View source for JKW-KABUM-04-NGA-001-035

{{Khyentse Metadata
|classification=Tibetan Publications
|subclass=Tibetan Texts
|fulltitletib=རིགས་ལྡན་འཇམ་དཔལ་གྲགས་པས་མཛད་པའི་རྩ་ལྟུང་རྒྱ་ཆེར་འགྲེལ་སོགས་ལས་ཁོལ་བཏུས་རབ་ཏུ་མང་པོ།
|fulltitle=rigs ldan 'jam dpal grags pas mdzad pa'i rtsa ltung rgya cher 'grel sogs las khol btus rab tu mang po
|citation=[['jam dbyangs mkhyen brtse'i dbang po]]. ''rigs ldan 'jam dpal grags pas mdzad pa'i rtsa ltung rgya cher 'grel sogs las khol btus rab tu mang po''. In '''jam dbyangs mkhyen brtse'i dbang po'i bka' 'bum'', Vol. 4: 588-650. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|editortib=
|tibgenre=Notes - zin bris
|terma=No
|sabcadcategory=Three
|language=Tibetan
|volumenumber=004
|volnumtib=༤
|volyigtib=ང་
|totalvolumes=25
|textnuminvol=001
|textsubnumber=035
|pagenumbers=588-650
|totalpages=63
|beginfolioline=294b1
|endfolioline=325b6
|totalfolios=32
|multivolumework=No
|rectonotes=sde tshan 1
|versonotes=mkhyen brtse'i bka' 'bum
|pdflink=File:JKW-KABUM-04-NGA-001.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|སློབ་དཔོན་འཇམ་དཔལ་གྲགས་པས་མཛད་པའི་རྩ་ལྟུང་རྒྱ་ཆེར་འགྲེལ་ལས།  གཞན་དག་རྡོ་རྗེ་རྩེ་མོ་གཙོ་བོར་གྱུར་པའི་བྱ་བ་དང་སྤྱོད་པ་གཙོ་བོར་གྱུར་པ་ལས་ཀྱང་།  གཉིས་སུ་མེད་པའི་དོན་ཁོང་དུ་ཆུད་ཅིང་དམ་ཚིག་ཅན་གྱི་སྐྱེ་བོས་བརྟགས་པའི་ལྷ་དང་ཡེ་ཤེས་ཀྱི་ལྷ་དང་དབང་པོའི་སྒོ་མཉམ་པར་སྦྱར་ནས།  དཀའ་ཐུབ་དང་དཀའ་སྤྱད་དང་ཁྲུས་ལ་སོགས་པའི་ལས་གཙོ་བོ་མི་འཛིན་པས་འགྲུབ་པར་གསུངས་ཏེ། དེ་སྐད་དུ་ཡང་།  ཁྲུས་དང་གཙང་སྦྲ་འདིར་མི་དགོས།  །དཀའ་ཐུབ་དཀའ་སྤྱད་འདིར་མི་དགོས།  །སངས་རྒྱས་རྣམས་དང་སེམས་དཔའ་ཆེ།  །རྟག་ཏུ་སྦྱོར་བས་འགྲུབ་པར་འགྱུར།  །ཞེས་འབྱུང་བ་དང་།  གཞན་ཡང་ཐིག་ལེ་མཉམ་གནས་ཀྱི་རྒྱུད་ལས།  བདེ་བ་ཆེན་པོའི་ངང་གནས་ན།  །དམ་ཚིག་མེད་ཅིང་སྡོམ་པའང་མེད།  །བྱ་དང་བྱེད་དང་སྩོལ་བའང་མེད།  །ནམ་མཁའ་ལྟ་བུར་འགྲུབ་པར་འགྱུར།  །ཞེས་འབྱུང་བ་དང་།  བྱང་ཆུབ་སེམས་འབྱུང་བའི་རྒྱུད་ལས།  །བྱང་ཆུབ་སེམས་ལ་མཉམ་གནས་ན། །དམ་ཚིག་སྡོམ་པ་ཉམས་མ་ཡིན།  །ཞེས་འབྱུང་བ་དང་།  །ཐུགས་གསང་བའི་རྒྱུད་ལས་ཀྱང་།  །སྤྲོས་མེད་ཐིག་ལེའི་ངང་གནས་ན།  །བྱ་བ་མ་ཡིན་སྤྱད་ཀྱང་འགྲུབ།  །ཅེས་འབྱུང་བ་དང་།  རྟོག་པ་ཡོངས་སུ་ཟད་པའི་རྒྱུད་ལས་ཀྱང་།  །དམ་ཚིག་ལ་སོགས་བརྟགས་པས་འཆིང་།  །སྒྱུ་མའི་སྦྱོར་ཤོས་སྟོང་པས་འགྲུབ།  །ཅེས་འབྱུང་བ་དང་།  མཁའ་འགྲོ་མ་གསང་བ་མཛོད་ལས་ཀྱང་།   འདི་ལྟར་སྣང་བའི་དངོས་པོ་རྣམས།  །སྒྱུ་མ་ལྷ་དང་ལྷ་མོར་གནས།  །བསྡམ་བྱ་མེད་ཅིང་སྡོམ་བྱེད་མེད།  །རྩ་དང་རླུང་དང་ཐིག་ལེ་མེད།  །སྟོང་པ་ཉིད་ཀྱིས་འགྲུབ་པར་འགྱུར།  །ཞེས་འབྱུང་བ་དང་།   གཞན་ཡང་རྣལ་འབྱོར་དང་རྣལ་འབྱོར་མའི་རྒྱུད་ཐམས་ཅད་ལས་ཀྱང་བདེ་བ་ཆེན་པོའི་དོན་རྟོགས་ན།  སྨྱུང་བར་གནས་པ་ལ་སོགས་པ་དམན་པའི་སྤྱོད་པར་བཤད་པས་ན་ཟབ་མོ་རྡོ་རྗེ་ཐེག་པ་རྣམས་ཀྱིས་ནི་རང་བཞིན་གྱིས་གནས་པའི་ལྷའི་སྦྱོར་བས་རྟག་པར་ཐིག་ལེ་ཆེན་པོ་མཉམ་པ་ཉིད་ལ་གནས་ན།  དངོས་གྲུབ་ཀྱི་མཆོག་སྐུ་གསུམ་ཡེ་ཤེས་ལྔ་ལ་སོགས་པ་ཐོབ་པར་འགྱུར་རོ།  །གཞན་དག་བྱ་བ་དང་སྤྱོད་པའི་རྒྱུད་རྡོ་རྗེ་ཐེག་པ་མ་ཡིན་ནམ།  །དེ་དག་ལས་ནི་ལས་དང་བྱ་བས་འགྲུབ་པར་བཤད་ན།  གཞན་ཡང་ཐེག་པ་ཆེན་པོའི་མདོ་སྡེ་རྣམས་ལས་ཀྱང་སྦྱིན་པ་ལ་སོགས་པ་བསོད་ནམས་ཀྱི་ཚོགས་ཀྱིས་ཐམས་ཅད་མཁྱེན་པའི་རྒྱུའི་གཙོ་བོར་གསུངས་པ་དང་འགལ་ལོ་ཞེ་ན།  །དེ་དག་ནི་བཅོམ་ལྡན་འདས་ཀྱིས་དགོངས་ཏེ་བཤད་པ་ཡིན་ནོ།  །བུས་པ་བློ་དམན་པ་དང་།  སྤྲོས་བཅས་ལ་དགའ་བ་དང་།  ཤིན་ཏུ་ཟབ་མོའི་དོན་ལ་འཇིགས་པ་རྣམས་གཟུང་བའི་ཕྱིར་གསུངས་པ་ཡིན་ནོ།  །དེ་སྐད་དུའང་གསང་སྔགས་ཀྱི་དོན་ལ་དེ་ཁོ་ན་ཉིད་འཇུག་པ་ལས།  སྟོང་ཉིད་ལྟ་བས་གྲོལ་འགྱུར་ཏེ།  །སྒོམ་པ་ལྷག་མ་དེ་དོན་ཡིན།  །ལུས་ངག་ཡིད་ཀྱི་སྤྱོད་པ་ཀུན།  །ཐེག་པ་དམན་ལ་བསྟན་པ་ཡིན།  །ཞེས་འབྱུང་བ།  སློབ་དཔོན་ཀླུ་སྒྲུབ་ཀྱི་ཞལ་སྔ་ནས་ཀྱང་དེ་ཉིད་ཚོལ་ལ་ཐོག་མར་ནི།   ཐམས་ཅད་ཡོད་ཅེས་རྗོད་པར་བྱེད།  །དོན་རྣམས་རྟོགས་ཤིང་ཆགས་མེད་ལ།  །ཕྱིས་ནི་རྣམ་པར་དབེན་དོན་ཉིད།  །ཅེས་བཤད་པས་སོ། །གཞན་དུ་འཇམ་དཔལ་སྒྱུ་འཕྲུལ་དྲྭ་བ་ལས་ཀྱང་།  ལག་ན་རྡོ་རྗེ།  ངས་སེམས་ཅན་རྣམས་ཀྱི་བློ་ཡི་ཁྱད་པར་དང་།  རིགས་ཀྱི་བྱེ་བྲག་གིས་ཐེག་པའི་ཁྱད་པར་རྣམས་བསྟན་ཏེ།  ལ་ལ་ལ་ཕྱི་རོལ་པའི་ཚུ་རོལ།  ལ་ལ་ལ་ཉན་ཐོས་ཀྱི་ཐེག་པའོ།  །ལ་ལ་ལ་རང་སངས་རྒྱས་ཀྱི་ཐེག་པ་དང་།  །གཞན་ཡང་ཕ་རོལ་ཏུ་ཕྱིན་པའི་ཐེག་པ་དང་།  །རིག་པ་འཛིན་པའི་རྒྱུད་དཔག་ཏུ་མེད་པ་བསྟན་ཀྱང་།  ཐིག་ལེ་ཆེན་པོ་ཡི་གེ་མེད་པ།  བརྡ་དང་བྲལ་བས་གཉིས་སུ་མེད་པས་སངས་རྒྱས་པར་རིག་པར་བྱའོ།  །ཞེས་གསུངས་པས་གསལ་བར་བྱས་པ་རིག་པར་བྱའོ།  །གཞན་ཡང་རྡོ་རྗེ་རྩེ་མོ་ལ་སོགས་པའི་ཁུངས་དང་།  རྡོ་རྗེ་གཙུག་ཏོར་ལས་ཀྱང་དེ་ཁོ་ན་ལ་མཉམ་གནས་ན།   དམ་ཚིག་མེད་ཅིང་སྔར་སྤྱད་མེད།  །རྡོ་རྗེ་དྲིལ་བུ་བཟུང་མི་དགོས།  །དེ་ཉིད་བཅུ་བྲལ་འགྲུབ་པར་འགྱུར།  །ཞེས་འབྱུང་བ་དང་།  ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཀྱང་།  རབ་འབྱོར་བྱང་ཆུབ་སེམས་དཔའ་རྣམས་ཀྱི་སྦྱིན་པ་ལ་སོགས་པ་རྣམས་ནི་སྤྲོས་པ་དང་བཅས་པ་སྟེ་མཚན་མར་རིག་པར་བྱའོ།  །དོན་དམ་པ་ནི་ཆོས་ཀྱི་དབྱིངས་རྒྱལ་བ་རྣམས་ཀྱི་ཡུམ་མོ།  །ཞེས་བྱ་བ་ལ་སོགས་པས་བསྟན་ཏོ།  །གཞན་ཡང་རྡོ་རྗེ་འཛིན་པ་ནི་དམ་ཚིག་སྤྱོད་པས་ཐོབ་པ་མ་ཡིན་ཏེ།  ཡང་དག་པའི་ལྟ་བ་དང་བྲལ་བས་རིག་བྱེད་གསང་ཚིག་གི་ཆོ་ག་བཞིན་ནོ།  །དེའི་ཕྱིར་ན་སྟོང་པ་ཉིད་ཀྱི་དོན་རྟོགས་ན་ལུས་ངག་གི་སྤྱོད་པ་དང་དམ་ཚིག་ལ་སོགས་པ་ཐེག་པ་འོག་མའི་ཚུལ་ཡིན་ཏེ།  རྣལ་འབྱོར་ཆེན་པོའི་རྒྱུད་ལས་ནི་དམ་ཚིག་དང་བྱ་སྤྱོད་ལ་སོགས་པ་མི་དགོས་ཏེ།  དེ་ལྟར་རྟོགས་པ་ནི་ཟབ་མོའི་དོན་ཁོང་དུ་ཆུད་པ་ཡིན་ནོ།  །ཞེས་སློབ་དཔོན་གཞན་དག་ཟེར་རོ།  །དེ་ཡན་ཆད་ངེས་དོན་ནོ།  །ཞེས་གསུངས་ཤིང་གཞུང་འདི་ཐོག་མར་རྒྱ་བརྩོན་སེང་དང་།  རིན་ཆེན་གྲགས་པས་ཀྱང་བཅོས་པའི་ཕྱིར་ཚད་ཐུབ་ཏུ་མངོན་ནོ།།    །།  ༈

བླ་མ་རྣམས་ལ་ཕྱག་འཚལ་ལོ།  །དམ་པ་ཉེར་བསྟེན་གཅིག་ཤོས་མིན།  །སྣོད་དང་ལྡན་པ་རྣམ་པར་བརྟག  །འདོད་ཕྱིར་གཞན་ལ་གནོད་པ་སྤངས། །དཀོན་མཆོག་ལ་སོགས་ནོར་བ་མིན།  །གཞན་དོན་སྐད་ཅིག་ཡལ་མི་དོར།  །བྱང་ཆུབ་མིན་པར་དགེ་མི་འཇུག  །རྣམ་ཤེས་འཕོ་བའི་དེ་ཉིད་མཁས།  །གཞན་དུ་ཡན་ལག་ཉེས་པའོ།  །ཡན་ལག་གི་ཉེས་པ་བདུན་རྫོགས་སོ།།    །།  ༈
སློབ་དཔོན་རིན་ཆེན་འབྱུང་གནས་ཞི་བའི་ཞབས་ཀྱིས་མཛད་པའི་དབང་བསྐུར་བའི་ངེས་པ་བསྟན་པ་ཞེས་བྱ་བ་ལས།  དེ་བས་བསྒྲུབ་བྱ་ཟག་མེད་པ།  །ཉམས་པ་མེད་པ་བླ་མེད་པ།  །བདེ་བ་དྲི་མེད་ནམ་མཁའ་འདྲ།  །འགྲོ་བའི་དོན་ནི་མཛད་སྤྱོད་པའོ།  །དེ་ཉིད་སྐྱོབ་པ་རྣམས་ཀྱི་སྐུ།  །ཆོས་ཀྱི་སྐུ་ཞེས་དྲན་པར་བྱ།  །དེ་ལ་བརྟེན་ནས་སྤྲུལ་སྐུ་ནི།  །ལོངས་སྤྱོད་སྤྲུལ་པའི་མཚན་ཉིད་དོ།  །དེ་ལ་བརྟེན་ནས་བསྒྲུབ་བྱ་སྟེ།  །ཐེག་པ་ཆེན་པོ་བླ་མེད་ལས།  །བདག་གཞན་དོན་དག་བསྒྲུབ་བྱའི་ཕྱིར།  །གཞན་དུ་དེ་ཡང་དགོས་པ་མེད།  །ཞེས་དང་།  ལུས་དང་ངག་ཡིད་དབྱེ་བ་ཡིས།  །གསང་བ་འདུས་པར་དབང་བསྐུར་བ།  །མགོན་པོས་རྣམ་པ་གསུམ་དུ་བསྟན།  །བཞི་པ་ཞེས་བྱ་མི་འདོད་དོ།  །ཞེས་སོགས་དྲངས་ཏེ་གསུམ་པའི་བདེ་བ་དེ་ཁོ་ན་ཆོས་ཀྱི་སྐུ་ཡིན་ལ།  དེ་ལས་སྐུ་གཉིས་པོ་སྐྱེ་བའི་ཕྱིར་ན་ཐབས་ལ་མཁས་པའི་ཁྱད་པར་དང་བཅས་པས་བསྒྲུབ་པའི་ཕྱིར།  གསུམ་པ་ལས་གཞན་དུ་བཞི་པ་མི་དབྱེ་ཞིང་།  འདོད་ན་ཐབས་མེད་པས་བདེ་བ་དང་བྲལ་བའི་སྟོང་པ་ཙམ་ནི་ཕར་ཕྱིན་གྱི་ཐེག་པ་ཉི་ཚེ་བར་གསུངས་པའི་བཤད་པ་རྒྱས་པར་སྣང་སྟེ་རྣམ་དཔྱོད་དང་ལྡན་པ་དག་གིས་ཤེས་རབ་ཀྱི་མིག་སྒྲུབས་ཤིག།    །།  ༈
ཡང་།  ཕྱག་རྒྱ་ལ་རེག་པས་སོགས་འདུ་བྱ་བ་སྲ་བའི་བག་ཆགས་ཏེ།  དེའི་དགའ་བ་ནི་རྣམ་པར་སྣང་མཛད་ཡབ་ཡུམ་མམ།  གཏི་མུག་རྡོ་རྗེ་སྟེ་བསྙེན་པའི་མཚན་ཉིད་ཅན་གྱི་ཡན་ལག་དང་པོའོ།  །དེ་སྐད་དུ།  བསྒྲུབ་བྱ་སྒྲུབ་པའི་སྦྱོར་བ་ནི།  །གང་ཡིན་བསྙེན་པ་ཡིན་པར་འདོད།  །ཞེས་སོ།  །གང་གིས་རྡོ་རྗེ་དང་པདྨ་གཉིས་སུ་མེད་པར་བྱེད་པའི་ཡེ་ཤེས་གང་ཡིན་པ་དེ་དག་བྱེ་ཞིང་བྲལ་བའི་བདག་ཉིད་ལ་རྒྱབ་ཀྱིས་ཕྱོགས་པ་གང་དམིགས་པར་གྱུར་པ་དེ་ཆུའི་ཁམས་ཀྱི་ངོ་བོ་ཉིད།  དེ་ལས་སྐྱེས་པའི་དགའ་བ་ནི་མི་བསྐྱོད་པ་ཡབ་ཡུམ་མམ།  ཞེ་སྡང་རྡོ་རྗེ་དང་ཉེ་བར་སྒྲུབ་པའི་ཡན་ལག་སྟེ་གཉིས་པའོ།  །དེ་ཡང་།  རྡོ་རྗེ་པདྨ་མཉམ་སྦྱོར་བ།  ཉེ་བའི་བསྙེན་པ་ཡིན་པར་འདོད།  ཞེས་སོ།  །རྗེས་ཐོག་དེར་པདྨའི་ནང་དུ་བཙུད་པ་ལ་ཞེན་པ་དང་།  དེའི་ཚེ་གཙུབས་པ་ལས་དྲོ་བར་གྱུར་པ་ནི་མེའི་ཁམས་ཏེ། གང་ལས་སྐྱེས་པའི་དགའ་བ་འོད་དཔག་མེད་ཡབ་ཡུམ་མམ།  འདོད་ཆགས་རྡོ་རྗེ་དང་།  སྒྲུབ་པ་ཞེས་བྱ་བའི་ཡན་ལག་སྟེ་གསུམ་པའོ།  །དེ་ཡང་།  སྒྲུབ་པ་བསྐྱོད་པ་ཡིན་པར་བཤད།  །ཧཱུྃ་ཕཊ་དང་ནི་ལྡན་པའོ། །ཞེས་གསུངས་པས་སོ།  །རྒྱུ་དེས་ཐབས་ཤེས་ལྷག་པར་ཆགས་ཤིང་མངོན་པའི་ང་རྒྱལ་གྱིས་རྩེད་མོའི་བདེ་བས་ཚོར་བ་མྱོས་ཤིང་དགའ་བར་གྱུར་པ་གང་ཡིན་པ་ནི་བཅོམ་ལྡན་འདས་རིན་ཆེན་འབྱུང་ལྡན་ཏེ།  དེ་ཉིད་སེམས་ལས་བྱུང་བ་ཡིན་པ་དང་།  འདོད་ཆགས་སུ་མཉམ་པས་སྔ་མའི་ཁོངས་སུ་བསྡུ་སྟེ་ཡན་ལག་ལོགས་ཤིག་མེད་དོ།  །དེ་ཡི་རྗེས་ལ་ཤེས་རབ་དང་ཐབས་གཉིས་སུ་མེད་པར་སྣང་བ་ཤིན་ཏུ་བསྒོམས་པ་ལས་བྱུང་བའི་མཆོག་ཏུ་དགའ་བ་རོ་མཉམ་པར་གྱུར་པ་ན།  མཆོག་ཏུ་དགའ་བ་ལྷན་ཅིག་སྐྱེས་པའི་ངོ་བོ་ནི་བཅོམ་ལྡན་འདས་དོན་ཡོད་གྲུབ་པ་དང་།  དེས་ལྷན་ཅིག་སྐྱེས་པའི་ཡེ་ཤེས་དང་མཉམ་དུ་བྱང་ཆུབ་སེམས་ཀྱང་ནོར་བུར་སྐུལ་བར་བྱེད་པས་ན་རླུང་གི་ཁམས་དང་།  ཕྲག་དོག་རྡོ་རྗེ་སྟེ།  ངེས་པར་འབྲས་བུ་ལྡན་པར་གྱུར་པས་ན་སྒྲུབ་པ་ཆེན་པོའོ།  །དེ་ཡང་།  རང་བདེ་ངོ་བོ་ཉིད་དང་བཞི།  །སྒྲུབ་པ་ཆེན་པོ་ཞེས་བྱའོ།  །ཞེས་སོ།  །དེ་ལྟར་ཡང་།  །བསྙེན་པའི་སྒྲུབ་པ་དང་པོ་སྟེ།  གཉིས་པ་ཉེ་བར་སྒྲུབ་པ་ཡིན།  །སྒྲུབ་པ་ཉིད་ནི་གསུམ་པ་སྟེ།  །སྒྲུབ་པ་ཆེན་པོ་བཞི་པའོ།  །ཞེས་དང་།  མཆོག་དང་དགའ་བྲལ་དབུས་སུ་ནི།  །མཚོན་ཞིང་ལྟོས་ལ་བརྟན་པར་གྱིས།  །ཞེས་གསུངས་སོ།  །ཞེས་པའང་གཞུང་དེའི་དགོངས་དོན་ཉེ་བར་བསྡུས་པ་འདི་ལ་གནད་གལ་པོ་ཆེ་ཡོད་དོ།།    །།  ༈

རྒྱ་གར་སྐད་དུ།  བཱཧྱ་ཨནྟ་ར་ཨ་མྲྀ་ཏ་ཀལྦ་ནཱ་མ།  བོད་སྐད་དུ།  ཕྱི་ནང་བདུད་རྩིའི་བཅུད་ལེན་ཞེས་བྱ་བ།  །རྡོ་རྗེ་རྣལ་འབྱོར་མ་ལ་ཕྱག་འཚལ་ལོ།  །རྒྱུན་ཆད་བདུད་རྩིའི་གསང་བ་བཅུད་ལེན་གྱིས། །ཉམས་ལེན་ཐབས་དང་དེ་ཡི་སྨན་སྦྱོར་དང་།  །ཉམས་སུ་བླངས་ན་ཚེ་རིང་གྲུབ་པ་ཐོབ། །དེ་ཕྱིར་བདག་ཉིད་བྷྱ་རའི་ཉམས་ལེན་བཤད།  །རྣལ་འབྱོར་ཕྱི་ཡི་ཉམས་ལེན་བྱེད་ན་ནི། །བདུད་རྩི་ལྔ་ཡིས་རང་ལུས་དག་པར་བྱས།  །རྣམ་སྣང་མི་བསྐྱོད་རིན་ཆེན་འབྱུང་ལྡན་དང་། །འོད་དཔག་མེད་དང་དོན་ཡོད་གྲུབ་པ་རྣམས།  །རང་གི་ལུས་གནས་ཉམས་ལེན་ཤེས་པ་མེད།  །མཱ་མ་ཀཱི་ཡི་རྒྱུད་བཏུས་ཉམས་ལེན་བཤད།  །རྣམ་སྣང་བླངས་ལ་རྡོ་རྗེའི་ཆུ་ཡིས་དཀྲུགས།  །བཙིར་ནས་སྣོད་ཀྱི་ནང་དུ་ཐུན་ཕྱེད་བཞག  །བྱིན་རླབས་མཆོད་བྱ་རླུང་མེད་ས་རུ་བརྡུངས།  །རླུང་ནད་ཅན་ལ་བུ་རམ་སྦྱར་བར་བྱ།  །བད་ཀན་ཅན་ལ་ཚ་བ་གསུམ་དང་སྦྱར།  །དྲི་མེད་རྣམ་སྣང་བཙིར་ནས་གྲིབ་སྐོམ་བྱ།  །ཞིབ་པར་བཏགས་ནས་མར་དང་སྦྲང་རྩི་སྦྱར།  །མི་བསྐྱོད་པ་ཡིས་སྦྲུས་ནས་བཟའ་བཏུང་བྱ།  །ཤ་དང་འོ་མ་བཟའ་ཞིང་ཆང་རྣམས་སྤང་།  །རྣམ་སྣང་ཉམས་ལེན་བདག་ཉིད་བྷྱ་རིས་སྨྲས།  །མི་བསྐྱོད་བསྐོལ་ནས་མར་དང་ཁ་ར་སྦྱར།  །གྲང་བར་བྱས་ནས་རྣལ་འབྱོར་བཏུང་བར་བྱ།  །ཆང་དང་བུད་མེད་སྤངས་ན་ཟླ་དྲུག་འགྲུབ།  །མི་བསྐྱོད་བཅུད་ལེན་བྷྱ་རིས་སྨྲ་བར་བྱེད། །རིན་ཆེན་འབྱུང་ལྡན་གན་དྷི་དངུལ་ཆུ་དང་།  །ར་ཡི་འོ་མ་སྦྲངས་དང་བྷི་ཏ་སྟེ།  །ཞིབ་པར་བཏགས་ནས་ཀ་ར་ལ་སོགས་སྦྱར།  །མར་ཁུ་བཏོན་ནས་རྣལ་འབྱོར་ལུས་ལ་བྱུགས། །སྨན་རྣམས་གཏོང་དུས་ཁེངས་པའི་དུས་སུ་བཏང་།  གཞན་དང་མི་འདྲ་བྷྱ་རི་སྟོབས་སྐྱེས་སོ།  །དབྱར་ཟླ་གསུམ་ལ་དོན་ཡོད་གྲུབ་པ་ཡི།  །ཨ་རུ་ར་དང་སྨན་ཚ་སྦྱར་ལ་བཟའ། །སྟོན་གསུམ་ཀ་ར་ཨ་རུ་ར་སྦྱར་ནས།  །རྣལ་འབྱོར་པ་ནི་ལྟོ་སྟོང་དག་ལ་བཟའ།  །དགུན་གསུམ་འབྲས་བུ་གསུམ་དང་སྦྱར་ལ་བཟའ།  །དཔྱིད་གསུམ་མར་སྦྲངས་འབྲས་བུ་གསུམ་སྦྱར་བཟའ།  །དོན་ཡོད་གྲུབ་པའི་རྣལ་འབྱོར་བཅུད་ལེན་པས།  །ནད་རྣམས་སེལ་ཞིང་དོན་རྣམས་གྲུབ་པར་བྱེད།  །ཤིང་མངར་སྦྲངས་མར་འོད་དཔག་མེད་པ་འབྲས་བུ་གསུམ། །ཅོང་ཞི་དང་སྦྱར་ཟོས་ན་ནད་རྣམས་སེལ།  །ཅིས་ཀྱང་རྣལ་འབྱོར་བླ་མའི་ཞལ་ལ་ལྟོས། །འོད་དཔག་མེད་ཀྱི་བཅུད་ལེན་བྷྱ་རིས་སྨྲས།  །ཟླ་བ་དྲུག་ནས་རྣལ་འབྱོར་རུ་རྟ་བཀོལ་ལ་བཏུང་།  །དཀར་གསུམ་མངར་གསུམ་ལ་བརྟེན་དབང་ལག་ཆུ་བཀོལ་བཏང་།  མདོར་ན་ཅི་དགོས་ཁ་ཟས་རིམ་གྱིས་སྤངས།  །བྲག་ལ་སྦྱར་ནས་བྷྱ་རིས་བསྟེན་པར་བྱ།  །ཁ་ཟས་རྒྱུན་ཆད་བཤད་ནས་གསང་བ་བཤད།  །སྙིང་གའི་དབུས་སུ་ཡི་དམ་ལྷ་ཉིད་ནི།  །རྡོ་རྗེ་ཕག་མོ་ཞལ་གཅིག་ཕྱག་གཉིས་ལྡན།  །སེམས་དཔའི་སྐྱིལ་ཀྲུང་བདུད་རྩི་བུམ་པ་འཛིན། །ངག་ཏུ་ཧཱུྃ་བརྗོད་སྙིང་ག་གྱེན་ལ་བཟློག  །ཡུམ་གྱི་འོད་ཀྱིས་དཀར་ནག་མཚམས་སུ་བཅད།  །ཨོཾ་ཨཱཿཧཱུྃ་བརྗོད་ཞལ་ནས་བདུད་རྩི་འཛགས།  །དཀར་ནག་བཅད་པའི་མཚམས་ནས་འབབ་པ་ཡིན།  །རང་ལུས་ཁོང་སྟོང་འོ་ལྟར་གང་བར་བསམས།  །དེ་ནི་ཏིང་འཛིན་སེམས་དཔའ་བདག་གིས་སྨྲས།  །མདུན་གྱི་མཁའ་ལ་ཡེ་ཤེས་སེམས་དཔའ་སྟེ།  །ཡིད་ཀྱིས་དྲན་ནས་དེ་ཡི་འོད་ཀྱིས་ནི།  །རང་གི་སྨིན་མཚམས་ཡན་ཆད་ཐོད་པ་བཅད།  །ཡེ་ཤེས་སེམས་དཔས་ཨོཾ་ཨཱཿཧཱུྃ་བརྗོད་པས།  །ཐོད་པའི་བདུད་རྩི་འཛགས་ཏེ་རྩ་སྦུབས་ཞུགས།  །བུམ་པའི་འོག་ཏུ་རྃ་འབར་བདུད་རྩི་བླུགས།  །དེ་ནས་འདྲེས་པས་ལུས་ནི་བདུད་རྩིས་གང་།  །གཉིས་མེད་དེ་ཡི་སྟོབས་ཀྱིས་ཆུ་སེར་སོགས།  །གསང་བའི་གནས་ནས་མར་ལ་འཛགས་པར་བསམས།  །དེ་ནས་མར་བཤལ་ཡར་རང་ལུས་ལ་བདུད་རྩིས་གང་།  །སླར་ཡང་རྣལ་འབྱོར་ཐོད་པ་བཅད་འཕྲོ་ལས།  །བདུད་རྩི་སོར་གཅིག་ལུད་ནས་གང་བར་བསམས།  །གལ་ཏེ་རྣལ་འབྱོར་རླུང་ཁམས་སྐྱེས་ན་ནི།  །སྙིང་གི་བུམ་པ་ཆར་གྱིས་གང་བར་བསམས།  །མཁྲིས་པས་སྐྱ་རིམས་ཚད་ནད་འབབ་ནད་ལ།  །ག་བུར་ཆུ་བཞིན་ནང་ལུས་བསིལ་བར་བསམས།  །རྣལ་འབྱོར་གྲང་བའི་ནད་ནི་ན་གྱུར་ན། །དྲོད་སྨན་རྣམས་ཀྱི་སྟོབས་ནི་བསྒོམ་པར་བྱ།  །བསྒོམས་ཀྱང་སྐྱོ་ན་ཧྲིཾ་ཡིག་བློ་ལྡནབཟླ། །བྷྱ་རི་བདག་ཉིད་གསང་བའི་བཅུད་ལེན་སྨྲས།  །བརྟན་པའི་སེམས་ཀྱིས་རྣལ་འབྱོར་ཉིད་ཀྱིས་བསྒྲུབས།  །ཉམས་སུ་མྱོང་བའི་ཡོན་ཏན་ནད་རྣམས་སེལ།  །ཟླ་དྲུག་ཤེས་རབ་བློ་འཕེལ་རང་བཞིན་སྐྱེ།  སློབ་དཔོན་བྷྱ་རིས་གསུངས་པའི་ཕྱི་ནང་གི་བདུད་རྩིའི་བཅུད་ལེན་རྫོགས་སོ།།  །།
རྒྱ་གར་གྱི་པཎྜི་ཏ་རཏྣ་མ་ལས་རང་འགྱུར་དུ་མཛད་ནས་བཤད་རྒྱུད་ཀྱི་གདམས་པ་བར་མ་ཆད་པར་གསུངས་སོ།།    །།  ༈
ཨ་སཾ་བྷནྡྷ་དྲྀཥྟི།  འབྲེལ་མེད་ཀྱི་ལྟ་བ་ལས། །མེ་ཡི་མཚན་ཉིད་སྲེག་བྱེད་དེ།  །དེ་ཉིད་ཁྱབ་བྱེད་ཅེས་བྱ་སྟེ།  །ཁྱབ་བྱ་དུ་བ་ཡིན་པར་མཐོང་།།    །།  ༈
ཡང་།  རྫོགས་ཆེན་པ་ཡི་ལུང་ལས་ནི།  །ཆོས་ཉིད་གཞིའམ་མ་བཅོས་པ།  །ཁྱབ་བྱེད་དེ་ལ་འབྱུང་བ་ཡི།  །འགྲོ་དྲུག་ཁྱབ་བྱར་གསུངས་པའོ།  །ཞེས་དང།  ནང་པ་མུ་སྟེགས་དབང་དུ་ནི།  །རང་རིག་འོད་གསལ་ཁྱབ་བྱེད་དེ།  །རྣམ་པར་རིག་པ་ཁྱབ་བྱར་སེམས།  ཞེས་སོ།།    །།  ༈ དེ་ཉིད་བརྒྱད་ཀྱི་ལྟ་བ་ལས།  །དྲི་བཅས་སེམས་ནི་འཁོར་བ་སྟེ།  །ཐ་སྙད་དང་བྲལ་མྱ་ངན་འདས།  །དཔེར་ན་སྤྲིན་མེད་ནམ་མཁའ་ནི། །གང་ལ་མི་གནས་ཕྱག་རྒྱ་ཆེ།  །ཨིནྡྲ་བྷུ་ཏི་སྨྲ་བར་བྱེད།  ཞེས་དང་།།    །།  ༈ ཐུགས་ཀྱི་གསང་བ་གླུར་བླངས་པ་ལས།  ཌོམྦི་ཧེ་རུ་ཀས་གསུངས་པ།  །སྲིད་བཞི་མཉམ་ཉིད་སྤྲོས་བྲལ་ལ།  །རྩོལ་སྒྲུབ་བྱེད་པ་ཤ་ཐང་ཆད།  །ཡུལ་སེམས་གཉིས་མེད་ཟང་ཐལ་ལ།  །ཐ་དད་འཛིན་པ་ཉོན་རེ་མོངས།  །བདག་གཞན་གཉིས་མེད་ཆོས་སྐུ་ལ།  །བཟང་ངན་འཛིན་པ་སྙིང་རེ་རྗེ།  །གསུངས་སོ།།  ༈ །།

ཨཱཪྻ་དེ་བས།  ཀྱེ་ཧོ།  ཕུང་པོ་ལྷ་ཡི་ངོ་བོར་གནས། །བུམ་པའི་དབང་བསྐུར་རང་ལ་རྫོགས།  །སྒྲ་སྟོང་བྲག་ཅ་ལྟ་བུར་རྟོགས།  །གསང་བའི་དབང་ལ་ལྟོས་མི་དགོས།  །ཉམས་མྱོང་བདེ་ཆེན་ཁོངས་ནས་སད།  །ཤེས་རབ་ཡེ་ཤེས་དབང་དང་ལྡན།  །ཆོས་རྣམས་ནམ་མཁའ་ལྟ་བུར་རྟོགས།  །བཞི་པའི་དབང་གི་དོན་དང་ལྡན།  །གསུངས་སོ།།    །།  ༈
གུ་དྷ་རི་པས་གསུངས་པ།  །ཡེ་ཤེས་རྡོ་རྗེ་ནམ་མཁའི་མདོག  །སྣ་ཚོགས་འབྱུང་བའི་ཆོ་འཕྲུལ་སྟོན།  །དམིགས་པ་མེད་པར་ཀུན་ལ་ཁྱབ། །འདུ་འབྲལ་མེད་པར་རང་ལ་རྫོགས།  །མ་བཙལ་ལྷུན་གྱིས་གྲུབ་པའི་དོན།  །ཞེས་གསུངས་སོ།  །ནཱ་རོ་པས་གསུངས་པ།  །སྤྱི་གཙུག་པདྨའི་གདན་སྟེང་དུ།  །མཚན་ལྡན་བླ་མའི་སྤྱན་སྔ་རུ།  །རྩ་དར་དཀར་གྱི་ལམ་ལས་འགྲོ་ཤེས་ན།  །མཚམས་མེད་ལྔ་པོ་བྱེད་ཀྱང་གྲོལ།  །གསང་སྔགས་ཐབས་ཀྱི་ཁྱད་པར་ཡིན།  །གསུངས་སོ།  །དཔའ་བོ་རྡོ་རྗེས་སྨྲས་པ།  །སེམས་ཀྱི་ཐིག་ལེ་ཡི་གེའི་དབྱིབས།  །རླུང་གིས་བསྐྱོད་དེ་མཁའ་ལ་འཕུར། །ལས་ཀྱི་སྒོ་བཞི་འགགས་ནས་ཀྱང་།  །བདེ་ཆེན་གནས་སུ་འཕོ་བར་བྱེད།  །ཞེས་དང།  རཏྣ་བོ་དྷིས་སྨྲས་པ།  །མ་བཅོས་རྣལ་མའི་ཤེས་པ་དེ།  །མི་སྦོམ་དེ་བཞིན་ཉིད་དུ་བཞག  །བཅོས་པ་ཐམས་ཅད་བློ་ཡིན་ཏེ།  །བློ་ལས་གྲོལ་ན་ཐར་པའི་ལམ།  །གསུངས་སོ།  །ཀརྨ་བཛྲས་སྨྲས་པ།  །འཁྲུལ་པའི་རྩ་བ་མ་ཆོད་ན།  །སེམས་ཀྱི་འཁྲུལ་འཁོར་མི་འཇིག་སྟེ།  །བཅོས་མའི་ཐེག་པ་སྙིང་རེ་རྗེ།  །རྩ་བ་བྲལ་བའི་དོན་མཐོང་ན།  །ལས་ཀྱི་འཁྲུལ་འཁོར་གཞི་ལ་འཇིག  །གསུངས་སོ།  །གྲུབ་ཐོབ་ལྔ་བཅུའི་རྟོགས་པ་བརྗོད་པ་ཐིག་ལེ་དག་པའི་ཕྲེང་བ་ལས་སོ།།    །།  ༈ བྲུལ་ཚོ།།    །།  ༈
སློབ་དཔོན་ཏོག་རྩེ་བའི་ཞལ་ནས།  །ཐ་མལ་ཤེས་པ་སྙིང་གི་དབུས་སུ་སད།  །ཚོགས་དྲུག་དག་ན་བདེ་ཆེན་རྒྱུན་མི་ཆད།  །བརྟགས་པ་ཐམས་ཅད་དོན་མེད་གཡེང་བའི་རྒྱུ།  །སྒོམ་དུ་མེད་པས་གཉུག་མའི་ངང་ལ་ཞོག  །ཞེས་སོ།།    །།  ༈
ཏི་ཨཱ་ལོ་ཀ  །དེ་ཉིད་སྣང་བར།  དྷ་ལ་རང་ངོ་མཐོང་བ་ན་དུ་བའི་ཞལ་སྔ་ནས།  །སྙིང་གི་དབུས་སུ་ངོ་སྤྲོད་པའི།  །བླ་མས་བསྟན་པའི་མཆོག་གི་དོན།  །ལྷུན་གྲུབ་རང་ངོ་ཤེས་པ་ནི།  །གནད་དེ་ངེས་པའི་ཤེས་པས་མཐོང་། །ཞེས་སོ།  །དགེ་བའི་ཆོས་སྡུད་ཚུལ་ཁྲིམས་ཅན་བྷ་ཙ་ལའི་ཞལ་ནས།  །གཞི་རྫོགས་རང་བྱུང་ཡེ་ཤེས་སུ།  །བཅོས་མའི་རྐྱེན་ལ་རག་མི་ལས།  །རང་རིག་འོད་གསལ་དངོས་པོའི་གཤིས།  །རྟེན་འབྲེལ་གང་གི་ཐབས་ཀྱིས་རིག  །ཅེས་གསུངས་སོ།  །དུ་མ་རོ་གཅིག་གི་རྣལ་འབྱོར་པ་བྷ་ཏ་ལའི་ཞལ་སྔ་ནས།  །ངོ་བོ་སྤྲོས་བྲལ་དྲི་མ་མེད།  །འགྲོ་བ་ཀུན་ལ་རང་བཞིན་གནས།  །ཤེལ་གོང་འདམ་གྱིས་གོས་པ་བཞིན།  །གློ་བུར་འཁྲུལ་པའི་རྟོག་པས་འགྲིབ།  །ཅེས་སོ།  །ཏིང་འཛིན་ཟས་ཀྱིས་འཚོ་བའི་རྣལ་འབྱོར་མ་ཙཱནྡྲ་བི་མ་ལའི་ཞལ་སྔ་ནས།  གྱེན་གྱི་ལྟ་སྟངས་ཚངས་པའི་གསང་།  །དབང་པོ་རང་སྣང་ཕྱག་རྒྱ་ཆེ།  །ཆོས་ཉིད་ངོ་བོ་ཐབས་ཀྱིས་ཟིན།  །སྤྲོས་བྲལ་འཆར་བ་ཡི་གེའི་གནད།  །ཅེས་སོ།   །རྩ་རླུང་ལས་སུ་རུང་བ་ནི་ལྭ་བའི་ཞལ་ནས།  །དྲན་རྟོག་འོད་གསལ་ལ་བཅིངས་པས།  །རང་རིག་ཡེ་ཤེས་ལྔ་ཡི་མདངས།  །ས་ཆུ་མེ་རླུང་ནམ་མཁའ་ཡི།  །སྣང་བ་རྒྱུ་ལམ་འབྲས་བུའི་རྟགས། །ཞེས་སོ།  །མི་གཡོ་བའི་བསམ་གཏན་ཛྙཱ་ན་དྷ་རའི་ཞལ་ནས།  །དྭངས་མའི་འོད་ཟེར་དུ་བར་སྣང་།  །སྨིག་རྒྱུ་སྣང་བ་བདེ་བའི་འོད།  །གསལ་བ་སྲིན་བུ་མེ་ཁྱེར་འོད།  །མི་རྟོག་འོད་ཟེར་མཁའ་ལྟར་སྣང་།  །ཞེས་སོ།  །ཞེས་པ་རྣམས་གསེར་གྱི་ཉི་མ་རྣམ་པར་སྣང་བའི་ལེའུ་༡ལས་སོ།།  །།

འོད་གསལ་རང་ངོ་འཕྲོད་པ་དྷརྨ་བྷ་དྲའི་ཞལ་སྔ་ནས། །སེམས་ཉིད་འོད་གསལ་དངོས་པོའི་དོན།  །རང་བཞིན་ངོ་བོ་སངས་རྒྱས་རྒྱུ།  །དམིགས་མེད་གདོད་ནས་དག་པ་ཡི།  །ཡེ་ཤེས་དེ་མཐོང་མ་རིག་སེལ།  །ཞེས་གསུངས་༢སོ།  །ཐུགས་རྗེའི་རྒྱན་དང་༣ལྡན་པ་གསེར་གླིང་པའི་ཞལ་ནས།  །འདོད་པའི་འབྲས་བུ་སྟེར་བ་ཡིས། །ཡིད་བཞིན་ནོར་འདྲའི་བྱང་ཆུབ་སེམས།  །སངས་རྒྱས་མ་བཅོས་ལྷུན་གྲུབ་སྐུ།  །འགྲོ་བ་ཀུན་ལ་རང་བཞིན་གནས།  །ཞེས་སོ།  །ཧ་ཧ་༤ཧི་ཧིའི་གད་རྒྱངས་ཅན་ཨ་ཧ་རའི་ཞལ་ནས།  །འཁོར་བ་སྤངས་པའི་ཕ་རོལ་ན།  །མྱ་ངན་འདས་པ་ཡོད་མ་ཡིན།  །འཁོར་བ་རང་བཞིན་མེད་པ་ཡི།  །མཚངས་དེ་མྱ་ངན་འདས་པའོ།  །ཞེས་གསུངས་སོ།  །ཟླ་༦བའི་འོད་ཟེར་མགྷ་པ་ལི་ཏའི་ཞལ་སྔ་ནས།  །ནམ་མཁའ་མདུང་ཚུགས་བསམ་གཏན་མཁར།  རིག་པ་སོར་བཞག་གནད་ཀྱི་མཚངས།  །བདེ་གསལ་རྒྱུན་མི་ཆད་པར་བྱེད།  །ཡུལ་ལ་ཡེངས་པར་མི་བྱའོ།  །ཞེས་གསུངས་སོ།  །སྤྲོས་བྲལ་གྱི་ཡེ་ཤེས་ངོས་ཟིན་པ་ཀོ་ཤ་པའི་ཞལ་སྔ་ནས།  ཆོས་རྣམས་ཐམས་ཅད་ངོ་བོས་སྟོང་།  །བདེན་ཟད་བརྫུན་ཟད་ཡི་གེ་ཟད། །དོན་ཟད་ནམ་མཁའི་རང་བཞིན་ཅན།  །བསམ་དུ་མ་བཏུབ་བསྒོམས་ལས་གྲོལ།   །ཞེས་གསུངས་སོ།  །དཔལ་གྱི་འོད་འཛིན་མ་རཏྣ་ལི་ཏའི་ཞལ་སྔ་ནས།  །རྟོག་བྲལ་ཡུལ་གྱི་རྗེས་མི་འབྲངས།  །སྣང་བ་ཧད་པོ་དེར་འཛིན་གྲོལ།  །སོར་བཞག་ཚོགས་དྲུག་ལྷུག་པའི་ངང་།  །སྒོམ་བློ་འདུན་པ་དྲི་མ་ཡིན།  །ཞེས་གསུངས་སོ།  །ཉོན་མོངས་༧རང་ཐོག་ཏུ་གྲོལ་བས་གཉེན་པོའི་བྱ་ར་ཞིག་པ་ས་ར་ཧཱི་པའི་ཞལ་སྔ་ནས།  ཤེས་པ་ངར་ཅན་དེ་ལྟོས་དང་།  །ནམ་མཁའི་དབྱིངས་ཀྱི་དབུས་གནས་པར།  །རིག་པ་དྲི་མེད་ལམ་གྱི་མཆོག །ཐིག་ལེ་མཐོང་ན་རྣམ་པར་གྲོལ།  །ཞེས་གསུངས་སོ།  །བདེ་བའི་སྒྲོན་མ་ལ་དྷ་བའི་ཞལ་སྔ་ནས།  སེམས་ལས་ཡེ་ཤེས་སྐྱེ་འགྱུར་བ།  །རིག་པ་དྲུང་བ་ཁྲོ་བོའི་སྤྱན།  །སོར་བཞག་རྣམ་རྟོག་རླུང་མི་བསྐྱོད།  །རྟེན་འབྲེལ་གྱིས་ནི་ཡང་དག་འགྲུབ།  །ཅེས་གསུངས་སོ། །ཟག་མེད་བདེ་༨བའི་མདངས་ལྡན་མ་རུ་ཀ་ལའི་ཞལ་སྔ་ནས།  །མཚོན་བྱེད་དཔེ་ཡི་ལྷན་སྐྱེས་ཀྱིས།  །མཚོན་བྱ་དོན་གྱི་ལྷན་སྐྱེས་རྟོགས།  །དེས་ནི་འགྲོ་འོང་མེད་པའི་བདག  །སེམས་ཉིད་གཉུག་མའི་རང་བཞིན་ནོ།  །ཞེས་གསུངས་སོ།  །སྣང་བ་རྒྱུད་ལ་ངེས་པར་སྐྱེས་པ་པཏྫ་ནའི་ཞལ་ནས།  །ལས་ཀྱི་ཕྱག་རྒྱ་མཚོན་བྱེད་དོ།  །ཆོས་ཀྱི་ཕྱག་རྒྱ་སྒོམ་པའི་ལམ།  །ཕྱག་རྒྱ་ཆེན་པོ་འབྲས་བུ་སྟེ།  །དམ་ཚིག་ཕྱག་རྒྱ་ཕྲིན་ལས་སོ།  །ཞེས་གསུངས་སོ།  །དོན་རྒྱུད་ལ་སྒྲོ་འདོགས་ཆོད་པ་དེ་བ་ཤ་རའི་ཞལ་སྔ་ནས།  བདེ་བ་ཉམས་མྱོང་དགའ་བ་སྟེ།  །འཛིན་གྲོལ་ཉམས་མྱོང་མཆོག་ཏུ་དགའ།  །བདེ་སྟོང་དབྱེ་རུ་མེད་པ་ནི། །ལྷན་ཅིག་སྐྱེས་པའི་དགའ་བའོ།  །ཉམས་དང་བྲལ་ན་དགའ་བྲལ་ལོ།  །ཞེས་གསུངས་སོ།  །བུམ་འཛིན་མ་དྷ་ན་རུའི་ཞལ་སྔ་ནས།  རིགས་དྲུག་འཁོར་བའི་སེམས་ཅན་ལ། །བདེ་གཤེགས་སྙིང་པོ་ཡོད་གྱུར་ཀྱང་།  །མ་བསྒྲུབས་གྲོལ་བ་ཐོབ་མི་འགྱུར། །ཞེས་གསུངས་སོ།  །ཞེས་པ་ནི་རྣལ་འབྱོར་པ་ཐམས་ཅད་ཀྱི་དེ་ཁོ་ན་ཉིད་སྣང་བ་ཞེས་པ་ལས་ཁོལ་དུ་ཕྱུང་བའོ།།    །།  ༈
ཕྱག་རྒྱ་ཆེན་པོ་གསེར་ཕྲེང་ལས༡།  དབྱར་གྱི་དུས་ན་སྔོ་རྣམས་སྐྱེ་འགྱུར་ཀྱང་།  །ཞིང་ལ་མ་བཏབ་ལོ་ཏོག་འབྱུང་མིན་ལྟར།  །འགྲོ་དྲུག་སེམས་ཅན་སངས་རྒྱས་རང་བཞིན་ཡང་།  །མ་བསྒོམས་རྣམ་གྲོལ་ཡེ་ཤེས་དོན་མི་མཐོང་།  །ཞེས་དང་།  རང་རིག་རང་གིས་རྟོགས་པ་ལ།  །ཆུ་ཁམས་གསེར་དང་ནམ་མཁའ་བཞིན། །སངས་རྒྱས་སེམས་ཅན་འཁོར་འདས་དག  །སྤང་བླང་ཐ་དད་ཅི་ཡང་མེད།  །ཅེས་དང་།  འཇའ་ཚོན་ལྟ་བུ་སྒྱུ་མའི་སྐུ།  །དམ་ཚིག་ཕྱག་རྒྱ་ཞེན་མེད་ཀྱི།  །དབང་པོ་རང་སྣང་ཐུག་ཕྲད་ཀྱིས།  །ཆོས་ཉིད་བདེན་པ་མཐོང་བ་ཡིན།  །ཞེས་དང་།  གསེར་གྱི་རི་རབ་ངོས་སུ་༣བྱ་གནས་པ།  །བྱ་ཡི་རང་བཞིན་བོར་ནས་གསེར་དུ་སྣང་།  །མཁས་པ་དག་གིས་སྐྱེ་བ་མེད་རྟོགས་ན།  །དངོས་པོའི་རང་བཞིན་བོར་ནས་བདེ་བ་ཆེ།  །ཞེས་སོ།  །ཞེས་མཻ་ཏྲི་བས་བསྡེབས་པ་མར་པས་འགྱུར་བ་ལས་སོ།།    །།  ༈

ཡོ་ག་ལ་ཀྵ་ཎ་སཏྱ།  རྣལ་འབྱོར་གྱི་མཚན་ཉིད་བདེན་པ་ལས།  །གཟུགས་སུ་སྣང་བ་སྐུ་ཉིད་ལ།  །སྐྲ་རྣམས་གསུང་དུ་བདག་ཉིད་བརྟག  །སེམས་ཅན་བྱང་ཆུབ་རྒྱུ་ཡིན་ཕྱིར།  །དེ་ཡི་ཤེས་པ་ཡེ་ཤེས་ཡིན། །ཞེས་དང་།  རྣལ་འབྱོར་སྒོམ་རྣམས་གཙོར་བྱ་ཡི།  །ལུས་ངག་དགེ་བ་གཙོར་མི་བྱ། །ཞེས་དང་།   རྟག་ཏུ་འཆི་བསམ་མ་ཆགས་བློས།  །དངོས་པོ་ཅི་ལའང་མ་ཆགས་པར།  སྤྱོད་ལམ་ཇི་ལྟར་གནས་ཀྱང་བསྒོམ།  །ཞེས་སློབ་དཔོན་བྱང་ཆུབ་བཟང་པོས་སོ།།    །།  ༈

རིན་པོ་ཆེ་འཁོར་ལོའི་དབང་གི་མན་ངག་ལས།  དབང་བསྐུར་རིམ་པ་ཡང་དག་པའི། །གནས་དང་དུས་དང་སློབ་དཔོན་དང་།  །སློབ་མ་དང་ནི་གླེང་གཞི་དང་།  །དཀྱིལ་འཁོར་དང་ནི་དེར་འཇུག་རིམ།  །དབང་བསྡུར་རིམ་དང་རྣམ་གྲངས་དང་།  །བསྐུར་བའི་གནས་དང་ཐབས་དག་དང་།  །སྒྲིབ་བྱང་ཚད་དང་ས་ནོན་དང་།  །དེ་འབྲེལ་མན་ངག་རིམ་པ་དང་།  །རྟགས་དག་དང་ནི་བརྡ་དག་དང་།  །རྫས་དག་དང་ཡང་དགོས་པའི་དོན།  །ནུས་པའི་ཚད་དང་འབྲས་དུ་སྟེ།  །རྣམ་པ་ཉི་ཤུས་མངོན་པར་བརྗོད།  །ཅེས་གསུངས་སོ།  །ཀྱེ་ཧོ་ཤཱཀྱ་སེང་གེ་ལ།  །བལྟམས་ཚེ་ཀླུ་རྒྱལ་དགའ་སོགས་པས། །བུམ་པའི་ཆུ་ཡིས་ཁྲུས་བྱས་དང་།  །མངོན་པར་རྫོགས་པར་སངས་རྒྱས་ཚེ།  །ས་ཡི་ལྷ་མོའི་བུམ་པ་ཡང་། །བཀྲ་ཤིས་བརྗོད་ནས་ཕྱག་ཏུ་ཕུལ།  །འཁོར་ལོའི་བསྒྱུར་རྒྱལ་རྒྱུད་འབྱུང་བ།  །སྤྱི་བོར་དབང་བསྐུར་གླེང་གཞི་ཡིན།  །ཞེས་དང་།  མགོ་ལ་མེ་ཏོག་ཕྲེང་བཏགས་པ།  །ལྷ་ཡི་དབང་སྟེ་དང་པོར་བཤད།  །ཆུ་དང་དབུ་རྒྱན་རྡོ་རྗེ་དང་།  །དྲིལ་བུ་མིང་དང་རྣམ་པ་ལྔ། །སློབ་མ་རིག་པའི་དབང་ཞེས་བྱ།  །དེ་ནས་སེང་གེའི་ཁྲི་སྟེང་དུ།  །རིག་བྱེད་སློབ་དཔོན་དབང་སྦྱིན་བྱ།  །གོང་མ་བརྟན་པར་བྱ་བའི་ཕྱིར།  །རྡོ་རྗེ་དྲིལ་བུ་བརྟུལ་ཞུགས་གཉིས། །ཕྱག་རྒྱ་དམ་ཚིག་གསུམ་པ་ཡིན།  །དབུགས་དབྱུང་བ་དང་ལུང་བསྟན་པ།  །ཕྱིར་མི་ལྡོག་སོགས་རིམ་པ་ཡིན།  །ཞེས་སོ།  །སྲོག་གཅོད་རྐུ་དང་ལོག་པར་གཡེམ།  །ལུས་ཀྱི་ཉེས་གསུམ་བྱང་བས་ན།  །ལུས་ཀྱི་དྲི་མ་དག་པར་བཤད།  །ཅེས་དང་།  དཀྱིལ་འཁོར་མཐོང་བས་ཚོགས་ཀྱི་ལམ།  །ཕྲེང་བས་མོས་སྤྱོད་སྦྱོར་ལམ་དག  །ཆུ་དང་དབུ་རྒྱན་ས་དང་པོ།  །མཐོང་ལམ་རྣམ་པར་དག་པར་གསུངས།  རྡོ་རྗེ་དྲིལ་དང་བདག་པོ་ཡིས།  །ས་གཉིས་པ་ནས་བརྒྱད་པའི་བར།  །སྒོམ་ལམ་རྣམ་པར་དག་པར་བཤད།  །ཅེས་དང་།   དབང་རྫས་དག་གི་ཁྱད་པར་ནི།  །མགོ་ལ་འདོགས་པའི་མེ་ཏོག་ཕྲེང་།  །སྤྱི་བོར་དག་པའི་ཆུ་ཡིན་ནོ།  །དེ་ཡང་བུམ་པའི་བྱེ་བྲག་ལས།  །རིན་ཆེན་དང་ནི་ཐོད་སོགས་ཕྲེང་། །མགོ་ལ་བཅིངས་པའི་དབུ་རྒྱན་ཡིན།  །དཔྲལ་བར་རིགས་དང་རྗེས་མཐུན་པའི། །རྟགས་ཀྱི་རྡོ་རྗེ་དེ་སྦྱིན་བྱ།  །དྲིལ་བུ་ཁ་ཡི་ཐད་སྦྱིན་བྱ།  །མིང་ལ་དབང་རྫས་དག་པའི་མཚན།  །དམ་ཚིག་རྡོར་དྲིལ་ལག་ཏུ་སྦྱིན།  །གསོར་བསིལ་སྒྲ་དང་བཅས་པའོ།  །ཕྱག་རྒྱའི་བདག་པོས་ཕྱག་རྒྱར་བསྒོམ།  །དབུགས་དབྱུང་བ་དང་ཡོན་ཏན་བརྗོད།  །ལུང་བསྟན་པ་ལ་ཆོས་གོས་དབྱིབས།  །ཕྱིར་མི་ལྡོག་ལ་དེ་ཉིད་བསྟན།  །ཞེས་དང་།   ཕྲེང་བ་ཡི་དམ་རྒྱལ་བའི་དབང་།  །ཆུ་ཁམས་མི་བསྐྱོད་རྣམ་པར་དག  །དབུ་རྒྱན་རིན་ཆེན་མཉམ་ཉིད་དེ།  །རྡོ་རྗེ་ཀུན་རྟོག་འོད་དཔག་མེད།  །དྲིལ་བུ་བྱ་གྲུབ་གདོན་མི་ཟ།  །མིང་ནི་ཆོས་དབྱིངས་སྣང་མཛད་སྐུ།  །རྡོ་རྗེ་བརྟུལ་ཞུགས་སེམས་དག་བྱེད།  །དྲིལ་བུ་དག་ནི་རྣམ་དག་སྟེ།  །ཕྱག་རྒྱ་དམ་ཚིག་ལུས་དག་པའོ།  །ཡང་།   རྡོ་རྗེ་ཐབས་ཀྱི་ངོ་བོ་སྟེ། །དྲིལ་བུ་དེ་བཞིན་ཤེས་རབ་སྦྱང་།  །གཉིས་མེད་ཕྱག་རྒྱའི་དམ་ཚིག་འདོད།  །ཅེས་དང་།   གཉིས་པ་༢གསང་བ་བཤད་བྱ་སྟེ།  །ཀྱེ་ཧོ་སྟོན་པ་རྡོ་རྗེ་འཛིན།  །འདོད་ཆགས་ཆེན་པོའི་ཏིང་འཛིན་གྱིས།  །འཁོར་རྣམས་བསྡུ་བ་རྣམས་མཛད་ནས།  །ཡུམ་གྱི་གསང་བའི་དཀྱིལ་འཁོར་དུ།  །གསང་བ་བྱང་ཆུབ་སེམས་དབང་བསྐུར།  །དེ་ལྟར་དཔལ་འདུས་ལ་སོགས་པའི།  །རྒྱུད་རྒྱལ་ཀུན་ལས་གྲགས་པ་རྣམས།  གླེང་གཞི་ཞེས་སུ་རྣམ་པར་བཤད། །ཅེས་དང་།  དཀར་དམར་སྤེལ་བ་ཕྲེང་བའི་དབང་།  །ཤུ་ཀྲ་ཞེས་ཏེ་ཆུ་ཡི་དབང་། །ཚངས་སྒོར་མི་བསྐྱོད་དབུ་རྒྱན་དབང་།  །ལྕེ་ལ་རྡོ་རྗེ་དེ་རྡོ་རྗེ།  །རྡོར་བུམ་ཧཱུྃ་སྒྲ་དྲིལ་བུའི་དབང་།  །ཨ་ཧོ་མུ་ཁ་མིང་གི་དབང་།  །དམ་ཚིག་ལྕེས་ལེན་བརྟུལ་ཞུགས་དབང་། །བལྟ་བར་མི་བྱ་ལུང་བསྟན་དབང་།  །ལོངས་སྤྱོད་རྩར་སྦྱར་ཕྱིར་མི་ལྡོག  །བདེ་བས་བདེ་ཐབས་དབུགས་དབྱུང་བའོ།  །ཞེས་དང་།  ངག་གི་སྒྲིབ་པ་དེས་བྱང་ནས།  །ངག་ནི་ཤིན་ཏུ་སྦྱངས་པ་སྟེ།  །སངས་རྒྱས་ས་ནི་དང་པོ་ནོན།  །ཞེས་དང་།   གསང་བའི་དབང་ཡང་རིམ་བཞི་སྟེ།  །རྡོ་རྗེ་དང་ནི་པདྨ་ནས།  །དྲི་མེད་ཆུ་འབབ་བུམ་པའི་དབང་།  །ཡང་ན་གང་གི་རིམ་དེ་ཉིད།  །ཟླ་བ་ཉི་མ་ལྕེ་ལ་རེག  །དེ་ནི་གསང་བ་གཉིས་པ་སྟེ།  །བདེ་ཆེན་ལམ་སྦྱོང་གསུམ་པའོ།  །ཐབས་དང་ཤེས་རབ་གཉིས་མེད་པ།  །ཡེ་ཤེས་ཆེན་པོ་གཞི་པའོ།  །ཞེས་དང་།  །དེ་ནས་གསུམ་པ་བཤད་བྱ་སྟེ།  །ཀྱེ་ཧོ་དཔལ་ལྡན་འདུས་སོགས་ལས།  །སྔགས་ཀྱི་སྤྱོད་པ་སྤྱད་པའི་ཚེ།  །འཁོར་གྱི་བྱང་ཆུབ་སེམས་དཔའ་རྣམས། །སྔགས་དང་དུས་དང་རྒྱལ་བ་ལས།  །བསླངས་ཏེ་སྦས་པའི་དོན་སྟོན་པ།  །དེ་ལྟ་བུ་ཡི་གླེང་གཞིའོ།  །ཞེས་དང་།  ཆགས་པའི་མཚན་ཉིད་ཕྲེང་བའི་དབང་།  །ཆུ་འབྱུང་མཚན་ཁྲུས་ཆུ་ཡི་དབང་།  །བྷག་ཙུམ་སྐྲ་བཟུང་དབུ་རྒྱན་དབང་།  །པདྨར་རྡོར་བཅུག་རྡོ་རྗེའི་དབང་།  །དེ་གཉིས་བསྐྱོད་པ་དྲིལ་བུའི་དབང་།  །དམ་ཚིག་ཧ་སྐད་མིང་གི་དབང་།  །དེ་དག་བརྟན་པ་སར་འབྱུང་བ།  །བལྟས་པས་དགའ་བ་རྡོ་རྗེ་ཡི།  །བརྟུལ་ཞུགས་དབང་དུ་དེ་བརྗོད་དོ།  །བགད་པ་དྲིལ་བུའི་བརྟུལ་ཞུགས་སོ།  །འཁྱུད་པ་དམ་ཚིག་ཕྱག་རྒྱ་ཡིན། །ཁ་ཕྲད་པ་ནི་དབུགས་བྱུང་བ།  །དཀུ་རྩ་མཉེ་བ་ལུང་བསྟན་ཡིན།  །པདྨར་བཙུམ་བྱས་ཕྱིར་མི་ལྡོག  །ཅེས་དང་།   སེམས་ཀྱི་སྒྲིབ་པ་ཀུན་བྱང་སྟེ།  །ཐམས་ཅད་ཀུན་མཁྱེན་ཡེ་ཤེས་ལྡན།  །སངས་རྒྱས་ས་གཉིས་ནོན་པ་སྟེ།  །རྡོ་རྗེ་འཛིན་པའི་ས་ཞེས་ཟེར།  །ཞེས་དང་།  འབྲས་བུ་དགའ་བ་བཞི་བསྐྱེད་དེ།  །ལྷ་སྦྱིན་བརྡ་འཕྲད་བུམ་པའི་དབང་།  །དེ་ཡི་འབྲས་བུ་དགའ་བ་བསྐྱོད།  །བྷག་ཙུམ་སྐྲ་བཟུང་དབུ་རྒྱན་དབང་།  །དེ་ཡི་འབྲས་བུ་དགའ་བ་བསྐྱེད།  །པདྨར་རྡོར་བཅུག་རྡོ་རྗེའི་དབང་།  །དེ་ཡི་འབྲས་བུ་མཆོག་དགའ་བསྐྱེད།  །རྡོ་རྗེ་དང་བསྐྱོད་དྲིལ་བུའི་དབང་།  །དེ་འབྲས་ལྷན་ཅིག་དགའ་བ་བསྐྱེད། །དམ་ཚིག་ཧ་སྐད་མིང་གི་དབང་།  །བདེ་བ་ཆེན་པོ་སྐྱེད་པར་བྱེད།  །ངོ་བོ་འབྲས་བུ་དབྱེར་མེད་དོ།  །ཞེས་དང་།   རིམ་པ་ཐ་མ་བཤད་བྱ་སྟེ།  །ཀྱེ་ཧོ་དཔལ་ལྡན་འདུས་སོགས་པར།  །འཁོར་གྱི་བྱང་ཆུབ་སེམས་དཔའ་ཡི།  །གསང་བའི་ཡི་གེ་མཐོང་བ་ཡི།  །སྐལ་པ་བདག་ཉིད་མེད་ཅེས་དུས།  །སྟོན་པ་ཡི་གེ་རྣམ་དག་ཅེས།  །ཡི་གེ་ལས་དབེན་མཚན་ཉིད་གསུངས།  །བཞི་པའི་གླེངས་གཞིར་ཤེས་པར་བྱ།  །སངས་རྒྱས་རྣམས་ཀྱི་ཡེ་ཤེས་ནི། །བདེ་བར་གཤེགས་པའི་ཐུགས་ལ་གནས།  །ཆོས་ཀུན་སེམས་ལ་གནས་བྱས་ཏེ། །སེམས་ནི་ཡེ་ནས་རྣམ་པར་དག  །དེ་ཕྱིར་ཆོས་ཀུན་རྣམ་པར་དག  །དེ་ནི་གནས་ཀྱི་བླ་མར་གསུངས།  །དུས་གསུམ་གཅིག་སྟེ་ཁྱད་མེད་ཅིང་།  །གང་དུ་དུས་གསུམ་དབྱེར་མེད་པ།  །དེ་ནི་བླང་དོར་མེད་པའི་དུས།  །མཆོག་ནི་བླ་མ་དེ་རབ་གསུངས། །སློབ་དཔོན་མ་མཐོང་སེམས་ཉིད་མཐོང་།  །རང་སེམས་བླ་མར་སྣང་བའི་ཕྱིར།  །ཀུན་གྱི་སློབ་དཔོན་སྐལ་པ་བཟང་།  །གཉིས་མེད་སློབ་དཔོན་དམ་པའོ།  །འགྲོ་ཀུན་དབྱིངས་ལས་སྐྱེས་པས་ན།  །རྡོ་རྗེ་སེམས་དཔའི་སྤུན་ཡིན་ཏེ།  །བསམ་གྱིས་མི་ཁྱབ་ཡུལ་སློབ་པ།  །རྒྱལ་བའི་སྲས་ཀྱི་དམ་པར་བཤད།  །སངས་རྒྱས་ཀུན་གྱི་བྱང་ཆུབ་སེམས།  །བླ་ན་མེད་པར་ཐུགས་ཆུད་པ།  །གཉིས་སུ་མེད་པའི་ཡེ་ཤེས་གང་།  །དེ་ནི་དཀྱིལ་འཁོར་སྙིང་པོར་གསུངས། །འདི་ཡི་གཞུང་ཐོས་མིག་ཕྱེ་བ།  །དཀྱིལ་འཁོར་མཐོང་བ་དོན་རྟོགས་ཡིན།  །རྟོགས་ནས་གོམས་བྱེད་འཇུག་པ་སྟེ།  །མངོན་དུ་གྱུར་པ་དངོས་གྲུབ་ཡིན།  །གཉིས་མེད་ཡེ་ཤེས་དབང་འགྱུར་བས།  །མྱ་ངན་འདས་པ་འཁོར་བ་ལ།  །ཇི་ལྟར་འདོད་པར་དབང་བསྒྱུར་བས།  །རིག་པ་རང་དབང་མཆོག་ཏུ་བཤད།  །འདི་དབང་ཐོབ་པའི་རྣལ་འབྱོར་ནི། །བསྒྱུར་བའི་དབང་ལ་ཐོགས་པ་མེད།  །ཇི་སྙེད་ཐེག་པ་རབ་འབྱམས་ཀྱི།  །དབང་བསྐུར་རྣམ་གྲངས་ཇི་སྙེད་ཀུན།  །གསང་བའི་དབང་དུ་གསུངས་པ་ཡི།  །ཡང་དག་པ་ཡི་གྲངས་ལས་འདས།  །མཉམ་པ་ཡེ་ཤེས་ཆེན་པོ་ཉིད།  །གཅིག་དང་དུ་མ་ལས་གྲོལ་ཕྱིར། །གནས་དང་གནས་མིན་དམིགས་དབྱེ་མེད།  །སྒོ་གསུམ་དབྱེ་བ་རྡུལ་ཙམ་མེད།  །གཉིས་མེད་ཡེ་ཤེས་ཆེན་པོ་ལས།  །སྒྱུ་འཕྲུལ་བྲལ་བ་མི་འགོགས་ཕྱིར།  །ཐབས་དང་ཐབས་བྱུང་ཐབས་བསམ་ཡས།  །ཐབས་ཀྱི་ནང་ནས་མཆོག་ཏུ་གསུངས།  །རང་རིག་ཡེ་ཤེས་རྒྱལ་བ་ཉིད།  །ཁམས་གསུམ་འཁོར་བ་ཉིད་ཡིན་ཕྱིར།  །འདི་ལ་སྒྲིབ་དང་མི་སྒྲིབ་ཅེས། །མཉམ་པའི་རྒྱལ་པོས་ཡོངས་མ་གསུངས།  །སྒྲིབ་པ་ཉིད་ནི་བྱང་ཆུབ་ལ།  །འཁོར་བ་ཉིད་ནི་མྱ་ངན་འདས།  །དབྱེ་བ་མེད་པའི་ས་མཆོག་གིས།  །ས་ཡི་ཁྱད་པར་ཟིལ་གྱིས་ནོན། །ཐམས་ཅད་ས་ཉིད་ཡེ་ཤེས་དང་།  །བརྗོད་པའི་ཐ་སྙད་ཡུལ་ལས་འདས།  །རང་བཞིན་གྱིས་ནི་འོད་གསལ་ཞིང་།  །རྫོགས་པ་ཆེན་པོའི་མཐར་ཐུག་པ།  །མན་ངག་ཀུན་གྱི་མཆོག་གི་མཆོག  །དེ་སྒྲུབ་ཐབས་དང་གསུངས་པར་ཟད།  །དཔེར་ན་གླང་པོ་རྙེད་གྱུར་མ།  །གླང་པོའི་རྗེས་ནི་མི་བཙལ་ལྟར།  །རང་རིག་ཡེ་ཤེས་མངོན་སུམ་ན།  །མཚན་མའི་རྟགས་ནི་འཁྲུལ་པའི་གཞི། །ཡང་དག་དོན་ནི་བརྡ་ལས་འདས།  །མཚོན་པར་བྱ་བའི་ཡུལ་མིན་ཡང་།  །འཛུབ་མོས་ཟླ་བ་བསྟན་པ་ལྟར།  །བརྡ་ཡི་སྒོ་ནས་འཇུག་པ་ཡིན། །སྣང་དང་སྲིད་པ་ཇི་སྙེད་པ། །སྐུ་གསུང་ཐུགས་ཀྱི་རྫས་ཡིན་པས།  །ལྷག་པར་སྤངས་ན་བླང་དང་བྲལ།  །ཡེ་ཤེས་རྗེས་ཀུན་ལས་གྲོལ་བཤད།  །རང་གི་དོན་ལ་མངོན་སུམ་ན། །རང་རིག་ཁོ་ན་ཙམ་དུ་ཟད།  །རང་རིག་དེ་ཡང་འདི་སྙམ་ཞེས།  །བརྗོད་པའི་ཐ་སྙད་རྣམས་དང་བྲལ།  །འདི་ནི་དགོངས་པའི་མཆོག་ཏུ་གསུངས།  །རིག་པ་རང་དབང་གྱུར་པ་ནི།  །སྲིད་པ་གསུམ་ན་འགྲན་ཟླ་མེད།  །འོག་མ་རྣམས་ཀྱི་གཉེན་པོར་ཆེ།  །ནུས་པ་མང་པོའི་བྱེ་བྲག་ལྡན།  །རྒྱུ་དང་འབྲས་བུ་དབྱེར་མེད་པས།  །རྒྱུ་འབྲས་ཐ་སྙད་ཡོངས་ཀྱིས་བྲལ།  །རྒྱུ་ཡི་ནང་ནའང་མཆོག་ཡིན་ཏེ།  །འབྲས་བུའི་ནང་ནའང་དེ་མཆོག་གོ  །དབང་གསུམ་བྱེ་བྲག་ལས་གྲོལ་ཕྱིར།  །བཞི་བའི་དབང་ཞེས་གྲགས་པ་སྟེ།  །རྒྱལ་བ་རྣམས་ཀྱི་ཐུགས་ཀྱི་གསང་།  །ཐམས་ཅད་མཁྱེན་པར་འདིར་བརྗོད་དོ།  །འོན་ཀྱང་ཀུན་མཁྱེན་མ་ཐོབ་པར།  །དེ་ཉིད་ཉེ་བར་ཡང་མི་འགྱུར།  །འོན་ཀྱང་འདི་ཡི་དབྱེ་བ་ཡིས།  །དེ་ཉིད་ཐོབ་བྱའི་གནས་སུ་འགྱུར།  །དེ་ལས་རིམ་པ་མཆོག་ཡིན་པས།  །སྒྲུབ་པོ་རྣམས་ཀྱིས་ནན་ཏན་བྱའོ།  །སློབ་དཔོན་རྣམས་ནི་མ་མཉེས་ཤིང་།  །དབང་རྣམས་རིམ་གྱིས་མ་བགྲོད་པར།  །སྔགས་སྤྱོད་སྒྲུབ་པ་རྩོམ་བྱེད་ན།  །དེ་འབྲས་མེད་ཅིང་ངན་སོང་ལྟུང་། །ཞེས་དང་།  །གང་ཞིག་དབང་གི་རིམ་པ་ནི།  །བླ་མ་གཞན་ལས་རྫོགས་བླངས་ལ། །མན་ངག་གི་ནི་རིམ་པ་ནི།  །བླ་མ་གཞན་ལས་བླང་དུ་རུང་།  །དབང་དང་མན་ངག་མ་བགྲོད་པར།  །གླེགས་བམ་ལ་བརྟེན་ཤེས་རབ་ཀྱིས།  །གང་ཞིག་མན་ངག་རིམ་རྙེད་ན། །དེ་ནི་སྔོན་སྦྱངས་འཕྲོ་ཅན་ནོ།  །དེས་ཀྱང་བླ་མ་དག་པ་ལ།  །དབང་གི་རིམ་པ་བགྲོད་པ་གཅེས།  །ཞེས་དང་།  དེ་ནས་བུམ་པའི་དབང་ལ་ཡང་།  །དབང་རྣམས་བཞིར་ནི་ངོས་གསུངས་ཏེ། །བུམ་པའི་བུམ་པ་ཐུན་མོང་སྟེ།  །གསང་དབང་ཁྱད་པར་གུས་པའོ། །ཤེས་རབ་ཡེ་ཤེས་སྦས་པ་གཉིས།  །དེ་ལྟར་རྣམ་གསུམ་བུམ་པ་ཡང་།  །ཡོད་མེད་མཐའ་ལས་ཡང་དག་གྲོལ།  །བུམ་པའི་དབང་ནི་བཞི་པ་ཡིན།  །ཞེས་དང་།   ཤ་མིག་དག་འགྱུར་སྔ་ལྟས་སུ།  །ཅི་མཐོང་འདྲི་བའི་ཆོ་ག་བྱ།  །ཞེས་དང་།   ནུས་པའི་ཚད་ནི་རྣམ་པ་ལྔ།  །དྲི་མ་འཁྲུད་དང་སྒྲིབ་སྦྱོང་དང་།  །ལས་བྱེད་པ་དང་འབྲས་བུ་ལ།  །མངོན་དུ་ཕྱོགས་དང་བདུད་བཞི་ནི།  །འཇོམས་པའི་ནུས་པས་བརྗོད་པ་སྟེ།  །ཕྲེང་བས་མ་དག་དྲི་མ་དང་།  །མོས་པའི་སྤྱོད་པས་སྒྲིབ་པ་འཁྲུ།  །འདོད་ལྷ་མཉེས་པའི་ལས་ཡིན་ཏེ། །འབྲས་བུ་མཐོང་བའི་ལམ་ལ་ཕྱོགས།  །ཡི་དམ་དངོས་གྲུབ་ཉེ་བ་ཡིན།  །གཟུང་འཛིན་ཕུང་པོའི་བདུད་རྣམས་བཅོམ།  །ཆུ་དང་དབུ་རྒྱན་གྱི་ནུས་པས།  །འཁོར་འདས་དྲི་མ་རྣམ་གཉིས་འཁྲུ།  །ས་ནི་དང་པོའི་སྒྲིབ་པ་དག  །ལས་ནི་རྡོ་རྗེ་རིན་ཆེན་གྱིས།  །རིགས་ཀྱི་ང་རྒྱལ་བྱེད་པ་ཡིན།  །འབྲས་བུ་སྒོམ་ལམ་ཕྱོགས་པ་དང་།  །རྡོ་རྗེ་དང་ནི་རིན་ཆེན་གྱིས། །ཐུན་མོང་དངོས་གྲུབ་གྲུབ་པ་ཡིན།  །ཉོན་མོངས་པ་ཡི་བདུད་རྣམས་བཅོམ།  །རྡོ་རྗེ་དྲིལ་བུ་བདག་པོ་ཡིས།  །གཡེང་བ་ལྔ་ཡི་དྲི་མ་འཁྲུ།  །ས་གཉིས་པ་ནས་བརྒྱད་པ་ཡི།  །བར་གྱི་སྒྲིབ་པ་སྦྱངས་བ་ཡིན།  །པདྨ་ལས་དང་སངས་རྒྱས་ཀྱི།  །རིགས་ཀྱི་ང་རྒྱལ་ལས་བྱེད་ཡིན།  །འབྲས་བུ་མཐར་ཕྱིན་ལ་ཕྱོགས་ཤིང་།  །གསུམ་པོའི་ཐུན་མོང་གྲུབ་པ་ཡིན། །འཆི་བདག་བདུད་བཅོམ་ཚེ་ལ་དབང་།  །བརྟན་བྱེད་དབང་གི་རིམ་པ་ཡིས།  །གཡེང་བ་ཕྲ་མོའི་བག་ཆགས་འཁྲུ།  །ལས་ནི་བརྟན་པར་བྱེད་པ་སྟེ།  །བརྟུལ་ཞུགས་ཀྱི་ནི་མེ་ཏོག་བསྟན།  །ཆུ་དང་དབུ་རྒྱན་དམ་ཚིག་གིས།  །བུམ་པ་བརྟན་པར་བཀའ་སྩལ་གྱི།  །རྡོ་རྗེ་དྲིལ་བུའི་ལུང་བསྟན་གྱིས།  །དབུགས་དབྱུང་བས་ནི་བདག་པོའོ།  །ཡང་ན་ཀུན་གྱི་ཐམས་ཅད་དོ།  །སངས་རྒྱས་ས་ལ་མངོན་ཕྱོགས་དང་།  །དངོས་གྲུབ་བརྟན་བྱེད་འབྲས་བུའོ།  །ལྷ་ཡི་བདུད་བཅོམ་བུམ་པ་ཡིན།  །ཞེས་དང་།  ནུས་པའི་ཚད་ཀྱང་དེ་བཞིན་དུ། །ཇི་སྙེད་ངག་གི་དྲི་མ་འཁྲུ།  །བུདྡྷའི་སར་སྒྲིབ་ཤིན་ཏུ་དག  །ཤེས་རབ་ཐབས་ཀྱི་ང་རྒྱལ་བྱེད།  །ཆོས་ཀུན་རོ་གཅིག་མཚོན་པར་ནུས།  །སངས་རྒྱས་པ་ནི་མངོན་དུ་ཐོབ།  །ཐབས་ཀྱི་ཕྱག་རྒྱས་ཕུང་པོ་འཇོམས།  །ཉོན་མོངས་ཤེས་རབ་མ་ཡིན་ཏེ།  །འཆི་བདག་གཉིས་སུ་མེད་པ་ཡིས།  །སེམས་འཕྲོས་པས་ནི་ལྷ་ཡི་བདུད།  །འཇོམས་པ་གསང་བའི་ནུས་པའི་ཚད།  །ཅེས་དང་།  འདི་ལ་ཡང་ནི་དབང་བཞི་ཚང་།  །ལྷ་སྦྱིན་བརྡ་ཕྲད་ལ་སོགས་པ། །བུམ་པའི་དབང་དུ་འདོད་པ་ཡིས།  །པད་དང་རྡོ་རྗེ་ཕྲད་པ་སོགས།  །གསུམ་པའི་གསང་བའི་དབང་ཡིན་ནོ།  །ཞུ་སྟེ་བདེ་བ་བབས་པ་ནི།  །གསུམ་པ་ཡི་ནི་གསུམ་པ་ཡི། །དགའ་བྱེད་བདེ་བྱེད་བཞི་པར་འདོད།  དེ་ནི་གསུམ་པའི་བཞི་པར་འདོད།  །དེ་ནི་གསུམ་པའི་རྣམ་གྲངས་ཡིན།  ཞེས་དང་།  །ནུས་པའི་ཚད་ཀྱང་དེ་བཞིན་ཏེ།  །དེས་ནི་སེམས་ཀྱི་དྲི་མ་འཁྲུ།  །རྡོ་རྗེ་འཛིན་པའི་སྒྲིབ་པ་དག  །ཕྱག་རྒྱ་བརྟེན་པའི་ལས་དང་ནི།  །བདེ་སྐྱིད་ཐོབ་པར་ནུས་པ་ཡིན།  །འབྲས་བུ་རྡོ་རྗེ་འཛིན་པ་སྟེ།  །རང་གི་རིག་པས་རིག་པ་འཛིན། །བདེ་ཆེན་ཉོན་མོངས་བདུད་བཅོམ་སྟེ།  །ལོངས་སྤྱོད་གནས་སུ་ཕུང་པོའི་བདུད།  །དྷརྨ་ཙཀྲར་ལྷ་བདུད་བཅོམ།  །སྤྲུལ་པར་འཆི་བདག་བདུད་བཅོམ་སྟེ།  །དགའ་བཞིས་བདུད་བཞི་རྣམ་པར་འཇོམས།  །དམ་ཚིག་འཁོར་ལོ་ཕུང་པོ་འཇོམས།  །པདྨར་རྡོར་བཅུག་ཉོན་མོངས་འཇོམས།  །རྡོ་རྗེ་དང་བསྐྱོད་ལྷ་བདུད་འཇོམས།  །བདེ་བ་འབེབས་པས་འཆི་བདག་འཇོམས།  །ཞེས་གསུངས་ཏེ།  འདི་ནི་སློབ་དཔོན་ཨིནྡྲ་བྷཱུ་ཏིས་མཛད་པ་དེའོ།།   །། ༈

སློབ་དཔོན་ལ་ཀྵྨཱི་ཀཱ་རས་མཛད་པའི་རྩ་ལྟུང་འགྲེལ་པར།  བྱང་ཆུབ་སེམས་དེར་བདེ་གཤེགས་བཀའ་ལས་འདས།  །བྱམས་སྤོངས་ཐེག་གསུམ་སྨོད་དང་ཆོས་ཡིད་རྣམས། །ཐུགས་ཀྱིའོ།  །སློབ་དཔོན་བརྙས་དང་ལྷ་ཉིད་ཕུང་པོ་སྨོད།  །དམ་ཚིག་མི་བསྟེན་ཤེས་རབ་སྨོད་པ་རྣམས།  །སྐུའིའོ།  །མི་བསྔགས་བརྗོད་དང་དད་ལྡན་སེམས་སུན་འབྱིན། །གདུགས་ལ་ཆགས་བྲལ་ཆོས་གཉིས་གསང་བ་སྟོན།  །གསུང་གིའོ།  །ཞེས་དང་།  ཉན་ཐོས་རྣམས་ཀྱི་ལུས་ངག་གཙོ་བོར་གྱུར་པའི་སྤང་བྱ་བདུན་གྱི་མཚན་ཉིད་དང་།  །བྱང་ཆུབ་སེམས་དཔའི་སྙིང་རྗེ་གཙོ་བོར་གྱུར་པའི་སྤང་བྱ་བཅུ་ཡི་མཚན་ཉིད་དང་། །གསང་སྔགས་རྣལ་འབྱོར་ཆེན་པོའི་ཐབས་དང་ཤེས་རབ་གཙོ་བོར་གྱུར་པའི་སྤང་བྱ་བཅུ་བཞིའི་མཚན་ཉིད་དང་།  ཞེས་སོ།།    །།  ༈
ཇོ་བོ་རྗེས་རྩ་ལྟུང་འགྲེལ་པ་ལས།  །དེ་ལ་ལྟུང་བ་དང་པོ་གཉིས་པའི་ངོ་བོ་རྒྱུ་གཅིག་སྟེ།  བླ་མ་ལ་བརྙས་ཤིང་བདེ་བར་གཤེགས་པའི་བཀའ་ལས་འདས་པ་སྟེ།  དེ་ཡང་།  །བླ་མ་དང་ནི་རྡོ་རྗེ་འཛིན།  །ཐ་དད་པར་ནི་མི་བརྟག་གོ།   །ཞེས་གསུངས་པའི་ཕྱིར་རོ།  །ཞེས་དང་།  སྤུན་ལ་ཉེས་པ་བརྗོད་པ་དང་།  བྱམས་པ་སྤངས་པ་གཉིས་ལྟུང་བའི་ངོ་བོ་གཅིག་ལ།  འབྱུང་བའི་རྒྱུ་ཡང་གཅིག་སྟེ།  དེའི་རྒྱུ་ནི་སྔོན་དུ་ཐུན་མོང་གི་ལམ་བྱམས་སྙིང་རྗེ་མ་སྦྱངས་པས་སེམས་ཅན་ལ་ཕན་འདོད་པ་དང་།  གཅེས་པར་འཛིན་པའི་བློ་མེད་པ་དེའི་དབང་གིས་གནོད་ཅིང་སྨོད་པ་ལ་སོགས་པའི་རྐྱེན་ཕྲ་མོ་མི་བཟོད་དེ།  དེའི་ཕྱིར་སྤུན་ལ་ཉེས་པ་བརྗོད་ཅིང་སེམས་ཅན་ལ་བྱམས་པ་སྤངས་པས་དེས་དེ་གཉིས་ངོ་བོ་གཅིག་སྟེ་གཞན་ལ་གནོད་པར་འདྲ་བས་སོ།  །ཞེས་དང་།  བྱང་ཆུབ་ཀྱི་སེམས་སྤོང་བ་དང་གྲུབ་པའི་མཐའ་སྤངས་པ་གཉིས་རྒྱུ་དང་ངོ་བོ་གཅིག་སྟེ།  རྒྱུ་ནི་བྱམས་པ་དང་སྙིང་རྗེའི་སྟོབས་ཀྱིས་བྱང་ཆུབ་སེམས་བརྟན་པར་མ་བྱས་པར་བླངས་སུ་ཟིན་ཡང་མི་བརྟན་ཏེ།  ཞེས་སོགས་དང་།  གསང་བ་སྒྲོགས་པ་དང་ཕུང་པོ་སྨོད་པ་གཉིས་རྒྱུ་དང་ངོ་བོ་གཅིག་སྟེ།  རིམ་གྱིས་མ་སྦྱངས་པའི་ཕྱིར་སྣོད་དུ་མ་གྱུར་པ་ལ་གསང་བའི་དོན་གྲུབ་པར་གནས་པའི་དོན་ལྟ་བ་རྣམ་པ་གཉིས་ལ་སོགས་པ་བསྟན་པས་ཕུང་པོ་ལྷའི་བདག་ཉིད་ལ་སོགས་པ་བསྐྱེད་པའི་གོ་རིམ་སྤངས་པས་རྒྱུ་དང་ངོ་བོ་གཅིག་གོ  །ཞེས་དང་།  ཆོས་ལ་ཡིད་གཉིས་ཟ་བ་དང་།  གདུག་ལ་བྱམས་སེམས་གཉིས་རྒྱུ་དང་ངོ་བོ་གཅིག་སྟེ།  །དེ་ཡང་སེམས་ཅན་ཐམས་ཅད་རང་བཞིན་གྱིས་དག་པ་འོད་གསལ་དང་ཟུང་དུ་འཇུག་པའི་རང་བཞིན་དུ་གཅིག་པས་ཐེ་ཚོམ་ཟ་སྟེ།  འཁོར་བ་དང་ཞི་བའི་ཕྱག་རྒྱ་ཆེན་པོ་ཟུང་དུ་མ་རྟོགས་པའི་དབང་གིས་གདུག་པ་ཅན་གནོད་ཅིང་དམོད་པ་ལ་སོགས་པའི་བྱང་ཆུབ་ཀྱི་རྟེན་དུ་དབྱུག་པ་བརྡེག་པ་ལ་སོགས་པ་དྲག་ཤུལ་གྱི་སྦྱོར་བས་ཕན་པ་མ་ཡིན་པར་བསྒྲུབས་པས་རྒྱུ་དང་ངོ་བོ་གཅིག་གོ།   །མིང་སོགས་བྲལ་བའི་ཆོས་ལ་དེར་རྟོགས་པ་དང་།  དད་ལྡན་སེམས་སུན་འབྱིན་པ་རྒྱུ་དང་ངོ་བོ་གཅིག་སྟེ།  མིང་ལ་སོགས་པ་བྲལ་བ་ནི་གྲུབ་པའི་གནས་པའི་དོན་ནམ་མཁའ་ལྟ་བུའི་རང་བཞིན་འོད་གསལ་བ་ལ་དངོས་པོ་མཚན་མར་བརྟགས་པའི་རྒྱུས་དེ་ལ་དད་པའི་སེམས་ཅན་དབང་པོ་རབ་དང་ལྡན་པ་རྣམས་སུན་འབྱིན་ཏེ།  མ་ཞུགས་པ་ལ་མི་འཇུག་ལ།  ཞུགས་པ་བཟློག་ཅིང་བརྟན་པར་མི་བྱེད་པས་སོ།  །དམ་ཚིག་མི་བསྟེན་པ་དང་ཤེས་རབ་སྨོད་པ་གཉིས་ཀྱང་།  བདུད་རྩི་ལྔ་ལ་སོགས་པའི་དམ་ཚིག་མི་བསྟེན་པ་ནི་ཤེས་རབ་སྨོད་པའི་རྒྱུ་ཡིན་ཏེ།  དེ་ལ་སྨོད་པ་ཉིད་དེ་སྤོང་བའི་རྒྱུའོ།  །ཞེས་སོ།  །གཞན་ཡང་།  དེ་ལྟར་བཅུ་བཞི་པོ་བསྡུ་ན་གསུམ་སྟེ།  ཐུན་མོང་གི་བྱང་ཆུབ་ཀྱི་སེམས་མི་ཉམས་པར་བྱེད་པ་དང་།  ཁྱད་པར་བྱང་ཆུབ་སེམས་མི་ཉམས་པར་བྱེད་པ་དང་།  དེ་གཉིས་ཀ་མི་ཉམས་པར་བྱེད་པའོ།  །ཞེས་གསུངས་ཏེ།  དང་པོ་ནི།  སྤུན་ལ།  བྱམས་སྤོང་།  བྱང་སེམས་འདོར་བ།  གྲུབ་མཐའ་སྨོད་པ།  གདུག་ལ་བྱམས་སྤོང་ལྔ་དང་།  ལྷག་མ་ནི་གཉིས་པ་དང་།  དང་པོ་གཉིས་ནི་གསུམ་པར་བཤད་དོ།  །ཡང་།  དེ་ནི་ལྟ་སྒོམ་སྤྱོད་གསུམ་གྱི་རང་བཞིན་ཡང་ཡིན་ཏེ།  ཆོས་ལ་ཡིད་གཉིས་དང་།  མིང་སོགས་བྲལ་ལ་དེར་རྟོག་སྤངས་པ་ལྟ་བ་རྣམ་གཉིས་རྟོགས་པའོ། །དང་པོ་དང་གཉིས་པ་དང་གསུམ་པ་དང་བཞི་པ་དང་ལྔ་པ་དང་དྲུག་པ་དང་བདུན་པ་དང་བརྒྱད་པ་དང་བཅུ་པའི་དགུ་སྤངས་བས་སྒོམ་པའི་མན་ངག་དང་།  སེམས་སུན་འབྱིན་པ་དང་།  དམ་ཚིག་མི་བསྟེན་པ་དང་།  ཤེས་རབ་སྨོད་པ་གསུམ་གྱིས་དགུ་སྤངས་ཤིང་སྦྱངས་པས་སྤྱོད་པའོ།  །ཞེས་སོ།།    །།  ༈

སློབ་དཔོན་འཇམ་དཔལ་གྲགས་པས་མཛད་པའི་རྩ་ལྟུང་རྒྱ་ཆེར་འགྲེལ་ལས།  སངས་རྒྱས་ཡེ་ཤེས་ཞབས་ཀྱི་གསུང་དྲངས་པ།  །རྣལ་འབྱོར་བཞི་པའི་ཆོ་ག་དང་།  །སྣང་སྲིད་སྒྱུ་མའི་སྦྱོར་བ་ཡིས།  །འགྲོ་འཆག་ཉལ་དང་འདུག་པ་རྣམས།  །སྐུ་གསུང་ཐུགས་ཀྱི་མཛད་པའོ།  །བྱེད་དང་སྨྲ་དང་སྤྱོད་པ་རྣམས། །བྷ་ག་ལས་ནི་གཡེང་མི་བྱ།  །ཟས་ནི་བདུད་རྩིར་རབ་དམིགས་ལ།  །ཐ་དད་མེད་པའི་དཀྱིལ་འཁོར་དུ།  །ཕྱི་ཡི་སྦྱིན་སྲེག་ཚུལ་དུ་ནི།  །རྟག་ཏུ་ཚོགས་ཀྱི་མཆོད་པ་བྱ།  །འགྲོ་བ་རང་བཞིན་དག་པ་ཡིས།  །དབང་བསྐུར་བ་ཡི་ཆོ་ག་ནི།  །ཕྱི་ཡི་ཆུས་ཀྱང་བཀྲུ་བར་བྱ། །ཉལ་ན་ཤེས་རབ་སྙིང་རྗེས་ཉལ།  །ལྡང་ན་དཔལ་ལྡན་གླུ་ཡིས་བསྐུལ།  །ཐམས་ཅད་རང་བཞིན་དག་པ་ཡིས།  །དག་པའི་ལྷ་དང་གནས་སུ་སྣང་།  །སེམས་ཉིད་ཅིར་ཡང་སྣང་བའི་ཕྱིར།  །བདེ་སྡུག་མཐའ་ལས་རྣམ་པར་གྲོལ།  །ཞེས་དང་།  སྒྱུ་འཕྲུལ་དྲྭ་བ་ལས་དྲངས་པ་དེ་བཞིན་འཁོར་བའི་ཕ་རོལ་གྱི།  །ཆོས་ཀྱི་ལམ་ནི་བསྐྱེད་པས་ནས།  །ཆོས་དང་ཆོས་མིན་རྣམ་སྤངས་ལ།  །བྱང་ཆུབ་བདེ་བ་འཐོབ་པ་བཞིན།  །དེ་བཞིན་རྣམ་རྟོག་དྲྭ་སྤངས་ལ།  །ཤིན་ཏུ་ཟབ་མོའི་ཆོས་སྤེལ་ཏེ།  །དེ་བཞིན་གཤེགས་པས་གསུངས་ལམ་ལ། །སྔགས་རིག་རྣམ་རྟོག་མ་བྱེད་ཅིག  །ཅེས་དང་།  འདི་ཡི་སྤྱོད་པ་ལ་གནས་པས།  །སྤྲོས་བཅས་མེད་ཅིང་མཉམ་བདག་མེད།  །བྱ་དང་བྱེད་དང་རྩོལ་ལས་འདས།  །དག་དང་མ་དག་དངོས་པོ་རྣམས།  །སྒྱུ་མ་བཞིན་དུ་དངོས་མེད་པར།  །བརྟག་པས་དབེན་པས་བླང་དོར་མེད།  །འདོད་ཆགས་ལ་སོགས་མི་སྤངས་ཏེ།  །གཞན་གྱི་སངས་རྒྱས་སྒྲུབ་མི་བྱེད། །ཡོད་མེད་རྟག་ཆད་མཐའ་ལས་འདས།  །ཁ་དོག་དབྱིབས་མེད་ལུས་ངག་མེད།  །སྲོག་རྩོལ་རིམ་དང་གཅིག་ཅར་སྤངས།  །ཡི་གེ་མཚན་མ་ཕྱག་རྒྱ་མེད།  །ཕྱོགས་བཅུ་གང་ལའང་གནས་མི་བྱེད།  །གཟུང་འཛིན་རྣམ་རྟོག་ཡུལ་ལས་འདས།  །དམ་ཚིག་སྡོམ་པ་དཀྱིལ་འཁོར་མེད།  །དེ་ཉིད་བཅུ་ལ་རྣམ་མི་རྟོག  །བསྒོམ་བྱ་སྒོམ་བྱེད་བསྒོམས་པ་མེད། །སངས་རྒྱས་སེམས་ཅན་བདག་རྩོལ་བྲལ།  །རྒྱུ་འབྲས་ལམ་ལ་སོགས་པ་སྤངས།  །རྒྱུ་དང་མི་རྒྱུའི་དངོས་རྣམས་ལ།  །ནམ་མཁའ་བཞིན་དུ་རྟོག་མི་བྱེད།  །མཆོད་རྟེན་གླེགས་བམ་ལ་སོགས་སྤངས།  །བདུད་དང་དངོས་གྲུབ་གཉིས་སུ་མེད།  །རང་རིག་ཤེས་བརྗོད་ཡུལ་ལས་འདས།  །སྦྲ་དང་བརྡ་དང་དབང་པོ་ཡིས།  །འདི་ལ་བསྟན་བྱ་རྡུལ་ཡང་མེད། །རྟོག་གེའི་སྤྱོད་ལས་འདས་པ་སྟེ།  །དམ་པའི་རྗེས་འབྲང་རང་གིས་རིག  །མཐོང་བ་མེད་པའི་དམ་པ་མཐོང་།  །རྗེས་སུ་ཤེས་པ་སྒྱུ་མ་བཞིན།  །རབ་མཐའི་ཤེས་པ་རྟོགས་གོམས་པས།  །རྟོག་མེད་གཞན་དོན་ནོར་བུ་བཞིན།  །སྐུ་གསུམ་ཡེ་ཤེས་ལྔ་ལ་སོགས།  །ཐུབ་པའི་ཡོན་ཏན་དཔག་བསམ་ཤིང་།  །སྟོན་དུས་སྐད་ཅིག་གིས་རྫོགས་ལྟར།  །དེ་ཕྱིར་དེ་ལ་གསང་བ་འདུས།  །བཞི་པའི་དབང་གིས་རབ་ཏུ་རྒྱན།  །དེ་ཉིད་དཔལ་མཆོག་དང་པོ་སྟེ།  །རྡོ་རྗེ་སེམས་དཔའ་མཐར་ཕྱིན་ལམ།  ཞེས་བཤད་པའི་ཕྱིར་འདི་ནི་མཐར་ཕྱིན་པའི་སྤྱོད་པ་སྟེ།  མཉམ་པར་བཞག་པའི་སྤྱོད་པ་ཆེན་པོའོ།  །ཞེས་དང་།  ལྷ་དང་དྲང་སྲོང་བདེན་པའི་ངག  །གང་ལ་སྦྱོར་བའི་ནུས་པ་ཡང་།  །བསླུ་བར་བྱེད་པ་མ་མཐོང་ན། །ཡེ་ཤེས་ཆགས་པ་མི་མངའ་བའི།  །སྨོན་ལམ་སྙིང་རྗེས་གཞན་དོན་འཇུག  །ཐམས་ཅད་མཁྱེན་པས་སྨོས་ཅི་དགོས།  ཞེས་དང་།  །རྣམ་ཤེས་འཕོ་བ་ནི་རྣལ་འབྱོར་པ་འཆི་བ་ཤེས་རབ་ཀྱི་ཕ་རོལ་ཏུ་ཕྱིན་པའོ།  །འཆི་བའི་ཚེ་བདེན་པ་གཉིས་ཀྱི་ཚུལ་གྱིས་སྒྱུ་མའི་བློ་དང་ལྡན་པས་ཆགས་སྡང་ལ་སོགས་པ་མེད་པས་དཀྱིལ་འཁོར་གསལ་བར་བྱས་ལ་དྲི་མ་ལས་ལྡང་བ་སྔོན་དུ་འགྲོ་བས།  སྲོག་འཕྲོག་པའི་རིམ་པས་དཀྱིལ་འཁོར་གྱི་འཁོར་ལོ་བསྡུས་ཏེ། རང་གི་ཡེ་ཤེས་དང་མི་གཉིས་པར་བྱས་ཏེ།  འོད་ཟེར་གྱིས་ཁམས་གསུམ་དག་པར་བྱས་ལ་དཀྱིལ་འཁོར་ལ་བལྟས་ཏེ།  ཐབས་དང་ཤེས་རབ་ཀྱི་དབུས་སུ་རང་གི་ཡི་གེར་བསྡུས་ལ།  རང་གི་དེ་ཉིད་ཀྱི་ཐུགས་ཀར་འོད་ཟེར་དང་བཅས་པས་འཇུག་པར་བྱའོ། །གཞན་དུ་ན་ཉེས་པ་དང་བཅས་པའོ།  །ཞེས་སོ།  །གཞན་ཡང་ཚུལ་འདི་ལ་ཟབ་ཅིང་རྒྱ་ཆེ་བའི་ལེགས་བཤད་རྨད་དུ་བྱུང་བ་དུ་མ་ཡོད་ཀྱང་འབྲིར་མ་ལྡང་སྟེ་རྟོགས་པར་འདོད་པ་རྣམས་ཀྱིས་ནན་ཏན་དུ་བལྟ་ཞིང་བཟུང་ནས་སྤེལ་བར་བྱའོ།།    །།  ༈

ཡང་དེས་མཛད་པའི་གསལ་བ་ཐམས་ཅད་སྤྱིའི་ཆོ་ག་སྙིང་པོ་རྒྱན་ལས།  །རྩོད་པའི་དུས་ནི་འདི་ཉིད་ན། །རྣམ་རྒྱས་ཉོན་མོངས་དབང་གིས་ནི།  །སློབ་དཔོན་སྐྱོན་ལས་ཡོན་ཏན་དག  །ཤས་ཆེར་གྱུར་པ་རྣམ་པར་བཟུང་།  །ཞེས་དང་།  དེ་ཉིད་བཅུ་ནི་ཤེས་གྱུར་པའི།  །བརྟུལ་ཞུགས་འཛིན་པ་ཡོན་གནས་སུ།  །དབང་བསྐུར་རབ་གནས་སྦྱིན་སྲེག་དང་། །ཚོགས་ཀྱི་འཁོར་ལོ་སོགས་དཔོན་དུ།  །གོས་དཀར་ཅན་ནི་མི་དགའོ།  །ཞེས་དང་།  ཉིན་མཚན་ཀུན་ཏུ་རབ་བསྒྲིམས་པས།  །ཉེས་པའི་གནས་ནི་ཤེས་པར་བྱ།  །གལ་ཏེ་ལྟུང་སོགས་བྱུང་གྱུར་ན།  །ཡི་གེ་བརྒྱས་ནི་བྱིན་གྱིས་བརླབ།  །ཇི་སྲིད་དུས་ལས་མ་འདས་པར།  །དག་པའི་ལས་ལ་ཉེར་གནས་བྱ།  །འགྱོད་བཅས་ཉེས་པ་འཕེལ་མི་འགྱུར།  །ཞེས་དང་།  །བསྟན་པའི་དོན་ལས་མ་གཏོགས་པར།  །རིགས་རྒྱུད་རབ་ཏུ་འཕེལ་འདོད་པས།  །ན་ཆུང་བདེ་ལ་བརྐམ་པ་ཡིས།  །སྔགས་པ་རྟག་ཏུ་ཉམས་པར་འགྱུར།  །ཞེས་དང་།  ཉོན་མོངས་པས་ནི་ཟིལ་གནོན་ཞིང་།  །གལ་ཏེ་དམ་ཚིག་ལས་འདས་ན།  །སྡུག་བསྔལ་མང་པོ་སྐྱེ་འགྱུར་ཏེ།  །དེ་བས་དག་པའི་ལས་རྣམས་སྤྱད།  །ལྟུང་སོགས་ཉེས་པའི་རིམ་པ་ལས། །དང་པོར་བདག་སེམས་སུན་ཕྱུང་སྟེ།  །ཡུལ་མདུན་སྙན་གསན་ཕབ་ནས་ཀྱང་།  །གསུམ་བསླངས་གསུམ་གྱི་སྦྱོར་བ་ལས།  །སྡོམ་གསུམ་འགལ་བ་ཉམས་པ་བཤགས།  །བདེ་གཤེགས་ཀུན་གྱི་སྙིང་པོ་བྱ།  །དཔྲལ་བ་སྙིང་ཁར་ཕྱག་རྒྱ་སྔགས།  །སྡིག་པ་ཐམས་ཅད་རྣམ་དག་བྱེད།  །ཕྱི་ནང་ལྷ་དབང་བདུད་རྩིས་བཀྲུ།  །ཧཱུྃ་ཨྃ་ཡི་གེ་གསུམ་གྱིས་བསྡུ། །ལྟེ་བར་གྲུ་གསུམ་མེ་ཡིས་བསྲེགས།  །དམིགས་པས་སྟོང་པ་མི་དམིགས་གསུམ།  །རང་གི་ཆོ་ག་བཞི་ཡི་དབང་།  །ཚོགས་ནི་འདུ་བའི་དཀྱིལ་འཁོར་ལ།  །མཁྱེན་པར་གསོལ་ཏེ་གནང་བ་ནོད།  །རྟེན་ལ་སྨྲེ་བཤགས་བཟླས་པར་ལྡན།  །ཞིང་ཁམས་ཁ་དོག་ལྔ་ལྡན་པ། །ཆོ་ག་བཞིན་དུ་དབུལ་བར་བྱ།  །ཆེ་དང་ཙཻཏྱའི་སྦྱོར་བ་ཡིས།  །སྡིག་པ་ཀུན་ལས་རྣམ་གྲོལ་ཞིང་།  །དུས་མིན་འཆི་བའང་བསླུ་བར་འགྱུར།  །དེ་བས་མཆོད་རྟེན་ལས་རྣམས་བྱ། །ཏིལ་ལ་སྡིགས་པའི་གཟུགས་དམིགས་ཏེ།  །མེ་ཡི་ལས་ཀྱིས་རྣམ་པར་སྦྱང་།  །ཉེས་པའི་རིམ་པ་ཤེས་བྱས་ནས།  །གཏོར་མས་དག་པ་ཉིད་དུ་བྱ།  །ཇི་སྐད་བཤད་པའི་དམ་ཚིག་རྣམས།  །གང་དུ་ཉམས་པར་གྱུར་པ་དེས།  །རང་གི་ལྷ་ཡི་སྙིང་པོའི་སྔགས།  །འབུམ་ཕྲག་གསུམ་དུ་བཟླས་བརྗོད་བྱ།  །ཡང་ན་ཁ་དོག་དབྱིབས་མེད་ཅིང་།  །རིགས་དང་མཚན་མ་མི་དམིགས་ཤིང་།  །རྣམ་ཐར་ཆགས་སོགས་ལས་གྲོལ་བ།  །ཟབ་མོའི་བསམ་གཏན་ཉིད་དམིགས་བྱ།  །ཡང་ན་བཤེས་སོགས་རྒྱར་ཆུད་ཅིང་།  །རང་གི་ལས་ཀྱིས་འཆི་འགྱུར་དང་།  །རྐྱེན་ཟད་པ་ཡི་སེམས་ཅན་རྣམས།  །དག་པའི་དོན་ཕྱིར་སྲོག་བསྐྱབ་བྱ། །གཞན་ཡང་མདོ་སོགས་གསང་བའི་བཀའ།  །མ་ལུས་པ་ནི་བཀླགས་པ་དང་།  །མཆོད་ཅིང་རབ་ཏུ་གནས་བྱས་ན།  །སྡིག་པ་ཀུན་དང་བྲལ་བར་འགྱུར།  །མེ་དང་ཆུ་དང་སྦྲུལ་གདུག་དང་།  །སེང་གེ་སྟག་དང་ཆོམ་རྐུན་དང་།  །གླང་ཆེན་སྨྱོ་དང་ཤ་ཟ་དང་།  །བཀྲེན་དང་རྒྱལ་པོའི་ཆད་པ་དང་།  །ནད་དང་སྤ་བཀོང་ཞུམ་པ་དང་།  །འདོད་བྲལ་གྲགས་པ་མ་ཡིན་དང་།  །སྐལ་ངན་རབ་ཏུ་འཇིག་བྱེད་ཅིང་།  །བགེགས་མེད་འཚེ་བ་མེད་པ་དང་། །སངས་རྒྱས་ཀུན་གྱིས་རབ་དགོངས་ཤིང་།  །རྡོ་རྗེ་འཛིན་རྣམས་བསྲུང་བ་དང་།  །ཞི་སོགས་མི་སྣང་ལ་སོགས་དང་།  །རྡོ་རྗེ་ཡེ་ཤེས་ཐོབ་བྱེད་ཅིང་།  །སྐྱེ་བོ་ཀུན་གྱིས་བཀུར་འགྱུར་བ།  །དེ་ལྟའི་ཡོན་ཏན་འཐོབ་བྱེད་པའི།  །བླ་མ་ལ་ནི་བཀུར་སྟི་དང་།  །རྙེད་པ་དང་ནི་རིམ་གྲོ་དང་།  །གུས་པ་ཆེན་པོས་རབ་བརྟེན་ནས།  །སྡིག་ཀུན་རྣམ་དག་བདག་ཉིད་འགྱུར།  །དཔའ་བོས་དོན་ཡོད་རྡོ་རྗེ་ཅན།  །བསྙེན་སོགས་རིམ་པ་སྔོན་འགྲོ་བས། །ཆོ་ག་རབ་ཏུ་རྫོགས་བྱས་ནས།  །དཀྱིལ་འཁོར་བཞེངས་ཏེ་བདག་འཇུག་གོ  །ཡང་ན་རྒྱུ་ཡི་ནང་ཞུགས་དང་།  །ཡང་ན་མིག་བཙུམ་གྱུར་པའམ།  །ཡང་ན་སྐུ་གཟུགས་ལ་བལྟས་ཏེ།  །རྒྱལ་བའི་ཚོགས་ལ་རྣམ་གཏད་ནས།  །སྟོང་ཕྲག་ལྔར་ནི་སངས་རྒྱས་ཀྱི།  །སྙིང་པོ་རབ་ཏུ་བཟླས་པར་བྱ།  །དཀར་པོའི་བརྒྱད་དང་བཅོ་ལྔ་ལ།  །དག་པའི་བདག་ཉིད་བྱས་ནས་ཀྱང་།  །རྒྱ་ཆེན་མཆོད་པ་སྔོན་འགྲོ་བས།  །བཟླས་བརྗོད་བརྟན་པ་བྱས་ནས་ནི། །སྡིག་པ་ཐམས་ཅད་རྣམ་དག་པར།  །རྒྱལ་བ་དམ་པས་གསུངས་པས་ན།  །ཐེ་ཚོམ་དང་ནི་བྲལ་འགྱུར་བས།  །སྔགས་པས་རྟག་ཏུ་སྤྱད་པར་བྱ།  །མཚན་མོ་མི་ཉལ་རྣལ་འབྱོར་གྱིས།  །མཁའ་ལ་རྒྱལ་བའི་ཚོགས་དམིགས་ཏེ།  །ཕུང་པོ་གསུམ་པའི་མདོ་སྡེ་དག  །གལ་ཏེ་ཆོ་ག་བཞིན་སྤྱད་ན།  །ཁ་ན་མ་ཐོ་སྦོམ་པོ་ཡང་།  །ཟླ་བ་གསུམ་གྱིས་རྣམ་དག་པར།  །ཐུབ་པས་གསུངས་པ་ཤེས་བྱས་ཏེ།  །དད་པ་ཡིས་ནི་ཀུན་ཏུ་སྤྱད།  །སངས་རྒྱས་ཀུན་གྱི་སྐུ་གཅིག་པོ།  །པད་དཀར་ཟླ་བའི་དབུས་གནས་ཤིང་།  །རྡོ་རྗེ་དྲིལ་བུས་རྒྱན་སྤྲས་པའི།  །རྡོ་རྗེ་སེམས་དཔའ་ལེགས་དམིགས་ཤིང་།  །ཡི་གེ་བརྒྱ་པ་ཆོ་ག་བཞིན།  །ཉི་ཤུ་རྩ་ནི་རེ་རེ་བཟླས།  །ལྟུང་སོགས་བྱིན་གྱིས་བརླབས་གྱུར་པ།  །འཕེལ་བ་རུ་ནི་མི་འགྱུར་ཞེས།  །གྲུབ་པ་མཆོག་རྣམས་ཀྱིས་བཤད་པས།  །ཐུན་མཚམས་སུ་ནི་སྤྱད་པར་བྱ། །འབུམ་ཕྲག་ཏུ་ནི་བཟླས་གྱུར་ན།  །རྣམ་པར་དག་པའི་བདག་ཉིད་འགྱུར།  །རང་ཉིད་ལྷ་ཡི་རྣལ་འབྱོར་གྱིས།  །དག་པའི་བླ་མ་བསྟེན་བྱས་ཏེ།  །སྐུ་དང་གསུང་ཐུགས་རྒྱལ་བ་ཡི།  །རྡོ་རྗེ་བཟླས་པ་ཉེར་གནས་ན།  །རྣམ་དག་ལམ་གྱི་རང་བཞིན་འགྱུར།  །སེམས་ངལ་སོས་ནས་རང་གི་ལུས།  །བདག་པོའི་རང་བཞིན་གནས་བྱས་ཏེ།  །འཁོར་ལོ་དྲུག་གམ་བཞི་གཅིག་གཉིས།  །ཆར་བྱ་རྐྱང་པའི་གནས་ཉིད་ལས།  །བདེ་སོགས་རྣམ་པར་ཡང་དག་གནས།  །དག་པ་ལ་དམིགས་དག་པར་འགྱུར།  །རྡོ་རྗེ་འཁོར་ལོ་རིན་ཆེན་དང་།  །རལ་གྲི་ཕྲ་བའི་བདག་ཉིད་བསམ།  །སེམས་བརྟན་ཚུལ་ལ་གནས་བྱས་ན།  །སྡུག་བསྔལ་བསྐྱེད་རྩ་ཀུན་ལས་གྲོལ།  །མདོར་ན་ལུས་ངག་སྤྱོད་པ་ཀུན།  །རབ་ཏུ་བསྒྲིམས་དང་ལྡན་པ་ཡིས།  །གཉེན་པོའི་སྡོམ་པ་ལ་སེམས་ཤིང་།  །མཆོད་སོགས་རྣལ་འབྱོར་ཚུལ་ལྡན་ན། །ཉེས་པ་ཀུན་དང་རྣམ་བྲལ་ཞིང་།  །དཔའ་བོས་ལམ་ནི་རྫོགས་པར་བྱེད།  །རྟག་ཏུ་བར་མེད་པར་གནས་ན།  །ཉེས་པ་ཆུང་ངུ་ཕྲ་མོ་ཡང་།  །སྦྲུལ་གྱི་མཆེ་བས་བཏབ་བཞིན་དུ། །ལུས་ངག་སེམས་ནི་ཉམས་པར་བྱེད།  །དེ་ཡི་དབང་གིས་སྡུག་བསྔལ་དང་།  །འཚོ་བ་དག་ནི་འབྱུང་འགྱུར་ཞིང་།  །ལམ་ལས་ཉམས་པ་ཉིད་དུ་འགྱུར།  །དེ་བས་རྡོ་རྗེ་སློབ་དཔོན་ནས་བརྩམས་ཏེ་རིམ་གྱིས་ལྕི་བ་རྣམས་ཤེས་པར་བྱ་ཞིང་དྲི་མ་ལས་ལྡང་བར་བྱའོ། །ལས་ཀྱི་དཀྱིལ་འཁོར་གཅིག་ཏུ་ཞུགས་པ་ལ་སོགས་པའི་ཉེས་པ་ཕྲ་བའི་ཕྲ་བ་རྣམས་ཀྱང་རྣལ་འབྱོར་པས་ཡལ་བར་དོར་བར་མི་བྱའོ།  །ཞེས་དང་།  བར་འདིར།  དྲང་སྲོང་བི་ཤྭ་མི་ཏྲ་སོགས་དང་།  བྲམ་ཟེ་སྟོང་ཉིད་བློ་སོགས་ཀྱིས་བསྐྱེད་རྫོགས་ཐབས་ཤེས་ཕྱོགས་རེ་ལ་བསྔགས་པ་རྣམ་བཀག་ནས།  གཉིས་ཀ་སྒྲུབ་པའི་འཕྲོས་དོན་མང་ཙམ་འདུག་སྟེ།  དག་པའི་ཆོ་ག་རྣམ་པར་ཕྱེ་བ་སྟེ་གསུམ་པ་ལས་སོ།  །སྡིག་པ་ཐམས་ཅད་རྣམ་དག་ཅིང་། །རྒྱ་ཆེར་འབྲས་ལ་ཉེར་སྦྱོར་བ།  །རྣལ་འབྱོར་སྤྱོད་པའི་མཆོག་རིམ་དག  །ཉ་སོགས་བརྒྱད་ལ་རབ་ཏུ་སྤྱད།  །ཅེས་དང་།  དཔའ་བོ་རྣམས་ཀྱིས་ལོངས་སྤྱོད་ཕྱིར།  །སྐྱེས་པའི་ཐོད་པ་ཆ་གཅིག་པར།  །མ་དཱ་ན་ནི་རབ་ཏུ་བརྟག  །དཔའ་བོ་རྣམས་ཀྱིས་ལོངས་སྤྱོད་ཕྱིར།  །གཡས་པ་རྩེ་གསུམ་ཕྱག་རྒྱ་ཡིས།  །ཤ་ཆེན་པོ་ནི་ལེགས་བཟུང་སྟེ།  །གཡས་གཡོན་སྟེང་འོག་ཏུ་བྱས་ནས།  །ཚིག་འདིས་དམ་ཚིག་རབ་ཏུ་བརྟག  །གཟིགས་ཤིག་མཛེས་ལྡན་དམ་པའི་ཆོས།  །འདི་ལ་ཐེ་ཚོམ་མི་བྱ་སྟེ།  །བྲམ་ཟེ་ཁྱི་དང་གདོལ་པ་རྣམས། །རང་བཞིན་གཅིག་ཏུ་རྟོགས་ལ་ཟོ།  །སྐུ་གསུང་ཐུགས་ཀྱི་ཡི་གེ་ལས།  །སོ་སོ་རུ་ནི་མངོན་བརྗོད་ནས།  ཨ་ལ་ལ་ཧོ་མཐར་སྭཱ་ཧཱ།  །དཔའ་བོ་བསམ་གཏན་བརྟན་འཛིན་ཅིང་། །པདྨའི་སྐོར་བ་སྔོན་འགྲོ་བས།  །གཡས་གཡོན་སྟེང་འོག་བྱས་ནས་ནི།  །ཚིག་འདི་ཡིས་ནི་བླང་བར་བྱ།  །འདོད་ཆགས་དྲི་མ་བྲལ་བ་ཡི།  །རིན་ཐང་མེད་པ་ལེགས་འོངས་ཆོས། །གཟུང་དང་འཛིན་པ་རྣམ་སྤངས་པ།  །དེ་ཁོ་ན་ལ་ཕྱག་འཚལ་ལོ།  །འབྲུ་གསུམ་པོ་ནི་མངོན་བརྗོད་ཅིང་།  །གཙོ་བོས་གནང་བ་བྱིན་ནས་ནི།  །དཔའ་བོ་རྣལ་འབྱོར་མ་རྣམས་ཀྱིས།  །རང་གི་ལོངས་སྤྱོད་གང་ཡིན་པ།  །སོ་སོར་རབ་ཏུ་སྤྱད་བྱས་ནས།  །དེ་ནས་ཀུན་ལ་ཐུན་མོང་ངོ་།  །ཆང་ནི་དཔའ་མོས་མ་སྤྱད་པར།  །དཔའ་བོ་ལ་ནི་སྐལ་མེད་དེ།  །ཤ་ལ་དེ་བཞིན་དཔའ་བོས་སོ།  །ཞེས་དང་།   བླ་མས་རྗེས་སུ་གནང་མིན་པར།  །གླུ་དང་གར་སོགས་མི་བྱའོ།  །ཇི་ལྟར་མཆོད་དང་ལོངས་སྤྱོད་དག  །ཚིམ་པ་རུ་ནི་མ་བྱས་པར། །བྲེ་མོའི་གཏམ་དང་འདུ་འཛིའི་སེམས།  །རྣམ་པ་ཀུན་ཏུ་མི་བྱ་སྟེ།  །བྱས་ན་དམྱལ་སོགས་འབྲས་ཐོབ་འགྱུར།  །འཚོད་ཚེ་གཤུང་དང་ངུ་འབོད་དེ།  །སྲེད་པས་ཡི་དྭགས་ངེས་པར་འགྱུར།  །རང་གི་བསམ་གཏན་བྲལ་གྱུར་ན།  །དུད་འགྲོའི་གནས་སུ་ལྟུང་ཕྱིར་དང་། །བསམ་པ་རབ་ཏུ་བརྟན་པ་ཡིས།  །སྐུ་གསུང་ཐུགས་ཀྱི་རྡོ་རྗེ་དང་།  །ས་གསུམ་པོ་ནི་རབ་ཏུ་མཆོད།  །ཞེས་དང་།   རི་དང་ཉི་ཟླ་གླིང་བཞི་པོ།  །བཛྲ་རེ་ཁེ་ཧཱུྃ་བརྗོད་ནས།  །དག་པའི་སེམས་ཀྱིས་དབུལ་བར་བྱ།  །ཞེས་དང་།  དཔའ་མོ་མཆོག་གི་སེམས་དམིགས་ནས། །རང་གི་ལྷ་ཡི་བསམ་གཏན་གྱིས།  །ས་ནི་སྐྱོན་དང་བྲལ་གྱུར་པ།  །བརྐོས་ཏེ་རབ་ཏུ་སྤྱད་པར་བྱ།  །རིན་ཆེན་དྲི་ཡི་ཆུར་བཅས་པས།  །གོང་བུ་དག་གི་སྔོན་བྱས་ནས།  །སྔགས་འདིས་བྱིན་གྱིས་བརླབ་པར་བྱ།  ན་མོ་བྷ་ག་ཝ་ཏེ་བཻ་རོ་ཙཱ་ན་པྲ་བྷཱ་རཱ་ཛཱ་ཡ།  ཏ་ཐཱ་ག་ཏཱ་ཡ།  ཨརྷ་ཏེ་སམྱཀྶཾ་བུདྡྷཱ་ཡ།  ཏདྱ་ཐཱ།  ཨོཾ་སཱུཀྵྨེ་སཱུཀྵྨེ་ས་མེ་ས་མེ།  ཤཱནྟི་དཱནྟེ་ཨ་ས་མཱ་རོ་བེ།  ཨ་ནཱ་ལམྦེ།  ཏ་རམྦེ་ཡ་ཤོ་བ་ཏི་མ་ཧཱ་ཏེ་ཛ་ནི་རཱ་ཀུ་ལེ།  ནིརྦཱ་ཎེ་སརྦ་ཏ་ཐཱ་ག་ཏ་ཧྲྀ་ད་ཡ།  ཨདྷི ཥྛཱ་ན།  ཨ་དྷི་ཥྛཱ་ཏེ་སྭཱ་ཧཱ།  ཉི་ཤུ་རྩ་གཅིག་མངོན་བརྗོད་པས།  །སྐུ་ཡི་དེ་ཉིད་རབ་དྲན་བྱ།  །དེ་ནས་དུམ་བུ་ཅི་རིགས་པར།  །ཆོས་གང་རྒྱུས་འབྱུང་སོགས་བརྗོད་ནས། །རྒྱས་ནི་རབ་ཏུ་གདབ་པར་བྱ།  །དེ་ནས་མགོན་པོ་རྣམ་སྣང་གསལ།  །གངས་ཆེན་མཚོར་ནི་རབ་དམིགས་ནས།  །མཆོད་དེ་མེ་ཏོག་རབ་ཏུ་དོར།  །འགྲོ་བ་བཟུང་ཕྱིར་གསོལ་བཏབ་ནས།  །རྒྱ་ཆེར་ཡོངས་སུ་བསྔོ་བར་བྱ།  །ཆོས་གང་རྒྱུས་འབྱུང་ལ་སོགས་པ། །ཐམས་ཅད་དུ་ནི་བསྔགས་པར་བྱ།  །དེས་ནི་འགྲོ་བའི་འཚོ་བྱེད་ཅིང་།  །སྡིག་ཀུན་རྣམ་དག་བྱེད་པ་དང་།  །ལས་དང་ཡང་དག་གྲུབ་སྟེར་བའི།  །ལས་ལ་དགའ་དང་ལྡན་པ་ཡིས།  །སྔགས་པས་རྟག་ཏུ་འབད་པར་བྱ།  །ཞེས་དང་།   གཟར་བུ་ལ་སོགས་མི་འབྱོར་ན།  །གཡས་པའི་མཐེ་བོས་མཐའ་མནན་ཏེ།  །གཡོན་གྱི་སོར་མོ་ལྔ་གཞིབས་ནས། །མཆོད་སྦྱིན་རབ་སྤྱད་དེ་ནས་ནི།  །ཅི་བདེ་བར་ཡང་གསུངས་པ་ཉིད།  །ཅེས་དང་།  འཁོར་བའི་རྒྱ་མཚོ་སྲིད་པའི་རྦ་རླབས་དྲག་པོ་དང་ལྡན་ཞིང་།  
།ཉོན་མོངས་སྦྲུལ་དང་ཆུ་སྲིན་སོགས་ནི་གདུག་པའི་འཚེ་བར་ལྡན།  །ཚེ་འདི་མི་རྟག་དབང་མེད་རྣམ་རྟོག་རླུང་གིས་གཡོས་མཐོང་ནས།  །དཔལ་འབྱུང་འཆི་མེད་དམ་པའི་ཆོས་ལ་འབད་པས་ཉེར་གནས་ཀྱིས།  །ཞེས་གསུངས་ཤིང་།  འདིར་བླ་མ་དང་སློབ་མའི་མཚན་ཉིད་བསྟེན་ཚུལ་སོགས་ཀྱང་རྒྱས་པར་ཡོད་དོ།།    །།  ༈

སློབ་དཔོན་ཨ་བྷ་ཡཱ་ཀ་རས་མཛད་པའི་ཚོགས་ཀྱི་འཁོར་ལོའི་ཆོ་གར།  །སྔགས་པས་ཁྱད་པར་མཚན་མོའི་དུས།  །ཞག་རེའམ་ནི་ཇི་སྙེད་པར། །ཟླ་རེ་དང་ནི་ལོ་རེ་ལ།  །འཁོར་ལོ་ལས་འདས་ཉམས་པར་འགྱུར།  །ཞེས་དང་།  ཉེ་བར་འཚེ་མེད་དུར་ཁྲོད་དགོན།  །རྫིང་བུའི་འགྲམ་དང་སྐྱེད་མོའི་ཚལ།  །མཚོ་ངོགས་ཆུ་རླུང་རི་སུལ་དང་།  །རང་གི་ཁྱིམ་སོགས་འབྲས་བུར་བཅས།  །ཡན་ལག་བརྒྱད་པ་ཐོབ་གྱུར་པ།  །དཔལ་ལྡན་ཆོག་ཤེས་སྙིང་རྗེ་ལྡན།  །འཇིག་རྟེན་ཆོས་ལ་མི་ཆགས་ཤིང་།  །སྲེད་དང་རྒྱུ་སོགས་རྣམ་པར་སྤངས།  །སྙན་པར་སྨྲ་ཞིང་འཛུམ་པའི་བཞིན།  །བཟོད་ཅན་བརྟན་ལ་བརྩོན་འགྲུས་ལྡན།  །ཚོགས་ཀྱི་འཁོར་ལོའི་དབང་ཕྱུག་ཏུ།  །དཔལ་ལྡན་རྡོ་རྗེ་སེམས་དཔའ་གསུངས།  །འཁོར་ལོ་པ་ཡང་དེ་ཉིད་ཀྱི།  །སློབ་མ་སྲེད་སོགས་རྣམ་པར་སྤངས།  །དབང་བསྐུར་ཐོབ་ཅིང་བློ་ལྡན་བཟོད།  །བརྩོན་དང་དྲན་པ་ལ་སོགས་ལྡན། །དམ་ཚིག་སྤྱད་བྱ་སྤྱོད་པ་རྣམས།  །རྒན་པའི་རིམ་པ་བཞིན་དུ་འདོད།  །དབང་མ་ཐོབ་པས་མི་རིག་པར།  །སྒྲུབ་པོས་འཁོར་ལོ་དེ་བྱའོ།  །ཞེས་དང་།   བླ་མའི་ཆོ་ག་ཤེས་ཤིང་དྲན།  །བརྩོན་འགྲུས་བཟོད་དང་ལྡན་པ་དང་།  །བླ་མ་ལ་གུས་བློ་མཐུན་པ།  །ལས་ཀྱི་རྡོ་རྗེར་དེ་རབ་བསྔགས།  །ཞེས་དང་།   དེ་ནས་རང་ཁ་ཧོམ་ཁུང་དུ།  །རྣམ་རིག་བ་ལའི་མཆོད་ཡོན་བྱ།  །ལག་པ་དགང་གཟར་བླུགས་གཟར་གྱིས། །ཡིད་ཀྱི་མེ་ལ་སྟོབ་སོགས་བསྲེག  །ནང་གི་བདག་ཉིད་སྦྱིན་སྲེག་གིས།  །རང་འདོད་ལྷ་ནི་ཚིམ་པར་བྱ།  །གླུ་སོགས་ཀྱིས་ནི་མཉེས་བྱ་ཞིང་།  །ཡང་དང་ཡང་དུ་བརྡ་ཚིག་སྨྲ།  །ཞེས་དང་།   རྒྱུན་དུ་གླུ་ནི་ལེན་པ་དང་།  །གང་དུ་རྟག་ཏུ་གར་བྱེད་པ།  །ཚོགས་ཀྱི་དབང་ཕྱུག་མདུན་བྱའོ། །ཞེས།  ཇི་སྙེད་ལུས་ཀྱི་གཡོ་འགུལ་དང་།  །ངག་གི་བརྗོད་པ་ཇི་སྙེད་ལ།  །དེ་སྙེད་ཕྱག་རྒྱ་སྔགས་ཡིན་ཏེ།  །ཧེ་རུ་ཀ་དཔལ་གོ་འཕང་གནས།  །ཞེས་དང་།  འདི་དང་གཞན་གྱི་རྒྱུད་གསུངས་པའི།  །བྱ་བ་རྣམས་ནི་བརྡ་ལ་བྱ།  །ཞེས་དང་།།    །།  ༈
སློབ་དཔོན་ནག་པོ་པས།   ཚོགས་རྣམས་བསགས་པར་བྱ་བ་དང་།  །བགེགས་རྣམས་ཞི་བར་བྱ་བའི་ཕྱིར།  །བསོད་ནམས་མཐར་ཐུག་ཚོགས་འཁོར་ལོ།  །ཞེས་དང་།  དེ་ནས་རྣལ་འབྱོར་ཕོ་མོ་ཀུན་གྱིས་ལྷའི་དཀྱིལ་འཁོར་དུ་བལྟས་ལ་དང་པོར་དྲིས་མཆོད།  དེ་ནས་མེ་ཏོག་དང་།  བདུག་པ་དང་།  མར་མེས་ཚུལ་བཞིན་དུ་མཆོད།  ཅེས་སོ།།    །།  ༈
 པཎྜིཏ་བཟང་པོས་བྱིན་པས།  དང་པོར་འབྱུང་པོའི་གཏོར་མ་བཏང་།  དེ་ནས་རིམ་བཞིན་བཞུགས་སུ་གསོལ།  ཞེས་དང་།  རྟག་ཏུ་བྱའམ་ཟླ་བར་རམ།  །ཡང་ན་ལོ་རེ་ན་ནི་བྱ།  །ལོངས་སྤྱོད་མཆོག་དང་ལྡན་པ་ལ།  །ཚོགས་ཀྱི་འཁོར་ལོ་མཆོད་པར་བྱ།  །ཞེས་དང་།  དེ་ལྟར་ཕྱི་ཡིས་མཆོད་བྱས་ནས།  །ནང་གི་མཆོད་པ་དག་ནི་བྱ།  །པདྨ་ལྟ་བུར་རང་གི་ཁ།  །ཧོམ་ཁུང་ཉིད་དུ་བསམས་བྱས་ལ།  །དགང་གཟར་བཀང་བ་བླུགས་པར་བྱ།  །ལག་པ་བླུགས་གཟར་དག་གིས་ཀྱང་།  །མཆོད་རྫས་ཡང་དག་དབུལ་བར་བྱ།  །ཞེས་དང་།  གར་ལ་སོགས་པའི་རོལ་མོ་རྣམས།  །གནང་བ་མེད་པར་མི་བྱའོ།  །ཞེས་དང་།  འཐབ་མོ་ལ་སོགས་སེམས་ཀྱིས་ཀྱང་།  །ངེས་པ་རུ་ནི་བསམ་མི་བྱ།  །ཞེས་དང་།  ལྷག་མ་ཐམས་ཅད་བསྡུས་ནས་ནི།  །ཕྱི་རོལ་ཏུ་ནི་གཏོར་མ་བཏང་།  །ཞེས་སོགས་གསུངས་སོ།།    །།  ༈ 

སློབ་དཔོན་རཏྣ་རཀྵི་ཏས་མཛད་པའི་ཚོགས་ཀྱི་འཁོར་ལོའི་ཆོ་ག་ཡིད་བཞིན་ནོར་བུ་ལས།   དམ་ཚིག་ཉམས་པའི་སྐྱོན་སེལ་བའི།  །མི་མཐུན་ཕྱོགས་རྣམས་འཇོམས་བྱེད་པ།  །འདོད་པའི་དོན་ཀུན་སྒྲུབ་བྱེད་ཅིང་།  །དགེ་བའི་ཚོགས་ལ་འདུད་པ་གང་།  །ཟོས་པས་དངོས་གྲུབ་འགྱུར་བ་ཉིད།  །ལྷག་པའི་ལྷ་ཡང་ཚིམས་པར་འགྱུར།  །ཕྱག་རྒྱ་ཆེན་པོའི་དངོས་གྲུབ་ནི།  །མྱུར་དུ་ལུང་བསྟན་ཐོབ་པར་བྱེད།  །ཚོགས་ཀྱི་འཁོར་ལོའི་ཆོ་ག་ཡིས།  །རིམ་གྱིས་འདོད་པའི་འབྲས་བུ་འབྱིན།  །ཞེས་དང་།  དེ་ལ་མང་དུ་འདུས་པའི་ཚོགས།  །འཁོ༵ར་ལོ༵་ལྷ་ཡི་རིམ་པ་ཉིད།  །ཐུན་མོང་དུས་སུ་བཤད་པ་ཉིད།  །ཁྱད་པར་འདི་ཡིས་ཤེས་པར་བྱ།  །ཐམས་ཅད་དུ་ནི་དམ་ཚིག་གཅིག  །རྟོག་པ་ཐམས་ཅད་ཡོངས་སུ་སྤངས།  །བླ་མ་ལ་གུས་ཏིང་འཛིན་གནས།  །སྦྱིན་སོགས་ཡོན་ཏན་རྒྱན་སྤྲས་པའི། །ཐབས་འདིས་ཚོགས་ཀྱི་འཁོར་ལོ་ལ།  །གེགས་མེད་པར་ནི་རབ་ཏུ་འཇུག  །ཅེས་དང་།  གསང་སྔགས་ཐེག་པའི་ཆོ་ག་འདིར།  །སློབ་དཔོན་རྣམ་པ་གསུམ་ཡིན་ཏེ།  །ཁྱིམ་པ་དགེ་ཚུལ་དགེ་སློང་རྣམས།  །ཐ་མ་འབྲིང་དང་མཆོག་ཅེས་བྱ།  །ཞེས་དང་།  དཀྱིལ་འཁོར་འཁོར་ལོ་འདི་ཉིད་དུ།  །དམ་ཚིག་སྡོམ་པ་མ་གཅིག་ན།  །འཁོར་ལོའི་དབང་ཕྱུག་དེ་ཡིས་ནི།  །རྣལ་འབྱོར་བསྡུ་བར་མི་བྱའོ།  །ཞེས་དང་།  རྣལ་འབྱོར་ཀུན་སྤྱོད་ལ་སོགས་པའི།  །འཁོར་ལོ་སྡོམ་པའི་རྒྱུད་ཀྱིས་ནི།  །ནག་པོའི་ཕྱོགས་དང་དཀར་ཕྱོགས་ཀྱི།  བཅུ་པ་ལ་ནི་དེ་རབ་མཆོད།  །ཡི་དྭགས་ཟླ་ཕྱེད་བཅུ་བཞི་དང་།  །དེ་བཞིན་དུ་ནི་བརྒྱད་པ་ལ།  །དཔལ་ལྡན་དགྱེས་མཛད་རྡོ་རྗེ་མཆོད།  །དུས་ཀྱི་འཁོར་ལོ་ཉ་གཉིས་ལ།  །གསང་བ་འདུས་པ་ཟླ་རེ་བཞིན།  །ལྔ་བརྒྱད་བཅུ་དང་བཅུ་བཞི་དང་།  །དེ་བཞིན་བཅོ་ལྔ་ནག་ཕྱོགས་ལའང་།  །ལྔ་སྟེ་དུས་ནི་བཅུ་རུ་འགྱུར།  །དེ་དག་དུས་ཀྱི་ཁྱད་པར་རོ།  །འདིར་ནི་རྟག་ཏུ་ཕུན་ཚོགས་སམ།  །ཇི་ལྟར་འདོད་ཅིང་ཇི་ལྟར་ནུས།  །གྲུབ་པར་ནུས་ན་ཉིན་རེའམ།  ལོ་ཟླ་ཀུན་ཏུ་བྱ་བའོ།  །གནས་ནི་དབེན་པར་གསང་བ་ཡི།  །འཁོར་ལོ་ཀུན་ཏུ་བྱ་བའོ།  །ཞེས་དང་།  དེ་ནས་རང་གི་ལྟེ་བར་ནི།  །གང་ཞིག་དགོས་པའི་དབྱེ་བ་ཡིས། །ལྷ་ཡི་འཁོར་ལོ་གནས་པར་བསམ།  །རང་གི་ལག་པ་གཡས་དང་གཡོན།  །བླུགས་གཟར་དགང་གཟར་རང་གཟུགས་ཉིད།  །ལྟེ་བའི་ལྷ་ལ་མཆོད་པའི་ཚུལ།  །ལོངས་སྤྱོད་ཚོགས་ཀྱིས་མཆོད་པར་བྱ།  །ཞེས་དང་།  ཡང་བརྟག་གཉིས་ལས་དྲངས་པ།   གླུ་ནི་རྣམ་དག་སྔགས་སུ་བཤད།  །གར་ནི་སྡོམ་པར་བྱེད་པ་ཉིད།  །དེ་ཡི་ཕྱིར་ན་གླུ་དང་གར།  །རྣལ་འབྱོར་པ་ཡིས་རྒྱུན་དུ་བྱ།  །ཞེས་དང་།  གྲུབ་ཐོབ་བླ་མས་གསུངས་པའི་དབྱངས།  །སྟོང་པ་སྙིང་རྗེ་དབྱེར་མེད་པར།  །དོན་སྟོན་རྡོ་རྗེའི་གླུ་ཉིད་དོ།  །ཞེས་དང་།  དེ་ནས་དཀྱིལ་འཁོར་སྡུད་པ་ན།  །ལྷག་པའི་གཏོར་མ་སྦྱིན་པར་བྱ།  །ཞེས་དང་།  གང་ཞིག་འདི་རྣམས་ཐམས་ཅད་ལ།  །དཔའ་བོ་རྐྱང་པའི་བྱ་བ་ནི།  །དཔའ་བོའི་སྟོན་མོ་ཞེས་སུ་བརྗོད། །ཚོགས་ཀྱི་དབང་ཕྱུག་དེ་ལྟ་མིན།  །དེ་བཞིན་དཔའ་མོ་རྐྱང་པ་ལ།  །དཔའ་མོའི་དབང་ཕྱུག་སྟོན་མོ་ཉིད།  །དེ་ལྟར་འཁོར་ལོའི་དབང་ཕྱུག་ལ།  །ཤེས་རབ་ཐབས་དང་བཅས་པ་ཉིད།  །ཅེས་སོགས་གསུངས་ཏེ་དགེ་སློང་གྲུབ་དབང་དཔལ་བཟང་པོས་བསྒྱུར་བར་སྣང་སྟེ་དོན་ཅུང་ཟད་རྒྱས་པར་ཡོད་དོ།།    །།  ༈

སྐུ་གསུང་ཐུགས་རབ་ཏུ་གནས་པའི་ཆོ་ག་དཔལ་དཱི་པཾ་ཀཱ་རས་མཛད་པ་ལས།  སློབ་དཔོན་དེ་ཉིད་བཅུ་ཤེས་ཤིང་།  །མཚན་ཉིད་ཀུན་དང་ཡང་དག་ལྡན།  །ཕྱག་རྒྱ་སྔགས་དང་ཆོ་ག་ཤེས།  །ལས་རྣམས་ཀུན་ལ་མཁས་པ་སྟེ།  །དམ་སྡོམ་བྱང་ཆུབ་སེམས་འབྱོངས་པས།  །བསྙེན་པ་རྣམ་གསུམ་རྫོགས་བྱས་ལ།  །དེ་དང་འདྲ་བའི་གྲོགས་བཅས་ཀྱིས།  །དུས་ཟླ་གཟའ་སྐར་ཚེས་གྲངས་ནི།  །ཉི་མའི་ཁྱིམ་ནི་བཅུ་གཉིས་ཏེ།  །དགུན་དཔྱིད་ར་འབྲིང་རོ་ཧི་ཏའི། །དབུས་སུ་ཉི་མ་ལོག་ནས་ནི།  །བྱང་འགྲོ་ཟླ་དྲུག་ཉིན་མོ་འཕེལ།  །དེ་དྲུག་ཞི་བར་རབ་གནས་ཤིས།  །དབྱར་སྟོན་ར་འབྲིང་ཟླ་དྲུག་ལྷོར།  །ནག་འཕེལ་དྲག་ཉི་དེར་མི་བརྩམས།  །ཞེས་དང་།  ཕུར་བུ་ལག་པ་པ་ཝ་སངས།  །ཟླ་བ་བཟང་ལྡན་གཟའ་དེ་ཤིས། །ཉི་སྤེན་དམག་དཔོན་ནོར་འཇོམས་ངན།  །ཆུ་སྨད་སྣར་མ་གྲོ་བཞིན་དང་།  །ལག་དང་སྣྲོན་སྣྲུབས་རྒྱལ་ཆུ་སྟོད། །ཁྲུམས་སྨད་སྐྱེ་དགུ་འཕེལ་བ་དང་།  །རབ་ཏུ་གནས་པའི་མཆོག་ཏུ་བྱེད།  །ཡིད་འདོད་དངོས་གྲུབ་མེ་བཞིན་སྟེ།  །སྣྲུབས་དང་གྲོ་བཞིན་དེ་བཞིན་ཏེ།  །ལག་གིས་སྐལ་བཟང་སྣར་མས་རྒྱལ།  །མགོ་ཡིས་ཉེ་བར་ཞི་བར་བྱེད།  །ཆུ་སྟོད་ཀྱིས་ནི་བུ་དག་གསོན། །ཁྲུམས་སྨད་རྟག་པར་དངོས་གྲུབ་སྟེར།  །རྒྱལ་གྱིས་ཚེ་རིང་བརྟན་པར་འགྱུར།  །སྣྲོན་གྱིས་མཆོག་ཏུ་བདེ་བར་བྱེད།  །ལྷ་མཚམས་ཀྱིས་ནི་མཆོག་སྟེར་འགྱུར།  །གཟའ་དང་སྐར་མ་དེ་དག་ཀྱང་།  །དར་གུད་མི་རིགས་ལས་དང་སྦྱར།  །ཚེས་གཅིག་གསུམ་ལྔ་དྲུག་བདུན་བཅུ།  །དྲུག་མོ་ནོར་འཇོམས་སྤང་གཞན་ཤིས།  །གཟའ་སྐར་ཚེས་གྲངས་མཐུན་འཛོམས་ན།  །མར་གྱི་ངོ་ལའང་བྱ་བར་ཤིས། །གནམ་སྟོང་བཅུ་བཞི་ཀུན་ཏུ་སྤང་།  །ཟླ་བ་གཟའ་དང་སྐར་མ་དང་།  །ཉི་མ་དུས་འཛོམས་སྐད་ཅིག་ལ།  །ཇི་སྐད་གསུངས་པ་བཞིན་བྱས་ན།  །བསམ་པ་ཐམས་ཅད་ཡོངས་རྫོགས་ཤིང་།  །རབ་ཏུ་གནས་པ་མཆོག་འགྱུར་ཏེ།  །འཁོར་ལོས་བསྒྱུར་བའི་དབང་ཕྱུག་ནི།  །ཐོབ་འགྱུར་འདི་ལ་ཐེ་ཚོམ་མེད།  །ཅེས་དང་།  དང་པོའི་ལས་ཅན་མ་འབྱོངས་པ།  །འཇིག་རྟེན་ཀུན་རྫོབ་ཐ་སྙད་དུ།  །འགྲོ་བས་དེ་ཉིད་མི་ཤིས་ལ།  །སྟོན་པས་རབ་ཏུ་གནས་པར་བཤད།  །དབྱེ་བ་སྒྲ་དོན་སྐྱོན་ཡོན་ལས།  །བྱ་བའི་ཐབས་དང་རྣམ་པ་དྲུག  །དོན་དམ་སྤྲོས་མེད་རབ་གནས་དང་།  །ཀུན་རྫོབ་སྐུ་གསུང་ཐུགས་གསུམ་སྟེ།  །ཡོན་ཏན་ཕྲིན་ལས་ཞོར་ལ་འབྱུང་།  །དམ་ཚིག་སེམས་དཔའ་སྤྱོད་བསྐྱེད་ལ།  །ཡེ་ཤེས་སེམས་དཔའ་ཡུན་རིང་དུ།  །གནས་པའི་ཕྱིར་ན་རབ་ཏུ་གནས།  །བྱིན་མ་བརླབས་པར་རིང་གནས་ན།  །དེ་ལ་བཀྲ་མི་ཤིས་འབྱུང་ཞིང་།  །དེ་སྲིད་མཆོད་པར་དེ་མི་འོས།  ཞེས་དང་།  རྟེན་འདི་མཐོང་བའི་སྐྱེ་བོ་ཡིས།  །བསོད་ནམས་ཐོབ་པ་དོན་ཡོད་པ།  །བསྐལ་པ་བྱེ་བ་རྣམས་སུ་ཡང་།  །བརྗོད་པར་ཡང་ནི་མི་ནུས་སོ།  །ལས་ནི་ཡོན་བདག་བསོད་ནམས་སྤེལ།  །སྔགས་པས་དགེ་བ་རྙེད་པར་བྱེད།  །དེ་བཞིན་སློབ་དཔོན་སྔགས་གནས་པས། །ཆོས་ལྡན་མཆོད་པ་བྱེད་པ་གང་།  །དེ་ཡིས་སྐྱེ་བར་མཆོད་པར་འགྱུར།  །བྱ་ཐབས་ཆོ་ག་དག་ལས་བྱ།  །ཆོ་ག་དམན་གནས་བཀྲ་མི་ཤིས།  །འདིར་སྡུག་ཕ་རོལ་འཇིགས་པ་ཆེ།  །དངོས་གྲུབ་འདོད་པས་ཆོ་གར་འབད།  །ཆོ་གའི་ཚུལ་ལེགས་བསོད་ནམས་ནི། །མཐོང་དང་མི་མཐོང་རྣམས་སུ་སྐྱེ།  །སྐུ་གཟུགས་སྔགས་ཀྱི་མཚན་ཉིད་ཀྱིས།  །རྟེན་ལ་བྱིན་རླབས་འཇུག་པར་འགྱུར།  །གང་ཟག་བློ་རིགས་ཐ་དད་པས།  །ཡོན་མཆོད་འབྱོར་ཚོགས་ཚོགས་པ་ཡིས།  །རབ་གནས་རྒྱས་པ་སྤྲོས་བཅས་བྱ།  །འབྲིང་པོ་ཆོ་ག་ཚང་ཙམ་དང་།  །བསྡུས་པ་ཏིང་འཛིན་ཐུན་གཅིག་ལ།  །རྡུལ་ཚོན་ལ་སོགས་དགོས་མི་བྱ།  །ཞེས་དང་།  སྙིགས་མ་ལྔ་ཡི་དུས་འདི་རུ།  །མཆོག་གི་སྐུ་དང་མཉམ་པ་ཡི།  །སྤྲུལ་པའི་སྐུ་ནི་འདི་ཡིན་གྱིས།  །ཁྱོད་ཀྱིས་མ་ཉམས་སྲུང་མཆོད་གྱིས།  །ཞེས་དང་།  སྤྲོས་པ་མི་དགའ་བསྡུས་པ་ནི།  །བསྙེན་པ་ཆོ་ག་སྟ་གོན་དང་། །དཀྱིལ་འཁོར་བྲི་སྒྲུབ་རྟེན་གསར་ལ།  །བགེགས་བསྐྲད་ཡི་གེ་བརྒྱས་བརྟན་པར།  །གོང་བཞིན་སྤྱན་དབྱེ་ལ་སོགས་པ། །ནུབ་གཅིག་ལ་ནི་ཀུན་རྫོགས་བྱ།  །མངའ་གསོལ་རྒྱས་པར་མ་གྲུབ་ཀྱང་།  །འདིར་ནི་ཉེས་པ་མི་འབྱུང་ངོ་།  །ཞེས་དང་།  ཤིན་ཏུ་བསྡུས་པའི་རབ་གནས་ནི།  །གཟའ་སྐར་ཚེས་གྲངས་མི་བརྩི་སྟེ།  །རྡུལ་ཚོན་མི་བརྟེན་ཐུན་གཅིག་ལ།  །དཀྱིལ་འཁོར་བསྒོམས་ཏེ་བརྒྱ་རྩ་བསྙེན།  །བགེགས་བསྐྲད་བཀྲུ་སོགས་གོང་ལྟར་བྱ།  །བསྐྱེད་དེ་སྤྱན་དྲངས་སྐུ་གསུང་ཐུགས།  །བྱིན་གྱིས་རླབས་དང་དབང་བསྐུར་བ།  །སྙིང་གའི་ས་བོན་འོད་ཀྱིས་ནི།  །འོག་མིན་རིགས་ལྔའི་ཐུགས་ཀ་ནས།  །བཀྲ་ཤིས་ལྷ་མོ་བུམ་རོལ་བཅས།  །དབང་བསྐུར་རིགས་བདག་རྒྱས་གདབ་བསམ།  །རྟེན་འབྲེལ་སྙིང་པོ་བརྒྱ་རྩ་རེས།  །དྲི་དང་མེ་ཏོག་གཏོར་བྱུགས་ཏེ།  །རང་རང་ལྷ་ལ་ཆོས་སྐུར་ཐིམ།  །བསམས་ལ་རྡོ་རྗེས་མཆོད་བསྟོད་བྱ།  །རྗེས་སོགས་སྤྱི་དང་མཐུན་པར་སྤྱད།  །ཅེས་སོགས་ཆོ་གའི་འགྲོས་རྒྱས་འབྲིང་བསྡུས་པའི་ཚུལ་ཞིབ་ཏུ་གསལ་བར་སྣང་ངོ་།  །སརྦ་ཤུབྷཾ།།    །།  ༈

སློབ་དཔོན་རཏྣཱ་ཀ་རའི་དབང་བསྐུར་བསྟན་པ་ལས།  དེ་ལྟར་༢འདིར་ཡང་སྐུ་གསུམ་པོའི་ངོ་བོ་ཉིད་བསྒྲུབ་པར་བྱ་བ་ཡིན་པས།  བསྒྲུབ་བྱ་ཇི་ལྟ་བ་དེ་ལྟ་བུའི་དེ་བཞིན་གཤེགས་པ་ཐམས་ཅད་ཀྱི་བརྡར་བྱས་པའི་ཕྱག་རྒྱས་བརྡ་ཇི་ལྟ་བ་བཞིན་དུ་མཚོན་པར་བྱ་བ་ཡིན་ནོ།  །ཇི་ལྟར་མཚོན་ཞེ་ན།  དེ་ལྟ་བས་ན་ཤེས་རབ་ཀྱི་དབང་བསྐུར་གྱི་དུས་སུ་རྡོ་རྗེ་ནོར་བུའི་རྩེ་མོར་ཕྱིན་པའི་བྱང་ཆུབ་སེམས་ཡུལ་དེ་ཉིད་དུ་མན་ངག་ཇི་ལྟ་བ་ཉིད་དང།  ཕྱོགས་གཉིས་པ་ནས་བསྟན་པའི་རིགས་པས་བསྟན་པར་བྱས་པའི་བྱང་ཆུབ་ཀྱི་སེམས་དེ་དང་ལྷན་ཅིག་སྐྱེས་པར་གྱུར་པ་གང་ཡིན་པ་རང་དང་གཞན་གྱི་སྣང་བའི་བྱེ་བྲག་དང་བྲལ་བ།  མཆོག་ཏུ་བདེ་བ་ཆེན་པོ་ཙམ་དུ་རབ་ཏུ་སྣང་བ་དང་།  གཉིས་སུ་མེད་པར་ཤེས་བྱ་ཐམས་ཅད་ནུབ་པར་གྱུར་པ་དག་གི་རྣམ་པར་རྟོག་པ་ལས་ཤིན་ཏུ་འདས་པའི་ངོ་བོ་རང་རིག་པ་དེར་བཏད་པ་མཐར་ཕྱིན་པ།  ནམ་མཁའ་དྲི་མ་མེད་པ་ལྟ་བུའི་ཡིད་མཆོག་ཏུ་གྱུར་པའི་བདེ་བ་ཉམས་སུ་མྱོང་བར་གྱུར་པ་དེ་ནི་ཆོས་སྐུའི་མཚན་ཉིད་དོ།  །དེ་ཡང་།  ཇི་སྲིད་རྣལ་འབྱོར་བྱང་ཆུབ་སེམས།  །གཏོང་བར་བྱེད་པ་མ་ཡིན་པ།  །དེ་སྲིད་ཀུན་དགའ་ལས་བྱུང་བདེ།  །ཅི་ཡང་རྒྱུན་མི་འཆད་པ་ཐོབ།  །ཅེས་གསུངས་སོ།  །གང་རྡོ་རྗེའི་ནང་གཡོ་བར་གྱུར་པའི་བྱང་ཆུབ་ཀྱི་སེམས་རེག་པ་ལས་བྱུང་བའི་ཡུལ་ངེས་པ་མེད་ན་ཡང་དམིགས་པའི་དབང་གིས་ཡུལ་སོ་སོར་ངེས་པ་ལྟ་བུར་ཁ་ཕྱིར་བལྟས་པའི་བདེ་བའི་རྣམ་པ་བྱང་ཆུབ་ཀྱི་སེམས་ལ་ལོངས་སྤྱོད་པའི་ཡེ་ཤེས་ནི་ཉམས་སུ་མྱོང་བ་དང་ལྡན་པས་དེ་ནི་ལོངས་སྤྱོད་རྫོགས་པའི་སྐུའི་མཚན་ཉིད་དོ།  །གང་ཡང་ཤེས་རབ་ཀྱི་པདྨའི་ནང་དུ་སྤྲོས་པའི་བྱང་ཆུབ་ཀྱི་སེམས་དེ་ལོངས་སྤྱོད་དུ་བྱས་པས་དེ་ཡོངས་སུ་མཉེས་པར་གྱུར་པས་ན་རྡོ་རྗེ་ནོར་བུས་ཉམས་སུ་མྱོང་བ་དང་ལྡན་པས་དེ་ནི་ལོངས་སྤྱོད་རྫོགས་པའི་སྐུའི་མཚན་ཉིད་དོ།  །གང་ཡང་ཤེས་རབ་ཀྱི་པདྨའི་ནང་དུ་སྤྲོས་པའི་བྱང་ཆུབ་ཀྱི་སེམས་དེ་ལོངས་སྤྱོད་དུ་བྱས་པས་དེ་ཡོངས་སུ་མཉེས་པར་གྱུར་པས་ན་རྡོ་རྗེ་ནོར་བུས་ཉམས་སུ་མྱོང་བ་དེ་ནི་སྤྲུལ་པའི་སྐུའི་མཚན་ཉིད་དོ།  །ཞེས་དང་།  ཕ་རོལ་ཏུ་ཕྱིན་པའི་ཐེག་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་ལས་ཀྱང་གཉིས་སུ་མེད་པ་ཉིད་བསྒྲུབ་བྱ་ཉིད་དུ་གསུངས་པའི་ཕྱིར།  ཐེག་པའི་ཁྱད་པར་ལ་ཡང་དེ་ཁོ་ན་ཉིད་ཀྱི་ཁྱད་པར་ནི་ཡོད་པ་མ་ཡིན་ཏེ།  དེ་ཁོ་ན་ཉིད་མ་ཡིན་པར་ཐལ་བར་འགྱུར་བའི་ཕྱིར་རོ།  །ཞེས་དང་།  དེའི་དོན་ནི་འདི་ཡིན་ཏེ།  ཤེས་རབ་ཡེ་ཤེས་གང་ཡིན་པ་དེ་ཉིད་བཞི་པ་དང་སྒྲུབ་པ་ཆེན་པོ་ཞེས་བྱ་བའི་དོན་ཏེ།  དེ་ཉིད་ཀྱིས།  རྡོ་རྗེ་འཆང་ཆེན་པོའི་གོ་འཕང་ཐོབ་པའི་ཕྱིར་རོ།  །ད་ལྟ་ནི་དེ་ཡི་གོ་འཕང་མཚོན་པར་བྱེད་པ་དེ་ཉིད་ཤེས་རབ་ཡེ་ཤེས་ལ་བཞི་པར་བྱ་ཞིང་།  །བཞི་པ་ཞེས་བྱའི་སྒྲས་བརྗོད་པར་བྱ་སྟེ།  སྒྲུབ་པ་ཆེན་པོ་ཞེས་བྱ་བའི་དོན་ཏོ།  །ཞེས་གསུངས།  ཡང་།  རྡོ་རྗེ་རིགས་ཀྱི་ལེའུ་ལས་འདོད་པའི་དབང་བསྐུར་བ་རྣམ་པ་བཞི་ཡང་ཤེས་རབ་ཡེ་ཤེས་ཀྱི་དགོངས་པ་ཉིད་ལ་སྦྱོར་བར་བྱེད་དེ།  གང་ཤེས་རབ་དང་ལྷན་ཅིག་ཆགས་པ་དང་།  དགོད་པ་ལ་སོགས་པས་དེ་བཞིན་གཤེགས་པ་ལ་སོགས་པ་ཐམས་ཅད་ལ་མཆོད་པའི་ངོ་བོ་སློབ་དཔོན་གྱི་ལས་ཀྱི་མཚན་ཉིད་ཡིན་པའི་ཕྱིར་སློབ་དཔོན་གྱི་དབང་བསྐུར་བའོ།  །ཤེས་རབ་གང་ལ་ཆགས་པ་དང་བཅས་པས་པདྨ་འབྱེད་ཅིང་མཐོང་བ་དེ་ནི་གསང་བ་ལ་བརྟེན་པ་ཡིན་པའི་ཕྱིར་གསང་བའི་དབང་བསྐུར་བའོ།  །ཤེས་རབ་གང་གི་ཡན་ལག་ཀུན་མཐོང་བ་དེ་ནི་ཤེས་རབ་ལ་བརྟེན་པ་ཡིན་པའི་ཕྱིར་ཤེས་རབ་ཡེ་ཤེས་ཀྱི་དབང་བསྐུར་བའོ།  །གང་གཉིས་ཀའི་བྱ་བ་ལས་བྱུང་བ་དེ་ཁོ་ནའི་མཆོག་ཡང་དག་པར་མཚོན་པ་གཉིས་སུ་མེད་པའི་ཡེ་ཤེས་ནི་བཞི་པ་ཡིན་ནོ་སྙམ་དུ་སེམས་ཏེ།  དེ་ཡང་།  དགོད་པ་དག་པ་སློབ་དཔོན་ཏེ།  དེ་བཞིན་གསང་བ་མཐོང་བ་ཉིད།  །ཡང་དག་ཀུན་ཐོབ་ཤེས་རབ་སྟེ།  །དེ་བཞིན་གཉིས་ཀྱིས་བཙལ་བའོ།  །ཞེས་གསུངས་པའི་ཕྱིར་རོ།  །ཞེས་སོགས་སྣང་སྟེ།   འདིའི་དགོངས་པ་ནི།   གསུམ་པས་དྲངས་པའི་བདེ་བ་ལས་ལོགས་སུ་བཞི་པ་མི་ཕྱེ་བ་སྟེ།  དགོས་པ་ནི།  ཚིག་ཙམ་གྱིས་ངོ་སྤྲོད་པའི་བཞི་པ་དོན་གྱིས་ཡེ་ཤེས་སུ་འདོད་པ་བཀག་སྟེ།  ལམ་དུས་སུ་དཔེ་ཡི་ཡེ་ཤེས་ཕྱག་རྒྱ་ལས་བྱུང་བ་ཉིད་བཞི་པ་བཏགས་པ་བ་དང་།  དངོས་ནི་མི་སློབ་པའི་བྲལ་འབྲས་སུ་སྐྱེ་བར་དགོངས་པར་མངོན་ནོ།  །གཞུང་འདིར་སྐུ་གསུམ་དུ་ཡེ་ཤེས་ལྔ་བསྡུ་བའི་ཚུལ་ཡང་།  སྒྲུབ་པ་དང་བཅས་ཀྱང་རུང་།  སྒྲུབ་པ་དང་བཅས་པ་མ་ཡིན་ཀྱང་རུང་།  ཆོས་སྐུ་ཙམ་ལ་མཚོན་པར་བྱེད་པ་ནི་མ་ཡིན་ནོ།  །དེ་ཙམ་ཞིག་ནི་ཐེག་པ་ཆེན་པོའི་བསྒྲུབ་བྱ་མ་ཡིན་པ་ཉིད་དེ།  དེ་ཙམ་ཞིག་ལ་ནི་གཞན་གྱི་དོན་ལ་སྦྱོར་བ་མེད་པའི་ཕྱིར་རོ།  །འོ་ན་ཇི་ལྟ་བུ་ཞེ་ན།  གཞན་ཡང་སྐུ་གཉིས་པོ་ཡེ་ཤེས་བཞིས་བསྡུས་པ་ཉིད་ཀྱང་བསྒྲུབ་བྱ་ཡིན་ནོ།  །དེ་ལྟར་ཡང་ཕ་རོལ་ཏུ་ཕྱིན་པའི་ཐེག་པ་ལས་ཆོས་ཀྱི་དབྱིངས་རྣམ་པར་དག་པ་དང་།  དེའི་ཡོངས་སུ་གཏོགས་པའི་ཆོས་ཀྱི་དབྱིངས་ཀྱི་ཡེ་ཤེས་ཆོས་ཀྱི་སྐུ་ཞེས་བྱ་བ་ནི་གཙོ་བོར་བསྒྲུབ་པར་བྱ་བ་ཡིན་ལ།  དེ་ལ་བརྟེན་ནས་རྣམ་པ་ཐམས་ཅད་དང་དོན་ཐམས་ཅད་ཀྱིས་གཟུགས་བརྙན་གྱི་ངོ་བོ་མེ་ལོང་ལྟ་བུའི་ཡེ་ཤེས་དང་།  སངས་རྒྱས་ཐམས་ཅད་དང་མཉམ་པ་ཉིད་དུ་རྟོགས་པའི་མཉམ་པ་ཉིད་ཀྱི་ཡེ་ཤེས་དང།  རྣམ་པ་ཐམས་ཅད་དུ་དོན་རྟོགས་པའི་དོན་ཐམས་ཅད་དེ་བཞིན་ཡོངས་སུ་གཅོད་པའི་སོ་སོར་རྟོག་པའི་ཡེ་ཤེས་ཏེ།  ཡེ་ཤེས་གསུམ་པོ་འདི་དག་ལོངས་སྤྱོད་རྫོགས་པའི་སྐུ་ཞེས་བྱ་བའི་འབྲས་བུ་གཞན་ཡིན་ནོ།  །དེ་བཞིན་དུ་རྣམ་པ་ཐམས་ཅད་དུ་འགྲོ་བའི་དོན་གྱི་བྱ་བ་མཛད་པའི་མཚན་ཉིད་ཅན་བྱ་བ་ནན་ཏན་གྱི་ཡེ་ཤེས་ཀྱི་ངོ་བོ་སྤྲུལ་པའི་སྐུ་ཞེས་བྱ་བ་ཡང་འབྲས་བུ་ཡིན་ནོ།  །དེ་བཞིན་དུ་གསང་སྔགས་ཀྱི་ཐེག་པར་ཡང་བརྡ་ཇི་ལྟ་བ་དང།  རྒྱུ་ཇི་ལྟ་བ་བཞིན་དུ་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ངོ་བོ་རྡོ་རྗེ་འཆང་གི་རང་བཞིན་དང་།  ཤིན་ཏུ་རྣམ་པར་དག་པ་དེ་ཡི་ཡེ་ཤེས་ཀྱི་ངོ་བོ་མི་བསྐྱོད་པའི་ངོ་བོ་ཆོས་ཀྱི་སྐུ་ཞེས་བྱ་བ་ནི་གཙོ་བོར་བསྒྲུབ་བྱ་ཡིན་ནོ།  །དེ་བཞིན་དུ་སྣ་ཚོགས་ཀྱི་རྣམ་པར་ཐམས་ཅད་སྣང་བས་མེ་ལོང་ལྟ་བུའི་ཡེ་ཤེས་ཀྱི་ངོ་བོ་རྣམ་པར་སྣང་མཛད་ཀྱི་རང་བཞིན་དང་།  སངས་རྒྱས་ཐམས་ཅད་དང་མཉམ་པ་ཉིད་དུ་རྟོགས་པ་རིན་ཆེན་འབྱུང་ལྡན་གྱི་ངོ་བོ་དང་།  ཉམས་སུ་མྱོང་བའི་དོན་གྱིས་རྣམ་པ་ཐམས་ཅད་ཡོངས་སུ་གཅོད་པའི་བདག་ཉིད་ཅན་སོ་སོར་རྟོག་པའི་ངོ་བོ་ཉིད་ནི་སྣང་བ་མཐའ་ཡས་ཀྱི་བདག་ཉིད་དེ།  ལོངས་སྤྱོད་རྫོགས་པའི་སྐུ་ཞེས་བྱ་བ།  འབྲས་བུ་གཉིས་ལས་ཆོས་ཀྱི་སྐུ་ལ་བརྟེན་པ་ཡིན་ནོ།  །དེ་བཞིན་དུ་སྣ་ཚོགས་ལ་ཁྱབ་པའི་འགྲོ་བའི་དོན་གྱི་བྱ་བ་མཛད་པའི་མཚན་ཉིད་ཅན།   བྱ་བ་ནན་ཏན་གྱི་ཡེ་ཤེས་ཀྱི་ངོ་བོ་ཉིད་ནི་དོན་ཡོད་གྲུབ་པའི་རང་བཞིན་ཏེ་སྤྲུལ་པའི་སྐུ་ཞེས་བྱ་བ་འབྲས་བུ་དང་བསྒྲུབ་པར་བྱ་བ་གཞན་ཡིན་ནོ།  །དེ་ལྟར་འདིར་ཡང་སྐུ་གསུམ་པོའི་ངོ་བོ་ཉིད་བསྒྲུབ་པར་བྱ་བ་ཡིན་པས།  ཞེས་སོགས་སྔར་དྲངས་པ་ལྟར་རོ།  །འདི་ཉིད་རིན་ཆེན་འབྱུང་གནས་ཀྱིས་མཛད་པ་སྟེ།  ད་དུང་ཚིག་དོན་གཉིས་ཀ་འདི་དང་འདྲ་ལ་ཁད་པ་ཞིག་སྣང་སྟེ།  དེ་ནི་སློབ་དཔོན་རྒྱལ་བ་བཟང་པོ་དཔལ་སྤས་ཀྱིས་མཛད་༡༠པའོ།  སྔ་མ་ནི་ལོ་ཙཱ་བ་ཚུལ་ཁྲིམས་རྒྱལ་བ་དང་།  ཕྱི་མ་ཤཱཀྱ་བརྩོན་འགྲུས་ཀྱིས་བསྒྱུར་བར་སྣང་ངོ་།    ། ༈

མཁན་ཆེན་སངས་རྒྱས་ཕུན་ཚོགས་པའི་རྣམ་ཐར་ལས།  ཚུལ་གནས་ཀྱི་དོན།   རྩ་བཞི་ཆང་དང་ལྔ་སམ་སྦགས་ཙམ་དང་།  བཤགས་སྡོམ་གང་ཆེ།  ཐོས་པ་ལ།  སོ་ཐར་མདོ་དབུ་ལུགས་སེམས་བསྐྱེད།  ཞེན་པ་བཞི་བྲལ།  དོན་བདུན་མ།  སྐྱིད་སྡུག་ལམ་ཁྱེར།  རྟེན་འབྲེལ་སྙིང་པོ།  དབུ་མའི་ལྟར་ཁྲིད།  བརྒྱད་སྟོང་།  དེའི་ལྟ་བསྒོམ་སྤྱོད་པ་ཐང་སྟོང་པའི་ལུགས།  རྡོ་རྗེ་གཅོད་པ།  སྡུད་པ་སོགས།  བྱམས་ཆོས་ལྔ།  རྩ་ཤེ།  སྤྱོད་འཇུག་སོགས།  གཅོད་སྐོར།  ས་སྐྱ།  ཐོགས་མེད།  བཀའ་གདམས་གླེགས་བམ།  ངོར་ཆེན།  མུས་ཆེན།  དཀོན་མཆོག་ལྷུན་གྲུབ།  ཐར་པཎ་རྣམས་ཀྱི་བཀའ་འབུམ།  དབང་ལས།  རིགས་གསུམ་སྤྱི།  མི་འཁྲུགས་པ་སྟ་གོན་ཡོད་མེད་གཉིས།  ཚེ་དཔག་ལྷ་དགུ།  འཆི་མེད་རྔ་སྒྲ།  ཨ་ར་པ་ཙ་ན།  སྦྱོངས་དཀྱིལ།  ཀུན་རིག  །འཆི་འཇོམས།  གསང་འདུས་ལུགས་གསུམ།  གཤེད་དམར་ལྷ་ལྔ།  འཇིགས་བྱེད་རྭ་ལུགས།  ས་ལུགས།  ལཱུ་ནག་དྲིལ་གསུམ།  མཁའ་འགྲོ་རྒྱ་མཚོ།  ཀྱེ་རྡོར་བཀའ་བབས་བཞི།  བདག་མེད་ལྷ་མོ་བཅོ་ལྔ།  མགོན་པོའི་དབང་ཀ་ལྔ།  གུར་སཾ་ཊ།  ཕུར་པ།  དྲག་དམར་རྣམས་ཀྱི་དབང་།  མཁའ་སྤྱོད་རྣམ་གསུམ།  ཕག་མོ་སྐོར་གསུམ།  དམར་པོ་སྐོར་གསུམ།  དམར་ཆུང་སྐོར་གསུམ།  ལམ་འབྲས།  ཆག་མེད་བཞི།  ཚར་སྒྲུབ།  རྣམ་བིར།  བརྡ་དོན།  བདག་མེད་མ།  ག་ཡ་དྷ་རའི་མགོན་རྐྱང་།  བརྡ་ཚིག  །པོད་མེར་དམར་སོགས།  བརྒྱ་རྩ།  རྒྱ་མཚོ་རྣམས་ཀྱི་རྒྱ་གཞུང་བོད་གཞུང་།  སྒྲོལ་མ་ཉེར་གཅིག  །དེའི་ཡིག་རྙིང་།  རྣམ་རྒྱལ་འཇོམས།  ནོར་རྒྱུན་མ།  སེང་གདོང་སྔོ་དམར།  མི་གཡོ་བ་དཀར་སྔོན།  དབྱངས་ཅན་དཀར་མོ།  །རྨེ་བརྩེགས་ལྗང་ནག  །སྨེ་དུད།  ཁྲོ་མོ་སྨེ་བརྩེགས།  འཇམ་དཀར།  སྨྲ་སེང་།  གང་བློ་མ།  ཨ་ར་པ་ཙ་ན།  ཁྱུང་ཁྲ་ནག  །འབྱུང་འདུལ།  ཨུ་ཙཪྻ།  གཏུམ་ཁྱུང་།  སྤྱན་གཟིགས་གཙོ་བོར་གསུམ་པ།  སེང་གེ་སྒྲ།  བཅུ་གཅིག་ཞལ།  སྒྲོལ་དཀར་འཁྲིད་བཅས།  གཉན་སྒྲོལ།  གཤེད་དམར།  སོར་འབྲང་།  ཚེ་དཔག་མེད་དཀར་པོ།  རས་ཆུང་དང་།  གྲུབ་ཐོབ་ལུགས།  ལྕགས་སྡོང་མ།  རི་ཁྲོད་མ།  སྨན་བླ།  གནས་བཅུ།  ཀླུ་དབང་རྒྱལ་པོ།  རྟ་མགྲིན།  སྐྱེར་སྒང་ལུགས།  ཟླ་རྒྱལ་ལུགས།  ཛཾ་སེར་ནག །གུར་ལྷ་བརྒྱད།  ལྷ་དགུ།  ལྷ་བཅུ་གཉིས་མ།  ལྕམ་དྲལ་ལྷ་གསུམ།  དུད་སོལ་མ།  པུ་ཏྲ།  ཞལ་བསྙེན་དུས།  བྲམ་ནག  །ལས་བཞི།  སྒྲུབ་དུས་གཉིས།  གསང་ཁྲིད།  མངགས་གཏད།  ཁྱུང་ཞལ།  གདོང་བསྙེན་ཅན།  ཕྱག་བཞི་དྲུག  །དམ་ཅན་ཆོས་རྒྱལ།  རིགས་བཞི།  མགོན་དཀར།  སྟག་ཞོན།  ཏྲཀྴད།  དམག་ཟོར་མ།  བེཀ་ཙེ།  ཚེ་རིང་མ།  རྣམ་སྲས།  དུར་བདག  །ཞང་བློན་ཕྱི་ནང་གསང་གསུམ།  ཡང་དེའི་གསང་སྒྲུབ་ལྷ་ལྔ།  དཔལ་ལྷ།  ཁྲིད་བརྒྱ།  ནག་པོ་རིམ་བཞི།   རྩ་དབུ་མ་ཡུམ་དང་སྦྱར་བ།  རྭ་རྩེ་སེམས་འཛིན།  རྭ་ཁྲིད།  རྣལ་འབྱོར་བཞི།  སྤྲོས་མེད།  ཚོམ་བུ་ལུགས།  བྲག་རྫོང་མ་ཕྱི་ནང་གསང་གསུམ།  ཞལ་གྱི་སྐོར་མང་པོ།  རྒྱུད་འབུམ་བླ་མེད་སྐོར་ཡོངས་རྫོགས།  འཇིགས་བྱེད་སྐོར་ཚང་མ།  གུར་ཞལ་གཉིས་ཀའི་གསེར་པོད།  མེ་འབར་མ།  གློ་བོ་མཁན་ཆེན་གྱི་བཀའ་འབུམ་ཐོར་བུ།  དཔལ་ལྡན་དོན་གྲུབ་བཀའ་འབུམ།  རྒྱུད་བཞི་སོགས་སོ།།    །།  ༈
ན་མོ་གུ་ར་བེ།  འཇམ་དཔལ་དབྱངས་ཀྱིས་བྱིན་གྱིས་བརླབས་ཤིང་ཚེ་དེ་ཉིད་དུ་མཆོག་གི་དངོས་གྲུབ་བརྙེས་པ་ལོ་ཙཱ་བ་རིན་ཆེན་བཟང་པོ་ལ་ཡོ་གའི་སྲོལ་གཉིས་མངའ་བའི་སྐུ་ཚེའི་སྟོད་ལ་པཎྜི་ཏ་སངས་རྒྱས་ཞི་བ་ལ་གསན་པའི་སྲོལ་ནི།  ཕྱག་ལེན་དང་དབང་བཀའ་ཀུན་སྙིང་ནས་བརྒྱུད་ཀྱང་བཤད་པ་ཤཱཀྱ་བཤེས་གཉེན་གྱི་ཀོ་ས་ལའི་རྒྱན་གྱི་སྟེང་ནས་མཛད་པས་ཕྱག་ལེན་དང་བཤད་པ་ཡང་ཅུང་ཟད་མ་མཐུན་ཅིང་།  སྦྱོང་རྒྱུད་ལའང་རྡོར་དབྱིངས་སོགས་ཀྱི་ཆོ་གས་རྒྱས་བཀབ།  དབྱངས་ལ་སོགས་པའི་སྤྲོས་པའང་ཆེ་བར་གྲགས་སོ།  །སྐུ་ཚེའི་སྨད་ལ་པཎྜིཏ་དྷརྨ་ཕ་ལར་གསན་པའི་སྲོལ་ནི།  པཎྜིཏ་དེ་ཉིད་ཀུན་སྙིང་ནས་བརྒྱུད་པ་བཞི་པ་ཡིན་པས་ཐག་ཉེ་ཞིང་།  ཕྱག་ལེན་དང་བཤད་པ་གཉིས་ཀ་ཀུན་སྙིང་གི་ལུགས་འབའ་ཞིག་མཛད།  སྦྱོང་རྒྱུད་ལའང་ཆོ་ག་གཞན་དུ་ཁ་འཕངས་ནས་གསལ་བར་མ་བཤད་པ་རྣམས།  གཙུག་དགུ་དང་དེ་ཉིད་འདུས་པ་སོགས་ནས་ཁ་བསྐངས་པ་མ་གཏོགས་རྒྱུད་ཀྱི་སྟེང་ནས་ཆོ་ག་ཐོན་པ་གཞན་དང་མི་བསྲེ་བར་རྒྱུད་ཀྱི་གོང་འོག་འཁྲུགས་བསྡེབས་ནས་སྤྲོས་པ་ཆུང་ཞིང་དག་པར་མཛད་དོ།  །ལུགས་དེ་ཉིད་བྲག་སྟེང་པ་ཡོན་ཏན་ཚུལ་ཁྲིམས་ནས་རིམ་པར་བརྒྱུད།  རྗེ་བཙུན་གྲགས་པར་བཀའ་བབས།  དེ་ཉིད་ཀྱིས་རྒྱུད་བཤད་ཐབས་ཀྱི་མན་ངག་གཞན་ཕན་སྤྱི་ཆིངས།  རྒྱུད་ཀྱི་ས་བཅད།  རྒྱུད་ཀྱི་མཆན།  ལག་ཏུ་བླང་བའི་རིམ་པ་གཞན་ཕན་འོད་ཟེར།  གཞན་ཕན་ཉེར་མཁོ་རྣམས་མཛད་དོ།  །དེ་ལ་ཕྱིས་ཀྱི་བོ་དོང་པ་ཕྱོགས་ལས་རྣམ་པར་རྒྱལ་བ་དཔལ་འཇིགས་མེད་གྲགས་པས་རྒྱུད་ཀྱི་དོན་ལ་མ་ཞུགས་སོ། །ཞེས་བཀག་ནས།  ཆོ་ག་རྒྱུད་དོན་གསལ་བ།  དེ་ཉིད་ལུང་དང་སྦྱར་བ་ལུང་གི་རྣམ་ངེས།  རིགས་པའི་རྣམ་ངེས་ཏེ་གསུམ་དུ་མཛད་པ་ལས།  གཞན་ཕན་འོད་ཟེར་ལ་ཕྱོགས་སྔར་བྱས་པ་རྣམས་ཀྱི་རྩོད་ལན་ནི་ཀུན་མཁྱེན་པུནྱ་སིཾ་ཧས་གཞན་ཕན་གནོད་འཇོམས་ཞེས་བྱ་བ་མཛད་ཡོད་དོ།  །ཤུ་བྷཾ།  །ཡང་ཀུན་རིག་ལ་ལོ་ཆེན་ནས་བརྒྱུད་པ་མ་གཏོགས་པ།  པཎྜིཏ་དྷརྨ་ཕ་ལས་ཇོ་བོ་རྗེ་ལ་བརྒྱུད་དེ་རྩ་སྐྱ་པ་སོགས་ཀྱིས་མཛད་པའི་སྲོལ་ཏེ་འཕགས་ཡུལ་ནས་བརྒྱུད་པ་གསུམ་དང་། བོད་འདིར་གསར་དུ་བཟོས་པའི་སྔར་གྱི་སྲོལ་གཉིས།  འདུལ་འཛིན་གྲགས་རྒྱལ་དུ་བོད་པས་སྐབས་དོན་དང་པོ་སྦྱོར་བ་ཆོས་སྐུའི་ཉམས་ལེན་ཆད་པ་སྟེ་ལུགས་སྲོལ་གསུམ་སྟེ་དྲུག་ཏུ་ཡོད་དོ།།  ཤུ་བྷཾ།  །།

དཔལ་ཀྱཻ་རྡོ་རྗེའི་ལུས་དཀྱིལ་གྱི་བཤད་པའི་སྐབས།  ཀྱཻ་རྡོར་རྩ་རྒྱུད་དང།  བཤད་རྒྱུད་ཀུན་ཏུ་ཁ་སྦྱོར་ལས་གསུངས་པའི་ལུས་དཀྱིལ་རྣལ་འབྱོར་དབང་ཕྱུག་གི་མན་ངག་སྟེ།  དེ་ལའང་། སྤྱིར་དཀྱིལ་འཁོར་གྱི་སྒྲ་དོན།  དཀྱིལ་འཁོར་དེའི་རབ་ཏུ་དབྱེ་བ།  ལུས་དཀྱིལ་བྱེ་བྲག་ཏུ་བཤད་པའོ།  །དང་པོ་ནི།  མཎྜལ་ཞེས་པའི་སྒྲ་ལས་དྲངས་ན་མ་ནུ་སཱ་ར་ནི་སྙིང་པོ་སྟེ།  བྱང་ཆུབ་ཀྱི་སེམས་བདེ་བ་ཆེན་པོའོ།  །ལ་ནི་ལེན་པའམ་འཛིན་པ་སྟེ།  སྙིང་པོ་བདེ་བ་ཆེན་པོ་ལེན་ཅིང་འཛིན་པས་ན་དཀྱིལ་འཁོར་ཏེ།  རྩ་རྒྱུད་ལས།   དཀྱིལ་ནི་སྙིང་པོ་ཞེས་བརྗོད་དེ།  །བྱང་ཆུབ་སེམས་ནི་བདེ་ཆེན་པོ།  །ལེན་པར་བྱེད་པས་དཀྱིལ་འཁོར་ཉིད།  །འདུས་པ་དཀྱིལ་འཁོར་ཉིད་དུ་བརྗོད།  ཅེས་སོ། །གཉིས་པ་ལ་དྲུག་སྟེ།  སློབ་དཔོན་ཀླུ་བྱང་གིས།  །རིན་ཆེན་དེ་བཞིན་ས་བོན་དང་།  །མེ་ཏོག་ཚོན་དང་དེ་བཞིན་དུ།  །ཕྱེ་མ་གཡོ་དང་ཕྱེ་མ་སྟེ།  །དེ་བཞིན་ཉིད་ཀྱི་དཀྱིལ་འཁོར་བདེན།  །ཞེས་དང་།  དེ་བཞིན་དུ་མངོན་བརྗོད་བླ་མར་དཀྱིལ་འཁོར་དྲུག་དང་།  མན་ངག་ཐུན་མོང་མ་ཡིན་པར་ལྔ་དང་།  ཐུན་མོང་དུ་བཅོས་མའི་དང་།  ཁྱད་པར་དུ་དཀྱིལ་འཁོར་བཞིར་དབྱེ་བ་དང་།  སློབ་དཔོན་དྲིལ་བུ་པས་དཀྱིལ་འཁོར་གསུམ་དུ་དབྱེ་བ་དང་།  ཁ་སྦྱོར་ལས་དཀྱིལ་འཁོར་གཉིས་སུ་གསུངས་པ་སོགས་སོ།།  །།
གསུམ་པ་ལུས་དཀྱིལ་བྱེ་བྲག་ཏུ་བཤད་པ་ལ།  ཕྱི་དཀྱིལ་ལས་ཁྱད་པར་འཕགས་ཚུལ།  ཁྱད་པར་དུ་འཕགས་པའི་ལུས་དཀྱིལ་གྱི་སྒྲ་དོན།  སྒྲ་དེ་ལྡན་ལུས་དཀྱིལ་གྱི་དབྱེ་བ།  དབྱེ་གཞི་ལུས་དཀྱིལ་གྱི་མཚན་གྱི་རྣམ་གྲངས།  མཚན་དེ་དང་ལྡན་པའི་ལུས་དཀྱིལ་ཉིད་གཏན་ལ་དབབ་པའོ།  །  ༈
རས་བྲིས་ཀྱི་དཀྱིལ་འཁོར་ལ་ཞལ་ཕྱག་རྫོགས་པར་བྲི་དགོས་ཏེ།  དེ་ཡང་ཛ་ཡ་སེ་ནས།  རྡུལ་ཚོན་བྲི་བར་མ་ནུས་ན།  །དཀྱིལ་འཁོར་དང་མཉམ་རས་ལ་ནི།  །ངེས་པར་བཅོམ་ལྡན་ཧེ་རུ་ཀ  །ཕྱག་རྒྱའི་གཟུགས་དང་བཅས་པ་འབྲི།  །ཞེས་སོ།    ། ༈
དབང་གི་ཆུ་བོའི་རྣམ་བཤད་དུ།  དབང་བསྐུར་བ་རྡོ་རྗེ་ཐེག་པའི་ལམ་གྱི་དངོས་གཞིར་བསྟན་པ་དང།  དབང་མ་བསྐུར་བའི་ཉེས་དམིགས།  དབང་བསྐུར་བའི་ཕན་ཡོན།  བསྐུར་བྱ་དབང་སྤྱིའི་རྣམ་བཞག  །ཆོ་གའི་ངོ་བོ་སྟེ་ལྔའོ།  །འདིའི་བཞི་པ་ལ།  དབང་བསྐུར་གྱི་སྒྲ་དོན།  སྤྱིའི་གྲངས་ངེས།  ནང་གསེས་ཀྱི་དབྱེ་བ།  དབང་གི་གོ་རིམ་མོ།  །དང་པོ་ནི།  ཆོ་ག་ཁྱད་པར་ཅན་ལ་བརྟེན་ནས་ཕུང་ཁམས་སྐྱེ་མཆེད་ལ་སངས་རྒྱས་ཀྱི་ས་བོན་བཏབ་པའི་སྒོ་ནས་རྒྱུད་ཡོངས་སུ་སྨིན་པའི་ངོ་བོ་སྟེ།  སྨིན་པའི་ཚད་ནི་རྒྱན་ལས།  ཇི་ལྟར་རྨ་དང་ཟས་ལ་དེ་དག་གིས།  །གཟགས་དང་སྤྱད་དུ་རུང་བས་སྨིན་འདོད་ལྟར།  །དེ་བཞིན་རྟེན་འདིར་ཕྱོགས་གཉིས་ཞི་བ་དང་།  །ཡོངས་སུ་སྤྱད་པ་ཉིད་དུ་སྨིན་པར་བསྟན།  །ཅེས་ཕར་ཕྱིན་གྱི་ཐེག་པར་བསྟན་པ་དེ་ཉིད་ལ་སྤང་བྱ་མཐོང་སྤང་སྤོང་རུང་དང་།  གཉེན་པོ་མཐོང་ལམ་སྐྱེ་རུང་ལ་སྨིན་པར་འཇོག་པ་ལྟར།  རྡོ་རྗེ་ཐེག་པའི་སྐབས་འདིར་རྟེན་དེ་ཉིད་ལ་སྤང་བྱ་སྒྲིབ་གཉིས་སྤོང་རུང་དང་།  ཐོབ་བྱ་མཆོག་གི་དངོས་གྲུབ་ཐོབ་རུང་དུ་འགྱུར་བ་ནི་སྨིན་པའི་ངོ་བོའོ།  །དེས་ན་དབང་བསྐུར་ཐོབ་པ་དང་།  སྔགས་ཀྱི་དམ་ཚིག་ཐོབ་པ་དང་།  སྡོམ་པ་ཐོབ་པ་དང་།  རྒྱུད་སྨིན་པར་བྱས་པ་རྣམས་དོན་གཅིག་ཡིན་ཅིང་།  དབང་བསྐུར་དང་།  སྔགས་ཀྱི་དམ་ཚིག་དང་།  རྒྱུད་སྨིན་པའི་ངོ་བོ་རྣམས་དོན་གཅིག་གོ  །ཞེས་སོ།  །གཉིས་པ་ནི།  གཏོར་བ་དང་།  དབང་བ་སོགས་དོན་ཚན་བཞིའི་སྒོ་ནས་དག་ལྡན་ལས་འཆད་པ་ལྟར་རོ།  །གསུམ་པ་ནི་རྒྱུད་སྡེ་བཞིར་དབང་མི་འདྲ་བ་བཞི་དང་།  བླ་མེད་ལ་བུམ་དབང་སོགས་བཞིའོ།  །ལྔ་པ་ནི།  སློབ་དཔོན་ཀླུས་མཛད་པའི་གསང་བ་འདུས་པའི་དཀྱིལ་ཆོག་དང་།  ཀླུ་བྱང་གི་ཆོ་ག་ཉི་ཤུར་མཛད།  བདེ་མཆོག་ནག་པོ་པར་སྔོན་དུ་བསྙེན་པ་དང་།  དཀྱིལ་འཁོར་གྱི་སྤྱོད་པ་བདུན་དང་།  བརྟུལ་ཞུགས་ཀྱི་རིམ་པ་བཅུ་བཞི་སྟེ་ཉི་ཤུ་རྩ་གཉིས་སུ་མཛད།  དྲིལ་བུ་པས་རྩ་བའི་དབྱེ་བ་བཞི།  ཡན་ལག་གི་དབྱེ་བ་བཅུ་བཞིར་གསུངས།  ཀྱཻ་རྡོར་མན་ངག་ལུགས་ལ།  ཞལ་དང་འདྲ་བའི་ཆོ་གའི་གཞི་བརྒྱད།   ཞབས་དང་འདྲ་བའི་ཆོ་གའི་ཆིངས་བཞི།  ཕྱག་དང་འདྲ་བའི་ཆོ་གའི་ཡན་ལག་བཅུ་དྲུག  །མིག་དང་འདྲ་བའི་ཆོ་གའི་གཙོ་བོ་ཉེར་བཞི་སོགས་གསུངས་པ་མ་འདྲེས་པར་རྟོགས་པར་བྱའོ།  །ལྔ་པ་ཆོ་གའི་ངོ་བོ་ལ།  ཞལ་དང་འདྲ་བའི་ཆོས་བརྒྱད་དེ།  གཞན་དོན་དུ་སློབ་མ་རྗེས་སུ་བཟུང་བའི་ཆོ་ག  །སྔོན་དུ་བསྙེན་པའི་ཆོ་ག  །སའི་ཆོ་ག  །སྟ་གོན་ཆོ་ག  །དཀྱིལ་འཁོར་བྲི་ཞིང་རྒྱན་དགྲམ་པའི་ཆོ་ག  །སྒྲུབ་ཅིང་མཆོད་པའི་ཆོ་ག  །འཇུག་ཅིང་དབང་བསྐུར་བའི་ཆོ་ག  །དཀྱིལ་འཁོར་ཆེན་པོའི་འཇུག་གི་ཆོ་གའོ། །དང་པོ་ལ།  གང་ལས་གསུངས་པའི་ལུང་ཁུངས།  གང་ལ་བྱ་བའི་སློབ་མ།  ཇི་ལྟར་བྱ་བའི་ཆོ་ག  །དེ་ལྟར་བྱས་པའི་དགོས་པའོ།།    །།  ༈}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-04-NGA-001]]
[[Category:Khyentse Lineage Project]]
[[Category:JKW-KABUM-Volume-04-NGA]]