View source for JKW-KABUM-20-WA-001-060

{{Text
|classification=Tibetan Publications
|subclass=Tibetan Texts
|fulltitletib=ས་སྐྱོང་སེ་ནཱ་ཤུ་བྷ་ནས་སྲིད་སྐྱོང་རྭ་བསྒྲེང་ནོ་མི་ཧན་ཆེན་པོར་ཁྲི་ཕེབས་ཀྱི་ལེགས་འབུལ་སྟོབ་པའི་ཡི་གེ།
|fulltitle=sa skyong se nA shu b+ha nas srid skyong rwa bsgreng no mi han chen por khri phebs kyi legs 'bul stob pa'i yi ge
|citation=[['jam dbyangs mkhyen brtse'i dbang po]]. ''sa skyong se nA shu b+ha nas srid skyong rwa bsgreng no mi han chen por khri phebs kyi legs 'bul stob pa'i yi ge''. In '''jam dbyangs mkhyen brtse'i dbang po'i bka' 'bum'', Vol. 20: 111-115. Khams sde dge rdzong sar dgon: Rdzong sar blo gros phun tshogs, 2020.
|collectiontitletib=མཁྱེན་བརྩེའི་བཀའ་འབུམ་
|collectiontitle=mkhyen brtse'i bka' 'bum
|author='jam dbyangs mkhyen brtse'i dbang po
|authortib=འཇམ་དབྱངས་མཁྱེན་བརྩེའི་དབང་པོ་
|editor=
|editortib=
|tibgenre=Official Letters - chab shog
|terma=No
|sabcadcategory=Seven
|language=Tibetan
|volumenumber=020
|volnumtib=༢༠
|volyigtib=ཝ་
|totalvolumes=25
|textnuminvol=001
|textsubnumber=060
|pagenumbers=111-115
|totalpages=5
|beginfolioline=56a4
|endfolioline=58a4
|totalfolios=3
|multivolumework=No
|rectonotes=sde tshan 1
|versonotes=mkhyen brtse'i bka' 'bum
|colophontib=།ཞེས་པའང་ས་སྐྱོང་ཆོས་རྒྱལ་ཆེན་པོ་ནས་ཆབ་ཤོག་གི་ལམ་ནས་བསྐུལ་བ་ལྟར་རིགས་པར་སྨྲ་བ་ཚངས་སྲས་དགྱེས་པའི་བློ་ལྡན་གྱིས་བྲིས་ཏེ་ཕུལ་བ་དགེ།
|colophonwylie=zhes pa'ang sa skyong chos rgyal chen po nas chab shog gi lam nas bskul ba ltar rigs par smra ba tshangs sras dgyes pa'i blo ldan gyis bris te phul ba dge
|pdflink=File:JKW-KABUM-20-WA-001.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|ས་སྐྱོང་སེ་ནཱ་ཤུ་བྷ་ནས་སྲིད་སྐྱོང་རྭ་བསྒྲེང་ནོ་མི་ཧན་ཆེན་པོར་ཁྲི་ཕེབས་ཀྱི་ལེགས་འབུལ་སྟོབ་པའི་ཡི་གེ་མེ་ཏོག་ཆུན་པོ་ཞེས་བྱ་བ། པུཎྱཛྙཱནབིམུཀྟབཱིཛཀཾ བོདྷིགརྦྷཛལཀྵཎཾཤུབྷཻཿ སྡེབ་སྦྱོར་མཉམ་པའི་བྲིཏྟའི་བྱེ་བྲག་དག་པའི་སྣང་བའོ། །ཤཱནྟབྷཱབནཙཱུཌབིཤྲམཾསིཤཱསནྱགཏིཾརབིརྫཡཱེཏ། །རྣམ་གྲོལ་བསོད་ནམས་ཡེ་ཤེས་ས་བོན་ནི། །བྱང་ཆུབ་སྙིང་པོར་འཁྲུངས་པའི་དགེ་མཚན་གྱིས། །སྲིད་དང་ཞི་བའི་གཙུག་ན་ངལ་འཚོ་བ། །ཡོངས་རྫོགས་བསྟན་འགྲོའི་ཉི་མ་རྒྱལ་གྱུར་ཅིག ༡ །ཚངས་སོགས་ཆེ་དགུའི་འདར་ལྡན་ཐོར་ཚུགས་ཀྱིས། །ཡང་ཡང་ཕྱིས་པའི་ནོར་བུའི་བ་གམ་གྱིས། །མངོན་པར་མཐོ་བའི་ཆོས་ཀྱི་རྒྱལ་ཐབས་ཆེ། །ངོ་མཚར་བྱེ་བས་མཛེས་པའི་ཉེ་དྲུང་དུ། ༢ །དཔག་བསམ་རྐང་བས་འཐུང་བས་དགའ་ཚལ་བཞིན། །ཡིད་ཅན་ཀུན་དགའི་འཇུག་ངོགས་གཅིག་གྱུར་པ། །ཁྱོད་ཞབས་དག་པའི་རིན་ཆེན་བཻ་ཌཱུཪྻར། །སྲས་བཅས་རྒྱལ་བས་ཤིས་པའི་མེ་ཏོག་འཐོར། ༣ །དེ་སླད་ལྷས་སྐྱོང་རིགས་ཀྱི་ལྕུག་ཕྲན་ཡང་། །དད་གསུམ་ངང་ཚུལ་རྒྱས་པའི་བརྟུལ་ཞུགས་ཀྱིས། །ཐལ་མོའི་ཆུ་སྐྱེས་སྤྱི་བོར་ཟུམ་དང་བཅས། །བསྔགས་བརྗོད་གཏམ་གྱི་རྒྱུད་མང་ཅུང་ཟད་བསྒྲེངས། ༤ །གང་ཚེ་བསོད་ནམས་རྒྱ་མཚོའི་རོལ་སྒེག་ནི། །ཡེ་ཤེས་འབིགས་བྱེད་རི་བོས་བསྲུབས་པ་ལས། །མཚན་དཔེའི་ཟླ་རིས་བྱས་པའི་དགེ་མཚན་གྱིས། །ས་གསུམ་བཀྲ་ཤིས་གསར་བའི་སྣང་བས་ཁྱབ། །བཅུ་ཕྲག་དྲུག་གི་སྤྲིང་ཡིག་དང་འགྲོགས་བཞིན། །ཆོས་ཕུང་གྲངས་མེད་འཆད་དང་སྒྲུབ་པ་ལ། །འཇམ་མགོན་གཉིས་པའི་ངོ་མཚར་འདིའོ་ཞེས། །བློ་ལྡན་བློ་ཡི་སྙེམས་པ་གཅིག་ཅར་འཕྲོག ༦ །གཟུང་འཛིན་འཁྲུལ་པ་དག་པའི་འོད་གསལ་དབྱིངས། །འཇུག་དང་ལྡང་བ་བྲལ་བ་སྙོམས་འཇུག་བཞིན། །ཇི་ལྟ་ཇི་སྙེད་གཟིགས་པའི་ཡེ་ཤེས་ནི། །སྲས་བཅས་རྒྱལ་བ་ཀུན་དང་མཉམ་པ་ཉིད། ༧ །ཁྱད་པར་འཕགས་མཆོག་ཕྱག་ན་པདྨོ་ཡི། །ཡོངས་རྫོགས་ཕྲིན་ལས་རྒྱ་མཚོར་དབང་བསྒྱུར་བས། །དེང་ནས་བཟུང་སྟེ་ཁོར་ལུག་རི་བོའི་ཁོངས། །རྫོགས་ལྡན་དུས་ཀྱི་དགའ་སྟོན་གསར་དུ་ཚུགས། །དེ་སོགས་བསྔགས་འོས་ཡོན་ཏན་མི་ཟད་པ། །སྤྲིན་བྲལ་ཉིན་མོར་བྱེད་པ་རྣམ་བརྟག་བློས། །ཐལ་མོའི་ཀུ་མུཏ་སྙིང་གར་ཟུམ་དང་བཅས། །སྒོ་གསུམ་གུས་པའི་དད་ཕྱག་ཉིན་བཞིན་སྟོབས། ༩ །ལྷག་བསམ་དག་པའི་ས་གཞིར་ལེགས་འཁྲུངས་པའི། །དངོས་འབྱོར་མེ་ཏོག་ཕྲ་མོ་འདིས་མཚོན་ཏེ། །ཡིད་སྤྲུལ་མཆོད་པའི་སྤྲིན་ཕུང་མཐའ་ཀླས་པས། །བྱང་ཆུབ་བར་དུ་བསྙེན་བཀུར་བགྱིད་ལ་ཕྱོགས། ༡༠ །གདུང་སེལ་གངྒཱའི་རྒྱུན་གྱི་ཞབས་བསིལ་དང་། །དབང་པོའི་མཚོན་གྱིས་བརྡར་བྱས་འཛད་མིན་པའི། །སྡིག་དང་ལྟུང་བ་ལས་བྱུང་སྒྲིབ་པའི་དྲི། །སྟོབས་བཞིའི་བདུད་རྩིའི་ཐིག་པས་ཡུད་ལ་སྦྱོངས། ༡༡ །མགོན་པོ་ཁྱོད་ཀྱི་བྱང་ཆུབ་སྤྱོད་པས་མཚོན། །འཕགས་དང་སོ་སྐྱེའི་ལེགས་བྱས་ཕུང་པོ་ལ། །ཡི་རང་ཨུཏྤལ་འཛུམ་སྒྲོས་གྲོལ་བ་ཡིས། །རྣམ་དཀར་འབྲས་བུ་ལྷན་ཅིག་དབང་དུ་བགྱི། ༡༢ །རིགས་ཅན་གསུམ་གྱི་འགྲོ་བ་མཐའ་ཀླས་པ། །རྨོངས་དང་མ་རིག་འཐིབ་བུས་ནོན་པ་ལ། །ཐར་པ་དམ་པའི་ལམ་བཟང་སྣང་བྱེད་པའི། །ཞི་བསིལ་བདུད་རྩིའི་སྒོ་བརྒྱ་འབྱེད་པར་གསོལ། ༡༣ །ལྷར་བཅས་ཡིད་ཅན་སྤྱི་དང་ཁྱད་པར་དུ། །འཛམ་བུའི་ལྗོན་པས་མཚན་པའི་སྨན་ལྗོངས་འདིར། །ཕན་བདེའི་བྱེད་པོ་གཅིག་གྱུར་ཐམས་ཅད་མཁྱེན། །ཞབས་པད་སྲིད་མཐའི་བར་དུ་བརྟན་པར་མཛོད། ༡༤ །དེ་ལྟར་བསགས་པའི་དགེ་ཚོགས་ལམ་གསུམ་རྒྱུན། །བྱང་ཆུབ་སྙིང་པོའི་རྒྱ་མཚོར་རོ་གཅིག་པས། །འཇིག་རྟེན་འཇིག་རྟེན་འདས་པའི་དགེ་ལེགས་ཀྱི། །བཀྲ་ཤིས་སྣང་བས་རྟག་ཏུ་ཁྱབ་གྱུར་ཅིག ༡༥ །སླར་ཡང་སྲིད་དང་ཞི་བ་ཡི། །དགེ་མཚན་རིན་ཆེན་བྱེ་བའི་ཕུལ། །ཁྱོད་ཞབས་བསྐལ་བརྒྱར་འཚོ་གཞེས་སླད། །ངག་གི་རྒྱུད་མང་འདི་སྐད་བསྒྲེངས། །ཤྲཱི་ཤྲཱི་ཤྲཱི་བི་ཛ་ཡནྟུ། གང་གིས་བསྙེན་པ་ཙམ་ནས་ཕན་བདེའི་མཆོག །སྦྱིན་ལ་ཙིནྟཱ་མ་ཎིས་མཚོན་མིན་པ། །བསོད་ནམས་བརྒྱ་ལས་གྲུབ་པའི་མཚན་དཔེའི་བྱིན། །རྟག་པ་རྒྱུན་གྱི་འཁོར་ལོ་ཞབས་བརྟན་གསོལ། ༡ །རྒྱལ་ཀུན་སོ་སོར་རྟོག་པའི་ཡེ་ཤེས་དང་། །འཇུག་པ་གཅིག་པའི་དབྱངས་ཀྱིས་དགེ་བྱས་པའི། །ཆོས་ཕུང་རྒྱ་མཚོའི་ངོ་མཚར་སྤྲོ་བཞིན་དུ། །ངེས་པར་ཞིང་ཁམས་འདི་ལས་ཡོལ་མེད་ཤོག ༢ །ཟད་དང་མི་སྐྱེ་ཤེས་པའི་ཡེ་ཤེས་ནི། །འགྱུར་བཅས་སྲིད་པའི་ཁམས་ལས་རྣམ་གྲོལ་ཕྱིར། །ཤིན་ཏུ་ཞི་བ་དམ་པའི་རྒྱལ་ཐབས་ལ། །འཆི་མེད་གྲུབ་པའི་རྣམ་ཐར་བཟུང་གྱུར་ཅིག ༣ །ཡོན་ཏན་མཐའ་ཀླས་བདུད་རྩིའི་དོ་ཤལ་དང་། །ཕྲིན་ལས་སྣང་བ་དཀར་པོས་ས་གསུམ་ན། །དོན་གཉིས་ངལ་འཚོ་མཆོག་ཏུ་རྒྱས་བཞིན་དུ། །འདིར་ཡང་ཡེ་ཤེས་གཟིགས་པས་ཁྱབ་པར་གསོལ། ༤ །མདོར་ན་སྐྱབས་ཀུན་འདུས་པའི་ཞལ་སྐྱིན་མགོན་པོ་ཁྱོད་ཀྱི་ཐུགས་རྗེ་ཡིས། །གནས་སྐབས་མཐར་ཐུག་སྨོན་པའི་དོན་ཀུན་ཡིད་བཞིན་འགྲུབ་པའི་དགེ་མཚན་གྱིས། །བསྟན་དང་འགྲོ་བའི་རྒུད་པ་ཀུན་ཞི་ཕུན་ཚོགས་འབྱོར་པས་མངོན་མཐོ་བའི། །བཀྲ་ཤིས་སྣང་བ་དམ་པའི་དཔལ་གྱིས་འཇིག་རྟེན་ཁམས་ཀུན་མཛེས་གྱུར་ཅིག །ཛ་ཡ་ཛ་ཡ་སུ་ཛ་ཡ། །ཞེས་པའང་ས་སྐྱོང་ཆོས་རྒྱལ་ཆེན་པོ་ནས་ཆབ་ཤོག་གི་ལམ་ནས་བསྐུལ་བ་ལྟར་རིགས་པར་སྨྲ་བ་ཚངས་སྲས་དགྱེས་པའི་བློ་ལྡན་གྱིས་བྲིས་ཏེ་ཕུལ་བ་དགེ།  །།  ༈}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-20-WA-001]]
[[Category:Khyentse Lineage Project]]
[[Category:JKW-KABUM-Volume-20-WA]]