View source for JKCL-KABUM-07-JA-033

{{Khyentse Metadata
|classification=Tibetan Publications
|subclass=Tibetan Texts
|fulltitletib=ཐུགས་ཆེན་ཚེམ་བུ་ལུགས་ཀྱིས་གཤིན་པོ་ལ་ཕན་གདགས་པ་རུས་སྦྱང་དང་སཱཙྪ་སྒྲུབ་པའི་ཆོ་གའི་ཟིན་བྲིས།
|fulltitle=thugs chen tshem bu lugs kyis gshin po la phan gdags pa rus sbyang dang sAts+tsha sgrub pa'i cho ga'i zin bris
|citation=[['jam dbyangs mkhyen brtse chos kyi blo gros]]. ''thugs chen tshem bu lugs kyis gshin po la phan gdags pa rus sbyang dang sAts+tsha sgrub pa'i cho ga'i zin bris''. In ''Rdzong sar mkhyen brtse 'jam dbyangs chos kyi blo gros kyi gsung 'bum'', Vol. 7: 571-573. Bir, H.P.: Khyentse Labrang, 2012.
|collectiontitletib=ཆོས་ཀྱི་བློ་གྲོས་བཀའ་འབུམ་
|collectiontitle=chos kyi blo gros bka' 'bum
|author='jam dbyangs mkhyen brtse chos kyi blo gros
|authortib=འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
|associatedpeople=tshem bu pa dar ma 'od zer
|associatedpeopletib=ཚེམ་བུ་པ་དར་མ་འོད་ཟེར་
|tibgenre=Funerary Rituals - gnas lung - byang chog, Notes - zin bris
|terma=No
|jkcloutline=Six
|deity=thugs rje chen po
|cycle=thugs chen dmar khrid tshem bu lugs
|cycletib=ཐུགས་ཆེན་དམར་ཁྲིད་ཚེམ་བུ་ལུགས་
|language=Tibetan
|volumenumber=007
|volnumtib=༧
|volyigtib=ཇ་
|totalvolumes=12
|textnuminvol=033
|pagenumbers=571-573
|totalpages=3
|beginfolioline=1a1
|endfolioline=2a6
|totalfolios=2
|multivolumework=No
|colophontib=།ཅེས་པའང་སྡེ་དགེའི་རྒྱལ་ཁབ་ཆེན་པོའི་ནུབ་བླ་མ་ཀུན་བཟང་ཆོས་འཕེལ་གྱི་གསུང་ངོར།  ཆོས་ཀྱི་བློ་གྲོས་པས་ཟིན་བྲིས་སུ་བཏབ་པའོ།  །མངྒ་ལཾ།།
|colophonwylie=/ces pa'ang sde dge'i rgyal khab chen po'i nub bla ma kun bzang chos 'phel gyi gsung ngor/__chos kyi blo gros pas zin bris su btab pa'o/__/mang+ga laM//
|pdflink=File:JKCL-KABUM-07-JA-033.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|ཐུགས་ཆེན་ཚེམ་བུ་ལུགས་ཀྱིས་གཤིན་པོ་ལ་ཕན་གདགས་པ་རུས་སྦྱང་དང་སཱཙྪ་སྒྲུབ་པའི་ཆོ་གའི་ཟིན་བྲིས་བཞུགས་སོ།  །ན་མོ་ལོ་ཀི་ཤྭ་རཱ་ཡ།  འཕགས་མཆོག་ཐུགས་རྗེ་ཆེན་པོ་ཚེམ་བུ་ལུགས་ཀྱི་རུས་སྦྱོང་དང་སཱཙྪ་སྒྲུབ་པར་སྤྲོ་ན་བསྙེན་པ་སྔོན་དུ་སོང་བས་ཆོ་གའི་ཁོག་ཞུ་ཆེན་པཎྜི་ཏའི་ཀུན་རིག་གི་རུས་སྦྱོང་ཚྭ་སྒྲུབ་ཨུཏྤལ་མགུལ་རྒྱན་གྱི་གཞུང་ལྟར་ལ་ལྷ་སྔགས་ཁ་བསྒྱུར་ཚུལ་ནི།  མཆོད་བ་ཉེར་སྤྱོད་དང་།  བུམ་པ་བཅུད་ལྡན་དུང་ཆོས་གཟུངས་རྡོར་རང་གི་མདུན་དུ་བཤམས།  རྡོར་དྲིལ་སོགས་འདུ་བྱས་ཏེ།  བདག་བསྐྱེད་རྗེ་མཁྱེན་བརྩེའི་གསུང་ཕན་བདེའི་མྱུར་ལམ་ལྟར་མཆོད་པ་བྱིན་རླབས་ནས་བརྩམས།  གདན་འོད་ཟེར་གྱི་རྣམ་པར་གྱུར་ནས་རང་ལ་ཐིམ་པར་གྱུར།  ཞེས་པའི་བར་གྱི་བསྒོམ་བཟླས་གྲུབ་ནས།  བུམ་སྒྲུབ་ལྷ་བསྐྱེད་ཆོག  །མཆོད་བསྟོད་བཟླས་པ་དང་།  བུམ་པའི་རྗེས་ཆོག་བཟླས་པའི་མཐར།  གཏོར་འབུལ་ཀྱང་སྤྲོ་ན་བྱ་ཞིང་།  ཡིག་བརྒྱ་ནོངས་བཤགས།  བུམ་ལྷ་འོད་ཞུ་བྱེད།  དེ་ཡང་ཡིག་དྲུག་འབུམ་ཕྲག་གཅིག་འགྲོ་ངེས་དང་།  ཐུན་གཤམ་དུ་ཞལ་བཅུ་གཅིག་པའི་གཟུངས་རིང་ཡང་ཅི་ནུས་དང་།  ཨོཾ་བཛྲ་ཨུ་ད་ཀ་དང་།  ཁྲུས་སྔགས་ཀྱང་ཅུང་ཟད་བཟླ།  རུས་བུ་རྣམས་རིན་པོ་ཆེའི་སྣོད་དུ་བཞག  །རུས་བུའི་སྟེང་དུ་སོགས་བྱུང་ཞིང་དག་པར་བསམ་ལ་བུམ་པའི་ཆུས་ཡིག་དྲུག་དང་།  གཟུངས་རིང་།  མི་འཁྲུགས་གཟུངས་དང་།  ངན་སོང་སྦྱོང་སྔགས།  ཡིག་བརྒྱ་རྣམས་དང་།  ཨོཾ་བཛྲ་པྲ་མརྡྷ་ན་པྲ་མརྡྷ་ནཱ་ཡ་སྭཱ་ཧཱ་སོགས་བཟླ་བཞིན་བཀྲུ།  རྒྱས་པར་ཕར་ཕྱིན་དྲུག་སོགས་ཚིགས་བཅད་རྣམས་སྤེལ་ན་ལེགས་ཤིང་།  གང་སེར་མའི་ཤིས་བརྗོད་ཀྱང་བྱ།  ཞག་གིས་ཆོད་ན།  བདག་བསྐྱེད་མཇུག་གི་བྱ་བ་བསྔོ་སྨོན་ཤིས་བརྗོད་བཅས།  དེ་ནས་རུས་པ་ཞིབ་མོར་འདུར་བ་སོགས་སཱཙྪའི་སྒྲུབ་གཞུང་བཞིན་ལ།  རྩ་རིག་གི་མལ་དུ་ཡིག་དྲུག་དང་ཞལ་བཅུ་གཅིག་པའི་གཟུངས་རིང་བཀོད།  །སྔགས་ཡིག་དྲུག་ཁོ་ན་དང་།  གཟུངས་རིང་ཁ་ཤས་མཐར།  ཚེ་ལས་འདས་པའི་སྡིག་པ་ཐམས་ཅད་ཤཱནྟིཾ་ཀུ་རུ་སྭཱ་ཧཱ།  ཞེས་བརྗོད་པས་བྱིན་གྱིས་བརླབས།  ཚྭ་གཟུངས་མ་ཎི་དང་གཟུངས་རིང་མཐར།  སྭཱ་ཧཱའི་གོང་ཚེ་འདས་ཀྱི་མིང་སྤེལ་ཤམ་ཅན་བྲིས་པ་ཅན་འབུལ།  ཡིག་དྲུག་བཟླ་བཞིན་བཏབ།  དངོས་གཞིའི་སྐབས་བུམ་པ་གཅིག་གིས་ཆོག  །བདག་བསྐྱེད་གྲུབ་ནས།  ཐུགས་རྗེ་ཆེན་པོའི་བུམ་སྒྲུབ་དཀྱུས་ལྟར།  སྦྱོང་བ་ནས་བརྩམས་རབ་གནས་ཚྭ་སྒྲུབ་གཞུང་ལྟར།  བདེན་བརྡར་གྱི།  རྡོ་རྗེ་སེམས་དཔའི་བདེན་པ་དང་།  ཞེས་པ།  བཅོམ་ལྡན་འདས་འཕགས་མཆོག་ཐུགས་རྗེ་ཆེན་པོའི་བདེན་པ་དང་ཞེས་བསྒྱུར།  རྟེན་བསྐྱེད།  ཨོཾ་བཛྲ་ཨ་མྲྀ་ཏ་སོགས་ཀྱིས་བསངས།  སྭཱ་བྷཱ་ཝས་སྦྱངས།  སྟོང་པའི་ངང་ལས་སོགས།  བུམ་པའི་ནང་དུ་པཱྃ་ལས་པདྨ་དང་།  ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧྲཱིཿདཀར་པོ་སོགས་ཐུགས་ཆེན་མདུན་བསྐྱེད་ལྟར།  སྤྱི་བོའི་བླ་མ་ལ་ཐིམ་པས་བླ་མ་ཀུན་འདུས་སུ་གྱུར།  བར་བརྗོད།  དེ་ནས་ལྷ་ལ་དམིགས་ཏེ་ཡིག་དྲུག་བཟླ།  དེའང་སཱཙྪའི་བུམ་པ་རེ་རེའི་ནང་ཐུགས་རྗེ་ཆེན་པོ་རིགས་བདག་བཅས་བཞུགས་པ་དང་།  རང་ཐུགས་རྗེ་ཆེན་པོ་རིགས་བདག་བླ་མ་འོད་དཔག་མེད་བཅས་ཀྱི་ཞལ་ནས་སྔགས་བཟླས་པས་དམིགས་ཡུལ་གྱིས་ཐོག་དྲངས་པའི་སེམས་ཅན་ཐམས་ཅད་ཀྱི་སྡིག་སྒྲིབ་སྦྱོང་དུ་གསོལ་སྙམ་པས་ཐུགས་རྒྱུད་བསྐུལ་བས་སཱཙྪར་བསྐྱེད་པའི་ལྷ་ཡི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿདཀར་པོའི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས།  སོགས་ནས་གསང་སྔགས་ཀུན་འདུས་སུ་གྱུར།  སླར་ཡང་།  རང་གི་སྙིང་ག་ནས་སྔགས་ཀྱི་ཕྲེང་བ་མདུན་གྱི་ལྷ་ཡི་ཐུགས་ཀར་ཕོག་པས།  སོགས་ཐུགས་ཆེན་རིལ་སྒྲུབ་ཀྱི་བཟླས་དམིགས་མཐར།  འབར་བར་གྱུར།  སླར་ཡང་འོད་ཟེར་འཕྲོས་པས་དམིགས་ཡུལ་གྱི་གཙོར་བྱས་པའི་སེམས་ཅན་ཐམས་ཅད་ཀྱི་སྡིག་སྒྲིབ་སྦྱོང་བའི་ཕྲིན་ལས་མཛད་པར་བསམ་ལ་ཡིག་དྲུག་ཁོ་ན་དང་།  ཐུན་གཤམ་གཟུངས་རིང་ཅུང་ཟད་རེ་བཟླ།  ཐུན་བསྡུ་བ་ན་འདོད་གསོལ་དང་ཐུགས་རྗེ་ཆེན་པོའི་གཞུང་ལྟར་ཕྱག་འཚལ་དང་།  མཆོད་པ་བྱིན་རླབས།  སོགས་ནས།  བྱང་ཆུབ་ཕྱིར་བསྔོའོ་བར་འདོན།  གཏོར་འབུལ་ཐུགས་ཆེན་སྒྲུབ་ཐབས་གཞུང་ལྟར།  མཆོད་རྟེན་ལྷ་དང་བཅས་པ་ཞུ་བ་ལས་སཱཙྪའི་རྣམ་པ་ཇི་ལྟ་བ་བཞིན་དུ་གྱུར།  སླར་ཡང་མཆོད་པ་ཁ་གསོ།  བྱིན་རླབས་སོགས་ཚྭ་སྒྲུབ་གཞུང་ལྟར་བྱའོ།  །དེ་ལྟ་བུའི་སྒོ་ནས་ཡིག་དྲུག་འབུམ་ཕྲག་གཉིས་བཟླ།  བདག་བསྐྱེད་རྗེས་ཀྱི་བསྔོ་སྨོན་ཤིས་བརྗོད་བྱས་པས་གྲུབ་བོ།  །ཚོགས་མང་ལྟ་བུས་རུས་སྦྱོང་ཚྭ་སྒྲུབ་ཉིན་གཅིག་ལ་གྲུབ་པར་བྱས་ན།  བདག་བསྐྱེད།  བུམ་བསྐྱེད་ཚར་རེས་ཆོག  །རྒྱས་པར་བྱང་ཆོག་དང་སྦྲེལ་ནས་རུས་བུ་བཀྲུ་བ་སོགས་བྱས་ཀྱང་ལེགས་པར་འགྱུར་རོ།  །ཅེས་པའང་སྡེ་དགེའི་རྒྱལ་ཁབ་ཆེན་པོའི་ནུབ་བླ་མ་ཀུན་བཟང་ཆོས་འཕེལ་གྱི་གསུང་ངོར།  ཆོས་ཀྱི་བློ་གྲོས་པས་ཟིན་བྲིས་སུ་བཏབ་པའོ།  །མངྒ་ལཾ།།   །།}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKCL-KABUM-Volume-07-JA]]
[[Category:Khyentse Lineage Project]]