges pa dor ba'i zhi gnas tsam bskyangs kyang 'khor ba'i rtsa ba bdag 'dzin la ci yang mi gnod do/__/don gyi dbang gis 'di gzigs nas/__rig pa'i dbang phyug gis/__'di yul sun dbyung med par ni/__/de spang bar ni nus ma yin/__/zhes dang /__'phags pa lhas kyang /__yul la bdag med mthong ba na/__/srid pa'i sa bon 'gag par 'gyur/__/zhes gsungs la/__ting nge 'dzin rgyal po las kyang /__gal te chos la bdag med so sor rtogs/__/so sor de rtogs gal te bsgoms pa ni/__/'bras bu myang 'das thob pa'i rgyu de yin/__rgyu gzhan gang yin der ni zhi mi 'gyur/__/zhes rjes su 'gro ldog gnyis ka nges pa'i sgo nas bdag med pa'i don la so sor rtog pa'i shes rab thar pa'i sgo dam par gsungs so/__/gnas lugs sgra dang rtogs pa'i yul min par gsungs pa/__dper na bu ram gyi ro 'di 'dra zhig yod ces bshad kyang lces myong ba ji bzhin par tshig la brten nas go mi nus pa bzhin du 'phags pa'i mnyam gzhag gis thugs su chud pa ji bzhin pa stong nyid ston pa'i tshig gis mtshon mi nus pa la bzhed mchi pas de ltar na legs so/__/'on kyang sgra rtog gi yul gtan mi rung ba byar mi rung ste/__gzhan du tshogs sbyor ba'i de kho na nyid don spyi'i sgo nas rtogs par gsungs pa mi 'thad par 'gyur zhing /__go bar mi nus pa'i don la 'di'i don yin zhes rtog ldan slob ma la 'chad par yang mi rigs te/__ci tsam bshad kyang go mi nus pa'i phyir ro/__/zhes gsungs so//____//_!_ paN chen blo bzang chos rgyan gyi rnam thar nor bu'i phreng ba las/__'gal byed kyi lo de kha'i nang du dgos pa'i dbang gis gsang ba'i slob dpon zhig la/__rnying lugs/__gshed dmar/__tshe bdag__/bka' brgyad gsang ba yongs rdzogs dang /__bde 'dus kyi dbang lung sogs rnying ma'i chos skor mang po zhus/__zhes snang ngo /___/__!_bod 'dre srin gdul dka' 'dul mdzad pa'i/__/dpal mthu stobs dbang phyug pad+ma 'byung /__/mgon khyod kyi ye shes sgyu ma'i 'phrul/__/thugs brtse bas gzigs shig a ti sha__/zhes dang /___/__!_dus der bsnyen rdzogs sgrub mi brgya phrag tu nyer bar byung bas/__du ma mkhan po gcig pa gsum pa man chad gcig gis gcig bsnyen par rdzogs par byar rung ngo /__/zhes mdo rtsa las gsungs pa bzhin/__khang pa lho byang gnyis su dkyil 'khor pa so sor bcad pa'i mtshams su 'dug ste/__du ma mkhan po gcig pa'i tshogs bsnyen par rdzogs pa sgrub dgos pa 'ga' zhig byung /__zhes so/___/__!_gsang sngags rnying ma'i gdams pa bdud rtsi'i chus/__/skal bzang byas pa grub ba'i ya mtshan gyis/__/snang srid zil gnon dam can bran du khol/__/rnal 'byor dbang phyug zhabs la gsol ba 'debs/___/__!_zhing mchog bde ba can gyi 'dren pa mchog__/snang ba mtha' yas ye shes zlos gar las/__/mtsho las skyes pa'i rdo rje'i sprul pa'i sku/__/bstan pa'i nyi ma mchog la gsol ba 'debs/__/de nyid thugs rje chen po'i rnam rol ni/__/blo bzang chos kyi rgyal mtshan 'dzin pa'i dpal/__/zhes gsungs/___/__!