JKW-KABUM-04-NGA-001-016

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 16, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

རྒྱུད་སྡེ་འོག་མའི་རས་རིས་དང་སྔགས་ཀྱི་ཕན་ཡོན་སོགས།

སྒྲུབ་པ་དང་། སྒྲུབ་ཆེན་གྱི་སྐབས་སུ། བསྐྱེད་རིམ་ཕྲ་བ་ཕྱག་རྒྱ་སྤྲོས་བཅས་དང་འབྲེལ་བར། རྫོགས་རིམ་དབང་གོང་མ་གཉིས་ཀྱི་ལམ་དང་རིམ་བཞིན་ཟུང་འབྲེལ་དུ་བསྒོམས་པས་དབང་པོ་ལྔ་དང་སྟོབས་ལྔས་བསྡུས་པའི་སྦྱོར་ལམ་བཞི་བགྲོད་དེ། རྒྱུད་ལས། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་ནོ། །ཞེས་གསུངས་པའི་ཕྱིར། དེ་ལྟ་བུའི་ཏིང་ངེ་འཛིན་གྱིས་མཐོང་ལམ་རྣམ་སྨིན་རིག་འཛིན་དང་། ཚེ་དབང་། མཐར་ལམ་ལྷུན་གྲུབ་རིག་འཛིན་རྣམས་རིམ་གྱིས་ཐོབ་སྟེ་འབྲས་བུ་ལ་སྦྱོར་བའི་ཚུལ། ཇི་སྐད་དུ། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་བ། །རིག་འཛིན་རྒྱལ་བའི་ཞིང་དུ་གྲགས། །ཞེས་རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་འཛིན། བསྐྱེད་རིམ་ཡན་ཏིང་འཛིན། ལག་བཞི། ལམ་གྱུར་འབྲས་བུའི་མཚན་ཉིད་རིག་འཛིན་རྣམ་པ་བཞི། ལམ་རྒྱུད་ཀྱི་དངོས་པོ་ཐམས་ཅད་མཚན་ཉིད་གསུམ་དུ་བསྡུ་བའི་ཚུལ་དཔལ་ལྡན་ཟུར་པའི་བཤད་སྲོལ་ལས་རྒྱ་ཆེར་ཕྱེ་བ་ལྟར་རོ། །བསྐྱེད་རིམ་མཆོག་ཏུ་གཅེས་པའི་ཚུལ། །གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་སྟོང་འཛིན་གྱི་བློ། བཏུལ་ནས་སུ། །སྔགས་དང་བསྐྱེད་རིམ། ཕྱག་རྒྱ་རབ་བརྟན་ནས། དངོས་གྲུབ་ཡ་མཚན་ཆེན་པོར་འགྱུར། ཞེས་སོ། །མངྒ་ལཾ།། །། ༈ སྤྱོད་འཇུག་ལས། སྟོང་ཉིད་བག་ཆགས་གོམས་པས་ནི། །དངོས་པོའི་ངར་འཛིན་པ། བག་ཆགས་སྤོང་འགྱུར་ཞིང་། བློ་བྲལ། ཅི་ཡང་མེད་ཅེས་གོམས་པས་ནི། །དེ་ཡང་ཕྱིས་ནས་སྤོང་བར་འགྱུར། །ཞེས་དང་། བརྟག་བྱའི་དངོས་པོ་མི་དམིགས་པ། །དེ་ཚེ་དངོས་མེད་རྟེན་བྲལ་བས། །བློ་ཡི་མདུན་ན་ཅི་ལྟར་གནས། །གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །དབུ་མ་ཐལ་འགྱུར། ཞེས་དང་། སྒྱུ་དྲྭར། གང་གིས་དམིགས་མེད་མི་ཤེས་པས། །དེ་ཡིས་ཆོས་ཀྱི་དབྱིངས་མི་ཤེས། །དེ་ཕྱིར་དངོས་དང་དངོས་མེད་པ། །འཇིག་པའི་དམིགས་མེད་ཤེས་པར་གྱིས། ། ཞེས་སོ།། །། ༈ རྣམ་རྟོག་ཅི་ཤར་ཡང་རྡོ་ཚན་གྱི་སྟེང་དུ་ཁ་བ་བབས་པ་ལྟ་བུ་ཞིག་དགོས། རྣམ་ཤེས་སྟོང་པ་ནི་ཁོ་རང་གི་གནས་ཚུལ་ཙམ། རིག་པ་སྟོང་པ་ནི་ལྟ་བས་ངེས་པ་རྙེད་པ། རྣམ་ཤེས་གསལ་བ་ནི་ཡུལ་རྐྱེན་དང་འཕྲད་ཚེ་བསླད་པ། རིག་པ་གསལ་བ་ནི་སྟོང་པའི་གོ་མ་འགགས་བཞིན་ལ་ཡུལ་རྐྱེན་གྱིས་མ་གོས་པ་སྟེ་ཆུ་དང་དངུལ་ཆུ་ས་ལ་ལྷུང་བ་ལྟ་བུའོ། །རྣམ་རྟོག་སྔ་ཕྱི་བར་གསུམ་ཅི་ཤར་ཡང་མེ་ལོང་དྭངས་པའི་ངོས་ལ་གཟུགས་བརྙན་འཆར་བ་ལྟ་བུ་སྟེ། ད་ལྟར་གཟུགས་ཤར་ཡང་ཤར་དུས་ནས་རང་བཞིན་མེད་པ་ལྟ་བུའོ།། །། ༈ ཐོད་རྒལ་གྱི་སྐབས། ནང་གི་རིག་པ་ཆུ་ལྟ་བུ། ཉི་ཟེར་ཕོག་པས་ཆུའི་འོད་ལོགས་སུ་ཕོག་པ་ལྟར་སྒྲོན་མ་མཐོང་བའོ། །ཐིག་ལེ་ཁྲིག་གེར་བརྟན་དུས་རླུང་སེམས་དབུ་མར་ཚུད་པའོ། །ཡིད་བཞིན་རིན་པོ་ཆེའི་མཛོད་འགྲེལ་ལས། འཇིག་རྟེན་ན་ཡུལ་རྫུན་པ་དངོས་མེད་མེད་སྣང་བ་ཉིད་བློ་འཁྲུལ་པར་འཇོག་པ་ཡིན་ཏེ། རྨི་ལམ་གྱི་ཤེས་པ་བཞིན་ནོ། །དངོས་པོར་སྣང་བ་ཉིད་མ་འཁྲུལ་བར་འཇོག་པ་ཡིན་ཏེ་སད་པའམ་ཟླ་བ་གཅིག་འཛིན་གྱི་ཤེས་པ་བཞིན་ནོ། །དེ་བས་ན་སྔོ་སོང་ཚེ་ན། སེམས་ཉིད་མ་ཡིན་ཏེ་དོན་དུ་སྣང་བའི་ཕྱིར་རོ། །ཁྱབ་པ་མེད་ན། དོན་དུ་སྣང་བ་འཁྲུལ་ལམ་མ་འཁྲུལ། མ་འཁྲུལ་ན་དེ་སེམས་སུ་མི་རུང་སྟེ། མ་འཁྲུལ་བ་ཐམས་ཅད་ཀྱི་ཡུལ་དེ་ཁོ་ན་ལྟར་འཛིན་པས་ན་དོན་སྣང་ཉིད་དོན་དངོས་སུ་བདེན་པའི་ཕྱིར་རོ། །འཁྲུལ་ན་སེམས་སུ་མི་འཐད་དེ་དོན་སྣང་རྫུན་ཞིང་། རྫུན་པ་དངོས་མེད་ཡིན་པས་དངོས་པོ་ཙམ་ཁེགས་པས་སེམས་ཀྱི་དངོས་པོ་མི་སྲིད་པའི་ཕྱིར་རོ། །ཞེས་དང་། གཅིག་དང་ཐ་དད་དུ་མི་འཐད་པ་ནི་ཤེས་པ་དང་རྣམ་པ་སོ་སོར་བདེན་པར་མི་རུང་སྟེ། ཡུལ་མ་རིག་པ་ལ་ཤེས་པའི་མཚན་ཉིད་མེད་པའི་ཕྱིར་དང་། རྣམ་ཤེས་ལུས་ཀྱི་ཕྱིར་ཐོན་པས་ཤི་བར་ཐལ་བའི་ཕྱིར་དང་། སེམས་མིག་གིས་མཐོང་བ་དང་སྲང་དུ་གཞལ་དུ་རུང་བར་ཐལ་བའི་ཕྱིར་དང། རི་དང་ཤིང་ལ་སོགས་པས་ཚུར་རང་རང་རིག་པར་ཐལ། རང་གིས་དེ་དག་རིག་པའི་ཕྱིར། ཁྱབ་པ་མེད་ན་རི་ལ་སོགས་པ་རང་གི་ཤེས་པ་ཡིན་པ་ཉམས་སོ། །ཞེས་དང་། ཚུལ་འདིས་སྣང་བ་སེམས་སུ་འདོད་པ་དང་། འགྲོ་བ་ཐམས་ཅད་ཤེས་རྒྱུད་གཅིག་པར་སྨྲ་བའི་གཏི་མུག་ཅན་རྣམས་བཀག་པ་ཡིན་ནོ། །ཁོ་བོ་ཅག་ནི་འཁྲུལ་ངོར་སྣང་བ་འདི་ཉིད་ཇི་ལྟར་སྣང་བཞིན་པའི་རྟེན་འབྲེལ་དུ་སྣང་བ་ཉིད་ཀྱིས་སེམས་དང་སེམས་ལས་གཞན་དུའང་ཅུང་ཟད་བདེན་པར་མི་འདོད་དེ་རྨི་ལམ་བཞིན་ནོ། །ཞེས་སོ། ། ༈

ལས་སྒྲིབ་རྣམ་སྦྱོང་གི་གཟུངས་ལས། གང་ཞིག་སྙིང་རྗེ་ཆེན་པོས་ནོན་ཏེ། རི་དྭགས་བྱ་དང་མི་མ་ཡིན་པ་རྣམས་ཀྱང་རུང་སྟེ། འཆི་བའི་རྣ་ཁུང་དུ་བརྗོད་ན་དེ་ངན་སོང་དུ་འགྲོ་བར་མི་འགྱུར་རོ། །ཞེས་དང་། མཚམས་མེད་པ་ལྔ་བྱེད་པའམ། དམ་པའི་ཆོས་སྤོང་བའམ། འཕགས་པ་ལ་སྐུར་པ་བཏབ་པ་ཡང་རུང་སྟེ། འཆི་ཀར་རྩིག་པ་ལ་གཟུངས་སྔགས་འདི་བྲིས་པ་མཐོང་ནས་དེའི་ལས་ཀྱི་སྒྲིབ་པ་ཐམས་ཅད་ཟད་པར་འགྱུར་ན། འདོན་པ་དང་བཟླས་བརྗོད་བྱེད་པ་ལྟ་ཅི་སྨོས་ཏེ། དེ་བཞིན་གཤེགས་པ་དེ་ཉིད་བྱོན་ནས་འདི་སྐད་དུ། རིགས་ཀྱི་བུ་ཚུར་ངའི་གན་དུ་ཤོག་ཅེས་ཀྱང་གསུང་བར་འགྱུར་རོ། །ཞེས་ཐོས་གྲོལ་དང་། མཐོང་གྲོལ་བསྟན། གཞན་ཡང་དོན་ཞགས་ཀྱི་ཆོ་ག་ཞིབ་མོ་དང་། སྒྲོལ་མ་རལ་པ་གྱེན་བརྫེས་ཀྱི་རྟོགས་པ་སོགས་ལས་བྲིས་སྐུའི་ཆོ་ག་དང་། རིལ་བུ་དང་། རྫས་ལ་བརྟེན་ནས་རིག་འཛིན་སྒྲུབ་པའི་ཚུལ་སོགས་ཤིན་ཏུ་མཐའ་ཡས་པ་བསྟན། སོར་འབྲང་མའི་མདོ་ལས་བཏགས་གྲོལ་དང་། ཇོ་བོ་རྗེའི་གྲོང་ཁྱེར་རྒྱུན་གཅོད་ཀྱི་འཁོར་ལོར་གྲགས་པའི་མཐའ་གྲོལ་སོགས་རྒྱ་ཆེར་གསུངས། ཁྱད་པར་དོན་ཞགས་ཀྱི་ཆོ་ག་ཞིབ་མོ་ལས། གསང་སྔགས་ཨོཾ་ཞེས་བྱ་བ་དྲན་ནས་ཚེ་འཕོས་པ་ནི་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར། ཞེས་སོགས་ཡི་གེ་གཅིག་པ་ནས་བཅུ་པའི་བར་གྱི་ཕན་ཡོན་རྒྱ་ཆེར་བསྟེན་པ་ལས་ཡི་གེ་བཅུ་པ་ནི། ཨོཾ་པདྨོ་ཥྞཱི་ཥ་བི་མ་ལེ་ཧཱུྃ་ཕཊ། གསང་སྔགས་སྙིང་པོ་ཡི་གེ་བཅུ་པ་འབུམ་བཟླས་བརྗོད་བྱས་ན་ཕྱིར་མི་ལྡོག་པ་ཉིད་དུ་ས་བཅུ་པ་ལ་གནས་པར་འགྱུར་ཞིང་། ལྷ་དང་མིའི་སྐྱེ་དགུ་དག་འདི་ནི་དེ་བཞིན་གཤེགས་པའོ། །ཞེས་བརྗོད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར། ཞེས་སོགས་དང་། སྙིང་པོ་བཅུ་པོ་ལན་གཅིག་དྲན་ནམ། ཀློག་གམ། མིང་བཟུང་པའང་དྲན་ནམ། ལག་ན་རྡོ་རྗེ། དུས་ཚིགས་གཅིག་ཏུ་དྲན་པ་ཙམ་གྱིས་ཀྱང་། དེའི་མཚམས་མེད་བྱེད་པ། མནར་མེད་གཞོལ་བ། བསྐལ་པར་གནས་པ་ཡང་དེས་ཐམས་ཅད་རྣམ་པར་དག་པར་འགྱུར་ལ། སྡིག་པ་དང་སྒྲིབ་པ་ཐམས་ཅད་ཟད་པར་འགྱུར་ལུས་ཡོངས་སུ་དག་ཅིང་དྲི་མ་མེད་པར་འགྱུར། སྒྲིབ་པ་དང་སྡིག་པ་བྲལ་བར་འགྱུར། ཚེ་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་བརྫུས་ཏེ་སྐྱེ་བར་འགྱུར། ཚེ་རབས་སུ་ཚེ་རབས་དྲན་པར་འགྱུར། ནམ་ཡང་ངན་འགྲོར་འགྲོ་བར་མི་འགྱུར། ཞེས་སོགས་རྒྱ་ཆེར་གསུངས་པ་དང་། ལག་ན་རྡོ་རྗེ། དེ་བས་ན་སེམས་ཅན་ཐམས་ཅད་ཀྱི་དོན་དུ་ཉིན་རེ་བཞིན་གཞན་མི་སྨྲ་བར་ལན་བདུན་དྲན་པར་བྱའོ། །སེམས་ཅན་གང་ལ་ལ་སེམས་ཅན་དམྱལ་བར་གཞོལ་བ་ཤི་བ་དང་། དགེ་སློང་ལ་ལ་བསླབ་པའི་སྡོམ་པ་དང་། ཚུལ་ཁྲིམས་ཀྱི་སྡོམ་པ་རལ་བ་དང་། མཁན་པོ་དང་སློབ་དཔོན་ལ་གུས་པར་མ་བྱས་པ་ཤི་བ་དེའི་དོན་དུ་བྱེ་མ་གཙང་མ་བླངས་ལ་ལན་བདུན་བཟླས་བརྗོད་བྱས་ནས། དུར་ཁྲོད་དམ། རོ་བསྲེགས་སའམ། མཆད་པ་དེར་བྱེ་མ་གཏོར་བར་བྱའོ། །གང་དང་གང་ན་སེམས་ཅན་གང་དག་གི་རུས་པ་ཡོད་པར་བྱེ་མ་གཏོར་མ་ཐག་ཏུ་དེ་དང་དེར་བྱེ་མ་བབས་པའི་སེམས་ཅན་དམྱལ་བའམ། ཡི་དྭགས་སམ། ཤ་ཟར་སྐྱེས་པའམ། སྲིན་པོའི་སྐྱེ་གནས་སུ་སྐྱེས་ན་དེའི་མོད་ལ་ཚེ་བརྗེས་ནས་མཐོ་རིས་སུ་གཞོལ་བར་འགྱུར་ཞིང་། ནམ་ཡང་སེམས་ཅན་དམྱལ་བར་གཞོལ་བར་མི་འགྱུར་རོ། །ཡང་ན་གྲོ་ག་ལ་བྲིས་ནས་མཆོད་རྟེན་གྱི་ནང་དུ་བཅུག་པའི་གནས་དེར་རྐང་གཉིས་པའམ། རྐང་པ་བཞི་པ་དག་ཉེ་བར་འོངས་པ་དེ་དག་ཐམས་ཅད་གྲིབ་མ་ཕོག་པ་ཙམ་གྱིས་སྡིག་པ་དང་སྒྲིབ་པ་ཐམས་ཅད་རྣམ་པར་དག་ཅིང་། ཐམས་ཅད་མཐོ་རིས་སུ་གཞོལ་བར་འགྱུར་རོ། །ཐ་ན་རི་དྭགས་དང་། བྱ་དང་། ཐ་ན་ལྡང་སྐོ་སྐ་དང་། ནེའུ་ལེ་དང་། སྡིག་པ་དང་། སྦྲུལ་དང་། ཁྱི་དང་། རུ་སྦལ་དང་། ལག་འགྲོ་དང་། དཀྱིལ་འཁོར་དེ་ལ་གྲིབ་མ་བབས་པ་ཙམ་གྱིས་ཐམས་ཅད་ཀྱི་ལས་ཀྱི་སྒྲིབ་པ་རྣམས་རྣམ་པར་དག་པར་འགྱུར་ཞིང་། དེ་དག་ཐམས་ཅད་མཐོ་རིས་ཀྱི་འཇིག་རྟེན་དུ་གཞོལ་བར་འགྱུར་རོ། །དུང་ལ་ལན་བདུན་བཟླས་བརྗོད་བྱས་ནས་གནས་མཐོན་པོར་བུས་ན་དུང་དེའི་སྒྲ་ཐོས་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། རི་དྭགས་དང་། བྱ་དང་། དུད་འགྲོའི་སྐྱེ་གནས་སུ་གཏོགས་པ་དེ་དག་ཐམས་ཅད་མཐོ་རིས་ཀྱི་འཇིག་རྟེན་དུ་གཞོལ་བར་འགྱུར་རོ། །གང་དག་ཚུལ་ཁྲིམས་ཡོངས་སུ་དག་པ་དང། སེམས་ཅན་སྦྱིན་པ་ལ་དགའ་བ་དང་། གང་དག་བསྙེན་གནས་ལ་ཉེ་བར་གནས་པ་དང་། གང་དག་སྐྱབས་གསུམ་བཟུང་བ་དང་། གང་དག་བྱང་ཆུབ་སེམས་དཔའི་སྡོམ་པས་བསྡམས་པ་དེ་དག་ཀྱང་། དུང་གི་སྒྲ་ཐོས་ནས་སེམས་ཅན་དེ་ཐམས་ཅད་ཕྱིར་མི་ལྡོག་པར་འགྱུར་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་ལ། ཚེ་བརྗེས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། ཚེ་རབས་སུ་ཚེ་རབས་དྲན་པར་འགྱུར་རོ། །ཙནྡན་ལ་ལན་བདུན་བཟླས་བརྗོད་བྱས་ནས་དགེ་འདུན་གྱི་ཀུན་དགའ་ར་བའམ། མཆོད་རྟེན་གྱི་འཁོར་སའམ། དགེ་འདུན་གྱི་ནང་ངམ། སྐྱེ་བོ་མང་པོའི་ནང་ངམ། རྒྱལ་པོའི་ཕོ་བྲང་དུ་བདུགས་ན། གང་དག་དེར་དྲི་མནམས་པའི་སེམས་ཅན་དེ་དག་ཐམས་ཅད་སངས་རྒྱས་ཀྱི་སྐུ་ཡོངས་སུ་རྫོགས་པར་འགྱུར་རོ། །ཆོས་གོས་ལ་བདུགས་ནས་གང་གི་ལུས་ལ་གྱོན་པ་དེའི་སྡིག་པ་དང་སྒྲིབ་པ་ཐམས་ཅད་རྣམ་པར་འཇིག་པར་འགྱུར་རོ། །ལུས་ལ་བབས་པ་ཙམ་གྱིས་དྲི་མ་དང་། སེར་སྣ་དང་། སྐྱོན་ཐམས་ཅད་སྤོང་བར་འགྱུར་རོ། །གོས་བཅངས་བ་ཙམ་གྱིས་འཇིག་རྟེན་ཐམས་ཅད་དབང་དུ་འགྱུར་རོ། །བདག་ཉིད་ཀྱི་གོས་དེས་བདུགས་ནས་རྒྱལ་པོའི་ཕོ་བྲང་དུ་ཞུགས་ན། རྒྱལ་པོ་དང་། བཙུན་མོ་དང། འཁོར་དང་བཅས་པ་དབང་དུ་འགྱུར། མཆོད་གནས་ཆེན་པོར་འགྱུར། འཇིག་རྟེན་ཐམས་ཅད་ཀྱི་བླ་མར་ཡང་འགྱུར་རོ། །འཕགས་པའི་དགེ་འདུན་གྱི་ནང་དུ་ཞུགས་ན་དགེ་སློང་ཐམས་ཅད་ཀྱི་མཆོད་གནས་ཆེན་པོར་འོས་པར་འགྱུར་རོ། །སྐྱེ་བོ་མང་པོའི་ནང་དུ་ཞུགས་ན་ནོར་ཆེན་པོ་འཕེལ་བར་འགྱུར་ཞིང་། མཆོད་པ་ཆེན་པོའི་འོས་སུ་འགྱུར་རོ། །ཞེས་སོགས་དང་ཐུན་མོང་གི་ལས་སྒྲུབ་པ་རྒྱ་ཆེར་གསུངས་ཤིང་། གྲོང་ཁྱེར་གྱི་སྒོ་བཞིར་བདུགས་ན་ནད་ཡམས་འཁྲུག་རྩོད་སོགས་ཆད་པ་དང་། འབྲོག་དགོན་པར་བདུགས་ན་གཅན་གཟན་དང་། ཆོམ་རྐུན་སོགས་ཀྱི་འཇིགས་པ་ལས་གྲོལ་བ་དང་། རིམས་ཐམས་ཅད་ལ་བདུགས་ན་དེ་ལས་ཐར་པའི་བར་ཕན་ཡོན་བསམ་གྱིས་མི་ཁྱབ་པ་བསྟན་ལ། གཞན་ཡང་། གང་ཞིག་རིལ་བུ་དེ་དག་བརྟེན། །རིལ་བུ་ཐིག་ལེ་རྟག་བྱེད་པ། །དེ་བཞིན་གཤེགས་ཀུན་དགོངས་པར་མཛད། །འཕགས་པ་སྤྱན་རས་གཟིགས་ཀྱི་དབང་། །དེ་ཉིད་རིག་ལ་རྟག་ཏུ་ནི། །མཆོག་སྦྱིན་དུས་ཀུན་གཟིགས་པར་མཛད། །བསོད་ནམས་ཕུང་པོ་སྟོང་དག་ནི། །ཉི་མ་རེ་རེ་སོག་པར་བྱེད། །འཇིག་རྟེན་པ་ཡི་བདེ་སྤྱད་ཅིང་། །འཇིག་རྟེན་ཕ་རོལ་ཤིན་ཏུ་བདེ། །ཞེས་སོགས་རིལ་བུ་དང། ཐིག་ལེ་དང་། མི་སྣང་བ་དང་། ནམ་མཁའ་ལ་འགྲོ་བ་དང་། སྦྱིན་སྲེག་དང་། མིག་འཕྲུལ་དང་། དཀྱིལ་འཁོར་དང་། གཏོར་མ། བྲིས་སྐུ་དང་། ཕྱག་རྒྱ་དང་། སྔགས་ཀྱི་ཆོ་ག་མཐའ་ཡས་པར་གསུངས་སོ། །རས་རིས་ཀྱི་ཆོ་ག་ལས། དབུས་སུ་འཕགས་པ་སྤྱན་རས་གཟིགས་དབང་ཕྱུག་ཚངས་པའི་ཆ་བྱད་འཆང་བ་པདྨ་རྒྱས་པས་ཡོངས་སུ་བསྐོར་བར་བྱ་སྟེ། ཁོར་ཡུག་ཏུ་འོད་འདོམ་གང་པ་ཀུན་ནས་འབར་བའི་ཕྲེང་བ་ཅན་ཕྱག་བཞི་པ། ཞལ་གསུམ་པ་རལ་པའི་ཅོད་པན་གྱིས་བརྒྱན་པ། ཟླ་བ་ཚེས་པས་སྤྲས་པ། འོད་དཔག་མེད་ཀྱི་ཅོད་པན་འཆང་བ། མདུང་རྩེ་གསུམ་འཆང་བ། པདྨའི་འདབ་མ་རྣམ་པར་བཀྲ་བའི་པདྨའི་ཞགས་པ་འཆང་བ། ཕྱག་གཡོན་པ་པདྨ་འཆང་བ། པདྨའི་སྟེང་དུ་པདྨ་གཙུག་ཏོར་བྱའོ། །འདབ་མ་ཕྱེད་ཁ་བྱེ་བའི་དབུས་ཀྱི་འདབ་མ་ལ། འཕགས་པ་སྤྱན་རས་གཟིགས་དབང་ཕྱུག་མགུལ་ཡན་ཆད་ཙམ་ཅོད་པན་འཆང་བ། དབུ་འབར་བའི་སྙིང་པོར་ཡོད་པ་བྲི་བར་བྱའོ། །ཕྱག་གཅིག་ནི་དབུགས་འབྱིན་པ་འཆང་ཞིང་རིན་པོ་ཆེའི་ཆར་འབེབས་པ། །འབར་བའི་སྙིང་པོ་ཅན་རྒྱན་ཐམས་ཅད་ཀྱིས་རྣམ་པར་བརྒྱན་པ་སྣ་ཚོགས་པའི་གོས་འཆང་བར་བྱའོ། །ཞེས་སོགས་ནས། མཐོང་བ་ཙམ་གྱི་མོད་ལ་སྡུག་བསྔལ་དང་སྡིག་པ་དང་ངན་འགྲོ་ཐམས་ཅད་རྣམ་པར་ཉམས་པར་བྱེད་དོ། །ཐམས་ཅད་རབ་ཏུ་ཞི་བར་འགྱུར་རོ། །འགྲོ་བ་ཐམས་ཅད་གཅོད་པར་འགྱུར་རོ། །ཉེས་པ་ཐམས་ཅད་འཇོམས་པར་འགྱུར་རོ། །སྡིག་པ་དང་སྒྲིབ་པ་ཐམས་ཅད་དང་མཚམས་མེད་པ་ལྔ་ལས་རྣམ་པར་ཐར་པར་བྱེད་དོ། །མཐོང་བ་ཙམ་གྱི་མོད་ལ་དོན་ཡོད་པའི་དངོས་གྲུབ་སོ་སོར་ཐོབ་བོ། །ཞེས་སོགས་རྒྱ་ཆེར་གསུངས་སོ། །ཕྱག་རྒྱའི་ལེའུ་ལས། སྡིགས་མཛུབ་ཡོངས་སུ་དཀྲིས་པ་ལ་མཐེ་བོང་གི་སོར་མོ་དང་། གུང་མོའི་སོར་མོ་རབ་ཏུ་བརྐྱངས་ལ་ལྕགས་ཀྱུའི་རྣམ་པར་བཀུག་སྟེ་མིང་མེད་དང་། མཐེའུ་ཆུང་ལག་པའི་ནང་དུ་བཅུག་ནས་རྟག་ཏུ་སྙིང་གའི་གནས་སུ་བཞག་པར་བྱ་སྟེ། འདི་ནི་དོན་ཡོད་པ་པདྨ་གཙུག་ཏོར་གྱི་རྩ་བའི་གསང་སྔགས་དང་ཕྱག་རྒྱར་བརྗོད་དོ། །ཞེས་རྩ་བའི་དམ་རྒྱ་དང་། ཕྱག་རྒྱ་འདི་ཉིད་ལས་གཡས་པའི་འཛུབ་མོ་བརྐྱངས་ཏེ་རྩ་བའི་གསང་སྔགས་ལན་གཅིག་བརྗོད་དོ། །ཞེས་ལས་སྒྲུབ་པའི་ཕྱག་རྒྱ་དང་། ཕྱག་རྒྱ་འདི་ཉིད་ལས་མཛུབ་མོའི་སོར་མོ་གཉིས་བརྐྱངས་ལ་ལྕགས་ཀྱུའི་རྣམ་པ་ཙམ་དུ་བཀུག་པ་འདི་ནི། ཞེས་སྤྱན་དྲངས་པ་ནས་གཤེགས་སུ་གསོལ་བའི་བར་ཐམས་ཅད་ཀྱི་ཕྱག་རྒྱར་གསུངས་སོ། །སྔགས་ཀྱི་ལེའུ་ལས། ཨོཾ་ཨ་མོ་གྷ་ཧྲི་ད་ཡ་པདྨོ་ཥྞཱི་ཥ་སཱ་དྷ་ཡ། བྷ་ར་བྷ་ར་སཾ་བྷཱ་ར། མ་ཧཱ་པདྨེ་སྭཱ་ཧཱ། སྐུལ་བ་དང་སྤྱན་དྲང་པ་དང་གཤེགས་སུ་གསོལ་པའི་སྔགས་སོ། །ཞེས་དང་། ཨོཾ་པདྨོ་ཥྞཱི་ཨ་མོ་གྷ་ཛ་ལེ་སྭཱ་ཧཱ། ཁྲུས་བྱ་བའི་སྔགས། ཨོཾ་བཛྲ་ཨ་དྷིཥྛཱ་ཎ་པདྨེ་ཧཱུྃ། བྱིན་གྱིས་བརླབ་པའི་སྔགས་སོ། །ཨོཾ་པདྨོ་ཥྞཱི་ཥ་ཨ་མོ་གྷ་ཨ་བྷི་ཥིཉྩ་ཨཱཏྨ་ཤུདྡྷེ་ཧཱུྃ། དབང་བསྐུར་བའི་སྔགས་སོ། །ཨོཾ་ཨ་པ་རི་མི་ཏཱ་ཛྭ་ལ་པདྨེ་ཧཱུྃ། བགྲང་ཕྲེང་གི་སྔགས་སོ། །ཨོཾ་ཤ་ཏ་ས་ཧ་སྲ་ཛྭ་ལི་ཏ་པདྨེ་དྷ་ར་དྷ་ར་ཧཱུྃ། བཟླས་བརྗོད་ཀྱི་སྔགས་སོ། །ཞེས་སོགས་རྒྱ་ཆེར་གསུངས་སོ།། །། ༈

[edit]

rgyud sde 'og ma'i ras ris dang sngags kyi phan yon sogs/__ sgrub pa dang /__sgrub chen gyi skabs su/__bskyed rim phra ba phyag rgya spros bcas dang 'brel bar/__rdzogs rim dbang gong ma gnyis kyi lam dang rim bzhin zung 'brel du bsgoms pas dbang po lnga dang stobs lngas bsdus pa'i sbyor lam bzhi bgrod de/__rgyud las/__bsnyen pa dang ni nye bsnyen dang /__/sgrub pa dang ni sgrub chen no/__/zhes gsungs pa'i phyir/__de lta bu'i ting nge 'dzin gyis mthong lam rnam smin rig 'dzin dang /__tshe dbang /__mthar lam lhun grub rig 'dzin rnams rim gyis thob ste 'bras bu la sbyor ba'i tshul/__ji skad du/__shes 'jug mtshan nyid 'byor ba'i gzungs/_/'bras bu smin byed rgyu dang rkyen/__/nus mthu can du gang gyur ba/__/rig 'dzin rgyal ba'i zhing du grags/__/zhes rgyu shes pa'i mtshan nyid lta ba/__rkyen 'jug pa'i mtshan nyid ting 'dzin/__bskyed rim yan ting 'dzin/__lag bzhi/__lam gyur 'bras bu'i mtshan nyid rig 'dzin rnam pa bzhi/__lam rgyud kyi dngos po thams cad mtshan nyid gsum du bsdu ba'i tshul dpal ldan zur pa'i bshad srol las rgya cher phye ba ltar ro/__/bskyed rim mchog tu gces pa'i tshul/__/gang gis glang chen myos 'dra'i sems/__/mnyam par bzhag pas stong 'dzin gyi blo/__btul nas su/__/sngags dang bskyed rim/__phyag rgya rab brtan nas/__dngos grub ya mtshan chen por 'gyur/__zhes so/_/mang+ga laM//____//__! spyod 'jug las/__stong nyid bag chags goms pas ni/__/dngos po'i ngar 'dzin pa/__bag chags spong 'gyur zhing /__blo bral/__ci yang med ces goms pas ni/__/de yang phyis nas spong bar 'gyur/__/zhes dang /__brtag bya'i dngos po mi dmigs pa/__/de tshe dngos med rten bral bas/__/blo yi mdun na ci ltar gnas/__/gang tshe dngos dang dngos med dag__/blo yi mdun na mi gnas pa/__/de tshe rnam pa gzhan med pas/__/dmigs pa med par rab tu zhi/__/dbu ma thal 'gyur/__zhes dang /__sgyu drwar/__gang gis dmigs med mi shes pas/__/de yis chos kyi dbyings mi shes/__/de phyir dngos dang dngos med pa/__/'jig pa'i dmigs med shes par gyis/__/_zhes so//____//__! rnam rtog ci shar yang rdo tshan gyi steng du kha ba babs pa lta bu zhig dgos/__rnam shes stong pa ni kho rang gi gnas tshul tsam/__rig pa stong pa ni lta bas nges pa rnyed pa/__rnam shes gsal ba ni yul rkyen dang 'phrad tshe bslad pa/__rig pa gsal ba ni stong pa'i go ma 'gags bzhin la yul rkyen gyis ma gos pa ste chu dang dngul chu sa la lhung ba lta bu'o/__/rnam rtog snga phyi bar gsum ci shar yang me long dwangs pa'i ngos la gzugs brnyan 'char ba lta bu ste/__da ltar gzugs shar yang shar dus nas rang bzhin med pa lta bu'o//____//__! thod rgal gyi skabs/__nang gi rig pa chu lta bu/__nyi zer phog pas chu'i 'od logs su phog pa ltar sgron ma mthong ba'o/__/thig le khrig ger brtan dus rlung sems dbu mar tshud pa'o/__/yid bzhin rin po che'i mdzod 'grel las/__'jig rten na yul rdzun pa dngos med med snang ba nyid blo 'khrul par 'jog pa yin te/__rmi lam gyi shes pa bzhin no/__/dngos por snang ba nyid ma 'khrul bar 'jog pa yin te sad pa'am zla ba gcig 'dzin gyi shes pa bzhin no/__/de bas na sngo song tshe na/__sems nyid ma yin te don du snang ba'i phyir ro/__/khyab pa med na/__don du snang ba 'khrul lam ma 'khrul/__ma 'khrul na de sems su mi rung ste/__ma 'khrul ba thams cad kyi yul de kho na ltar 'dzin pas na don snang nyid don dngos su bden pa'i phyir ro/__/'khrul na sems su mi 'thad de don snang rdzun zhing /__rdzun pa dngos med yin pas dngos po tsam khegs pas sems kyi dngos po mi srid pa'i phyir ro/__/zhes dang /__gcig dang tha dad du mi 'thad pa ni shes pa dang rnam pa so sor bden par mi rung ste/__yul ma rig pa la shes pa'i mtshan nyid med pa'i phyir dang /__rnam shes lus kyi phyir thon pas shi bar thal ba'i phyir dang /__sems mig gis mthong ba dang srang du gzhal du rung bar thal ba'i phyir dang/__ri dang shing la sogs pas tshur rang rang rig par thal/__rang gis de dag rig pa'i phyir/__khyab pa med na ri la sogs pa rang gi shes pa yin pa nyams so/__/zhes dang /__tshul 'dis snang ba sems su 'dod pa dang /__'gro ba thams cad shes rgyud gcig par smra ba'i gti mug can rnams bkag pa yin no/__/kho bo cag ni 'khrul ngor snang ba 'di nyid ji ltar snang bzhin pa'i rten 'brel du snang ba nyid kyis sems dang sems las gzhan du'ang cung zad bden par mi 'dod de rmi lam bzhin no/__/zhes so/____/_! las sgrib rnam sbyong gi gzungs las/__gang zhig snying rje chen pos non te/__ri dwags bya dang mi ma yin pa rnams kyang rung ste/__'chi ba'i rna khung du brjod na de ngan song du 'gro bar mi 'gyur ro/_/zhes dang /__mtshams med pa lnga byed pa'am/__dam pa'i chos spong ba'am/__'phags pa la skur pa btab pa yang rung ste/__'chi kar rtsig pa la gzungs sngags 'di bris pa mthong nas de'i las kyi sgrib pa thams cad zad par 'gyur na/__'don pa dang bzlas brjod byed pa lta ci smos te/__de bzhin gshegs pa de nyid byon nas 'di skad du/__rigs kyi bu tshur nga'i gan du shog ces kyang gsung bar 'gyur ro/__/zhes thos grol dang /__mthong grol bstan/__gzhan yang don zhags kyi cho ga zhib mo dang /__sgrol ma ral pa gyen brdzes kyi rtogs pa sogs las bris sku'i cho ga dang /__ril bu dang /__rdzas la brten nas rig 'dzin sgrub pa'i tshul sogs shin tu mtha' yas pa bstan/__sor 'brang ma'i mdo las btags grol dang /__jo bo rje'i grong khyer rgyun gcod kyi 'khor lor grags pa'i mtha' grol sogs rgya cher gsungs/__khyad par don zhags kyi cho ga zhib mo las/__gsang sngags oM zhes bya ba dran nas tshe 'phos pa ni 'jig rten gyi khams bde ba can du skye bar 'gyur/__zhes sogs yi ge gcig pa nas bcu pa'i bar gyi phan yon rgya cher bsten pa las yi ge bcu pa ni/__oM pad+mo Sh+NI Sha bi ma le hU~M phaT/__gsang sngags snying po yi ge bcu pa 'bum bzlas brjod byas na phyir mi ldog pa nyid du sa bcu pa la gnas par 'gyur zhing /__lha dang mi'i skye dgu dag 'di ni de bzhin gshegs pa'o/__/zhes brjod la bla na med pa yang dag par rdzogs pa'i byang chub las phyir mi ldog par 'gyur/__zhes sogs dang /__snying po bcu po lan gcig dran nam/__klog gam/__ming bzung pa'ang dran nam/__lag na rdo rje/__dus tshigs gcig tu dran pa tsam gyis kyang /__de'i mtshams med byed pa/__mnar med gzhol ba/__bskal par gnas pa yang des thams cad rnam par dag par 'gyur la/__sdig pa dang sgrib pa thams cad zad par 'gyur lus yongs su dag cing dri ma med par 'gyur/__sgrib pa dang sdig pa bral bar 'gyur/__tshe 'phos nas 'jig rten gyi khams bde ba can du brdzus te skye bar 'gyur/__tshe rabs su tshe rabs dran par 'gyur/__nam yang ngan 'gror 'gro bar mi 'gyur/__zhes sogs rgya cher gsungs pa dang /__lag na rdo rje/__de bas na sems can thams cad kyi don du nyin re bzhin gzhan mi smra bar lan bdun dran par bya'o/__/sems can gang la la sems can dmyal bar gzhol ba shi ba dang /__dge slong la la bslab pa'i sdom pa dang /__tshul khrims kyi sdom pa ral ba dang /__mkhan po dang slob dpon la gus par ma byas pa shi ba de'i don du bye ma gtsang ma blangs la lan bdun bzlas brjod byas nas/__dur khrod dam/__ro bsregs sa'am/__mchad pa der bye ma gtor bar bya'o/__/gang dang gang na sems can gang dag gi rus pa yod par bye ma gtor ma thag tu de dang der bye ma babs pa'i sems can dmyal ba'am/__yi dwags sam/__sha zar skyes pa'am/__srin po'i skye gnas su skyes na de'i mod la tshe brjes nas mtho ris su gzhol bar 'gyur zhing /__nam yang sems can dmyal bar gzhol bar mi 'gyur ro/__/yang na gro ga la bris nas mchod rten gyi nang du bcug pa'i gnas der rkang gnyis pa'am/__rkang pa bzhi pa dag nye bar 'ongs pa de dag thams cad grib ma phog pa tsam gyis sdig pa dang sgrib pa thams cad rnam par dag cing /__thams cad mtho ris su gzhol bar 'gyur ro/__/tha na ri dwags dang /__bya dang /__tha na ldang sko ska dang /__ne'u le dang /__sdig pa dang /__sbrul dang /__khyi dang /__ru sbal dang /__lag 'gro dang /__dkyil 'khor de la grib ma babs pa tsam gyis thams cad kyi las kyi sgrib pa rnams rnam par dag par 'gyur zhing /__de dag thams cad mtho ris kyi 'jig rten du gzhol bar 'gyur ro/__/dung la lan bdun bzlas brjod byas nas gnas mthon por bus na dung de'i sgra thos pa'i skyes pa dang /__bud med dang /__khye'u dang /__bu mo dang /__ri dwags dang /__bya dang /__dud 'gro'i skye gnas su gtogs pa de dag thams cad mtho ris kyi 'jig rten du gzhol bar 'gyur ro/__/gang dag tshul khrims yongs su dag pa dang/__sems can sbyin pa la dga' ba dang /__gang dag bsnyen gnas la nye bar gnas pa dang /__gang dag skyabs gsum bzung ba dang /__gang dag byang chub sems dpa'i sdom pas bsdams pa de dag kyang /__dung gi sgra thos nas sems can de thams cad phyir mi ldog par 'gyur zhing /__bla na med pa yang dag par rdzogs pa'i byang chub thob par 'gyur la/__tshe brjes nas 'jig rten gyi khams bde ba can du skye bar 'gyur te/__tshe rabs su tshe rabs dran par 'gyur ro/__/tsan+dan la lan bdun bzlas brjod byas nas dge 'dun gyi kun dga' ra ba'am/__mchod rten gyi 'khor sa'am/__dge 'dun gyi nang ngam/__skye bo mang po'i nang ngam/__rgyal po'i pho brang du bdugs na/__gang dag der dri mnams pa'i sems can de dag thams cad sangs rgyas kyi sku yongs su rdzogs par 'gyur ro/__/chos gos la bdugs nas gang gi lus la gyon pa de'i sdig pa dang sgrib pa thams cad rnam par 'jig par 'gyur ro/__/lus la babs pa tsam gyis dri ma dang /__ser sna dang /__skyon thams cad spong bar 'gyur ro/__/gos bcangs ba tsam gyis 'jig rten thams cad dbang du 'gyur ro/__/bdag nyid kyi gos des bdugs nas rgyal po'i pho brang du zhugs na/__rgyal po dang /__btsun mo dang/__'khor dang bcas pa dbang du 'gyur/__mchod gnas chen por 'gyur/__'jig rten thams cad kyi bla mar yang 'gyur ro/__/'phags pa'i dge 'dun gyi nang du zhugs na dge slong thams cad kyi mchod gnas chen por 'os par 'gyur ro/__/skye bo mang po'i nang du zhugs na nor chen po 'phel bar 'gyur zhing /__mchod pa chen po'i 'os su 'gyur ro/_/zhes sogs dang thun mong gi las sgrub pa rgya cher gsungs shing /__grong khyer gyi sgo bzhir bdugs na nad yams 'khrug rtsod sogs chad pa dang /__'brog dgon par bdugs na gcan gzan dang /__chom rkun sogs kyi 'jigs pa las grol ba dang /__rims thams cad la bdugs na de las thar pa'i bar phan yon bsam gyis mi khyab pa bstan la/__gzhan yang /__gang zhig ril bu de dag brten/__/ril bu thig le rtag byed pa/__/de bzhin gshegs kun dgongs par mdzad/__/'phags pa spyan ras gzigs kyi dbang /__/de nyid rig la rtag tu ni/__/mchog sbyin dus kun gzigs par mdzad/__/bsod nams phung po stong dag ni/__/nyi ma re re sog par byed/__/'jig rten pa yi bde spyad cing /__/'jig rten pha rol shin tu bde/__/zhes sogs ril bu dang/__thig le dang /__mi snang ba dang /__nam mkha' la 'gro ba dang /__sbyin sreg dang /__mig 'phrul dang /__dkyil 'khor dang /__gtor ma/__bris sku dang /__phyag rgya dang /__sngags kyi cho ga mtha' yas par gsungs so/__/ras ris kyi cho ga las/__dbus su 'phags pa spyan ras gzigs dbang phyug tshangs pa'i cha byad 'chang ba pad+ma rgyas pas yongs su bskor bar bya ste/__khor yug tu 'od 'dom gang pa kun nas 'bar ba'i phreng ba can phyag bzhi pa/__zhal gsum pa ral pa'i cod pan gyis brgyan pa/__zla ba tshes pas spras pa/__'od dpag med kyi cod pan 'chang ba/__mdung rtse gsum 'chang ba/__pad+ma'i 'dab ma rnam par bkra ba'i pad+ma'i zhags pa 'chang ba/__phyag g.yon pa pad+ma 'chang ba/__pad+ma'i steng du pad+ma gtsug tor bya'o/__/'dab ma phyed kha bye ba'i dbus kyi 'dab ma la/__'phags pa spyan ras gzigs dbang phyug mgul yan chad tsam cod pan 'chang ba/__dbu 'bar ba'i snying por yod pa bri bar bya'o/__/phyag gcig ni dbugs 'byin pa 'chang zhing rin po che'i char 'bebs pa/__/'bar ba'i snying po can rgyan thams cad kyis rnam par brgyan pa sna tshogs pa'i gos 'chang bar bya'o/__/zhes sogs nas/__mthong ba tsam gyi mod la sdug bsngal dang sdig pa dang ngan 'gro thams cad rnam par nyams par byed do/__/thams cad rab tu zhi bar 'gyur ro/__/'gro ba thams cad gcod par 'gyur ro/__/nyes pa thams cad 'joms par 'gyur ro/__/sdig pa dang sgrib pa thams cad dang mtshams med pa lnga las rnam par thar par byed do/__/mthong ba tsam gyi mod la don yod pa'i dngos grub so sor thob bo/__/zhes sogs rgya cher gsungs so/__/phyag rgya'i le'u las/__sdigs mdzub yongs su dkris pa la mthe bong gi sor mo dang /__gung mo'i sor mo rab tu brkyangs la lcags kyu'i rnam par bkug ste ming med dang /__mthe'u chung lag pa'i nang du bcug nas rtag tu snying ga'i gnas su bzhag par bya ste/__'di ni don yod pa pad+ma gtsug tor gyi rtsa ba'i gsang sngags dang phyag rgyar brjod do/__/zhes rtsa ba'i dam rgya dang /__phyag rgya 'di nyid las g.yas pa'i 'dzub mo brkyangs te rtsa ba'i gsang sngags lan gcig brjod do/_/zhes las sgrub pa'i phyag rgya dang /__phyag rgya 'di nyid las mdzub mo'i sor mo gnyis brkyangs la lcags kyu'i rnam pa tsam du bkug pa 'di ni/__zhes spyan drangs pa nas gshegs su gsol ba'i bar thams cad kyi phyag rgyar gsungs so/__/sngags kyi le'u las/__oM a mo g+ha hri da ya pad+mo Sh+NI Sha sA d+ha ya/__b+ha ra b+ha ra saM b+hA ra/__ma hA pad+me swA hA/__skul ba dang spyan drang pa dang gshegs su gsol pa'i sngags so/__/zhes dang /__oM pad+mo Sh+NI a mo g+ha dza le swA hA/__khrus bya ba'i sngags/__oM badz+ra a d+hiSh+ThA Na pad+me hU~M/__byin gyis brlab pa'i sngags so/__/oM pad+mo Sh+NI Sha a mo g+ha a b+hi Shiny+tsa At+ma shud+d+he hU~M/__dbang bskur ba'i sngags so/__/oM a pa ri mi tA dz+wa la pad+me hU~M/__bgrang phreng gi sngags so/__/oM sha ta sa ha sra dz+wa li ta pad+me d+ha ra d+ha ra hU~M/__bzlas brjod kyi sngags so/__/zhes sogs rgya cher gsungs so//____//__!