View source for JKW-KABUM-02-KHA-001-021

{{Khyentse Metadata
|classification=Tibetan Publications
|subclass=Tibetan Texts
|fulltitletib=རྡོ་རྗེའི་གནས་ཆེན་ཡེར་པ་བྱང་ཆུབ་ཤིང་གི་དགའ་ཚལ་ལ་བསྔགས་པའི་གཏམ་དྲང་སྲོང་གྲུབ་པའི་རྒྱན།
|fulltitle=rdo rje'i gnas chen yer pa byang chub shing gi dga' tshal la bsngags pa'i gtam drang srong grub pa'i rgyan
|citation=[['jam dbyangs mkhyen brtse'i dbang po]]. ''rdo rje'i gnas chen yer pa byang chub shing gi dga' tshal la bsngags pa'i gtam drang srong grub pa'i rgyan''. In '''jam dbyangs mkhyen brtse'i dbang po'i bka' 'bum'', Vol. 2: 64-66. Khams sde dge rdzong sar dgon: Rdzong sar blo gros phun tshogs, 2020.
|collectiontitletib=མཁྱེན་བརྩེའི་བཀའ་འབུམ་
|collectiontitle=mkhyen brtse'i bka' 'bum
|author='jam dbyangs mkhyen brtse'i dbang po
|authortib=འཇམ་དབྱངས་མཁྱེན་བརྩེའི་དབང་པོ་
|editor=rdzong sar blo gros phun tshogs
|editortib=རྫོང་སར་བློ་གྲོས་ཕུན་ཚོགས་
|tibgenre=Discourses - gtam
|terma=No
|sabcadcategory=Two
|language=Tibetan
|volumenumber=002
|volnumtib=༢
|volyigtib=ཁ་
|totalvolumes=25
|textnuminvol=001
|textsubnumber=021
|pagenumbers=64-66
|totalpages=3
|beginfolioline=32b1
|endfolioline=33b1
|totalfolios=2
|multivolumework=No
|rectonotes=sde tshan 1
|versonotes=mkhyen brtse'i bka' 'bum
|colophontib=།ཅེས་པའང་རྒྱལ་ཁམས་ཉུལ་པའི་དཱ་རི་དྲཱ་མཚོ་སྐྱེས་བླ་མ་དགྱེས་པའི་འབངས་ཀྱིས་གྲུབ་པའི་གནས་ཆེན་དེ་ཉིད་དུ་གསོལ་བ་བཏབ་པ་སརྦ་དཱ་སུ་ཤྲེ་ཡནྟུ།།
|colophonwylie=ces pa'ang rgyal khams nyul pa'i dA ri drA mtsho skyes bla ma dgyes pa'i 'bangs kyis grub pa'i gnas chen de nyid du gsol ba btab pa sarba dA su shre yan+tu
|pdflink=File:JKW-KABUM-02-KHA-001.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|རྡོ་རྗེའི་གནས་ཆེན་སེར་བ་བྱང་ཆུབ་ཤིང་གི་དགའ་ཚལ་ལ་བསྔགས་པའི་གཏམ་དྲང་སྲོང་གྲུབ་པའི་རྒྱན་ཅེས་བྱ་བ། །ཨོཾ་སྭ་སྟི་སིདྡྷི་རསྟུ། བྱང་ཆུབ་སྙིང་པོར་འཆི༷་མེ༷ད་གྲུབ་པའི་བདུད་རྩིའི་དོ་ཤལ་གསར་པ་ནི། །ཅི་ཡང་བཟུང་བ་མཚོ་སྐྱེས་ཞབས་ཀྱི་རྣམ་པ་ཀུན་ལྡན་ཡེ་ཤེས་ཆེས། །བྱིན་རླབས་ཟླ༷་བ༷་ནོར་བུའི་སྙེམས་འཆང་རིག་འཛིན་དགྱེས་པའི་བྲག་ཕུ༷ག་ན། །སྲིད་ཞིའི་དགེ་མཚན་ཕྲག་བརྒྱའི་འཛུམ་དཀར་གཅིག་ཅར་དགོད་དེ་བསྔགས་པར་འོས། ༡  །གང་ན་ཟུང་འཇུག་སྒྱུ་མའི་བཀོད་པ་དང་། །རྗེས་མཐུན་པདྨཱ་ཀ་རའི་མཚན་དཔེའི་ཞལ། །རྣམ་ཐར་གསུམ་ལྡན་དབྱིངས་སུ་སྙོམས་འཇུག་པའི། །ངང་ཚུལ་སྲ་མཁྲེགས་བྲག་རིའི་བ་གམ་ཡོད། ༢  །གཡས་ཕྱོགས་གངས་ཅན་ལྷ་གཅིག་སྲོང་བཙན་རྗེའི། །བསམ་གཏན་ཟིལ་དངར་བཏུང་བའི་བསྟི་གནས་སུ། །འཕགས་མཆོག་ཕྱག་ན་པདྨོའི་ཡེ་ཤེས་སྐུ། །འདུ་འབྲལ་སྤངས་པའི་དགེ་མཚན་རྟག་ཏུ་རྔམས། ༣  །གཡོན་ཕྱོགས་ཐབས་ཤེས་ཨེ་ཝྃ་ཟུང་འཇུག་པ། །རྡོ་རྗེ་དྲིལ་བུའི་མཚན་གྱི་སྒེག་འཆང་བར། །ཆོས་ཀུན་བདེ་ཆེན་སྡོམ་པའི་དཔྱིད་ཐིག་ལེ། །གཅིག་དང་ཐ་དད་བྲལ་བར་མངོན་སུམ་རོལ། ༤  །སྟེང་ཁར་སངས་རྒྱས་གཉིས་པ་པདྨ་སྐྱེས། །རྫུ་འཕྲུལ་རྡོ་རྗེའི་བཀོད་པར་དགྱེས་བཞིན་དུ། །བདེ་སྟོང་ཉེ་རྒྱུའི་འདུ་བར་སྤྱོད་པའི་གནས། །མཐོང་བའི་མོད་ནས་ཚེ་འདིའི་སྣང་ཞེན་འཇིལ། ༥།འོག་ཏུ་གངས་རིའི་ཡུལ་ན་སྔོན་མེད་པའི། །འཇིག་རྟེན་མིག་གཅིག་སྨྲ་བའི་ཉི་མ་ཆེ། །རྣམ་པར་སྣང་མཛད་སྲུང་བས་རིམ་གཉིས་ཀྱི། །བདུད་རྩིའི་མཆོག་དངོས་གྲུབ་པའི་པདྨོ་བཞད། ༦  །མདུན་ཕྱོགས་ལྷ་རི་འོད་གསལ་སྙིང་པོའི་མགུལ། །དཔལ་ལྡན་མར་མེ་མཛད་དཔལ་ཡབ་སྲས་ཀྱིས། །བསམ་ཡས་སྒྱུ་འཕྲུལ་བཀོད་པས་གསང་བའི་ཆོས། །འཇིགས་པ་མེད་པའི་སེང་གེའི་སྒྲ་ཆེན་བསྒྲགས། ༧  །གཞན་ཡང་མཁས་པའི་ཚོགས་རབ་བྱེ་བ་དང་། །གྲུབ་པའི་སྐྱེས་བུ་དུ་མས་བསྟེན་པའི་གནས། །ལྷ་དང་དྲང་སྲོང་དགྱེས་པའི་དགའ་ཚལ་ཆེར། །དཔའ་བོ་ཌཱ་ཀིས་རྡོ་རྗེའི་གར་གྱིས་རོལ། ༨  །མདོར་ན་དྲན་པས་སྲིད་བདེའི་འཁྲུལ་པ་ཞིག  །སླེབ་པ་ཙམ་གྱིས་བདེ་ཆེན་ཡེ་ཤེས་སྐྱེད། །རྩེ་གཅིག་བསྒོམས་ན་མཆོག་དང་ཐུན་མོང་གི  །དངོས་གྲུབ་མྱུར་དུ་སྦྱིན་པའི་གྲགས་པས་མཛེས། ༩  །དེ་སླད་སྲོག་དང་བཅས་པའི་ལུས་ནི་ཞི་བའི་ནགས་འདིར་མངོན་ཕྱོགས་ནས། །ཐ་མལ་སྣང་བའི་ཞེན་པ་ཇི་སྙེད་སྒྱུ་མའི་ལྷ་སྐུར་ཤར་བའི་མཐར། །བརྟན་དང་གཡོ་བའི་བྱེད་པ་མཐའ་དག་དྷཱུ་ཏཱིའི་ཕྱག་རྒྱར་སྦྱར་བ་ལས། །སྣང་གསུམ་འཕོ་ཆགས་སྤྲོས་པས་མི་ཕྱེད་འཆི་མེད་གྲུབ་པ་ཉིད་གྱུར་ཅིག  ༡༠  །ཅེས་པའང་རྒྱལ་ཁམས་ཉུལ་པའི་དཱ་རི་དྲཱ་མཚོ་སྐྱེས་བླ་མ་དགྱེས་པའི་འབངས་ཀྱིས་གྲུབ་པའི་གནས་ཆེན་དེ་ཉིད་དུ་གསོལ་བ་བཏབ་པ་སརྦ་དཱ་སུ་ཤྲེ་ཡནྟུ།།   །། ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-02-KHA-001]]
[[Category:Khyentse Lineage Project]]
[[Category:JKW-KABUM-Volume-02-KHA]]