View source for JKW-KABUM-15-BA-006-001

{{Khyentse Metadata
|classification=Tibetan Publications
|subclass=Tibetan Texts
|fulltitletib=བླ་མའི་ཐུགས་སྒྲུབ་བར་ཆད་ཀུན་སེལ་ལས༔  རིགས་བདག་རྡོ་རྗེ་སེམས་དཔའི་གསང་སྔགས་ཐོས་པས་གྲོལ་བ།
|fulltitle=bla ma'i thugs sgrub bar chad kun sel las: rigs bdag rdo rje sems dpa'i gsang sngags thos pas grol ba
|fulltitlekar=thugs sgrub rdor sems gsang sngags thos grol
|fulltitlekartib=ཐུགས་སྒྲུབ་རྡོར་སེམས་གསང་སྔགས་ཐོས་གྲོལ།
|citation=[['jam dbyangs mkhyen brtse'i dbang po]]. ''bla ma'i thugs sgrub bar chad kun sel las rigs bdag rdo rje sems dpa'i gsang sngags thos pas grol ba''. In '''jam dbyangs mkhyen brtse'i dbang po'i bka' 'bum'', Vol. 15: 127-133. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|sourcerevealer=mchog gyur gling pa
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|sourcerevealertib=མཆོག་གྱུར་གླིང་པ་
|editortib=
|tibgenre=Activity Practices - las tshogs
|terma=Yes
|sabcadcategory=Five
|deity=rdo rje sems dpa'
|cycle=bla ma'i thugs sgrub bar chad kun sel
|cycletib=བླ་མའི་ཐུགས་སྒྲུབ་བར་ཆད་ཀུན་
|language=Tibetan
|rtzlink=Terdzo-NI-034
|volumenumber=015
|volnumtib=༡༥
|volyigtib=བ་
|totalvolumes=25
|textnuminvol=006
|textsubnumber=001
|pagenumbers=127-133
|totalpages=7
|beginfolioline=1a
|endfolioline=4a4
|totalfolios=4
|multivolumework=No
|rectonotes=sde tshan 6
|versonotes=mkhyen brtse'i bka' 'bum
|colophontib=ཞེས་པའང་རང་གཞན་ཀུན་ལ་སྨན་པའི་བསམ་པས་གཏེར་གཞུང་རྩ་བ་ལས་ཟུར་དུ་ཁྱེར་བདེ་བར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཕྱུང་བ་སྟེ།  དགེ་བས་མཐའ་ཡས་སེམས་ཅན་ཐམས་ཅད་དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཆེན་པོའི་གོ་འཕང་ཚེ་འདི་ཉིད་ལ་མངོན་དུ་བྱེད་པའི་རྒྱུར་གྱུར་ཅིག
|colophonwylie=zhes pa'ang rang gzhan kun la sman pa'i bsam pas gter gzhung rtsa ba las zur du khyer bde bar mtsho skyes bla ma dgyes pa'i 'bangs mkhyen brtse'i dbang pos phyung ba ste/__dge bas mtha' yas sems can thams cad dpal rdo rje sems dpa' sgyu 'phrul drwa ba chen po'i go 'phang tshe 'di nyid la mngon du byed pa'i rgyur gyur cig
|pdflink=File:JKW-KABUM-15-BA-006.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །བླ་མའི་ཐུགས་སྒྲུབ་བར་ཆད་ཀུན་སེལ་ལས༔  རིགས་བདག་རྡོ་རྗེ་སེམས་དཔའི་གསང་སྔགས་ཐོས་པས་གྲོལ་བ་བཞུགས་སོ།།  །།
ན་མོ་གུ་རུ་བཛྲ་སཏྭ་ཡ།  །འདིར་བླ་མའི་ཐུགས་སྒྲུབ་བར་ཆད་ཀུན་སེལ་ལས།  ཐུགས་རྗེ་ཆེན་པོ་ངན་སོང་དོང་སྤྲུགས་ཀྱི་ཆ་ལག་རིགས་བདག་རྡོ་རྗེ་སེམས་དཔའི་གསང་སྔགས་ཐོས་པས་གྲོལ་བའི་སྒོམ་བཟླས་ལ་འཇུག་པར་འདོད་པས།  ན་མོ༔  བླ་མ་རྡོ་རྗེ་སེམས་དཔའ་དང་༔  མཆོག་གསུམ་རྒྱལ་བ་རྒྱ་མཚོ་ལ༔  བདག་སོགས་འགྲོ་ཀུན་བྱང་ཆུབ་བར༔  རྩེ་གཅིག་གུས་པས་སྐྱབས་སུ་མཆི༔  ཧོ༔  མ་གྱུར་སེམས་ཅན་ཐམས་ཅད་ཀུན༔  སངས་རྒྱས་གོ་འཕང་ཐོབ་བྱའི་ཕྱིར༔  ཉེས་སྤྱོད་ཀུན་སྡོམ་དགེ་ཆོས་སྡུད༔  གཞན་ཕན་བྱང་སེམས་རྟག་ཏུ་བསྐྱེད༔  སེམས་ཅན་བདེ་དང་ལྡན་གྱུར་ཅིག༔  སྡུག་བསྔལ་ཀུན་དང་བྲལ་བར་ཤོག༔  བདེ་དང་རྟག་ཏུ་མི་འབྲལ་ཞིང་༔  ཆོས་ཀུན་མཉམ་ཉིད་རྟོགས་པར་ཤོག༔  ཅེས་སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས།  ཨཱཿ  སྟོང་གསལ་རང་རིག་རྡོ་རྗེ་སེམས༔  འདུས་མ་བྱས་ཤིང་ལྷུན་གྱིས་གྲུབ༔  གདོད་ནས་གྲོལ་བའི་དེ་བཞིན་གཤེགས༔  ཞལ་ཕྱག་མཚན་མའི་སྐུར་བཞེངས་པ༔  བདག་ཉིད་མ་བཅོས་རྩ་བའི་ལྷ༔  དཀར་གསལ་ཞལ་གཅིག་འཛུམ་བཅས་བཞད༔  ཕྱག་གཡས་རིག་སྟོང་རྡོ་རྗེ་དང་༔  གཡོན་པས་སྣང་སྟོང་དྲིལ་བུ་བསྣམས༔  ལོངས་སྤྱོད་རྫོགས་སྐུའི་རྒྱན་གྱིས་བརྒྱན༔  སངས་རྒྱས་རིགས་ལྔའི་དབུ་རྒྱན་ཅན༔  འོད་ཟེར་བསམ་མི་ཁྱབ་པའི་ཀློང་༔  རྡོ་རྗེ་སྐྱིལ་མོ་ཀྲུང་གིས་བཞུགས༔  ཕུང་པོ་སངས་རྒྱས་ལྔ་བདག་ལ༔  འབྱུང་བ་རིགས་ཀྱི་ཡུམ་ཆེན་ལྔ༔  དབང་ཡུལ་སྐྱེ་མཆེད་འཁོར་དང་བཅས༔  བྱང་ཆུབ་སེམས་དཔའ་སེམས་མ་དང་༔  སྤྲུལ་སྐུ་ཁྲོ་བོ་ཁྲོ་མོའི་ཚོགས༔  དབྱེར་མེད་ཉིད་དུ་མངོན་སངས་རྒྱས༔  གནས་གསུམ་རྡོ་རྗེའི་འབྲུ་གསུམ་དང་༔  ཙིཏྟ་རིན་ཆེན་ཟུར་དྲུག་པའི༔  དབུས་སུ་སྐྱེ་མེད་ཨ་དཀར་པོ༔  ཟུར་དྲུག་ཡི་གེ་དྲུག་པ་དང་༔  རང་བྱུང་གསང་བའི་འབྲུ་དྲུག་མཚན༔  དེ་དག་རྣམས་ལ་ཡིད་གཏད་པས༔  སོ་སོའི་སྔགས་ཀྱི་རང་སྒྲ་དང་༔  ཐིག་ལེ་སྟོང་པ་ཡི་གེ་བརྒྱ༔  འགགས་མེད་རྡོ་རྗེའི་སྒྲ་ཡི་དབྱངས༔  ངར་དང་ལྡན་པ་རྡོ་རྗེའི་སྒྲ༔  གསལ་ཞིང་དལ་བ་མཉམ་ཉིད་སྒྲ༔  སྙན་ཅིང་འགྱུར་བ་སོར་རྟོག་སྒྲ༔  ཀུན་ཀྱང་ཐོག་མེད་བྱ་གྲུབ་སྒྲ༔  བརྗིད་ཅིང་ལྷུན་སྟུག་ཆོས་དབྱིངས་སྒྲ༔  བརྗོད་པ་སྤངས་པ་འོད་གསལ་སྒྲ༔  ཡི་གེ་དྲུག་གི་སྒྲར་བཟླས་པས༔  འཇིག་རྟེན་དྲུག་གི་ཕྱོགས་ཀུན་ཁྱབ༔  སོ་སོའི་ཉོན་མོངས་དྲུག་སྦྱངས་ནས༔  རིགས་དྲུག་སེམས་དཔའི་སྐུ་རུ་བསམ༔  བརྟན་པ་དང་ནི་གཡོ་བ་ཡི༔  ས་ཆུ་མེ་རླུང་མཉམ་པའི་སྒྲ༔  ཐམས་ཅད་སྔགས་ཀྱི་རང་སྒྲ་འུར༔  སྣང་སྲིད་གཞིར་བཞེངས་ཕྱག་རྒྱ་དང་༔  ཐོས་ཚད་རང་གྲོལ་རང་བྱུང་སྔགས༔  འཁོར་བ་དོང་སྤྲུགས་དགོངས་པའི་གཟེར༔  མཉམ་ཉིད་མི་གཡོའི་དབྱིངས་སུ་གདབ༔  ཨཱཿ  སྐྱེ་མེད་དོན་གྱི་ཡི་གེ་ནི༔  ཨོཾ་ཨཱཿཧཱུྃ༔  རྡོ་རྗེ་གསུམ་གྱི་ངོ་བོར་ཤར༔  ཨོཾ་བཛྲ་སཏྭ་ཨཱཿ  ཐུགས་རྗེའི་ཆོ་འཕྲུལ་ཡི་གེ་དྲུག༔  འཿཨཿཤཿསཿམཿཧཿ  རང་བྱུང་གསང་བའི་དབྱངས་སུ་ལེན༔  ཨོཾ་བཛྲ་སཏྭ་ས་མ་ཡ༔  མ་ནུ་པཱ་ལ་ཡ༔  བཛྲ་སཏྭ་ཏེ་ནོ་པ༔  ཏིཥྛ་ཌིཌྷོ་མེ་བྷ་ཝ༔  སུ་ཏོཥྱོ་མེ་བྷ་ཝ༔  སུ་པོཥྱོ་མེ་བྷ་བ༔  ཨ་ནུ་རཀྟོ་མེ་བྷ་བ༔  སརྦ་སིདྡྷི་མྨེ་པྲ་ཡཙྪ༔  སརྦ་ཀརྨ་སུ་ཙ་མེ༔  ཙིཏྟཾ་ཤྲེ་ཡ་ཀུ་རུ་ཧཱུྃ༔  ཧ་ཧ་ཧ་ཧ་ཧོ༔  བྷ་ག་ཝཱན་སརྦ་ཏ་ཐཱ་ག་ཏ་བཛྲ་མ་མེ་མུཉྩ༔  བཛྲཱི་བྷ་བ་མ་ཧཱ་ས་མ་ཡ་སཏྭ་ཨ༔  ཐིག་ལེ་སྟོང་པ་ཡི་གེ་བརྒྱ༔  མ་མ་ཀོ་ལིང་ས་མནྟ༔  ཐོས་པས་འཁོར་བ་དོང་སྤྲུགས་པའི༔  སྙིང་པོ་བློ་འདས་ངང་ནས་བཟླས༔  ཞེས་བརྗོད་ཅིང་བསམ་ལ༔  ཨ༔  ཨོཾ་ཨཱཿཧཱུྃ༔  ཨོཾ་བཛྲ་སཏྭ་ཨཱཿ  འཿཨཿཤཿསཿམཿཧཿ  ཨོཾ་བཛྲ་སཏྭ་སོགས་ཡི་གེ་བརྒྱ་པ་དང་༔  མ་མ་ཀོ་ལིང་ས་མནྟ༔  ཞེས་པ་རྣམས་སྦྲེལ་ཏེ་ཅི་ནུས་སྐད་གསང་མཐོན་པོས་བཟླས་མཐར་དབྱངས་གསལ་རྟེན་སྙིང་གི་སྔགས་ཀྱི་ལྷག་ཆད་ཁ་བསྐང་ཞིང་བྱིན་རླབས་བརྟན་པར་བྱས་རྗེས་ཐལ་མོ་སྦྱར་ཏེ།  ཨོཾ༔  རང་བྱུང་འོད་གསལ་ཆོས་ཀྱི་དབྱིངས༔  ཀུན་ཏུ་བཟང་པོ་ཀུན་བདག་ཉིད༔  རྡོ་རྗེ་སེམས་དཔའ་བདེ་བ་ཆེ༔  མི་བསྐྱོད་རྣམ་སྣང་རིན་ཆེན་འབྱུང་༔  དཔག་མེད་དོན་ཡོད་གྲུབ་པ་ཡི༔  བསམ་ཡས་སྒྱུ་འཕྲུལ་དྲྭ་བའི་རིགས༔  ཐམས་ཅད་སྤྲོ་དང་སྡུད་མཛད་པ༔  ཀྱེ་ཀྱེ་དཔལ་ལྡན་རྡོ་རྗེ་སེམས༔  བདག་ལ་དགོངས་པར་མཛད་དུ་གསོལ༔  བདག་གིས་འགྲོ་བ་ཀུན་དོན་དུ༔  རྡོ་རྗེའི་སྔགས་ཀྱི་སྒྲ་བསྒྲགས་པས༔  མགོན་པོ་ཁྱོད་ཀྱི་ཡེ་ཤེས་དང་༔  ཐུགས་བསྐྱེད་སྨོན་ལམ་དཔག་ཡས་མཐུས༔  ཁམས་གསུམ་སྣོད་བཅུད་ཐམས་ཅད་ཀྱི༔  འབྱུང་བའི་སྒྲ་དང་དབྱེར་མེད་པས༔  གྲགས་སྟོང་སྔགས་ཀྱི་སྒྲ་རུ་གྱུར༔  ཐོས་པས་ལས་དང་ཉོན་མོངས་དང་༔  སྡུག་བསྔལ་ཀུན་ལས་རྣམ་གྲོལ་ཏེ༔  བླ་ན་མེད་པའི་བྱང་ཆུབ་ཐོབ༔  འཁོར་བ་དོང་ནས་སྤྲུགས་པ་ཡི༔  འགྲོ་འདུལ་ཕྲིན་ལས་མཐར་ཕྱིན་ཤོག༔  ཅེས་གསོལ་བ་གདབ་ཅིང་དགེ་བའི་རྩ་བ་བྱང་ཆུབ་ཏུ་བསྔོ༔  རང་ཉིད་བཅོམ་ལྡན་འདས་རྡོ་རྗེ་སེམས་དཔའི་སྐུ་སྣང་སྟོང་ཟུང་འཇུག་ཏུ་གསལ་བཞིན་པའི་ངང་།  སེམས་ཉིད་བློ་འདས་སྟོང་གསལ་དབྱེར་མེད་དོན་དམ་པའི་རྡོ་རྗེ་སེམས་དཔའི་རང་ཞལ་བལྟ་བས་མཚམས་སྦྱར་ཏེ་སྤྱོད་ལམ་ལ་འཇུག་པར་བྱའོ༔  དེ་ལྟར་བརྩོན་པའི་དུས་དང་ཕན་ཡོན་ཀྱང་གཞུང་རྩ་བ་ལས།  འདི་ནི་རྒྱུན་དང་ཁྱད་པར་དུ༔  སྒྲ་དང་ས་གཡོས་བྱུང་བ་དང་༔  མི་མང་འདུ་ཞིང་ཚོགས་པ་སོགས༔  ཀུན་གྱིས་ཐོས་པར་བརྗོད་བྱས་ན༔  དངོས་སུ་ཐོས་རྣམས་སྨོས་ཅི་དགོས༔  སྔགས་བཟླས་རྫི་ཕྱོགས་རླུང་གི་སྒྲ༔  ཐོས་པས་ཀྱང་ནི་ངན་སོང་དང་༔  འཁོར་བའི་སྡུག་བསྔལ་ཐམས་ཅད་ཞི༔  དད་དང་ངེས་ཤེས་སྐད་ཅིག་ཙམ༔  སྐྱེས་ཀྱང་ཐར་པའི་ས་བོན་ཐེབས༔  དེ་ཕྱིར་ཕྱི་རབས་འགྲོ་བ་རྣམས༔  རྒྱུན་གྱི་ཐུགས་དམ་སྙིང་པོར་མཛོད༔  ཅེས་གསུངས་ཏེ་ཨོ་རྒྱན་རྡོ་རྗེ་འཆང་ཆེན་པོའི་གསུང་གིས་ནམ་ཡང་མི་བསླུ་བའི་ཕྱིར་དད་པ་བརྟན་པོས་རྒྱུན་གྱི་ཆོས་སྤྱོད་རྣམས་ཀྱི་སྙིང་པོ་མཛད་འཚལ་ལོ༔  ཞེས་པའང་རང་གཞན་ཀུན་ལ་སྨན་པའི་བསམ་པས་གཏེར་གཞུང་རྩ་བ་ལས་ཟུར་དུ་ཁྱེར་བདེ་བར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཕྱུང་བ་སྟེ།  དགེ་བས་མཐའ་ཡས་སེམས་ཅན་ཐམས་ཅད་དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཆེན་པོའི་གོ་འཕང་ཚེ་འདི་ཉིད་ལ་མངོན་དུ་བྱེད་པའི་རྒྱུར་གྱུར་ཅིག   །  ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-15-BA-006]]
[[Category:Khyentse Lineage Project]]
[[Category:JKW-KABUM-Volume-15-BA]]