View source for JKW-KABUM-15-BA-014-003

{{Khyentse Metadata
|classification=Tibetan Publications
|subclass=Tibetan Texts
|fulltitletib=རྟ་མཆོག་རོལ་པའི་སྙིང་ཏིག་ལས།  དབང་ཆེན་ཚེ་སྒྲུབ་ཟབ་མོའི་རྒྱུན་གྱི་རྣལ་འབྱོར་སྙིང་པོ།
|fulltitle=rta mchog rol pa'i snying tig las/ dbang chen tshe sgrub zab mo'i rgyun gyi rnal 'byor snying po
|fulltitlekartib=རྟ་མགྲིན་སྙན་བརྒྱུད་ཟབ་མོའི་ཚེ་སྒྲུབ་རྒྱུན་གྱི་རྣལ་འབྱོར།
|fulltitlekar=rta mgrin snyan brgyud zab mo'i tshe sgrub rgyun gyi rnal 'byor
|citation=[['jam dbyangs mkhyen brtse'i dbang po]]. ''rta mchog rol pa'i snying tig las dbang chen tshe sgrub zab mo'i rgyun gyi rnal 'byor snying po''. In '''jam dbyangs mkhyen brtse'i dbang po'i bka' 'bum'', Vol. 15: 326-331. Khams sde dge rdzong sar dgon: Rdzong sar blo gros phun tshogs, 2020.
|collectiontitletib=མཁྱེན་བརྩེའི་བཀའ་འབུམ་
|collectiontitle=mkhyen brtse'i bka' 'bum
|author='jam dbyangs mkhyen brtse'i dbang po
|authortib=འཇམ་དབྱངས་མཁྱེན་བརྩེའི་དབང་པོ་
|sourcerevealer='jam dbyangs mkhyen brtse'i dbang po
|sourcerevealertib=འཇམ་དབྱངས་མཁྱེན་བརྩེའི་དབང་པོ་
|tibgenre=Daily Practice - rgyun khyer
|terma=Yes
|sabcadcategory=Five
|deity=rta mgrin
|cycle=rta mchog rol pa'i snying tig
|cycletib=རྟ་མཆོག་རོལ་པའི་སྙིང་ཏིག་
|language=Tibetan
|volumenumber=015
|volnumtib=༡༥
|volyigtib=བ་
|totalvolumes=25
|textnuminvol=014
|textsubnumber=003
|pagenumbers=326-331
|totalpages=6
|beginfolioline=6b1
|endfolioline=9a3
|totalfolios=4
|multivolumework=No
|rectonotes=sde tshan 14
|versonotes=mkhyen brtse'i bka' 'bum
|colophontib=ཞེས་པའང་སྐྱབས་མགོན་སི་ཏུ་མཆོག་སྤྲུལ་རིན་པོ་ཆེའི་ཐུགས་དམ་ཉམས་བཞེས་སུ་ལྷ་རྫས་ཀྱི་མེ་ཏོག་དང་བཅས་ཏེ་བཀའ་སྩལ་རིན་པོ་ཆེའི་ཕྲེང་བ་སྤྱི་བོར་ཕེབས་པ་ལྟར།  མཚོ་སྐྱེས་ཀུན་ཏུ་འཆང་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་སྒྲུབ་བརྒྱུད་བསྟན་པའི་རིང་ལུགས་འཛིན་པ་སྐྱབས་ཆེ་བླ་བྲང་དུ་རབ་བྱུང་བཅོ་ལྔ་པའི་ཐོག་མ་མེ་ཡོས་ཁྲུམས་སྟོད་ཟླ་བའི་དཀར་ཕྱོགས་ཀྱི་ཚེས་བཅུར་བྲིས་ཏེ་ཕུལ་བ་དགེ་ལེགས་སུ་གྱུར་ཅིག  །སརྦ་དཱ་མངྒ་ལཾ་བྷ་བ་ཏུ།།
|colophonwylie=zhes pa'ang skyabs mgon si tu mchog sprul rin po che'i thugs dam nyams bzhes su lha rdzas kyi me tog dang bcas te bka' stsal rin po che'i phreng ba spyi bor phebs pa ltar/__mtsho skyes kun tu 'chang dgyes pa'i 'bangs pad+ma 'od gsal mdo sngags gling pas sgrub brgyud bstan pa'i ring lugs 'dzin pa skyabs che bla brang du rab byung bco lnga pa'i thog ma me yos khrums stod zla ba'i dkar phyogs kyi tshes bcur bris te phul ba dge legs su gyur cig__/sarba dA mang+ga laM b+ha ba tu//
|rtzlink=Terdzo-LA-027
|recensionlink=JKW-KABAB-19-DZA-011
|pdflink=File:JKW-KABUM-15-BA-014.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༅།།   །། ༈  རྟ་མཆོག་རོལ་པའི་སྙིང་ཏིག་ལས།  དབང་ཆེན་ཚེ་སྒྲུབ་ཟབ་མོའི་རྒྱུན་གྱི་རྣལ་འབྱོར་སྙིང་པོ་བཞུགས་སོ།  །ན་མོ་གུ་རུ་ཧ་ཡ་བ་རཾ་ལ་ལི་ཏཱ་ཡ།  འདིར་སློབ་དཔོན་ནཱ་ག་རྫུ་ནའི་དགོངས་པ།  ཨོ་རྒྱན་གྱི་གུ་རུ་པདྨ་རྒྱལ་པོས་སྙན་བརྒྱུད་ཟབ་མོར་གདམས་པའི་ཆོས་སྡེ།  རྟ་མཆོག་རོལ་པའི་སྙིང་ཏིག་གི་དབང་ཆེན་ཚེ་སྒྲུབ་ཟབ་མོའི་རྒྱུན་གྱི་རྣལ་འབྱོར་སྙིང་པོར་དྲིལ་ཏེ་ཉམས་སུ་བླང་བའི་ཚུལ་ལ་གསུམ།  སྔོན་འགྲོ།  དངོས་གཞི།  རྗེས་སོ།  །དང་པོ་ལ་གསུམ།  སྐྱབས་འགྲོ།  སེམས་བསྐྱེད།  ཚོགས་བསག་གོ།  །དང་པོ་ནི།  ཚོགས་ཞིང་བླ་མ་རྟ་མཆོག་རོལ་པའི་དཀྱིལ་འཁོར་མཁའ་ཁྱབ་ཏུ་སད་པའི་སྤྱན་སྔར་བདག་གཞན་འགྲོ་ཀུན་སྒོ་གསུམ་འཇུག་པ་གཅིག་པས་སྐྱབས་སུ་འགྲོ་བར་མོས་ལ།  ཨ༔  སྐྱེ་བ་མེད་པའི་དབྱིངས་ཉིད་ལས༔  འགགས་མེད་སྣང་བའི་ཕྱག་རྒྱར་བཞེངས༔  དཔལ་ཆེན་རྟ་མཆོག་ཧེ་རུ་ཀར༔  རང་ངོ་ཤེས་པས་སྐྱབས་སུ་མཆི༔  ལན་གསུམ།  གཉིས་པ་ནི།  སྨོན་འཇུག་གི་དོན་ཡིད་ལ་དྲན་བཞིན་པས།  ཧཱུྃ༔  དེ་བཞིན་ཉིད་དབྱིངས་མ་རྟོགས་པའི༔  འགྲོ་ལ་སྙིང་རྗེ་ཆེན་པོའི་བློས༔  རིམ་གཉིས་ཟབ་མོའི་རྣལ་འབྱོར་གྱིས༔  ཁམས་གསུམ་སྒྲོལ་བར་སེམས་མཆོག་བསྐྱེད༔  ལན་གསུམ།  གསུམ་པ་ནི།  ཧོ༔  རྡོ་རྗེ་སློབ་དཔོན་སངས་རྒྱས་དཔལ༔  དུས་གསུམ་བཞུགས་ལ་ཕྱག་འཚལ་ལོ༔  མཆོག་གསུམ་བསྟེན་པའི་ཞིང་གྱུར་ལ༔  གཉིས་མེད་ཡིད་ཀྱིས་སྐྱབས་སུ་མཆི༔  དངོས་འབྱོར་ཡིད་ཀྱིས་རྣམ་སྤྲུལ་པའི༔  དག་པའི་མཆོད་པ་བཞེས་སུ་གསོལ༔  དངོས་གྲུབ་ཆུ་བོ་གཅོད་པའི་གེགས༔  ཉེས་བྱས་མ་ལུས་བཤགས་པར་བགྱི༔  ཕྱོགས་བཅུ་འཁོར་གསུམ་དག་པའི་ཆོས༔  མ་ཆགས་སྤྱོད་ལ་རྗེས་ཡི་རངས༔  དག་པ་མཐའ་བཞིའི་དྲི་མ་མེད༔  རྫོགས་པའི་བྱང་ཆུབ་སེམས་བསྐྱེད་དོ༔  བདེ་གཤེགས་དབང་ཕྱུག་སེམས་ཅན་ལ༔  དགོས་པ་གསུམ་ཕྱིར་ལུས་འབུལ་ལོ༔  ཚེ་རབས་བགྲངས་པའི་ལས་རྣམས་ཀུན༔  བསྡུས་ཏེ་བྱང་ཆུབ་ཆེན་པོར་བསྔོ༔  ལན་གསུམ།  ཛཿཧཱུྃ་བྃ་ཧོཿས་ཚོགས་ཞིང་རྣམས་རང་ལ་ཐིམ་པར་བསམ།  གཉིས་པ་དངོས་གཞི་ལ་གསུམ།  ལྷ་བསྒོམ་པ།  སྔགས་བཟླ་བ།  ཚེ་རྟེན་ལ་སྦ་བའོ།  །དང་པོ་ནི།  ཨཿ  རྟ་མགྲིན་རྒྱལ་པོ་དེ་བཞིན་ཉིད༔  མ་བཅོས་མ་བསླད་གཉུག་མའི་གཤིས༔  དམིགས་མེད་སྙིང་རྗེ་མཆོག་གི་གདངས༔  འགགས་མེད་ཟང་ཐལ་ཀུན་ཏུ་ཤར༔  རོལ་པ་ཆེན་པོའི་ཆོ་འཕྲུལ་ལས༔  རྒྱུ་ཡི་ས་བོན་ཧྲཱིཿདམར་པོ༔  སྔགས་ཀྱི་སྒྲ་གདངས་དང་བཅས་པ༔  ཁམས་གསུམ་སྟོང་ཞིང་དབྱིངས་སུ་ཐིམ༔  རྒྱུ་ལས་ཨེ་ཡྃ་བྃ་ལྃ་སུྃ༔  འཕྲོས་པས་འབྱུང་བ་རིམ་བརྩེགས་སྟེང་༔  རི་རབ་སྟེང་དུ་སྲུང་འཁོར་དབུས༔  དབང་ཆེན་གཞལ་ཡས་མཚན་ཉིད་རྫོགས༔  དེ་དབུས་ཟླ་གམ་འབར་བའི་དཀྱིལ༔  པདྨ་ཉི་ཟླ་ཀླུ་སྲིན་སྟེང་༔  ཧྲཱིཿལས་དབང་ཆེན་ཚེ་ཡི་བདག༔  ཉི་མ་འཆར་ཁའི་མདངས་འོད་ཅན༔  ཞལ་གསུམ་ཕྱག་དྲུག་ཞབས་བཞི་བགྲད༔  པདྨ་ལྕགས་ཀྱུ་ཞགས་པ་གཡས༔  ཚེ་བུམ་ལྕགས་སྒྲོག་དྲིལ་བུ་གསིལ༔  གཟི་ལྡན་ལྕགས་ཀྱུ་ཐོད་པ་འཛིན༔  དཔལ་དང་དུར་ཁྲོད་རོལ་པའི་ཆས༔  སྤྱི་གཙུག་རྟ་མགོ་ལྗང་ཞུར་ལས༔  ཧི་ཧིའི་དབྱངས་སུ་རབ་འཚེར་བས༔  འཁོར་འདས་དྭངས་བཅུད་དབང་མེད་སྡུད༔  པད་ཉི་དྲེགས་པ་ལྷ་ཆེན་སྟེང་༔  ཡེ་ཤེས་མེ་དབུས་འགྱིང་ཞིང་རོལ༔  གར་དགུས་བརྗིད་པའི་སྐུ་མཆོག་ལས༔  ཁམ་རྒྱ་དམུས་ལོང་ཁྱི་སྤྱང་སོགས༔  ཕོ་ཉ་དྲེགས་པའི་འཕྲོ་འདུ་ཡིས༔  ཚེ་བཀུག་བྱིན་བསྐྱེད་སྲིད་དང་ཞིའི༔  དངོས་གྲུབ་མ་ལུས་སྩོལ་བར་གྱུར༔  ཅེས་བརྗོད་ཅིང་བསམས་ལ།  སྤྲོ་ན།  གནས་གསུམ་བྱིན་རླབས་དང་དབང་བསྐུར་སྤྱན་འདྲེན་སོགས་གཞུང་ལྟར་བྱ།  གང་ལྟར་ཡང་ལྷར་སྣང་སྒྱུ་མ་ལྟ་བུ་ལ་སེམས་བཟུང་ཞིང་ང་རྒྱལ་བརྟན་པོར་བསྐྱེད།  དག་པ་དྲན་པ་རྣམས་ཚུལ་བཞིན་དུ་བྱའོ།  །གཉིས་པ་ནི།  ཐུགས་ཀར་ཉི་ཟླ་ཁ་སྦྱོར་དབུས༔  ཧཱུྃ་ནྲྀ་ཨ་ཡི་ཚེ་རྟེན་ལ༔  འཆི་མེད་རྡོ་རྗེའི་སྔགས་ཀྱི་ཕྲེང་༔  ལུ་གུ་རྒྱུད་དུ་བསྐོར་བ་ལས༔  འོད་འཕྲོས་ཕོ་ཉའི་ཐུགས་དམ་བསྐུལ༔  སྤྲུལ་པ་ཡང་སྤྲུལ་བཀའ་ཉན་བཅས༔  ནམ་མཁའི་ཁམས་ནས་གློག་ལྟར་འཁྱུགས༔  བར་སྣང་ཁམས་ནས་སྤྲིན་ལྟར་གཡོས༔  ས་གཞིའི་ཁམས་ནས་རླངས་ལྟར་བརྡོལ༔  ཁམས་གསུམ་ཐམས་ཅད་ཤིག་ཤིག་གཡོས༔  སྲིད་གསུམ་དྲེགས་པ་འདར་ཞིང་བསྡངས༔  བརྟན་གཡོའི་དྭངས་བཅུད་དབང་མེད་འཕྲོགས༔  འཆི་མེད་ཚེ་ཡི་བདུད་རྩི་ནི༔  ཉི་མ་འཆར་ཁའི་འོད་ལྟ་བུ༔  སྙིང་དབུས་ཚེ་རྟེན་ལ་ཐིམ་པས༔  རྡོ་རྗེ་ཚེ་ཡི་མཆོག་ཐོབ་གྱུར༔  ཅེས་བརྗོད་ཅིང་གསལ་བཏབ་ལ།  ཨོཾ་རུ་ལུ་རུ་ལུ་ཨེ་ཨཱ་རལླི་ཧྲཱིཿཛཿཨཱ་ཡུརྫྙཱ་ན་སིདྡྷི་ཧྲཱིཿཛཿབྷྲཱུྃ༔  ཞེས་བཟླས་པའི་སྐྱོན་སྤངས་ལ་ཇི་ལྟར་ནུས་པ་བཟླ།  གསུམ་པ་ནི།  བཟླས་བརྗོད་རྫོགས་ནས་སྤྲོ་ན་ཚེ་འགུགས་བསྐུལ།  གང་ལྟར་ཡང་།  ཏིང་འཛིན་རོལ་པའི་ཆོ་འཕྲུལ་གྱིས༔  འཁོར་འདས་ཚེ་བཅུད་སྙིང་དབུས་ཀྱི༔  ཚེ་ཡི་རྟེན་ལ་གཉིས་མེད་ཐིམ།  ཡབ་ཡུམ་སྙོམས་ཞུགས་རྗེས་ཆགས་ཀྱི༔  བདེ་བ་མི་ཕྱེད་རྡོ་རྗེའི་སྲོག༔  འོད་དམར་པདྨ་རཱ་གའི་ཕྲེང་༔  ལུ་གུ་རྒྱུད་ཀྱི་ཐག་པ་ཡིས༔  སྐུ་བཅིངས་རླུང་རྣམས་དབུ་མར་བཅུག༔  ཐིག་ལེ་ཚེ་རྟེན་དྲྭ་བར་བསྡམ༔  ཅིས་ཀྱང་མི་ཆོད་མི་ཤིགས་པའི༔  རྡོ་རྗེ་གསུམ་གྱི་སྲོག་ལྡན་གྱུར༔  ཅེས་བརྗོད་ཅིང་བསམས་ལ།  ཨོཾ་ཨཱཿཧཱུྃ་བཛྲ་ཀཱ་ཝཱ་ཙི་རཀྵ་རཀྵ་ཧཱུྃ༔  ཞེས་བཟླ།  སྤྲོ་ཞིང་ནུས་ན་རླུང་རྡོ་རྗེའི་བཟླས་པ་དང་།  སྦྱོར་བ་བཞི་ལྡན་གྱི་བུམ་པ་ཅན་གྱི་རྣལ་འབྱོར་ཟབ་མོས་ཀྱང་བརྟན་པར་བྱའོ།  །གསུམ་པ་རྗེས་ལ་གསུམ།  འོད་གསལ་དུ་བསྡུ་བ།  ཟུང་འཇུག་གི་སྐུར་ལྡང་བ།  བསྔོ་སྨོན་ཤིས་བརྗོད་ཀྱིས་མཐའ་བརྒྱན་པའོ།  །དང་པོ་ནི།  ཨ་ཨ་ཨ༔  ལྷར་སྣང་རིག་རྩལ་དབྱིངས་སུ་ཐིམ༔  དབྱིངས་རིག་འདུ་འབྲལ་མེད་པའི་ངང་༔  བདེ་སྟོང་ཟུང་འཇུག་རྟགས་ཀྱི་སྐུ༔  ཕྱག་རྒྱ་ཆེན་པོའི་རོལ་པར་ཤར༔  ཕཊ྄་ཕཊ྄་ཕཊ྄༔  ཅེས་ལྷར་སྣང་འོད་གསལ་དུ་བསྡུ་ཞིང་ཟུང་འཇུག་གི་སྐུར་ལྡང་།  ཧོ༔  བསོད་ནམས་ཡེ་ཤེས་ཚོགས་གཉིས་ཀྱིས༔  འགྲོ་རྣམས་སྒྲིབ་གཉིས་ཡོངས་དག་ནས༔  ཁ་སྦྱོར་བཞི་ལྡན་རྟ་མཆོག་དཔལ༔  པདྨ་ཁྲག་འཐུང་མྱུར་འགྲུབ་ཤོག༔  ཅེས་བསྔོ་སྨོན་དང་།  ཨོཾ༔  དབྱིངས་ཀྱི་ངོ་བོ་ཆོས་སྐུ་སྣང་མཐའ་ཡས༔  རིག་པ་རང་སྣང་དབང་ཆེན་ལོངས་སྤྱོད་རྫོགས༔  དབྱིངས་རིག་ཟུང་འཇུག་རྩ་བརྒྱུད་བླ་མ་ཡིས༔  མཆོག་ཐུན་དགེ་ལེགས་འགྲུབ་པའི་བཀྲ་ཤིས་ཤོག༔  ཅེས་ཤིས་པ་བརྗོད་པས་མཚམས་སྦྱར་ཏེ་སྤྱོད་ལམ་ལ་འཇུག་གོ།  །ཞེས་པའང་སྐྱབས་མགོན་སི་ཏུ་མཆོག་སྤྲུལ་རིན་པོ་ཆེའི་ཐུགས་དམ་ཉམས་བཞེས་སུ་ལྷ་རྫས་ཀྱི་མེ་ཏོག་དང་བཅས་ཏེ་བཀའ་སྩལ་རིན་པོ་ཆེའི་ཕྲེང་བ་སྤྱི་བོར་ཕེབས་པ་ལྟར།  མཚོ་སྐྱེས་ཀུན་ཏུ་འཆང་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་སྒྲུབ་བརྒྱུད་བསྟན་པའི་རིང་ལུགས་འཛིན་པ་སྐྱབས་ཆེ་བླ་བྲང་དུ་རབ་བྱུང་བཅོ་ལྔ་པའི་ཐོག་མ་མེ་ཡོས་ཁྲུམས་སྟོད་ཟླ་བའི་དཀར་ཕྱོགས་ཀྱི་ཚེས་བཅུར་བྲིས་ཏེ་ཕུལ་བ་དགེ་ལེགས་སུ་གྱུར་ཅིག  །སརྦ་དཱ་མངྒ་ལཾ་བྷ་བ་ཏུ།།   །། ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-15-BA-014]]
[[Category:Khyentse Lineage Project]]
[[Category:JKW-KABUM-Volume-15-BA]]