View source for JKW-KABUM-19-DZA-001-069

{{Khyentse Metadata
|classification=Tibetan Publications
|subclass=Tibetan Texts
|fulltitletib=ཡོངས་འཛིན་འཇམ་པའི་དབྱངས་བྱམས་པ་ཀུན་དགའ་བཀྲ་ཤིས་ཀྱི་རྣམ་ཐར་མདོར་བསྡུས་པ་དད་པའི་ས་བོན་ཨུཏྤལ་རྒྱས་པའི་སྙེ་མ།
|fulltitle=yongs 'dzin 'jam pa'i dbyangs byams pa kun dga' bkra shis kyi rnam thar mdor bsdus pa dad pa'i sa bon ut+pal rgyas pa'i snye ma
|citation=[['jam dbyangs mkhyen brtse'i dbang po]]. ''yongs 'dzin 'jam pa'i dbyangs byams pa kun dga' bkra shis kyi rnam thar mdor bsdus pa dad pa'i sa bon ut+pal rgyas pa'i snye ma''. In '''jam dbyangs mkhyen brtse'i dbang po'i bka' 'bum'', Vol. 19: 480-502. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|editortib=རྫོང་སར་བློ་གྲོས་ཕུན་ཚོགས་
|tibgenre=History Texts - lo rgyus, Religious History Texts - chos 'byung
|terma=No
|sabcadcategory=Seven
|language=Tibetan
|volumenumber=019
|volnumtib=༡༩
|volyigtib=ཛ་
|totalvolumes=25
|textnuminvol=001
|textsubnumber=069
|pagenumbers=480-502
|totalpages=23
|beginfolioline=240b6
|endfolioline=251b6
|totalfolios=12
|multivolumework=No
|rectonotes=sde tshan 1
|versonotes=mkhyen brtse'i bka' 'bum
|colophontib=དཔལ་ལྡན་བླ་མ་དམ་པ་བྱམས་པ་སྨོན་ལམ་གྲགས་པས་ལམ་འབྲས་བླ་མ་བརྒྱུད་པའི་རྣམ་ཐར་གྱི་ཁ་སྐོང་དུ་མདོར་བསྡུས་འདི་ལྟ་བུ་ཞིག་སྦྱོར་བར་འོས་སོ་ཞེས་ཟིན་ཐོའི་ས་བོན་དང་བཅས་ཏེ་སྩལ་བ་བཞིན།  ཤར་མདོ་ཁམས་ཀྱི་བཙུན་པ་འཇམ་དབྱངས་མཁྱེན་བརྩེའི་དབང་པོས་ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ས་སྐྱའི་བླ་བྲང་དུ་རབ་བྱུང་བཅུ་གཉིས་འགལ་བྱེད་ཅེས་པ་ལྕགས་མོ་ཕག་གི་ལོའི་སྣྲོན་ཟླའི་དཀར་ཕྱོགས་ཀྱི་རྫོགས་པ་གསུམ་པའི་དུས་ཚེས་དགེ་བའི་སྔ་དྲོའི་ཆ་ཁོ་ནར་གང་ཤར་ཡུད་ཙམ་ལ་བྲིས་པ་དགེ་ལེགས་མཆོག་ཏུ་རྒྱས་པའི་རྒྱུར་གྱུར་ཅིག།
|colophonwylie=dpal ldan bla ma dam pa byams pa smon lam grags pas lam 'bras bla ma brgyud pa'i rnam thar gyi kha skong du mdor bsdus 'di lta bu zhig sbyor bar 'os so zhes zin tho'i sa bon dang bcas te stsal ba bzhin/__shar mdo khams kyi btsun pa 'jam dbyangs mkhyen brtse'i dbang pos yon tan rin po che du ma'i 'byung gnas dpal sa skya'i bla brang du rab byung bcu gnyis 'gal byed ces pa lcags mo phag gi lo'i snron zla'i dkar phyogs kyi rdzogs pa gsum pa'i dus tshes dge ba'i snga dro'i cha kho nar gang shar yud tsam la bris pa dge legs mchog tu rgyas pa'i rgyur gyur cig
|pdflink=File:JKW-KABUM-19-DZA-001.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅། །ཡོངས་འཛིན་འཇམ་པའི་དབྱངས་བྱམས་པ་ཀུན་དགའ་བཀྲ་ཤིས་ཀྱི་རྣམ་ཐར་མདོར་བསྡུས་པ་དད་པའི་ས་བོན་ཨུཏྤལ་རྒྱས་པའི་སྙེ་མ་ཞེས་བྱ་བ་བཞུགས་སོ།  །བྱམ༷ས་པ༷་ཆེན་པོའི་བདུད་རྩི་ཡིས།  །ཀུན༷་དག༷འི་ཕན་བདེ་མཆོག་སྩོལ་བ།  །བཀྲ༷་ཤི༷ས་གྲགས་པའི་རྒྱལ་མཚན་ཅན།  །ཁྱབ་བདག་བླ་མས་རྟག་ཏུ་སྐྱོངས། ༡ །གང་དེའི་ངོ་མཚར་རྣ༷མ་པར་ཐ༷ར།  །འཁོར་ལོ་གསུམ་གྱི་མཛད་པའི་ཚུལ།  །འཆི་མེད་ལམ་ལྟར་རྒྱ་ཆེ་བ།  །བྱིས་བློའི་སྤྱོད་ཡུལ་མ་ཡིན་ཀྱང་།  ༢ །དམ་པའི་གསུང་གིས་བསྐུལ་བའི་མོད།  །མདོར་བསྡུས་ཚིག་གི་དཔྱིད་དཔལ་ལས།  །དད་པའི་ས་བོན་སྤེལ་བའི་སླད།  །ཨུཏྤལ་སྙེ་མ་འཁྲུངས་འདིའོ།  ༣ །དེ་ལ་འདིར་འཛམ་གླིང་བསྟན་འགྲོའི་མངའ་བདག་དཔལ་ས་སྐྱ་པ་ཆེན་པོའི་ཡོངས་སུ་འཛིན་པ་འཇམ་པའི་དབྱངས་བྱམས་པ་ཀུན་དགའ་བཀྲ་ཤིས་ཀྱི་རྟོགས་པ་བརྗོད་པ་མདོར་བསྡུས་པའི་ཚུལ་གྱིས་འཆད་པ་ལ་དོན་གསུམ།  སྐུ་སྐྱེ་བ་སྔ་མའི་རྣམ་ཐར་བསྡུས་ཏེ་སྨོས།  སྐུ་ཚེ་འདི་ཉིད་ཀྱི་རྣམ་ཐར་ཅུང་ཟད་རྒྱས་པར་བཤད།  སྨོན་ལམ་དང་ཤིས་བརྗོད་ཀྱིས་མཇུག་བསྡུ་བའོ།  །དང་པོ་ནི།  བྱམས་པའི་ཐུགས་མངའ་བྱང་ཆུབ་སེམས་གཉིས་འབྱོངས།  །རྣམ་ཀུན་དགའ་བཞིའི་ཡེ་ཤེས་མཐར་སོན་པས།  །བཀྲ་ཤིས་གྲགས་པའི་རྒྱལ་མཚན་འཛིན་མཁས་པ།  །རིགས་བརྒྱའི་ཁྱབ་བདག་ཆེན་པོར་གསོལ་བ་འདེབས།  །ཞེས་སྨོས་ཏེ།  དེ་ཡང་ངེས་པར་འབྱུང་བའི་ཡིད་ཀྱིས་བྱམས་པ་དང་སྙིང་རྗེའི་ཐུགས་བསྐྱེད་ཕུན་སུམ་ཚོགས་པ་མངའ་བའི་ཉེར་ལེན་ལས།  སྨོན་པ་དང་འཇུག་པས་རབ་ཏུ་ཕྱེ་བའི་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་འབྱོངས་ཤིང་།  ཚུལ་དེས་དྲངས་པའི་སྦྱོར་བས་ཐབས་ཀྱིས་ཁྱད་པར་དུ་འཕགས་པའི་རྡོ་རྗེ་ཐེག་པའི་ལམ་ལ་ཞུགས་པ་ན།  རྣམ་པ་ཀུན་ཏུ་ཅིར་སྣང་ཐམས་ཅད་ལྷ་དང་བདེ་ཆེན་དགའ་བ་བཞིའི་ཡེ་ཤེས་སུ་ཤར་བའི་རིམ་གཉིས་ཀྱི་རྣལ་འབྱོར་མཐར་སོན་པས།  དེ་བཞིན་གཤེགས་པ་དང།  རྡོ་རྗེ་དང་།  རིན་པོ་ཆེ་དང་།  པདྨ་དང་།  ལས་ཀྱི་རིགས་སོགས་རིགས་བརྒྱ་ཕྲག་དུ་མའི་སྤྲོ་བ་དང་བསྡུ་བའི་ཁྱབ་བདག་ཆེན་པོ་རྡོ་རྗེ་སེམས་དཔའི་གོ་འཕང་བརྙེས་སུ་ཟིན་ནའང།  དམིགས་པ་མེད་པའི་སྙིང་རྗེ་དང་།  སྨོན་ལམ་ཚད་མེད་པས་གདུལ་བྱའི་སྐལ་བ་དང་རྗེས་སུ་མཐུན་པར་གཟུགས་སྐུའི་སྒྱུ་འཕྲུལ་ཅིར་ཡང་འཆར་བ་ལས།  མཐའ་ཡས་པའི་བསྟན་འགྲོའི་དོན་རླབས་པོ་ཆེ་ལ་དབང་འབྱོར་བར་མ་ཟད།  གྲུབ་པའི་དབང་ཕྱུག་ཆེན་པོ་ཆོས་ཉིད་ཡེ་ཤེས་ཀྱི་ཞལ་སྔ་ནས་ཀྱང་།  སྐུ་སྐྱེ་བ་སྔ་མ་ཞིག་ཏུ་དབུ་རྩེའི་དཀོན་གཉེར་དུ་སྐྱེ་བ་བཞེས་ཚུལ་གསུངས་པ་དང་།  སྔོན་བྱུང་གི་ལོ་རྒྱུས་གཞན་ལས།  འཇམ་དབྱངས་གཟི་འོད་འབར་བའི་སྣང་བརྙན་འདིས་དབུ་རྩེའི་དཀོར་གཉེར་ལས་དག་པ་ཞིག་མངོན་སུམ་རྗེས་སུ་བཟུང་ཚུལ་འབྱུང་བ་གཉིས་སྒྲ་མཐུན་པས་རྗེ་བཙུན་བླ་མ་དམ་པ་ཉིད་ཡིན་པར་གདོན་མི་ཟ་བ་དང་།  འོད་གསལ་གྱི་སྣང་བར་འཇམ་སྒེག་པར་གྱུར་པའི་མཚན་མ་གཟིགས་པ་སོགས་ཀྱིས་མཚོན་ངོ་མཚར་གྱི་སྐྱེས་རབས་བགྲང་ལས་འདས་པར་འཆར་བ་གང་ཞིག  །ཕྱག་བྱ་བ་དང་།  མཆོད་པར་བྱ་བ་དང་།  གསོལ་བ་འདེབས་པའི་འོས་ཆེས་མཆོག་ཏུ་གྱུར་པ་སྟེ།  བླ་མ་ལྔ་བཅུ་པ་ལས།  དབང་བསྐུར་མཆོག་ཐོབ་རྡོ་རྗེ་ཡི།  །སློབ་དཔོན་ལ་ནི་དེ་བཞིན་གཤེགས།  །ཕྱོགས་བཅུའི་འཇིག་རྟེན་ཁམས་བཞུགས་པས།  །དུས་གསུམ་དུ་ནི་མོས་ཕྱག་འཚལ།  །ཅེས་གསུངས་པའི་ཕྱིར་རོ།  །གཉིས་པ་སྐུ་ཚེ་འདི་ཉིད་ཀྱི་རྣམ་ཐར་ཅུང་ཟད་རྒྱས་པར་བཤད་པ་ལ་གསུམ།  ཐོག་མར་དགེ་བ་སྐུ་སྐྱེ་བ་བཞེས་པའི་ཚུལ།  བར་དུ་དགེ་བ་རང་གཞན་གྱི་དོན་གཉིས་ལྷུན་གྱིས་གྲུབ་པའི་ཚུལ།  ཐ་མར་དགེ་བ་ཡོངས་སུ་མྱ་ངན་ལས་འདས་ཀྱང་མཛད་པ་རྒྱུན་མི་འཆད་པའི་ཚུལ་ལོ།  །དང་པོ་ནི།  མགོན་ཁྱོད་བསམས་བཞིན་ཐུབ་བསྟན་འཛིན་པའི་སླད།  །རྡོ་རྗེ་གདན་མཚུངས་དཔལ་ལྡན་ས་སྐྱ་ཡི།  །བྱང་ཕྱོགས་གྲུབ་པའི་སྨན་ལྗོངས་ཉམས་དགའ་བར།  །མཚན་དཔེའི་དཔག་བསམ་འཁྲུངས་ལ་གསོལ་བ་འདེབས།  །ཞེས་སྨོས་ཏེ།  དེའང་གོང་དུ་ཇི་སྐད་སྨོས་པ་བཞིན།  ངེས་པའི་དོན་དུ་སངས་རྒྱས་ཐམས་ཅད་དང་གཉིས་སུ་མེད་པའི་ཡེ་ཤེས་ཀྱི་རྒྱལ་ཐབས་ལས་མ་གཡོས་བཞིན།  དྲང་དོན་འགྲོ་བ་རྣམས་སྒྲོལ་བའི་སླད་དུ།  མདོ་སྡེ་རྒྱན་ལས།  དེ་ཡིས་ཆོས་ཀུན་སྒྱུ་མ་ལྟ་བུ་དང་།  །སྐྱེ་བ་སྐྱེད་མོའི་ཚལ་འགྲོ་ལྟར་རྟོགས་ཏེ།  །ཞེས་གསུངས་པ་ལྟར།  བསམས་བཞིན་དུ་ཐུབ་པའི་བསྟན་པ་རིན་པོ་ཆེ་སྤྱི་དང་།  བྱེ་བྲག་དཔལ་ས་སྐྱ་པའི་རིང་ལུགས་དྲི་མ་མེད་པ་འཛིན་པའི་སླད་དུ་སྐུ་སྐྱེ་བ་བཞེས་པའི་ཡུལ་ནི།  བྱང་ཆུབ་སྙིང་པོ་རྡོ་རྗེ་གདན་ནས་དཔག་ཚད་བརྒྱ་བགྲོད་པའི་གནས།  བོད་ཡུལ་གཡས་རུ་གཙང་ལ་སྟོད་ཀྱི་སའི་ཆ།  མཁས་པ་དང་གྲུབ་པའི་སྐྱེས་བུ་བསམ་གྱིས་མི་ཁྱབ་པས་བྱིན་གྱིས་བརླབས་པའི་རྡོ་རྗེའི་གྲོང་ཁྱེར།  ངེས་པ་ལྔ་ལྡན་འོག་མིན་ཆེན་པོའི་ཞིང་ཁམས་དང་ཚུལ་མཚུངས་པ་དཔལ་ལྡན་ས་སྐྱའི་ཆོས་གྲྭ་ཆེན་པོའི་བྱང་ཕྱོགས།  གར་བཀྲ་ཤིས་དར་རྒྱས་ཞེས་གྲགས་པའི་འདབས་འབྱོར།  ལྷ་དང་དྲང་སྲོང་གྲུབ་པས་བསྟེན་པའི་སྨན་ལྗོངས་ཉམས་དགའ་བ།  བལ་སྤེལ་ཁང་གསར་ཞེས་པའི་ཁྱིམ་དུ།  རབ་བྱུང་བཅུ་གསུམ་པའི་ནང་གསེས་ཤིང་ཕོ་ཁྱིའི་ལོར་ཧ་ཅང་འབྱོར་པ་དང་།  རྒུད་པའི་མཐའ་གཉིས་སུ་མ་ལྷུང་བར་ཆོས་སྒྲུབ་པ་ལ་འགལ་རྐྱེན་དང་བྲལ་བའི་པད་མའི་རིགས་སུ་མཚན་དཔེའི་དཔག་བསམ་ལྗོན་པ་འཁྲུངས་སོ་ཞེས་གྲགས་པའི་ཡི་གེས་མཛེས་པར་གྱུར་ཏོ།  །གཉིས་པ་བར་དུ་དགེ་བ་རང་གཞན་གྱི་དོན་གཉིས་ལྷུན་གྱིས་གྲུབ་པའི་ཚུལ་ལ་གསུམ།  རང་དོན་ཚུལ་གནས་ཐོས་བསམ་སྒོམ་པའི་མཐར་སོན་པ་དང་།  གཞན་དོན་འཆད་རྩོད་རྩོམ་པའི་ཕྲིན་ལས་ཀྱི་བསྟན་པ་རིན་པོ་ཆེ་ཉིན་མོ་ལྟར་མཛད་པ་དང་།  གཉིས་ཀའི་དོན་དུ་མཁས་བཙུན་བཟང་གསུམ་གྱི་ཡོན་ཏན་རྒྱ་མཚོ་ལྟ་བུ་ལ་དབང་འབྱོར་བའི་ཚུལ་ལོ།  །དང་པོ་ལའང་།  དཔལ་མགོན་འཕགས་པ་དབྱིག་གཉེན་གྱིས།  ཚུལ་གནས་ཐོས་དང་བསམ་ལྡན་པས།  །སྒོམ་པ་ལ་ནི་རབ་ཏུ་སྦྱོར།  །ཅེས་གསུངས་པ་ལྟར་རིམ་པར་ཕྱེ་ན།  དང་པོ་གཞི་ཚུལ་ཁྲིམས་དག་པ་ལ་གནས་པའི་ཚུལ་ནི།  གཞོན་ནུའི་དུས་ནས་ཐུབ་བསྟན་ལྷ་ཁང་ཆེར།  །བརྟན་མཁས་ཡོན་ཏན་ཡོངས་རྫོགས་མངྒ་ལར།  །སོ་ཐར་སྡོམ་པའི་བདུད་རྩི་བཞེས་པ་ལས།  །ཚུལ་ཁྲིམས་པད་དཀར་བཞད་ལ་གསོལ་བ་འདེབས།  །ཞེས་སྨོས་ཏེ།  དེ་ལྟར་སྐུ་འཁྲུངས་ནས་རིམ་གྱིས་ནར་སོན་པ་ན།  དད་པ་དང་།  ངེས་འབྱུང་དང་།  སྙིང་རྗེ་ཆེན་པོ་ལ་སོགས་པ་དམ་པའི་རིགས་ཀྱི་ཡོན་ཏན་རྣམས་གསལ་བར་སད་པའི་རྒྱུ་དང་།  སྐྱེས་རབས་ཀྱི་ཕྲེང་བ་ཐམས་ཅད་དུ་འབྲལ་མེད་རིགས་ཀྱི་བདག་པོར་གྱུར་པ་འཇམ་མགོན་ཀུན་དགའ་བློ་གྲོས་ཀྱིས་གསུང་བསྐུལ་གནང་བའི་རྐྱེན་ལ་བརྟེན་ནས།  ཆུང་ངུའི་དུས་ནས་དཔལ་ས་སྐྱའི་ཐུབ་བསྟན་ལྷ་ཁང་ཆེན་མོའི་ཆོས་གྲར་ཞུགས་ཏེ།  བརྟན་མཁས་ཕན་འདོགས་པའི་ཡན་ལག་ཐམས་ཅད་ཡོངས་སུ་རྫོགས་པའི་གནས་བརྟན་འདུལ་བ་འཛིན་པ་མཐའ་དག་གི་ཁྱུ་མཆོག  །མཁན་རབས་ཉེར་ལྔ་པ་མཻ་ཏྲི་དྷརྨ་མངྒ་ལ་སྟེ་བྱམས་པ་ཆོས་ཀྱི་བཀྲ་ཤིས་ཞེས་ཡོངས་སུ་གྲགས་པའི་སྤྱན་སྔར་སོ་སོར་ཐར་པའི་སྡོམ་པའི་བདུད་རྩི་དད་བརྩོན་གྱིས་གཞིར་བཞེས་པ་ལས།  ཉམས་པ་དང་།  བཅོམ་པ་དང་།  ཕལ་པ་དང་།  ལྟུང་བར་གྱུར་པའི་རྡུལ་དང་དྲི་མ་ཐམས་ཅད་ལས་འདས་པ།  ཚུལ་གནས་ཁྲིམས་ཀྱི་པདྨ་དཀར་པོ་ཆེས་ཆེར་བཞད་པས་བསྔགས་འོས་ཀྱི་དྲི་བསུང་དངར་པོས་ཕྱོགས་ཐམས་ཅད་དུ་ཁྱབ་པར་གྱུར་ཏོ།  །གཉིས་པ་ཐོས་པ་རྒྱ་མཚོའི་མཐར་སོན་པའི་ཚུལ་ནི།  འཇམ་པའི་དབྱངས་དངོས་ཀུན་དགའ་བློ་གྲོས་དང་།  །རྡོ་རྗེ་འཛིན་པ་རིན་ཆེན་རྒྱལ་མཚན་སོགས།  །རིས་མེད་དམ་པ་དུ་མའི་ཞབས་བསྟེན་ནས།  །ཐོས་པའི་ཕ་རོལ་སོན་ལ་གསོལ་བ་འདེབས།  །ཞེས་སྨོས་ཏེ།  དེའང་འགྲོ་བ་ལྷ་དང་བཅས་པའི་མ་འདྲིས་པའི་མཛའ་བཤེས།  རིས་སུ་མ་ཆད་པའི་ཐུབ་བསྟན་རྒྱ་མཚོ་གསལ་བའི་ཉི་མ།  སྲས་བཅས་རྣམ་འདྲེན་ཡོངས་ཀྱི་ཡེ་ཤེས་སྒྱུ་མའི་སྐུ་ཅན་རྗེ་བཙུན་འཇམ་པའི་དབྱངས་དངོས་ངག་དབང་ཀུན་དགའ་བློ་གྲོས་སངས་རྒྱས་བསྟན་པའི་རྒྱལ་མཚན་དཔལ་བཟང་པོ་དང་།  རྗེ་དེ་ཉིད་ཀྱི་ཐུགས་སྲས།  མཁས་ཤིང་དངོས་གྲུབ་བརྙེས་པའི་རྡོ་རྗེའི་སློབ་དཔོན་ཆེན་པོ་རིན་ཆེན་རྒྱལ་མཚན་དང་།  མུས་ཆེན་ཆོས་ཉིད་ཡེ་ཤེས་སོགས་རིས་མེད་དམ་པ་དུ་མའི་ཞབས་ཀྱི་པདྨོར་མཉེས་པ་གསུམ་གྱིས་བསྟེན་ནས།  མང་དུ་ཐོས་པའི་ཚུལ་མཐའ་དག་གི་ཕ་རོལ་ཏུ་སོན་པ་ཡིན་ཏེ།  ཐོག་མར་ཐུབ་བསྟན་ལྷ་ཁང་ཆེན་མོར་མཁན་ཆེན་བྱམས་པ་ཆོས་ཀྱི་བཀྲ་ཤིས་སོགས་རིག་པ་སྨྲ་བའི་དབང་ཕྱུག་དུ་མ་ལས་ཚད་མ་རིག་པའི་སྒོ་འབྱེད་བསྡུས་གཞུང་བརྩི་བ་ནས་བརྩམས་ཏེ་རྒྱུ་མཚན་ཉིད་ཀྱི་ཐེག་པ་ལ་རིམ་གྱིས་ཞུགས་པ་ན།  གཞན་གྱིས་འགྲན་པའི་ཟླ་ཐམས་ཅད་དང་བྲལ་བའི་སྤོབས་པ་བསམ་གྱིས་མི་ཁྱབ་པའི་གྲགས་དཀར་ཟླ་ཤེལ་གྱི་སྣང་བས་ཡོངས་སུ་ཁྱབ་ཅིང་།  དཔལ་ས་སྐྱ་པའི་མཁས་པ་གཡག་གཞོན་རྣམ་གཉིས་ཀྱི་སྐབས།  གདན་ས་ཆེན་པོ་དང་།  བྱང་ཕྱོགས་ངམ་རིང་གི་ཆོས་སྡེ་སོགས་སུ་སྨྲ་བའི་ཁྱུ་མཆོག་རླབས་པོ་ཆེའི་གནས་ཐོབ་པ་རྣམས་ཀྱིས་བཤད་པའི་སྲོལ་གཏོད་པ།  པུསྟི་གྲགས་ཆེན་བཅོ་བརྒྱད་ཅེས།  ཚད་མ་མདོ།  རྣམ་འགྲེལ།  རྣམ་ངེས།  འདུལ་བ་སོ་ཐར་གྱི་མདོ།  མདོ་རྩ།  མངོན་པ་ཀུན་བཏུས་དང་མཛོད།  ཕར་ཕྱིན་བྱམས་ཆོས་སྡེ་ལྔ་དང་།  སྤྱོད་འཇུག  །དབུ་མ་རྩ་འཇུག་བཞི་གསུམ།  མདོ་སྔགས་ཐམས་ཅད་ཀྱི་སྤྱི་དོན་སྡོམ་པ་གསུམ་གྱི་རབ་ཏུ་དབྱེ་བ།  གསུང་རབ་ཀུན་ལ་ལྟ་བའི་མིག་གཅིག་པུ་ཚད་མ་རིག་པའི་གཏེར་རྣམས་ཐུགས་ལ་བཟུང་བ་ཡིན་ཏེ།  རྗེ་རང་ཉིད་ཀྱི་གསུང་ལས།  ཐུབ་བསྟན་གྱི་མཁན་རབས་ཉེར་ལྔ་པར།  །ཤཱཀ་ཐུབ་ཀྱི་བརྟུལ་ཞུགས་བཟུང་ནས་སུ།  །བཅོ་བརྒྱད་ཀྱི་གཞུང་ལུགས་བློ་ནས་བཏོན།  །བསྡུས་གྲ་དང་བཅས་ལ་དཔེ་བྲལ་བྱས།  །ཞེས་སོ།  །དེ་ལྟར་ཚད་མ་རིག་པ་སོགས་ལ་མཁྱེན་དཔྱོད་ཀྱི་པདྨོ་མཆོག་ཏུ་རྒྱས་པའི་སྐབས་ཤིག  །མདོ་ཁམས་སྡེ་དགེའི་རྒྱལ་ཁབ་ནས།  ཞུ་ཆེན་མ་ཧཱ་པཎྜི་ཏ་ཚུལ་ཁྲིམས་རིན་ཆེན་གྱི་ཞལ་སློབ།  མཁས་པའི་དབང་པོ་ཞེ་ཆེན་དྲུང་ཡིག་བསྟན་འཛིན་རྒྱལ་མཚན་ཞེས་རིག་པ་སྨྲ་བའི་རྒྱན་གཅིག་པུ་དེ་ཉིད།  འཇམ་མགོན་ཀུན་དགའ་བློ་གྲོས་ཀྱི་གསུང་གིས་བསྐུལ་བ་བཞིན་དཔལ་ས་སྐྱར་རིག་གནས་ཀྱི་ལེགས་བཤད་རྩོལ་བར་ཆེད་ཀྱིས་བྱོན་པའི་སྐབས།  ས་ཆེན་འཇམ་པའི་དབྱངས་དེ་ཉིད་ཀྱིས་རྗེ་འདི་པ་རྣམ་དཔྱོད་ཀྱི་རྩལ་གཞན་དང་མ་འདྲ་བས་གནས་སྐབས་སུ་ཐུན་མོང་གི་རིག་ལམ་རྒྱ་མཚོའི་སློབ་དཔོན་དུ་འོས་པ་དང་།  མཐར་ཐུག་རྗེ་ཉིད་ཀྱི་ཞབས་པད་དུ་འཁོད་ནས་ཟབ་རྒྱས་གདམས་པའི་བདུད་རྩི་མཐའ་དག་རྫོགས་པར་བཞེས་ཏེ།  སླར་གདུང་བརྒྱུད་རིན་པོ་ཆེ་རྣམས་ལ་ལྷག་མེད་དུ་འབུལ་ཐུབ་པས་བསྟན་འགྲོའི་དོན་བསམ་གྱིས་མི་ཁྱབ་པར་འབྱུང་བ་རྗེས་སུ་དགོངས་ཏེ་རིག་གནས་འཕེལ་རྒྱས་གླིང་དུ་མཁས་པའི་དབང་པོ་གང་དེར་སྦྱོར་གཏོད་མཛད་པ་ན།  རྗེ་དེ་ཉིད་སྐྱེས་སྦྱངས་ཤེས་རབ་ཀྱི་མཐུ་ཕུན་སུམ་ཚོགས་པས།  ལེགས་པར་སྦྱར་བའི་བརྡ་སྤྲོད་པའི་བསྟན་བཅོས་ཀ་ལཱ་པ་གཙོ་བོར་གྱུར་པའི་རྩ་བའི་མདོ་རྣམས་དང་།  དེའི་ཡན་ལག་མིང་ལས་ཚིག་ཏུ་སྒྲུབ་པ་སི་སོགས་ཀྱི་རབ་ཏུ་བྱེད་པ་དང་།  བྱིངས་ལས་ཚིག་ཏུ་སྒྲུབ་པ་ཏི་སོགས་ཀྱི་རབ་ཏུ་བྱེད་པ་དང་།  བྱིངས་ལས་མིང་གི་བྱེ་བྲག་སྣ་ཚོགས་སྒྲུབ་པ་ཨ་ཎ་སོགས་ཀྱི་རབ་ཏུ་བྱེད་པ་དང་།  པྲྀཏྟ་དང་།  ཛཱ་ཏི།  ངོ་མཚར་བའི་སྦྱོར་བས་རབ་ཏུ་དབྱེ་བའི་སྡེབ་སྦྱོར་གྱི་གཞུང་དང་།  དོན་གཅིག་མིང་གི་རྣམ་གྲངས་དུ་མའི་སྒོ་ནས་བསྙད་པ་དང་།  མིང་གཅིག་དོན་དུ་མ་ལས་འཇུག་པའི་མངོན་བརྗོད་ཀྱི་བསྟན་བཅོས་དང་།  ལམ་རྣམ་པར་དབྱེ་བ་དང་།  དོན་དང་།  སྒྲ་དང་།  གབ་ཚིག་གི་རྒྱན་དང་།  དེ་དག་གི་སྐྱོན་སྤངས་ཚུལ་དང་བཅས་པ་རྗེས་སུ་སྟོན་པའི་ཚིག་རྒྱན་གྱི་གཞུང་དང་ཕྱི་དུས་ཀྱི་འཁོར་ལོའི་ངེས་གསང་རྒྱ་ཆེར་སྟོན་པ་སྐར་རྩིས་ཀྱི་གཞུང་དང་།  དེའི་ཡན་ལག་ཏུ་གཏོགས་པ་བཅས་བསླབ་པར་བརྩམ་པ་ན།  རིང་པོར་མ་ཐོགས་པར་གཞན་གྱིས་འགྲན་ཟླ་དང་བྲལ་བའི་མཁས་པ་ཆེན་པོའི་གོ་འཕང་བདེ་བླག་ཏུ་བརྙེས་ནས་ཡབ་རྗེ་ཀུན་བློའང་ཤིན་ཏུ་དགྱེས་པའི་འཛུམ་ཞལ་ལྷུག་པར་སྟོན་པ་དང་།  འཕེལ་རྒྱས་སློབ་དཔོན་གྱི་གོ་སར་དབང་བསྐུར་བ་ཡིན་ཏེ།  རྗེ་ཉིད་ཀྱི་གསུང་ལས།  དེ་མཚམས་ནས་སྒྲ་སྙན་སྡེབ་སྦྱོར་སོགས།  །འཕེལ་རྒྱས་སུ་འོངས་ནས་བརྡར་ཤ་བཅད།  །ཅེས་གསུངས།  དེ་ནས་ཡབ་རྗེ་འཇམ་པའི་དབྱངས་ཆེན་པོས་ཟབ་རྒྱས་གདམས་པའི་མཛོད་གཏད་པར་དགོངས་ནས།  གནས་སྐབས་སུ་གསོལ་དཔོན་གྱི་རྣམ་པར་བཞུགས་སུ་བཅུག  །རྗེ་འདི་པས་ཀྱང་བདག་ཉིད་ཆེན་པོ་ལ་ཐེ་ཚོམ་དང་མཉམ་འགྲོགས་ཀྱིས་མི་རུ་བཟུང་བའི་ལོག་ལྟ་སྤངས་ཏེ།  སངས་རྒྱས་དངོས་སུ་མཐོང་བའི་མོས་གུས་ཐུན་མོང་མ་ཡིན་པས་ཅི་གསུང་དང་ལེན་གྱིས་མཉེས་པར་བྱས་པས་འཕྲལ་དང་ཡུན་གྱི་རྟེན་འབྲེལ་གྱི་སྒོ་ཐམས་ཅད་འབད་མེད་ལྷུན་གྲུབ་ཏུ་འགྲིགས་ཏེ།  སྤྱིར་དཔལ་ལྡན་ས་སྐྱ་པའི་ཟབ་ཆོས་མཐའ་དག་དང་།  ཁྱད་པར་ཁྱབ་བདག་རྡོ་རྗེ་འཆང་ཆེན་པོ་ནས་མཆོག་གཟིགས་ཀྱི་བརྒྱུད་པ་བར་མ་ཆད་པར་བྱོན་པའི་རྒྱལ་གསུང་མདོ་སྔགས་ཀུན་སྙིང་པོ་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་སྨིན་གྲོལ་རྒྱབ་བརྟེན་དང་བཅས་པ།  དབང་གི་ཆུ་བོ་མ་ནུབ་པ།  བྱིན་རླབས་ཀྱི་བརྒྱུད་པ་མ་ཉམས་པ།  གདམས་ངག་གི་སརྒ་མ་ལོག་པ།  མོས་གུས་ཀྱི་བསམ་པ་ཚིམ་པར་ནུས་པ་སྟེ་ཚད་མ་བཞི་དང་སྙན་བརྒྱུད་བཞིས་གདམས་པས་ཐུགས་བཅུད་ཡོངས་སུ་སྨིན་པར་མཛད་པ་ཡིན་ལ།  དེ་བཞིན་དུ་རྡོ་རྗེ་འཛིན་པ་རིན་ཆེན་རྒྱལ་མཚན་ལས་ཀྱང་གསུང་ངག་རིན་པོ་ཆེ་ཚོགས་བཤད་དང་།  མགོན་པོའི་སྐོར་སོགས་ཟབ་ཆོས་རྒྱ་མཚོ་ལྟ་བུ་དང་།  རྗེ་བཙུན་རིན་པོ་ཆེ་འཆི་མེད་བསྟན་པའི་ཉི་མ་ལས་གསུང་ངག་རིན་པོ་ཆེ་སློབ་བཤད་ཀྱི་སྨིན་གྲོལ་ཆ་ལག་དང་བཅས་པ།  མུས་ཆེན་གྲུབ་པའི་དབང་ཕྱུག་ཆོས་ཉིད་ཡེ་ཤེས་ལས་དཔལ་ལྡན་ཤངས་པ་བཀའ་བརྒྱུད་པའི་ཆོས་སྐོར་ཡོངས་རྫོགས།  མཆོག་སྤྲུལ་མཁས་པའི་དབང་པོ་བྱམས་པ་ངག་དབང་བསྟན་འཛིན་ཕྲིན་ལས་ལས་རྒྱལ་པོ་ཆེན་པོ་རྣམ་ཐོས་སྲས་ཀྱི་སྐོར་སོགས་ཏེ།  མདོར་ན་སོ་ཐར་གྱི་སྡོམ་པ།  བྱང་སེམས་ཀྱི་སེམས་བསྐྱེད།  གསང་སྔགས་རྒྱུད་སྡེ་བཞིའི་དབང་།  བྱིན་རླབས།  རྗེས་གནང་།  རིག་གཏད།  ཟབ་ཁྲིད།  རྒྱབ་བརྟེན་ལུང་གི་སྐོར་སོགས་དུས་དེར་རྒྱུན་བཞུགས་པ་ཕལ་ཆེར་གསན་པ་ཡིན་ཏེ།  རྒྱས་པར་རྗེ་ཉིད་ཀྱི་གསན་ཡིག་ཐོར་བུར་འཁོད་པས་མཚོན་ཏེ་ཤེས་པར་བྱའོ།  །གསུམ་པ་བསམ་བྱུང་གི་རིགས་པས་སྒྲོ་འདོགས་བཅད་པའི་ཚུལ་ནི།  ཕྱི་ནང་གཙུག་ལག་རྒྱ་མཚོའི་གནས་རྣམས་ལ།  །འཁྲུལ་མེད་ཚད་མ་གསུམ་གྱིས་གཞལ་བ་ན།  །འགལ་འབྲེལ་དཔྱོད་པའི་བློ་གྲོས་ཡོངས་རྗོགས་པས།  །བསམ་བྱུང་རྣམ་པར་དག་ལ་གསོལ་བ་འདེབས།  །ཞེས་སྨོས་ཏེ།  དེ་ཡང་སྔར་ཇི་སྐད་བཀོད་པ་བཞིན།  ཕྱི་ཐུན་མོང་གི་རིག་གནས་སྒྲ་ཚད་སྙན་ངག་སྡེབ་སྦྱོར་མངོན་བརྗོད་སྐར་རྩིས་སོགས་དང་།  ཁྱད་པར་ནང་རིག་པ་སྡེ་སྣོད་གསུམ་དང་རྒྱུད་སྡེ་བཞི་ཡན་ལག་བཅས་པའི་གཞུང་དེ་རྣམས་ཀྱི་ཚིག་གསན་པ་ཙམ་དུ་མ་ཟད།  དོན་གྱི་གནས་མངོན་སུམ་དང་།  ལྐོག་གྱུར་དང་།  ཤིན་ཏུ་ལྐོག་གྱུར་གྱི་གཞལ་བྱ་རྣམས་ལ།  འཇལ་བྱེད་མངོན་སུམ་དང་།  རིགས་པ་དང་།  ལུང་ཚད་མ་རྣམས་ཀྱིས་སོ་སོར་གཞལ་བས།  འགལ་བ་དང་འབྲེལ་བའི་ཚུལ་དཔྱོད་པ་ལ་བློ་གྲོས་ཀྱི་མཐུ་ཡོངས་སུ་རྫོགས་ཏེ།  བསམ་པ་ལས་བྱུང་བའི་ཤེས་རབ་རྣམ་པར་དག་པ་བརྙེས་པ་ནི་རྗེ་རང་ཉིད་ཀྱི་གསུང་རབ་རྣམས་མཇལ་བས་ཤེས་པར་འགྱུར་རོ།  །བཞི་པ་མཐར་ཐུག་སྒོམ་པ་ལས་བྱུང་བའི་ཡེ་ཤེས་བརྙེས་པའི་ཚུལ་ནི།  མཐར་ཐུག་གོ་འཕང་རྟོགས་པའི་ཡོན་ཏན་ལས།  །བྱུང་ཞིང་དེ་ཡང་བསྒྲུབ་ལ་རགས་ལས་ཕྱིར།  །མདོ་སྔགས་ཟབ་དོན་རྩེ་གཅིག་ཉམས་བཞེས་མཐུས།  །སྒོམ་བྱུང་ཤེས་རབ་བརྙེས་ལ་གསོལ་བ་འདེབས།  །ཞེས་སྨོས་ཏེ།  དེ་ཡང་མཐར་ཐུག་མཆོག་གི་དངོས་གྲུབ་ནི་རྟོགས་བྱ་རྣམས་རིམ་གྱིས་མངོན་སུམ་དུ་བྱས་པའི་མཐུ་ལས་འབྱུང་ལ།  རྟོགས་པ་དེ་རང་གི་མེད་ན་མི་འབྱུང་བའི་ཐབས་མཐར་ཐུག་པའང་རྩེ་གཅིག་སྒྲུབ་པ་ལ་གཞོལ་བ་ཁོ་ན་ལ་རགས་ལས་པའི་ཕྱིར།  ངེས་འབྱུང་དང་།  བྱང་ཆུབ་ཀྱི་སེམས་དང་།  ཟབ་མོ་སྤྲོས་བྲལ་གྱི་ལྟ་བ་རྣམས་སྣང་བ་གསུམ་གྱིས་གཏན་ལ་འབེབས་པ་ཕ་རོལ་ཏུ་ཕྱིན་པའི་གཞུང་དང་ཅིར་སྣང་ལྷར་ཤར་བའི་བསྐྱེད་རིམ་དང་།  ལྷར་སྣང་བདེ་ཆེན་གྱི་ཡེ་ཤེས་སུ་འཆར་བའི་རྫོགས་པའི་རིམ་པ་སྟེ་སྔགས་ཀྱི་ལམ་ཟབ་མོ་དག་ལ་རྩེ་གཅིག་ཏུ་གཞོལ་བ་དང་།  དེ་བཞིན་དུ།  ཁྲོ་བོའི་རྒྱལ་པོ་འབྱུང་པོ་འདུལ་བྱེད།  བཅོམ་ལྡན་འདས་དཔལ་དགེས་པ་རྡོ་རྗེ།  སྒྲོལ་དཀར།  འཇམ་དབྱངས་དཀར་པོ།  འཇམ་དཔལ་ནག་པོ།  ཀུ་རུ་ཀུལླེ།  རྣལ་འབྱོར་མ།  གུར་ཞལ་སོགས་ཡི་དམ་དང་ཆོས་སྐྱོང་དུ་མའི་གཞིའི་བསྙེན་པ་མཐར་ཕྱིན།  དུས་རྒྱུན་དུའང་།  དཔལ་དགེས་པ་རྡོ་རྗེ་དང་།  རྡོ་རྗེ་རྣལ་འབྱོར་མ་གཙོ་བོར་གྱུར་པའི་ལྷག་པའི་ལྷའི་རྣལ་འབྱོར་ཡན་ལག་དང་བཅས་པ་ཐུགས་དམ་ཉམས་བཞེས་རྩེ་གཅིག་ཏུ་གནང་བས་སྒོམ་པ་ལས་བྱུང་བའི་ཤེས་རབ་ཀྱི་པདྨོ་ཅིར་ཡང་རྒྱས་པར་མ་ཟད།  ཨཥྚའི་བསྙེན་ཆེན་སྐབས་འོད་གསལ་གྱི་སྣང་བར་ཚར་ཆེན་རྡོ་རྗེ་འཆང་ཆེན་པོ་དང་།  དཔལ་ས་སྐྱ་པ་ཀུན་དགའ་བློ་གྲོས།  མུས་ཆེན་གྲུབ་དབང་ཆོས་ཉིད་ཡེ་ཤེས་སོགས་བླ་མ་དམ་པ་རྣམས་ཀྱིས་རྗེས་སུ་བཟུང་བའི་ཚུལ་ཟིན་བྲིས་ཐོར་བུ་གནང་བ་ལས་འབྱུང་ཞིང་།  སྒྲོལ་དཀར་གྱི་བྲིས་ཐང་ཁྱད་པར་ཅན་ཞིག་བཞེངས་པར་མཛད་པ་དང་རྗེས་སུ་མཐུན་པར་རྗེ་ཉིད་ལ་གཟིགས་སྣང་བྱུང་བ་ཡིན་པར་རྟོགས་ཤེས་མཁས་པ་དག་གིས་གསུངས་པས་མཚོན་ཡི་དམ་ལྷས་རྗེས་སུ་བཟུང་བ་སོགས་གྲུབ་པའི་དགེ་མཚན་གྱི་འབྲས་བུ་གཡུར་དུ་ཟ་བས་གསོལ་བ་བཏབ་པ་ཙམ་གྱིས་འདོད་རྒུའི་ཆར་ཆེན་པོ་འབེབས་པ་གདོན་མི་ཟ་བ་ཉིད་དོ།  །གཉིས་པ་གཞན་དོན་འཆད་རྩོད་རྩོམ་པའི་ཕྲིན་ལས་ལ་མངའ་བརྙེས་པའི་ཚུལ་ལ་གསུམ་ལས།  དང་པོ་འཆད་པ་ཉི་མའི་འོད་ཀྱིས་བློ་ལྡན་གྱི་ཡིད་ཀྱི་པད་ཚལ་རྒྱས་པར་མཛད་པའི་ཚུལ་ནི།  སྒྲ་སྙན་སྡེབ་སྦྱོར་ལ་སོགས་ཐུན་མོང་དང་།  །ཕ་རོལ་ཕྱིན་དང་རྡོ་རྗེ་ཐེག་པ་ཡི།  །གཞུང་ལུགས་རྒྱ་མཚོ་འཆད་ལ་ཐོགས་མེད་པས།  །མཁས་རྣམས་དགྱེས་པ་བསྐྱེད་དེར་གསོལ་བ་འདེབས།  །ཞེས་སྨོས་ཏེ།  ལེགས་པར་སྦྱར་བ་སྒྲ་ཡི་བསྟན་བཅོས་ཡན་ལག་དང་བཅས་པ་དང་།  སྙན་ངག་མེ་ལོང་ལ་སོགས་པ་ཚིག་རྒྱན་གྱི་བསྟན་བཅོས་དང་།  སྡེབ་སྦྱོར་གྱི་བསྟན་བཅོས་དང།  སྐར་རྩིས་ཀྱི་བསྟན་བཅོས་སོགས་ཐུན་མོང་གི་རིག་གནས་འཆད་སྤེལ་དང་།  སེམས་བསྐྱེད་སྲོལ་གཉིས་སོགས་ཕར་ཕྱིན་གྱི་ཟབ་དོན།  རྒྱུད་སྡེ་བཞི་དང་རྗེས་སུ་འབྲེལ་བའི་རྡོ་རྗེ་ཐེག་པའི་སྨིན་གྲོལ་རབ་འབྱམས་ཀྱི་འཆད་སྤེལ་མཐའ་ཀླས་པ་ཞིག་གནང་བ་སྟེ།  དེ་ཡང་གསུང་ངག་ལམ་འབྲས་ཁོ་ནའི་དབང་དུ་བྱས་ནའང་ཚོགས་བཤད་ཚར་བདུན་དང་།  སློབ་བཤད་ཚར་གཅིག་གིས་མཚོན་ལེགས་བཤད་ཀྱི་བདུད་རྩི་རྒྱས་པར་སྩལ་བས་གསུང་ལས་སྐྱེས་པའི་སློབ་མའང་མཁས་པའི་རྣམ་དཔྱོད་ལྡན་པ།  གྲུབ་པའི་དགེ་མཚན་བརྙེས་པ།  བསྟན་པའི་བྱ་བ་རླབས་པོ་ཆེ་ལ་དབང་འབྱོར་བ་མང་དུ་བྱོན་པ་ཡིན་ནོ།  །གཉིས་པ་རྩོད་པ་རྡོ་རྗེའི་ཟེགས་མས་ཕས་རྒོལ་གྱི་བྲག་རི་བསྙིལ་བའི་ཚུལ་ནི།  ཡིད་ཆེས་ལུང་གི་བ་དན་རབ་འཕྱར་ཞིང་།  །དངོས་སྟོབས་རིག་པའི་མཚོན་རྣོན་ལྷུང་བ་ལས།  །ཕས་རྒོལ་སྤོབས་པ་འཕྲོག་བྱེད་རྩོད་ངག་གི།  །འབྱོར་པས་མངོན་པར་མཐོ་ལ་གསོལ་བ་འདེབས།  །ཞེས་སྨོས་ཏེ།  རྣམ་པ་ཀུན་ཏུ་མི་བསླུ་བ་ཡིད་ཆེས་པའི་ལུང་དང་།  ལུང་དོན་འཁྲུལ་མེད་དུ་འདྲེན་ནུས་པའི་དངོས་སྟོབས་ཀྱི་རིགས་པ་ཚད་མའི་སྐྱེ་བར་བཏོན་ཏེ་འཆད་རྩོམ་གང་ལ་ཞུགས་ཀྱང་།  ཕས་རྒོལ་གྱི་སྤོབས་པ་མཐའ་དག་འཕྲོག་ཅིང་།  རང་ལུགས་ཚད་མའི་གནས་སུ་བསྒྲུབ་ནུས་པར་མ་ཟད།  གནས་སྐབས་སུའང་ཆོས་གྲྭ་ཆེན་པོ་ཆོས་འཁོར་ལྷུན་པོའི་དྲུང་རམ་པ་མཁས་པའི་དབང་པོ་སངས་རྒྱས་ཆོས་དར་སོགས་དང་དུས་རྒྱུན་དུ་འབྲེལ་བའི་གཏམ་གྱི་སྐབས་དབྱེ་བས་བློ་གྲོས་དང་ལྡན་པ་དག་གི་ཡིད་རང་དབང་མེད་པར་འཕྲོག་ཅེས་གཏམ་དུ་གྲགས་སོ།  །གསུམ་པ་རྩོམ་པ་རིན་པོ་ཆེའི་ཕྲེང་བས་ཐུབ་བསྟན་ཁང་བཟང་མཛེས་པར་བྱས་པའི་ཚུལ་ནི།  འཇམ་དཔལ་གཞོན་ནུ་ཀུན་དགའི་མཚན་ཅན་གྱི།  །རྟོགས་བརྗོད་རིན་ཆེན་ཕྲེང་བར་སྤེལ་བས་མཚོན།  །ཡོན་ཏན་གསུམ་ལྡན་ལེགས་བཤད་རྩོམ་པ་ལ།  །ངག་གི་དབང་ཕྱུག་བརྙེས་དེར་གསོལ་བ་འདེབས།  །ཞེས་སྨོས་ཏེ།  །དེ་ལ་ལེགས་བཤད་ཀྱི་ཕྲེང་བ་ཚར་དུ་དངར་བས་བློ་ལྡན་མགྲིན་པའི་མཛེས་རྒྱན་དུ་གྱུར་པའང་།  འཇམ་དཔལ་གཞོན་ནུའི་ཡེ་ཤེས་ཀྱི་རྣམ་རོལ་ངག་གི་དབང་པོ་ཀུན་དགའ་བློ་གྲོས་ཀྱི་རྟོགས་བརྗོད་རིན་པོ་ཆེས་མཚོན་གསུང་རྩོམ་ལེགས་བཤད་ཕུལ་དུ་ཕྱིན་པ་ཇི་སྙེད་ཅིག་མཛད་པ་ཡིན་ཏེ།  འདིར་མདོ་ཙམ་སྨོས་ན།  རྗེ་རང་ཉིད་ཀྱི་ལྷག་པའི་ལྷ་སྒྲོལ་མ་དཀར་མོ།  འཇམ་དབྱངས་དཀར་པོ།  འཇམ་དཔལ་ནག་པོ།  དཔལ་དགེས་པ་རྡོ་རྗེ།  རྡོ་རྗེ་རྣལ་འབྱོར་མ།  ཀུ་རུ་ཀུལླེ།  འདོད་རྒྱལ།  གུར་ཞལ་སོགས་ལྷག་པའི་ལྷ་རབ་འབྱམས་ཀྱི་བསྟོད་པ།  རྣལ་འབྱོར་དབང་ཕྱུག་སོགས་རྩ་བརྒྱུད་བླ་མའི་སྐུ་བསྟོད།  འཇམ་མགོན་ཀུན་དགའ་བློ་གྲོས་ཀྱི་རྟོགས་བརྗོད་རིན་པོ་ཆེ་པོད་ཆེན་གཅིག་དང་།  དེའི་དོན་བསྡུ།  གྲུབ་དབང་རིན་པོ་ཆེ་རྒྱལ་མཚན་རྣམ་ཐར་གསོལ་འདེབས།  དེ་དང་མཐུན་པའི་རྣམ་ཐར་མདོར་བསྡུས།  དཔལ་ས་སྐྱ་པའི་གནས་རྟེན་ངོ་མཚར་བ་རྣམས་ཀྱི་བཤད་པ་སོགས་པོད་གསུམ་ཙམ་བཞུགས་ཤིང་།  དེ་ཐམས་ཅད་ཀྱང་དོན་མེད་པ་ལ་སོགས་ཕྱི་རོལ་པའི་བསྟན་བཅོས་ངན་པའི་མཚན་ཉིད་དྲུག་དང་བྲལ་ཞིང་།  ངོ་བོ་དོན་དང་ལྡན་པ།  བྱེད་ལས་སྒྲུབ་པ་ལྷུར་ལེན་པ།  འབྲས་བུ་སྡུག་བསྔལ་སྤོང་བ་སྟེ་ཡོན་ཏན་གསུམ་གྱིས་ཁྱད་པར་དུ་བྱས་པ་འབའ་ཞིག་གོ།  །གསུམ་པ་གཉིས་ཀའི་དོན་དུ་མཁས་བཙུན་བཟང་པོའི་ཡོན་ཏན་ལྷུན་གྱིས་གྲུབ་པའི་ཚུལ་ལ་གསུམ་སྟེ།  དང་པོ་མཁས་པའི་རྣམ་དཔྱོད་ཟླ་མེད་པའི་ཚུལ་ནི།  མདོར་ན་སྡེ་སྣོད་གསུམ་དང་རྒྱུད་སྡེ་བཞིའི།  །ཚིག་དང་དོན་ལ་མཁྱེན་པའི་ཕུལ་ཕྱིན་པས།  །རང་བཞིན་ཕན་བདེའི་གོ་འཕང་ལ་སྦྱོར་བའི།  །མཚུངས་མེད་མཁས་པའི་དབང་པོར་གསོལ་བ་འདེབས།  །ཞེས་སྨོས་ཏེ།  མདོར་བསྡུ་ན་འདུལ་བ་མདོ་སྡེ་མངོན་པ་སྡེ་སྣོད་རིན་པོ་ཆེ་རྣམ་པ་གསུམ་དང་།  བྱ་སྤྱོད་རྣལ་འབྱོར་བླ་མེད་རྒྱུད་སྡེ་རིན་པོ་ཆེ་རྣམ་པ་བཞིའི་ཚིག་གི་གནས་ཐམས་ཅད་སྒྲ་དང་།  དོན་གྱི་གནས་ཐམས་ཅད་ཚད་མ་རིག་པའི་ལམ་གྱིས་གསལ་བས་མཁྱེན་དཔྱོད་ཀྱི་མཐུ་ཕུལ་དུ་བྱུང་བས་རང་གཞན་ཕན་བདེའི་གོ་འཕང་ལ་སྦྱོར་ནུས་པའི་སྨྲ་བའི་དབང་ཕྱུག་ཆེན་པོའི་གོ་འཕང་བརྙེས་པས་མཁས་པ་རྣམས་ཀྱི་གཙུག་གི་ནོར་བུར་གྱུར་པའོ།  །གཉིས་པ་བཙུན་པའི་ངང་ཚུགས་གཞན་དང་དཔེ་ཟླ་བྲལ་བ་ནི།  སོ་སོར་ཐར་དང་བྱང་སེམས་རིག་འཛིན་གྱི།  །སྡོམ་པ་གསུམ་གྱི་བཅས་པའི་ར་བ་ལས།  །ནམ་ཡང་མི་འདའ་བསླབ་ལ་རབ་གུས་པ།  །བཙུན་པའི་ཁྱུ་མཆོག་ཆེན་པོར་གསོལ་བ་འདེབས།  །ཞེས་སྨོས་ཏེ།  སོ་སོར་ཐར་པའི་སྡོམ་པ་དང་།  བྱང་ཆུབ་སེམས་དཔའི་སེམས་བསྐྱེད་དང་།  གསང་སྔགས་སྤྱིའི་དམ་ཚིག་གི་ཁས་བླང་པ་རགས་པ་ལྟ་ཅི་སྨོས།  ཕྲ་བ་ཙམ་ཡང་འདའ་བའི་སྐབས་མི་སྲིད་ཅིང་།  ངོས་ལྐོག་གི་རྣམ་ཐར་བྱི་ལའི་ངང་ཚུལ་ཅན་མ་ཡིན་པར་རྣམ་པ་ཀུན་ཏུ་ཆོས་དང་མཐུན་ངེས་པའི་སྤྱོད་པ་དྲང་པོར་སྲོང་བ་རྒྱལ་བ་དགྱེས་པའི་ཚུལ་ཁྲིམས་ལ་གནས་པས་ན་བཙུན་པའི་མཆོག་ཏུ་གྱུར་པའོ།  །གསུམ་པ་བཟང་པོའི་ཕྲིན་ལས་མཐའ་ཡས་པའི་ཚུལ་ནི།  ཁྱད་པར་གངས་ཅན་བསྟན་པའི་མངའ་བདག་ཆེ།  །དཔལ་ལྡན་ས་སྐྱའི་འཇམ་མགོན་མཆོག་རྣམས་ལ།  །ཟབ་རྒྱས་གདམས་པ་རྒྱ་མཚོ་ཡོངས་བསྩལ་བས།  །བཟང་པོའི་ཕྲིན་ལས་རྒྱས་ལ་གསོལ་བ་འདེབས།  །ཞེས་སྨོས་ཏེ།  ཁྱད་པར་གྲུབ་དབང་རིན་ཆེན་རྒྱལ་མཚན་གྱིས་ལུང་བསྟན་པ་བཞིན།  བསྟན་པ་རིན་པོ་ཆེར་སྨན་པའི་འཆད་ཉན་བསམ་གྱིས་མི་ཁྱབ་ཅིང་།  བྱེ་བྲག་ཏུ་གངས་ཅན་བསྟན་པའི་མངའ་བདག་འཇམ་མགོན་ས་སྐྱ་པ་ཁྲི་ཆེན་རྡོ་རྗེ་འཆང་མཆེད་ཞལ་མཐའ་དག་ལ།  རང་གི་རིགས་ལས་བྱུང་བའི་ཟབ་ཆོས་གཙོ་བོར་གྱུར་པའི་དམ་ཆོས་མཐའ་དག་ལྷག་མ་མེད་པར་ཕུལ་བས་དེང་ནས་སྲིད་མཐའི་བར་དུ་བསྟན་པ་རིན་པོ་ཆེའི་སྲོག་ཤིང་གཅིག་པུར་གྱུར་པ་ནི་ངོ་མཚར་གྱི་མཛད་བཟང་ཐམས་ཅད་ཀྱི་གཙོ་བོ་ཡིན་ཏེ།  དེ་ཡང་རྗེ་བཙུན་ས་སྐྱ་པ་ཁྲི་ཆེན་རྡོ་རྗེ་འཆང་ངག་དབང་ཀུན་དགའ་བཀྲ་ཤིས།  མཐུ་སྟོབས་ཀྱི་དབང་ཕྱུག་ངག་གི་དབང་པོ་ཀུན་དགའ་རིན་ཆེན།  འཇམ་པའི་དབྱངས་བྱམས་པ་མགོན་པོ་དངོས་གྲུབ་དཔལ་འབར།  ཀུན་མཁྱེན་རྡོ་རྗེ་གདན་པ་ཆེན་པོ་འཇམ་མགོན་ཀུན་དགའ་རྒྱལ་མཚན།  རྗེ་བཙུན་རིན་པོ་ཆེ་བསྟན་པའི་སྒྲོན་མེ།  སྐལ་བཟང་ཚུལ་ཁྲིམས་པདྨ་ཕྲིན་ལས།  ཀླུ་སྡིང་ཞབས་དྲུང་རིན་པོ་ཆེ།  ནཱ་ལེནྡྲ་གཟིམ་འོག་མཆོག་སྤྲུལ་བསྟན་འཛིན་ཕྲིན་ལས།  ལྷ་ཁང་མཁན་རིན་པོ་ཆེ་རིན་ཆེན་ཆོས་འཕེལ།  དགའ་ལྡན་པ་བསྟན་པའི་རྒྱལ་མཚན།  བླ་མ་བྱམས་པ་བསྟན་འཛིན།  མདོ་སྔགས་སྨྲ་བའི་ཉི་མ་དགའ་ལྡན་དཔོན་སློབ་བྱམས་པ་སྨོན་ལམ་གྲགས་པ།  འདར་གྲོང་ཆེན་མཁན་པོ་ཀུན་དགའ་དཔལ་བཟང་སོགས་ཡོངས་སུ་གྲགས་པ་དང་།  མ་གྲགས་པ་མཐའ་ཀླས་པས་སངས་རྒྱས་ཀྱི་བསྟན་པ་རིན་པོ་ཆེ་བཤད་སྒྲུབ་ལས་གསུམ་གྱི་སྒོ་ནས་རྒྱས་པར་མཛད་པ་ཡིན་ནོ།  །སྤྱི་དོན་གསུམ་པ་ཐ་མར་དགེ་བ་ཡོངས་སུ་མྱ་ངན་ལས་འདས་ཀྱང་མཛད་པ་རྒྱུན་མི་འཆད་པའི་ཚུལ་ནི།  དེ་ལྟར་ཞིང་འདིར་མཛད་པ་རྫོགས་པའི་མཐར།  །འོད་གསལ་ཆེན་པོའི་དབྱིངས་སུ་སྙོམས་ཞུགས་ཀྱང་།  །སླར་ཡང་ཟུང་འཇུག་སྤྲུལ་པའི་རྣམ་རོལ་གྱི།  །མཛད་པ་རྒྱུན་མི་འཆད་ལ་གསོལ་བ་འདེབས།  །ཞེས་སྨོས་ཏེ།  དེ་ལྟར་ཞིང་འདིར་ཐུབ་བསྟན་རིན་པོ་ཆེ་སྲིད་མཐར་གསལ་བའི་བྱ་བ་ཡོངས་སུ་རྫོགས་པ་ན།  གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་བ་དང་།  ཞིང་ཁམས་གཞན་གྱི་གདུལ་བྱ་རྒྱ་ཆེ་བར་དགོངས་ནས།  མུས་ཆེན་གྲུབ་པའི་དབང་པོ་ཆོས་ཉིད་ཡེ་ཤེས་ཀྱི་ལུང་བསྟན་ཇི་ལྟ་བ་བཞིན་དགུང་གྲངས་དྲུག་ཅུ་རྩ་བཞིར་ཕེབས་པ་མེ་མོ་གླང་གི་ལོའི་ས་ག་ཟླ་བའི་ནང་དུ།  མགུལ་ཆམ་ལྟ་བུའི་བསྙུན་རྐྱེན་ཕྲ་མོ་ཞིག་གིས་གཞན་དོན་དུ་གཤེགས་པ་ན།  འོད་གསལ་ཆེན་པོར་ཞུགས་པའི་རྟགས་རྣམས་གསལ་བར་བསྟན་ཅིང་།  ཐུགས་དམ་གསལ་འདེབས་རྒྱ་ཚོ་སློབ་དཔོན་རྡོ་རྗེ་འཛིན་པ་ཤེས་རབ་འོད་ཟེར་གྱིས་མཛད།  འཇམ་མགོན་སྐུ་མཆེད་ནས་ཀྱང་མཆོད་སྤྲིན་རྒྱ་ཆེར་སྤྲོས།  གོང་དུ་སྨོས་པའི་རྡོ་རྗེ་སློབ་དཔོན་དེ་ཉིད་ཀྱི་བླ་བྲང་རིན་ཆེན་སྒང་དུ་སྐུ་གདུང་ཞུགས་འབུལ་སོགས་དང་།  ཕྱི་རྟེན་དངུལ་གྱི་གདུང་རྟེན་བུམ་སྒོར་རྗེ་ཉིད་ཀྱི་སྐུ་འདྲ་དང་བཅས་དེང་སང་མཆོད་སྡོང་འཛམ་གླིང་འོད་གསལ་གྱི་མདུན་དུ་བཞུགས་པ་འདི་དང་།  དུས་ཐང་སོགས་གཤེགས་རྗེས་ཀྱི་བྱ་བ་མཐར་ཕྱིན་པ་དང་།  ཡབ་རྗེ་གདོད་མའི་མགོན་པོ་དཔལ་ལྡན་ཆོས་སྐྱོང་གི་དགོངས་རྫོགས་དང་ཆབ་གཅིག་ཏུ་ས་ག་ཟླ་བར་དཔལ་དགེས་པ་རྡོ་རྗེའི་སྒྲུབ་མཆོད་བཅས་རྣམ་དཀར་གྱི་རྒྱུན་དེང་སང་བར་དུ་གོང་འཕེལ་དུ་གནས་ཤིང་།  སླར་ཡང་ཟུང་འཇུག་སྤྲུལ་པའི་ཟློས་གར་བྱང་ཤར་མཚམས་སུ་གསང་སྔགས་རྡོ་རྗེ་ཐེག་པའི་ལམ་ཟབ་མོ་གཙོ་བོར་སྤྱོད་པའི་རྣལ་འབྱོར་གྱི་དབང་ཕྱུག་ཞིག་ཏུ་སྐུའི་སྐྱེ་བ་བཞེས་ཏེ།  རྟེན་དེ་ལ་མཆོག་གི་དངོས་གྲུབ་མངོན་དུ་མཛད་ཚུལ་གྲུབ་དབང་ཆོས་ཉིད་ཡེ་ཤེས་ཀྱིས་ལུང་བསྟན་པས་མཚོན།  རྟག་པ་དང་།  ཁྱབ་པ་དང་།  ལྷུན་གྱིས་གྲུབ་པའི་ཕྲིན་ལས་རྒྱ་མཚོ་ལ་དབང་འབྱོར་བས་འགྲོ་ལ་ཕན་བདེ་སྩོལ་བའི་མཛད་པ་རྒྱུན་མི་འཆད་པ་འབྱུང་བ་ཉིད་དོ།  །གསུམ་པ་སྨོན་ལམ་དང་ཤིས་བརྗོད་ཀྱི་ཕྲེང་བ་སྦྱར་བྱང་དང་བཅས་པས་མཇུག་བསྡུ་བ་ནི།  རྩེ་གཅིག་གུས་པས་ཁྱོད་ཀྱི་རྣམ་པར་ཐར།  །ཞེས་སོགས་སྨོས་ཏེ་གོ་སླ་བས་མ་སྤྲོས་སོ།  །འདིར་སྨྲས་པ།  གནས་ལྔ་རིག་པའི་པཎྜི་ཏ།  །མཚུངས་མེད་རྡོ་རྗེ་སློབ་དཔོན་ཆེ།  །བྱམས་པ་ཀུན་དགའ་བཀྲ་ཤིས་ཀྱི།  །རྟོགས་བརྗོད་མཁའ་ལྟར་རྒྱ་ཆེ་ཡང་།  །རང་གཞན་དད་པའི་ས་བོན་ལས།  །ཕན་བདེའི་མྱུ་གུ་འཕེལ་བའི་ཆེད།  །ཚིག་སྦྱོར་ཡིད་འོང་ཨུཏྤལ།  །རབ་ཏུ་རྒྱས་པའི་སྙེ་མ་འདི།  །བརྩོན་པས་བསྒྲུབས་པའི་ལེགས་བྱས་ཀྱིས།  །ཡིད་ཅན་རྒྱ་མཚོའི་རྡུལ་སྙེད་ཀུན།  །བླ་མ་མཆོག་གིས་རྗེས་བཟུང་ནས།  །བྱང་ཆུབ་སྙིང་པོར་རོ་གཅིག་ཤོག  །ཅེས་དཔལ་ས་སྐྱ་པའི་ཡོངས་འཛིན་འཇམ་པའི་དབྱངས་བྱམས་པ་ཀུན་དགའ་བཀྲ་ཤིས་ཀྱི་རྣམ་ཐར་མདོར་བསྡུས་པ་དད་པའི་ས་བོན་ཨུཏྤལ་རབ་ཏུ་རྒྱས་པའི་སྙེ་མ་ཞེས་བྱ་བ་འདིའང་།  རྗེ་དེ་ཉིད་གྱི་ཐུགས་སྲས་མདོ་སྔགས་རབ་འབྱམས་སྨྲ་བའི་སེང་གེ།  །དཔལ་ལྡན་བླ་མ་དམ་པ་བྱམས་པ་སྨོན་ལམ་གྲགས་པས་ལམ་འབྲས་བླ་མ་བརྒྱུད་པའི་རྣམ་ཐར་གྱི་ཁ་སྐོང་དུ་མདོར་བསྡུས་འདི་ལྟ་བུ་ཞིག་སྦྱོར་བར་འོས་སོ་ཞེས་ཟིན་ཐོའི་ས་བོན་དང་བཅས་ཏེ་སྩལ་བ་བཞིན།  ཤར་མདོ་ཁམས་ཀྱི་བཙུན་པ་འཇམ་དབྱངས་མཁྱེན་བརྩེའི་དབང་པོས་ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ས་སྐྱའི་བླ་བྲང་དུ་རབ་བྱུང་བཅུ་གཉིས་འགལ་བྱེད་ཅེས་པ་ལྕགས་མོ་ཕག་གི་ལོའི་སྣྲོན་ཟླའི་དཀར་ཕྱོགས་ཀྱི་རྫོགས་པ་གསུམ་པའི་དུས་ཚེས་དགེ་བའི་སྔ་དྲོའི་ཆ་ཁོ་ནར་གང་ཤར་ཡུད་ཙམ་ལ་བྲིས་པ་དགེ་ལེགས་མཆོག་ཏུ་རྒྱས་པའི་རྒྱུར་གྱུར་ཅིག།   །།  ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-19-DZA-001]]
[[Category:Khyentse Lineage Project]]
[[Category:JKW-KABUM-Volume-19-DZA]]