View source for JKW-KABUM-14-PHA-011

{{Khyentse Metadata
|classification=Tibetan Publications
|subclass=Tibetan Texts
|fulltitletib=ཟབ་མོ་བླ་མའི་སྒྲུབ་ཐབས་གདུང་བ་ཞི་བྱེད་ཀྱི་ཕྲིན་ལས་ཁྲིགས་སུ་བསྡེབས་པ་ཡེ་ཤེས་སྙིང་པོ།
|fulltitle=zab mo bla ma'i sgrub thabs gdung ba zhi byed kyi phrin las khrigs su bsdebs pa ye shes snying po
|fulltitlekar=bla sgrub gdung ba zhi byed kyi phrin las ye shes snying po
|fulltitlekartib=བླ་སྒྲུབ་གདུང་བ་ཞི་བྱེད་ཀྱི་ཕྲིན་ལས་ཡེ་ཤེས་སྙིང་པོ།
|citation=[['jam dbyangs mkhyen brtse'i dbang po]]. ''zab mo bla ma'i sgrub thabs gdung ba zhi byed kyi phrin las khrigs su bsdebs pa ye shes snying po''. In '''jam dbyangs mkhyen brtse'i dbang po'i bka' 'bum'', Vol. 14: 153-167. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|sourcerevealer='phreng po gter ston shes rab 'od zer
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|sourcerevealertib=འཕྲེང་པོ་གཏེར་སྟོན་ཤེས་རབ་འོད་ཟེར་
|editortib=
|tibgenre=Activity Manual - las byang
|terma=Yes
|sabcadcategory=Five
|deity=pad+ma 'byung gnas
|cycle=pad+ma'i zhal gdams rtsa gsum mthong ba rang grol
|cycletib=པདྨའི་ཞལ་གདམས་རྩ་གསུམ་མཐོང་བ་རང་གྲོལ་
|parentcycle=grol tig dgongs pa rang grol gyi chos sde
|parentcycletib=གྲོལ་ཏིག་དགོངས་པ་རང་གྲོལ་གྱི་ཆོས་སྡེ་
|language=Tibetan
|rtzlink=Terdzo-NYA-006
|volumenumber=014
|volnumtib=༡༤
|volyigtib=ཕ་
|totalvolumes=25
|textnuminvol=011
|pagenumbers=153-167
|totalpages=15
|beginfolioline=1a
|endfolioline=8a6
|totalfolios=8
|multivolumework=No
|rectonotes=sde tshan 11
|versonotes=mkhyen brtse'i bka' 'bum
|colophontib=།ཅེས་པདྨའི་ཞལ་གདམས་རྩ་གསུམ་མཐོང་བ་རང་གྲོལ་གྱི་ཆོས་སྡེ་བླ་སྒྲུབ་གདུང་བ་ཞི་བྱེད་ཀྱི་ཕྲིན་ལས་ཁྲིགས་སུ་བསྡེབས་པ་འདིའང་རང་གཞན་མང་པོར་བྱིན་རླབས་ཀྱི་ཡེ་ཤེས་ལྷག་པར་སྨིན་པའི་སླད་དུ།  མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གཏེར་གཞུང་རྡོ་རྗེའི་ཚིག་རྐང་ཁོ་ན་རྒྱས་བསྡུས་འཚམས་པར་སྦྱར་བ་དགེ་ལེགས་མཆོག་ཏུ་གྱུར་ཅིག།  །།མངྒལཾ།།
|colophonwylie=ces pad+ma'i zhal gdams rtsa gsum mthong ba rang grol gyi chos sde bla sgrub gdung ba zhi byed kyi phrin las khrigs su bsdebs pa 'di'ang rang gzhan mang por byin rlabs kyi ye shes lhag par smin pa'i slad du/__mtsho skyes bla ma dgyes pa'i 'bangs mkhyen brtse'i dbang pos gter gzhung rdo rje'i tshig rkang kho na rgyas bsdus 'tshams par sbyar ba dge legs mchog tu gyur cig/__//mang+galaM//
|pdflink=File:JKW-KABUM-14-PHA-011.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །པ དྨ སྱ བ ཀྟྲ མ བ བཱ ད ཏྲི མཱུ ལ ད ཪྴ སྭ མོ ཙ ནཱ ཏྲ། གུ རུ སཱ གྷ ན དཱབྟ ཤྴཱ ནྟ ཀ རྟུ ཪྐ རྨ ལེ ཁཱ སཾ ཡོ ཛི ཏ ཛྙཱ ན ག  རྦྷ ནཱ མཱ སྟི།། 
༄༅།  །པདྨའི་ཞལ་གདམས་རྩ་གསུམ་མཐོང་བ་རང་གྲོལ་ལས།  བླ་སྒྲུབ་གདུང་བ་ཞི་བྱེད་ཀྱི་ཕྲིན་ལས་ཁྲིགས་སུ་བསྡེབས་པ་ཡེ་ཤེས་སྙིང་པོ་ཞེས་བྱ་བ་བཞུགས་སོ། 

།ཟབ་མོ་བླ་མའི་སྒྲུབ་ཐབས་གདུང་བ་ཞི་བྱེད་ཀྱི་ཕྲིན་ལས་ཁྲིགས་སུ་བསྡེབས་པ་ཡེ་ཤེས་སྙིང་པོ་ཞེས་བྱ་བ།  བདེ་གཤེགས་ཀུན་འདུས་པདྨ་འབྱུང་གནས་ལ་ཕྱག་འཚལ་ལོ།  །མཁའ་ཁྱབ་རྒྱལ་བ་སྲས་བཅས་ཐམས་ཅད་ཀྱི།  །སྐུ་དང་ཡེ༷་ཤེ༷ས་རྒྱ་མཚོའི་བདག་ཉིད་ཆེ།  །ཀུན་ཏུ་བཟང་པོ་པདྨ་སཾ་བྷ་བར།  །བཏུད་ནས་ལམ་ཟབ་སྙིང༷་པོ༷འི་ཕྲིན༷་ལ༷ས་དབྱེ།  །འདི་ལ་གསུམ།  སྦྱོར་བ།  དངོས་གཞི།  རྗེས་སོ།  །དང་པོ་ནི།  ཡིད་དང་མཐུན་པའི་གནས་སུ་དུས་ཁྱད་པར་ཅན་གྱི་ཚེ།  དམ་ཚིག་དང་ལྡན་པའི་སྒྲུབ་པ་པོས་གོང་དུ་རྩ་གསུམ་གྱི་སྣང་བརྙན་སོགས་རྟེན་ཁྱད་པར་ཅན་བཀྲམ་པའི་སྤྱན་སྔར།  བླ་གཏོར་པདྨ་འདབ་བརྒྱད་ཟེའུ་འབྲུ་དང་བཅས་པའི་སྟེང་དུ་ནོར་བུ་བཞི་སྒྲོམ་མེ་རི་དང་བཅས་པའི་མཐར་པད་ཆུང་བརྒྱད་ཀྱིས་བསྐོར་བ་རྒྱན་སྤྲོས་གང་མཛེས་ཀྱི་གཡས་གཡོན་དུ་སྨན་རག་དང་།  མདུན་དུ་ཉེར་སྤྱོད་སོགས་བཀོད་མཛེས་སུ་བསྟར།  ཆོ་གའི་སྦྱོར་བ་དངོས་ལ།  ཚོགས་བསག་སྔོན་གཏོར་སྲུང་འཁོར་བསྒོམ།  །བྱིན་དབབ་མཆོད་པ་བྱིན་གྱིས་བརླབ།  ཅེས་ལྔ་ལས།  དང་པོ་ནི།  སྐྱབས་ཡུལ་ནམ་མཁའ་གང་བར་སད་པའི་སྤྱན་སྔར།  ཧཱུྃ།  བླ་མ་ཡི་དམ་ཌཱ་ཀི་ཀུན་གྱི་མཆོག༔  སྐུ་གསུང་ཐུགས་ནི་དཀོན་མཆོག་གསུམ་གྱི་དཔལ༔  སྒོ་གསུམ་དད་པས་འདི་བཟུང་བྱང་ཆུབ་བར༔  བདག་སོགས་འགྲོ་ཀུན་གུས་པས་སྐྱབས་སུ་མཆི༔  ལན་གསུམ་གྱིས་སྐྱབས་སུ་འགྲོ།  ཧཱུྃ།  བླ་མ་རྩ་གསུམ་སྐྱབས་ཀྱི་མཆོག་ཏུ་འཛིན༔  འགྲོ་བའི་དོན་དུ་སྨོན་འཇུག་སེམས་བསྐྱེད་དེ༔  སྐུ་གསུང་ཐུགས་དང་མཉམ་སྦྱོར་གསང་སྔགས་ཀྱི༔  དམ་ཚིག་སྡོམ་པ་རྟག་ཏུ་བསྐྱང་བར་བགྱི༔  ལན་གསུམ་གྱིས་སེམས་བསྐྱེད།  ཧཱུྃ།  རྣམ་དག་མཉམ་པའི་ངང་ཉིད་ལས༔  བླ་མ་རྩ་གསུམ་ལྷ་ཚོགས་གཤེགས༔  ཉི་ཟླ་པདྨའི་གདན་ལ་བཞུགས༔  ཕྱག་འཚལ་མཆོད་འབུལ་སྡིག་པ་བཤགས༔  དགེ་ལ་ཡི་རང་ཆོས་འཁོར་བསྐོར༔  བཞུགས་གསོལ་འདེབས་སོ་དགེ་རྩ་བསྔོ༔  འགྱུར་མེད་རྡོ་རྗེའི་དོན་རྟོགས་ཤོག༔  ཅེས་ཡན་ལག་བདུན་པས་རྒྱུད་སྦྱང་ངོ་།  །གཉིས་པ་ནི།  རང་ཉིད་སྐད་ཅིག་གིས་བླ་མ་དྲག་པོ་དྲེགས་པ་ཟིལ་གྱིས་གནོན་པའི་སྐུར་གྱུར།  སྔོན་གཏོར།  རྃ་ཡྃ་ཁྃ་གིས་བསང་སྦྱང་།  ཨོཾ་ཨཱཿཧཱུྃ་གིས་བརླབ།  ཧཱུྃ།  ཡུལ་ཕྱོགས་འདི་དག་ཀུན་ལ་གནས་པ་ཡི༔  ལྷ་ཀླུ་གནོད་སྦྱིན་སྲིན་པོ་འབྱུང་པོ་དང་༔  ཡི་དྭགས་ཤ་ཟ་རྗེད་བྱེད་སྨྱོ་བྱེད་དང་༔  མཁའ་འགྲོ་མ་མོ་འཁོར་དང་བཅས་པ་རྣམས༔  མཆོད་སྦྱིན་གཏོར་མ་བཟང་པོ་འདི་ཉིད་བཞེས༔  བར་དུ་གཅོད་པའི་བསམ་སྦྱོར་ངན་སྤོངས་ལ༔  ཞི་དང་ཕན་པའི་སེམས་ཀྱིས་གནས་པར་གྱིས༔  མ་ཧཱ་པཉྩ་བ་ལིཾ་ཏ་ཁཱ་ཧི་ཁཱ་ཧི༔  ཞེས་བསྔོ།  ཧཱུྃ།  ཡེ་ཤེས་རོལ་པ་དཔལ་གྱི་སྐུར་གསལ་བའི༔  སྐུ་གསུང་ཐུགས་ལས་སྤྲུལ་པའི་ཁྲོ་ཚོགས་ཀྱིས༔  བགེགས་རིགས་མ་ལུས་རྒྱ་མཚོའི་མཐར་བསྐྲད་བགྱི༔  ཨོཾ་སུམྦྷ་ནི་སུམྦྷ་ཧཱུྃ༔  གྲྀཧྞ་གྲྀཧྞ་ཧཱུྃ༔  གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ༔  ཨཱ་ན་ཡ་ཧོཿ  བྷ་ག་ཝཱ་ན་བི་དྱཱ་རཱ་ཛཱ་ཡ་ཧཱུྃ་ཕཊ༔  ཅེས་བསྐྲད།  གསུམ་པ་ནི།  ཧཱུྃ།  ཡེ་ཤེས་རོལ་པ་དཔལ་གྱི་ཐུགས་ལས་བྱུང་༔  རྡོ་རྗེ་འཁོར་ལོ་རལ་གྲི་རྒྱ་གྲམ་དང་༔  མདའ་མཚོན་ཕུར་བུ་མེ་ཕུང་ཕྱོགས་མཚམས་གཏམས༔  བསྐལ་པའི་རླུང་ཡང་གནས་འདིར་ལྡང་མི་འགྱུར༔  ཨོཾ་བཛྲ་ཙཀྲ་ཏཱིཀྵྞ་ཀརྨ་ཀཱི་ལཱ་ཡ་ཛྭ་ལ་རྃ་ཧཱུྃ་ཕཊ༔  བཞི་པ་ནི།  ཧཱུྃ།  བླ་མ་ཡི་དམ་ཌཱ་ཀིའི་སྐུ་གསུང་ཐུགས༔  རང་རྩལ་འགག་མེད་ནམ་མཁའི་མཐའ་དང་མཉམ༔  ཛཿཧཱུྃ་བྃ་ཧོཿཆོས་དབྱིངས་གནས་ནས་གཤེགས༔  གཉིས་མེད་བརྟན་བཞུགས་བྱིན་དབང་བསྐུར་དུ་གསོལ༔  ཨོཾ་ཨཱཿཧཱུྃ་ཧྲཱིཿབཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མཱ་ཛཿཛཿ  ཨཱ་བེ་ཤ་ཡ་ཨ་ཨཱཿ  ལྔ་པ་ནི།  ཧཱུྃ།  བླ་མ་རྩ་གསུམ་སྣང་སྲིད་དག་པ་ལ༔  རང་རྩལ་མ་འགགས་མཆོད་པའི་ཆོ་འཕྲུལ་གྱིས༔  ཀུན་བཟང་མཆོད་སྤྲིན་རྒྱ་མཚོར་བྱིན་བརླབས་ནས༔  ཡེ་ཤེས་ལྔ་རྫོགས་སྐུ་གསུང་ཐུགས་སུ་བརླབ༔  ཨོཾ་ཨཱཿཧཱུྃ་སརྦ་པཱུ་ཛ་མེ་གྷ་ཨཱཿཧཱུྃ༔  ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་མ་ཧཱ་བ་ལིཾ་ཏ་མ་ཧཱ་རཀྟ་ཧཱུྃ་ཧྲཱིཿཋཱ༔  མ་ཧཱ་བཛྲ་ཧཱུྃ༔  བཛྲ་གཎྜེ་ཨཿ  གཉིས་པ་དངོས་གཞི་ལ།  གཞུང་གི་དགོངས་པ་དངོས་བསྟན་ཐོག་མར་ཡེ་ཤེས་པ་སྤྱན་དྲངས།  དེ་ཉིད་མདུན་བསྐྱེད་ཀྱི་ཚུལ་དུ་གསལ་གདབ་ཅིང་མཆོད་བསྟོད་བཟླས་པས་ཐུགས་རྒྱུད་བསྐུལ་བ་ཡིན་ནའང་།  བརྒྱུད་པའི་ཕྱག་གཞེས་སུ།  བདག་མདུན་དབྱེར་མེད་དུ་བསྐྱེད་ཅིང་སྤྱན་དྲང་བ་སོགས་གསུང་བ་སྤྱིའི་འགྲོས་ལྟར་མཛད་པས།  ལྷ་བསྐྱེད་སྤྱན་དྲང་དབྱེར་མེད་བསྟིམ།  །མཆོད་ཅིང་བཟླས་པས་བསྙེན་སྒྲུབ་བྱ།  །ཞེས་པ་ལྟར་ལྔ་ལས།  དང་པོ་ནི།  ཧཱུྃ།  ཆོས་རྣམས་ཡེ་ནས་བརྡལ་བ་ཆེན་པོའི་ངང་༔  འགྱུར་མེད་རི་རབ་མཛེས་ཤིང་ལྷུན་ཆགས་དབུས༔  རིན་ཆེན་སྣ་ལྔ་ལས་གྲུབ་གཞལ་མེད་ཁང་༔  མུ་ཏིག་ཚོགས་འབར་ཟླ་ཤེལ་བ་གམ་ཅན༔  རིན་ཆེན་ཏོག་དང་དྲྭ་ཕྱེད་པུ་ཤུས་སྤྲས༔  འདོད་སྣམ་མཆོད་པའི་ལྷ་མོ་མཛེས་མས་གང་༔  སྒོ་བཞིར་རྟ་བབས་རིགས་བཞིའི་གིང་དང་བཅསཿ  ཕྱོགས་བཞི་མཚམས་བརྒྱད་གདུང་སེལ་རྫིང་བུས་བསྐོར༔  དཔག་བསམ་བུམ་བཟང་མེ་ཏོག་སྣ་ཚོགས་ལྡན༔  བར་མཚམས་རིག་འཛིན་དཔའ་བོ་མང་པོས་གཏམས༔  དེ་དབུས་པད་སྡོང་འདབ་རྒྱས་ཡངས་པའི་སྟེང་༔  སེང་ཁྲི་པདྨ་ཉི་མའི་གདན་ཁྲི་ལ༔  ཡིད་འཕྲོག་འཇའ་ཚོན་སྣ་ལྔའི་གུར་ཁྱིམ་དབུས༔  རང་རིག་བདེ་ཆེན་སྐུར་བཞེངས་པདྨ་འབྱུང་༔  ཟ་འོག་ཕོད་དང་ཆོས་གོས་སྨུག་བེར་གསོལ༔  སྙན་ཞུ་འཇམ་མཉེན་རབ་མཛེས་དར་སྣས་སྤྲས༔  གཡས་གཡོན་ཕྱག་གཉིས་རྡོ་རྗེ་བུམ་ཐོད་བསྣམས༔  ཞབས་གཉིས་ཕྱེད་སྐྱིལ་རྒྱལ་པོ་རོལ་སྟབས་པང་༔  དོན་དམ་འོད་གསལ་འགྱུར་མེད་མཚོ་རྒྱལ་ཡུམ༔  གཅེར་བུ་གྲི་ཐོད་སྐུ་སྨད་རྒྱན་ཆ་འཁྲོལ༔  སྣང་ལ་མ་གྲུབ་བདེ་སྟོང་ལྷ་སྐུར་བཞུགས༔  གནས་གསུམ་རྡོ་རྗེ་གསུམ་གྱི་ཡི་གེས་མཚན༔  དེ་ལས་འོད་འཕྲོས་རང་བཞིན་གནས་མཆོག་དང་༔  ཁྱད་པར་པདྨ་འོད་ཀྱི་ཕོ་བྲང་ནས༔  ཡེ་ཤེས་ལྷ་ཚོགས་བཛྲ་ས་མཱ་ཛཿ  གཉིས་པ་ནི།  ཧཱུྃ།  ཆོས་རྣམས་ཡེ་ནས་བརྡལ་བ་ཆེན་པོའི་ངང་༔  ལྷུན་གྲུབ་བདེ་བ་ཆེན་པོའི་ཕོ་བྲང་ནས༔  དུས་གསུམ་བདེ་གཤེགས་ཀུན་འདུས་པདྨ་འབྱུང་༔  རིག་འཛིན་དཔའ་བོ་མཁའ་འགྲོའི་ཚོགས་དང་བཅས༔  ཐོགས་མེད་ཐུགས་རྗེའི་དབང་གིས་གཤེགས་སུ་གསོལ༔  ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་ཌཱ་ཀི་ནཱི་སརྦ་སིདྡྷི་ཕ་ལ་ཧཱུྃ་ཨཱཿ  གསུམ་པ་ནི།  ཧཱུྃ།  གདོད་ནས་གཉིས་མེད་མཉམ་པའི་ངང་ཉིད་ལས༔  བློ་སྦྱང་ཕྱིར་དུ་དམ་ཚིག་ཡེ་ཤེས་སེམས༔  ཆུ་ལ་ཆུ་བཞག་སྒྱུ་མ་ཇི་བཞིན་དུ༔  དུ་མར་སྣང་ཡང་རོ་གཅིག་བརྟན་པར་བྱ༔  ཛཿཧཱུྃ་བྃ་ཧོཿཀཱ་ཡ་ཝཱ་ཀ་ཙིཏྟ་ཏིཥྛ་བཛྲ་ལྷན༔  བཞི་པ་ལ།  ཐོག་མར་ཕྱག་འཚལ་བ་ནི།  ཧཱུྃ།  བདེ་གཤེགས་ཀུན་འདུས་རིག་འཛིན་བླ་མའི་ཚོགས༔  རང་ཤེས་འཁྲུལ་བྲལ་བརྡ་དང་གར་གྱི་ཕྱག༔  རྣམ་དག་ཡེ་ཤེས་ཆེན་པོ་རྟོགས་བྱའི་ཕྱིར༔  སྲི་ཞུ་གུས་པས་འཕྲུལ་དགའི་ཚུལ་ཕྱག་འཚལ༔  ན་མོ་པུ་རུ་ཤ་ཡ་ཧོ༔  ཨ་ཏི་པུ་ཧོཿ  པྲ་ཏཱིཙྪ་ཧོཿ  ཕྱི་ནང་གསང་བའི་མཆོད་སྤྲིན་རབ་འབྱམས་སུ་སྤྲོས་ཏེ།  ཨོཾ་ཨཱཿཧཱུྃ༔  ཕྱི་ཡི་མཆོད་པ་ས་དང་བར་སྣང་ཁེངས༔  ནང་གི་མཆོད་པ་ཟག་མེད་བདུད་རྩིའི་ཚོགས༔  གསང་བ་བདེ་ཆེན་སྨྲ་བསམ་བརྗོད་ལས་འདས༔  འགྲོ་བའི་དོན་དུ་དགྱེས་བཞིན་བཞེས་སུ་གསོལ༔  ཨོཾ་བཛྲ་པུཥྤེ་ནས།  ཤབྡ་པཉྩ་ཀཱ་མ་གུ་ཎ་མཧཱ་ཨ་མྲྀ་ཏ་བ་ལིཾ་ཏ་རཀྟ་མཧཱ་སུ་ཁ་སརྦ་པཱུ་ཛ་ཨཱཿཧཱུྃ༔  བསྟོད་པའི་མཆོད་པ་ནི།  རང་བཞིན་ཆོས་ཀྱི་དབྱིངས་ལས་མ་གཡོས་ཀྱང་༔  ཐུགས་རྗེའི་ཕྲིན་ལས་བརྟན་གཡོ་ཀུན་སྤྲུལ་ནས༔  སྣ་ཚོགས་ཐབས་ལྡན་འགྲོ་བ་འདུལ་མཛད་པའི༔  བདེ་གཤེགས་ཀུན་འདུས་པདྨ་འབྱུང་ལ་འདུད༔  ལྔ་པ་ནི།  བདག་ཉིད་སློབ་དཔོན་ཆེན་པོའི་ཐུགས་ཀ་རུ༔  ཆགས་བྲལ་པདྨ་ཐབས་ཤེས་ཉི་ཟླའི་དབུས༔  གཅིག་ཏུ་འཛིན་པའི་ཁ་དོག་དང་བྲལ་བའི༔  འོད་ལྔ་ཡེ་ཤེས་ལྔ་ལྡན་ཧཱུྃ་གི་མཐར༔  སྔགས་ཕྲེང་འཁོར་བའི་ཟེར་གྱིས་རྒྱལ་བ་མཆོད༔  བྱིན་རླབས་དངོས་གྲུབ་ཚུར་འདུས་རང་ལ་ཐིམ༔  སླར་འཕྲོས་ཁམས་གསུམ་འགྲོ་བའི་ལས་ཉོན་སྦྱངས༔  སྣང་སྲིད་ལྷ་སྔགས་བདེ་སྟོང་འཁོར་ལོར་གྱུར༔  ཅེས་དགོངས་པའི་སྲོག་ཏུ་བཟུང་ལ།  ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་ཌཱ་ཀི་ནཱི་སརྦ་སིདྡྷི་ཕ་ལ་ཧཱུྃ་ཨཱཿ  ཞེས་གཙོ་བོར་བསྙེན་སྔགས་དང་།  ཨོཾ་ཨཱཿཧཱུྃ་བཛྲ་གུ་རུ་པདྨ་ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧཱུྃ༔  ཞེས་སྒྲུབ་སྔགས་ཀྱང་ཅི་རིགས་པར་བཟླ།  འཁོར་འདས་དབྱེར་མེད་བདེ་བ་ཆེན་པོའི་དབྱིངས་སུ་མཉམ་པར་གཞག  །ཐུན་ལས་ལྡང་བ་ན་མཆོད་བསྟོད་དང་།  ཡེ་ནས་རང་རིག་བླ་མ་པདྨ་འབྱུང་༔  བདེ་ཆེན་འགྱུར་མེད་ཡེ་ཤེས་མཚོ་རྒྱལ་ཡུམ༔  སྐྱོན་བྲལ་དྲི་མེད་ཀུན་མཁྱེན་པདྨ་འབྱུང་༔  རྟག་པར་ངག་ཏུ་ཁྱོད་ཀྱི་ཛཔ྄་བཟླས་པས༔  སྐད་ཅིག་ཙམ་ཡང་ཁྱེད་སྐུ་བརྗེད་མ་གྱུར༔  ཚེ་རབས་ཀུན་ཏུ་ཐུགས་རྗེས་གཟུང་དུ་གསོལ༔  ཚུལ་བཞིན་བསྒྲུབས་ཀྱང་ཁྱོད་སྐུ་མི་སྟོན་ན༔  འགྲོ་དོན་མཛད་པའི་སྐུ་མཆོག་མེད་དམ་ཅི༔  བུམ་བཟང་ཡིད་བཞིན་དཔག་བསམ་རེ་སྐོང་ན༔  ཁྱོད་ཀྱི་ཐུགས་བསྐྱེད་གཞན་དོན་གང་དུ་ཐལ༔  མགོན་ཁྱོད་ཐོས་སམ་སྐད་ཅིག་དྲན་པས་ཀྱང་༔  གཉིས་སུ་འཛིན་པའི་ཀུན་རྟོག་གཞོམ་འགྱུར་ན༔  བདག་ཅག་གཉིས་འཛིན་ཟད་ཚེ་ཅི་ཞིག་དགོས༔  ཀུན་བཟང་མངོན་གྱུར་ཁྱེད་ལ་གསོལ་ཅི་འཚལཿ  འཁྲུལ་མེད་ཐུགས་རྗེའི་ཞགས་པས་དྲང་དུ་གསོལ༔  ཞེས་གསོལ་བ་གདབ།  དེ་ཡང་ཇི་སྐད་དུ་གཞུང་རྡོ་རྗེའི་ཚིག་རྐང་ལས༔  མ་འོངས་དུག་ལྔའི་ཁ་འཆལ་གདུལ་དཀའ་བས༔  འབོད་པའི་གདུང་ཤུགས་གསོལ་བ་མ་བཏབ་ན༔  ང་ཡི་ཐུགས་རྗེ་ཅུང་ཟད་འཇུག་པར་དཀའ༔  ཁ་ཙམ་མ་ཡིན་སྙིང་ནས་གསོལ་བ་ཐོབ༔  དངོས་ཉམས་ཡིད་ལ་དག་སྣང་དཔག་མེད་འབྱུང་༔  གདུང་བས་གསོལ་བཏབ་ཆོས་དབྱིངས་ཆེན་པོར་གཞག༔  ཅེས་འབྱུང་བ་ལྟར་རང་རིག་གཉུག་མའི་ཡེ་ཤེས་ཆོས་དབྱིངས་ཀ་དག་གི་དགོངས་པ་ལས་མ་གཡོས་བཞིན་དུ།  རྩལ་མོས་གུས་སུ་དུང་ངེ་བའི་ངང་ནས་གདུང་བའི་ཤུགས་དྲག་ཏུ་བསྐྱེད་པར་བྱའོ།  །གསུམ་པ་རྗེས་ལ།  ཚོགས་མཆོད་བྱ་ཞིང་དངོས་གྲུབ་བསྐུལ།  །ཉེར་བསྡུ་བསྔོ་སྨོན་བཀྲ་ཤིས་བརྗོད།  །ཅེས་པ་ལྟར་ལྔ་ལས་དང་པོ་ཚོགས་ཀྱི་མཆོད་པ་རྗེས་འབྲེལ་དང་བཅས་པ་ལའང་བཅུ་གཅིག་གི  །དང་པོ་བྱིན་གྱིས་བརླབ་པ་ནི།  ནང་མཆོད་འཐོར་ཞིང་།  ཧཱུྃ།  རུ་སྦལ་ཁོག་པའི་སྣོད་ཡངས་སུ༔  ཤ་ལྔ་བདུད་རྩི་རྣམ་ལྔ་དང་༔  དབང་པོ་ལྔ་དང་གོ་རོ་ཙ༔  བ་སུ་ཏ་དང་ནང་ཁྲོལ་ལྔ༔  བཟའ་དང་བཏུང་བ་འབྲས་བུར་བཅསཿ  ཚོགས་རྫས་ཡུལ་གྱི་འདོད་ཡོན་རྣམས༔  འབྲུ་གསུམ་འོད་ཀྱིས་བྱིན་བརླབས་ཤིང་༔  མི་གཙང་རྟོག་སྒྲིབ་སྦྱངས་སྤེལ་ནས༔  ཨོཾ་ཨཱཿཧཱུྃ་དང་ཧ་ཧོ་ཧྲཱིཿས༔  བྱིན་བརླབས་བདུད་རྩིའི་རྒྱ་མཚོར་གྱུར༔  གཉིས་པ་ཚོགས་ཞིང་སྤྱན་འདྲེན་པ་ནི།  ཧཱུྃ།  བླ་མ་ཡི་དམ་མཁའ་འགྲོ་དང་༔  དམ་ཅན་རྒྱ་མཚོའི་ཚོགས་བཅས་རྣམས༔  ཚོགས་གཏོར་མགྲོན་དུ་སྤྱན་འདྲེན་ནོ༔  གནས་མཆོག་དམ་པ་ཉམས་རེ་དགའ༔  བདེ་ལྡན་པདྨ་འོད་ཀྱི་ཞིང་༔  ཚོགས་དང་གཏོར་མ་མདངས་དང་ལྡན༔  དཔལ་ལྡན་མཛེས་པའི་ཕོ་བྲང་ཡིན༔  འདིར་ཚོགས་རྣལ་འབྱོར་དམ་རེ་གཙང་༔  འདོད་ཡོན་རེ་སྐོང་ལྷུན་གྱིས་གྲུབ༔  འོག་མིན་གནས་དང་པདྨ་བརྩེགས༔  དུར་ཁྲོད་བརྒྱད་དང་གནས་ཡུལ་དང་༔  ཨོ་རྒྱན་གནས་ནས་གཤེགས་སུ་གསོལ༔  གུ་རུ་དྷེ་ཝ་ཌཱ་ཀི་ནཱི་དྷརྨ་པཱ་ལ་བཛྲ་ས་མ་ཡ་ཛཿ  གསུམ་པ་བཞུགས་སུ་གསོལ་བ་ནི།  ཧཱུྃ།  ཕོ་བྲང་ཡིད་འོང་མཛེས་པ་འདིར༔  བླ་མ་ཡི་དམ་མཁའ་འགྲོ་རྣམས༔  བདག་དང་འགྲོ་ལ་ཞལ་བསྟན་ཕྱིར༔  པདྨ་ཉི་ཟླའི་གདན་ལ་བཞུགསཿ  པདྨ་ཙནྡྲ་སཱུཪྻ་སྟྭཾ༔  བཞི་པ་ཚོགས་ཕུད་འབུལ་བ་ནི།  ཧཱུྃ།  སྣོད་ཀྱི་འཇིག་རྟེན་ཡངས་པ་རུ༔  བཅུད་སོགས་འདོད་ཡོན་དྲུག་ལྡན་འདི༔  ཏིང་འཛིན་སྔགས་ཀྱིས་བྱིན་བརླབས་པས༔  ཚོགས་མཆོད་གཏོར་མས་ཐུགས་དམ་བསྐང་༔  དཔག་བསམ་ཤིང་ཆེན་རེ་སྐོང་ཞིང་༔  ཡིད་བཞིན་ནོར་བུ་དགོས་འདོད་ཆར༔  ཀུན་བཟང་མཆོད་སྤྲིན་མཁའ་ཁྱབ་ཀྱིས༔  རིགས་ཀྱི་བླ་མ་འགྲོ་བའི་མགོན༔  ཁྱབ་བདག་ཡི་དམ་མཁའ་འགྲོའི་ཚོགས༔  བཀའ་སྲུང་གཉེར་གཏད་དམ་ཅན་རྣམས༔  ཐུགས་དམ་གཉན་པོ་དེས་བསྐང་ལ༔  ཚངས་པའི་དངོས་གྲུབ་སྩལ་དུ་གསོལ༔  ག་ཎ་ཙཀྲ་པཱུ་ཛ་ཁཱ་ཧི༔  བར་པ་བཤགས་པ་ནི།  ཧོཿ  ཡེ་ཤེས་སྤྱན་ལྡན་ཐུགས་རྗེའི་ཚོགས༔  ཡུད་ཙམ་བདག་ལ་ཉེར་དགོངས་ལ༔  མཚམས་མེད་ལྔ་དང་ཉེ་བ་ལྔ༔  ལྕི་བ་བཞི་དང་ལོག་པ་བརྒྱད༔  ཁ་ན་མ་ཐོ་སྡིག་པའི་ལས༔  གནོང་འགྱོད་དབང་གིས་མཐོལ་ལོ་བཤགས༔  ཡི་གེ་བརྒྱ་པ་བརྗོད།  དྲུག་པ་ཚོགས་ཐ་མ་ལ།  སྣང་སྲིད་ཡེ་སྒྲོལ་གྱི་དགོངས་པས་བསྒྲལ་བ་ནི།  ཧཱུྃ།  སྣང་སྲིད་ཡེ་ནས་དག་པ་ལ༔  ཡེ་ཤེས་རྩལ་ལ་དགྲར་འཛིན་མཁན༔  རང་རང་ལས་ལ་གཞན་དུ་སྣང་༔  ཐམས་ཅད་རོ་མཉམ་མཚོན་ཆས་བསྒྲལ༔  མཱ་ར་ཡ་རྦད༔  བསྒྲལ་མཐར་ཡེ་སྦྱོར་གྱི་དགོངས་པས་བསྟབ་པ་ནི།  བདག་ཏུ་འཛིན་པ་རང་གི་སེམས༔  སྣང་བ་ཡེ་ཤེས་ཀློང་དུ་བསྟབ༔  འཁྲུལ་རྟོག་ལས་ཀྱི་ཚོགས་བརྒྱད་རྣམས༔  སྐྱེ་མེད་རྟོགས་པའི་མཚོན་གྱིས་གཏུབས༔  བསྟབ་བོ་ཀུན་བཟང་ཀློང་དུ་བསྟབ༔  མཱཾ་ས་རཀྟ་ཀེཾ་ནི་རི་ཏི་ག་ཎ་ཙཀྲ་ཁཱ་ཧི༔  བདུན་པ་ཚོགས་ལ་རོལ་པ་ནི།  བརྡ་དང་བརྡའི་འབུལ་ལེན་སྤྱི་ལྟར་བྱས་ལ་ཕུང་ཁམས་སྐྱེ་མཆེད་གདན་གསུམ་ཚང་བའི་དཀྱིལ་འཁོར་དུ་ཤེས་པས་བཟའ་བའི་དམ་ཚིག་ནང་གི་སྲེག་བླུགས་ཀྱི་ཆོ་གར་བསྟར་ནས་ཚིམ་པ་དྲུག་ལྡན་དུ་རོལ།  བརྒྱད་པ་ལྷག་མའི་ཆོ་ག་ནི།  ཚོགས་ལྷག་རྣམས་གསོག་འཇོག་མེད་པར་བསྡུས།  ཤིས་པར་བྱ་བའི་ཕྱིར་གཙང་ལྷག་སྟེང་དུ་བསྣན།  རྟོག་པ་དག་པའི་རྣལ་འབྱོར་པ་ཡིན་ན་ལྕེ་རྟ་མགྲིན་ཡབ་ཡུམ་རོལ་པ་མཛད་པའི་བྱང་སེམས་བདུད་རྩིའི་ཁ་ཕྲུ་དང་རོ་གཅིག་པ་ཧེ་རུ་ཀའི་དམ་རྒྱས་དབབ་པའམ་གོ་འཕང་དམན་ན་གཡོན་པའི་མཐེབ་སྲིན་སྦྱར་བ་རེག་ཅིང་ནང་མཆོད་བྲན་ནས།  ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧ་ཧོཿཧྲཱིཿ  ཧཱུྃ།  ཡེ་ཤེས་རོལ་པ་ལྷ་ཡི་ཚོགས་རྣམས་དང་༔  ལས་ལས་གྲུབ་པའི་མཁའ་འགྲོ་དབང་ཕྱུག་གིང་༔  མ་བདུན་སྲིང་བཞི་འདིར་གཤེགས་མཆོད་པ་བཞེས༔  འབར་མ་དང་ནི་སྦར་མ་ཕོ་ཉའི་ཚོགས༔  ལྷ་སྲིན་སྡེ་བརྒྱད་བཀའ་ཡི་སྲུང་མར་བཅས༔  མ་ལུས་འདིར་སྤྱོན་ཟག་མེད་བདུད་རྩི་ལ༔  རྔམས་ཤིང་དགྱེས་པའི་ཚུལ་གྱིས་རོལ་ཏུ་གསོལ༔  མ་མ་ཤ་ཏྲཱུཾ་ཨ་མུ་ཀཾ༔  ཁྲོཾ་ཡཀྵ་བི་ཛ་ཡ་ཁ་ཁ་ཁཱ་ཧི་ཁཱ་ཧི༔  ཞེས་ཕྱི་རོལ་གོམ་པ་བདུན་ཅུའི་སར་སྲིན་མོའི་ཟ་ལམ་དུ་དོར།  དགུ་པ་ཆད་ཐོ་བྱ་བ་ནི།  གཏོར་གཞོང་བསྐུལ་ཏེ་སྨན་རཀ་བྲན་ལ།  ཧཱུྃ།  སྲིད་གསུམ་ཞིང་འཁོད་དམ་ཅན་དྲེགས་པའི་ཚོགས༔  འདོད་ཡོན་ཟག་མེད་བདུད་རྩིའི་གཏོར་མ་ལོངས༔  བདེ་གཤེགས་རྩ་གསུམ་རྒྱལ་བའི་སྤྱན་སྔ་རུ༔  ཇི་ལྟར་ཁས་བླངས་དམ་བཅས་དྲན་མཛོད་ལ༔  མདོ་སྔགས་བཤད་སྒྲུབ་བསྟན་པ་བསྲུང་བ་དང་༔  དེ་འཛིན་སྐྱོང་ཞིང་ལོག་འདྲེན་དབྱིངས་སུ་སྒྲོལ༔  ཁམས་གསུམ་འགྲོ་ཀུན་བདེ་སྐྱིད་སྤེལ་བ་དང་༔  གང་གསོལ་ཕྲིན་ལས་མྱུར་དུ་འགྲུབ་པར་མཛོད༔  བཅུ་པ་བརྟན་མ་བསྐྱང་བ་ནི།  བཤལ་ཆུས་བྲན་ལ།  ཧྲཱིཿ  དགུང་སྔོན་སྟེང་དང་གངས་རི་གཡའ་རྩེ་དང་༔  སྨན་ལྗོངས་སྐྱེད་མོས་ཚལ་དང་ནགས་འདབས་དང་༔  ཕྱོགས་མཚམས་སྟེང་འོག་གང་ན་གནས་པ་ཡི༔  བོད་ཁམས་སྐྱོང་བའི་བརྟན་མ་བཅུ་གཉིས་ཚོགས༔  སློབ་དཔོན་པདྨའི་སྤྱན་སྔར་ཁས་བླངས་བཞིན༔  རང་རང་ཕོ་བྲང་གནས་ནས་འདིར་བྱོན་ལ༔  ཕུད་ལྷག་བཤལ་བའི་གཏོར་མ་འདི་བཞེས་ལ༔  བཅོལ་པའི་ཕྲིན་ལས་མ་ལུས་སྒྲུབ་པར་མཛོད༔  ཅེས་གཏོར་མ་གཉིས་མཁར་གྱི་ཡང་སྟེངས་སུ་ཞལ་ནང་བསྟན་གྱིས་འབུལ།  བཅུ་གཅིག་པ་རྟ་བྲོ་ནི།  སྒོ་དྲུང་དུ་གཏོར་གཞོང་ཁ་སྦུབས་པའི་འོག་ཏུ་བགེགས་རྣམས་ཚུད་པ་རི་རབ་ཀྱིས་མནན་པར་དམིགས་ལ།  ཧཱུྃ།  རྣམ་པ་རི་རབ་སུམ་བརྩེགས་ལཿ  དོན་དུ་སྐུ་གསུང་ཐུགས་སུ་གསལ༔  དོང་གཏིང་ལོག་ལྟའི་དཔུང་རྣམས་ནི༔  མ་ལུས་ལུས་པ་མེད་པར་བསྐྱུར༔  སྟེང་དུ་དཔལ་ཆེན་ལྷ་ཚོགས་ཀྱིས༔  བྲོ་བརྡུང་ཞི་རྒྱས་དབང་དྲག་རྫོགས༔  ཨོཾ་ཨཱཿཧཱུྃ་སྟྭཾ་བྷ་ཡ་ནན༔  དྲག་ཤུལ་གྱི་ལས་མཐའ་ཤིས་པས་བསྡུ་བའི་ཕྱིར་གཏོར་གཞོང་བསྒྱེལ་པ་སྨན་འབྲུས་བཀང་ལ།  རྣལ་འབྱོར་པ་བདག་ཅག་འཁོར་དང་བཅས་པའི་ཚེ་བསོད་དཔལ་འབྱོར་ཐམས་ཅད་པུཥྟི་ཀུ་རུ་ཨོཾ་ཞེས་བརྗོད།  དེ་རྣམས་ནི་ཐུན་མཚམས་སུ་བྱ་བ་ཆོ་གས་ཀྱི་མཆོད་པ་རྗེས་འབྲེལ་དང་བཅས་པ་སྟེ།  ཚོགས་མཆོད་རྐྱང་པ་ལ་ལྷག་མ་ཡན་བགྱིས་པས་ཀྱང་དོན་གྲུབ་པ་ཡིན་ནོ།  །གཉིས་པ་དངོས་གྲུབ་བླང་བ་ནི།  གཏང་རག་གི་སླད་དུ་སྔར་བཞིན་མཆོད་ཅིང་བསྟོད་ལ།  སྒྲུབ་གཏོར་ལྷར་གསལ་བ་སྤྱི་བོར་བཏེག་སྟེ།  ཧཱུྃ།  བདག་གཞན་གཉིས་དག་དཀྱིལ་འཁོར་ཀུན་སྣང་དུ༔  རྨད་བྱུང་བླ་མ་བདེ་གཤེགས་རིགས་འདུས་ཚོགས༔  དངོས་གྲུབ་སྩལ་དང་སྩོལ་བར་མི་དམིགས་ཀྱང་༔  སྐུ་གསུང་ཐུགས་དང་ཡོན་ཏན་ཕྲིན་ལས་རྣམས༔  ད་ལྟ་ཉིད་དུ་གསལ་ཞིང་བརྟན་པར་མཛོད༔  ཕྲིན་ལས་རྣམ་བཞི་མྱུར་དུ་འགྲུབ་པ་དང་༔  དགོས་འདོད་རེ་སྐོང་ཡིད་བཞིན་གཏེར་གྱི་མཛོད༔  མཐོང་ཆོས་དབང་དང་ཐུན་མོང་ཡོན་ཏན་བརྒྱད༔  མངོན་ཤེས་དྲུག་ལྡན་དངོས་གྲུབ་བདག་ལ་སྩོལ༔  སྔགས་མཐར།  ཀཱ་ཡ་སིདྡྷི་ཨོཾཿ  ཝཱ་ཀ་སིདྡྷི་ཨཱཿ  ཙིཏྟ་སིདྡྷི་ཧཱུྃ༔  སརྦ་སིདྡྷི་ཧྲཱིཿ  ཞེས་བརྗོད་ཅིང་གནས་བཞིར་རེག་ལ་གཏོར་རྫས་ཅུང་ཟད་དངོས་གྲུབ་ཀྱི་ཚུལ་དུ་རོལ།  ཡི་གེ་བརྒྱ་པ་ལན་གསུམ་བརྗོད་པས་ནོངས་པ་བཤགས།  གསུམ་པ་ཉེར་བསྡུ་ནི།  རྟེན་ཡོད་ན་བརྟན་བཞུགས་དང་།  སྣང་ཆ་གཟུགས་བརྟན་གྱི་འཁོར་ལོར་རྟག་མཐའ་བསལ་ཕྱིར།  ཧཱུྃ།  རང་རིག་ཐིག་ལེ་གཅིག་ཏུ་གསལ་བ་ལ༔  སྤྲོ་དང་བསྡུ་བར་བྱ་བ་མི་དམིགས་ཀྱང་༔  མ་རྟོགས་འཁྲུལ་པའི་རྟག་ལྟ་སྦྱང་བྱའི་ཕྱིར༔  ཐམས་ཅད་ཐིག་ལེ་ཆེན་པོར་བསྡུ་བར་བྱ༔  བཛྲ་མུཿ  ཨཱ་ལི་ཀཱ་ལི་དང་ཡི་གེ་བརྒྱ་པ་བཟླ།  ཆད་མཐའ་བསལ་ཕྱིར།  ཧཱུྃ།  རྟག་ཏུ་མི་འགྱུར་ཐིག་ལེ་ཆེན་པོའི་ངང་༔  བསྐྱེད་དང་རྫོགས་པའི་མཐའ་གཉིས་བྲལ་བ་ལ༔  ཆད་པའི་སྟོང་ཉིད་མེད་པ་ལས་གྲོལ་ཕྱིར༔  རྫོགས་རིམ་ལྷ་སྐུ་བླ་མ་རྩ་གསུམ་ལྷ༔  སྣང་ལ་མ་གྲུབ་འཇའ་ཚོན་ལྟ་བུར་ཤར༔  བཞི་པ་དགེ་བ་བསྔོ་ཞིང་སྨོན་ལམ་གདབ་པ་ནི།  ཧཱུྃ།  དུས་གསུམ་མི་དམིགས་སྒྱུ་མར་སྣང་བའི་ཆོས༔  མིག་འཕྲུལ་ཇི་བཞིན་དགེ་ཚོགས་བྱང་ཆུབ་ཏུ༔  ཡོངས་སུ་བསྔོས་པས་རྩ་གསུམ་དཀྱིལ་འཁོར་གྱི༔  གོ་འཕང་མཆོག་ལ་འགྲོ་ཀུན་སྦྱོར་གྱུར་ཅིག༔  ལྔ་པ་ཤིས་བརྗོད་བྱ་བ་ནི།  རང་བཞིན་ཆོས་དབྱིངས་ངང་ཉིད་ལས༔  གཟུགས་སྐུའི་རྣམ་རོལ་དཔག་ཡས་ཀྱིས༔  རླབས་ཆེན་ཕྲིན་ལས་སྐྱོང་མཛད་པའི༔  བརྒྱུད་གསུམ་བླ་མའི་བཀྲ་ཤིས་ཤོག༔  མ་འགགས་རང་གསལ་འོད་ལྔའི་ཀློང་༔  རབ་འབྱམས་དཀྱིལ་འཁོར་རྣམ་པར་མཛེས༔  མཆོག་ཐུན་དངོས་གྲུབ་སྩོལ་མཛད་པའི༔  ཡི་དམ་ལྷ་ཚོགས་བཀྲ་ཤིས་ཤོག༔  ཕྱོགས་བཅུ་གནས་ཡུལ་སྤྲུལ་པའི་ཞིང་༔  ཕྲིན་ལས་རྣམ་བཞིའི་རོལ་གར་མཁན༔  མཁའ་འགྲོ་སྲུང་མའི་ཚོགས་རྣམས་ཀྱིས༔  བཀྲ་ཤིས་བདེ་ལེགས་སྩལ་དུ་གསོལ༔ ཞེས་བརྗོད་ཅིང་དགེ་ལེགས་ཀྱི་མེ་ཏོག་ཆར་བསྙིལ་བར་བྱའོ།  །བསྙེན་པ་བྱེད་ན་བསྙེན་སྔགས་འབུམ་ཚོ་བདུན་དང་།  སྒྲུབ་སྔགས་འབུམ་ཕྲག་གཅིག་བཟླས་པས་དབང་པོ་རབ་ལ་རྟགས་མཐོང་བར་འགྱུར་ཞིང་།  གཞན་དུ་ལས་རུང་ཙམ་ཡིན།  སྨིན་པར་སློབ་པ་ལ་ནི་ཚད་མེད་དོ།  །བདེ་གཤེགས་ཀུན་འདུས་བླ༷་མ་མཚོ་སྐྱེས་རྗེ།  །བསྙེན་ཅིང་སྒྲུབ༷་པས་མཐའ་གཉིས་ག༷དུང་བའི་ཚོགས།  །ཞི༷་བྱེད་བདུད་རྩིའི་ཚོ༷གས་ཡིད་ཅན་ཀུན།  །འཆི་མེད་ཡེ༷་ཤེས༷་སྙིང༷་པོ༷འི་སྐུར་སྨིན་ཤོག  །ཅེས་པདྨའི་ཞལ་གདམས་རྩ་གསུམ་མཐོང་བ་རང་གྲོལ་གྱི་ཆོས་སྡེ་བླ་སྒྲུབ་གདུང་བ་ཞི་བྱེད་ཀྱི་ཕྲིན་ལས་ཁྲིགས་སུ་བསྡེབས་པ་འདིའང་རང་གཞན་མང་པོར་བྱིན་རླབས་ཀྱི་ཡེ་ཤེས་ལྷག་པར་སྨིན་པའི་སླད་དུ།  མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གཏེར་གཞུང་རྡོ་རྗེའི་ཚིག་རྐང་ཁོ་ན་རྒྱས་བསྡུས་འཚམས་པར་སྦྱར་བ་དགེ་ལེགས་མཆོག་ཏུ་གྱུར་ཅིག།  །།མངྒལཾ།།  །།}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-Volume-14-PHA]]
[[Category:Khyentse Lineage Project]]