View source for JKW-KABUM-14-PHA-023-001

{{Khyentse Metadata
|classification=Tibetan Publications
|subclass=Tibetan Texts
|fulltitletib=སྔ་འགྱུར་སྡོམ་པ་གསུམ་གྱི་བརྒྱུད་པའི་བླ་མ་རྣམས་ལ་གསོལ་བ་འདེབས་པ།
|fulltitle=snga 'gyur sdom pa gsum gyi brgyud pa'i bla ma rnams la gsol ba 'debs pa
|citation=[['jam dbyangs mkhyen brtse'i dbang po]]. ''snga 'gyur sdom pa gsum gyi brgyud pa'i bla ma rnams la gsol ba 'debs pa''. In '''jam dbyangs mkhyen brtse'i dbang po'i bka' 'bum'', Vol. 14: 369-373. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|editortib=རྫོང་སར་བློ་གྲོས་ཕུན་ཚོགས་
|tibgenre=Lineage Supplications - brgyud 'debs, Vows - sdom pa
|terma=Yes
|sabcadcategory=Five
|language=Tibetan
|volumenumber=014
|volnumtib=༡༤
|volyigtib=ཕ་
|totalvolumes=25
|textnuminvol=023
|textsubnumber=001
|pagenumbers=369-373
|totalpages=5
|beginfolioline=1a
|endfolioline=3a3
|totalfolios=3
|multivolumework=No
|rectonotes=sde tshan 23
|versonotes=mkhyen brtse'i bka' 'bum
|pdflink=File:JKW-KABUM-14-PHA-023.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །སྔ་འགྱུར་སྡོམ་པ་གསུམ་གྱི་བརྒྱུད་པའི་བླ་མ་རྣམས་ལ་གསོལ་བ་འདེབས་པ་བཞུགས་སོ།།  །།
ཨོཾ་སྭསྟི།  འདིར་སྔ་འགྱུར་གཙོ་བོར་གྱུར་པའི་སྡོམ་པ་གསུམ་གྱི་བླ་མ་བརྒྱུད་པ་རྣམས་ལ་གསོལ་བ་འདེབས་པའི་རིམ་པ་འགའ་ཞིག་ཕྱོགས་གཅིག་ཏུ་བཀོད་པ་ལ།  ཐོག་མར་སོ་ཐར་སྡོམ་རྒྱུད་ཀྱི་བརྒྱུད་འདེབས་ནི།  མཚན་དཔེའི་གཟུགས་སྐུ་མཐོང་དང་ཚངས་དབྱངས་གསུང་།  །ལན་ཅིག་ཐོས་པའི་མོད་ལ་སྲིད་ཞིའི་གདུང་།  །རབ་བསལ་ཁྱོད་ཐུགས་རྣམ་མཁྱེན་ལ་སྦྱོར་བ།  །ཀུན་མཁྱེན་ཉི་མའི་གཉེན་ལ་གསོལ་བ་འདེབས།  །ཤཱ་རིའི་བུ་དང་རྒྱལ་རིགས་སྒྲ་གཅན་འཛིན།  །བྲམ་ཟེའི་བཙུན་པ་རཱ་ཧུ་ལ་གུཔྟ།  །འཕགས་མཆོག་ཀླུ་སྒྲུབ་སློབ་དཔོན་ལེགས་ལྡན་འབྱེད།  །དཔལ་སྦས་ཡེ་ཤེས་སྙིང་པོར་གསོལ༴  །གངས་ཅན་བསྟན་པའི་ཉི་མ་ཞི་བ་འཚོ།  །སྦ་རིགས་རཏྣ་གཙང་པ་རབ་གསལ་ཞབས།  །ཤཱཀྱ་མུ་ནེ་གཡོར་པོ་དགེ་བ་འབྱུང་།  །དགོངས་པ་རབ་གསལ་ཞབས་ལ༴  ཀླུ་མེས་ཚུལ་ཤེ་རྡོ་རྗེ་རྒྱལ་མཚན་དང་།  །སྣེ་པོ་གྲགས་རྒྱལ་འབྲེ་ཆེན་ཤེས་རབ་འབར།  །བརྩོན་འགྲུས་འབར་དང་གཞོན་ནུ་སེང་གེའི་ཞབས།  །གྲོ་སྟོན་བདུད་རྩི་གྲགས་ལ༴  མཆིམས་ཆེན་ནམ་མཁའ་གྲགས་དང་གྲགས་ཤེ་བ།  །མཆིམས་སྟོན་བློ་བཟང་གྲགས་པ་ཀུན་རྒྱལ་རྗེ།  །གྲུབ་པ་ཤེས་རབ་པཎ་ཆེན་དགེ་འདུན་གྲུབ།  །གནས་རྙིང་ཀུན་དགའི་མཚན་ལ༴  དགེ་འདུན་རྒྱ་མཚོ་དགེ་ལེགས་དཔལ་བཟང་པོ།  །ཁ་སྐོང་ནི།  དཔལ་འབྱོར་རྒྱ་མཚོ་དཀོན་མཆོག་ཆོས་འཕེལ་དང་།  དཀོན་མཆོག་བསྟན་འཛིན་ངག་དབང་ཆོས་ཀྱི་དཔལ།  །ཆོས་ཀྱི་གྲགས་པ་རྣམས་ལ༴  དྷརྨ་པ་ཏཱི་ཨཽ་ཌཱི་ཡཱ་ན་དང་།  །པདྨའི་མཚན་ཅན་རྡོར་འཛིན་གསང་སྔགས་ཞབས།  །བཀའ་དྲིན་མཉམ་མེད་རིག་འཛིན་བཟང་པོ་སྟེ།  །མཁན་བརྒྱུད་དམ་པ་རྣམས་ལ༴  ཞེས་སོ།  །ངན་སོང་གནས་གསུམ་སྡུག་བསྔལ་དྲག་པོས་མནར།  །མི་དང་འདོད་ལྷ་འགྱུར་བའི་དུཿཁས་གཟིར།  །གཟུགས་དང་གཟུགས་མེད་འདུ་བྱེད་འཆིང་བས་བཅིངས།  །འཁོར་བའི་རང་མཚང་མངོན་སུམ་མཐོང་བར་ཤོག  །ཚུལ་དེས་བཅོས་མིན་ཡིད་འབྱུང་ངེས་པ་ལྔ།  །ཡོངས་བྲལ་ད་ཆོག་སྒོ་ནས་གསོལ་བཞིའི་ལས།  །འཁྲུལ་མེད་ཆོ་གས་ཚངས་སྤྱོད་དཔལ་ཐོབ་སྟེ།  །ངུར་སྨྲིག་འཛིན་པའི་མཆོག་ཏུ་འགྱུར་པར་ཤོག  །མཐའ་གཉིས་སྤངས་པའི་བསོད་སྙོམས་ཟས་ཀྱིས་འཚོ།  །ཤིང་དྲུང་ཙོག་པུ་ཙམ་གྱི་གནས་མལ་དང་།  །རྙེད་བླ་ཕྱག་དར་ཁྲོད་པའི་ངུར་སྨྲིག་གོས།  གཞན་གྱིས་སྤྱད་ཟིན་སྨན་ལ་བསྟེན་པར་ཤོག  །ཕམ་པ་བཞི་དང་ལྷག་མ་བཅུ་གསུམ་གྲངས།  །སྤང་ལྟུང་སུམ་ཅུ་ལྟུང་བྱེད་བཅུ་ཕྲག་དགུ།  །སོར་བཤགས་བཞི་དང་ཉེས་བྱས་བརྒྱ་བཅུ་གཉིས།  །བག་ཡོད་བརྟན་པོས་ཚུལ་བཞིན་སྲུང་བར་ཤོག  །གཞན་གྱིས་ཁྲོ་དང་མཚོན་སོགས་ཉེ་བར་བརྡེག  །གཤེ་དང་མཚང་འདྲུ་ལ་སོགས་གནོད་ཀུན་ལ།  །དྲན་ཤེས་བརྟན་པོས་གཉེན་པོ་ལེགས་བསྟེན་ནས།  །རྟག་ཏུ་བཟོད་པའི་གོ་ཆ་བགོ་བར་ཤོག  །མཁན་སློབ་དགེ་བའི་བཤེས་ལ་མཆོག་ཏུ་དད།  །ཚངས་པ་མཚུངས་པར་སྤྱོད་ལ་གཅིག་ཏུ་གུས།  །སྡེ་སྣོད་ལུང་ལ་རབ་སྦྱངས་བསླབ་པ་གསུམ།  །མངོན་པར་རྟོགས་པས་བདག་རྒྱུད་ཕྱུག་པར་ཤོག  །བག་ཡོད་མཐུན་པའི་རླུང་གིས་ཚུལ་ཁྲིམས་གཟིངས།  །མངོན་མཐོའི་རིན་ཆེན་གླིང་བགྲོད་ཐར་པའི་ནོར།  །ལྷག་བསམ་རྒྱལ་མཚན་རྩེ་མོར་ཡོངས་བཀོད་ནས།  །འགྲོ་རྣམས་ཕན་བདེའི་འདོད་དགུས་ཚིམ་བྱེད་ཤོག   །  ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-14-PHA-023]]
[[Category:Khyentse Lineage Project]]
[[Category:JKW-KABUM-Volume-14-PHA]]