View source for JKW-KABUM-21-ZHA-003-007

{{Khyentse Metadata
|classification=Tibetan Publications
|subclass=Tibetan Texts
|fulltitletib=བཅོམ་ལྡན་འདས་རྡོ་རྗེ་མི་འཁྲུགས་པའི་སྒྲུབ་ཐབས་ཉུང་གསལ་སྙིང་པོར་དྲིལ་བ་སྒྲིབ་གཉིས་མུན་སེལ།
|fulltitle=bcom ldan 'das rdo rje mi 'khrugs pa'i sgrub thabs nyung gsal snying por dril ba sgrib gnyis mun sel
|citation=[['jam dbyangs mkhyen brtse'i dbang po]]. ''bcom ldan 'das rdo rje mi 'khrugs pa'i sgrub thabs nyung gsal snying por dril ba sgrib gnyis mun sel''. In '''jam dbyangs mkhyen brtse'i dbang po'i bka' 'bum'', Vol. 21: 330-333. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|editortib=
|tibgenre=Sadhanas - Evocation Ritual - sgrub thabs
|terma=No
|sabcadcategory=Eight
|deity=rdo rje mi 'khrugs pa
|language=Tibetan
|volumenumber=021
|volnumtib=༢༡
|volyigtib=ཞ་
|totalvolumes=25
|textnuminvol=003
|textsubnumber=007
|pagenumbers=330-333
|totalpages=4
|beginfolioline=11b1
|endfolioline=13a1
|totalfolios=3
|multivolumework=No
|rectonotes=sde tshan 3
|versonotes=mkhyen brtse'i bka' 'bum
|colophontib=།ཅེས་གྲུབ་པའི་སློབ་དཔོན་ཛེ་ཏཱ་རིས་ལེགས་པར་བཀྲལ་བའི་རྗེས་སུ་འབྲངས་ཏེ་ཉུང་གསལ་སྙིང་པོར་དྲིལ་བའི་ཚུལ་གྱིས་ཤཱཀྱའི་དགེ་སློང་མཉྫུ་གྷོ་ཥས་སྦྱར་བའོ།།
|colophonwylie=ces grub pa'i slob dpon dze tA ris legs par bkral ba'i rjes su 'brangs te nyung gsal snying por dril ba'i tshul gyis shAkya'i dge slong many+dzu g+ho Shas sbyar ba'o
|pdflink=File:JKW-KABUM-21-ZHA-003.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅། །བཅོམ་ལྡན་འདས་རྡོ་རྗེ་མི་འཁྲུགས་པའི་སྒྲུབ་ཐབས་ཉུང་གསལ་སྙིང་པོར་དྲིལ་བ་སྒྲིབ་གཉིས་མུན་སེལ་ཅེས་བྱ་བ་བཞུགས་སོ།  །བླ་མ་རྡོ་རྗེ་མི་འཁྲུགས་པའི།  །ཞབས་ཀྱི་པདྨོར་ཕྱག་བྱས་ནས།  །གང་དེའི་སྒྲུབ་ཐབས་སྒྲིབ་གཉིས་ཀྱི།  །མུན་སེལ་ཟླ་བའི་སྣང་བ་སྦྱིན།  །དེ་ལ་སྐྱབས་སེམས་དང་ཚད་མེད་བཞི་བསྒོམས་པས་བསོད་ནམས་ཀྱི་ཚོགས་བསགས་ནས།  ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ།  ཞེས་པས་ཆོས་ཐམས་ཅད་སྤྲོས་བྲལ་དུ་ཤེས་པས་ཡེ་ཤེས་ཀྱི་ཚོགས་བསགས་ཏེ་ཚོགས་གཉིས་ཀྱི་རང་འབྲས་མཚན་བཅས་ལྷའི་རྣལ་འབྱོར་བསྒོམ་ཞིང་བཟླས་པ་བྱ་བ་ནི།  སྟོང་པའི་ངང་ལས་པཾ་ལས་པདྨ་དང་།  །ཨ་ལས་ཟླ་སྟེང་རང་སེམས་ཧཱུྃ་མཐིང་ལས།  །རྡོ་རྗེ་རྩེ་ལྔའི་ལྟེ་བར་ཧཱུྃ་གིས་མཚན།  །འོད་འཕྲོས་འཕགས་མཆོད་འགྲོ་ཀུན་སྒྲིབ་གཉིས་སྦྱངས།  །ཚུར་འདུས་བདག་ཉིད་རྡོ་རྗེ་མི་འཁྲུགས་པ།  །དབང་སྔོན་མདོག་ཅན་དྭངས་གསལ་འོད་ཟེར་འཕྲོ།  །ཕྱག་གཡས་ས་གནོན་གཡོན་པས་མཉམ་བཞག་སྟེང་།  །རྡོ་རྗེ་ལེགས་འཛིན་ཞི་འཛུམ་མཚན་དཔེས་མཛེས།  །ལྷ་རྫས་ན་བཟའ་རིན་ཆེན་རྒྱན་གྱིས་སྤྲས།  །ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས།  །གནས་གསུམ་ཨོཾ་དཀར་ཨཱཿདམར་ཧཱུྃ་མཐིང་གིས།  །རྡོ་རྗེ་གསུམ་གྱི་ངོ་བོར་བྱིན་གྱིས་བརླབས།  །ཅེས་བརྗོད་ཅིང་བསམས་ལ།  ལག་གཉིས་ཐལ་མོ་སྦྱར་བའི་སྲིན་ལག་བསྣོལ།  མཛུབ་མོ་གུང་མོའི་རྒྱབ་ཏུ་སྦྱར་བའི་དམ་ཚིག་གི་ཕྱག་རྒྱ་གནས་གསུམ་དུ་རེག་ཅིང་།  གཟུངས་སྔགས་ཚར་རེ་བརྗོད་པས་བྱིན་བརླབ།  སླར་ཡང་སྙིང་གའི་ཧཱུྃ་ལས་འོད་འཕྲོས་པས།  །ཡེ་ཤེས་སེམས་དཔའ་བཛྲ་ས་མཱ་ཛཿ  ཨོཾ་ཨརྒྷཾ་སྭཱ་ཧཱ།  ཛ་ཧཱུྃ་བྃ་ཧོཿས་རང་ཐིམ་འོད་ཞུ་བས།  །སྙིང་དབུས་པདྨ་ཟླ་བའི་དཀྱིལ་འཁོར་སྟེང་།  །ཧཱུྃ་ཨོཾ་ཏྲཱྃ་ཧྲཱིཿཨཱཿལས་རིགས་མཆོག་ལྔ།  །མཚན་དཔེའི་དཔལ་འབར་དར་དང་རིན་ཆེན་བརྒྱན།  །འོད་ཟེར་སྣ་ཚོགས་འཕྲོ་བཞིན་བཞུགས་པར་གྱུར།  །ཨོཾ་སརྦ་ཏ་ཐཱ་ག་ཏ་བཛྲ་ཨཀྵཾ་བྷྱ་མཎྜལ་ས་པ་རི་ཝཱ་ར་ཨརྒྷཾ།  སོགས་ཀྱིས་མཆོད།  བཅོམ་ལྡན་རྒྱལ་བ་སྲས་དང་བཅས་རྣམས་ལ།  །གུས་པས་ཕྱག་འཚལ་མཆོད་ཅིང་གསོལ་འདེབས་ན།  །བདག་གཞན་སྡིག་སྒྲིབ་བྱང་ཞིང་དག་པ་དང་།  །མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས།  །སྙིང་གའི་གཙོ་བོའི་ཐུགས་ཀར་ཟླ་དཀྱིལ་སྟེང་།  །དཀར་གསལ་གཟུངས་སྔགས་ཕྲེང་བའི་སྣང་བ་ཡིས།  །འཕགས་པ་མཆོད་ཅིང་འགྲོ་ཀུན་སྡིག་སྒྲིབ་སྦྱངས།  །ཚུར་འདུས་བྱིན་རླབས་གཟི་བྱིན་མཆོག་ཏུ་འབར།  །ཅེས་གསལ་བཏབ་ལ་གཟུངས་སྔགས་ཇི་ཙམ་ནུས་པ་བཟླ།  ཐུན་མཐར་མཚན་མེད་ཀྱི་རྣལ་འབྱོར་ནི།  ཀུན་རྫོབ་རང་སྣང་ལྷ་ཡི་སྐུར།  །མེད་བཞིན་སྣང་བ་སྒྱུ་མའི་གཟུགས།  །དོན་དམ་རང་བཞིན་ལས་འདས་པའི།  །སྤྲོས་པ་བྲལ་བའི་ཡེ་ཤེས་སོ།  །ཞེས་པའི་དོན་ལ་སོ་སོར་རྟོགས་པའི་ཤེས་རབ་ཀྱིས་དཔྱད་དེ་མཉམ་པར་བཞག  །དེ་ལས་ལྡང་བ་ན།  རང་གི་སྙིང་དབུས་ཡེ་ཤེས་པ།  །མདུན་གྱི་ནམ་མཁར་བྱོན་པ་ལ།  །ཏིང་ངེ་འཛིན་གྱིས་རྣམ་སྤྲུལ་པའི།  །མཆོད་པའི་སྤྲིན་ཕུང་རྒྱ་མཚོས་མཆོད།  །གོང་བཞིན་མཆོད་ཅིང་བསྟོད་ལ་གསོལ་བ་གདབ།  ཡི་གེ་བརྒྱ་པ་ལན་གསུམ་གྱི་མཐར།  ནོངས་པ་གང་མཆིས་མཐོལ་བཤགས་ཤིང་།  །ཡེ་ཤེས་པ་རྣམས་ཆོས་དབྱིངས་གཤེགས།  །རང་ཉིད་དམ་ཚིག་སེམས་དཔའ་ཡི།  །གནས་གསུམ་འབྲུ་གསུམ་ཡི་གེས་མཚན།  །དགེ་བ་འདི་ཡིས་མྱུར་དུ་བདག  །ཅེས་སོགས་བསྔོ་སྨོན་བྱ་ཞིང་ཐུན་མཚམས་ཀྱི་བྱ་བ་ལ་འཇུག  །བསྙེན་པ་བྱེད་ན་ཐུན་གསུམ་གྱི་རིམ་པས་གཟུངས་རིང་འབུམ་ཕྲག་བཞིའམ།  གཅིག་བཟླ།  ཐུན་གཉིས་ཀྱི་མཐར་གཏོར་མ་ཆ་གསུམ་ཡང་བཏང་ངོ་།  །བཅོམ་ལྡན་རྡོ་རྗེ་མི་འཁྲུགས་པའི།  །མཚན་བཅས་མཚན་མེད་རྣལ་འབྱོར་གྱི།  །སྣང་བས་སྒྲིབ་པའི་མུན་སེལ་བ།  །ཐམས་ཅད་མཁྱེན་པ་ཉིད་གྱུར་ཅིག  །ཅེས་གྲུབ་པའི་སློབ་དཔོན་ཛེ་ཏཱ་རིས་ལེགས་པར་བཀྲལ་བའི་རྗེས་སུ་འབྲངས་ཏེ་ཉུང་གསལ་སྙིང་པོར་དྲིལ་བའི་ཚུལ་གྱིས་ཤཱཀྱའི་དགེ་སློང་མཉྫུ་གྷོ་ཥས་སྦྱར་བའོ།།   །།   ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-21-ZHA-003]]
[[Category:Khyentse Lineage Project]]
[[Category:JKW-KABUM-Volume-21-ZHA]]