View source for JKW-KABUM-02-KHA-003

{{Khyentse Metadata
|classification=Tibetan Publications
|subclass=Tibetan Texts
|fulltitletib=རྗེ་བཙུན་བླ་མ་དམ་པའི་ཞལ་ལུང་རྣམས་བསྐྱུད་བྱང་ཟིན་བྲིས་སུ་བཏབ་པ་བློ་གསལ་དགའ་བའི་རྣ་རྒྱན།
|fulltitle=rje btsun bla ma dam pa'i zhal lung rnams bskyud byang zin bris su btab pa blo gsal dga' ba'i rna rgyan
|citation=[['jam dbyangs mkhyen brtse'i dbang po]]. ''rje btsun bla ma dam pa'i zhal lung rnams bskyud byang zin bris su btab pa blo gsal dga' ba'i rna rgyan''. In '''jam dbyangs mkhyen brtse'i dbang po'i bka' 'bum'', Vol. 2: 361-475. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=
|authortib=འཇམ་དབྱངས་མཁྱེན་བརྩེའི་དབང་པོ་
|editortib=རྫོང་སར་བློ་གྲོས་ཕུན་ཚོགས་
|tibgenre=Notes - zin bris, Advice - zhal gdams
|terma=No
|sabcadcategory=Two
|language=Tibetan
|volumenumber=002
|volnumtib=༢
|volyigtib=ཁ་
|totalvolumes=25
|textnuminvol=003
|pagenumbers=361-475
|totalpages=115
|beginfolioline=1a
|endfolioline=58a
|totalfolios=58
|multivolumework=No
|rectonotes=sde tshan 3
|versonotes=mkhyen brtse'i bka' 'bum
|pdflink=File:JKW-KABUM-02-KHA-003.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅། །རྗེ་བཙུན་བླ་མ་དམ་པའི་ཞལ་ལུང་རྣམས་བསྐྱུད་བྱང་ཟིན་བྲིས་སུ་བཏབ་པ་བློ་གསལ་དགའ་བའི་རྣ་རྒྱན་ཅེས་བྱ་བ་བཞུགས་སོ། །
ན་མོ་བི་བྷཱུ་བཛྲ་དྷཱ་ར་མཉྫུ་གྷོ་ཥཱནནྡ་མ་ཏཱི་སཱ་ར་ཛ་ན་ཧ་པ་སྱ་ཤབྡ་སྭ་རཱ་ཡ། ཐོག་མར་ཉན་ཐོས་ཀྱི་ཐེག་པའི་སྐབས་སུ། བདེན་བཞི་རྣམ་པ་བཅུ་དྲུག་གི་དོན་མཚོན་ཙམ་སྤྲོ་ན། དང་པོ་ལ། སྡུག་བསྔལ་བདེན་པའི་ངོ་བོ། ཕུང་པོ་ལྔ་སྡུག་བསྔལ་གསུམ་དང་ལྡན་པས་ལུས་ངག་ཡིད་གསུམ་ཀར་མི་བདེ་བ་ཡིན། ངེས་ཚིག་དུ་ཁཿསཏྱཾ་ངན་པར་འགྲོ་བ་བདེན་པ་ཞེས་པའོ། །དབྱེ་ན། དབྱེ་གཞི་རང་དང་བཅས་བཞི་ལས། དང་པོ་སྡུག་བསྔལ་ལ་གསུམ་ནི། ཟག་བཅས་ཀྱི་འདུ་བྱེད་ལ་ཡིད་དུ་འོང་བ་རྣམས་ནི་འགྱུར་བའི་སྡུག་བསྔལ་མི་ལ་ཡོད་དེ། ཚེ་སྟོད་སྨད་དུ་བདེ་སྐྱིད་འགྱུར་བས་མཚོན། སྐྱེ་བའི་སྡུག་བསྔལ་འཇུར་མིག་ནས་དྲངས་པ་ལྟ་བུ། རྒ་བ་ཤིང་སྡོང་གོག་པ་ལྟ་བུ། ན་བ་དུག་འཐུང་བ་ལྟ་བུ། འཆི་བ་མུན་ནང་དུ་འགྲོ་བ་ལྟ་བུ། དགྲ་དང་འཕྲད་དོགས་པ་བྱིའུ་ཁྲས་དེད་པ་ལྟ་བུ། གཉེན་བྱམས་པ་དང་འབྲལ་དོགས་པ་བུ་གཅིག་པུ་ཤིར་ཉེ་བ་ལྟ་བུ། ཡོད་པ་འཚོ་སྐྱོང་མི་ཐུབ་པ་རྒན་མོས་ཕྱུགས་ཚོལ་བ་ལྟ་བུ། མེད་པ་བཙལ་གྱིས་མི་རྙེད་པ་ཡི་དྭགས་ཟས་སྐོམ་ཚོལ་བ་ལྟ་བུ་སྟེ་སྡུག་བསྔལ་བརྒྱད་དང་། དེ་བཞིན་ལྷ་ལ་འཕོ་ལྟུང་གིས་མཚོན། སྡུག་བསྔལ་གྱི་སྡུག་བསྔལ་ཡིད་དུ་མི་འོང་བ་རྣམས་ཏེ། མཛེ་ཐོག་ཏུ་ཕོལ་མིག་བྱུང་བའམ། བྱོལ་སོང་རྣམས་ལ་གླེན་ལྐུགས་ཀྱི་སྟེང་དུ། ཁལ་འགེལ། ཞོ་བཞོ། སྤུ་བཏོག  །ཤ་ཁྲག་གི་ཆེད་དུ་གསོད་པས་མཚོན། ཁྱབ་པ་འདུ་བྱེད་ཀྱི་སྡུག་བསྔལ་ཀུན་ལ་ཡོད། ཟས་གོས་ལ་སོགས་ཀྱིས་མནར་བས་མཚོན། གཉིས་པ་མི་རྟག་པ་ལ་ཕྱི་ནང་གཉིས། ཕྱི་ལ་ཡང་གཉིས་ཏེ། རིང་བ་དུར་ཁྲོད་དུ་མི་སོགས་ཤི་བའི་རུས་པ་མཐོང་བ། ཉེ་བ་སེམས་ཅན་ད་ལྟ་ཤི་བ་མཐོང་ཐོས་སོ། །ནང་ལ་འཆི་ངེས་གསུམ་སྟེ། སྐྱེས་ཚད་མཐར་འཆི་བར་ངེས། འདུས་བྱས་མི་རྟག་པར་ངེས། ཚེ་སྐད་ཅིག་མི་རྟག་པར་ངེས་སོ། །ནམ་འཆི་ཆ་མེད་གསུམ་སྟེ། འཆི་བའི་རྐྱེན་མང་བ། ལུས་ལ་སྙིང་པོ་མེད་པ། ཚེ་ལ་ལོང་མེད་པ། འཆི་བ་ལ་ཅིས་ཀྱང་མི་བསྟོངས་པ་གསུམ་སྟེ། མཛའ་བཤེས་གཉེན་འདུན་གྱིས་མི་བསྟོངས། ཟས་ནོར་ལོངས་སྤྱོད་ཀྱིས་མི་བསྟོངས། རང་གི་ལུས་ཀྱིས་མི་བསྟོངས་པ་རྣམས་སོ། །གསུམ་པ་སྟོང་པ་ནི། དེ་ཀུན་རང་བཞིན་མེད་པའི་དོ ན་བསམ་ཞིང་དཔྱད་པ། བཞི་པ་བདག་མེད་པ་ནི་གང་ཟག་གི་བདག་མེད་པར་མཐོང་བའོ། །གཉིས་པ་ཀུན་འབྱུང་བདེན་པའི་ངོ་བོ་ནི། སྡུག་བསྔལ་དེ་ཀུན་འབྱུང་བའི་གཞི་དུག་གསུམ་སོགས་ཡིན། ངེས་ཚིག  །ས་མུ་ཡ་ད་སྟེ། ལས་དང་ཉོན་མོངས་པའི་མཚན་ཉིད་དེ་དག་ལས་སྡུག་བསྔལ་བ་དེ་ཀུན་འབྱུང་བ་ལ་བྱ། དབྱེ་ན་དབྱེ་གཞི་རང་དང་བཅས་བཞི་ལས། དང་པོ་ནི། ཀུན་འབྱུང་ཞེས་པ། རྒྱུ་དུག་གསུམ་ལ་བརྟེན་ནས་འབྲས་བུ་རིགས་དྲུག་གི་སྡུག་བསྔལ་འབྱུང་བའོ། །གཉིས་པ་ལ། འདོད་ཡོན་ལྔའི་རྒྱུ་དང་། དེ་ལ་ཆགས་པའི་ཉེས་དམིགས་གཉིས། འདུན་པ། ཆགས་པ། རབ་ཏུ་བརྐམ་པ་གསུམ་མོ། །ཉེས་དམིགས་ནི། གཟུགས་ལ་ཆགས་པས་ཕྱེ་མ་ལེབ་ལྟ་བུ། སྒྲ་ལ་ཆགས་པས་རི་དྭགས་ལྟ་བུ། དྲི་ལ་ཆགས་པས་བུང་བ་ལྟ་བུ། རོ་ལ་ཆགས་པས་ཉ་ལྟ་བུ། རེག་བྱ་ལ་ཆགས་པས་གླང་པོ་ཆེ་ལྟ་བུའོ། །གསུམ་པ་རྐྱེན་ལ། འདས་མ་འོངས་ད་ལྟར་དུས་གསུམ་གྱིས་ཕྱེ། བཞི་པ་སྐྱེ་བ་ལ། རྒྱུ་རྣམ་རྟོག་སྐྱེ། འབྲས་བུ་ངན་སོང་སྐྱེ་བ་དང་གཉིས་སོ། །གསུམ་པ་འགོག་པའི་བདེན་པའི་ངོ་བོ་ནི། ཉོན་མོངས་རགས་པ་ཐམས་ཅད་ཞི་བའི་སྟོང་པའོ། །ངེས་ཚིག་ནི་རོ་དྷ་ངེས་འགོག་སྟེ། ཉོན་མོངས་པ་ཐམས་ཅད་ངེས་པར་འགོག་པའི་ཕྱིར་རོ། །དབྱེ་ན། དབྱེ་གཞི་རང་དང་བཅས་བཞི་ལས། དང་པོ་འགོག་པ་ཞེས་པ། སྡུག་བསྔལ་དང་བཅས་པ་འགོག་པས་འགོག་པ་སྟེ། རྒྱུ་ཉོན་མོངས་པ་འགོག་པས་ན་འགོག་པ། རྐྱེན་རྣམ་རྟོག་འབྲང་བ་དེ་འགོག་པས་ན་འགོག་པ། འབྲས་བུ་སྡུག་བསྔལ་འགོག་པས་ན་འགོག་པ། རྣམ་རྟོག་གི་རྒྱུན་ཐམས་ཅད་འགོག་པས་ན་འགོག་པ་སྟེ། ཉན་ཐོས་རྣམས་འགོག་པ་ལ་སྙོམས་པར་ཞུགས་ནས་བྱམས་པའི་བསྟན་པ་ལ་ལྡང་བར་འདོད་པའོ། །གཉིས་པ་ཞི་བ་ལ་ལྔ་སྟེ། ཉོན་མོངས་ཀྱི་མེ་ཞི་བ་ནི་མྱང་འདས་གྱི་ས་ན་དུག་གསུམ་མེད་པ་སྟེ་དུག་གསུམ་རྩད་ནས་སྤོང་པའི་ཕྱིར་རོ། །ཉེས་དམིགས་ཀྱི་མེ་ཞི་བ་ནི་མྱང་འདས་ཀྱི་ས་ན་འཁོར་བའི་སྡུག་བསྔལ་ཐམས་ཅད་ཞི་བ་སྟེ་འཁོར་བར་གནས་པའི་ཉེས་པ་ཐམས་ཅད་ཞི་བའོ། །ལོངས་སྤྱོད་ཀྱི་མེ་ཞི་བ་ནི། མྱང་འདས་ཀྱི་ས་ན་འདུ་བྱེད་ཀྱི་སྡུག་བསྔལ་མེད་དེ་ཟས་སྐོམ་གྱི་སྡུག་བསྔལ་མེད་པའོ། །སྤྱོད་ལམ་གྱི་མེ་ཞི་བ་ནི་འགྲོ་ཉལ་འདུག་པ་ཐམས་ཅད་ལ་མི་བདེ་བ་མེད་པའོ། །ཚོར་བའི་མེ་ཞི་བ་ནི། ཁམས་གསུམ་མཐའ་དག་ཚོར་བ་གསུམ་ལས་མ་འདས་པས། ཚོར་བ་བདེ་བ་ཐམས་ཅད་འགྱུར་བའི་སྡུག་བསྔལ། སྡུག་བསྔལ་མྱོང་བ་ཐམས་ཅད་སྡུག་བསྔལ་གྱི་སྡུག་བསྔལ། ཚོར་བ་མྱོང་བ་ཐམས་ཅད་འདུ་བྱེད་ཀྱི་སྡུག་བསྔལ་ལོ། །དེས་ན་མྱང་འདས་ལ་ཚོར་བ་བདེ་སྡུག་བཏང་སྙོམས་གསུམ་མེད་པའོ། །གསུམ་པ་གྱ་ནོམ་པ་ལ་གསུམ། ཉོན་མོངས་ཀྱི་ཐ་བ་གྱ་ནོམ་པ་ནི། ཉོན་མོངས་པའི་ཐ་བ་ཞི་གནས་ཀྱིས་མ་བརླན། ཤེས་རབ་ཀྱི་ཐོང་གཤོལ་གྱིས་མ་རློག་པ་དེ་ལ་འཇིག་རྟེན་ལས་འདས་པའི་མྱུ་གུ་ཐམས་ཅད་མི་སྐྱེའོ། །ངན་སོང་གི་ཐ་བ་གྱ་ནོམ་པ་ནི། ངན་སོང་གི་ཐ་བ་འཕགས་པའི་ལམ་གྱིས་མ་བརླན་ན། མཐོ་རིས་ཐར་པའི་གོ་འཕང་མི་འབྱུང་ངོ་། །སྡུག་བསྔལ་གྱི་ཐ་བ་གྱ་ནོམ་པ་ནི། སྡུག་བསྔལ་གྱི་ཐ་བ་བདེ་བས་མ་བརླན་ན་འཕགས་པའི་ལམ་མི་འབྱུང་བས། བདེ་བས་བརླན་དགོས། རྐྱེན་ཐམས་ཅད་དང་བྲལ་བས་གྱ་ནོམ་པ་སྟེ་ལེགས་པ་ཞེས་བྱའོ། །བཞི་པ་ངེས་པར་འབྱུང་བ་ལ་བཞི། རྒྱུ་ངེས་པ་ནི་ཉོན་མོངས་པ་ཐམས་ཅད་ཀྱི་རྩ་བ་མ་རིག་པ་དང་། བག་ཆགས་འཐུག་པོ་ས་བོན་དང་བཅས་སྤོང་བ་དང་། སྒྲིབ་པ་གཉིས་ཀྱི་བག་ཆགས་སྤོང་པའོ། །རྐྱེན་ངེས་པ་ནི་མ་རིག་པའི་གཉེན་པོར་རིག་པའི་ཤེས་རབ་དང་། བག་ཆགས་ཀྱི་གཉེན་པོར་བསོད་ནམས་ཀྱི་ཚོགས་དང་སྒྲིབ་གཉིས་སྦྱོང་པའི་གཉེན་པོར་བདེན་པ་བཞིའོ། །ལམ་ངེས་པ་ནི་བདེན་བཞི་ཉིད་ལམ་དུ་བྱས་ནས་ཉམས་སུ་ལེན་པའོ། །འབྲས་བུ་ངེས་པ་ནི། སྡུག་བསྔལ་ལ་ངེས་པར་འབྱུང་བའོ། །དེ་ཡང་འཁོར་བའི་སྡུག་བསྔལ་ལས་ངེས་པར་འབྱུང་དགོས། ངེས་པར་འབྱུང་བ་ལ་རྒྱུ་བག་ཆགས་འཐུག་པོ་སྤང་དགོས། རྐྱེན་བསོད་ནམས་དཔག་མེད་གསོག་དགོས། ལམ་སྡོམ་པ་མིག་བཞིན་བསྲུང་དགོས། འབྲས་བུ་སྡུག་བསྔལ་དགག་དགོས། དེས་བག་ཆགས་ལ་ངེས་པར་འབྱུང་བས་ན་ངེས་འབྱིན་ནོ། །བཞི་པ་ལམ་བདེན་གྱི་ངོ་བོ་ནི། དཀར་པོའི་ལམ་དེ་ལ་ཞུགས་ཕྱིན་ཆད་ཐར་པ་ཐོབ་པ་ཞིག་གོ  །ངེས་ཚིག་ནི། པནྠི་ཞེས་མང་པོ་འགྲོ་བའི་ཕྱིར་ལམ་སྟེ་ཐར་པར་འགྲོ་བའི་ལམ་མོ། །དབྱེ་ན། དབྱེ་གཞི་རང་དང་བཅས་པ་བཞི་ལས། དང་པོ་ནི། བདེན་པ་བཞི་ཁོ་ནའི་སྒོ་ནས་འཇུག་པའོ། །གཉིས་པ་རིག་པ་ལ་བཞི་སྟེ། ལྟོས་པའི་རིག་པ་ནི། རྒྱུ་ངན་པ་ལ་ལྟོས་ནས་འབྲས་བུ་ངན་པར་ཤེས། རྒྱུ་བཟང་པོ་ལ་ལྟོས་ནས་འབྲས་བུ་བཟང་པོར་ཤེས་པའོ། །བྱ་བྱེད་ཀྱི་རིག་པ་ནི། ཉོན་མོངས་པ་མི་དགེ་བའི་གཉེན་པོར་འགྱུར་བའི་བྱ་བ་བྱེད། དགེ་བ་དཀར་པོའི་ཆོས་མཐའ་དག་གི་གྲོགས་སུ་འགྱུར་བའི་བྱ་བ་བྱེད་པའོ། །འཐད་པ་སྒྲུབ་པའི་རིག་པ་ནི་ཆོས་ཅན་ལ་འཐད་པ་ཝ་ལྟ་བུ། དམ་བཅའ་ལ་འཐད་པ་མེ་ལྟ་བུ། གཏན་ཚིགས་ལ་འཐད་པ་དུ་བ་ལྟ་བུ། མཐུན་དཔེ་ལ་འཐད་པ་ཐབ་ཚང་ནང་དུ་མེ་ལྟ་བུའོ། །མདོར་ན་ཆོས་ཐམས་ཅད་ཚད་མའི་ལམ་གྱི་ཡང་དག་པར་ཤེས་པས་གཏན་ལ་འབེབས་པའོ། །ཆོས་ཉིད་ཀྱི་བདེན་པ་བདག་མེད་གཉིས་རྟོགས་པའམ། བདེན་བཞི་མ་ནོར་བར་རྟོགས་པའོ། །གསུམ་པ་སྒྲུབ་པ་ལ་གཉིས། ཐུན་མོང་སྒྲུབ་པ་ནི། འཆི་བ་མི་རྟག་པ། ལས་རྒྱུ་འབྲས། འཁོར་བའི་ཉེས་དམིགས་བསམས་ནས་སྐྱབས་སུ་འགྲོ། སྡོམ་པ་མིག་འབྲས་ལྟར་བསྲུང་། གང་ཟག་གི་བདག་མེད་བསྒོམ། ཐུན་མོང་མ་ཡིན་པའི་སྒྲུབ་པ་ནི། སེམས་ཅན་ཐམས་ཅད་ལ་བྱམས་སྙིང་རྗེའི་སྐྱབས་འགྲོ་ཁྱད་པར་ཅན་བསྐྱེད། སྨོན་འཇུག་གི་སེམས་བསྐྱེད། ཕར་ཕྱིན་གྱི་སྒོར་ཞུགས། ཆོས་ཀྱི་བདག་མེད་པ་སྒོམ་པ་དེས་བློ་ཕྱིན་ཅི་མ་ལོག་གི་དོན་ལ་སྒྲུབ་པར་ནུས་པས་ན་སྒྲུབ་པ་ཞེས་བྱ། བཞི་པ་ངེས་འབྱིན་ལ། རྒྱུ་འཁོར་བ་ལས་འབྱིན་པ་ནི། དཔེར་ན་རྩུབ་གཏན་རློན་པ་ལས་མེ་མི་འབར་བ་ལྟར་ཞེན་པ་ཉོན་མོངས་ཀྱི་རླན་གྱིས་གོས་ན་འབྲས་བུ་མྱ་ངན་ལས་འདས་པ་མི་ཐོབ་བས་འཁོར་བའི་ཉོན་མོངས་པའི་ཞེན་པ་དེ་དང་བྲལ་བར་བྱའོ། །འབྲས་བུ་མྱ་ངན་ལས་འདས་པ་ངེས་པར་འབྱིན་པ་ནི། དཔེར་ན། ཤིང་སྐམ་པོ་ལས་མེ་འབྱུང་བ་ལྟར་དཀོན་མཆོག་གསུམ་ཡུལ་དུ་བྱས་ནས་ལམ་བདེན་བཞི་སྦྱོར་བ་ནི་ཉམས་སུ་ལེན་ཅིང་། འབྲས་བུ་དགྲ་བཅོམ་བའོ། ། ༈ ཡེ་ཤེས་རྣམ་པ་བཅུ་དྲུག་ནི། སྒྱུ་མ་ངལ་བསོའི་འགྲེལ་པ་ལས། དེ་ནས་མཐོང་ལམ་རྣམ་པར་མི་རྟོག་པའི་ཡེ་ཤེས་བདེན་པ་བཞིའི་ཆོས་ཉིད་མངོན་དུ་མཐོང་སྟེ། ཁམས་ཀྱི་ཕྱོགས་གཅིག་སྤང་བྱ། རྟགས་གློ་བུར་བ་དག་པའི་དུས་སོ། །དེ་ལ་སྡུག་བསྔལ། ཀུན་འབྱུང་། ལམ་འགོག་པའི་བདེན་བ་རེ་རེ་བཞིན་ཆོས་ཤེས་པ་དང་། ཆོས་ཤེས་པ་ལ་བཟོད་པ། རྗེས་སུ་ཤེས་པ་དང་། རྗེས་སུ་ཤེས་པ་ལ་བཟོད་པ་སྟེ་བཞི་བཞི་བསྡོམས་པས་བཅུ་དྲུག་གོ  །ཆོས་ཤེས་པ་ནི་བདེན་བཞི་སོ་སོའི་ཆོས་ཅན་གྱི་རང་མཚན་མཐོང་བའོ། །ཆོས་ཤེས་པ་ལ་བཟོད་པ་ནི་རང་མཚན་མཐོང་བས་མི་སྐྲག་པའོ། །རྗེས་སུ་ཤེས་པ་ནི་བདེན་བཞི་སོ་སོའི་རང་མཚན་སྟོང་ཉིད་དུ་མཐོང་པའོ། །རྗེས་སུ་ཤེས་པའི་བཟོད་པ་ནི་ནམ་མཁའ་མཐོང་བ་ལ་མི་སྐྲག་པའོ། །དེ་དག་ལ་བློ་རྫས་གཅིག་གིས་བདེན་བཞི་རང་བཞིན་སྣང་སྟོང་སྒྱུ་མ་ལྟ་བུར་བྱ་རྫོགས་ཀྱི་སྐད་ཅིག་མཐོང་ཚུལ་བཞི་འཆར་ཏེ། བདེན་བཞི་དོན་ལ་ཆོས་ཤེས་བཞི། ཆོས་བཟོད་བཞི། རྗེས་ཤེས་བཞི། རྗེས་བཟོད་བཞིའི་རིམ་པ་སོ་སོར་འཆར་བའི་ཕྱིར་རོ། །དེ་དག་ལ་མངོན་རྟོགས་རྒྱན་ལས། སྡུག་བསྔལ་ལ་སོགས་བདེན་པ་དང་། ཆོས་ཤེས་རྗེས་སུ་ཤེས་པ་དང་། །བཟོད་ཤེས་སྐད་ཅིག་བདག་ཉིད་ནི། །ཞེས་སོ། །དེའི་དུས་སུ་མཐོང་སྤོང་བརྒྱ་དང་བཅུ་གཉིས་སྤོང་ཚུལ་ནི། ཀུན་བརྟགས་ཀྱི་ཉོན་མོངས་པ་དྲུག་ལ། མ་རིག་པ། འདོད་ཆགས། ཁོང་ཁྲོ། ང་རྒྱལ། ཐེ་ཚོམ། ལྟ་བའོ། །ལྟ་བ་ལ་ལྔ་སྟེ། འཇིག་ཚོགས་ཀྱི་ལྟ་བ། མཐར་འཛིན། ལོག་ལྟ། ཚུལ་ཁྲིམས་དང་བརྟུལ་ཞུགས་ལ་མཆོག་འཛིན། ལྟ་བ་ལ་མཆོག་ཏུ་འཛིན་པའོ། །དེ་ལ་མ་རིག་པ་ལ་སོགས་པ་ལྟ་བ་མ་ཡིན་པ་ལྔ་པོ་དེ་དང་བསྡོམས་པས་བཅུ། དེ་ལྟར་རྩ་བའི་ཉོན་མོངས་པ་བཅུ་པོ་དེ་འདོད་ཁམས་ན་བདེན་བཞི་རེ་རེ་ལའང་བཅུ་བཅུ་བྱུང་བས་བཞི་བཅུ། གཟུགས་དང་གཟུགས་མེད་གཉིས་ན་ཁོང་ཁྲོ་མ་གཏོགས་དགུ་དགུ་བདེན་བཞི་རེ་རེ་ལ་བྱུང་བས། སུམ་ཅུ་རྩ་དྲུག་པ་གཉིས་ཏེ་བསྡམས་པས་མཐོང་སྤོང་བརྒྱ་དང་བཅུ་གཉིས་པོ་སྤོང་ཚུལ་ནི། མཐོང་ལམ་གྱི་ཡེ་ཤེས་སྐྱེ་འགྱུར་ལམ་གྱིས་རགས་པ་བརྒྱུད་ནས་སྦྱངས། སྐྱེ་བཞིན་པས་ཕྲ་བ་དངོས་སུ་སྤོངས། སྐྱེས་དུས་ནས་མཐོང་སྤོང་གི་ས་བོན་མ་ལུས་པ་འགག་པའི་ཚུལ་གྱིས་སོ། །དེའི་འོག་ཏུ་སྒོམ་ལམ་པའི་དྲི་མ་བཞི་བརྒྱ་དང་བཅུ་བཞི་ཡང་། རང་རང་གི་སའི་སྦྱོར་བ་དང་། དངོས་དང་། རྗེས་ལ་སྤངས་ཏེ། སྒོམ་སྤོང་གི་ཉོན་མོངས་བག་ལ་ཉལ་བའི་ལྷན་སྐྱེས་ལས་ཕྱེ་ན་དྲུག་སྟེ། མ་རིག་པ། འདོད་ཆགས། ཁོང་ཁྲོ། ང་རྒྱལ། འཇིག་ཚོགས་ལྟ་བ། མཐར་འཛིན་གྱི་ལྟ་བའོ། །འདོད་ཁམས་ན་ཉོན་མོངས་པ་དྲུག་པོ་རེ་རེ་ལའང་། ཆེན་པོ། འབྲིང་། ཆུང་ངུ་གསུམ་གསུམ་ལས། དེ་ལའང་ཆེན་པོ། འབྲིང་། ཆུང་ངུ་། འབྲིང་གི་ཆེན་པོ། འབྲིང་། ཆུང་ངུ་། ཆུང་ངུའི་ཆེན་པོ། འབྲིང་། ཆུང་ངུ་སྟེ་དགུ་དགུར་ཕྱེ་བས་དྲུག་ཚན་དགུ་སྟེ་ལྔ་བཅུ་རྩ་བཞི། གཟུགས་ཁམས་ན་བསམ་གཏན་དང་པོ། གཉི་པ། གསུམ་པ། བཞི་པ་རྣམས་སུ་ཁོང་ཁྲོ་བོར་ནས་ཉོན་མོངས་པ་ལྔ་པོ་རྣམས་ལ་ཆེ་འབྲིང་ཆུང་དགུ་དགུ་སྟེ། འདོད་ཆགས་ལ་སོགས་པ་བཞི་བཅུ་ཞེ་ལྔ་པ་བཞི་བསྡོམས་པས་བརྒྱ་བརྒྱད་ཅུ། གཟུགས་མེད། ནམ་མཁའ། རྣམ་ཤེས་ཅིའང་མེད། སྲིད་རྩེ་བཞི་ལ་བརྒྱ་བརྒྱད་ཅུ་སྟེ། ཁམས་གོང་མའི་བརྒྱ་བརྒྱད་ཅུ་བཅུ་ཚན་གཉིས་ལ་སུམ་བརྒྱ་དྲུག་ཅུ། དེའི་སྟེང་དུ་འདོད་པའི་ལྔ་བཅུ་རྩ་བཞི་བསྣན་པས་སྒོམ་སྤོང་བཞི་བརྒྱ་དང་བཅུ་བཞིའོ། །སྤོང་ཚུལ་ཡང་། སྦྱོར་བ་དང་། བར་ཆད་མེད་ལམ་གཉིས་ཀྱི་ཉེ་རྒྱུ་དང་པོར་སྤོང་། ཁྱད་པར་ལམ་གྱིས་དངོས་སུ་སྤོང་། རྣམ་གྲོལ་ལམ་གྱིས་ཐག་བསྲིང་དང་། ཕྲ་བ་འགག་འགྱུར་གྱི་ཚུལ་གྱིས་སྤོང་ངོ་། །ཞེས་གསུངས་སོ། །རང་རྒྱལ་གྱི་སྐབས་རྟེན་འབྲེལ་བཅུ་གཉིས་ལ་ཕྱི་རྒྱུ་དང་འབྲེལ་པ་དྲུག་ནི། མྱུ་གུ་དང་། ལྡོང་བུ། ཡལ་ག  །ལོ་འདབ། མེ་ཏོག  །འབྲས་བུའོ། །ནང་རྐྱེན་པ་དྲུག་ནི། ས་ཆུ་མེ་རླུང་དུས་ཀྱི་འགྱུར་བ། ས་བོན་ནོ། །འདིའི་མཚན་ཉིད་ལ་སྤྱི་མཚན་དང་རང་མཚན་གཉིས། དང་པོ་ལ་གསུམ། རྒྱུ་དེ་ཡོད་པ་ལས་སྐྱེ། མེད་པ་ལས་མི་སྐྱེ། རྒྱུ་མི་རྟག་པ་ལས་སྐྱེ། རྟག་པ་ལས་མི་སྐྱེ། ནུས་པ་ལས་སྐྱེ། མི་ནུས་པ་ལས་མི་སྐྱེའོ། །རང་གི་མཚན་ཉིད་ལ། མ་རིག་པ་ནི་ལས་རྒྱུ་ལ་རྨོངས་པ། འདུ་བྱེད་ནི་དམིགས་པ་ལ་སེམས་གཡོ་བ། རྣམ་ཤེས་དང་པོ་མངལ་དུ་ཞུགས་པ། མིང་ནི་མིང་བཞིའི་ཐོང་སྟེ། ཚོར་བ་འདུ་ཤེས་འདུ་བྱེད་རྣམ་ཤེས་བཞི། གཟུགས་ནི་མེར་པོ་སོགས། སྐྱེ་མཆེད་དྲུག་ནི་མིག་ལ་སོགས་པའི་དབང་པོ། རེག་པ་ནི་གསུམ་འདུས་ནས་ཡོངས་སུ་གཅོད་པ། ཚོར་བ་ནི་ཉམས་སུ་མྱོང་བ། སྲིད་པ་ནི་ཚོར་བ་ལ་ཆགས་པ། ལེན་པ་ནི་རྒྱུ་ལ་ཆགས་པ། སྲིད་པ་ནི་ལས་ཀྱི་བག་ཆགས་ནུས་མཐུ་ཅན། སྐྱེ་བ་ནི་དང་པོ་མ་བྱུང་བ་ལས་བྱུང་བ། རྒ་བ་ནི་རྒྱུན་འགྱུར་བ། ཤི་བ་ནི་སྲོག་གི་དབང་པོ་རྒྱུན་ཆད་པའོ། །དབྱེ་བ་མ་རིག་པ་ལ། དེ་ཁོ་ན་ཉིད་དང་ལས་རྒྱུ་འབྲས་ལ་རྨོངས་པ་གཉིས། འདུ་བྱེད་ལ་བསོད་ནམས་ཀྱི་འདུ་བྱེད་སེམས་པ་དང་། གཡོའི་འདུ་བྱེད་སེམས་པ་གཉིས། རྣམ་ཤེས་ལ་རྒྱུ་འབྲས་གཉིས། གཟུགས་ལ་འབྱུང་བའི་གཟུགས་དང་འབྱུང་འགྱུར་གཉིས། སྐྱེ་མཆེད་ལ་དྲུག་སྟེ། དབང་པོ་ལྔ་ཡིད་ཤེས་བཅས། རེག་པ་ལ་ཡང་དེ་དྲུག་ལ་བརྟེན་པས་དྲུག  །ཚོར་བ་བདེ་སྡུག་བཏང་སྙོམས་ཀྱི། སྲེད་པ་ལ། འདོད་སྲེད། གཟུགས་སྲེད། གཟུགས་མེད་ཀྱི་སྲེད་པ་གསུམ། ལེན་པ་ལ་བདག་ཏུ་སྨྲ་བའི་ཉེར་ལེན། ལྟ་བའི་ཉེར་ལེན། ཉེ་འདོད་པའི་དང་ཚུལ་ཁྲིམས་ཀྱི་ཉེར་ལེན། བརྟུལ་ཞུགས་མཆོག་འཛིན་གྱི་ཉེར་ལེན་བཞིའོ། །སྲིད་པ་ལ། སྔོན་གྱི་སྲིད་པ། སྐྱེ་བའི་སྲིད་པ། འཆི་བའི་སྲིད་པ། བར་སྲིད་བཞི། སྐྱེ་བ་ལ། སྒོང་མངལ་དྲོད་རྫུས་བཞི། རྒ་ཤི་ནི་དེ་བས་སོ། །སྔ་མ་སྔ་མ་རྒྱུ་ལ། ཕྱི་མ་ཕྱི་མ་འབྲས་བུའོ། །དེ་ཡང་རིང་བའི་རྒྱུ་འབྲས་དང་། ཉེ་བའི་རྒྱུ་འབྲས་གཉིས་ལས། གོང་མ་བདུན་ནི་རིང་བའི་རྒྱུ་འབྲས་ཏེ། མ་རིག་པའི་དབང་གིས་ལས་བྱས། ལས་དབང་གིས་བག་ཆགས་བསགས་པས། བག་ཆགས་ནི་ལྔར་བཞག་པ་སྟེ། འབྲས་བུའི་མིང་རྒྱུ་ལ་བཏགས་ནས་བག་ཆགས་མི་ཟེར་བར། རྣམ་པར་ཤེས་པ་ལ་མིང་གཟུགས་སྐྱེ་མཆེད་རེག་པ་ཚོར་བ་ཟེར་རོ། །ཉེ་བའི་རྒྱུ་འབྲས་ནི་སྲེད་པ་ལ་སོགས་པ་འོག་མ་རྣམས་སོ། །བར་དེར་རྟེན་འབྲེལ་སྔ་མའི་ཁོང་དུ་གཏོགས་པ་གཅིག་གིས་སྲེད་པ་བསྐྱེད། སྲེད་པས་ལེན་པ་བསྐྱེད། སྲེད་ལེན་ཆུ་ལུད་འདྲ་བ་དེས་བག་ཆགས་ལྔ་པོ་གསོས་བཏབ་པས་བག་ཆགས་ནུས་མཐུ་ཅན་དུ་སོང་བ་དེ་ལ་སྲེད་པ་ཟེར་བ་ལགས་སོ། །ཉན་རང་གི་ས་བདུན་ནི། ཧེ་རུ་ཀ་གལྤོ་ལས། དང་པོ་དཀར་པོ་རྣམ་པར་མཐོང་། །ཤུཀླ་བི་དཪྴན་བྷཱུ་མི་ཞེས་པ། མོས་པ་སྤྱོད་པའི་ས་ནས་དྲོད་ལ་དང་། རྣམ་པར་བྱང་བ་དཀར་པོ་རྣམ་པར་མཐོང་བའི་ས་ཞེས་བྱའོ། །རིགས་དང་ལྡན་པ་རིགས་ཀྱིས། །གོ་ཏྲ་བྷཱུ་མི་ཞེས་པ། དད་པ་ཤིན་ཏུ་ཆེ་བའི་ས། །འཇིག་རྟེན་ཆོས་ཀྱི་མཆོག་ལ་ཆོས་དང་གང་ཟག་ལ་བདག་མེད་པར་བཟོད་པས་ན། བྱང་ཆུབ་ཐོབ་པའི་རིགས་དང་ལྡན་པས་ན་རིགས་ཀྱི་ས་ཞེས་བྱའོ། །གྲངས་ལས་འཕགས་པས་བརྒྱད་པའི་ས། །ཨཥྟ་མི་ཀ་བྷཱུ་མི་ཞེས་བྱ་བ་ནི། བརྒྱད་པ་ལ་བྱ་སྟེ། དགྲ་བཅོམ་པའི་འབྲས་བུ་ཐོབ་པའི་གྲལ་དང་པོ་ནས། ཡས་བགྲང་ན་རྒྱུན་དུ་ཞུགས་པ་ལ་འཇུག་པ་གྲངས་བརྒྱད་ལ་བབས་པས་ནའོ། །བརྒྱད་པའི། དེ་ཉིད་རྟགས་མཐོང་མཐོང་པའི་ས། །དཪྴན་བྷཱུ་མི་ཞེས་པ། དྲི་ཤྱཱ་ཏེ་པྲཾཀྵ་ཎ་ཞེས་པ་ནི། དྲི་ཤ་ནི་མཐོང་བ། བྷཱུ་མི་ནི་ས་སྟེ་རྒྱུན་ཞུགས་ཀྱི་འབྲས་བུ་ལ་གནས་པས་དེ་ཁོ་ན་ཉིད་རྟག་པར་མཐོང་བས་ན་མཐོང་བའི་ས་ཞེས་བྱའོ། །འདོད་ཁམས་འདོད་ཆགས་སྲབ་པའི་ས། །ཏ་ནཱུ་བྷཱུ་མི་ཞེས་པ། ལན་གཅིག་ཕྱིར་འོང་བས་ན་འདོད་ཁམས་འདོད་ཆགས་དང་སྲབ་མོར་བྱས་པ་ན་སྲབ་པའི་སའོ། །འདོད་པའི་འདོད་ཆགས་བྲལ་བའི་ས། །བི་ག་ཏ་ཏཱ་ག་བྷཱུ་མི་ཞེས་པ་ཕྱིར་མི་འོང་བའི་ས་སྟེ། ས་འདི་ལ་གནས་པས་འདོད་པ་འདུན་པ་དང་། གནོད་སེམས་སྤངས་པས་ན་འདོད་ཆགས་དང་བྲལ་བ་ཡིན་ཏེ། དེའི་སའོ། །བསྲུང་བྱ་མི་ཉམས་བསྲུང་པའི་ས། །ཀྲྀ་ཏཱ་བི་བྷཱུ་མི་ཞེས་པ་དགྲ་བཅོམ་པའི་ས་ལ་བྱ་སྟེ། ཀྲྀ་ཏ་ནི་བྱས་པ། ཨ་ནི་ཨ་བི་དུ་ན་ཤཱི་ལ་ཞེས་པ་སྟེ་བསྲུང་བའི་རང་བཞིན་ཅན་ཡིན་པས་སྔར་བྱས་ཏེ་གྲུབ་པའི་དོན་མི་ཉམས་པའི་བསྲུང་བའི་ཕྱིར་བྱས་པ་བསྲུང་བའི་ས་ཞེས་བྱ་སྟེ། དངོས་སུ་ན་དགྲ་བཅོམ་པའི་སའོ། །ཉོན་མོངས་ས་བདུན་རྣམ་པར་གནས། །པྲོ་ཏཱ་སནྡྷ་ཞེས་པ་ནི། པྲོ་ཏ་ནི་ཆུ་ཡི་རྒྱུན་ལྟ་བུའོ། །ཨ་སནྡྷ་ནི་ནང་དུ་ཞུགས་པ་སྟེ་སྤྱིར་མྱ་ངན་འདས་ཀྱི་མཚོར་འབབ་པའི་ཆུ་བོའི་རྒྱུན་དུ་ཞུགས་པ་སྟེ། པ་ཀྲྀ་དཱ་གཱ་མི་ཞེས་པ་སྟེ། པ་ཀྲྀ་ད་ནི་ལན་གཅིག  །ཨཱ་གཱ་མཱི་ནི་འོང་བ་སྟེ། ཚེ་དེ་ཉིད་ལ་མྱ་ངན་མི་འདའ་ཡི། ལན་གཅིག་སླར་འཇིག་རྟེན་འདིར་སྐྱེ་བ་སྟེ་དེས་ན་ལན་གཅིག་ཕྱིར་འོང་བ་ཞེས་བྱའོ། །ཨ་ནཱ་གཱ་མཱི་ཞེས་པ་ཐ་མའི་སྐལ་བ་ཅན་གྱིས་ཆོས་རྣམ་ལྔ་སྤངས་པས། སླར་འདོད་ཁམས་སུ་སྐྱེ་བ་ཕྱིར་མི་འོང་བ་ཞེས་བྱའོ། །ལས་ཉོན་ཀྱི་དགྲས་མྱང་འདས་ཀྱི་བར་གཅོད་པ་རྣམས་བཅོམ་པ་ལ་དགྲ་བཅོམ་པ་ཞེས་བྱའོ། །དེ་ལྟར་ན་ཉན་ཐོས་ཀྱི་ས་བདུན་གྱི་ཁོག་བསྡེབ་པར་བྱའོ། །ཞེས་གསུངས་སོ། །བྱང་སེམས་སྐབས་བདེན་གཉིས་གཅིག་ན་སྐྱོན་བཞི་ཡོད་དེ། ཀུན་རྫོབ་ཀྱི་སྣང་བ་གཞན་ནས་འཚོལ་མི་དགོས་པ་བཞིན་དོན་དམ་ཡང་མི་འཚོལ་བར་འགྱུར་བ། ཀུན་རྫོབ་བསླུ་བ་བཞིན་དོན་དམ་ཡང་བསླུ་བ། དོན་དམ་བདེན་པ་བཞིན་ཀུན་རྫོབ་ཡང་བདེན་པ། ཀུན་རྫོབ་ལ་དབྱེ་ན་དུ་མ་ཡོད་པ་བཞིན། དོན་དམ་ལའང་དུ་མ་ཡོད་པའོ། །ཐ་དད་ན་སྐྱོན་བཞི་སྟེ། ཀུན་རྫོབ་བཀག་པས་དོན་དམ་མི་འབྱུང་བ། ཀུན་རྫོབ་ཀྱི་ཆོས་ཉིད་དོན་དམ་མ་ཡིན་པ། དོན་དམ་དེས་ཀུན་རྫོབ་ཀྱི་སྒྲོ་འདོགས་མི་ཆོད་པ། ཉོན་མོངས་པ་དང་རྣམ་བྱང་གཉིས་ཀུན་གཞིའི་ངོ་བོར་མ་གཅིག་པའོ། །དེ་ལ་ཀུན་རྫོབ་བདེན་པ་སྤྱིའི་མཚན་ཉིད་ནི། མི་བདེན་པས་བསླུ་ཞིང་སོ་སྐྱེའི་སྤྱོད་ཡུལ་དུ་གྱུར་པ་ཞིག་གོ  །ངེས་ཚིག་ནི། སཾ་པྲྀ་ཏི་ས་ཏྱཾ་ཞེས་པ་ཡང་དག་པར་སྒྲིབ་པ་བདེན་པ་སྟེ། རྣམ་པར་རྟོག་པ་དང་བཅས་པའི་ཤེས་པས་དངོས་པོའི་དེ་ཁོ་ན་ཉིད་མཐོང་བར་བྱེད་པ་ལ་སྒྲིབ་པའི་ཕྱིར་རོ། །དབྱེ་ན་ཡང་ལོག་གཉིས་ལ་ཁྱད་པར་བརྒྱད་དེ། དང་པོ་དོན་བྱེད་ནུས་མི་ནུས་ནི། རེ་ཞིག་པའི་ཚད་མས་ཀྱང་གྲུབ། རེ་ཞིག་པའི་དོན་བྱེད་ཀྱང་ནུས་པ་ཡང་དག་ཀུན་རྫོབ། རེ་ཞིག་གི་ཚད་མས་ཀྱང་མ་གྲུབ། དོན་ཡང་བྱེད་མི་ནུས་པ་ལོག་པའི་ཀུན་རྫོབ་དེ་འདྲེས་སོ། །གཉིས་པ་རྟོག་ པ་ཡོད་མེད་ནི། རྟོག་མེད་ཡུལ་ཅན་དུ་བྱས་པ་ཡང་དག་ཀུན་རྫོབ། རྟོག་པ་དང་བཅས་པ་ཡུལ་ཡུལ་ཅན་དུ་བྱས་པ་ལོག་པའི་ཀུན་རྫོབ། གསུམ་པ་རིག་པས་དབང་བྱས་ན། ཡུལ་ཡུལ་ཅན་དུ་བྱས་པ་ཡང་དག་ཀུན་རྫོབ། དེའང་ཡིན་པ་སོ་སོ་ལོག་པའི་ཀུན་རྫོབ། བཞི་པ་གསལ་མི་གསལ་ནི། གསལ་བར་སྣང་ན་ཡང་དག་ཀུན་རྫོབ། མི་གསལ་ན་ལོག་པའི་ཀུན་རྫོབ། ལྔ་པ་མེད་དོན་ནི། མེད་པ་མ་ཡིན་པའི་དོན་སྣང་བ་ཙམ་ཡང་དག་ཀུན་རྫོབ། མེད་པའི་དོན་ལ་ཞེན་པ་ལོག་པའི་ཀུན་རྫོབ། དྲུག་པ་རྟེན་དག་པ་ནི། རྟེན་རང་གི་དབང་པོ་ལ་དངོས་སུ་བརྟེན་པ་དེ་ཡང་དག་ཀུན་རྫོབ། དེ་ལས་ལོག་པ་ལོག་པའི་ཀུན་རྫོབ། བདུན་པ་ཡུལ་ནི། ཡུལ་འདི་ན་དུས་ད་ལྟར་སྣང་བ་མཐུན་པ་ནི། ཤེས་པ་མ་ཞེན་པ་འཆིང་ནུས་བསྐྱེད་ནུས་ན་ཡང་དག་ཀུན་རྫོབ། དེ་ལྟར་མ་ཡིན་པ་ལོག་པའི་ཀུན་རྫོབ། བརྒྱད་པ་ཀུན་རྫོབ་མཚན་ཉིད་བཞི་ཅན་ནི། མཐུན་པར་སྣང་། དོན་བྱེད་ནུས། རྒྱུ་དང་རྐྱེན་ལས་བསྐྱེད་པ་ཡང་དག  །བརྟགས་ན་དབེན་པ་ལོག་པའོ། །སྣང་ལ་དོན་བྱེད་ནུས་པའི་དཔེ་བུམ་པ་དེ་བཞིན་དུ་སྣང་ལ། དོན་བྱེད་མི་ནུས་པ་ཐག་ཁྲའི་སྦྲུལ་སྣང་ཡང་མི་སྣང་དོན་ཡང་མི་ནུས་པ་ནི། མི་སྲིད་པའི་ཆོས་བཞི་སྟེ། རི་བོང་གི་རྭ། མོ་གཤམ་གྱི་བུ། རུས་སྦལ་གྱི་སྤུ། ནམ་མཁའི་མེ་ཏོག་གོ  །གཞན་ཡང་བྱེ་མ་ལས་མར་དང་། སེང་གེ་ལས་ཁ་ཆུ་སོགས་མཚོན་ནོ། །དོན་དམ་པའི་བདེན་པའི་མཚན་ཉིད་སྤྲོས་མཐའ་ཐམས་ཅད་དང་བྲལ་བ། ངེས་ཚིག་པ་རཱ་མཪྠ་སཏྱཾ། ཞེས་པ་དོན་མཆོག་བདེན་ཏེ། འཇིག་རྟེན་ལས་འདས་པའི་ཡེ་ཤེས་མཆོག་གི་དམིགས་པའི་སྤྱོད་ཡུལ་ལ་དོན་དུ་གྱུར་པ་འཕགས་པ་རྣམས་མྱ་ངན་འདས་པ་དང་། སྐྱེ་བ་མེད་པར་ཡང་དག་པར་བདེན་པའོ། །དབྱེ་ན་གཉིས། རྣམ་གྲངས་མ་ཡིན་པའི་དོན་དམ་པ་ནི། མཐའ་བརྒྱད་དང་བྲལ་བ་སྟེ། སྐྱེ། འགག  །རྟག  །ཆད། འགྲོ། འོང་། མཐའ། དབུས་དང་བྲལ་བ་སངས་རྒྱས་གྱི་ཐུགས་ཡིན། །རྣམ་གྲངས་ཀྱི་དོན་དམ་པ་ཐུགས་དེས་མཁྱེན་ནས་གཟིགས་པའི་ཡུལ་ཡིན། སྟོང་ཉིད་བཅོ་བརྒྱད་ཀྱང་རྣམ་གྲངས་པའི་དོན་མང་སྟེ། མིག་རྣ་བ་སྣ་ལྕེ་ཡིད་རྣམས་ཐེར་ཟུག་ཏུ་མ་ཡིན་པའི་ཕྱིར་ན་ནང་སྟོང་པ་ཉིད། གཟུགས་སྒྲ་དྲི་རོ་རེག་བྱའི་ཆོས་ཐམས་ཅད་ཐེར་ཟུག་ཏུ་མ་ཡིན། འཇིག་པར་མི་འགྱུར་བས་ན་ཕྱི་སྟོང་པ་ཉིད། ཕྱི་ནང་གི་སྐྱེ་མཆེད་བཅུ་གཉིས་དོན་དམ་པར་གཟུང་འཛིན་གཉིས་ཀ་མེད་དོ། །ཡུལ་དང་ཡུལ་ཅན་གྱི་ཚུལ་དང་བྲལ་བས་ཕྱི་ནང་སྟོང་པ་ཉིད། ཆོས་ཐམས་ཅད་ངོ་བོ་ཉིད་ཀྱིས་སྟོང་པ་རང་བཞིན་གྱིས་སྟོང་སྟེ་གཞན་གྱིས་སྟོང་པར་བྱར་མེད་པས་སྟོང་པ་ཉིད་སྟོང་པ་ཉིད། ཕྱི་སྣོད་ཀྱི་འཇིག་རྟེན་ན་སའི་དཀྱིལ་འཁོར་ཆེན་པོར་ཕྱོགས་བཅུར་སྟོང་པས་ཆེན་པོ་སྟོང་པ་ཉིད། དོན་དམ་པ་ཉིད་ལ་ཡང་དངོས་པོར་བཟུང་དུ་རུང་བ་མེད་པས་དོན་དམ་པ་སྟོང་པ་ཉིད། འདུས་བྱས་ཁམས་གསུམ་སྒྱུ་མ་དང་འདྲ་སྟེ། སྐྱེ་འགག་གནས་གསུམ་དང་བྲལ་ཞིང་སྟོང་པས་འདུས་བྱས་སྟོང་པ་ཉིད། འདུས་མ་བྱས་ནམ་མཁའ་དང་། དེ་བཞིན་ཉིད་དང་། འགོག་པ་གཉིས་རྒྱུ་རྐྱེན་གྱིས་གྲུབ་པ་མ་ཡིན་པ་འདི་བཞི་རང་བཞིན་གྱིས་སྟོང་པས་ན་འདུས་མ་བྱས་སྟོང་པ་ཉིད། མཐའ་ལས་འདས་པ་སྟོང་པ་ཉིད་ནི་གོ་སླའོ། །འཁོར་བ་ཐོག་མཐའ་མེད་ཅིང་དབུས་ཀྱང་མེད་པས་ཐོག་མ་དང་ཐ་མ་མེད་པ་སྟོང་པ་ཉིད། བུམ་ནང་གི་ཆུ་ལྟར་ཡོད་པ་ལས་མེད་པར་བྱས་ལྟ་བུ་མ་ཡིན་པ་སྟེ། ཆོས་ཐམས་ཅད་ཡེ་ནས་རང་བཞིན་གྱིས་སྟོང་པས་བསལ་བ་མེད་པའི་ཕྱིར་དོར་བ་མེད་པ་སྟོང་པ་ཉིད། ཆོས་ཐམས་ཅད་ཉན་རང་དང་དེ་བཞིན་གཤེགས་པས་ཀྱང་མ་མཛད། རང་བཞིན་གྱི་འདུས་བྱས་ཀྱང་མ་ཡིན་པས་རང་བཞིན་སྟོང་པ་ཉིད། ཕུང་པོ་ཁམས་དང་སྐྱེ་མཆེད་ལ་སོགས་པ་འདུས་བྱས་འདུས་མ་བྱས་ཀྱི་ཆོས་ཐམས་ཅད་སོ་སོའི་མཚན་ཉིད་ཀྱིས་སྟོང་པས་ཆོས་ཐམས་ཅད་སྟོང་པ་ཉིད། གཟུགས་ཚོར་འདུ་ཤེས་སོགས་རང་མཚན་བཏགས་པ་ཙམ་དུ་ཟད་དེ། ཡོངས་སུ་གྲུབ་པ་མེད་པས་དངོས་པོ་མེད་པ་སྟོང་པ་ཉིད། འདུ་འཕྲོད་ལས་བྱུང་བའི་ཆོས་རྣམས་རང་དབང་ཅན་དུ་མི་སྐྱེ་སྟེ། རྟེན་ཅིང་འབྲེལ་ཏེ་བྱུང་བ་ན་ངོ་བོ་ཉིད་མེད་པའི་ཕྱིར་ངོ་བོ་ཉིད་སྟོང་པ་ཉིད། དངོས་པོ་མེད་པར་རྟོགས་པའི་མཐོང་བ་དང་། ཤེས་པ་ནི་དངོས་པོ་མེད་པའི་ངོ་བོ་ཉིད་ཅེས་བྱ། མཐོང་བ་དང་ཤེས་པ་འདི་ཀ་ཡང་མཐོང་བས་ཀྱང་མ་གྲུབ། ཤེས་པས་ཀྱང་མ་བྱས་ཏེ་རང་བཞིན་གྱིས་སྟོང་པའི་ཕྱིར་དངོས་པོ་མེད་པའི་ངོ་བོ་ཉིད་སྟོང་པ་ཉིད་དོ། །དེ་ལྟ་བུའི་སྟོང་པ་ཉིད་བཅོ་བརྒྱད་པོ་རེ་རེ་ལ་ཡང་མཐའ་བརྒྱད་རེ་རེས་ཁྱབ་བོ།   ། ༈ དབུ་མ་པས་དམ་བཅའ་བའི་གཏན་ཚིགས་ཆེན་པོ་བཞི་ཡི་བཤད་པའི་ཚུལ་ལ། དང་པོ་རྡོ་རྗེ་གཟེགས་མ་ནི་དགག་བྱའི་རྒྱུ་དཔྱད་ནས་དགག་བྱ་འགོག་པ་སྟེ། ཆོས་ཅན་ངོ་བོ་ཙམ་ཡང་དོན་དམ་པར་བདག་དང་། གཞན་དང་། གཉིས་ཀ་དང་། རྒྱུ་མེད་པ་ལས་མ་སྐྱེས་པ་གང་ཞིག་ལ་སྐྱེ་བའི་དངོས་པོ་མཐའ་དག་གིས་སྟོང་སྟེ། དཔེར་ན་དོན་སྤྱི་ཙམ་ལ་དངོས་པོ་མེད་པ་བཞིན་ནོ། །ཡོད་མེད་སྐྱེ་འགོག་ནི། དགག་བྱའི་འབྲས་བུ་དཔྱད་ནས་འགོག་པ་སྟེ། ཆོས་ཅན་སྣང་བ་རྟེན་འབྲེལ་འདི་ཡང་དོན་དམ་པར་རྒྱུ་ལ་འབྲས་བུ་ཡོད་མེད་སྐྱེ་བ་གསུམ་ཀ་སྟོང་པའི་ཕྱིར་ཏེ། འདི་ལྟར་གང་ལས་རྒྱུ་དང་འབྲས་བུ་ཡོད་པ་དང་། མེད་པ་སྐྱེ་བས་སྟོང་པ་དང་། སྐྱེ་བའི་དངོས་པོ་མཐའ་དག་གིས་སྟོང་པ་སྟེ། དཔེར་ན་དངོས་པོ་མེད་ཀྱང་། ངོ་བོ་ཉིད་ཀྱིས་མཚོན་པར་བྱས་པ་བཞིན་ནོ། །མུ་བཞི་སྐྱེ་འགོག་ནི། རྒྱུ་འབྲས་གཉིས་ཀ་དཔྱད་ནས་འགོག་པ་སྟེ། འདི་ལྟར་སྣང་བའང་དོན་དམ་པར་གཅིག་ལས་གཅིག་ཤེས་དང་། གཅིག་ལས་དུ་མ་དང་། དུ་མ་ལས་དུ་མ་དང་། དུ་མ་ལས་གཅིག་སྐྱེ་བའི་མུ་བཞི་སྐྱེ་བས་སྟོང་པའོ། །དཔེར་ན་དངོས་པོ་མེད་པར་ནམ་མཁའ་ཞེས་གདགས་པ་བཞིན་ནོ། །རྟེན་འབྲེལ་ཆེན་པོ་ལ་གཉིས་ཏེ། མ་ཡིན་དགག་གཏན་ཚིགས་སུ་བཀོད་པ་རྟེན་འབྲེལ་ཆེན་པོ་རང་གི་ངོ་བོ་དཔྱད་ནས་འགོག་པ་ནི། རྟེན་ཅིང་འབྲེལ་བར་འབྱུང་བ་དེ་ཡང་སྐྱེ་འགག་ལ་སོགས་པའི་མཐའ་བརྒྱད་དང་བྲལ་བ་ཡིན་པས་བདེན་པའི་རང་བཞིན་གྱིས་སྟོང་པ་སྟེ། དཔེར་ན། སྨིག་རྒྱུ་གཡོ་བ་བཞིན་སྣང་བའི་རྟེན་འབྲེལ་ཙམ་དུ་མ་འགག་པའོ། །མེད་དགག་གཏན་ཚིགས་སུ་བཀོད་པ་གཅིག་དང་དུ་བྲལ་ནི། ཡོད་པའི་དངོས་པོ་ཙམ་དུ་མའི་དངོས་པོ་ཡིན་པ་བཀག་པ་ཙམ་གྱིས་གཅིག  །གཅིག་གི་དངོས་པོར་ཡོད་དུས་སུ་ཆོད་དེ། ཡོད་པའི་དངོས་པོ་ཙམ་ལ་གཅིག་ཏུ་ཡོད་པའམ། དུ་མར་ཡོད་པས་ཁྱབ་ལ་དངོས་སུ་མེད་ངེས་པ་ན་གཅིག་དང་དུ་མའི་ཁྱབ་བྱར་མཐོང་བའི་ཡོད་པའི་དངོས་པོ་འདི་ཉིད་དོན་དམ་པའི་དངོས་པོ་ཡིན་ནའང་། དེ་ཉིད་གཅིག་དང་དུ་མས་མ་ཁྱབ་པར་དོགས་པ་སྐྱེ་བའི་ནུས་པ་བརྩམས་ཏེ། དོན་དམ་པའི་དངོས་པོ་ཆ་གཅིག་དང་དུ་མས་ཁྱབ་པ་མཚན་ཉིད་ངེས་པའི་ཚུལ་གྱིས་ཤུགས་ལས་གྲུབ་པའོ། །ངེས་དོན་དབུ་མ་ཆེན་པོས་ཆོས་ཐམས་ཅད་མཚན་ཉིད་གསུམ་དུ་འདུས་པར་བཞེད་པ་ལས། ཐོག་མར་ཀུན་བཏགས་བཤད་པ་ལ། ངོ་བོ་ནི། གཟུགས་སོགས་ཡུལ་དྲུག་དང་། དབང་པོ་དྲུག་དག  །ཆོས་དང་གང་ཟག་དངོས་པོར་ཡོད་དོ་སྙམ་དུ་འཁྲུལ་པའི་རྣམ་ཤེས་ཀྱིས་ནན་གྱིས་བཏགས་པའི་གཟུང་འཛིན་ཆ་གཉིས་ཀྱི་རྟོག་པ་དེའོ། །ངེས་ཚིག་ནི། པ་རི་ས་མ་ཏཱ་དཱ་ཞེས་ཡོངས་སུ་མེད་པ་ལ་སྒྲོ་བཏགས་པ་ལྟ་བུའོ། །དབྱེ་ན་གཉིས་ཏེ། སྣང་བའི་ཀུན་བཏགས་ནི་ཡུལ་དང་། དབང་པོའི་གཟུང་འཛིན་གཉིས་སོ། །མི་སྣང་བའི་ཀུན་བཏགས་ནི། རི་བོང་གི་རྭ་དང་། མོ་གཤམ་གྱི་བུ་དང་། མུ་སྟེགས་པའི་བདག་ཏུ་ལྟ་བ་དང་། ཉན་ཐོས་ཀྱི་རྡུལ་ཕྲན་རྣམས་སོ། །གཉིས་པ་གཞན་དབང་བཤད་པ་ལ། ངོ་བོ་ནི། ཀུན་གཞིའི་རྣམ་ཤེས་འཁོར་དང་བཅས་པ་ཉིད། །རྒྱུ་འབྲས་ཀྱི་ཚུལ་དུ་སྐད་ཅིག་མ་ལ་སེམས་དང་སེམས་བྱུང་རྟེན་འབྲེལ་དུ་འབྱུང་འབྱུང་བ་དེའོ། །དེ་ལ་ཅིའི་ཕྱིར་གཞན་དབང་ཞེས་བྱ་ཞེ་ན། ཁམས་གསུམ་གྱི་ཤེས་པ་རྒྱུ་རྐྱེན་ལ་རགས་མ་ལུས་པར་རང་སྐྱེ་མི་ནུས་པས་གཞན་དབང་ཞེས་བྱ་བ་སྟེ། རྒྱུ་རྐྱེན་བཞིས་བསྐྱེད་དེ། ཀུན་གཞི་ལ་བག་ཆགས་ཡོད་པ་ནི་རྒྱུའི་རྐྱེན། མིག་གི་དབང་པོ་ལ་སོགས་པ་འཇུག་པའི་ཚོགས་དྲུག་ནི་བདག་པོའི་རྐྱེན། ཡུལ་གཟུགས་སྒྲ་དྲི་རོ་རེག་བྱ་ལ་སོགས་པ་ནི་དམིགས་པའི་རྐྱེན། ཤེས་པ་སྐད་ཅིག་མ་མ་འགག་པས་གོ་དབྱེ་ནས། སྐད་ཅིག་མ་ཕྱི་མ་འབྱུང་བ་ནི་དེ་མ་ཐག་པའི་རྐྱེན་ནོ། །ངེས་ཚིག  །པ་ར་ཏནྟྲ་ཞེས། །གཞན་རྐྱེན་ལ་རགས་ལས་ཤིང་ཤེས་པས་དེར་སྟོན་པའོ། །དབྱེ་ན་གཉིས་ཏེ། བསྐྱེད་པའི་གཞན་དབང་ནི་སེམས་ཅན་གྱི་སེམས་ལས་བྱུང་བ་ནི་ཀུན་འབྱུང་དང་རྐྱེན་གྱིས་བསྐྱེད་པའི་འདུས་བྱས་སོ། །ལྟོས་པའི་གཞན་དབང་ནི། དེ་ལ་བལྟོས་ནས་རྒྱུ་རྐྱེན་ལས་བསྐྱེད་པའི་འདུས་མ་བྱས་བཞི་སྟེ། སོ་སོར་བརྟག་པའི་འགོག་པ། སོ་སོར་བརྟག་མིན་འགོག་པ། ནམ་མཁའ་དང་། དེ་བཞིན་ཉིད་རྣམས་སོ། །གསུམ་པ་ཡོངས་གྲུབ་བཤད་པ་ལ། ངོ་བོ་ནི། གཞན་དབང་གི་ཆོས་ཅན། དེ་ཀུན་ལ་གཟུང་འཛིན་གཉིས་དང་བྲལ་བ་སྟེ། དེ་ལ་ཅིའི་ཕྱིར་ཡོངས་གྲུབ་ཅེས་བྱ་ཞེ་ན། དཔེར་ན་ཆུ་དང་། ནམ་མཁའ་དང་། གསེར་དང་འདྲའོ། །ཆུ་རྙོག་རུང་དྭངས་རུང་ཆུ་ཡི་རང་བཞིན་སྔོ་སིང་ངེ་བ་དེ་གང་ནས་ཀྱང་མ་འོང་། གང་དུ་ཡང་མ་སོང་། གསེར་ཡང་མགར་བའི་བརྡུང་རུང་མ་བརྡུང་རུང་། དེའི་རང་བཞིན་སེར་པོ་གང་ཡང་མ་སོང་། གང་ནས་ཀྱང་མ་འོང་། ནམ་མཁའ་ཡང་གསལ་རུང་མི་གསལ་རུང་ནམ་མཁའ་དྭངས་པའི་རང་བཞིན་ནི་གང་ནས་ཀྱང་མི་འོང་། གང་དུ་ཡང་མ་སོང་ངོ་། །དེ་བཞིན་དུ་ཆོས་ཉིད་ཆོས་ཀྱི་དབྱིངས་དེ། སངས་རྒྱས་ཀྱིས་འཇིག་རྟེན་དུ་བསྟན་ཀྱང་གང་ནས་ཀྱང་མ་འོང་། མ་བསྟན་ཀྱང་གང་དུའང་མ་སོང་བ་ལ་བྱའོ། །ངེས་ཚིག་ནི། པ་རི་ནི་ཥྤནྣ་ཞེས་པ་དེ་བཞིན་ཉིད་དང་ཡང་དག་པའི་ཡེ་ཤེས་གཉིས་མ་འགྱུར་བ་དང་། ཕྱིན་ཅི་མ་ལོག་པའི་ཚུལ་གྱིས་ཡོངས་སུ་རྫོགས་ཤིང་གྲུབ་པས་ན་ཡོངས་སུ་གྲུབ་པའི་མཚན་ཉིད་དོ། །དབྱེ་ན་གཉིས་ཏེ། མི་འགྱུར་བའི་ཡོངས་གྲུབ་ནི། ཆོས་རྣམས་ཀྱི་ཆོས་ཉིད། ཕྱིན་ཅི་མ་ལོག་པའི་ཡོངས་གྲུབ་ནི། ཆོས་ཉིད་ཕྱིན་ཅི་མ་ལོག་པར་རྟོགས་པའི་རིགས་པའི་ཡེ་ཤེས་སོ། །དེ་ཡང་མེད་པའི་ཆོས་ལ་ཡོད་པར་བཏགས་པ་ཐམས་ཅད་ཀུན་བཏགས། རྒྱུ་རྐྱེན་གྱིས་སྐྱེ་བ་ཐམས་ཅད་གཞན་དབང་། ཕྱིན་ཅི་མ་ལོག་བློས་བཏགས་པ་ཡང་མིན། རྒྱུ་རྐྱེན་གྱིས་ཀྱང་མ་བསྐྱེད་པ་ཐམས་ཅད་ཡོངས་གྲུབ་ཡིན་ནོ། །བྱང་ཆུབ་སེམས་དཔའི་སེམས་བསྐྱེད་ཀྱི་ས་མཚམས་དབྱེ་བ་ཉེར་གཉིས་ཀྱི་དོན་ནི། མངོན་རྟོགས་རྒྱན་ལས། དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང་། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱི། །རྣམ་པ་ཉི་ཤུ་རྩ་གཉིས་སོ། །ཞེས་གསུངས་ཏེ། དཔེ་ཉི་ཤུ་རྩ་གཉིས་པོ་འདི་དག་ནི། དོན་འདུན་པ་ནས་ཆོས་སྐུའི་བར་དུ་ཡིན་ཏེ། དེ་ཡང་ལམ་ལྔ་དང་སྦྱར་ན། འདུན་པ་དང་ལྡན་པ་ནི་ས་དང་འདྲ་སྟེ། ཆོས་དཀར་པོ་ཐམས་ཅད་ཀྱི་གཞིའི་དངོས་པོ་བྱེད་པའོ། །བསམ་པ་དང་ལྡན་པ་ནི་གསེར་དང་འདྲ་སྟེ། བྱང་ཆུབ་བར་དུ་མི་འགྱུར་བའོ། །ལྷག་པའི་བསམ་པ་དང་ལྡན་པ་ནི་ཟླ་བ་ཚེས་པ་དང་འདྲ་སྟེ། དགེ་བའི་ཆོས་མཐའ་དག་རྣམ་པར་འཕེལ་བར་འགྱུར་བའོ། །དེ་གསུམ་ནི་ཚོགས་ལམ་ཆུང་ངུ་དང་། འབྲིང་པོ་དང་། ཆེན་པོ་ཉིད་ཀྱི་ལས་དང་པོ་པའི་སས་བསྡུས་པའོ། །སྦྱོར་བ་དང་ལྡན་པ་ནི་མེ་དང་འདྲ་སྟེ། ཐམས་ཅད་མཁྱེན་པ་ཉིད་གསུམ་ལ་སྒྲིབ་པའི་བུད་ཤིང་སྲེག་པར་བྱེད་པའོ། །དེ་ནི་སྦྱོར་བའི་ལམ་གྱིས་བསྡུས་པའོ། །སྦྱིན་པའི་ཕ་རོལ་ཏུ་ཕྱིན་པ་ནི་གཏེར་ཆེན་པོ་དང་འདྲ་སྟེ། སེམས་ཅན་ཐམས་ཅད་ཚིམ་པར་བྱེད་པའོ། །ཚུལ་ཁྲིམས་དང་ལྡན་པ་ནི་རིན་པོ་ཆེའི་འབྱུང་གནས་དང་འདྲ་སྟེ། ཡོན་ཏན་རིན་པོ་ཆེའི་རྟེན་གྱི་དངོས་པོ་བྱེད་པའོ། །བཟོད་པ་དང་ལྡན་པ་ནི་རྒྱ་མཚོ་ཆེན་པོ་དང་འདྲ་སྟེ། མི་འདོད་ཐམས་ཅད་ཐོག་ཏུ་བབས་པས་མི་འཁྲུགས་པའོ། །བརྩོན་འགྲུས་དང་ལྡན་པ་ནི་རྡོ་རྗེ་དང་འདྲ་སྟེ། མི་ཤིགས་པ་ཉིད་ཀྱིས་ན་སྲ་བའོ། །བསམ་གཏན་དང་ལྡན་པ་ནི་རིའི་རྒྱལ་པོ་དང་འདྲ་སྟེ། དམིགས་པའི་རྣམ་པར་གཡེང་བས་མི་བསྐྱོད་པའོ། །ཤེས་རབ་དང་ལྡན་པ་ནི་སྨན་དང་འདྲ་སྟེ་ཉོན་མོངས་པའི་ནད་ཞི་བར་བྱེད་པའོ། །ཐབས་དང་ལྡན་པ་ནི་དགེ་བའི་བཤེས་གཉེན་དང་འདྲ་སྟེ། གནས་སྐབས་ཐམས་ཅད་དུ་སེམས་ཅན་གྱི་དོན་ཡོངས་སུ་མི་གཏོང་བའོ། །སྨོན་ལམ་དང་ལྡན་པ་ནི་ཡིད་བཞིན་གྱི་ནོར་བུ་དང་འདྲ་སྟེ། ཇི་ལྟར་སྨོན་པའི་འབྲས་བུ་འགྲུབ་པའོ། །སྟོབས་དང་ལྡན་པ་ནི་ཉི་མ་དང་འདྲ་སྟེ་གདུལ་བྱ་ཡོངས་སུ་སྨིན་པར་བྱེད་པའོ། །ཡེ་ཤེས་ཀྱི་ཕ་རོལ་ཏུ་ཕྱིན་པ་ནི་ཆོས་ཀྱི་སྒྲ་དབྱངས་དང་འདྲ་སྟེ། གདུལ་བྱ་འདུན་བར་བྱེད་པའི་ཆོས་སྟོན་པའོ། །དེ་ལྟར་བཅུ་ནི་རིམ་པ་ལྟར་རབ་ཏུ་དགའ་བ་ལ་སོགས་པ་བཅུས་བསྡུས་ཏེ། མཐོང་བའི་ལམ་དང་སྒོམ་པའི་ལམ་གྱི་སྤྱོད་ཡུལ་ཅན་ཡིན་ནོ། །མངོན་པར་ཤེས་པ་དང་ལྡན་པ་ནི་རྒྱལ་པོ་ཆེན་པོ་དང་འདྲ་སྟེ། མཐུ་ཐོགས་པ་མེད་པས་གཞན་གྱི་དོན་སྒྲུབ་པའོ། །བསོད་ནམས་དང་ཡེ་ཤེས་ལྡན་པ་ནི་བང་མཛོད་དང་འདྲ་སྟེ། ཚོགས་མང་པོའི་མཛོད་དུ་གྱུར་པའོ། །བྱང་ཆུབ་ཀྱི་ཕྱོགས་དང་མཐུན་པའི་ཆོས་དང་ལྡན་པ་ནི་ལམ་པོ་ཆེ་དང་འདྲ་སྟེ། འཕགས་པ་ཐམས་ཅད་གཤེགས་ཤིང་རྗེས་སུ་གཤེགས་པས་སོ། །སྙིང་རྗེ་དང་། ལྷག་མཐོང་དང་ལྡན་པ་ནི་བཞོན་པ་དང་འདྲ་སྟེ། འཁོར་འདས་གང་དུའང་ལྟུང་བ་མེད་པར་བདེ་བླག་ཏུ་འགྲོ་བའོ། །གཟུངས་དང་སྤོབས་པ་དང་ལྡན་པ་ནི་བཀོད་མའི་ཆུ་དང་འདྲ་སྟེ། ཐོས་པ་དང་མ་ཐོས་པའི་ཆོས་འཛིན་པས་མི་ཟད་པའོ། །དེ་ལྟར་ལྔ་ནི་བྱང་ཆུབ་སེམས་དཔའི་ཁྱད་པར་གྱི་ལམ་གྱིས་བསྡུས་པའོ། །ཆོས་ཀྱི་སྐྱེད་མོས་ཚལ་དང་ལྡན་པ་ནི་སྒྲ་སྙན་ཐོས་པ་དང་འདྲ་སྟེ། ཐར་པ་འདོད་པའི་གདུལ་བྱ་ལ་སྙན་པར་སྒྲོགས་པའོ། །བགྲོད་པ་གཅིག་པའི་ལམ་དང་ལྡན་པ་ནི་ཆུ་བོའི་རྒྱུན་དང་འདྲ་སྟེ། གཞན་གྱི་དོན་བྱ་བ་མི་ཉམས་པའོ། །ཆོས་ཀྱི་སྐུ་དང་ལྡན་པ་ནི་སྤྲིན་དང་འདྲ་སྟེ། དགའ་ལྡན་གྱི་གནས་ན་བཞུགས་པ་ལ་སོགས་པ་སྟོན་པའི་སྒོ་ནས་སེམས་ཅན་གྱི་དོན་བྱ་བ་རྣམས་དེ་ལ་རགས་ལས་པའོ། །དེ་ལྟར་གསུམ་ནི་སངས་རྒྱས་ཀྱི་སས་བསྡུས་པ་སྟེ། དེ་ལྟར་ཉི་ཤུ་རྩ་གཉིས་བོ་ལས་དང་པོ་པའི་ས་ནས་བཟུང་སྟེ། སངས་རྒྱས་ཀྱི་སའི་བར་གྱིས་བསྡུས་པའོ། །ཡང་ས་མཚམས་ཀྱི་སྒོ་ནས་དབྱེ་བ་ནི་བཞི་སྟེ། མོས་པ་དང་ལྡན་པའི། ལྷག་པའི་བསམ་པ་དང་ལྡན་པའི། རྣམ་པར་སྨིན་པའི། སྒྲིབ་པ་སྤང་པའི་སེམས་བསྐྱེད་དོ། །དེ་ལ་དང་པོ་ནི། མོས་པས་སྤྱོད་པའི་སས་བསྡུས་པ་རྣམས་སོ། །གཉིས་པ་ནི། ས་དང་པོ་ནས་བདུན་པའི་བར་རོ། །གསུམ་པ་ནི། ས་བརྒྱད་པ་ནས་བཅུ་པའི་བར་རོ། །བཞི་པ་ནི། སངས་རྒྱས་ཀྱི་སའོ། །དེ་ལྟར་ཡང་སྔ་མ་ལས། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །ཞེས་གསུངས་སོ། །བྱང་ཆུབ་སེམས་དཔའི་ས་བཅུའི་སྒྲ་དོན་ནི། བྱང་ཆུབ་དང་ཉེ་ཞིང་སེམས་ཅན་མང་པོའི་དོན་འགྲུབ་པར་གཟིགས་པས་རབ་ཏུ་དགའ་བ། ལྟུང་བའི་ཆ་ཕྲ་མོ་ཆད་ཀྱང་བྱང་ནས་འཆལ་བའི་ཚུལ་ཁྲིམས་ཀྱི་དྲི་མ་མེད་པ། ཉན་རང་གི་ས་ལས་འདས་པའི་ཏིང་ངེ་འཛིན་གྱི་ཕུང་པོ་ཡོངས་སུ་དག་པ་ཡེ་ཤེས་ཀྱི་སྣང་བ་ཆེན་པོའི་གནས་སུ་གྱུར་བ་ཐོབ་པས་འོད་བྱེད་པ། ཉོན་མོངས་པ་སྲེག་པ་བྱང་ཆུབ་ཕྱོགས་ཀྱི་མེའི་འོད་འཕྲོ་བས་འོད་འཕྲོ་བ། ཉན་རང་ལས་འདས་པའི་འཕགས་པའི་བདེན་པ་བཞི་བསྒོམས་ཤིང་འཁོར་འདས་གཉིས་ཀ་ལ་མི་གནས་པའི་ཤེས་རབ་ཡོངས་སུ་དག་པར་བྱ་བ་སྦྱོང་ཤིང་སྒོམ་པ་ལ་ཤིན་ཏུ་དཀའ་བ། ཤེས་རབ་ཀྱི་ཕར་ཕྱིན་ལ་བརྟེན་ནས་འཁོར་འདས་གཉིས་ཀ་ལ་མི་གནས་ཤིང་། མཚན་མ་མེད་པ་ལ་རང་གི་ངང་གིས་འཇུག་པའི་ཡེ་ཤེས་ལ་མང་དུ་གནས་ཤིང་མངོན་དུ་གཟིགས་པས་ན་མངོན་དུ་གྱུར་པ། མཚན་མ་མེད་པ་ལ་བགྲོད་པ་གཅིག་ཏུ་གྱུར་པའི་ལམ་དང་ཉེ་ཞིང་རིང་དུ་ཕྱིན་པས་ན་རིང་དུ་སོང་བ། མཚན་མ་ཡོད་མེད་ཀྱི་འདུ་ཤེས་གཉིས་ཀས་བསྐྱོད་པར་མི་ནུས་པས་མི་གཡོ་བ། སོ་སོ་ཡང་དག་པར་རིག་པ་བརྙེས་པས་ན་བློ་གྲོས་གཞན་ལས་འཕགས་པས་ལེགས་པའི་བློ་གྲོས། གཟུངས་དང་ཏིང་འཛིན་ཀུན་ལ་ཡང་སྤྲིན་དང་འདྲ་བར་ཁྱབ་ཅིང་། ཐོས་པའི་ཆོས་ནམ་མཁའ་འདྲ་བ་ལ་སྤྲིན་བཞིན་ཁྱབ་པས་ཆོས་ཀྱི་སྤྲིན་ནོ། །དེ་རྣམས་སྦྱིན། ཚུལ། བཟོད། བརྩོན། བསམ། ཤེར། ཐབས། སྨོན། སྟོབས། ཡེ་ཤེས་ཀྱི་ཕ་རོལ་ཕྱིན་བཅུ་རྫོགས་པ་དང་སྦྱར་བ་ཡིན་ནོ། །བྱང་ཆུབ་སེམས་དཔའི་ལམ་ལྔ་ཆོས་སོ་བདུན་དང་སྦྱར་ཚུལ་ནི། དྲན་པ་ཉེར་བཞག་ནས་འཕགས་ལམ་ཡན་ལག་བརྒྱད་ཀྱི་བར་བྱང་ཆུབ་གསུམ་པོའི་ཕྱོགས་སུ་གྱུར་པས་ན་བྱང་ཆུབ་ཆོས་སོ་བདུན་ཡིན། དེ་ལ་རང་དང་སྤྱིའི་མཚན་ཉིད་ཤེས་རབ་ཀྱིས་བརྟགས་ཏེ་མཐོང་པའི་དོན་རྣམས་དྲན་པས་གསལ་བར་འཛིན་ཏེ་དྲན་པ་ཤས་ཆེ་བས་དྲན་པ་ཉེར་བཞག་བཞི་ཡིན། ལུས་དྲན་མི་རྟག  །སྡུག་བསྔལ། བདག་མེད་གསུམ། ཚོར་དྲན་བདེ། སྡུག  །བཏང་སྙོམས་གསུམ། སེམས་དྲན་རྣམ་ཤེས་ཚོགས་བརྒྱད་ཀྱི་དོན་སེམས་པ། ཆོས་དྲན་ཀུན་ཉོན་དང་། རྣམ་བྱང་གི་དོན་ཚོལ་བའོ། །བརྩོན་འགྲུས་ཀྱིས་དགེ་བ་བསྐྱེད་ཅིང་མི་དགེ་བ་སྤངས་པས་ན་ཡང་དག་པ་སྤོང་བ་བཞི་ཡིན། དེ་ཡང་མི་དགེ་བ་སྒོ་གསུམ་ལ་སྐྱེས་པ་སྤོང་། མ་སྐྱེས་པ་མི་བསྐྱེད། དགེ་བའི་ཆོས་སྒོ་གསུམ་ལ་སྐྱེས་པ་རྣམས་གོང་དུ་སྤེལ། མ་སྐྱེས་པ་བསྐྱེད་པའོ། །རྫུ་འཕྲུལ་གྱི་རྐང་པ་བཞིས་ནམ་མཁའ་ལ་འགྲོ་བ་ལ་སོགས་པའི་རྫུ་འཕྲུལ་གྱི་རྟེན་དང་རྒྱུར་གྱུར་པས་དེ་སྐད་ཅེས་བྱ། འདུན་པས་ནི་འདུན་པ་དྲག་པོ་བསྐྱེད། བརྩོན་འགྲུས་ཀྱིས་མྱུར་དུ་སྒྲུབ་སེམས་ཀྱིས་གང་འདོད་བསྒྲུབ། སྤྱོད་པས་འབྲས་བུ་གང་ཡིན་སྤྱོད་པའོ། །ཚོགས་ལམ་ཞེས་པ་ནི་ཚོགས་མང་དུ་གསོག་པའི་དེ་སྐད་དུ་བརྗོད་དོ། །དད་སོགས་ལྔ་ཡི་དབང་གིས་སེམས་ལས་རུང་དུ་གྱུར་པའི་རྒྱུད་ལ་ཐར་པ་ཆ་མཐུན་གྱི་དགེ་བ་བསྐྱེད་པ་ལ་དབང་བའི་ཕྱིར་དབང་པོ་ལྔ་ཡིན། དད། བརྩོན། དྲན། ཏིང་འཛིན། ཤེས་རབ་རྣམས་ལ་དབང་ཐོབ་པའོ། །དེ་ལྟ་བུའི་དབང་ལྔ་ཡུན་རིང་དུ་བསྒོམས་པས་མ་དད་པ། ལེ་ལོ། དྲན་བ་ཉམས་པ། གཡེང་བ། ཤེས་བཞིན་མ་ཡིན་པ་ལྔས་བར་ཆད་མི་ནུས་པས་དད་པ་སོགས་པའི་མཐུ་བསྐྱེད་པའི་སྟོབས་ལྔའོ། །སྦྱོར་ལམ་ཞེས་པ་དྲོད། རྩེ་མོ། བཟོད་པ། ཆོས་མཆོག་ནས་མཐོང་ལམ་ལ་སྦྱོར་བས་ནའོ། །གཟུང་བ་རང་བཞིན་གྱིས་མེད་པ་དྲོད་དེ། འཕགས་ལམ་གྱིས་ཉོན་མོངས་པའི་བུད་ཤིང་སྲེག་པར་འདོད། དེ་ལ་ཡིད་ཆེས་ཤིང་དགེ་རྩའི་རྩེ་མོ་ཡིན་པས་རྩེ་མོ། འཛིན་པ་རང་བཞིན་མེད་པར་བཟོད་པ། ཟག་བཅས་ཀྱི་སྐྱེ་འཇིག་ལ་བཟོད་པ། དེ་ལ་ཡིད་ཆེས་པས་འཇིག་རྟེན་པའི་ཆོས་མཆོག་སྟེ་འཇིག་རྟེན་གྱི་ཆོས་གཞན་ལས་ལྷག་པའོ། །མཐོང་ལམ་ལ་དེ་ཁོ་ན་ཉིད་བྱང་ཆུབ་པའི་རྒྱུར་གྱུར་པས་བྱང་ཆུབ་ཡན་ལག་བདུན་ཡིན། དེ་ཡང་། དམིགས་པ་མི་བརྗེད་པ་དྲན་པ་ཡང་དག་བྱང་ཆུབ་ཀྱི་ཡན་ལག  །ཇི་ལྟ་ཇི་སྙེད་ཀྱི་ཆོས་རྣམ་པར་འབྱེད་པ་བྱང་ཆུབ་ཀྱི་ཡན་ལག  །འཁོར་བ་ལས་འདའ་བའི་བརྩོན་འགྲུས་བྱང་ཆུབ་ཀྱི་ཡན་ལག  །ལུས་ངག་ཡིད་གསུམ་ལ་ཕན་འདོགས་པའི་དགའ་བ་བྱང་ཆུབ་ཀྱི་ཡན་ལག  །སེམས་ལས་སུ་རུང་བ་ཤིན་ཏུ་སྦྱོང་བ་བྱང་ཆུབ་ཀྱི་ཡན་ལག  །སེམས་རྩེ་གཅིག་ཏུ་མཉམ་པར་འཇོག་པ་ལ་འཛིན་པ་དང་བྲལ་བ་ཏིང་ངེ་འཛིན་བྱང་ཆུབ་ཀྱི་ཡན་ལག  །ཆོས་ཐམས་ཅད་ལ་རེ་དོགས་དང་བྲལ་བའི་དགའ་བ་ཐོབ་པ་བཏང་སྙོམས་བྱང་ཆུབ་ཀྱི་ཡན་ལག་རྣམས་སོ། །མཐོང་ལམ་ཞེས་པ་སྔར་མ་མཐོང་བའི་ལམ་མཐོང་བའི་ཕྱིར་རོ། །འཕགས་ལམ་ཡན་ལག་བརྒྱད་ཀྱིས་དགྲ་བཅོམ་པའི་འབྲས་བུ་ཐོབ་པར་བྱེད་དེ། ཡང་དག་པའི་ལྟ་བས་མཐོང་ལམ་མངོན་དུ་བྱེད། ཡང་དག་པའི་རྟོགས་པས་མི་རྟོགས་པར་མི་སྨྲ། ཡང་དག་པའི་ངག་གིས་གང་ལ་གང་གིས་འདུལ་བའི་ཆོས་སྟོན། ཡང་དག་པའི་མཐས་བྱ་བ་མ་ཡིན་པ་གཞན་མི་བྱེད། ཡང་དག་པའི་འཚོ་བའི་བདག་གཞན་གཉིས་ཀར་མི་གནོད་ཅིང་ཉོན་མོངས་པས་མི་གོས། ཡང་དག་པའི་རྩོལ་བས་ནི་འདུས་མ་བྱས་པའི་ཆོས་སྒྲུབ། ཡང་དག་པའི་དྲན་པས་སེམས་དང་སེམས་བྱུང་གི་མི་དགེ་བས་སྐབས་མི་རྙེད། ཡང་དག་པའི་ཏིང་ངེ་འཛིན་གྱིས་སེམས་སྐད་ཅིག་དང་ལྡན་པའི་ཡེ་ཤེས་ཀྱིས་ཐམས་ཅད་མཁྱེན་པ་དང་། དེའི་ཡེ་ཤེས་ཀྱིས་མངོན་པར་རྫོགས་པར་སངས་རྒྱས་པའོ། །སྒོམ་ལམ་ཞེས་པ་ཆོས་ཉིད་ཀྱི་དོན་ལ་ཡང་དང་ཡང་དུ་འདྲིས་པར་བྱེད་པའི་ཕྱིར་རོ། །དེ་དག་ས་བཅུ་དང་སྦྱར་ན། དང་པོ་མཐོང་ལམ། གཉིས་པ་ནས་བརྒྱད་བར་སྒོམ་ལམ། མོས་སྤྱོད་ནས་ས་དང་པོའི་བར་རང་དོན་སྒྲུབ་པ་ལས་གཞན་དོན་བྱེད་མི་ནུས་ཏེ་རང་ཉིད་ཀྱང་ཉོན་མོངས་དང་ཆ་བྲལ་བའི་ཕྱིར་རོ། །ས་གཉིས་པ་ནས་བརྒྱད་བར་དོན་གཉིས་ཀ་བྱེད་དེ། ཉོན་མོངས་མངོན་གྱུར་དང་བྲལ། བག་ཉལ་ཡོད། དགུ་པ་དང་བཅུ་པའི་བར་གཞན་དོན་འབའ་ཞིག་མཛད་དེ། ཉོན་མོངས་པ་ས་བོན་དང་བཅས་པ་སྤངས་པས་རང་དོན་བྱ་མི་དགོས། ས་དགུ་པ་དང་བཅུ་པ་མི་སློབ་ལམ་ཡིན་ཏེ། སློབ་ལམ་གྱིས་གནས་སྐབས་སྤངས་པ་ལ་བཤད་དོ། །ཡུམ་ལས། རྟོག་པ་དང་བཅས་ཤིང་དཔྱོད་པ་དང་བཅས་པ་ནི་བསམ་གཏན་དང་པོ། རྟོག་པ་མེད་ལ་སྤྱོད་པ་ཙམ་དང་བཅས་པ་ནི་བསམ་གཏན་གཉིས་པ། རྟོག་པ་ཡང་མེད་ལ་དཔྱོད་པ་ཡང་མེད་པའི་ཡིད་ལ་བྱེད་པ་བསམ་གཏན་གསུམ་པ། དགའ་བ་སྡུད་པ་ཡིད་ལ་བྱེད་པ་ནི་བསམ་གཏན་བཞི་པའོ། །ཞེས་སོ། །བསམ་གཏན་བཞི་པ་ལ་འཕགས་པའི་ཤེས་རབ་ཀྱིས་ཟག་མེད་སྤེལ་ཞིང་རིམ་པ་ལྔར་བསྒོམས་ན་མི་ཆེ་བ་སོགས་གཙང་གནས་ལྔར་སྐྱེའོ། །དེ་ཡང་། བསམ་གཏན་དང་པོ་དང་བཞི་པ་སྤེལ་བ་ཆུང་ངུ་། དང་པོ་དང་གཉིས་པ་བསྡམས་པ་ལས་བཞི་པ་སྤེལ་བ་འབྲིང་། དང་པོ་དང་གཉིས་པ་གསུམ་པ། དེ་དང་གསུམ་པ་བཞི་པ་སྤེལ་བ་ཆེན་པོ། བསམ་གཏན་བཞི་པོ་ནང་ཚན་རེ་རེ་ཞིང་བཞི་པ་དང་སྤེལ་བ་ཆེན་པོ། དེ་དག་ཐོད་རྒལ་དུ་བསྒོམས་པས་མཆོག་ཏུ་ཆེན་པོའོ། །ཐོད་རྒལ་ནི་བསམ་གཏན་བཞི་པོའི་ལམ་དོར་བས་ན་འཕྱོངས་པའི་བར་དུ་སྒོམ་པ་སྟེ། མས་ཡར་རིམ་དང་། རིམ་མིན་དུ་གཅིག་ནས་གསུམ་གྱི་བར་ནས། ཡས་མར་སོང་བའི་བར་དུ་བཞིས་བསྒོམ་པའོ། །གོ་མྱོང་གཉིས་པོ་གང་ཡིན་ཀྱང་སོ་སྐྱེའི་སྒོམ་པའི་བསམ་གཏན་ཡིན་པ་ལ། རིམ་གྱིས་པའི་དབང་དུ་བྱས་ན་སེམས་ཀྱི་གནས་ལུགས་ལྟ་ཚུལ་ནས་བཟུང་སྟེ་རྩེ་གཅིག་ཆེན་པོ་མན་ཆད་ཡིན་ནོ། །འཕགས་པ་རྣམས་ཀྱིས་མི་རྟོག་པའི་ཤེས་རབ་ནི། སྙོམས་འཇུག་དགུ་པོ་རང་བཞིན་མེད་པར་ཤེས་པའི་ལྷག་མཐོང་ཉིད་དོ། །བསམ་གཟུགས་འགོག་བཅས་སྙོམས་འཇུག་དགུ་ཡི་ཏིང་འཛིན་སྐྱེ་ལུགས་ནི། མཉམ་པར་འཇོག་བྱེད་ཀྱི་བློ་དང་བཅས་ཤིང་གང་དུའང་མི་རྟོག་པར་འཇོག་པའི་གསལ་སྟོང་དེ་ལ་དྲན་རྩིས་དཔྱོད་པ་དང་བཅས་པའི་སྦྱོར་བས་དངོས་གཞི་མི་རྟོག་པར་སྐྱེ་ཞིང་། ཐུན་མཚམས་ནི་རྟོག་དཔྱོད་དང་བཅས་ཏེ་བསམ་གཏན་དང་པོའི་ཏིང་འཛིན་ཡིན་ནོ། །དེའི་དྭངས་ཆ་ལས་སྤྱན་དང་མངོན་ཤེས་ཅུང་ཟད་འཆར་རོ། །ཡང་སྔ་མ་དེའི་སེམས་ཀྱི་དངོས་གཞི་བརྟན་པའི་ཉེར་བསྡོགས་རྟོག་པ་མེད་ལ་དཔྱོད་པ་ཙམ་དང་བཅས་པ་ནི་སྦྱོར་བ། དེའང་གསལ་སྟོང་དུ་ཤེས་པའི་དྲན་རྟོག་ཕྲ་མོའང་མེད་ཀྱང་ཉམས་མྱོང་གི་འཛིན་པ་དང་བཅས་པའི་གསལ་སྟོང་སྐྱེས་པ་ནི་དངོས་གཞི་སྟེ། བསམ་གཏན་གཉིས་པའི་ཏིང་འཛིན་ནོ། །ཡང་དེའི་སེམས་ཀྱི་དངོས་གཞི་བརྟན་པའི་ཉེར་བསྡོགས་ལས་རྟོག་དཔྱོད་གཉིས་ཀ་མེད་པའི་སྟོང་པ་ཁྱད་པར་ཉིད་སྐྱེས་པ་དངོས་གཞི། བསམ་གཏན་གསུམ་པའིའོ། །ཡང་སྔ་མའི་སེམས་ཀྱི་དངོས་གཞི་བརྟན་པའི་ཉེར་བསྡོགས་ལས། བདེ་གསལ་མི་རྟོག་པའི་དགའ་བདེ་སྔོན་ལས་ཆེས་ལྷག་པར་སྐྱེ་བ་ནི་བསམ་གཏན་བཞི་པའི་དངོས་གཞི་སྟེ། དེ་རེ་རེ་ལའང་གོམས་ཚུལ་གྱི་རིམ་པས་གཟུགས་ཁམས་ཀྱི་ལྷའི་གནས་རིས་གསུམ་གསུམ་ལ་སྐྱེ་བའི་རྒྱུ་བྱེད་དེ་སོ་སོའི་སྐྱེ་བོའི་གནས་བཅུ་གཉིས་ཏེ་འབྲས་ཆེ་མན་ཆད་དོ། །འབྲས་བུ་ཆེ་བའི་དགའ་བདེའི་རང་བཞིན་དེ་ཉིད་ཞི་གནས་རྐྱང་པར་གོལ་ཞིང་གཏིང་གསལ་གྱི་མདངས་མ་རྙེད་ན་དབང་པོའི་ཡུལ་རྒྱུན་འགགས་ནས་རྣམ་པར་རྟོག་མི་རྟོག་གཉིས་ཀའི་དྭངས་ཆ་འགག་སྟེ། གཟུགས་མེད་དུ་འཕེན་ལ། དེ་ཡང་གསལ་ཆ་འགག་པའི་ཤེས་པ་ནམ་མཁའ་ལྟར་སྟོང་ལ་མ་དགག་ཙམ་གྱི་ངོ་བོ་ཉིད་ལ་གོམས་པ་ནི་ནམ་མཁའ་མཐའ་ཡས་ཀྱི་སྐྱེ་མཆེད་དོ། །དེའི་ངང་ལ་གོམས་པས་རྣམ་ཤེས་ཀྱི་ངོ་ན་སེམས་ཙམ་པའི་གསལ་སྣང་མཐའ་ཡས་པ་ཡིད་ལ་བྱེད་ཀྱང་ཚོགས་དྲུག་གི་དྭངས་ཆ་མ་འགག་པར་བསྟན་པ་ལས་རྣམ་ཤེས་མཐའ་ཡས། དེ་ལྟར་གོམས་པ་ལས་སེམས་ཙམ་དུ་ཤེས་པའི་ཚོར་བ་ཕྲ་མོ་དེའང་ནུབ་ནས་གང་དུའང་མི་མཐོང་བ་ནི་ཅི་ཡང་མེད་པའི་སེམས། དེ་ལྟར་ཅི་ཡང་མེད་པ་ཙམ་དུ་འཛིན་པའི་སེམས་དེ་ཡང་ཡོད་མེད་གང་དུའང་མ་གྲུབ་པར་ཡིད་ལ་མི་བྱེད་པ་མི་སྟུག་པོར་འབྱམས་པ་ནི་ཡོད་མིན་མེད་མིན་གྱི་སྐྱེ་མཆེད་དེ་སྲིད་རྩེའི་སེམས་སོ། །དེ་རྣམས་གང་ལ་གོམས་པ་དེའི་ངང་དུ་ཤི་ནས་དེར་སྐྱེ་བ་ཡིན་ནོ། །འགོག་པ་ནི། བདེ་སྡུག་གི་ཚོར་བ་དང་འདུ་ཤེས་བཀག་པས་འགོག་པའི་ཏིང་ངེ་འཛིན་ཐོབ་པ་ཡིན་ཏེ། སེམས་བྱུང་ལྔ་བཅུ་དང་རྟོག་ཚོགས་བརྒྱད་ཅུ་སོགས་གཏན་འགགས་པའི་རུམ་དུ་རིག་ཆའི་ཡོན་ཏན་བག་ལ་ཞ་སོང་བ་ཡིན་ནོ། །དེ་ཡང་བློས་དཔྱད་ནས་བརྟགས་པས་འགོག་པ་དང་། རྟོག་བྲལ་གྱི་ངང་ལ་བཞག་པ་བརྟག་མིན་གྱི་འགོག་པའོ། །འབྲས་བུ་ཆེ་བའི་བསམ་གཏན་མན་ཆད་དེ་ཤེས་རབ་ཀྱི་ལམ་སྟེགས་ཙམ་དུ་མངོན་དུ་བྱེད་ཀྱང་རྣམ་པར་སྣང་བ་དེ་ཉིད་ཡང་དག་པའི་ལྷག་མཐོང་རྣམ་པར་མི་རྟོག་པས་ཟིན་ནས་གྲོལ་བ་ནི་འཕགས་པ་རྣམས་ཀྱི་ཁྱད་ཆོས་སོ།།   །། ༈ 
སློབ་དཔོན་ཀླུ་སྒྲུབ་ཀྱིས་མཛད་པའི་འཇམ་པའི་རྡོ་རྗེའི་སྒྲུབ་ཐབས་བློ་གྲོས་འཕེལ་བ་ལས། པདྨ་འདབ་བརྒྱད་སེར་པོ་དབུས་དཀར་པོར་བྱས་ལ། དེའི་སྟེང་དུ་ལྷུང་བཟེད་དུ་ཤེས་རབ་འཕེལ་བར་བྱེད་པའི་རྫས། དབང་པོ་ལག་པ། གླ་རྩི། གི་ཝང་། སྤང་རྒྱན་དཀར་པོ་རྣམས་བ་དམར་མོའི་འོ་མས་སྦྲུས་ཏེ་རིལ་བུ་སྲན་མ་ཙམ་བྱའོ། །དེའི་སྟེང་དུ་འཇམ་དཔལ་དང་དབྱངས་ཅན་མ་གཉིས་ཀ་ཞལ་སྦྱོར་གྱི་ཙཀླི་གཅིག་གཞུག་པར་བྱའོ་དང་། སྒྲུབ་པའི་ཚད་ཞག་བདུན་དུ་བྱའོ། །རྟགས་ནི་འོད་དང་སྒྲ་ལ་སོགས་པ་འབྱུང་ངོ་། །ཞག་བརྒྱད་ན་དཀྱིལ་འཁོར་གྱི་ལྷ་རང་དང་རིལ་བུ་ལ་བསྟིམ། རིལ་བུ་དེ་སྒྲུབ་པ་པོས་ཟོས་པས་འཇམ་པའི་དབྱངས་དང་ཤེས་རབ་མཉམ་པར་འགྱུར་རོ། །ཐུན་མོང་ཚེ་ཡི་དངོས་གྲུབ་ཀྱང་ཐོབ་སྟེ། དེ་ལྟར་ཡང་། འདི་ཟོས་ཡོན་ཏན་བསམ་མི་ཁྱབ། །ལོ་བརྒྱ་ཐུབ་པ་བརྒྱད་བརྒྱར་འགྲོ། །དགུ་བཅུ་ལོན་པ་བཅུ་དྲུག་ལྟར། །སྐྲ་དཀར་བུད་ནས་ནག་པོར་འགྱུར། །བང་ནི་རྟ་དང་མཉམ་པར་འགྱུར། །སྐྲ་ནི་མེ་ཏོག་པདྨ་འདྲ། །ལུས་ནི་དཀར་ལ་སྦོམ་པར་འགྱུར། །ཉམས་སྟོབས་ལུས་ཟུང་འཕེལ་བར་འགྱུར། །ལྷ་འདྲེ་རྣམས་ཀྱིས་སྟོང་གྲོགས་བྱེད། །ཡོན་ཏན་སྨོན་འཇུག་སེམས་དང་ལྡན། །སེམས་བསྐྱེད་དེ་དང་ལྡན་པ་ཡི། །སྐྱེས་བུ་དེ་ནི་དམ་པ་ཡིན། །ཡོན་ཏན་དེ་དང་ལྡན་ཞེས་སྨྲ། །ཞེས་འབྱུང་ངོ་། །འདིའི་བདག་བསྐྱེད་འཇམ་དབྱངས་དམར་པོ། རིལ་བུ་དབྱངས་ཅན་མ་དཀར་པོད་རལ་ཅན། མོར་བསྐྱེད་སྣང་།   ། ༈ འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་ཐབས་བརྒྱ་རྩ་བརྒྱད་པ་ལས། ཐུགས་རྗེ་ཆེན་པོ་ནམ་མཁའ་མཛོད་སེར་པོའི་སྒྲུབ་ཐབས་ལས། གཙོ་བོ་སྐུ་མདོག་སེར་པོ། ཡིད་བཞིན་གྱི་ཤིང་ལ་སྐུ་རྒྱབ་བརྟེན་པ། གཡོན་པདྨོ་འཛིན་ཅིང་། གཡས་ནོར་ཐམས་ཅད་སྦྱིན་པ་མཛད་པའི་གཡས་སུ་འཕགས་པ་ནོར་འཕེལ་རྔ་ཡབ་ཐོགས་ནས་ནོར་གྱི་རྒྱུན་འབེབས་པ་དང་། གཡོན་དུ་ལྷ་མོ་ནོར་སྦྱིན་མ་དམར་མོ་རིལ་པ་འཛིན་པ་ནོར་བུ་དམར་པོའི་ཕྲེང་བས་བརྒྱན་པ། སྔགས་ནི། ཨོཾ་ཨཱཿཧྲཱིཿཧཱུྃ། ཚད་འབུམ་ཕྲག་ལྔ་བཟླས་ནས་རང་གི་བདོག་པ་ཐམས་ཅད་སྦྱིན་པ་བཏང་ན་བསོད་ནམས་ཀྱི་སྤྲིན་ལས་འདོད་དགུའི་ཆར་ཆེན་འབེབས་པར་བྱེད་དོ།   ། ༈ འཕགས་པ་ཐུགས་རྗེ་ཆེན་པོ་ལུས་ཀྱི་འཁོར་ལོ་འབར་བ་ལས་སྙིང་གར་པདྨ་འདབ་མ་བཞི་པའི་ཕྱི་རོལ་ཏུ་རྩིབས་དྲུག་དང་ལྡན་པའི་འཁོར་ལོ། དབུས་དང་འདབ་མ་བཞི་ལ། འཇིག་རྟེན་དབང་ཕྱུག  །གཏི་མུག་རྡོ་རྗེ་སོགས་བཞི། རྩིབས་དྲུག་ལ་འགྲོ་བ་རིགས་དྲུག་གི་རྣམ་པར་དག་པ་འགོད་པར་བྱ་སྟེ། ལྷ་རིགས་རྣམ་དག་འཆི་འཕོ་མེད། །དབང་པོ་རྡོ་རྗེ་གུར་གུམ་མདོག  །མེ་ཏོག་ཕྲེང་བའི་ཆུན་པོ་འཛིན། །དྲེགས་པ་མ་ལུས་སྤངས་པའོ། །ཨ། ལྷ་མིན་རྣམ་དག་འཁྲུགས་པ་མེད། །དྲག་པོ་རྡོ་རྗེ་རྒྱ་སྐྱེགས་མདོག  །རལ་གྲི་དང་ནི་འཁོར་ལོ་འཛིན། །ཕྲག་དོག་མ་ལུས་ཀུན་སྤངས་པའོ། །ཨི། མི་ནི་རྣམ་དག་བྲེལ་ཕོངས་མེད། །དབང་ཕྱུག་རྡོ་རྗེ་རྫ་གསར་མདོག  །རྡོ་རྗེ་དང་ནི་དྲིལ་བུ་འཛིན། །རྣམ་པར་གཡེངས་པ་ཀུན་སྤངས་པའོ། །ཨུ། དུད་འགྲོ་རྣམ་དག་བླུན་རྨོངས་མེད། །སེང་གེ་རྡོ་རྗེ་དུ་བའི་མདོག  །དགྲ་སྟྭ་དང་ནི་དབྱུག་པ་འཛིན། །བག་མེད་བཏུལ་བ་ཀུན་སྤངས་པའོ། །ཨེ། ཡི་དྭགས་རྣམ་དག་སེར་སྣ་མེད། །གཤིན་རྗེ་རྡོ་རྗེ་ཆར་སྤྲིན་མདོག  །ཐོད་པ་དང་ནི་ཞགས་པ་འཛིན། །འཇུངས་པའི་སྲེད་པ་ཀུན་སྤངས་པའོ། །ཨོ། དམྱལ་བ་རྣམ་དག་ཚ་གྲང་མེད། །འཇིགས་སྐྱོབས་རྡོ་རྗེ་བྱེ་རུའི་མདོག  །བུམ་པ་དང་ནི་ལྷུང་བཟེད་འཛིན། །མི་ཟད་ཡང་ཡང་ཀུན་སྤངས་པའོ། །ཞེས་སྣང་བ་འདི་ཐུབ་པ་དྲུག་དང་གཅིག་པར་འདུག་གོ ། ༈ 
བསམ་གྱིས་མི་ཁྱབ་པའི་མཆོད་པའི་ཆོ་ག་གཞུང་དང་གསལ་བྱེད་ལྟར་བཤད་ན། གཙང་མའི་གནས་སུ་མེ་ཏོག་སོགས་ཅི་འབྱོར་པའི་མཆོད་པ་དགྲམ། རང་སྐད་ཅིག་གིས་འཕགས་པ་སྤྱན་རས་གཟིགས་རྒྱལ་མཚན་རྩེ་མོ་གསེར་མདོག་ཞལ་གཅིག་ཕྱག་གཉིས་པ། གཡས་མཆོག་སྦྱིན་ལས་མཆོད་པའི་ཆར་ཆེན་པོ་འབེབས་ཤིང་། གཡོན་པདྨོ་རྒྱས་པ་འཆང་བ། མཆོད་པའི་སྤྲིན་རྒྱ་མཚོའི་དབུས་ན་བཞུགས་ཤིང་ཡོ་བྱད་ནམ་མཁའི་མཛོད་ལ་མངའ་བརྙེས་འཁོར་ལོས་སྒྱུར་བའི་རྒྱལ་པོའི་ངང་ཚུལ་ཅན་དུ་གསལ་བར་གྱུར། །ཨོཾ་བཛྲ་པུཥྤེ་ཨཱཿཧཱུྃ། དེ་བཞིན། དྷཱུ་པེ་ནས་ཤབྡའི་བར་དང་། མཎྜལ་སྦྱར་བས་བྱིན་རླབས། ཚོགས་ཞིང་མཁའ་ཁྱབ་ཏུ་སད་པའི་སྤྱན་སྔར། བླ་མ་དཀྱིལ་འཁོར་ལྷ་ཚོགས་སོགས། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་བཅས་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ། །ཞེས་ཕྱག་འཚལ་བ་སྔོན་དུ་འགྲོ་བས། རང་གི་ཐུགས་ཀའི་ཧྲཱིཿལས་མཆོད་པའི་ལྷ་མོ་ཁ་དོག་སྣ་ཚོགས་པ་བསམ་གྱིས་མི་ཁྱབ་པ་རེ་རེ་ལས་ཀྱང་དཔག་ཏུ་མེད་པའི་སྤྲིན་འཕྲོ་བ་སྤྲོས་ནས་བསྙེན་བཀུར་བར་བསམས་ལ། རང་བཞིན་སྟོང་པ་ཉིད་ཅན་གྱི། །སྣ་ཚོགས་མེ་ཏོག་བསམ་མི་ཁྱབ། །རྒྱལ་མཚན་རྩེ་མོའི་རིག་པ་ཡིས། །སྤྲུལ་ནས་འཕགས་ཚོགས་མཆོད་པར་བྱ། །ཨོཾ་ན་མོ་བྷ་ག་ཝ་ཏེ་མ་ཧཱ་ཀ་རུ་ཎི་ཀ་པུཥྤེ་པཱུ་ཛ་མེ་གྷ་ས་མུ་དྲ་ཀེ་ཏུ་རཱ་ཛ་ཡ། ཏ་ཐཱ་ག་ཏཱ་ཡ། ཨརྷ་ཏེ་ས་མྱཀྶཾ་བུདྡྷཱ་ཡ། ཏདྱ་ཐཱ། ཨོཾ་པུཥྤེ། པུཥྤེ། པུཥྤེ། པུཥྤ་ཨུཏྦྷ་ཝེ། པུཥྤ་ཨ་བ་ཀཱི་ར་ཎེ་སྭཱ་ཧཱ། ཞེས་པའི་རིག་པ་འདི་ལན་གསུམ་དུ་བརྗོད་ཅིང་འབུལ། དེ་བཞིན་དུ་མེ་ཏོག་གི་གནས་སུ་བདུག་སྤོས་དང་། པུཥྤ་དང་པུཥྤེ་གནས་སུ་དྷཱུ་པེ་དང་དྷཱུ་པེ་སོགས་སྦྱར་བས་མཚོན། ཉེར་སྤྱོད་ལྔ་དང་། རོལ་མོ་མཎྜལ་བཅས་འབུལ། ཐོག་མ་མེད་ནས་ད་ལྟའི་བར། །ཞེས་སོགས་སྡིག་པ་བཤགས་པས་མཚོན་ཡན་ལག་ལྷག་མ་རྣམས་ཀྱང་བྱས་ཏེ། བདག་དང་སེམས་ཅན་ཐམས་ཅད་བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་ཏེ་མྱུར་དུ་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། །ཅེས་གསོལ་བ་གདབ་རྗེས་ཚོགས་ཞིང་རྣམས་མི་དམིགས་པར་བལྟས་ལ་དེ་ཁོ་ན་ཉིད་རྗེས་སུ་དྲན་པས་དགེ་བའི་རྩ་བ་སངས་རྒྱས་ཀྱི་སར་བསྔོའོ། །ཕན་ཡོན་ནི། མི་ཕྱེད་གུས་པ་མང་ལྡན་པས། །གཟུངས་འདི་ལན་གསུམ་ཆོ་ག་འདིས། །ཉིན་རེ་དུས་གསུམ་མཆོད་བྱེད་ན། །བྱེ་བ་བསམ་མི་ཁྱབ་མཆོད་འགྱུར། །ཞེས་སོ།   ། ༈ 
ལུས་ཀྱི་འཁོར་ལོ་བཅིངས་གྲོལ་གྱི་མན་ངག་ལས། ཐུགས་རྗེ་ཆེར་ཁྲོས་བཞད་པའི་ཞལ། །རྡོ་རྗེའི་ཁྱུང་གཤོག་མཐིང་ག་ཅན། །ཞེས་གཤོག་པ་བཤད།   ། ༈ 
དཔལ་རྡོ་རྗེ་ཐོད་པའི་དངོས་གྲུབ་སྒྲུབ་ཐབས་ལས། བློ་ལྡན་ཆོ་ག་བཟང་ཤེས་པས། །བདེ་ཆེན་དངོས་གྲུབ་སྟེར་བའི་ཕྱིར། །ཀ་པཱ་ལ་འདྲའི་གནས་སུ་ནི།  །ཀ་པཱ་ལ་ཡི་དངོས་གྲུབ་བསྒྲུབ། །ཅེས་ཐོད་སྒྲུབ་ཀྱི་མན་ངག་བཤད་ཅིང་། དེའང་མཚན་མ་བཟང་པོའི་ཐོད་པ། ག་བུར་ཙནྡན་གླ་རྩི་སོགས་དྲི་བཟང་པོས་བྱུགས་པར་དཀྱིལ་འཁོར་བྲི། ལྔ་ཚན་ལྔ་དང་རིང་བསྲེལ་སྙིང་པོར་གཞུག་པ་སོགས་ཆོ་ག་རྒྱས་པར་བཤད་དོ།   ། ༈ 
ཐུགས་རྗེ་ཆེན་པོ་རྔ་སྒྲའི་སྒྲུབ་ཐབས་ལས། འདབ་ཆགས་ང་རོ་ཆེན་པོའི་ལོ། །སྐར་མ་རྒྱལ་ལ་བབས་པའམ། །ཡང་ན་དབྱར་གྱི་སྒྲ་སྒྲོགས་དུས། །མཁས་པས་རྔ་ཆེན་བཅོས་པར་བྱ། །ཙནྡན་སྡོང་བུ་དཀར་དམར་རམ། །སྒྲ་སྒྲོགས་ཤིང་དང་སྙན་པའི་འདབ། །སེང་ལྡེང་གླང་སྣ་བུ་འབོད་དང་། །ཏི་ཏི་ར་སྔོ་རྒྱུ་ཡིན་བརྟག  །ཉི་མ་ཤར་དང་ཟླ་བ་ཤར། །སྲོད་ཀྱི་དུས་ལ་བབས་པ་ན། །གླ་རྩི་ག་བུར་གུར་གུམ་བྱུག  །རྡོ་རྗེ་ཁྲོས་པས་བགེགས་ཚར་བཅད། །བྱམས་པའི་ཉི་མ་གང་ལ་བབས། །ཁྲི་སྙན་མོ་ཡིས་པགས་པ་སྦྱངས། །ནམ་མཁའི་སྒྲ་གསང་སྒྲོགས་པ་ན། །ལྷོ་རུ་ཁ་བལྟས་གཡོགས་པར་བྱ། །དེ་ནས་དྲི་མཆོག་དམ་ཚིག་ཅན། །བདུད་རྩི་ལག་པར་ལེགས་བྱུགས་ལ། །དབང་ཐོབ་ལྷ་བཟོ་སྐད་མཐོན་པོས། །སྒྲ་དབྱངས་མགོན་པོ་བྲི་བར་བྱ། །དབུས་སུ་པདྨོ་དམར་བཞིའི་སྟེང་། །གཞོན་ནུའི་མདངས་རྒོད་ང་རོ་བཅིངས། །ཕྱག་གཉིས་རིན་ཆེན་རྔ་ཆེན་བརྡུང་།  །ཟླ་བའི་མདོག་ཅན་བརྗིད་པའོ། །ཤར་སོགས་འདབ་བཞིར་གྲགས་ཆེན་དང་། །འབྲུག་སྒྲ་སྙན་པའི་དབྱངས་ཅན་དང་། །ང་རོ་མི་ཟད་གནོད་སྦྱིན་བཞི། །ཕྱོགས་ཀྱི་ཁ་དོག་ཇི་བཞིན་གནས། །བརྩོན་པའི་ཆ་བྱད་ཅན་གྱིས་སྤྲད། །ཕྱག་བཞི་དུང་དཀར་ཀཱ་ལ་ཧཱ། །དྲིལ་བུ་དང་ནི་གཎྜི་ཐོགས། །མིག་དམར་དགའ་བ་ཁྲོས་པའི་ཚུལ། །དེ་མཐར་འཁོར་ལོ་བརྒྱད་རྩིབས་རིས། །བཀྲ་ཤིས་བརྒྱད་འཛིན་ལྷ་མོ་བརྒྱད། །ཤིན་ཏུ་སྒེག་མཛད་དུལ་བའི་ཚུལ། །འཛུམ་པའི་མདངས་དཀར་སྣ་ཚོགས་མདོག  །མུ་ཁྱུད་རྡོ་རྗེའི་སྤྲིན་འཁྲིགས་པ། །འུར་འུར་སྐད་འབྱིན་འཇིགས་པ་དང་། །གློག་རྒྱན་ཕྲེང་བས་མཛེས་པ་ནི། །མཁས་པ་ཏིང་འཛིན་ལྡན་པས་བྲིས། །དེའི་འོག་ཏུ་ཇི་སྐད་བསྔགས་པའི་སྐབས་ནས་ཡེ་ཤེས་ཀྱི་འཁོར་ལོ་ཅན་གྱི་རྔ་བཀུག་ནས་རོལ་མོ་ལ་སོགས་པའི་མཆོད་པས་མཉེས་པར་བྱས་ནས་རྗེས་སུ་གཞུག་པར་བྱའོ། །དེ་ནས་ལྟེ་བ་མུ་ཁྱུད་ཀྱི་ནང་གི་ཁྱུད་ཀོར་དུ་ཡི་གེ་ཆེན་པོ་ལྔ་དང་ཉེ་བའི་ཡི་གེ་ལྔ་བཅུ་བྱང་ཆུབ་ཀྱི་སེམས་གཉིས་འདྲེས་པ་བྲི་ཞིང་། སྔགས་དེ་ཉིད་སྒྲ་ཆེན་པོས་ལན་བདུན་དུ་བཀླགས་ལ་རོལ་མོ་གསིལ་བ་དང་བྲོ་བརྡུང་བར་བྱའོ། །དེ་རྗེས་མཁས་པས་བརྒྱ་བྱིན་གྱི། །ལག་པ་འདྲ་བའི་འཁྲུལ་འཁོར་གྱིས། །རྩོལ་བ་སྤངས་ནས་རྔ་བརྡུང་ཞིང་། །བདག་ཉིད་རྣལ་འབྱོར་བརྩོན་པས་བྱ། །སྒྲུབ་པ་པོ་ཡི་ངག་མེད་ཀྱང་།   །ཇི་ཙམ་བསྙེན་པའི་མཚན་བཤད་སྔགས། །དེ་ཡི་ཕྱེད་གཉིས་འགྲུབ་པར་ནི། །ངེས་པར་ཐེ་ཚོམ་མི་བྱའོ། །དེའི་འོག་ཏུ་གཡུལ་བཟློག་པའམ། །གྲགས་པ་མཐོ་འདོད་དེ་བཞིན་གཞན། །ཐམས་ཅད་སྙིང་རྗེ་མ་བྲལ་བས། །རྔ་འདི་བརྡུང་བ་ཙམ་གྱིས་འགྲུབ། །འཇིག་རྟེན་གསུམ་གྲགས་མཐའ་ཡས་པ། །ཐུགས་རྗེ་ཆེན་པོས་ཉིད་སྤྲུལ་པ། །རྔ་ཆེན་རྒྱལ་པོ་བརྟག་པའི་ལས། །དོན་ཀུན་སྒྲུབ་པར་བྱེད་པ་ཡིན། །ཞེས་སོ།   ། ༈ 
སྲུང་སྐུད་ཀྱི་ཆོ་ག་ལས། །འཕགས་པ་སྤྱན་རས་གཟིགས་ལ་དད་པ་ཐོབ་པས། ཚོར་བས་གཟིར་བ་དང་། གདོན་གྱིས་གླགས་བཙལ་བ་དང་། རྐུན་པོ་དང་དགྲས་འཇིགས་པའི་ནུས་པའི་དབང་བ་བསྲུང་བ་ལ་སོགས་པའི་དོན་དུ་སྙིང་རྗེ་ཆེན་པོས་སྲུང་སྐུད་བཅིང་བར་བྱའོ། །འཁོར་ལོ་རྡོ་རྗེ་རིན་ཆེན་དང་། །པདྨོ་སྣ་ཚོགས་ཁ་དོག་ཅན། །རས་དང་དར་དང་བལ་དང་བཅས། །པདྨའི་སྐུད་པ་ཤིན་ཏུ་བསྔགས། །སོགས་གསུངས་ཏེ། གཞོན་ནུ་ཕོ་མོས་བཀལ་བའི་སྲད་བུ་པདྨ་འདབ་བརྒྱད་ཀྱི་དབུས་སུ་བཞག་ནས་སྦྱང་བ་སོགས་བྱ། དེ་ནས་རང་འཇིག་རྟེན་དབང་ཕྱུག་སྲད་བུ་དང་པདྨོ་བསྣམས་པར་བསྐྱེད་ནས། མདུད་པ་གསུམ་བྱས་ལ། སོ་སོར་གསང་བ་གསུམ་གྱིས་འོད་ཕྱུང་བས་སྒོ་གསུམ་སྲུང་བའི་ནུས་ལྡན་དུ་བསམས་ལ། ཨོཾ་ཨཱཿཧྲཱིཿཀཱ་ཡ་བཛྲ་ཀྵ་ཡ་ཀཎྛ་ཧཱུྃ། དེ་བཞིན། ཝཱ་ཀ་དང་། ཙིཏྟ་སྦྱར་བས་སྔགས། དམ་ཚིག་གི་སྲད་བུ་འོད་ལྔ་འབར་བར་བསམས་ལ་བསྒྲུབ་བྱའི་མགུལ་ལམ་དཔུང་པ་ལ་བཅིངས་པར་གསུངས།  ། ༈ 
ཚེ་འདས་ལ་བྱ་བའི་ཆོ་གར། སྙིང་རྗེ་ཆེན་པོ་ཡིད་གཞུང་པས། །སྤྱན་རས་གཟིགས་དཔལ་བསྙེན་བྱས་ཏེ། །ལུས་ཅན་མི་འདོད་བཞིན་དུ་ལྷུང་། །དེ་དག་ངན་འགྲོ་བཟློག་པར་བྱ། །སྔོན་ནས་སྦྱངས་པ་ཉིད་དང་ནི། །གཞན་དག་གློ་བུར་བྱ་བ་ཉིད། །དེ་བཞིན་ཕྱི་ནས་གཞན་གྱིས་ཏེ། །མཆོག་དང་ཕ་མཐའ་གྲངས་བཞིན་འདོད། །ཅེས་རབ་རང་བྱིན་རླབས་ཀྱི་སྦྱོར་བས་འཕོ། འབྲིང་གློ་བུར་བདག་ལ་འོད་ཀྱི་སྦུ་གུས་སྦྱོར་བའི་འཕོ་བ་དག་བཤད་ནས་ཐ་མ། དེ་ལྟར་རིང་ནས་ལམ་གོམས་པའི། །བློ་ལྡན་དུས་ལས་འདས་གྱུར་ཚེ། །འཕགས་པ་ངན་སོང་སྦྱོང་དཔལ་གྱི། །ཆོ་ག་བདུན་ཕྲག་བདུན་དུ་སྦྱངས། །རོའམ་རུས་པ་གོས་སམ་མིང་། །རྟེན་དེའི་མདུན་དུ་བཞག་ནས་སུ། །མ་དག་པ་དང་དག་པ་ཡི། །དཀྱིལ་འཁོར་གཉིས་ལ་རྟེན་གཉིས་བཞག  །བརྡེག་དང་བསྲེག་དང་བཀྲུ་བ་ཡིས། །དྲི་མ་གཞིག་གཞོམ་དད་པ་དག  །དཀྱིལ་འཁོར་ནག་པོ་བྱ་བས་ཏེ། །བསྟན་དང་དབང་བསྐུར་བྱ་བ་ལའོ། །ཡུངས་ཀར་བྱེ་མ་ཐལ་ཆེན་ལ། །རིམ་པར་བཟླས་ནས་བསྣུན་བྱ་ཞིང་། །སྦྱིན་སྲེག་ཆོ་གའི་བྱ་བ་ཡིས། །རྟེན་བཅས་བག་ཆགས་འབད་དེ་བསྲེག  །ངན་སོང་སྦྱོང་བའི་སྐུ་གསུང་ཐུགས། །བཞུ་བའི་ཆུས་བཀང་བུམ་པ་བླུགས། །རྡོ་རྗེའི་གླུ་བླངས་རིམ་པ་བཟླ། །མ་ལུས་དྲི་མ་བཀྲུ་བར་བྱ། །ཨོཾ་ཨཱཿཧྲཱིཿསརྦ་དུརྒ་ཏི་པ་རི་ཤོ་དྷ་ནེ་རཱ་ཛ་ཡ། ཨ་མུ་ཀེ་ཀཱ་ཡ། ཝཱ་ཀ་ཙིཏྟ་སརྦ་པ་པཾ་ཏོ་ཥ་ཝ་ར་ཎ་བྷཾ་ག་བྷཾ། ཌ་ཧ་ཌ་ཧ། བཱ་རཙྪ་བཱ་རཙྪ། ཤོ་དྷ་ཡ་ཤོ་དྷ་ཡ་ཕཊ་ཕཊ་སྭཱ་ཧཱ། དེ་རྗེས་དྲི་མ་དག་པའི་སེམས། །ལྷག་པའི་ལྷ་ལ་བཅུ་གནས་ནི། །ཇི་སྲིད་དབང་བསྐུར་བྱས་ཏེ་མཆོད། །དགའ་སྟོན་ཆེན་པོ་སྦྱིན་པར་བྱ། །ཞེས་སོ།   ། ༈ 
བཀྲ་ཤིས་ཀྱི་ཆོ་ག་ལས། བཀྲ་ཤིས་བཟང་དང་བཀྲ་ཤིས་ནོར་འབྲུ་སྨན། །བཀྲ་ཤིས་མཆོད་རྫས་དང་ནི་བཀྲ་ཤིས་རྒྱན། །དཔལ་ལྡན་བཀྲ་ཤིས་དཀྱིལ་འཁོར་ཆེར་བྲི་ལ། །བཀྲ་ཤིས་རྒྱལ་པོ་སྤྱན་རས་གཟིགས་དབང་དགུག  །གང་དག་གང་གི་ཕྱིར་དང་གང་དུ་ཇི་ལྟར་བྱ་བའི་རང་བཞིན་ཐམས་ཅད་ལ་བཀྲ་ཤིས་ཞེས་སྦྱར་རོ། །ཤིས་པ་བརྗོད་པའི་དབྱངས་དང་སེམས་དང་རྗེས་སུ་མཐུན་པའི་རོལ་མོ་དང་གླུས་མཆོད་དོ། །མེ་ཏོག་དཀར་དམར་དང་ཙནྡན་དཀར་དམར་དང་རྒྱན་དང་དྲིའི་ཁྱད་པར་ངེས་པའོ། །ཡོ་བྱད་གློ་བུར་དང་གསར་དུ་སྐྱེས་པ་མཐའ་དག་ལ་རྒྱལ་བར་གྱུར་པའི་ཚིག་སྔོན་དུ་སོང་བས་སོ། །སྦྱིན་བདག་གམ་སློབ་མའི་ལུས་བཀྲུས་ལ་བཀྲ་ཤིས་ཀུན་ཏུ་སྣང་བའི་རྒྱས་གདབ་བོ། །སིཌྷཽ། འདི་རྣམས་གྲུབ་པ་བརྙེས་པའི་སློབ་དཔོན་པཎྜི་ཏ་ཆེན་པོ་ཨ་ཛི་ཏ་མི་ཏྲ་གུཔྟས་མཛད། །རྣལ་འབྱོར་གྱི་དབང་ཕྱུག་མི་ཏྲ་ཛོ་ཀི་དང་། ཁྲོ་ལོའི་འགྱུར་རོ། །ཨ་ཏི་སཱ་དྷུ་སཱ་དྷུ་པཱ་ཤྱ་ཧོཿ   ། ༈ 
རྣམ་འཇོམས་ཀྱི་ཁྲུས་ཆོག་གི་འགྲེལ་པ་སློབ་དཔོན་རྡོ་རྗེ་གོ་ཆས་མཛད་པ་ལས། དེའི་ནང་དུ་དགང་བ་ནི། ཆུ་ཡིས་ཞེས་པ་སྨོས་ཏེ། ཙནྡན་དང་གུར་གུམ་ལ་སོགས་པའི་སྤོས་ཆུས་བཀང་སྟེ། དེ་དང་ལྷན་ཅིག་ལྡན་པའི་རིན་པོ་ཆེ་ནི་ཤེལ་དང་རྡོ་རྗེ་ཞེས་པ་དངོས་སུ་ཟད། ནོར་བུ་ཞེས་པ་སྤྱིའི་ཚིག་ཏུ་སྨོས་ཏེ། རྣམ་པར་མ་ཕྱེ་བའི་པདྨ་རཱ་ག་དང་། ཨིནྡྲ་ནི་ལ་ལ་སོགས་པ་རིན་པོ་ཆེའི་རིགས་སུ་གཏོགས་པ་དང་། མུ་ཏིག་དང་ས་ལེ་སྦྲམ་ལ་སོགས་པ་སྟེ། དེ་དག་གས་ཆག་མེད་པ་རྒྱན་གྱི་བྱ་བ་བྱེད་ནུས་པ་སྟེ་རིན་ཆེན་རྨ་མེད་ཅེས་བྱའོ། །གཞན་ཡང་དེའི་ཟླ་ལ་ཡུངས་ཀར་དང་། རྩ་དཱུརྦ་དང་། མེ་ཏོག་རྣམས་གཞུག་པར་བྱའོ། །ཞེས་དང་། ཡང་གོང་མའི་འབྲུ་དང་སྨན་ཞེས་བྱ་བ་ལ། བྱ་གྷྲི་དང་། སི་གྷྲི་ལ་སོགས་པའི་སྨན་རྣམ་པ་ལྔ་དང་། ཏིལ་དང་སྲན་མ་བ་ཤ་ཀ་ལ་སོགས་པའི་འབྲུ་སྣ་ཚོགས་རྣམས་རྒྱུད་ལས་གྲགས་པ་བཞིན་ནོ། །མགུལ་ཆིངས་གཙང་མའི་གོས་ཞེས་བྱ་བ་མ་སྤྱད་པ་མ་ཉམས་པའི་རས་དཀར་པོ་ཁ་ཚར་དང་བཅས་པའོ།   ། ༈ སློབ་དཔོན་བྱང་ཆུབ་སྙིང་པོས་མཛད་པའི་གཟུངས་ཆོག་ལས། རིན་པོ་ཆེ་སྣ་ལྔ་དང་། འབྲུ་ལྔ་དང་། སྨན་ལྔ་དང་། སྙིང་པོ་ལྔ་དང་། སྤོས་དྲི་ཞིམ་པོ་བླུགས་ཏེ། ལྡུམ་བུས་ཁ་བརྒྱན་ལ་མགྲིན་པར་དཀྲིའོ།  ། ༈ ཛ་ཡ་ཝ་རྨས་མཛད་པའི་དཀྱིལ་ཆོག་ལས། འབྲུ་སྨན་རིན་ཆེན་ལྔར་ལྡན་པས། །བཟང་པོའི་ཤིང་གིས་ཁ་བརྒྱན་ནས། །ཀུ་ཤའི་སྟན་ལ་ཡང་དག་བཞག  །ཅེས་འདིའི་དབང་ཆོག་པད་དཀར་གྱི་དཀྱིལ་ཆོག་དང་མཐུན་པར་སྣང་།   ། ༈ བྲམ་ཟེ་མ་ཎི་བཛྲས་མཛད་པའི་ལས་བཞི་སྒྲུབ་པའི་ཆོ་ག་ལས། ལས་སུ་བྱ་བ་ཆུ་དང་འབྲེལ་བས་བཀྲུ་བ་ཞེས་པ་དེང་སང་ཛྭ་ཆུ་བཀོལ་བ་དང་གྲགས་པའི་དབྱིབས་ལྟ་བུ་ཞིག་སྣང་། འོན་ཀྱང་ཏིང་ངེ་འཛིན་གྱི་མེས་བསྐོལ་བ་ལས་དངོས་སུ་བསྐོལ་བའི་གསར་ཁ་མེད། ཕན་ཡོན་ནི། གང་གི་ལུས་ལ་ཆུས་རེག་པ། །བགེགས་ཀྱི་གནོད་པ་ལས་གྲོལ་འགྱུར། །ཞེས་སོ། །པཎྜི་ཏ་ཛྙཱ་ན་ཤྲཱི་དང་། ལོ་ཙཱ་བ་རབ་ཞི་བཤེས་གཉེན་གྱི་འགྱུར་རོ།   ། ༈ རྣམ་འཇོམས་གཟུངས་སྒྲུབ་གྲུབ་ཆེན་བྲམ་ཟེ་ཀུ་མཱ་ར་སེ་ནས་མཛད་པ། དེའི་སློབ་མ་སངས་རྒྱས་གསང་བ་དང་། དཔའ་མཉྫུ་ཤྲཱིའི་འགྱུར་ལས། ཁྲུས་ཀྱི་བུམ་པ་བཟང་པོ་བྱ། །དེ་ཡང་གསེར་སོགས་དག་ལས་འབྱུང་། །མཚན་ཉིད་ལྡན་དེར་ཆུ་ཀླུང་ཆུ། །འོ་མ་དྲི་ལྔ་སྨན་དང་འབྲུ། །རིན་ཆེན་སྙིང་པོ་མེ་ཏོག་བཅས། །ཤེལ་དང་ཕ་ལམ་མུ་ཏིག་དང་། །ཁ་རྒྱན་མགུལ་གསུམ་པ་ཡིས་བཅིངས། །དཱུཪྺ་བདུག་དང་ཀུ་ཤ་དང་། །རྨ་བྱའི་སྒྲོ་དང་རྡོ་རྗེར་ལྡན། །ལས་ཀྱི་ཆོ་ག་མཐོང་བ་ཡིས། །ལེགས་བྱས་བསྐྲད་ལ་སྒྲུབ་རྫས་ནི། །རིན་ཆེན་སྣོད་ཀྱི་སྟེང་དུ་གནས། །མཎྜལ་སྟེང་དུ་དེ་བཞག་ལ། །ཞེས་སོ། །འདིའི་ཆོ་ག་རྣམས་བྱ་བ་སྤྱིའི་ཆོས་སྐད་ཇི་བཞིན་པའོ།   ། ༈ གཏོར་མའི་ཆོ་ག་སངས་རྒྱས་གསང་བས་མཛད་པ་ལས། །བར་ཆད་ཞི་དང་ཚོགས་བསགས་དང་། །འདོད་པ་ཐམས་ཅད་རབ་བསྒྲུབ་ཕྱིར། །ཟླ་བ་ཞག་དང་ཐུན་མཚམས་ལ། །ཡོ་བྱད་ཅི་འབྱོར་གཏོར་མ་བཏང་། །ཞེས་སོ།   ། ༈ དེས་མཛད་པའི་ཁྲུས་ཀྱི་ཆོ་གར་བུམ་རྫས་ཀྱི་ངོས་འཛིན་གོང་གི་རྡོ་རྗེ་གོ་ཆའི་གསུངས་དང་མཐུན་ནོ།  ། ༈ ཤ་བ་རི་པས་མཛད་པའི་དཀྱིལ་ཆོག་རིན་ཆེན་སྣང་བར། དངུལ་ལ་སོགས་པའི་བུམ་པར་ནི། །ནོར་བུ་ཡུངས་ཀར་དཱུཪྺ་དང་། །ཤེལ་དང་པདྨ་ཙནྡན་དང་། །གསེར་དང་རིན་ཆེན་ཆུས་དགང་བྱ། །ཞེས་སོ།   ། ༈ རྣམ་འཇོམས་ཀྱི་ལས་སྒྲུབ་པའི་ཐབས་ཀྱི་ཆོ་ག་མགོན་པོ་བྱམས་པས་རྗེས་སུ་བཟུང་བའི་དཔལ་གདྒཱ་དྷ་རའི་སྲས་ཀྱི་ཐུ་བོ་བྲམ་ཟེ་མ་ཎི་བཛྲས་མཛད་པ་ལས། རང་ལྷའི་དམིགས་པ་གསལ་བ་དང་། །སྔགས་ཀྱི་བཟླས་པ་མཐར་ཕྱིན་པས། །རིག་སྔགས་༡ཐོགས་པ་མེད་པ་དང་། །ཕ་རོལ་སྡེ་ལས་༢རྒྱལ་བ་དང་། །སྐྲག་༣དང་མཐུ་སྟོབས་གཞིག་༤པ་དང་། །རིག་སྔགས་བཅད་༥དང་མནན་༦པ་དང་། །ལས་༧གཞོལ་ཕ་རོལ་ལས་གཞིག་༨དང་། །གདོན་བརླག་༩གདོན་ལས་གྲོལ་༡༠པ་དང་། །འབྱུང་༡༡པོ་དགུག་དང་མནན་༡༢པ་དང་། །ལས་རྣམས་མ་གྲུབ་སྤོགས་པ་༡༣དང་། །གྲུབ་པའི་འབྲས་༡༤བུ་མཐར་དབྱུང་དང་། །འདོད་འབྲས་དངོས་གྲུབ་༡༥བསྒྲུབ་པ་དང་། །སྲུང་༡༦དང་ཞི་དང་༡༧རྒྱས་༡༨པ་དང་། །རེངས་༡༩དང་རྨུགས་༢༠པར་བྱེད་པ་ཡི། །ཐུན་མོང་ཁྱད་པར་བདག་ཉིད་ཀྱི། །ཆོ་ག་ཉི་ཤུའི་སྦྱོར་བ་རྣམས། །ཇི་ལྟར་བླ་མའི་མན་ངག་ལས། །རྟོགས་པའི་རིམ་པ་གསལ་བར་བྱ། །ཞེས་རྒྱས་པར་བཤད་དོ།   ། ༈ རྡོ་རྗེ་རྣམ་པར་འཇོམས་པའི་ལས་སྣ་ཚོགས་སྒྲུབ་པའི་ཆོ་ག་ཞེས་མཛད་བྱང་མེད་པ་ལས། སྡིག་༡པ་ཐམས་ཅད་ཞི་བ་ཏིལ་དང་མེ་ཏོག་དཀར་པོའི་སྦྱིན་སྲེག  །སྡུག་བསྔལ་ཐམས་ཅད་༢ཞི་བ་ཁྲུས་གྱི་ཆོ་ག  །དཔལ་༣འཕེལ་བ་འབྲས་བུ་དང་མེ་ཏོག་སེར་པོ་མངར་གསུམ་དང་བཅས་པའི་སྦྱིན་སྲེག  །ཨིནྡྲ་བི་ཤོ་དྷ་ན་སྦྱར་བས་དབང་༤པོ་ཉམས་པ་གསོ་པའི་ཁྲུས་ཆོག  །ཚེ་ཉམས་པ་༥གསོ་བ་དཱུཪྺ་དང་མེ་ཏོག་སེར་པོའི་སྦྱིན་སྲེག  །ཕུན་སུམ་ཚོགས་པར་བྱེད་པ་འབྲུ་དང་མེ་ཏོག་སེར་པོའི་སྦྱིན་སྲེག  །བུམ་བཟང་གཙང་མའི་ཆུས་བཀང་སྟེ། འབྲུ་སྨན་རིན་ཆེན་སྙིང་པོ་དྲི། །མ་ཉམས་རས་ཀྱིས་མགུལ་དཀྲིས་ཤིང་། །བཟང་པོའི་ཤིང་གིས་ཁ་བརྒྱན་པར། །ལྷར་བསྐྱེད་ཡེ་ཤེས་གཞུག་མཆོད་བསྟོད། །ཤོ་དྷ་ཡ་བི་ཤོ་དྷ་ཡ། མཐར་སྦྱར་སྔགས་བཟླས་ལེགས་བཀྲུས་པས། །ལྷ་རྣམས་མདུན་གྱི་ལྟེ་༧བར་གནས། །ཞེས་པ་འདི་ནི་ཁྲུས་སོགས་ཀྱི་ཁུངས་སུ་སེམས། མཛའ་སྡུག་དབང་དུ་བྱེད་པ་མེ་ཏོག་དམར་པོའི་སྦྱིན་སྲེག  །ཚེ་ཡི་ཚིལ་བུ་གུ་གུལ་དང་། །ཡུངས་ཀར་ཅེ་སྤྱང་ཀླད་པར་སྦྱར། །བརྒྱ་རྩ་བརྒྱད་དུ་མངོན་སྔགས་པས། །དུར་ཁྲོད་སོལ་བའི་མེ་ལ་བསྲེག  །བདུག་པས་བྲན་བཟའ་སོགས་ལུས་བདུག  །གདོན་གྱིས་གཙེས་པ་ཐར་བར་བྱེད། །པདྨའི་རྩ་བ་ཙནྡན་དམར། །མངོན་པར་བསྔགས་པའི་མེ་སྦར་ཏེ། །རིག་སྔགས་བརྒྱ་རྩ་བརྒྱད་བཟླས་པའི། །དཱུཪྺས་རང་གི་མིག་བསྐུས་ན། །ཕན་ཚུན་མི་མཐུན་གནས་པ་ཡང་། །ལྟས་པ་ཙམ་གྱིས་༡༠མཛའ་བོར་འགྱུར། །བོང་འགྲིབ་པ་འཇོམས་༡༡པ་འབྲུའི་སྦྱིན་སྲེག  །མྱ་ངན་ངལ་དང་གནོད་པ་༡༢འཇོམས་པའི་ཁྲུས་ཆོག  །བླ་གོས་མཐའ་ལ་བརྒྱ་རྩ་བརྒྱད། །མངོན་སྔགས་མདུད་པ་བདུན་བོར་ནས། །ལམ་དུ་ཞུགས་ན་མི་ཟད་པའི། །འཇིགས་དང་ཉམ་ང་ལས་གྲོལ་བྱེད། །ཐོ་རངས་ལྷ་ཡི་བསམ་གཏན་ལྡན། །སྔགས་ཀྱིས་མངོན་པར་བསྔགས་པ་ཡི། །ཆུ་དང་ཐལ་བ་ཡུངས་ཀར་གྱིས། །ཕྱོགས་མཚམས་བཅིངས་པས་ཕོངས་པ་༡༤འཇོམས། །སྔགས་བཏབ་པའི་སྤོས་དཀར་གྱིས་བདུག་པས་གཟའ་༡༥དང་། གུ་གུལ་བདུག་པས་རྒྱུ་༡༦སྐར་གྱི་གནོད་པ་འཇོམས། ཁ་དོག་ལྔ་ཡི་སྐུད་པ་ལ། །རིག་སྔགས་སྟོང་ཕྲག་བདུན་བཟླས་ནས། །གང་གི་མགུལ་ལམ་དཔུང་པ་ལ། །བཅིངས་པས་བྱད་༡༧སྟེམས་ལས་གྲོལ་བྱེད། །མི་ཟད་གདོན་གྱིས་ཉེན་པ་ལ། །སྔགས་ཀྱི་ཆུ་ཡིས་ལུས་བཀྲུས་ནས། །གུ་གུལ་ཡུངས་ནག་ཡི་དྭགས་སྐྲ། །ཁྭ་ཡི་གཤོག་པ་རྨ་བྱའི་ཤ  །ཅེ་སྤྱང་རྟུག་པ་སྔགས་བཅས་པའི། །བདུག་པས་ངེས་པར་ཐར་༡༨བར་བྱེད། །རྨི་ལམ་སྡིག་པའི་མཚན་མ་མཐོང་། །གཙང་མའི་གོས་གྱོན་དྲིས་བདུག་སྟེ། །ཤར་དུ་མངོན་པར་ཕྱོགས་པ་ཡིས། །རིག་སྔགས་བརྒྱ་རྩ་བརྒྱད་བཟླས་པའི། །ཆུ་ཡིས་ཁྲུས་༡༩བྱས་དགེ་བ་དང་། །སྡིག་མེད་དཔལ་དང་ལྡན་པར་བྱེད། །ཅེས་གསུངས། འདི་མ་ཎི་ཀ་བཛྲ་གྱིས་མཛད་དམ་སྙམ་ཞིང་། ཛྙཱ་ན་ཤྲཱི་དང་། རབ་ཞིའི་འགྱུར་རོ།   ། ༈ གང་གི་ལས་སྒྲུབ་པའི་ཐབས་ཀྱི་རིག་སྔགས་ཀྱི་མཐུ་ཐོགས་པ་མེད་པར་བྱ་བ་ནི་བཅུ་ཆའི་སྦྱིན་སྲེག་ལ་བཤད། གདོན་ལས་ཐར་བ་ནི། ཁྲུས་ཀྱི་རྗེས་སུ་ས་རྫ་ནའི་སྔགས་བདུག་སྦྱིན་པས་གྲུབ། རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་ནི། འབྱུང་པོ་མངགས་གཞུག་གི་ལས་སྒྲུབ་པར་གསུངས། མ་གྲུབ་པ་གྲུབ་པར་བྱེད་པ། སྤོག་ཆོག་ནི། མདུན་དུ་མཎྜལ་ལྷ་དམིགས་ཏེ་སྔགས་བརྗོད་པས་མེ་ཏོག་ཁྲི་ཕྲག་གཅིག་ཕུལ་ལ། དེ་ཉིད་སྲེག་རྫས་བྱས་པའི་སྦྱིན་སྲེག་བྱ་བར་གསུངས། གྲུབ་པ་ཆུད་མི་ཟ་བ་ནི་ལས་སྦྱོར་གྱི་སྦྱིན་སྲེག་ལ་བཤད། འདོད་པའི་དངོས་གྲུབ་བསྒྲུབས་པས། མདུན་དུ་མཎྜལ་གྱི་སྟེང་ལྷའི་སྐུ་གཟུགས་བཞག  །དེའི་དྲུང་དུ་རིན་པོ་ཆེའི་སྣོད་དུ་དངོས་གྲུབ་ཀྱི་རྫས་བཤམས། བདག་གི་རྣལ་འབྱོར་དང་མདུན་དུ་ལྷ་དམིགས་ལ་མཆོད་བསྟོད་སྔོན་དུ་འགྲོ་བས་བཟླས་པ་བྱ་ཞིང་ཕོ་ཉའི་ཚོགས་སྤྲོ་བསྡུས་སྦྱོར་བས་དངོས་གྲུབ་སྒྲུབ་པར་དམིགས་ཏེ། དྲོ་བ་དང་། དུ་བ་འཐུལ་བ་དང་། འབར་བ་ལས་མཁའ་སྤྱོད། ས་སྤྱོད། ས་འོག་གི་དངོས་གྲུབ་སྦྱིན་པར་གསུངས། སྲུང་བ་སོགས་འཁོར་ལོས་སྒྲུབ་པར་བསྟན་ཏོ། །མཐར། གང་ལ་བསྙེན་པ་བྱས་པའི་སྔགས། །ལས་སྒྲུབ་པ་ཡང་དེ་ཉིད་དེ། །དད་བརྟན་ཐེ་ཚོམ་མེད་པ་ལ། །སྔགས་ནི་ཡིད་བཞིན་ནོར་ལྟར་འགྲུབ། །ཅེས་སོ།   ། ༈ 
གདན་བཞིའི་དཀྱིལ་ཆོག་སྙིང་པོ་མདོར་བསགས་ལས། །ཡི་གེ་དགོད་པས་བཀོད་ནས་ནི། །ས་བོན་ལས་ནི་ལྷ་ཡི་ཚུལ། །ཟླ་བའི་དཀྱིལ་འཁོར་དབུས་གནས་པའི། །རྡོ་རྗེ་སེམས་དཔའ་བསམ་པར་བྱ། །པདྨའི་གདན་ལ་བཞུགས་པ་སྟེ། །གངས་དང་ཀུནྡ་ལྟ་བུའི་འོད། །ཕྱག་གཉིས་སེམས་དཔའི་སྐྱིལ་མོ་ཀྲུང་། །སངས་རྒྱས་ལྔ་ཡི་ཅོད་པན་ཅན། །རྡོ་རྗེ་སྙིང་གར་བཟུང་ནས་ནི། །གཡོན་གྱི་དྲིལ་བུ་དཀུ་ལ་བརྟེན། །སྐུ་ལ་རྒྱན་རྣམས་ཐམས་ཅད་དང་། །ཤིན་ཏུ་མཛེས་པའི་ན་བཟས་བཀླུབས། །འོད་ཟེར་སྣ་ཚོགས་འབར་བ་ཅན། །རྡོ་རྗེ་སེམས་དཔས་བདག་ཅེས་བརྗོད། །ཡེ་ཤེས་ས་བོན་འབུམ་ཕྲག་གསུམ། །སྔོན་དུ་བསྙེན་པའི་བཟླས་པ་བྱ། །ཐིག་ལེ་ནཱ་ད་ཡང་དག་ལྡན། །ཕྱག་འཚལ་ནཱ་མ་སྭཱ་ཧཱའི་མཆན། སྦྱིན་པའི་མཐའ་ཅན་ཏེ། །རྣལ་འབྱོར་མ་ནི་བརྒྱད་པོ་ཡི། །ཁྲི་ཁྲག་བཞི་ནི་བསྙེན་པར་བྱ། །སྦོས་མོ་ཌཱ་མི་ཀྲི་སོགས་ཀྱི། །ཉི་ཤུ་སྟོང་ཕྲག་ལྔ་རུ་བཟླས། །ཕྱི་རོལ་གནས་ཀྱི་འཇིག་རྟེན་པ། རྒྱལ་དབང་དངོས་གྲུབ་ཤིན་ཏུ་དྲག  །སྟོང་ཕྲག་གསུམ་དུ་བཟླས་ནས་ནི། །ཀུན་ནས་ཀུན་ཏུ་འགྲུབ་པར་འགྱུར། །སྔོན་དུ་བསྙེན་པས་འགྲུབ་འགྱུར་ཏེ། །མ་བསྙེན་པ་ནི་དཀྱིལ་འཁོར་མིན། །སྔགས་དང་རྣལ་འབྱོར་དེ་དག་གིས། །རིམ་གྱིས་བྱིན་གྱིས་རློབ་པར་འགྱུར། །སྔོན་དུ་ལྷ་བསྙེན་པས་མཉེས་པར་བྱ་བའི་ཆོ་ག་སྟེ་གཉིས་པའོ། །ཞེས་སློབ་དཔོན་བསྐྱོད་པའི་བརྟུལ་ཞུགས་ཀྱིས་མཛད་པ་ལས་སོ།།    །། ༈ 
ཕག་མོའི་སྐོར་ལས། ནཱ་རོ་མཁའ་སྤྱོད་སྐབས། གོས་ཟུང་དམར་པོ་བཤམས། འདིའི་མཆོད་པའི་སྐབས། རིགས་བཅུ་དྲུག་གི་སྔགས་ལས་དྷརྨ་དྷཱ་ཏུ་ཆད། གཏོར་ཆོག་གི་ས་བོན་ལས་ར་གཅིག་ལྷག་པ་སོགས། ལར་རིན་འབྱུང་སྤར་མ་འདི་ལ་ཡི་གེ་མ་དག་པ་མང་བས་ཞིབ་དཔྱོད་གལ་ཆེ། བུམ་བསྐྱེད་ཀྱི་ཧཱུྃ་བཞིའི་བཟླས་པར། བིདྱ་རཱ་ཛ་ཞེས་འདོན་པར་གསུངས་འདུག་ནའང་། བདེ་མཆོག་གི་སྐོར་ཐམས་ཅད་ལ་བཛྲ་རཱ་ཛ་ཁོ་ན་བཤད་པས། དཔྱད། ལུས།   ། ༈ དཔྱལ་ལུགས་ཞལ་གཉིས་མར། ལུས་གཞལ་ཡས་ཁང་། ངག་ཡིག་འབྲུ། སེམས་ལྷ་སྐུར་བསྒོམ་གསུངས་པ་དངོས་སུ་དེ་དང་དེར་བསྒོམ་པ་ཡིན་གྱི། དག་པ་དྲན་པ་ལྟ་བུ་ནི་མིན་གསུངས། ཆོས་འབྱུང་གདེངས་ཀ་རྒྱས་པའི་སྟེང་རུ་སྦལ་གྱི་རྒྱབ་ལྟར་མཐོ་བ་ཞེས་པ་གང་ཡིན་མ་འཚལ། འདིའི་ཕག་ཞལ་རྣ་ལྟག་གཡས་ནས་ཐོན་པ་ཡིན། དབང་ལྷ་དཔལ་ཧེ་རུ་ཀའི་རྣམ་པ་ནི་བདེ་མཆོག་ལྷ་དྲུག་ཅུ་རྩ་གཉིས་དང་། རང་སྔགས། ཨོཾ་ཤྲཱི་བཛྲ་ཧེ་ཧེ་སོགས། མཆོད་འབུལ་གྱི་སྒོ་མཚམས་མ་བརྒྱད་ཀ་སྐུ་མདོག་ལྗང་སྔོན་ཞལ་གཅིག་ཕྱག་གཉིས་མ། ཆོས་འབྱུང་ཡི་གེ་བཞི་དང་བཅས་པ་ནི། དབུས་སུ་བྃ། དེའི་མདུན་དུ་ཧཱུྃ། གཡོན་ཟུར་དུ་ཨོཾ། གཡས་ཟུར་དུ་ཨཱཿའོ། །རྩ་སྔགས་ཨོཾ་གསུམ་མ། ཁྱད་པར་གྱི་མཆོད་པ་བདུད་རྩི་དབུལ་བ་ནི། སྒྲུབ་མཆོད་སོགས་ཀྱི་སྐབས་དུས་སོགས་ཀྱི་ཨརྒྷཾ་མཆོད་པ་ལྟ་བུ་ཡིན་ཀྱང་། དབང་སྒྲུབ་སྐབས་ནང་མཆོད་བྱིན་གྱིས་བརླབས་པ་ཨོཾ་གསུམ་མའི་མཐར་འབྲུ་གསུམ་བཏགས་པ་འཐོར་བས་ཆོག  །ལག་མཆོད་ཀྱི་སྐབས་ཨོཾ་མཐེ་བོང་ནས་བརྩམས་ཏེ་འགོད་པ་དང་། མཐེའུ་ཆུང་ནས་བརྩམས་ཏེ་འགོད་པའི་ལུགས་གཉིས་ལས་ཇོ་ལུགས་དང་འབྲུག་ལུགས་ལ་ཕྱི་མ་ལྟར་བཞེད། དེ་ཡང་ནང་ངོས་ཀྱི་ཚིགས་བར་པ་ལའོ། །སོར་མོ་རྣམས་ཕྱེད་ཙམ་བཀུག་པའི་སེན་མོའི་རྣམས་འཛོམས་པར་ཕཊ་ཕཊ། ཅེས་བཀོད། སྲུང་སྐུད་གདགས་དུས་སྔགས་བརྗོད་རྒྱུ་སྟ་གོན་གྱི་སྐབས་རྣམས་དང་གཅིག  །སྤྱིར་ཕག་མོའི་སྐབས་འདི་རྣམས་ཀྱི་ཆོ་ག་སྤྲོས་དགོས་རིགས་བདེ་ཆེན་དཔལ་འབར་ནས་ལེན་གསུངས།   ། ༈ མཻ་ཏྲི་མཁའ་སྤྱོད་ཀྱི་དཔལ་གྱི་རི་ནི་ལྷོ་ཕྱོགས་ཤྲཱི་པརྦ་ཏ་དང་། མ་ན་བྷཾ་ག་ནི་ཡིད་ཕམ་པའི་རིའོ། །བྱིན་རླབས་གསུམ་པའི་སྐབས་ལྟེ་བར་ཆོས་འབྱུང་ཟུར་དྲུག་གི་དབུས་སུ་འཁོར་ལོ་སྔགས་ཕྲེང་དང་བཅས་པ་ནི་སྔགས་འཁོར་ལ་དེ་ལྟར་བཏགས་པ་མ་གཏོགས་འཁོར་ལོ་ཟུར་པ་ཞིག་བསྒོམ་རྒྱུ་མེད། བཞི་བའི་སྐབས། སྣ་རྩེ་ནས་ཕྱི་རོལ་ཏུ་སོར་བརྒྱད་པའི་སར་དགའ་འཁྱིལ་གྱེན་ལངས་བསྒོམ། ལྔ་པའི་སྐབས་ཀྱི་གསང་གནས་སུ་དགའ་འཁྱིལ་བསྒོམ་པའང་གྱེན་ལངས། ལར་འདི་ཡིག་རྙིང་གི་རྗེས་འབྲངས་ཏེ་ཕྱིས་ཀྱི་སྤྲུ་ལུང་པའི་ཡིག་ཆ་དང་ཅུང་མི་གཅིག་པ་མང་།   ། ༈ དོན་གྲུབ་མ་རྒྱས་པར་བདེ་ཆེན་དཔལ་འབར་དང་། དབང་སྒྲུབ་སོགས་ཀྱི་སྐབས་རིན་འབྱུང་རང་གི་དཔྱལ་ལུགས་ཞལ་གཉིས་མ་གུང་བསྒྲིགས་པས་ཁྱབ།   ། ༈ དབུ་བཅད་མར། གཡོན་གྱི་རྡོ་རྗེ་རབ་བསྔགས་མ། གཡོན་གྲི་གུག་དང་། གཡས་ཐོད་པ་འཛིན་པ་ཡིན་ཀྱང་སྤར་མ་དག  །དག་དྲན་སྐབས་ཞལ་གཉིས་མ་དང་འདྲ་བ་ལ། མི་རོའི་གདན་གྱི་ཚབ། འཇིགས་བྱེད་ཆེན་མོ་དང་དུས་མཚན་མ་ནི་གཟུང་བ་དང་འཛིན་པ་སྤངས་པའོ། །བསྒྱུར་བ་ལྟ་བུ་ཞིབ་ཆ་ཤིན་ཏུ་དཔྱད་དགོས་པ་མང་།   ། ༈ ཕག་མོ་གནམ་ཞལ་མར། རིན་ཆེན་ལྷར་བསྐྱེད་སོགས་དུས་འཁོར་གྱི་དབང་གོང་མ་ལྟ་བུ་ཞིག་ཨེ་ཡིན་ཀྱང་དེང་སང་རྒྱུན་གང་ཡང་མེད་གསུངས། འདིའི་ཨིནྡྲ་བྷོ་དྷི་ནི་ཨ་བ་སའི་སྐབས་ཀྱི་དེ་ཡིན་འདྲའོ།  ། ༈ རུས་སྦལ་ཞབས་ཀྱི་བཞུགས་སྟངས་ནི་མིའུ་ཐུང་གེལ་བའི་འདུག་སྟངས་དང་གཅིག་སྙམ།   ། ༈ དཔལ་འཛིན་ལུགས་ཀྱི་ཕག་གདོང་གི་ཞལ་དམར་པོ། ལྷ་གསུམ་རོ་གདན་གཅིག་ལ་བཞུགས་པ།   ། ༈ གོ་བཟློག་ལྷན་སྐྱེས་མར་རྡོར་སེམས་སྒོམ་བཟླས་དགོས།   ། ༈ ཕག་དཀར་ལ། ཞབས་གཡས་བསྐུམ་གཡོན་བརྐྱང་མཛད་པ་ཕག་མོ་སྤྱི་དང་མ་གཅིག་པས་དཔྱད། སྐུ་མདོག་དཀར་མོའི་ཚིག་གསལ་ཆད། ཐིག་ལེ་དཀར་པོ་དབང་སྒྲུབ་དང་མཉམ་དུ་ལྷར་བསྐྱེད་བསྟིམས་སོགས་བྱས་ལ། སློབ་མ་ལ་སྟེར་སྐབས་སྔགས་གཞུང་གསལ་ལྟར་བཟླས་པ་ལ་གཏད། ཕུས་བཏབ་པ་སོགས་མི་དགོས། སློབ་མས་པད་འདབ་བརྒྱད་དབུས་ཧྲཱིཿདང་། འདབ་མར་དབྱངས་གསལ་༡༦སྐོར་གཉིས་གཉིས་བྲི། དེ་བསང་སྦྱངས་དམ་ཡེ་དབྱེར་མེད་དུ་བྱ་བའམ། ཡེ་ཤེས་པ་ཙམ་བསྟིམ་ལ་མཆོད་པ་སོགས་གཞུང་ལྟར། གི་ཝཾ་གིས་ལྕེ་ལ་ཡི་གེ་འབྲི་བ་ཕྱག་ལེན་དུ་མི་མཛད། གལ་ཏེ་འབྲི་ན་ཧྲཱིཿཁོ་ན་ཡིན་སྙམ། ཕག་དཀར་གསར་རྙིང་ལ་བྱིན་རླབས་སོ་སོར་མཛད་གསུངས་སོ།    ། ༈ 
སྭ་སྟི། བཀྲ་ཤིས་གཟའ་དགུའི་མཆོད་པའི་ཆོ་ག་པཎྜི་ཏ་བ་ན་རཏྣ་ཉིད་ཀྱི་བླ་མ་ཧང་བ་ཞེས་པའི་གསུང་ཟིན་བྲིས་སུ་མཛད་པ་ལས། སྲུང་བ་ལྔའི་མཆོད་པའི་མཇུག་ཏུ། ཉི་མ་ལ། བདུག་སྤོས་ནི། ཀུན་ཏུ་རྒྱུ། མཆོད་ཡོན་གྱི་སྣོད་ནི་ཟངས། རིན་པོ་ཆེ་དམར་པོ་དང་། ཙནྡན་དམར་པོ་དང་། སཱ་ལའི་འབྲུ་དམར་པོ་དང་། འོ་མ་དང་བཅས་པའི་གཏོར་མ་དང་། ཡོན་ནི་བེའུ་དང་བཅས་པའི་བའོ། ༡༽  །ཟླ་བའི་བདུག་སྤོས་ག་བུར། མཆོད་ཡོན་སྣོད་དངུལ། མུ་ཏིག་གི་མཆོད་ཡོན། ཏིལ་དཀར། འབྲས་དཀར། འོ་ཟན་གྱི་གཏོར་མ། ཡོན་དུང་། ༢༽  །མིག་དམར་ལ། སྤོས། གུ་གུལ། མཆོད་ཡོན་སྣོད་ཟངས། མཆོད་ཡོན་ནི་བྱེ་རུ་སོགས་རིན་ཆེན་དམར་པོ། སྲན་མ་མ་ཥ། ཡུངས་ཀར། བུ་རམ། འབྲས་ཆན་གྱི་གཏོར་མ། ཡོན་དངུལ་གྱི་ཁྱུ་མཆོག  ༣༽  །ལྷག་པར། སྤོས་སྤོས་དཀར། མཆོད་སྣོད་གསེར། མཆོད་ཡོན་གསེར་དང་བྱེ་རུ། ནས་དང་འབྲས་ཟན་སེར་པོའི་གཏོར་མ། ཡོན་གསེར་རོ། ༤༽  །ཕུར་བུའི་སྤོས་ཤཱི་བཱ་ས། མཆོད་སྣོད་གསེར། མཆོད་ཡོན་གསེར། ཡུངས་ཀར་དང་། ཞོ་དང་། གྲོ་དང་། འོ་མའི་གཏོར་མ། ཡོན་གོས་ཟུང་སེར་པོ། ༥༽  །པ་སངས་ཀྱི་སྤོས་གུ་གུལ་དང་། ཤྲཱི་བ་ས། མཆོད་ཡོན་སྣོད་དངུལ། འབྲས་དཀར་པོ། བུ་རམ། ཁུར་བ། མར་གྱི་གཏོར་མ། ཡོན་ནི་དངུལ་གྱི་རྟའོ། ༦༽  །སྤེན་པའི་སྤོས་གནྡྷ་རཱ་ས་དང་། བིལྦ། མཆོད་སྣོད་ས། མཆོད་ཡོན་ལྕགས། སྲན་མ་མ་ཥ། མུཏྒ། ཏིལ། འབྲས་ཆན་གྱི་གཏོར་མ། ཡོན་དངུལ་གྱི་བ་ནག་མོའོ། ༧༽  །སྒྲ་གཅན་གྱི་སྤོས་བི་ལྦའི་ས་བོན། མཆོད་སྣོད་ས། མཆོད་ཡོན་ཞ་ཉེ། སྲན་མ་ཥའི་གཏོར་མ། ཡོན་གྲིའོ། ༨༽  །མཇུག་རིང་སྤོས་བིལྦའི་ས་བོན། སྣོད་ས། མཆོད་ཡོན་རིན་པོ་ཆེ་ལྔ། ཏིལ་ནག  །འོ་མ། བུ་རམ་གྱི་གཏོར་མ། ཡོན་དངུལ་གྱི་རྭ་སྐྱེས་སོ།   ། ༈ སྒྲུབ་རིན་ཟིན་བྲིས་བཀའ་བརྒྱུད་ཕྲིན་ལས་ཤིང་རྟ་ལས་ཁམས་སྤྲུལ་རིན་པོ་ཆེས་གསན་སྐབས་གནང་༡༥༦བར། ལས་མགོན་བྱ་རོག་གདོང་བརྒྱུད་པ་གཉིས་འདྲེས་ཀྱི་ཟིན་བྲིས་ཡན་ལ་ལྡེབ་༡༥༦སྣང་། ཐམས་ཅད་ལ་བཤམ་བཀོད་རིགས་རྣམས་རྒྱས་པར་སྣང་། དམིགས་བསལ་ཡོད་མེད་ཕལ་ཆེར་ལ་དཀྱིལ་འཁོར་བསྒོམ་དོན་དང་མཐུན་པར་འབྲི་བར་བཤད། སྤྱིར་ཡོ་བྱད་བཤམ་ཚུལ་སོགས་ཤིན་ཏུ་ཞིབ་པར་ཡོད་འདུག  །སྒྲོལ་དཀར་གྱི་སྐབས། དབུ་སྐྲ་ལི་བ་ནི། འཇམ་ཞིང་རྩེ་མོ་འཁྱིལ་བའི་ཉམས་ཅན་དེའོ། །བསང་ཆུ་སྔགས་དང་ཕྱག་རྒྱས་བརླབས་པ་ལས་ལྷས་དམིགས་བསལ་བསྐྱེད་མི་དགོས། ལས་རྡོར་གྱིས་ཡིག་བརྒྱ་བརྗོད་ནས་སྒོ་དྲུང་དུ་ཁྲུས་བྱ། བུམ་བསྐྱེད་ལ། བུམ་ནང་དུ་བསྐྱེད་པ་དང་། དུང་ཆོས་སུ་བསྐྱེད་པ་གཉིས་ལས། ཏཱ་ར་སྔ་མ་བཞེད། བུ་སྟོན་རིན་པོ་ཆེས་སྐུ་ཚེའི་སྨད་དང་འབྲུག་ལུགས་དག་ཕྱི་མ་ལྟར་གནང་གསུངས།   ། ༈ ཇོ་ལུགས་སྒྲོལ་དཀར་ལ་རིགས་བདག་རིན་འབྱུང་མཛད་པ་ཚེ་རྒྱས་པའི་ཆེད་ཡིན།   ། ༈ དབྱངས་ཅན་དཀར་མོའི་བི་ལེ་པ་ནི་ཞེས་པ་བཞི་མཉམ་གྱི་ལྡེ་གུ་སྟེ། འདིའི་སྒོས་མཆོད་ཡིན། ཕྱག་རྒྱ་ཞལ་ཟས་ཀྱི་རྒྱའམ། མཆོད་པ་སྤྱི་འགྲེ་ནམ་མཁའ་མཛོད་ཀྱི་རྒྱ་གང་རིགས་བྱ།   ། ༈ ཀུ་རུ་ཀུལླེའི་ས་བོན་ཧྲཱིཾཿཞེས་ཡི་གེ་མ་དག  །ཧྲཱིཿཁོ་ནའོ།   ། ༈ རིགས་བྱེད་ཕུག་ཅེས་ལྷོ་ཕྱོགས་རྒྱ་མཚོའི་གླིང་ཤེད་ན་ཡོད་པར་གྲགས།   ། ༈ པདྨའི་ཕྲེང་བ་ནི། བལ་པོ་ནས་འབྱུང་བའི་མེ་ཏོག་པདྨ་རང་གི་འབྲུའི་རྩ་བ་དེ་ཀ་ལ་བྱེད་གསུངས།   ། ༈ ཀག་ཆོལ་ཞེས་པའི་བརྡ་དཔྱད་གསུངས།   ། ༈ མཆོད་ཡོན་ལ་རོ་རྡོ་རྗེ་མའི་རྒྱ། ཞབས་བསིལ་གཡོན་དེ་བཞིན་ལ། གཡས་པས་འཐོར་ཚུལ་ལྕགས་ཀྱུའི་རྒྱ་སྤྱི་མཚུངས། ཞགས་པ་ལ་སྥོ་ཊའི་རྒྱ་ལས་མཛུབ་མོ་སྦྲེལ་བ། ལྕགས་སྒྲོག་ལ་ཁུ་ཚུར་རྒྱབ་སྤྲོད་མཛུབ་མོ་དང་མཐེའུ་ཆུང་སྦྲེལ་བ། དྲིལ་བུ་ལ་འདྲ།   ། ༈ ཀླུ་ཤིང་ཞེས་པ་བལ་པོ་སྐྱེ་བ་དེ་ནི་མིན་འདྲ་གསུངས།   ། ༈ སྒྲུབ་ཐབས་རྒྱ་མཚོ་ལ་མ་ཚང་བའི་ལྷ་ལྔ་བཅུ་ཙམ་ཁ་སྐོང་ནས་ཏཱ་རས་གསར་འགྱུར་གནང་བ་དེའི་རྒྱུན་ཆད་གསུངས།   ། ༈ གཙོ་བོའི་ཕྱག་མཚན་མེད་པ་རྣམས་འཁོར་གྱི་ཕྱག་མཚན་སྤྲོ་གསུངས།   ། ༈ སྒོམ་ལུང་དང་བཟླས་ལུང་འབོགས་ཚུལ་ལ། སྐྱབས་སེམས་ཀྱི་རྗེས། ཁྱེད་རང་རྣམས་སྐད་ཅིག་གིས་ལྷ་འདི་ཞེས་བྱ་བའི་སྐུར་གྱུར་པ་ནི་སོགས། ལྷའི་མངོན་རྟོགས་ཀྱི་དམིགས་པ་ཕོག  །དེ་ནས་སློབ་དཔོན་དང་མདུན་བསྐྱེད་ལས་སྔགས་ཕྲེང་སྤྲོ་བ་སོགས་བཟླས་ལུང་སྤྱི་ལྟར་རོ་གསུངས།   ། ༈ ཀླུ་དབང་རྒྱལ་པོའི་སྐུ་མདོག་རིན་པོ་ཆེ་མི་དཔོག་པའི་ཁ་དོག་ཞེས་པ་དེ་ཇི་ལྟར་དང་། ཕྱག་རྒྱ་མི་འཁྲུགས་པའི་ཆོ་གར་འབྱུང་བའི་རྡོ་རྗེ་རྩེ་ལྔའི་ཕྱག་རྒྱ་ལྟ་བུ་ཞིག་འབྲི་སྲོལ་སྣང་བའང་དཔྱད་ཅེས་དང་། སྐྱབས་སྦྱིན་འདྲ་ཡིན་ནམ་བརྟག  །སྦྲུལ་གྱི་གདེངས་ཀ་ནི་ཀླུ་རྣམས་རྒྱབ་ནས་ལངས་ཏེ་བསྙེན་བཀུར་བའི་ཚུལ་ལས་ཀླུ་ལ་གདེངས་ཀ་ཡོད་པ་ལྟ་བུ་ནི་གཏན་ནས་མིན་ནོ། ། ༈ཌཱ་མ་རུ་བླ་མེད་མ་རྒྱུད་ལ་འཁྲོལ། ཕ་རྒྱུད་འཇིགས་བྱེད་མ་གཏོགས་གཞན་ལྷའི་ཕྱག་མཚན་ལ་ཌཱ་མ་རུ་དམིགས་བསལ་ཡོད་ན་མ་གཏོགས་མི་འཁྲོལ་གསུངས།  ། ༈ འཇམ་རྡོར་གྱི་ཡུམ་ཡབ་དང་མཚུངས་ཀྱང་ཐོར་ཚུགས་མེད། ཡབ་ཀྱི་ཐུགས་ཀར་རང་འདྲའི་ཡེ་སེམས་ཡུམ་བཅས་དང་། ཡུམ་གྱི་ཐུགས་ཀར་ཡུམ་ལ་ཡབ་ཀྱིས་འཁྱུད་པའི་གོ་བཟློག་གི་ཡེ་སེམས་ངེས་པར་བསྒོམས་གསུངས།   ། ༈ མི་བསྐྱོད་པ་དབྱངས་བཅུ་གཉིས་ནི་རྀ་ལྀ་བཞི་དོར་བའི་ལྷག་མ་ཡིན་འདྲ། རིན་འབྱུང་ལ་རྗེས་གནང་སྒྲུབ་བསྐུར་རེ་རེ་ནས་ངེས་པར་མཛད་གསུངས།   ། ༈ ཇོ་ལུགས་ལ་དབང་གསུམ་པར་ཕལ་ཆེར་རིག་ཙཀ་གཏད།   ། ༈ དུས་འཁོར་གྱི་རྡོ་རྗེའི་རྒྱན་ནི། རྒྱུ་ཕ་ལམ། དབྱིབས་རྩེ་གསུམ་རྩེ་ལྔ་གང་རུང་། ཁ་དོག་གསེར་ལྟ་བུའོ། །ཕྱག་སོར་གྱི་ཚིགས་ཕྲེང་དང་པོ་ནག་པོ་སོགས་ཀྱི་དང་པོ་ཕྱག་མཐིལ་གྱི་ཕྱོགས་ནས་རིམ་བཞིན་བརྩི། མཐེ་བོང་ལ་ཚིགས་མངོན་པ་གཉིས་ལས་མེད་ཀྱང་། ལག་པའི་མཁྲིག་མ་དང་ཉེ་བའི་ཕྱོགས་དེར་མི་མངོན་པ་གཅིག་ཡོད་པས་དེ་ནས་བརྩི་བར་བཞེད། དེ་ཡང་ལུགས་གཞན་ལས་མཐེ་བོང་སོགས་ཀྱི་རང་མདོག་རྒྱབ་ངོས་དང་། ཚིགས་ཀྱི་རང་མདོག་མདུན་ངོས་སུ་ཡོད་པར་འདོད། ཇོ་ལུགས་ཚིགས་ཀྱི་མདོག་སོར་གདུབ་བཀོན་པ་ལྟར་མཚམས་སོ་སོར་ཁྱུར་ཙམ་རེ་ཡོད་པར་བཞེད། འདིའི་ཛཿལ་མཛུབ་མོ་ལྕགས་ཀྱུ་ལྟར་དགུག་པའི་རྡོ་རྗེ་ཁུ་ཚུར། ཧཱུྃ་ལ་རྡོ་རྗེ་རྩེ་ལྔའི་རྒྱ། བཾ་ལ་གཡོན་སྟེང་དང་། ཧོཿ ལ་གཡས་སྟེང་དུ་བྱས་པའི་ཁུ་ཚུར་རྒྱབ་སྤྲོད་དང་། སྟེང་འོག  །ཧི་ལ་གཡོན་ཁུ་ཚུར་གྱེན་བལྟས་སུ་བཟེད། གཡས་ཁུ་ཚུར་གྱེན་དུ་བསྒྲེང་བ་ཡིན་སྙམ། ཞིབ་པར་དུས་འཁོར་ཕྱག་རྒྱའི་འགྲེལ་པར་བལྟ་གསུངས།   ། ༈ རྡོ་རྗེ་ཤུགས་ཀྱི་དབང་གཏོར་དཔལ་གཏོར་དམར་པོ་ཟུར་དྲུག་ལ་དབལ་ཅན། མཆོད་གཏོར་དམར་པོ་པད་འདབ་བཞིས་མཚན་པ་རྒྱན་ལྡན་ཆེ་བ། སྲུང་མ་དྲུག་ཅུ་ལ་གཡས་སུ་གསུམ། གཡོན་དུ་གསུམ་སྟེ་དྲུག་གཙོ་བོ་ལས་ཆུང་བ། ཐམས་ཅད་ཟླུམ་གཏོར་དམར་པོ། མཆོད་པ་བཅུ་གཉིས་སྦྲེང་ཚར་རམ། ཤར་དུ་དྲི། མེ་ཏོག  །ལྷོར་སྤོས། མེ། ནུབ་ཏུ་ན་བཟའ། མེ་ལོང་། བྱང་དུ་ཞལ་ཟས། ཤིང་ཏོག  །ཤར་གྱི་ཤར་དུ་ཏིང་ཤག་རྡོར་དྲིལ། ནུབ་ཀྱི་ནུབ་ཏུ་ཆོས་འབྱུང་། པི་ཝཾ། འདིའི་ཞལ་བཞི་ལས། རྒྱབ་ཞལ་ལ་མགྲིན་པ་མེད་པས་མགྲིན་པ་གསུམ་པ། ཕྱག་དཔུང་པ་དང་ཕྱག་ངར་རྣམས་མདུན་ནས་རྒྱབ་ངོས་སུ་ཐད་བསྒྲིགས། འདིའི་ཡི་དྭགས་ཀྱི་གདན་ནི་གཤིན་རྗེའི་གདན། རལ་པའི་ཐོར་ཚུགས་དང་ཐོར་ཅོག་དོན་གཅིག་སྟེ་དབུ་སྐྲ་གྱེན་དུ་མཐོ་ཚད་བསྡམ་པ། དོ་ཀེར་དང་ཟུར་ཕུད་དོན་གཅིག་སྟེ་སྔ་མ་ལས་ཐུང་བར་ཕྱེད་དང་སུམ་ཆའི་ཚད་ཙམ་བསྡམས་པས་དེ་ཡིན་སྙམ། ལྷ་མོའི་རིགས་ལ་དཀའ་ཐུབ་མཛད་པའི་བཀོད་པ་མ་གཏོགས་གཞན་ལ་ཐོར་ཚུགས་ཡོད་པའི་སྲོལ་མེད། བླ་མེད་སྤྱི་ལ་མཆོད་པའི་རིག་མ་བཅུ་དྲུག་དང་། དུས་འཁོར་ལ་བཅུ་གཉིས་རང་བཤད། ཡུལ་བདག་དང་གྲོང་བདག་གཏོར་མ་འབུལ་ན་ཟུར་དུ་ཟླུམ་གཏོར་གཉིས་བཤམ། ལག་གཡས་ཁུ་ཚུར་ཁ་གྱེན་བསྟན་དང་། གཡོན་ཐུར་བསྟན་རྒྱབ་བསྣོལ་བའི་སྟེང་གི་མཛུབ་མོས་འོག་མའི་མཛུབ་མོ་འཐེན་པའི་ཕྱག་རྒྱས་ཡུལ་བདག་དང་། སོར་བཅུ་ཀ་ཆ་སྙོམས་པ་ལྕགས་ཀྱུ་ལྟར་བཀུག་པ་གཡས་གཡོན་ལ་ཁ་སྤྲོད་མ་རེག་ཙམ་བྱས་པ་གྱེན་མཐུར་གྲུ་ཁུང་བྱེད་པས་གྲོང་བདག་བཀུག  །སོ་སོའི་མིང་མཐར་ཨི་དཾ་བ་ལིཾ་སོགས་བཏགས་པས་བསྔོ།  ། ༈ སྤྱི་བོ་དང་། དཔྲལ་བ་ཞེས་པ་སོ་སོ་ཡིན་པས་ཚིག་རིས་མཐུན་པར་ཡིག་འབྲུའང་དེར་བསྒོམ་གསུངས།   ། ༈ སམྦུ་ཊིའི་འཇིགས་བྱེད་ཀྱི་དམ་རྫས་ཞེས་པ་ཆང་ཁོ་ན། རྡོ་རྗེ་སྲིན་པོ་སོགས་གསུམ་གྱི་གཏོར་མ་ཟུར་གསུམ་ལོགས་རེ་རེ་མཐེབ་ཀྱུས་བརྒྱན་པ།   ། ༈ རིན་འབྱུང་ཡོངས་རྫོགས་ཀྱི་མཆོད་སྔགས། ཆུ་གཉིས་ཀྱི་སྔགས་མཐར་སྭཱ་ཧཱ། པུཥྤེ་མན་ལ་ཨཱཿཧཱུྃ་སྦྱར་སྲོལ་ཡོད། རྣལ་འབྱོར་མའི་རིག་མ་བཅུ་དྲུག་གི་སྔགས་ལས་དྷརྨ་དྷཱ་ཏུ་ཆད་པ་དང་། བདུད་རྩི་ལྔའི་ས་བོན་ལ་ར་གཅིག་ལྷག་པར་ཡོད་པ་སོགས་མ་དག་པ་མང་།   ། ༈ གཡོན་པའི་མཐེབ་སྲིན་གྱིས་སྔགས་འབྲི་བར་གསུངས་པ་རྣམས་གཡས་པའི་མཐེབ་མཛུབ་ཀྱིས་སྨྱུ་གུ་བཟུང་ནས་གཡོན་པའི་མཐེབ་སྲིན་གྱིས་ཀྱང་དེའི་རྩ་བ་ནས་འཛིན་པའི་ཚུལ་གྱིས་བྲི་བར་གསུངས།   ། ༈ སྤྱན་རས་གཟིགས་ཡི་གེ་དྲུག་པའི་བསྟོད་པར། ཆུ་བདག་གི་ཞབས་བསྟེན་ཅེས་པ་ཡིན། རྗེས་གནང་ཆིངས་སྒྲུབ་ཐབས་རྒྱ་རྒྱམ་འདྲེས་པའི་ཕྱོགས་ཡིན།  ། ༈ བཅུ་གཅིག་ཞལ་དམར་མོ་ལུགས་སོགས་ལ་བདག་བསྐྱེད་ཀྱི་ཡེ་ཤེས་པ་མཐར་གཤེགས་སུ་གསོལ་བ་ཡང་ཕྱག་ལེན་རྙིང་པའི་སྤྱི་འགྲེ་ལས། རང་བཞེད་དངོས་རི་ཁྲོད་མའི་སྐབས། ཡེ་ཤེས་པ་གཤེགས་པ་ངེས་པར་མི་དགོས། གསུངས་པ་དེའོ།   ། ༈ དོན་ཞགས་བ་རི་ལུགས་ལ་ཕྱུགས་བདག་གི་ཆ་ལུགས་ནི། དཀའ་ཐུབ་ཀྱི་ཆ་ལུགས་རྒྱན་སྤངས་པ། གཏོར་འབུལ་ཀྱི་སྔགས་ལས། ཁྲོ་གཉེར་ཅན་མའི་མཚན་སྔགས་ཆད་ཡོད་པས། གྷྲྀ་ཀུ་ཊི་ས་པ་རི་ཝཱ་ར་ངེས་པར་དགོས།   ། ༈ དབྱུ་གུ་རྩེ་གསུམ་ནི་དབྱུག་པ་མགོ་གསུམ་པ།   ། ༈ ཁ་སཪྤཱ་ཎི་ལྷ་ལྔའི་ནོར་བཟང་བྱིས་པའི་ཆ་ལུགས་དང་རྒྱན་ནི། སྐྲ་ཟུར་ཕུད་ཆུང་ངུ་ཕན་ཚུན་དུ་ཁ་ཤས་བསྡམས་པ་ལ་རིན་པོ་ཆེ་དྲྭ་བ་དྲྭ་ཕྱེད་ལྟ་བུས་སྤྲས་པ། འདིའི་ས་བོན་གྱི་སྔགས་ལ་ཧྲཱིཿཆད་སྣང་།   ། ༈ བཅུ་གཅིག་ཞལ་འཇིགས་པ་བརྒྱད་སྐྱོབས་ལ་བསྒོམ་ལུང་གིས་ཆོག་པར་གསུངས་ཀྱང་བསྒོམ་ལུང་མཛད་པ་ཕྱག་ལེན་ལ་ཡོད།   ། ༈ སྤྱན་རས་གཟིགས་རྡོ་རྗེ་སྙིང་པོར་ཐུན་གྱི་སྡིག་བཤགས་གང་འགྲུབ་བྱེད་གསུངས་པ་ལྟ་བུ་འདི་རིགས་ཐམས་ཅད་བསྙེན་པ་ཁོ་ནའི་སྐབས་ལ་དགོངས་པས་དབང་སྒྲུབ་དུས་མ་བྱས་ཀྱང་རུང་གསུངས།   ། ༈ སེང་གེ་སྒྲའི་རིགས་ལྔ་དཔྱི་གཉིས་སུ་བསྒོམ་རྒྱུ་སྐུའི་རྒྱབ་ངོས་ནས་ཞལ་ནང་བསྟན་དུ་བཞུགས་པ་ཡིན་གསུངས་སྣང་། རྗེས་གནང་ལ། བགེགས་གཏོར་བཀྲུ་བྱབས་སྲུང་གསུམ་བྱེད་ཅེས་པར། བགེགས་སྦྱོང་གསུམ་དང་། སྡིག་སྦྱོང་ཏིལ་སྦྱོང་བཅས་བྱེད་སྲོལ་ཡོད་ལ། སྤྱིར་ཏིལ་སྦྱོང་སྔགས། རྡོ་རྗེ་མཁའ་འགྲོ་མ་བསྐྱེད་ན། བཛྲ་ཌཱ་ཀི་སོགས་དང་། མ་བསྐྱེད་ན་སརྦ་པཱ་པྃ་བྱེད་པ་ཤས་ཆེ་བས་འདིར་ཡང་ཕྱི་མ་ལྟར་རོ།   ། ༈ བདེ་གཤེགས་བཞི་བསྒྲིལ་ལ། བསྒོམ་ལུང་བུམ་དབང་གི་གོང་དུ་བྱེད་པ་ཕྱག་ལེན་ཡིན། བཟླས་ལུང་ནི་དབང་བཞི་རྫོགས་པའི་མཐའ་དམ་ཚིག་ཁས་བླངས་ཀྱི་གོང་དུ་བྱེད།   ། ༈ སྒྲོལ་མ་ཉིན་ཞི་མཚན་ཁྲོའི་ཁྲོ་མོའི་སྐུ་ནི་རྣམ་འགྱུར་མ་ངེས་སྣ་ཚོགས་སུ་སྟོན་ཅིང་། ཕྱག་གཡོན་པའང་ས་ལ་བསྣུན་པ་དང་། ཐུགས་ཀར་སྡིགས་མཛུབ་མཛད་པ་སོགས་མ་ངེས་པར་བསྒོམས་ཀྱང་། བྲིས་སྐུའི་ཚེ་ཐུགས་ཀར་སྡིགས་མཛུབ་མཛད་པ་ཁོ་ནའོ།   ། ༈ སྒྲོལ་མ་དམར་མོ་ལྟ་བུ་ལྷ་བསྐྱེད་ལུགས་མི་འདྲ་བ་གཉིས་རེ་ཡོད་པ་འདི་རིགས་ལ་རྩ་བ་བདག་བསྐྱེད་དང་། གཅིག་ཤོས་མདུན་བསྐྱེད་ལ་སྦྱར་རོ།   ། ༈ སྒྲོལ་མ་ནོར་སྦྱིན་མར། གནས་བཅུ་ཡི་གེ་བཀོད་པ་ནི། སྤྱི་བོར་ཨོཾ། དཔྲལ་བར་ཏཱ། སྤྱན་གཉིས་ལ་རེ། མགྲིན་པར་ཏུད། དཔུང་པར་ཏཱ། སྙིང་གར་རེ། ལྟེ་བར་ཏུ། གསང་བར་རེ། པུས་མོ་གཉིས་ལ་སྭཱ། ཞབས་གཉིས་ལ་ཧཱ།   ། ༈ སྒྲོལ་མ་ལྷ་ལྔ་རྩ་བ་བདག་བསྐྱེད་དང་། ཙཱནྡྲ་གོ་མིའི་ལུགས་མདུན་བསྐྱེད་ལ་བསྒོམ་པར་གསུངས། ཕྱི་མའི་ནོར་བུ་འཛིན་མ་དང་སོ་སོར་འབྲང་མ་གཅིག་གམ་སེམས།   ། ༈ ཀཱ་པ་ལ་ཏཱ་ར་ལྟ་བུ་སྔགས་བརྒྱ་རྩ་རྗེས་ཟློས་ལས་བཟླས་ལུང་གིས་དམིགས་བསལ་མ་བཤད་པ་རྣམས་ལའང་བཟླས་ལུང་གི་དམིགས་པ་ངེས་པར་འབོག་ཅེས་སྣང་། འདི་གཞིར་བཞག་ལ་ཞལ་བསྒྱུར་ཏཱ་ར་ལའང་ཟུར་དུ་བྱེད་པས་མཚོན་ཞར་བྱུང་དུ་བཤད་པ་རྣམས་ལའང་སོ་སོར་མཛད།   ། ༈ ཕྱག་རྡོར་ཨུ་ཙཪྻའི་རྟེན་གཏོར་ནག་པོ་གྲུ་གསུམ་པད་འདབས་བརྒྱད་པ། དེ་མདུན་མཆོད་གཏོར་དབུས་སུ་ཀ་པཱ་ལར་གཏོར་མ་འདབ་བརྒྱད་ཅན་དམར་པོ། གཡས་སུ་རིན་པོ་ཆེའི་སྣོད་དུ་དཀར་གཏོར་པད་འདབ་བཞི་པ་རྒྱན་སུམ་རིམ་ཅན། གཡོན་དུ་རྫའི་སྣོད་དུ་བགེགས་གཏོར་ལྟ་བུ་ཤོ་ལུ་ཞེས་གྲགས་པ་དེ་ལ་མཐེབ་ཀྱུས་བསྐོར་བ་ཆང་བུ་དང་བཅས་པ།   ། ༈ ཕྱག་རྡོར་འབྱུང་འདུལ་རིང་བརྒྱུད་དང་། ཉེ་བརྒྱུད་སོ་སོར་བྱ། འདི་དག་ལ་གཏོར་དབང་ཡང་ངེས་པར་བྱེད། པད་འདབས་ཀྱི་དབུས་སུ་ཚོམ་བུ་འགོད་པའི་དམིགས་བསལ་མེད་པ་རྣམས་ཀྱང་ལྷའི་སྐུ་མདོག་དང་མཐུན་པའི་ཚོམ་བུ་རེ་འགོད་རྒྱུ་མཛད་སྣང་།   ། ༈ རྟ་མགྲིན་ལྷན་སྐྱེས་ལ་གཏོར་མ་དམར་པོ་པད་འདབ་བརྒྱད་པ།   ། ༈ ཤཱན་བཞི་སྐོར་གྱི་དཀྱིལ་འཁོར་ལྷན་སྐྱེས་དང་འདྲ་བ་ལ། དབུས་སུ་ཉི་གདན་ལ་ཚོམ་བུ་དམར་པོ། ཕྱོགས་ཀྱི་འདབ་བཞིར་ཤཱན་བཞིའི་མདོག་མཐུན་ཚོམ་བུ་རེ་བཀོད་གསུངས།   ། ༈ ཤཱཀྱ་ཤྲཱིའི་ལུགས་ཀྱི་རྟ་མགྲིན་མཎྜལ་གྲུ་བཞི་ཉིས་བརྩེགས་ཁར་པདྨ་དམར་པོ་འདབ་བརྒྱད་ལ་ཉི་གདན་གྱི་དབུས་སུ་ཚོམ་བུ་དམར་པོ་བཀོད་གསུངས་པ་སོགས་དམིགས་བསལ་མེད་པ་རྣམས་ལ་མངོན་རྟོགས་དང་བསྟུན་པ་ཁོ་ན་མཛད་འདུག  ། ༈ བཀའ་གདམས་ཁྱུང་སེར་དང་། ཤྲ་བ་ཎ་ལྟ་བུ་ལུང་ཙམ་གྱིས་ཆོག་གསུངས་པ་ཐམས་ཅད་ལའང་བསྒོམ་ལུང་གི་དམིགས་པ་ཡོད་སྲོལ་སྣང་། ། ༈ མགོན་པོ་ཕྱག་དྲུག་པའི་གཏོར་མ་ཐོད་པར་རྟེན་གཏོར་ནོར་དབྱིབས་རྫབ་ཅན་ཅུང་ལེབ་པའི་ངོས་སུ་ནོར་བུ་མིག་གསུམ་འབུར་དོད་ཅན་དམར་པོ། མཐར་འཁོར་གྱི་གཏོར་མ་སུམ་ཆ་ཙམ་སླེབས་དང་མཐེབ་ཀྱུས་བསྐོར། མཆོད་གཏོར་རྒྱས་པ་བྲ་གཟུགས་མ་འཁོར་ལྔ་དང་མཐེབ་ཀྱུ་མང་པོས་བསྐོར་བ།   ། ༈ གཤེད་དམར་གྱི་རྒྱུད་ལེའུ་ཉེར་གཉིས་པ་གསར་འགྱུར་ལས། སྐྱུ་རུ་ར་དང་། ཨ་རུ་ར་དང་། དཱུཪྺའི་རྒྱལ་པོ་དང་། པི་པི་ལིང་དང་། ན་ལེ་ཤམ་དང་། ལྕགས་ཀྱི་ཕྱེ་མ་རྣམས་སྦྲང་རྩི་དང་། ཤ་ཁ་ར་དག་གིས་ཨུ་དུམ་ཝ་རའི་ཚད་ཀྱི་རིལ་བུར་བྱའོ། །དེ་ནས་རིལ་བུ་བཟའ་བར་བྱ་སྟེ། ཟླ་བས་ཚེ་ལོ་སུམ་བརྒྱར་འགྱུར་རོ། །དང་། ལ་ཕུག་གི་ས་བོན་དང་། པྲི་ཡངྐུ་དང་། ཙནྡན་དམར་པོ་དང་། རུ་རྟ་བཏགས་ནས་དྲིལ་ཕྱིས་བྱས་པས་སྤྲེའུ་ལ་སོགས་པ་འཇོམས་སོ། །དང་། སྐྱུ་རུ་དང་། པི་པི་ལིང་དང་། ཙི་ཏྲ་ཀ་དང་། སྐམ་གཤེར་དང་། བུ་རམ་རྙིང་པ་དང་། མར་དང་སྦྲང་རྩི་མཉམ་པར་བཟའ་བར་བྱ་སྟེ། དུས་མ་ཡིན་པའི་ལུད་པ་དང་དབུགས་མི་བདེ་བ་འཇོམས་སོ། །དང་། རྩཱ་དཱུཪྺ་ལ་ཡུང་བས་བཏགས་ནས་བྱུགས་པས་རྡོ་འཇོམས་སོ། །དང་། བིལྦ་བསྲེགས་པ་བུ་རམ་གྱིས་བཟའ་བར་བྱ་སྟེ། ཁྲག་འབྱམས་པ་འཇོམས་སོ། །དང་། དགའ་མ་གཤིན་རྗེ་གཤེད་དམར་པོའི། །རྒྱུད་དུ་གངྒའི་ཀླུང་གི་ནི། །བྱེ་སྙེད་དངོས་གྲུབ་ཆེས་མང་ངོ་། །ལྷ་མོ་གུས་དང་བཅས་པས་ཉོན། །ལྷ་མོ་དག་ནི་མྱ་ངན་འདའ། །དབང་པོ་སོགས་ཀྱིས་མི་མཐོང་ངོ་། །བི་རཱུ་པཀྵ་རྣལ་འབྱོར་དབང་། །བྲམ་ཟེའི་རིགས་སུ་འབྱུང་བར་འགྱུར། །བརྩོན་འགྲུས་ཆེན་པོ་སྟོབས་ཆེན་ལྡན། །བདག་གི་ཆོས་ནི་སྟོན་པ་པོ། །འགའ་ཞིག་གིས་ནི་སྦས་པའི་རྒྱུད། །འདིས་ནི་ཐོས་ནས་ལེགས་སྦེད་ཅན། །གསང་སྔགས་འབུམ་ཕྲག་གཅིག་བཟླས་ནས། །བདག་ནི་སྒྲུབ་པར་བྱེད་པར་འགྱུར། །འཛམ་བུའི་གླིང་ན་སྣ་ཚོགས་པའི། །དངོས་གྲུབ་རབ་ཏུ་སྟེར་བར་བྱེད་པར་འགྱུར། །ཀྲྀ་ཤཱུ་བཱི་ཛཾ་མཱ་ས་ཀཾ  །འདི་དག་བདུན་གྱི་རྣལ་འབྱོར་པས། །སྟེར་བར་དམིགས་པ་བྱེད་པར་འགྱུར། དང་། དང་པོར་གསོ་སྦྱོང་སྦྱིན་པར་བྱ། །ཕྱི་ནས་བསླབ་ པའི་གནས་ལྔ་སྦྱིན། །བྱེ་བྲག་སྨྲ་བ་འབད་པས་བསླབ། །མདོ་སྡེ་པ་ཡང་དེ་བཞིན་ནོ། །དགེ་བ་བཅུ་ལ་གོམས་གྱུར་ནས། །བླ་མ་ལ་གུས་འདུལ་ལ་མོས། །དབུ་མའང་སློབ་ཏུ་བཅུག་ནས་ནི། །སྔགས་འདི་ཀུན་ཏུ་བརྩམ་པར་བྱ།   ། ༈ གསར་འགྱུར་ནག་པོ་ཆེན་པོ་དངོས་གྲུབ་ཀུན་ལས་བཏུས་པའི་རྒྱུད་ལས། འཇིག་རྟེན་གསུམ་པོ་སྒྲུབ་བྱེད་ཅིང་། །འདོད་པ་ཀུན་སྦྱིན་ནག་པོ་ཆེ། །གང་གིས་རྣམ་པར་ཤེས་ཙམ་གྱིས། །ལུས་ཅན་ཀུན་གྱིས་དབང་ཕྱུག་ཐོབ། །སོགས་དངོས་གྲུབ་མཐའ་ཡས་པར་སྒྲུབ་པའི་བསྔགས་པ་རྒྱ་ཆེར་གསུངས་སོ། །དེའི་ལྷ་བཞེངས་པའི་སྐབས་ལས། ཕྱག་གཉིས་པ་དང་། བཞི་པ། དྲུག་པ། བརྒྱད་པ། བཅུ་གཉིས་པ། བཅུ་དྲུག་པ། བཅུ་པ། བཅུ་བཞི་པ་སོགས་དང་། དབང་གི་མགོན་པོ་དང་། ངག་གིས་དབང་ཕྱུག་ལ་སོགས་པ་བཤད་ཅིང་། ཕྱག་བཞི་པའི་སྐབས། ཕྱག་བཞི་པ་བསྐྱེད་པར་བཤད་པར་བྱ་སྟེ། ཕྱག་རྒྱ་བཞི་རྣམ་པར་དག་པ་ལྷ་མོ་བཞི་དང་བཅས་པའོ། །སོགས་ཕྱག་དང་པོ་གཉིས་གྲི་ཐོད། ལྷག་མ་གཉིས་ཡུམ་ལ་འཁྱུད་པར་གསུངས།   ། ༈ སློབ་དཔོན་སྤྱོད་པའི་བརྟུལ་ཞུགས་ཀྱིས་གདན་བཞིའི་དཀྱིལ་ཆོག་སྙིང་པོ་མདོར་བསགས་ལས། སངས་རྒྱས་ཞིང་སོགས་ཞིང་རྣམས་ལ། །ཁྱད་པར་དུ་ནི་སྦྱིན་ལ་སྤེལ། །དམངས་རིགས་སྟོང་ཕྲག་གཉིས་དག་ནི། །བྲམ་ཟེ་གཙང་མ་གཅིག་དང་འདྲ། །བྲམ་ཟེ་སྟོང་ཕྲག་གཉིས་དག་ནི། །དགེ་སློང་གཅིག་ལ་རབ་ཏུ་སྦྱར། །དགེ་སློང་སྟོང་ཕྲག་གཉིས་དག་ནི། །རྡུལ་མེད་པ་ནི་གཅིག་དང་མཉམ། །རྡུལ་མེད་སྟོང་ཕྲག་བརྒྱད་དག་ནི། །ཡེ་ཤེས་ལྡན་པ་གཅིག་དང་སྦྱར། །ཡེ་ཤེས་ལྡན་པ་སྟོང་ཕྲག་གཉིས། །སློབ་དཔོན་གཅིག་དང་མཉམ་པར་བརྟག  །དེ་ལྟར་སྦྱིན་པའི་ཞིང་བྱས་ནས། །བློ་དང་ལྡན་པས་རྟག་ཏུ་སྦྱིན། །རྣལ་འབྱོར་རྩ་བའི་ཆོས་ལ་ནི། །ཞིང་བཟང་པོ་ལ་ས་བོན་གདབ།  །ཅེས་སོ། ༼ན༽  །གསང་བ་རིང་བསྲེལ་གྱི་སྙིང་པོ། ཨོཾ་སརྦ་ཏ་ཐཱ་ག་ཏ་ཨུཥྞཱི་ཥ་དྷཱ་ཏུ་མུ་དྲཱ་ཎི་སརྦ་ཏ་ཐཱ་ག་ཏ་དྷརྨ་དྷ་ཏུ་བི་བྷཱུ་ཥི་ཏ་ཨ་དྷིཥྛི་ཏེ་ཧུ་རུ་ཧུ་རུ་ཧཱུྃ་ཧཱུྃ་སྭཱ་ཧཱ། བྱང་ཆུབ་རྒྱན་འབུམ་གྱི་སྙིང་པོ། ཨོཾ་སརྦ་ཏ་ཐཱ་ག་ཏ་བྱཱ་ལོ་ཀི་ཏེ་ཛ་ཡ་ཛ་ཡ་སྭཱ་ཧཱ།   ། ༈ ཙནྡན་གྱི་ཡན་ལག་ཅེས་བྱ་བའི་གཟུངས་ལས། འདི་ལྟར་ས་ཆེན་པོ་འདི་ནི་མ་ལུས་པ་གྲུམ་པར་འགྱུར་ཡང་སྲིད། རྒྱ་མཚོ་ཆེན་པོ་ནི་བསྐམ་ཀྱང་སྲིད། དེ་བཞིན་དུ་རིའི་རྒྱལ་པོ་རི་རབ་ནི་འཇིག་པར་འགྱུར་ཡང་སྲིད། རླུང་ནི་ཞགས་པས་བཅིང་དུ་རུང་ཡང་སྲིད། ཟླ་བ་དང་ཉི་མ་ནི་ས་ཡི་སྟེང་དུ་ལྷུང་ཡང་སྲིད། ནམ་མཁའ་ནི་ལག་པ་གཉིས་ཀྱིས་མནན་དུ་རུང་ཡང་སྲིད། མེ་ནི་ཆུར་འགྱུར་ཡང་སྲིད། འབྱུང་བ་ཆེན་པོ་བཞི་ནི་གཞན་དུ་འགྱུར་ཡང་སྲིད། སེམས་ཅན་ཐམས་ཅད་ཀྱི་སེམས་ནི་གཅིག་ཏུ་འགྱུར་ཡང་སྲིད་ཀྱི། དེ་བཞིན་གཤེགས་པས་གསུངས་ཤིང་བྱིན་གྱིས་བརླབས་པ་ནི་གཞན་དུ་འགྱུར་མི་སྲིད་དེ། སུས་བསྐྱོད་པའམ། བསྒུལ་བར་མི་ནུས་སོ། །འདི་ནི་བདུད་སྡིག་ཅན་གྱིས་གླགས་རྙེད་པར་མི་འགྱུར་རོ། །ཞེས་སོ།   ། ༈ སྒོ་མཐའ་ཡས་པས་སྒྲུབ་པའི་གཟུངས་ལས། །རྒྱལ་བས་བསྔགས་པའི་དགོན་པར་གནས་པར་གྱིས། །དེ་ལ་གནས་པ་གཞན་ལ་བརྙས་པ་མེད། །ཟབ་མོའི་བསོད་པ་འདུན་པ་བསྐྱེད་ནས་སུ། །བག་ཡོད་མགོ་ལ་འབར་བཞིན་གནས་པར་གྱིས། །ཞེས་དང་། ཀྱེ་མ་སངས་རྒྱས་བསྟན་པ་ལེགས་པར་རྙེད། །སྡུག་བསྔལ་མང་པོའི་རྩ་བ་ཁྱིམ་ཡང་སྤོངས། །ལུས་དང་ངག་དང་ཡིད་ཀྱང་ཡོངས་དག་པས། །སངས་རྒྱས་དང་ནི་ཆོས་ལ་གུས་པར་གྱིས། །དང་། མདོ་སྡེ་ཐོས་ནས་རྗེས་སུ་ཡི་རང་དང་། །ཡི་གེར་བྲིས་དང་གཟུངས་དང་བཀླག་པ་ཡིས། །བསོད་ནམས་ཆུ་བོ་ཇི་ཙམ་བསྐྱེད་པ་ནི། །སེམས་ཅན་ཀུན་གྱིས་ཤེས་པར་ཡོང་མི་ནུས། །དེ་ནི་ཚེ་རབས་ཀུན་ཏུ་རྒྱལ་བ་མཐོང་། །དེ་དག་ལས་ཀྱང་དད་པ་བསམ་ཡས་རྙེད། །མདོ་སྡེ་ཟབ་མོའི་ཚུལ་ཡང་ཤེས་པར་འགྱུར། །དེས་ནི་མྱུར་དུ་བྱང་ཆུབ་མངོན་འཚང་རྒྱ། །ཞེས་སོ།   ། ༈ ན་མཿསརྦ་ཏ་ཐཱ་ག་ཏ་ཧྲྀ་ད་ཡ་ཨ་ནུ་ག་ཏེ་ཨོཾ་ཀུ་རུཾ་གི་ནི་སྭཱ་ཧཱ། འདི་ལན་གཅིག་བཟླས་པས་ཀྱང་བསྐལ་པ་འབུམ་ཕྲག་བརྒྱ་སྟོང་དུ་བསགས་པའི་ལས་ཀྱི་སྒྲིབ་པ་ཡང་ཟད་པར་འགྱུར་རོ། །དེ་བཞིན་གཤེགས་པ་སྤྱིའི་སྙིང་པོ་རྗེས་སུ་དྲན་པ་རྫོགས་སོ།   ། ༈ མཆོད་པའི་སྤྲིན་གྱི་གཟུངས་ལ། མཧཱ་བྷོ་དྷི་ཙིཏྟ་བཛྲ་ལས་བར་དུ་བིདྱཱ་མི་སྣང་།   ། ༈ དཀོན་མཆོག་གསུམ་ལ་ཕྱག་མཚལ་ལོ། །ཨོཾ་སྨ་ར་སྨ་ར་བི་སྨ་ན་སྐ་ར་མ་ཛ་བ་ཧཱུྃ། ཞེས་བརྗོད་ཅིང་རིན་ཆེན་བརྡར་བས་རིན་པོ་ཆེའི་གདུགས་དང་རྒྱལ་མཚན་ལ་སོགས་པའི་ཆར་དཔག་ཏུ་མེད་པ་ནམ་མཁའི་ཁམས་གང་བར་བསམས་ལ་འབུལ་ལོ། །རིན་ཆེན་བརྡར་བའི་གཟུངས་རྫོགས་སོ།   ། ༈ འཕགས་པ་འཇམ་དཔལ་གྱི་རྩ་བའི་རྟོགས་པ་ཆེན་པོ་ལས། གང་དུ་དྲན་པ་ཙམ་གྱིས་མཚམས་མེད་པ་ལྔ་ཡང་ཡོངས་སུ་སྦྱོང་བར་བྱེད་ན་བཟླས་པས་ལྟ་སྨོས་ཀྱང་ཅི་དགོས། དེ་ཡང་གང་ཞེ་ན། ཨོཾ་ཨཱ་བཱི་ར་ཧཱུྃ་ཁེ་ཙ་ར། གྲོགས་པོ་དག་འདི་ནི་ཡི་གེ་བརྒྱད་པ་དཔའ་བོ་ཆེན་པོ་ཞེས་བྱ་བ་གསང་བའི་སྙིང་པོའི་བདག་ཉིད་ཡིན་ཏེ། སངས་རྒྱས་ཉིད་མཉེས ་བཞིན་དུ་རབ་ཏུ་ལྟེ་བར་གནས་པ་ཡིན་ནོ། །ཞེས་དང་། ན་མཿས་མནྟ་བུདྡྷཱ་ནཱཾ། ཨ་ཙིནྟཱ་དྦྷཱཏ་རཱུ་པཱི་ཎཱཾ། ཨོཾ་ཏཱ་རེ་སྭཱ་ཧཱ། རིག་པ་ཕུག་རོན་ཞེས་བྱ་བ། །ལས་རྣམས་ཀུན་ལ་རབ་ཏུ་བསྔགས། །ཞེས་སོ། །ཕྱོགས་བཞིར་ཐེག་པ་ཆེན་པོའི་མདོ་སྡེ་བཀླག་པར་བྱ་བ་ལ་འདི་ལྟ་སྟེ། བཅོམ་ལྡན་འདས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་ལྷོ་ཕྱོགས་སུ་བཀླག་པར་བྱའོ། །འཕགས་པ་ཟླ་བ་སྒྲོན་མའི་ཏིང་ངེ་འཛིན་ནུབ་ཕྱོགས་སུ་བཀླག་པར་བྱའོ། །འཕགས་པ་སྡོང་པོས་བརྒྱན་པ་བྱང་ཕྱོགས་སུ་བཀླག་པར་བྱའོ། །འཕགས་པ་གསེར་འོད་དམ་པའི་མདོ་སྡེ་ཤར་ཕྱོགས་སུ་བཀླག་པར་བྱའོ། །ཞེས་དང་། དཀྱིལ་འཁོར་བྲི་བའི་ཚེ། བཅོམ་ལྡན་འདས། རིགས་གསུམ། བྱང་ཆུབ་སེམས་དཔའ་རྣམས་ཀྱི་གཙོ་བོ། ཀུན་ཏུ་བཟང་པོ་རྣམས་དངོས་སུ་བྲི་ཞིང་། ལྷག་མ་རྣམས་ནི་ཇི་ལྟར་རྣམ་པར་བཞག་པ་བཞིན་ཕྱག་རྒྱ་བྲི་བར་བྱའོ་གསུངས། བདག་ཉིད་ཆེན་པོས་གང་གསུངས་པའི། །རི་མོ་འདི་ནི་མདུན་བཞག་ན། །སྔགས་རྣམས་མ་ལུས་འགྲུབ་པར་འགྱུར། །ཞེས་དང་། རས་བྲིས་མཐོང་བའི་སྐྱེ་བོ་ཡི། །བསོད་ནམས་ཐོབ་པ་དོན་ཡོད་པ། །བསྐལ་པ་བྱེ་བ་རྣམས་སུ་ཡང་། །བརྗོད་པར་ཡང་ནི་མི་ནུས་སོ། །ཞེས་དང་། བསྐལ་པ་བྱེ་བར་མི་ཟད་ལས། །རས་རིས་མཐོང་བ་ཙམ་གྱིས་གྲོལ། །རས་རིས་མཐོང་བ་ཙམ་གྱིས་ནི། །སྐད་ཅིག་དེ་ལ་གྲོལ་བར་འགྱུར། །སངས་རྒྱས་བྱེ་བ་སྟོང་ཕྲག་ནི། །མཐོང་བ་ཙམ་གྱིས་གྲོལ་འགྱུར་ཏེ། །རས་བྲིས་མཐོང་བ་ཙམ་གྱིས་ཀྱང་། །དེ་ཡི་མོད་ལ་གྲོལ་པར་འགྱུར། །ཞེས་དང་། དད་པ་མེད་པའི་མི་ལ་ནི། །དཀར་པོའི་ཆོས་རྣམས་མི་སྐྱེ་སྟེ། །ས་བོན་ཚིག་པར་གྱུར་པ་ལས། །མྱུ་གུ་སྔོན་པོ་ཇི་བཞིན་ནོ། །དད་དང་ལྡན་པའི་མི་དག་ལ། །སངས་རྒྱས་ལས་ནི་འགྲུབ་འགྱུར་ཏེ། །སྔགས་རྣམས་ཐམས་ཅད་ཁྱད་བར་དུ། །དད་པ་མེད་ལ་མི་འགྲུབ་བོ། །ཞེས་དང་། མར་མེའི་སྣོད་གསེར་རམ་དངུལ་ལམ་ཟངས་སམ་སའི་རང་བཞིན་ལ་ཤིང་ཏུ་རུཏྐའི་འབྲུ་མར་གྱིས་བཀང་བའམ་དྲི་ཞིམ་པོའི་འབྲུ་མར་གྱིས་བཀང་བའམ་བའི་མར་གྱིས་ཡོངས་སུ་བཀང་བའི་མར་མེ་རས་ཀྱི་དུམ་བུ་སར་པས་སྙིང་པོ་བྱས་ཏེ་རས་བྲིས་ཀྱི་མདུན་དུ་འབུམ་ཕྲག་གཅིག་གི་མར་མེ་དབུལ་བར་བྱའོ། །ཞེས་དང་། ཆོས་ལྡན་རྒྱལ་པོ་ཡོད་པ་དང་། །གཙང་སྦྲ་ཡོད་པའི་སྐྱེ་བོ་ཡོད། །ཕ་དང་མ་ལ་གུས་པ་དང་། །བྲམ་ཟེའི་རིགས་ནི་ཡོད་པ་ཡི། །གནས་དེར་ལྷ་རྣམས་འགྲུབ་འགྱུར་ཏེ། །གཞན་དུ་འགྲུབ་པ་མ་ཡིན་ནོ། །ཞེས་དང་། སྟོབས་བཅུ་ལྡན་པས་བཤད་པའི་ཞིང་། །བྱང་ཕྱོགས་ཡོད་པའི་རི་དག་དང་། །ཁ་ཆེ་དང་ནི་རྒྱ་ཡུལ་དང་། །བལ་པོ་དེ་བཞིན་མང་ཡུལ་དང་། །རྒྱ་ཡུལ་ཆེ་དང་ལི་ཡུལ་དང་། །དེ་དག་མ་ལུས་གྲུབ་པའི་ཞིང་། །ཞེས་དང་། ཆུ་ཀླུང་རྒྱ་མཚོའི་འགྲམ་དག་གམ། །དེ་བཞིན་རི་བོ་ཁ་བ་ཅན། །རི་ཡི་རྒྱལ་པོ་འབིགས་བྱེད་ལ། །ལས་གྱི་མཆོག་ནི་བསྒྲུབ་པར་བྱ། །ཞེས་དང་། དེ་ནས་ཉི་མ་ཕྱེད་ཤར་ན། །སྔགས་བཟླས་དེ་ཚེ་སྤང་བར་བྱ། །སྔགས་བཟླས་དེ་ཚེ་བཏང་བ་ན། །སྡོམ་བརྩོན་མཆོད་ཡོན་སླར་གཤེགས་གསོལ། །དེ་ཚེ་བཏང་བའི་ལྷག་དུས་ལ། །ཐུབ་པའི་བསྟན་ལ་དགེ་བ་བྱ། །དམ་ཆོས་བཀླག་ལ་སོགས་པ་ནི། །ཤེས་རབ་ཕ་རོལ་ཕྱིན་ལ་སོགས། །གླེགས་བམ་ས་བཅུ་ཞེས་བྱ་བ། །མཆོད་དང་བཀླག་པ་རྟག་ཏུ་བྱ། །ཞེས་དང་། འཁོར་བའི་རྒྱ་མཚོའི་ཆུ་འབྱུང་བ། །ཟོ་ཆུན་གྱི་ནི་རྣམ་པ་བཞིན། །འགྲོ་བ་དེ་དག་མི་བཟད་པའི། །སྡུག་བསྔལ་ཆུ་ཡིས་ཁྱབ་པ་ཡིན། །སངས་རྒྱས་ཀྱིས་ནི་བུད་མེད་དག  །གཅིག་ཏུ་སྡུག་བསྔལ་རྩ་བར་གསུངས། །ཉན་ཐོས་བྱང་ཆུབ་སེམས་དཔའ་དང་། །རང་རྒྱལ་ཐུབ་པས་དེ་བཞིན་གསུངས། །ཞེས་དང་། ཟློས་པ་འདི་ལ་ཚུལ་ཁྲིམས་ཉམས། །དེ་ལ་གུས་པ་མཆོག་མེད་ཅིང་། །གྲུབ་པ་འབྲིང་ཡང་ཡོད་མེད་དེ། །གྲུབ་པ་ཐ་མའང་ཡོད་མ་ཡིན། །ཚུལ་ཁྲིམས་འཆལ་བ་ཐུབ་དབང་གི  །སྔགས་འགྲུབ་པར་ནི་མ་གསུངས་ཏེ། །མྱ་ངན་འདས་གྲོང་འགྲོ་བ་ཡི། །ཡུལ་དང་ཕྱོགས་ཀྱང་མ་ཡིན་ནོ། །བྱིས་པ་ངན་པ་འདི་ལ་ནི། །སྔགས་གྲུབ་པ་ནི་ག་ལ་ཡོད། །སྐྱེ་བོ་ཚུལ་ཁྲིམས་འཆལ་འདི་ལ། །དེ་ལ་བདེ་འགྲོ་ག་ལ་ཡོད། །མཐོ་རིས་སུ་ཡང་མི་འགྱུར་ཞིང་། །བདེ་བ་མཆོག་ཏུའང་མི་འགྱུར་ན། །རྒྱལ་བས་གསུངས་པའི་སྔགས་རྣམས་ནི། །འགྲུབ་པར་འགྱུར་བ་ལྟ་ཅི་སྨོས། །ཞེས་དང་། བློ་ལྡན་གཡེང་བ་མེད་ལ་དགའ། །གཙང་ཞིང་མ་ཆགས་ཤེས་ཉེན་ཅན། །རིགས་མཐོ་བརྟན་དང་དཔའ་བ་དང་། །བརྩེར་ལྡན་མཐོང་ན་དགའ་བ་དང་། །ཆོས་དང་ཆོས་མིན་རྣམ་དཔྱོད་ཤེས། །དེ་ལ་གྲུབ་པ་རྙེད་མི་དཀའ། །ཞེས་དང་། བཀྲེས་དང་སྐོམ་པས་ཉེན་གྱུར་ན། །སྔགས་ཀྱི་དོན་ལ་རྟེན་མི་ནུས། །ཁ་ཟས་མང་དང་ཉུང་ཟོས་ན། །སྔགས་རྣམས་ཐོབ་པར་མི་ནུས་སོ། །དེ་ཉིད་ཕྱིར་ན་ཐུབ་དབང་གིས། །སེམས་ཅན་ཟས་ཀྱིས་གནས་པའོ་ཞེས། །ལུས་ཅན་རྣམས་ལ་གསུངས་པ་སྟེ། །དང་། གཟུགས་ཀྱི་ཁམས་ན་གནས་པ་རྣམས། །བསམ་གཏན་ཟས་ལ་སྤྱོད་པ་ཅན། །གཟུགས་མེད་ཁམས་ཀྱི་ལྷ་དག་ནི། །ཏིང་འཛིན་འབྲས་བུ་སྤྱོད་པའོ། །སྲིད་པ་བར་མའི་སེམས་ཅན་རྣམས། །དྲི་ཡི་ཟས་སུ་རབ་ཏུ་བསྒྲགས། །དེ་བཞིན་འདོད་ཁམས་སེམས་ཅན་དག  །སྣ་ཚོགས་ཟས་ལ་སྤྱོད་པ་ཡིན། །དེ་ཉིད་ཕྱིར་ན་ཐུབ་དབང་གིས། །ལས་ཀྱི་རྒྱུ་ཡིས་གསུངས་པ་ནི། །སེམས་ཅན་ཟས་ཀྱིས་གནས་པ་ཞེས། །ཐམས་ཅད་ལ་ནི་རབ་ཏུ་བསྒྲགས། །དང་། སྤྱོད་པ་ཡོངས་སུ་དག་པ་དང་། །དགེ་ཞིང་ཚངས་པར་སྤྱོད་པ་དང་། །ཁ་ཟས་ཚོད་ནི་རན་པ་ལ། །དེ་ལ་གྲུབ་པ་རྙེད་མི་དཀའ། དང་། རྒྱུད་རྣམས་ཀུན་ལ་བསྔགས་པ་ཡི། །གཙང་སྦྲ་ལྔ་ཡི་ཆོ་ག་གསུངས། །ལུས་ཀྱི་དག་དང་མ་དག་དང་། །ཡིད་ཀྱིས་དག་པ་ཡིན་པར་བསྟན། །བཞི་པ་བདེན་པའི་དག་བརྫུན་སྤངས་པ། པ་སྟེ། །ཆུ་ཡི་དག་པ་ལྔ་པར་བཤད། །ཅེས་དང་། ལོག་པར་སྨྲ་བར་གྱུར་པ་དང་། །རྨོངས་པས་ལོག་པར་བརྗོད་པ་ཡིས། །འབྱུང་པོ་རྣམས་ལ་སླུ་བྱེད་པ། །དེ་ལ་སྔགས་གྲུབ་ག་ལ་ཡོད། དང་། སྔགས་དང་རྒྱུད་ཀྱི་དོན་ལྡན་པའི། །འབྲས་བཅས་ལས་ནི་བརྩམ་པར་བྱ། །བརྩམས་པའི་ལས་ནི་བརྩམ་བྱ་སྟེ། །ལས་མེད་ཉིད་ལ་བརྩམ་མི་བྱ། །དང་། སྔགས་པས་ཟློས་མཐར་ངལ་བསོ་ཞིང་། །ཇི་སྲིད་དུས་སུ་བསྡད་པར་བྱ། །ཟློས་པ་དུས་ལ་བབས་པ་ན། །དེར་ནི་བཟླས་པར་བྱ་བ་ཡིན། །དང་། གལ་ཏེ་དེས་ནི་རྨི་ལམ་ན། །དགེ་བའི་རྨི་ལམ་མཐོང་ན་ནི། །འབྲས་བཅས་རྨི་ལམ་སྟོན་པ་སྟེ། །དེར་ནི་གྲུབ་པ་སྟོན་པ་ཡིན། །དང་། མྱ་ངན་མེད་ཤིང་ཞི་དོན་དུ། །སློབ་པ་དག་ནི་རབ་ཏུ་བསྔགས། །དང་། ཧ་ཅང་མི་སྐམ་རློན་པའང་མིན། །ཚིག་མིན་ལས་ནི་བརྩམས་མི་བྱ། །དང་། ཤར་དུ་བལྟས་པས་ཞི་བ་འགྲུབ། །བྱང་དུ་བལྟས་པས་རྒྱས་པའོ། །དང་། ཞི་དང་རྒྱས་པའི་ལས་ལ་ནི། །ཤིང་རློན་དག་ནི་རབ་ཏུ་བསྔགས། །དང་། གཙང་བའི་རྩྭ་ཡི་རྩ་བས་ནི། །མེ་སྒྲོན་ཚད་དང་ལྡན་བྱས་ནས། །དེ་ནས་ཆང་པར་བཅངས་ནས་ནི། །འབད་པས་མེ་ནི་སྦར་བར་བྱ། །ཁ་ཡི་རླུང་གིས་མི་བྱ་སྟེ། །རྟག་ཏུ་གོས་ཀྱི་མཐས་ཀྱང་མིན། །ཤམ་ཐབས་བླ་གོས་རྣམ་པར་སྤངས། །གོས་གཞན་དག་ནི་བཀག་མ་ཡིན། །དང་། རླུང་གཡབ་གཙང་དང་དེ་བཞིན་གོས། །ལོ་མས་ཀྱང་ནི་རླུང་གཡབ་བྱ། །དང་། ལག་པ་དེ་ནི་གཡོན་པ་ཡིས། །ལན་གསུམ་བར་དུ་ཆུས་གཏོར་ནས། །དང་། ཞོ་དང་མར་གྱིས་སྦག་པ་དང་། །སྦྲང་རྩིས་སྦག་པའི་ཡམ་ཤིང་གིས། །རྒྱས་པའི་ལས་ནི་བྱ་བའི་ཕྱིར། །སྔགས་ཀྱིས་ཀུན་ཏུ་སྦྱིན་སྲེག་བྱ། །དང་། ཞི་བ་ཁ་དོག་དཀར་པོ་ནི། །རྒྱལ་བ་མཆོག་གིས་རྟག་ཏུ་བསྔགས། །དང་། དེ་བཞིན་རྟག་ཏུ་མདོག་དམར་ལས། །རྒྱས་པར་འགྲུབ་པར་འདོད་པ་ཡིན། །བྱང་ཆུབ་སེམས་དཔའ་སེམས་དཔའ་ཆེ། །ས་བཅུ་ལ་ནི་ཡང་དག་གནས། །སྦྱིན་སྲེག་ལས་ཀྱིས་འགུགས་བྱེད་ན། །ས་སྟེང་མི་རྣམས་སྨོས་ཅི་དགོས། །དང་། ཏིལ་ལ་མར་གྱིས་བཏགས་པའམ། །ཞོ་ལ་སྦྲང་རྩི་བསྲེས་པ་ཡིས། །ལས་ཀུན་ལ་ནི་སྦྱིན་སྲེག་ནི། །སྟོང་རྩ་བརྒྱད་ནི་རྟག་ཏུ་བྱ། །དང་། །མེ་ཡི་ལས་དང་དེ་བཞིན་གཟུགས། །རས་རིས་མདུན་དུ་བརྩམ་བྱས་ན། །དེ་ནི་སྔགས་རྣམས་འགྲུབ་འགྱུར་ཞེས། །སྔོན་གྱི་བདེར་གཤེགས་རྣམས་ཀྱིས་གསུངས། །ཞེས། མཚམས་མེད་ལྔ་པོ་བྱེད་པ་དང་། །ཚུལ་འཆལ་བློ་ནི་ཆུང་བ་དང་། །སྡིག་པ་ཀུན་ལ་འཛུད་བྱེད་པ། །ཁྱབ་བདག་མཐོང་བ་དཀྱིར་འཁོར་ཙམ་གྱིས་གྲོལ། །དང་། དང་པོའི་ཐུན་གྱི་རྨི་ལམ་གང་། །བད་ཀན་ལས་གྱུར་ཤེས་པར་བྱ། །གཉིས་པར་གང་བྱུང་མཁྲིས་པ་སྟེ། །འཇིག་རྟེན་ལ་ཡོད་སྨད་པ་ཡིན། །གསུམ་པ་རླུང་བྱུང་ཤེས་པར་བྱ། །བཞི་པ་བདེན་པར་འབྱུང་བ་ཡིན། །བད་ཀན་རྨི་ལམ་དང་པོ་ནི། །འདི་འདྲར་རྟག་ཏུ་མཐོང་བ་ཡིན། །ནོར་བུ་ཤེལ་གྱི་ཁང་པ་ནི། །ཀུན་ནས་མུ་ཏིག་ཕྲེང་བ་ཅན། །ཨ་མྲའི་ཤིང་ཚོགས་རབ་མང་པོ། །བདག་ཉིད་ཆུ་ནང་བྱིང་བ་མཐོང་། །སོགས་ཉེས་པ་གསུམ་གྱི་རྨི་ལམ་རྒྱ་ཆེར་བསྟན་ཅིང་། གོང་དུ། སངས་རྒྱས་ཉན་ཐོས་བསེ་རུ་ནི། །གལ་ཏེ་འདི་ཡིས་རྨི་ལམ་མཐོང་། །སྔགས་པ་དེ་ནི་བྱ་བ་ཡི། །འབྲས་བཅས་ངེས་པར་འགྲུབ་པར་འགྱུར། །སོགས་གསུངས་སོ། །འཇམ་དཔལ་ཞེས་བྱ་ཡོངས་སུ་བཏགས་པ་ནི། །ཁྱོད་ཀྱི་མིང་ནི་སྔོན་གྱི་རྒྱལ་བས་མཛད། །ཁྱོད་ཀྱི་མིང་དུ་འདི་ལྟར་བཏགས་བྱས་པ། །འདས་དང་མ་བྱོན་ད་ལྟར་སངས་རྒྱས་ཀྱི། །གཞན་དུ་མ་ཡེངས་རྩེ་གཅིག་ཡིད་དག་པས། །ཁྱོད་ཀྱི་མིང་ནི་འཁོར་གྱི་ནང་དུ་ཐོས། །དེས་ནི་འདི་ལ་ཤེས་དང་ཞི་བ་ཐོབ། །སྲིད་མཐར་བྱང་ཆུབ་མཆོག་ནི་ཁྱད་པར་ཐོབ། །སྔགས་རྣམས་མ་ལུས་འགྲུབ་པར་འགྱུར་བ་དང་། །འགྲོ་བའི་སྐྱེ་གནས་མཆོག་ནི་རབ་ཐོབ་ཅིང་། །རྟག་ཏུ་ཆོས་མཆོག་ལ་ནི་ཡང་དག་གནས། །བགེགས་རྣམས་རྣམ་པར་སྤོང་ཞིང་གྲུབ་པ་ཐོབ། །འདོད་པའི་སྔགས་རྣམས་མ་ལུས་འགྲུབ་པར་བྱེད། །བྱང་ཆུབ་ཤིང་དབང་དྲུང་དུ་མྱུར་དུ་འགྲོ། །སོང་ནས་བྱང་ཆུབ་མཆོག་ནི་ཐོབ་པར་བྱེད། །སོང་ནས་སེམས་ཅན་ཕན་ཕྱིར་དེར་འདུག་སྟེ། །སངས་རྒྱས་བྱང་ཆུབ་འཁོར་ལོ་རབ་ཏུ་བསྐོར། །དེ་ལྟར་རྒྱལ་བའི་ཡོན་ཏན་གཙོ་བོས་གསུངས། །འཇམ་དཔལ་ཞེས་ནི་ཁྱོད་ཀྱི་མིང་དྲན་པ། །ཡོན་ཏན་བསམ་མི་ཁྱབ་ཅེས་རྒྱལ་བས་གསུངས། །རྒྱལ་བའི་གཙོ་བོ་སྔར་གཤེགས་ཐམས་ཅད་ཀྱིས། །རྟག་ཏུ་ཁྱོད་ཀྱི་མཐུ་ནི་བསྟན་པ་ཡིན། །གཞོན་ནུ་དག་པ་ཁྱེད་ཀྱི་སྔགས་རྟོག་པ། །བསྐལ་པ་གྲངས་མེད་རྟག་ཏུའང་སྟོན་མི་ནུས། །ཡིད་འོང་བཟང་པོ་རྣར་ནི་སྙན་པ་དང་། །དགའ་བསྐྱེད་སྙན་པ་དང་ནི་རྗེས་སུ་མཐུན། །སེམས་ནི་ཚིམ་བྱེད་བདེ་བ་རབ་ཏུ་སྦྱིན། །འཇམ་ཞེས་བྱ་བར་སངས་རྒྱས་ཡང་དག་གསུང་། །དང་། ཇི་ལྟར་སཱ་ལུའི་འབྲུ་རྣམས་ནི། །མྱུ་གུས་རྣམ་པར་ཤེས་པར་བྱེད། །དེ་བཞིན་གྲུབ་པའི་རྫས་རྣམས་ནི། །མཚན་ཉིད་ཀྱིས་ནི་རྣམ་པར་ཤེས། །དང་། རྒྱུ་མཚན་དང་ནི་སྤྱོད་པ་དང་། །སྐྱེ་བ་དང་ནི་རིགས་དང་གནས། །རྟག་ཏུ་ལ་ཉེ་སྣ་ཚོགས་པ། །ལས་དེ་ལས་ནི་ཉེ་བར་དམིགས། །དང་། གྲུབ་དང་མ་གྲུབ་མཚན་མ་ནི། །རྐྱེན་གྱི་དོན་ལ་ལྟོས་པ་ཡིན། །རྒྱུ་མཚན་སྤྱོད་དང་མཚན་མ་ནི། །རྐྱེན་ལ་མངོན་པར་རབ་ཏུ་བརྟག  །དེ་བས་རྣམ་ཀུན་འབད་ནས་ནི། །རྐྱེན་ལ་རགས་ལས་བྱ་བ་ཡིན། །ཟློས་པའི་སྔགས་རྣམས་རྟག་ཏུ་ནི། །གྲུབ་པ་རྒྱུ་ལ་ལྟོས་པ་ཡིན། །འདི་དག་རྐྱེན་གྱི་ཡན་ལག་ནི། །ལས་ནི་བདག་གིར་བྱེད་པས་མཚོན། །ཅེས་སོགས་ཇི་ལྟར་སཱ་ལུའི་འབྲས་བུ་ཕུན་སུམ་ཚོགས་པ་འབྱུང་མི་འབྱུང་མྱུ་གུའི་དུས་ནས་ཤེས་པ་ལྟར། སྔགས་འགྲུབ་མི་འགྲུབ་ལྟས་ཀྱི་བྱེད་ལས་ཤེས་ཤིང་། ལྟས་ཀྱང་མཚན་མ་དང་། རྨི་ལམ་དང་། གཞན་གྱི་སྤྱོད་ཚུལ་སོགས་ལ་ཉེ་ལས་ཤེས་པས་ན། རྨི་ལམ་ངན་པ་གཙོ་བོར་གྱུར་པའི་ལྟས་མི་ཤིས་པ་བྱུང་ན་དེ་དག་ཟློག་ཅིང་། ཤིས་པའི་ལྟས་ཀྱི་བྱེད་ལས་ཆུད་མི་ཟ་བར་བདག་གིར་འགྱུར་བའི་རིག་སྔགས་ནི། རྨི་ལམ་ངན་པ་བཟོད་དཀའ་དང་། །མ་རུང་སེམས་ཅན་ཟློག་བྱེད་པ། །རྒྱལ་བ་སཱ་ལའི་དབང་པོ་ཡི། །སྔོན་གྱི་སྔགས་རྒྱལ་ཡོངས་གསུངས་པ། །ལྷ་ཡི་ཚོགས་དང་གཟའ་རྣམས་དང་། །རྒྱུ་སྐར་སྐར་མཁན་རྣམས་ཉོན་ཅིག  །ཅེས་སོགས་མཉན་པར་གདམས་ནས་གཙུག་ཏོར་འབར་བའི་སྔགས་ཕན་ཡོན་དང་བཅས་པ་གསུངས་སོ། །འདིའི་སྔགས། ཏིཥྛ་ཥྟི་ཕཊ་ཕཊ་སྭཱ་ཧཱ། ཞེས་སྣང་། ལས་བདག་གིར་བྱེད་པའི་རྐྱེན་གྱི་ལེའུ་རབ་འབྱམས་ལས་བཅུ་དྲུག་པའི་སྐབས་སུ་སྣང་ངོ་། །རྒྱུ་སྐར་ལྷག་མ་གཙོ་བོ་ནི། །དུས་ཀྱི་ཐ་མར་འབྱུང་བ་མིན། །ཞེས་སྣང་ནའང་། རྒྱུ་སྐར་གཙོ་ལས་ལྷག་མ་ནི། །ཞེས་བསྒྱུར་ན་གོ་བདེ་བར་སེམས་ཏེ། གཙོ་བོ་ཉེར་བདུན་ལས། སྐར་ཕྲན་གཞན་གྱི་ནུས་པ་དུས་མཐར་མི་འབྱུང་། ཞེས་པའི་དོན་དུ་སྣང་བས་སོ། །ཡང་། ཤེས་རབ་ཆེན་པོ་འཇམ་པའི་དབྱངས། །བྱིས་པ་གཞོན་ནུའི་གཟུགས་དང་ལྡན། །འཇིག་རྟེན་འདིར་ནི་ཀུན་ཏུ་རྒྱུ། །སེམས་ཅན་རྗེས་སུ་བཟུང་བར་བཟོད། །དེ་ཡི་དུས་སུ་གྲུབ་པ་ནི། །འཇམ་པའི་དབྱངས་ནི་རབ་ཏུ་མཐོང་། །རྒྱུ་སྐར་སྐར་མའི་དཔྱད་ཤེས་པ། །དེ་ཡི་ཚེ་ན་འབྱུང་བར་འགྱུར། །སོགས་གསུངས་པ་འདིས་ནག་རྩིས་གཙོ་བོར་ལུང་བསྟན་པར་རྟོགས་ཏེ་རྒྱུ་མཚན་མང་པོ། །ཐ་སྐར་སྣར་མ་ཉིད་དང་ནི། །རྒྱལ་དང་ཁྲུམས་ནི་སྟོད་སྨད་གཉིས། །ནམ་གྲུ་དང་ནི་ལྷ་མཚམས་དག  །བཟླས་པའི་དུས་སུ་རབ་ཏུ་བསྔགས། །དང་། ཕུར་བུ་པ་སངས་ཟླ་བ་དང་། །གཟའ་ལྷག་མཆོག་ནི་ལས་ཀུན་ལ། །གཟའ་མཆོག་འདི་དག་རྟག་ཏུ་ནི། །བཞི་པོ་ཚེས་དང་ལྡན་པ་ནི། །ས་སྟེང་འཇིག་རྟེན་ཀུན་ཏུ་ནི། །འགྲོ་བའི་ལས་ནི་གྲུབ་པར་བྱེད། །ཅེས་དང་། སེ་གོལ་བརྒྱ་ཡི་ཚོགས་དག་ལ། །རྩ་རྒྱུན་གཅིག་ཏུ་བསྟན་པ་ཡིན། །རྩ་རྒྱུན་བཞི་ལ་ཆུ་ཚོད་བསྟན། །ཆུ་ཚོད་བཞི་ལ་ཐུན་ཞེས་བྱ། །ཐུན་བཞི་ལ་ནི་ཉིན་པར་ཏེ། །མཚན་མོ་དག་ཀྱང་དེ་བཞིན་བསྟན། །དེ་ལྟར་བརྒྱད་དང་ལྡན་པ་ལ། །ཉིན་མཚན་དུ་ནི་རབ་ཏུ་བརྟག  །དང་། ཉི་མ་བཅོ་ལྔ་ཉིད་ལ་ནི། །ཟླ་བ་ཕྱེད་ནི་རབ་ཏུ་བསྟན། །ཟླ་ཕྱེད་གཉིས་ལ་ཟླ་བ་ཞེས། །རྩིས་ཤེས་འཇིགས་པ་མེད་པས་བསྟན། །དེ་བཞིན་ཟླ་བ་ཟླ་དྲུག་གིས། །སྒྲ་གཅན་གྱིས་ཀྱང་འཛིན་པ་ཡིན། །དེ་ནས་ཟླ་བ་བཅུ་གཉིས་ལ། །ལོ་ཡི་སྒྲར་ནི་རབ་ཏུ་བསྒྲགས། །དེ་ནས་ལོ་ནི་བཅུ་གཉིས་ལ། །ལོ་ཆེན་ཞེས་ནི་དེ་ལ་བྱ། །གཟའ་དང་རྒྱུ་སྐར་ཕྱིན་ཅི་ལོག  །ལྷ་མིན་དབང་པོ་ཐམས་ཅད་ཀྱང་། །དེ་ནས་ལོ་ནི་བཅུ་གཉིས་ལ། །འདིར་ནི་དགེ་དང་མི་དགེ་བྱེད། །ཅེས་དང་། ལེ་བརྒན་དུ་བཙོས་པའི་སྐུད་པ་ལན་བདུན་བཟླས་བརྗོད་བྱས་ཏེ་མདུད་པ་བོར་ན་བཅིང་བར་འགྱུར་རོ། །དང་། སློང་མོའི་ཟས་ཟ་ཞིང་ཆོ་འཕྲུལ་ཆེན་པོའི་ཟླ་ཕྱེད་ཀྱི་ཟླ་བ་ལ་ནུབ་གསུམ་སྨྱུང་བར་བྱས་ལ། ཟླ་བ་གཟས་ཟིན་པ་ན་བ་ནག་མོའི་འོ་མ་ལ་ལན་བརྒྱ་རྩ་བརྒྱད་མངོན་པར་བསྔགས་ཏེ་འཐུང་ན་བཅུད་ལེན་གྱི་ཡོན་ཏན་དང་ལྡན་པར་འགྱུར་རོ། །དང་། རྩྭ་དཱུཪྺའི་འཇག་མ་ལ་ཞོ་དང་སྦྲང་རྩི་མར་གྱིས་བཏགས་པ་སྟོང་རྩ་བརྒྱད་ནུབ་བཅུའི་བར་དུ་སྦྱིན་སྲེག་བྱས་ན་དུས་མ་ཡིན་པར་འཆི་བ་རབ་ཏུ་ཞི་ཞིང་ཚེ་རིང་བར་འགྱུར་རོ། །དང་། སྲུང་བའི་སྐུད་པས་ནི་ནད་ཐམས་ཅད་ལས་གྲོལ་བར་འགྱུར་རོ། །དང་། ཤུ་དག་ལ་ཞོ་དང་སྦྲང་རྩི་དང་མར་གྱིས་བཏགས་ཏེ་སྦྱིན་སྲེག་བྱས་ན་རྒོལ་བ་ཐམས་ཅད་ལ་ལན་འདེབས་ནུས་པར་འགྱུར་རོ། །དང་།   རྒྱ་དང་རྒྱ་ནི་ཆེ་ཉིད་ལ། །འཇམ་པའི་དབྱངས་ནི་རབ་འགྲུབ་འགྱུར། །གང་ཡང་དེ་ནི་སྔགས་རྣམས་ནི། །དེར་ནི་རབ་ཏུ་འགྲུབ་པར་འགྱུར། །དང་། ཁ་བ་ཅན་རིའི་ནང་བྱུང་བ། །དེར་ནི་ཐམས་ཅད་འགྲུབ་པར་འགྱུར། །སྐྱེ་བོ་སྐལ་ལྡན་བཟང་པོ་ནི། །ཞི་བའི་ལས་ནི་རྩོམ་པར་བྱེད། །དང་། རྒྱལ་བས་གསུངས་པའི་སྔགས་ཀྱིས་ནི། །ཞི་བའི་ལས་ནི་བྱ་བ་ཡིན། །རིན་ཆེན་རིགས་ཀྱི་བྱ་བ་ནི། །རྒྱས་པའི་ལས་ནི་ཐམས་ཅད་དོ། །མངོན་པར་སྤྱོད་པའི་ལས་རྣམས་ནི། །རྡོ་རྗེའི་རིགས་ཀྱིས་བྱ་བ་ཡིན། །དང་། མཆོག་དང་བར་དང་ཐ་མ་ནི། །དེ་དག་རྣམ་པ་གསུམ་འབྱེད་པ། །ཞི་དང་རྒྱས་པ་དག་དང་ནི། །མངོན་སྤྱོད་པར་ནི་འདོད་པ་ཡིན། །དང་། བརྒྱ་ཡི་གྲངས་ཀྱིས་བགྲང་བ་ནི། །དེ་དག་བཅུ་ལ་སྟོང་ཕྲག་གཅིག  །སྟོང་ཕྲག་བཅུ་ལ་ཁྲི་ཡིན་ཏེ། །ཁྲི་བཅུ་ལ་ནི་འབུམ་ཕྲག་གཅིག  །འབུམ་ཕྲག་བཅུ་ལ་ས་ཡ་སྟེ། །ས་ཡ་བཅུ་ལ་བྱེ་བ་ཡིན། །བྱེ་བ་བཅུ་ལ་དུང་ཕྱུར་ཏེ། །དུང་ཕྱུར་བཅུ་ལ་ཐེར་འབུམ་ཡིན། །སོགས་རྒྱ་ཆེར་བསྟན། །འཇིག་རྟེན་དང་ནི་མྱ་ངན་འདའ། །སྟོང་པའི་སྟེང་ནི་སྟོང་གྱུར་ན། །ཁྱོད་ཉིད་བྱིས་པའི་གཟུགས་ཀྱིས་ནི། །སངས་རྒྱས་མཛད་པ་བྱེད་པར་འགྱུར། །དེ་ཚེ་དགོན་ཆེན་རབ་དགའ་བ། །ཁ་བ་ཅན་ནང་ཡོད་པ་ཡིན། །དང་། སེམས་ཅན་མཐའ་ནི་བསམ་མི་ཁྱབ། །རྣམ་པར་སྨིན་པའང་༴  སངས་རྒྱས་ཆོས་ཀྱང་༴  བྱང་ཆུབ་སྤྱོད་པའང་༴  གདུལ་བའི་སེམས་ཅན་ལ་བརྟེན་ནས། །ཕན་མཛད་སྤྱོད་པ་བསམ་མི་ཁྱབ། །བྱང་ཆུབ་སེམས་དཔའི་སྤྱོད་པ་རྣམས། །བསམ་མི་ཁྱབ་པར་ཡོངས་སུ་བསྟན། །ཅེས་སོ། །ཆོས་འདི་དག་ནི་མདོར་བསྡུ་ན། །དགེ་དང་མི་དགེ་བསྟན་པ་ཡིན། །རྟག་ཏུ་མི་དགེ་སྤང་བྱ་སྟེ། །དུས་རྣམས་ཀུན་ཏུ་དགེ་བ་སྤྱད། །དང་། གངྒཱའི་བྱང་ཕྱོགས་འགྲམ་དག་ནི། །ཆུ་བོ་ཆེན་པོ་དེ་ལས་གཞན། །ཁ་བ་ཅན་རིའི་ལྷོ་ཕྱོགས་ཆར། །སཱ་ལའི་ནགས་ཞེས་བྱ་བ་འབྱུང་། །དེ་ཚེ་ནུབ་ཕྱོགས་བལྟས་པའི་མལ། །དེར་ནི་གནས་སུ་འབྱུང་བར་འགྱུར། །དེ་ཚེ་ཆུ་བོ་རབ་དགའ་བ། །བཟང་པོ་གསེར་ལྡན་འགྲམ་དག་ཏུ། །ལྷ་རྣམས་ཀུན་གྱི་ཚོགས་ལ་སོགས། །འདུས་པ་དག་ནི་འབྱུང་བར་འགྱུར། །དང་། ཡི་གེ་ཧཱུྃ་དེ་ཡི་གེ་གཅིག  །ལས་རྣམས་མ་ལུས་བྱེད་ཅིང་དག  །སྔགས་ཀྱི་རྒྱལ་པོ་བཟླས་ཙམ་གྱིས། །འདི་ནི་བཟླས་པ་ཙམ་གྱིས་བྱེད། །འགྲོ་དང་གནས་པའི་དུས་དག་དང་། །དེ་བཞིན་དགྲ་རྐུན་རེངས་པར་བྱེད། །སེམས་ཅན་གདུག་པ་ཐམས་ཅད་ལ། །བཟླས་པ་ཙམ་གྱིས་རེངས་པར་བྱེད། །དང་། མ་སྐྱེས་དགྲ་ཡི་བུ་ཨུའི་མིང་ཅན་གྱིས། །དེས་ནི་སྟོན་པའི་གསུང་རབས་དག  །རྒྱ་ཆེར་འབྲི་བར་བྱེད་འཇུག་འགྱུར། །དང་། རྒྱལ་པོ་དེ་ལས་གཞན་པ་ཡང་། །ཟླ་བ་སྦས་ཞེས་བྱ་བ་འབྱུང་། །གནོད་སྦྱིན་ཆུ་དབང་གྲུབ་པ་སྟེ། །རྒྱལ་སྲིད་གནོད་པ་མེད་པར་བྱེད། །དང་། དེ་བཞིན་གཤེགས་པའི་བསྟན་འདི་ལ། །རྣམ་པ་སྣ་ཚོགས་བྱ་བ་བྱེད། །བྱང་གི་ཕྱོགས་ལ་བརྟེན་ནས་ནི། །དེ་ཡི་ཚེ་ན་འབྱུང་བར་འགྱུར། །ལྷ་ལྡན་ཡུལ་ཞེས་བྱ་བ་ན། །གངས་ཅན་མི་ཡི་ནང་གནས་པའི། །རྒྱལ་བ་མི་ཡི་ལྷ་ཞེས་པ། །ལིཙྪ་བཱི་རྣམས་རིགས་སུ་འབྱུང་། །དང་། སྟོན་པའི་གསུང་རབ་ས་སྟེང་དུ། །དུས་མཐར་འཇིག་རྟེན་ཉམས་པ་ན། །སྡོམ་བརྩོན་རྒྱལ་པོའི་ཚུལ་གྱིས་ནི། །འབྱུང་བར་འགྱུར་བ་ཐེ་ཚོམ་མེད། །དང་། ཡི་གེ་ར་དང་བ་དང་པོར། །དགེ་སློང་གང་ཞིག་རབ་བྱུང་གསུངས། །སྟོན་པའི་བསྟན་པ་གསལ་བྱེད་པ། །འབྱུང་བར་འགྱུར་བ་ཐེ་ཚོམ་མེད། །དང་། དེ་ནས་ཡི་གེ་ས་དང་ཀ  །དང་པོ་ངག་ཏུ་བརྗོད་པ་དང་། །ཞེས་དང་། དང་པོར་ཡི་གེ་བ་གྲགས་དང་། །སྟོན་པའི་གཟུགས་བརྙན་དོན་ཡང་བྱེད། །བློ་ལྡན་དང་པོར་ཡི་གེ་མ། །སོགས་དང་། སྡོམ་བརྩོན་ཐམས་ཅད་བསྒྲགས་པ་ཡང་། །སྟོན་པའི་བསྟན་པ་གསལ་བྱེད་པའོ། །སོགས་ལུང་བསྟན་ཏོ། །འཇམ་དཔལ་ཆོ་ག་འདི་གསུངས་པ། །བཀླག་པ་དང་ནི་འཆང་བ་ཡིས། །དེ་ནི་འདོད་འཇོའི་བ་འདྲར་འགྱུར། །ནོར་ཆེན་ལོངས་སྤྱོད་ཕུན་སུམ་ཚོགས། །ཞེས་གསུངས་སོ། །སྤྱིར་འཇམ་དཔལ་གྱི་རྩ་བའི་རྒྱུད་འདིར་རས་བྲིས་ཆེ་འབྲིང་ཆུང་གསུམ་སོགས་རས་བྲིས་ཀྱི་ཆོ་ག་༧དང་། ཟློས་པ་དང་། སྦྱིན་སྲེག་དང་། སྒྲུབ་པོའི་མཚན་ཉིད་དང་། རྨི་ལམ་དང་། ཚེས་དང་། རྒྱུ་སྐར་དང་། ལྟས་ཀྱི་བྱེ་བྲག་སོགས་མཐའ་ཡས་པ་གསུངས་ཤིང་། མཇུག་ཏུ་ལུང་བསྟན་པ་རྒྱ་ཆེར་སྣང་སྟེ་གཙོ་བོར་རྒྱལ་རིགས་ཁོ་ནར་སྣང་ངོ་། ༼ན༽  ལྡེབ༢༠༤མཚམས། ཡི་གེ་གཅིག་གི་ས་འདི་ནི་རིག་པའི་འཁོར་ལོས་སྒྱུར་བ། དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་འོག་ནས་གོང་དུ་གནས་པ་བསྟན་པ་ཐོགས་པ་མེད་པ་སོགས་ནས། བྷྲཱུྃ། བཅོམ་ལྡན་འདི་ནི་ཐམས་ཅད་མཁྱེན། །སངས་རྒྱས་སྔགས་གཟུགས་རྣམ་པར་གནས། །སྟོན་པ་ཐུགས་རྗེ་ཆེ་དང་ལྡན། །སེམས་ཅན་ཀུན་ལ་རྣམ་པར་སྐྱོང་། །ཞེས་སོགས་དང་། རྩྭ་ཀུ་ཤ་ལ་བརྒྱ་རྩ་བཟླས་ནས་མཚོ་གནས་བཅད་ན་གཞན་གྱི་རིག་སྔགས་བཅད། དར་ལེ་བརྒན་ལ་མདུད་པ་བོར་ནས་ལན་བདུན་བཟླས་ན་བཅིངས། ཞོ་དང་སྦྲང་རྩི་དང་མར་དང་ཏིལ་གྱིས་སྦྱིན་སྲེག་གིས་ཐམས་ཅད་དབང་དུ་འགྱུར་བ་དང་། ཐང་ཤིང་གིས་ལྷ། མངར་གསུམ་གྱིས་ཀླུ། མྱ་ངན་མེད་པའི་ཤིང་དང་པྲྀ་ཡངྐའི་ཤིང་གིས་དྲི་ཟ། སྐེ་ཚེས་གནོད་སྦྱིན་མོ་དང་ཀླུ་མོ། ཡུངས་ཀར་གྱིས་རྒྱལ་པོ། མེ་ཏོག་གིས་བྲམ་ཟེ། ཞོ་དང་འོ་མ་དང་མར་གྱིས་རྗེ་རིགས། ཕུབ་མའི་རྡུལ་གྱིས་དམངས་རིགས། ལན་ཚྭས་བུད་མེད་སོགས་དབང་དུ་འགྱུར་བར་གསུངས།།   །། ༈ 
འཇམ་དཔལ་རྩ་རྒྱུད་ལས། རིག་པའི་རྒྱལ་མོ་རྫུ་འཕྲུལ་ཅན། །དེ་ནི་སྒྲོལ་མ་ཞེས་ཀྱང་བསྟན། །བུད་མེད་གཟུགས་འཆང་ལྷ་མོ་ནི། །འགྲོ་བ་ཀུན་ཏུ་རྣམ་པར་རྒྱུ། །སྙིང་རྗེས་བརླན་པའི་སེམས་ཀྱིས་ནི། །སེམས་ཅན་རྣམས་ལ་ཕན་དོན་དུ། །མི་མཇེད་འཇིག་རྟེན་ཁམས་གནས་ནས། །བུད་མེད་མིང་གིས་འཇུག་པར་བྱེད། །ས་བཅུ་ལ་ནི་རབ་གནས་ཐོབ། །བྱང་ཆུབ་སེམས་མ་རྫུ་འཕྲུལ་ཆེ། །སེམས་ཅན་རྣམས་ནི་འདུལ་བྱེད་པ། །ལྷ་མོ་སྒྲོལ་མ་ཞེས་སུ་བསྟན། །འདི་ནི་འབད་མེད་འགྲུབ་པ་སྟེ། །སྲུང་དང་སྐྱོབ་དང་སྦ་བར་བྱེད། །ལོངས་སྤྱོད་དབང་ཕྱུག་འཕེལ་བྱེད་པས། །འདི་ནི་ལྷ་མོ་བསྒྲུབ་པར་བྱ། །བྱང་ཆུབ་མཆོག་གི་ཆེད་དུ་ནི། །སྐྱེད་པ་ཉིད་ནི་བརྩམ་པར་བྱ། །སྙིང་རྗེས་བརླན་པའི་ལུས་ཅན་ལ། །དེ་ཚེ་ལྷ་མོ་རྗེས་འབྲང་བ། །སྔགས་ཀྱི་གཟུགས་ཀྱིས་སེམས་ཅན་ལ། །བྱང་ཆུབ་ཚོགས་ཀྱི་བྱ་ཕྱིར་རོ། །རེ་བ་ཐམས་ཅད་དགའ་རྒྱས་ཕྱིར། །ཤར་གྱི་ཕྱོགས་སུ་གནས་པ་ཡིན། །བདག་ཉིད་རྣམས་ལ་སྟོང་དང་ནི། །རྣམ་པ་མང་པོ་བྱས་ནས་ཀྱང་། །རྒྱ་མཚོ་བཞི་ཡི་མཐར་ཐུག་པར། །ས་རྣམས་ཀུན་ཏུ་རྣམ་པར་རྒྱུ། །ཞེས་སོགས་རྒྱ་ཆེར་བསྟན་ལ། ཡེ་ཤེས་ཐིག་ལེའི་རྒྱུད་ལས། ཏཱ་ནི་ཡིག་འབྲུ་ཁུ་བ་ཡབ། །རཱ་ནི་ཡུམ་སྟེ་ཁྲག་ཡིན་ནོ། །དེ་གཉིས་འདྲེས་པ་ཐིག་ལེ་ཡིན། །གཞན་མིན་རྣམ་ཤེས་ངོ་བོའོ། །ཞེས་གཙོ་བོ་སྟོང་པ་ཉིད་ཡུམ་དང་། ཡན་ལག་ཐབས་བདེ་བ་ཆེན་པོ་ཡབ་ཀྱི་ངོ་བོ་དབྱེར་མི་ཕྱེད་པ་བྱང་ཆུབ་སེམས་ཀྱི་རྡོ་རྗེ་ནི་ངེས་དོན་གྱི་སྒྲོལ་མའོ།   ། ༈ དཔལ་མཆོག་དང་པོའི་རྒྱུད་ལས། གསེར་རམ་ཡང་ན་དངུལ་དང་ནི། །དེ་བཞིན་ཤིང་ལས་བྱས་པ་ཡི། །རང་གི་འདོད་ལྷའི་གདོང་རྣམས་ཀྱིས། །གྲུབ་པའི་ཕྱག་རྒྱས་གར་རྣམས་བྱ། །ཞེས་གར་འཆམས་ཀྱི་ཁུངས་གསུངས་སོ།   ། ༈ མགོན་པོ་ཀུན་འབྱུང་ལས། སྣ་ཚོགས་འབྲུ་ནག་དཔལ་བྱས་པའི། །གཏོར་མ་མི་ཤས་བརྒྱན་པ་དང་། །ཅེས་གཏོར་མ་ཟུར་གསུམ་དུ་བྱེད་པའི་ཁུངས་སོ།   ། ༈ 
སྔ་འགྱུར་རྡོ་རྗེ་ཕུར་པ་གསང་བའི་རྒྱུད་ལས། །གླེགས་ཤིང་ཐབས་དང་ཤེས་རབ་ལ། །ཤོག་གུ་ཐེག་པའི་ས་གཞི་སྟེ། །ཞི་གནས་ལྷག་མཐོང་ཞིང་གི་རྒྱགས། །དབྱིངས་དང་ཡེ་ཤེས་དོན་རྒྱགས་གཉིས། །སྨྱུ་གུ་རིག་པའི་ཤེས་རབ་སྟེ། །བྱང་ཆུབ་སེམས་རྟགས་སྣག་ཚ་ཡིན། །ཡི་གེ་གསུམ་གྱི་ཕྱག་རྒྱས་བྲིས། །བྱེད་པ་པོ་ནི་དམ་ཚིག་ཅན། །ལེགས་ཤིང་ཚད་དང་ལྡན་བྱས་ནས། །སྔགས་མཁན་དམ་ཚིག་བློ་ཅན་གྱིས། །དུས་གསུམ་བཞུགས་པ་ཐམས་ཅད་ཀྱི། །གསུང་གི་དེ་ཉིད་བྱིན་བསྡུས་ནས། །གླེགས་བམ་ཉིད་ལ་བསྟིམ་པར་བྱའོ།   ། ༈ འཇམ་དཔལ་ལས་བཞིའི་འཁོར་ལོའི་རྒྱུད་ཕྱི་མ་ལས། དུས་ངན་ཐ་མར་བྱུང་བའི་ཚེ། །ལྷ་མོའི་ནང་ན་འོད་ཟེར་ཅན། །འཕགས་པའི་ནང་ན་འཇམ་དཔལ་ཉིད། །འདི་གཉིས་མ་གཏོགས་དངོས་གྲུབ་གཞན། །རིག་འཛིན་ཀུན་ལ་མ་ཡིན་ནོ། །ཞེས་སོ། ། ༈ འཇམ་དཔལ་དཔའ་བོ་གཅིག་པུ་གྲུབ་པ་རྒྱུད་ཀྱི་རྒྱལ་པོ་ལེའུ་གཉིས་པ་ལས། ཨོཾ་ཤྲ་བ་ཎ་པི་ཤཱ་ཙི་ནི་མུཎྜེ་སྭཱ་ཧཱ། བ་རུ་རའི་ཤིང་ངམ་ནྱ་གྲོ་དྷའི་ཤིང་གི་རྩ་བར་འདུག་ལ། ཅང་མི་སྨྲ་བར་འབུམ་ཕྲག་གཅིག་བཟླས་ན་གྲུབ་པར་འགྱུར་ཏེ་འཇིག་རྟེན་གསུམ་གྱི་སྤྱོད་པ་ཡང་སྟོན་པར་འགྱུར་རོ། །ཡང་ན་ལེགས་པར་ཁྲུས་བྱས་ལ་གོས་གཙང་མ་བགོས་ཏེ་དབེན་པར་འདུག་ལ་ཁྲི་བཟླས་པས་གྲུབ་པར་འགྱུར་རོ། །དགོང་མོ་ཉལ་ཁར་རུ་རྟ་ལ་བརྒྱ་རྩ་བརྒྱད་མངོན་པར་བཟླས་ནས་གདོང་དང་རྐང་པ་གཉིས་བཀྲུས་ན་རྨི་ལམ་དུ་དགེ་བ་དང་མི་དགེ་བ་རྣམས་སྟོན་པར་འགྱུར་རོ། །ཞེས་བྱ་བ་ནི་ལྷ་མོ་ཤྲ་བ་ཎའི་སྒྲུབ་པའི་ཐབས་སོ། །ཡང་། ཨོཾ་མུ་ཙི་ལི་སྭཱ་ཧཱ། །མོ་ཧ་ནི་སྭཱ་ཧཱ། ལག་ན་རྡོ་རྗེ་རྨི་ལམ་མཐོང་བའི་གཟུངས་ཀྱང་འདིའོ། །དན་ཏི་ལི་སྭཱ་ཧཱ། གསང་སྔགས་འདི་ཁྲི་བཟླས་ན་འགྲུབ་པར་འགྱུར་རོ། །བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་རྒྱ་ཆེན་པོ་བྱས་ནས་ལན་བརྒྱ་རྩ་བརྒྱད་མངོན་པར་བསྔགས་པའི་ཆུས་གདོང་བཀྲུས་ཏེ། དགོས་པ་ཡིད་ལ་བྱེད་པའི་བཟླས་པས་མི་སྨྲ་བར་ཉལ་ན་བཅོམ་ལྡན་འདས་རང་གི་གཟུགས་སུ་མཐོང་བར་འགྱུར་ཞིང་དགེ་བ་དང་མི་དགེ་བ་རྨི་ལམ་དུ་རྨིས་པར་འགྱུར་རོ། །ཞེས་གསུངས་པ་འདིས་ནི་དབང་གི་སྟ་གོན་ལ་སོགས་པའི་སྐབས་སུ་རྨི་ལམ་བརྟག་པའི་རིག་སྔགས་སོ། །ཡང་། ཨོཾ་བུདྡྷ་ཙུ་རུ་མཱ་ཙུ་རུ་ཀེ་སྭཱ་ཧཱ། སྐུ་གདུང་དང་བཅས་པའི་མཆོད་རྟེན་ནམ་རྗེ་བཙུན་སངས་རྒྱས་ཀྱི་སྤྱན་སྔར་བསྙེན་པ་ཆོ་ག་ཁྲི་བཟླས་ལ། དེའི་འོག་ཏུ་ཅི་འབྱོར་པའི་མཆོད་པ་བྱས་ནས་ཉལ་བའི་དུས་སུ་བརྒྱ་རྩ་བརྒྱད་བཟླས་ཏེ། བདག་གང་ནས་སྐྱེས་པར་གྱུར། གང་དུ་སྐྱེ་བར་འགྱུར་ཞེས་ཡིད་ལ་བསམས་ཤིང་ཉལ་ན་འདས་མ་འོངས་པའི་སྐྱེ་བ་དམིགས་པར་འགྱུར་བར་ཐེ་ཚོམ་མེད་དོ། །གལ་ཏེ་ཟླ་བ་དྲུག་གི་ནང་རོལ་དུ་འཆི་བར་འགྱུར་བ་དེའི་ཚེ་རྨི་ལམ་དུ་བདག་གམ་གཞན་གྱི་མགོ་བོ་མི་མཐོང་བར་འགྱུར་རོ། །དེ་བཞིན་དུ་མངོན་པར་བསྔགས་པའི་མེ་ལོང་བལྟས་པ་ན་ཁྱེའུའམ་བུ་མོ་གང་གི་མགོ་བོ་མཐོང་བར་མ་གྱུར་པ་དེ་ཟླ་བ་དྲུག་གི་ནང་དུ་འཆི་བར་འགྱུར་རོ། །རྡོ་ལིག་བུ་མིག་དང་། ཤིང་ཨ་ག་སྟི་དཀར་པོའི་རྩ་བ་རེང་བུར་བྱས་ཏེ། བརྒྱ་རྩ་བརྒྱད་མངོན་པར་བསྔགས་པའི་མིག་ལ་བྱུག་ན། གང་དག་ཟླ་བ་དྲུག་གི་ནང་དུ་འཆི་བར་འགྱུར་བའི་རྐང་གཉིས་པ་དང་། རྐང་བཞི་དེ་དག་ཐམས་ཅད་ཀྱི་མགོ་བོ་མེད་པ་མངོན་སུམ་དུ་མཐོང་བར་འགྱུར་རོ། །ཞེས་བྱ་བ་ནི་བུདྡྷ་ཙུ་རུ་མའི་རྨི་ལམ་བརྟག་པའི་ཆོ་གའོ། །ཡང་། ཨོཾ་ཛམྦྷེ་མོ་ཧེ་སྭཱ་ཧཱ། རྗེ་བཙུན་སྒྲོལ་མ་ལ་ཀ་ར་ཝཱི་རའི་མེ་ཏོག་གིས་མངོན་པར་མཆོད་དེ། སྔགས་ཀྱི་རྒྱལ་པོ་ཡི་གེ་འབུམ་བཟླས་ན་ཡིད་ལ་རེ་བ་ཐམས་ཅད་རྫོགས་པར་བྱེད་དོ། །ཞེས་དོན་ཐམས་ཅད་གྲུབ་པའི་ཆོ་གའོ། །འོག་མ་འདི་དག་སྒྲོལ་མ་རྣལ་འབྱོར་མའི་རྒྱུད་ལས་ཀྱང་འབྱུང་། ལེའུ་གསུམ་པར། འཇམ་དཀར་གྱི་སྒྲུབ་ཐབས་དང་། སྔགས་འདྲ་མིན་གསུམ། སྒྲོལ་མའི་སྔགས་འཇམ་དཀར་གཙོ་འཁོར་ལྔའི་སྒྲུབ་ཐབས་བཅས་བསྟན་པའི་འཕྲོར། ར་ཡི་འོ་མ་ཨ་རུ་ཚ་བ་གསུམ། །ས་ཐ་ཤུ་དག་སེ་འབྲུ་སེན་དྷ་པ། །ལན་བདུན་སྔགས་པའི་མར་དང་ནི། །འཐུང་བས་དབྱངས་ཅན་འགྲུབ་པར་འགྱུར། །ར་ཡི་འོ་མ་བྲེ་བཞི་དང་། །སྨན་རྣམས་སྲང་གཅིག་ཙམ་གྱི་ཚད། །མར་བྲེ་གང་དང་མཁས་པ་ཡིས། །རིམ་གྱིས་མེ་ཆུ་ལ་བསྐོལ་བྱ། །ཟླ་གཅིག་ཙམ་ཞིག་རབ་སྦྱར་ན། །བླ་མེད་ཚིག་ནི་ཐོབ་འགྱུར་ཞིང་། །ཟླ་དྲུག་ཉེ་བར་ལོངས་སྤྱོད་པས། །ངག་གི་དབང་ཕྱུག་མངོན་སུམ་འགྱུར། །ཤུག་པ་ཤིང་མངར་སེན་དྷ་པ། །ཨ་རུ་བཅའ་སྒ་ལ་ལ་ཕུད། །རུ་རྟ་པི་པི་ཟི་ར་བཅས། །རྣམ་བཏགས་ངག་ནི་དག་པར་བྱེད། །ལྷ་ལ་མེ་ཏོག་དྲི་བཟང་སོགས། །ནངས་པར་ཡང་དག་མཆོད་ནས་ནི། །ལན་བདུན་སྔགས་བྱས་ཟོས་ན་ནི། །ཟླ་བ་དྲུག་གིས་ཐོས་འཛིན་བྱེད། །ཟླ་བ་གསུམ་གྱིས་ཚིག་བདག་འགྱུར། །ཟླ་བ་གཅིག་གིས་བློ་ལྡན་ཞིང་། །ཁུ་བྱུག་གཞོན་ནུའི་སྐད་བཞིན་དུ། །དབྱངས་སྙན་པ་ནི་སྐྱེ་བར་འགྱུར། །ཞེས་དང་། ཨོཾ་བཱག་དི་ནི་བཱ་ཙརྨ་ནི་ཡཙྪ་ས་ར་སྭ་ཏཱི་མ་ཧཱ་ཤྭེ་ཏེ་སྭཱ་ཧཱ། པདྨ་ལས་སྐྱེས་པའི་དཀར་མོ་ཆེན་མོའི་སྙིང་པོ་འདིས་ནི་གོང་དུ་བཤད་པའི་ལས་ཐམས་ཅད་བྱེད་པར་འགྱུར་རོ། །ཞེས་གསུངས། ཡང་ལེའུ་དང་པོར། ཨོཾ་པི་ཤཱ་ཙི་པརྞ་ཤ་བ་རི་སརྦ་ཨུ་པ་དྲ་བ་ནཱ་ཤ་ནི་སྭཱ་ཧཱ། རིག་པ་ཆེན་པོ་འདི་མ་བསྒྲུབས་སུ་ཟིན་ཀྱང་རྐང་གཉིས་པ་དང་རྐང་བཞི་པ་ཐམས་ཅད་ཀྱི་རྣམ་པར་འཚེ་བ་སེལ་བར་བྱེད་ཅིང་། ལས་ཐམས་ཅད་བྱེད་པར་འགྱུར་རོ། །སྦྱིན་སྲེག་གམ་བཟླས་པའམ་ཁྲུས་སམ་སྔགས་མདུད་མངོན་པར་བསྔགས་པའི་ཆུ་འཐུང་པའམ་བྱབས་པས་ནད་ཐམས་ཅད་སེལ་བར་བྱེད་དོ། །གྲོ་ག་ལ་གུར་གུམ་གྱིས་བྲིས་པའི་སྔགས་རྐེའམ་དཔུང་པ་ལ་བཏགས་ན་རྩོད་སྦྱོང་ལས་རྒྱལ་བ་ཐོབ་པར་འགྱུར་ཞིང་། རིམས་ཉིན་བཞི་པ་སོགས་མི་ཟད་པའི་ས་ལས་རྣམ་པར་གྲོལ་བར་འགྱུར་རོ། །སྲིན་པོ་ལ་སོགས་པའི་འཇིགས་པ་སེལ་བར་བྱེད་ཅིང་། འཐབ་པ་དང་འཁྲུགས་པ་དང་རྩོད་པ་དག་ལས་རྒྱལ་བ་སྒྲུབ་པར་བྱེད་དོ། །སྟག་དང་ཆུ་སྲིན་དང་ལྟོ་འཕྱེ་ཆེན་པོ་དང་རྐུན་པོ་ལ་སོགས་པས་མི་མཐོང་ཞིང་རྟག་ཏུ་བཟླས་ན་སྐྱེ་བོ་ཐམས་ཅད་དགའ་བར་འགྱུར་རོ། །ཞེས་སོ།།   །། ༈ 
འཇམ་དཔལ་དཔའ་བོ་གཅིག་པུ་གྲུབ་པའི་རྒྱུད་ཀྱི་ལེའུ་དང་པོ་ལས། ཨོཾ་ཨ་མཱ་ར་ཎི་ཛཱི་ཝནྟེ་ཡེ་སྭཱ་ཧཱ། སྔགས་ཀྱི་རྒྱལ་པོ་འདི་ལེགས་པར་བཟླས་ན་ལས་ཐམས་ཅད་བྱེད་པར་འགྱུར་རོ། །མངོན་པར་བསྔགས་པའི་ཆུ་འཐུང་ན་འབྲུམ་བུ་འོང་བར་མི་འགྱུར་རོ། །ལུས་ལས་སྐྱེས་པའི་དུག་མི་ཟད་པ་དང་། སྤྲེའུ་དུག་དང་སྦྲུལ་དུག་ལ་སོགས་པའི་རྨ་ལ་ཡུང་བ་དང་། ཨ་རུ་ར་དང་། རུ་རྟ་ལ་སོགས་པ་ལ་ཡོངས་སུ་བཟླས་ཏེ་བསྐུས་ན་རང་བཞིན་དུ་གནས་པར་འགྱུར་རོ། །ནད་དང་རྣམ་པར་འཚེ་བ་ཐམས་ཅད་ལ་སྔགས་མདུད་བཅིངས་ན་ཞི་བར་བྱེད་དོ། །རྟག་ཏུ་བཟླས་ན་ཚེ་ཟད་པ་ཡང་ཚེ་ལོ་བརྒྱ་ཐུབ་པར་འགྱུར་རོ། །མར་དང་ཏིལ་གྱི་སྦྱིན་སྲེག་གིས་ཐམས་ཅད་ཞི་བར་བྱེད་དོ། །མངོན་པར་བསྔགས་པའི་སྨན་གྱི་བཏུང་བས་ནད་ཐམས་ཅད་ལས་ཡོངས་སུ་ཐར་བར་བྱེད་དོ། །ལན་བརྒྱ་བཀྲུས་པའི་མར་ལ་མངོན་པར་བསྔགས་པས་ན་བའི་ཡན་ལག་ལ་བསྐུས་ན་རང་བཞིན་དུ་གནས་པར་འགྱུར་རོ། །མགོའི་ནད་ལ་ཏིལ་མར་ལ་སྔགས་ཏེ་བསྐུས་ན་རང་བཞིན་དུ་གནས་པར་འགྱུར་རོ། །གདུག་པའི་རྨ་ལ་ཆུ་ལ་སྔགས་ནས་གཏོར་བས་སོས་པར་འགྱུར་རོ། །སྤྲི་ཧའི་ནད་ལ་བེ་དོང་ལ་སོགས་པའི་མཚོན་གྱིས་གཏུབས་པས་ཀྲྀ་ཧ་བཅད་པར་འགྱུར་རོ། །ནི་རྒུན་དྷི་དང་། ནིམ་པའི་རྩ་བ་རྨ་བྱའི་མཇུག་སྒྲོ་དང་བཅས་པ་གཅིག་ཏུ་སྦྱར་ལ། བརྒྱ་རྩ་བརྒྱད་མངོན་པར་བསྔགས་པའི་བདུག་པས་བདུག་ན། རིམས་ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་ལ་སོགས་པ་སེལ་བར་བྱེད་ཅིང་། འབྱུང་པོ་དང་། ཤ་ཟ་དང་། ཚངས་པ་དང་། སྲིན་པོ་ལ་སོགས་པ་སེལ་བར་འགྱུར་རོ། །བུད་མེད་བུ་ཤི་བ་ལ་ལན་བརྒྱ་རྩ་བརྒྱད་མངོན་པར་བསྔགས་པའི་བུམ་པས་ཁྲུས་བྱས་ན་བུ་གསོན་པོ་དང་ལྡན་པར་འགྱུར་རོ། །གྲོ་ག་ལ་བྲིས་པའི་སྔགས་རྐེད་པའམ་དཔུང་པ་ལ་བཏགས་པས་མངལ་སྲུང་བར་འགྱུར་རོ། །སྔགས་རྗེས་སུ་དྲན་པས་གཡུལ་ངོགས་སུ་འཇུག་ན་རྒྱལ་བ་རྙེད་པར་འགྱུར་ཞིང་བྱབས་པས་ནད་ཐམས་ཅད་སེལ་བར་བྱེད་དོ། །ཞེས་སོ།   ། ༈ གཤིན་རྗེ་གཤེད་ཀྱི་རྒྱུད་རྟོགས་པ་གསུམ་པ་ལས། ཞི་བའི་ལས་ནི་ཟླ་བ་ཡིན། །རྒྱས་པ་དེ་བཞིན་མིག་ཏུ་བསྒྲགས། །དབྱེ་བ་ཡོན་ཏན་ཞེས་བྱ་སྟེ། །དགུག་པའི་ལས་ནི་དེ་བཞིན་མདའ། །བསྐྲད་དང་མནན་པ་དབང་པོ་ཡིན། །མནན་པ་རྗེས་སུ་འབྲང་བ་ཡིས། །བསད་པའི་ལས་ནི་རྒྱ་མཚོར་འདོད། །ལས་རྣམས་དེ་དག་རེ་རེ་ལའང་། །འཕགས་སོགས་མཆོད་སྦྱིན་དང་པོ་སྟེ། །ཉི་མ་གཉིས་པ་གཏོར་མ་སྦྱིན། །གསུམ་པ་བཟླས་པ་རྣམ་པར་འབད། །བཞི་པ་སྦྱིན་སྲེག་ཚང་བར་བྱ། །ལྔ་པ་ལས་ཀྱི་འཁོར་ལོ་བསྐོར། །དྲུག་པ་བསམ་གཏན་རྩེ་གཅིག་བྱ། །བདུན་པ་ལས་ཀྱི་ལྷག་ཆད་བསྐང་། གྲོགས་ཀྱི་ལས་ལ་ཁྱད་པར་དུ། །ལས་ཀྱི་གཙོར་ནི་གང་བསྒྲུབ་དེའི། །འཁོར་ལོ་བསྐོར་བ་ཉི་མ་བཞིས། །ལས་ཀྱི་བྱེ་བྲག་འདི་ཤེས་ན། །ཞི་བས་འཇིགས་པ་བརྒྱད་ལས་སྐྱོབ། །རྒྱས་པས་ཡོན་ཏན་དྲུག་དང་སྦྱོར། །དབང་གིས་མོས་པ་རྣམ་བཞིར་འགྱུར། །དབྱེ་བས་གསང་སྡེ་བརྒྱད་དང་འབྱེད། །མནན་པས་དབང་པོ་དྲུག་འཆིང་བྱེད། །གཞན་ནི་ཇི་ལྟར་དེ་བཞིན་ནོ། །སྔགས་དང་རྫས་དང་སྦྱོར་བ་ལ། །དཔྱད་ན་དངོས་གྲུབ་མ་འགྲུབ་སྟེ། །གལ་ཏེ་ཡིད་གཉིས་ཟ་གྱུར་ཏམ། །བསམ་པ་འགྱུར་རམ་དད་པ་ཉམས། །དེ་ཚེ་དངོས་གྲུབ་སྟེར་བ་ཡང་། །ཕྱིར་ལྡོག་འགྱུ ར་བར་གདོན་མི་ཟ། །དད་པ་བརྟན་པོས་བསྒྲུབ་པ་ན། །ནམ་མཁའ་མེད་པར་གྱུར་ན་ཡང་། །སྔགས་ཀྱི་དངོས་གྲུབ་མེད་མི་སྲིད། །ལྷ་དང་དྲང་སྲོང་གིས་བཤད་པའི། །རིག་སྔགས་བསླུ་བ་མི་སྲིད་ན། །འདོད་ཆགས་བྲལ་བས་བྱས་པ་ཡི། །གསང་སྔགས་སྦྱོར་བས་བསླུ་བ་ནི། །མ་བྱུང་འབྱུང་བར་མི་འགྱུར་རོ། །ཆོས་ཉིད་བསམ་གྱིས་མི་ཁྱབ་པའི།  །སོགས་སོ།།   །། ༈ 
སྨན་བླའི་མཚན་དྲན་པ་དང་། གཟུངས་བཟླས་པས་ཚངས་སྤྱོད་མི་ཉམས་ཤིང་ནད་ཕོགས་ཀྱིས་དབང་པོ་ཉམས་པ་སོགས་སོས། ནད་ཐམས་ཅད་ཞི་ཞིང་བྱང་ཆུབ་བར་དུ་མི་འབྱུང་། འཇིགས་པ་ཐམས་ཅད་ལས་སྲུང་ཞིང་ཟས་གོས་སོགས་རྩོལ་མེད་དུ་རྙེད། བུད་མེད་ཀྱི་སྲིད་པ་ཐ་མར་བྱེད་ཅིང་ངན་སོང་ལས་ཐར་བ་སོགས་ཕན་ཡོན་དཔག་ཏུ་མེད། ཆོ་ག་མདོ་རང་རྐང་དང་། སྔགས་ཆོག་ཏུ་བཀྲལ་བ་གཉིས་ཡོད། སྔ་མ་ཡོངས་གྲགས་དང་། ཕྱི་མ་ངོར་ཆེན་རྡོ་རྗེ་འཆང་སོགས་བཞེད། བྱ་རྒྱུད་དང་མཐུན་པར་བཀྲལ་བའི་དབང་བཀའ་དང་། བདག་བསྐྱེད་གཙོ་འཁོར་གསུམ་པ་དང་། མདུན་བསྐྱེད་སྨན་བླ་མཆེད་བདུན་བྱས་པའི་རྗེས་གནང་བཅས་བོ་དྷི་སཏྭཱ་ནས་བརྒྱུད་པ་དང་། ཡང་ཇོ་བོ་ནས་བརྒྱུད་པའི་བདག་མདུན་གཉིས་ཀ་གཙོ་འཁོར་གསུམ་པར་བྱས་པ་ཞིག་ཀྱང་ཡོད་སྣང་། སྔ་མའི་སྐབས་གཟུངས་རིང་དང་། བར་པར་གཟུངས་འབྲིང་པོ། ཕྱི་མར་གཟུངས་ཐུང་གཙོ་བོར་བཟླ་བར་གསུང་སྣང་། འོན་ཀྱང་ཕྱི་མའི་རྒྱུན་ཤིན་ཏུ་དཀོན་པས་སླར་བཙལ་ལོ།   ། ༈ 
འཇམ་དབྱངས་སྨྲ་སེང་འདི་ཡིག་རྙིང་རྣམས་དང་། སྣར་ཐང་བརྒྱ་རྩའི་རྒྱ་གཞུང་བཅས་སུ་སེང་གེ་གདན་ཐབས་དང་། ཕྱག་གཡས་རལ་གྲི་ཕྱར་ཞིང་། གཡོན་ཨུཏྤལ་ཡུ་བ་ཐུགས་ཀར་བཟུང་བའི་མེ་ཏོག་སྙན་ཐད་ཁ་བྱེ་བར་གླེགས་བམ་མཚན་པ་ཁོ་ན་བཤད། དཔའ་བོ་བཅུ་གཉིས་ཀྱི་རྫས་གླ་བ་ཞེས་བཤད། ཕྱིས་ཀྱི་ཡིག་ཆར་ཕྱག་ཆོས་འཆད་སོགས་དང་། རྫས་ལ་ཨ་བ་བཤད་པ་རེ་ཡང་སྣང་། ཡིག་ཆ་ཕྱི་མར། ར་དཀར་གྱི་འོ་མ་དབྱངས་ཅན་མ་ཞུ་བ་དང་། བ་དམར་གྱི་འོ་མ་འཇམ་དབྱངས་ཞུ་བའི་བདུད་རྩིར་བསམས་ལ་སྦྲུས་ཞེས་སྣང་བས། སྤྲོ་ན་འོ་མའི་སྟེང་དུ་ལྷ་སོ་སོ་བུམ་བསྐྱེད་ལྟར་བསྐྱེད་ཅིང་བཟླས་མཐར་འོད་དུ་ཞུ་བའི་བདུད་རྩིར་བསམ་པ་ལེགས་སྙམ། སྦྲང་རྩི་དབང་སྡུད་ཀྱི་རྫས་ཡིན་པས་ཤེས་རབ་གཙོ་བོ་བྱེད་པ་ལ་མི་དགོས་ཞེས་ཁ་ཅིག་སྨྲ་ཡང་། ཤེས་རབ་དབང་དུ་བྱེད་པ་མཚོན་ཕྱིར་བསྲེ་བ་ལེགས་ཤིང་ཡིག་རྙིང་དུའང་འབྱུང་། སྣོད་ལས་མཐུན་གྱི་ཁ་དོག་ཅན་གྱི་དབུས་སུ་ཟངས་སམ། ཙནྡན་ནམ། ཤུག་པའི་རལ་གྲི་སོར་བཞི་པ་བསྒྲེང་པའི་ཕྱོགས་བཞིར་སྔགས་བཟླ་བཞིན་པས་རིལ་བུའི་ཡི་གེ་དབུ་ཕྱིར་བསྟན་བརྩེགས་ཞེས་བཤད་པ་དང་། ཡང་རིལ་བུའི་གྲངས་ཉིས་བརྒྱ་བཅུ་དྲུག་བྱ་བར་བཤད་པ་སྣང་བས་རྒྱུ་མཚན་བརྟག  །གསན་ཡིག་ལ་ལར་འཇམ་དཔལ་ཡབ་ཡུམ་རྒྱལ་ཆེན་བཞིས་བསྐོར་བའི་རྗེས་གནང་ཞེས་སྣང་བ་དེ་འདྲ་བའི་རྒྱུན་ཀྱང་ཡོད་པར་མངོན། རྗེས་གནང་ཁ་ཅིག་ཏུ་ཚིག་འཇམ་དཀར་མ་ཏི་ལུགས་ལ་དཔེ་བླངས་པའང་སྣང་། མཇུག་ཏུ་བཟླས་ལུང་དང་། ཡིག་རྙིང་ལས་བཤད་པའི་རྗེས་སྡུད་ཀྱི་རྫོགས་རིམ་དམིགས་པར་འབོགས་པའི་ཚུལ་ཀྱང་སྣང་ངོ་།   ། ༈ ཀུ་རུ་ཀུལླེ་ཞེས་སྔ་མ་རྣམས་ཀྱིས་རིགས་བྱེད་མར་བསྒྱུར། ཡིད་བཟང་རྩེ་པས། ས་སྒྲོག་རིགས་སུ་བསྒྱུར་བར་སྣང་།   ། ༈ ཀུན་དོང་ཞེས་པ་སྒོག་སྐྱ།   ། ༈ ཀེའུ་ཞེས་པ་ལ་ལས་བཙོང་དང་། ཁ་ཅིག་རི་སྒོག་ལ་ངོས་འཛིན།   ། ༈ ཅུང་སེང་ཞེས། འཕྲོག་མ་ལ་ཅུང་སེང་སྦྱིན་པ་ཞེས་འབྱུང་བས་ཆང་བུའི་བརྡ་རྙིང་ཡིན།   ། ༈ ཁ་སཱཪྤཱ་ཎི་འགའ་ཞིག་གིས་མཁའ་སྤྱོད་དུ་བསྒྱུར། ཁྲོ་ལོས་རྒྱུ་མཚན་བཅས་མགྲོན་བུ་ཟད་པར་བསྒྱུར་རོ། ༈   །ལ་དུ་ནི། མྱ་ངན་འདས་ཆེན་ལས་འདི་ལྟར་གསུངས། མར་དང་། བག་ཕྱེ་དང་། སྦྲང་རྩི་དང་། །བཅའ་སྒ་དང་། པི་པི་ལིང་དང་། ན་ལེ་ཤམ་དང་། རྒུན་འབྲུཾ་དང་། བལ་པོའི་སེའུ་དང་། འུ་སུའི་འབྲས་བུ་ལ་སོགས་པ་རྣམས་བསྡུས་ན་ལ་དུ་ཞེས་བྱའོ། །ཞེས་གསུངས།   ། ༈ རབ་གནས་སྐབས། འདག་ཆལ་གྱི་རྫས། །སྲན་དཀར་ཕྱེ་མའམ། སུག་པ་དཀར་པོའི་ཕྱེ་མའམ། ཐལ་དཀར་རྡོ་རྗེའི་ཕྱེ་མ་ཞེས་གསུངས་པ་གང་རུང་གིས་ཆོག་པར་མངོན། ཤུན་ལྤགས་ལྔ་མ་འབྱོར་ན་སྐྱུ་རུ་རའི་ཕྱེ་མས་ཆོག་པར་བཤད།   ། ༈ གཎྜིའི་རྒྱུ། པ་ལ་ཤ   །རྒྱ་སྐྱེགས་ཤིང་། ཨ་ཤཏྠ། པི་ལིང་ཤིང་།ཨ་ཤྭ་ཏ། རྒྱ་སྟར་ཤིང་། ཙུ་ཏ། ཨ་མྲ་ཤིང་།   ། ༈ རྡོ་རིང་དབོན་པོ་མཁས་བཙུན་ཀུན་དགའ་རྒྱལ་མཚན་ཡང་དགུང་ལོ་བཅུ་གཅིག་དུས་མནལ་ལམ་དུ་ཀུན་སྤངས་རིན་པོ་ཆེར་ཚེ་སྒྲུབ་ཞུས་ཟེར་བའི་བསྐུལ་མ་བྱུང་བ་ལྟར་ཞུས་པས། ཀུན་སྤངས་རྗེས་ཀུན་མཁྱེན་རོང་པོ་ནས་བརྒྱུད་པའི་ཚེ་སྒྲུབ་ཞག་བདུན་མ་འདི་ཆིག་བརྒྱུད་དུ་གནང་། སྐུ་ཚེ་རིང་པོར་ཡོང་བའི་ལུང་བསྟན་མཛད་པ་ལྟར་དགུང་ལོ་བརྒྱད་ཅུ་རྩ་གསུམ་དུ་བཞུགས་ཤིང་། མཐར་སྐུ་ལ་བསྙུན་པ་མེད་པར་གཤེགས་ཞེས་འབྱུང་།   ། ༈ དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས། དབང་ལག  །ལག་པ་ཆད་པ་སོས། ཆུ་སྲིན་སྡེར་མོ། སོར་མོ། ནཱ་ག་གེ་སར། བྱང་ཆུབ་ཀྱི་སེམས་དྲན། ནཱ་ག་པུཥྤ། མེ་ཏོག་གི་ཚལ་དུ་འགྱུར། སྤོས་དཀར། དྲི་ང་བ་སྤང་ཞིང་བྱང་ཆུབ་ཀྱི་སེམས་དྲན། འབྲས་ཡོས། ནད་ཐམས་ཅད་འཚོ། ཐང་ཀ  །མཚལ་དཀར། ཁྲག་སྐམ་པ་པོས།  རྡོ་རྒྱུས་བྱ་བལ་མ། རྒྱུས་པ་ཆད་པ་སོས། །སྤུ་ཤེལ་རྩེ། ག་བུར། ཚ་བའི་ནད་སོས། དར་ལེ་བརྒན། ཁྱིང་སེར་འཇིགས་པ་ཐམས་ཅད་སེལ། དུང་། རུས་ཆག་སོས། རས་སྐུད་གསུམ། ཚེ་བསྲིང་། མངར་གསུམ་བཅས་ཞལ་ཟས་རོ་བརྒྱ་དང་ལྡན་པར་འགྱུར། སྦྱར་བ་ཀླུ་སྨན་གྱི་མཆོག་ཏུ་གསུངས་ཤིང་། སོ་སོའི་ཕན་ཡོན་དང་བཅས་ཏེ་བསྟན་པའི་མཐར། དེ་དག་ཀུན་ཀྱང་རིན་པོ་ཆེའི་བུམ་པའམ་ཁམ་ཕོར་ལྟ་བུ་མཆུ་ལྔ་པར་བླུགས་ནས་སྦས་ན་གང་ཉམས་པ་དེ་སོས་པར་འགྱུར་རོ། །ཞེས་གསུངས། ཡང་དེ་ཉིད་ལས་ཀླུའི་བྱད་འགྲོལ་ཚུལ་འདི་ལྟར་གསུངས་ཏེ། རྟག་ཏུ་སྐོམ་ཆས་གཏོར་མས་མཆོད། །ཞི་བས་དུག་དབྱུང་བྱད་ཀྱང་དགྲོལ། །རྩ་བའི་དཀྱིལ་འཁོར་ཕྱོགས་བཞི་རུ། །ནཱ་གའི་གཟུགས་བྲིས་དུག་ཅན་བཞག  །ཚོན་སྐུད་སྦྲུལ་བསྒོམ་བཅིངས་པ་དེ། །སྤུ་གྲི་འབར་བས་གཏུབས་ཤིང་དབྱེ། །རི་རབ་ཆེན་པོའི་ཕྱོགས་བཞི་ན། །དུག་བཞི་ལས་སྐྱེས་རིགས་བཞིའི་ཀླུ། །ས་ཆུ་མེ་རླུང་དུག་བཞིའི་བདག  །བཅིངས་པ་གྲོལ་ཕྱིར་དུག་དབྱུང་ཕྱིར། །དགུ་ཐུབ་སྒྲོ་ལ་ཁྱུང་བསམ་ཕྱིར། །དུག་བྱབས་སྔགས། ཨོཾ་ཉི་མ་ས་ལ་ནཱཾ། གྷུ་ནི་ཞི་རྩི་ཏ་གྷུ་ལཾ་ནཱཾ། ཙི་ཏྲ་མུ་ཏྲ་ཟློག་བྱེར། ཙི་ཏྲ་གྷུ་ལི་ནཱཾ། ཡ་ཁྲ་ནཱ་ག་ཟློག  །ནཱ་ག་ཤིག  །ནཱ་ག་མགོ་ལ་ནཱཾ། ཧ་ས་པ་ཁྲེ། རང་རང་གནས་སུ་བཏང་། །བདེན་པ་བདར་ཞིང་ཏིང་འཛིན་གསལ། །ཞེས་སོ།   ། ༈ རྡོ་རྗེ་བདེ་ཁྲོས་ཀྱི་རྒྱུད་ལས། བུམ་པར་ནོར་བུ་རིན་ཆེན་གཞུང་། །མཛེས་པའི་དར་སྣ་འབྲུ་ཡི་མཛོད། །གང་གི་རྟེན་ལ་སྦས་གྱུར་ན། །གནོད་པ་རགས་པ་ཞི་བར་འགྱུར། །ཞེས་དང་། བཙན་དུག་གུ་གུལ་གླ་རྩི་དང་། །ཤུ་དག་ཤིང་ཀུན་མུ་ཟི་དྲུག  །གསང་སྔགས་བཏབ་སྟེ་ལུས་ལ་བྱུགས། །གུ་གུལ་ཉ་མཁྲིས་གླ་རྩི་དང་། །སྒོག་པ་ཤུ་དག་དྲི་ཆེན་རྣམས། །བདུག་པ་བྱའམ་ཡང་ན་བཀྲུ། །གསེར་གཡུ་བྱི་རུ་མིག་མ་དང་། །བཙན་དུག་རྨ་བྱའི་མཁྲིས་པ་དག  །བཅངས་ན་གྲུབ་པའི་མཆོག་ཏུ་འགྱུར། །ཞེས་སོ།  ། ༈ གསང་བ་དངོས་བསྟན་ལས། བསྐྱེད་པའི་རིམ་ལ་དམིགས་ཐོབ་ནས། །སྙིང་གར་ཡེ་ཤེས་སེམས་དཔའ་བསམ། །དེ་ཡི་རང་བཞིན་སྙིང་ནང་དུ། །པདྨ་འདབ་བཞི་ཐིག་ལེས་བརྒྱན། །ཉི་ཟླའི་བར་དུ་རྒྱ་སྲན་ཚད། །དེ་ཡི་ནང་དུ་གནས་པའི་སྲོག  །ཨ་ཤད་དམར་མོའི་རྩེ་ལྟར་བསྒོམ། །དེ་ལ་དམིགས་པ་བརྟན་པ་དང་། །ཅི་ཡང་བསམ་པར་མི་བྱ་སྟེ། །བསམ་གྱིས་མི་ཁྱབ་དེ་བསམ་ན། །དེ་ལས་ཡེ་ཤེས་སྐྱེ་བར་འགྱུར། །གསལ་ཞིང་མི་རྟོག་རིག་པའི་སྐུ། །ཡེ་ཤེས་ཞེས་ནི་དེ་ལ་བྱ། །ཞེས་སོ།  ། ༈ 
རྣམ་སྣང་སྒྱུ་འཕྲུལ་དྲྭ་བའི་རྒྱུད་ལས། བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲན་ཅིང་གཡོ་སྒྱུ་མེད། །གསང་སྔགས་རྒྱུད་ཀྱི་སྦྱོ ར་ཤེས་པས། །དཀྱིལ་འཁོར་འབྲི་བའི་ལས་བྱའོ། །དེ་ཉིད་བཅུ་ནི་ཡོངས་ཤེས་ཤིང་། །སེམས་ཅན་ཀུན་ལ་མི་འཇིགས་སྦྱིན། །ཐེག་པ་ཆེ་ལ་རྟག་དགའ་བ། །དེ་ནི་སློབ་དཔོན་ཡིན་པར་གསུངས། །ཞེས་དང་། དགེ་དང་སྡོམ་ལ་དགའ་བ་དང་། །རྟག་ཏུ་བླ་མ་ལ་གུས་དང་། །རྒྱུན་དུ་ལྷ་རྣམས་མཆོད་བྱེད་པའི། །ཡོན་ཏན་ལྡན་ན་སློབ་མ་ཡིན། །ཅེས་དང་། སློབ་དཔོན་ཅི་འདྲ་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང་། །དེ་བཞིན་གཤེགས་པ་རིན་ཆེན་ཏོག  །དེ་ནི་ཡེ་ཤེས་རྒྱ་མཚོ་ཆེ། །ཡིད་བཞིན་ནོར་བུ་རིན་ཆེན་བཞིན། །སློབ་དཔོན་གྱི་ནི་ཡོན་ཏན་བཟུང་། །སྐྱོན་རྣམས་ནམ་ཡང་མ་ཡིན་ནོ། །ཡོན་ཏན་བཟུང་བས་དངོས་གྲུབ་ཅིང་། །སྐྱོན་རྣམས་ཀྱིས་ནི་དངོས་གྲུབ་ཉམས། །དེ་ཡི་གྲིབ་མའང་མི་འགོམ་སྟེ། །མཆོད་རྟེན་བཤིག་དང་འདྲ་བར་གསུངས། །ཞེས་དང་། དེ་ཕྱིར་ཀུན་གྱིས་རབ་བསྒྲིམ་སྟེ། །བསམ་ཡས་འབྲས་བུ་སྨིན་བྱེད་པའི། །སངས་རྒྱས་འབྲས་བུ་འདོད་བྱེད་པའི། །སེམས་ཅན་དད་དང་ལྡན་པས་མཆོད། །ཅེས་སོ། །ཡང་། གཡས་པས་སྲུང་སྐུད་བཅིངས་ནས་སུ། །ལག་མཐིལ་སོ་ཤིང་ཀུ་ཤ་སྦྱིན། །དང་། དེ་ལ་འདི་ནི་སྐྱབས་སུ་འགྲོ་བ་ཡིན་ཏེ། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་བཤགས་པར་བགྱི། །འགྲོ་བའི་དགེ་ལ་ཡི་རང་སྟེ། །སངས་རྒྱས་བྱང་ཆུབ་ཡིད་ཀྱིས་བཟུང་། །ཞེས་དང་། དང་པོ་ས་གཞི་ཡོངས་སུ་བཟུང་། །གཉིས་པ་ལ་ནི་གནས་པ་སྟེ། །ནུབ་གསུམ་པ་ལ་འཇུག་པ་ཡིན། །ཞེས་དང་། རྡོ་རྗེ་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་སྙིང་པོའི་དཀྱིལ་འཁོར་འདིར། །བདག་གིས་སློབ་མ་གཞུག་པར་བྱ། །དང་། ཐུར་མ་ལ་སོགས་མེད་ན་ཡང་། །ཕྱག་རྒྱའི་གཟུགས་རྣམས་བསྟན་པར་བྱ། །ཞེས་ཐུར་མ་མེ་ལོང་འཁོར་ལོ་སོགས་དབང་རྫས་དམིགས་བསལ་མ་རྙེད་ན་ཕྱག་རྒྱས་ཆོག་པར་བཤད། དེ་ནས་བླ་མས་ཡོན་བླངས་ཏེ། །ས་དང་ཡིད་འོང་ཆུང་མ་དང་། །རིན་ཆེན་གསེར་དང་ནོར་བུ་འབར། །མུ་ཏིག་བྱི་རུ་ལ་སོགས་དང་། །ལུས་ཀྱང་དབུལ་དུ་གཞུག་པར་བྱ། །བླ་མ་ལ་ནི་གུས་པ་ཡི། །སློབ་མས་དེ་བཞིན་ཁོ་ནར་བྱ། །བླ་མ་མགུ་བས་དངོས་གྲུབ་སྟེར། །གཞན་དུ་མིན་ཞེས་ཐུབ་པས་གསུངས། །དང་། དཀྱིལ་འཁོར་གྱི་ནི་ཡོ་བྱད་ཀུན། །སློབ་དཔོན་ཉིད་ཀྱིས་བསྡུ་བར་བྱ། །སློབ་མས་ཅུང་ཟད་མི་སྤྱད་དོ། །དེ་ནི་དམ་ཚིག་ཉམས་པར་འགྱུར། །སློབ་དཔོན་གྱིས་ཀྱང་ཅི་རིགས་པར། །བདག་ཉིད་འདོད་པས་སྤྱད་པར་བྱ། །ཞེས་དང་། གང་ཞིག་བཅིངས་པ་ཙམ་གྱིས་ནི། །སྡིག་པ་ཀུན་ལས་རྣམ་གྲོལ་ཞིང་། །འདི་ན་ལུས་ནི་བྱིན་རླབས་ཏེ། །རང་གི་གཟུགས་སུ་རྣམ་བསྒོམ་ན། །སངས་རྒྱས་ཉིད་ཀྱང་ཐོབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །དང་། ཨོཾ་བཛྲ་གཎྜེ་ར་ཎི་ཏ། ནས། བཛྲ་དྷརྨ་ཧྲྀ་ད་ཡ། སནྟོ་ཥ་ནི་ཧཱུྃ་ཧཱུྃ་ཧཱུྃ། ལག་གཡས་རྡོ་རྗེ་གསོར་བྱ་ཞིང་། །སྣ་ཚོགས་ཁུགས་སུ་འགྱུར་བ་ཡི། །རྡོ་རྗེའི་གླུ་ཡིས་བསྟོད་པར་བྱ། །དང་། མི་ཐོད་ལས་བྱས་ཅང་ཏེའུ་ལ། །སྤྲེའུའི་པགས་པས་གཡོགས་ནས་ནི། །ངོས་གཉིས་ལ་ནི་པདྨ་བྲི། །བུད་མེད་ཁྲག་གིས་འཛག་པར་བྱ། །དེ་ཡི་དཀྱིལ་དུ་ཕྲེཾ་བྲིས་ཏེ། །མི་ཡི་སྐྲ་ཡིས་བཏགས་ནས་ནི། །མཐིང་རིལ་གྱི་ནི་རྐང་རུས་ཀྱིས། །ཕྲེཾ་ཧཱུྃ་མིང་ནས་བརྗོད་ཅིང་བརྡུང་། །དང་། སྦྱིན་སྲེག་དེ་ཉིད་ལ་གནས་པའི། །མེ་ནི་ལྷ་ཡི་ཞལ་ཡིན་པས། །སྣ་ཚོགས་ལས་ཀུན་འགྲུབ་བྱེད་པའི། །སྦྱིན་སྲེག་ལས་ནི་རབ་ཏུ་བཤད། །སྦྱིན་སྲེག་གིས་ནི་ལྷ་རྣམས་ཚིམ། །ཚིམ་པར་གྱུར་ནས་དངོས་གྲུབ་སྟེར། །གསང་སྔགས་ལྷག་ཆད་གང་ཡིན་པ། །ཐམས་ཅད་སྦྱིན་སྲེག་དག་གིས་སྐོང་། །དེ་ཕྱིར་སྐུ་གསུམ་མཁས་མཆོག་གིས། །སྦྱིན་སྲེག་རབ་ཏུ་བསྔགས་པར་མཛད། །ཅེས་དང་། ཀུ་ཤའི་རྩེ་མོས་གནོན་པ་ཡིས། །ཐབ་ཁུང་ཁོར་ཡུག་བསྐོར་བར་བྱ། །མེ་ནི་འབར་བར་ཤེས་པ་དང་། གཡས་པས་མི་འཇིགས་མཐེབ་བསྐྱོད་ཅིང་། །གསང་སྔགས་འདི་ཡིས་ཆོ་ག་བཞིན། །མེ་ཡི་ལྷ་ནི་སྤྱན་དྲང་ངོ་། །ཚུར་སྤྱོན་ཚུར་སྤྱོན་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག  །བསྲེག་བླུགས་ཞལ་ཟས་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །ཨོཾ་ཨགྣ་ཡེ། དཱི་པྱ་དཱི་པྱ། ཨཱ་བེ་ཤ་མ་ཧཱ་ཤྲཱི་ཡེ། ཧ་བྱ་ཀ་བྱ། བཱ་ཧཱ་ནཱ་ཡ་སྭཱ་ཧཱ། སོགས་གསུངས་ཏེ། འཇིག་རྟེན་དང་འཇིག་རྟེན་ལས་འདས་པའི་མེ་ལྷ་གཉིས་ཀ་སྤྱན་དྲངས་རྗེས་བསྐྱེད་པར་གསུངས་སོ།   ། ༈ གཤིན་རྗེ་དགྲ་ནག་གི་རྒྱུད་ཀྱི་ལེའུ་བདུན་པ་ལས། ཤེས་རབ་བསྐྱེད་པར་བྱ་བའི་ཕྱིར། །ཞལ་གསུམ་ཕྱག་དྲུག་དམར་བ་ལ། །ཞི་བ་ཕྱག་ན་པདྨ་བསྣམས། །དབྱངས་ཅན་བརྟུལ་ཞུགས་ཅན་གྱིས་བསྒོམ། །དང་། དེ་ནས་བཅོམ་ལྡན་འདས་དམ་ཚིག་ཆེན་པོའི་གཤིན་རྗེའི་གཤེད་རྡོ་རྗེ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་དབྱངས་ཅན་མའི་སྔགས་གསུངས་པ། ཨོཾ་པི་ཙུ་པི་ཙུ་པྲཛྙཱ་ཝརྡྷ་ནི། ཛྭ་ལ་ཛྭ་ལ་མེ་དྷ་ཝརྡྷ་ནི། དྷི་རི་དྷི་རི་བུདྡྷ་ཝརྡྷ་ནི་སྭཱ་ཧཱ། ཚེས་ཀྱི་དང་པོ་ནས་བཟུང་སྟེ། །ཀུན་ཏུ་ཟླ་བ་ཉ་ཡི་བར། །སྦྱར་བའི་སྐད་ནི་སྨྲ་བར་བྱ། །ཇི་སྲིད་ཟླ་བའི་རྗེས་འཇུག་པས། །རྟག་ཏུ་ཚིགས་བཅད་བརྒྱ་ཟིན་འདིས། །ངག་གི་དབང་ཕྱུག་འགྲུབ་པར་འགྱུར། །ཁམས་གསུམ་མ་ལུས་པ་དག་ནི། །མ་ལུས་ལུས་པ་མེད་པར་འགྲུབ། །ཅེས་སོ། །གཤེད་དམར་གྱི་རྒྱུད་ཀྱི་རིམ་པར་ཕྱེ་བ་གསུམ་པ་ལས་ཀྱང་ལྷའི་རྣལ་འབྱོར་མ་བསྟན་པ་མ་གཏོགས་སྔགས་ཀྱི་སྦྱོར་བ་འདི་ཁོ་ན་བཞིན་གསུངས་སོ།   ། ༈ གཤེད་དམར་རྒྱུད་བུ་འགྱུར་ལས། སྐྱ་རུ་རའི་ཕྱེ་མ་དང་། འོ་མ་ལ་སོགས་པ་བཟའ་བར་བྱ་སྟེ། ལོའི་སྦྱོར་བས་ཚེ་བརྒྱའོ། །དང་། སྐྱུ་རུ་ར་དང་། ཨ་རུ་ར་དང་། བུང་བའི་རྒྱལ་པོ་དང་། པི་པི་ལིང་དང་། ན་ལེ་ཤམ་དང་། ལྕགས་ཀྱི་ཕྱེ་མ་རྣམས་སྦྲང་རྩི་དང་། ཤ་ཁ་ར་དག་གིས་ཨུ་དུམྺཱ་རའི་འབྲས་བུའི་ཚད་ཀྱི་རིལ་བུར་བྱའོ། །དེ་ནས་རིལ་བུ་བཟའ་བར་བྱ་སྟེ། ཟླ་བས་ཚེ་ལོ་སུམ་ཅུར་འགྱུར་རོ། །དང་། ཐམས་ཅད་དུ་ཕ་མ་ཉིད་ལྷའི་རྣམ་པས་བཟའ་བར་བྱའོ། །སྔགས་ཀྱིས་མཉེས་ཤིང་བྱིན་གྱིས་བརླབ་པར་བྱའོ། །དང་། འབྲས་བུ་གསུམ་གྱི་ཕྱེ་མ་དང་། མར་དང་སྦྲང་རྩི་རྣམས་བཏུང་བར་བྱ་སྟེ་ནད་ཐམས་ཅད་འཇོམས་སོ།   ། ༈ རྣམ་སྣང་སྒྱུ་འཕྲུལ་དྲྭ་བའི་རྒྱུད་ལས། གང་ཞིག་ནོར་རྫས་འདོད་པ་ཡིས། །གནོད་གནས་འདི་འདྲ་བསྒོམ་བགྱིས་ན། །དེ་ཡིས་ས་ཆེན་ནོར་རྫས་ཀྱིས། །རིང་པོར་མི་ཐོགས་གང་བར་འགྱུར། །ཞེས་དང་། ལག་ན་རྡོ་རྗེ་བདུད་རྩི་ཡིས། །ཆུ་ཡང་རྟག་ཏུ་དབུལ་བར་བྱ། །དང་། གཟུགས་འོད་ཟེར་ཅན། བརྙན་མང་པོ་འཕྲོ་བ་ཡིས། །སྡང་བའི་སེམས་ཅན་བཅིངས་པ་དང་། །མིག་དང་ཁ་ནི་འདྲུབ་པར་བྱེད། །དང་། དཀྱིལ་འཁོར་དམར་པོ་རི་ཁྲོད་མ་ཆེར་འབར་བས། །ཁྲོ་བོའི་སྤྲིན་འཕྲོ་སྡུད་མཛད་ཅིང་། །གདོན་གང་སྐྱེ་རྒུའི་ནང་གནས་པ། །དེ་དག་ཁྲོ་བོའི་མེས་ཀྱང་བསྲེག  །ཕྱིར་ཡང་བསྲེགས་ནས་སངས་རྒྱས་ཀྱི། །ཁ་དོག་བདུད་རྩི་ཆར་འབེབས་མཛད། །དེ་འདྲ་རྣལ་འབྱོར་གྱིས་བསྒོམ་ན། །མི་ངས་ཐམས་ཅད་ཞི་བར་མཛད། །དང་། ཛཿཡི་ཡེ་ཤེས་ལས་བསྒྲུབས་པ། །རིག་སྔགས་མཚན་ནི་དུག་སེལ་མ། །སོགས་ནས། ཕྱག་བཟང་བུམ་པ་ཟླ་འདྲ་བའི། །ཁ་ནི་ཛ་ཡིས་རྣམ་བརྒྱན་པས། །དུག་གིས་ཕོག་པ་རྣམས་ལ་ལྡུག  །རྟག་ཏུ་སྐུ་གསུམ་དུག་སེལ་མ། །དུག་གིས་ཕོག་པ་རྣམས་ལ་བསྒོམ། །དེ་ལྟར་བསྒོམ་པར་བྱས་པ་ཡིས། །རིང་པོར་མི་ཐོགས་བྱང་ཆུབ་ཐོབ། །དང་། ས་ཡི་ཡེ་ཤེས་ལས་བསྒྲུབས་པ། །སྟོང་ཆེན་རབ་ཏུ་འཇོམས་མཛད་པའི། །ལྷ་མོ་ནད་ཀུན་འཕྲོག་མ་སྟེ། །སྡང་བའི་སེམས་ཅན་འཇོམས་མཛད་མ། །སོགས་ཕྱག་སྟོང་དབུ་སྟོང་དང་། ཕྱག་བརྒྱད། དབུ་བཞིའི་བསྒོམ་ཚུལ་དང་། དེ་ཡི་ལས་ཀྱིས་བསྐུལ་བ་ཡི། །གསང་སྔགས་དཔའ་བོས་གདོན་བར་བྱ། །རྣལ་འབྱོར་དབང་ཕྱུག་ལས་འདོད་པས། །འདི་བྱས་པས་ནི་སྲུང་བར་འགྱུར། །དང་། དྷྭཾ་ཞེས་བྱ་བ་བསྐྱེད་པ་ཡི། །བསྡིགས་པའི་མཛུབ་མོའི་ཕྱག་རྒྱ་ཅན། །དྲག་མོ་ཆེན་མོ་ཞལ་བཞི་པ། །སྤྱན་གསུམ་ཕྱག་བརྒྱད་རྣམས་ཀྱིས་བརྒྱན། །རལ་གྲི་གཏུན་ཤིང་འཁོར་ལོ་མདའ། །མདུང་རྩེ་གསུམ་པ་རྡོ་རྗེ་གཞུ། །ཆོམ་རྐུན་མཛུབ་མོས་བསྡིགས་པ་སྟེ། །རྡོ་རྗེ་རོ་ལངས་འབྱུང་བ་དག  །མཐོང་བས་དཔུང་རྣམས་བཅོམ་གཏོང་བས། །ལྷ་མོ་རྟག་ཏུ་བསྒོམས་ན་ནི། །རིང་པོར་མི་ཐོགས་བྱང་ཆུབ་ཐོབ། །འཇིག་རྟེན་གསུམ་རྣམ་པར་འཇོམས་པ་ལ་མཁས་པ་མཆོག་གི་རྡོ་རྗེ་རྩེ་མོ་ཞེས་བྱ་བའི་ཏིང་ངེ་འཛིན་ཏོ། །དང་། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས། བརྒྱ་བྱིན་མངོན་པར་མཐོ་བའི་སྟོབས་ལྷ་མ་ཡིན་རྣམ་པར་འཇོམས་པས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྒྱལ་མཚན་གྱི་རྩེ་མོའི་དཔུང་རྒྱན་གྱི་གཟུངས་ཆེན་པོ་འདི་གསུངས་སོ། །ཨོཾ་བྷ་ག་ཝ་ཏཱི་དྷྭ་ཛཱ་གྲ་ཀེ་ཡཱུ་རེ་པ་ར་སཻ་ནྱ། བི་དྷྭཱ་ནྶ་ན་ཀཱ་སྭཱ་སཻ་ནྱ་པ་རི་ལ་ནི། ཨུ་ལུ་ཀཱ་མུ་ཁི་ཁ་ཁ་ཁཱ་ཧི་ཁཱ་ཧི། པ་ར་སཻ་ནྱ་མ་ཨ་ནནྟ་བྷུ་ཛེ། ཨ་ནནྟ་མུ་ཁེ། པྲ་ཧ་ར་པྲ་ཧ་ར་ཧཱུྃ་ཕཊ྄་ཕཊ྄་སྭཱ་ཧཱ། དེ་ནས་རིག་སྔགས་ཆེ་གསུངས་པས། །སངས་རྒྱས་ཞིང་རྣམས་གཡོས་པར་འགྱུར། །བྱང་ཆུབ་སེམས་དཔའ་རབ་གཡོས་ཤིང་། །བདུད་ཀྱི་སྡེ་རྣམས་ཚིག་པར་གྱུར། །གནོད་སྦྱིན་སྲིན་པོ་གོས་བྲལ་ནས། །འཇིགས་ཤིང་སྐྲག་པར་གྱུར་པ་ཡིས། །གཙོ་བོ་རྡོ་རྗེ་རྣམ་སྣང་དྲན། །དང་། །ཁུ་ཚུར་གཉིས་ལས་གུང་མོ་གཉིས་གཤིབས་ཏེ་བསྒྲེང་བ་ལས་རིན་པོ་ཆེའི་ཚུལ་དུ་བཀུག་ལ་མཐེ་བོང་བརྐྱང་པའི་སྟེང་དུ་མཛུབ་མོ་གཉིས་གདུ་བུའི་ཚུལ་དུ་བྱས་པ་ནི་སངས་རྒྱས་འཁོར་ལོ་ཅན་གྱི་ཕྱག་རྒྱ་གཡུལ་ལས་སྒྲོལ་བར་བྱེད་པའོ། །གསུངས་ཏེ་ཏིང་འཛིན་སྔགས་རྒྱས་བསྟན་ལ། ལས་ཀྱི་ཚོགས་ནི་དམིགས་བསལ་མེད་དོ། །པྲ་ཡི་ཡེ་ཤེས་ལས་བསྒྲུབ་པ། །སྟོབས་ཆེན་ཕ་རོལ་གནོན་མཛད་མ། །སྤྱན་གསུམ་ཕྱག་བརྒྱད་གཡས་པ་ན། །རལ་གྲི་འཁོར་ལོ་མདུང་རྩེ་གསུམ། །མདའ་ཡིས་རྣམ་བརྒྱན་ཕྱག་གཡོན་ན། །རྡོ་རྗེ་ཞགས་པ་དགྲ་སྟྭ་གཞུ། །བསྣམས་པས་སྡང་བའི་བགེགས་ལྷུང་མཛད། །བུ་མི་འཚོ་དང་མོ་གཤམ་དག  །གསང་པའི་དཀྱིལ་འཁོར་བཅུག་ནས་སུ། །ལྷ་རྣམས་ཀུན་གྱིས་བུམ་པ་འཛིན། །སློབ་དཔོན་གྱིས་ནི་དབང་བསྐུར་ཞིང་། །དེ་ཡི་མངལ་དུ་བྱིས་པ་ནི། །འཇམ་པའི་གཟུགས་ཅན་འཇུག་པར་བསམ། །ཞགས་པའི་ཕྱག་རྒྱས་མཚན་ངན་ནས། །སྐྱེས་པའི་གཟུགས་ཅན་འབྱུང་བ་དག  །དྲན་པ་ཡིས་ནི་བྲལ་ནས་ཀྱང་། །མངལ་ནི་བསོད་ནམས་དག་གིས་སྤེལ། །མངལ་ཐམས་ཅད་རྣམ་པར་བལྟ་བ་སོ་སོར་འབྲང་མའི་ཡེ་ཤེས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དང་། ཨོཾ་མ་ཎི་དྷ་རི་བཛྲ་ཎི་མ་ཧཱ་པྲ་ཏི་ས་རི་སྭཱ་ཧཱ། ཞེས་བསྟན། ཨོཾ་མ་ཧཱ་ས་ཧ་སྲ་པྲ་མརྡྷ་མརྡྷ་ནཱ་བ་ར་སིདྡྷིཾ་ད་མཱི་གེ་མ་ཎི་བཛྲ་ཎི་ཧཱུྃ་ཕཊ་སྭཱ་ཧཱ། སོགས་སྟོང་ཆེན་རབ་འབྱམས་ཀྱི་སྙིང་པོ་གསུངས། བ་ཡི་ཡེ་ཤེས་རོལ་པས་བསྐྲུན། །ལྷ་མོ་ནོར་གྱི་བློ་གྲོས་མ། །གཟི་ཆེན་གསེར་གྱི་མདོག་ཅན་ལ། །ཕྱག་དྲུག་ལང་ཚོ་དར་ལ་བབས། །རྒྱན་རྣམས་ཀུན་གྱིས་བརྒྱན་པ་སྟེ། །འཇོ་སྒེག་ཐབས་བཅས་འབར་བ་སྟེ། །དེ་ཡི་ཕྱག་གཡས་མཆོག་སྦྱིན་མཛད། །གཉིས་པས་འབྲུ་ཡི་སྙེ་མ་དང་། །གསུམ་པ་ཡིས་ནི་མདའ་ཡང་གསོར། །ཕྱག་གཡོན་ཡིད་བཞིན་ནོར་བུ་དང་། །རིན་ཆེན་ཆར་འབེབས་གཞུ་ཡང་འཛིན། །གྲོགས་མོའི་སྐྱེ་བོས་ཡོངས་བསྐོར་ཅིང་། །མངགས་གཞུག་གནོད་སྦྱིན་མེ་ཡི་གཟུགས། །རིན་ཆེན་ཆར་པ་འབེབས་པ་དང་། །ནོར་ཀུན་གྱི་ནི་ཆར་པ་ཡང་། །འབེབས་པར་བྱེད་པ་བསམ་པར་བྱ། །ནོར་གྱི་བློ་གྲོས་ཆེན་མོ་འདི། །དེ་ལྟར་སྔགས་པས་བསྒོམ་ན་དེས། །དཔག་ཚད་བདུན་ནི་རྒྱས་པར་ཡང་། །ནོར་གྱི་ཆར་གྱིས་ཁྱབ་པར་མཛད། །བྱང་ཆུབ་ཤིང་མཆོག་དམ་པ་ན། །དེ་ལྟར་རྣལ་འབྱོར་བདག་ཉིད་བསྒོམ། །ནོར་གྱི་རྒྱུན་གྱི་ཆར་རབ་ཏུ་འབེབས་པའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དང་། ཨོཾ་བ་སུ་དྷཱ་རི་མ་ཧཱ་བ་སུ་དྷཱ་ར་དྲྀཥྟ་ནི་པཱ་ཏ་ནི་བ་སུ་སྭཱ་ཧཱ། དང་། བཅོམ་ལྡན་ནོར་རྒྱུན་ཞེས་བྱ་བའི། །མཚན་ནི་མི་མཆོག་སྒྲོགས་བགྱིད་ན། །དེ་ལ་ནོར་གྱི་ཆར་འབབ་ཅིང་། །ནོར་ཆེན་དང་ནི་ལྡན་པར་བགྱི། །གསུངས། ཨོཾ་པི་ཤཱ་ཙི་པ་ཎ་ཤ་བ་རི། སརྦ་མཱ་རི་པྲ་ཤ་མ་ནི་ཧཱུྃ་ཕཊ། དང་། ནམ་མཁར་ཀུན་ནས་རིག་སྔགས་ཀྱི། །རྒྱལ་མོས་ལེགས་པར་བཀང་ནས་སུ། །བདུད་རྩིའི་ཆར་འབེབས་བསམ་ན་ནི། །མོད་ལ་གནོད་པ་ཞི་བར་འགྱུར། །ཞེས་གསུངས་སོ། །བདེ་བ་ལས་འཁྲུངས་རྡོ་རྗེ་འཆང་བ་ཡི། །དངོས་པོ་དངོས་མེད་འབྱུང་གནས་ཆེན་པོར་མཁྱེན། །དང་པོ་གང་དུ་རྣམ་པར་སྣང་མཛད་ནི། །དག་ཅིང་དྲི་མེད་བློས་ནི་ཨོཾ་དུ་སྤྲུལ། །གཟུགས་མང་ཚུལ་གྱིས་ཕྲེང་བས་བསྐོར་བ་ཡི། །སྒྱུ་འཕྲུལ་དྲྭ་བ་ཁྱོད་ལ་ཕྱག་འཚལ་ལོ། །ཞེས་སོ། །ཡང་ཐོག་མར། དེ་ལ་རེ་ཞིག་དང་པོ་དངོས་གྲུབ་ནི་སློབ་དཔོན་ཆོས་ཀྱི་རྗེས་སུ་འབྲང་བ་ཡིན་པས། སློབ་དཔོན་མེད་པར་གྱུར་ན་ནི། །དངོས་གྲུབ་ཐོབ་པར་མི་འགྱུར་བས། །སློབ་དཔོན་མཚན་ཉིད་བཤད་པར་བྱ། །ཡེ་ཤེས་སྙིང་པོ་ཁྱོད་ཉོན་ཅིག  །བརྟན་ཞིང་སོགས་སོ།  ། ༈ སྤྲིན་ཆེན་ལས་ཀླུ་ལ་བདེ་བ་སྦྱིན་པའི་གཟུངས་ནི། ཏདྱ་ཐཱ། དྷཱ་ར་ཎཱི་དྷཱ་ར་ཎཱི། ཨུཏྟཱ་ར་ཎི། སཾ་པྲ་ཏིཥྛ་ཏེ། བི་ཛ་ཡ་ཝ་རྞ། སཏྱ་པྲ་ཏི་ཛྙཱ་ས་ར་ཧ། །ཛྙཱ་ན་བ་ཏི། ཨུད་དེ་པཱ་ད་ནི་བི་ནཱ་མ་ནི། ཨ་བྷི་ཥེ་ཙ་ནི། ཨ་བྷི་བྱ་ཧཱ་ར། ཤུ་བྷ་བ་ཏི། ཨ་ཛི་མ་ཏུ། ཨེ་ཧི་ཀུ་མ་བ་ལ་ནཱི། བ་ཧ་ཧཱ་ར་ཀླེ་ཤ་ན། དྷུ་ན་པཱ་པཾ། ཤོ་བྷ་ཡ་མརྒ་ཎ། ནི་ར་ཏི་ཀ  །དྷརྨ་ཏ་ཤུདྡྷ། ལོ་ཀ་བི་ཏི་མི་ར་ར་ཙ་ས། དུཿཁ་ཤ་མ་ན་སརྦ་བུདྡྷ་ཨ་ཝ་ལོ་ཀ་ན་ཨ་དྷིཥྛི་ཏེ། པྲཛྙཱ་ཛྙཱ་ན་བི་སྭཱ་ཧཱ། འདིས་ཀླུ་ཐམས་ཅད་ཀྱི་སྡུག་བསྔལ་རྒྱུན་གཅོད། བདེ་བ་སྦྱིན། ཆར་འབེབས། ལོ་ཏོག་སྐྱེད་པ་སོགས་ཡོན་ཏན་རྒྱ་ཆེར་བསྔགས་སོ།   ། ༈ གཟའ་ཡུམ་གྱི་གཟུངས་ལ། ལག་ན་རྡོ་རྗེ་གཟའ་རྣམས་ཀྱི་ཡུམ་ཞེས་བྱ་བའི་གཟུངས་སྔགས་ཀྱི་ཚིག་འདི་དག་སྟོན་ཟླ་ཐ་ཆུང་སྨིན་དྲུག་ཟླ་བའི་ཡར་ངོའི་ཚེས་བདུན་ནས་བརྩམས་ཏེ། གསོ་སྦྱོང་བླངས་ནས་ཚེས་བཅུའི་བར་དུ་ཉིན་གཅིག་བཞིན་མཆོད་ཅིང་བརྗོད་པར་བྱས་ནས་ཉ་ལ་ཉིན་ཐོག་ཐག་བཀླག་ན་དེ་ལ་ལོ་དགུ་བཅུ་རྩ་དགུའི་བར་དུ་འཆི་བའི་འཇིགས་པ་འབྱུང་བར་མི་འགྱུར་རོ། །སྐར་མདའ་ལྷུང་བ་དང་། གཟའ་དང་རྒྱུ་སྐར་གྱིས་གདུངས་པའི་འཇིགས་པ་འབྱུང་བར་མི་འགྱུར་རོ། །ཞེས་སོགས་གསུངས།  ། ༈ ཡོན་ཏན་བསྔགས་པ་དཔག་ཏུ་མེད་པའི་གཟུངས་ནི། དཀོན་མཆོག་གསུམ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ། ཨ་མི་ཏ་བྷཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་ཨ་མི་ཏེ། ཨ་མི་ཏོཏྦྷ་ཝེ། ཨ་མི་ཏ་སཾ་བྷ་ཝེ། ཨ་མི་ཏ་བིཀྲཱ་ནྟེ། ཨ་མི་ཏ་ག་མི་ནི། ག་ག་ན་ཀཱིརྟི་ཀ་རེ། སརྦ་ཀླེ་ཤཀྵ་ཡཾ་ཀ་རི་སྭཱ་ཧཱ། འདི་ལན་གཅིག་བརྗོད་པས་བསྐལ་པ་འབུམ་གྱི་སྡིག་སྒྲིབ་བྱང་བ་སོགས་དང་། ལན་སུམ་འབུམ་བཟླས་བརྗོད་བྱས་ན་དེ་བཞིན་གཤེགས་པ་འོད་དཔག་མེད་མཐོང་བར་འགྱུར་རོ། །གསུངས། སྣང་བ་མཐའ་ཡས་རྗེས་སུ་དྲན་པའི་གཟུངས་ལ། བཅོམ་ལྡན་འདས། + སངས་རྒྱས་སྣང་བ་མཐའ་ཡས་ལ་ཕྱག་འཚལ་ལོ། །ཏདྱ་ཐཱ། ཨ་མི་ཏེ། ++ ཀྲཱནྟ་ཀ་རེ། ཨ་མི་ཏ་ག་ག་ན། +++ སྭཱ་ཧཱ། ཡང་གཅིག་ལ། བི་ཀྲཱནྟ་ཡན་འདྲ་བ་ལ། གཱ་མི་ནི། ག་ག་ན་སོགས་གསུངས་སོ། །རྒྱལ་མཚན་རྩེ་མོའི་དཔུང་རྒྱན་གྱི་གཟུངས། ཏདྱ་ཐཱ། ཨོཾ་ཛ་ཡ་ཛ་ཡ་སོགས། རྒྱལ་མཚན་རྩེ་མོའམ། མགུལ་དུ་བཏགས་ན་མིའི་རྒྱལ་པོ་དང་སྐྱེས་བུ་དཔའ་བོ་ཐམས་ཅད་སྲུང་བར་བྱེད་དོ་ཞེས་གསུངས།   ། ༈ མིག་ནད་རྣམ་པར་སྦྱོང་བའི་རིག་སྔགས། ཏདྱ་ཐཱ། ཧི་ལི་མི་ལི། ཀི་ལི་མི་ལི། ཧི་ལི་ཏེ་མི་ལི། ཧུ་ཡཱ་ཧུ་ཡཱ་ཧུ་ཡཱ་མ་ནི། ཧུ་ལུ་ཧུ་ལུ་ཧུ་ལུ། ཧུ་དུ་ཧུ་དུ་ཧུ་དུ། ཙཀྵུར་མེ་བི་ཤོདྷ་ཡ་སྭཱ་ཧཱ།   ། ༈ དཔའ་བོ་གཅིག་གྲུབ་ལས། ཨོཾ་པདྨེ་པདྨ་ཨཀྵི་པདྨ་སུ་བྷ་གེ་ཕུཿ  པདྨེ་པདྨ། ཨཀྵེ་པདྨ། སུ་བྷ་གེ་ཕུ་སྭཱ་ཧཱ། འདིས་བྱབས་པས་མིག་རེངས་པ་སོས།   ། ༈ མིག་ནད་ཞི་བའི་གཟུངས། ཏདྱ་ཐཱ། རུ་དྷི་རེ་ཕུཿ  རུ་དྷི་ར་ཨཀྵི་ཕུཿ  རུ་དྷི་ར་པེཾ་ག་ལེ་ཕུཿ  བ་ཏེ་ཕུཿ  བ་ཏི་ལེ་ཕུཿ  ཧནྟེ་ཕུཿ  མཱྃ་ས་དུནྡྷུ་བྷི་ཕུཿ  པདྨ་ཨཀྵི་ཕུཿ  པདྨ་དཎྜ་ཧི་ར་ཎཱི་ཡེ་ཕུ་སྭཱ་ཧཱ། འདི་སྲད་བུ་དཀར་པོར་ལན་བདུན་བཟླས་ཏེ་མདུད་པ་བོར་བ་གདགས། ཚུལ་བདུན་བཟླས་ཏེ་བྱབས།   ། ༈ དཀོན་མཆོག་གསུམ་ལ་ཕྱག་འཚལ་ལོ། །འཕགས་པ་འོད་དཔག་ཏུ་མེད་པ་ལ་ཕྱག་འཚལ་ལོ། །ཏདྱ་ཐཱ། ཨི་ལི་མི་ཏི་མི་ལི། ཧ་ནེ་སུ་ཧ་ནེ། ཆྒཻ་མོ་ཞིག་ཛྭ་ར་བནྡྷཱ་མི། ཨེ་ཀ་རི་ཀཾ །ཏྲི་རི་ཀཾ །ཙ་ཏུརྦད་ཀཾ །ནིརྱ་ཛྭ་རཾ་སྭཱ་ཧཱ། འདི་མགུལ་དུ་བཏགས་ན་རིམས་ནད་མེད་པར་བྱེད།   ། ༈ ནམ་སྙིང་མཚན་བརྒྱའི་གཟུངས། ཨོཾ་སྭ་སྟི་ཀ་མ་ལཱཀྵི་བི་པུ་ལ་སཾ་བྷ་ཝ། དྷརྨ་དྷཱ་ཏུ་གོ་ཙ་ར་སྭཱ་ཧཱ། ཕྱག་རྡོར་མཚན་བརྒྱ། ཨོཾ་བཛྲ་ཙཎྜ་སརྦ་དུཥྟན་ཏ་ཀ་ཧ་ན་ད་ཧ་པ་ཙ་ཧཱུྃ་ཕ྄ཊ།   ། ༈ སྒྲིབ་སེལ་མཚན་བརྒྱར། ཨོཾ་ཨ་མྲྀ་ཏ་བིནྡྷུ་ཛ་བ་མ་ཧཱ་སུ་ཁ་སྭཱ་ཧཱ། འདི་གང་གི་རྣ་ལམ་དུ་གྲགས་པས་སྒྲིབ་པ་ཐམས་ཅད་སེལ་བར་གསུངས། སྐུ་གདུང་དང་བཅས་པའི་མཆོད་རྟེན་ལ་ཚེས་བརྒྱད་བཅོ་ལྔ་གང་རིགས་སྨྱུང་བར་གནས་པས། སྤོས་སོགས་ཀྱིས་མཆོད་ཅིང་བསྐོར་བ་དང་བཅས་བཟླས་ན་དམ་པ་ཅི་འདོད་ཐོབ་ཅིང་སྡིག་པ་དང་སྡུག་བསྔལ་འཇིགས་པ་ཐམས་ཅད་ལས་ཐར་བར་གསུངས།   ། ༈ ས་སྙིང་། ཨོཾ་སུམྦྷ་ནི་སུམྦྷ། ཧ་ར་ཙ་ར། མ་ཧཱ་པཱ་ཤ་མ་རུ་ཏཱ། ཨ་མོ་གྷ་བཛྲ་ས་ཏྭཱ་སཱ་ཧཱ།   ། ༈ བདུད་རྩི་འབྱུང་བ་ལ། ཨོཾ་ཨ་མྲྀ་ཏེ་ཧཱུྃ། དང་། ན་མཿསརྦ་སོགས་ནམ་མཁའ་མཛོད་ཀྱི་སྔགས་གསུངས།   ། ༈ ཁ་འབར་མའི་གཟུངས་ལས། ན་མ་སྶརྦ་ཏ་ཐཱ་ག་ཏ་ཨ་ཝ་ལོ་ཀི་སོགས་གསུངས།   ། ༈ འཇུར་གེགས་ཀྱི་གཟུངས་ལས། ཨོཾ་ཛྭ་ལ་མི་དཾ་སོགས་གསུངས།   ། ༈ ཡེ་ཤེས་སྐར་མདའི་གཟུངས་ལས། ཨོཾ་ཛྙཱ་ན་ཨ་ཝ་ལོ་ཀི་ཏེ་ས་མནྟ་སྥ་ར་ཎ་ར་སྨི་བྷ་བ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་ཧཱུྃ། ཞེས་པའི་ཆུ་སྦྱིན་གསུངས།   ། ༈ ཕྱག་རྡོར་བར་ཆད་སེལ་བའི་གཟུངས་ནི། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཨ་པྲ་ཏི་ཧ་ཏ་ཕ་ལ་ཧཱུྃ་ཕ྄ཊ། སརྦ་བིགྡྷཱཾ་ཨནྟ་རཱ་ཡ་བི་ནཱ་ཤ་ཀ་ར་མཱ་ར་ཡ་ཧཱུྃ་ཕཊ། བརྒྱ་རྩ་བརྒྱད་བཟླས་ན་གཤིས་ངན་དུ་འཆི་བ་བཅུ་གསུམ་གྱིས་མི་ཚུགས། འཛིན་འཆང་བཟླས་པས་བགེགས་ཐམས་ཅད་ཀྱིས་གླགས་མི་རྙེད་པ་དང་། སྒྲིབ་པ་ཐམས་ཅད་བྱང་བ་སོགས་མཐའ་ཡས་པར་གསུངས་སོ།།   །། ༈ 
ཀུན་མཁྱེན་ཆོས་འབྱུང་དང་ཀུན་ཁྱབ་དཔོན་སློབ་བཀའ་འགྲོས་ནས་བཀོད་པའི་གྲུབ་བརྒྱའི་བཀོད་ཡིག་ཉུང་ངུ་ཞིག་ཡོད་པས། རྗེས་གནང་གི་སྐབས་ཀྱང་མངོན་རྟོགས་དེ་ལྟར་ཡོད། ཏཱ་རའི་གྲུབ་བརྒྱའི་བཀོད་ཡིག་ཀྱང་ཡོད་པས་སླར་བཙལ་གསུངས།   ། ༈ ཇོ་ལུགས་གསང་འདུས་འཇམ་རྡོར་སྤར་མ་ལ་ཡི་གེ་མ་དག་པ་རེ་ཟུང་ཡོད། རྣམ་སྣང་གི་སྔགས་ཆད་པས། ཨོཾ་ཨཱཿཛི་ན་ཛིཀྲ་བྲཱུཾ་ཧཱུྃ། ཞེས་སྦྱར་དགོས་སོ། །དཀྱིལ་འཁོར་གྱི་གཙོ་བོ་མི་བསྐྱོད་པ་དང་འཇམ་དཔལ་དབྱེར་མེད་ཡིན་ཅིང་། སྔགས་ཀྱང་། མཉྫུ་བཛྲ་ཟེར་བ་འདི་ཡོད་པ་ཡིན་གསུངས་སོ། །དེ་ཡང་། ཛི་ན་ཛིཀ྄་འབྱིན་སྔགས། བྲཱུཾ་ས་བོན། དེ་དག་འབྲུ་གསུམ་དང་སྤེལ་བའོ། །རྡོ་རྗེ་སློབ་དཔོན་གྱི་དབང་གི་སྐབས་སུ་བརྟན་བྱེད་ཆུ་དབང་ཞིག་བསྐུར་གསུངས་པ་དེ་ནི་ངེས་པར་དགོས། རིག་དབང་ལྷག་མ་རྣམས་བསྐུར་གསུངས་པ་ན་བོད་སྔ་མའི་རྗེས་སུ་འབྲངས་ནས་སོར་བཞག་མཛད་པ་མ་གཏོགས་རང་བཞེད་དང་རྒྱ་གར་པའི་ལུགས་མིན་ཏེ། རྒྱ་གར་པའི་ལུགས་ལ་སློབ་དཔོན་བྱེད་མི་ནུས་པ་རྣམས་རིག་དབང་ལྔ་སློབ་མའི་དོན་ཁོ་ནར་ཞུ་མཁན་ཡོད་པས། དེས་སློབ་དཔོན་གྱི་རིག་དབང་གི་གོ་མི་ཆོད་པས། དབང་ཐོག་མར་ཞུ་དུས་ནས་རིག་དབང་ལྔ་ཡོངས་རྫོགས་རྡོ་རྗེ་སློབ་དཔོན་དུ་བསྒྲུབས་པའི་ཆེད་དུ་ཞུ་བ་ཞིག་དགོས་པས། མར་མེ་མཛད་བཟང་པོས་བཞི་བརྒྱ་ལྔ་བཅུ་པ་ལས། རྡོ་རྗེ་སློབ་དཔོན་གྱི་དབང་གི་སྐབས་སུ། སྔར་བཞིན་རིག་དབང་ལྔ་བསྐུར་ཟེར་བའང་དེ་ལ་དགོངས། བོད་འདིར་ནི་དབང་བཞི་ཡོངས་རྫོགས་སྟན་ཐོག་གཅིག་ཏུ་བསྐུར་བའི་ཕྱིར་དེ་འདྲའི་ཐ་སྙད་མེད་དོ།   ། ༈ བོད་ཡིག་སྲོང་བཙན་གྱི་དུས་ཐོན་མིས་ཐོག་མར་མཛད། དེ་ནས་མིའི་ཨག་ཚོམ་གྱི་དུས་གཙང་པ་དགེ་བསྙེན་དཀོན་མཆོག་འབངས་ཞེས་བྱ་བ་དང་། ཁྲི་སྲོང་གི་དུས་བྷེ་ཤོ་ཁྲམ་ཟེར་བ་སོགས་དང་། ཁྲི་རལ་གྱི་དུས་གྲ་ཤོད་རྣམ་གཉིས་ཞེས་སོགས་བྱུང་། ཕྱི་དར་གྱི་དུས་ལོ་ཆེན་ཤཱཀྱ་རྡོ་རྗེ་བྱ་བ་དང་། ལྷག་པར་མཁས་པ་ཀ་ཁྱུང་གཉིས། དེ་ལས་ཀྱང་ཁྱུང་པོ་ཕུལ་དུ་བྱུང་བས་བོད་ཀྱི་ཡིག་དཔོན་བྱས་པར་གྲགས། སློབ་མའང་བུ་ཆེན་བཅུ་གཉིས་སོགས་བྱུང་བ་ལས། མཁས་པ་རོང་པོ་ཉིད་མཆོག་ཏུ་གྱུར་པའོ། །ཞེས་སྐད་དོ།།   །། ༈ 
རྣལ་འབྱོར་མའི་བསྐྱེད་རྫོགས་དང་གསང་འདུས་རིམ་ལྔ་དོད་ཐུབ་སྦྱར་ན། འགྲོ་བ་དག་པའི་རྣལ་འབྱོར་དང་། ཁྱད་པར་ལུས་དཀྱིལ་ཐུན་མོང་མ་ཡིན་པའི་གསལ་སྣང་གྲུབ་པ་ལ་བརྟེན་ནས་རླུང་སེམས་འཇུག་པ་གཅིག་པས་སྣང་བ་ལྷ་སྐུར་རང་ཤར་བ་ལུས་དབེན། རྫོགས་རིམ་རྩ་དབུ་མ་ཁ་དབྱེ་ནས་རླུང་དབུ་མར་ཞུགས་གནས་ཐིམ་གསུམ་སྒྲུབ་ནུས་པ་ངག་དབེན། རླུང་ལུས་ལ་ཞུགས་པས་སྟོང་གཞིའི་འོད་གསལ་འདྲེན་པ་སེམས་དབེན། སེམས་ལ་ཞུགས་པའི་སྟོང་ཉིད་ལས་ལྷ་སྐུ་འཇའ་ཚོན་ལྟ་བུར་ལྡང་བས་སྒྱུ་ལུས། དེ་ཉིད་སྟོང་པར་ཞུགས་པས་འོད་གསལ། ཁྱད་པར་བསམ་མི་ཁྱབ་པ་དུས་ཚོད་མ་ཡིན་པའི་སྡུད་རིམ་ལ་བརྟེན་ནས་འོད་གསལ་དང་ཟུང་འཇུག་གཉིས་ཀ་འགྲུབ་པའི་གནད་སོགས་རྒྱས་པར་སྦྱར་དུ་ཡོད་ཀྱང་ཡི་གེ་ཉུང་ངུས་མཚོན་དཀའ་བས་ས་བཅད་ཙམ་ཞུས་པ་ཞིབ་དཔྱོད་གནང་བས་མཁྱེན་པར་འགྱུར་བ་ལགས་ཤིང་། གཞན་ཡང་ལཱུ་ཧི་པའི་རྫོགས་རིམ་རྣལ་འབྱོར་ཆེན་པོ། དྲིལ་བུ་རིམ་ལྔ། ནག་པོ་རིམ་བཞི་སོགས་དང་སྦྱར་ཚུལ་ཞྭ་ལུ་རྡོ་རྗེ་འཆང་ནས་རྒྱ་ཆེར་གསུངས་པ་ཐོས་ལགས།།    །།



                             ཞུ་བཅུག་པ་ཤེས་རབ་ཐེངས་གསུམ་པ་ཡིན་ལགས།

}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-Volume-02-KHA]]
[[Category:Khyentse Lineage Project]]