View source for JKW-KABUM-15-BA-016-001

{{Khyentse Metadata
|classification=Tibetan Publications
|subclass=Tibetan Texts
|fulltitletib=ཕྲིན་ལས་ཕུར་པའི་གནད་ཏིག་ལས།  སྔོན་འགྲོའི་རྣལ་འབྱོར་སྙིང་པོ།
|fulltitle=phrin las phur pa'i gnad tig las/ sngon 'gro'i rnal 'byor snying po
|fulltitlekartib=ཕུར་པའི་གནད་ཏིག་གི་སྔོན་འགྲོ།
|fulltitlekar=phur pa'i gnad tig gi sngon 'gro
|citation=[['jam dbyangs mkhyen brtse'i dbang po]]. ''phrin las phur pa'i gnad tig las sngon 'gro'i rnal 'byor snying po''. In '''jam dbyangs mkhyen brtse'i dbang po'i bka' 'bum'', Vol. 15: 361-367. Khams sde dge rdzong sar dgon: Rdzong sar blo gros phun tshogs, 2020.
|collectiontitletib=མཁྱེན་བརྩེའི་བཀའ་འབུམ་
|collectiontitle=mkhyen brtse'i bka' 'bum
|author='jam dbyangs mkhyen brtse'i dbang po
|authortib=འཇམ་དབྱངས་མཁྱེན་བརྩེའི་དབང་པོ་
|sourcerevealer='jam dbyangs mkhyen brtse'i dbang po
|sourcerevealertib=འཇམ་དབྱངས་མཁྱེན་བརྩེའི་དབང་པོ་
|tibgenre=Preliminary Practices - sngon 'gro
|terma=Yes
|sabcadcategory=Five
|deity=rdo rje phur pa
|cycle=phrin las phur pa'i gnad tig
|cycletib=ཕྲིན་ལས་ཕུར་པའི་གནད་ཏིག་
|language=Tibetan
|volumenumber=015
|volnumtib=༡༥
|volyigtib=བ་
|totalvolumes=25
|textnuminvol=016
|textsubnumber=001
|pagenumbers=361-367
|totalpages=7
|beginfolioline=1a
|endfolioline=4a1
|totalfolios=4
|multivolumework=No
|rectonotes=sde tshan 16
|versonotes=mkhyen brtse'i bka' 'bum
|colophontib=།ཞེས་པའང་གཞུང་རྩ་བ་དང་།  དཔལ་ཆེན་ཡང་དག་ཟབ་ཏིག་ལས་ཇི་ལྟར་འབྱུང་བ་བཞིན་ངག་འདོན་སྙིང་པོར་དྲིལ་བའི་ཚུལ་གྱིས་མཚོ་སྐྱེས་བླ་མ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པའི་སྡེས་སྦྱར་བའི་དགེ་བས་མཐའ་ཡས་པའི་སེམས་ཅན་ཐམས་ཅད་བླ་མ་རྡོ་རྗེ་གཞོན་ནུའི་གོ་འཕང་ཚེ་འདི་ཉིད་ལ་མངོན་དུ་བྱེད་པའི་རྒྱུར་གྱུར་ཅིག  །སརྦ་དཱ་ཤྲེ་ཡོ་བྷ་བ་ཏུ།།
|colophonwylie=zhes pa'ang gzhung rtsa ba dang /__dpal chen yang dag zab tig las ji ltar 'byung ba bzhin ngag 'don snying por dril ba'i tshul gyis mtsho skyes bla ma dgyes pa'i 'bangs pad+ma 'od gsal mdo sngags gling pa'i sdes sbyar ba'i dge bas mtha' yas pa'i sems can thams cad bla ma rdo rje gzhon nu'i go 'phang tshe 'di nyid la mngon du byed pa'i rgyur gyur cig__/sarba dA shre yo b+ha ba tu//
|rtzlink=Terdzo-KHI-017-1
|recensionlink=JKW-KABAB-20-WA-008
|pdflink=File:JKW-KABUM-15-BA-016.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །ཕྲིན་ལས་ཕུར་པའི་གནད་ཏིག་ལས།  སྔོན་འགྲོའི་རྣལ་འབྱོར་སྙིང་པོ་བཞུགས།།
ན་མོ་གུ་རུ་བཛྲ་ཀཱི་ལ་ཡཱ་ཡ།  །འདིར་སློབ་དཔོན་པྲ་བྷ་ཧསྟིའི་དགོངས་པ།  གུ་རུ་ཤཱཀྱ་སེང་གེས་སྙན་བརྒྱུད་ཟབ་མོར་གདམས་པའི་ཆོས་སྡེ།  དཔལ་ཆེན་ཕུར་པའི་གནད་ཏིག་ལས་སྔོན་འགྲོའི་རྣལ་འབྱོར་སྙིང་པོར་དྲིལ་ཏེ་ཉམས་སུ་བླང་བའི་ཚུལ་ནི།  གཞུང་རྩ་བ་ལས།  དེ་ལ་ཐོག་མར་དབེན་གནས་སུ༔  བདེ་བའི་ཡོ་བྱད་ཚོགས་པར་བྱ༔  ངེས་འབྱུང་དྲག་པོས་རྒྱུད་སྦྱངས་ནས༔  བྱང་ཆུབ་སེམས་མཆོག་རབ་ཏུ་བསྐྱེད༔  བླ་མའི་བྱིན་རླབས་སྙིང་ལ་དབབ༔  ཅེས་གསུངས་ཏེ།  འདི་ལ་གཉིས།  ཐུན་གྱི་སྔོན་འགྲོ་དང་།  ཁྲིད་ཀྱི་སྔོན་འགྲོའོ།  །དང་པོ་ནི།  དབང་དང་མན་ངག་ཐོབ་ཅིང་དམ་ཚིག་དང་སྡོམ་པ་རྣམ་པར་དག་པས་གནས་དབེན་པར་སྟན་བདེ་བ་ལ་འདུག  །ལུས་གནད་བསྲང་།  རླུང་རོ་བསལ།  བྱང་ཆུབ་ཀྱི་སེམས་ཡིད་ལ་བྱས་ཏེ།  བླ་མ་སྤྱི་བོར་བསྒོམ་ཞིང་འདོད་པའི་དོན་ལ་གསོལ་བ་གདབ།  མཐར་རང་ལ་བསྟིམས་ནས་ཐུགས་ཡིད་བསྲེས་ལ་དྲན་པ་མངོན་དུ་བཞག་སྟེ་ཁྲིད་ཀྱི་སྔོན་འགྲོའི་དམིགས་རིམ་ལ་འཇུག་པར་བྱའོ།  །གཉིས་པ་ལ་གཉིས།  ཐུན་མོང་གི་སྔོན་འགྲོ་དང་།  ཐུན་མོང་མ་ཡིན་པའི་སྔོན་འགྲོའོ།  །དང་པོ་ནི།  དཔལ་ཆེན་ཡང་དག་ཟབ་ཏིག་ལས།  དལ་འབྱོར་རྙེད་དཀའ་དོན་ཆེ་དང་༔  མི་རྟག་མྱུར་དུ་འཇིག་པར་བསམ༔  ལས་འབྲས་བླང་དོར་ཚུལ་བཞིན་བྱ༔  འཁོར་བར་ཡིད་འབྱུང་དྲག་ཏུ་བསྐྱེད༔  ཅེས་གསུངས་པ་ལྟར་རེ་རེ་ནས་ཞིབ་ཏུ་དཔྱད་ཅིང་སེམས་བཟུང་ལ་མྱོང་བ་ཐོན་པར་བྱའོ།  །གཉིས་པ་ལ་གསུམ།  ཐེག་པ་སྤྱིའི་འཇུག་སྒོ་སྐྱབས་འགྲོ།  ཐེག་ཆེན་གྱི་རྩ་བ་སེམས་བསྐྱེད།  རྡོ་རྗེ་ཐེག་པའི་ལམ་གྱི་སྙིང་པོ་བླ་མའི་རྣལ་འབྱོར་རོ།  །དང་པོ་ནི།  ཐ་མལ་གྱི་སྣང་བ་དབྱིངས་སུ་ཐིམ་པ་ལས་སྣོད་བཅུད་ཐམས་ཅད་དག་པའི་ཞིང་ཁམས་ཆེན་པོར་གྱུར་པའི་རང་གི་མདུན་གྱི་ནམ་མཁར་མཆོད་སྤྲིན་རྒྱ་མཚོ་འཁྲིགས་པའི་དབུས་སུ།  དྲེགས་པ་ཁྱོ་ཤུགས་ཉི་ཟླའི་གདན་ལ་བླ་མ་དང་གཉིས་སུ་མེད་པའི་དཔལ་ཆེན་པོ་རྡོ་རྗེ་གཞོན་ནུ་སྐྱབས་གནས་ཀུན་འདུས་ཀྱི་ངོ་བོར་མངོན་སུམ་བཞིན་དུ་བཞུགས་པའི་སྤྱན་སྔར་རང་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་སྐྱབས་སུ་འགྲོ་བར་མོས་ལ།  ཨ༔  སྐྱེ་བ་མེད་པའི་དབྱིངས་ཉིད་ལས༔  འགག་མེད་སྣང་བའི་ཕྱག་རྒྱར་བཞེངས༔  དཔལ་ཆེན་རྡོ་རྗེ་གཞོན་ནུ་ལ༔  རང་ངོ་ཤེས་པས་སྐྱབས་སུ་མཆི༔  ཞེས་ཅི་ནུས་སུ་བྱ།  གཉིས་པ་ནི།  སྐྱབས་ཡུལ་དཔང་པོར་བཞུགས་པའི་ཚུལ་གྱིས་སྨོན་འཇུག་གི་དོན་ཡིད་ལ་དྲན་བཞིན་པས།  ཧཱུྃ།  དེ་བཞིན་ཉིད་དབྱིངས་མ་རྟོགས་པའི༔  འགྲོ་ལ་སྙིང་རྗེ་ཆེན་པོའི་བློས༔  རིམ་གཉིས་ཟབ་མོའི་རྣལ་འབྱོར་གྱིས༔  ཁམས་གསུམ་སྒྲོལ་བར་སེམས་མཆོག་བསྐྱེད༔  ཅེས་ཇི་ལྟར་རིགས་པ་བརྗོད་པའི་སྒོ་ནས་གསལ་གདབ།  མཐར་སྐྱབས་ཡུལ་རང་ལ་བསྟིམས་ཏེ་དོན་དམ་བྱང་སེམས་ཀྱི་ངང་དུ་མཉམ་པར་བཞག  གསུམ་པ་ལ་དྲུག  །རྟེན་བསྐྱེད་པ།  ཚོགས་བསག་པ།  སྡིག་སྒྲིབ་སྦྱང་བ།  གསོལ་བ་གདབ་པ།  དབང་བླང་བ།  དེ་ཁོ་ན་ཉིད་ལ་བློ་བཞག་པའོ།  །དང་པོ་ནི།  ཨ༔  སྣོད་བཅུད་འཛིན་ཞེན་དབྱིངས་སུ་ཐིམ༔  སྣང་སྲིད་ཞིང་ཁམས་ཆེན་པོའི་དབུས༔  རང་མདུན་ནམ་མཁར་འོད་ལྔའི་ཀློང་༔  སེང་ཁྲི་པདྨ་ཉི་ཟླའི་སྟེང་༔  རྩ་བའི་བླ་མ་རྡོ་རྗེ་སེམས༔  དཀར་གསལ་རྡོ་རྗེ་དྲིལ་བུ་འཛིན༔  རང་འོད་སྙེམས་མའི་བདེ་བས་དགྱེས༔  དར་དང་རིན་ཆེན་རུས་པས་བརྒྱན༔  ཐུགས་ཀར་ཡེ་ཤེས་སྙིང་པོའི་སྲོག༔  དཔལ་ཆེན་བཛྲ་ཀུ་མཱ་ར༔  མཐིང་ནག་ཕྱག་གཉིས་ཕུར་བུ་འདྲིལ༔  ཡབ་ཡུམ་མཉམ་སྦྱོར་དུར་ཁྲོད་ཆས༔  བདེ་དྲོད་མེ་ཕུང་འབར་བའི་ཀློང་༔  དྲེགས་པ་པད་ཉིའི་གདན་ལ་འགྱིང་༔  འོད་ཟེར་གཟི་བརྗིད་དཔལ་དུ་འབར༔  སྐྱབས་ཀུན་འདུས་པའི་ངོ་བོར་གྱུར༔  གཉིས་པ་ལ་གཉིས།  ཡན་ལག་བདུན་པ་བྱ་བ་དང་།  མཎྜལ་འབུལ་བའོ།  །དང་པོ་ནི།  ཨོཾ་ཨཱཿཧཱུྃ༔  དབྱིངས་ལས་རིག་པ་རང་ཤར་བ༔  བླ་མ་དཔལ་ཆེན་ཞི་ཁྲོའི་ལྷར༔  ཕྱག་འཚལ་མཆོད་སྤྲིན་རྒྱ་མཚོས་མཆོད༔  སྡིག་སྒྲིབ་ཉེས་ལྟུང་སྙིང་ནས་བཤགས༔  དགེ་ལ་ཡི་རང་ཆོས་འཁོར་བསྐུལ༔  རྟག་པར་བཞུགས་གསོལ་དགེ་རྩ་ཀུན༔  ཡང་དག་བྱང་ཆུབ་སྙིང་པོར་བསྔོ༔  རྡོ་རྗེའི་ཡེ་ཤེས་མྱུར་འགྲུབ་ཤོག༔  གཉིས་པ་ནི།  ཨོཾ་ཨཱཿཧཱུྃ༔  འཁོར་འདས་སྣོད་བཅུད་དཔལ་འབྱོར་དང་༔  བདག་ལུས་ཕུང་ཁམས་སྐྱེ་མཆེད་བཅས༔  གཟུང་འཛིན་རྣམ་དག་མཎྜ་ལས༔  བླ་མ་རྒྱལ་བ་སྲས་བཅས་མཆོད༔  ཨོཾ་སརྦ་རཏྣ་མཎྜ་ལ་པཱུ་ཛ་ཨཱཿཧཱུྃ༔  གསུམ་པ་ནི།  ཐུགས་ཀར་ཟླ་སྟེང་ཧཱུྃ་ཡིག་མཐར༔  སྔགས་ཀྱི་ཕྲེང་བས་བསྐོར་བ་ལས༔  བདུད་རྩི་བྱང་ཆུབ་སེམས་ཀྱི་རྒྱུན༔  ཆར་ལྟར་བབས་ཏེ་རང་ལ་ཐིམ༔  ནད་གདོན་སྡིག་སྒྲིབ་ཉམས་ཆག་སྦྱངས༔  བདེ་ཆེན་ཡེ་ཤེས་རྒྱས་པར་གྱུར༔  ཨོཾ་བཛྲ་སཏྭ་ཀཱི་ལི་ཀཱི་ལ་ཡ་ཧཱུྃ་ཧཱུྃ༔  ཞེས་དཔལ་རྡོ་རྗེ་སེམས་དཔའ་དང་བཅོམ་ལྡན་འདས་རྡོ་རྗེ་གཞོན་ནུ་ཞི་ཁྲོའི་སྔགས་སྦྲེལ་བ་ཅི་ནུས་སུ་བཟླ།  བཞི་ པ་ནི།  ཧཱུྃ་ཧཱུྃ་ཧཱུྃ༔  ཆོས་དབྱིངས་སྐྱེ་བ་མེད་པ་ལས༔  རིག་པ་ཡེ་ཤེས་གཟུགས་ཀྱི་སྐུ༔  བླ་མ་དཔལ་ཆེན་ཞི་ཁྲོའི་ལྷ༔  སྐྱབས་ཀུན་འདུས་པའི་བདག་ཉིད་ལ༔  སྙིང་ནས་གུས་པས་གསོལ་འདེབས་ཤིང་༔  ཐུགས་དམ་ཟབ་མོའི་རྒྱུད་བསྐུལ་ན༔  བྱིན་གྱིས་རློབས་ཤིག་བླ་མ་རྗེ༔  དངོས་གྲུབ་སྩོལ་ཅིག་ཡི་དམ་ལྷ༔  བདེ་ཆེན་དབང་སྐུར་མཁའ་འགྲོའི་ཚོགས༔  སྒོ་གསུམ་སྨིན་ཅིང་གྲོལ་བ་དང་༔  འཇའ་ལུས་འགྲུབ་པར་བྱིན་གྱིས་རློབས༔  ཞེས་མོས་གུས་གདུང་ཤུགས་དྲག་པོས་ཡང་ནས་ཡང་དུ་གསོལ་བ་གདབ།  ལྔ་པ་ནི།  རིགས་ཀུན་ཁྱབ་བདག་ཞི་ཁྲོའི་ལྷ༔  སྙོམས་ཞུགས་བྱང་ཆུབ་སེམས་ཀྱི་རྒྱུན༔  སྤྱི་བོ་ནས་བརྒྱུད་གནས་བཞིར་བབས༔  དབང་བཞིའི་ཡེ་ཤེས་འཕེལ་བར་གྱུར༔  ཅེས་བརྗོད་ཅིང་བསམས་ལ་སེམས་གཟུང་།  དྲུག་པ་ནི།  ཐུན་བསྡུ་བའི་ཚེ།  བླ་མ་ཞི་ཁྲོ་ཡབ་ཡུམ་དགྱེས་པ་ཆེན་པོས་འོད་དུ་ཞུ་ནས་རང་ལ་ཐིམ།  རང་གི་ལུས་ངག་ཡིད་གསུམ་དང་།  བླ་མའི་སྐུ་གསུང་ཐུགས་དབྱེར་མེད་དུ་གྱུར་པར་མོས་ཏེ་ཐུགས་ཡིད་བསྲེས་ལ།  རིག་པའི་གཤིས་དམིགས་མེད་དུ་རྗེན་ནེ།  གདངས་བརྗོད་བྲལ་དུ་ལམ་མེ།  དེ་གཉིས་དབྱེར་མི་ཕྱེད་པ་ཟུང་འཇུག་གཉུག་མའི་ངང་བསྐྱང་ཞིང་ལམ་དུ་ཁྱེར་བ་ལ་བསླབ་པར་བྱའོ།  །ཞེས་པའང་གཞུང་རྩ་བ་དང་།  དཔལ་ཆེན་ཡང་དག་ཟབ་ཏིག་ལས་ཇི་ལྟར་འབྱུང་བ་བཞིན་ངག་འདོན་སྙིང་པོར་དྲིལ་བའི་ཚུལ་གྱིས་མཚོ་སྐྱེས་བླ་མ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པའི་སྡེས་སྦྱར་བའི་དགེ་བས་མཐའ་ཡས་པའི་སེམས་ཅན་ཐམས་ཅད་བླ་མ་རྡོ་རྗེ་གཞོན་ནུའི་གོ་འཕང་ཚེ་འདི་ཉིད་ལ་མངོན་དུ་བྱེད་པའི་རྒྱུར་གྱུར་ཅིག  །སརྦ་དཱ་ཤྲེ་ཡོ་བྷ་བ་ཏུ།།   །། ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-15-BA-016]]
[[Category:Khyentse Lineage Project]]
[[Category:JKW-KABUM-Volume-15-BA]]