View source for DKR-KABUM-10-THA-047

{{Khyentse Metadata
|classification=Tibetan Publications
|subclass=Tibetan Texts
|sectionheading=No
|fulltitletib=ཆོས་སྐྱོང་དགོངས་པ་ཀུན་འདུས་རྩ་བ་དང་ཡན་ལག་གི་ཕྲིན་ལས་ཁྲིགས་སུ་བསྡེབས་པ་དམ་ཅན་ཡོངས་འདུའི་དགའ་ཚལ།
|fulltitle=chos skyong dgongs pa kun 'dus rtsa ba dang yan lag gi phrin las khrigs su bsdebs pa dam can yongs 'du'i dga' tshal
|citation=[[Khyentse, Dilgo]]. ''Chos skyong dgongs pa kun 'dus rtsa ba dang yan lag gi phrin las khrigs su bsdebs pa dam can yongs 'du'i dga' tshal''. In ''Skyabs rje dil mgo mkhyen brtse rin po che'i bka' 'bum'', Vol. 10: 225-275. Delhi: Shechen Publications, 1994.
|collectiontitletib=དིལ་མགོ་མཁྱེན་བརྩེ་བཀའ་འབུམ།
|collectiontitle=dil mgo mkhyen brtse bka' 'bum
|author=Khyentse, Dilgo
|authortib=དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
|tibgenre=Activity Manual - las byang, Sadhanas - Evocation Ritual - sgrub thabs
|terma=Yes
|dkroutline=Three
|deity=chos skyong
|language=Tibetan
|volumenumber=010
|volnumtib=༡༠
|volyigtib=ཐ་
|totalvolumes=25
|textnuminvol=047
|pagenumbers=225-275
|totalpages=101
|beginfolioline=1a
|endfolioline=51a3
|totalfolios=51
|multivolumework=No
|rectonotes=phrin las
|versonotes=chos skyong dgongs 'dus
|colophontib=།ཅེས་ཟབ་གསང་འདི་ཉིད་ཀྱི་བདག་པོར་གདོད་ནས་གྲུབ་པ་ཨོ་རྒྱན་སངས་རྒྱས་གཉིས་པའི་རྡོ་རྗེའི་ལུང་གིས་ཆེ་ཐང་དུ་བསྔགས་པ་ངེས་གསང་བསྟན་པའི་ཤིང་རྟ་རྒྱལ་དབང་ཀརྨ་པ་ཆེན་པོ་རང་བྱུང་ཁྱབ་བདག་རིག་པའི་རྡོ་རྗེའི་ཆོས་སྐྱོང་དགོངས་འདུས་བཀའ་རྒྱ་ཅན་གྱི་དཔེ་ལུང་གི་རྒྱུན་མི་ཉམས་པའི་རྟེན་འབྲེལ་དང་དགོས་པ་ཡོད་པས་འདི་ལྟ་བུ་ཞིག་ཁྱོད་ཀྱི་བྲི་བར་འོས་ཞེས་ཆེད་དུ་རྡོ་རྗེའི་བཀའི་བསྐུལ་མ་གནང་བ་བཞིན་ཆོས་སྐྱོང་དགོངས་འདུས་རྩ་བའི་ཕྲིན་ལས་ཙམ་བྲིས་ཟིན་སྐབས། གཏེར་ཆེན་མཆོག་སྤྲུལ་འཇམ་དབྱངས་སྨྲ་བའི་ཟླ་བས་བཀྲ་ཤིས་པའི་རྫས་རྟེན་དང་བཅས་པས་མཆོག་གཏེར་སྲུང་མའི་གསོལ་མཆོད་དངོས་གྲུབ་རྒྱ་མཚོ་ཉིད་ཧ་ཅང་རྒྱས་ཆེ་བས་དུས་དང་རྒྱུན་པར་ལྕོགས་དཀའ་བར་འདུག་པས་མཆོག་གཏེར་སྲུང་མའི་གསོལ་བསྐང་དོན་བསྡུས་གནད་ཚང་ཞིག་བྲིས་ཞེས་བཀའ་ནན་ཡང་ཡང་བསྩལ་བ་རྗེས་སུ་སྒྲུབ་སླད་ཕོ་རྒྱུད། མོ་རྒྱུད། ནོར་ལྷ་གཏེར་བདག་གི་གསོལ་ཕྲིན་གསུམ་བསྣན་ཏེ། འཕགས་ཡུལ་དབུས་འགྱུར་བཛྲ་ཨཱ་ས་ནའི་ཀེའུ་ཚང་ནས་དབུ་བརྩམས་ཏེ། རྡོ་རྗེ་གླིང་གསང་སྔགས་འབྱུང་བའི་གནས་ཀྱི་མཚན་ཉིད་ཡོངས་སུ་རྫོགས་པའི་གནམ་ལྕགས་རི་བོའི་རྩེར་དཀྱུས་གཅིག་ཏུ་སྤེལ་བ་པོ་ཟབ་གསང་ཤིང་རྟའི་སྲོལ་འབྱེད་རྣམས་ཀྱིས་རྗེས་སུ་བཟུང་ཞིང་བྱིན་གྱིས་བརླབས་པས་ཚུལ་འདི་སྨྲ་བའི་སྐལ་བཟང་གི་སྤོབས་པ་ཅུང་ཟད་དགེ་བ་པདྨ་གར་དབང་བདེ་ཆེན་འོད་གསལ་མདོ་སྔགས་གླིང་པའམ་འཇིགས་མེད་མཁྱེན་བརྩེའི་འོད་ཟེར་ཕྲིན་ལས་དྲག་པོ་རོལ་པ་རྩལ་དུ་འབོད་པའི་རྒྱལ་ཁམས་པས་བྲིས་པའི་ཡི་གེ་གཉིས་པར་སྤེལ་བ་པོ་རེབ་ཀོང་ཕུར་ཐོགས་སྟོང་དང་དགུ་བརྒྱའི་སྔགས་གྲལ་དད་མོས་རྣལ་འབྱོར་སྤྱོད་པ་སྐལ་བཟང་ནུས་ལྡན་རྡོ་རྗེ་རྩལ་གྱིས་བགྱིས་པ་འདིས་ཀྱང་ངེས་གསང་བསྟན་པའི་སྙིང་པོ་གཏེར་ཆེན་ཆོས་ཀྱི་རྒྱལ་པོ་རྣམ་གསུམ་གྱི་རིང་ལུགས་དྲི་མ་མེད་པ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །ཤྲཱི་བི་ཛ་ཡནྟུ།།
|colophonwylie=/ces zab gsang 'di nyid kyi bdag por gdod nas grub pa o rgyan sangs rgyas gnyis pa'i rdo rje'i lung gis che thang du bsngags pa nges gsang bstan pa'i shing rta rgyal dbang karma pa chen po rang byung khyab bdag rig pa'i rdo rje'i chos skyong dgongs 'dus bka' rgya can gyi dpe lung gi rgyun mi nyams pa'i rten 'brel dang dgos pa yod pas 'di lta bu zhig khyod kyi bri bar 'os zhes ched du rdo rje'i bka'i bskul ma gnang ba bzhin chos skyong dgongs 'dus rtsa ba'i phrin las tsam bris zin skabs/_gter chen mchog sprul 'jam dbyangs smra ba'i zla bas bkra shis pa'i rdzas rten dang bcas pas mchog gter srung ma'i gsol mchod dngos grub rgya mtsho nyid ha cang rgyas che bas dus dang rgyun par lcogs dka' bar 'dug pas mchog gter srung ma'i gsol bskang don bsdus gnad tshang zhig bris zhes bka' nan yang yang bstsal ba rjes su sgrub slad pho rgyud/_mo rgyud/_nor lha gter bdag gi gsol phrin gsum bsnan te/_'phags yul dbus 'gyur badz+ra A sa na'i ke'u tshang nas dbu brtsams te/_rdo rje gling gsang sngags 'byung ba'i gnas kyi mtshan nyid yongs su rdzogs pa'i gnam lcags ri bo'i rtser dkyus gcig tu spel ba po zab gsang shing rta'i srol 'byed rnams kyis rjes su bzung zhing byin gyis brlabs pas tshul 'di smra ba'i skal bzang gi spobs pa cung zad dge ba pad+ma gar dbang bde chen 'od gsal mdo sngags gling pa'am 'jigs med mkhyen brtse'i 'od zer phrin las drag po rol pa rtsal du 'bod pa'i rgyal khams pas bris pa'i yi ge gnyis par spel ba po reb kong phur thogs stong dang dgu brgya'i sngags gral dad mos rnal 'byor spyod pa skal bzang nus ldan rdo rje rtsal gyis bgyis pa 'dis kyang nges gsang bstan pa'i snying po gter chen chos kyi rgyal po rnam gsum gyi ring lugs dri ma med pa phyogs dus gnas skabs kun tu dar zhing rgyas la yun ring du gnas pa'i rgyur gyur cig_/shrI bi dza yan+tu//
|pdflink=File:DKR-KABUM-10-THA-047.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །ཆོས་སྐྱོང་དགོངས་པ་ཀུན་འདུས་རྩ་བ་དང་ཡན་ལག་གི་ཕྲིན་ལས་ཁྲིགས་སུ་བསྡེབས་པ་དམ་ཅན་ཡོངས་འདུའི་དགའ་ཚལ་ཞེས་བྱ་བ་བཞུགས་སོ།།<br><br>
༄༅། །ཡེ་ཤེས་རྡོ་རྗེའི་མཚོན་གྱིས་གཉིས་འཛིན་བདུད། །མཐར་བྱེད་སྟོབས་བཅུའི་རང་གཟུགས་ནག་པོ་ཆེ། །ཐུབ་བསྟན་ལྷ་དབང་གྲོང་སྲུང་ཧེ་རུ་ཀ །ལྕམ་དྲལ་འབར་བའི་བཀའ་སྡོད་ཚོགས་ཀུན་རྒྱལ། །དེ་ཡི་རྒྱུད་ལུང་མན་ངག་གིས་བསྟན་དོན། །སངས་རྒྱས་གཉིས་པའི་ཞལ་ལུང་མ་འཁྲུལ་བ། །གྲུབ་པའི་སྐྱེས་བུའི་རྗེས་སུ་གདམས་པའི་བཅུད། །བླ་མའི་དྲིན་གྱིས་འཇུག་བདེའི་བཙས་སུ་སྤེལ། །རྡོ་རྗེ་ཐེག་པའི་རྣལ་འབྱོར་པས་འདོད་རྒུའི་ཕྲིན་ལས་རབ་འབྱམས་ཡིད་བཞིན་དུ་སྒྲུབ་པ་ལ་དམ་ཅན་སྲུང་མའི་དབང་པོ་རྣམས་མཆོད་ཅིང་བསྟོད་དགོས་པས་ན། ཐོག་མར་བཀའ་གཏེར་ཆོས་ཀྱི་གཉེར་འཛིན་པའི་དམ་ཅན་འདི་དག་གི་ཐུན་མོང་དང༌། ཐུན་མོང་མ་ཡིན་པའི་དབང་དང་སྲོག་གཏད་རྗེས་གནང་ལེགས་པར་ཐོབ་ཅིང་སྤྱི་དང་བྱེ་བྲག་གི་དམ་ཚིག་ལ་ཡང་དག་པར་གནས་པས་ཚུལ་འདི་ལ་ནན་ཏན་དུ་བྱ་སྟེ། དེའི་རིམ་པ་ལ། རྫས་བཤམས་བདག་བསྐྱེད་བྱིན་གྱིས་རླབས། སྤྱི་གཏོར་རྣམ་བཞི་སྔོན་འགྲོའོ།  །སོ་སོའི་ལས་རིམ་གཏོར་མ་འབུལ། །བསྟོད་པ་རྗེས་འབྲང་བཟླས་པ་བྱ། །ཚོགས་མཆོད་བསྐང་བཤགས་དྲག་བསྐུལ་དང༌། །སྟོབ་པ་རྣམ་དགུ་དངོས་གཞིའོ།  །མཆོད་བསྟོད་ནོངས་བཤགས་བརྟན་བཞུགས་བྱ། །གཤེགས་གསོལ་བསྔོ་སྨོན་ཤིས་བརྗོད་རྗེས། །ཞེས་པའི་དང་པོ་སྔོན་འགྲོ་ལ་བཞིའི་ཐོག་མར་ཡོ་བྱད་བཤམས་པ་ནི། དུར་ཁྲོད་ལ་སོགས་པ་ལས་དང་མཐུན་པའི་གནས་ཁང་བྱི་དོར་བྱས་ཤིང་རྒྱན་གྱིས་སྤྲས་པའི་གུང་དུ་གཞུང་མཐུན་གྱི་སྐུ་རྟེན་བཀྲམ་པའི་སྤྱན་སྔར་སྟེགས་བུ་རིམ་པ་གསུམ་གྱི་དང་པོར་བདག་བསྐྱེད་རྩ་གསུམ་གང་ལ་བརྟེན་པའི་གཏོར་མ། དེའི་མདུན་དུ་ཆོས་སྐྱོང་དགོངས་འདུས་ཀྱི་གཙོ་བོ་ལེགས་ལྡན་གྱི་གཏོར་མ་གནམ་ལྕགས་ཀྱི་དོ་ཟུར་བརྒྱད་ནག་པོ་འོག་ཏུ་ཁྲག་མཚོ་ཅན་གྱི་སྟེང་གཏོར་མ་དཔུང་རོང་མདུན་དུ་བཤོས་ཕྲན་ཅན་གྱི་མདུན་ནས་བརྩམས་འཁོར་དམར་གཏོར་དཔུང་རོང་རང་འདྲ་བརྒྱད་དང་བར་མཚམས་ཐེབས་ཀྱུས་བསྐོར་བ་དང༌། གཡས་སུ་ཕོ་རྒྱུད་སྤྱི་གཏོར་གཙོ་བོ་གཟའ་བདུད་ལ་དཔུང་རོང་གཡས་ཀྱུས་མིག་གིས་མཚན་པ་དམར་པོ་ལ་འཁོར་དཔུང་རོང་བཅུ་གཅིག་གིས་བསྐོར་བ། དེའི་གཡས་སུ་ནོར་ལྷ་སྤྱི་གཏོར་གཙོ་བོ་རྣམ་སྲས་ལ་ལས་བཞི་ལྷུན་གྲུབ་ཀྱི་གཏོར་མ་ཚོགས་གཏོར་ལྟ་བུ་སྨད་གྲུ་བཞི་ཅན་འཁོར་ནོར་བུའི་འབྲང་རྒྱས་སེར་པོ་བཅུ་གཉིས་ཀྱིས་བསྐོར་བ། ལེགས་ལྡན་གྱི་གཡོན་དུ་མོ་རྒྱུད་སྤྱི་གཏོར་དུད་སོལ་མ་ལ་དམར་གཏོར་གྲུ་གསུམ་གྲི་དྲས་མ་འཁོར་རང་འདྲ་བཅུ་གཉིས་ཀྱིས་བསྐོར་བ། དེའི་གཡོན་དུ་སྲུང་མ་སྤྱི་གཏོར་གཏོར་མ་དཔུང་རོང་ལ་བཤོས་ཕྲན་ལྔ་བཅུ་ལས་མི་ཉུང་བས་བསྐོར་བ། ཀུན་ཀྱང་བར་རྣམས་ཐེབས་ཀྱུས་བསྐོར་ཞིང་དར་གདུགས་རྒྱན་སྤྲོས་ཅན་བཀོད། ཤ་དར། ཁྲག་ཐིག །སྨན་སྣ། འབྲུ། ཤིང་ཐོག་སོགས་རང་རང་ལ་འོས་པའི་མཐུན་རྫས་སྣ་ཚོགས་པ་ཅི་འབྱོར་བསྟར་ལེགས་པར་བཀོད། སྟེགས་གསུམ་པར་ཞི་དྲག་གི་མཆོད་པ་མཇུག་སྤྲོད་དང༌། གཏོར་འབུལ། བསྐང་གཏོར། ཚོགས་མཆོད། གསེར་སྐྱེམས་སོགས་བཤམས་དགོས་གང་ཡོད་དང༌། སྒྲུབ་པ་པོ་རྣམས་ཀྱི་མདུན་དུ་ནང་མཆོད། རྡོར་དྲིལ། གཡབ་དར། ཌཱ་མ་རུ། འཐོར་ནས། རྔ་དང༌། རྐང་གླིང༌། རོལ་མོའི་རིགས་བྱེད་སོགས་འདུ་བྱའོ།  །གཉིས་པ་བདག་བསྐྱེད་ནི། ཐུགས་སྒྲུབ་རྒྱུན་གྱི་བཀོལ་བྱང་མདོ་སྒྱུ་དང་བཀའ་བརྒྱད་གང་རུང་ངམ། གསང་ཐིག་ཕུར་པ་སོགས་གང་འོས་ཀྱི་བརྒྱུད་འདེབས་ནས་བརྩམས་སྐྱབས་སེམས་བསྐྱེད་བཟླས་བསྡུ་ལྡང་གི་བར་བྱ་བའམ། ཡང་ན་ཆོས་སྐྱོང་དགོངས་འདུས་སྙིང་པོ་ལྟར་བདག་བསྐྱེད་མགོན་པོ་ཧེ་རུ་ཀ་ཉིད་འབྲེལ་ཆེ་བས་ན། བླ་མ་དཔལ་ཆེན་ཧེ་རུ་ཀ༔ མཆོག་གསུམ་དཔའ་བོ་མཁའ་འགྲོ་དང༔ མ་ཧཱ་ཀཱ་ལའི་ཚོགས་བཅས་ལ༔ རྣམ་པ་ཀུན་ཏུ་སྐྱབས་སུ་མཆི༔ ལན་གསུམ་གྱིས་སྐྱབས་འགྲོ་དང༌། སེམས་ཅན་མ་ལུས་ཀུན་དོན་དུ༔ སངས་རྒྱས་བསྟན་པ་བསྲུང་ནས་ཀྱང༔ བདུད་དགྲ་མ་ལུས་ཀུན་བསྒྲལ་ནས༔ རྗེས་སུ་འཛིན་པར་སེམས་བསྐྱེད་དོ༔ ལན་གསུམ་གྱིས་སེམས་བསྐྱེད། དཀོན་མཆོག་རྩ་གསུམ་ཆོས་སྐྱོང་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆག་སྡིག་སྒྲིབ་མཐོལ་ཞིང་བཤགས༔ གསང་སྔགས་བསྒྲུབས་ལ་རྗེས་ཡི་རང༔ སྨིན་གྲོལ་གསང་སྔགས་ཆོས་འཁོར་བསྐོར༔ མྱ་ངན་མི་འདའ་བཞུགས་སུ་གསོལ༔ སྙིང་པོ་སེམས་ཅན་དོན་དུ་བསྔོ༔ ཡང་དག་རྡོ་རྗེའི་དོན་རྟོགས་ཤོག༔ ལན་གསུམ་གྱིས་བསགས་སྦྱང་བྱ། སྒྲུབ་པའི་ཉིན་དང་པོ་སོགས་ལ་བགེགས་གཏོར་དངོས་སུ་བཤམས་ལ་ཆབ་ཀྱིས་བྲན། རྃ་ཡྃ་ཁྃ༔ ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབས། ནམ་མཁའ་མཛོད་ཀྱི་སྔགས་རྒྱས་བསྔོས་ལ། བཀའ་བསྒོ་དངོས་ནི། ཧཱུྃ༔ ཡེ་ཤེས་མགོན་པོའི་དཀྱིལ་འཁོར་དུ༔ བསྐལ་པའི་མེ་ཕུང་འབར་བ་ལ༔ འབྱུང་པོ་རྡུལ་གྱིས་མི་ཚུགས་པས༔ ལོག་པར་འདྲེན་པ་ཕྱིར་དེངས་ཤིག༔ དྲག་སྔགས་ཐུན་དང་རོལ་མོས་བསྐྲད། ཧཱུྃ༔ སྟེང་འོག་ཕྱོགས་མཚམས་མཚོན་ཆའི་གུར༔ སྐར་ལྟར་འཁྲུགས་ཤིང་སེར་ལྟར་འཁྲིགས༔ གློག་ལྟར་འཁྱུག་ཅིང་ཐོག་ལྟར་འབེབས༔ གཏུམ་དྲག་རོལ་པས་མཚམས་བཅད་དོ༔ ཧཱུྃ༔ ཡེ་ཤེས་མེ་རླུང་ཆུ་འཕྲོས་པས༔ དངོས་འཛིན་དྲི་མ་ཐམས་ཅད་གཏོར༔ དུར་ཁྲོད་རོལ་པའི་གཞལ་ཡས་དབུས༔ དྲག་པོ་བྷཉྫའི་སྣོད་ཡངས་སུ༔ དགྲ་བགེགས་བཀུག་ཅིང་བསྒྲལ་བ་ཡི༔ ཤ་ལྔ་བདུད་རྩི་ཞུ་བའི་བཅུད༔ ཨོཾ་ཨཱཿཧཱུྃ་གི་འོད་ཟེར་གྱིས༔ ཡེ་ཤེས་བདུད་རྩི་སྤྱན་དྲངས་བསྟིམ༔ ཤ་ཁྲག་རུས་པའི་བཟའ་བཏུང་དང༔ དུར་ཁྲོད་རོལ་པའི་བཀོད་པ་སོགས༔ མཆོད་སྤྲིན་སྤྱན་གཟིགས་བསམ་མི་ཁྱབ༔ ཨོཾ་ཨཱཿཧཱུྃ་སརྦ་པཱུ་ཛ་མེ་གྷ་ཨཱཿཧཱུྃ༔ ཧཱུྃ༔ རྣམ་དག་ཆོས་དབྱིངས་ཁྱབ་བརྡལ་ཆེན་པོ་ལ༔ སྙིང་རྗེའི་རང་མདངས་ཧཱུྃ་ཡིག་འབར་བ་ལས༔ འོད་འཕྲོས་སྣོད་བཅུད་སྦྱངས་ནས་ཚུར་འདུས་པ༔ འབྱུང་བ་རིམ་བརྩེགས་དུར་ཁྲོད་ས་གཞི་ལ༔ མཐིང་ནག་གྲུ་གསུམ་གཞལ་ཡས་ཁང་གི་དབུས༔ པདྨ་ཉི་མ་རོ་ཡི་གདན་སྟེང་དུ༔ ཧཱུྃ་ལས་གྲི་གུག་ཧཱུྃ་མཚན་འཕྲོ་འདུ་ལས༔ བདག་ཉིད་ཡེ་ཤེས་མགོན་པོ་ཧེ་རུ་ཀ༔ མཐིང་ནག་དབུ་དགུ་ཕྱག་ནི་བཅོ་བརྒྱད་ཀྱིས༔ འབར་བའི་མཚོན་ཆ་འཛིན་ནས་ཞབས་བརྒྱད་བགྲད༔ དཔལ་དང་དུར་ཁྲོད་ཆས་ཀྱིས་འཇིགས་པར་བརྒྱན༔ ཀྲོ་དྷཱི་ཤྭ་རི་གྲི་ཐོད་འཛིན་དང་འཁྲིལ༔ ཡེ་ཤེས་མེ་འབར་རྡོ་རྗེའི་ཐོག་སེར་འབེབས༔ ཐུགས་ཀར་ཡེ་ཤེས་སེམས་དཔའ་ཧཱུྃ་ཡིག་ལས༔ འོད་འཕྲོས་སྣང་སྲིད་འཁོར་ལོ་རྩིབས་བཅུ་འབར༔ ཧཱུྃ་བཅུ་འཕྲོས་པས་ཁྲོ་རྒྱལ་གྲི་ཐོད་ཅན༔ ཕུར་པའི་དབལ་ཅན་གདོན་བགེགས་སྙིང་ལ་ཟུག༔ ཡེ་ཤེས་མེ་དང་མཚོན་ཆའི་བུ་ཡུག་འཚུབས༔ ཕྲ་མན་མང་པོས་བསད་པའི་ཕྲིན་ལས་མཛད༔ ཅེས་བདག་ཉིད་ཡེ་ཤེས་ཀྱི་མགོན་པོ་ཆེ་མཆོག་ཧེ་རུ་ཀའི་ང་རྒྱལ་བརྟན་པོས། རང་གི་ཐུགས་ཀར་ཉི་མ་ལ་གནས་པའི་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་ཡིག་གི་མཐར་སྔགས་ཕྲེང་བེཌཱུརྻའི་ཕྲེང་བ་ལྟ་བུར་གཡས་སུ་འཁོར་བར་བལྟས་ལ་སྤྲོ་བསྡུའི་དམིགས་པ་སྦྱར་ཏེ། ཨོཾ་མ་ཧཱ་ཀཱ་ལ་ཧཱུྃ་ཧཱུྃ་ཕཊ༔ ཅེས་རྩ་སྔགས་འབྲུ་བརྒྱད་པ་བརྒྱ་རྩ་ཉུང་མཐའ་བྱས་པ་དང༌། འཁོར་གྱི་ཁྲོ་བཅུས་སྲུང་བའི་ལས་མཛད་པར་བསམ་ལ། མ་མ་ཀཱ་ཝཱ་ཙི་རཀྵ་ཧཱུྃ༔ སྲུང་སྔགས་ཤམ་སྦྱར་བ་ཉེར་གཅིག་ཙམ་བཟླས་ལ། ཧཱུྃ་ཧཱུྃ་ཧཱུྃ་གིས་ལྷར་སྣང་འོད་གསལ་གྱི་ངང་དུ་བསྡུ། ཕཊཕཊ་ཕཊ་ཀྱིས་ཐུན་མཚམས་ཧེ་རུ་ཀའི་སྐུར་ལྡང་ངོ༌། །གསུམ་པ་མཆོད་རྫས་བྱིན་གྱིས་རླབས་པ་ནི། རྃ་ཡྃ་ཁྃ། སྟོང་པའི་ངང་ལས་བྷྲཱུྃ་ལས་ཡུམ་གྱི་མཁའ་དབྱིངས་གཞལ་ཡས་ཁང༔ བྷཉྫ་འབར་བའི་སྣོད་དུ་ཧཱུྃ་ལས་བདེ་བ་ཆེན་པོའི་མཆོད་སྤྲིན་བསམ་གྱིས་མི་ཁྱབ་པ་སྤྲོ་བར་གྱུར༔ ཨོཾ་བཛྲ་ཨརྒྷཾ་པདྱཱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷཻ་ནེ་ཝི་དྱ་ཤབྡ་ཨཱཿཧཱུྃ༔གིས་བྱིན་གྱིས་རླབས། བདུད་རྩི། རྃ་ཡྃ་ཁྃ༔གིས་བསང་སྦྱང༌། བདུད་རྩི་སྟོང་གསལ་མེ་རླུང་རྣམ་ཐར་གསུམ་གྱི་ཐོད་སྒྱེད་ཀྱི་སྟེང་དུ་བྷྲཱུྃ་ལས་དབྱིངས་ཀྱི་བྷཉྫ་འབར་བ་ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བའི་ནང་དུ་སྲིད་པ་གསུམ་གྱི་ཕུང་ཁམས་སྐྱེ་མཆེད་དག་པའི་ཤ་ལྔ༔ བདུད་རྩི་ལྔའི་བཅུད་ཀྱིས་གང་བ༔ རླུང་མེ་སྦྱོར་བས་བྱང་ཆུབ་སེམས་སུ་ཞུ་ནས་ཡེ་ཤེས་ལྔའི་འོད་ཟེར་གྱིས་འཁོར་འདས་ཀྱི་བཅུད་ཐམས་ཅད་བསྡུས་ནས་མཚོ་ལ་ཆར་བབ་པ་བཞིན༔ དམ་ཚིག་ཡེ་ཤེས་གཉིས་སུ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ ཞེས་ལན་གསུམ་བཟླས། རཀྟ། རྃ་ཡྃ་ཁྃ༔གིས་བསང་སྦྱང༌། རཀྟ་བྷཉྫ་འབར་བ་ཡུམ་གྱི་མཁའ་དབྱིངས་སུ་ར་ལས་བདེ་བ་ཆེན་པོའི་འོད་ཟེར་འཕྲོས་པས༔ ཁམས་གསུམ་གྱི་ཆགས་པ་ཐམས་ཅད་རཀྟ་ལ་ཐིམ༔ ཡབ་ཀྱིས་རྡོ་རྗེས་གཟིར་ཞིང་དཀྲུགས་པས་ཉོན་མོངས་བག་ཆགས་དང་བཅས་པ་སྦྱངས༔ དམར་ཆེན་གྱི་རྒྱ་མཚོ་ཆེན་པོར་གྱུར༔ ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མན་དྷ་ལ་ཧཱུྃ་ཧྲཱིཿཋཱ༔ ཞེས་ལན་གསུམ་བཟླས། གཏོར་མ། རྃ་ཡྃ་ཁྃ༔གིས་བསང་སྦྱང༌། གཏོར་མ་ཕྱི་སྣོད་ཀྱི་འཇིག་རྟེན་ཐམས་ཅད་བྷཉྫ་འབར་བའི་གཞལ་ཡས་ཁང༔ ནང་བཅུད་ཀྱི་སེམས་ཅན་ཐམས་ཅད་ཤ་ལྔ་བདུད་རྩི་ལྔའི་ངོ་བོར་ཞུ་བའི་གཏོར་མ་བདུད་རྩིའི་རྒྱ་མཚོ་ཆེན་པོ༔ ཟེགས་མ་ལས་འདོད་ཡོན་མཆོད་པའི་ལྷ་མོ་དཔག་ཏུ་མེད་པ་འཕྲོ་བར་བསམ༔ ཨོཾ་ཨཱཿཧཱུྃ་མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བ་ཏེ་གུ་ཧྱ་ཧྲི་ཤྭ་ས་མ་ཡ་ཧཱུྃ་ཧྲཱིཿཋཱ༔ ཞེས་ལན་གསུམ་གྱིས་བྱིན་གྱིས་བརླབ། བཞི་པ་རྩ་གསུམ་སྤྱིའི་གཏོར་འབུལ་ནི། རང་གི་ཐུགས་ཀའི་ཧཱུྃ་ལས་འོད་འཕྲོས་པས༔ བླ་མ་ཡི་དམ་མཁའ་འགྲོ་སྤྱན་དྲངས་གྱུར༔ ཧཱུྃ། དམིགས་མེད་མཁའ་ལྟར་ཁྱབ་ཅིང་དག་པའི་སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང༌། །ཐུགས་རྗེའི་ངང་ཉིད་ཆོས་སྐུར་དག་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །ཨོཾ་ཨེ་ཧྱ་ཧི་བྷ་ག་ཝཱན་མ་ཧཱ་ཀ་རུ་ཎི་ཀ་དྲྀ་ཤྱ་ཧོཿ ས་མ་ཡ་ཧོཿ ས་མ་ཡ་སྟྭཾ༔ ཛཿཧཱུྃ་བྃ་ཧོཿ ཞེས་པས་སྤྱན་དྲངས་ལ་མཆོད་པ་ནི། ཧཱུྃ། བླ་མེད་མཆོག་གི་མཆོད་པ་དམ་པ་ནི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ཨོཾ་ཨཱཿཧཱུྃ་གུ་རུ་མཎྜ་ལ་དེ་བ་ག་ཎ་ས་པ་རི་ཝཱ་རེ་བྷྱཿ བཛྲ་ཨརྒྷཾ་པྲ་ཏཱིཙྪ་སྭཱ་ཧཱ་ནས་ཤབྡའི་བར་གྱིས་ཕྱི་མཆོད་དང༌། བཛྲ་པཉྩ་ཨ་མྲྀ་ཏ་ཁ་རཾ་ཁཱ་ཧི། མ་ཧཱ་རཀྟ་ཁ་རཾ་ཁཱ་ཧི། ཞེས་སྨན་རཀ་སྟོབ། མདུན་གྱི་ནམ་མཁར་བཞུགས་ནས་གཏོར་མའི་བཅུད༔ ཡེ་ཤེས་ལྗགས་ཀྱི་སྦུ་གུས་གསོལ་བར་བསམ༔ གུ་རུ་དེ་ཝ་ཌཱ་ཀི་ནཱི་མ་ཧཱ་བ་ལིཾ་ཏ་ཁཱ་ཧི༔ ཞེས་ལན་གསུམ་མམ་བདུན་གྱིས་གཏོར་མ་ཕུལ། ཧཱུྃ༔ ཆོས་ཀྱི་དབྱིངས་ལས་ཐུགས་རྗེའི་སྐུར་སྤྲུལ་པ༔ དགོངས་བརྡ་སྙན་བརྒྱུད་སྨོན་ལམ་གཏེར་རྒྱ་དང༔ ཤོག་སེར་ཚིག་བརྒྱུད་རིག་འཛིན་བླ་མའི་ཚོགས༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ ཡི་དམ་ཞི་བ་ཁྲོ་བོའི་ལྷ་ཚོགས་དང༔ ཕྱི་ཡི་གནས་ཡུལ་ནང་གི་རྩ་རླུང་ལ༔ གནས་པའི་མཁའ་འགྲོ་བསམ་མི་ཁྱབ་པ་རྣམས༔ དམ་རྫས་བདུད་རྩིའི་གཏོར་མ་འདི་བཞེས་ལ༔ ཕྱི་ནང་གསང་བའི་བར་ཆད་ཞི་བ་དང༔ བྱིན་རླབས་དངོས་གྲུབ་མ་ལུས་བསྩལ་དུ་གསོལ༔ ཞེས་གཏོར་མ་འབུལ་ཞིང་འདོད་དོན་གསོལ། སྐབས་འདིར་རྩ་གསུམ་སོ་སོའི་གཏོར་འབུལ་དང༌། མཁའ་འགྲོ་སྤྱི་གཏོར་བཅས་འབུལ་བར་འདོད་ན་གཞུང་བཞིན་སྦྱར། དཀྱུས་ཙམ་དུ། རྃ་ཡྃ་ཁྃ། ཨོཾ་ཨཱཿཧཱུྃ༔ ལན་གསུམ། ཧཱུྃ། བླ་མ་ཡི་དམ་མཁའ་འགྲོ་ཆོས་སྲུང་རྣམས། །འདིར་གཤེགས་དགྱེས་པའི་གདན་ལ་བཞུགས་སུ་གསོལ། །བྱིན་རླབས་ཀློང་ཡངས་རྩ་བརྒྱུད་བླ་མ་དང༌། །དངོས་གྲུབ་སྤྲིན་འཁྲིགས་ཡི་དམ་ཞི་ཁྲོའི་ལྷ། །དགོས་འདོད་ཆར་འབེབས་དཔའ་བོ་མཁའ་འགྲོའི་ཚོགས། །མཆོད་གཏོར་འདི་བཞེས་བཅོལ་བའི་ཕྲིན་ལས་མཛོད། །མཁའ་ལྟར་ཁྱབ་བདག་ལེགས་ལྡན་ཚོགས་ཀྱི་བདག །ཡེ་ཤེས་མགོན་པོ་ཕྱག་བཞི་ཕྱག་དྲུག་པ། །ཞལ་བཞི་མ་ནིང་སྐུ་གསུང་ཐུགས་ཡོན་ཏན། །ཕྲིན་ལས་མགོན་པོ་ཡབ་ཡུམ་འཁོར་དང་བཅས། །མཆོད་གཏོར་འདི་བཞེས་བཅོལ་བའི་ཕྲིན་ལས་མཛོད། །མཐུ་སྟོབས་དུས་མཐའི་རླུང་དང་བསྐལ་པའི་མེ། །རྡོ་རྗེ་བེར་ཆེན་ལྷ་མོ་རང་བྱུང་མ། །འདོད་ཁམས་དབང་ཕྱུག་ལྷ་མོ་དུད་སོལ་མ། །སྔགས་སྲུང་ཨེ་ཛཱ་ཊི་སྲོག་སྒྲུབ་མ། །ཤན་པ་དམར་ནག་ལས་བྱེད་དྲེགས་པའི་ཚོགས། །མཆོད་གཏོར་འདི་བཞེས་བཅོལ་བའི་ཕྲིན་ལས་མཛོད། །སྲིད་པའི་རླུང་ཞགས་དབང་ཕྱུག་ལྷ་ཆེན་ཡབ། །ཨུ་མ་དེ་ཝཱི་ཡུམ་བཅས་མཁའ་འགྲོའི་ཚོགས། །ལྷ་སྲིན་ཀུན་གྱི་དམག་དཔུང་སྤྲིན་ལྟར་སྡུད། །དྲང་སྲོང་ཆེན་པོ་གཟའ་མཆོག་རཱ་ཧུ་ལ། །མཆོད་གཏོར་འདི་བཞེས་བཅོལ་བའི་ཕྲིན་ལས་མཛོད། །གཏུམ་ཆེན་རྔམས་པའི་ང་རོ་འབྲུག་ལྟར་སྒྲོགས། །ཞིང་སྐྱོང་སེང་གེའི་གདོང་ཅན་ཡབ་དང་ཡུམ། །རྒྱལ་ཆེན་རྣམ་མང་ཐོས་སྲས་རྟ་སྔོན་ཅན། །དུར་ཁྲོད་བདག་པོ་བདག་མོ་ངས་ནུས་མ། །ལས་ཀྱི་གཤིན་རྗེ་དམ་ཅན་རྡོ་རྗེ་ལེགས། །མཆོད་གཏོར་འདི་བཞེས་བཅོལ་བའི་ཕྲིན་ལས་མཛོད། །ཕྲིན་ལས་དངོས་གྲུབ་ཐོགས་མེད་གློག་ལྟར་འཁྱུགས། །ཚེ་རིང་མཆེད་ལྔ་ཨ་ཕྱི་གཡུ་སྒྲོན་མ། །ཁ་རག་ཁྱུང་བཙུན་མ་སོགས་བརྟན་མའི་ཚོགས། །གནོད་སྦྱིན་ཞང་བློན་བེག་རྩེ་ཚོགས་ཀྱི་བདག །ཛམ་ལྷ་རིགས་ལྔ་རྟ་བདག་ཀུ་བཻ་ར། །ཀུན་འཁྱིལ་མཆེད་གསུམ་ལ་སོགས་ནོར་བདག་རྣམས། །མཆོད་གཏོར་འདི་བཞེས་བཅོལ་བའི་ཕྲིན་ལས་མཛོད། །དྲག་སྔགས་མཐུ་རྩལ་ཐོག་སེར་བཞིན་དུ་འབེབས། །རྟ་ནག་དྲེགས་པ་ཤ་ཟ་ཁ་མོ་ཆེ། །སྡེ་དཔོན་སུམ་བཅུ་སྔགས་བདག་བཅོ་བརྒྱད་དང༌། །ཤྭ་ན་ས་བདག་བདག་ཉིད་སྐྱེས་བུ་སོགས། །གཟའ་གདོང་གིང་ལྔ་བདུད་ཤན་རྩིས་ཀྱི་བདག །མཆོད་གཏོར་འདི་བཞེས་བཅོལ་བའི་ཕྲིན་ལས་མཛོད། །དགྲ་བོའི་སྟེང་དུ་རླུང་ལྟར་ཇག་པར་རྒྱུགས། །སྤུ་གྲི་མཆེད་གསུམ་སྔགས་བདག་སྨྱོ་ཁ་དང༌། །ཇག་པ་མེ་ལེན་ཀླུ་བཙན་སྤུན་བདུན་དང༌། །དྲེགས་པ་སྡེ་ལྔ་པེ་ཧར་ཙི་མ་ར། །ཟབ་གཏེར་བཀའ་ཡི་སྲུང་མ་ཐམས་ཅད་ཀྱིས། །མཆོད་གཏོར་འདི་བཞེས་བཅོལ་བའི་ཕྲིན་ལས་མཛོད། །སྒྲུབ་པའི་མཐུན་རྐྱེན་དབྱར་གྱི་དཔལ་ལྟར་སྤེལ། །ཐང་ལྷ་སྤྲག་གི་བཙན་རྒོད་སྤོམ་ར་ཆེ། །མགུར་ལྷ་བཅུ་གསུམ་དགེ་བསྙེན་ཉེར་གཅིག་དང༌། །ཆོས་འཁོར་སྒྲུབ་གནས་དབེན་གནས་ཆོས་བཞིན་སྐྱོང༌། །གཉུག་མར་གནས་དང་གློ་བུར་ལྷགས་པ་ཡི། །གཞི་བདག་ཕོ་མོ་འཁོར་དང་བཅས་པ་རྣམས། །མཆོད་གཏོར་འདི་བཞེས་བཅོལ་བའི་ཕྲིན་ལས་མཛོད། །སངས་རྒྱས་བསྟན་སྲུང་དཀོན་མཆོག་དབུ་འཕང་བསྟོད། །དགེ་འདུན་སྡེ་རྒྱས་རྣལ་འབྱོར་ཚེ་དཔལ་སྤེལ། །སྙན་པའི་དར་ཕྱོར་གྲགས་པའི་དུང་བུས་ལ། །འཁོར་དང་ལོངས་སྤྱོད་རྒྱས་པ་ཉིད་དུ་མཛོད། །ཞི་རྒྱས་དབང་དྲག་ལས་རྣམས་མ་ལུས་པ། །འབད་མེད་ལྷུན་གྱིས་འགྲུབ་པར་མཛད་དུ་གསོལ། །རྟེན་ལ་བཞུགས་སམ་རང་གནས་ཅི་བདེར་གཤེགས། །སྲིད་ཞིའི་དགེ་ལེགས་རྒྱས་པའི་བཀྲ་ཤིས་ཤོག །གཉིས་པ་དངོས་གཞི་ལ་བཞིའི་དང་པོ་དམ་ཅན། ཆོས་སྐྱོང་དགོངས་འདུས་རྩ་བའི་ཕྲིན་ལས་ནི། ཨ་མྲྀ་ཏས་བསང༌། སྭ་བྷཱ་ཝས་སྦྱང༌། སྟོང་པ་ཉིད་ཀྱི་ངང་ལས་མདུན་གྱི་ནམ་མཁར་དུར་ཁྲོད་ཀྱི་ས་གཞི་འཇིགས་སུ་རུང་བ་རོ་གསར་རྙིང་སྣ་ཚོགས་གཅལ་དུ་བཀྲམ་ཞིང་ཕུང་པོར་སྤུངས་པ། །ཁྲག་གིས་སྦག་པའི་རོ་ལངས་རྣམས་རྒོད་ཅིང་གར་རྩེ་བ། ལས་ཀྱི་ཤན་པ་འབུམ་ཀུན་ཏུ་རྒྱུ་ཞིང་ཉམས་པ་རྣམས་འགུགས་འཆིང་སྲོག་གཅོད་ཀྱི་ལས་བྱེད་པ། མ་རུང་པའི་སྲོག་ཆགས་གདུག་པ་ཅན་ངུ་འབོད་ཀྱི་སྒྲ་དང་བཅས་པས་ཤ་ཟ་ཞིང་ལང་ལོང་དུ་འཕྱོ་བ། ཕྱོགས་མཚམས་སྟེང་འོག་ཐམས་ཅད་དུ་མེ་རླུང་དམར་ནག་འབར་ཞིང་འཁྲུགས་པས་མཁའ་ལས་ཐོག་སེར་མཚོན་ཆའི་ཆར་འབེབས་ཤིང་དྲག་པོའི་འབྲུག་སྟོང་གི་སྒྲ་གློག་དང་བཅས་པས་འབེབས་པ། ས་གཞིར་མཚོན་ཆའི་རི་ཀླུང་དུག་ཤིང་གི་ནགས་ཚལ་ལ་ནང་རོལ་གྱི་ལྷུ་དུམ་དང་དབང་པོའི་མེ་ཏོག་གིས་བཀྲ་བ། ཁྲག་ཞག་གི་རྒྱ་མཚོ་རྦ་ཀློང་འཁྲུགས་པ་ལ་ཚིལ་བུའི་འབྲུམ་ཆགས་ཤིང་མི་རྟའི་བམ་རོ་ཁྱེར་བ། །ཁྲག་དང་ཤ་ཆེན་རྐང་དང་ཚིལ་བུ་ཀླད་པ་དང་ལྷ་བ་རྣག་དང་ཆུ་སེར་རྣམས་ཀྱིས་གང་བའི་འོབས་རིམ་གྱིས་ཡོངས་སུ་བསྐོར་བ། སྣང་སྲིད་རབ་འབར་དྲག་པོའི་ཞིང་ཁམས་ཆེན་པོ་ལྷུན་གྱིས་རྫོགས་པའི་དབུས་སུ་ཐུགས་ཀའི་ཧཱུྃ་ལས་བྷྲཱུྃ་འཕྲོས་བྷྲཱུྃ་བི་ཤྭ་བི་ཤུདྡྷེ་བཛྲ་ཛྙཱ་ན་མཎྜ་ལ་བྷྲཱུྃ། དེ་ཡོངས་སུ་གྱུར་པ་ལས་དུར་ཁྲོད་འབར་བའི་གཞལ་ཡས་ཁང་ཆེན་པོ་གྲུ་བཞི་སྒོ་བཞི་པ། རྨང་གཞི་ལྕགས་ལས་བྱས་པའི་སྟེང་དུ་ཤར་དུ་སྟག་གི་ཐོད་པ། །ལྷོར་མིའི་ཐོད་པ། ནུབ་ཏུ་རྟ་ཡི་ཐོད་པ། བྱང་བྱ་ཡི་ཐོད་པས་བརྩིགས་པ། སྲིན་པོའི་ཐོད་པའི་ཁ་བད་ཅན། ཉི་ཟླ་གཟའ་སྐར་གྱི་འོད་འཕྲོ་བ། རྒྱུ་མའི་དྲ་ཕྱེད། ཀེང་རུས་ཀྱི་ཀ་གདུང༌། རྐང་དང་རྩིབ་མའི་དྲལ་ཕྱམ། ཞིང་ལྤགས་ཀྱི་ཐོག་ཕུབ་པའི་རྩེར་རྡོ་རྗེའི་ཏོག་གིས་མཚན་པ། སྒོ་བཞི་ལྕགས་ཀྱི་སྒོ་གླེགས་དང་རུས་པའི་རྟ་བབ་ཀྱིས་བརྒྱན་པ། མི་རོའི་རྒྱལ་མཚན། ཞིང་ཆུང་གི་འཕན་གདུགས། རོ་སྐྲའི་རྔ་ཡབ། གློ་སྙིང་གི་འཕྱང་འཕྲུལ་སོགས་འཇིགས་པའི་རྒྱན་ཐམས་ཅད་ཀྱིས་བརྒྱན་པའི་དབུས་སུ་གནམ་ལྕགས་འབར་བའི་འཁོར་ལོ་ནག་པོ་རྩིབས་བརྒྱད་པའི་ལྟེ་བར་སྲིན་ཡུལ་ལངྐ་པུ་རི་མ་ལ་ཡ་གནམ་ལྕགས་འབར་བའི་རི་བོའི་སྤོར་པདྨ་དང་ཉི་མའི་སྟེང་དུ་མི་རོ་དང་རྟ་རོ་ལ་གནས་པའི་ཧཱུྃ་ལས་གྲི་གུག་ཧཱུྃ་གིས་མཚན་པར་གྱུར། སྥ་ར་ཎ་ཕཊ། དེ་ལས་འོད་ཟེར་འཕྲོས་པས་དགྲ་བགེགས་གདུག་པ་ཅན་ཐམས་ཅད་ཚར་བཅད། སཾ་ཧ་ར་ཎ་ཧཱུྃ། ཚུར་འདུས་ཡོངས་སུ་གྱུར་པ་ལས། ཨོཾ་བྷུརྐུ་མ་ཧཱ་ཀཱ་ལ་ཡ་ཧཱུྃ་ཕཊ། དཔལ་ཆེ་མཆོག་ཡོན་ཏན་གྱི་མགོན་པོ་ལེགས་ལྡན་ཚོགས་ཀྱི་བདག་པོ་ནག་པོ་ཆེན་པོ་རྡོ་རྗེ་སྲིན་པོའི་གཟུགས་ཅན་སྐུ་མདོག་མཐིང་ནག་ཐུང་ཞིང་སྦོམ་ལ་ཡན་ལག་རགས་པ་ཉི་མ་འབུམ་གྱི་གཟི་བརྗིད་ཅན། ཞལ་གཅིག་ཕྱག་གཉིས་སྤྱན་གསུམ་པ། ཕྱག་གཡས་འབར་བའི་གྲི་གུག་དང་གཡོན་གདུག་པ་ཅན་གྱི་ཁྲག་གིས་གང་བའི་ཐོད་པ་ཐུགས་ཀར་སྟེང་འོག་ཏུ་འཛིན་པ། མཆན་གཡས་སུ་ཙནྡན་གྱི་བེང་ཆེན་གཟིར་བའི་སྟོད་སྨད་ནས་ལྷ་བདུད་ཀྱི་དམག་དཔུང་འགྱེད་པ། སྐུ་ལ་དར་ནག་གི་འཇོལ་བེར་བརྩེགས་མར་གསོལ་ཞིང༌། གསེར་སྐེད་ནོར་བུའི་མིག་ཚང་ཅན་བཅིང་བ། ཐོད་པ་སྐམ་པོ་རིགས་ལྔའི་རྩེ་ཕྲན་ཅན་གྱི་དབུ་རྒྱན་དང༌། རློན་པ་ཁྲག་འཛག་པ་ལྔ་བཅུའི་དོ་ཤལ་འཕྱང་བ། ཡན་ལག་སྦྲུལ་གྱིས་དཀྲིས་ཤིང་མི་ལྤགས་ཀྱི་སྟོད་གཡོག་སོགས་དུར་ཁྲོད་འཇིགས་པའི་ཆས་ཅན། སྭག་ཏིའི་ལྷྭམ་ཡུ་རིང་གསོལ་ནས་གཡོན་བརྐྱང་པའི་སྟབས་ཀྱིས་འགྱིང་ཞིང་བརྗིད་པས་དགྲ་བགེགས་རྣམས་བརྫིས་པ། གཏུམ་ཞིང་མི་སྲུན་པའི་ཉམས་ཅན། སྤྱི་བོར་བྱ་ཁྱུང་ནག་པོ་འཕུར་ཞིང་ལྡིང་བ། སྟ་ཟུར་གཉིས་ན་སེང་གེ་རལ་པ་སྤྲུགས་པ། རྩིབ་ལོགས་ལ་འཕར་དྲེད་འཁྱུག་པ། ཞབས་ལས་སྟག་འཕྲོ་བ། གཡོན་དུ་ཡུམ་ཀྲོ་དྷཱི་ཤྭ་རི་སྔོན་པོ་ཞལ་གཅིག་ཕྱག་གཉིས་སྤྱན་གསུམ་རལ་པ་ཐུར་དུ་གཏིབས་པ། སྟག་ལྤགས་དང་རེ་ལྡེའི་སྨད་དཀྲིས་ཅན། སྦྲུལ་ཞགས་དང་ཐོད་སྐྱོགས་རུས་བཅུད་འབྲུ་མར་ཁྲག་ཆང་གིས་གང་བ་སྟོབ་པ་དང་བཅས་ཡེ་ཤེས་ཀྱི་མེ་དཔུང་འབར་བའི་ཀློང་དུ་བཞུགས་པའི་གཡས་སུ་ལས་མགོན་ནག་པོ། ཤར་དུ་ཀིང་ཀ་ར། ལྷོར་གནོད་སྦྱིན་དམར་པོ། ནུབ་ཏུ་གཟའ་བདུད་སྨུག་ནག །བྱང་དུ་འདོད་ཁམས་དབང་ཕྱུག་ནག་པོ་དང་བཅས་པའི་བཀའ་འཁོར་གཽ་རཱི་མ་སོགས་མ་མོ་བརྒྱད། སིཾ་ཧ་མ་སོགས་ཕྲ་མན་བརྒྱད། འབར་མ་བརྒྱད་སོགས་བདུད་རྩི་ཡོན་ཏན་གྱི་བཀའ་སྲུང་རྣམས་དང༌། དབང་ཕྱུག་ཉི་ཤུ་རྩ་བརྒྱད། གྲུ་འདེགས་མ་བཞི། སྒོ་སྲུང་བཞི། སླས་དང་བྱན་མོ་བྲན་མོ་རུ་འདྲེན། གཞན་ཡང་དྲེགས་པའི་སྡེ་དཔོན་སུམ་ཅུ། སྔགས་བདག་དྲེགས་པ་བཅོ་བརྒྱད་དང་བཅས་ཏེ་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པའི་བདག་ཉིད་ཅན་དུ་བཞུགས་པའོ།  །གཙོ་བོའི་མདུན་ཤར་གྱི་རྩིབས་དྲག་པོ་རང་བྱུང་གི་དུར་ཁྲོད་བསིལ་བ་ཚལ་ཆེན་པོར་ཡང་དག་ཐུགས་ཀྱི་མགོན་པོ་ཕྱག་བཞི་པ་མཐིང་ནག་ཞལ་གཅིག་ཕྱག་བཞིའི་དང་པོ་གཉིས་དགྲ་སྙིང་གིས་མཚན་པའི་གྲི་གུག་དང་ཐོད་ཁྲག་སྟེང་འོག་ཏུ་འཛིན་པས་ཡུམ་ལ་འཁྱུད་པ། འོག་མ་གཉིས་ཀྱིས་རལ་གྲི་མེ་འབར་བ་དང་ཁ་ཊྭཱྃ་ག་འཕྱར་བ། ཞབས་གཉིས་རྒྱལ་པོ་རོལ་པའི་འདུག་སྟངས་ཀྱིས་ཡུམ་ཙཎྜི་ཀ་ནག་མོ་གྲི་ཐོད་ཅན་དང་སྦྱོར་བ་དང་པད་ཉི་དགྲ་བགེགས་ཀྱི་གདན་ལ་རོལ་སྟབས་སུ་བཞུགས་པས་ཁྲག་འཐུང་དཔའ་བོའི་ཆ་བྱད་ཡོངས་སུ་རྫོགས་པ་ལ། ཤར་དུ་ལས་མགོན་བྱ་རོག་གདོང༌། ལྷོར་འབར་མ་ནག་མོ། ནུབ་ཏུ་ཤ་ཟ་སེང་གདོང༌། བྱང་དུ་གཟའ་བདུད་སྨུག་ནག །ཤར་ལྷོར་ཚངས་པ་དཀར་པོ། ལྷོ་ནུབ་ཏུ་གཤིན་རྗེ་དམར་ནག །ནུབ་བྱང་དུ་རྡོ་རྗེ་ལེགས་པ། བྱང་ཤར་དུ་གནོད་སྦྱིན་ནག་པོ་རྣམས་དང༌། ཕྱི་རོལ་གྱི་ཁོར་ཡུག་ལ་ཤར་དུ་ནག་པོ་སྟོང༌། ལྷོར་ཤ་ཟ་འབུམ། ནུབ་ཏུ་མ་མོ་བྱེ་བ། བྱང་དུ་གནོད་སྦྱིན་ཁྲི་སོགས་སྤྲུལ་པའི་ཕོ་ཉ་བསམ་གྱིས་མི་ཁྱབ་པ་འགྱེད་པ། གཞན་ཡང་གནས་ཡུལ་མ་མོ་བརྒྱད་ཚན་གཉིས། དབང་ཕྱུག་མ་ཉི་ཤུ་རྩ་བརྒྱད་སྤྲུལ་པ་ཕྱག་བརྙན་དང་བཅས་པ་སོགས་ཡང་དག་ཐུགས་ཀྱི་བཀའ་སྲུང་མ་ལུས་པའི་ཚོགས་དང་བཅས་པས་བསྐོར་བ། ལྷོའི་རྩིབས་གཏུམ་ཆེན་ཨུ་ཙ་ལ་ཡི་དུར་ཁྲོད་ཆེན་པོའི་དབུས་སུ་འཇམ་དཔལ་སྐུའི་མགོན་པོ་སྟག་ཞོན་ནག་པོ་སྤྲིན་ལྟར་གནག་ཅིང༌། ཁྲོ་བོ་རྔམ་བརྗིད་རོལ་པ། ཕྱག་གཡས་ཙནྡན་གྱི་བེང་ཆེན་ནམ་མཁར་ཕྱར་བ། གཡོན་ལྕགས་པར་ཁྲག་གིས་གང་བ་ཐུགས་ཀར་བཟུང་ནས་གསོལ་བ། དར་ནག་གི་བེར་དགུ་བརྩེགས་དང་གསེར་སྐེད་སྭག་ཏིའི་ལྷྭམ་ཡུ་རིང་གསོལ་བ། དུར་ཁྲོད་ཆས་ཀྱིས་བརྒྱན་པ་དཔའ་གཏུམ་སྟག་ཆེན་རྔམ་པ་ལ་ཆིབས་ཅིང་སེང་གེ་རོལ་དུ་ཁྲིད་པ། ལྕགས་ཀྱི་བྱ་ཁྲ་ལྡིང་ཞིང་ཅེ་སྤྱང་དོམ་དྲེད་ཕྱི་ནས་འབྲང་བ། ཡུམ་ལྷ་མོ་དམར་ནག་སྐུ་གསུང་ཐུགས་ཀྱི་མོན་པ། ཤ་ཟན་ཁྲག་འཐུང་སྲོག་གཅོད་བླ་འགུགས་སྙིང་འབྱིན་གཟེར་འདེབས་ཚེ་འཕྲོག་གི་མོན་པ་དང་མ་མོ་མཁའ་འགྲོ་ཤ་ཟ་གྲངས་མེད་པས་བསྐོར་བ། གཞན་ཡང་ལས་ཀྱི་གཤིན་རྗེ་འཆི་བདག་བཅུ་གཉིས་དྲེགས་པ་བཅུ་དྲུག །གིང་བཞི་བདུད་བཞི་རྩིས་པ་བཞི་ཤན་པ་བཞི་ཕྱོགས་སྐྱོང་བཅུ་གཉིས་མ་གཤིན་སུམ་བརྒྱ་དྲུག་བཅུ་སོགས་འཇམ་དཔལ་གཤིན་རྗེའི་བཀའ་སྲུང་དྲེགས་པའི་ཚོགས་དང་བཅས་པ། ནུབ་ཀྱི་རྩིབས་འབར་བའི་དུར་ཁྲོད་འཇིགས་སུ་རུང་བར་པད་ཉི་ཚོགས་ཀྱི་བདག་པོ་གླང་གདོང་ལ་ཕུག་དང་ནོར་བུ་བསྣམས་པ་ཉལ་སྟབས་སུ་མནན་པའི་སྟེང་དུ་པདྨ་གསུང་གི་མགོན་པོ་མྱུར་མཛད་ཡེ་ཤེས་ཀྱི་མགོན་པོ་སྐུ་མདོག་སྨུག་ནག་ཕྱག་དྲུག་པ་དང་པོ་གཉིས་གྲི་ཐོད། བར་པ་གཉིས་པདྨ་དང་ཁ་ཊྭཱྃ་ག །ཐ་མ་གཉིས་ཀྱིས་ཐོད་རྔ་དང་རྒྱུ་ཞགས་བསྣམས་པ། སྟག་ལྤགས་མགོ་ཕྲེང་རུས་པ་སྦྲུལ་དང་ཕྱག་ཞབས་དྲིལ་བུ་གཡེར་ཁའི་ཕྲེང་བས་བརྒྱན་པ་ཞབས་གར་སྟབས་ཀྱིས་བཞེངས་སྟབས་སུ་བཞུགས་པས་ཙནྡན་གྱི་སྡོང་པོ་ལ་རྒྱབ་བསྟེན་པ། གཡོན་དུ་དཔལ་ལྡན་ལྷ་མོ་ནག་མོ། མདུན་དུ་གནོད་སྦྱིན་ཀྵེ་ཏྲ་པཱ་ལ། གཡས་སུ་གཤིན་རྗེ་ཊ་ཀི་རཱ་ཛ། རྒྱབ་ཏུ་དབང་ཕྱུག་ཛི་ན་མི་ཏྲ། གཡོན་དུ་བདུད་པོ་ཏྲཀྴད་ནག་པོ་རྣབ་དང༌། གཙང་རིས་ཀྱི་མགོན་པོ་བདུན་ཅུ་རྩ་ལྔ་སོགས་དམ་ཅན་རྒྱ་མཚོའི་དམག་ཚོགས་དང་བཅས་པ་ལ་ཁམས་བརྒྱ། དམུས་ལོང༌། དཔལ་གྱི་ཁྱི་སྤྱང༌། འདབ་གཤོག་འབྲུག་བཞི་གསེར་གྱི་མ་མོ་སོགས་པདྨ་གསུང་གི་བཀའ་སྲུང་གིས་བསྐོར་བ། བྱང་རྩིབས་མེ་རི་འབར་བའི་དུར་ཁྲོད་ཆེན་པོར་ཕྲིན་ལས་ཕུར་པའི་མགོན་པོ་དཔལ་ལྡན་མ་ནིང་ནག་པོ། སྦྲུལ་ནག་གི་རལ་པ་ཐུར་དུ་འཕྱང་བས་ས་གཞིར་ཁྱབ་པ། ཞལ་གཅིག་ཕྱག་གཉིས། གཡས་འབར་བའི་རུ་མཚོན་རྣོན་པོ་གནམ་དུ་ཕྱར་ཞིང་གཡོན་གདུག་པ་ཅན་གྱི་སྙིང་དང་སྦྲུལ་ཞགས་འཛིན་པ། ཙནྡན་གྱི་བེང་ཆེན་སྐེད་ལ་བཙུགས་པའི་སྒོ་གསུམ་ནས་དམག་དཔུང་འགྱེད་པ། གཡོན་བརྐྱང་གི་པད་ཉི་རོ་གདན་སྟེང་འགྱིང་ཞིང་ཡུམ་དཔལ་འབར་མ་དཀར་མོ་དང་བཅས་པ། གཡས་སུ་ལས་མགོན་སྲོག་བདུད། མདུན་ནས་གཡས་སྐོར་གྱིས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་མགོན་པོ། འདོད་ཁམས་དབང་ཕྱུག་རེ་མ་ཏི་ནག་མོ་དང་བཅས་པ་ལ་རུ་འདྲེན་བཀའ་སྡོད་མྱུར་མགྱོགས་ཕོ་ཉའི་ཚོགས་ཀྱིས་བསྐོར་བ། མཐའ་སྐོར་དུ་ཤྭ་ན་མ་བཞི་བདག་ཉིད་མ་བཞི་ས་བདག་མ་བཞི་བསེ་ལྕགས་དུང་གི་སྐྱེས་བུ་ལ་སོགས་པ་ཕུར་པ་ཕྲིན་ལས་ཀྱི་བཀའ་སྲུང་མ་ལུས་ཡོངས་སུ་རྫོགས་པའི་ཚོགས་དང་བཅས་པ། ཤར་ལྷོའི་རྩིབས་སྣང་སྲིད་ཆོས་དབྱིངས་ཡུམ་གྱི་མཁའ་ཀློང་ཆོས་འབྱུང་ཁྲག་མཚོ་ཀེང་རུས་ཀྱི་རི་རབ་སྟེང་དུ་ཐོད་མཁར་འབར་བའི་ཀློང་དུ་སྣང་སྲིད་མ་མོའི་སྤྱི་དཔལ་དབྱིངས་ཀྱི་རྒྱལ་མོ་ཨེ་ཀ་ཛཱ་ཊི་མ་སྨུག་ནག་སྤྱན་གཅིག་རལ་གཅིག་མཆེ་གཅིག་ནུ་གཅིག་དང་ལྡན་པ། ཕྱག་གཡས་ཞིང་དབྱུག་ཕྱར་ཞིང་གཡོན་དགྲ་སྙིང་དང་ལྕགས་སྤྱང་ཁྲ་ཐབས་སུ་འགྱེད་པ། གཅེར་བུ་དུར་ཁྲོད་ཀྱི་ཆས་དང་བཅས་ཏེ་ཞབས་གཉིས་དོར་སྟབས་ཀྱིས་པད་ཉི་དགྲ་བགེགས་ཀྱི་གདན་ལ་བཞེངས་ཏེ་མེ་རླུང་དམར་ནག་དྲག་ཏུ་འཁྲུགས་པའི་དབུས་ན་རོལ་པ། འཁོར་དུ་རྟག་པའི་རྒྱལ་མོ་ལྔ། ཨེ་ཀ་ཛཱ་ཊི་སྤུན་དྲུག །དེའི་བྲན་མོ་བཅུ་བཞི། སྨན་མོ་ལྔ་བཅུ་རྩ་བརྒྱད། ཡང་གཡོག་འབུམ་སྟོང༌། དབང་ཕྱུག་ཉི་ཤུ་རྩ་བརྒྱད། མཁའ་འགྲོ་སུམ་ཅུ་རྩ་གཉིས། གིང་ཆེན་བཅོ་བརྒྱད། ལང་ཀ་བཅུ་དྲུག །ཕོ་ཉ་དྲུག་ཅུ་རྩ་བཞི། འབར་མ་བརྒྱད། མ་མོ་བདུན། སྲིང་མོ་བཞི། ས་བདག་སོ་གཉིས། ཕྱོགས་སྐྱོང་བའི་བུ་མོ་འབུམ་ཕྲག་བཅུ། སྨན་ཕྲན་ཤ་ཟ་བདུད་མོ་འབུམ་ཕྲག་གསུམ། དཀར་སེར་དམར་སྔོ་ནག་སྨུག་འབུམ་ཕྲག་དྲུག་དང༌། ཤྭ་ན་ས་བདག་བདག་ཉིད་མ་བཞི་ལྕམ་དྲལ་ལ་སོགས་ཡེ་ཤེས་ལས་དང་འཇིག་རྟེན་གྱི་མ་མོ་འབུམ་ཕྲག་ཡངས་པའི་ཚོགས་ཀྱིས་བསྐོར་བ། ལྷོ་ནུབ་ཀྱི་རྩིབས་དུར་ཁྲོད་དྲག་པོའི་བཀོད་པ་ལྷུན་གྱིས་རྫོགས་པར་གྲུ་གསུམ་ཨེ་ཡི་གཞལ་མེད་ཁང་གི་ནང་དུ་པད་ཉི་དྲེགས་པའི་གདན་ལ་རིག་འཛིན་གྱི་མགོན་པོ་དཔལ་མགོན་མཐུ་སྟོབས་དབང་ཕྱུག་ཞལ་བཞི་པ་དབུས་མཐིང་གཡས་དཀར་གཡོན་དམར་སྟེང་ཞལ་ལྗང་གུ་ཕྱག་བཞིས་གཡས་གཉིས་གྲི་གུག་དང་རལ་གྲི། གཡོན་གཉིས་ཐོད་ཁྲག་དང་རྡོ་རྗེའི་དབྱུག་ཐོ། ཡུམ་རེ་ཏི་སྔོ་སྐྱ་ཁ་ཊྭཱྃ་དང་ནད་རྐྱལ་འཛིན་པ་དང་སྦྱོར་ཏེ་ཞབས་དོར་སྟབས་ཀྱིས་བཞེངས་པ་དཔལ་དང་དུར་ཁྲོད་ཀྱི་ཆས་ཅན་ཀླུ་གཤིན་གཟའ་སྲིན་གྱིས་འཁོར་དང་བཅས་པ། ཞིང་སྐྱོང་སུམ་ཅུ་རྩ་གཉིས། རྡོ་རྗེའི་ཕོ་ཉ་དྲུག་ཅུ་རྩ་བཞི། གིང་ཆེན་བཅུ་དྲུག་ལ་སོགས་པ་རྡོ་རྗེ་རིན་ཆེན་པདྨ་ལས་ཀྱི་རིགས་ཀྱི་ཡེ་ཤེས་ལས་དང་འཇིག་རྟེན་གྱི་དཔའ་བོ་གིང་ཆེན་ཌཱ་ཀི་ཤུགས་འགྲོ་སོགས་རིག་འཛིན་བླ་མའི་བཀའ་སྡོད་རྒྱ་མཚོས་བསྐོར་བ། ནུབ་བྱང་དུར་ཁྲོད་ཆེན་པོའི་དབུས་སུ་སྣ་ཚོགས་རྡོ་རྗེའི་ལྟེ་བར་ཆོས་འབྱུང་པད་ཟླ་ཉི་མ་དགྲ་བགེགས་ཀྱི་སྟེང་དུ་འཇིག་རྟེན་མཆོད་བསྟོད་ཀྱི་མགོན་པོ་རྡོ་རྗེ་ནག་པོ་ཆེན་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ། དྲི་གུག་དང་ཐོད་ཁྲག་ཐུགས་ཀར་སྟེང་འོག་ཏུ་འཛིན་པ། སྨར་སྨིན་དབུ་སྐྲ་གྱེན་དུ་བརྫེས་ཤིང་རྡོ་རྗེའི་གཤོག་པ་འབར་བ་རྡེབས་པ། དུར་ཁྲོད་འཇིགས་པའི་ཆས་ཅན་ཞབས་ཕུར་བུ་འབར་བའི་རྣམ་པ་དགྲ་བགེགས་ཀྱི་སྙིང་གར་གཟིར་བ་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། ཡུམ་ཆེན་ཨེ་ཀ་ཛཱ་ཊི། ལྷ་མོ་འདོད་ཁམས་དབང་ཕྱུག །ལས་མགོན་པུ་ཏྲ་མིང་སྲིང༌། མཐུ་སྟོབས་ཀྱི་དབང་ཕྱུག་གིང་བདུད་གཟའ་བཙན་ཀླུ་སྲིན་གནོད་སྦྱིན་མ་མོ་སྟེ་དྲེགས་པ་ཆེན་པོའི་སྡེ་དཔོན་སུམ་ཅུ་ལྕམ་དྲལ་བཀའ་སྡོད་ཕོ་ཉའི་ཚོགས་རྣམ་འགྱུར་མི་བཟད་པའི་ཆོ་འཕྲུལ་དང་བཅས་པས་བསྐོར་བ། བྱང་ཤར་རྡོ་རྗེའི་བྲག་ཆེན་གྱི་སྟེང་དུ་པད་ཉི་བདུད་རྟ་ནག་པོ་རླུང་གཤོག་གི་སྟེང་ན་དམོད་པ་དྲག་སྔགས་ཀྱི་མགོན་པོ་ལས་བྱེད་སྲས་མཆོག་ནག་པོ་མི་སྡུག་སྲིན་པོ་ལྟར་ཁྲོས་པའི་ཞལ་ཅན། གཡས་གྲི་གུག་ཕྱར་ཞིང་གཡོན་ཐོད་ཁྲག་འཛིན་པ་དར་ནག་གི་བེར་སོགས་དྲག་པོའི་རྒྱན་ཆས་རྫོགས་པ། ཞབས་ཕྱེད་སྐྱིལ་དུ་བཞུགས་པའི་པང་དུ་རེ་མ་ཏི་མེ་ལོང་དང་ཕུར་པ་འཛིན་པ་དང་འཁྲིལ་སྦྱོར་དུ་བཞུགས་པའི་མཐའ་སྐོར་དུ་ནག་པོ་ཆེན་པོ་ཡབ་ཡུམ་བཅུ་དྲུག །ཕྱོགས་བཅུའི་མགོན་པོ་ཆེན་པོ་བཅུ། དྲེགས་པ་བདུན་ཅུ་རྩ་གཉིས། མ་མོ་བདུན་ཚན་བཞི། སྲིང་མོ་ཆེན་མོ་བཞི། འབར་མ་བརྒྱད། དུས་བཞིའི་རྒྱལ་མོ་བཞི། དམག་གི་རྒྱལ་མོ་བཞི་སོགས་སྲིད་གསུམ་དྲེགས་པའི་དམག་ཚོགས་རྒྱ་མཚོས་ཡོངས་སུ་བསྐོར་པ། གཞན་ཡང་སྟེང་འོག་བར་གྱི་སྡེ་བརྒྱད་དྲེགས་པ་དྲག་སྔགས་ཀྱི་བདག་པོའི་ཚོགས་བསམ་གྱིས་མི་ཁྱབ་པ་དང་བཅས་པ་སྟེ། དེ་ལྟར་སྲིད་གསུམ་གདུག་པའི་ཚོགས་ཀུན་མཐར་བྱེད་དྲག་པོ་ཆོས་སྐྱོང་དགོངས་པ་འདུས་པའི་གཙོ་འཁོར་བཀའ་སྡོད་སྤྲུལ་པའི་སྡེ་ཐམས་ཅད་གཏུམ་རྔམ་མི་བཟད་པའི་ཉམས་འགྱུར་སྣ་ཚོགས་པའི་ཆོ་འཕྲུལ་གྱིས་ཕྲིན་ལས་འདོད་རྒུར་རང་དབང་བསྒྱུར་ཞིང་སྒྲུབ་པ་པོའི་རེ་བ་སྐོང་བས་ནམ་མཁའ་བར་སྣང་ས་གཞི་ཐམས་ཅད་ཡོངས་སུ་གང་བར་གྱུར། གཙོ་འཁོར་ཐམས་ཅད་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཧཱུྃ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་རང་བཞིན་ལྷུན་གྱིས་གྲུབ་པའི་གནས་མཆོག་མ་ལ་ཡ་གནམ་ལྕགས་འབར་བའི་རི་བོ་དུར་ཁྲོད་ཆེན་པོ་བརྒྱད་ལ་སོགས་པ་རང་བཞིན་གྱི་གནས་ནས་དྲག་པོ་ཆོས་སྐྱོང་དགོངས་འདུས་ཀྱི་ལྷ་ཚོགས་འཁོར་དང་བཅས་པ་མདུན་གྱི་ནམ་མཁར་སྤྲིན་ཕུང་གཏིབ་པ་བཞིན་བྱོན་པར་བསམ་ལ་ལྕགས་ཀྱུའི་ཕྱག་རྒྱ་བཅིང་སྟེ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ ཨོཾ་བྷུརྐུ་མ་ཧཱ་ཀཱ་ལ་ས་མ་ཡ་ཧྲཱིཾ་ཧྲཱིཾ་ཨཾ་ཀུ་ཤ་ཛཿཛཿཞེས་དང༌། ཧཱུྃ༔ ཆོས་དབྱིངས་དུར་ཁྲོད་མེ་རི་འབར༔ གནས་ཡུལ་ཆོས་འཁོར་ཐམས་ཅད་ནས༔ ཡེ་ཤེས་མགོན་པོ་ལྕམ་དྲལ་དང༔ ལས་ཀྱི་མགོན་པོ་འཁོར་དང་བཅས༔ དྲེགས་པའི་མགོན་པོ་མ་མོའི་ཚོགས༔ བསྟན་སྲུང་ཐམས་ཅད་སྤྱན་འདྲེན་ན༔ མྱུར་བ་ཉིད་དུ་གཤེགས་སུ་གསོལ༔ ཧཱུྃ༔ ཆོས་དབྱིངས་རྣམ་དག་ངང་ལས་མ་གཡོས་ཀྱང༔ གདུག་པ་འདུལ་ཕྱིར་ཁྲོ་བོའི་སྐུར་སྟོན་པ༔ སྲིན་པོའི་གཟུགས་ཅན་གདུག་པ་སྤྱན་འདྲེན་ན༔ ཐུགས་རྗེའི་དབང་གིས་གནས་འདིར་གཤེགས་སུ་གསོལ༔ འཇིགས་རུང་ལང་ཀའི་གྲོང་ཁྱེར་ཆེན་པོའི་དབུས། །རྒྱུད་སྡེ་རྒྱ་མཚོའི་འབྱུང་གནས་མ་ལ་ཡ། །དྲག་ཤུལ་ཏན་གན་སྤྱོད་པའི་ཚོགས་ཁང་ནས། །ལེགས་ལྡན་རྡོ་རྗེ་སྲིན་པོ་གཤེགས་སུ་གསོལ། །རྡོ་རྗེ་གདན་དང་ཤྲཱི་ན་ལེནྡྲར། །ཡང་དག་ཐུགས་ཀྱི་མགོན་པོ་ཕྱག་བཞི་པ། །ཡུམ་ཆེན་ཙཎྜི་ལས་མགོན་སྤྲུལ་འཁོར་བརྒྱད། །ཕོ་ཉ་བྱ་གཅན་ཚོགས་བཅས་གཤེགས་སུ་གསོལ། །དོན་ལ་འོག་མིན་རྣམ་པ་ཨུ་ཙ་ལ། །སྣང་མཛད་རྡོ་རྗེའི་རིགས་ཀྱི་ཁྲག་འཐུང་ཆེ། །སྐུ་ཡི་མགོན་པོ་གཏུམ་ཆེན་སྟག་ཞོན་ནག །མ་གཤིན་མོན་པའི་ཚོགས་བཅས་གཤེགས་སུ་གསོལ། །ལྷོ་ཕྱོགས་རབ་འཇིགས་དུར་ཁྲོད་བསིལ་བའི་ཚལ། །པདྨ་གསུང་གི་མགོན་པོ་ཕྱག་དྲུག་པ། །འདོད་ཁམས་དབང་ཕྱུག་གནོད་སྦྱིན་གཤིན་རྗེའི་དབང༌། །ཏྲཀྴད་དཔལ་མགོན་སྡེ་བཅས་གཤེགས་སུ་གསོལ། །འོག་མིན་གནས་དང་ས་གསུམ་འཇིག་རྟེན་ནས། །ཕུར་པ་ཕྲིན་ལས་མགོན་པོ་མ་ནིང་ནག །ཡུམ་ཆེན་སྐུ་གསུང་ཐུགས་ཡོན་ཕྲིན་ལས་མགོན། །རེ་ཏི་ཕོ་ཉ་བཅས་ཀུན་གཤེགས་སུ་གསོལ། །ཆོས་དབྱིངས་རྣམ་ཐར་གསུམ་རྫོགས་མཁའ་དབྱིངས་ནས། །སྣང་སྲིད་མ་མོའི་སྤྱི་དཔལ་ཨེ་ཀ་ཙ། །ཡེ་ཤེས་འཇིག་རྟེན་ལས་ཀྱི་མ་མོ་འབུམ། །ལྕམ་དྲལ་བཀའ་སྡོད་འཁོར་བཅས་གཤེགས་སུ་གསོལ། །ལྷོ་ཕྱོགས་དཔལ་གྱི་རི་དང་ཏི་སེ་ནས། །རིག་འཛིན་མགོན་པོ་ཞིང་སྐྱོང་ཞལ་བཞི་པ། །ཡུམ་ཆེན་རེ་ཏི་ཀླུ་གཤིན་གཟའ་སྲིན་པོ། །འཁོར་གྱི་སྡེ་བརྒྱད་དཔུང་བཅས་གཤེགས་སུ་གསོལ། །འོག་མིན་གནས་དང་རྡོ་རྗེ་གདན་སོགས་ནས། །འཇིག་རྟེན་མཆོད་བསྟོད་མགོན་པོ་རྡོ་རྗེ་གུར། །མ་གཤིན་སྡེ་དཔོན་སུམ་ཅུ་ལ་སོགས་པ། །དྲེགས་པའི་འཁོར་དང་བཅས་ཀུན་གཤེགས་སུ་གསོལ། །གསང་ཆེན་ལྷུན་གྲུབ་གཙུག་ལག་ཁང་ཆེན་ནས། །དམོད་པ་དྲག་སྔགས་སྲས་མཆོག་མགོན་པོ་བེར། །ནག་པོ་བཅུ་དྲུག་ཕྱོགས་སྐྱོང་མ་སྲིང་འབར། །དུས་བཞིའི་དམག་རྒྱལ་ཚོགས་བཅས་གཤེགས་སུ་གསོལ། །སྟོབས་བཅུ་མཐར་ཕྱིན་ཡེ་ཤེས་རྡོ་རྗེའི་མཚོན། །རྣམ་འགྱུར་འབར་བའི་ཞེ་སྡང་སྲིན་པོའི་གཟུགས། །བདེ་ཆེན་ཐབས་མཆོག་མ་ཧཱ་ཀཱ་ལ་ཆེ། །སྲིད་གསུམ་ཟིལ་གནོན་འབར་བའི་གར་གྱིས་གཤེགས། །ངོ་བོ་ཆོས་ཉིད་གཅིག་གི་རོལ་པ་ལས། །རྣམ་པ་གསང་བ་མི་ཟད་རྒྱན་གྱི་འཕྲུལ། །བདེ་གཤེགས་སྒྲུབ་སྡེ་བརྒྱད་ཀྱི་བཀའ་སྡོད་ཚུལ། །འབར་བའི་སྤྲུལ་འཁོར་བཅས་ཏེ་གཤེགས་སུ་གསོལ། །ཨོཾ་ཨེ་ཧྱ་ཧི་ཤྲཱི་མ་ཧཱ་ཀཱ་ལ་ཛྙཱན་ནཱ་ཐ་དྷརྨ་པཱ་ལ་ག་ཎ་མཎྜ་ལ་ས་པ་རི་ཝཱ་ར་མ་ཧཱ་ཀ་རུཎི་ཀ་དྲྀ་ཤྱ་ཧོ་ས་མ་ཡ་སྟྭྃ་ཨཱ་ཀརྵ་ཡ་ཧཱུྃ་ཛཿ ཨེ་ཨཱ་རལླི་ཧྲཱིཾ་ཧྲཱིཾ་ཛཿཛཿས་སྤྱན་དྲངས། ཧཱུྃ། སངས་རྒྱས་བསྟན་པ་སྲུང་བའི་མཐུ་རྩལ་ཅན། །མ་ཧཱ་ཀཱ་ལ་ཡབ་ཡུམ་འཁོར་དང་བཅས། །དྲག་པོའི་གཞལ་ཡས་དཀྱིལ་འཁོར་ཆེན་པོ་འདིར། །གཉིས་མེད་བརྟན་པར་བཞུགས་ལ་ཕྲིན་ལས་མཛོད། །ཨོཾ་ཤྲཱི་མ་ཧཱ་ཀཱ་ལ་ག་ཎ་མཎྜ་ལ་ས་པ་རི་ཝཱ་ར་ས་མ་ཡ་ཏིཥྛནྟུ། དམ་ལ་བཞག་ནི། ཡི་དམ་གྱི་ང་རྒྱལ་བརྟན་པོའི་རྡོ་རྗེ་རྩེ་ལྔ་པའི་ཕྱག་རྒྱ་མགོན་པོ་འཁོར་བཅས་ཀྱི་སྤྱི་བོར་བཞག་པར་མོས་ཏེ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཨོཾ་བཛྲ་ས་མ་ཡ་ཧ་ན་ཧ་ན་ཧཱུྃ་ཕཊ༔ དཔལ་རྡོ་རྗེ་སྲིན་པོ་ཁྲག་འཐུང་ནག་པོ་ཆེན་པོ་དྲག་པོ་ཆོས་སྐྱོང་དགོངས་པ་འདུས་པའི་ལྷ་ཚོགས་འཁོར་དང་བཅས་པ་རྣམས་ཀྱིས་ཞི་བ་རྡོ་རྗེ་དབྱིངས། ཁྲག་འཐུང་ཁྲོ་བོའི་རྒྱལ་པོ་བདེ་གཤེགས་སྒྲུབ་པ་བཀའ་བརྒྱད། སློབ་དཔོན་སངས་རྒྱས་གཉིས་པ། རྗེ་འབངས་སྙིང་གི་བུ་དགུ། ལྷ་སྲས་ཆོས་ཀྱི་བློ་གྲོས། གཏེར་ཆེན་མཆོག་གྱུར་གླིང་པ། ཀུན་མཁྱེན་རྡོ་རྗེ་གཟི་བརྗིད། འཇམ་མགོན་པདྨ་གར་དབང༌། གཏེར་སྲས་དབང་མཆོག་རྡོ་རྗེ། རིག་འཛིན་ཚེ་དབང་ནོར་བུ། མཁན་ཆེན་རིན་ཆེན་དར་རྒྱས། པདྨ་ཐེག་མཆོག་བསྟན་འཛིན། ཁྱབ་བདག་དཔལ་མགོན་བླ་མ་པདྨ་ཡེ་ཤེས་རྡོ་རྗེའི་བར་དུ་བྱོན་པའི་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོངས། འཇིག་རྟེན་གྱི་རྒུད་པ་སོལ། སེམས་ཅན་གྱི་ཕན་བདེ་སྤེལ། རྣལ་འབྱོར་པ་རྣམས་ཀྱི་སྡོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་སྒྲུབས། སྡང་བའི་དགྲ་ཐུལ། གནོད་པའི་བགེགས་ཆོམས། ཁྱད་པར་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང༌། མཐུན་རྐྱེན་སྨོན་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པ་དང་མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་ཕྲིན་ལས་མཛོད་ཅིག །ཅེས་དམ་ཚིག་གི་གཉེར་གཏད་དོ། ཧཱུྃ། ཆོས་སྐུ་འགྱུར་མེད་དཔལ་ལྡན་ནག་པོ་ཆེ། །ཕྲིན་ལས་ལྷུན་གྲུབ་ཡེ་ཤེས་མགོན་པོའི་ཚོགས། །དགྲ་བགེགས་ཀུན་འདུལ་ཆོས་སྐྱོང་ཡོངས་ཀྱི་རྗེ། །མགོན་པོ་འཁོར་དང་བཅས་ལ་ཕྱག་འཚལ་ལོ། །ཨ་ཏི་པཱུ་ཧོ། པྲ་ཏཱིཙྪ་ཧོཿ ཞེས་པས་ཕྱག་བྱ། ཧཱུྃ། ཧེ་རུ་ཀ་དཔལ་གཏུམ་ཆེན་རྔམས་པའི་གཟུགས། །ཡེ་ཤེས་ཀློང་དགུའི་མགོན་པོ་འཁོར་བཅས་ལ། །དྲི་བཟང་སྦྱར་བའི་ཆབ་ཀྱིས་ཞབས་བསིལ་ཞིང༔ ཡན་ལག་བརྒྱད་ལྡན་བདུད་རྩིས་སྐུ་ཁྲུས་གསོལ༔ མེ་ཏོག་རིན་ཆེན་རྒྱན་ཕྲེང་རྣམ་པར་བཀྲ༔ སྦྱར་སྤོས་བསང་དུད་སྣ་ཚོགས་སྤྲིན་ཕུང་གཡོ༔ གཟུགས་མཛེས་སྣང་གསལ་ཚོགས་ནི་ཉི་ལྟར་གསལ༔ ཐུགས་ལ་བདེ་བ་སྐྱེད་པ་བྱུགས་པའི་བཅུད༔ རོ་བརྒྱའི་ཞལ་ཟས་ཤིང་ཏོག་ལ་དུ་དང༔ འབྲས་ཆན་ཁུར་བ་དཀར་གསུམ་མངར་གསུམ་ཚོགས༔ གདུག་པ་བསྒྲལ་བའི་ཤ་ཁྲག་དོན་སྙིང་རྣམས༔ རྣམ་པ་སོ་སོའི་དགྱེས་བསྐྱེད་མཆོད་པའི་སྤྲིན༔ ངོ་བོ་ཡེ་ཤེས་སྒྱུ་མའི་རྣམ་རོལ་དུ༔ ནམ་མཁའ་གང་བར་མོས་བློས་སྤྲུལ་ནས་སུ༔ སྙན་པའི་དབྱངས་དང་ངོ་མཚར་རོལ་མོའི་ཚོགས༔ སྤྱན་གཟིགས་ཟློས་གར་བསམ་མི་ཁྱབ་པ་བཅས༔ འབུལ་ལོ་དགྱེས་པར་བཞེས་ལ་ཕྲིན་ལས་མཛོད༔ ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཨརྒྷྃ་ནས། ཤབྟ་པཉྩ་ཀཱ་མ་གུ་ཎ་པྲ་ཏཱིཙྪ་ཧོཿ ཧཱུྃ༔ དྲག་པོར་གཤེགས་པའི་ཁྲག་གི་མཆོད་ཡོན་འབུལ༔ དུག་ཆུས་ཞབས་བསིལ་དགྲ་བགེགས་གདན་ལ་བཞུགས༔ མགོ་ཕྲེང་དབང་པོའི་མེ་ཏོག་སྐུ་ལ་བརྒྱན༔ འདྲེ་འཇིགས་ཚིལ་ཆེན་བསྲེགས་པའི་དུད་སྤྲིན་གཏིབས༔ ཞུན་ཆེན་རོ་རས་བསྐལ་པའི་མེ་ཆེན་སྦར༔ ཁྲག་ཞག་མཁྲིས་པའི་དྲི་ཆབ་རྒྱ་མཚོར་བསྐྱིལ༔ ཤ་དང་རུས་པའི་ལྷུན་པོ་ཆེར་སྤུངས་ཏེ༔ བདུད་རྩི་རྩ་བརྒྱད་སྟོང་སྦྱར་དཔའ་བོའི་ཕུད༔ འབྲུ་སྣ་ཤིང་ཏོག་བཟའ་དང་བཏུང་བའི་ཚོགས༔ ཕྱི་ནང་གསང་མཆོད་འབུལ་ལོ་བཞེས་སུ་གསོལ༔ སྔོན་གྱི་ཁས་བླངས་དམ་ལས་མ་གཡེལ་བར༔ བསྟན་པ་སྲུང་བའི་ཕྲིན་ལས་མཛད་དུ་གསོལ༔ ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཤྨ་ཤཱ་ན་པཱུ་ཛ་ཨརྒྷཾ་ནས། ཤབྡ་པྲ་ཏཱིཙྪ་ཧོཿ ཧཱུྃ༔ ཉོན་མོངས་ཀུན་འཇོམས་བྱང་སེམས་བདུད་རྩིའི་སྤྲིན༔ ཆགས་མེད་རཀྟ་དམར་ཆེན་རྦ་རླབས་གཡོ༔ འདོད་ཡོན་གཏོར་མ་ཀུན་བཟང་མཆོད་སྤྲིན་གཏིབས༔ དགའ་བཞི་སྐྱེད་པའི་ལྷ་མོ་བསམ་མི་ཁྱབ༔ གདུག་པའི་ཚོགས་བསྒྲལ་དཔའ་གཏུམ་རྔམས་བརྗིད་ཤུགས༔ ཕྱོགས་ལས་རྣམ་རྒྱལ་རྒྱལ་མཚན་སྒྲེང་བའི་དཔལ༔ དགྱེས་པ་སྐྱེད་ཕྱིར་ཁྲག་འཐུང་འཁོར་བཅས་ལ༔ ཡེ་ཤེས་ཀློང་དུ་རོ་གཅིག་མཆོད་པ་འབུལ༔ ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་མ་ཧཱ་སུ་ཁ་དགྲ་བགེགས་མཱ་ར་ཡ་ཕཊ་པཱུ་ཛ་ཧོཿཞེས་ཕྱི་ནང་གསང་བ་བླ་ན་མེད་པའི་མཆོད་པས་མཉེས་པར་བསམ་མོ།  །གཉིས་པ་ཕོ་རྒྱུད་དྲེགས་པ་ཀུན་འདུས་ཀྱི་ཕྲིན་ལས་ནི། ཨོཾ་མ་ཧཱ་ཤཱུ་ནྱ་ཏ་སོགས། སྟོང་པའི་ངང་ལས་དྲག་པོ་ཆོས་སྐྱོང་དགོངས་འདུས་རྩ་བའི་དཀྱིལ་འཁོར་ཆེན་པོའི་གཡས་དུར་ཁྲོད་ཀྱི་ས་གཞི་ལ་ཐོད་པའི་གཞལ་ཡས་ཁང་གི་དབུས་སུ་ཁྲག་མཚོ་འཁྲུགས་པའི་ཀློང་དུ། བདག་གི་ཐུགས་ཀ་ནས་ཧཱུྃ་འཕྲོས་པས༔ དེ་ལས་གཟའ་བདུད་ནག་པོ་མགོ་བོ་དགུ་པ་བྱ་རོག་གི་ཞལ་དང་བཅུ༔ ཞལ་གདངས་ཤིང་ང་རོ་སྒྲོགས་པ༔ སྤྱན་བགྲད་ཅིང་ཕྱག་དང་པོ་གཉིས་ཀྱིས་སྦྲུལ་ཞགས་དང་ཆུ་སྲིན་གྱི་རྒྱལ་མཚན་འཛིན་པ༔ འོག་མ་གཉིས་ཀྱིས་རྭའི་མདའ་གཞུ་འགེངས་པ༔ སྐུ་སྨད་སྦྲུལ་དུ་འཁྱིལ་བ༔ ལུས་ཀུན་མིག་གིས་གང་བ་མེ་རླུང་འཚུབས་པའི་དབུས་སུ་བཞུགས་པ༔ དེའི་འཁོར་དུ་བིཥྞུ་ར་ཙ་ལ་སོགས་རཱ་ཧུ་ལ་བརྒྱད༔ ཉི་མ་ལ་སོགས་པའི་གཟའ་ཆེན་བརྒྱད༔ རྒྱུ་སྐར་ཉི་ཤུ་རྩ་བརྒྱད༔ གདོང་མོ་མཆེད་བཞི་རྣམས་གསལ་བར་གྱུར༔ དེའི་ཕྱི་རོལ་དུ་མདུན་ནས་གཡས་སྐོར་གྱིས་བདུད་མགོན་སེང་གེའི་གདོང་ཅན་རལ་པའི་གསེབ་ནས་སེང་ཆུང་སྤྲོ་བ། གཡས་རྩེ་གསུམ་པའི་དར་ནག་གི་བ་དན་ཕྱར་ཞིང་གཡོན་ཐོད་པར་དམར་གཏོར་ཁྱེར་བ། དར་ནག་གི་བེར་དང་འཁོར་གསུམ་སྐེད་ལ་བསྐོར་ནས་བདུད་རྟ་ནག་པོ་རྟིང་དཀར་ལ་ཞོན་པ། ཡུམ་སེང་གདོང་དམར་མོ་རྟ་དམར་ལ་ཞོན་པ། གཡས་རྩེ་གསུམ་ཕྱར་ཞིང་གཡོན་དགྲ་སྙིང་ཡབ་ལ་སྟོབ་པ། མདུན་དུ་བམ་རོ་ཕོ་མོ་སྤྲེའུ་སྤྱི་ཚུགས་སུ་ལག་གཉིས་ལྕགས་ཀྱི་སྡེར་མོ་བགྲད་པ་ས་ལ་བཙུགས་ནས་རྒྱུག་པ། རྐང་པས་དམར་གཏོར་དགྲ་ལ་འཕེན་པ། ལས་བྱེད་ཤ་ཟ་སྡེ་བརྒྱད་སྣང་སྲིད་ལྷ་མ་སྲིན་དྲེགས་པ་ཅན་ཐམས་ཅད་ཀྱིས་བསྐོར་བ། ལས་མགོན་སྲོག་བདུད་ཏྲཀྴད་ནག་པོ་རུ་མཚོན་དང་མདུང་ཞགས་ཐོགས་ནས་ཁྲམ་ཤིང་སྐེད་ལ་བཙུགས་ཤིང་མདའ་གཞུ་གྲུ་ལ་བཀལ་བ། འཆི་བདག་ལས་ཀྱི་གཤིན་རྗེ་མ་ཧེ་ཁྲོས་པའི་གདོང་ཅན་རྭ་རྩེ་ལས་མེ་འབར་བ། ཐོད་དབྱུག་དང་ཐོད་ཁྲག་ཐོགས་པ། ཆུ་གླང་གི་སྟེང་ན་འགྱིང་པའི་གཅེར་བུ་རྒྱན་མེད་རང་རྟགས་བསྒྲེངས་པ་ལས་མེ་འབར་བ། ཞབས་དོར་སྟབས་ཅན་གཡོན་དུ་ཙ་མུནྟྲི་མ་ཧེའི་གདོང་ཅན་ལྕགས་ཀྱུ་དང་ཐོད་པ་འཛིན་པས་ཡབ་ལ་གདོང་ཕྱོགས་པས་བརྩེ་བ། འཁོར་དུ་ལས་ཀྱི་གཤིན་རྗེ་ཡ་མ་དཎྜི་སོགས་བརྒྱད་དང༌། ལོ་ཟླ་ཞག་གི་གཤིན་རྗེ་སྡེ་བརྒྱད་དྲེགས་པ་མ་གཤིན་བདུན་བརྒྱ་ཉི་ཤུ་ཚོགས་དང་བཅས་པ། གནོད་སྦྱིན་བེཀྩེ་དམར་པོ་བསྭེ་རྨོག་བསྭེ་ཁྲབ་གསོལ་ཞིང་ཟངས་གྲི་མདའ་གཞུ་དང་བཅས་པའི་དགྲ་སྙིང་འཛིན་ཅིང་མཆན་དུ་བསྭེ་མདུང་འཆང་བ། སྐྱེས་མཆོག་བཛྲ་སཱ་དྷུ་དམར་པོ་རྡོ་རྗེ་དང་དགྲ་སྙིང་འཛིན་པ། དབུ་ལ་ཐང་ཞུ་དམར་པོ་རྡོ་རྗེའི་ཏོག་ཅན་གསོལ་ཞིང་སེང་གེ་ལ་ལ་ཆིབས་པ། ཡུམ་རྡོ་རྗེ་གཡུ་སྒྲོན་མ་མདའ་དར་དང་མེ་ལོང་འཛིན་པ་སྨན་བཙུན་གྱི་ཆས་ཅན་ཤ་བ་ཡུ་མོ་ཆིབས་པ། མཆེད་ཟླ་སུམ་བརྒྱ་དྲུག་ཅུ། དགྱེས་སྡེ་བརྟན་མ་བཅུ་གཉིས་ཟ་བྱེད་མཆེ་བ་ཅན་སོགས་ཀྱིས་བསྐོར་བ། ཀླུ་བཙན་འབར་བ་སྤུན་བདུན་བསྭེ་རྨོག་བསྭེ་ཁྲབ་ཅན་མདུང་དང་ནོར་བུའི་མཚན་པའི་ཞགས་པ་བསྣམས་ནས་རྟ་རྒོད་བྲ་བོ་མི་ཟན་ལ་ཆིབས་པ། རྒྱལ་ཆེན་པེ་ཧ་ར་དར་ནག་གི་བེར་དང་དོམ་སློག་དབུ་ལ་ཐིབས་ཞུ་གསོལ་བ། བདུད་ཞགས་དང་པུ་གྲི་ཐོགས་ནས་བ་གླང་སྣ་རིང་ལ་ཆིབས་ནས་རོལ་དུ་གློག་དམར་ཁྲིད་པ། བཙན་རྒྱལ་ཤུ་བ་སྲོག་ཟན་མདུང་དམར་དང་ཞགས་པ་ཅན། ལྷའི་དགེ་བསྙེན་དཔལ་ལྡན་ཤེས་རབ་ལྷའི་ཆས་ཅན་ཤེལ་མདོག་རྒྱལ་མཚན་དཀར་པོ་དང་གླེགས་བམ་ཐོགས་པ། བདུད་རྒྱལ་སྐོས་རྗེ་དྲང་དཀར་ནག་པོ་བདུད་ཀྱི་ཆས་ཅན་མདུང་ཞགས་འཕེན་པ། ཀླུ་བདུད་སོག་མ་མེད་ཀླུའི་ཆས་ཅན་མདུང་དང་སྦྲུལ་ཞགས་ཐོགས་པ། རྡོ་རྗེ་གནོད་སྦྱིན་ནོར་བདག་སེར་པོ་གནོད་སྦྱིན་གྱི་ཆས་ཅན་རྒྱལ་མཚན་དང་ནེའུ་ལེ་འཛིན་པ་རང་མདོག་གི་བེར་གསོལ་ཞིང༌། གཏེར་སྲུང་དྲེགས་པ་སྡེ་ལྔ་རང་མདོག་གི་རྟ་ལ་ཞོན་པ། རང་རང་གི་བཀའ་འཁོར་ལས་བྱེད་སྤྲུལ་པའི་དམག་ཚོགས་བྱེ་བ་འབུམ་གྱིས་བསྐོར་བ། གཞན་ཡང་དེ་དག་གི་ཕྱི་རོལ་དུ་སྟེང་གི་ལྷ་བརྒྱད། འོག་གི་ཀླུ་བརྒྱད། བར་སྣང་གི་གཟའ་བརྒྱད། འཇིགས་བྱེད་ཆེན་པོ་དགུ་དང༌། ཕྱོགས་སྐྱོང་ཆེན་པོ་བཅུ། རྒྱུ་སྐར་ཉི་ཤུ་རྩ་བརྒྱད། རྒྱལ་པོ་ཆེན་པོ་བཞི་ལ་སོགས་པ་གཙང་རིས་ཀྱི་མགོན་བདུན་ཅུ་རྩ་ལྔ་ལ་སོགས་སྲིད་གསུམ་འབྱུང་པོའི་ཚོགས་ཐམས་ཅད་རྣམ་འགྱུར་དང་ཆ་ལུགས་མ་ངེས་པའི་ཚོགས་དུ་མ་ཆར་སྤྲིན་འཁྲིགས་པ་ལྟ་བུས་བསྐོར་ཞིང་བཞུགས་པར་གྱུར། དེ་ལྟར་གསལ་བའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་ཧཱུྃ་ལས་འོད་ཟེར་འཕྲོས་པས་ཕྱོགས་བཅུ་ནམ་མཁའི་ཨེ་ཀློང༌། གནས་ཡུལ་དུར་ཁྲོད་རབ་འབྱམས་ནས་ཕོ་རྒྱུད་དྲེགས་པའི་དམག་དཔུང་བཀའ་གཏེར་སྲུང་མ་གཉན་པོ་འཁོར་དང་བཅས་པ་སྐད་ཅིག་གིས་རྫུ་འཕྲུལ་དགྱེས་དགུའི་རོལ་པས་སྤྱན་དྲངས་པར་གྱུར། སྤོས་རོལ་གཡབ་དར་རྐང་གིས་བསྐུལ་ཏེ། ཧཱུྃ༔ ནམ་མཁའ་ཡངས་པའི་དཀྱིལ་འཁོར་ནས༔ གཟའ་བདུད་འཁོར་དང་བཅས་པ་རྣམས༔ དཔལ་གྱི་སྤྱན་སྔར་དམ་བཅས་བཞིན༔ བསྟན་པ་སྲུང་ཕྱིར་གཤེགས་སུ་གསོལ༔ ཧཱུྃ༔ འོག་མིན་ཆོས་དབྱིངས་ཕོ་བྲང་དང༔ རྡོ་རྗེ་གདན་དང་ན་ལེནྡྲ༔ གནས་ཡུལ་དུར་ཁྲོད་བརྒྱད་ལ་སོགས༔ རང་བཞིན་གར་བཞུགས་གནས་མཆོག་ནས། །སྣང་སྲིད་དྲེགས་པའི་ཚོགས་རྗེ་རྣམས། །གར་དགུའི་གཟི་བརྗིད་དཔལ་དུ་འབར། །དགྱེས་བཞད་རྔམས་སྒྲ་དི་རི་རི། །སྒྲུབ་མཆོག་རྣལ་འབྱོར་བདག་ཅག་ལ། །དམ་ཚིག་གདུང་ཤུགས་རྗེས་དགོངས་ཏེ། །ད་ལྟ་ཉིད་དུ་གཤེགས་སུ་གསོལ། །དར་ནག་ཞིང་གི་གཡབ་མོ་དང༌། །རྐང་གླིང་ཐོད་པའི་རྔས་བསྐུལ་ཞིང༌། །དུད་པའི་སྤོས་སྤྲིན་ཐིབས་སེ་ཐིབ། །སྤྱན་འདྲེན་གནས་འདིར་ད་ཚུར་བྱོན། །ཨོཾ་ཤྲཱི་ཧེ་རུ་ཀ་སརྦ་ནཱ་ཐ་བཛྲ་ཙཎྜ་ས་པ་རི་ཝཱ་ར་བཛྲ་ས་མ་ཡ་ཛཿཛཿ ཞེས་པས་སྤྱན་དྲངས། ཛཿཧཱུྃ་བྃ་ཧོཿ ཨོཾ་བཛྲ་ས་མ་ཡ༔ ས་མ་ཡ་སྨ་ར༔ ས་མ་ཡ་མ་ཏི་ཀྲ་མ༔ ས་མ་ཡ་ཤྲཱི་བཛྲ་དྷརྨ་པཱ་ལ་ཀིང་ཀ་ར་ཨཿཡཿམཿདུཿརུཿཙཿཤཿནཿབཛྲ་ས་མ་ཡ་རཀྵནྟུ་པཉྩ་ཨ་མྲྀ་ཏོ་ད་ཀ་ཋ་ཋ་ཋ་ཧཱུྃ༔ ཞེས་བདུད་རྩི་འཐོར་ལ། ཧཱུྃ༔ ལྷ་རྫས་ལས་གྲུབ་མཆོད་ཡོན་ཞབས་བསིལ་དང༔ མེ་ཏོག་བདུག་སྤོས་མར་མེ་དྲི་བཟང་ཆབ༔ ཞལ་ཟས་རོལ་མོ་གཟུགས་སྒྲ་དྲི་རོ་རེག༔ རྒྱལ་སྲིད་བཀྲ་ཤིས་རྫས་རྟགས་ཕྱི་མཆོད་འབུལ༔ དབང་པོའི་ཕྲེང་བ་ཚིལ་ཆེན་དུད་པའི་སྤྲིན༔ ཞུན་ཆེན་མར་མེ་མྱོས་བྱེད་ཁྲག་མཁྲིས་དུག༔ ཤ་རུས་ཞལ་ཟས་རྐང་གླིང་ཐོད་རྔའི་སྒྲ༔ ཤ་ལྔ་བདུད་རྩི་ལྔ་ཡི་ཨ་མྲྀ་ཏ༔ པདྨ་རཀྟ་བསད་པའི་དམར་ཆེན་པོ༔ འབྲུ་བཅུད་དཀར་མངར་ཤིང་ཐོག་ལ་དུའི་ཟས༔ དམ་རྫས་གཏོར་ཆེན་ནང་གི་མཆོད་པ་འབུལ༔ ཐབས་ཤེས་དགའ་བཞི་བྱང་སེམས་སྦྱོར་མཆོད་དང༔ ཞིང་བཅུ་དགྲ་བགེགས་མ་ལུས་བསྒྲལ་བས་མཆོད༔ མཆོད་བྱ་མཆོད་བྱེད་གཉིས་མེད་དེ་ཁོ་ན༔ གསང་བའི་མཆོད་སྤྲིན་ཆེན་པོ་འབུལ་གྱིས་བཞེས༔ ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཨརྒྷཾ་ནས། ཤབྡ་པཉྩ་ཀཱ་མ་གུ་ཎ་པཱུ་ཛ་ཧོཿ པཉྩ་ཨ་མྲྀ་ཏ་རཀྟ་བ་ལིཾ་ཏ་ཏ་ན་ག་ཎ་དྷརྨ་དྷཱ་ཏུ་པཱུ་ཛ་ཧོཿས་དགྱེས་པ་བསྐྱེད་དོ། གསུམ་པ་སྣང་སྲིད་མོ་རྒྱུད་ཀུན་འདུས་ཀྱི་ཕྲིན་ལས་ནི། ཨོཾ་མ་ཧཱ་ཤཱུ་ནྱ་ཏ་སོགས། སྟོང་པའི་ངང་ལས་དྲག་པོ་ཆོས་སྐྱོང་དགོངས་འདུས་ཀྱི་གཡོན་དུ། སྣང་སྲིད་མ་མོ་མཁའ་འགྲོ་ཡོངས་སུ་འདུ་བའི་ས་གཞི་གདུག་པ་ཅན་བསྒྲལ་བའི་ལོངས་སྤྱོད་ཀྱིས་བརྒྱན་པས་འཇིགས་ཤིང་སྐྱི་གཡའ་བ། མི་བཟད་པའི་ཤ་ཟ་དང་གཅན་སྤྱང་ཀེང་རུས་ཀྱིས་ཡོངས་སུ་བསྐོར་བའི་དབུས་སུ་ཁྲག་གི་རྦ་ཀློང་དྲག་ཏུ་འཁྲུགས་པའི་ཀློང་ན་དཔལ་ལྡན་དུད་སོལ་མ་སྐུ་མདོག་ཆར་སྤྲིན་ལྟར་གནག་པ། སྐུ་ཤིན་ཏུ་རིད་ཅིང་ཀེང་རུས་འཇིགས་པའི་ལུས་ཅན། ཞལ་གཅིག་ཕྱག་བཞི་ཞབས་གཉིས་མ་ཞལ་དུ་མི་རོ་རངས་པ་བཅུག་ནས་མཆེ་བ་བཞི་གཙིགས་པ་སྤྱན་གསུམ་དམར་ཟླུམ་བགྲད་པ། རལ་པ་དམར་སེར་གྱེན་དུ་བརྫེས་ཤིང་དབུ་ལ་སྦྲུལ་དང་ཐོད་པ་ཟླ་ཚེས་ཀྱིས་བརྒྱན་པ། ཕྱག་གཡས་ཀྱི་དང་པོ་ན་རལ་གྲི་འཕྱར་བའི་ཚུལ་གྱིས་འཛིན་ཅིང༌། གཉིས་པ་བྷཉྫ་དམར་སྐྱིལ་ཐུགས་ཀར་འཛིན་པ། གཡོན་དང་པོས་ཤཀྟི་བརྐྱངས་པའི་ཚུལ་གྱིས་འཛིན་ཅིང༌། གཉིས་པས་ཏྲི་ཤུ་ལའི་མགུལ་ནས་དར་དཔྱངས་འཕྱང་བ་ཅུང་ཟད་འགྱིངས་བའི་ཚུལ་གྱིས་འཛིན་པ། སྙན་གཡས་པ་ལ་དུག་སྦྲུལ་གྱིས་བརྒྱན་པའི་མགུལ་ནས་དྲིལ་བུ་བསིལ་བ། གཡོན་དུ་སེང་གེ་རལ་པ་དམར་པོས་བརྒྱན་པ། སྙན་གོང་གཉིས་ན་མེ་ཏོག་དང་དར་ནག་གི་ཅོད་པན་འཕུར་བ། ལྷ་མ་ཡིན་གྱི་མགོ་བོ་རློན་པའི་དོ་ཤལ་བྱས་པ། གླང་པོ་ཆེའི་པགས་པའི་སྟོད་གཡོགས་དང༌། བ་གླང་གི་ཀོ་བས་སྨད་གཡོགས་ཤིང་རེ་ལྡེ་སེར་པོས་སྐུ་སྨད་དྲིལ་བ། ཐལ་ཆེན་གྱི་རྒྱ་དང་ཁྲག་ཞག་གི་ཐིག་ལེས་ཚོམ་བུར་བྲིས་པ་ཀླུའི་དབང་པོ་སྐ་རགས་བྱས་པ། ཞབས་གཉིས་ལྕགས་སྒྲོག་གིས་བརྒྱན་པ། བོང་བུ་གྭ་དམར་གྱི་སྟེང་ན་བཙན་སྐྱིལ་དུ་བཞུགས་ཤིང་ཞལ་གཡོན་ཕྱོགས་སུ་གཟིགས་པ་དུར་ཁྲོད་ཀྱི་དབུས་ན་སྐད་འབྲུག་གི་སྒྲ་ལྟར་སྒྲོགས་ཤིང༌། མ་མོ་མཁའ་འགྲོ་ཤ་ཟ་འབུམ་སྡེའི་དབུས་ན་བཞུགས་པ། ཞིང་སྐྱོང་དུར་ཁྲོད་ཀྱི་མ་མོ་མི་སྡུག་སྲིན་མོའི་ཆས་ཅན་རལ་གྲི་དང་ཐོད་ཁྲག་བསྣམས་ནས་བོང་བུ་ལ་ཞོན་པ་འཁོར་གྱི་ཌཱ་ཀི་བཞི། ལྕམ་དྲལ་མིང་སྲིང་བརྒྱད་སྤྲུལ་པའི་ཤྭ་ན་ཝ་སྤྱང་དྲེད་དང་བཅས་པ། ཤན་པ་སྲོག་སྒྲུབ་ནག་མོ་རྔམས་ཤིང་ཁྲོས་པ་གཡས་ཆུ་གྲི། གཡོན་གློ་སྙིང་ཟ་བ། མི་ལྤགས་ཀྱི་གོས་དང་ཐོད་རུས་སྦྲུལ་གྱིས་བརྒྱན་ཅིང་རླུང་ནག་ལ་ཞོན་པ། ཕོ་ཉ་གདོང་ཅན་གསུམ་སོགས་ཤ་ཟ་མ་མོ་འབུམ་གྱིས་བསྐོར་བ། མཐའ་སྐོར་ཕྱོགས་མཚམས་རྣམས་སུ་གངས་རི་མཐོན་མཐིང་རྒྱལ་མོའི་མགུལ། ཆོས་བཟང་ལྷའི་འདུན་ས་ལྟ་བུའི་སྐྱེད་མོའི་ཚལ་བལྟ་ན་སྡུག་པའི་དབུས་སུ་ལྷའི་གོས་བཟང་དར་དཀར་གྱི་གུར་ཁྱིམ་རྒྱན་བཀོད་ཕུན་སུམ་ཚོགས་པའི་དབུས་སུ་པད་ཟླ་སེང་གེ་དཀར་མོའི་སྟེང་དུ་སྨན་བཙུན་བཀྲ་ཤིས་ཚེ་ཡི་དབང་ཕྱུག་མ་ཆུ་ཤེལ་གྱི་ལྷུན་པོ་ལ་ཉིན་བྱེད་འོད་ཀྱིས་འཁྱུད་པ་ལྟ་བུའི་ལང་ཚོའི་མེ་ཏོག་བལྟ་ན་སྡུག་པ་འཆི་མེད་རྣམ་སད་ཀྱི་བུ་མོའི་ཆ་བྱད་ཅན། སྒེག་འཛུམ་ལང་ཚོ་རྒྱས་པའི་ཕྱག་གཡས་གསེར་གྱི་རྡོ་རྗེ་རྩེ་ལྔ་དང་བཅས་ཏེ་མདའ་དར་གཡབ་པ། གཡོན་འཆི་མེད་ཚེ་ཡི་བུམ་པ་འཛིན་པ། ཞབས་རོལ་སྟབས་ཀྱིས་འཇའ་སྤྲིན་ཟེར་ཕྲེང་འཁྲུགས་པའི་དབུས་ན་བཞུགས་པའི་འཁོར་དུ། མཐིང་གི་ཞལ་བཟང༌། མི་གཡོ་གླང་བཟང༌། ཅོད་པན་མགྲིན་བཟང༌། ཏལ་དཀར་འགྲོ་བཟང་དང༌། སྦས་པའི་ཡབ་ཚོགས་བདག་གླང་གདོང༌། བརྟན་སྐྱོང་ཡ་མ་ལྷ་ཀླུ་གནོད་སྦྱིན་དྲང་སྲོང་རིག་འཛིན་མིའམ་ཅི་དང་དྲི་ཟ་སྨན་གྱི་བུ་མོ་དུ་མས་བསྐོར་བ། ཞིང་སྐྱོང་ལྷན་སྐྱེས་ཌཱ་ཀིའི་རྒྱལ་མོ་སྨན་བཙུན་རྡོ་རྗེ་གཡུ་ཡི་སྒྲོན་མ་དཀར་གསལ་ཟླ་བའི་ཕུང་པོ་ལྟ་བུ་ཞལ་གཅིག་མཛེས་འཛུམ་ཆགས་པའི་ཉམས་ཅན། ཕྱག་གཡས་མདའ་དར་དང་གཡོན་སྣང་སྲིད་གསལ་བའི་མེ་ལོང་འཛིན་པ། ཞབས་རོལ་སྟབས་ཀྱིས་རིན་པོ་ཆེའི་ཁྲི་ལ་བཞུགས་པའི་འཁོར་རིགས་བཞིའི་ཌཱ་ཀི །བརྟན་སྐྱོང་སྨན་བཙུན་གནས་ཡུལ་ཌཱ་ཀི་འབུམ་གྱིས་བསྐོར་བ། ཟབ་ཆོས་རྫོགས་ཆེན་སྡེ་གསུམ་གྱི་བཀའ་སྲུང་གཏུམ་ཆེན་ཁྲོས་མ་མེ་གདོང་དྷཱ་ཀི་དྲག་མོ་གྲི་ཐོད་བསྣམས་པ། འཁོར་ཆུ་སྲིན་དང་སེང་གེའི་གདོང་པ་ཅན། དབྱིངས་ཀྱི་མ་མོ་གྲི་ཐོད་དང་གཤོག་པ་ཅན་རིགས་བཞིའི་ཕོ་ཉས་སྐོར་བ། དམ་ཅན་རྡོ་རྗེ་ལེགས་པ་མཆེད་ཟླ་སུམ་བརྒྱ་དྲུག་ཅུ་དགྱེས་སྡེ་བརྟན་མའི་ཚོགས་དང་བཅས་པ། ལྷ་རྒྱལ་གསལ་བའི་འོད་ལྡན་དཀར་པོ་འཁོར་ལོ་དང་དང་ནོར་བུ། བཙན་རྒྱལ་བསྐལ་པའི་མེ་འབར་དམར་ནག་མདུང་དང་ཞགས་པ། ཀླུ་རྒྱལ་ནོར་འཛིན་གཞོན་ནུ་དམར་སྔོན་ནོར་བུ་དང་གཏེར་བུམ་བསྣམས་ཤིང་རང་མདོག་གི་རྟ་ལ་ཞོན་པ། དབྱིངས་ཕྱུག་ཆོས་ཀྱི་སྒྲོན་མ་དཀར་གསལ་ལྷའི་ཆས་ཅན་ཌཱ་རུ་དང་ཐོད་པ་ནོར་བུའི་གང་བ་བསྣམས་ནས་རྟ་སྔོན་ལ་ཆིབས། ཟིན་གྱི་རྡོ་རྗེ་ཀུན་བཟང་རྡོ་རྗེ་དང་ཚེ་བུམ་འཛིན་པ་སེང་གེ་ལ་ཆིབས་པ་གནམ་མཚོ་རྡོ་རྗེ་ཀུན་གྲགས་ཆུ་སྲིན་རྒྱལ་མཚན་དང་མེ་ལོང་འཛིན་པ་གཡུ་འབྲུག་ལ་ཆིབས་པ། མགོ་ཡུལ་ཧ་རི་རྡོ་རྗེ་ཡ་མ་ཤ་ལང་དང་ཞགས་པ་བསྣམས་ནས་རྐྱང་བུ་ཁ་དཀར་ལ་ཆིབས་པ། ཡར་འབྲོག་རྡོ་རྗེ་བགེགས་གཙོ་རུ་མཚོན་རྩེ་ལྔ་དང་ཞགས་པ་བསྣམས་ནས་དྲེལ་སྔོན་ལ་ཆབས་པ་སྟེ་ནག་མོ་བཞིན་མི་སྡུག་པའི་བདུད་ཀྱི་བུ་མོ་བཞི། ལྷ་བུ་ཤ་མེད་རྡོ་རྗེ་གཡུ་བུན་གསེར་ཟོར་གཏེར་བུམ་བསྣམས་ནས་ཤ་བ་ཡུ་མོ་ལ་ཆིབས་པ། ཁ་རག་རྡོ་རྗེ་ཁྱུང་བཙུན་ཌཱ་རུ་མེ་ལོང་བསྣམས་ནས་ཁྱུང་ལ་ཆིབས་པ། བྱང་སྟོད་མཁའ་ལྡིང་ཀླུ་མོ་སྦྲུལ་ཞགས་ཕུར་པ་བསྣམས་ནས་རྟ་སེར་ལ་ཆིབས་པ། རྨ་རི་རབ་འབྱམས་བེ་ཅོན་ཟས་གཞོང་བསྣམས་ནས་འཕར་བ་ལ་ཆིབས་པ་སྟེ་དམར་མོ་གནོད་སྦྱིན་གྱི་བུ་མོ་བཞི། ཀོང་བཙུན་རྡོ་རྗེ་དེ་མོ་མདའ་དར་དང་སྒྲོམ་བུ་བསྣམས་ནས་རྟ་སྔོན་གཡུ་རྔོག་ལ་ཆིབས་པ། ཨེ་གཉལ་རྡོ་རྗེ་སྨན་གཅིག་དར་དཀར་འབྲང་རྒྱས་བསྣམས་ནས་མཛོ་མོ་ལ་ཆིབས་པ། གཙང་གི་རྡོ་རྗེ་གཡར་མོ་ཕྱག་གཉིས་ཏིང་ཤག་བསྣམས་ནས་རུས་སྦལ་མགོ་དགུ་ལ་ཆིབས་པ། ཕུད་ཀྱི་གཡུ་དྲིལ་གཟུགས་ལེགས་པདྨ་དང་དྲིལ་བུ་བསྣམས་ནས་སྟག་མོ་ལ་ཆིབས་པ་དཀར་ཤམ་བཞིན་བཟང་སྨན་གྱི་བུ་མོ་བཞི་སྟེ་བོད་ཁམས་སྐྱོང་བའི་བརྟན་མ་ཆེན་མོ་བཅུ་གཉིས་ལ་སྤྲུལ་པ་སྐྱོང་མ་ཡ་མ་འབུམ་ཕྲག་ཡངས་པའི་ཌཱ་ཀིའི་ཚོགས་ཀྱིས་བསྐོར་པ། གཏེར་སྲུང་རྡོ་རྗེ་ཁྱུང་བཙུན་མ་དམར་གསལ་ཌཱ་རུ་དང་མེ་ལོང་ཐོགས་ཤིང་ལྷའི་བུ་མོའི་ཆས་ཅན་ཁྱུང་ལ་ཆིབས་པ། ཤྭ་ན་མུ་ཁ་མཐིང་ནག་ལྕགས་སྤྱང་མགོ་དགུ་ལ་ཞོན་པ་ཡབ་སྲིན་པོའི་སྐྱེས་བུ། ཤི་ཀ་མུ་ཁ་ལྗང་ནག་གཡུ་ཡི་ཁྱི་མོ་ལ་ཞོན་པ་ཡབ་གཤིན་རྗེའི་སྐྱེས་བུ། ཏྲི་ཏ་མུ་ཁ་སེར་ནག་གསེར་འཕར་ལྕེ་བརྒྱད་ལ་ཞོན་པ་ཡབ་བདུད་ཀྱི་སྐྱེས་བུ། སྲི་ལ་མུ་ཁ་དམར་ནག་ཟངས་ཀྱི་ཝ་མོ་རྐང་གསུམ་ལ་ཞོན་པ་ཡབ་གནོད་སྦྱིན་གྱི་སྐྱེས་བུ་དང་བཅས་རང་མདོག་གི་ཕུར་པ་འདྲིལ་བ་སྟེ་ཤྭ་ན་མ་བཞི། རེ་མ་ཏི་ནག་མོ་དྲེལ་རྟ་རྐང་གསུམ་ལ་ཆིབས་པ་ཤར་བདུད་དཀར་པོ་ཅན། རེ་མ་ཏྲི་སེར་ནག་ཤ་བ་ཡུ་མོ་ལ་ཆིབས་པ་ལྷོ་བདུད་སྔོན་པོ་ཅན། རེ་མ་ཛ་དམར་ནག་ཆུ་གླང་སྔོན་པོ་ལ་ཆིབས་པ་ནུབ་བདུད་དམར་པོ་ཅན། རེ་མ་ཛུ་ལྗང་ནག་རྔ་མོང་ལ་ཆིབས་པ་བྱང་བདུད་ལྗང་ནག་ཅན་བཞི་ཀའང་མཆོག་ཕུར་འདྲིལ་བ་སྟེ་བདག་ཉིད་མ་བཞི། ཡ་བྱིན་མཐིང་ནག་བདུད་རྟ་ཆིབས་ཤིང་སྲིན་པོའི་གིང་དཀར་པོ་དང་བཅས་པ། དེ་བྱིན་སེར་ནག་གཟའ་རྟ་ཆིབས་ཤིང་གཤིན་རྗེའི་གིང་སྔོན་པོ་དང་བཅས་པ། བསེ་བྱིན་དམར་ནག་བཙན་རྟ་ཆིབས་ཤིང་བདུད་གིང་དམར་པོ་དང་བཅས་པ། ཕག་བྱིན་ལྗང་ནག་ཀླུ་རྟ་ཆིབས་ཤིང་གནོད་སྦྱིན་གིང་སེར་པོ་དང་བཅས་པ་ཀུན་ཀྱང་རང་མདོག་གི་ཕུར་པ་ཐོགས་པའི་ས་བདག་མ་བཞི། གཞན་ཡང་བསྭེ་ལྕགས་དུང་གི་སྐྱེས་བུ་ཏཱ་ཀི་ནག་པོ་སྟེ་གིང་ཆེན་བཞི། འབྱུང་པོ་སེར་པོ། དཀར་མོ་ཉི་ཟླ་ཐོད་ཕྲེང༌། སྲིན་པོ་ཤ་ཟ་རོ་ལངས་ཁྱུང་ཆེན་ཝ་སྤྱང་སོགས་སྤྲུལ་པའི་ཕོ་ཉ་དང༌། བཀའ་སྡོད་ལྷ་བཙན་བདུད་ཀྱི་དགེ་བསྙེན་ཉེར་གཅིག །ཚ་བའི་བརྟན་མ་བཅུ་གཉིས་རྣམས་དང༌། ཞི་རྒྱས་དབང་དྲག་སྒྲུབ་པའི་ཕོ་ཉ་དབང་ཕྱུག་ཉི་ཤུ་རྩ་བརྒྱད་སོགས་སྣང་སྲིད་མོ་རྒྱུད་ཀྱི་ཚོགས་འབུམ་ཕྲག་ཡངས་པ་ཆེན་པོའི་ཚོགས་དང་བཅས་པ་མ་ལུས་པའི་རྣམ་འགྱུར་ཆ་བྱད་རྫོགས་པའི་གཟུགས་འཆང་ཞིང་ཕྲིན་ལས་འདོད་རྒུའི་རྩལ་འཆང་བས་སྒྲུབ་པ་པོའི་རེ་འདོད་ཡིད་བཞིན་སྐོང་བའི་ཚུལ་གྱིས་གནས་པའོ།  །དེ་རྣམས་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་ཆོས་དབྱིངས་ཡུམ་གྱི་མཁའ། གནས་ཡུལ་དུར་ཁྲོད་ཆོས་འཁོར་གཙུག་ལག་གཉན་པོ་གར་བཞུགས་ནས་སྤྱན་དྲངས་པར་གྱུར་པར་བསམ་ལ། བཤུགས་གླུ་རྐང་གླིང་ཧསྟིའི་གཡབ་མོ་སྤོས་རོལ་དང་བཅས་ཏེ། ཧཱུྃ་བྷྱོཿ དད་པ་དང་ནི་དམ་ཚིག་གིས༔ ཚུར་གཤེགས་ཚུར་གཤེགས་འདོད་ཁམས་དབང༔ གཤིན་རྗེའི་ལྕམ་མོ་བདུད་ཀྱི་ཡུམ༔ ཧེ་རུ་ཀ་དཔལ་དགྱེས་སྡེ་མོ༔ བདེ་ཆེན་དུད་པའི་སོལ་བ་ཅན༔ གཙོ་འཁོར་བྲན་དང་ཡང་གཡོག་བཅས༔ སྣང་སྲིད་མ་གཤིན་བྱེ་བའི་ཚོགས༔ སངས་རྒྱས་བསྟན་པ་བསྲུང་བ་དང༔ ཉམས་པའི་དགྲ་བགེགས་བསྒྲལ་བའི་ཕྱིར༔ གནས་འདིར་གདུང་བས་སྤྱན་འདྲེན་ན༔ ལས་ལ་མ་གཡེལ་ད་ཚུར་བྱོན༔ བྷྱོཿ ཆོས་དབྱིངས་ཡུམ་གྱི་མཁའ་ཀློང་ནས། །ཨེ་ཀ་ཙཱ་ཏི་གཤེགས་སུ་གསོལ། །གཤིན་རྗེའི་ལྕམ་མོ་བདུད་ཀྱི་ཡུམ། །དུད་པའི་སོལ་མ་གཤེགས་སུ་གསོལ། །གནས་ཡུལ་དུར་ཁྲོད་དཀོར་གྱི་བདག །ཞིང་སྐྱོང་མ་མོ་གཤེགས་སུ་གསོལ། །དུར་ཁྲོད་གནས་ནས་མཁའ་འགྲོའི་གཙོ། །མི་སྲུན་ཤན་པ་གཤེགས་སུ་གསོལ། །ལྷན་ཅིག་སྐྱེས་མ་ཞིང་སྐྱོང་རྒྱལ། །ཚེ་རིང་མཆེད་ལྔ་གཤེགས་སུ་གསོལ། །རིག་འཛིན་ཡོངས་ཀྱི་བཀའ་ཉན་གཙོ། །རྡོ་རྗེ་གཡུ་སྒྲོན་གཤེགས་སུ་གསོལ། །དབྱིངས་ཕྱུག་བདེ་ཆེན་ཌཱ་ཀིའི་གཙོ། །ཆོས་ཀྱི་སྒྲོན་མ་གཤེགས་སུ་གསོལ། །བོད་ཡུལ་མཐའ་དབུས་གནས་གཏེར་བདག །བརྟན་མ་བཅུ་གཉིས་གཤེགས་སུ་གསོལ། །ཟབ་གསང་སྡེ་གསུམ་བཀའ་གཏེར་སྲུང༌། །མ་མོ་ལྕམ་དྲལ་གཤེགས་སུ་གསོལ། །རྡོ་རྗེ་ཕུར་པའི་བཀའ་སྲུང་ཆེ། །ཤྭ་ན་ལྕམ་དྲལ་གཤེགས་སུ་གསོལ། །ཆོས་ཀུན་བདེ་ཆེན་མཁའ་ཀློང་དུ། །ཐབས་ཤེས་སྡོམ་པའི་ཕོ་ཉ་བ། །དངོས་གྲུབ་རྒྱ་མཚོ་ཕྲིན་ལས་གཏེར། །མ་མོ་འཁོར་བཅས་གཤེགས་སུ་གསོལ། །ཨོཾ་ཤྲཱི་དི་ཝཱི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿམ་མ་ཡ་མ་ས་པ་རི་ཝཱ་ར་ཨེ་ཨཱ་རལླི་ཧྲཱིཾ་ཧྲཱིཾ་ཛཿཛཿ ཛཿཧཱུྃ་བྃ་ཧོཿ ས་མ་ཡ་ཧོཿ ས་མ་ཡ་སྟྭྃ༔ ཧཱུྃ༔ དུར་ཁྲོད་གནས་མཆོག་ཕོ་བྲང་འདིར༔ དགྲ་བགེགས་བསྣོལ་བའི་གདན་སྟེང་དུ༔ མ་སྲིང་མཁའ་འགྲོ་དམ་ཅན་རྣམས༔ ཕྲིན་ལས་སྒྲུབ་ཕྱིར་བཞུགས་སུ་གསོལ༔ ཛཿཧཱུྃ་བྃ་ཧོཿ ས་མ་ཡ་ཏིཥྛ་ལྷན༔ ཞེས་བཞུགས་སུ་གསོལ། ཧཱུྃ་བྷྱོཿ རྡོ་རྗེ་འཆང་དབང་སྤྱི་དཔལ་ཆེ༔ རྩ་བརྒྱུད་བླ་མས་གཉེར་གཏད་ལྟར༔ ཁྲག་འཐུང་ཆེན་མོ་འཁོར་བཅས་ཀྱིས༔ དམ་ཚིག་བདུད་རྩི་འདི་གསོལ་ལ༔ དགྱེས་པའི་ཞལ་སྟོན་གཟི་བྱིན་སྐྱེད༔ གསལ་བའི་ལུང་སྩོལ་ནུས་པ་སྤོར༔ ཐུགས་ཀྱིས་དགོངས་ལ་བདེ་ཆེན་སྒྲུབས༔ བཅོལ་བའི་ལས་ཀུན་མྱུར་དུ་མཛོད༔ བཛྲ་ཨ་མྲྀ་ཏ་ས་མ་ཡ་རཀྵནྟུས་དམ་ལ་བཞག་ཅིང་བཀའ་བསྒོ། ཧཱུྃ༔ ཧེ་རུ་ཀ་ཡི་དབྱིངས་ཉིད་ལས༔ ཡེ་ཤེས་རོལ་པའི་དམ་ཅན་ཚོགས༔ ཐབས་ཀྱི་སྐུར་བསྟན་རྫུ་འཕྲུལ་ཅན༔ སྲུང་མ་རྣམས་ལ་ཕྱག་འཚལ་ལོ༔ ན་མོ་ན་མ་ཡེ་ཞེས་ཕྱག་གིས་བཏུད། ཧཱུྃ་བྷྱོཿ སྟོང་ཉིད་དབྱིངས་ལས་བདེ་བའི་རྩལ༔ རྣམ་པ་དུ་མར་འཆར་བ་ཡི༔ ཕྱི་ནང་ཉེར་སྤྱོད་འདོད་ཡོན་དང༔ སྨན་རཀ་གཏོར་ཚོགས་རྒྱ་མཚོས་མཆོད༔ མཐུན་རྫས་རྟེན་རྫས་སྒྲུབ་རྫས་ཀྱིས༔ ཐུགས་དམ་བསྐང་ཞིང་ཉམས་ཆགས་བཤགས༔ གནས་སྐབས་མཐར་ཐུག་དངོས་གྲུབ་ཀྱི༔ འདོད་པའི་འབྲས་བུ་མཆིས་པར་མཛོད༔ ཨོཾ་བཛྲ་ཨརྒྷཾ་ནས། ཤབྡ་སརྦ་པཱུ་ཛ་ཧོ༔ མ་ཧཱ་པཉྩ་ཨ་མྲྀ་ཏ་ཁཱ་ཧི༔ མ་ཧཱ་རཀྟ་ཁཱ་ཧི༔ མ་ཧཱ་མཱྃ་ས་རཀྟ་གོ་རོ་ཙ་ན་བ་སུ་ཏ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཞེས་མཆོད་པ་འབུལ། བཞི་པ་ནོར་ལྷ་གཏེར་བདག་ཀུན་འདུས་ཀྱི་ཕྲིན་ལས་ནི། ཨོཾ་མ་ཧཱ་ཤཱུ་ནྱ་ཏ་སོགས། སྟོང་པ་ཉིད་ཀྱི་ངང་ལས་རྩ་བའི་དཀྱིལ་འཁོར་ཆེན་པོའི་མདུན་དུ་འདོད་རྒུ་ལྷུན་གྲུབ་གཏེར་གྱི་དགའ་ཚལ་རིན་ཆེན་གཏེར་འཆང་རྒྱ་མཚོ་ཡོངས་སུ་འདུ་བའི་གཞལ་མེད་ཁང་ལྕང་ལོ་ཅན་དགའ་བའི་ཚལ་ཆེན་པོ་རིན་པོ་ཆེའི་ཕོ་བྲང་དབྱིབས་ལེགས་ཤིང་བལྟ་ན་སྡུག་པ་རྒྱན་གྱིས་སྤྲས་པ་སུམ་བརྩེགས་ས་འོག་ཏུ་གཏེར་གྱི་ཁང་པ་བཅོ་ལྔ་དང་བཅས་ཤིང༌། ཁོར་ས་རིམ་པ་གསུམ་གྱིས་བསྐོར་བའི་འོག་ཁང་གི་ལྟེ་བར་པད་ཉི་དགྲ་བགེགས་ཀྱི་སྟེང་དུ་ཧཱུྃ་ལས་གསང་བའི་བདག་པོ་གོས་སྔོན་ཅན་མཐིང་ནག་རྡོ་རྗེ་དང་དྲིལ་བུ་འཛིན་པ་དར་དང་རིན་ཆེན་དུར་ཁྲོད་ཀྱི་ཆས་གོས་ཡོངས་སུ་རྫོགས་པའི་མདུན་བཀའ་སྡོད་ཀྱི་ཚུལ་དུ་སྐུའི་གནོད་སྦྱིན་དབང་པོ་རྣམ་ཐོས་སྲས་སྐུ་མདོག་སེར་གསལ་བརྗིད་ཅིང་དཔའ་བ། གསེར་གྱི་གོ་ཁྲབ་དང་ལྷ་རྫས་ཀྱི་ན་བཟས་བཀླུབས་པ། ཕྱག་གཉིས་རྒྱལ་མཚན་དང་ནེའུ་ལེ་འཛིན་པས་སེང་གེའི་གདན་ལ་འགྱིང་སྟབས་སུ་བཞུགས་པ་ལ་ཡུམ་དཔལ་ལྷ་མོ་དང༌། འཁོར་དུ་ཚངས་པ་སེར་པོ། བརྒྱ་བྱིན་དཀར་པོ། ཛམ་ལྷ་དམར་པོ། ཚོགས་བདག་དམར་པོ་དང༌། སྒོ་མ་མཁའ་འགྲོ་བཞིས་བསྐོར་བ། བར་ཁང་དུ་གསུང་གི་རྣམ་སྲས་མདུང་དམར་ཅན་བརྗིད་ཆགས་སྒེག་པའི་ཚུལ་ལ་བསྭེ་ཡི་རྨོག་དར་དམར་གྱི་འཕྲུ་དང་ན་བཟའ་ནོར་བུ་ཨུཏྤལ་དམར་པོའི་བརྒྱན་ཅིང༌། གཡས་མདུང་དམར་དང་ནོར་རྐྱལ། གཡོན་ལྕགས་ཀྱུ་དང་རྒྱལ་མཚན་འཛིན་པས་འགྱིང་སྟབས་སུ་བཞུགས་པའི་འཁོར་དུ་གཟའ་བདུད་འབར་བ་གནམ་ཐེལ་སྒྲོལ་གིང༌། དྷཱ་ན་ཀ་ལ་ཤན་པ་ཀླུ་བདུད་སྒོ་བ་བཞིས་བསྐོར་བ། སྟེང་ཁང་དུ་པད་ཉི་དགྲ་བགེགས་ཀྱི་གདན་ལ་ཐུགས་ཀྱི་རྣམ་སྲས་དྲག་པོ་རྟ་སྔོན་ཅན་མཐིང་ནག་ལྕགས་ཀྱི་བྱ་ཁྲ་དང་སེང་གེ་གཡུ་འབྲུག་སྟག་གཟིག་ཁྱི་སྤྱང་རྣམས་རོལ་དུ་ཁྲིད་པ། འཁོར་དུ་བདུད་མོ་མཆེད་བཞི་དང༌། སྒོ་སྲུང་རྒྱལ་ཆེན་སྡེ་བཞི་གཞོན་པ་དང་བཅས་པ་སོགས་སྤྲུལ་པ་དམག་དཔུང་བསམ་གྱིས་མི་ཁྱབ་པས་བསྐོར་བའི་གཞལ་མེད་ཁང་གི་ཕྱི་རོལ་ཁོར་ས་དང་པོ་ལ་ཁང་བརྩེགས་བརྒྱད་ཀྱི་ནང་དུ་རྟ་བདག་ཆེན་པོ་བརྒྱད། ཁོར་ས་བར་མར་ཀླུ་ཆེན་བརྒྱད། ཁོར་ས་ཐ་མ་ན་གནོད་སྦྱིན་གྱི་དམག་དཔུང་དང་བཅས་ཏེ་བཞུགས་པའི་ཕྱོགས་བཞིར་པད་ཟླའི་སྟེང་དུ་རྡོ་རྗེ་རིན་ཆེན་པདྨ་ལས་ཀྱི་ཛམ་བྷ་ལ་རིགས་བཞི་དཀར་སེར་དམར་ལྗང་གཡས་རྡོ་རྗེའི་བེ་ཅོན་རིན་པོ་ཆེ་པདྨའི་ལྕགས་ཀྱུ་ཐོད་ཁྲག་དང་གཡོན་ནེའུ་ལེ་འཛིན་པ་དར་དང་ནོར་བུ་པདྨའི་ཕྲེང་བས་བརྒྱན་པ་གནོད་གནས་དབང་པོའི་ངང་ཚུལ་ཅན། ཤར་ལྷོར་ལྷའི་ནོར་བདག་ཚོགས་བདག་གླང་གདོང་དཀར་པོ་ལ་ཕུག་དང་ནོར་བུ་བསྣམས་པ། ལྷོ་ནུབ་ཏུ་མིའི་ནེར་བདག་ནོར་གྱི་རྒྱུན་མ་གསེར་མདོག་མཆོག་སྦྱིན་དང་འབྲས་ཀྱི་སྙེ་མ་ཅན། ནུབ་བྱང་དུ་ཀླུའི་ནོར་བདག་རིག་བྱེད་མ་དམར་གསལ་པདྨའི་ལྕགས་ཀྱུ་དང་ཞགས་པ་ཅན། བྱང་ཤར་དུ་གནོད་སྦྱིན་ནོར་བདག་རྣམ་ཐོས་སྲས་རིན་པོ་ཆེའི་རྒྱལ་མཚན་དང་ནེའུ་ལེ་བསྣམས་པ། དེའི་ཕྱི་རོལ་གྱི་གྲ་བཞིར་རིན་པོ་ཆེ་དབྱིག་གི་ནོར་བདག་ནོར་བུ་བཟང་པོ་དཀར་སེར་ནོར་བུ་དང་ནེའུ་ལེ་བསྣམས་པ། ཅང་ཤེས་རྟའི་ནོར་བདག་རེ་མནྟ་གསེར་མདོག་ཤེལ་གྲི་དང་ནེའུ་ལེ་འཛིན་པ། འདོད་རྒུ་ཟས་ནོར་གྱི་ནོར་བདག་གནོད་སྦྱིན་དམར་པོ་དབང་མདོག་མདུང་དར་དང་རིན་ཆེན་བསྣམས་པ། རྐང་བཞི་ཕྱུགས་ཀྱི་ནོར་བདག་ཀུ་བེ་ར་མཐིང་ནག་རལ་གྲི་དང་ནེའུ་ལེ་འཛིན་པ་གོ་ཁྲབ་ཅན་རང་མདོག་གི་རྟ་ལ་ཆིབས་པ་རྣམས་དང༌། དེ་དག་གི་གཡས་སུ་ཉམས་དགའ་བའི་སྐྱེད་ཚལ་གྱི་དབུས་སུ་རིན་པོ་ཆེའི་ལྗོན་ཤིང་མེ་འབྲས་དམར་པོ་བཀྲ་བའི་རྩེར་ཨུཏྤལ་དང་ཉི་མའི་གདན་ལ། ནོར་གྱི་ལྷ་མོ་མཐིང་ག །གོས་ཀྱི་ལྷ་མོ་ལྗང་གུ། ཟས་ཀྱི་ལྷ་མོ་དམར་པོ་སྟེ་དྷཱ་ཀི་ཀུན་འཁྱིལ་མཆེད་གསུམ་གནོད་སྦྱིན་གྱི་བུ་མོ་སྒེག་ཚུལ་ཅན་དར་དང་རིན་ཆེན་རུས་པས་བརྒྱན་པ་ཐམས་ཅད་གཡས་གསེར་གྱི་དགྲ་སྟྭ་དང་གཡོན་ཐོད་པ་ནོར་བུའི་གང་བ་བསྣམས་ཏེ་བཞེངས་སྟབས་སུ་བཞུགས་པ། གཡོན་ཕྱོགས་སུ་དུར་ཁྲོད་ཀྱི་ས་གཞིར་པད་ཉི་དུང་དང་མགྲོན་བུའི་སྟེང་དུ་དཔལ་དུར་ཁྲོད་ཀྱི་བདག་པོ་ཡབ་ཡུམ་ཀེང་རུས་ཀྱི་གཟུགས་ཅན་ཁྲོ་ལ་སྒེག་པ་བཤུགས་གླུའི་གནས་ཡུལ་གྱི་དཔའ་བོ་མཁའ་འགྲོ་དབང་དུ་སྡུད་པ། ཐོད་སྐམ་གྱི་དཔུང་རྒྱན་སྣ་ཚོགས་དར་གྱི་སྟོད་གཡོགས་དང་ཅོད་པན་རིན་པོ་ཆེའི་དོ་ཤལ་ཅན། སྟག་གཟིག་གི་ཤམ་ཐབས་གསོལ་བ། ཞབས་གར་སྟབས་ཀྱིས་སྦྲེལ་ཏེ་མེ་དཔུང་གི་དབུས་ན་བཞུགས་པ་རང་འདྲའི་སྤྲུལ་པས་ཀུན་ཏུ་ཁྱབ་པར་སྤྲོ་བའོ།  །རྒྱབ་ཏུ་པདྨ་རཱ་ག་ལས་གྲུབ་པའི་གཞལ་ཡས་ཁང་དམར་པོ་ཟླ་གམ་སྒོ་གཅིག་པའི་དབུས་སུ་པད་ཉི་ལ་ལྷ་ཆེན་དབང་ཕྱུག་ཆེན་པོ་སྐུ་མདོག་དམར་པོ་ཞལ་གཅིག་ཕྱག་གཉིས་ཆགས་པ་དང་སྒེག་པའི་ཉམས་ཅན་སྤྱན་གསུམ་དང་ལྡན་པ། གཡས་ལྕགས་ཀྱུ་དང་གཡོན་ཞགས་པ་འཛིན་པ། དབུ་སྐྲ་རལ་པའི་ཐོར་ཚུགས་ཟུར་ཕུད་ཟླ་ཚེས་ཀྱིས་བརྒྱན་པ། ཡུམ་ཨུ་མ་དེ་ཝི་དམར་གསལ་གཞོན་ནུ་ལང་ཚོ་རྒྱས་པ་གཡས་མེ་ལོང་དང་གཡོན་བུམ་པ་འཛིན་པ་བདེ་བའི་ཉམས་ཀྱི་ཡབ་དང་འཁྲིལ་པ། དབང་མདོག་གི་དར་དང་རིན་པོ་ཨུཏྤལ་དམར་པོའི་ཕྲེང་བས་བརྒྱན་པ། ཕྱོགས་བཞིར་གསང་བའི་ཌཱ་ཀི་རིགས་བཞི་སོགས་ཁམས་གསུམ་གྱི་དྲེགས་པ་ཅན་གྱིས་བསྐོར་བ། མདུན་ཕྱོགས་སུ་རིགས་གསུམ་ཀུན་འདུས་པདྨའི་ཟློས་གར་སྐྱེས་བུ་ཆེན་པོ་འཁོར་ལོའི་བསྒྱུར་བའི་ཆས་ཅན། གསེར་འཁོར་དང་ནོར་བུ་འཛིན་པ་ལ་ཞབས་རྒྱལ་པོ་རོལ་སྟབས་ཀྱིས་སེང་གེའི་ཁྲི་ལ་བཞུགས་པ། འཁོར་དུ་དཀར་ཕྱོགས་ཀྱི་ཆོས་སྐྱོང་གཙང་རིས་ཀྱི་དཔལ་མགོན། དགྲ་ལྷ་ཝེར་མ། ཐུགས་ཀར་ཅང་སེའི་དམག་ཚོགས། རྫུ་འཕྲུལ་རླུང་རྟ་ལྷ་བཞི། འབྲོག་གཡག་དར་མ་བཅུ་གསུམ། དགྲ་བླའི་དྲ་མ་མཆེད་དགུ། མགོན་པོ་དགྲ་བླ་བཅུ་གསུམ་སོགས་མ་ཚང་བ་མེད་པས་བསྐོར་ཏེ་གནམ་ས་བར་སྣང་གི་ཁྱོན་དུ་རྒྱུ་བ། གཞན་ཡང་སྤར་སྨེ་གཟའ་སྐར་ལོ་ཟླ་ཞག་དུས་རྟེན་འབྲེལ་ཚེས་ལྷ་གནས་གཞི་ཡུལ་གྱི་བདག་པོ་འཇིག་རྟེན་སྐྱོང་བའི་ལྷ་ཆེན་པོ་གཉན་ཆེན་སྡེ་བཞི། སྒང་དྲུག་གཞི་བདག་བཅུ་གཉིས། ཆུ་བཞིའི་དགེ་བསྙེན་ཆེན་པོ་བཞི་ལ་སོགས་པ་མདོ་ཁམས་གནས་ཆེན་ཉེར་ལྔའི་ཡུལ་སྐྱོང་ཟོ་དོར་སྡེ་དཔུང་དང་བཅས་པ་རང་རང་གི་ལས་དང་རྣམ་འགྱུར་གྱི་བཀོད་པ་མ་འདྲེས་པས་བཞུགས་པའོ།  །དེ་རྣམས་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་ལྕང་ལོ་ཅན་དགའ་བའི་ཚལ། ཚངས་པའི་གནས་སོ་ས་གླིང་དང་ཧ་ཧར་དགོད་པའི་དུར་ཁྲོད། མཁའ་སྤྱོད་མཐོང་བ་ཀུན་སྨོན་སོགས་གནས་ཡུལ་སྤྲུལ་པའི་ཕོ་བྲང་རྣམས་ནས་སྤྱན་དྲངས་པར་གྱུར། སྦྱར་སྤོས་དང་དར་སྣའི་གཡབ་མོ་སྙན་འགྱུར་གྱི་རོལ་མོ་དང་བཅས་ཏེ། བཻ༔ ཆོས་སྐུའི་དབྱིངས་ལས་ལོངས་སྤྱོད་རྫོགས་པའི་ངང༔ མ་གཡོས་བཞིན་དུ་སྤྲུལ་པའི་ཞིང་ཁམས་སྣང༔ དེ་ལས་མི་མཇེད་འཇིག་རྟེན་བྱང་གི་ཕྱོགས༔ ལྕང་ལོ་ཅན་ནས་བཅོམ་ལྡན་གསང་བའི་བདག༔ འཁོར་དང་བཅས་པ་གནས་འདིར་སྤྱན་འདྲེན་གྱི༔ ད་ལྟ་ཉིད་དུ་དགྱེས་པས་གཤེགས་སུ་གསོལ༔ བསོད་ནམས་ཡེ་ཤེས་ཚོགས་གཉིས་རྫོགས་པ་ལས༔ བྱང་ཆུབ་སེམས་དཔའ་ལག་ན་རྡོ་རྗེ་དངོས༔ ས་བརྒྱད་སེམས་དཔའ་དཔལ་ལྡན་ངལ་བསོས་པོ༔ ངོ་བོ་གཅིག་ལ་སྐུ་གསུམ་རྣམ་འཕྲུལ་ཚུལ༔ རབ་འབྱམས་ནོར་ལྷ་གཏེར་བདག་དཀར་ཕྱོགས་སྐྱོང༔ བཙུན་མོ་སྲས་བློན་འཁོར་དང་བཅས་པ་རྣམས༔ དམ་ཚིག་དབང་གིས་གནས་འདིར་སྤྱན་འདྲེན་ན༔ ཐུགས་དམ་དབང་གིས་མྱུར་དུ་གཤེགས་སུ་གསོལ༔ བཛྲ་ས་མ་ཛཿས་སྤྱན་དྲངས། ས་མ་ཡ་ཏིཥྛ་ལྷན་གྱིས་བཞུགས་སུ་གསོལ། བཛྲ་ས་མ་ཡ་ཧཱུྃ་གིས་དམ་ལ་བཞག །ཨ་ཏི་པཱུ་ཧོཿ པྲ་ཏིཙྪ་ཧོཿས་ཕྱག་བྱ། ཧཱུྃ༔ བཅོམ་ལྡན་གསང་བདག་གོས་སྔོན་རྡོ་རྗེ་འཛིན༔ རྒྱལ་ཆེན་སྲས་བློན་འཁོར་ཚོགས་བཅས་རྣམས་ལ༔ ཕྱི་ནང་གསང་མཆོད་སྲིད་ཞིའི་དཔལ་འབྱོར་སོགས༔ མི་ཟད་ནམ་མཁའ་མཛོད་ཀྱི་འཁོར་ལོས་མཆོད༔ ཨོཾ་བ་སུ་དེ་ཝ་ག་ཎ་མཎྜ་ལ་བཛྲ་ཨརྒྷཾ་སོགས། ཤབྡ་པཉྩ་ཀཱ་མ་གུ་ཎ་ཨ་མྲྀ་ཏ་རཀྟ་བ་ལིཾ་ཏ་དགྲ་བགེགས་མཱ་ར་ཡ་ཕཊ་པཱུ་ཛ་ཧོཿ གཉིས་པ་གཏོར་མ་འབུལ་བ་ནི། ལྷ་རྣམས་ཀྱི་ལྗགས་ཧཱུྃ་ལས་བྱུང་བའི་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བས་བདེ་བ་ཆེན་པོའི་རང་བཞིན་དུ་ཚིམ་པར་བསམ་ཞིང༌། རྡོ་རྗེའི་ཐལ་མོ་གྱེན་དུ་ཕྱེ་བ་བསྟན་ལ། ཨོཾ་བྷུ་རུ་ཀུ་རུ་ཨི་ཙ་ཀི་བྱི་ཨུ་ཙུཥྨ་མ་ཧཱ་ཀྲོ་དྷ་ཧཱུྃ་ཕཊ༔ ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་མ་ཧཱ་ཀཱ་ལ་ཨེ་ཀ་ཛ་ཊི་གུ་ཎ་ཧྲཱི་ད་ཧཱུྃ་ཕཊ༔ ཨོཾ་བཛྲ་མ་ཧཱ་ཀཱ་ལ་ཏྲི་ཡྃ་ཛཿཛཿ དགྲ་བོ་མཱ་ར་ཡ་ཧཱུྃ་ཕཊ༔ ཨོཾ་བཛྲ་མ་ཧཱ་ཀཱ་ལ་ཀྵེཾ་ཀྵེ་ཏྲ་བིགྷྣཱན་བི་ན་ཡ་ཀ་ཧཱུྃ་ཧཱུྃ་ཕཊ༔ ཨོཾ་ཤྲཱི་མ་ཧཱ་ཀཱ་ལ་གུ་ཧྱ་པ་ཏི་དུ་བྷྱོ་པཉྩ་ནཱ་ཐ་ཧཱུྃ་ཕཊ༔ ཨོཾ་རོ་རུ་ཨེ་ཀ་ཛ་ཊི་སྙིང་ཁ་རཀྨོ་རུ་ལུ་རུ་ལུ་ཧཱུྃ་བྷྱོ་ཛཿ ཨོཾ་མ་ཧཱ་ཀཱ་ལ་བི་ཀཱ་ལ་ཏྲི་ཡྃ་ཛཿ ཨོཾ་མ་ཧཱ་ཀཱ་ལ་ཧཱུྃ་ཕཊ༔ ཨོཾ་ཤྲཱི་མ་ཧཱ་ཀཱ་ལ་ཡཀྵ་བཻ་ཏཱ་ལི་ཧཱུྃ༔ ཞེས་ཆོས་སྐྱོང་དགོངས་འདུས་རྩ་བའི་ལྷ་ཚོགས་རྣམས་དང༌། ཧྲི་ཤག་རུ་རག་རཾ་ན་གེ་ཙིཏྟ་ཏྲཱྃ་མ་མ་ཡོ་ཟ་འགྲམ་ཧ་ཧ་ག་ཤ་ལ་ཛཿ ཨོཾ་མ་ཧཱ་ཀཱ་ལ་སིཾ་ཧ་མུ་ཁ་ཧཱུྃ་ཕཊ༔ ཏྲི་ཧྲིཾ་ཛཿ ཌཱ་ཀི་ནི་སི་ན་ར་མ་ཏྲི་ཧྲིཾ་ཛཿ ཨ་ཡ་མ་དུ་རུ་ཙ་ཤ་ན་ཙིཏྟ་ཧྲིཾ་ཧྲིཾ་ཛཿ ཨོཾ་མ་ཧཱ་ཀཱ་ལ་ཏྲཀྴད་དུཿཛཿ ཨོཾ་ཀཱ་ལ་རཱུ་པ་ཡ་མ་རཱ་ཛ་ཧཱུྃ་ཕཊ༔ ཨོཾ་རཀྨོ་པྲཱ་ཎ་ཨཱརྨ་ཀྵེ་རུ་སུ་རུ་ཥ་ལོ་ཧི་ཏ་སརྦ་ཤ་ཏྲཱུན་མཱ་ར་ཡ་ཧཱུྃ་ཕཊ༔ ཨོཾ་བཛྲ་སཱ་དྷུ་ས་མ་ཡ་བཱཀ་ཏྲཾ་ཏྲཾ་ཤི་ནི་ཀྲ་མ་ནི་ས་མ་ཡ་སཱ་དྷུ་ཏྲི་ཛཿཛཿཧཱུྃ་བྃ་ཧོཿ བཛྲ་ཌཱཀི་ནི་མ་ནུ་རཀྟོ་ཧཱུྃ༔ ཨོཾ་ནཱ་ག་ཙཎྜ་ཙ་ར་ར་ཏྲི་གིངྐ་ར་ཡཀྵ་ཡཀྵ་ས་མ་ཡ་ཙིཏྟ་ཧྲི་ཧྲིཾ་ཛཿཛཿ ཨོཾ་རཱ་ཛ་སིདྡྷི་ས་མ་ཡ་ཐིམ་ཛཿ ཨོཾ་ཤུ་ལ་ཏྲི་དེ་ཝ་ཨ་དྷ་ཤ་གྷྲྀ་ཝ་དུཿནཱ་ག་རཱ་ཛ་ནཾ་དྷྭ་ཏི་ཀུ་མ་ར་བཻ་ཛཿ དྲེགས་པ་ཕོ་རྒྱུད་ཀུན་འདུས་དང༌། ཨོཾ་རོ་རུ་རོ་རུ་བི་དྷིཥྛི་བ་དྷོཏྶི་ཀ་མ་ལ་རཀྵ་སཱི་ཧཱུྃ་བྷྱོ་ཧཱུྃ༔ ཨོཾ་མ་མ་ར་ལི་པྲ་མ་ཡ་ཀཱ་ལི་ཡེ་ཛཿཛཿ ཨོཾ་ཁྱི་ཁ་ལེ་ནག་མོ་ཧཱུྃ་ཕཊ༔ ཨོཾ་བཛྲ་དྷཱ་ཀི་ནི་ཨ་ཡུ་ཥེ་ཤཱ་རི་མཱྃ་ལཱྃ་ཨཱྃ་ཏཱྃ་ཙིཏྟ་ཧྲིཾ་ཧྲིཾ་ཛཿཛཿ ཨོཾ་བཛྲ་པྲ་མོ་ཧ་བྃ་ཧ་རི་ནི་ས་ཧྲིཾ་ཧྲིཾ་སརྦ་སིདྡྷི་སྭཱ་ཧཱ༔ ཨོཾ་གྷཱ་མུ་ཊ་ཛི་ཏེ་དྷརྨ་དཱི་པེ་སརྦ་སིདྡྷི་ཧཱུྃ༔ ཨོཾ་མ་མོ་ཛྭ་ལི་ཛྭ་ལ་ནི་ཙཎྜི་ཧཱུྃ་ཕཊ༔ མ་མ་ཏྲཀ་རཀྴ་ག་རུ་ཊ་ཧཱུྃ་ཕཊ༔ ཨོཾ་ཏྲི་ཤུ་ལ་བཛྲ་སཱ་དྷུ་སིདྡྷི་ཧཱུྃ༔ ཨ་ཙ་ནཾ་ཛཿ ཨོཾ་ལ་ལ༔ ལེ་ལེ༔ ཏྃ་ཏྃ༔ ཏེ་ཏེ་ཁ་རཀྨ༔ མ་མ་སྲིང་འགྲོ་མ་ཧཱུྃ་བྷྱོ་ཧཱུྃ་ཧཱུྃ༔ ཨོཾ་བཛྲ་མ་ཏི་ཧཱུྃ༔ ཨོཾ་བཛྲ་ཀཱི་ལི་ཀཱི་ལ་ཡ་མོ་ཧ་གྷ་ཏ་ཡ་མ་མ་ཤྲཱི་གྷྲཾ་ཀརྨ་ཀཱ་ར་ཡེ༔ མོ་རྒྱུད་མ་མོ་ཀུན་འདུས་དང༌། ཨོཾ་ནི་ལཾ་བ་ར་དྷ་ར་བཛྲ་པཱ་ཎི་ཧཱུྃ་ཧཱུྃ་ཕཊ༔ ཨོཾ་བཻ་ཤྲ་བ་ཎཱ་ཡ་སྭཱ་ཧཱ༔ ཨོཾ་མ་ཧཱ་རཱ་ཛ་ཡཀྵ་ས་མ་ཡ་བཻ་ཤྲ་མ་ཎ་ཙིཏྟ་ཧྲིཾ་ཧྲིཾ་ཛཿཛཿ ཨོཾ་བཻ་ཏྲཀ་རཀྵ་བྷྱོ་ཧཱུྃ་ཕཊ༔ ཨོཾ་བུདྡྷ་བཛྲ་རཏྣ་པདྨ་ཀརྨ་ཛམ་བྷ་ལ་ཧཱུྃ་ཛཿ ཨོཾ་ག་ཎ་པ་ཏི་བ་སུ་དྷཱ་རི་ཎི་ཀུ་རུ་ཀུལླེ་བཻ་ཤྲ་བ་ཎ་ཧཱུྃ་ཛཿ ཨོཾ་མ་ཎི་བྷ་དྲ་རེ་མནྟ་མ་ཧཱ་རཱ་ཛ་ཡཀྵ་ཀུ་བེ་ར་ཧཱུྃ་ཛཿ ཨོཾ་ཨི་ལིང་ཀི༔ སི་ལིང་ཀི༔ ཀི་ལིང་ཀི་སྭཱ་ཧཱ༔ ཨོཾ་ན་མོ་ཤུ་ཏྲ་མུ་ཏྲི་མ་ཧཱ་པི་ཤཱ་ཙི་ན་ཡེ་སྭཱ་ཧཱ༔ ཨོཾ་ཨ་ན་ལེ༔ ཀུནྡྷ་ལེ༔ གྷྲྀ་ཧྣ༔ པི་ཎ་དྷ༔ པི་ཤཱ་ཙི་ན་ཡེ་སྭཱ་ཧཱ༔ ཨོཾ་ཀུ་མ་ཀུ་མ་ཁུས་ཐིས་སྭཱ་ཧཱ༔ ཨོཾ་མ་མ་ར་ལི་པྲ་མ་ཡ་ཛཿཛཿ ཨོཾ་མ་ཧཱ་དེ་ཝ་ཛཿ་ཨུ་མ་དེ་ཝཱི་ཧྲིཾ་ཧ་རི་ནི་ས་པཱ་ཤཾ་ཀུ་རུ་ཧོཿ ཨོཾ་མ་ཧཱ་སིང་ཧ་མ་ཎི་རཱ་ཛ་ཧཱུྃ་ཕཊ༔ ཨོཾ་ལོ་ཀ་པཱ་ལ་ནི་དྷི་པ་ཏི་བྷཱུ་མི་པ་ཏི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ནོར་ལྷ་གཏེར་བདག་འཇིག་རྟེན་སྐྱོང་བའི་ལྷ་ཐམས་ཅད་ཀྱི་སྙིང་པོའི་མཐར་ས་པ་རི་ཝཱ་ར་བཏགས་པ་ལན་གསུམ་མམ་བདུན་གྱིས་གཏོར་མ་ཕུལ་ལ། དཔལ་མ་ཧཱ་ཀཱ་ལ་ཁྲག་འཐུང་གི་རྒྱལ་པོ། གཙུག་ལག་ཁང་དང་དཀྱིལ་འཁོར་གྱི་སྲུང་མ། དུག་གསུམ་ནད་ཀྱི་སྨན་པ། རྣལ་འབྱོར་ཡོངས་ཀྱི་དགྲ་བླ། བདུད་དཔུང་སྒྲོལ་བའི་དཔའ་བོ། བསྟན་པའི་བཀའ་སྲུང་ཆེན་པོ། ཆེ་མཆོག་ཡོན་ཏན་གྱི་མགོན་པོ་ལེགས་ལྡན་རྡོ་རྗེ་སྲིན་པོ་ཚོགས་ཀྱི་བདག་པོ། ཡང་དག་ཐུགས་ཀྱི་མགོན་པོ་ཕྱག་བཞི་པ། འཇམ་དཔལ་སྐུའི་མགོན་པོ་སྟག་ཞོན། པདྨགསུང་གི་མགོན་པོ་མྱུར་མཛད་ཕྱག་དྲུག་པ། ཕུར་པ་ཕྲིན་ལས་ཀྱི་མགོན་པོ་མ་ནིང༌། མ་མོ་རྦོད་གཏོང་གི་རྗེ་བཙན་ཨེ་ཀ་ཙཱ་ཏི། རིག་འཛིན་སློབ་དཔོན་གྱི་མགོན་པོ་ཞལ་བཞི། འཇིག་རྟེན་མཆོད་བསྟོད་ཀྱི་མགོན་པོ་རྡོ་རྗེ་གུར། དམོད་པ་དྲག་སྔགས་ཀྱི་མགོན་པོ་སྲས་མཆོག་བེར་ནག་པོ་སོགས་དྲག་པོ་ཆོས་སྐྱོང་དགོངས་འདུས། ཁྱབ་འཇུག་དུག་གི་སྤུ་གྲི། བདུད་མགོན་སེང་གེའི་གདོང་ཅན། སྲོག་བདུད་ཏྲཀྴད་ནག་པོ། ལས་གཤིན་འཆི་བདག་ནག་པོ། གནོད་སྦྱིན་བེཀྩེ་ལྕམ་སྲིང༌། དམ་ཅན་སྐྱེས་བུ་ཆེན་པོ། ཀླུ་བཙན་འབར་བ་སྤུན་བདུན། ཆོས་སྐྱོང་རྒྱལ་ཆེན་པེ་ཧ་ར། གཏེར་སྲུང་དྲེགས་པ་སྡེ་ལྔ་སོགས་མགོན་པོ་ཕོ་རྒྱུད་དཔའ་བོའི་སྡེ་ཚོགས། ལྷ་མོ་དུད་སོལ་མ། ཞིང་སྐྱོང་དུར་ཁྲོད་མ་མོ། ཤན་པ་སྲོག་སྒྲུབ་ནག་མོ། བཀྲ་ཤིས་ཚེ་རིང་མཆེད་ལྔ། སྨན་བཙུན་རྡོ་རྗེ་གཡུ་སྒྲོན། ཨ་ཕྱི་ཆོས་ཀྱི་སྒྲོན་མ། བོད་སྐྱོང་བརྟན་མ་བཅུ་གཉིས་སོགས་སྣང་སྲིད་མ་མོ་མཁའ་འགྲོའི་ལྷ་ཚོགས། རྒྱལ་ཆེན་རྣམ་སྲས་རིགས་གསུམ། ནོར་བདག་ཛམ་ལྷ་རིགས་བཞི། ས་གསུམ་ནོར་གྱི་བདག་པོ། ཟས་གོས་ནོར་ཕྱུགས་གཏེར་བདག །ཀུན་འཁྱིལ་ལྷ་མོ་མཆེད་གསུམ། མགོན་དཀར་དུར་ཁྲོད་བདག་པོ། དབང་མཛད་ལྷ་ཆེན་ལྕམ་དྲལ། སེང་ཆེན་དགྲ་བླའི་རྒྱལ་པོ་སོགས་ནོར་བདག་འཇིག་རྟེན་སྐྱོང་བ་སྡེ་དཔུང་དང་བཅས་པས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། སངས་རྒྱས་ཀྱི་བསྟན་པ་སྲུངས་ཞེས་པ་ནས། ཕྲིན་ལས་མཛོད་ཅིག །ཅེས་པའི་བར་གྱིས་འདོད་པའི་ཕྲིན་ལས་གསོལ། གསུམ་པ་བསྟོད་པ་ལ་བཞི་ལས། དང་པོ་ནི། ཧཱུྃ། བདེ་ཆེན་བདུད་རྩིས་སྲིད་ཞིའི་ཆོས་མ་ལུས། །ཡེ་ཤེས་རྡོ་རྗེའི་སྲོག་གི་བཅུད་ཆེན་པོར། །ཟག་མེད་ཡོན་ཏན་ལང་ཚོ་རྫོགས་པའི་དཔལ། །ཆེ་བའི་ཆེ་མཆོག་ལེགས་ལྡན་ནག་པོར་བསྟོད། །རྣམ་བཅས་ཆོས་ཀུན་གདོད་ནས་བདེ་བ་ཆེར། རྣམ་རོལ་འབར་བའི་ཧེ་རུ་ཀ་དགྱེས་པས། །རྣམ་མེད་སྟོང་དྲུག་དབྱིངས་སྦྱོར་རྡོ་རྗེ་སེམས། །དཔལ་ལྡན་ནག་པོ་ཆེན་པོར་བཞེངས་ལ་བསྟོད། །མཁའ་ཁྱབ་རྒྱལ་བ་རྟག་པའི་ཡེ་ཤེས་སྐུ། །སྣང་སྲིད་ཆོས་ཀུན་རྣམ་དག་ཕྱག་རྒྱའི་ཀློང༌། །ཟིལ་གནོན་བདེ་གཤེགས་རིགས་ཀྱི་དཔའ་བོའི་རྗེ། གཏུམ་ཆེན་སྟག་ལ་ཞོན་པའི་མགོན་པོར་བསྟོད། །སྲོག་རྩོལ་འདུ་བྱེད་ནཱ་དའི་དབྱིངས་དག་པས། །གཞོམ་མེད་རྡོ་རྗེ་གསང་བའི་གསུང་གི་དབྱངས། །རྡོ་རྗེ་རྟ་གདོང་རྔམས་བཞད་བསྟན་སྲུང་ཚུལ། །མྱུར་མཛད་ཡེ་ཤེས་མགོན་པོ་མཆོག་ལ་བསྟོད། །ཁྱབ་བརྡལ་ཡེ་ཤེས་སྲོག་ཏུ་སྙིང་རྗེའི་མཚོན། །རབ་འབར་ཆིག་ཤུར་ལས་ཀྱི་སྤུ་གྲིའི་དབལ། །ཉམས་པའི་བདུད་དགྲའི་སྲོག་གཟན་ཁྲོ་བོ་འཆོལ། །དཔལ་མགོན་མ་ནིང་ནག་པོ་མཆེད་གསུམ་བསྟོད། །རྡོ་རྗེ་དྷཱུ་ཏིའི་སྲོག་ཏུ་དགའ་བཞིའི་འགྲོས། །ཡེ་ཤེས་རླུང་གི་ཕོ་ཉས་དྲངས་པ་ལས། །བདེ་ཆེན་རྡོ་རྗེ་བཙུན་མོ་བསྟན་སྲུང་ཚུལ། །དབྱིངས་ཀྱི་རྒྱལ་མོ་ཨེ་ཀ་ཙཱ་ཊིར་བསྟོད། །ཕྱི་ཡི་གནས་ཡུལ་ནང་དུ་ས་བཅུའི་ལམ། །དོན་གྱི་སྤང་རྟོགས་རྫོགས་པའི་ལས་མཁན་ཆེ། །ཚད་མེད་ཞལ་གྱིས་མཛེས་པའི་བསྟན་སྲུང་གཙོ། །ཞིང་སྐྱོང་གཟི་ལྡན་སྟོབས་འཕྲོག་དབང་པོར་བསྟོད། །འཁོར་འདས་སྲོག་འཕྲོག་བདག་འཛིན་རུ་ཏྲ་བསྒྲལ། །འཕགས་ལམ་རྫོང་ཟིན་བསྟན་སྐྱོང་བདུད་སྡེ་འདུལ། །ཆགས་སྡང་འཕྲང་སྒྲོལ་ཏན་གཎ་སྤྱོད་ལ་དགྱེས། །ཁྲག་འཐུང་དཔའ་བོ་མ་ཧཱ་ཀཱ་ལར་བསྟོད། །ཤུགས་སྒྲོལ་ཐུགས་རྗེའི་ཐོག་ཆར་དྲག་ཤུལ་འབེབས། །མཐུ་སྟོབས་དྲག་པོ་སྔགས་ཀྱི་དམོད་པ་བཙན། །རྒྱུད་གསུམ་དྲེགས་པ་ཡོངས་ཀྱི་སྡེ་དཔོན་ཆེ། །སྲས་མཆོག་མ་ཧཱ་ཀཱ་ལ་ལྕམ་དྲལ་བསྟོད། །དོན་དམ་བདེ་གཤེགས་ཡོངས་རྫོགས་སྒྲུབ་སྡེ་བརྒྱད། །རྣམ་རོལ་ཡེ་ཤེས་མགོན་པོ་སྡེ་དགུའི་དལ། །རྒྱལ་བའི་བསྟན་སྲུང་སྲིད་གསུམ་དྲེགས་པ་འདུལ། །མགོན་པོ་འཁོར་དང་བཅས་ལ་གུས་པས་བསྟོད། །ཅེས་དྲག་པོ་ཆོས་སྐྱོང་དགོངས་འདུས་ཀྱི་མགོན་ཆེན་སྡེ་དགུ་ལ་སྤྱིར་བསྟོད་པའོ།  །སྒྲུབ་པ་དང་ལས་སྦྱོར་གྱི་སྐབས་སུ་སྤྲོས་པ་དང་འབྲེལ་ན་མགོན་ཆེན་སོ་སོའི་རྟགས་ཀྱི་བསྟོད་པ་དང་རྐང་བརྒྱད་ཀྱི་བསྟོད་པ་སོགས་སྐབས་སུ་གང་བབ་བཀའ་གཏེར་གྱི་གཞུང་བསྟོད་འབུམ་ནས་འབྱུང་བ་བཞིན་སྦྱར་ཀྱང་ལེགས་པའི་ཡན་ལག་ཏུ་འགྱུར་རོ།  །གཉིས་པ་ནི། ཧཱུྃ་བྷྱོཿ བདེ་སྟོང་ཟུང་འཇུག་རྣམ་ཀུན་མཆོག་ལྡན་ལས། །གང་འདུལ་སྒྱུ་འཕྲུལ་དྲ་བའི་རོལ་མོ་ཅན། །རྒྱུད་གསུམ་དྲེགས་པའི་སྡེ་དཔོན་རྒྱ་མཚོའི་ཚོགས། །ལོངས་སྤྱོད་ཡོངས་རྫོགས་འཁོར་ལོར་འཆར་ལ་བསྟོད། །ཤིན་ཏུ་ཕྲ་བ་གཉུག་མའི་མཚན་དཔེ་ནི། །དྲག་ཤུལ་རྡོ་རྗེ་སྲིན་པོའི་སྣང་ཚུལ་གྱིས། །སྡེར་བཅས་བདུད་སྡེའི་དཔུང་ཚོགས་ཕམ་བགྱིད་པའི། །ཁ་སྦྱོར་རྡོ་རྗེའི་སྐུ་རུ་བཞེངས་ལ་བསྟོད། །འཇུག་དང་ལྡང་བའི་སྲོག་རྩོལ་རྒྱུ་བ་ཀུན། །འོད་གསལ་དབུ་མའི་དབྱིངས་སུ་བསད་བྱས་པས། །འཕོ་མེད་རྡོ་རྗེའི་སྔགས་རིགས་སྒྲུབ་པ་པོ། །བདེ་ཆེན་ནཱ་དའི་གསུང་དུ་འཆར་ལ་བསྟོད། །སྣང་སྟོང་ཟུང་འཇུག་ཡེ་ཤེས་ཆེན་པོ་དང༌། །མི་ཕྱེད་མཉམ་པར་སྦྱོར་བའི་ཆོས་ཉིད་ནི། །འཕོ་ཆགས་སྤྲོས་པའི་ཕ་རོལ་ལས་བརྒལ་བ། །རང་བཞིན་མེད་པའི་ཐུགས་ཀྱི་དབྱིངས་ལ་བསྟོད། །རྩེ་གཅིག་སྒྲུབ་པའི་ཚོགས་ལ་ཐུགས་བརྩེ་བས། །སྒྲུབ་གཉིས་འདོད་པ་ལྷུག་པར་འཇོ་བའི་དཔྱིད། །ཡོན་ཏན་ཡིད་བཞིན་ནོར་བུས་མཚོན་མིན་ཕྱིར། །སྙིང་རྗེས་ཡོངས་གང་ཆེན་པོའི་བདག་ཉིད་བསྟོད། །རྨད་བྱུང་ཐབས་ལ་མཁས་པའི་འཇུག་པ་ནི། །ཞི་ཆགས་ཁྲོ་བོའི་རྣམ་འགྱུར་མཐའ་ཀླས་ཀྱིས། །ཐེག་མཆོག་སྙིང་པོའི་བསྟན་པ་བསྲུང་བ་ལ། །ཕྲིན་ལས་རྒྱུན་མི་ཆད་པར་སྣང་ལ་བསྟོད། །མདོར་ན་དུས་གསུམ་ཀུན་ཏུ་ཁྱེད་བསྟེན་ཅིང༌། །དུས་མེད་རིག་པའི་ངང་དུ་རོ་གཅིག་ན། །ཐུགས་རྗེའི་སྒྱུ་འཕྲུལ་འགོག་པ་མེད་པ་ཡིས། །བདག་གཞན་ཕན་བདེའི་དཔལ་གྱིས་སྐྱོང་བར་མཛོད། །ཅེས་དྲེགས་པ་ཕོ་རྒྱུད་ཀུན་འདུས་ཀྱི་བསྟོད་པའོ།  །གསུམ་པ་ནི། བྷྱོཿ སྲིད་ཞི་དབྱིངས་སུ་དག་པའི་ཆོས་དབྱིངས་མཁར། །སྐུ་ལྔའི་ཡོན་ཏན་རྫོགས་པའི་ཀློང་ཆེན་པོ། །སྒྱུ་འཕྲུལ་དྲ་བར་བརྩོན་ཀྱང་འཕོ་མེད་གཞིར། །འདུ་འབྲལ་མེད་པའི་འཁོར་ལོར་འཆར་ལ་འདུད། །དུས་མཐའི་སྤྲིན་མཚུངས་མི་སྡུག་རྔམས་པའི་གཟུགས། །སྙིང་རྗེའི་གློག་གི་སྡང་མིག་ཙམ་གྱིས་ཀྱང༌། །སྲིད་གསུམ་འཇིག་རྟེན་བརླག་པའི་རྡོ་རྗེའི་སྐུ། །གཏུམ་དྲག་ཉམས་བརྒྱས་སྒེག་ཅིང་དཔལ་ལ་བསྟོད། །ཁྲག་འཁྲུགས་ཞལ་གྱི་རྦ་ཀློང་ལས་བྱུང་བའི། །རྡོ་རྗེའི་འཐོར་རླུང་ནད་མཚོན་དུག་ཟེར་ཅན། །འབར་བའི་གད་རྒྱང་བདུད་སྡེ་གཤེ་བས་རྒོད། །ཉམས་པ་རྩད་ནས་གཅོད་པའི་གསུང་ལ་བསྟོད། །ཀུན་ཏུ་རབ་ཞིའི་དབྱིངས་ལས་མི་གཡོ་བཞིན། །གསང་ཆེན་བསྟན་དང་དེ་འཛིན་རྗེས་བརྩེ་བས། །རྔམས་བརྗིད་འབར་བ་གཏུམ་ཆེན་སྲིན་མོའི་ཚུལ། །བདེ་ཆེན་བྱང་ཆུབ་སེམས་ཀྱི་ཐུགས་ལ་བསྟོད། །ཡེ་ཤེས་ལས་དང་འཇིག་རྟེན་སྣ་ཚོགས་པའི། །སྒྱུ་འཕྲུལ་དྲ་བའི་གར་གྱིས་རྟག་རོལ་ཀྱང༌། །ངེས་པའི་གསང་བ་འཕགས་བཞིའི་ཡུམ་ཆེན་མོའི། །ཟག་མེད་འབྲས་བུའི་ཡོན་ཏན་རྫོགས་ལ་བསྟོད། །ཚར་གཅོད་རྗེས་འཛིན་ཕྲིན་ལས་རྒྱ་མཚོ་ལས། །ཕན་བདེའི་ནོར་བུ་དགའ་སྟོན་མི་ཟད་པས། །སྒྲུབ་མཆོག་རྗེས་སྐྱོང་ཉམས་པའི་གཤེད་མ་ཆེ། །ཁྲག་འཐུང་ལས་ཀྱི་དབང་མོར་ཕྱག་འཚལ་བསྟོད། །ཡེ་ཤེས་མ་མོས་འཁོར་འདས་བདེ་ཆེན་བརྡལ། །འཇིག་རྟེན་མ་མོས་ལེགས་ཉེས་སྟངས་ཀུན་འཛིན། །ལས་ཀྱི་མ་མོས་ཕྲིན་ལས་རབ་འབྱམས་སྒོ། །སྒྲུབ་པའི་དཀྱིལ་འཁོར་ལྷ་ཚོགས་ཀུན་ལ་བསྟོད། །ཅེས་མོ་རྒྱུད་མ་མོ་ཀུན་འདུས་ལ་བསྟོད་པའོ།  །བཞི་པ་ནི། ཧཱུྃ༔ རྒྱལ་བ་ཀུན་གྱི་ཐུགས་ཀྱི་ཡེ་ཤེས་ལས༔ གསང་བའི་བདག་པོ་ལག་ན་རྡོ་རྗེ་འཆང༔ སྣང་སྲིད་ཟིལ་གནོན་གདུག་པ་ཐབས་ཀྱིས་འདུལ༔ རྡོ་རྗེ་བེ་ཅོན་ཅན་ལ་ཕྱག་འཚལ་བསྟོད༔ རྒྱལ་ཀུན་མི་འགྱུར་སྐུ་ཡི་རྣམ་འཕྲུལ་ལས༔ བསོད་ནམས་ཡོངས་རྫོགས་རྒྱལ་ཆེན་རྣམ་ཐོས་སྲས༔ སྣོད་བཅུད་སྣང་སྲིད་ནོར་རྣམས་ཀུན་གྱི་བདག༔ དབུལ་བའི་གདུང་སེལ་ཁྱོད་ལ་ཕྱག་འཚལ་བསྟོད༔ རྒྱལ་ཀུན་ལོངས་སྤྱོད་གསུང་གི་རྣམ་འཕྲུལ་ལས༔ ཁམས་གསུམ་དབང་སྡུད་རྒྱལ་ཆེན་མདུང་དམར་ཅན༔ མ་དད་བསྡུ་བ་རྣམ་བཞིས་སྡུད་མཛད་པའི༔ སྲིད་གསུམ་འགུགས་བྱེད་ལྕགས་ཀྱུ་ཁྱོད་ལ་བསྟོད༔ རྒྱལ་ཀུན་བདེ་ཆེན་ཐུགས་ཀྱི་རོལ་པ་ལས༔ དྲག་གཏུམ་ཁྲོས་རྔམས་གནོད་སྦྱིན་དམག་གི་དཔུང༔ སྲིད་གསུམ་དགྲ་བགེགས་སྐད་ཅིག་ཉིད་ལ་སྒྲོལ༔ བསྟན་དགྲ་འདུལ་བའི་དམག་དཔོན་ཁྱོད་ལ་བསྟོད༔ རིགས་བཞིའི་ནོར་བདག་ཨཱརྻ་ཛམ་བྷ་ལ༔ ལྷ་མི་ཀླུ་དང་གནོད་སྦྱིན་དབང་སྡུད་པའི༔ ཚོགས་བདག་ནོར་སྦྱིན་ཀུ་རུ་ཀུལླེ་དང༔ རྒྱལ་ཆེན་རྣམ་ཐོས་སྲས་ལ་ཕྱག་འཚལ་བསྟོད༔ རིན་ཆེན་ཅང་ཤེས་ཟས་ནོར་ཕྱུགས་ཀྱི་བདག༔ ཀུན་འཁྱིལ་མཆེད་གསུམ་མགོན་དཀར་དུར་ཁྲོད་བདག༔ དབང་ཕྱུག་ལྷ་ཆེན་སེང་ཆེན་དགྲ་ལྷའི་རྒྱལ༔ དཀར་ཕྱོགས་གཏེར་གཞིའི་བདག་པོ་ཀུན་ལ་བསྟོད༔ དེ་ལྟར་མཆོད་ཅིང་གསོལ་བ་བཏབ་པའི་མཐུས༔ བདག་སོགས་འགྲོ་ཀུན་སེར་སྣའི་སྒྲིབ་པ་ཞི༔ ལོངས་སྤྱོད་རྒྱས་ཤིང་ཁམས་གསུམ་དབང་དུ་སྡུས༔ བར་ཆད་ཀུན་སོལ་མཆོག་ཐུན་དངོས་གྲུབ་སྩོལ༔ གནོད་སྦྱིན་ནོར་ལྷ་གཏེར་བདག་འཇིག་རྟེན་སྐྱོང་བ་རྣམས་ཀྱི་བསྟོད་པའོ།  །བཞི་པ་རྗེས་འབྲང་ནི། དམ་ཅན་གཏེར་སྲུང་གཞན་དག་གི་ཕྲིན་ལས་བྱེ་བྲག་པ་རྣམས་སྐབས་འདིར་སྦྱར་ཞིང༌། དེ་དག་གི་མཐར་གཏེར་གཞི་སྤྱིའི་གཏོར་འབུལ་ནི། ཏྲཱྃ་ལས་གཏོར་མ་ཡེ་ཤེས་འདོད་རྒུའི་སྤྲིན༔ རྡུལ་ཕྲན་རེ་རེ་བཞིན་དུ་ཡུལ་དང་མཁར༔ སོ་སོའི་འདོད་པའི་ཡོན་ཏན་བསམ་མི་ཁྱབ༔ འཛད་མེད་ནམ་མཁའ་མཛོད་ཀྱི་རང་བཞིན་གྱུར༔ ཨོཾ་ཨཱཿཧཱུྃ་ཧོཿ ལན་གསུམ། ནི་དྷཱི་པ་ཏི་བྷཱུ་མི་པ་ཏི་ས་པཱ་རི་ཝ་ར་བཛྲ་ས་མ་ཛཿས་སྤྱན་དྲངས། ནི་དྷཱི་པ་ཏི་བྷཱུ་མི་པ་ཏི་ས་པཱ་རི་ཝ་ར་ཨོཾ་ཨ་ཀ་རོ་སོགས་ལན་གསུམ་གྱིས་དབུལ། ཨོཾ་བཛྲ་ཨརྒྷཾ་ནས།ཤབྡ་པྲ་ཏཱིཙྪ་སྭཱ་ཧཱའི་བར་དང༌། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། སྨན་རཀ་གཏོར་མ་རྣམས་ཕུལ། ཟབ་གཏེར་སྲུང་མའི་དབང་པོ་དང་གཞི་བདག་གཉུག་མར་གནས་པ་འཁོར་དང་བཅས་པ་རྣམས་ཀྱིས་མཆོད་པ་དམ་པ་འདི་བཞེས་ལ། སངས་རྒྱས་ཀྱི་བསྟན་པ་སྲུངས་སོགས་དཀྱུས་བཞིན་བྱ། ཧཱུྃ། ཀུན་བཟང་པད་འབྱུང་ཐུགས་ཀྱི་ཐིག་ལེ་ཡི། །བླ་རྫོགས་ཐུགས་གསུམ་ཟབ་བདུན་སྒྲུབ་སྡེ་བརྒྱད། །རྒྱུད་ལུང་མན་ངག་རྩ་བ་ཡན་ལག་གི །ཟབ་གཏེར་སྲུང་མ་འཁོར་དང་བཅས་ལ་བསྟོད། །དཀར་ཕྱོགས་སྐྱོང་བ་ལྷ་ཡི་དགེ་བསྙེན་ཚོགས༔ ནག་ཕྱོགས་སྐྱོང་བ་བདུད་དང་བཙན་གྱི་རིགས༔ ཀླུ་རིགས་ཕོ་མོ་བསམ་གྱིས་མི་ཁྱབ་པ༔ སྡེ་བརྒྱད་ཕོ་མོ་གཞི་བདག་འཇིག་རྟེན་སྐྱོང༔ གཉུག་མར་གནས་དང་གློ་བུར་ལྷགས་པ་རྣམས༔ འདོད་ཡོན་གཏོར་མའི་མཆོད་པ་འདི་བཞེས་ལ༔ ཆོས་དང་མཐུན་པའི་འདོད་དོན་བསྒྲུབ་ཏུ་གསོལ༔ གཞི་བདག་ཆེན་པོ་ཁྱེད་རྣམས་ཀྱིས། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང༌། །དཔལ་དང་གྲགས་དང་སྐལ་པ་བཟང༌། །ལོངས་སྤྱོད་རྒྱ་ཆེན་ཀུན་ཐོབ་ཅིང༌། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛོད། །དུས་མིན་འཆི་བའི་ནད་རྣམས་དང༌། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང༌། །འབྲུ་རྣམས་འཕེལ་ཞིང་ཕྱུགས་འཕེལ་བ། །དགེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་མཛོད། །ཅེས་འདོད་པའི་ཕྲིན་ལས་གསོལ། ལྔ་པ་བཟླས་པ་ཆོས་སྐྱོང་དགོངས་འདུས་སྙིང་པོ་ལྟར་བྱ་བ་བཞི་ལས། དང་པོ་རིགས་བདག་བླ་མ་ལ་བསྟེན་ནས་ཉམས་ཆགས་འཁོན་གྲིབ་ཞི་བའི་བཟླས་པ་ནི། ཡེ་ཤེས་མགོན་པོའི་རིགས་ཀྱི་བདག༔ བླ་མའི་སྐུ་ཡི་འོད་ཟེར་གྱིས༔ བདག་གི་དམ་ཚིག་ཉམས་ཆགས་སྦྱངས༔ དམ་ཅན་ཁྲོས་པ་ཞི་བར་མཛོད༔ ཨོཾ་མ་ཧཱ་གུ་རུ་ཨོཾ་ཤཱིནྟཾ་ཀུ་རུ་སྭཱ་ཧཱ༔ བརྒྱ་རྩ་བཟླས། གཉིས་པ་ཡི་དམ་ཞི་བས་དམ་ཅན་མཐུ་རྩལ་དཔུང་བསྐྱེད་པའི་བཟླས་པ་ནི། ཡེ་ཤེས་མགོན་པོའི་དབུ་རྒྱན་གྱི༔ བདེ་གཤེགས་སྐུ་ལ་འོད་འཕྲོས་པས༔ དམ་ཅན་རྣམས་ཀྱི་མཐུ་རྩལ་སྐྱེད༔ གཟི་བརྗིད་འོད་དུ་འབར་བར་བསམ༔ ཨོཾ་ཧཱུྃ་ཏྲཱྃ་ཧྲཱིཿཨཿབྷཱུྃ་པུཥྚིཾ་ཀུ་རུ་སྭཱ་ཧཱ༔ བརྒྱ་རྩ་བཟླ། གསུམ་པ་ཁྲོ་མོ་ཟིལ་གྱི་གནོན་བཟླས་པས་དམ་ཅན་དབང་དུ་བྱ་བ་ནི། ཡེ་ཤེས་མགོན་པོའི་སྐུ་ཡི་དབྱིངས༔ ཡི་དམ་རྣམས་ཀྱི་སྐུ་ལས་འོད༔ འཕྲོས་པས་དམ་ཅན་དབང་དུ་བྱས༔ ཅི་བཅོལ་བཀའ་བཞིན་ལས་སྒྲུབ་བསམ༔ ཨོཾ་ཤྲཱི་ཧེ་རུ་ཀ་ཧྲི་ཝཱ་ཤཾ་ཀུ་རུ་ཧོཿ བརྒྱ་རྩ་བཟླ། བཞི་པ་ཆོས་སྐྱོང་དྲག་པོའི་ཕྲིན་ལས་བསྐུལ་བའི་དམིགས་བཟླས་ནི། མདུན་བསྐྱེད་དམ་ཅན་ཐུགས་ཀ་རུ༔ ཉི་སྟེང་སྲོག་སྔགས་ཀྱིས་བསྐོར་བར༔ བདག་ཐུགས་འོད་ཀྱིས་བསྐུལ་བ་ལས༔ ཡེ་ཤེས་ལས་བྱེད་མ་མགོན་གྱི༔ སྐུ་ལས་འོད་འཕྲོས་ཕྲིན་ལས་སྒྲུབ༔ ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ཡ། བཛྲ་ཧེ་རུ་ཀ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་པོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲཱི་ཡཿཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱན་སརྦ་ཏ་ཐཱ་ག་ཏ། ཧེ་རུ་ཀ་མཱ་མེ་མ⁽12df⁾ཉྩ་ཧེ་རུ་ཀོ་བྷ་ཝ་མ་ཧཱ་ས་མ་ཡ་སཏྭ་ཨཱཿཧཱུྃ་ཕཊ། ཅེས་ཧེ་རུ་ཀའི་ཡིག་བརྒྱ་དང༌། གོང་གནོན་གྱི་བཟླས་པ་སྔོན་དུ་འགྲོ་བས་བཟླ་བྱའི་སྔགས་ནི། ཨོཾ་བྷུ་རུ་ཀུ་རུ་ཨི་ཙི་ཀི་བྱི་ཨུ་ཙུཥྨ་མ་ཧཱ་ཀྲོ་དྷ་ཧཱུྃ་ཕཊ༔ ཆེ་མཆོག་ཡོན་ཏན་གྱི་མགོན་པོ་ལེགས་ལྡན་ཚོགས་བདག་གོ །ཨོཾ་མ་ཧཱ་ཀཱ་ལ་གུ་ཎ་ཧྲྀ་དཱ་ཧཱུྃ་ཕཊ༔ ཡང་དག་ཐུགས་ཀྱི་མགོན་པོ་ཕྱག་བཞི་པ་ཡབ་དང༌། ཨོཾ་ཨེ་ཀ་ཛཱ་ཊི་བྷྱོ་ཛཿ ཡུམ་སྔགས་སོ། །ཨོཾ་བཛྲ་མ་ཧཱ་ཀཱ་ལ་ཏྲི་ཡཾ་ཛཿཛཿ དགྲ་བོ་མཱ་ར་ཡ་ཧཱུྃ་ཕཊ༔ འཇམ་དཔལ་སྐུའི་མགོན་པོ་སྟག་ཞོན་གྱི་སྔགས་སོ། །ཨོཾ་བཛྲ་མ་ཧཱ་ཀཱ་ལ་ཀྵེཾ་ཀྵེ་ཏྲ་བིགྷྣཱན་བི་ན་ཡ་ཀ་ཧཱུྃ་ཧཱུྃ་ཕཊ༔ པདྨ་གསུང་གི་མགོན་པོ་མྱུར་མཛད་ཕྱག་དྲུག་པའི་སྔགས་སོ། །ཨོཾ་ཤྲཱི་མ་ཧཱ་ཀཱ་ལ་གུ་ཧྱ་པ་ཏི་དུ་བྷྱོ་པཉྩ་ནཱ་ཐ་ཧཱུྃ་ཕཊ༔ ཕུར་པ་ཕྲིན་ལས་ཀྱི་མགོན་པོ་མ་ནིང་གི་སྔགས་སོ། །ཨོཾ་རོ་རུ་ཨེ་ཀ་ཛ་ཊི་སྙིང་ཁ་རཀྨོ་རུ་ལུ་རུ་ལུ་ཧཱུྃ་བྷྱོ་ཛཿ མ་མོ་རྦོད་གཏོང་གི་རྗེ་བཙན་ཨེ་ཀ་ཙ་ཏིའི་སྔགས་སོ། །ཨོཾ་མ་ཧཱ་ཀཱ་ལ་བི་ཀ་ལ་ཏྲི་ཡཾ་ཛཿ རིག་འཛིན་སློབ་དཔོན་གྱི་མགོན་པོ་ཞལ་བཞི་པའི་སྔགས་སོ། །ཨོཾ་མ་ཧཱ་ཀཱ་ལ་ཧཱུྃ་ཕཊ༔ འཇིག་རྟེན་མཆོད་བསྟོད་ཀྱི་མགོན་པོ་རྡོ་རྗེ་གུར་གྱི་སྔགས་སོ། །ཨོཾ་ཤྲཱི་མ་ཧཱ་ཀཱ་ལ་ཡཀྵ་བཻ་ཏ་ལི་ཧཱུྃ༔ དམོད་པ་དྲག་སྔགས་ཀྱི་མགོན་པོ་སྲས་མཆོག་གི་སྔགས་ཏེ་དྲག་པོ་ཆོས་སྐྱོང་དགོངས་འདུས་མགོན་ཆེན་སྡེ་དགུའི་བསྙེན་པའོ། །ཧྲི་ཤག་རུ་རག་རཾ་ནཱ་གེ་ཙིཏྟ་ཏྲྃ་མ་མ་ཡོ་ཟ་འགྲམ་ཧ་ཧ་ག་ཤ་ལ་ཛཿ ཕོ་རྒྱུད་ཀྱི་གཙོ་བོ་ཟབ་བདུན་གཤིན་རྗེའི་བཀའ་སྲུང་ཁྱབ་འཇུག་དུག་གི་སྤུ་གྲིའི་སྔགས་སོ། །ཨོཾ་མ་ཧཱ་ཀཱ་ལ་སིཾ་ཧ་མུ་ཁ་ཧཱུྃ་ཕཊ༔ ཏྲི་ཧྲིཾ་ཛཿ ཌཱ་ཀི་ནི་སི་ན་ར་མ་ཏྲི་ཧྲིཾ་ཛཿ ཨ་ཡ་མ་དུ་རུ་ཙ་ཤ་ན་ཙིཏྟ་ཧྲིཾ་ཧྲིཾ་ཛཿ བསྟན་སྲུང་ཆོས་བཞིའི་མགོན་པོ་ཞིང་སྐྱོང་ཡབ་ཡུམ་གྱི་སྔགས་སོ། །ཨོཾ་མ་ཧཱ་ཀཱ་ལ་ཏྲཀྴད་དུཿཛཿ དངོས་གྲུབ་རྒྱ་མཚོ་ལས་དམིགས་གསལ་དུ་གསུང་པའི་སྲོག་བདུད་ཏྲཀྴད་ནག་པོའི་སྔགས་སོ། །ཨོཾ་ཀཱ་ལ་རཱུ་པ་ཡ་མ་རཱ་ཛ་ཧཱུྃ་ཕཊ༔ ཟབ་བདུན་གཤིན་རྗེའི་བཀའ་སྲུང་ལས་གཤིན་འཆི་བདག་ནག་པོའི་སྔགས་སོ། །ཨོཾ་རཀྨོ་པྲཱ་ན་ཨཱཏྨ་ཀྵེ་རུ་སུ་རུ་ཥ་ལོ་ཧ་ཏ་སརྦ་ཤ་ཏྲཱུྃ་མཱ་ར་ཡ་ཧཱུྃ་ཕཊ༔ ཆོས་སྐྱོང་དགོངས་འདུས་བཀའ་རྒྱ་ཅན་ལས་གསུང་གི་མགོན་པོའི་སྐོར་ལས་འབྱུང་བའི་གནོད་སྦྱིན་བེཀྩེའི་སྔགས་སོ། །ཨོཾ་བཛྲ་ས་མ་ཡ་བྷཀ་ཏྲཾ་ཏྲྃ་ཤི་ནི་ཀྲ་མ་ནི་ས་མ་ཡ་སཱ་དྷུ་ཏྲི་ཛཿཛཿཧཱུྃ་བྃ་ཧོཿ ཨོཾ་བཛྲ་ཌཱ་ཀི་ནི་མ་ནུ་རཀྟོ་ས་མ་ཡ་ཛཿཧཱུྃ་བྃ་ཧོཿ ཐུགས་རྗེ་ཆེན་པོ་པདྨ་སྒྱུ་འཕྲུལ་དྲ་བའི་བཀའ་སྲུང་དམ་ཅན་ལྕམ་དྲལ་གྱི་སྔགས་སོ། །ཨོཾ་ནཱ་ག་ཙཎྜ་ཙ་ར་ར་ཏྲི་གིངྐ་ར་ཡཀྴ་ཡཀྴ་ས་མ་ཡ་ཙིཏྟ་རཏྣ་ཧྲིཾ་ཧྲིཾ་ཛཿཛཿ ཐུགས་སྒྲུབ་ཡིད་བཞིན་ནོར་བུའི་གཏེར་སྲུང་ཀླུ་བཙན་འབར་བ་སྤུན་བདུན་གྱི་སྔགས་སོ། །ཨོཾ་རཱ་ཛ་སིདྡྷི་ས་མ་ཡ་ཐིམ་ཛཿ ཐུགས་སྒྲུབ་ཡིད་བཞིན་ནོར་བུའི་བཀའ་སྲུང་རྒྱལ་ཆེན་པེ་ཧ་རའི་སྔགས་སོ། །ཨོཾ་ཤུ་ལ་ཏྲི་དེ་ཝ་ཨ་དྷ་ཤ་གྷྲྀ་ཝ་དུཿནཱ་ག་རཱ་ཛ་ནཾ་དྷྭ་ཏི་ཀུ་མ་ར་བཻ་ཛཿ ཟབ་བདུན་སྤྱིའི་གཏེར་སྲུང་དྲེགས་པ་སྡེ་ལྔའི་སྔགས་སོ། །ཨོཾ་རོ་རུ་རོ་རུ་བི་དྷིཥྛ་བདྷོཏྶི་ཀ་མ་ལ་རཀྵ་སཱི་ཧཱུྃ་བྷྱོ་ཧཱུྃ༔ མོ་རྒྱུད་ཀྱི་གཙོ་མོ་རིགས་གསུམ་སྙིང་ཐིག་གི་བཀའ་སྲུང་ལྷ་མོ་དུད་སོལ་མའི་སྔགས་སོ། །ཨོཾ་མ་མ་ར་ལི་པྲ་མ་ཡ་ཀཱ་ལི་ཡེ་ཛཿཛཿ ལས་ཀྱི་མཁའ་འགྲོ་རྡོ་རྗེ་སྡེར་མོའི་བཀའ་སྲུང་ཞིང་སྐྱོང་དུར་ཁྲོད་མ་མོའི་སྔགས་སོ། །ཨོཾ་ཁྱི་ཁ་ལེ་ནག་མོ་ཧཱུྃ་ཕཊ༔ སྤྱི་འགྲོའི་དབང་གིས་ལྷ་མོ་སྲོག་སྒྲུབ་མའི་སྔགས་སོ། །ཨོཾ་བཛྲ་དྷཱ་ཀི་ནི་ཨཱ་ཡུ་ཥེ་ཤྭ་རི་ས་མ་ཡ་ཛཿཨ་ཡུར་པུཎྱེ་པུཥྚིཾ་ཀུ་རུ་སྭཱ་ཧཱ༔ ཨོཾ་ཛྙཱ་ན་དྷཱ་ཀི་ནི་མཱྃ་ལཱྃ་ཨཱྃ་ཏཱྃ་སརྦ་སིདྡྷི་ཧཱུྃ་ཧཱུྃ༔ ཐུགས་སྒྲུབ་བར་ཆད་ཀུན་སེལ་བཀའ་སྲུང་བཀྲ་ཤིས་ཚེ་རིང་མཆེད་ལྔའི་སྔགས་སོ། །ཨོཾ་བཛྲ་པྲ་མོ་ཧ་བྃ་ཧ་རི་ནི་ས་ཧྲིཾ་ཧྲིཾ་སརྦ་སིདྡྷི་སྭཱ་ཧཱ༔ དགོངས་གཏེར་སྒྲོལ་མའི་ཟབ་ཏིག་གི་བཀའ་སྲུང་སྨན་བཙུན་རྡོ་རྗེ་གཡུ་སྒྲོན་མའི་སྔགས་སོ། །ཨོཾ་གྷཱ་མུ་ཨཱ་ཛི་ཏེ་དྷརྨ་དཱི་པེ་སརྦ་སིདྡྷི་ཧཱུྃ༔ ཞེས་གཏེར་ཆེན་རིན་པོ་ཆེའི་དམིགས་གསལ་བཀའ་སྲུང་དབྱིངས་ཕྱུག་ཨ་ཕྱི་མའི་སྔགས་སོ། །ཨོཾ་མ་མོ་ཛྭ་ལི་ཛྭ་ལ་ནི་ཙཎྜི་ཧཱུྃ་ཕཊ༔ མ་མ་ཏྲག་རཀྵ་ག་རུ་ཊ་ཧཱུྃ་ཕཊ༔ ཨོཾ་ཏྲི་ཤུ་ལ་བཛྲ་སཱ་དྷུ་སིདྡྷི་ཧཱུྃ༔ ཨ་ཙ་ནཾ་ཛཿ ཟབ་ཆོས་རྫོགས་ཆེན་སྡེ་གསུམ་གྱི་བཀའ་གཏེར་སྲུང་མའི་སྔགས་སོ། །ཨོཾ་ལ་ལཿ ལེ་ལེ༔ ཏྃ་ཏྃ༔ ཏེ་ཏེ་ཁ་རཀྨ༔ མ་མ་སྲིང་འགྲོ་མ་ཧཱུྃ་བྷྱོ་ཧཱུྃ་ཧཱུྃ༔ ཐུགས་སྒྲུབ་བར་ཆད་ཀུན་སེལ་གྱི་བཀའ་སྲུང་བོད་སྐྱོང་བརྟན་མ་བཅུ་གཉིས་ཀྱི་སྔགས་སོ། །ཨོཾ་བཛྲ་མ་ཏི་ཧཱུྃ༔ ཐུགས་སྒྲུབ་བར་ཆད་ཀུན་སེལ་གྱི་གཏེར་སྲུང་ཁ་རག་ཁྱུང་བཙུན་མའི་སྔགས་སོ། །ཨོཾ་བཛྲ་ཀཱི་ལི་ཀཱི་ལ་ཡ་མོ་གྷ་ཏ་ཡ་མ་མ་ཤྲཱི་གྷྲཾ་ཀརྨ་ཀཱ་ར་ཡེ་ཧཱུྃ་ཕཊ༔ ཟབ་བདུན་ཕུར་པའི་བཀའ་སྲུང་ཕུར་སྲུང་དམ་ཅན་གྱི་སྔགས་སོ། །ཨོཾ་ནི་ལཾ་བ་ར་དྷཱ་ར་བཛྲ་པ་ཎི་ཧཱུྃ་ཧཱུྃ་ཕཊ༔ ཐུགས་སྒྲུབ་ཡིད་བཞིན་ནོར་བུའི་བཀའ་སྲུང་རྣམ་སྲས་ལྟར་ནོར་ལྷ་གཏེར་བདག་གཙོ་བོ་གོང་གནོན་གསང་བདག་གི་སྔགས་སོ། །ཨོཾ་བཻ་ཤྲ་མ་ཎ་ཡ་སྭཱ་ཧཱ༔ བཀའ་སྡོད་རྣམ་སྲས་སེར་ཆེན་གྱི་སྔགས་སོ། །ཨོཾ་མ་ཧཱ་རཱ་ཛ་ཡཀྵ་ས་མ་ཡ་བཻ་ཤྲ་མ་ཎ་ཙིཏྟ་ཧྲིཾ་ཧྲིཾ་ཛཿཛཿ དབང་གི་གནོད་སྦྱིན་མདུང་དམར་ཅན་གྱི་སྔགས་སོ། །ཨོཾ་བཻ་ཏྲཀ་ཏྲཀྵ་བྷྱོ་ཧཱུྃ་ཕཊ༔ དྲག་པོ་རྟ་སྔོན་ཅན་གྱི་སྔགས་སོ། །ཨོཾ་བུདྡྷ་བཛྲ་རཏྣ་པདྨ་ཀརྨ་ཛམ་བྷ་ལ་ཧཱུྃ་ཛཿ ཐུགས་སྒྲུབ་བར་ཆད་ཀུན་སེལ་གུ་རུ་སྐྱེས་མཆོག་ཚུལ་བཟང་གི་སྒྲུབ་ཐབས་ལས་འབྱུང་བ་ལྟར་ཛམ་ལྷ་རིགས་བཞི་སྤྱི་དྲིལ་གྱི་སྔགས་སོ། །ཨོཾ་ག་ཎ་པ་ཏི་བ་སུ་དྷཱ་རི་ཎི་ཀུ་རུ་ཀུལླེ་བཻ་ཤྲཱ་བ་ཎ་ཧཱུྃ་ཛཿ ལྷ་ཀླུ་མི་དང་གནོད་སྦྱིན་ནོར་བདག་གི་སྔགས་སོ། །ཨོཾ་མཱ་ཎི་བྷ་དྲ་རེ་མནྟ་མ་ཧཱ་རཱ་ཛ་ཡཀྵ་ཀུ་བཻ་ར་ཧཱུྃ་ཛཿ ཟས་ནོར་རྟ་ཕྱུགས་ནོར་བདག་གི་སྔགས་སོ། །ཨོཾ་ཨི་ལིང་ཀི༔ པི་ལིང་ཀི༔ ཀི་ལིང་ཀི་སྭཱ་ཧཱ༔ ནོར་དང༌། ཨོཾ་ན་མོ་ཤུ་ཏྲ་མུ་ཏྲི་མ་ཧཱ་པི་ཤཱ་ཙི་ན་ཡེ་སྭཱ་ཧཱ༔ གོས་དང༌། ཨོཾ་ཨ་ན་ལེ༔ ཀུན་དྷ་ལེ༔ གྷྲྀ་ཧྣ༔ པི་ཎ་དྷ༔ པི་ཤཱ་ཙི་ན་ཡེ་སྭཱ་ཧཱ༔ ཟས་ཀྱི་ལྷ་མོ་སྟེ་ཟབ་བདུན་དང་བར་ཆད་ཀུན་སེལ་གཉིས་ཀ་ལས་འབྱུང་བའི་ཀུན་འཁྱིལ་མཆེད་གསུམ་གྱི་སྔགས་སོ། །ཨོཾ་ཀུ་མ་ཀུ་མ་ཁུས་ཐིས་སྭཱ་ཧཱ༔ ཨོཾ་མ་མ་ར་ལི་པྲ་མ་ཡ་ཛཿཛཿ བར་ཆད་ཀུན་སེལ་མི་གཡོ་བའི་བཀའ་སྲུང་དུར་བདག་ཡབ་ཡུམ་གྱི་སྔགས་སོ། །ཨོཾ་མ་ཧཱ་དེ་བ་ཛཿཨུ་མ་དེ་བཱི་ཧྲིཾ་ཧ་རི་ནི་ས་པཱ་ཤཾ་ཀུ་རུ་ཧོཿ ཐུགས་ཆེན་པདྨ་སྒྱུ་འཕྲུལ་དྲ་བ་དང་ཟབ་བདུན་པདྨ་མཁའ་འགྲོའི་བཀའ་སྲུང་ལྷ་ཆེན་ལྕམ་དྲལ་གྱི་སྔགས་སོ། །ཨོཾ་མ་ཧཱ་སིཾ་ཧ་མ་ཎི་རཱ་ཛ་ཧཱུྃ་ཕཊ༔ སེང་ཆེན་དགྲ་བླའི་རྒྱལ་པོའི་སྔགས་སོ།  །བཟླས་པ་འདི་དག་བསྡུ་ན་སྤྱིར་བཏང་བྱེད་ན་རྩ་བ་ཆོས་སྐྱོང་དགོངས་འདུས་མགོན་ཆེན་ལྕམ་དྲལ་སྡེ་དགུ་སོ་སོ་དང༌། །དྲེགས་པ་ཕོ་རྒྱུད་མོ་རྒྱུད་ནོར་ལྷ་རྣམས་སྤྱི་དྲིལ་གྱི་སྔགས། ཨོཾ་བཛྲ་སརྦ་དུཥྚན་མ་མ་རུ་ལུ་བ་སུ་དྷཱ་རི་ཨེ་ཛཿབྷྱོཿ ཞེས་ཆོས་སྐྱོང་དགོངས་འདུས་སྙིང་པོ་ལས་འབྱུང་བ་ཙམ་བཟླས་ཀྱང་རྒྱས་བསྡུས་མཚམས་པར་འགྱུར་ཞིང་དམིགས་གསལ་སོ་སོའི་ལས་སྦྱོར་གྱི་སྐབས་བསྙེན་བཟླས་བྱེ་བྲག་ཏུ་སྦྱར་བ་སྐབས་ཕྱེད་པར་བྱ་དགོས་ལ། ཨོཾ་མ་ཧཱ་ཀཱ་ལ་ཡ། ཤཱ་ས་ན་ཨུ་པ་ཧ་རི་ནི། ཨེ་ཥ་ཨ་པཉྩི་མ་ཀཱ་ལོ་ཨ་ཡི་དཾ་རཏྣ་ཏྲ་ཡཱ་ཡ། ཨ་པ་ཀཱ་རི་ཎཱཾ་ཡ་དི་པྲ་ཏི་ཛྙཱ་སྨ་ར་སི་ཏ་དཱ། ཨི་དཾ་དུཥྚན་ཁ་ཁ་ཁཱ་ཧི་ཁཱ་ཧི། མཱ་ར་མཱར། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ་དི་ན་མཻ་ཀི་ན་ཧཱུྃ་ཕཊ་ཧཱུྃ། ཞེས་གཙོ་འཁོར་ཐུན་མོང་སྟེ། འདི་རྣམས་ཇི་ཙམ་ནུས་པ་བཟླས་པའི་མཐར། ཐུན་མཚམས་སུ་བ་ལིཾ་ཟས་སྣ་ཕུད་སྐྱེམས་སོགས་གསོ་བྲན་གྱིས། རྃ་ཡྃ་ཁྃ། ཨོཾ་ཨཱ༔ཧཱུྃ། ལན་གསུམ་གྱིས་བྱིན་རླབས་ཏེ། ཨོཾ་བཛྲ་ཙཎྜ་སརྦ་དུཥྚན་མ་མ་རུ་ལུ་ཨེ་ཛཿབྷྱོཿ ས་པཱ་རི་ཝ་ར་ཨི་དཾ་བ་ལིཾ་ཏ་ཁཱ་ཧི། ལན་གསུམ་གྱིས་གཏོར་མ་ཕུལ་ལ། ཧཱུྃ༔ བླ་མ་མགོན་པོ་དབྱེར་མེད་པ༔ ཐུགས་རྗེ་བརྩེ་བས་དགོངས་སུ་གསོལ༔ ཉམས་ཆགས་འགལ་འཁྲུལ་ཅི་མཆིས་པ༔ འགྱོད་པས་བཤགས་སོ་དག་པར་མཛོད༔ ཅེས་ཡིག་བརྒྱ་བཟླ། དྲུག་པ་ཚོགས་ཀྱི་མཆོད་པ་ལ་བཞི་ལས་དང་པོ་ཐབས་ཤེས་ཀྱི་རྫས་རྣམས་བསང་ཆུས་བྲན་ལ་བྱིན་གྱིས་བརླབ་པ་ནི། རྃ་ཡྃ་ཁྃ། ཡེ་ཤེས་མེ་རླུང་ཆུ་ཡིས་དངོས་འཛིན་སྦྱངས༔ བྷྲཱུྃ་ལས་བྷཉྫ་འབར་བའི་སྣོད་རྣམས་སུ༔ ཨོཾ་ཧཱུྃ་ཏྲཱྃ་ཧྲིཿཨཱཿལས་བདུད་རྩི་ལྔ༔ མཱུྃ་ལཱྃ་མཱྃ་པཱྃ་ཏཱྃ་ལས་ཤ་ལྔ་གསལ༔ རླུང་མེ་སྦྱོར་བས་འོད་ཞུ་བདུད་རྩིར་འཁྱིལ༔ རླངས་པ་ཡེ་ཤེས་བཅུད་བསྡུས་དེ་ལ་ཐིམ༔ དམ་ཡེ་གཉིས་མེད་ཁ་དོག་དྲི་རོར་ལྡན༔ འདོད་ཡོན་ལྔ་ཡི་མཆོད་སྤྲིན་སྤྲོ་བར་གྱུར༔ གཉིས་པ་ནི། ཧཱུྃ། འོག་མིན་ཆོས་དབྱིངས་ཕོ་བྲང་ནས༔ རྩ་བརྒྱུད་བླ་མ་གཤེགས་སུ་གསོལ༔ རང་བཞིན་གནས་མཆོག་དམ་པ་ནས༔ ཡི་དམ་ལྷ་ཚོགས་གཤེགས་སུ་གསོལ༔ དུར་ཁྲོད་བརྒྱད་དང་ཉེར་བཞིའི་གནས༔ དཔའ་བོ་མཁའ་འགྲོ་གཤེགས་སུ་གསོལ༔ རང་རང་གར་བཞུགས་གནས་མཆོག་ནས༔ མ་མགོན་ལྕམ་དྲལ་དམ་ཅན་རྣམས༔ ཚོགས་ལ་སྤྱན་འདྲེན་གཤེགས་སུ་གསོལ༔ བཛྲ་ས་མ་ཛཿ གསུམ་པ་ནི། ཧཱུྃ༔ འདོད་ཡོན་ལྔ་ཡི་མཆོད་སྤྲིན་ནི༔ བླ་མ་ཡི་དམ་མཁའ་འགྲོ་དང༔ མ་མགོན་ལྕམ་དྲལ་ལ་སོགས་པའི༔ དམ་ཅན་རྒྱ་མཚོ་རྣམས་ལ་འབུལ༔ ག་ཎ་ཙཀྲ་པཱུ་ཛ་ཁཱ་ཧི༔ བཞི་པ་ནི། ཧཱུྃ༔ ཐོག་མེད་དུས་ནས་བསགས་པ་ཡི༔ མ་རིག་ཉམས་ཆགས་འགལ་འཁྲུལ་རྣམས༔ ཚོགས་ཀྱི་མཆོད་པས་བསྐང་ཞིང་བཤགས༔ ཐམས་ཅད་བྱང་ཞིང་དག་གྱུར་ཅིག༔ ཡིག་བརྒྱ་བརྗོད། བདུན་པ་ཐུགས་དམ་སྐོང་བའི་རིམ་པ་ལ། དམ་ཅན་སོ་སོའི་སྐོང་བ། བཤགས་པ། ཕྲིན་བཅོལ་དང་གསུམ་ལས། དང་པོ་ནི། སྐོང་རྫས་རྣམས་ཨ་མྲྀ་ཏས་བསང༌། སྭ་བྷཱ་ཝས་སྦྱང༌། སྟོང་པའི་ངང་ལས་བྷྲཱུྃ་ལས་གནས་ཁང་དུར་ཁྲོད་དྲག་པོའི་ཞིང་ཁམས། བསམ་གྱིས་མི་ཁྱབ་པར་ཕྱི་ནང་གསང་བའི་མཆོད་པ་སྤྱན་གཟིགས་མཐུན་རྫས་རྟེན་རྫས་སྐོང་རྫས་ལ་སོགས་པ་ཐམས་ཅད་སྲིད་ཞིའི་འདོད་ཡོན་གྱི་རྣམ་པ་མཁོ་རྒུ་ཚང་བ། བཟང་རྒུས་འབྱོར་བ། མཛེས་རྒུས་བརྒྱན་པ། ངོ་བོ་ཡེ་ཤེས་སྒྱུ་མའི་རང་བཞིན་བདེ་བའི་རྣམ་པ་ཐམས་ཅད་པར་འཆར་བས་ནམ་མཁའི་ཁམས་གང་བར་གྱུར། ན་མཿསརྦ་ཏ་ཐཱ་ག་ཏ་སོགས་ལན་གསུམ། བཛྲ་སྥ་ར་ཎ་ཁྃ་ཞེས་པས་བྱིན་གྱིས་བརླབ་ཅིང་ཟད་མི་ཤེས་པར་སྤེལ་ལ། དང་པོ་དྲག་པོ་ཆོས་སྐྱོང་དགོངས་འདུས་མགོན་ཆེན་སྡེ་དགུ་སྤྱི་དྲིལ་གྱི་བསྐང་བ་ནི། ཧཱུྃ། ཆོས་དབྱིངས་རང་བྱུང་རྡོ་རྗེའི་མཚོན་ཆེན་པོའི། །བདག་རྟོག་རུ་ཏྲ་བསྒྲལ་བའི་དྲག་པོའི་ཞིང༌། །ཁྲག་འཐུང་དགྱེས་དགུའི་ལོངས་སྤྱོད་མི་ཟད་གཏེར། །འདོད་རྒུ་ཡིད་བཞིན་འཆར་བས་ཐུགས་དམ་བསྐང༌། །ཁྲག་མཁྲིས་དུག་ཆུའི་རྒྱ་མཚོ་རྦ་ཀློང་འཁྲུགས། །དོན་སྙིང་དབང་པོའི་མེ་ཏོག་འདར་ཞིང་འཕྲིགས། །ཚིལ་གསུར་དུད་སྤྲིན་མེ་རླུང་ཕྱོགས་ཀུན་འཚུབས། །རྐང་གླིང་ཤ་ཟའི་བཤུགས་ལུའི་ཐུགས་དམ་བསྐང༌། །བཅུད་ལྡན་བདུད་རྩིའི་རྫིང་བུ་རཀྟའི་མཚོ། །འདོད་འབྱུང་གཏོར་མའི་ལྷུན་པོ་རྒྱན་གྱིས་བཀྲ། །ཉེར་སྤྱོད་ཀུན་བཟང་མཆོད་སྤྲིན་འདོད་རྒུའི་གཏེར། །བདེ་སྟོང་ཡེ་ཤེས་རོལ་པས་ཐུགས་དམ་བསྐང༌། །བཅུ་དྲུག་རིག་མས་འདོད་པའི་སྒྱུ་རྩལ་རྩེ། །མངོན་སྤྱོད་ལས་ཀྱིས་དུག་གསུམ་རུ་དྲ་བསྒྲལ། །གཉིས་མེད་ཡེ་ཤེས་སྒྱུ་འཕྲུལ་དྲ་བའི་གར། །ཆོས་ཀྱི་དབྱིངས་དང་མཉམ་པས་ཐུགས༴ མཐུན་པའི་དམ་རྫས་བཞེད་རྒུ་མི་ཟད་གཏེར། །རྟེན་པའི་དམ་རྫས་བླ་རྟེན་སྲོག་འཁོར་འཛུག །སྐོང་བའི་དམ་རྫས་སྲིད་ཞིའི་དཔལ་འབྱོར་ཀུན། །ཡིད་བཞིན་ལྷུན་གྱིས་གྲུབ་པའི་མཆོད་པ་འདིས། །ཆེ་མཆོག་ཡོན་ཏན་མགོན་པོ་སྤྱི་དཔལ་ཆེ། །ལེགས་ལྡན་རྡོ་རྗེ་སྲིན་པོའི་ཐུགས༴ ཐུགས་ཀྱི་མགོན་པོ་ཕྱག་བཞིའི་ཐུགས༴ སྐུ་ཡི་མགོན་པོ་སྟག་ཞོན་ཐུགས༴ གསུང་གི་མགོན་པོ་ཕྱག་དྲུག་ཐུགས༴ ཕྲིན་ལས་མགོན་པོ་མ་ནིང་ཐུགས༴ མངོན་རྫོགས་མ་མོ་སྔགས་སྲུང་ཐུགས༴ རིག་འཛིན་མགོན་པོ་ཞལ་བཞིའི་ཐུགས༴ དྲག་སྔགས་མགོན་པོ་གུར་གྱི་ཐུགས༴ མཆོད་བསྟོད་མགོན་པོ་སྲས་མཆོག་ཐུགས༴ ཚོགས་ཀྱི་བདག་པོ་བེང་དབང་ཨ་གྷོ་ར། །ཞིང་སྐྱོང་སེང་གདོང་བདུད་མགོན་ཏྲཀྴད་ནག །དཔལ་མགོན་བདུན་ཅུ་དགྱེས་སྡེ་བཀའ་འཁོར་བཅས། །དྲག་པོ་ཆོས་སྐྱོང་དགོངས་འདུས་ཐུགས་དམ་བསྐང༌། །ཐུགས་དམ་དགྱེས་བསྐང་ཉམས་པ་སོར་ཆུད་ནས། །སྐུ་གསུང་ཐུགས་ཀྱི་ཕྲིན་ལས་རྨད་པོ་ཆེའི། །དགྱེས་རྒུའི་གར་གྱིས་བསྟན་དང་དེར་འཛིན་སྤེལ། །འདོད་རྒུའི་ཕྲིན་ལས་ཡིད་བཞིན་འགྲུབ་པར་མཛོད། །ཅེས་དཀྱུས་སུ་འཇུག་བདེའི་དབང་དུ་བྱས་ལ་རྒྱས་པར་སྤྲོ་ན་མགོན་ཆེན་སྡེ་དགུ་སོ་སོའི་བསྐང་བ་སྐབས་དང་གང་འབྲེལ་སྦྱར་ན་ལེགས་པའི་ཡན་ལག་ཏུ་འགྱུར་རོ།  །གཉིས་པ་ཕོ་རྒྱུད་དྲེགས་པ་ཀུན་འདུས་ཀྱི་སྤྱི་བསྐང་ནི། ཧཱུྃ། འགྱུར་མེད་ཆོས་སྐུའི་ཀློང་ལས་མ་གཡོས་ཀྱང༌། །གསང་ཆེན་བསྟན་པ་གཉན་པོ་མེལ་ཚེའི་ཕྱིར། །འབར་བའི་ལང་ཚོ་བསྐལ་པའི་མེ་རླུང་ཤུགས། །བདུད་སྡེའི་གཡུལ་ངོར་བཞེངས་ཀུན་གནས་འདིར་བྱོན། །ཆོས་ཉིད་བདེ་ཆེན་གཅིག་གི་ཆོ་འཕྲུལ་ལས། །ཆོས་ཅན་མ་འགག་རྟེན་འབྱུང་གྲུབ་པའི་རྫས། །རྒྱུད་གསུམ་དྲེགས་པ་ཡོངས་ལ་མཉེས་པའི་རྫས། །ངོ་མཚར་དགྱེས་རྒུའི་རོལ་པས་ཐུགས་དམ་བསྐང༌། །ཕྱི་ཡི་མཆོད་སྤྲིན་ཉེར་སྤྱོད་འདོད་ཡོན་ལྔ། །ནང་གི་དམ་རྫས་སྨན་གཏོར་རཀྟའི་བཅུད། །གསང་རྟེན་བླ་རྡོ་སྲོག་འཁོར་མཐུན་པའི་རྫས། །ཡིད་བཞིན་ལྷུན་གྱིས་གྲུབ་པས་ཐུགས༴ བསྐྱེད་རྫོགས་བསྒོམས་པས་སྲིད་ཞིའི་སྟོང་སྲོག་འཕྲོག །བསྙེན་སྒྲུབ་ལས་ཀྱིས་དྲེགས་པ་གནད་ལ་གཅུན། །འབོད་རྦད་བསད་པས་བསྟན་འགྲོའི་ཕན་བདེའི་དཔལ། །ཡར་ཟླའི་དཔལ་བཞིན་སྤེལ་བས་ཐུགས༴ སྡེ་བརྒྱད་དྲེགས་པའི་གཙོ་བོ་གཟའ་བདུད་ཆེ། །བདུད་མགོན་སེང་གདོང་ཏྲཀྴད་ཡ་མ་རཱ། །གནོད་སྦྱིན་བེཀྩེ་དམ་ཅན་ཀླུ་བཙན་རྒྱལ། །ཕོ་རྒྱུད་ཆོས་སྲུང་རྒྱ་མཚོའི་ཐུགས་དམ་བསྐང༌། །དགྱེས་རྒུའི་དམ་ཚིག་གཉན་པོ་མ་བྲལ་བར། །ལུང་རྟོགས་བསྟན་པའི་ཆབ་སྲིད་རྟག་ཏུ་སྤེལ། །སྐྱེ་རྒུའི་ཡིད་སྣང་དཀར་པོའི་ལམ་བསྒྱུར་ཞིང༌། །འཇིག་རྟེན་ཕན་བདེའི་འཚོ་བའི་ཕྲིན་ལས་མཛོད། །རིག་འཛིན་གྲུབ་པས་ཕྱོགས་དུས་ཀུན་ཁྱབ་ཅིང༌། །འཆད་རྩོད་རྩོམ་ལས་བཤད་སྒྲུབ་ལས་གསུམ་རྒྱས། །ནད་མུག་མཚོན་འཁྲུགས་སྙིགས་མའི་བསྐལ་ངན་བཟློག །དཀོན་མཆོག་དབུ་རྨོག་བཙན་ཞིང་དར་བར་མཛོད། །ཉམས་ཆགས་ཉེས་པའི་དྲི་མ་དབྱིངས་སུ་ཞི། །བསྟན་སྲུང་དབང་པོ་དགྱེས་པའི་འཛུམ་དཀར་བཞད། །སྲིད་ཞིའི་ལེགས་ཚོགས་དབང་སྡུད་བདུད་དགྲའི་དཔུང༌། །ཚར་གཅོད་ཕྱོགས་ལས་རྣམ་རྒྱལ་ཕྲིན་ལས་མཛོད། །གསུམ་པ་མོ་རྒྱུད་མ་མོ་ཀུན་འདུས་ཀྱི་སྤྱི་བསྐང་ནི། བྷྱོཿ བདེ་ཆེན་ཀུན་ཏུ་བཟང་མོའི་མཁའ། །ཀློང་ཡངས་བརྡལ་བ་ཆེན་པོའི་སྤྲིན། །སྣང་སྲིད་མ་ལུས་མཆོག་བདེའི་དཔྱིད། །དགྱེས་དགུའི་སྤྲིན་གྱིས་ཐུགས་དམ་བསྐང༌། །འགག་མེད་སྲིད་ཞིའི་ཆོས་རྣམས་ཀུན། །སྐྱེ་མེད་རྡོ་རྗེའི་ཨེ་དབྱིངས་སུ། །འཕོ་མེད་བདེ་ཆེན་སྡོམ་པའི་གར། །འདུ་འབྲལ་མེད་པས་ཐུགས་དམ་བསྐང༌། །སྒྱུ་མ་རྡོ་རྗེ་བཙན་པོའི་གཟུགས། །གཞོམ་མེད་གསང་བ་དགྱེས་པའི་སྒྲ། །ཞུ་བདེའི་དྲི་དང་དགའ་བཞིའི་རོ། །རེག་འཇམ་གཏུམ་མོའི་ཐུགས་དམ་བསྐང༌། །ཟླ་བའི་བདུད་རྩི་ཞུ་བའི་སྐུ། །རྡོ་རྗེ་ཉི་མའི་བདེ་ཆེན་གསུང༌། །མི་རྟོག་མཉམ་པའི་བ་ལིཾ་ཏ། །རང་བྱུང་རྫས་ཀྱིས་ཐུགས་དམ་བསྐང༌། །རྒྱུད་དྲུག་དགའ་བའི་རོལ་རྩེད་ཀྱིས། །ཡེ་ཤེས་མཚོན་ཆེན་འབར་བ་ཡིས། །ཀ་དག་ཆེན་པོར་ཐུགས་དམ་བསྐང༌། །ངོ་བོ་ཞི་བ་རྡོ་རྗེའི་དབྱིངས། །རྣམ་པ་སྣང་སྲིད་ཡུམ་གྱི་གར། །བདེ་ཆེན་དགྱེས་མ་ཁྲག་འཐུང་གཙོ། །ཨེ་ཀ་ཙ་ཏིའི་ཐུགས་དམ༴ དུད་སོལ་ལྷ་མོའི་ཐུགས་དམ༴ དུར་ཁྲོད་ལྷ་མོའི་ཐུགས་དམ༴ སྲོག་སྒྲུབ་ནག་མོའི་ཐུགས༴ ཚེ་རིང་མཆེད་ལྔའི་ཐུགས༴ རྡོ་རྗེ་གཡུ་སྒྲོན་ཐུགས༴ དབྱིངས་ཕྱུག་ཆོས་སྒྲོན་ཐུགས༴ བརྟན་མ་བཅུ་གཉིས་ཐུགས་དམ་བསྐང༌། །ཐུགས་དམ་གཉན་པོ་དགྱེས་བསྐང་བས། །ཕྱི་རུ་མ་མོའི་གཡོ་འཁྲུགས་ཞི། །སྣོད་བཅུད་བདེ་ལེགས་དཔལ་གྱིས་འབྱོར། །ནང་དུ་རྩ་རླུང་ཐིག་ཉམས་གསོས། །ཚེ་བསོད་དབང་ཐང་ཉམས་རྟོགས་སྤེལ། །གཞན་དུ་གཟུང་འཛིན་འཁྲུལ་རྟོག་བཅོམ། །རླུང་སེམས་དྷཱུ་ཏིར་དབང་དུ་འདུས། །དེ་ཉིད་རྣམ་ཐར་གསུམ་གྱི་ཀློང༌། །འཕྲུལ་རྟོག་བདུད་དགྲ་ཚར་བཅད་ནས། །དོན་གཉིས་ལྷུན་གྲབ་ཕྲིན་ལས་སྒོ། །རྩོལ་མེད་སྒྱུ་འཕྲུལ་དྲ་བ་ཡིས། །འགྲོ་ཀུན་རྗེས་སུ་འཛིན་ནུས་ཤིང༌། །ཟབ་ཅིང་གསང་བ་རྡོ་རྗེའི་ལམ། །ཀུན་ཏུ་རྒྱས་ཤིང་འཕེལ་བར་མཛོད། །བཞི་པ་ནོར་ལྷ་གཏེར་བདག་ཀུན་འདུས་ཀྱི་སྐོང་བ་ནི། ཧྲཱིཿ ཆོས་དབྱིངས་ཀུན་ཏུ་ཁྱབ་པ་ཡི། །བསོད་ནམས་ཡེ་ཤེས་སྒྱུ་འཕྲུལ་གར། །ཀུན་བཟང་དགྱེས་རྒུའི་མཆོད་པའི་སྤྲིན། །དངོས་ཡིད་ཏིང་འཛིན་ནུས་པའི་སྒོ། །རང་ཤར་ཕུན་ཚོགས་སྲིད་ཞིའི་དཔལ། །ལྷུན་གྲུབ་རིན་ཆེན་དབྱིག་གི་གཞིར། །ནོར་བུ་གཞལ་མེད་རྒྱན་ཕྲེང་བརྒྱན། །གཟི་བརྗིད་འོད་འབར་རྒྱ་ཕིབས་བརྩེགས། །བཀྲ་ཤིས་རྟགས་རྫས་རྒྱལ་སྲིད་བདུན། །ཉེ་བའི་རིན་ཆེན་འདོད་ཡོན་ལྔ། །གྲུབ་པའི་རྫས་ཀྱི་གཏེར་བརྡོལ་ཞིང༌། །འདོད་འབྱུང་བུམ་བཟང་མ་རྨོས་སྙེ། །དཔག་བསམ་ཤིང་དང་རྟ་མཆོག་བ། །རིན་ཆེན་རི་གླིང་ནགས་ཚལ་མཛེས། །བདུད་རྩིའི་ཆུ་ཀླུང་ཀླུ་དབང་རྩེན། །རི་དྭགས་གནག་ཕྱུགས་གཅན་གཟན་ཁྱུ། །བག་ཕེབས་རྩེ་དགའི་ཟློས་གར་ཅན། །ལྷ་མིའི་དབང་པོའི་སྟོབས་དཔལ་དང༌། །གཟི་བྱིན་འགྲན་ལ་ཆེས་དཔའ་ཞིང༌། །མཛེས་སྡུག་མིག་ཡངས་ཀུན་དགའ་བརྩེ། །ནོར་བུའི་སྤྲིན་ལས་བདུད་རྩིའི་ཆར། །འབེབས་དང་སྙན་བརྗིད་ལྷའི་རོལ་མོ། །ཕུན་ཕྱོགས་འདོད་དགུའི་ལོངས་སྤྱོད་ཀྱིས། །གསང་བའི་བདག་པོས་ཐུགས་དམ་བསྐང༌། །བགེགས་ཞི་གནོད་སྦྱིན་བྲན་དུ་བཀོལ། །རིན་ཆེན་གཏེར་འཆང་རྒྱ་མཚོའི་གཙོ། །ངལ་གསོས་བུ་ཡི་ཐུགས་དམ་བསྐང༌། །ཚོགས་གཉིས་རིན་ཆེན་དཔལ་འབྱོར་སྤེལ། །མདུང་དམར་ཅན་གྱི་ཐུགས་དམ་བསྐང༌། །ཁམས་གསུམ་དབང་སྡུད་དངོས་གྲུབ་སྩོལ། །རྟ་སྔོན་ཅན་གྱི་ཐུགས་དམ་བསྐང༌། །གདུག་པ་ཀུན་འདུལ་མཐུ་སྟོབས་སྩོལ། །འཁོར་གྱི་གནོད་སྦྱིན་ཐུགས་དམ་བསྐང༌། །འདོད་དགུའི་ཕྲིན་ལས་ཡིད་བཞིན་སྩོལ། །གཞན་ཡང་རིགས་བཞིའི་ནོར་བདག་དང༌། །ཟས་གོས་རྟ་ནོར་དབྱིག་གི་བདག །ལྷ་ཆེན་དུར་བདག་ཡབ་ཡུམ་སོགས། །ནོར་ལྷ་རྒྱ་མཚོའི་ཐུགས་དམ་བསྐང༌། །རིགས་གསུམ་སྒྱུ་འཕྲུལ་སེང་ཆེན་རྗེ། །འཇིག་རྟེན་སྐྱོང་བའི་ལྷ་ཆེན་གསུམ། །གནས་ཡུལ་གཏེར་གཞིའི་བདག་པོ་སོགས། །དཀར་ཕྱོགས་སྐྱོང་ཀུན་ཐུགས་དམ་བསྐང༌། །གྲིབ་མཐོལ་མི་གཙང་དབྱིངས་སུ་དག །དགྱེས་པའི་ལྷ་ཞལ་ཟླ་ལྟར་དཀར། །བསོད་ནམས་དབང་ཐང་སྙན་གྲགས་དར། །ཕྱོགས་ལས་རྣམ་པར་རྒྱལ་བ་ཡི། །བསྟན་དང་དེར་འཛིན་སྦྱིན་བདག་གི །ཚེ་བསོད་དབང་ཐང་རླུང་རྟ་བཙན། །མི་མཐུན་རྒུད་པ་ཀུན་ཞི་བའི། །ལེགས་ཚོགས་འཕེལ་རྒྱས་བརྟན་པར་མཛོད། །ཅེས་སྐོང་བའི་ཕྲིན་ལས་རྣམས་སོ་སོ་དང༌། བསྡུ་ན། ཧཱུྃ་ཧྲཱིཿ སངས་རྒྱས་བསྟན་པ་སྲུང་བའི་མཐུ་རྩལ་ཅན༔ སོགས་བླ་མ་དགོངས་འདུས་ཀྱི་བསྐང་བཤགས་རིན་ཆེན་ཕྲེང་བ་ལས་འབྱུང་བ་ལྟར་སྦྱར་ཀྱང་རུང་ལ་སྐབས་དེ་ཉིད་དུ་དབྱངས་ཀྱི་འགྱུར་བ་རོལ་མོའི་སྦྱོར་བ་ལྷན་ཅིག་པས་གྱེར་ཞིང་སྦྱར་བའི་སྤོས་ཀྱི་རྒྱུན་བཏུལ་བ་སོགས་བྱའོ།  །གཉིས་པ་བཤགས་པ་ལ་སྤྱི་དང༌། བྱེ་བྲག་གཉིས་ལས། །དང་པོ་ནི། ཧོཿ རང་བཞིན་ཆོས་ཀྱི་དབྱིངས་ལས་མ་གཡོས་ཀྱང༌། །ཐུགས་རྗེའི་དབང་གིས་འབར་བའི་སྐུར་བཞེངས་པ། །རྒྱལ་བའི་བསྟན་སྲུང་དམ་ཅན་རྒྱ་མཚོའི་ཚོགས། །འཁོར་བཅས་བདག་ལ་གསན་ཅིང་དགོངས་སུ་གསོལ། །བདག་ཅག་བླུན་རྨོངས་མ་རིག་འཁྲུལ་པའི་ཡིད། །ལས་དང་ཉོན་མོངས་བག་ཆགས་ཀྱིས་དཀྲུགས་པས། །ལྷ་ཁྱོད་བསྙེན་ཅིང་བསྒྲུབ་པར་དམ་བཅས་ཀྱང༌། །སྐུ་ཡི་ཕྱག་རྒྱ་མ་གསལ་དོན་མ་རྟོགས། །སྔགས་ཀྱི་བཟླས་བརྗོད་མ་དག་ལྷག་ཆད་འཁྲུགས། །ཡིད་ཀྱི་ཏིང་འཛིན་བྱིང་རྒོད་རྟོག་པས་བསླད། །དམ་རྫས་མ་ཚང་རྟེན་རྫས་མ་ཚོགས་དང༌། །རྒྱུ་ཆུང་ཕུད་ཉམས་འབགས་བཙོག་དྲི་མས་གོས། །དུས་ཀྱི་མཆོད་གཏོར་འགྱངས་ཤིང་ཆག་པ་དང༌། །བསྙེན་སྒྲུབ་གཡེལ་ཞིང་ལས་སྦྱོར་ལོག་པ་སོགས། །རྩ་བ་ཡན་ལག་དམ་ཚིག་ཉམས་པ་ཀུན། །རབ་གནོང་འགྱོད་པའི་སེམས་ཀྱི་མཐོལ་ལོ་བཤགས། །མཐོལ་བཤགས་བཟོད་པ་དང་དུ་བཞེས་ནས་ཀྱང༌། །ཉམས་ཆག་སྒྲིབ་པའི་ཚོགས་རྣམས་ཀུན་བྱང་སྟེ། །འགྱུར་མེད་ཚངས་པ་མཆོག་གི་དངོས་གྲུབ་སྩོལ། ཞེས་དང༌། ཡི་གེ་བརྒྱ་པ་བཞི་གསུམ་སོགས་ཀྱིས་ཐུགས་དམ་མ་བསྐང་པ་རྣམས་བཤགས་པར་བྱའོ།  །གཉིས་པ་བྱེ་བྲག་མ་མོའི་འཁྲུགས་སྐོང་ནི། རྒྱས་པར་སྤྲོ་ན་ཚེ་རིང་མའི་གཞུང་ནས་འབྱུང་བ་ལྟར་ཁྱད་པར་གྱི་རྫས་དང་ལྡན་པའི་བྷཉྫ་ལ་བརྟེན་ནས་བྱ། སྤྱིར་བཏང་ཙམ་དུ། བྷྱོཿ སྣང་སྲིད་གདོད་ནས་ཡུམ་ལྔའི་ཀློང༔ མ་མོ་མཁའ་འགྲོའི་དཀྱིལ་འཁོར་ལ༔ འཕོ་འགྱུར་མཚན་མ་ལས་འདས་ཤིང༔ ཞི་བ་ཆེན་པོར་རྟག་གནས་ཀྱང༔ ལྷན་སྐྱེས་ཀུན་བརྟག་མ་རིག་གི༔ རྒྱུ་འབྲས་རྟེན་འབྲེལ་ལ་བརྟེན་ནས༔ རང་རྒྱུད་དུག་ལྔ་འཁྲུགས་པ་ལས༔ མ་མོ་འཁྲུགས་པའི་ཆོ་འཕྲུལ་སྟོན༔ སྣོད་ཀྱི་འབྱུང་བ་རྒུད་པར་བྱེད༔ བཅུད་ཀྱི་སེམས་ཅན་རྣམ་རྟོག་སྒུལ༔ མི་ཕྱུགས་ནད་ཡམས་སྤྲིན་ལྟར་འཁྲིགས༔ ལོ་ཉེས་སད་སེར་འཐབ་རྩོད་ལྡང༔ དེ་དག་ཐམས་ཅད་འབྱུང་བའི་རྒྱུ༔ བཅས་དང་རང་བཞིན་སྡིག་པའི་ལས༔ བག་མེད་འཆོལ་བར་སྤྱོད་པ་ཡི༔ དམ་གྲིབ་མི་གཙང་ཕོག་ལས་བྱུང༔ སྡིག་པའི་ལས་རྣམས་འགྱོད་པས་བཤགས༔ དམ་ཚིག་ཉམས་ན་ཚོགས་ཀྱིས་བསྐང༔ ཉམས་གྲིབ་བདུད་རྩིས་ནུས་པས་སྦྱངས༔ ཐུགས་དང་འགལ་བ་དབྱིངས་སུ་མཐོལ༔ འཁོར་འདས་གདོད་ནས་བདུད་རྩི་ལྔ༔ མ་བཅོས་མ་བསླད་དེ་བཞིན་གཤེགས༔ ཡེ་ཤེས་རིགས་ལྔ་རྣམ་དག་པའི༔ དག་མཉམ་ཆེན་པོའི་ཕུད་ཀྱིས་མཆོད༔ བདུད་རྩིའི་ཟེར་ལས་བྱུང་བ་ཡི༔ སྣོད་བཅུད་གཞིར་བཞེངས་འདོད་ཡོན་སྤྲིན༔ ནམ་མཁའ་མཛོད་ཀྱི་ལོངས་སྤྱོད་ཀྱིས༔ རྟག་པ་རྒྱུན་ཏུ་ཐུགས་དམ་བསྐང༔ ཡེ་ཤེས་དབྱིངས་ཀྱི་མ་མོ་ལ༔ ཁྲོ་དང་འཁྲུགས་པ་མི་མངའ་ཡང༔ རྣམ་འགྱུར་འཇིག་རྟེན་མ་མོའི་ཚོགས༔ ཁྲོས་ཤིང་འཁྲུགས་པ་ཞི་བ་དང༔ དགྱེས་པ་ཆེན་པོའི་ཕྲིན་ལས་ཀྱི༔ ནད་དང་གནོད་པ་དབྱིངས་སུ་སྦྱོངས༔ ཚེ་དང་བསོད་ནམས་སྙན་གྲགས་སྤེལ༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཡི་གེ་བརྒྱ་པ་བཟླས་པས་དག་ཚངས་དུ་གྱུར་པར་བསམ་མོ།  །གསུམ་པ་ལ། བསྒྲལ་བསྟབ། ཕྲིན་བཅོལ་དངོས། ལྷག་མ་གཏོང་བའོ།  །དང་པོ་ནི། ན་མོཿ དཀོན་མཆོག་རྩ་གསུམ་བདེན་པ་དང༔ ཆོས་སྐྱོང་སྲུང་མའི་དྲག་རྩལ་གྱིས༔ དྲེགས་པའི་མགོན་པོ་ཇག་པར་ཆོས༔ ཡིད་ལ་བརྣག་པའི་དགྲ་བགེགས་རྣམས༔ ལྕགས་ཀྱུས་ཟུངས་ལ་ཞགས་པས་ཆིངས༔ གཟུགས་བྱང་འདི་ལ་དབྱེར་མེད་ཁུག༔ ཨོཾ་མ་ཧཱ་ཀཱ་ལ་ཡ་ཧཱུྃ་ཕཊ༔ གནོད་བྱེད་དགྲ་བགེགས་དམ་སྲི་ཕོ་མོ་ཛཿཧཱུྃ་བྃ་ཧོཿས་དགུག་ཅིང་བསྟིམ། ཧཱུྃ་བྷྱོཿ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ། །བཀའ་སྡོད་རོལ་པའི་དུར་ཁྲོད་ཆེན་པོ་ནས། །ཤིན་ཏུ་མི་བཟད་རབ་འཇིགས་སྐུར་སྟོན་པ། །ལྕམ་དྲལ་ཡོངས་རྫོགས་དྲག་པོའི་ཕྲིན་ལས་མཛོད། །ཅེས་བསྐུལ། ཧཱུྃ༔ དུག་གསུམ་གདུག་པའི་དགྲ་དང་བགེགས༔ ཡེ་ཤེས་མཚོན་གྱིས་བསྒྲལ་ནས་སུ༔ ཤ་ཁྲག་རུས་པ་ནང་ཁྲོལ་བཅས༔ དམ་ཅན་སྲུང་མའི་ཞལ་དུ་བསྟབ༔ མཱྃ་ས་རཀྟ་ཀིཾ་ནི་རི་ཏི་ཁཱ་ཧི༔ ཞེས་ཞལ་དུ་བསྟབ་ནས་བཟློག་པའི་ཕྲིན་ལས་བཅོལ་བ་ནི། ཧཱུྃ། བདེ་ཆེན་ཐབས་མཆོག་མགོན་པོ་ཧེ་རུ་ཀ །ཤེས་རབ་དབྱིངས་ཀྱི་ཐིག་ལེ་རལ་གཅིག་མ། །ཟུང་འཇུག་དབུ་མར་ཤར་བའི་མ་ནིང་ནག །རྒྱུད་གསུམ་དམ་ཅན་དྲེགས་པའི་སྡེ་ཚོགས་ཀུན། །དགྲ་བགེགས་ཤ་ཁྲག་གཏོར་མ་འདི་རོལ་ལ༔ རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི༔ སེམས་དང་སེམས་བྱུང་རྒྱུ་འབྲས་འཆོལ་བ་ལས༔ བྱུང་བའི་ནད་གདོན་ཆག་ཆེ་ཉམ་ང་དང༔ ཕྱི་ནང་འབྱུང་བ་དགྲ་གཤེད་འཁྲུགས་པའི་རྐྱེན༔ འཇིགས་པ་ཆེན་པོ་བརྒྱད་དང་བཅུ་དྲུག་དང༔ བྱད་ཕུར་རྦོད་གཏོང་ཐན་ལྟས་ངན་པ་ཀུན༔ བཟློག་ཅིང་བསྒྱུར་བའི་ཕྲིན་ལས་མཛད་དུ་གསོལ༔ ཁྱད་པར་གསང་ཆེན་སྔ་འགྱུར་བསྟན་པ་ལ༔ བསམ་པ་ངན་པ་སྦྱོར་བ་རྩུབ་པ་ཡི། །སྨོན་ལམ་ལོག་པའི་མི་དང་མི་མིན་ཚོགས། །ཡེ་ཤེས་དབྱིངས་སུ་སྒྲོལ་བའི་ཕྲིན་ལས་མཛོད། །འདིར་དགོས་པ་དང་འབྲེལ་ན་མགོན་པོའི་བཟློག་བྱང་དང༌། དགྲ་ཆིངས་དགྲ་བཟློག་སོགས་སྦྱོར་རུང་ངོ༌། །གཉིས་པ་འདོད་པའི་ཕྲིན་ལས་ཀྱི་གཉེར་གཏད་པ་ལ། རྣམ་སྲས་ནོར་ལྷའི་དཀྱིལ་འཁོར་ལ་བསྟེན་པའི་འདོད་དགུའི་ཕྱ་གཡང་སྤེལ་བ་དང༌། ལྷ་ཆེན་ལྕམ་དྲལ་ལ་བསྟེན་པའི་དབང་གི་ཕྲིན་ལས་བྱེ་བྲག་ཏུ་གསོལ་བ་སོགས་དགོས་ན་གཏེར་གཞུང་སོ་སོ་ལས་འབྱུང་བ་ལྟར་སྐབས་འདིར་སྦྱར། སྤྱི་ལ་ཕྲིན་ལས་བཅོལ་བ་ནི། ཧཱུྃ། རབ་འབྱམས་རྒྱལ་བའི་མཁྱེན་བརྩེ་ནུས་པའི་མཛོད། །རིགས་གསུམ་དཔའ་བོ་མཁན་སློབ་ཆོས་གསུམ་གྱི། །ཞལ་སྐྱིན་རིག་འཛིན་རྩལ་འཆང་རྣམ་གསུམ་གྱི། །ཐ་ཚིག་ཕོག་པའི་དམ་ཅན་རྒྱ་མཚོ་དགོངས། །རྡོ་རྗེའི་གདུང་འཛིན་རྣལ་འབྱོར་བདག་ཅག་གིས། །བསྙེན་པས་གཞུང་བསྲང་སྒྲུབ་ཅིང་རྩེ་གཅིག་བསྐུལ། །ཕྱི་ནང་གསང་བའི་མཆོད་པས་དགྱེས་བསྐྱེད་དེ། །འདོད་པའི་ཕྲིན་ལས་གཉན་པོ་གསོལ་འདི་དགོངས། །བདེན་གསུང་བཀའ་ཡི་སྙིང་པོ་རྒྱུད་སྡེའི་སྲོག །ཤིང་རྟ་བརྒྱད་དང་ཟབ་བདུན་ཆོས་གཏེར་སྙིང༌། །བླ་རྫོགས་ཐུགས་གསུམ་སྒྲུབ་སྡེ་བརྒྱད་ལ་སོགས། །བཀའ་བབ་རིན་ཆེན་བདུན་གྱི་བསྟན་མཆོག་སྤེལ། །རིས་སུ་མ་ཆད་ཐུབ་བསྟན་ཡོངས་ཀྱི་སྙིང༌། །ཕྱོགས་སུ་མ་ལྷུང་བཤད་སྒྲུབ་ལས་གསུམ་རྫོགས། །མིང་ཙམ་མ་ཡིན་དོན་གྱི་ལུང་རྟོགས་ཅན། །ཆ་ཙམ་མ་ཡིན་ཀུན་ནས་རྒྱས་པར་མཛོད། །དེ་འཛིན་བཀའ་བབ་འཇམ་མགོན་རྣམ་གསུམ་གྱི། །བསྟན་པ་སྐྱོང་དང་འཛིན་པའི་སྐྱེས་ཆེན་སྤེལ། །ངོ་མཚར་ཐུགས་བསྐྱེད་རྣམ་ཐར་ཕྲིན་ལས་ཀྱི། །སྣང་བ་རྫོགས་ལྡན་གསར་བའི་སྒོ་འཕར་ཕྱེས། །ཁྲིམས་གཙང་སྡོམ་གསུམ་དག་པས་རང་རྒྱུད་གྲོལ། །མང་ཐོས་ཆོས་རབ་རྣམ་འགྱེད་སྤོབས་པ་མཐོ། །བསམ་དང་སྒོམ་པའི་གོམས་སྟབས་ཆེས་བརླིང་བཞིན། །འཆད་རྩོད་རྩོམ་ནུས་དགེ་འདུན་འདུ་བ་སྤེལ། །དབང་གིས་རྒྱུད་སྨིན་དམ་ཚིག་ལང་ཚོ་དར། །བསྐྱེད་རྫོགས་རིན་ཆེན་རྒྱན་གྱིས་བལྟ་ན་སྡུག །རྣམ་བཞིའི་རིག་འཛིན་ལས་རྫོགས་སྐྱེས་བུ་ཆེའི། །དོན་གཉིས་འབད་མེད་ལྷུན་གྱིས་གྲུབ་པར་མཛོད། །མཐའ་དག་ཡིད་ཅན་རྣམ་དཀར་ལམ་བཟང་འཇུག །སྐྱེས་བུ་གསུམ་གྱི་ལམ་ནས་མངོན་མཐོ་དང༌། །ངེས་ལེགས་དཔལ་ལ་སྦྱོར་བས་འཇིག་རྟེན་ཀུན། །བདེ་སྐྱིད་དགའ་བ་བརྒྱ་ཕྲག་མི་ཉམས་འཕེལ། །སྒྲུབ་པའི་རྣལ་འབྱོར་བདག་ཅག་ཡོན་མཆོད་ཀུན། །རང་དོན་བསྙེན་སྒྲུབ་ལས་ཀྱི་སྦྱོར་བ་དང༌། །གཞན་ཕན་བསྟན་འགྲོའི་ཕན་བདེ་སྤེལ་བ་ལ། །དུས་ཀུན་གཡེལ་མེད་སྲུང་སྐྱོབས་དབུགས་འབྱིན་མཛོད། །ཞི་བྱེད་ཟླ་བ་བདུད་རྩིས་ཡིད་རབ་སིམ། །ཚེ་དཔལ་ལུང་རྟོགས་དར་རྒྱས་ཐུབ་བསྟན་དར། །ཁམས་གསུམ་རླུང་སེམས་དབང་བྱེད་འདོད་དགུའི་འབྱོར། །མི་སྲུན་བདུད་བགེགས་ཉམས་པའི་དགྲ་སྡེ་སྒྲོལ། །མདོར་ན་ཇི་ལྟར་འདོད་པའི་ཕྲིན་ལས་སྒོ། །རྩེ་གཅིག་བློ་ཡིས་གཉེར་དུ་གཏད་ལགས་ན། །བུམ་བཟང་གཏེར་དང་དཔག་བསམ་ཤིང་བཞིན་དུ། །འབད་མེད་ལྷུན་གྱིས་གྲུབ་པས་དབུགས་འབྱིན་མཛོད། །ཅེས་མངོན་པར་འདོད་པའི་ཕྲིན་ལས་ཐོགས་མེད་དུ་སྒྲུབ་པར་རྩེ་གཅིག་ཏུ་གསོལ་བ་གདབ་པར་བྱའོ།  །དེ་ནས་བརྡ་དང་བརྡའི་ལན་བཅས་ཚོགས་ལ་རོལ། གསུམ་པ་ནི། ཨོཾ་ཨཱཿཧཱུྃ་ཧ་ཧོ་ཧྲཱིཿ ལྷག་མའི་དམ་རྫས་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་གྱུར། ཨེ་ཨཱ་རལླི་ཧྲཱིཾ་ཧྲཱིཾ་ཛཿས་རྐང་གླིང་བཤུགས་པ་རོལ་མོའི་སྒྲ་དང་བཅས། བྷྱོཿ ལྷག་ལ་དབང་བའི་དྲེགས་པ་ནི༔ མ་མོ་ལས་བྱེད་ཚོགས་དང་བཅས༔ མཐུ་དང་རྫུ་འཕྲུལ་བསམ་མི་ཁྱབ༔ དུར་ཁྲོད་ཀུན་ཉུལ་ཤ་ཆེན་ཟ༔ ཞིང་ལྤགས་གྱོན་ནས་བྷཉྫ་ཐོགས༔ རལ་པ་གཏིབས་ཤིང་བཤུགས་གླུ་ལེན༔ ལེགས་ཉེས་སྟངས་འཛིན་ཕྲིན་ལས་ནི༔ ཐོགས་མེད་སྒྲུབ་པའི་དམ་ཅན་རྣམས༔ ཚོགས་ལྷག་བདུད་རྩི་འདི་གསོལ་ལ༔ ཕྱི་ནང་གསང་བའི་བར་ཆད་སོལ༔ སྒྲུབ་པའི་སྡོང་གྲོགས་མཛད་པ་དང༔ ཕྲིན་ལས་རྣམ་བཞི་མྱུར་དུ་སྒྲུབ༔ ཨུཙྪིཥྚ་བ་ལིཾ་ཁཱ་ཧི༔ ཅེས་བསྔོ།  བརྒྱད་པ་ཁྱད་པར་མངོན་སྤྱོད་ཀྱི་གཡུལ་ལ་རྦད་ཅིང་བསྐུལ་བ་ནི་མན་ངག་གི་ཡི་གེ་གུད་དུ་བཀོད་པ་ལས་ཤེས་པར་བྱའོ།  །དགུ་པ་གཏོར་མ་སྟོབ་པ་ལ་བཞི། ཆོས་སྲུང་སྤྱིའི་གཏོར་མ་འབུལ་བ། ཆད་ཐོ། བརྟན་མ། རྟ་བྲོའོ། དང་པོ་ནི། འབུལ་གཏོར་རྣམས་ལ་དབལ་འབར་བཙུགས། སྤོས་དང་རོལ་མོ་གསེར་སྐྱེམས་ཀྱིས་མཚོན་པར་སྒྲུབ་ཁང་གི་ཡང་ཐོག་སོགས་གང་དུ་གཏོང་བའི་སར་ཁྱེར་ལ་དམིགས་བྱ་དགུག་པ་ནི། ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། སངས་རྒྱས་ཀྱི་བཀའ་བདེན་པ་དང༌། ཆོས་ཀྱི་བཀའ་བདེན་པ་དང༌། དགེ་འདུན་གྱི་བཀའ་བདེན་པ་དང༌། གསང་སྔགས་དང་རིག་སྔགས་དང༌། གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང༌། ཆོས་ཉིད་གདོད་ནས་སྟོང་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང༌། ཁྱད་པར་རྡོ་རྗེའི་ཆོས་སྐྱོང་བའི་སྲུང་མ་བཀའ་སྡོད་ཕོ་ཉའི་དམག་ཚོགས་འཁོར་དང་བཅས་པ་རྣམས་ཀྱི་བཀའ་བདེན་པ་དང༌། བདེན་པ་ཆེན་པོའི་མཐུ་ལ་བརྟེན་ནས་བསྟན་དང་འགྲོ་བའི་སྤྱི་དགྲ །ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུག་པའི་གཟུགས་ཅན་སྡང་བའི་དགྲ་དང༌། གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་སྐད་ཅིག་ཡུད་ཙམ་ལ་དམིགས་པའི་རྟེན་འདི་ལ་ཁུག་ཅིག །རྩ་སྔགས་ཤཱ་ས་ནའི་མཐར། ནྲྀ་ཏྲི་བཛྲ་ཨཾ་ཀུ་ཤ་ཛཿཛཿཧཱུྃ་བྃ་ཧོཿ ཞེས་བསྟིམ། བདག་གི་ཐུགས་ཀ་ནས་ཡི་གེ་ཛཿདམར་ནག་གཉིས་འཕྲོས་པ་མདུན་གྱི་དགྲ་བགེགས་རྣམས་ཀྱི་སྣ་བུག་དང༌། གཤང་ལས་ལས་ཞུགས་པ་སྙིང་གར་ཕྱིན་པས་ཟངས་ལྕགས་ཀྱི་འཁོར་ལོ་གཉིས་སུ་གྱུར་ཏེ་གཡས་གཡོན་དུ་ཤུགས་དྲག་པོར་འཁོར་བས་ཤ་ཁྲག་རུས་གསུམ་དུམ་བུར་གཏུབས་ཏེ་ཕུང་པོར་སྤུངས། དགྲ་བོའི་རྣམ་ཤེས་ཡི་གེ་ཨ་ཡིག་དཀར་གསལ་གྱི་རྣམ་པར་འོག་མིན་རྡོ་རྗེ་སེམས་དཔའི་ཐུགས་ཀར་སྤར། ཚེ་བསོད་དབང་ཐང་གི་དཔལ་ཡོན་ཐམས་ཅད་ནྲྀ་དམར་ལྗང་གི་རྣམ་པར་བདག་ལ་ཐིམ་པས་གཟི་བྱིན་བཀྲག་མདངས་རྒྱས། མདུན་གྱི་ཤ་ཁྲག་རུས་པའི་ཕུང་པོར། ཨོཾ་ཨཱཿཧཱུྃ་ཧོཿ ལན་གསུམ་གྱིས་འདོད་ཡོན་མི་ཟད་པའི་རྣམ་པ་ཅན་གྱི་ཡེ་ཤེས་ཀྱི་བདུད་རྩིའི་རྒྱ་མཚོར་གྱུར་པ་ཆོས་སྲུང་རྣམས་ཀྱི་ཞལ་དུ་བསྟབ་པས་མཆོག་ཏུ་དགྱེས་པ་ཕྲིན་ལས་གང་བཅོལ་ཐོགས་མེད་དུ་སྒྲུབ་པར་བསམ། ཨོཾ་མ་ཧཱ་ཀཱ་ལ་ཡ། ཤཱ་ས་ན་ཨུ་པ་ཧ་རི་ཎི། ཨེ་ཥ་ཨ་པཉྩི་མ་ཀ་ལོ་ཨ་ཡྃ། ཨི་དཾ་རཏྣ་ཏྲ་ཡཱ་ཡ། ཨ་པ་ཀཱ་རི་ཎཾ་ཡ་དི་པྲ་ཏི་ཛྙཱ་སྨ་ར་སི་ཏ་དཱ་ཨི་དཾ་དུཥྚན་ཁ་ཁ་ཁཱ་ཧི་ཁཱ་ཧི། མ་ར་མ་ར། གྲྀཧྞ་གྲྀཧྞ། བྷནྡྷ་བྷནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ཎ་ཧཱུྃ་ཕཊ་ཧཱུྃ། ས་པཱ་རི་ཝ་ར་སོགས་ལན་གསུམ་གྱིས་ཕུལ་ལ། ཧཱུྃ། གཞི་གྲོལ་གདོད་མའི་ཧེ་རུ་ཀ་ཆེན་པོས། །རིག་རྩལ་རྒྱུད་གསུམ་དྲེགས་ཚོགས་དབང་བསྡུས་ཏེ། །ཁྱད་ཆོས་དྲུག་གི་རྡོ་རྗེའི་རྒྱུད་གསུང་ཚེ། །ཁས་བླངས་དམ་ཅན་རྒྱ་མཚོ་སྐུར་བཞེངས་ཤིག །བོད་ཁམས་གདུལ་བྱའི་ལྷག་མ་རྗེས་སྐྱོང་ཕྱིར། །སངས་རྒྱས་གཉིས་པ་པདྨའི་རྒྱལ་ཚབ་ཆེ། །སྤྲུལ་པའི་གཏེར་འབྱིན་རྒྱ་མཚོའི་འཁོར་ལོའི་བསྒྱུར། །ཨོ་རྒྱན་མཆོག་གྱུར་བདེ་ཆེན་གླིང་པ་ཆེར། །རབ་འབྱམས་དཀྱིལ་འཁོར་རྒྱ་མཚོའི་དབང་བསྐུར་ཞིང༌། །མདོ་སྒྱུ་སེམས་དང་རྩ་གསུམ་སྒྲུབ་སྡེ་བརྒྱད། །ཟབ་མོའི་རྒྱུད་དང་མན་ངག་བསམ་ཡས་ཀྱི། །དབང་གི་ཆུ་བོ་བཞི་ཡི་བཀའ་བབ་ཚེ། །བཀའ་གཏེར་སྲུང་མ་རྒྱ་མཚོའི་གཟུགས་བསྟན་ཅིང༌། །དྲེགས་ཚོགས་དབང་བསྡུས་བཀའ་རྟགས་ཕྱག་རྒྱས་གཟིར། །སྨོན་ལམ་གཏད་རྒྱས་ཟབ་གསང་གཏེར་སྒོ་ཕྱེས། །ཕྲིན་ལས་མཐའ་དག་སྒྲུབ་པར་ཁས་བླངས་བའི། །སྔོན་གྱི་གཡར་དམ་གཉན་པོ་རྗེས་བསྐུལ་ཕྱིར། །རྨད་བྱུང་གཏོར་མའི་ལྷུན་པོ་འདོད་ཡོན་གཏེར། །སྨན་རཀ་བདེ་ཆེན་བདུད་རྩིའི་ཟེགས་མ་འཕྲོ། །ཐུགས་ལ་བཞེད་དགུ་དེར་འཆར་མཆོད་པའི་སྤྲིན། །མི་ཟད་ཀུན་བཟང་སྒྱུ་འཕྲུལ་དྲྭ་བ་འདི། །སྔར་མཛད་ལེགས་པའི་ལས་ཀྱི་གཏང་རག་དང༌། །སླད་ནས་མི་གཡེལ་ཇི་ལྟར་འདོད་པ་ཡི། །ཕྲིན་ལས་ལྷུན་གྱིས་གྲུབ་ཕྱིར་གུས་འབུལ་ན། །དགྱེས་དགུའི་གར་གྱི་རོལ་པས་བཞེས་ནས་ཀྱང༌། །བསྟན་འགྲོའི་དགེ་མཚན་ཡིད་བཞིན་ལྷུན་གྱིས་གྲུབ། །སྒྲུབ་པའི་རྣལ་འབྱོར་བདག་ཅག་སྡེ་དང་བཅས། །སྲུང་སྐྱོབ་མེལ་ཚེ་ལུས་དང་གྲིབ་བཞིན་འགྲོགས། །ནད་གདོན་མི་མཐུན་རྒུད་པ་མཐའ་དག་ཞི། །བཤད་སྒྲུབ་ཕྲིན་ལས་ཉམས་རྟོག་ཡོན་ཏན་རྒྱས། །ས་གསུམ་དབང་བྱེད་མི་སྲུན་ལོག་པར་འདྲེན། །བདུད་བགེགས་བར་ཆད་བསྒྲལ་ཞིང་བརླག་པར་མཛོད། །ལེགས་ཉེས་སྟངས་འཛིན་འཁོར་འདས་སྣ་ཚོགས་པའི། །དམ་ཅན་རྒྱ་མཚོ་རིག་སྟོང་གདོད་མའི་ཀློང༌། །གཉིས་མེད་འཇུག་པར་ཕྲིན་ལས་དཔག་ཡས་ཀྱིས། །རྟག་སྐྱོང་ཕྱོགས་ལས་རྣམ་པར་རྒྱལ་བར་མཛོད། གཏོར་མ་སྟོབ་ཅིང་འདོད་དོན་གསོལ། གཉིས་པ་ཆད་ཐོ་བསྒྲག་པ་ནི། ཧཱུྃ༔ འོག་མིན་ཆོས་དབྱིངས་ཕོ་བྲང་དུ༔ དཔལ་ཆེན་ཡང་དག་ཧེ་རུ་ཀས༔ མགོན་པོ་ནག་པོ་འཁོར་བཅས་ལ༔ དབང་བསྐུར་གསང་བའི་མཚན་བཏགས་ཚེ༔ ཇི་ལྟར་ཞལ་བཞེས་མ་གཡེལ་བར༔ དམ་རྫས་གཏོར་མ་འདི་བཞེས་ལ༔ བཅོལ་བའི་ཕྲིན་ལས་འགྲུབ་པར་མཛོད༔ ལེགས་ལྡན་ནག་པོའི་གྲོང་ཁྱེར་དུ༔ བཅོམ་ལྡན་ཤཱཀྱ་ཐུབ་པ་དང༔ རྡོ་རྗེ་གཙུག་ཏོར་རིགས་ལྔ་ཡིས༔ དབང་བསྐུར་དམ་ལ་བཞག་པ་བཞིན༔ ཇི་ལྟར་ཞལ་བཞེས་མ་གཡེལ་བར༔ དམ་རྫས་གཏོར་མ་འདི་བཞེས་ལ༔ བཅོལ་བའི་ཕྲིན་ལས་འགྲུབ་པར་མཛོད༔ རྒྱ་གར་རྡོ་རྗེ་གདན་དྲུང་དུ༔ རིག་འཛིན་སློབ་དཔོན་རྣམ་བརྒྱད་ཀྱིས༔ བསྟན་པ་སྲུང་བར་བཀའ་བསྒོས་བཞིན༔ ཇི་ལྟར་ཞལ་བཞེས་མ་གཡེལ་བར༔ དམ་རྫས་གཏོར་མ་འདི་བཞེས་ལ༔ བཅོལ་བའི་ཕྲིན་ལས་འགྲུབ་པར་མཛོད༔ དཔལ་གྱི་བསམ་ཡས་གཙུག་ལག་ཏུ༔ སློབ་དཔོན་པདྨ་ཐོད་ཕྲེང་དང༔ དགེ་སློང་ནམ་མཁའི་སྙིང་པོ་ཡིས༔ བཀའ་ཡི་སྲུང་མར་བསྐོས་པ་བཞིན༔ ཇི་ལྟར་ཞལ་བཞེས་མ་གཡེལ་བར༔ དམ་རྫས་གཏོར་མ་འདི་བཞེས་ལ༔ བཅོལ་བའི་ཕྲིན་ལས་འགྲུབ་པར་མཛོད༔ ད་ལྟ་སྒྲུབ་པའི་གནས་མཆོག་འདིར༔ མ་མགོན་ལྕམ་དྲལ་ཁྱེད་རྣམས་ལ༔ བསྙེན་སྒྲུབ་མཆོད་ཅིང་བསྟོད་དུས་སུ༔ སྔོན་གྱི་དམ་བཅའ་མ་གཡེལ་བར༔ བཅོལ་བའི་ཕྲིན་ལས་འགྲུབ་པར་མཛོད༔ གསུམ་པ་བརྟན་མ་ནི། བྷྱོཿ བོད་ཁམས་སྐྱོང་བ་བརྟན་མའི་ཚོགས༔ ཨ་སུ་ར་ཡི་བྲག་ཕུག་ཏུ༔ སློབ་དཔོན་པདྨའི་སྤྱན་སྔ་རུ༔ ཁས་བླངས་བཞིན་དུ་མཆོད་གཏོར་བཞེས༔ བོད་ཁམས་ཆོས་བཞིན་སྐྱོང་བ་དང༔ རྣལ་འབྱོར་གྲོགས་མཛོད་བསྟན་པ་སྤེལ༔ མ་མ་ཧྲཱིཾ་ཧྲཱིཾ་བ་ལིཾ་ཏ་ཁཱ་ཧི༔ ཅེས་གཏོར་མ་འབུལ་ལོ།  །བཞི་པ་རྟ་བྲོ་ནི། ཧཱུྃ༔ དུར་ཁྲོད་ཆེན་པོའི་དཀྱིལ་འཁོར་འདིར༔ མ་ཧཱ་ཀཱ་ལས་བྲོ་བརྡུང་བས༔ ལྷ་མོའི་ཚོགས་ཀྱང་དབྱིངས་སུ་རོལ༔ དྲེགས་པ་སྡེ་བརྒྱད་ལས་ལ་འགྱེད༔ བྱ་ནག་ཁྱི་ནག་སྤྲིན་ལྟར་གཏིབས༔ དུག་ལྔས་གཟིར་བའི་དགྲ་དང་བགེགས༔ ཡེ་ཤེས་ལྔ་ཡི་རྨང་དུ་མནན༔ སྐུ་ནི་གར་དགུའི་བྲོ་ཆེན་བརྡུང༔ གསུང་ནི་ཧཱུྃ་ཕཊ་ང་རོའི་གླུ༔ ཐུགས་ནི་སྒྲོལ་མཛད་ཡེ་ཤེས་ཐུགས༔ སྐུ་གསུང་ཐུགས་ཀྱི་བྲོ་བརྡུང་བས༔ དུག་གསུམ་དགྲ་བགེགས་རྡུལ་དུ་བརླག༔ ཨོཾ་ལྃ་ཧཱུྃ་ལྃ་སྟྭྃ་བྷ་ཡ་ནན༔ གསུམ་པ་རྗེས་ཀྱི་ཆོ་ག་ལ་དྲུག་ལས། དང་པོ་གཏང་རག་གི་མཆོད་པ་ནི། ཨོཾ་ཤྲཱི་བཛྲ་དྷརྨ་པཱ་ལ་ས་པཱ་རི་ཝ་ར་ཨརྒྷཾ་སོགས། ཤབྡ་པྲ་ཏཱིཙྪ་སྭཱ་ཧཱ། བསྟོད་པ་ནི། ཧཱུྃ༔ དབྱིངས་ལས་རོལ་པ་ཡེ་ཤེས་མགོན་པོའི་ཚོགས༔ ཐུགས་རྗེའི་སྐུ་སྤྲུལ་ལས་མགོན་ལྕམ་དྲལ་དང༔ བསྟན་སྲུང་དྲེགས་པའི་མགོན་པོ་མཐུ་སྟོབས་ཅན༔ དམ་ཅན་རྒྱ་མཚོའི་ཚོགས་ལ་ཕྱག་འཚལ་བསྟོད༔ ཅེས་དང༌། གཉིས་པ་ནོངས་པ་བཤགས་པ་ནི། ཧཱུྃ༔ བླ་མ་མགོན་པོ་དབྱེར་མེད་པ༔ དམ་ཅན་རྒྱ་མཚོ་དགོངས་སུ་གསོལ༔ ཉམས་ཆག་འགལ་འཁྲུལ་ཅི་མཆིས་པ༔ འགྱོད་པས་བཤགས་སོ་དག་པར་མཛོད༔ གང་ཡང་བདག་ཅག་ལས་དང་པོ་པའི་རྟེན་གྱི་གང་ཟག་བྱིང་བ་དང་རྒོད་པའི་དབང་དུ་གྱུར་པས་ཏིང་ངེ་འཛིན་མ་གསལ་བ་དང༌། ཚོགས་མ་དག་པ་དང་ཛཔ྄་བཟླས་ཉུང་ཞིང་ཆོ་ག་ལྷག་ཆད་དུ་གྱུར་པ་མཆོད་པའི་ཡོ་བྱད་དམན་པ་ལ་སོགས་པ་སྲུང་མའི་དབང་པོ་ཁྱེད་རྣམས་ཀྱི་ཐུགས་དང་འགལ་བའི་རྐྱེན་དུ་གྱུར་པ་གང་ལགས་པ་དེ་དག་ཐམས་ཅད་བཟོད་པར་མཛད་དེ་ཆོས་དབྱིངས་ཀ་དག་ཆེན་པོའི་ཀློང་དུ་ལྷག་ཆད་ཁ་བསྐང་བར་མཛད་དུ་གསོལ། ཞེས་དང༌། ཡི་གེ་བརྒྱ་པས་ནོངས་པ་བཤགས། གསུམ་པ་བརྟན་བཞུགས་ནི། རྟེན་ཡོད་པ་རྣམས་ལ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། ཁྱད་པར་དུ་ཡང་སྐུ་གཟུགས་ཀྱི་རྟེན་འདི་རྣམས་ལ་བསྐྱེད་ཅིང་སྤྱན་དྲངས་པའི་ལྷ་ཚོགས་རྣམས་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་བསྩལ་དུ་གསོལ། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་བརྗོད་ཅིང་མེ་ཏོག་འཐོར། བཞི་པ་གཤེགས་གསོལ་ནི། ཨོཾ། ཁྱེད་ཀྱི་སེམས་ཅན་སོགས་ནས། བཛྲ་མུཿས་སེ་གོལ་གྱི་སྒྲ་དང་བཅས་པས། ཡེ་ཤེས་པ་རྣམས་ཆོས་ཀྱི་དབྱིངས་སུ་གཤེགས། དམ་ཚིག་པ་བདག་ཉིད་དང་གཉིས་སུ་མེད་པར་གྱུར། འཇིག་རྟེན་པའི་འཁོར་རྣམས། གཙྪ་གཙྪ་སྭ་བྷཱ་ཝ་ནཾ་གྱིས་རང་གནས་སུ་བཏང༌། ལྔ་པ་སྨོན་ལམ་ནི། དགེ་བ་འདི་ཡིས་མྱུར་དུ་བདག །ཧེ་རུ་ཀ་དཔལ་འགྲུབ་གྱུར་ནས། འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་དགེ་བའི་རྩ་བ་བྱང་ཆུབ་མཆོག་གི་རྒྱུར་བསྔོ།  །དྲུག་པ་ཤིས་བརྗོད་ནི། ཧཱུྃ། ཀུན་ཀྱང་འགྱུར་མེད་དོན་དམ་བདེ་བ་ཆེ། །མཐའ་ཀླས་སྒྱུ་འཕྲུལ་དྲྭ་བའི་རོལ་མོ་ལས། །དོན་གཉིས་འདོད་རྒུ་ཡིད་བཞིན་སྩོལ་མཛད་པ། །རྩ་གསུམ་དམ་ཅན་རྒྱ་མཚོའི་བཀྲ་ཤིས་ཤོག །གཏུམ་དྲག་རྡོ་རྗེའི་ལང་ཚོའི་སྤྲིན་རུམ་དུ། །མི་བཟད་འབར་བའི་སྙིང་རྗེའི་རྔམས་པའི་ཆར། །ལོག་འདྲེན་མགོ་བོ་འགེམས་པའི་གནམ་ལྕགས་ལྕེ། །དཔལ་ལྡན་ནག་པོ་ཆེན་པོའི་བཀྲ་ཤིས་ཤོག །བདེ་ཆེན་ཟླ་བ་བདུད་རྩིའི་འཇོ་སྒེག་གི །རྣམ་ཐར་སྒོ་གསུམ་པདྨའི་འཐུང་བ་ལས། །ལེགས་འཁྲུངས་སྲིད་ཞི་མི་ཕྱེད་སྒྱུ་འཕྲུལ་གར། །དབྱིངས་ཕྱུག་མ་སྲིང་རྒྱ་མཚོའི་བཀྲ་ཤིས་ཤོག །ཡེ་ཤེས་དབྱིངས་ཁྱབ་བསོད་ནམས་ནོར་བུའི་རྒྱལ། །དྲན་པས་འདོད་དགུའི་ཆར་འབེབས་གནོད་གནས་དབང༌། །གནས་གཞི་གཏེར་སྐྱོང་དཀར་པོའི་ཚོགས་ཀུན་གྱིས། །ཕྱོགས་ལས་རྣམ་པར་རྒྱལ་བའི་བཀྲ་ཤིས་ཤོག །མཁས་གྲུབ་རིག་འཛིན་འདུས་པས་ས་སྟེང་ཁྱབ། །བཤད་སྒྲུབ་ལས་ཀྱི་འཁོར་ལོས་རྒྱལ་བསྟན་སྤེལ། །ངེས་གསང་རྡོ་རྗེ་སྙིང་པོའི་ཤིང་རྟའི་སྲོལ། །རྟག་ཁྱབ་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་བརྗོད་པས་ཕྱོགས་དུས་ཀུན་ཏུ་དགེ་ལེགས་ཀྱི་སྣང་བས་རྟག་ཁྱབ་ལྷུན་གྱིས་གྲུབ་པར་བྱའོ།  །དེ་ལྟར་དཀྱུས་གཅིག་ཏུ་བཀོད་པའི་ཕྲིན་ལས་འདི་དག་མཐའ་གཅིག་ཏུ་ཚང་བར་བཏང་དགོས་པའི་ངེས་པ་མེད་པས་སྐབས་སུ་གང་བབ་དེའི་ཕྲིན་ལས་ནས་བརྩམས་བསྐང་བཤགས་རྣམས་སྦྱར་བས་དོན་གྲུབ་པའང་ཤེས་པར་བྱ་དགོས་སོ།  །བཀའ་གཏེར་སྲུང་མ་རྒྱ་མཚོ་སྒྲུབ་པའི་ཐབས། །རྡོ་རྗེའི་གསུང་གི་ཕྲེང་བ་དཔག་ཡས་ན། །ཅོལ་ཆུང་བྱིས་པའི་ངག་གི་ཚིག་ཕྲེང་ཚོགས། །ངལ་ནས་དང་དུ་ལེན་ལ་དགོས་པ་ཅི། །འོན་ཀྱང་གྲུབ་པ་ཆེན་པོའི་ཟབ་གཏེར་གྱི། །ཆ་ཤས་རེ་ཡང་ངོ་མཚར་རྨད་བྱུང་ཞིང༌། །སྙིགས་དུས་བསྟན་འགྲོའི་བཙས་སུ་ཆེ་སྙམ་ནས། །རྡོ་རྗེའི་རིག་འཛིན་མཆེད་ཀྱི་བཀའ་བཞིན་སྒྲུབ། །དེ་ལས་བྱུང་བའི་རྣམ་དཀར་ལེགས་བྱས་སྤྲིན། །ཡོངས་བསྔོས་མཁའ་ལ་བྲིས་པས་དུས་མཐར་ཡང༌། །རིག་འཛིན་རྩལ་འཆང་གསུམ་གྱི་རིང་ལུགས་ཀྱིས། །བསྟན་དང་འགྲོ་ཕན་དབུགས་འབྱིན་རྒྱུར་གྱུར་ཅིག །ཅེས་ཟབ་གསང་འདི་ཉིད་ཀྱི་བདག་པོར་གདོད་ནས་གྲུབ་པ་ཨོ་རྒྱན་སངས་རྒྱས་གཉིས་པའི་རྡོ་རྗེའི་ལུང་གིས་ཆེ་ཐང་དུ་བསྔགས་པ་ངེས་གསང་བསྟན་པའི་ཤིང་རྟ་རྒྱལ་དབང་ཀརྨ་པ་ཆེན་པོ་རང་བྱུང་ཁྱབ་བདག་རིག་པའི་རྡོ་རྗེའི་ཆོས་སྐྱོང་དགོངས་འདུས་བཀའ་རྒྱ་ཅན་གྱི་དཔེ་ལུང་གི་རྒྱུན་མི་ཉམས་པའི་རྟེན་འབྲེལ་དང་དགོས་པ་ཡོད་པས་འདི་ལྟ་བུ་ཞིག་ཁྱོད་ཀྱི་བྲི་བར་འོས་ཞེས་ཆེད་དུ་རྡོ་རྗེའི་བཀའི་བསྐུལ་མ་གནང་བ་བཞིན་ཆོས་སྐྱོང་དགོངས་འདུས་རྩ་བའི་ཕྲིན་ལས་ཙམ་བྲིས་ཟིན་སྐབས། གཏེར་ཆེན་མཆོག་སྤྲུལ་འཇམ་དབྱངས་སྨྲ་བའི་ཟླ་བས་བཀྲ་ཤིས་པའི་རྫས་རྟེན་དང་བཅས་པས་མཆོག་གཏེར་སྲུང་མའི་གསོལ་མཆོད་དངོས་གྲུབ་རྒྱ་མཚོ་ཉིད་ཧ་ཅང་རྒྱས་ཆེ་བས་དུས་དང་རྒྱུན་པར་ལྕོགས་དཀའ་བར་འདུག་པས་མཆོག་གཏེར་སྲུང་མའི་གསོལ་བསྐང་དོན་བསྡུས་གནད་ཚང་ཞིག་བྲིས་ཞེས་བཀའ་ནན་ཡང་ཡང་བསྩལ་བ་རྗེས་སུ་སྒྲུབ་སླད་ཕོ་རྒྱུད། མོ་རྒྱུད། ནོར་ལྷ་གཏེར་བདག་གི་གསོལ་ཕྲིན་གསུམ་བསྣན་ཏེ། འཕགས་ཡུལ་དབུས་འགྱུར་བཛྲ་ཨཱ་ས་ནའི་ཀེའུ་ཚང་ནས་དབུ་བརྩམས་ཏེ། རྡོ་རྗེ་གླིང་གསང་སྔགས་འབྱུང་བའི་གནས་ཀྱི་མཚན་ཉིད་ཡོངས་སུ་རྫོགས་པའི་གནམ་ལྕགས་རི་བོའི་རྩེར་དཀྱུས་གཅིག་ཏུ་སྤེལ་བ་པོ་ཟབ་གསང་ཤིང་རྟའི་སྲོལ་འབྱེད་རྣམས་ཀྱིས་རྗེས་སུ་བཟུང་ཞིང་བྱིན་གྱིས་བརླབས་པས་ཚུལ་འདི་སྨྲ་བའི་སྐལ་བཟང་གི་སྤོབས་པ་ཅུང་ཟད་དགེ་བ་པདྨ་གར་དབང་བདེ་ཆེན་འོད་གསལ་མདོ་སྔགས་གླིང་པའམ་འཇིགས་མེད་མཁྱེན་བརྩེའི་འོད་ཟེར་ཕྲིན་ལས་དྲག་པོ་རོལ་པ་རྩལ་དུ་འབོད་པའི་རྒྱལ་ཁམས་པས་བྲིས་པའི་ཡི་གེ་གཉིས་པར་སྤེལ་བ་པོ་རེབ་ཀོང་ཕུར་ཐོགས་སྟོང་དང་དགུ་བརྒྱའི་སྔགས་གྲལ་དད་མོས་རྣལ་འབྱོར་སྤྱོད་པ་སྐལ་བཟང་ནུས་ལྡན་རྡོ་རྗེ་རྩལ་གྱིས་བགྱིས་པ་འདིས་ཀྱང་ངེས་གསང་བསྟན་པའི་སྙིང་པོ་གཏེར་ཆེན་ཆོས་ཀྱི་རྒྱལ་པོ་རྣམ་གསུམ་གྱི་རིང་ལུགས་དྲི་མ་མེད་པ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །ཤྲཱི་བི་ཛ་ཡནྟུ།། །།}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:DKR-KABUM-Volume-10-THA]]
[[Category:Khyentse Lineage Project]]