View source for JKW-KABUM-01-KA-002-038

{{Khyentse Metadata
|classification=Tibetan Publications
|subclass=Tibetan Texts
|pagename=JKW-KABUM-01-KA-002-038
|fulltitletib=ཇོ་བོ་རྗེ་དཔལ་ལྡན་ཨ་ཏི་ཤ་ལ་ཅུང་ཟད་བསྔགས་པའི་ཚིག་གི་རྒྱུད་མངས་དད་བརྒྱའི་མེ་ཏོག།
|fulltitle=jo bo rje dpal ldan a ti sha la cung zad bsngags pa'i tshig gi rgyud mangs dad brgya'i me tog
|citation=[['jam dbyangs mkhyen brtse'i dbang po]]. ''jo bo rje dpal ldan a ti sha la cung zad bsngags pa'i tshig gi rgyud mangs dad brgya'i me tog''. In '''jam dbyangs mkhyen brtse'i dbang po'i bka' 'bum'', Vol. 1: 164-168. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|editortib=
|tibgenre=Verses of Praise - bstod pa
|terma=No
|sabcadcategory=One
|associatedpeople=Atiśa
|associatedpeopletib=ཇོ་བོ་རྗེ་ཨ་ཏི་ཤ་
|language=Tibetan
|volumenumber=001
|volnumtib=༡
|volyigtib=ཀ་
|totalvolumes=25
|textnuminvol=002
|textsubnumber=038
|pagenumbers=164-168
|totalpages=5
|beginfolioline=53b1
|endfolioline=55b3
|totalfolios=3
|multivolumework=No
|rectonotes=sde tshan 2
|versonotes=mkhyen brtse'i bka' 'bum
|colophontib=།དེ་ལྟར་ལྔ་བརྒྱ་པ་རྣམས་ཀྱི་གཙུག་གི་ནོར་བུ་དཔལ་ལྡན་ཨ་ཏི་ཤའི་རྣམ་ཐར་ལ་ཅུང་ཟད་བསྔགས་པའི་ཚིགས་སུ་བཅད་པ་འདིའང་།  རྗེ་དེ་ཉིད་ཀྱིས་བྱིན་གྱིས་བརླབས་པའི་གནས་དཔལ་གྱི་སྙེ་ཐང་དུ་སྐུ་འདྲ་རིན་པོ་ཆེ་ཡིད་བཞིན་ནོར་བུའི་སྤྱན་སྔར་ས་ཟླའི་དམར་ཕྱོགས་ཀྱི་རྒྱལ་བ་གཉིས་པར་རྒྱལ་ཁམས་ཉུལ་བའི་ད་རི་དྲཱ་གཙུག་ལག་སྨྲ་བའི་ཉི་མས་སྣང་གསལ་ཞིག་གི་ངོགས་སུ་འབད་པས་བྲིས་ཏེ་གསོལ་བ་བཏབ་པ་སིདྡྷི་ར སྟུ།།
|colophonwylie=de ltar lnga brgya pa rnams kyi gtsug gi nor bu dpal ldan a ti sha'i rnam thar la cung zad bsngags pa'i tshigs su bcad pa 'di'ang /__rje de nyid kyis byin gyis brlabs pa'i gnas dpal gyi snye thang du sku 'dra rin po che yid bzhin nor bu'i spyan sngar sa zla'i dmar phyogs kyi rgyal ba gnyis par rgyal khams nyul ba'i da ri drA gtsug lag smra ba'i nyi mas snang gsal zhig gi ngogs su 'bad pas bris te gsol ba btab pa sid+d+hi ra_stu
|pdflink=File:JKW-KABUM-01-KA-002.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །ཇོ་བོ་རྗེ་དཔལ་ལྡན་ཨ་ཏི་ཤ་ལ་ཅུང་ཟད་བསྔགས་པའི་ཚིག་གི་རྒྱུད་མང་དད་བརྒྱའི་མེ་ཏོག་ཅེས་བྱ་བ་བཞུགས་སོ།  །ན་མཿཤྲཱི་མཱཾ་དཱི་པཾ་ཀ་རཱ་ཡ།  དགེ་ལེགས་ཐུགས་རྗེའི་བདུད་རྩིའི་སྤྲིན་གྱིས་སྲིད་པའི་གདུང་བ་མཐའ་དག་འཕྲོག  །དཔལ༷་ལྡན༷་ཡོན་ཏན་དམ་པའི་ལྗོན་ཤིང་ཞི་བསིལ་འདོད་པ་འཇོ་བའི་གཏེར།  །རིག་དང་བརྩེ་བའི་མར༷་མེ༷འི་སྣང་བས་མཐའ་གཉིས་མུན་པ་བསྙིལ་མཛ༷ད་པའི།  །མཁས་གྲུབ་རྒྱ་མཚོའི་གཙུག་གི་ནོར་བུས་ཤིས་པའི་མེ་ཏོག་ཆར་དུ་བསྙིལ།  ༡  །ཕུ༷ལ་བྱུང༷་སྲིད་ན་མངོན་མཐོའི་ཟུར་ཕུད་ཀྱིས།  །ཡང་ཡང་བསྙེན་པའི་ཞབས༷་སྐྱེས་བཀྲ་ཤིས་རྡུལ།  །གང་དུ་བཀོད་པ་ཙམ་གྱིས་རྒྱལ་བའི་བསྟན།  །སླར་ཡང་དར་ལ་བབས་པའི་ངང་ཚུལ་བཟུང་།  ༢  །ཨེ་མ་དེ་ཡི་རྟོགས་པ་བརྗོད་པའི་གཏམ།  །རིན་ཆེན་རིན་ཐང་བྲལ་བའི་ལེགས་བཤད་དབྱངས།  །དཔྱོད་ལྡན་འཕགས་དང་མཁས་པའི་མགྲིན་པ་ནས།  །ཁོར་ཡུག་རི་བོའི་ཁོངས་སུ་རླུང་ལྟར་སྒྲོགས།  ༣  །ཐོག་མར་ཆེན་པོའི་རིགས་ཀྱི་སཱ་ལའི་ཚལ།  །མཛེས་སྟེར་པདྨོ་གཞོན་ནུའི་སྙེམས་འཆང་བ།  །ཤར་བའི་མོད་ནས་མཁྱེན་དང་བརྩེ་བ་ཡིས།  །བདུད་རྩིའི་དོ་ཤལ་མི་ཐུང་ཅི་ཡང་རིང་།  ༤  །རྒྱུའོ་དྲི་བཟང་རྒྱས་པའི་ཀུ་མུ་དཱའི།  །རྫིང་བུར་བུང་བ་མྱོས་པའི་ཚོགས་རྣམས་ཏེ།  །ཞི་བསིལ་ཉམས་བརྒྱས་རབ་སྒེག་ཐར་པའི་གྲོང་།  །འཇུག་ལ་ཁྱོད་ཐུགས་རྟག་ཏུ་ཉམས་པ་མེད།  ༥  །དེ་སླད་ཟླ་ཤེལ་གསར་པའི་འཛུམ་རླབས་དང་།  །འཁྲུལ་པའི་རྣམ་ཐར་དཀར་པོས་མཛེས་པ་ཡང་།  །ཕྱི་ནས་གྲུབ་པའི་དཔལ་གྱིས་མངོན་མཐོ་བའི།  །ཚུལ་འདིས་སོམ་ཉིའི་དྲྭ་བ་འཇིལ་ལ་དབང་།  ༦  །སླར་ཡང་ཐམས་ཅད་གཟིགས་པས་རང་ཉིད་ཀྱི།  །ཡོངས་རྫོགས་བསྟན་ལ་བྱ་བ་མཛད་པའི་སླད།  །བག་མེད་འགོག་པའི་བདུད་རྩི་ཟུངས་ཤིག་ཅེས།  །བསྐུལ་བའི་ངོ་མཚར་སྲིད་ན་ཉིན་བཞིན་གསལ།  ༧ །དེ་ཚེ་རྣམ་པར་གྲོལ་བའི་ཚུལ་ཁྲིམས་ནི།  །བརྟན་མཁས་ཡོན་ཏན་བྱེ་བའི་ཕུང་པོ་ཅན།  །འཆད་དང་སྤྱོད་ལ་འཕགས་མཆོག་ཨུ་པ་ལཱི།  །ཁོ་ན་ཉིད་ཅེས་འཇིག་རྟེན་གསུམ་ན་སྙན།  ༨  །ཡུན་རིང་དུས་ནས་གོམས་པའི་ཁྱད་པར་དང་།  །བརྩོན་པས་ཟབ་མོའི་དོན་ལ་མཉམ་བཞག་པས།  །གཟུངས་དང་མངོན་པར་ཤེས་དང་ཏིང་འཛིན་སྒོ།  །ཕ་མཐའ་ཡས་པར་འཇུག་ཅིང་ལྡང་བར་མཛད།  ༩  །མ་ཕྱིས་དྲི་མེད་མཁྱེན་པའི་མེ་ལོང་དུ།  །བྲིས་མིན་ཤེས་བྱའི་རི་མོ་འབུམ་འཆར་བས།  །བསྐུལ་བ་མེད་པར་དཔྱོད་ལྡན་རྒྱ་མཚོ་ཡིས།  །ཐོར་ཚུགས་ས་ལ་དུད་པའི་བསྟི་སྟང་སྟོབ།  ༡༠  །ཕྱི་ནང་རིག་གཞུང་ཀུན་གྱི་ཚིག་དང་དོན།  །གང་བློའི་གྲ་ཟུར་གཅིག་ན་བདེར་བཟུང་བས།  །ཚུལ་བཞིན་འཆད་རྩོད་རྩོམ་ལ་མཚུངས་མེད་པའི། །གྲགས་དཀར་ཡི་གེ་ཕྱོགས་ཀྱི་འགྲམ་པར་བྱིན།  ༡༡ །ཀུན་མཁྱེན་ཉིད་ཀྱང་འདོད་པའི་ཆགས་བྲལ་ཞིང་།  །འགྲོ་བའི་མིག་སྟེ་འཆར་ནུབ་གཞན་དབང་མིན།  །སྣ་ཚོགས་གཟུགས་ཀྱིས་འཇིག་རྟེན་ཁྱབ་འཇུག་ཀྱང་།  །གཞན་དག་བསླུ་བའི་བསམ་སྦྱོར་གཞར་ཡང་དབེན།  ༡༢ །ཁྱད་པར་བསིལ་ལྡན་ལྗོངས་སུ་ཐུབ་པའི་བསྟན།  །སྙིགས་སྤྱོད་གདུང་བའི་མལ་དུ་ཉམ་ཐག་ཚེ།  །རྗེ་བཙུན་འཕགས་མས་བསྐུལ་བའི་དེ་མ་ཐག  ། གང་ཁྱོད་ཁ་བའི་ཁྲོད་འདིར་དལ་གྱིས་གཤེགས།  ༡༣ །དེ་ཚེ་སྙིང་རྗེས་རབ་བརླན་བྱང་ཆུབ་སེམས།  །སྲ་ཞིང་ལྕི་དང་གཡོ་བའི་མཆིལ་པ་རུ།  །གྲུབ་པ་མིན་ཡང་ཚུར་མཐོང་རྣམས་ཀྱི་ཡིད།  །མཐའ་དག་གཞུ་བཞིན་བཀུག་པའི་ངོ་མཚར་བཟུང་།  ༡༤ །མཐའ་ཀླས་སྲས་བཅས་རྒྱལ་བའི་ཐུགས་ཀྱི་བཅུད།  །སྐྱེས་བུ་གསུམ་གྱི་ལམ་རིམ་ཁོ་ནས་ཀྱང་།  །ཟབ་རྒྱས་རྒྱལ་བའི་བཀའ་དང་དགོངས་འགྲེལ་ཀུན།  །གདམས་ངག་གཅིག་ཏུ་འཆར་བའི་མཚན་སྙན་ལེན།  ༡༥  །སྡེ་སྣོད་རྒྱ་མཚོའི་བཤད་སྒྲ་སྒྲོག་པ་དང་།  །ལྷན་ཅིག་མཁས་པའི་འདུ་བ་ཆེར་རྒྱས་ཤིང་།  །རྩེ་གཅིག་སྒྲུབ་ལ་བརྩོན་པའི་དགེ་མཚན་གྱིས།  །རྨད་བྱུང་གྲུབ་པའི་ལམ་སྲོལ་གསར་དུ་ཚུགས།  ༡༦  །དེ་ཕྱིར་དགའ་ལྡན་གནས་སུ་མ་ཕམ་ཞབས། །འཕགས་པའི་ཡུལ་དུ་སློབ་དཔོན་ཀླུ་ཡི་དབང་།  །གངས་རིའི་ལྗོངས་འདིར་མར་མེ་མཛད་དཔལ་རྣམས།  །ཀུན་མཁྱེན་གཉིས་པར་གྲགས་པའི་སྒྲ་དེ་འཛིན།  ༡༧  ། གང་གི་བསྐལ་པར་གོམས་པའི་ཐུགས་བསྐྱེད་ཀྱིས།  །བསྟན་འགྲོར་ཕན་བདེ་བསྒྲུབས་ལ་ངོ་མཚར་ཅི།  །བསོད་ནམས་བྱེ་བའི་རང་གཟུགས་མཚན་དཔེའི་བྱིན།  །འདེགས་བཟོད་བྷོ་ཊའི་ལྗོངས་འདི་ཨེ་མ་བརླིང་།  ༡༨  །དེ་སླད་མཐོང་ན་མི་མཐུན་མེད་པའི་ཞལ།  །མངོན་སུམ་བསྙེན་པའི་སྐལ་བཟང་བཏང་གྱུར་ཀྱང་།  །ཡིད་བཞིན་འདོད་པ་འཇོ་བའི་ཞལ་སྐྱིན་མཆོག  །མཇལ་བས་མོས་པའི་ཆུ་གཏེར་སྙིང་ལ་ཁོལ།  ༡༩  །གང་ཕྱིར་དད་བརྒྱའི་དཔྱིད་ཀས་བཟུང་བ་ཡི།  །ཚིག་སྦྱོར་མེ་ཏོག་ཕྲ་མོའི་མཆོད་སྤྲིན་གྱིས།  །ཅུང་ཟད་བསྙེན་བཀུར་བགྱིས་པའི་བསོད་ནམས་ཀྱིས།  །ཡེ་ཤེས་གཟིགས་པའི་འབབ་སྟེགས་མཛེས་པར་བྱས། ༢༠ །དེ་ལས་བྱུང་བའི་ལེགས་བྱས་སྣང་བ་ཡིས།  །ངེས་འབྱུང་ལོ་འདབ་མངོན་མཐོའི་ཐོར་ཚུགས་ཀྱིས།  །དུད་བྱས་བྱང་ཆུབ་སེམས་གཉིས་པདྨོ་དང་།  །ཡང་དག་ལྟ་བའི་འབྲས་བུས་འཁྱུད་གྱུར་ཅིག  ༢༡  །ཁྱད་པར་དྲི་མེད་ཐུབ་བསྟན་རིན་པོ་ཆེའི།  །བཤད་སྒྲུབ་གདུགས་དཀར་སྲིད་རྩེར་བསྒྲེངས་པ་ལས།  །འགྲོ་ཀུན་གནས་སྐབས་མཐར་ཐུག་དོན་གཉིས་ཀྱི།  །ངལ་འཚོའི་དགའ་སྟོན་མཆོག་ཏུ་རྒྱས་པར་ཤོག  ༢༢།  མདོར་ན་རིག་དང་བརྩེ་བའི་ཡོན་ཏན་མཁའ་བཞིན་ཕ་མཐའ་ཡས་པའི་དཔྱིད།  །རྣམ་འདྲེན་སྲས་བཅས་དགྱེས་པའི་ཟླ་བ་གྲགས་སྙན་བདུད་རྩིའི་དོ་ཤལ་གྱིས།  །འཁྱུད་པའི་ངོ་མཚར་སྲིད་ན་མཚུངས་མེད་ཕུལ་བྱུང་ཞབས་ཀྱི་རྣམ་ཐར་དག  །བདག་གཞན་ཡིད་ཅན་རྒྱ་མཚོའི་ཚོགས་རྣམས་སྤྱོད་ཡུལ་མཉམ་པ་ཉིད་གྱུར་ཅིག  ༢༣ །དེ་ལྟར་ལྔ་བརྒྱ་པ་རྣམས་ཀྱི་གཙུག་གི་ནོར་བུ་དཔལ་ལྡན་ཨ་ཏི་ཤའི་རྣམ་ཐར་ལ་ཅུང་ཟད་བསྔགས་པའི་ཚིགས་སུ་བཅད་པ་འདིའང་།  རྗེ་དེ་ཉིད་ཀྱིས་བྱིན་གྱིས་བརླབས་པའི་གནས་དཔལ་གྱི་སྙེ་ཐང་དུ་སྐུ་འདྲ་རིན་པོ་ཆེ་ཡིད་བཞིན་ནོར་བུའི་སྤྱན་སྔར་ས་ཟླའི་དམར་ཕྱོགས་ཀྱི་རྒྱལ་བ་གཉིས་པར་རྒྱལ་ཁམས་ཉུལ་བའི་ད་རི་དྲཱ་གཙུག་ལག་སྨྲ་བའི་ཉི་མས་སྣང་གསལ་ཞིག་གི་ངོགས་སུ་འབད་པས་བྲིས་ཏེ་གསོལ་བ་བཏབ་པ་སིདྡྷི་ར སྟུ།།   །།  ༈}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-01-KA-002]]
[[Category:Khyentse Lineage Project]]
[[Category:JKW-KABUM-Volume-01-KA]]