View source for JKW-KABUM-18-TSHA-001-017

{{Text
|classification=Tibetan Publications
|subclass=Tibetan Texts
|fulltitletib=ཡང་ཡུལ་མཆོག་དམན་ལ་འབུལ་ཡིག་གཉེན་སྟོན་ལོ་གསར་འབུལ་ཚན་སོགས་དཔེར་བརྗོད་སྣ་ཚོགས།
|fulltitle=yang yul mchog dman la 'bul yig gnyen ston lo gsar 'bul tshan sogs dper brjod sna tshogs
|citation=[['jam dbyangs mkhyen brtse'i dbang po]]. ''yang yul mchog dman la 'bul yig gnyen ston lo gsar 'bul tshan sogs dper brjod sna tshogs''. In '''jam dbyangs mkhyen brtse'i dbang po'i bka' 'bum'', Vol. 18: 195-269. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|editortib=
|tibgenre=Official Letters - chab shog
|terma=No
|sabcadcategory=Six
|language=Tibetan
|volumenumber=018
|volnumtib=༡༨
|volyigtib=ཚ་
|totalvolumes=25
|textnuminvol=001
|textsubnumber=017
|pagenumbers=195-269
|totalpages=75
|beginfolioline=98a6
|endfolioline=135a2
|totalfolios=38
|multivolumework=No
|rectonotes=sde tshan 1
|versonotes=mkhyen brtse'i bka' 'bum
|pdflink=File:JKW-KABUM-18-TSHA-001.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|ཡངས་པའི་རྒྱལ་ཁམས་ཐམས་ཅད་ཆོས་བཞིན་དུ་སྐྱོང་བའི་རྒྱལ་པོ་ཆེན་པོ་ཞིག་ལ་འབུལ་ན།  ཚངས་དབང་བདེ་འབྱུང་བདག་པོ་ལ་སོགས་པ།  །བསོད་ནམས་བྱེ་བས་དྲེགས་པའི་སྤུན་ཟླ་རུ།  །ངེས་ཀྱང་ཆོས་ཀྱི་འབྱོར་པས་མངོན་མཐོ་ཕྱིར།  །མཚུངས་མེད་མི་ཡི་ལྷ་གཅིག་རྒྱལ་གྱུར་ཅིག  །གང་ན་གྲགས་པ་དྲི་མེད་ཟླ་བའི་ཟེར།  །བཏུང་བས་མྱོས་པའི་སར་སྐྱེས་སྟེང་འཐུང་དཀར།  །དྭངས་པའི་མགྲིན་པ་མཐོན་པོར་བཏེགས་བཞིན་དུ།  །ཞུ་མཆིད་སོ་ཡི་ཟེའུ་འབྲུ་སྟོན་ལ་ཕྱོགས།  །འདི་ན་ཕུན་སུམ་ཚོགས་པའི་གཞིར་གྱུར་པ།  །ལུང་དང་རྟོགས་པའི་བསྟན་པ་རིན་པོ་ཆེར།  །ངེས་ཀྱང་དེའི་བྱེད་པོ་ས་སྤྱོད་ལ།  །རགས་ལས་མཐོང་ནས་བྱང་ཆུབ་སེམས་དཔའི་ཚོགས།  །བསམ་བཞིན་མི་ཡི་སྲིད་པར་འཁྲུངས་པ་ལ།  །སོམ་ཉིའི་འཁྱོགས་ཐག་ཆད་པའི་དམ་པ་གང་།  །འཚོ་གཞེས་བརྟན་པའི་སྤྲིངས་ཡིག་ཐོས་ཙམ་གྱིས།  །དོན་གཉིས་གྲུབ་པའི་སྟེགས་ལ་ངལ་འཚོར་གྱུར།  །འདི་ནའང་ཁྱོད་ཀྱི་བཀའ་དྲིན་རྨད་བྱུང་དཔྱིད།  །ཕན་བདེའི་བསིལ་འོད་སྣུམ་པའི་རྭ་བ་རུ།  །འདུ་ཤེས་གསུམ་གྱི་མལ་དུ་བདེར་གནས་བཞིན།  །ཉེར་འཚེའི་གེགས་ཀྱི་འདུ་བྱེད་བྲལ་བར་མཆིས།  །འབྱུང་འགྱུར་དུས་ཀྱང་མཚན་བཟང་ཨུཏྤལ་ལ།  །ལྷར་བཅས་སྐྱེ་དགུའི་ཐོར་ཏོའི་རྩེ་མོ་རུ།  །ནུབ་མེད་རྟག་པར་འཆར་བའི་གཟི་བྱིན་གྱིས།  །རྫོགས་ལྡན་གསར་པའི་དགའ་སྟོན་སྤྲོ་བར་མཛོད།  །དེ་སྐད་ཞུ་མཆིད་ཏེ་པོར་བརྗོད་པ་ཡིས།  །ངང་ཚུལ་དཔལ་གྱི་དུམ་བུའི་དྲི་བསུང་ནི།  །གཟིགས་རྟེན་མ་ལ་ཡ་ཡི་རླུང་བཞོན་དང་།  །འགྲོགས་ཏེ་ཁྱོད་ཞབས་བསྙེན་བཀུར་བགྱི་སླད་སྤྲོས།  །ཡང་ན།  གང་གིས་ཕས་རྒོལ་སྙིང་ལ་མྱ་ངན་མེས།  །རྣམ་པར་གདུངས་མོད་ཆབ་འབངས་སྲོག་གི་ཟུང་།  །བྱམས་བརྩེའི་བདུད་རྩིས་བརླན་པའི་གྲགས་དཀར་གྱིས།  །ཕྱོགས་ཀྱི་ཁོར་ཡུག་ཀུན་ཏུ་ཁྱབ་དེའི་དྲུང་།  །གང་ཚུལ་གཏོང་དང་སྙིང་སྟོབས་མ་ཞུམས་པའི།  །རིན་ཆེན་རྡུལ་མང་འཛགས་པའི་མ་དྲོས་གཏེར།  །མཐོང་བས་ཡིད་ལ་སིམ་པ་མི་ཟད་པ།  །བྱིན་ནས་རྗེས་སུ་བསྔགས་པའི་མཆིད་འདི་གླེངས།  །ས་འདི་རིར་བཅས་རྟེན་དང་བརྟེན་པ་ཀུན།  །གང་གི་དཔུང་པས་བཟུང་ལ་ངོ་མཚར་ཅི།  །བྱང་སེམས་མི་ཡི་མྱུ་གུར་བརྫུ་བའི་ཕྱིར།  །རྣམ་གྲོལ་ཆོས་ཀྱི་འབྱོར་པས་མཐོ་མིན་ནམ།  །དེ་ཕྱིར་འཚོ་གཞེས་བརྟན་པའི་གཏམ་སྙན་ལ།  །རྗེས་སུ་དཔག་པས་སྤྲོ་དགའི་འདུ་བྱེད་ཀྱིས།  །རྣམ་པར་སིམ་པའི་ཀུན་རྨོངས་བདག་ཅག་ཀྱང་།  །ལང་ཚོའི་འདུ་བྱེད་ཉམས་པར་མ་གྱུར་བཞིན།  །སླད་མར་བསོད་ནམས་དུ་མའི་ས་འཛིན་གྱིས།  །རྣམ་པར་བསྲུབས་པའི་གཟུགས་སྐུའི་གཽ་བི་དཱ།  །སྐྱེ་དགུར་ཕན་བདེའི་དགའ་སྟོན་སྩོལ་བའི་སླད།  །ཡུན་རིང་བརྟན་པའི་ཐབས་ཚུལ་ལྷུར་བཞེས་གསོལ།  །དེ་སྐད་ཞུ་མཆིད་སྨིན་ལེགས་སིནྡྷུ་ར།  །སྙན་ཚིག་ལི་ཁྲིའི་ཐིག་ལེ་གཡོ་བ་དང་།  །རྟེན་དངོས་འབྲས་བཟང་ཉམས་པ་མེད་དང་བཅས།  །ཀུན་ཏུ་དགེ་བའི་ཆོས་ལ་རིངས་པར་ཕུལ།  །ཡང་ན།  ཚངས་དབང་ས་ལ་རྒྱུ་བའམ།  །ས་བདག་གྲགས་པའི་བ་དན་གང་།  །ཆོས་ཀྱི་འབྱོར་པས་རབ་འཕགས་ཕྱིར།  །མི་ཡི་དབང་པོར་ངེས་དེའི་དྲུང་།  །གང་གི་རིགས་གཟུགས་ལང་ཚོ་སོགས།  ཡོན་ཏན་ཉམས་པ་མེད་པ་ཉིད།  །རྣ་བའི་རྒྱན་དུ་བྱིན་པ་ཡིས།  །ཡིད་རབ་སྤྲོ་བས་མཆིད་འདི་གསོལ།  །འདི་ན་སྟོབས་དང་རྒྱལ་སྲིད་སོགས།  །ཕྱོགས་རེས་དྲེགས་པ་མང་མོད་དེ།  །ལུགས་གཉིས་ཕུན་སུམ་ཚོགས་པའི་གཏེར།  །མཐའ་དག་རྫོགས་པ་ཁྱོད་ལས་སུ།  །ཚུལ་དེའི་དཔལ་ལ་བསམ་པ་ཡིས།  །སྤྲོ་དགའ་ལྐོག་ཏུ་མ་གྱུར་བར།  །ཡང་ཡང་ངོམས་བཞིན་གནས་བདག་ཀྱང་།  །འཚོ་བའི་འདུ་བྱེད་བདེ་བར་མཆིས།  །སླད་ནས་ནོར་འཛིན་དགའ་མ་ནི།  །ལྷུན་པོའི་རྣ་རྒྱན་དང་བཅས་པ།  །གནས་པ་ཇི་སྲིད་བསོད་ནམས་ཀྱི།  །མཚན་བཟང་ནུབ་པ་མེད་པར་མཛོད།  །ཞུ་མཆིད་དྭངས་པའི་བློ་གྲོས་ཀྱི།  །རྫིངས་བུར་ཡུན་རིངས་གསོས་པ་ལས།  །སྙན་ཚིག་ཆུ་སྐྱེས་སར་པ་ཡང་།  །གཟིགས་རྟེན་གེ་སར་བཅས་ཏེ་ཕུལ།    ། ༈

ཡང་རང་སྡེ་བྱམས་པས་སྐྱོངས་ཤིང་།   ས་བདག་ཆེན་པོའི་བཀའ་དྲིན་གདུགས་དཀར་གྱི་གྲིབ་མར་ངལ་འཚོ་བའི་རྒྱལ་ཕྲན་ཕལ་པ་ཞིག་ལ་འབུལ་ན།  ལེགས་སྤྱད་བསོད་ནམས་འབྲས་བུ་སྨིན་པའི་དཔྱིད།  །དཔལ་འབྱོར་ཨ་མྲྀ་གསར་པའི་དོགས་པ་ཅན།  །རང་སྡེ་བྱམས་པའི་གྲིབ་མས་སྲུངས་མཁས་པ།  །ལྗོན་བཟང་ས་ཡི་ཐིག་ལེ་འཛིན་དེའི་དྲུང་།  །གང་ཚུལ་དགེ་བའི་གཏམ་སྙན་ཨུ་དུམྦར།  །ཐོད་པར་དཀྲིས་པའི་རི་དྭགས་མིག་མ་ཡིས།  །བདག་ཡིད་བརྟན་པ་ཕྲོགས་དང་ཆབ་གཅིག་པར།  །ཞུ་མཆིད་ཚིག་གི་ཕྲེང་བ་དབྱངས་སུ་བསྟར།  །ཚོགས་གཉིས་དྲོད་གཤེར་གྱིས་སྨིན་དལ་འབྱོར་གྱི།  །ལྕུག་ཕྲན་མ་ཉམས་དར་བའི་ཕངས་པ་ནས།  །སྡེ་བཞིའི་འབྲས་བཟང་གཡུར་དུ་ཟ་བ་གང་།  །ལུགས་གཉིས་ཏེ་བོར་སྤྱོད་པར་རྗེས་སུ་རངས།  །འདི་ན་སྲིད་དང་ཞི་བའི་ཡོན་ཏན་གྱིས།  ཁྱད་པར་བྱས་པ་འགའ་ཡང་མེད་མོད་ཀྱི།  །མཆོག་གསུམ་བཀའ་དྲིན་དཔལ་ཀྱི་དུམ་བུ་ནི།  །ཡིད་ལ་ཆགས་པས་ཉེར་འཚོའི་གདུང་བ་བྲལ།  །སླད་མའི་ཆར་ཡང་རྣམ་དཀར་ཆུ་འཛིངས་ལས།  །བླངས་པའི་སྒོ་གསུམ་ཙིནྟ་མ་ཎི་ཆེ།  །ཕན་བདེའི་འདོད་དགུ་སྩོལ་དང་ལྷན་གཅིག་པར།  །ལྟོས་བཅས་ཆབ་འབངས་དཔྱིད་དུ་བརྟན་པར་མཛོད།  །དེ་སྐད་དྭངས་བའི་ཡིད་ཀྱི་དཔྱིད་དཔལ་ལས།  ཉེ་བར་འཁྲུངས་པའི་ཚིག་རྒྱན་ཀུཎྜ་ཀ  །ཞུ་འདེགས་ཟླ་ཞུན་གོས་བཟང་ཀླུབས་དང་བཅས།  །ཡུལ་འཁོར་དཔུངས་པས་བསྲུང་པའི་མདུན་དེར་འཛུམས།  །ཞེས་པ་ལྟ་བུས་མཚོན་ཡུལ་མཆོག་དམན་གྱི་བབས་དང་བསྟུན་ནས་སྦྱར་ཤེས་པར་བྱའོ།  ། ༈ ལུགས་གཉིས་ཀྱི་དཔུང་པས་ས་ཆེན་བདེ་བར་སྐྱོངས་པའི་ཆོས་རྒྱལ་ཆེན་པོའི་ཁྲིམས་ཀྱི་ཁ་ལོ་བསྒྱུར་བ་ལ་རྣམ་དཔྱོད་ཏེ་པོར་ཡངས་པའི་བཀའི་བློན་ཆེན་ཞིག་ལ་འབུལ་ན།  རྨད་བྱུང་ས་ཡི་ཚངས་པ་ཆེན་པོ་ཡི།  །ཆོས་སྲིད་ཐུར་མ་བརྒྱ་པའི་འཇོ་སྒེག་ཅན།  །གཟུར་གནས་བློ་གྲོས་དཔུངས་པས་བཟུང་མཁས་ཕྱིར།  །ལུགས་གཉིས་ཁྲིམས་ཀྱི་ཁ་ལོ་བསྒྱུར་དེའི་དྲུང་།  །གང་གི་མཛད་བཟང་ཏེ་བོར་སྤྱོད་པ་ཡིས།  །གྲགས་སྙན་བདུད་རྩིས་ར་བའི་སྤུན་ཟླ་ཅན།  །རིང་ནས་རྣ་བས་འཐུང་བའི་སིམ་པ་ཡིས།  །རབ་ཏུ་མྱོས་པས་སྤྲོ་དགའི་ཞུ་མཆིད་འབུལ།  །བསོད་ནམས་གསེར་གྱི་དྲྭ་བས་གདོང་མཛེས་ཤིང་།  །ཕྱོགས་ལྷུང་སྤངས་པའི་རྣམ་དཔྱོད་གཙུག་བུམ་མཐོ།  ཁྲིམས་གཉིས་ནོར་བུའི་ཁུར་མང་འདེགས་བཟོད་གང་།  །སྔོན་མེད་གཉིས་འཐུང་དབང་པོ་མཆོག་ཏུ་ངེས།  །དེ་སླད་སྒོ་གསུམ་ཉེར་འཚེའི་དྲི་བྲལ་བའི།  །གཏམ་བཟང་ག་བུར་ཐིག་པ་བཏུང་བ་ལས།  །འདི་ན་གནས་པའི་འདུ་ཤེས་གསུམ་པ་ཡང་།  །སྤྲོ་དགའི་ངལ་འཚོ་ཅི་ཡང་ཐོབ་པར་གྱུར།  །སླད་མར་དྲྭ་མའི་གཞུང་ལུགས་མ་ཉམས་པའི།  །སྤྱོད་མཆོག་དཔག་བསམ་གཞོན་ནུའི་གྲིབ་བསིལ་དུ།  །ཆབ་འབངས་བྱམས་པས་སྐྱོངས་དང་ལྷན་གཅིག་པར།  །ཕྱོགས་ལས་རྣམ་པར་རྒྱལ་བའི་དཔལ་ཐོབ་མཛོད།  །དེ་སྐད་ལྷག་བསམ་དཔྱིད་ལྡན་སྨིན་ལེགས་མའི།  །འགྲམས་པ་ནས་འཕོས་བརླན་གྱིས་ཕྱེ་བ་ཡི།  །ཞུ་མཆིད་བ་ཀུ་ལ་ཡི་མཚར་སྡུག་ལས།  །རྟེན་དངོས་ལོ་འདབ་གཞོན་ནུས་འཁྱུད་བཞིན་ཕུལ།  ། ༈ ཡངས་པའི་རྒྱལ་ཁམས་བདེ་བས་འཚོ་ཞིང་རིགས་རུས་ཀྱི་དཔལ་གྱིས་མངོན་པར་མཐོ་བའི་བཙུན་མོ་ཆེན་མོ་ཞིག་ལ་འབུལ་ན།  ལེགས་བྱས་ཆུ་གཏེར་བསྲུབས་ལས་སྐྱེས་པ་ཡི།  །གྲགས་པ་ག་བུར་གཞོན་ནུའི་རྣ་རྒྱན་ཅན།  །ནོར་འཛིན་བརྩེ་བའི་རྡུལ་དཀར་རབ་གཡོ་བས།  །སྲུངས་མཁས་རྒྱལ་རིགས་ཐིག་ལེར་མཛེས་དེའི་དྲུང་།  །དགའ་བར་བྱས་སོ་བདུན་གྱི་བདུན་པ་ཡིས།  །དཀར་མིན་ཨུཏྤལ་གཞོན་ནུའི་ནགས་ཀླུངས་ཏེ།  ཁྱོད་ཀྱི་སྤྱོད་ཚུལ་ཕུན་སུམ་ཚོགས་པའི་གཏམ།  ཐོས་པ་ཙམ་གྱིས་སྤྲོ་བས་མཆིད་འདི་ཕུལ།  །དད་དང་གཏོང་སོགས་ཡོན་ཏན་མ་ཉམས་པས།  །བཙུན་མོ་རིན་ཆེན་མཆོག་གི་སྤུན་ཟླ་རུ།  །འཛེགས་ཀྱང་དམན་ལ་ལྷག་པར་བརྩེ་ལྡན་གང་།  །བྱང་ཆུབ་དམ་པའི་རིགས་སུ་གདོན་མི་ཟ།  །དེ་སླད་ལང་ཚོ་ཤར་གྱི་ཐིག་ལེ་ལ།  །ཉེར་འཚེ་རཱ་ཧུའི་གདོང་པ་རྒྱངས་བསྲིངས་བཞིན།  །བརྟན་པར་བཞུགས་པའི་གཏམ་གྱི་ཟེགས་མ་ཡིས།  །འདི་གནས་གྱི་ནའི་ཡིད་ཀྱི་ས་མོས་དགོད།  །སླད་མའི་ཆར་ཡང་ཉི་འོག་བསྟན་དང་འགྲོར།  །བྱམས་པས་སྐྱོངས་བའི་ཡལ་འདབས་རིང་བརྐྱངས་བཞིན།  །ཚོགས་གཉིས་འབྲས་བཟང་དུད་པའི་དཔལ་དང་བཅས།  །རིང་པོར་འཚོ་བའི་ལེགས་སྨོན་གྲུབ་པར་མཛོད།  །དེ་སྐད་སྤྲོ་བར་འོས་པའི་སྤྲིངས་ཡིག་ནི།  །སྙན་པར་སྨྲ་བའི་ཚིག་གི་རྒྱན་དང་བཅས།  །རྟེན་གྱི་གོས་བཟང་གསར་པ་ཀླུབས་བཞིན་དུ།  །ཕྱོགས་དུས་ཀུན་ཏུ་དགེ་བའི་ཚེས་ལ་ཕུལ།  ། ༈ རང་གི་འབངས་ལ་ཕན་བདེ་སྟེར་ཞིང་།  རིག་གཟུགས་འབྱོར་པའི་ཡོན་ཏན་མི་དམན་པའི་སྡེ་དཔོན་ཕལ་པ་ཞིག་ལ་འབུལ་ན།  སྔོན་བསགས་ཚོགས་གཉིས་རྡུལ་དཀར་འཛགས་པ་ཡིས།  །ལེགས་པར་བསྐྱེད་པའི་དལ་རྟེན་ཀུནྡཱ་གསར།  །དཔལ་འབྱོར་མཚར་སྡུག་རྫོགས་པའི་ཐིག་ལེ་ཡིས།  །ཆབ་འབངས་དགའ་བའི་དགའ་སྟོན་སྦྱིན་དེའི་དྲུང་།  །སྐྱེས་སྦྱངས་བློ་གྲོས་ཉོན་མོང་སྣང་བ་ཡིས།  །རེག་པ་མིན་ཡང་ཁྱོད་ཚུལ་གཟུར་གནས་ཀྱི།  །གཏམ་ཙམ་ཐོས་པས་ཡིད་ཀྱི་ཨུཏྤལ་ལ།  །ཅི་དགར་བྱེད་པ་ཞུ་མཆིད་དྲི་བསུང་འཐུལ།  །འདི་ན་གནག་མིན་ལས་ཀྱི་ས་བོན་ལས།  །རིག་གཟུགས་ལྕུག་ཕྲན་སར་པའི་གྲིབ་སིལ་དུ།  །རང་སྡེ་བྱམས་པས་སྐྱོངས་ལ་ངལ་མེད་ཁྱོད།  །བསྔགས་པར་འོས་པའི་མེ་ཏོག་དུ་མས་བརྒྱན།  །དེ་ཕྱིར་འཚོ་བ་དོན་དང་བཅས་པས་ན།  །ལང་ཚོའི་འདུ་བྱེད་མ་ཡོལ་བརྟན་པ་ཡིས།  །ཀུན་རྨོངས་འདུ་ཤེས་གསུམ་པ་བདག་ཅག་ཀྱང་།  །རྗེས་སུ་རངས་པའི་སྤྲོ་དགས་སིམ་བཞིན་བདོག  །སླད་མར་ལུགས་གཉིས་མཛད་བཟང་མ་ཉམས་པས།  །འདི་དང་གཏན་གྱི་བདེ་བ་སྒྲུབས་མཁས་ཤིང་།  །རིང་པོར་བརྟན་པའི་འཕྲོད་བཞེས་མི་ལྷོད་པས།  །འདིར་ཡང་བརྩེ་བའི་ཐུགས་རྗེས་སྐྱོངས་བར་མཛོད།  །དེ་སྐད་ཞུ་བའི་མཆིད་ཚིག་ལང་ཚོ་མ།  །སྙན་པར་སྨྲ་བའི་གླུ་དབྱངས་ལེན་བཞིན་དུ།  །རྟེན་དངོས་རྣ་རྒྱན་མཛེས་དང་ཆབ་ཅིག་པར།  །ཀུན་ཏུ་དགེ་བའི་ཚེས་ལ་རིངས་པར་དེངས།  །  ༈ ཀུན་ཕན་སྟེར་ཞིང་།  མཛེས་མཛངས་དང་ལྡན་པའི་དཔོན་མོ་ཞིག་ལ་འབུལ་ན།  ཟླ་ཤེལ་ཞུ་བའི་བཅུད་ཀྱང་མ་བཏུང་ཞིང་།  །དཔྱིད་ཀྱི་མ་མས་རྣམ་པར་གསོས་མིན་ཡང་།  །ལེགས་བྱས་བྱེད་པོས་བསྐྲུན་པའི་མཚར་སྡུག་ཅན།  །སྔོན་མེད་ས་ཡི་གདུ་བུ་གསར་པའི་དྲུང་།  །རང་སྡེ་བྱམས་པའི་རྭ་བར་འཛུད་པ་དང་།  །ཕས་རྒོལ་སྙིང་ལ་གདུང་བའི་འདུ་འགོད་སྟོང་།  །སྦྱིན་མཁས་དཔལ་མོ་གང་གི་གྲགས་དཀར་ལ།  །ཡིད་རབ་སྤྲོ་བས་ཞུ་མཆིད་འདི་འབུལ་ལོ།  །དཔལ་འབྱོར་རྐང་པས་འཐུང་བའི་སྤྲིན་ཆེན་ལས།  །ལུགས་གཉིས་འབྲས་བཟང་གྲུ་ཆར་སྐྱུགས་མཁས་པས།  །ལྟོས་བཅས་སྲོག་ཟུང་བདུད་རྩིར་སྒྱུར་མཛད་ཁྱོད།  །ཉེར་འཚེ་བྲལ་བའི་ཚུལ་དེར་གཅིག་ཏུ་རངས།  །འདི་ན་འཕྲལ་དང་ཡུན་གྱི་བདེ་བ་ཡིས།  ཁྱད་པར་བྱས་པ་འགའ་ཡང་མ་མཆིས་པའི།  །ཀུན་རྨོངས་འདུ་ཤེས་གསུམ་པ་བདག་ཅག་ཀྱང་།  །མཆོག་གསུམ་བཀའ་དྲིན་ཁོ་ནས་ངལ་འཚོ་ཐོབ།  །སླད་མའི་ཆར་ཡང་གནའ་བོའི་གཞུང་བཟང་བཞིན།  །ཡ་རབས་དྲྭ་མའི་ངང་ཚུལ་ལྷུར་ལེན་པས།  །འདི་དང་གཏན་གྱི་ཕུན་ཚོགས་སྒྲུབ་མཁས་པའི།  །རིང་ལུགས་འདི་ལ་གཡོ་བ་མེད་པར་མཛོད།  །དེ་སྐད་གསོལ་བར་འོས་པའི་གཏམ་གྱི་ཕྲེང་།  །ཡི་གེའི་གཟུགས་སུ་འཕོས་པའི་རེ་ཁཱ་ལ།  །རྟེན་དངོས་བླ་གོས་གསར་པས་བཀླུབས་བྱས་ནས།  །ས་སྐྱོང་དབང་མོ་གང་དེའི་མདུན་སར་ཆས།  ། ༈ དེ་དག་གི་བཀའ་ཐ་མ་ཕྱིར་ཕེབས་ལྟ་བུའི་འབྱོར་ལན་གྱི་ཚེ།  །གང་ཚེ་མཐའ་བཞིའི་དྲེགས་ལྡན་བྱེ་སྙེད་ཀྱིས།  །གཙུག་ཏུ་མཆོད་འོས་བཀའ་གསང་མ་ཎི་ཀཿ  རྒྱན་གསུམ་ལམ་གྱི་སྲད་བུར་ལེགས་སྦྲེལ་ནས།  །ཕྱག་རྒྱའི་གཟི་བྱིན་ཉམས་མེད་སྤྱི་བོར་ཐོབ།  །ཞེས་སམ།  ཁྱད་པར་རིང་ནས་བྱམས་བརྩེའི་ཆུ་གཏེར་གྱིས།  །དངོས་ཀྱང་འདོར་མིན་གསུང་གསང་ཟླ་ཚེས་གསར།  །ཕྱག་རྒྱའི་རི་དྭགས་གཞོན་ནུས་འཁྱུད་བཞིན་དུ།  །གུས་སྤྲོ་བདེ་འབྱུང་རལ་རྩེར་ཉེ་བར་སོན།  །ཞེས་སམ།  འདི་ན་བརྗོད་བྱའི་རིན་ཆེན་དུ་མའི་ཁུར།  །འདྲེན་བཟོད་བཀའ་ལུང་སྙན་པའི་ས་སྲུང་དབང་།  །དངོས་པོའི་བདོག་པའི་སྐྱེས་ཀྱི་རྒྱན་དང་བཅས།  །མོས་ལྡན་ཀུན་དགའི་སྐྱེད་ཚལ་མཆོག་ཏུ་སོན།  །ཞེས་སམ།  ལྷག་པར་རྗེས་བརྩེའི་དཔྱིད་དཔལ་ལས།  །གསུང་མཆིད་པུཎྜ་རཱི་ཀའི་ཕྲེང་།  །དངོས་པོའི་སྐྱེས་བཟང་གེ་སར་བཅས།  །ཉམས་མེད་སྤྲོ་དགའི་དཔལ་དུ་སོན།  །ཞེས་སམ།  གང་ཚེ་སྤྲིང་ཡིག་གཞོན་ནུ་མས།  །དོན་ལྡན་བརྗོད་བྱའི་གླུ་ལེན་ཞིང་།  །གནང་སྐྱེས་ནོར་བུའི་དོ་ཤལ་བཅས།  །རྟགས་ཀྱི་མཆུ་སྒྲོས་དགོད་བཞིན་འབྱོར།  །ཞེས་པ་ལྟ་བུ་ཡུལ་གྱི་བབས་དང་བསྟུན་པའི་གང་འོས་སྦྱོར་བར་བྱ་ཞིང་།  གཞན་ཡང་དེ་དག་རྗེས་སུ་འབྲེལ་བར་ཉེར་མཁོའི་དཔེར་བརྗོད་འགའ་ཞིག་ཐོར་བུར་འབྲི་ན།  །  ༈ 

ཐོག་མར་རང་གཞན་གྱི་ཡུལ་གྲུ་སྐྱོང་བའི་མི་བདག་སུ་ཡང་རུང་བ་རྒྱལ་ཐབས་ལ་མངའ་གསོལ་བའི་ལེགས་འབུལ་གྱི་ཚེ།  །གོང་རྒྱན་སོགས་སྨོས་མ་ཐག་པ་ལྟར་གྱི་དང་པོར་འོག་ནས་འབྱུང་བའི་ཤིས་བརྗོད་ཅི་རིགས་པ་སྦྱར་བ་ལ་སྐབས་མཚམས་ཀྱི་བརྗོད་བྱ་བསྣན་པས་ཀྱང་རུང་མོད་དེ།  འོན་ཀྱང་འདིར་ཅུང་ཟད་ཙམ་དཔེར་བརྗོད་ན།  ཤྲཱི་སུ་ཤྲེ་ཡོ་བི་ཛ་ཡནྟུ།  གང་ཞིག་ལན་གཅིག་དྲན་པའི་མོད་ནས་དགེ་ལེགས་རིན་ཆེན་བྱེ་བའི་དབྱིག  །ལྷུག་པར་འཇོ་བའི་དགའ་སྟོན་སྦྱིན་ལ་ནོར་བུའི་རེག་བྱས་མཚོན་མིན་པའི།  །དཀོན་མཆོག་གསུམ་ཞེས་གྲགས་པའི་སྣང་བ་སྲིད་ཞིའི་བླ་ན་རབ་འབར་དེས།  །དེང་འདིར་ཁྱོད་ལ་ཤིས་པའི་མེ་ཏོག་མནྡཱ་ར་བ་ཆར་དུ་བསྙིལ།  །མཚན་གྱི་སྤྲིངས་ཡིག་རྣ་བར་བཏབ་པས་ཀྱང་།  །རིང་འཚོའི་མདུད་པ་བསྐལ་བརྒྱར་མི་ཤིགས་པའི།  །ཚེ་མཐའ་ཡས་པའི་ཐུགས་རྗེའི་ཟླ་ཤེལ་གྱིས།  །འཆི་མེད་རྟག་པའི་བདུད་རྩིས་དགེ་བར་མཛོད།  །དཔལ་ལྡན་རྒྱལ་བ་ཀུན་གྱི་ཡེ་ཤེས་གཏེར།  །གཅིག་བསྡུས་སྒྱུ་འཕྲུལ་དྲྭ་བའི་རོལ་རྩེད་ཅན།  །འཇམ་མགོན་མཁྱེན་པའི་ཉི་མ་གསར་པ་དེས།  །རྣམ་དཔྱོད་ཨུཏྤལ་དར་བའི་ཆོ་ག་བསྒྲུབ།  །རྗེས་ཆགས་སྤྲིན་གྱི་རྒྱུད་མངས་བརྡུངས་ཙམ་གྱིས།  །སྲིད་དང་ཞི་བའི་ཕུན་ཚོགས་མདོངས་མཐའ་ཅན།  །རིངས་པར་འགུགས་པའི་དབང་གི་མཆིལ་པ་དེས།  །ས་གསུམ་དྲེགས་ལྡན་ཡོངས་ཀྱི་བརྟན་པ་འཕྲོགས།  །ལེགས་པར་སྤྱོད་ལ་འཚེ་བའི་ཕས་རྒོལ་དཔུང་།  །མིང་གི་ལྷག་མར་བགྱིད་དང་ཆབ་ཅིག་པར།  །ཕྱོགས་ལས་རྣམ་པར་རྒྱལ་བའི་བ་དན་དཀར།  །མཐུ་ལྡན་ཆོས་སྲུང་ཚོགས་ཀྱིས་སྲིད་རྩེར་བསྒྲེངས།  །ཚོགས་ཟུང་རྒྱ་མཚོའི་སྙིང་པོས་རབ་ལྕི་བའི།  །གནོད་གནས་དབང་པོའི་ཆུ་འཛིན་གསར་པ་ལས།  །མི་ཟད་འདོད་དགུའི་གྲུ་ཆར་གཡོ་བ་ཡིས།  །སྔོན་མེད་རྫོགས་ལྡན་གཞོན་ནུའི་དུས་སྟོན་དཀྲིགས།  །དེ་ལྟར་ལྷག་བསམ་དཔྱིད་ཀྱི་མ་མ་ཡིས།  །ཉེར་བསྐྲུན་ཤིས་པ་བརྗོད་པའི་གཏམ་གྱི་དབྱངས།  །སྙན་ཚིག་པུཎྜ་རཱི་ཀའི་མཆོད་སྤྲིན་གྱིས།  །ས་སྤྱོད་སྤྱན་གྱི་འབབ་སྟེགས་མཛེས་བྱས་ནས།  །བསོད་ནམས་དཔག་ཡས་ཆུ་གཏེར་བསྲུབས་པ་ལས།  །ལེགས་པར་འཁྲུངས་པའི་མཚན་བཟང་ཉིན་མོར་བྱེད།  ཁེངས་ལྡན་ས་འཛིན་བྱེ་བས་ཉེར་བཏུད་པའི།  །ཞབས་སྟེགས་ནོར་བུའི་བ་གམ་ག་ལ་བར།  །ཞེས་པ་ལྟ་བུའི་འབེབས་འོག་ཏུ།  ཇི་ལྟར་ཉི་གཞོན་འོད་ཀྱི་རླབས་གཡོ་བས།  །གུར་གུམ་སར་པའི་ནགས་ཀླུང་རྒྱས་པ་བཞིན།  །གང་གི་རྣམ་ཐར་རྨད་བྱུང་གིས་བསྐུལ་བས།  །རབ་ཏུ་དྭང་བའི་ཞུ་གསོལ་འདི་སྐད་གླེང་།  །ཞེས་སོགས་གང་འོས་མཐར།  བསྐལ་པར་གཞན་ཕན་བརླན་དང་མི་ཕྱེད་པའི།  །བྱང་ཆུབ་སྤྱོད་མཆོག་ཛུམྦུའི་སྙེ་མ་ནི།  །བསྟན་སྲིད་མ་དྲོས་འཇིངས་སུ་རྩེན་པའི་མོད།  །ཕན་བདེའི་གཟི་བྱིན་བརྒྱ་ཕྲག་དུས་གཅིག་འབར།  ཁྱད་པར་དེང་ཚེ་ཕྱོགས་དང་ཕྱོགས་བྲལ་གྱི།  །སྟོབས་དང་འབྱོར་པས་སྙེམས་པའི་ཐོར་ཚུགས་ཀྱིས།  །ཉེ་བར་བསྟེན་པའི་རྒྱལ་ཐབས་ཆེན་པོ་ལ།  །སྲིད་ཞི་ཀུན་གྱིས་མངོན་པར་དབང་བསྐུར་ཅིང་།  །རྒྱལ་སྲིད་ཡན་ལག་བདུན་གྱི་ཤར་རིའི་ཕྲག  །སྡེ་བཞིའི་འཆར་ཀའི་དམར་བས་རབ་དྲངས་པའི།  །གྲགས་སྙན་ཟླ་སྣང་དཀར་པོའི་སིམས་འོད་ཀྱིས།  །ས་གསུམ་ཀུན་དགར་བྱས་དང་ཆབ་ཅིག་པར།  །ལས་ཤུགས་གསེར་གྱི་འཁོར་ལོ་སྔོན་འགྲོ་བས།  །རི་གླིང་རྒྱ་མཚོར་བཅས་པའི་ཐ་གྲུ་ཀུན།  །དབང་གིས་མངའ་བསྒྱུར་སྤྲིངས་ཡིག་གིས་བཏབ་པས།  །ལྷར་བཅས་ཡིད་ཀྱི་བརྟན་པ་དབང་མེད་འཕྲོགས།  །དེ་ཚེ་འདིར་གནས་གྱི་ནའི་ཆུ་གཏེར་ཡང་།  །གུས་སྤྲོའི་རྦ་རླབས་ཆལ་ཆིལ་གཡོས་པའི་མོད།  །དངོས་པོའི་ལེགས་སྐྱེས་ཕྲ་མོའི་མེ་ཏོག་གིས།  །དགེ་ལེགས་ཤིས་པའི་སྒོ་འཕར་དབྱེ་ལ་ཕྱོགས།  །ཞེས་སྭསྟིའི་དབྱངས་སྙན་ཀ་མ་ལའི་ཕང་ཕུང་ཆར་དུ་བསྙིལ་བས་ལམ་ཡངས་པར་བྱས་ནས།  སྐབས་སུ་བབས་པའི་གླེང་བར་བྱ་བ་ནི།  འདི་ལྟར་གླིང་བཞི་ལས་མཆོག་ཏུ་གྱུར་པའི་ལས་ཀྱི་ས་པ་ཛམྦུའི་རྐང་འཐུང་གིས་ཉེ་བར་མཚན་པའི་ལྗོངས་སུ།  དུས་གསུམ་གྱི་རྣམ་པར་འདྲེན་པ་ཐམས་ཅད་བྱང་ཆུབ་ཀྱི་སྙིང་པོར་མངོན་དུ་གཤེགས་པའི་ཡུལ་དབུས་འགྱུར་འཆང་ནས་བྱང་ཕྱོགས་ཀྱི་སའི་ཆར།  །ཕྱོགས་དང་ཕྱོགས་མཚམས་ཐམས་ཅད་ཀཻ་ལ་ཤ་ཡི་རི་བོའི་ཕྲེང་བ་ཚར་དུ་དངར་བས་ཡོངས་སུ་བསྐོར་ཞིང་།  དེ་བཞིན་གཤེགས་པའི་བསྟན་པ་རིན་པོ་ཆེའི་ཁུར་གྱིས་ལྷག་པར་ལྕི་བའི་བྷོ་ཊ་དང་།  མ་ཧཱ་བྷོ་ཊ་ཞེས་སུ་གྲགས་པའི་ཡུལ་གྲུ་འདིར།  དཔལ་ལྡན་སྟོབས་བཅུ་མངའ་བས་འཇམ་དཔལ་རྩ་བའི་རྒྱུད་སོགས་ནས་ལུང་གིས་བསྟན་པ་ལྟར།  སྔོན་གྱི་ཚེ་ཆོས་སྐྱོང་བའི་རྒྱལ་པོ་མེས་དབོན་རྣམ་གསུམ་ནས་བཟུང་སྟེ།  སངས་རྒྱས་ཀྱི་བསྟན་པ་དེར་འཛིན་དང་བཅས་པ་ལ་སྲི་ཞུ་བླ་ལྷག་ཏུ་མཛད་ཅིང་།  ལས་ཤུགས་བཙན་པོའི་རུ་མཚོན་འཕྱར་བས་ཕས་རྒོལ་གྱི་དྲེགས་ལྡན་ཐམས་ཅད་སྤ་བཀོང་སྟེ།  དགེ་བཅུའི་ལམ་སྲོལ་དང་འབྲེལ་བའི་བཀའ་ཁྲིམས་བཙན་པོས་ཉི་འོག་གི་འགྲོ་བ་མཐའ་དག་བདེ་སྐྱིད་རྒྱ་མཚོའི་ཕུང་པོ་སྲིད་མཐར་འགྱུར་བར་མཛད་པའི་སྟོབས་ཀྱི་འཁོར་ལོས་སྒྱུར་བ་དང་།  དེ་དང་རྗེས་མཐུན་གྱི་རྒྱལ་ཕྲན་ཕལ་པ་ཇི་སྙེད་ཅིག་བྱོན་པ་དང་།  བྱེ་བྲག་འདིའི་མཚམས་སུ་སྤྲོ་ན་སོ་སོའི་ལོ་རྒྱུས་རྒྱལ་རབས་དང་།  དེབས་ཐེར་སོགས་ལས་ཇི་ལྟར་འབྱུང་བ་ལྟར་རྒྱས་བསྡུས་ཅི་རིགས་བརྗོད་པའི་མཐར།  ཏུ།  མདོ་སྡེ་རྒྱན་ལས།  བྱང་ཆུབ་སེམས་དཔའ་རྟག་ཏུ་ནི།  །ཁྱིམ་པ་འཁོར་ལོས་སྒྱུར་རྣམས་སུ།  །གྱུར་ནས་སྐྱེ་བ་ཐམས་ཅད་དུ།  །སེམས་ཅན་རྣམས་ཀྱི་དོན་བྱེད་དོ།  །ཞེས་སོགས་བདེན་པར་སྨྲ་བའི།  ལུང་གི་རི་མོ་བསུབ་ཏུ་མེད་པས་ཉེ་བར་མཚན་པའི་ལྷ་སྲས་བྱང་ཆུབ་སེམས་དཔའ་གང་ཉིད།  བོད་དང་བོད་ཆེན་པོའི་བསྟན་འགྲོ་ཀུན་གྱི་རྟེན་དང་།  གླིང་དང་།  དཔུང་གཉེན་གཅིག་པུར་སྲིད་པ་དང་ཞི་བའི་ཕུན་སུམ་ཚོགས་པ་མ་ཚང་བ་མེད་པས་དགེ་ཞིང་ཤིས་པ་མཆོག་གི་དུས་ཚེས་བཟང་པོར།  ཇི་སྐད་དུ།  ཆོས་འདོད་དོན་གྱི་སྡེ་ཚན་གསུམ།  །ཐར་པ་དང་བཅས་སྡེ་བཞི་སྟེ།  །དེ་སྟོབས་མཚུངས་པས་བཟང་པོ་བཞི།  །ཞེས་སྡེ་བཞི་དང་།  རྗེ་བོ་བློན་པོ་ཡུལ་འཁོར་དང་།  །རྫོང་དང་མཛོད་དང་དམག་དཔུང་གྲོགས།  །ཕན་ཚུན་ཕན་འདོགས་ཡན་ལག་བདུན།  །འདི་རྣམས་རྒྱལ་སྲིད་ཅེས་སུ་བརྗོད།  །ཅེས་རྒྱལ་སྲིད་ཀྱི་ཡན་ལག་བདུན་ལ་སོགས་པས་ཁྱད་པར་དུ་བྱས་པའི་ཡབ་མེས་ཀྱི་བསྟན་སྲིད་ཕ་མཐའ་ཡས་པ་ཡོངས་སུ་སྐྱོང་བའི་རྒྱལ་ཐབས་ཀྱི་ཁྲི་འཕང་མཐོན་པོར་ལྷ་དང་བཅས་པའི་འགྲོ་བ་ཀུན་གྱིས་མངོན་པར་དབང་བསྐུར་བ་དང་ཆབས་ཅིག  །ཕས་རྒོལ་གྱི་ཚོགས་ཀུན་ཉི་མཐོང་ཀུནྡཱ་ལྟ་བུར་བཅིལ་བ་དང་།  ལྟོས་བཅས་ཐམས་ཅད་ཕན་པ་དང་བདེ་བའི་རྫོགས་ལྡན་གསར་པའི་དུས་སྟོན་ལ་ངོམས་པ་མེད་པར་ལོངས་སུ་སྤྱོད་པའི་དགེ་མཚན་གྱིས་སྒོ་འཕར་བརྒྱ་ཕྲག་དུས་གཅིག་ཏུ་དབྱེ་བར་མཛད་པའི་བཀའ་དྲིན་གཞལ་དུ་མ་མཆིས་པ་འདི་བཞིན།  གང་གི་ཐུགས་རྗེའི་གདུགས་དཀར་གྱི་གྲིབ་མར་ངལ་གསོ་བའི་ཁོ་བོ་ཅག་གིས་ཀྱང་དགའ་སྟོན་གྱི་ལེགས་འབུལ་ཅུང་ཟད་སྟོབ་པར།  ཐོག་མར་བཀྲ་ཤིས་པའི་རེ་ཁྭས་འཁྱུད་པའི་ལྷ་གོས་རབ་དཀར་དཀྱུས་སུ་རིང་བ།  གང་སྐུ་བསྐལ་པ་རྒྱ་མཚོར་འཚོ་གཞེས་བརྟན་པའི་རྟེན་འབྲེལ་དུ་རྒྱལ་བ་ཚེ་མཐའ་ཡས་པའི་སྐུ་བརྙན།  གང་གསུང་མཐའ་བཞིའི་དྲེགས་ལྡན་ཡོངས་ཀྱི་གཙུག་ཏུ་མཆོད་པའི་བཀའ་ལུང་གི་སྣང་བ་ནུབ་པ་མེད་པའི་བརྡར་མདོ་སྡེ་བསྐལ་པ་བཟང་པོའི་པུསྟི་ཀཿ  གང་ཐུགས་ཆོས་དང་སྲིད་ཀྱི་གཙུག་ལག་ཀུན་ལ་རྣམ་དཔྱོད་ཏེ་པོར་ཡངས་པའི་རྟེན་འབྲེལ་དུ་བཀའ་གདམས་མཆོད་རྟེན་རྙིང་མ།  སོགས་འབུལ་ཚན་རྣམས་བྲིས་མཐར།  གྲངས་ལྡན་རྗེས་སུ་བརྩེ་བའི་སྤྱན་ཟུར་གཡོ་བའི་རྟེན་ཙམ་དུ་འབུལ་ལམ་ཞུ་ཞིང་།  སླར་ཡང་སྨྲས་པ།  དེང་འདིར་བྱེད་པོས་ཆེད་དུ་མ་བསྐྲུན་སྔོན་བསགས་བསོད་ནམས་ཀྱིས་བརླན་པའི།  །དཔལ་དང་ཡོན་ཏན་བདུད་རྩིའི་འབྱུང་གནས་ཚངས་པའི་བློས་ཀྱང་གཞལ་དཀའ་གང་།  །འཆི་མེད་མགོན་པོ་ཚེ་མཐའ་ཡས་པའི་ཐུགས་རྗེའི་འོད་རྡུལ་གྱིས་བཏབ་པས།  །རིང་འཚོའི་པདྨོ་མཆོག་ཏུ་ཡིད་འོང་བསྐལ་པ་རྒྱ་མཚོར་འབར་གྱུར་ཅིག  །སྙིགས་མའི་གདུང་བས་གཞུར་བའི་བསྟན་དང་འགྲོར།  །བརྩེ་ཆེན་ཐུགས་རྗེའི་གྲུ་ཆར་དབབ་པ་ཡིས།  །རྫོགས་ལྡན་གསར་པའི་སིམ་པ་སྟེར་མཁས་པ།  །སྔོན་མེད་གདེངས་ཅན་བདག་པོ་ཁྱོད་ཀྱིས་མཛོད།  །ཡིད་སྲུབས་དཔུང་གིས་བཏེགས་པའི་ཕས་རྒོལ་ཀུན།  །ཡིད་ལ་དྲན་པ་ཙམ་གྱིས་མཐར་བྱས་ནས།  །ཡིད་ཅན་ཕན་བདེའི་དགའ་སྟོན་སྦྱིན་པ་ལ།  །ཡིད་བཞིན་འདོད་འཇོའི་དཔལ་དུ་སྣང་གྱུར་ཅིག  །མདོར་ན་གང་མཚན་ཐོས་པ་ཙམ་གྱིས་སྲིད་པའི་འཇིགས་པ་ཀུན་འཕྲོགས་ན།  །སུ་ཞིག་སྐྱབས་སུ་སོང་བ་ཙམ་ནས་ཞི་བསིལ་གོ་འཕང་སྟེར་མཛད་པར།  །བསླུ་བ་སྤངས་བའི་ཡི་གེས་རབ་བརྗིད་མཆོག་གསུམ་འདུས་ཞལ་བླ་མ་ཡི།  །ཕུན་ཚོགས་བཀྲ་ཤིས་སྣང་བ་གསར་པས་རྣམ་པ་ཀུན་ཏུ་དགེ་གྱུར་ཅིག  །སརྦ་དཱ་རཱ་ཛྱ་བ་རི་དྷི་པྲ་བརྡྷ་ནཾ་ཀུརྦནྟུ།  ཞེས་པ་ལྟ་བུ་དང་།།  །། ༈


གཉེན་སྟོན་ཐབ་གསོས་ཀྱི་ཚེ།  གོང་རྒྱན་དང་།  འབེབས་ཞུ་སོགས་སྔ་མ་ལྟར་རམ་བསྡུ་ན།  ཨོཾ་སྭསྟི་སིདྡྷི་རསྟུ།  གང་མཚན་དཔལ་གྱི་དུམ་བུའི་སིམ་པ་ལས།  །རབ་ལྷག་ཟླ་ཤེལ་བཞུ་བའི་འོད་རིས་ཀྱིས།  །ཕན་བདེའི་སྟེང་འཐུང་དཀར་པོའི་འདབ་བརྒྱའི་འཛུམ།  །དབྱེ་མཛད་མཆོག་གསུམ་རྒྱ་མཚོས་ཁྱོད་ལ་སྲུངས།  །བསོད་ནམས་བྱེ་བའི་ཆུ་གཏེར་འཁྱིལ་པ་ལས།  །ཉེ་བར་འཁྲུངས་པའི་མི་བདག་ས་འཛིན་དབང་།  །རྨད་བྱུང་སྡེ་བཞིའི་བང་རིམ་གྱིས་མཛེས་པའི།  །ཞབས་སྟེགས་ས་ཟླའི་བ་གམ་ག་ལ་བར།  །འཆར་ཀའི་དམར་བ་ཕུན་ཚོགས་ཟླ་གཞོན་གྱི།  །རྗེས་སུ་རྐང་པ་འཇོག་པའི་ལྷག་བསམ་ལས།  །དྭང་བའི་ཞུ་གསོལ་མེ་ཏོག་འཐོར་བ་ཡང་།  །རྗེས་བརྩེའི་སྤྱན་ཟུར་ལྷུང་བའི་འབབས་སྟེགས་ལགས།  །གང་ན་སྙིགས་མའི་ཁུར་གྱིས་རབ་ལྕི་བའི།  །བསྟན་དང་འགྲོ་བའི་ངང་ཚུལ་འདི་གཟིགས་ནས།  །སྙིང་རྗེས་ཤིན་ཏུ་བརླན་བྱས་རྒྱལ་སྲས་ཤིག  །མི་ཡི་དབང་ཕྱུག་ཁྱོད་དུ་མངོན་པར་འཁྲུངས།  །དེ་ཚེ་ལུགས་གཉིས་ཏེ་པོར་སྤྱོད་པའི་མདས།  །ཚུལ་མིན་འབོད་གྲོགས་མགྲིན་པ་ཉེར་བཅད་ནས།  །ཕན་བདེའི་སི་ཏཱ་མགྲོན་དུ་གཉེར་པ་ཡིས། །ལྷར་བཅས་རྫོགས་ལྡན་གསར་པའི་དཔལ་ལ་སྦྱར།  ཁྱད་པར་རྣམ་ལྔའི་སྐྱོན་དྲིས་རིང་བཏང་བའི།  །ཡོན་ཏན་བརྒྱད་ལྡན་བཙུན་མོ་རིན་ཆེན་མཆོག  །དཔལ་གྱི་འབྱོར་པ་ཆེན་པོའི་སྒྱུ་ཐབས་ཀྱིས།  །རང་དབང་ཉིད་དུ་བདག་གིར་མཛད་པའི་མོད།  །གྲགས་སྙན་ནོར་བུའི་རྔ་ཡབ་གཡོབ་པ་དང་།  །ཕུན་ཚོགས་སྡེ་བཞིའི་འདུ་བ་རྒྱས་པ་དང་།  །དེས་ཀྱང་མི་མཐུན་རྒུད་པ་རིང་བཅིལ་བའི།  །གསུམ་པོ་འདི་ནི་མཉམ་དུ་དང་བར་གྱུར།  །གང་ཚེ་ལྟོས་བཅས་སྐྱེ་དགུའི་ཕན་བདེའི་སྲོག  །རྒྱལ་ཐབས་རྩ་བ་མི་ཉམས་བརྟན་པ་ལས།  །དགེ་མཚན་འདོད་དགུའི་ལྗོན་བཟང་འབྱུང་ངོ་ཞེས།  །ལྷར་བཅས་བསྔགས་པའི་མེ་ཏོག་གཡོ་བས་བྲེལ།  །དེ་སླད་འདི་ནའང་གང་གི་བཀའ་དྲིན་གྱིས།  །གདུགས་དཀར་ཡངས་པོར་འཁོར་བའི་གྲིབ་བསིལ་དུ།  །ཉེ་བར་འཚོ་བའི་འདུ་ཤེས་གསུམ་པ་ཡང་།  །སྙིང་ནས་སྤྲོ་དགའི་ལེགས་སྐྱེས་ཅུང་ཟད་བསྟར།  །འདིའང་རང་ཉིད་རྒྱལ་པོ་དེའི་མངའ་ཁུལ་དུ་གནས་པ་ལྟ་བུའི་དབང་དུ་བྱས་ཀྱི།  གཞན་དུ་ན།  མཆོག་གསུམ་བཀའ་དྲིན་གྱིས།  ཞེས་པ་ལྟ་བུར་བསྒྱུར་དགོས་པས་མཚོན་གོང་འོག་རྣམས་སུ་དམིགས་བསལ་གྱི་ཁ་བསྒྱུར་དགོས་པ་རྣམས་སོ་སོར་འབྲི་བ་ལས་མཐའ་གཅིག་ཏུ་རིགས་འགྲེ་བར་མི་བྱའོ།  །ཞེས་སྐབས་སུ་བབས་པའི་བརྗོད་པ་ཉུང་ངུས་མདུན་བསུས་ཏེ།  དེང་གི་ཆར་འདིར་རྒྱལ་རབས་སོགས་དམིགས་བསལ་སྤྲོ་ན་ཇི་ལྟར་འོས་པ་འཛུད།  ཡང་།  གང་ན་སའི་དགེ་བཅུའི་དཔྱད་པ་མ་ཚང་བ་མེད་པས་ཡོངས་སུ་བསྲུངས་པའི་མ་ཧཱ་བྷོ་ཊ་སྟེ་བོད་ཆེན་པོའི་ནོར་འཛིན་གྱི་ཐིག་ལེར།  ཆོས་དོན་འདོད་ཐར་ལ་སོགས་པའི་སྲིད་ཞིའི་དགེ་མཚན་གྱི་སྒོ་འཕར་གཅིག་ཅར་དུ་བྱེ་བའི་གཙུག་ལག་ལུགས་བརྒྱའི་འདུན་ས་ཆེན་པོར།  །སྤོར་ཐང་རྩིས་ཀྱི་གཞུང་ལས་ཇི་ལྟར་བཤད་པའི་མཐུན་སྦྱོར་སོགས་ཕུན་སུམ་ཚོགས་པའི་དུས་ཚེས་སུ་སཱ་ལའི་ལྗོན་པ་ལྟར་ཆོ་འབྲངས་རིགས་རུས་མངོན་པར་མཐོ་བའི་ངང་ཚུལ་མ་སྨད་པའི་བཙུན་མོ་དམ་པ།  ཟླ་མེད་བསོད་ནམས་རྒྱ་མཚོའི་བྱེད་པོས་བསྐྲུན་པའི་དཔལ་གྱི་འབྱོར་པ་གནོད་གནས་དབང་པོའི་གན་མཛོད་ལས་ལྷག་པས་མདུན་བདར་ཏེ་ཁབ་ཏུ་བསུས་པ་ལས།  ཆབ་འབངས་ལྟོས་བཅས་ཡོངས་ཀྱི་ཕན་བདེའི་རྩ་བ་རྒྱལ་སྲིད་རིན་པོ་ཆེ་ཡུན་དུ་བརྟན་ཅིང་།  མངའ་ཐང་གདུང་རྒྱུད་སོགས་ཟླ་བས་རེག་པའི་ཆུ་གཏེར་ལྟར་སྲིད་པའི་རྩེ་མོར་འགོངས་པར་མཛད་པའི་བཀའ་དྲིན་ཁོ་ན་ལ་ཁ་ཙམ་མ་ཡིན་པར་སྤྲོ་དགའི་ཡིད་ཀྱིས་རྗེས་སུ་དཔག་སྟེ།  རྟེན་འབྲེལ་གྱིས་རྒ་མི་འཆོལ་བའི་ཆེད་དུ་ཤིས་པའི་ལེགས་སྐྱེས་ཟེགས་མ་ཙམ་སྟོབ་པར།  ཞེས་པའི་མཚམས་འབུལ་ཚན་རྣམས་རིམ་པར་བཀོད་མཐར་སྨོན་ལམ་ཤིས་བརྗོད་སོགས་གང་འོས་སྦྱར་རོ།  ། ༈ དབུས་བརྫོང་ལྟ་བུར།  གོང་གཤམ་ཀྱི་བརྗོད་པ་དཀྱུས་བཞིན་ལ།  ཁྱད་པར་སྔོན་སྨོན་ཡན་ལག་བརྒྱ་པའི་ཕྲག  །ཉེ་བར་རྩེན་པའི་མཚན་བཟང་ཟླ་ཤེལ་གསར།  །དེང་དུས་བྷོ་ཊའི་སྨན་ལྗོངས་ཉམས་དགའ་བ།  །དབུས་འགྱུར་འཆང་ཞེས་གྲགས་པའི་ཕྱོགས་སུ་ཆས།  །དེ་ན་རྨད་བྱུང་ཡོན་གནས་མཐའ་དག་ལ།  །མཆོད་པའི་སིམ་འོད་དཀར་པོ་རིང་སྤྲོས་པས།  །ཚུལ་མིན་མུན་པ་མཐའ་དག་བསལ་བ་དང་།  །ཕན་བདེའི་སྟེང་འཐུངས་དཀར་པོའི་འཇོ་སྒེག་བསྒྲུབས།  །སླར་ཡང་བསོད་ནམས་བྱེ་བའི་ཕུང་པོ་གང་།  །མི་རིང་བོད་ཆེན་ལྗོངས་སུ་སྣང་བ་ལས།  །ལྟོས་བཅས་ཕན་བདེའི་སིམ་པ་སྟེར་བའི་སླད།  །གསོལ་འདེབས་ལེགས་སྐྱེས་ཕྲ་མོའི་དགའ་སྟོན་སྟོབ།  །ཅེས་ཚིག་རྒྱན་གྱི་མེ་ཏོག་ཕྲ་མོ་སྔོན་དུ་གཏོར་ནས།  སྐབས་སུ་བབས་པའི་གླེང་བར་བྱ་བ་ནི།  འདི་ལྟར་ཡང་སྲིད་ཀུན་ཏུ་རྣམ་པར་དཀར་བའི་ལེགས་མཛད་ཁོ་ན་ལ་གཅིག་ཏུ་གཞོལ་བའི་དམ་བཅའི་རི་མོ་བསུབ་ཏུ་མེད་པས།  དེང་གི་ཆར་ཡང་།  མཐའ་ཡས་པའི་སེམས་ཅན་ཀུན་ལ་སྨན་པའི་ཐུགས་བསྐྱེད་ཟླ་བ་ཚེས་པ་ལྟ་བུས་བོད་ཡུལ་དབུས་འགྱུར་འཆང་དག་པའི་ཞིང་ཁམས་སུ་ཆིབས་ཀྱི་ཁ་ལོ་བསྒྱུར་ཏེ།  སྤྲུལ་པའི་གཙུག་ལག་ཁང་རྣམ་པ་གསུམ་གྱིས་མཚོན་ཡེ་ཤེས་ཀྱི་རང་སྣང་ལས་གྲུབ་པའི་གཞལ་མེད་ཁང་རྟེན་དང་རྟེན་པར་བཅས་ལ་མཆོད་འབུལ་སྨོན་ལམ་དང་།  སྐྱབས་མཆོག་༧རྒྱལ་འདིའང་སྐབས་ཐོབས་ཀྱི་བསྒྱུར་བཀོད་གང་འོས་བྱ།  བའི་དབང་པོ་ཐམས་ཅད་མཁྱེན་གཟིགས་ཆེན་པོ་དབུས་རིས་མེད་ཀྱི་སྐྱེས་ཆེན་དམ་པ་རྣམས་ལ་མཇལ་ཕྱག་དང་སྲི་ཞུ།  གྲྭ་ས་ཆེན་པོ་སེར་འབྲས་དགེ་གསུམ་གྱིས་གཙོས་བཤད་སྒྲུབ་འདུས་པའི་སྡེ་རྣམས་སུ་བསྙེན་བཀུར་གྱི་ཡོན་སྟོབ་པ་སོགས་ཚོགས་གཉིས་ཀྱི་ཆུ་གཏེར་མུ་མཐའ་མེད་པར་འཕེལ་བས།  འབྲེལ་ཐོགས་ཐམས་ཅད་གནས་སྐབས་མངོན་མཐོ་དང་།  མཐར་གྱིས་ངེས་པར་ལེགས་པའི་གོ་འཕང་ཆེན་པོར་བདེ་བླགས་སུ་སྦྱོར་བའི་དགོངས་གཏད་རྨད་དུ་བྱུང་བ་དེ་བཞིན་ལ།  གང་གི་ཐུགས་རྗེའི་གདུགས་དཀར་གྱི་གྲིབ་མར་བདེ་བར་འཚོ་བའི་གྱི་ན་བ་ཁོ་བོ་ཅག་ཀྱང་ཤིན་ཏུ་དྭང་བ་ཆེན་པོས་རྒྱུད་ཡོངས་སུ་བསྐུལ་ཏེ།  ཇི་ལྟར་བཞེད་པའི་དོན་ཐམས་ཅད་དེ་དེ་བཞིན་འབད་མེད་དུ་འགྲུབ་པའི་གྲགས་སྙན་གྱི་སྣང་བ་དཀར་པོས་ཕྱོགས་ཀྱི་ཁོར་ཡུག་ཐམས་ཅད་རྒྱས་པར་འགེངས་པས་ཕན་བདེའི་སིམ་པ་བརྒྱ་ཕྲག་ཏུ་འབར་བ་དང་ཆབས་ཅིག  །སླར་ཡང་མི་རིང་བར་བོད་ཆེན་སྐྱེ་འགྲོ་ཡོངས་ཀྱི་རྟེན་དང་།  གླིང་དང་།  སྐྱབས་དང་།  དཔུང་གཉེན་གཅིག་པུར་རྒྱལ་ཐབས་ཀྱི་ཁྲི་འཕང་མཐོན་པོར་ཞབས་ཀྱི་པདྨོ་གེགས་མེད་དུ་བཀོད་གྲུབ་པར་གསོལ་བ་འདེབས་པའི་རྟེན་སྐུ་རྫོངས་མཚོན་ཙམ་འབུལ་བ་ལ།  ཞེས་པའི་མཐར་འབུལ་ཚན་སོགས་ཇི་ལྟར་རིགས་པ་བྲིའོ།    ། ༈ དེ་བཞིན་དུ་ཕྱིར་ཕེབས་པའི་དབུ་ཐོན་གྱི་ལེགས་འབུལ་ལྟ་བུ་ལའང་།  གོང་རྒྱན་དང་འབེབས་སོགས་གང་འོས་མཚམས་སུ།  ཁྱད་པར་རིང་ནས་ཚོགས་ཟུང་བྱེ་སྙེད་ཀྱིས།  །ཉེ་བར་བསྐུལ་བའི་ཐུགས་ཀྱི་བཞེད་དོན་ཀུན།  །གེགས་མེད་འགྲུབ་པའི་སྭསྟིའི་དབྱངས་སྙན་པོའི།  །ཡི་གེ་ཕྱོགས་ཀྱི་བུ་མོའི་འགྲམས་པར་བརྗིད།  །དེ་ཚེ་ལེགས་བྱས་ཟླ་བའི་རྔ་ཡབ་ཀྱིས།  །ཚེ་དཔལ་འབྱོར་པའི་ཆུ་གཏེར་སྒེག་མོའི་གཟུགས།  །ཆོས་ཆར་དར་བའི་ཤིས་པ་བསྒྲུབས་བཞིན་དུ།  །མི་མཐུན་རིམས་ནད་བརྟན་པ་གཅིག་ཅར་འཕྲོགས།  །སླར་ཡང་བོད་ཆེན་སྐྱེ་དགུའི་དོ་ཀེར་རྩེར།  །ཞབས་སེན་ནོར་བུའི་མེ་ལོང་བཏབ་པ་ཡི།  །ཚད་མེད་བཀའ་དྲིན་དྲན་པའི་འཁྲི་ཤིང་ལས།  །དགའ་སྟོན་མེ་ཏོག་ཕྲ་མོ་འབུལ་ལ་རིངས།  །ཞེས་སྐབས་སུ་བབས་པའི་བརྗོད་པ་ཉུང་ངུས་མདུན་བདར་ཏེ།  དེང་གི་ཆར་ཡང་།  གྲངས་མེད་སྐྱེ་དགུའི་བསོད་ནམས་ཀྱི་ཕུང་པོས་མགྲོན་དུ་ཉེ་བར་ཁུགས་པའི་མི་རྗེ་སའི་ཚངས་པ་ཆེན་པོ་གང་ཉིད།  །བསིལ་ལྡན་ནོར་འཛིན་གྱི་ལྟེ་བ་དབུས་གཙང་སྤྲུལ་པའི་ཞིང་ཁམས་སུ་ཆིབས་ཀྱི་ཁ་ལོ་བསྒྱུར་བ་ལ།  ཡིད་སྲུབས་ཀྱི་བདག་པོས་བཏེག་པའི་ཉེ་ཞོ་ཕྲ་མོ་ཙམ་གྱིས་ཀྱང་བརྫི་བ་མེད་པར།  ཇི་ལྟར་བཞེད་པའི་དོན་ཐམས་ཅད་འབད་མེད་དུ་འགྲུབ་པའི་དགེ་མཚན་གྱི་སྣང་བ་བརྒྱ་ཕྲག་ཏུ་འབར་བཞིན།  །སླར་ཡང་བདག་སོགས་ལྟོས་བཅས་ཡོངས་ལ་བརྩེ་བ་ཆེན་པོའི་གཟིགས་པས་གཞར་ཡང་མི་བཏང་བའི་ཕྱིར།  བོད་ཆེན་ཡངས་པའི་ལྗོངས་འདིར་གསེར་ཞལ་རིན་པོ་ཆེ་མངོན་སུམ་དུ་སྣང་བར་མཛད་པའི་བཀའ་དྲིན་ནི་ཚངས་པའི་བློ་ཡི་ར་བ་ལས་ཀྱང་ཆེས་བརྒལ་བའི་ཕྱིར་དངོས་པོའི་བདོག་པ་ཉུང་ངུའི་གཞལ་བྱ་མ་ཡིན་ཡང་།  །གནས་སྐབས་རྗེས་བརྩེའི་སྤྱན་ཟུར་གཡོ་བའི་རྟེན་ཙམ་དུ་ལེགས་འབུལ་ཕྲ་མོ་ཞིག་སྟོབ་པར།  ཐོག་མར་བཀྲ་ཤིས་པའི་ལྷ་གོས་རབ་དཀར།  ཞེས་སོགས་གང་འོས་བྲིའོ།  །  ༈ མ་ལེགས་ལྟ་བུ་འབུལ་བའི་ཚེ།  དབུལ་ཡུལ་གྱི་དམིགས་ཕྱེད་པའི་གོང་བརྗོད་སོགས་ཇི་ལྟར་འོས་པའི་མཚམས།  ཀྱེ་མ་དེང་ཚེ་བསྟན་འགྲོའི་ལེགས་བྱས་ཀྱིས།  །ཉེ་བར་ཐོབ་པའི་མི་བདག་རིན་ཆེན་དེ།  །བསོད་ནམས་ཉག་ཐག་ཕྲ་བའི་གཞན་དབང་གིས།  །ལེགས་བྲིས་དགའ་ཚལ་སྟུག་པོར་ཡུད་ལ་ཤོར།  །དེ་ཚེ་སྣ་ཚོགས་རྟོག་པའི་སྤྲིན་པ་ཡིས།  །སེམས་ཀྱི་ཟླ་ཤེལ་གསར་པ་བསྒྲིབས་མཁས་ཕྱིར།  །བཟོད་དཀའི་ཚེར་མ་རྩུབ་མོའི་ཉི་འོད་ཀྱིས།  ཡིད་དབང་ཨུཏྤལ་དཀར་པོ་དམ་དུ་བཅིངས།  །འོན་ཀྱང་འདུས་བྱས་ཆོས་ཀུན་སྐྱེ་འཇིག་གི  །ཕྱག་རྒྱས་བཏབ་པའི་ངང་ཚུལ་ལ་སེམས་ནས།  །གཅིག་ཏུ་རྣམ་པར་དཀར་བའི་འཇུག་པ་ལས།  །ཕན་པར་བྱེད་པ་སྲིད་ན་དབེན་པ་བཞིན།  །གང་ཐུགས་གདུང་བའི་སྨིག་རྒྱུ་རིང་བཏང་ནས།  །ཚོགས་ཟུང་གེ་སར་དགོད་པར་འོས་སོ་ཞེས།  །ཞུ་གསོལ་སྙན་གྱི་དབང་པོར་སིམས་པའི་སླད།  །དངོས་པོའི་ས་བོན་ཕྲ་མོ་འབུལ་ལ་ཕྱོགས།  །ཞེས་པ་ལྟ་བུ་དང་།  གཤམ་དུ་འབུལ་ཚན་རྣམས་བཀོད་མཐར་ལྷག་མ་ཇི་ལྟར་རིགས་པར་སྦྱར་བར་བྱའོ།  ། ༈ 

ཡང་ལོ་གསར་གྱི་དགའ་སྟོན་ལྟ་བུ་འབུལ་བའི་སྐབས་སུ།  གོང་གཤམ་གྱི་བརྗོད་པ་གཞན་དཀྱུས་ལྟར་ལ།  ཁྱད་པར་དེང་དུས་རྒྱལ་ཐབས་ཆུ་གཏེར་ཆེ།  སྲིད་རྩེར་འཕེལ་པའི་གྲགས་སྙན་སྟེང་འཐུང་དཀར།  ཁོར་ཡུག་རི་བོའི་བར་དུ་རྒྱས་འགེངས་བཞིན།  །འཚོ་གཞེས་ཆོ་ག་བསྒྲུབས་པའི་དང་པོའི་འཕྲིན།  །འདོར་བྱེད་སྔ་མའི་ཉེར་འཚེ་བདེན་བྲལ་མགྲིན།  །སྐྱབས་གསུམ་དགའ་བྱེད་མདའ་ཡིས་ཉེར་བཅད་དེ།  །གསར་དུ་ཚེས་འདིར་ཤིས་དགུའི་མཛའ་ན་མོ།  །མགྲོན་དུ་འགུགས་པའི་དགའ་སྟོན་གསལ་བའི་སླད།  །རྐང་པས་འཐུངས་ལས་སྨིན་པའི་འབྲས་བཟང་སོགས།  །རོ་བཅུད་ཕུན་སུམ་ཚོགས་པའི་ཟིལ་མངར་གྱིས།  །ལེགས་བྲིས་བདུད་རྩིའི་དཔལ་ལ་ཕྲག་དོག་གང་།  །མི་འགྱུར་རྟགས་ཀྱི་རེ་ཁྭ་དགོད་བཞིན་ཕུལ།  །ཞེས་པ་ཙམ་མམ་གཤམ་དུ་ཚིག་ལྷུག་སྦྱོར་བར་སྤྲོ་ན།  ཞེས་ཚིགས་སུ་བཅད་པ་ཉུང་ངུས་མདུན་བསུས་ཏེ།  དེང་གི་དུས་དགེ་བའི་ཆར་ཡང་།  མཆོག་གསུམ་རྒྱ་མཚོའི་བྱིན་རླབས་ཉིན་མོར་བྱེད་པའི་འོད་སྣང་རིང་པོར་འཕྲོ་བ་ལ་བརྟེན་ནས།  ཡིད་ཅན་ཕན་བདེའི་རྩ་ལག་སྟོབས་ཀྱི་འཁོར་ལོས་སྒྱུར་བ་ཆེན་པོ་གང་ཉིད།  ཆེ་དགུའི་རལ་ཁུར་སྣུམ་པོས་བརླིང་བར་བྱས་པའི་ནོར་བུའི་ཁྲི་འཕང་མཐོན་པོར།  གསང་གསུམ་གྱི་དཀྱིལ་འཁོར་པདྨ་དཀར་པོ་ལྟར་མཆོག་ཏུ་རྒྱས་པའི་གཏམ་སྙན་གྱི་ཟིལ་དངར་རིང་ནས་བསོད་ནམས་ཀྱི་བྱེད་པོས་བསྐྲུན་པའི་རྣ་བའི་བཅུད་ལེན་དུ་བཏུངས་པ་ལས།  གནམ་ལོ་རྙིང་པའི་ཁོངས་སུ་འགལ་རྐྱེན་ཉེ་ཞོའི་ཕྱོགས་ཐམས་ཅད་ལས་རྣམ་པར་རྒྱལ་བའི་རྒྱལ་རྔ་སྲིད་པའི་རྩེར་མོར་བརྡུངས་བ་དང་།  བགྲང་གཞི་གསར་པའི་འཛུམ་ཞལ་ཐོག་མར་ཕྱེ་བས་བརྟན་གཡོའི་དགེ་མཚན་མ་ལུས་ཤིང་ལུས་པ་མེད་པའི་སྒོ་འཕར་བརྒྱ་ཕྲག་ཏུ་དབྱེ་བའི་རྟེན་འབྱུང་དུས་སྟོན་གྱི་སྐྱེས་ཕུད་མཚོན་བྱེད་ཙམ་དུ།  ཐུད་དཀར་གྱི་གོང་བུ།  བདའ་དགུའི་ལྗོན་འབྲས།  བཅོས་མའི་བུར་སྦྲང་བཞེས་སྤྲོའི་བྱེ་བྲག་སོགས་རྟགས་ཀྱི་རེ་ཁྭས་མཛེས་པར་བྱས་ཏེ་ཕུལ་བ་དགྱེས་པ་ཆེན་པོས་སྤྱན་རས་བཙའ་བར་གསོལ་བ་འདེབས་པ་དང་སླར་སྨྲས་པ།  ཞེས་སོགས་དཀྱུས་ཀྱི་བརྟན་བཞུགས་ཤིས་སྨོན་ཇི་ལྟར་འོས་པ་སྦྱར་བར་བྱ་སྟེ།  དེ་དག་རྣམས་ནི་གཙོ་བོར་རྒྱལ་ཁབས་ཆེན་པོའི་རིགས་ལ་འབུལ་བའི་དབང་དུ་བྱས་ཀྱི།  གཞན་དུ་མི་དཔོན་ཕལ་པ་སོགས་ལ་བརྗོད་བྱ་དེ་དང་ཕྱོགས་མཐུན་ཙམ་ལ་དམིགས་བསལ་གྱི་ཁ་བསྒྱུར་སྐབས་དང་མཐུན་པར་བྱ་བ་ལས་འདིར་དཔེར་བརྗོད་པ་ན་ཧ་ཅང་ཡི་གེས་འཇིགས་པས་རེ་ཞིག་བཏང་སྙོམས་སུ་བྱས་སོ།  ། ༈ 

བཅུ་ཕྲག་རིག་པའི་གནས་ལ་གཞན་དྲིང་མི་འཇོག་པའི་མཁས་པ་ཞིག་ལ་འབུལ་ན།  རྨད་བྱུང་རྣམ་དཔྱོད་ཡངས་པའི་གོམ་གསུམ་གྱིས།  །ཤེས་བྱའི་ས་ཆེན་མ་ལུས་བདེར་བཅིངས་ཚེ།  །སྔོན་མེད་ཁྱབ་འཇུག་གཉིས་པ་ཉིད་དོ་ཞེས།  །ལྷར་བཅས་དགའ་བའི་ཅ་ཅོ་སྒྲོགས་དེའི་དྲུང་།  །གང་གིས་མཁྱེན་རབ་བདུན་གྱི་བདུན་པ་ཡིས།  །དམན་བློའི་འདམ་སྐྱེས་གཞོན་ནུར་རེག་པའི་མོད།  །གུས་སྤྲོའི་མཆུ་སྒྲོས་བྱེ་བའི་འཛུམ་དཀར་ལས།  །སྙན་པར་སྨྲ་བའི་ངག་གི་བསུང་ཞིམ་འཐུལ།  །གཞན་དག་རྗེས་སུ་གཟུང་བའི་གཉིས་འཐུང་སྟེང་།  །ལོག་སྨྲ་ཚར་གཅོད་རྡོ་རྗེའི་མཚོན་གདེངས་ཤིང་།  །རང་ཉིད་ཀུན་ཤེས་རིག་པའི་མིག་སྟོང་ཅན།  ཁྱོད་ནི་ས་ཡི་ལྷ་དབང་གཉིས་པར་ངེས།  །མཐའ་ཀླས་ཤེས་དང་ཤེས་བྱའི་སྣང་བ་ཡིས།  །ས་གསུམ་དཀར་པོར་བྱས་པའི་གཏམ་འདི་ཀ   །བྱེད་པོ་ཤར་གྱི་ཐིག་ལེ་ཡིན་སྙམ་ན།  །སྐལ་བཟང་སློབ་མའི་ཡིད་ཀྱི་ཀུནྡཱ་བཞད།  །འདི་ན་སྐྱེས་དང་སྦྱངས་པའི་བློ་གྲོས་ཀྱིས།  །རང་རྒྱུད་དགེ་བར་བྱས་པ་མེད་མོད་ཀྱི།  །མཆོག་གསུམ་ཐུགས་རྗེའི་སྤྲིན་དཀར་གྱིས་གསོས་པས།  །ལང་ཚོའི་མྱུ་གུ་མ་ཉམས་བདེ་བར་མཆིས།  །སླད་མར་སྲིད་དང་ཞི་བའི་དགེ་ལེགས་ཅན།  །ཐམས་ཅད་མཁྱེན་ཅེས་གྲགས་པའི་བ་དན་དཀར།  །མངོན་པར་བརྙེས་ནས་སྲིད་པ་ཇི་སྲིད་བར།  །བརྟན་པར་བཞུགས་པའི་དགའ་སྟོན་སྤྲོ་བར་མཛོད།  །དེ་སྐད་ཞུ་བའི་མཆིད་ཚིག་ཡུལ་འཁོར་སྲུང་།  །གཟིགས་རྟེན་འདབ་གཤོག་དཀར་པོ་ཟུང་བསྐྱོད་དེ།  །འཕྲིན་ཡིག་རྐང་པའི་དྲིལ་ཆུང་འཁྲོལ་དང་བཅས།  །གང་གི་རྣམ་དཔྱོད་ཨུཏྤལ་རོལ་མཚོར་དེངས།  །  ༈ ཡང་ན།  མཁྱེན་དཔྱོད་ཉིན་མོར་བྱེད་པའི་འོད་རྡུལ་ནི།  །ཡོངས་རྫོགས་རིག་གཞུང་ཨུཏྤལ་དགའ་ཚལ་དུ།  །གཟུགས་ཅན་བཞིན་དུ་རྒྱུ་བའི་དཔྱིད་དཔལ་གྱིས།  །ལྷར་བཅས་ཡིད་ཀྱི་བརྟན་པ་འཕྲོགས་དེའི་དྲུང་།  །མང་ཐོས་ཆར་གྱིས་བྲན་པར་མ་གྱུར་ཅིང་།  །བསམ་བྱུང་དཔྱིད་ཀྱི་དཔལ་མོས་བཟུང་མིན་ཀྱང་།  །ལྷག་བསམ་པདྨ་དཀར་པོ་བཞད་པ་ལས།  །ཞུ་མཆིད་དྲི་བསུང་མངར་པོ་དེང་འདིར་འཐུལ།  །རྡུལ་བྲལ་ཞི་བ་དམ་པའི་གྲོང་ཁྱེར་དུ།  །དཀྲི་བའི་ལམ་སྟེགས་ཐུན་མོང་ཁྱད་པར་གྱི།  །ལེགས་བཤད་བདུད་རྩི་གསར་པའི་དགའ་སྟོན་མཁན།  །འཚོ་གཞེས་ཆོ་ག་མ་རྙིང་དགེ་ལགས་སམ།  །འདི་ན་གཟོད་ནས་རྨོངས་དང་མ་རིག་པའི།  །དྲ་བས་དམ་དུ་བཅིངས་པའི་གྱི་ན་བ།  །དཀོན་མཆོག་ཐུགས་རྗེའི་རྭ་བར་རྟེན་འཆའ་བས།  །གནས་སྐབས་ཉེར་འཚེས་ཉེན་པར་མ་གྱུར་ཙམ། །སླད་དུ་རིགས་གཟུགས་ལང་ཚོའི་འབྱོར་པ་ཡིས།  ཁྱད་པར་བྱས་པའི་གང་ཟག་མང་མོད་ཀྱང་།  །བློ་གྲོས་མཚུངས་མེད་རིག་པའི་རྣ་ཆ་ཅན།  ཁྱོད་གཅིག་ལགས་བཞིན་ཡུན་དུ་ཞབས་བརྟན་མཛོད།  །དེ་སྐད་སྤྲོ་བར་འོས་པའི་གཏམ་གྱི་དབྱངས།  །ཚིག་རྒྱན་ཏམྦུརཿཡི་རོལ་མོ་དང་།  །རྣམ་པར་བསྲེས་པའི་སྙན་འགྱུར་སྒྲོགས་དང་བཅས།  །རྟེན་གྱི་བླ་གོས་གཡོ་བཞིན་རིངས་པར་དེངས།  །ཡང་ན།  གྲངས་མེད་ཤེས་བྱའི་བདུད་རྩིའི་བཅུད།  །འཐུང་བས་མྱོས་པའི་ཟླ་ཤེལ་ནི།  །མཁས་མང་བདེ་འབྱུང་ཅོད་པན་རྩེར།  །རྣམ་པར་རོལ་དེའི་ཞབས་སེན་དུ།  །དྭང་བས་ཞུ་མཆིད་ཨུཏྤ་ལ།  །སྙན་ཚིག་ཚོན་རིས་བཀྲ་དང་བཅས།  །སྤྱི་བརྟོལ་བསྐྱེད་དེ་འབུལ་ལགས་ན།  །རྗེས་བརྩེའི་ཐུགས་ཀྱིས་བཞེས་པར་མཛོད།  །གང་གི་ཐུན་མོང་ཁྱད་པར་གྱི།  །རིག་གཞུང་རྒྱ་མཚོ་འཕེལ་བྱས་ཕྱིར།  །ཕལ་ཆེར་ཆར་སྤྲིན་སར་པའམ།  །ཟླ་བའི་སིམ་འོད་ཟག་པར་འཁྲུལ།  །འདི་ན་རྨོངས་དང་མ་རིག་པའི། །ཤ་ཚུགས་རྒྱས་པའི་ལག་ལྡན་ཡང་།  །ཚུལ་མིན་འདམ་ལ་བྱིངས་བཞིན་དུ།  །འཚོ་བའི་འདུ་བྱེད་མ་ཉམས་ཙམ།  །སླད་མར་ཆུ་གཏེར་རྣམ་པ་བཞིའི།  །འོག་པགས་འཆང་བའི་རྟེན་འདི་རུ།  །དཔྱོད་ལྡན་དུ་མའི་གཉེན་གྱུར་ཕྱིར།  །འཚོ་གཞེས་ཆོ་ག་བརྟན་པར་མཛོད།  །ཞུ་མཆིད་དགེ་བའི་མལླི་ཀ  །གཟིགས་རྟེན་འདབ་གཤོགས་ཟུང་བསྐྱོད་དེ།  །སྙན་ཚིག་རྐང་པའི་གདུ་བུའི་སྒྲ།  །འཁྲོལ་བཞིན་རིངས་པ་རིངས་པར་དེངས།    ། ༈ 
བྱེ་བྲག་ཏུ་སྒྱུ་མ་མཁན་གྱི་བཀོད་པ་ཡང་རྟུལ་པོར་བགྱིད་པའི་བཟོ་རིག་ཁོ་ན་ལ་མཁས་པའི་དབང་པོར་གྱུར་པ་ཞིག་ལ་འབུལ་ན།  །རྨད་བྱུང་མཁྱེན་དཔྱོད་ནོར་བུའི་ཨཱ་དཪྴར།  ངོ་མཚར་བཟོ་རིག་རྒྱ་མཚོའི་རི་མོ་ཡིས།  །ལྷར་བཅས་ཡི་ག་དབང་མེད་འགུགས་བརྩོན་པའི།  །བྱེད་པོ་སྣ་ཚོགས་ལས་བྱེད་གཉིས་པའི་དྲུང་།  །མང་ཐོས་ཉི་ཟླའི་ཟེར་གྱིས་མ་སྨིན་ཅིང་།  །སྒོམ་བྱུང་ཆུ་རྡུལ་གསར་པས་རེག་མིན་ཡང་།  །ལྷག་བསམ་མཛེས་མའི་འགྲམ་ཆང་གིས་ཕྱེ་ཚེ།  །མཆིད་འོས་བ་ཀུ་ལ་ཡི་མཚར་སྡུག་གྲོལ།  །གང་གི་བློ་མཆོག་འཁྲི་ཤིང་དུད་པ་ལས།  །དོན་གཉེར་སྐལ་བཟང་སྐྱེ་བོའི་སྙིང་དང་མིག  །བདུད་རྩིར་བགྱི་སླད་བསྐྲུན་པའི་མེ་ཏོག་གིས།  །སྲིད་འདིའི་མཛེས་པ་གཞན་ཀུན་འགོགས་པ་བཞིན།  །གྲགས་པའི་ཡོན་ཏན་དེ་ཡིས་བདག་སོགས་ཀྱང་།  །ཡིད་ཀྱི་བརྟན་པ་ཕྲོགས་དང་ཆབས་ཅིག་པར།  ས་ལ་འཆི་མེད་གྲོང་ཁྱེར་དང་མཚུངས་པའི།  །དགའ་སྟོན་སར་པ་འཕོས་སྙམ་སྤྲོ་བས་སིམ།  །འདི་ན་སྐྱབས་གནས་རིན་ཆེན་རྣམ་གསུམ་གྱི།  །ཐུགས་རྗེའི་གདུགས་དཀར་གྲིབ་མར་ངལ་བསོས་པས།  །ཉེར་འཚེའི་ཚ་གདུང་རིང་དུ་བྱས་པ་དང་།  །ལྷན་ཅིག་དད་གསུམ་ལང་ཚོ་ཅི་ཡང་འཕེལ།  །སླད་ཆར་འདོད་འབྱུང་དལ་རྟེན་དཔག་བསམ་དབང་།  །ཐབས་ཚུལ་རིམ་གྲོའི་ཆར་གྱིས་བྲན་པ་ལས།  །ཡུན་དུ་བརྟན་པའི་འཇོ་སྒེག་གཡོ༷་དང་བཅས།  །ཕུན་ཚོགས་ཕན་བདེའི་འབྱོར་པ་སྦྱིན་པར་མཛོད།  །དེ་སྐད་ཞུ་མཆིད་མལླི་ཀཀྵ་ནི།  །རྟེན་གྱི་འདབ་གཤོག་དཀར་པོ་གཡོ་བ་དང་།  །བརྗོད་པ་སྙན་པའི་དྲིལ་ཆུང་འཁྲོལ་དང་བཅས།  །ཀུན་ཏུ་དགེ་བའི་ཚེས་ལ་རྣམ་པར་དེངས།  །ཞེས་པ་ལྟ་བུ་དང་།    ། ༈
ཡང་བཟོ་རིག་གི་ནང་ཚན་རི་མོ་བྲིས་འབུར་ལྟ་བུ་གང་རུང་ལ་མཁས་པ་ཞིག་གི་མདུན་དུ་འབུལ་ན།  སྲིད་ཞིའི་ཆོས་ཁམས་ཡོངས་ཀྱི་ཉམས་འགྱུར་ཀུན།  །རྣམ་དཔྱོད་སོར་རྩེས་བསྐྲུན་པའི་ངོ་མཚར་གྱིས།  །འཇིག་རྟེན་མེས་པོའི་ཡིད་ཀྱང་འགུགས་ནུས་པའི།   །བྱེད་པོ་མཚུངས་མེད་མཆོག་གི་ཉེ་དྲུང་དུ།  །སྐྱེས་སྦྱངས་ཡོན་ཏན་དམན་པའི་བྷྲ་མ་རས།  གང་གི་རྣམ་ཐར་ཨུཏྤལ་ཆུན་པོ་ལ།  །དགའ་བས་ཕྱོགས་ནས་མཆིད་ཚིག་དར་དིར་གླུ།  །རྐང་པར་བཅད་པའི་ཕྲེང་བ་འདི་འབུལ་ལོ།  །རྨད་བྱུང་བློ་གྲོས་ཤེལ་གྱི་ཨཱ་དཪྴར།  །གྲངས་མེད་རི་མོའི་འདུ་འགོད་འཕོས་པ་ཡིས།  དཔྱོད་ལྡན་མིག་དང་སྙིང་ལ་བདུད་རྩིའི་རོ།  །སྦྱིན་མཁས་གང་ཁྱོད་བདེ་བར་འཚོ་ལགས་སམ།  །འདི་ན་རྨོངས་དང་མ་རིག་བརྒྱ་ཕྲག་གི  །ཁུར་གྱིས་ནོན་པའི་འདུ་ཤེས་གསུམ་པ་ཡང་།  །མཆོག་གསུམ་ཐུགས་རྗེའི་དཔྱངས་ཐག་གིས་བཟུང་བས།  །སྲིད་པ་ཕྱི་མར་ཉིང་མཚམས་མ་སྦྱར་ཙམ།  །སླད་ནས་ཟབ་གསང་མདོ་རྒྱུད་རྒྱ་མཚོ་ལས།  །ཇི་ལྟར་བསྟན་པའི་མཚན་ཉིད་མ་སྨད་པས།  །ཉེ་བར་བསྲུང་བའི་སྣང་བརྙན་གསར་པ་ཡིས།  བསྟན་འགྲོར་དགའ་བ་བརྒྱ་ཕྲག་བསྐྱེད་པར་མཛོད།  །དེ་སྐད་ཞུ་མཆིད་རབ་དྭངས་བློ་གྲོས་ནི།  །སྨིན་ལེགས་མཛེས་མའི་སོར་རྩེར་རྣམ་བརྟགས་པས།  །སྙན་ཚིག་མྱ་ངན་མེད་པའི་མེ་ཏོག་གསར།  །རྟེན་གྱི་འདབ་མ་མ་ཉམས་དགོད་བཞིན་ཕུལ།    ། ༈

ཡང་ཡོན་ཏན་ཀུན་གྱི་ཕྱི་མོར་གྱུར་པའི་རྒྱ་བོད་ཀྱི་ཡིག་རིགས་དུ་མར་སོར་མོའི་འདུ་འགོད་མི་རྨོངས་པའི་མཁས་པ་ཞིག་ལ་འབུལ་ན།  རྒྱལ་གསུང་རྣམ་པ་ཀུན་ལྡན་ནཱ་དའི་དབྱངས།  །མིང་ཚིག་ཡི་གེའི་གཟུགས་སུ་བསྐྲུན་པ་ལ།  །ཟླ་མེད་ལེགས་སྦྱིན་ཉི་མའི་སྤུན་ཟླ་ཅན།  །རྨད་བྱུང་སྣང་བ་སར་པའི་ཉེ་དྲུང་དུ།  །ཐོས་དང་བསམ་པའི་བརླན་གྱིས་མ་ཕྱེད་ཅིང་།  །སྒོམ་བྱུང་ཉི་ཟླའི་འོད་ཀྱིས་རེག་མིན་ཡང་།  །གང་ཚུལ་དཔྱིད་ཀྱི་དཔལ་མོས་བསྐུལ་བའི་ཚེ།  །སྤྲོ་དགའི་ཕང་ཕུང་གཡོ་བས་མཆིད་འདི་ཕུལ།  །འཕགས་བོད་ཡི་གེའི་རིག་བྱེད་མཐའ་དག་ལ།  །མཉེན་ལྕུག་སོར་མོའི་འདུ་འགོད་མ་རྨོངས་པའི།  ཁྱོད་ཀྱི་སྔོན་མེད་ངོ་མཚར་གསར་པའི་གཟུགས།  །བལྟ་ཕྱིར་དབང་པོས་སྤྱན་སྟོང་སྤྲུལ་པ་བཞིན།  །དེ་སླད་དོན་དང་བཅས་པའི་འཚོ་བ་ནི།  །དུས་ལས་ཡོལ་མིན་གཏམ་གྱི་དགའ་སྟོན་གྱིས།  །དབྱར་གྱི་རྔ་གསང་ཐོས་པའི་མདོངས་མཐའ་བཞིན།  །བདག་ཀྱང་མི་ཕྱེད་དང་བའི་ཚོར་བས་སིམ།  །སླད་མར་རྒྱལ་བསྟན་ལུང་གི་ཆོས་འཁོར་གྱི།  །ཕྱི་མོར་གྱུར་པའི་རིག་པ་ཁྱད་པར་ཅན།  །འདི་ཉིད་ཁོ་ན་འཆད་དང་སྤེལ་བ་ཡིས།  །ཕུན་སུམ་ཚོགས་པའི་ཤིས་པ་བསྒྲུབ་པར་མཛོད།  །དེ་སླད་མཆིད་འོས་ཨམྲྀའི་དོགས་པ་ཡིས།  །རྣམ་པར་བསྲུང་བའི་མཆིད་ཚིག་སྦྲང་རྩི་གསར།  །མགྲིན་པར་བཟུང་བའི་རཿཡིག་གཉིས་པ་ནི།  །རྟེན་དངོས་གཤོག་རླབས་གཡོ་བཞིན་རིངས་པར་དེངས།    ། ༈ 

ལུས་ཅན་རྣམས་དུས་མིན་གྱི་འཆི་བ་ལས་བཟློག་ཅིང་།  གནང་རིགས་སྐྱེས་སྦྱངས་དང་ལྡན་པའི་འཚོ་བྱེད་མཁས་པ་ཞིག་ལ་འབུལ་ན།  གཞན་ཕན་ག་བུར་དོགས་པས་སྙིང་བརླན་ཞིང་།  །རྣམ་དཔྱོད་མེ་ཏོག་དགོད་ལ་མ་རྨོངས་པས།  །གྲངས་མེད་འགྲོ་བའི་དབུགས་ཆེན་འབྱིན་པ་ལ།  །སྔོན་མེད་དཔལ་གྱི་དུམ་བུ་སར་པའི་དྲུང་།  །ཤིན་ཏུ་གདུང་བའི་རྣམ་འགྱུར་གྱིས་ཉེན་པར།  །དག་བྱེད་བདུད་རྩི་འབབས་པའི་སྤྲིན་སྔོན་ཁྱོད།  །མཐོང་བའི་མོད་ནས་དགའ་བས་བྲེལ་བའི་བུ།  །མགྲིན་སྔོན་མགྲིན་པ་བཏེགས་ནས་མཆིད་འདི་གསོལ།  །དུག་གསུམ་བུད་ཤིང་འབར་བ་ལས་མཆེད་པའི།  །མི་ཟད་ཟུག་རྔུའི་མེ་ལྕེ་གཡོ་བའི་དབལ།  །གསོ་བྱེད་ཐབས་ཚུལ་དུ་མའི་ཆུ་གཏེར་གྱིས།  །རྣམ་པར་སྨད་པའི་དྲིན་དེ་སུ་ཡིས་གཟོ།  །དེ་ཕྱིར་གཞུང་མང་ཨུཏྤལ་ཆུན་པོ་ནི།  །རྣ་བའི་རྒྱན་དུ་མཛེས་པ་མ་རྙིངས་བཞིན།  །འཚོ་གཞེས་བརྟན་པའི་སྤྲིང་ཡིག་ཐོས་ཙམ་གྱི།  །བརྒྱ་ཕྲག་དགའ་བ་བསྐྱེད་དེ་རྒྱུ་ཡི་མཐུ།  །འདི་ན་བསྔགས་འོས་ཡོན་ཏན་ནོར་བུ་ཡིས།  ཁྱད་པར་བྱས་པ་ཅུང་ཟད་མེད་མོད་ཀྱི།  །མཆོག་གསུམ་བཀའ་དྲིན་གྲིབ་མར་རྟེན་འཆའ་ལས།  །གཅིག་ཏུ་འཚོ་བའི་འདུ་བྱེད་ཉམས་མ་གྱུར།  །སླད་མའི་ཆར་ཡང་མགོན་མེད་ཉམ་ཐག་འགྲོར།  །ཕན་པར་བྱེད་པ་གཞན་འགའ་ཡོད་མིན་ཕྱིར།  །ས་ལ་འཆི་མེད་དྲང་སྲོང་གཉིས་པ་ཁྱོད།  །ཡུན་དུ་བརྟན་པའི་ཐབས་ཚུལ་ལྷུར་ལེན་མཛོད།  །ཞུ་མཆིད་སྙན་ཚིག་མེ་ཏོག་དོ་ཤལ་གྱིས།  །རྣམ་པར་སྒེག་པའི་འཁྲི་ཤིང་གསར་པ་ནི།  །རྟེན་གྱི་ལོ་འདབ་གཡོ་བའི་དཔྱིད་དང་བཅས།  །འདུ་ཤེས་གསུམ་གྱི་བྲན་དུ་གྱུར་དེས་ཕུལ།  །ཡང་ན།  དཔལ་ལྡན་གསོ་རིག་ཚངས་དབང་རལ་པ་ལས།  །ལེགས་པར་འབབས་པའི་གཞུང་བཟང་གངྒཱའི་གཏེར།  །རྣམ་དཔྱོད་འཛིན་མའི་ལྟོ་བར་བཟུང་མཁས་པས།  །འགྲོ་ཀུན་ཉེས་གསུམ་དྲི་མ་སེལ་དེའི་དྲུང་།  །གང་གི་གཞན་ཕན་མེ་ཏོག་དགོད་པ་ལས།  །ཉེ་བར་འོང་བའི་གཏམ་གྱི་སྦྲང་རྩི་ཡིས།  །ཀུན་རྨོངས་རཿཡིག་གཉིས་པ་བདག་ཅག་ཀྱང་།  །ཡི་རངས་ལང་ཚོ་རྒྱས་པས་མཆིད་འདི་གསོལ།  །དམན་ལྷག་ལོག་པའི་ཞགས་པ་རིང་བཅད་པའི།  །ངོ་མཚར་འཆི་གསོས་ལམ་མཆོག་གྲུབ་པའི་གཟིས།  །རྣམ་འགྱུར་གདུང་བ་སེལ་བའི་དགའ་སྟོན་ཁྱོད།  །འཚོ་གཞེས་བརྟན་པས་ཡིད་ལ་སྤྲོ་དགའ་བྱིན།  །འདི་ན་རིགས་གཟུགས་ཐོས་པའི་ཡོན་ཏན་གྱིས།  །རིང་དུ་སྤངས་པའི་གྱི་ནར་སྤྱོད་པ་ཡང་།  །བསླུ་མེད་སྐྱབས་གནས་གསུམ་གྱི་བཀའ་དྲིན་གྱིས།  །ཉེར་འཚེའི་འདུ་བྱེད་སྐབས་བཙལ་བྲལ་བཞིན་བདོག  །སླད་མར་ཚེ་རིག་བྱེ་བའི་ཆུ་བ་ཡིས།  །རྣམ་པར་བསྲུངས་པའི་སྡེ་བཞིའི་པདྨོ་ནི།  །འཛུམ་བཅས་རོལ་པའི་ཚུལ་འདི་དུས་རིང་མོར།  །འཚོ་བའི་ཐབས་ཚུལ་ལྷོད་པ་མེད་པར་ཞུ།  །དེ་སྐད་མཆིད་འོས་དཔྱིད་ཀྱི་ཀཽ་ཀི་ལ།  །སྙན་ཚིག་མགྲིན་པའི་གླིང་བུ་འཁྲོལ་བ་དང་།  །རྟེན་གྱི་སྐྱེད་བྱེད་ཕན་ཚུན་གཡོ་བཞིན་ཏུ།  །དོན་གཉིས་དགའ་བའི་ཚལ་དེར་དེངས་ལ་ཕྱོགས།  །ཡང་ན།  །གཞན་ལ་ཕན་འདོད་ཆུ་གཏེར་ལས།  །ལེགས་འོང་རྣམ་དཔྱོད་ཟླ་བ་གསར།  །འཆི་གསོས་བདུད་རྩིའི་སྤྲིན་སྤྲོ་བས།  །ཀུན་དགའི་དགའ་སྟོན་སྦྱིན་དེའི་དྲུང་།  །གང་གི་རྣམ་ཐར་དྲི་མེད་གཏམ།  །འདི་ན་ཡང་ཡང་ཐོས་པ་ལས།  །སྤྲོ་དགའི་མགྲིན་པ་མཐོར་བཏེགས་ཏེ།  །རྐང་པར་བཅད་ནས་ཞུ་བའི་མཆིད།  །མི་ན་གནས་དང་རྣམ་འགྱུར་ཚོགས།  །གསོ་བའི་ཐབས་ཚུལ་མ་རྨོངས་གང་།  །ཡན་ལག་བརྒྱད་ཀྱི་འཇོ་སྒེག་བཅས།  །འཚོ་གཞེས་ཆོ་ག་གསལ་ལགས་གྲང་།  །གཟོད་ནས་རྣམ་པར་དཀར་བ་ཡི།  །རྒྱུ་འབྲས་སྤངས་པའི་དམན་བདག་ཀྱང་།  །འདུ་ཤེས་གསུམ་གྱི་དམ་འོག་ཏུ།  །འདའ་བར་མ་ནུས་བཞིན་དུ་མཆིས།  །སླད་མར་ཕན་བདེའི་གཏེར་གྱུར་བའི།  །གཟུགས་སྐུའི་ལྗོན་བཟང་མ་ཉམས་བཞིན།  །འགྲོ་སྲོག་དུས་མིན་འཆི་བ་ཡིས།  །རྣམ་པར་ཉེན་ལས་སྐྱོབ་པར་མཛོད།  །དེ་སྐད་ཞུ་མཆིད་ཨུཏྤ་ལ།  །རྟེན་དངོས་ཚོན་ཆགས་བཀྲ་བཞིན་དུ།  །དྭང་བའི་ཡིད་ཀྱི་བློ་མཚོ་ནས།  །མངོན་པར་ཐོན་པ་དགེ་གྱུར་ཅིག  །  ༈ 
རང་བཞིན་རྐྱེན་དང་རྣམ་འགྱུར་གྱི་གཞུང་ལུགས་དཔྱིས་ཕྱིན་པར་སྟོན་པའི་ལེགས་པར་སྦྱར་བའི་བསྟན་བཅོས་ལ་རྨོངས་པ་མེད་པའི་རྣམ་དཔྱོད་ཅན་སྒྲ་རིག་འཛིན་པའི་དབང་པོ་ཞིག་ལ་འབུལ་ན།  མཐའ་ཡས་སྨྲ་བའི་སྒོ་འཕར་རབ་དབྱེ་བས།  །ལུང་དུ་སྟོན་པའི་སྒྲ་དབྱངས་སྲིད་རྩེའི་བར།  ཁྱབ་མཛད་ས་ཡི་ཕུར་བུ་གཉིས་པ་ཞེས།  །མཁས་ཀུན་དགའ་བས་སྒྲོགས་དེའི་མདུན་ས་རུ།  །མིང་ཚིག་ཡི་གེའི་རིག་བྱེད་ངོ་མཚར་བའི།  །རྣམ་དཔྱོད་མ་ཉམས་བཀྲ་བའི་བསིལ་ཟེར་ཅན།  །གང་གི་གྲགས་དཀར་བདུད་རྩིའི་སྤུན་ཟླ་ལ།  །ཡིད་རབ་དྭང་བས་ཞུ་བའི་མཆིད་འདི་ཕུལ།  །སྣ་ཚོགས་བྱིངས་ཀྱི་གུར་གུམ་གཞོན་ནུའི་རྒྱ།  །སྣ་ཚོགས་རྐྱེན་གྱིས་ཉིན་བྱེད་ཀྱིས་ཕྱེ་ཚེ།  །སྣ་ཚོགས་མིང་དང་ཚིག་གི་མཚར་སྡུག་ཅན།  །སྣ་ཚོགས་བཞད་པའི་བྱེད་པོ་ཁྱོད་ལས་སུ།  །དེ་སླད་དྲི་མེད་ལེགས་པར་སྦྱར་བའི་གཏམ།  །རྐང་བཞིའི་ཚིགས་སུ་བཅད་པའི་གཞུང་ལུགས་ལ།  །མི་བྱེད་འདྲེས་པའི་དགེ་མཚན་སར་པ་ཡིས།  །འདི་ན་གནས་པའི་ཡིད་ཀྱང་ངལ་འཚོར་གྱུར།  །ཤིན་ཏུ་རྨོངས་པའི་ཞགས་པས་དམ་བཅིངས་པའི།  །ངང་ཚུལ་འདི་ལས་འདའ་བར་མ་ནུས་ཕྱིར།  །གྱི་ན་ཙམ་གྱི་སྤྱོད་པས་འཚོ་བདག་ཀྱང་།  །སྲོག་གི་འདུ་བྱེད་ཉམས་པར་མ་གྱུར་ཙམ།  །སླད་མར་འཆི་མེད་རྟག་པའི་ཨ་མྲྀ་ཏས།  །གསང་གསུམ་དགེ་བར་བརླན་པའི་དོག་པ་ཡིས།  །འཚོ་གཞེས་མ་རྙིངས་དགོད་པའི་མེ་ཏོག་གིས།  །དཔྱོད་ལྡན་དགའ་བའི་བདོག་པ་སྦྱིན་པར་མཛོད།  །དེ་སྐད་ཞུ་མཆིད་རཱ་ཛ་ཧཾ་ས་ནི།  །སྙན་ཚིག་རྐང་པའི་དྲིལ་ཆུང་འཁྲོལ་བ་དང་།  །རྟེན་དངོས་གཤོག་རླབས་མ་ཉམས་གཡོ་དང་བཅས།  །ཀུན་ཏུ་ཤིས་པའི་དུས་ལ་ཛཱག་ཏཱ་མ།  །ཡང་ན།  རང་བཞིན་རྐྱེན་དང་རྣམ་འགྱུར་ཉམས་བརྒྱ་ཡིས།  །རབ་ཏུ་སྒེག་པའི་སྒྲ་རིག་རྒྱ་མཚོའི་གཞུང་།   །འཐུང་བཟོད་རྟ་དོང་མེ་ལྕེའི་ངང་ཚུལ་ཅན།  །སྔོན་མེད་དཔལ་ལྡན་ཟླ་བ་གཉིས་པའི་དྲུང་།  །སྐྱེ་བས་ཐོབ་དང་རྗེས་སུ་སྦྱངས་པ་ལས།  །བྱུང་བའི་རྣམ་དཔྱོད་མཚར་སྡུག་རྫོགས་མིན་ཡང་།  །ལྷག་བསམ་བརླན་གྱིས་སྨིན་པའི་ས་བོན་ལས།  །རབ་དྭངས་ལོ་འདབ་གཡོ་བའི་མཆིད་འདི་འབུལ།  །ལེགས་པར་སྦྱར་བའི་ཆུ་གཏེར་མཐའ་དག་ཀུན།  །རྣམ་དཔྱོད་ཧུབ་གཅིག་གིས་བཏུངས་གྲགས་དཀར་གྱིས།  །ཛཧྣུའི་སྙན་པ་འཕྲོགས་པའི་མཁས་དབང་གང་།  །འཚོ་གཞེས་བརྟན་པས་ཀུན་དགའི་མྱོང་བ་བྱིན།  །འདི་ན་བློ་མཆོག་ཀུནྡཱའི་འཇོ་སྒེག་གིས།  །གཞན་ཡིད་འགུགས་པའི་ངོ་མཚར་མི་ལྡན་ཡང་།  །མཆོག་གསུམ་བཀའ་དྲིན་རྭ་བར་བརྟན་འཆའ་བས།  །ལང་ཚོའི་མྱུ་གུ་ཉམས་པར་མ་གྱུར་ཙམ།  །སླད་དུ་ཕུན་ཚོགས་བྱེ་བའི་འབྱུང་གནས་མཆོག  །གཟུགས་སྐུའི་འཕྲོད་བཞེས་མ་ཉམས་སྤྱད་པ་ཡིས།  །རིང་པོར་བརྟན་པའི་སྐལ་བཟང་དཔག་བསམ་གྱིས།  །བརྡ་སྤྲོད་འབྲས་བཟང་ཀུན་ལ་སྦྱིན་པར་མཛོད།  །དེ་སྐད་ཞུ་མཆིད་རྟེན་གྱི་མེ་ཏོག་ནི།  རྣ་བའི་རྒྱན་དུ་ཐོགས་པའི་འཁྲི་ཤིང་གསར།  །སྙན་ཚིག་བསུང་ཞིམ་ཅི་དགར་འཐུལ་དང་བཅས།  །རིངས་པར་ཕུལ་ལོ་སརྦ་ཤོ་བྷནྟུ།    ། ༈ 

ཡང་དབྱངས་ལྡན་གྱི་རྒྱུད་མངས་ནས་བླངས་པ་དང་མཚུངས་པའི་ངག་གིས་བརྗོད་བྱ་ལུང་དང་རྟོགས་པའི་དམ་ཆོས་ཀྱིས་མཚོན་པའི་ཚོགས་མཐའ་དག  །རྗོད་བྱེད་རྒྱན་གསུམ་ལམ་ནས་དྲངས་པ་ལ་གཞན་དྲིང་མི་འཇོག་པའི་སྙན་ངག་པ་ཆེན་པོ་ཞིག་ལ་འབུལ་ན།  སྨྲ་བ་ངག་གི་དཔལ་གྱུར་མཚོ་བྱུང་མ།  །ལེགས་བྱས་མགྲིན་པར་ཆགས་པའི་དཔྱིད་དཔལ་ལས།  །དབྱངས་ལྡན་རྫོགས་པའི་སྙན་ཚིག་བདུད་རྩིའི་སྤྲིན།  །སྤྲོ་མཛད་སྔོན་མེད་ཟླ་བ་གསར་པའི་དྲུང་།  །འདི་ན་རྟག་དང་གུས་སྦྱོར་བརྟུན་པ་ཡིས།  །གཞུང་མང་འདྲེན་པའི་ངལ་བ་ལྷོད་གྱུར་ཀྱང་།  །ལྷག་བསམ་མ་དྲོས་ཆུ་གཏེར་གཡོ་བའི་ལྕེ།  །ཞུ་མཆིད་ཛམྦུ་ནཱ་དའི་ཕྲེང་བ་སྤྲོས།  །བརྗོད་བྱ་མངོན་པར་མཐོ་དང་ངེས་ལེགས་ཆོས།  །རྗོད་བྱེད་རྒྱན་གསུམ་ལམ་ནས་འདྲེན་པའི་ཚེ།  །གངས་རིའི་ཁྲོད་ཀྱི་དཔལ་ལྡན་དཎྜི་ཞེས།  །ལྷར་བཅས་དགའ་བའི་ཅོད་པན་ཁྱོད་ལ་བྱིན།  །དེ་སླད་དོན་ལྡན་འཚོ་བའི་གཏམ་བཟང་ནི།  །གྲགས་པ་ག་བུར་རྡུལ་དང་ལྷན་ཅིག་པ།  །བཏུང་བས་མྱོས་པའི་བདག་ཡིད་ཀུ་མུ་དཱ།  །ཡི་རང་འདབ་རྒྱ་གྲོལ་བའི་མཚར་སྡུག་ངོམ།  །གནས་སྐབས་ཙམ་མིན་མཐར་ཐུག་མཆོག་གི་སར།  །དབུགས་འབྱིན་བགྱིད་པའི་རིན་ཆེན་རྣམ་གསུམ་གྱི།  །ཐུགས་རྗེའི་རྔ་ཡབ་གྲིབ་མར་གནས་བདག་ཀྱང་།  །ཉེར་འཚེའི་ཚ་གདུང་སྐབས་ཙམ་བྲལ་བཞིན་མཆིས། །སླད་མའི་དུས་ཀྱང་རྣམ་དཔྱོད་རྨད་བྱུང་གིས།  །རྣ་བའི་བཅུད་དུ་འཐུང་བར་འོས་པའི་གཏམ།  །ཡང་ཡང་སྤྲོ་བའི་རོལ་མོ་མི་འགོག་བཞིན།  །སྒོ་གསུམ་སྤྱོད་ཡུལ་ཡུན་དུ་བརྟན་པར་མཛོད།  །གང་གི་ལེགས་པར་བཤད་པའི་སྤྲིན་དཀར་གྱིས།  །ཆུ་རྡུལ་བཏུང་བས་མྱོས་པའི་ཀོ་ཀི་ལས།  །སྤྲིང་ཡིག་མགྲིན་པའི་གླིང་བུ་འཁྲོལ་དང་བཅས།  །རྟེན་དངོས་འདབ་ཟུང་བསྐྱོད་བཞིན་རིངས་པར་དེངས།  །ཞེས་པ་ལྟ་བུ་སྦྱར་རོ།  རྟོག་གེའི་ཚིག་དོན་ཆེན་པོ་བརྒྱད་ལ་རྣམ་པར་དཔྱོད་པའི་སྤོབས་པ་རྨད་དུ་བྱུང་བས་དོན་ལ་འཁྲུལ་པའི་ལོག་པར་རྟོག་པ་ཐམས་ཅད་འཇོམས་པའི་ཚད་མ་སྨྲ་བའི་དབང་ཕྱུག་ཞིག་ལ་འབུལ་ན།  ཕྱི་དང་ནང་གི་གྲུབ་མཐའ་རྒྱ་མཚོའི་འཇིང་།  །དཔྱད་གསུམ་དག་པའི་རིན་ཆེན་གྲུས་བརྒལ་ནས།  །ལེགས་བཤད་འདོད་པ་འཇོ་བའི་རྣ་རྒྱན་ཅན།  སྔོན་མེད་ཆོས་ཀྱི་དེད་དཔོན་མཆོག་དེའི་དྲུང་།  །གང་གསུང་གཟུ་བོར་སྨྲ་བའི་ཉིན་མོར་བྱེད།  །ཤར་བས་ཚུལ་མིན་ཀུནྡཱ་ཟུམ་པ་དང་།  །ཡང་དག་གཏམ་གྱི་ཨུཏྤལ་མིག་བྱེ་བར།  །དད་སྤྲོའི་དགའ་བ་རྒྱས་པའི་མཆིད་འདི་ཕུལ།  །འདི་ན་དོན་ལ་ལོག་པར་རྟོག་པ་ཡི།  །གཞུང་མང་རི་བོའི་རྐང་པ་འཇོམས་པ་ལ།  །སྔོན་མེད་ངག་གི་རྩེ་བརྒྱ་རྒྱུ་བ་ཡིས།  །མཐའ་དག་ཕྱེ་མར་བྱས་པའི་གཏམ་དེ་སྙན།  །ཚད་མར་གྱུར་པས་འགྲོ་ལ་ཕན་བཞེད་པའི།  །སྟོན་པ་མཆོག་གི་ལེགས་གསུང་སྡེ་སྣོད་ཀུན།  །རྨད་བྱུང་རྣམ་པར་དཔྱོད་པས་གཞལ་མཛད་གང་།  །འཚོ་གཞེས་སྤྱོད་ཡུལ་མ་རིངས་དགེ་ལེགས་གྲང་།  །འདིར་གནས་བསྔགས་འོས་ཡོན་ཏན་ཆུ་གཏེར་གྱི།  །རྦ་རླབས་སྲིད་རྩེར་འཕྱུར་བའི་སྐབས་བྲལ་ཡང་།  །མཆོག་གསུམ་སྐྱབས་ཀྱི་སྙིང་པོར་བཟུང་བ་ཡིས།  །ཉེར་འཚེའི་གེགས་ཀྱིས་གཙེས་པར་མ་གྱུར་ཙམ།  །སླད་མར་སྔགས་རིག་གྲུབ་པའི་དྲང་སྲོང་གི  །རུས་པའི་ཕུང་པོ་རྡོ་རྗེའི་ལང་ཚོ་ཅན།  །དེ་དང་གཉིས་སུ་མེད་པར་གསང་བ་གསུམ།  །མི་ཕྱེད་ཕྱག་རྒྱས་དམ་དུ་སྡོམས་ཤིག་ཀྱེ།  །དེ་སྐད་ཚིག་དང་དོན་གྱི་རྒྱན་བཟང་པོ།  །བྲལ་ཡང་ལྷག་བསམ་དག་པའི་འོ་མཚོ་ལས།  །དལ་གྱིས་ཐོན་པའི་འཕྲིན་ཡིག་ངང་མོ་དཀར།  །རྟེན་གྱི་གཤོག་ཟུང་གཡོ་བཞིན་རིངས་པར་བསྐྱོད།  །ཡང་ན།  རྨད་བྱུང་རྣམ་དཔྱོད་ནོར་བུའི་ཨཱ་དཪྴར།  །རྟོག་གེའི་ཚིག་དོན་དུ་མའི་གཟུགས་བརྙན་ཆེ།  །འགོག་པ་མེད་པར་ཤར་བའི་མཚར་སྡུག་ལ།  །དཔྱོད་ལྡན་ཁེངས་པའི་ཐོར་ཚུགས་དུད་དེའི་དྲུང་།  །དགོད་པར་བྱས་སོ་ཤར་གྱི་ཐིག་ལེ་ཡི།  །དྲི་མེད་ས་ཡི་གདུ་བུ་གསར་པ་སྟེ།  ཁྱོད་ཀྱི་མི་ཟད་སྤོབས་པའི་གྲགས་དཀར་གྱིས།  བདག་ཡིད་ཤིན་ཏུ་རངས་པས་མཆིད་འདི་ཕུལ།  །ནགས་སུ་རྒྱས་པའི་ག་བུར་རྐང་འཐུང་དང་།  །ཆུ་མཚོར་ལུས་རྟེན་གནག་མིན་ཨུཏྤལ་བཞིན།  །ཐོས་དང་མཐོང་ན་དགའ་བའི་རྣམ་དཔྱོད་ཅན།  །ཆོས་ཀྱི་གྲགས་པ་གཉིས་པ་ཁྱོད་ལས་སུ།  །ཤེས་བྱ་ཡུལ་གྱི་མཚན་ཉིད་མ་འདྲེས་གཟུགས།  །དྲི་མེད་རིག་པའི་ནོར་བུའི་མེ་ལོང་ངོགས།  །ཇི་བཞིན་འཆར་བའི་འཇོ་སྒེག་ངོམས་པའི་ཚེ།  །ཚུལ་མིན་སྨྲ་བའི་སྤོབས་པ་རང་སར་བཅིལ།  །དེ་སླད་དོན་ལྡན་འཚོ་བའི་མུ་ཏིག་ཕྲེང་།  །མཁས་མང་མཛེས་མའི་མགྲིན་པར་བརྟན་ཆགས་པར།  །གཅིག་ཏུ་སྤྲོ་ཞིང་གྱི་ནས་འཚོ་བདག་ཀྱང་།  །ཉེར་འཚོའི་འདུ་བྱེད་གཡོ་བར་མ་གྱུར་ཙམ།  །སླད་མར་རྣམ་འདྲེན་སྟོབས་བཅུའི་མངའ་བདག་གི  །བསྟན་མཆོག་ཉི་ཟླ་གསར་བའི་རྣ་ཆ་ནི།  །གངས་ལྡན་རི་བོའི་མཁའ་ལ་ཡོལ་མེད་ཕྱིར།  །གསང་གསུམ་ཤིང་རྟའི་སྒྱུ་ཐབས་རྟག་བརྟན་གསོལ།  །དེ་སྐད་ཞུ་མཆིད་གང་ཚུལ་དགེ་བའི་སྤྲིན།  །བདུད་རྩིར་འབབས་པ་བཏུང་བས་ཡིད་མྱོས་པའི།  །ཡི་གེའི་དཔྱིད་ཀྱི་ཕོ་ཉ་སར་པ་ནི།  །ཚིག་རྒྱན་མགྲིན་པའི་རོལ་མོ་འཁྲོལ་བཞིན་དེངས།  །ཡང་ན།  མངོན་སུམ་རྗེས་སུ་དཔག་པ་ཡི།  །གཞུང་ལུགས་སྨྲ་བའི་རྣམ་དཔྱོད་ནི།  །དཔལ་ལྡན་གྲགས་པའི་ཟློས་གར་ཅན།  །ཚད་མའི་དབང་ཕྱུག་མཆོག་དེའི་དྲུང་།  །འདི་ན་སོ་ལྡན་མྱོས་པ་ཡིས།  །ཕས་རྒོལ་ཕྱེ་མར་འཐགས་པ་བཞིན།  །དོན་ལ་ལོག་པར་རྟོག་པའི་རྒྱུན།  །གཅོད་མཛད་གང་དེར་མཆིད་འདི་གསོལ།  །གྲངས་མེད་སྡེ་སྣོད་རྒྱ་མཚོའི་འཇིང་།  །བརྒལ་བརྟག་སུན་འབྱིན་རིན་ཆེན་གྲུས།  །ལེགས་བརྒལ་ལེགས་བཤད་ནོར་གྱི་བུའི།  །དོན་གཉིས་ཅི་དགར་འཇོ་དེ་རྨད།  །འདི་ན་མངོན་དང་ལྐོག་འགྱུར་གྱི།  །ཆོས་ཀུན་ཏེ་པོར་གཞལ་བ་ལ།  །བློ་གྲོས་འདྲེན་བྱེད་ལྡོང་གྱུར་ཀྱང་།  །ལང་ཚོའི་འདུ་བྱེད་མ་ཉམས་ཙམ།  །སླད་མར་རྟག་གསལ་ཁྱབ་པ་ཡི།  །སྤོབས་པ་རྨད་དུ་བྱུང་བ་ལ།  །གཞན་གྱིས་བརྫི་བར་མི་ནུས་བཞིན།  །གསང་གསུམ་གཡོ་མེད་བརྟན་པར་མཛོད།  །གང་ཚུལ་སྤྲིན་གྱི་རྔ་གསང་བཅུད།  །རྣ་བའི་བདུད་རྩིར་བཏུངས་བ་ཡིས།  །ཞུ་མཆིད་གཙུག་ཕུད་ལྡན་པ་ཡང་།  །སྙན་པའི་ཟློས་གར་བསྒྱུར་གིན་དེངས།    ། ༈

ཕྱི་དུས་ཀྱི་འཁོར་ལོའི་དེ་ཁོ་ན་ཉིད་སྟོན་ཞིང་།  བརྟན་གཡོའི་བླང་དོར་གྱི་ཚུལ་ལ་མ་རྨོངས་པའི་སྐར་ནག་རྩིས་རིག་པ་ཞིག་ལ་འབུལ་ན།  ཕུལ་བྱུང་བློ་མཆོག་ནོར་བུའི་མ་ཀུ་རར།  །བསྒྱུར་བགོད་འཕྲི་བསྣན་རི་མོའི་ཟློས་གར་སྟོང་།  །མངོན་པར་འཆར་བའི་དཔྱིད་དཔལ་དེ་ཁོ་ནས།  །ལྐོག་གྱུར་ཆོས་རྣམས་རྗེན་པར་སྟོན་དེའི་དྲུང་།  །ཕྱི་རོལ་བརྟན་དང་གཡོ་བའི་ལེགས་ཉེས་ཀུན།  །དཔྱོད་ལ་མཚུངས་པ་མེད་པའི་གྲགས་དཀར་ནི།  །ཟླ་ཤེལ་བདུད་རྩིའི་འཁྲུལ་ནས་རབ་དྭངས་པའི།  །ཡི་རངས་ཀུནྡ་བཞད་དེས་མཆིད་འདི་གསོལ།  །དཔལ་ལྡན་དམ་པ་དང་པོའི་སངས་རྒྱས་ཀྱིས།  །ཟབ་གསང་ནཱ་དའི་དབྱངས་ཀྱིས་བསྙད་པའི་གཞུང་།  །འཛིན་བཟོད་སྔོན་མེད་གཏམ་གྱི་རོལ་མཚོ་ཁྱོད།  །ས་འདིར་རྡོ་རྗེའི་རིགས་ལྡན་གཉིས་པར་གྲུབ།  །གཞན་ཡང་སྤོར་ཐང་རྩིས་དང་དབྱངས་འཆར་སོགས།  །གཞུང་བཟང་ཨུཏྤལ་དུ་མས་སྒེག་པའི་ཕྱིར།  །འཇམ་དཔལ་གཞོན་ནུའི་བྱིན་རླབས་སྙིང་དབུས་སུ།  །འཆར་ཀའི་ཉི་གཞོན་ཚུལ་གྱིས་ཆགས་མིན་ནམ།  །དེ་སླད་འཚོ་གཞེས་བརྟན་པའི་གཏམ་གྱི་དཔྱིད།  །ཐོས་པས་སྤྲོ་བར་གྱུར་པའི་དམན་བདག་ཀྱང་།  །མཆོག་གསུམ་བཀའ་དྲིན་དཔག་བསམ་སར་པའི་གྲིབ།  །གཅིག་ཏུ་འཆེལ་བས་ཉེར་འཚེའི་ཚ་གདུང་བྲལ།  །སླད་མའི་ཆར་ཡང་བསྟན་དང་འགྲོ་བ་ལ།  །བླང་དང་དོར་བའི་ལེགས་བཤད་འདོམས་པ་དང་།  །ཕན་བདེའི་དགའ་སྟོན་བརྒྱ་ཕྲག་སྤེལ་བའི་སླད།  །ཡུན་དུ་འཆི་མེད་བཅུད་ལེན་བཏུང་བར་མཛོད།  །ཞུ་མཆིད་ལྷག་བསམ་ཚོན་རིས་དང་འགྲོགས་པའི།  །ཚིག་རྒྱན་སིནྡྷུ་བཱ་རའི་མེ་ཏོག་ནི།  །རྟེན་དངོས་གེ་སར་ཅིར་ཡང་དགོད་དང་བཅས།  །ཀུན་ཏུ་དགེ་བའི་ཚེས་ལ་རིངས་པར་གཏོར།  །ཞེས་པས་མཚོན་གང་འོས་སྦྱར་རོ།    ། ༈ 
དེ་རྣམས་ལས་དམིགས་བསལ་རང་ཉིད་ལ་དྲིན་ཐོབ་ཀྱི་ཡོངས་འཛིན་ལྟ་བུ་ཞིག་ཡིན་ན།  རྨད་བྱུང་རིག་གཞུང་བདུད་རྩིའི་ཆུ་གཏེར་ཀུན།  །བཏུང་བས་མྱོས་པའི་རྣམ་དཔྱོད་ཟླ་ཤེལ་གསར།  །བདག་སོགས་མོས་ལྡན་བདེ་འབྱུང་ངལ་བའི་རྩེར།  །རྣམ་པར་མཛེས་དེའི་ཞབས་སེན་ག་ལ་བར།  ཁྱོད་ཞལ་ཉིན་མོའི་རྡུལ་དམར་ཁོ་ན་ཡིས།  །རྒྱུན་དུ་གསོས་པས་བློ་གྲོས་པདྨོའི་ཁ།  །ཅུང་ཟད་དགོད་པའི་གུས་འབངས་གྱི་ན་པས།  །ཚད་མེད་བཀའ་དྲིན་དྲན་པའི་ཞུ་གསོལ་སྟོབ།  །མང་དུ་ཐོས་པའི་ལོ་འདབ་དུད་པ་ལས།  །བསམ་བྱུང་མེ་ཏོག་དཀར་པོའི་མཚར་སྡུག་གིས།  །སྒོམ་སྤངས་འབྲས་བཟང་འབོད་ལ་རིངས་པ་གང་།  །མཁས་མང་དགར་བའི་ཚལ་དུ་རྣམ་པར་མཛེས།  །དེ་སླད་འཚོ་གཞེས་བརྟན་པའི་གཏམ་གྱི་དབྱངས།  །མི་ཟད་སྦྲང་རྩི་སར་པའི་དོག་པ་ཅན།  །སྙིང་ལ་བརླན་བས་དགའ་བའི་བྷྲ་མ་རཿ  དད་སྤྲོའི་ཟློས་གར་རྩེན་བཞིན་ངལ་འཚོ་ཐོབ།  །སླད་མའི་ཆར་ཡང་ལྟོས་བཅས་སློབ་འབངས་ཚོགས།  །ཐུགས་བརྩེའི་སྤྱན་ཟུར་གཡོ་བས་རྟག་གཟིགས་ནས།  །གསང་གསུམ་འཆི་མེད་གྲུབ་པའི་ལང་ཚོ་དང་།  །མི་ཕྱེད་འདྲེས་པའི་བཀའ་དྲིན་ཅི་ཡང་སྩོལ།  །དེ་སྐད་ཞུ་མཆིད་གཞན་གསོས་མགྲིན་པའི་གླུར།  །ངེས་པར་འཁྲུལ་པའི་གཏམ་གྱི་བརྗོད་པ་ནི།  །མགྲིན་པར་བསྟི་བའི་ཚིག་རྒྱན་སྨིན་ལེགས་མས།  །རྟེན་དངོས་རྣ་ཆ་གཡོ་བཞིན་མྱུར་བར་དེངས།  །ཞེས་པ་ལྟ་བུ་སྐབས་དང་བསྟུན་ནས་བསྒྱུར་ཤེས་པར་བྱ་ལ།    ། ༈

དེ་དག་གི་ཡི་གེ་ཚུར་བསྐུར་བའི་འབྱོར་ལེན་ལྟ་བུའི་ཚེ།  གང་ཚེ་བརྗོད་བྱ་དོན་ལྡན་མཉན་འོས་གཏམ།  །རྗོད་བྱེད་རྒྱན་གསུམ་ལམ་ནས་ལེགས་དྲངས་པ།  །དངོས་པོའི་བདོག་པའི་སྐྱེས་ཀྱི་ཁྱད་པར་བཅས།  །མ་ཉམས་སོན་པས་སྤྲོ་དགའི་ཚོར་བ་བརྟས།  །ཞེས་སམ།  ཁྱད་པར་བརྗོད་བྱའི་སིམ་པ་འདྲེན་བཟོད་པའི།  །མིང་ཚིག་ཡི་གེའི་རྩེ་དགའི་འཁྲི་ཤིང་མ།  །དངོས་པོའི་སྐྱེས་ཀྱི་དོ་ཤལ་བཀླུབས་བཞིན་དུ།  །སོན་པས་སྤྲོ་བའི་ངལ་འཚོ་ཅི་ཡང་བྱིན།  །ཞེས་སམ།  འདི་ན་ཚ་བས་ཉེན་པ་ལ།  །འབིགས་བྱེད་རླུང་གི་རེག་བྱ་ལྟར།  །དོན་མཐུན་ཡིད་ལ་སྤྲོ་བསྐྱེད་པའི།  །འཕྲིན་ཡིག་གསར་པའི་དགའ་སྟོན་འབྱོར།  །ཞེས་པ་ལྟ་བུས་མཚོན་གང་འོས་སྦྱར་རོ།    ། ༈  
ཡང་སྔར་སྨོས་པའི་ཡུལ་ཅི་རིགས་པར་རྣམ་དཔྱོད་དང་ལྡན་པ་དག་ལ་རང་གཞན་གྱི་གྲུབ་པའི་མཐའ་ལས་བརྩམས་པའི་འབེལ་གཏམ་ལྟ་བུ་བགྱིད་པར་སྤྲོ་ན།  ཨོཾ་སྭ་སྟི་སིདྡྷཾ།  །གང་གིས་ཆོས་ཀུན་འགྲོ་འོང་མེད་གཟིགས་ཀྱང་།  །སྲིད་ལམ་དུབ་པ་རྣམས་ལ་ཐུགས་བརྩེ་བས།  །རྨད་བྱུང་ཞི་བསིལ་བདུད་རྩི་སྦྱིན་མཛད་པ།  །སྟོན་མཆོག་འགྲོ་བའི་བླ་མས་ཤིས་པ་སྩོལ།  །རྒྱལ་བས་ལུས་ཅན་ཁམས་དབང་བསམ་པ་དང་།  །འཚམས་པར་བསྟན་པའི་ཆོས་སྒོ་ཇི་སྙེད་ཀུན།  །བརྗོད་ནུས་མིན་ཡང་རང་གཞན་གྲུབ་མཐའ་ལས།  །བརྩམས་ཏེ་གཏམ་གྱི་སྦྱོར་བ་ཅུང་ཟད་ཕྱེ།  །དེ་ཡང་རིགས་ཅན་གསུམ་གྱི་གདུལ་བྱ་ལ།  །དམན་འབྲིང་མཆོག་གི་ཐེག་པ་རྣམ་གསུམ་གྱིས།  །བྱང་ཆུབ་གསུམ་གྱི་གོ་སར་དབུགས་དབྱུང་སླད།  །འདུལ་མདོ་མངོན་པའི་སྡེ་སྣོད་གསུམ་བསྟན་པར།  །རེ་ཞིག་ཐེག་དམན་རྗེས་འབྲང་ཕྱི་དོན་གང་།  །བདེན་གྲུབ་ཉིད་དུ་ཁས་ལེན་བྱེ་མདོ་དང་།  །མཆོག་གི་རྗེས་འབྲང་བདེན་མེད་ཁས་ལེན་པ།  །སེམས་ཙམ་དབུ་མ་གཉིས་ཏེ་རྣམ་པ་བཞི།  །དེ་ལ་དང་པོས་ཤེས་བྱ་གཞི་ལྔ་པོ།  །ཟག་བཅས་ཟག་མེད་གཉིས་སུ་ལེགས་བསྡུས་ཏེ།  །བཅོམ་དང་དཔྱད་པའི་སྒོ་ནས་ངར་འཛིན་བློ།  །འདོར་དུ་རུང་དང་མིན་ལས་བདེན་གཉིས་དབྱེ།  །གཉིས་པས་སྣང་ཡུལ་སྤྱི་མཚན་ཀུན་རྫོབ་དང་།  །མངོན་སུམ་རང་མཚན་དོན་དམ་བདེན་པར་རྟོགས།  །དུས་གསུམ་རྫས་གྲུབ་ནམ་མཁའི་རྟག་དངོས་སོགས།  །འདོད་པ་མ་ཡིན་ངོ་བོ་རྟོག་གེར་མཐུན།  །ཐུན་མོང་ལམ་དུས་ཉོན་མོངས་ཉོན་མོངས་མིན།  །བདེན་བཞི་རྣམ་པ་བཅུ་དྲུག་གིས་སྦྱངས་བས།  །རིམ་པ་བཞིན་དུ་དམན་ལམ་དགྲ་བཅོམ་དང་།  །སངས་རྒྱས་གོ་འཕང་ཐོབ་ཅེས་འབྲས་བུར་འཆད།  །གསུམ་པས་དངོས་པོ་ཀུན་རྟག་གཞན་དབང་གཉིས།  །ཀུན་རྫོབ་ཉིད་དོ་ཡོངས་གྲུབ་དོན་དམ་གྱི།  །བདེན་པར་འདོད་ཅིང་ཡུལ་ཅན་ཚོགས་བརྒྱད་དེ།  །དེ་ཡང་རྣམ་པ་བདེན་དང་རྫུན་སོགས་དབྱེ།  །མདོར་ན་ཤེས་བྱ་མཚན་ཉིད་དེར་འཇུག་དང་།  །དེ་ཡི་རྒྱུ་འབྲས་རབ་དབྱེ་བསླབ་པ་གསུམ།  །སྤངས་དང་ཡེ་ཤེས་ཕུན་སུམ་ཚོགས་པ་བཅུའི།  །གཞི་ལམ་འབྲས་བུའི་བརྗོད་བྱ་གཏན་ལ་དབབ།  །བཞི་པར་རང་རྒྱུད་སྨྲ་དང་ཐལ་འགྱུར་ཏེ།  །སྔ་མས་གཉིས་སྣང་བཅས་དང་དེ་ལྡོག་པས།  །རྟོགས་བྱ་དོན་བྱེད་ནུས་མིན་ཀུན་རྫོབ་དང་།  །སྤྲོས་མཐའ་བརྒལ་དང་མ་བརྒལ་དོན་དམ་འདོད།  །དེ་ཡང་རྒྱུ་འབྲས་གཉི་གར་དཔྱོད་པ་དང་། །དགག་པ་རྣམ་གཉིས་གཏན་ཚིགས་ལ་བཀོད་པའི།  །རིགས་ཆེན་ལྔ་པོས་ཆོས་རྣམས་ཐམས་ཅད་ཀུན།  །སྟོང་པ་ཉིད་དུ་གཏན་ལ་འབེབས་པར་བྱེད།  །ཕྱི་མས་སྣང་སྟོང་ཀུན་རྫོབ་དོན་དམ་དུ།  །བཏགས་པ་ཉིད་ཀྱང་འཇིག་རྟེན་བློ་ངོ་ལ།  །ལྟོས་པ་ཙམ་སྟེ་ངེས་པར་ཁས་ལེན་ན།  །རྟག་དང་ཆད་པའི་མཐའ་ལས་གྲོལ་མི་སྲིད།  །དེ་སླད་བློ་ཉིད་འཁྲུལ་དང་མ་འཁྲུལ་ལས།  ཁྱད་པར་འབྱེད་ཅིང་རང་ལ་སྤྲོས་པ་ཡི།  །དམ་བཅའ་གང་ཡང་ཁས་མི་ལེན་པའི་ཕྱིར།  །བཟློག་ཕྱོགས་ཁོ་ནས་གཞན་སེལ་འདོད་པ་བསྒྲུབ།  །ལམ་གྱི་སྐབས་སུ་བདག་མེད་རྣམ་གཉིས་ལ།  །དམིགས་པས་བདག་འཛིན་མདུད་པ་རིང་བཅད་དེ།  །ས་བཅུ་ལམ་ལྔའི་ཕ་རོལ་སོན་པ་ཡི།  །སྐུ་གསུམ་གོ་འཕང་མཆོག་ལ་རེག་པར་སྟོན།  །དེ་སྐད་གང་ལ་སྤྲིངས་འདི་ལྷག་བསམ་གྱི།  །དཔྱིད་དཔལ་མ་ཉམས་དར་བ་ལས་བྱུང་བའི།  །ཆོས་ཀྱི་མཆོད་པའི་པུཎྜཱ་རཱི་ཀ་སྟེ།  །ནོངས་གང་དྲི་མེད་རིག་པས་སྐྱོང་བར་མཛོད།  །ཤུ་བྷེ་ན་སརྦ་ག་ཏི་སིདྡྷཱནྟ་ས་མུ་དྲ་པ་རེ་ག་ཏཾ་ཧེ་ཏ་བྷཱུ་ཡཱུཏ།  །ཞེས་པ་ལྟ་བུ་གང་ལ་གང་འཚམས་ཀྱི་བརྗོད་བྱ་རྒྱ་ཆེར་སྤྲོ་བས་ཕན་པ་བསྒྲུབ་པར་བྱའོ།    ། ༈ 

གཞན་ཡང་རང་མཉམ་གྱི་མཆེད་གྲོགས་ཆོས་དང་མཐུན་པ་ཞིག་ལ་འབུལ་ན།  །དམ་པའི་ངང་ཚུལ་རྩ་བ་རབ་བརྟན་པར།  །ལེགས་པར་འཁྲུངས་པའི་དལ་འབྱོར་ཨུཏྤལ་གསར།  །བསྔགས་འོས་འབྲས་བཟང་དུ་མའི་གཏེར་གྱུར་པའི།  །མི་ཕྱེད་རྡོ་རྗེའི་མཆེད་པོ་གང་དེའི་དྲུང་།  །གྲོང་ཁྱེར་མ་ཡི་རྐང་རྡུལ་བཏབ་པ་ལས།  །མྱ་ངན་མེད་པའི་མེ་ཏོག་དགོད་པ་བཞིན།  །རྣམ་པར་དཀར་བའི་གཏམ་གྱིས་བསྐུལ་མ་ཐག  །སྤྲོ་དགའི་འཛུམ་བཅས་སྤྲིང་ཡིག་འདི་འབུལ་ལོ།  །གང་ཚེ་རྣམ་པ་ཀུན་ལྡན་གྲོང་ཁྱེར་དུ།  །འཁྲིད་མཛད་མཆོག་གི་རྡོ་རྗེ་སློབ་དཔོན་གྱིས།  །དཀྱིལ་འཁོར་གཅིག་ཏུ་བཅུག་པའི་ཕྱག་རྒྱ་ཡིས།  །ཕན་ཚུན་བརྩེ་ཞིང་གཅུགས་པའི་དགའ་སྟོན་ཆགས།  །དེ་སླད་ཚུལ་མིན་རྙོགས་མས་མ་བསླད་པའི།  །ལེགས་སྤྱོད་བློ་མིག་གྲུང་པའི་ཆུ་གཏེར་ཁྱོད།  །ཉེ་བར་བརྟན་པའི་གཏམ་ཙམ་ཐོས་པས་ཀྱང་།  །བསམ་གཏན་དང་པོའི་ཏིང་འཛིན་སྙིང་ལ་འཕོས།  །འདི་ན་གཟོད་ནས་རིགས་གཟུགས་ལང་ཚོ་དང་།  །ཆོས་ཀྱི་འབྱོར་པས་བཏང་བའི་དཱ་རི་དྲྭ།  །ལྷག་བསམ་འཁོར་བའི་རྗེས་སུ་རྟེན་བཅས་ནས།  །འཚོ་བའི་འདུ་བྱེད་ཉམས་པར་མ་གྱུར་ཙམ།  །སླད་མའི་ཆར་ཡང་གནས་སྐབས་མངོན་མཐོ་བའི།  །ཐེམ་སྐས་མཆོག་ལ་རིངས་པར་འཛེགས་པ་དང་།  །མཐར་ཐུག་ཀུན་མཁྱེན་གྲོང་དུ་དཀྲི་དང་བཅས།  །ལེགས་སྤེལ་ཉེས་སེལ་བདག་གིར་བཞེས་པ་ཞུ།  །དེ་སྐད་གླེང་བར་འོས་པའི་གཏམ་གྱི་དཔྱིད།  །དབྱངས་ཅན་ངག་གི་དཔལ་ལས་བྱུང་མིན་ཡང་།  །དྭངས་པའི་བློ་གྲོས་ཡི་གེར་འཕོས་པ་དང་།  །རྟེན་གྱི་བླ་གོས་གཡོ་བཞིན་རིངས་པར་དེངས།  །ཞེས་པ་ལྟ་བུ་དང་།    ། ༈ 
དེ་བཞིན་དུ་རང་བཞིན་གྱིས་ངང་ཚུལ་བཟང་ཞིང་གློ་དཀྱེལ་ཆེ་བའི་མཛའ་གཅུགས་སྙིང་དང་མིག་ལ་བདུད་རྩི་སྟེར་བ་ཞིག་ལ་འབུལ་ན།  རང་བཞིན་རྣམ་པར་དགེ་བའི་ཆུ་གཏེར་ལས།  །ལེགས་འོང་ལྷག་བསམ་བདུད་རྩིའི་འོད་དཀར་གྱིས།  །ལྟོས་བཅས་ཀུནྡཱའི་དགའ་ཚལ་དར་མཛད་པའི།  །སྔོན་མེད་གྲོགས་མཆོག་ཟླ་ཤེལ་གསར་པའི་དྲུང་།  ཁྱོད་ཚུལ་རྨད་བྱུང་ཉིན་མོའི་རྡུལ་དམར་རྒྱུན།  །ཡང་ཡང་སྙིང་གི་པདྨོར་བརླན་པ་ལས།  །ཤིན་ཏུ་སྤྲོ་བའི་འདབ་རྒྱ་གྲོལ་དང་བཅས།  །མཆིད་འོས་སྦྲང་རྩིའི་ཐིགས་པ་འཇོ་ལ་རིངས།  །རྣམ་པ་ཀུན་ཏུ་འགྱུར་བ་མེད་པ་ཡི།  བློ་མཆོག་གངྒཱ་སྐྱེས་ཀྱི་ལང་ཚོ་ལ།  །ལྷག་པར་བརྩེ་བའི་གཟི་བྱིན་གསར་པ་དེས།  །སྙིང་དང་མིག་ལ་བདུད་རྩིའི་དགའ་སྟོན་བསྐྲུན།  །དེ་སླད་འཚོ་བའི་ཨུཏྤལ་མ་རྙིངས་པའི།  །གཏམ་གྱི་དྲི་བསུང་མངར་པོ་འཐུལ་བའི་མོད།  །འདི་ན་གནས་པའི་རཿཡིག་གཉིས་པ་ཡང་།  །ཀུན་ནས་ཀུན་ཏུ་སྤྲོ་བའི་ཟློས་གར་རྩེན།  །སླད་མའི་ཆར་ཡང་ཕན་ཚུན་མཉེས་གཤིན་པའི།  །དུང་སེམས་ཟླ་བའི་སིམ་འོད་མ་ཉམས་པའི།  །དོན་གཉིས་ཆུ་གཏེར་སྲིད་རྩེར་འཕྱུར་དང་བཅས།  །སྒོ་གསུམ་དུས་ལས་ཡོལ་མེད་བརྟན་པར་སྨོན།  །གང་གི་མཛད་བཟང་སྤྲིན་གྱི་བ་གམ་ལ།  །ཡིད་རབ་གཅུགས་པའི་མདོངས་མཐའ་གཞོན་ནུ་ཡིས།  །མཆིད་འོས་སྒྲོ་གཤོགས་ཟླུམ་པོའི་གར་དང་བཅས།  །རྟེན་དངོས་མངལ་ཁུར་འཛིན་བཞིན་དགེ་བར་དེངས།    ། ༈ 

ཡང་ཚོང་དཔོན་ལྟ་བུ་སྲིད་པའི་འབྱོར་བ་དང་ལྡན་པའི་མི་ཁྱིམ་ཕལ་པའི་རིགས་ལ་འབུལ་ན།  ཡང་སྲིད་ཀུན་ཏུ་གཏོང་ལ་གོམས་པ་ཡི།  །བསོད་ནམས་ས་བོན་མ་ཉམས་དར་བ་ལས།  །དེང་འདིར་མི་ཟད་འབྱོར་པའི་འབྲས་བཟང་ཅན།  །སྔོན་མེད་ཡོངས་འདུའི་དབང་པོ་གསར་པ་དེར།  །ཚངས་པའི་སྲས་མོའི་ཕྱག་གི་རྒྱུད་མངས་དང་།  །སྣ་ཚོགས་ཤིང་རྟའི་གདངས་སྙན་འཕྲོགས་མིན་ཡང་། །ཐོས་པ་ཙམ་གྱིས་ཀུན་དགའི་དཔལ་བསྐྱེད་པའི།  །དོན་ལྡན་གཏམ་གྱི་སྒོ་འཕར་འདི་སྐད་དབྱེ།  །ལུགས་གཉིས་ཏེ་པོར་འབྱེད་པའི་རྣམ་དཔྱོད་ཀྱིས།  །གཏང་དང་ལེན་པའི་སྒོ་བརྒྱ་དབྱེ་བ་ལ།  །མིག་སྐྱེའི་ན་ཀུ་ལ་ཡི་གན་མཛོད་ལས།  །རབ་ལྷག་དཔལ་གྱི་འབྲས་བུས་དུད་པ་གང་།  །དལ་རྟེན་ལྗོན་ཤིང་བརྟན་པའི་ཕངས་པ་ནས།  །ལེགས་སྤྱོད་མེ་ཏོག་དགོད་དེར་ཡི་རངས་པའི།  །འདིར་གནས་པ་ཡང་བསླུ་མེད་མཆོག་གསུམ་གྱི།  །ཐུགས་རྗེའི་གདུགས་དཀར་གྲིབ་མར་ངལ་འཚོ་ཐོབ།  །སླད་དུ་སྲིད་པའི་ཕུན་ཚོགས་ཨུཏྤ་ལས།  །འཁྱུད་པའི་ལང་ཚོའི་འཁྲི་ཤིང་མི་ཉམས་པར།  །ཡུན་དུ་བརྟན་པའི་ཐབས་ཚུལ་ཉིན་མོའི་འོད།  །བརྟེན་ལ་རྣམ་པ་ཀུན་ཏུ་གཡེལ་མེད་མཛོད།  །དེ་སྐད་འཕྲིན་ཤོད་གསང་པོར་བརྗོད་མཁས་པའི།  །ཡི་གེའི་མཚར་སྡུག་རྫོགས་པའི་སྨིན་ལེགས་མ།  །རྟེན་གྱི་གོས་བཟང་ལྷབ་ལྷུབ་གཡོ་བཞིན་དུ།  །ཀུན་ཏུ་ཤིས་པའི་ཚེས་ལ་རིངས་པར་སོང་། ། ༈ 

སྐྱེས་བུ་ལང་ཚོ་དར་ལ་བབས་ཅིང་སྟོབས་དང་སྒྱུ་རྩལ་འགྲན་དུ་མེད་པའི་རིགས་ལ།  །ལང་ཚོའི་སྤྲིན་དཀར་དར་བའི་ཕང་པ་ནས།  །སྟོབས་དང་སྒྱུ་རྩལ་གློག་གི་རྩེ་དགའ་ཡིས།  །དྲེགས་ལྡན་མདོངས་མཐའི་བརྟན་པ་འཕྲོགས་བྱེད་པའི།  །ཟླ་མེད་སྟག་ཤར་གཞོན་ནུ་གང་དེ་ལ།  །ཚིག་རྒྱན་བུང་བ་དགའ་བའི་སྐྱེད་ཚལ་ནས།  །རྣམ་དཔྱོད་སོར་རྩེས་བཏུས་པའི་མེ་ཏོག་ཕྲེང་།  །དོན་བཟང་གསེར་གྱི་སྐུད་པ་ལ་སྦྲེལ་ནས།  །བློ་གསལ་མགྲིན་པ་མཛེས་པའི་རྒྱན་དུ་བསྲིངས།  །འདི་ན་ལུས་ངག་ཡིད་ཀྱི་སྒྱུ་ཐབས་ཀྱིས།  ཁེངས་ལྡན་མགྲིན་བཅུའི་དཔུང་ཚོགས་འཆིང་བའི་ཚེ།  །སྔོན་མེད་དགའ་བྱེད་གཉིས་པ་ཉིད་དོ་ཞེས།  །ངོ་མཚར་གཏམ་གྱི་ཅོད་པན་ཁྱོད་ལ་བྱིན།  །དེ་སླད་དལ་རྟེན་ཟོ་མདོག་མ་ཉམས་པའི།  །སྤྲིང་ཡིག་ལྷོ་ཕྱོགས་རླུང་ནི་དལ་འབབས་པས།  །སྙིང་ལ་སྤྲོ་བ་ཐོབ་པའི་དངོས་ཅག་ཀྱང་།  །མཆོག་གསུམ་ཐུགས་རྗེ་ཁོ་ནས་ཉེར་འཚེ་བྲལ།  །སླད་ནས་འཚོ་ཐབས་མཁས་པའི་ཟླ་ཐིག་གིས།  །ཉེ་བར་བྲན་ལས་འབྱུང་འདུས་སྟེང་འཐུང་དཀར།  །ཡུན་དུ་བརྟན་པའི་ངང་ཚུལ་ལྷུར་ལེན་བཞིན།  །གྲགས་སྙན་རི་བོའི་ཁོངས་སུ་གཏམས་པར་མཛོད།  །དེ་སྐད་མཆིད་ཚིག་རྩེ་དགའི་འཁྲི་ཤིང་མ།  །མཉན་འོས་གཏམ་གྱི་རྒྱུད་མངས་བརྡུངས་བཞིན་དུ།  །བློ་ལྡན་དཔའ་བོའི་དབང་ཕྱུག་གཞོན་ནུ་དེའི།  །སྙིང་དང་མིག་ལ་བདུད་རྩི་སྦྱིན་སླད་དེངས།    ། ༈ 

རང་ཉིད་དང་ལྷག་པར་མཛའ་ཞིང་མཛེས་མཛངས་མཚུངས་པ་མེད་པའི་སྙིང་སྡུག་བུད་མེད་ཞིག་ལ་བསྲིངས་ན།  གདེངས་ཅན་བསྟི་གནས་བསྲུབས་ལས་ཐོན་མིན་ཞིང་།  །ལེགས་བྲིས་དགའ་བའི་ཚལ་ནས་མ་འོངས་ཀྱང་།  །ཤིན་ཏུ་མཛེས་པའི་ལང་ཚོའི་མཚར་སྡུག་གིས།  །བདག་ཡིད་ཀུན་དགའི་དགའ་སྟོན་སྦྱིན་པ་དེར།  །རྣ་གོང་ཨུཏྤལ་ཕོན་པོར་ཕྲག་དོག་པའི།  །དཀྱུས་རིང་མིག་གི་དཔལ་ལྡན་མཛེས་མ་ཁྱོད།  །ཡིད་ལ་དྲན་པས་བརྩེ་ཞིང་གཅུགས་པའི་མཆིད།  །ཡི་གེའི་གཟུགས་སུ་འཕོས་པས་དབུགས་འབྱིན་བྱས།  །བརྒྱ་ཕྲག་ཟླ་ཤེལ་གཞོན་ནུའི་ཚོན་རིས་ཀྱི།  །བརྟན་པ་ཕྲོགས་པའི་བཞིན་གྱི་དཀྱིལ་འཁོར་ནི།  །མཐོང་ན་སིམ་པ་སྟེར་བའི་དཔལ་དང་བཅས།  །མཉན་འོས་གཏམ་གྱི་བདུད་རྩིའི་དག་པས་མཛེས།  །དེ་སླད་སྒོ་གསུམ་ཉེར་འཚེའི་དྲི་བྲལ་བའི།  །ངང་ཚུལ་མ་ལ་ཡ་ཡི་རྐང་འཐུང་དང་།  །འགྲོགས་པའི་ལྷོ་ཕྱོགས་རླུང་གི་རྩེ་དགའ་ཡིས།  །སྙིང་ལ་དགའ་བ་སྟེར་བའི་མགྲོན་པོར་བྱས།  །འདི་ན་བསྔགས་འོས་ཡོན་ཏན་འབྲས་བཟང་གིས།  །རྣམ་པར་སྤངས་པའི་བནྡྷུའི་ལྕུགས་ཕྲན་ཡང་།  །ལང་ཚོའི་མེ་ཏོག་རྙིངས་པར་མ་གྱུར་བཞིན།  །ཉིན་མཚན་ཀུན་ཏུ་ཁྱོད་དཔལ་སེམས་ལ་བརླན།  །སླད་མའི་དུས་ཀྱང་ནོར་འཛིན་དགའ་མ་ནི།  །ལྷུན་པོའི་རྣ་རྒྱན་འཛིན་པ་དེ་སྲིད་དུ།  ཕན་ཚུན་བརྩེ་བའི་ཟུར་མིག་གཡོ་བ་ཡིས།  །རིང་ཡང་ཉེ་བ་ཇི་བཞིན་མཛོད་ཅེས་སྨྲེང་།  །རྒྱུའོ་དྲི་ལྡན་ཨུཏྤལ་ནགས་ཀླུང་ཆེར།  །སྦྲང་རྩིས་མྱོས་པའི་རཿཡིག་གཉིས་པ་སྟེ།  །སྙིང་སྡུག་ཁྱོད་ཀྱི་སོར་རྩེའི་ཆུ་གཏེར་དུ།  །འཕྲིན་ཡིག་ངང་མོ་གཞོན་ནུ་དལ་གྱིས་དེངས།  །ཞེས་པ་ལྟ་བུས་མཚོན་ཇི་ལྟར་རིགས་པ་དང་།    ། ༈ 
དེ་དག་གི་འབྱོར་ལན་གྱི་ཚེ།  ཁྱད་པར་ཀཏྤུར་དབང་པོས་ཀུནྡཱ་དང་།  །དཔྱིད་དཔལ་ཡོངས་སུ་དར་བས་པདྨོ་བཞིན།  །མཐོང་ན་སིམ་པ་བསྐྱེད་པའི་གཏམ་གྱི་དབྱངས།  །ཡི་གེའི་གཟུགས་སུ་འཕོས་གང་སོན་པ་སྤྲོ།  །ཞེས་སམ།  གང་ཚེ་བློ་གྲོས་སྦྲང་རྩིའི་སྐྱེད་ཚལ་ནས།  །རིངས་པར་ལྷག་པའི་འཕྲིན་ཡིག་གཞན་གསོས་མས།  །སྙིང་ལ་འབབས་པའི་རྒྱུད་མངས་བརྡུངས་པ་ཡིས།  །དོན་མཐུན་ཡིད་ལ་སྤྲོ་བ་ཅིར་ཡང་བྱིན།  །ཞེས་སམ།  བརྩེ་བའི་སེམས་ཀྱི་མཚོ་གླིང་ནས།  །ལེགས་འོང་འཕྲིན་ཡིག་འདབ་དམར་གྱིས།  །ཚིག་དོན་སྙན་པའི་སྒྲ་སྒྲོགས་བཞིན།  །སོན་པས་སྤྲོ་དགའི་འཚོ་བ་བརྟས།  །ཞེས་སོགས་སྦྱར་བར་བྱའོ།    ། ༈ 

གཞན་ཡང་དེ་དག་ལས་འཕྲོས་ཏེ་མི་ཡི་ཆོས་ལུགས་དང་མཐུན་པའི་འབེལ་གཏམ་བགྱིད་པར་སྤྲོ་ན།  སྐབས་སུ་བབས་པའི་མཚམས།  སླར་ཡང་མི་ཡི་ཆོས་ལུགས་ལེགས་སྤྱད་ན།  །སུམ་རྩེན་གྲོང་ཁྱེར་ཉིད་དུ་མྱུར་འགྲོ་ཞིང་།  །དེ་ལ་བརྟེན་ནས་ཐར་པའི་ཐེམ་སྐས་ལ།  །རིམ་གྱིས་འཛེགས་སླད་བརྩེ་བའི་མཆིད་འདི་གསོལ།  །གང་ཞིག་འཕེན་རྫོགས་དཀར་པོས་ཉེར་བསྐྱེད་པའི།  །སྨྲ་ཤེས་དོན་གོ་དབང་པོ་ཚང་བ་མི།  །ལུས་རྟེན་འདི་འདྲ་སྲིད་ན་རྙེད་དཀའ་བས།  །རྣམ་པ་ཀུན་ཏུ་བདེ་རྒྱུ་ཁོ་ནར་བརྩོན།  །དེ་ཡང་བསྔགས་འོས་ལས་ཀུན་བསོད་ནམས་ལས།  །འགྲུབ་ཀྱི་སྟེས་དབང་ཁོ་ནས་མ་ཡིན་ཕྱིར།  །དཀོན་མཆོག་མཆོད་དང་ཚོགས་ཆེན་གསོག་པ་སོགས།  །ནམ་ཡང་མི་འདོར་སྙིང་ལ་རི་མོར་བྲིས།  །མི་དགེ་བཅུ་སྤངས་ཆང་མི་འཐུང་བ་དང་།  །འཚོ་བ་བཟང་དང་མི་འཚེ་གུས་པ་སྦྱིན།  །མཆོད་འོས་མཆོད་དང་དམན་ལ་བྱམས་པ་སྟེ།  །བཅུ་དྲུག་འདི་རྣམས་སྲོག་ལས་གཅེས་པར་སྲུངས།  །ཇི་ལྟར་འབིགས་བྱེད་རི་བོའི་ནགས་ཚལ་དུ།  །སྡོང་དུས་ཕལ་ཡང་ཙནྡན་ནུས་འཆང་ལྟར།  །དམ་པ་བརྟེན་ཅིང་དེ་ཡི་རྗེས་སློབ་ན།  །སྐྱེ་བོ་དམན་ཡང་དམ་པའི་སྤྱོད་པར་འགྱུར།  །སྦྲུལ་གདུག་གདེངས་ཀའི་གྲིབ་མ་བསིལ་ཡབ་ཏུ།  །བསྟེན་ན་དུག་གིས་འཆིང་བའི་གནས་ཐོབ་བཞིན།  །འགྲོགས་པ་ཙམ་ནས་སྨད་འོས་ལ་སྦྱར་བའི།  །ངན་པའི་གྲོགས་ལས་ཐབས་ཀྱིས་རིང་དུ་བྱོལ།  །མཐོ་རིས་ཡོན་ཏན་བདུན་གྱི་ཕྱི་མོ་ཡང་།  །འཚོ་བ་རིང་བ་ཉིད་ལ་རགས་ལས་ན།  །སྲོག་གི་འཇིགས་པ་སྐྱབས་སོགས་དེ་རྒྱུ་དང་།  །རྣམ་པར་མ་གྱུར་གནས་པའི་ཐབས་ལ་འབད།  །གལ་ཏེ་ལས་དང་རྐྱེན་གྱི་འཕེན་པ་ཡིས།  །འདུ་བ་རྣལ་མར་གནས་ལས་ཕྱིར་ཕྱོགས་ཚེ།  །འཚོ་བྱེད་མཁས་པའི་ངག་བཞིན་བླང་དོར་དང་།  །ཐབས་ཚུལ་རིམ་གྲོ་དུ་མས་དབུགས་འབྱིན་བྱ།  །ཆུ་ཐིགས་བསགས་ལས་རྒྱ་མཚོ་འབྱུང་བ་ལྟར།  །ཡོན་ཏན་ཕྲ་མོ་ནས་ཀྱང་འབད་བྱ་ཞིང་།  །གཟུགས་མཛེས་སྐྱོན་གཅིག་ཁོ་ནས་སྐལ་ངན་བཞིན།  ཚུལ་མིན་སྤྱོད་པ་ཕྲ་ཡང་རིང་དུ་དོར།  །ཆོས་དང་སྲིད་ཀྱི་བྱ་བ་གང་ལའང་།  །སྒྲིན་པོའི་བློ་ཡིས་བརྟག་ཅིང་དཔྱད་པ་ལས།  །རང་དགར་ཉིད་དུ་རྟབ་རྟབ་འཇུག་པའམ།  །གཞན་ཟེར་ཚིག་གི་རྗེས་སུ་འབྲང་བ་སྤང་།  །ཡི་ངོར་བདེ་སྡུག་རྟོག་པ་གང་ཤར་ཀྱང་།  །ཚིག་ཏུ་བརྗོད་ན་རང་མཚན་སྟོན་པའི་ཕྱིར།  །དལ་གྱིས་བློ་ཡི་རྒྱ་མཚོར་བསྐྱིལ་བྱས་ནས།  །སུས་ཀྱང་གཏིང་མི་དཔོགས་པའི་ངང་ཚུལ་བཟུང་།  །མཐོ་ལ་འགྲན་དང་མཉམ་ལ་ཕྲག་དོག་དང་།  །དམན་ལ་བརྙས་པའི་བསམ་སྦྱོར་རིང་སྤངས་ཏེ།  །གུས་དང་དུལ་དང་བྱམས་པས་ཡིད་དྲངས་བཞིན།  །རང་གི་འདོད་པ་གང་དེར་ཐབས་ཀྱིས་གཞུག  །མ་བརྟགས་པར་ཡང་ཁ་ཚོན་བཅད་པ་དང་།  །དགའ་སྡུག་སྟོན་ཀའི་སྤྲིན་ལས་མྱུར་བ་དང་།  །མི་འགྲུབ་བྱ་བར་ཁས་ལེན་བགྱིད་པ་རྣམས།  །མཐའ་མ་རང་གཞན་ཕུང་བའི་རྒྱུ་རུ་ཟད།  ཁྱུ་མཆོག་ལྟ་བུར་རང་རྒྱུད་རིང་བ་དང་།  །རི་དབང་ལྟ་བུར་རང་ཚུགས་ཟིན་པ་དང་།  ཁས་བླངས་དམ་བཅའ་ཤི་ཡང་མི་འདོར་བའི།  །དམ་པ་རྣམས་ཀྱི་སྤྱོད་ཚུལ་དེ་འདྲའོ།  །ཕན་པ་བྱས་ལ་བཟང་དྲིན་མི་བརྗེད་ཅིང་།  །ལྟོས་བཅས་ཐམས་ཅད་ཤ་ཚས་རིང་དུ་བསྐྱང་།  ཁྲེལ་དང་ཕྱི་ཐག་རིང་པོར་བསྲིངས་པ་ཡིས།  །བསྔགས་འོས་ཡི་གེ་ཕྱོགས་ཀྱི་མཐར་ཡང་བརྗིད།  ཁྱད་པར་ཉེ་དང་རིང་བ་གང་ལའང་།  །ལྷག་བསམ་ཟླ་བ་ལྟ་བུར་དཀར་བ་ལས།  །གནོད་པའི་ཚེར་མ་ཁོང་དུ་མི་བཟུང་བ།  །ལུགས་གཉིས་ཀུན་གྱི་ནང་ནས་གནད་དུ་ཆེ།  །རང་ལ་ངེས་པར་ལྟོས་པའི་ཡིད་གཅུགས་ལ།  །བླང་དོར་ཤ་ཚའི་སྙིང་གཏམ་ཞིབ་འཆད་ཅིང་།  །གནས་སྐབས་ནམ་ཡང་དྲང་པོའི་ངག་ཚིག་ནི།  །བརྗོད་པ་ཉུང་ལ་མདོ་དོན་འདུས་པར་གླེང་།  །མཁས་ཀྱང་གཞན་ལ་ཁྱད་གསོད་ང་རྒྱལ་དང་།  །འབྱོར་ཡང་དྲེགས་དང་འཇུངས་པས་འཚིར་བ་དང་།  །མཐོ་ཡང་ཁེངས་དང་གཡོ་སྒྱུའི་སྦྱོར་བ་ཡིས།  །རང་གཞན་བསླུ་བའི་རྣམ་ཐར་རིང་དུ་སྤང་།  །གནོད་ལ་འབྲོས་ཤིང་གནོད་པ་མེད་ལ་འཚེ།  །ཕན་ལ་ཁྲོ་ཞིང་བྱམས་ལ་མི་བཟོད་པའི།  །སྐྱེ་བོ་དེ་ནི་ཀུན་གྱི་ཐ་ཤལ་ཏེ།  །རང་གཞན་གང་གི་ཕྱོགས་སུ་མཆིས་ཀྱང་འདོར།  །སྙིང་ནས་རང་ལ་བློ་གཏད་བསླུ་བ་དང་།  །ཆེད་དུ་བོར་དང་མནའ་ལ་མི་འཛེམ་དང་།  །ངན་གཡོའི་སྦྱོར་བས་གསོད་པར་བརྩམ་པ་རྣམས།  །སྲོག་ལ་བབས་ཀྱང་མི་བགྱིད་རི་མོར་བཟུང་།  །བསླབ་ཀྱང་མི་གོ་བཅོས་ཀྱང་མི་འགྱུར་ཞིང་།  །ངན་པའི་སྤྱོད་དང་གཏམ་ངན་ངོ་སོར་ཁྱེར།  །སྙིང་གྲོས་ཡིན་ཡང་དགྲ་ལ་བསྐྱལ་བ་སོགས།  །གང་ན་མཆིས་ཀྱང་རིང་དུ་བསྐྲད་པར་འོས།  །སུ་དང་འགྲོགས་ཀྱང་མཛའ་ཆེས་འཁོན་ཆེས་སྤང་།  །གང་དུ་ཕྱིན་ཀྱང་མ་བཅོལ་ཁུར་མི་བླངས།  །དུས་གསུམ་ཀུན་ཏུ་འགྲོགས་ན་བདེ་བ་དེ།  །རང་ཉིད་གཉའ་ཡང་གཞན་ངོར་མཛེས་པ་ལགས།  །བདེ་སྡུག་བྱུང་འཕྲལ་བཞིན་གྱི་འགྱུར་ལྡོག་སྤང་།  །དགྲ་བོ་ཡིན་ཡང་ཚིག་ངན་མཚོན་མི་འདེབས།  །གནོད་ལན་གནོད་དང་ཕན་ལན་ཕན་བཏགས་ཀྱང་།  །ཐབས་ཀྱིས་རིམ་པར་བྱ་ལས་དུས་གཅིག་མིན།  །བདག་ཉིད་འཇུག་གམ་ཕ་རོལ་གཞུག་ཀྱང་རུང་།  །ལེགས་པའི་ལམ་ལས་ཉེས་པར་མི་དཀྲི་ཞིང་།  །གལ་ཏེ་སྟེས་དབང་ཁོ་ནས་ཉེས་གྱུར་ཀྱང་།  །སྔོན་གྱི་ལས་སུ་སེམས་ལས་འགྱོད་པ་སྤང་།  །རྫུན་དང་ཟོབ་དང་ནོར་ལ་སྲེད་པ་དང་།  །ཉེ་རིང་ཡུལ་ལ་ཆགས་སྡང་བྱ་བ་བྲལ།  །གཅིག་ཏུ་ཐར་ལམ་ཁོ་ན་སྟོན་མཁས་གང་།  །འདི་ཕྱིའི་བློ་གཏད་བླ་མའི་འོས་སུ་ཆེ།  །ཕྱི་ཐག་རིང་ཞིང་གསར་འགྲོགས་དབེན་པ་དང་།  །གཞུང་བཟང་དཀྱེལ་ཆེ་ལས་ལ་ངོ་སོར་ལྡན།  །རེ་བ་མི་ལྡོག་གསེར་ལྟར་མི་འགྱུར་བ།  །ཚེ་འདིའི་བློ་གཏད་དཔོན་གྱི་འོས་སུ་ཆེ།  །གཏམ་དང་ཟས་དང་བསླུ་བའི་རྗེས་མི་འབྲངས།  །རྣམ་པ་ཀུན་ཏུ་ཕན་པ་འབའ་ཞིག་སེམས།  །ལེགས་སྤེལ་ཉེས་འཆོས་སྐྱིད་སྡུག་གཅིག་པར་བལྟ།  །མཛའ་གཞུང་རིང་བ་གང་དེ་གྲོགས་ཀྱི་འོས།  །ཇི་ལྟར་བསྒོ་བའི་ལས་རྣམས་ཉེར་བསྒྲུབས་ཤིང་།  །དེ་ཡང་གཅིག་ཏུ་བྱས་ཡུས་མི་འདྲེན་ལ།  །རྫུན་དང་རྐུ་དང་གཡོ་སྒྱུའི་ཉེ་རིང་མེད།  །དེ་འདྲ་གང་ཡིན་བྲན་གྱི་འོས་སུ་ཆེ།  །མདོར་ན་ཡོན་ཏན་སྐྱོན་གྱི་དམིགས་འབྱེད་བཞིན།  །བློ་ཁོག་ཡངས་ལ་བློ་རྩེ་བསྒྲིམས་པ་ཡིས།  །བླང་དོར་ཁོ་ནས་རང་ཉིད་རྒྱལ་བ་སོགས།  །ལུགས་ཀྱི་བསྟན་བཅོས་རྣམས་ལས་འབྱུང་བཞིན་སྤྱད།  །དེ་ཡིས་གནས་སྐབས་ཚེ་འདིར་བདེ་བ་དང་།  འབྱོར་དང་དཔལ་དང་བསྔགས་འོས་གནས་ཐོབ་ཅིང་།  །ལྷ་མིའི་ལུས་རྟེན་བརྒྱུད་ནས་བླངས་པའི་མཐར།  །བྱང་ཆུབ་དམ་པ་འཐོབ་བོ་གྲོགས་མཆོག་ཀྭ  །ཞེས་པ་ལྟ་བུ་དང་།    ། ༈

དེ་བཞིན་དུ་ཆོས་ཀྱི་བག་ཆགས་དང་ལྡན་པའམ།  ཐབས་ཀྱིས་དེར་གཞུག་པར་འོས་པ་སོགས་ལ་ཆོས་དང་མཐུན་པའི་འཕེལ་གཏམ་བགྱིད་པར་སྤྲོ་ནའང་།  སྐབས་སུ་བབས་པའི་ཚེ་འདི་ལྟར་བསྙད་པར་བྱ་སྟེ།  སླར་ཡང་སྡེ་སྣོད་རྒྱ་མཚོའི་སྤྲིན་ཆེན་ལས།  །ལེགས་འོང་ཞི་བསིལ་བདུད་རྩིའི་སྙིང་པོ་ཡིས།  །བླ་མེད་ཐར་པའི་སིམ་པ་སྟེར་བགྱིད་པའི།  །དོན་ལྡན་གཏམ་གྱི་སྐྱེས་བཟང་འདི་སྐད་འབུལ།  །རྣམ་མང་ལེགས་བྱས་ས་བོན་ལས་འཕོས་པའི།  །དལ་རྟེན་ལྗོན་བཟང་འབྱོར་བཅུའི་མེ་ཏོག་ཅན།  །འདི་འདྲ་བསྐལ་པ་རྒྱ་མཚོར་རྙེད་དཀའ་བས།  །དོན་ལྡན་གེ་སར་དགོད་ལ་རིངས་པར་མཛོད།  །ཕྱི་ནང་བརྟན་དང་གཡོ་བའི་ཆོས་ཁམས་ཀུན།  །མཐའ་བཞིའི་ཕྱག་རྒྱས་དམ་ལ་བཞག་པའི་ཕྱིར།  །སྐད་ཅིག་ཙམ་ཡང་རྟག་པ་མ་མཆིས་ན།  །སྙོམ་ལས་ལེ་ལོའི་ཞགས་པ་རིང་དུ་ཁྲོལ།  །དཀར་ནག་མི་གཡོའི་ལས་ཀྱི་ས་བོན་ལས།  །བདེ་སྡུག་བར་མའི་འབྲས་བུ་བསླུ་མེད་ཕྱིར།  །རྣམ་པ་ཀུན་ཏུ་དགེ་སྡིག་བླང་དོར་ལ།  །འབད་འདི་འདུན་མ་ཀུན་གྱི་ཡང་རྩེ་ཡིན།  །དེ་ཡང་ངན་སོང་གསུམ་གྱི་སྡུག་བསྔལ་ལ།  །འཇིགས་ནས་དེ་ཡི་ཉེར་ལེན་སྤོང་བྱེད་ཅིང་།  །ཕྱི་མ་ལྷ་མིའི་གོ་འཕང་དོན་གཉེར་བ།  །མངོན་མཐོ་སྒྲུབ་བྱེད་སྐྱེས་བུ་ཆུང་ངུའི་ལམ།  །སྲིད་པའི་གནས་ཀུན་མེ་འོབས་ལྟར་མཐོང་སྟེ།  །རང་ཉིད་ཁོ་ནའི་ཞི་བདེ་དོན་གཉེར་བས།  །ངེས་འབྱུང་དྲག་པོའི་བསླབ་ལ་འབད་པ་གང་།  །ཐར་པ་སྒྲུབ་བྱེད་སྐྱེས་བུ་འབྲིང་གི་ལམ།  །ཁྱད་པར་སྐྱེ་ཀུན་དྲིན་གྱིས་བསྐྱངས་པ་ཡི།  །འགྲོ་བ་མཐའ་དག་སྒྲོལ་བའི་ཁུར་ཁྱེར་ནས།  །བྱང་ཆུབ་སེམས་དཔའི་སྤྱོད་ལ་འབད་པ་གང་།  །རྣམ་མཁྱེན་སྒྲུབ་བྱེད་སྐྱེས་བུ་ཆེན་པོའི་ལམ།  །དེ་ཕྱིར་ཕྱི་མའི་ཚུལ་ལ་བློ་སྦྱངས་ནས།  །མཐུན་པའི་ཡུལ་གནས་དགེ་བའི་བཤེས་གཉེན་བརྟེན།  །བདག་ཉིད་ལེགས་སྨོན་བསོད་ནམས་བསགས་བགྱིད་པའི།  །འཁོར་ལོ་ཆེན་པོ་བཞི་ཡི་འཇུག་པ་བཟུང་།  །གང་ལ་བརྟེན་ནས་ནམ་ཡང་མི་བསླུ་བའི།  །དཀོན་མཆོག་གསུམ་ཞེས་གྲགས་པའི་གདུགས་དཀར་པོ།  །དུས་གསུམ་སྐྱབས་ཀྱི་མཆོག་ཏུ་བསྙེན་བྱས་ནས།  །སྤང་བླང་བསླབ་བྱའི་གནས་ལ་འབད་པས་བསྒྲིམ།  །ཚད་མེད་རྣམ་བཞིའི་ཟླ་འོད་ཀྱིས་བརླན་པས།  །ཕྱིན་དྲུག་ཀུནྡའི་འཇོ་སྒེག་དར་བབ་ཅིང་།  །དེ་མཐུས་ས་བཅུ་ལམ་ལྔའི་ཀེ་ས་རཿ  མི་རིང་དར་བའི་ངང་ཚུལ་ལྷུར་ལེན་མཛོད།  །དེ་ཡང་གཏོང་ལ་སྤྲོ་བའི་སེམས་དགེ་བས།  ལན་དང་རྣམ་པར་སྨིན་ལ་མི་རེ་བར།  །ཆོས་ནོར་མི་འཇིགས་སྦྱིན་པའི་ར་བ་རུ།  །མཐའ་ཀླས་ཡིད་ཅན་དབུགས་རབ་འབྱིན་པར་བྱ།  །སྒོ་གསུམ་ཉེས་པར་སྤྱོད་པའི་འདམ་རྫབ་ཀུན།  །དགེ་ཆོས་ཡོངས་སུ་སྡུད་པས་དག་བྱས་ཏེ།  །གཞན་ལ་ཕན་བདེའི་བསིལ་བ་སྟེར་མཁས་པའི།  །དྲི་མེད་ཚུལ་ཁྲིམས་ཆུ་ཡིས་སྙིང་རབ་བརླན།  །ཇི་ལྟར་བདག་ལ་གནོད་པའི་ལས་བྱེད་ཀྱང་།  །ཡིད་ཀྱི་དབང་པོ་ནམ་ཡང་མི་འཁྲུག་ཅིང་།  །ཆོས་ཕྱིར་དཀའ་བ་སྤྱད་ལ་བཟོད་པ་དང་།  །ཟབ་མོའི་དོན་ལ་མི་སྐྲག་གོ་ཆ་བགོ  །ཕུལ་བྱུང་ལྷག་པའི་བསམ་པས་ཉེར་དྲངས་ཏེ།  །སེམས་ཅན་དོན་ལ་ངལ་བ་མི་བརྟེན་བཞིན།  །བྱང་ཆུབ་སྤྱོད་ལ་སྤྲོ་བའི་བརྩོན་འགྲུས་ནི།  །ཡོན་ཏན་ཀུན་གྱི་འབྱུང་ཁུངས་གཅིག་ཏུ་ངེས།  །ཞི་ལྷག་ཟུང་འབྲེལ་བསམ་གཏན་ལ་གོམས་པས།  །ལུས་སེམས་ཤིན་སྦྱངས་བདེ་བར་ངལ་འཚོ་ཞིང་།  །རྨད་བྱུང་ཡོན་ཏན་རིམ་གྱིས་རྫོགས་པའི་མཐུས།  །མངོན་པར་ཤེས་པས་ཕ་རོལ་སྒྲོལ་བར་འོས།  །དྲི་མེད་ཐོས་བསམ་སྒོམ་པའི་རི་དབང་གིས།  །ཟབ་ཅིང་རྒྱ་ཆེའི་ཆོས་ཚུལ་ཆུ་ཡི་གཏེར།  །བསྲུབས་སྐྱེས་མཐར་ལྟའི་མུན་པ་རིང་བཅད་པའི།  །ཤེས་རབ་ཕ་རོལ་ཕྱིན་པའི་ཉིན་བྱེད་བསྟེན།  །མདོར་ན་ལམ་དུས་ཚོགས་གཉིས་ཀྱིས་མཚོན་པའི།  །ལེགས་སྤྱད་གང་ཡང་དངོས་པོར་མི་ཞེན་པར།  །མཉམ་གཞག་མཁའ་ལྟར་དག་པའི་སྟོང་ཉིད་དང་།  །རྗེས་ཐོབ་སྒྱུ་མའི་ཚུལ་གྱིས་ཉམས་སུ་བླང་།  མཐར་གྱིས་ཇི་ལྟར་བསགས་པའི་རྣམ་དཀར་ཀུན།  །བྱང་ཆུབ་མཆོག་གི་རྒྱུ་རུ་བསྔོས་བྱས་ན།  །ཆུ་ཐིགས་རྒྱ་མཚོར་འབབས་ཤིང་གཞོལ་བ་ལྟར།  །བསོད་ནམས་མཐའ་ཀླས་འཕེལ་ཞིང་ཟད་པ་མེད།  །དེ་ལྟར་ཚོགས་སྦྱོར་མཐོང་སྒོམ་རྣམ་པ་བཞིར།  །སློབ་པའི་ཡོན་ཏན་རིམ་གྱིས་རྫོགས་པ་ལས།  །གྲངས་མེད་གསུམ་སོགས་དབང་པོའི་རྗེས་མཐུན་པར།  །མི་གནས་མྱ་ངན་འདས་པ་འཐོབ་པོ་ཀྱེ།  །ཞེས་པ་ལྟ་བུས་མཚོན་ཁམས་དབང་བསམ་པའི་རིམ་པ་དང་རྗེས་སུ་མཐུན་པར་ལུགས་གཉིས་ཀྱི་བླང་དོར་མ་ནོར་བའི་སྒོ་ནས་ཕན་གདགས་པའི་ཐབས་ལ་མཁས་པར་བྱའོ།  །དེ་དག་གང་ཡང་རུང་བའི་ཐོག་མར་ཤིས་པ་བརྗོད་པའི་ཚིགས་སུ་བཅད་པ་སྦྱོར་བར་སྤྲོ་ནའང་འདི་ལྟ་སྟེ།  ཨོཾ་སྭསྟི་པྲ་ཛ་བྷྱཿ  བྲལ་སྨིན་ཡོན་ཏན་རྒྱ་མཚོའི་སྣོད་གྱུར་མཚན་དཔེའི་འཇོ་སྒེག་རྫོགས་པའི་སྐུ།  །སྒྲིབ་གཉིས་རྒྱུར་བཅས་ཟད་པར་སྤོང་བྱེད་ཞི་བསིལ་ཆོས་ཕུང་བརྒྱད་ཁྲིའི་གསུང་།  །རྟག་ཆད་སྤྲོས་པའི་ཕྱོགས་དང་མི་མཛའ་ཟབ་ཞི་སྤྲོས་བྲལ་དབུ་མའི་ཐུགས།  །མི་ཟད་རྒྱན་གྱི་འཁོར་ལོར་བསྔགས་འོས་རྫོགས་སངས་རྒྱས་དེས་ཁྱོད་ལ་སྲུངས།  །རྗོད་བྱེད་ངག་ཚིག་དྲི་མ་མེད་པ་སྡེ་སྣོད་གསུམ་གྱི་ཨུཏྤ་ལས།  །བརྗོད་བྱ་བསླབ་གསུམ་འབྲས་བཟང་འབྱིན་དེས་ཐར་པ་དམ་པའི་ཟིལ་དངར་གྱིས།  །བརྗོད་དོན་ཁམས་གསུམ་ཉོན་མོངས་གདུང་སེལ་ཟག་བྲལ་ལམ་གྱི་མངོན་རྟོགས་ཅན།  །བརྗོད་ཚུལ་ཐོག་མཐའ་བར་གསུམ་དགེ་བ་དམ་པའི་ཆོས་ཀྱིས་ཤིས་པར་མཛོད།  །རྒྱལ་གསུང་བདུད་རྩིས་རབ་ཏུ་བརླན་ལས་བློ་གྲོས་པུཎྜཱ་རི་ཀའི་འཛུམ།  །རིག་གྲོལ་ཡོན་ཏན་བརྒྱད་ཀྱི་མཚར་སྡུག་ཕ་མཐའ་ཡས་པར་གཡོ་བ་ཡང་།  །ཉེས་བར་སྤྱོད་པའི་རྡུལ་ལས་རིང་འདས་གཞན་ཕན་ཁོ་ནར་རབ་ཆགས་པའི།  །བྱང་ཆུབ་སེམས་དཔའི་དགེ་འདུན་ཚོགས་ཀྱིས་ཤིས་པའི་མེ་ཏོག་ཆར་དུ་བསྙིལ།  །ཞེས་སམ།  ཨོཾ་སྭསྟི་སིདྡྷཾ།  རྨད་བྱུང་གཞན་ཕན་སྤྱོད་པའི་གོམ་སྟབས་ནི།  །གྲངས་མེད་བསྐལ་པ་རྒྱ་མཚོར་བསྒྱུར་བ་ལས།  །བྱང་ཆུབ་སྙིང་པོའི་ཕ་མཐར་སོན་གྱུར་པའི།  །སྟོན་པ་རྫོགས་སངས་རྒྱས་དེས་ཁྱོད་ལ་སྲུངས།  །གང་གསུང་མ་ལ་ཡ་ཡི་ནགས་ཚལ་ལས།  །ལེགས་འོང་ཐེག་གསུམ་རླུང་གཞོན་དལ་འབབས་པས།  །བསྐལ་བཟང་ཐར་འདོད་སྙིང་ལ་སིམ་སྟེར་བའི།  །དམ་ཆོས་བདུད་རྩིའི་ཆོ་གས་དགེ་བར་མཛོད།  །བག་མེད་འགོགས་པའི་ས་བོན་ལས་འཕོས་པའི།  །ཐོས་བསམ་མཚར་སྡུག་རབ་འབར་ཨུ་དུམྦར།  །སྒོམ་སྤངས་འབྲས་བུའི་ཁུར་གྱིས་ཉེར་དུད་པ།  །རིག་གྲོལ་དགེ་འདུན་ཚོགས་ཀྱིས་ཤིས་པ་སྒྲུབས།  །ཞེས་སམ།  ཨོཾ་སྭ་སྟི།  བསོད་ནམས་ཡེ་ཤེས་ཚོགས་གཉིས་ཀྱི།  །ཆུ་གཏེར་ཆེན་པོ་བསྲུབས་པའི་ཕུལ།  །བྲལ་སྨིན་ཆ་ཤས་གང་བའི་ཟླ།  །རྫོགས་སངས་རྒྱས་དེས་དགེ་ལེགས་སྩོལ།  །གང་གསུང་ཞི་བསིལ་བདུད་རྩིའི་རླབས།  །སྐལ་བཟང་སུ་ཞིག་བགོ་སྐལ་དུ།  །ཐོབ་ལས་གཏན་བདེའི་བཅུད་སྦྱིན་པ།  །དམ་པའི་ཆོས་ཀྱིས་ཤིས་པར་མཛོད།  །བསྔགས་འོས་ཡོན་ཏན་བཉྫུ་ལ།  །བསླབ་གསུམ་མཛེས་མའི་སོར་རྩེ་ཡིས།  །བསྣུན་ལས་ཕན་བདེའི་འཛུམ་དམུལ་བ།  །དགེ་འདུན་འདུས་པས་ཁྱོད་ལ་སྲུངས།  །ཞེས་སམ།  ཨོཾ་སྭ་སྟི་བི་ཛ་ཡནྟུ།  གང་ཞིག་སྐྱབས་སུ་བསྟེན་པ་ཙམ་ནས་མི་ཕྱེད་ཐུགས་རྗེའི་བདུད་རྩིའི་སྤྲིན།  །དགེ་ལེགས་རྟག་པའི་དཔྱིད་དུ་འཇོ་བས་སྐལ་བཟང་ལུས་ཅན་མདོངས་མཐའི་ཚོགས།  །དད་གསུམ་ཟློས་གར་གསར་དུ་བསྒྱུར་བཞིན་དོན་གཉིས་མངལ་ཁུར་སྟུག་པོ་ཡིས།  །ཉེ་བར་ལྕི་བའི་སྙིང་པོ་ལ་སྦྱོར་མཆོག་གསུམ་རྒྱ་མཚོར་ཁྱོད་ལ་སྲུངས།  །ཞེས་སམ།  ཤྲཱི་བི་ཛ་ཡནྟུ།  །འདི་ན་མཚན་ཙམ་ཐོས་པའི་ཟླ་གཞོན་གྱིས།  །ཕན་བདེའི་ཀུནྡ་འཛུམ་དཀར་གཡོ་བ་ལ།  །དཀོན་མཆོག་གསུམ་ཞེས་གྲགས་པའི་སྣང་བ་དེས།  །རྣམ་ཀུན་ཤིས་པའི་བསིལ་བ་སྦྱིན་གྱུར་ཅིག  །ཞེས་སམ།  སུ་ཤྲེ་ཡསྟུ།  །གང་གིས་གཙུག་ཏུ་བསྙེན་པའི་མོད།  །འཁོར་བའི་འཇིགས་པ་ཡོངས་འཕྲོགས་ནས།  །ཐར་པའི་གོ་སར་དབུགས་དབྱུང་བའི།  །སྐྱབས་གནས་གསུམ་གྱིས་ཤིས་པ་སྩོལ།  །ཞེས་སམ།  །ཤྲཱིམཱྃ་གུ་རཱུ་ཎཱ་ཤྲེ་ཡོ་བྷ་བནྟུ།  །རྨད་བྱུང་བྱིན་རླབས་ག་བུར་ཐིགས་པའི་རྒྱུན།  །རེག་པས་བསྐལ་བར་བསྒྲུབས་འོས་ལྷན་སྐྱེས་ཀྱི།  །ཡེ་ཤེས་ཆེན་པོའི་སིམ་པ་མཆོག་སྟེར་བ།  །ཁྱབ་བདག་དཔལ་ལྡན་བླ་མས་ཁྱོད་ལ་སྲུངས།  ཞེས་སམ།  ཨ་མཱ་ར་ནཱ་ཐཻཿཀ་ལྱཱ་ཎཾ་ཀུརྦནྟུ།  རྡུལ་བྲལ་སོ་སོར་རྟོག་པའི་འཇོ་སྒེག་ནི།  །རབ་དམར་མཚན་དཔེའི་ཕུང་པོ་དང་འགྲོགས་ཕྱིར།  །དྲན་པས་རིང་འཚོའི་དཔལ་སྟེར་ལྷག་པའི་ལྷས།  ཁྱོད་ལ་རྣམ་ཀུན་འཆི་མེད་སྦྱིན་གྱུར་ཅིག  །ཞེས་སམ།  ཤྲཱི་བི་ཛི་བནྟུ།  གང་གི་མཚན་གྱི་རྒྱལ་རྔ་བརྡུངས་ཙམ་ནས།  །དུས་མིན་འཆི་བའི་རྒུད་པ་དྲུངས་ཕྱུང་སྟེ།  །འཕོ་མེད་རྟག་པའི་གོ་འཕང་ལ་སྦྱོར་བའི།  །རྗེ་བཙུན་ཡིད་བཞིན་འཁོར་ལོས་ཤིས་པར་མཛོད།  །ཞེས་སམ།  ཨོཾ་སྭ་སྟི་ཛ་ཡནྟུ།  མཐའ་ཀླས་སྲས་བཅས་རྒྱལ་བའི་ཡེ་ཤེས་སྐུ།  །ཐུན་མཚམས་སྤྲིན་གྱི་ལང་ཚོ་ལ་ཆགས་པའི།  །འཇམ་མགོན་མཁྱེན་པའི་ཟླ་ཤེལ་གསར་པ་དེས།  །བློ་མཆོག་ཆུ་གཏེར་འཕེལ་བའི་ཤིས་པ་སྒྲུབས།  །ཞེས་སམ།  ཤྲཱི་ཀ་ལྱཱཎ་མསྟུ།  གང་གི་ཐུགས་རྗེའི་ཉི་གཞོན་གཡོ་བའི་རླབས།  །མོས་ལྡན་ཡིད་མཁར་ཤར་བའི་དེ་མ་ཐག  །རྣམ་དཔྱོད་པདྨའི་ནགས་ཀླུང་དར་བབས་པའི།  ངག་དབང་མཚོ་བྱུང་ལྷ་མོས་ཁྱོད་ལ་སྲུངས།  །ཞེས་སམ།  ན་མོ྅ཪྻཏཱཪྻཻ།  གང་ཞབས་ལན་གཅིག་དྲན་པའི་མདུན་ས་རུ།  །བརྒྱད་གཉིས་འཇིགས་པས་ཉེན་པའི་འགྲོ་བ་ཀུན།  །ཕན་དང་བདེ་བའི་དབུགས་འབྱིན་སྟེར་མཁས་པ།  །རྗེ་བཙུན་མྱུར་མ་དཔའ་མོས་མཆོག་སྦྱིན་མཛོད།  །ཅེས་སམ།  ཤྲཱི་ཛ་ཡནྟུ།  རྗེས་ཆགས་དབང་གི་མཆིལ་པས་བཏབ་ཙམ་གྱིས།  །ཁམས་གསུམ་སྐྱེ་རྒུའི་བརྟན་པ་འཕྲོག་བྱེད་པའི།  །རིགས་བྱེད་ཌཱ་ཀིའི་ཐུགས་རྗེའི་ཨུཏྤ་ལས།  །སྡེ་བཞིའི་བུང་བ་འདུ་བའི་དགའ་སྟོན་སྒྲུབས།  །ཞེས་སམ།  ཤྲཱི་བཛྲ་དྷརྨཱ་པཱ་ལ་ལཻ་རཀྵནྟུ།  གང་ཞིག་སྐད་ཅིག་དྲན་པའི་ཡེ་ཤེས་མེས།  །མ་ལུས་བདུད་སྡེའི་བུད་ཤིང་ཀུན་བསྲེགས་ནས།  །ཕུན་ཚོགས་ཤིས་པའི་སྣང་བ་སྦྱིན་མཛད་པ།  །རྡོ་རྗེའི་ཆོས་སྲུང་ཚོགས་ཀྱིས་ཁྱོད་ལ་སྐྱོངས།  །ཞེས་སམ།  ཤྲཱི་སུ་ཤུ་བྷ་བརྡྷནྟུ།  གསེར་རི་གུར་གུམ་ཚོན་གྱིས་སྒེག་པའམ།  །གནོད་གནས་གཙུག་གིས་བསྟེན་པའི་དབང་པོ་གང་།  །འགྲོ་ལ་འདོད་རྒུའི་བྱེད་པ་པོར་ངེས་ཕྱིར།  །དལ་བསོས་བུ་ཡི་འབྱོར་པ་ཆར་དུ་བསྙིལ།  །ཞེས་པ་ལྟ་བུས་མཚོན་ཇི་ལྟར་སྐབས་སུ་བབས་པ་དང་།  གཞན་ཡང་མཁས་པ་དང་།  བཙུན་པ་དང་།  འཇིག་རྟེན་གྱི་འབྱོར་པས་མངོན་པར་མཐོ་བའི་རིགས་ཅན་དག་ལ་དམིགས་བསལ་གྱི་ཤིས་བརྗོད་རྒྱས་པར་སྦྱོར་བར་འདོད་ནའང་འདི་ལྟར་སྦྱར་བར་བྱ་སྟེ།  །སརྦ་ཛྙཱ་སུ་ཤྲེ་ཡོ་བྷ་བནྟུ།  །རྨད་བྱུང་མཚན་སྙན་ནོར་བུའི་དོ་ཤལ་མཆོག  །སྣ་ལུང་དཔྱངས་པའི་མོད་ནས་རིག་པའི་གཞུང་།  །མཐའ་ཀླས་འབྱོར་པའི་དཔལ་གྱིས་མངོན་མཐོ་བ།  །འཇམ་མགོན་སྨྲ་བའི་ཉི་མས་ཤིས་པ་སྩོལ།  གང་གི་ཐུགས་རྗེའི་འོད་རྡུལ་གསར་པ་ཡིས།  ཁྱོད་བློའི་གསེར་གྱི་པདྨོ་འཛུམ་པའི་ཁ།  །ཕྱེ་ལས་མཁྱེན་གཉིས་ཟིལ་མངར་རྟག་འབབས་བཞིན།  །བློ་གསལ་རྒྱ་མཚོའི་དཔྱིད་དུ་འབར་གྱུར་ཅིག  །དེ་ཡང་སྲིད་ཞིའི་ཉམས་འགྱུར་རྣམ་མང་བཟོ།  །སྒོ་གསུམ་ནོར་བུའི་བ་གམ་ལ་འཕོས་པས།  །ལས་སྣ་ཚོགས་པའི་ཁེངས་པ་བསྙིལ་བྱེད་ཅིང་།  །ལྷར་བཅས་ཡི་ག་དབང་མེད་འགུགས་གྱུར་ཅིག  །རྣམ་འགྱུར་གདུང་བས་གཞུར་བའི་སྐྱེ་བོ་ཀུན།  །རིང་དུ་གནས་པའི་ཐབས་ཚུལ་བདུད་རྩིའི་ཆར།  །ཉེར་བཟུང་ཡན་ལག་བརྒྱད་ལྡན་གསོ་བའི་སྤྲིན།  །རྣམ་དཔྱོད་མ་དྲོས་འཇིང་ནས་སྤྲོ་གྱུར་ཅིག  །རང་བཞིན་རྣམ་མང་ཁམས་ཀྱི་ཏམྦུ་རཿ  མཐའ་ཀླས་རྐྱེན་གྱི་སོར་རྩེས་བསྣུན་པ་ལས།  །མིང་དང་ཚིག་གི་སྙན་འགྱུར་སྟོང་འཁྲོལ་བས།  །གཟུར་གནས་རྣ་བའི་བཅུད་དུ་འཇོ་བར་ཤོག  །རྟོག་གེའི་ཚིག་དོན་བརྒྱད་གཉིས་རྡོ་རྗེའི་མཚོན།  །གདེངས་པ་ཙམ་གྱིས་ཕས་རྒོལ་རི་བོའི་རྐང་།  །འཇོམས་ཤིང་རང་སྡེའི་གྲུབ་མཐའི་ལེགས་བྲིས་ཚལ།  །སྐྱོང་མཁས་འཆི་མེད་དབང་པོར་གསལ་གྱུར་ཅིག  ཁྱད་པར་ཐེག་གསུམ་ཨུཏྤལ་གཞོན་ནུའི་ཁོངས།   །གསང་རྒྱུད་རྒྱ་མཚོའི་འབྲས་བཟང་གིས་དུད་པ།    །ཡོངས་རྫོགས་བསྟན་པའི་དཔྱིད་དཔལ་ཉམས་དགའ་བར།   །རང་ཉིད་ཀུན་མཁྱེན་དགའ་བས་རྩེན་པར་ཤོག  །བསྒྱུར་བགོད་འབྲི་བསྣན་རི་མོའི་སྒྱུ་ཐབས་ཀྱིས།  །ཕྱི་རོལ་དུས་ཀྱི་འཁོར་ལོའི་རྣམ་གཞག་གང་།  །ཡུད་ཀྱིས་རྟོགས་པའི་ངོ་མཚར་སྨིག་སྨན་གྱིས།  །འགྲོ་འདིའི་ལེགས་ཉེས་དམིགས་བུ་གསལ་གྱུར་ཅིག   །ཤར་ལྷོའི་ལམ་དང་སྒྲ་དོན་གབ་ཚིག་རྒྱན།  །ཇི་བཞིན་འབྱེད་ཅིང་སྨྲ་ལ་མཚུངས་མེད་ངག  །མཚོ་བྱུང་མགྲིན་པར་ལྷག་པའི་མཐུས་བསྐུལ་ཏེ།  །དཔལ་ལྡན་དཎྜཱིའི་སྤུན་ཟླར་འཛེགས་པར་ཤོག  །ལྕི་དང་ཡང་པའི་ཡི་གེའི་མེ་ཏོག་ནི།  །བྲྀཏྟ་ཛཱ་ཏིའི་འཁྲི་ཤིང་ལ་བཀོད་པར།  །རྨད་བྱུང་ངོ་མཚར་སྦྱོར་བའི་མཚར་སྡུག་གིས།  རིན་འབྱུང་ཞི་བའི་མཛེས་པ་བཟུང་གྱུར་ཅིག  །གཟོད་ནས་གྲུབ་དང་གློ་བུར་ལེགས་སྦྱར་བའི།  །དོན་དང་མིང་གི་མངོན་པར་བརྗོད་པའི་མཐའ།  །རྫོགས་པར་གཟིགས་ལ་འཆི་མེད་སེངྒེའི་ཞབས།  །སླར་ཡང་འོངས་པའི་དགའ་བས་སྙེམས་པར་ཤོག  །སྔོན་བྱུང་གཏམ་གྱི་གླེང་གཞི་ལས་བརྩམས་ཏེ།  །མཐའ་ཀླས་གཟུགས་དང་སྐད་ཀྱི་རྣམ་འགྱུར་ཚོགས།  །མ་འདྲེས་ཟློས་པའི་གར་དུ་རོལ་པ་ཡིས།  །དོན་མཐུན་ཡིད་ལ་སིམ་པ་སྟེར་གྱུར་ཅིག  །མདོར་ན་རྣམ་མཁྱེན་ཡེ་ཤེས་མཆོག་ལ་གང་གིས་སྦྱོར་བའི་ཉེ་རྒྱུ་ནི།  །ཕྱི་ནང་རིག་པའི་ལམ་བཟང་ཉིད་དེ་དེ་དེའི་ཚུལ་ལ་འཆད་པ་དང་།  །རྩོད་ཅིང་རྩོམ་པའི་ཤིས་པ་བསྒྲུབས་པས་སྙིགས་མའི་རྒུད་པ་དྲུངས་ཕྱུངས་ཏེ།  །ཕུན་ཚོགས་མཁས་བརྒྱའི་རྫོགས་ལྡན་གསར་པའི་དགེ་ལེགས་སྣང་བ་འབར་བར་ཤོག  །ཅེས་དང་།  ཨོཾ་སྭསྟི་སིདྡྷི་རསྟུ།  ཡིད་ཅན་སུ་ཞིག་སྐྱབས་སུ་དོང་བ་ལས།  །རྨད་བྱུང་དགེ་མཚན་སྣུམ་པོའི་གྲིབ་མ་རུ།  །ཕན་བདེའི་དབུགས་འབྱིན་སྩོལ་བའི་གདུགས་དཀར་པོ།  །མཆོག་གསུམ་ཐུགས་རྗེའི་བསིལ་བས་ཁྱོད་ལ་སྲུངས།  །ཐུན་མོང་རིག་པའི་ཆུ་གཏེར་གཏིང་ཡངས་པར།  །བློ་མཆོག་གསེར་ཉ་གཡོ་བའི་ཟློས་གར་གྱིས།  །ཀུན་རྨོངས་ཚ་གདུང་སྟུག་པོ་རིང་བཅིལ་ནས།  །མཁས་ཚུལ་གསུམ་གྱི་སིམ་པས་སྙིང་བརླན་ཤོག  །གང་ལ་རེག་ན་སྲིད་ཞིའི་ཕུན་ཚོགས་ཀུན།  །འབད་མེད་ལྷུག་པར་སྩོལ་བ་ནོར་གྱི་བུས།  །མཚོན་མིན་སྡེ་སྣོད་རྒྱ་མཚོའི་བུམ་པ་བཟང་།  བདག་གིར་བགྱི་པའི་དམ་བཅའ་འཛིན་གྱུར་ཅིག  །བག་མེད་འགོག་པའི་དཔྱིད་ཀས་ཉེར་དྲངས་པའི།  །བརྟན་མཁས་ཡོན་ཏན་ཡོངས་རྫོགས་པདྨ་དཀར།  །རིག་དང་གྲོལ་བའི་མཚར་སྡུག་གཡོ་བ་ཡིས།  །བསླབ་གཞིའི་སྨན་ལྗོངས་ཉམས་དགར་མཛེས་པར་ཤོག  །གཞན་ཕན་ཡིད་བཞིན་མཚོ་ནས་ཉེར་འཐོན་པའི།  །སྨོན་འཇུག་རི་མོ་གཡས་སུ་འཁྱིལ་པའི་དུང་།  །མཐའ་ཀླས་འགྲོ་བའི་ཉེར་འཚོར་རབ་བསྐུལ་བས།  །སྒྲིབ་གཉིས་རིམས་ནད་རྒྱུ་བ་གཅོད་གྱུར་ཅིག  །འཕགས་ལམ་ངེས་གསང་རིག་འཛིན་སྡེ་སྣོད་ཆེའི།  །སྨིན་དང་གྲོལ་བའི་བདུད་རྩིའི་ཟིལ་དངར་མཆོག  །ཐུགས་ཀྱི་དཔལྦེར་སིམ་པའི་དེ་མ་ཐག  །གྲུབ་གཉིས་ལང་ཚོ་ཅི་ཡང་འབར་བར་ཤོག  །མདོར་ན་བསླབ་གསུམ་གོ་ཆ་བརྟན་པ་ལ།  །ཡིད་སྲུབས་དཔུང་གིས་ནམ་ཡང་མི་བརྫི་བར།  །ཕྱོགས་ལས་རྣམ་པར་རྒྱལ་བའི་རྒྱལ་མཚན་གྱིས།  །བྱང་ཆུབ་སྙིང་པོའི་ཐིག་ལེར་གཤེགས་གྱུར་ཅིག  དེ་ལྟར་ཤིས་པའི་གསེར་འཁོར་སྔོན་འགྲོ་བས།  །ཡོངས་རྫོགས་བསྟན་པའི་རི་གླིང་ཐ་གྲུ་ཀུན།  །དབང་བསྒྱུར་ལྷར་བཅས་བསྔགས་འོས་རྒྱལ་ཐབས་ལ།  །འཛེགས་པའི་གྲགས་སྙན་སྲིད་ན་མཐོ་བར་ཤོག  །ཅེས་དང་།  སརྦ་དཱ་ཀ་ལྱཱ་ཎཾ་ཀུརྦནྟུ།  ཕུན་ཚོགས་ཤིས་རྒུའི་མེ་ཏོག་དཀར་པོའི་སྤྲིན།  །གང་ལ་འཐོར་བ་ཙམ་གྱིས་སྐད་ཅིག་ལ།  །རྨད་བྱུང་མཐོ་རིས་ཡོན་ཏན་གསར་པའི་གཟིས།  །ཕན་བདེའི་དགའ་སྟོན་མངོན་པར་དར་གྱུར་ཅིག  །ཆེན་པོའི་མཐོ་རིས་ཀྱི་ཡོན་ཏན་བདུན་དང་རྒྱལ་སྲིད་སྣ་བདུན་སྦྱར་བའི་ཤིས་བརྗོད་དོ།  །རིགས་ཀྱི་མ་དྲོས་ཆུ་འཛིངས་ལས།  །བྱུང་བའི་ཛམྦུ་ནཱ་དའི་རང་བཞིན་གྱིས།  །ལེགས་པར་བསྐྲུན་པའི་རྩིབས་སྟོང་འཁོར་ལོ་ཡིས།  །དགེ་མཚན་གླིང་བཞིའི་ཁྱོན་ལ་དབང་བསྒྱུར་ཤོག  །མཐོང་ན་སྙིང་དང་མིག་ལ་བདུད་རྩིའི་རོ།  །སྦྱིན་མཁས་ནོར་བུའི་རེག་བྱ་དང་མཚུངས་པའི།  །ལང་ཚོའི་གཟི་བྱིན་ཉམས་པ་མེད་པའི་གཟུགས།  །རྒ་ན་རྒུད་པའི་ཡུལ་ལས་གྲོལ་གྱུར་ཅིག  །ཟབ་མྱུར་གསལ་བའི་ཤེ༷ས་ར༷བ་མཐའ་ཀླས་ཀྱི།  །མཚར་སྡུག་ཉམས་འགྱུར་རྒྱགས་པའི་ཟུར་མིག་གིས།  །ཆོས་དང་སྲིད་ཀྱི་མཛའ་བོ་འགུགས་མཁས་པས།  །བཙུན་མོ་རིན་ཆེན་དམ་པའི་དཔལ་བཟུང་ཤོག  །གནོད་གནས་དབང་པོའི་སྤུན་ཟླ་ལ་ཆགས་པའི།  །མི་ཟད་འདོད་རྒུའི་གན་མཛོད་འཛིན་པ་ལ།  །ཟླ་མེད་ཁྱིམ་བདག་མཆོག་གི་སྙེམས་འཆང་བ།  །རང་གཞན་འབྱོར༵་བའི༵་དུས་སྟོན་རྒྱས་གྱུར་ཅིག  །ནད༵་མེད༵་འཚོ་བའི་ཐབས་ཚུལ་པད་རྩ་ཡིས།  །དལ་རྟེན་ཤ་ཚུགས་རྒྱས་པའི་གཉིས་འཐུང་དབང་།  །ལེགས་སྤྱད་གསེར་གྱི་དྲྭ་བས་གདོང་མཛེས་བཞིན།  །ཕན་བདེའི་དགའ་ཚལ་སྟུག་པོར་དཀྱུ་བར་ཤོག  །དབ༵ང་བཅུའི་རྗེས་མཐུན་དཔལ་གྱིས་རབ་ཕྱུག༵་པའི།  །གོམ་སྟབས་ལྷོད་པོར་གཡོ་བའི་ཅང་ཤེས་མཆོག  །བསོད་ནམས་རིན་ཆེན་ཕྲག་བརྒྱས་ཡོངས་གཏམས་པ།  །བསྔགས་འོས་ཤུལ་ལམ་དམ་པར་འཇུག་གྱུར་ཅིག  །མདོར་ན་མཆོག་གསུམ་ཐུགས་རྗེའི་དཔུང་པ་ཡིས།  །དུས་མིན་ཉི་བུའི་གཡུལ་ངོ་ཕམ་བྱས་ཏེ།  །ཚེ༷་སྲོག་རི༷ང་འཚོའི་མདུད་པ་མི་ཕྱེད་བཞིན།  །ཕྱོགས་ལས་རྣམ་པར་རྒྱལ་བའི་དཔལ་ཐོབ་ཤོག  །ཅེས་པ་ལྟ་བུས་མཚོན་སྐབས་སུ་གང་འོས་སྦྱར་རོ།  །དེ་ལྟར་དམིགས་བསལ་དང་སྤྱིར་བཏང་གི་ཡུལ་མཆོག་འབྲིང་ཕལ་པ་རྣམས་ལ་རྐང་བཞིའི་ཚིགས་སུ་བཅད་པ་གཙོ་བོར་བཏོན་པའི་སྙན་ངག་གི་ཕྲིན་ཡིག་འབུལ་ཚུལ་འཕྲོས་དོན་དང་བཅས་པ་ཅུང་ཟད་ཅིག་བསྙད་པར་བྱས་པའང་།  ཇི་སྐད་དུ།  དཔལ་ལྡན་དཎྜཱིས།  འོན་ཀྱང་རྣམ་རྟོག་ས་བོན་ནི།  །སྔོན་གྱི་སློབ་དཔོན་རྣམས་ཀྱིས་བསྟན།  །དེ་ཉིད་རབ་ཏུ་ལེགས་སྦྱར་ཕྱིར།  །ཡོངས་སུ་ངལ་འདི་བདག་གིའོ།  །ཞེས་གསུངས་པ་ལྟར་བློ་གྲོས་གསར་བུར་གྱུར་པ་དག་གི་རྣམ་པར་རྟོག་པ་འཕྲོ་བའི་ས་བོན་ཙམ་ཞིག་བསྟན་ཟིན་ཏེ།  གཞན་དུ་ན་དེ་དང་དེས་མཚོན་ནས་སྦྱོར་བ་པོ་རང་རང་གི་རྣམ་དཔྱོད་ཀྱི་འཛིན་མ་ལས་ཡུལ་དུས་གནས་སྐབས་ཀྱི་སྒོ་ནས་ཇི་ལྟར་འོས་པ་ཚིག་སྦྱོར་གྱི་རིམ་པ་བརྗོད་པ་གཙང་ཞིང་།  བརྗོད་དོན་གསལ་བ་དང་།  སྐྱོན་གྱིས་མ་རེག་པའི་དགའ་ཚལ་མཐའ་ཀླས་པ་སྤྲོ་ཤེས་དགོས་པ་ལས།  རེ་རེ་བཞིན་དུ་དཔེར་བརྗོད་པ་ནི་ཚངས་དང་ཕུར་བུའི་ངག་ཀྱང་ངལ་བའི་གནས་སུ་འགྱུར་ན་བདག་ལྟ་བུས་ལྟ་སྨོས་ཀྱང་ཅི་འཚལ་ཏེ།  སྔ་མས།  སྙན་དངགས་མཛེས་པར་བྱེད་པ་ཡི།  །ཆོས་རྣམས་རྒྱན་ཅེས་རབ་ཏུ་བརྗོད།  །དེ་ནི་ད་ལྟའང་རྣམ་རྟོག་སྟེ།  །དེ་དག་མ་ལུས་སུས་འཆད་ནུས།  །ཞེས་གསུངས་པ་ལྟར་མ་ཟད།  དཔྱོད་ལྡན་དག་གིས་སྨྲས་པ་ཁོ་ན་ཡང་བསྐྱར་དུ་བཀོད་པ་ནི་ནེ་ཙོའི་ཀློག་པ་དང་འདྲ་བས་བློ་གྲོས་ཕུར་ཁུང་ཐུག་པའི་རྟགས་སུ་ངེས་པའི་ཕྱིར།  ལམ་འདིར་དོན་དུ་གཉེར་བའི་བློ་མིག་གཟུ་བོར་གནས་པའི་ཚོགས་ཀྱིས་འཕགས་ཡུལ་གྱི་སློབ་དཔོན་ཆེན་པོ་དབྱངས་ཅན་མགྲིན་པར་ཆགས་པ་དཔལ་ལྡན་དབྱུག་པ་ཅན་གྱི་བསྟན་བཅོས་ལ་མོས་བརྩོན་ཤེས་བཟོད་བཞི་དང་ལྡན་པའི་རྟག་གུས་ཀྱི་སྦྱོར་བས་ལེགས་པར་སྦྱངས་ཏེ།  །སྙན་དངགས་མཁན་རྣམས་ཀྱི་གཙུག་གི་ནོར་བུ་རྒྱལ་པོ་དགེ་དབང་ཡབ་སྲས་དང་།  །སྨྲ་བ་དོན་ལྡན་གྱི་སྐྱེས་བུ་མཁས་མཆོག་དཔལ་བོའི་རྗེས་སུ་འབྲངས་བས་ཚིག་དང་དོན་དུ་བཅས་པའི་སྦྱོར་བ་ཕུན་སུམ་ཚོགས་པས་འཆད་པ་དང་།  རྩོད་པ་དང་།  རྩོམ་པའི་བརྟུལ་ཞུགས་བཟུང་བ་ལས་བློ་གྲོས་གནས་མིན་གྱི་ལམ་ཉི་ཚེ་བར་ཆུད་མི་གསོན་པར་གསོལ་བ་འདེབས་པ་ལགས་སོ།  །སྤྱི་དོན་གཉིས་པར་ཚིག་ལྷུག་པར་སྤེལ་བའི་དཔེར་བརྗོད་པ་ནི་ལོགས་སུ་བྲིས་པ་ལས་ཤེས་པར་བྱའོ།  །

སླར་སྨྲས་པ།  ཚིག་སྙན་རྣ་བའི་བདུད་དུ་འབབས་འདི་མཛེས་སྡུག་ལུས་ཕྲའི་རྒྱུད་མངས་ཉིད་མིན་སྨྲ་མཁས་མགྲིན་པའི་རྫ་རྔ་སྟེ།  །དོན་བཟང་རིན་ཆེན་ཕྲག་བརྒྱས་གཏམས་འདིའང་གདེངས་ཅན་རྩེན་པའི་བསྟི་གནས་ཅི་ཞིག་བློ་གསལ་བློ་ཡི་ཆུ་གཏེར་ཆེ།  །དེས་ཀྱང་ངོ་མཚར་ལང་ཚོ་སྦྱིན་གང་བདེ་འཐུངས་ཟིལ་དངར་གསར་པ་མ་ལགས་སྔོན་མེད་གཏམ་གྱི་སྦྱོར་བ་ལས།  །ཉེ་བར་བྱུང་བའི་སྐལ་བཟང་མཆོག་ཕྱིར་དཔྱོད་ལྡན་སྙིང་ལ་བདུད་རྩིའི་རྦ་རླབས་ཅིར་ཡང་འཕྱུར་བའི་ཆོ་གར་བྱས།  །ཇི་ལྟར་འབིགས་བྱེད་རི་བོའི་ནགས་ཚལ་ལས།  །འཕོས་པའི་ལྷོ་ཕྱོགས་རླུང་གི་སིམ་པ་ལྟར།  །མཁས་མང་བཀའ་དྲིན་རྫིང་བུར་གསོས་བདག་ཀྱང་།  །རྣམ་དཔྱོད་པདྨོའི་འཁྲི་ཤིང་ཅུང་ཟད་དགོད།  །དེ་སླད་དཔྱིད་ཀྱི་དཔལ་མོའི་དྲོད་གཤེར་དང་།  །ཉི་གཞོན་འོད་རླབས་གཡོ་བས་ཕྱེས་མིན་པའི།  །གཞུང་བཟང་ཨུཏྤལ་གཞོན་ནུའི་དོ་ཤལ་ཡང་། །སྐྱེས་སྦྱངས་ཤེས་བརྩོན་བརླན་གྱིས་ཕུད་ལ་བསྐྲུན།  །གང་ལས་བྱུང་བའི་རྣམ་པར་དཀར་བའི་ཕུལ།  །ཀུཎྜཱ་རཱི་ཀའི་དྲེགས་པ་བསྙིལ་བ་དེས།  །ལུས་ཅན་རྨོངས་པའི་གཉིད་ལས་གཡུར་བ་ཀུན། །ཐམས་ཅད་མཁྱེན་པའི་ངལ་གསོ་བསྟེན་པར་ཤོག  །ཁྱད་པར་ལེགས་བཤད་སྦྲང་རྩིའི་ཐིག་པ་འདི།  །དོན་གཉེར་རཿཡིག་གཉིས་པའི་ཚོགས་རྣམས་ཀྱིས། །བཏུངས་ལས་རྣམ་འབྱེད་མཚར་སྡུག་རྫོགས་པའི་མོད། །མཉན་འོས་གླུ་དབྱངས་དར་དིར་ལེན་གྱུར་ཅིག     །རྣམ་མང་ཕྱི་ནང་རིག་གཞུང་མཐའ་ཀླས་པའི། །སྣང་བ་སར་པ་སྤྲོ་བའི་མཁས་མང་གིས།   །ཤིན་ཏུ་རྩོད་པའི་མུན་སྟུག་ཕམ་བྱས་ཏེ།  །ཁོར་ཡུག་རི་བོའི་ཁོངས་ཀུན་མཛེས་པར་ཤོག  །མཐར་ཐུག་སྤྲོས་པའི་མཚན་མ་རྒྱུར་བཅས་ཤིན་ཏུ་ཞི་བའི་དབྱིངས་སིམ་བཞིན།  །རྨད་བྱུང་སྙིང་རྗེའི་གཞན་དབང་ལ་འཆེལ་ཡིད་ཅན་ཁམས་དབང་བསམ་པ་དང་།  །རྗེས་སུ་མཐུན་པའི་ཆོས་འཁོར་བསྐོར་ལ་མི་ཕྱེད་ན་དའི་སྒྲ་དབྱངས་ཅན།  །གསུང་གི་རྡོ་རྗེའི་རྣམ་ཐར་རྒྱ་མཚོར་འགྲོ་ཀུན་དབུགས་འབྱིན་ཐོབ་གྱུར་ཅིག  །དེ་ལྟར་མཆོག་འབྲིང་ཕལ་བར་གྱུར་བའི་ཡུལ་རྣམས་ལ་ཕྲིན་ཡིག་གི་རིམ་པ་ཇི་ལྟར་སྟོབ་པའི་ཚུལ་གྱི་གཏམ་འཕྲོས་དོན་དང་བཅས་པ་ཨུཏྤལ་གཞོན་ནུའི་དོ་ཤལ་ཞེས་བྱ་བ་འདི་ཡང་།  བློ་གསལ་ཞིང་དོན་དུ་གཉེར་བ་དག་གིས་ནན་ཏན་ཆེན་པོའི་བཀའ་སྩལ་པ་ལྡོག་ཏུ་མ་ནུས་པར།  ཡུལ་དུས་གནས་སྐབས་སོགས་ཀྱི་བརྗོད་བྱ་སྐུལ་བ་པོའི་བཞེད་པ་གཙོ་བོར་བགྱིས་ཏེ།  མ་ཧཱ་པཎྜི་ཏ་ཟེ་ཆེན་པའི་བཀའ་དྲིན་ལས་ཐ་སྙད་རིག་པར་སྨྲ་བའི་གྲལ་མཐར་སོན་པའི་བཏགས་མིང་དུ་ཚངས་སྲས་དགྱེས་པའི་བློ་ལྡན་ནམ།  གཙུག་ལག་སྨྲ་བའི་ཉི་མ་ཞེས་ཀྱང་བགྱི་བའི་རྒྱལ་ཁམས་ཀྱི་དཱ་རི་དྲཱ་པས་རང་ལོ་བཅོ་བརྒྱད་པར་ཕལ་ཆེར་ཞིག་བྲིས་པ་ལས།  །སླད་ནས་ས་གསུམ་ན་འགྲན་ཟླ་དང་བྲལ་བ་རྩོད་པའི་དུས་ཀྱི་ཀུན་མཁྱེན་གཉིས་པ་རྡོ་རྗེ་འཆང་ཀུན་དགའ་བཟང་པོ་བརྒྱུད་པ་དང་བཅས་པའི་གདན་ས།  གཡས་རུ་གཙང་གི་སའི་ཐིག་ལེ་ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ཨེ་ཝཾ་ཆོས་ལྡན་གྱི་ཆོས་གྲྭ་ཆེན་པོར་རྫོགས་པར་སྦྱར་བའི་དགེ་བས་འགྲོ་ཀུན་སོ་སོ་ཡང་དག་པར་རིག་པའི་ཡེ་ཤེས་ཀྱི་སྣང་བ་ལ་རེག་པའི་རྒྱུར་གྱུར་ཅིག  །སརྦ་དཱ་ཀ་ལྱཱ་ཎཾ་བྷ་བནྟུ།།  །།
}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-18-TSHA-001]]
[[Category:Khyentse Lineage Project]]
[[Category:JKW-KABUM-Volume-18-TSHA]]