View source for DKR-KABUM-17-TSA-022

{{Text
|classification=Tibetan Publications
|subclass=Tibetan Texts
|sectionheading=No
|fulltitletib=རང་བྱུང་པདྨའི་སྙིང་ཐིག་ལས༔ གུ་རུ་ཉི་མ་འོད་ཟེར་གྱི་སྒྲུབ་ཐབས་འགྲོ་འདུལ་ཕྲིན་ལས་སྣང་བ༔
|fulltitle=rang byung pad+ma'i snying thig las: gu ru nyi ma 'od zer gyi sgrub thabs 'gro 'dul phrin las snang ba
|citation=[[Khyentse, Dilgo]]. ''Rang byung pad+ma'i snying thig las gu ru nyi ma 'od zer gyi sgrub thabs 'gro 'dul phrin las snang ba''. In ''Skyabs rje dil mgo mkhyen brtse rin po che'i bka' 'bum'', Vol. 17: 133-138. Delhi: Shechen Publications, 1994.
|collectiontitletib=དིལ་མགོ་མཁྱེན་བརྩེ་བཀའ་འབུམ།
|collectiontitle=dil mgo mkhyen brtse bka' 'bum
|author=Khyentse, Dilgo
|authortib=དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
|sourcerevealer=Khyentse, Dilgo
|sourcerevealertib=དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
|associatedpeople=pad+ma 'byung gnas
|associatedpeopletib=པདྨ་འབྱུང་གནས་
|tibgenre=Sadhanas - Evocation Ritual - sgrub thabs
|terma=Yes
|dkroutline=Six
|deity=gu ru nyi ma 'od zer
|cycle=rang byung pad+ma snying thig
|cycletib=རང་བྱུང་པདྨ་སྙིང་ཐིག་
|language=Tibetan
|volumenumber=017
|volnumtib=༡༧
|volyigtib=ཙ་
|totalvolumes=25
|textnuminvol=022
|pagenumbers=133-138
|totalpages=11
|beginfolioline=1a
|endfolioline=6a3
|totalfolios=6
|multivolumework=No
|rectonotes=nyi 'od
|versonotes=rang byung pad+ma snying thig
|colophontib=ཕྱི་རུ་མེ་རླུང་འཕྲུལ་འཁོར་གྱིས། །མཁའ་དབྱིངས་ཅི་དགར་བགྲོད་པའི་ཚེ། །ནང་དུ་རིག་རྩལ་རླུང་གཡོས་པའི། །ཡི་གེ་ཤོག་གུར་ཕབ་པའི་རྐྱེན། །སངས་རྒྱས་པྃདྨྃའི་བསྟན་ལ་གུས། །དབྃང་གིས་རྒྱུད་སྨིན་དད་དམ་གཙང༌། །ཐེག་མཆོག་རྒྱལྃ་ཐབས་སྐྱོང་བའི་བུས། །བསྐུལ་བ་དོན་ཡོད་བྱ་ཕྱིར་བྲིས། །རིག་རྩལ་བརྟུལ་ཞུགས་སྤྱོད་པ་ཡིས། །ནང་གི་གྲུབ་པ་ཆེ་བརྙེས་པས། །ཚོགས་བརྒྱད་བསྒྲལ་བའི་དུར་ཁྲོད་དུ། །ཡེ་ཤེས་རྩལ་ཆེན་རྫོགས་རྒྱུར་ཤོག །དེ་སྐད་ཁྲག་འཐུང་པདྨའི་འབངས། །གར་དབང་མདོ་སྔགས་གླིང་པ་ཡིས། །ལྷོ་ཕྱོགས་ནམ་མཁའི་ཁོར་ཡུག་ཏུ། །སྟན་ཐོག་གཅིག་ཏུ་བྲིས་པ་དགེ།།
|colophonwylie=phyi ru me rlung 'phrul 'khor gyis/_/mkha' dbyings ci dgar bgrod pa'i tshe/_/nang du rig rtsal rlung g.yos pa'i/_/yi ge shog gur phab pa'i rkyen/_/sangs rgyas pa~Md+ma~M'i bstan la gus/_/dba~Mng gis rgyud smin dad dam gtsang*/_/theg mchog rgyala~M thabs skyong ba'i bus/_/bskul ba don yod bya phyir bris/_/rig rtsal brtul zhugs spyod pa yis/_/nang gi grub pa che brnyes pas/_/tshogs brgyad bsgral ba'i dur khrod du/_/ye shes rtsal chen rdzogs rgyur shog_/de skad khrag 'thung pad+ma'i 'bangs/_/gar dbang mdo sngags gling pa yis/_/lho phyogs nam mkha'i khor yug tu/_/stan thog gcig tu bris pa dge//
|pdflink=File:DKR-KABUM-17-TSA-022.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|རང་བྱུང་པདྨའི་སྙིང་ཐིག་ལས༔ གུ་རུ་ཉི་མ་འོད་ཟེར་གྱི་སྒྲུབ་ཐབས་འགྲོ་འདུལ་ཕྲིན་ལས་སྣང་བ་བཞུགས༔
<br>
རྩ་གསུམ་ལྷ་ལ་ཕྱག་འཚལ་ལོ༔ ཡེ་ཤེས་མངོན་དུ་གྱུར་པ་ན༔ སྣང་སྲིད་ཐམས་ཅད་སངས་རྒྱས་ཞིང༔ རིག་རྩལ་རྫོགས་པའི་རྣལ་འབྱོར་གྱིས༔ སྣང་བ་སྒྱུ་མ་ལྟ་བུའི་ངང༔ བྱེད་སྤྱོད་ཐམས་ཅད་གཞན་ཕན་སྒོ༔ ཐབས་དང་ཐུགས་རྗེ་བསམ་མི་ཁྱབ༔ འགྲོ་ཕན་ཕྲིན་ལས་མཁའ་མཉམ་ཕྱིར༔ ཉི་མ་འོད་ཟེར་སྒྲུབ་ཐབས་བསྟན༔ ས་མ་ཡ༔  ཨ༔ དེ་བཞིན་ཉིད་དབྱིངས་ཀུན་ཏུ་སྣང༔ ཐུགས་རྗེ་མཁའ་ཁྱབ་གར་གྱི་དབང༔ ཟུང་འཇུག་ཡི་གེ་སྤྲིན་གྱི་ཧྲཱིཿ འོད་ཀྱིས་སྣོད་བཅུད་དབྱིངས་སུ་སྦྱངས༔ རང་སྣང་ལྷུན་གྲུབ་དུར་ཁྲོད་ཆེ༔ ཚོགས་བརྒྱད་དབྱིངས་སུ་བསྒྲལ་བའི་བརྡར༔ བམ་རོ་གསར་རྙིང་བཅལ་དུ་བཀྲམ༔ བྱ་གཅན་རོ་ལངས་ཀེང་རུས་རྒྱུ༔ འབུམ་ཕྲག་དཔའ་བོ་མཁའ་འགྲོའི་དབུས༔ རྡོ་རྗེའི་བྲག་སྟེང་པད་ཟླའི་སྟེང༔ བམ་རོའི་ཁར་བཞུགས་ཉི་མ་འོད༔ ཁྲོ་འཛུམ་རྣལ་འབྱོར་སྤྱོད་པའི་གཟུགས༔ གསེར་མདོག་སྒེག་བཞད་འཛུམ་པའི་ཞལ༔ ཐོད་སྐམ་རུས་པའི་རྒྱན་གྱིས་མཛེས༔ སྟག་ཤམ་དར་དཔྱངས་ཐོར་ཚུགས་རྩེར༔ རྡོ་རྗེ་རྩེ་ལྔ་ཕྱག་གཡས་ཀྱི༔ སྡིག་མཛུབ་ཉི་མ་རྟོད་ལ་གནོན༔ གཡོན་པས་བདེ་སྟེར་གསང་བ་ཡུམ༔ སྦས་ཚུལ་ཁ་ཊྭཱཾ་རྩེ་གསུམ་འཛིན༔ ཕྱེད་སྐྱིལ་རོལ་པའི་སྟབས་སུ་བཞུགས༔ ཡེ་ཤེས་གཟི་བྱིན་མཚུངས་པ་མེད༔ རྡོ་རྗེའི་ལྟ་སྟངས་དབྱིངས་སུ་གཟིར༔ ཕྱི་རོལ་པདྨ་འདབ་བཞིའི་སྟེང༔ རྡོ་རྗེ་རིན་ཆེན་པདྨ་ལས༔ རིགས་བཞིའི་པདྨ་མཁའ་འགྲོ་བཞི༔ དཀར་སེར་དམར་ལྗང་རིན་ཆེན་དང༔ རུས་པའི་རྒྱན་ལྡན་ཕྱག་གཡས་ཀྱི༔ རྡོ་རྗེ་རིན་ཆེན་པདྨ་དང༔ སྣ་ཚོགས་རྡོ་རྗེ་གཡོན་དྲིལ་བུ༔ བཞེངས་སྟབས་པད་ཟླ་འོད་ཀློང་བཞུགས༔ དེའི་ཕྱིར་མཐིང་གསལ་འོད་ཀྱི་ཀློང༔ ཐུགས་ཀྱི་དཔའ་བོ་རྣལ་འབྱོར་བརྒྱད༔ ཀུན་ཀྱང་ཧེ་རུ་ཀ་ཡི་ཆས༔ ཁྲོ་གཏུམ་མདོག་སྔོ་བཞེངས་སྟབས་ཀྱིས༔ རྡོ་རྗེ་དྲིལ་འཛིན་ཡུམ་དང་སྦྱོར༔ དེའི་ཕྱིར་དམར་གསལ་འོད་ཀྱི་ཀློང༔ གསུང་གི་དཔའ་བོ་རྣལ་འབྱོར་བརྒྱད༔ ཆགས་ཉམས་སྒེག་འཛུམ་བཞེངས་སྟབས་ཅན༔ པདྨ་དྲིལ་འཛིན་ཡུམ་དང་སྦྱོར༔ དེའི་ཕྱིར་དཀར་གསལ་འོད་ཀྱི་ཀློང༔ སྐུ་ཡི་དཔའ་བོ་རྣལ་འབྱོར་བརྒྱད༔ བདེ་ཆེན་གཟི་འབར་འོད་ཟེར་དང༔ དྲིལ་འཛིན་ཡུམ་སྦྱོར་བཞེངས་སྟབས་ཅན༔ དེའི་ཕྱིར་ལས་བཞིའི་སྒོ་མ་ནི༔ དཀར་སེར་དམར་ལྗང་མཁའ་འགྲོ་མ༔ གྲི་གུག་ཐོད་ཁྲག་འཛིན་པ་བཞི༔ བརྐྱང་བསྐུམ་ཞལ་ཕྱིར་བསྟན་པས་བཞེངས༔ ཀུན་ཀྱང་པདྨ་ཟླ་བའི་སྟེང༔ སྣང་སྟོང་སྒྱུ་འཕྲུལ་དྲྭ་བ་ཡི༔ བཀོད་པ་ཆེན་པོ་ལྷུན་གྱིས་གྲུབ༔ འབུམ་ཕྲག་དཔའ་བོ་ཌཱ་ཀི་མས༔ རྡོ་རྗེའི་གླུ་གར་བཅས་ཏེ་བཞུགས༔ སྣ་ཚོགས་འོད་ཟེར་སྤྲོ་བསྡུ་ཡིས༔ ཚར་གཅོད་རྗེས་འཛིན་ཕྲིན་ལས་སྟོན༔ ཡེ་ཤེས་སྤྱན་འདྲེན་ཕྲིན་ལས་ཆིངས༔ རྩ་བའི་སྒྲུབ་ཐབས་བཞིན་སྦྱར་ཞིང༔ བསྙེན་སྒྲུབ་ལས་ཀྱི་བཟླས་པ་ནི༔ བདག་ཉིད་རྣལ་འབྱོར་དབང་ཕྱུག་གི༔ ཐུགས་ཀར་རཏྣ་ཐོད་ཕྲེང་རྩལ༔ གསེར་མདོག་རིན་ཆེན་དྲིལ་བུ་བསྣམས༔ དར་སེར་བེར་དང་རིན་ཆེན་རྒྱན༔ ཕྱེད་སྐྱིལ་རཏྣ་ཌཱ་ཀི་སྦྱོར༔ ཐུགས་དབུས་རིན་ཆེན་ཟུར་བརྒྱད་པའི༔ ལྟེ་བར་ཉི་ཟླའི་གྭའུའི་དབུས༔ ཏྲཱཾ་ལ་སྔགས་ཀྱི་ཕྲེང་བས་བསྐོར༔ ཡེ་ཤེས་གཟི་འབར་སེམས་གཏད་དེ༔ ཨོཾ་ཨཱཿཧཱུྃ་བཛྲ་གུ་རུ་སཱུརྻ་རསྨི་སརྦ་སིདྡྷི་ཧཱུྃ༔ འབུམ་ཕྲག་བཞི་བཟླས་དངོས་གྲུབ་ཐོབ༔ གཉིས་པ་སྒྲུབ་པའི་དམིགས་བཟླས་ནི༔ ཐུགས་ཀའི་འོད་ཀྱིས་འཁོར་རྣམས་བསྐུལ༔ རྩ་གསུམ་རྒྱལ་བ་རབ་འབྱམས་ཀུན༔ སྐུ་སྔགས་ཕྱག་མཚན་རྣམ་པ་རུ༔ ཆར་ལྟར་བབ་ནས་གཉིས་མེད་བསྟིམ༔ ཐུགས་རྗེའི་ཤུགས་བསྐྱེད་སྔགས་སྒྲ་སྒྲོགས༔ ཀུན་ཀྱང་རྡོ་རྗེའི་གར་བསྒྱུར་བས༔ སྣོད་བཅུད་ཀུན་གཡོས་སྣང་གྲགས་རིག༔ ལྷ་སྔགས་ཡེ་ཤེས་རོལ་པར་སད༔ ཨོཾ་ཨཱཿཧཱུྃ་བཛྲ་གུ་རུ་སཱུརྻ་རསྨི་ཌཱ་ཀ་ཌཱ་ཀི་ནི་སརྦ་སིདྡྷི་ཕ་ལ་ཧཱུྃ༔ འབུམ་བཞི་བཟླས་པས་རྟགས་མཚན་འབྱུང༔ གསུམ་པ་ལས་ལ་སྦྱར་བ་ནི༔ གཙོ་འཁོར་ཀུན་གྱིས་འོད་ཀྱི་ཕྲེང༔ ལས་བཞིའི་མདོག་སྤྲོས་ཞི་རྒྱས་དབང༔ དྲག་པོའི་ཕྲིན་ལས་ཐོགས་མེད་པའི༔ ཕོ་ཉས་འཇིག་རྟེན་ཀུན་གང་སྟེ༔ ཚར་གཅོད་རྗེས་འཛིན་མཐར་ཕྱིན་བསམ༔ སྒྲུབ་པའི་སྔགས་ལ་ཤམ་འདི་གདགས༔ ཤཱནྟིཾ་པུཥྚིཾ་ཝཱ་ཤཾ་མཱ་ར་ཡ་ཕཊ༔ ཁྲི་ཕྲག་གིས་ཀྱང་རྟགས་མཐོང་འགྱུར༔ ས་མ་ཡ༔ ཉམས་ལེན་རྩ་བ་དབང་བསྐུར་ཏེ༔ དཀྱིལ་འཁོར་གཞུང་མཐུན་བུམ་པ་དང༔ གསང་ཐོད་ཕྱག་རྒྱ་མེ་ལོང་ཤེལ༔ གཏོར་མ་བཤམས་ལ་ལས་གཞུང་བསྲང༔ བསྙེན་སྒྲུབ་ལས་ཀྱི་བཟླས་པའི་རྗེས༔ འོད་ཟེར་ཆུ་རྒྱུན་གཅིག་མའི་དབང༔ ནོད་ལ་གནང་ཞུ་སྔོན་འགྲོ་བས༔ སྣོད་ལྡན་སློབ་མ་རྗེས་སུ་འཛིན༔ རྡོ་རྗེ་འཛིན་པ་དགོངས་སུ་གསོལ༔ རིགས་ཀུན་དབང་བསྒྱུར་སློབ་དཔོན་གྱིས༔ རྡོ་རྗེ་བཞི་ཡི་དཀྱིལ་འཁོར་ཆེར༔ འཇུག་པའི་སྐལ་བཟང་མངོན་གྱུར་མཛོད༔ སྐྱབས་སེམས་ཚོགས་བསགས་སྡོམ་པ་གཟུང༔ སློབ་མ་ལྷར་བསྐྱེད་བྱིན་དབབ་བརྟན༔ ཧྲཱིཿ ཆོས་དབྱིངས་བུམ་པའི་གཞལ་ཡས་སུ༔ རིག་པ་རང་བྱུང་ལྷ་ཚོགས་བཞུགས༔ གཉིས་མེད་ཡེ་ཤེས་བདུད་རྩིའི་ཆུས༔ སྐལ་ལྡན་བུ་ལ་དབང་བསྐུར་རོ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ༔ ཨཱཿ མཚན་ལྡན་རྡོ་རྗེའི་ཀ་པཱ་ལར༔ ལྷག་པའི་བྱང་ཆུབ་སེམས་ཀྱི་སྤྲིན༔ སངས་རྒྱས་འདུས་པའི་བདུད་རྩི་མྱོང༔ ཡེ་ཤེས་ཆེན་པོའི་དོན་རྟོགས་ཤོག༔ གུ་ཧྱ་ཨ་བྷི་ཥིཉྩ་ཨཱཿ ཧོ༔ གསང་བ་མཆོག་གི་དགྱེས་པ་ན༔ བདེ་ཆེན་ཡེ་ཤེས་མཆོག་གི་དོན༔ སྟེར་བའི་ཕོ་ཉ་འདི་གཏད་པས༔ རོལ་ཅིག་རྟོག་པ་བྲལ་བས་སྤྱོད༔ མ་ཧཱ་མུ་དྲ་པཱུ་ཛ་ཧོ༔ ཨ༔ ཀུན་ཁྱབ་ཡེ་ཤེས་ཆེན་པོའི་མཆོག༔ རང་ལ་གནས་པའི་རང་ངོ་ལྟོས༔ སངས་རྒྱས་གཞན་དུ་མ་ཚོལ་ན༔ གཉུག་མ་བདེ་ཆེན་དོན་རྟོགས་འགྱུར༔ དྷརྨ་དྷཱ་ཏུ་ཨ་ཏི་ཧོ༔ ཧཱུྃ༔ བདེ་སྟོང་བྷཉྫའི་གཞལ་ཡས་སུ༔ རྩ་གསུམ་ལྷ་ཚོགས་རབ་འབྱམས་ཀུན༔ དམ་རྫས་གཏོར་མའི་ཚུལ་བཞུགས་པས༔ དབང་བསྐུར་རྡོ་རྗེའི་དངོས་གྲུབ་སྩོལ༔ ཀཱ་ཡ་ཝཱཀ་ཙིཏྟ་ཛྙཱ་ན་ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿ དམ་ཚིག་ཁས་བླང་ཡོན་འབུལ་སོགས༔ རྗེས་ཀྱི་ལས་རིམ་སྤྱི་ལྟར་བྱ༔ འདིས་ནི་ལམ་ཀུན་སྒོམ་ལ་དབང༔ ཡེ་ཤེས་མཆོག་ཀྱང་ངེས་པར་འགྲུབ༔ གསང་བ་ཆེན་པོའི་གནད་ཀྱི་བཅུད༔ རྡོ་རྗེ་ཐེག་པའི་ཁྱད་ཆོས་སོ༔ ས་མ་ཡ༔ ཕྲིན་ལས་མཐའ་རྒྱས་རིམ་པ་ལ༔ སྣོད་ཀུན་རྡོ་རྗེའི་ཞིང་ཁམས་སུ༔ བྱིན་གྱིས་བརླབ་པའི་རིམ་པ་ནི༔ རི་མཐོ་ས་གཙང་དཔྱད་ལེགས་པར༔ རྟེན་མཁར་གྲུ་བཞིར་དཀྱིལ་འཁོར་བཀོད༔ རིག་འཛིན་བླ་མའི་མཚན་སྔགས་དང༔ རྩ་གསུམ་སྲོག་འཁོར་རིན་ཆེན་ཤེལ༔ སྨན་འབྲུ་དྲི་བཟང་དར་ཟབ་དང༔ འབྱུང་བཅུད་ཉེར་ལྔའི་རྫས་ཀྱིས་གཏམས༔ རིན་ཆེན་བུམ་པར་སྐུ་ཡང་གཞུག༔ ཕྲིན་ལས་གཞུང་བསྲང་བསྐྱེད་རིམ་བྱ༔ ཁྱད་པར་དམིགས་པའི་གནད་བྱང་ནི༔ མདུན་གྱི་རྟེན་མཆོག་དཀྱིལ་འཁོར་ལྷའི༔ འོད་ཀྱིས་ཕྱི་སྣོད་འབྱུང་ལྔའི་དལ༔ དབྱིངས་ཕྱུག་ཡུམ་ལྔའི་རང་བཞིན་དུ༔ དག་པའི་བདེ་ཆེན་རྡོ་རྗེའི་ཞིང༔ རྡུལ་ཕྲན་རེར་ཡང་སངས་རྒྱས་ཀྱི༔ ཞིང་གི་བཀོད་པ་བློ་ལས་འདས༔ སྟོན་པ་འཁོར་དང་བཅས་པ་ཡིས༔ ཆོས་སྟོན་རྫུ་འཕྲུལ་འོད་ཟེར་འགྱེད༔ རྡོ་རྗེའི་རིག་འཛིན་ཕོ་མོ་ཡིས༔ ས་ལམ་སྦྱོང་ཞིང་གསང་བ་སྤྱོད༔ མཐོང་ཐོས་དྲན་ཀུན་ཟག་མེད་ཀྱི༔ དགོངས་པས་འཁོར་བ་དོང་སྤྲུགས་བསམ༔ སྒྲུབ་པའི་སྔགས་ལ་ཤམ་འདི་གདགས༔ བཛྲ་སྠ་ན་མ་ཧཱ་སུ་ཁ་མཎྜལ་ཛྙཱ་ན་དྷཱ་ཏུ་པུཥྚིཾ་ཀུ་རུ་ཧོ༔ ཞེས་སྦྱར་ཐུན་མཚམས་བྱིན་ཆེན་དབབ༔ སྣོད་བཅུད་ཁྲུས་དང་རབ་གནས་བྱ༔ ཚོགས་ཀྱི་འཁོར་ལོས་དགྱེས་བསྐྱེད་བྱ༔ གང་དུ་བྱིན་རླབས་གནས་ཀྱི་ཁྱོན༔ གདོད་ནས་གྲུབ་དང་མཉམ་པར་རོལ༔ སྤྲོས་བཅས་ཏིང་འཛིན་འཕྲོ་འདུ་ཡིས༔ གངས་བྲག་ལྷུན་སྟུག་རི་དང་མཚོ༔ རྡོ་རྗེའི་ཞིང་དུ་བསྒྱུར་བ་ཡི༔ དམིགས་བཟླས་བྱིན་ཆེན་དབབ་པ་ལས༔ ངེས་པར་དོན་དང་ལྡན་འགྱུར་རོ༔ ས་མ་ཡ༔  བཅུད་ཀྱི་སེམས་ཅན་དགེ་བ་ལ༔ འདུན་པའི་དམིགས་བཟླས་ཟབ་མོ་ནི༔ བདག་ཉིད་ཉི་མ་འོད་ཟེར་གྱི༔ ཐུགས་བསྐྱེད་བྱང་ཆུབ་སེམས་ཆེན་པོ༔ འོད་ཟེར་ཉི་མ་འབུམ་བཞིན་སྤྲོས༔ ལྷ་འདྲེ་མི་གསུམ་ལ་རེག་པས༔ དུག་ལྔའི་རྒྱུ་འབྲས་ཀུན་སྦྱངས་ཏེ༔ ལྷན་སྐྱེས་རིགས་ཀྱི་ནུས་པ་སད༔ སྟོང་ཉིད་སྙིང་རྗེ་ཟུང་འཇུག་པའི༔ ཡེ་ཤེས་ཆེན་པོའི་རྩལ་རྒྱས་ཏེ༔ དག་པའི་ཞིང་གི་སེམས་དཔའ་བཞིན༔ དགྲ་གཉེན་ཆགས་སྡང་འདུ་ཤེས་བྲལ༔ ཕན་ཚུན་ཕ་མ་ལྟ་བུ་ཡིས༔ ཆོས་བཞིན་སྤྱོད་པས་དུས་འདའ་བསམ༔ སྒྲུབ་སྔགས་ཤམ་དུ་འདི་ཡང་གདགས༔ སརྦ་སཏྭ་བྷོ་དྷི་ཙིཏྟ་ཀུ་རུ་ཨོཾ༔ བྱམས་དང་སྙིང་རྗེའི་སྟོབས་ལྡན་པས༔ འདི་སྤྱོད་འབྲེལ་ཚད་དོན་ལྡན་འགྱུར༔ ས་མ་ཡ༔ རྒྱུད་ཀྱི་དུག་ལྔ་སྦྱང་བའི་ཕྱིར༔ རྣམ་རྟོག་འཁྲུལ་པའི་སྣང་ངོ་རུ༔ འཆིང་བྱེད་འཁོར་བའི་ས་བོན་ཉིད༔ དཔྱད་ན་ཐག་ཁྲར་སྦྲུལ་སྣང་གིས༔ འཇིགས་དངངས་སྐྱེས་དང་མཚུངས་པ་སྟེ༔ དོན་གྱི་དབྱིངས་ལ་སྒྲིབ་བསལ་མེད༔ ཡེ་ཤེས་ཆོས་སྐུ་ཐིག་ལེ་གཅིག༔ རྩལ་སྣང་ཐོད་ཕྲེང་རིགས་ལྔ་ཡི༔ ཡེ་ཤེས་ཆེན་པོར་ལྷུན་གྲུབ་ཕྱིར༔ རང་བྱུང་རྡོ་རྗེའི་ཐབས་ཆེན་པོས༔ ཟིན་པས་གསེར་སྦྱངས་གཡའ་དག་བཞིན༔ ངེས་པའི་ལྟ་བའི་གདེང་བསྐྱེད་དེ༔ འགྲོ་རྒྱུད་དུག་ལྔའི་བྱ་སྤྱོད་ཀུན༔ གུ་རུ་རིགས་ལྔའི་ཡེ་ཤེས་ཕྱིར༔ མཁའ་ལ་ཁུ་ཚུར་གྱིས་བརྡེག་བཞིན༔ ཀུན་འབྱུང་འཁྲུལ་པས་ཕན་གནོད་མེད༔ དུག་ལྔ་ཡེ་ཤེས་ཆེན་པོ་རུ༔ དག་པའི་མ་ཧཱ་གུ་རུ་ལྔས༔ ཐབས་དང་ཐུགས་རྗེ་རྨད་བྱུང་གི༔ མཛད་པ་བསམ་མི་ཁྱབ་པར་སྟོན༔ ཚར་གཅོད་རྗེས་འཛིན་དུ་ཤེས་པས༔ དག་མཉམ་ཆོས་སྐུའི་དགོངས་པ་སྐྱོངས༔ རྩལ་སྦྱངས་མཁའ་ཁྱབ་ཕྲིན་ལས་ཀྱི༔ སྣང་བ་ཤེས་པས་ཐམས་ཅད་ཀུན༔ ལྷ་དང་བླ་མར་ངོ་ཤེས་ན༔ གདུལ་བྱ་འདུལ་བྱེད་གཉིས་སུ་མེད༔ བར་སྣང་འཇའ་ཚོན་གྱིས་བཀྲ་ཡང༔ ནམ་མཁའི་དབྱིངས་ལ་འདུ་འགོད་བྲལ༔ སྒོ་གསུམ་བྱ་བྱེད་ཐམས་ཅད་པ༔ ཡེ་ཤེས་རྒྱན་གྱི་རོལ་པ་སྟེ༔ ཕྱི་ནང་གཞན་གསུམ་གཉིས་མེད་པའི༔ བདེ་བ་ཆེན་པོའི་དཀྱིལ་འཁོར་དུ༔ གདོད་ནས་ལྷུན་གྱིས་གྲུབ་པའོ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཕྱི་རུ་མེ་རླུང་འཕྲུལ་འཁོར་གྱིས། །མཁའ་དབྱིངས་ཅི་དགར་བགྲོད་པའི་ཚེ། །ནང་དུ་རིག་རྩལ་རླུང་གཡོས་པའི། །ཡི་གེ་ཤོག་གུར་ཕབ་པའི་རྐྱེན། །སངས་རྒྱས་པྃདྨྃའི་བསྟན་ལ་གུས། །དབྃང་གིས་རྒྱུད་སྨིན་དད་དམ་གཙང༌། །ཐེག་མཆོག་རྒྱལྃ་ཐབས་སྐྱོང་བའི་བུས། །བསྐུལ་བ་དོན་ཡོད་བྱ་ཕྱིར་བྲིས། །རིག་རྩལ་བརྟུལ་ཞུགས་སྤྱོད་པ་ཡིས། །ནང་གི་གྲུབ་པ་ཆེ་བརྙེས་པས། །ཚོགས་བརྒྱད་བསྒྲལ་བའི་དུར་ཁྲོད་དུ། །ཡེ་ཤེས་རྩལ་ཆེན་རྫོགས་རྒྱུར་ཤོག །དེ་སྐད་ཁྲག་འཐུང་པདྨའི་འབངས། །གར་དབང་མདོ་སྔགས་གླིང་པ་ཡིས། །ལྷོ་ཕྱོགས་ནམ་མཁའི་ཁོར་ཡུག་ཏུ། །སྟན་ཐོག་གཅིག་ཏུ་བྲིས་པ་དགེ།།  །།}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:DKR-KABUM-Volume-17-TSA]]
[[Category:Khyentse Lineage Project]]