View source for JKW-KABUM-14-PHA-012-001

{{Khyentse Metadata
|classification=Tibetan Publications
|subclass=Tibetan Texts
|fulltitletib=ཚེ་སྒྲུབ་རྒྱུན་ཁྱེར་བརྟན་བཞུགས་མའི་ངག་འདོན་འཆི་མེད་སྙིང་པོ།
|fulltitle=tshe sgrub rgyun khyer brtan bzhugs ma'i ngag 'don 'chi med snying po
|citation=[['jam dbyangs mkhyen brtse'i dbang po]]. ''tshe sgrub rgyun khyer brtan bzhugs ma'i ngag 'don 'chi med snying po''. In '''jam dbyangs mkhyen brtse'i dbang po'i bka' 'bum'', Vol. 14: 170-173. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|sourcerevealer='phreng po gter ston shes rab 'od zer
|editor=rdzong sar blo gros phun tshogs
|authortib=འཇམ་དབྱངས་མཁྱེན་བརྩེའི་དབང་པོ་
|sourcerevealertib=འཕྲེང་པོ་གཏེར་སྟོན་ཤེས་རབ་འོད་ཟེར་
|editortib=རྫོང་སར་བློ་གྲོས་ཕུན་ཚོགས་
|tibgenre=Daily Practice - rgyun khyer, Longevity Rituals - tshe sgrub, Liturgy - ngag 'don
|terma=Yes
|sabcadcategory=Five
|deity=pad+ma 'byung gnas
|cycle=pad+ma'i zhal gdams rtsa gsum mthong ba rang grol
|cycletib=པདྨའི་ཞལ་གདམས་རྩ་གསུམ་མཐོང་བ་རང་གྲོལ་
|parentcycle=grol tig dgongs pa rang grol gyi chos sde
|parentcycletib=གྲོལ་ཏིག་དགོངས་པ་རང་གྲོལ་གྱི་ཆོས་སྡེ་
|language=Tibetan
|volumenumber=014
|volnumtib=༡༤
|volyigtib=ཕ་
|totalvolumes=25
|textnuminvol=012
|textsubnumber=001
|pagenumbers=170-173
|totalpages=4
|beginfolioline=1b1
|endfolioline=3a4
|totalfolios=3
|multivolumework=No
|rectonotes=sde tshan 12
|versonotes=mkhyen brtse'i bka' 'bum
|archivistnotes=The title that appears at the beginning of this text entry (པདྨའི་ཞལ་གདམས་རྩ་གསུམ་མཐོང་བ་རང་གྲོལ་གྱི་ཆོས་སྡེ་ལས་བྱུང་བའི་ལྷག་པའི་ལྷ་སྣ་ཚོགས་ཀྱི་སྒྲུབ་ཐབས་ཕྲིན་ལས་རོལ་མཚོ།) is the general title for the collection of practices that are included in sde tshan 12.
|colophontib=།ཞེས་པའང་ལོ་ཆེན་བཻ་རོའི་རྣམ་འཕྲུལ་ཀུན་མཁྱེན་པྲཛྙཱ་ར་སྨིའི་ཟབ་གཏེར་ལས་བྱུང་བ་མཁྱེན་བརྩེའི་དབང་པོས་ངག་འདོན་ཁྲིགས་སུ་བསྡེབས་པ་ཨཱ་ཡུརྫྙཱ་ན་པུཥྟིཾ་ཀུ་རུ།།
|colophonwylie=zhes pa'ang lo chen bai ro'i rnam 'phrul kun mkhyen pradz+nyA ra smi'i zab gter las byung ba mkhyen brtse'i dbang pos ngag 'don khrigs su bsdebs pa A yur+dz+nyA na puSh+tiM ku ru/
|pdflink=File:JKW-KABUM-14-PHA-012.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅།  །པདྨ སྱ བཀྟྲ མ པ བཱ ད ཏྲི མཱུ ལ ད ཪྴ སྭ མོ  ཙ ན སྱ དྷ རྨ བ རྒྒཱ ཏྶཾ བྷ བཱ དྷི དེ བ བི ཤྭ སྱ སཱ དྷཱ ཀ ཀ རྨ ལ ལི ཏ སཱ ག ར ནཱ མ བི ཧ ར ཏི སྨ  ། ། 
༄༅།  །པདྨའི་ཞལ་གདམས་རྩ་གསུམ་མཐོང་བ་རང་གྲོལ་གྱི་ཆོས་སྡེ་ལས་བྱུང་བའི་ལྷག་པའི་ལྷ་སྣ་ཚོགས་ཀྱི་སྒྲུབ་ཐབས་ཕྲིན་ལས་རོལ་མཚོ་ཞེས་བྱ་བ་བཞུགས་སོ། 

།ཚེ་སྒྲུབ་རྒྱུན་ཁྱེར་བརྟན་བཞུགས་མའི་ངག་འདོན་འཆི་མེད་སྙིང་པོ་ཞེས་བྱ་བ་བཞུགས།  ན་མོ་གུ་རུ་བྷྱཿ  ཚེ་སྒྲུབ་ཟབ་མོའི་རྒྱུན་ཁྱེར་ནི།  བླ་མ་མཆོག་གསུམ་ཡི་དམ་ལྷར།  །གུས་པས་སྐྱབས་མཆི་མཁའ་མཉམ་འགྲོ། བླ་མེད་བྱང་ཆུབ་མཆོག་ཐོབ་ཕྱིར།  །ཟབ་མོའི་རྣལ་འབྱོར་བསྒོམ་པར་བགྱི།  །ལན་གསུམ་གྱིས་སྐྱབས་སེམས་སྔོན་དུ་འགྲོ་བས།  ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།  སྟོང་པའི་ངང་ལས་སྐད་ཅིག་གིས་འོག་གཞི་སྣ་ཚོགས་རྡོ་རྗེའི་ལྟེ་བར༔  གཡུང་དྲུང་རིས་གསེར་གྱི་མདོག་ཅན་གྱི་སྟེང་དུ༔  པདྨ་དམར་པོ་འདབ་བརྒྱད་གེ་སར་དང་བཅས་པའི་ལྟེ་བར་གནས་ཁང་བྷྲཱུྃ་ལས་པདྨ་རཱ་གའི་བུམ་པ་མཚན་ཉིད་དང་ལྡན་པ༔  འཆི་མེད་བདུད་རྩིས་གང་བའི་ནང་དུ༔  པདྨའི་སྡོང་པོའི་སྟེང་དུ༔  རང་ཉིད་གུ་རུ་པདྨ་དཀར་དམར་སཾ་བྷ་བའི་ཆ་ལུགས་ཅན༔  ཕྱག་གཡས་གསེར་གྱི་རྡོ་རྗེ་རྩེ་ལྔ་གདེངས་པའི་ཚུལ་དང་༔  གཡོན་བུམ་ཐོད་བདུད་རྩིས་གང་བ་བསྣམས་པས་ཡུམ་ལ་འཁྱུད་པ༔  ཞབས་རྒྱལ་པོ་རོལ་པའི་སྟབས་སུ་བཞུགས་པའི་པང་ན༔  ཡུམ་ཡེ་ཤེས་མཚོ་རྒྱལ་དཀར་མོ་གྲི་ཐོད་འཛིན་པས་འཁྱུད་ཅིང་ཞབས་གཉིས་པད་སྐྱིལ་གྱིས་འཁྲིལ་བ༔  རང་གི་ཐུགས་ཀར་པད་ཉི་ཟླ་བའི་སྟེང་དུ་མགོན་པོ་ཚེ་དཔག་མེད་སྐུ་མདོག་དམར་པོ་ལོངས་སྤྱོད་རྫོགས་སྐུ་ཞལ་ནང་དུ་གཟིགས་ནས་ཞབས་གཉིས་མཉམ་པའི་སྟབས་ཀྱིས་བཞེངས་པ༔  ཕྱག་གཉིས་མཉམ་གཞག་གི་སྟེང་ན་པདྨ་རཱ་གའི་བུམ་པ་འཆི་བ་མེད་པའི་བདུད་རྩིས་གང་བ་བསྣམས་པའི་ཐུགས་ཀར་པདྨ་ཉི་ཟླའི་གདན་དུ་ཧྲཱིཿཡིག་དམར་པོ་འོད་ཟེར་ཀུན་ཏུ་འཕྲོ་བ་གསལ་ཞིང་གཟི་བརྗིད་དང་ལྡན་པར་གྱུར་ཅེས་བརྗོད་ཅིང་གསལ་བཏབ་ལ།  ཧྲཱིཿཡིག་ལ་སེམས་འཛིན་ཅིང་།  ཧྲཱིཿཞེས་བརྒྱ་རྩ་ལས་མི་ཉུང་བར་བཟླས་མཐར།  ཚེ་དཔག་མེད་ཀྱི་ཐུགས་ཀའི་ཧྲཱིཿལས་འོད་ཟེར་བསམ་གྱིས་མི་ཁྱབ་པ་འཕྲོས།  བརྟན་གཡོའི་དྭངས་བཅུད་ཐམས་ཅད་འོད་ཕུང་གི་རྣམ་པར་བསྡུས།  ཧཱུྃ་ཧཱུྃ་ཞེས་བརྗོད་པས་ཕྱག་གི་བུམ་བར་བྱོན།  ཁོལ་ཞིང་ལུད་པས་ལུས་ཀྱི་ནང་ཐམས་ཅད་འཆི་མེད་ཚེའི་བདུད་རྩིས་གང་བས་རྡོ་རྗེའི་སྲོག་འགྲུབ་པར་གྱུར།  ཅེས་བརྗོད་ཅིང་བསམས་ལ་རླུང་བུམ་པ་ཅན་ཁ་སྦྱར་དུ་འཛིན་ཅིང་དབྱིངས་རིག་དབྱེར་མེད་ཀྱི་ངང་དུ་མཉམ་པར་གཞག་པ་ནི་སྲུང་བའི་གུར་ཁང་དང་བཅས་བའི་ཚེ་སྒྲུབ་ཁྱད་པར་ཅན་ནོ།  །ཐུན་ལས་ལྡང་བ་ན།  དགེ་བ་འདི་ཡིས་བདག་དང་སེམས་ཅན་ཀུན།  །འཆི་བདག་ལ་སོགས་བདུད་བཞི་རྣམ་བཅོམ་སྟེ།  །སྐྱེ་རྒ་ན་འཆིའི་མཚོ་ཆེན་ལས་སྒྲོལ་བ།  །མགོན་པོ་ཚེ་མཐའ་ཡས་པ་འགྲུབ་པར་ཤོག  །ཅེས་སོགས་བསྔོ་སྨོན་བཀྲ་ཤིས་བྱའོ།།  །།
ཡང་རང་གི་རྩ་བའི་བླ་མའི་ཆེད་དུ་ཞབས་བརྟན་འབུལ་ན།  སྐྱབས་སེམས་ནས།  འཆི་བ་མེད་པའི་བདུད་རྩིས་གང་བ་བསྣམས་པ་ཞེས་པའི་བར་གོང་ལྟར་ལ།  དེའི་ཐུགས་ཀར་པདྨ་འདབ་བརྒྱད་ཀྱི་སྟེང་དུ་འོད་ལྔའི་སྣ་ཚོགས་རྡོ་རྗེའི་ལྟེ་བར་གཡུང་དྲུང་རིས་གསེར་གྱི་མདོག་ཅན་སྟེང་དུ་ཉི་ཟླའི་གདན་ལ་རྩ་བའི་བླ་མ་ཉིད་ད་ལྟའི་སྐུའི་རྣམ་པ་ཇི་ལྟ་བ་གཞོན་ཚུལ་ལང་ཚོ་དར་ལ་བབས་པ་མཚན་དཔེའི་གཟི་བྱིན་མཆོག་ཏུ་འབར་ཞིང་ཐུགས་ཀར་པདྨ་དང་ཉི་ཟླའི་གདན་ལ་ཧྲཱིཿཡིག་དམར་པོ་འོད་ཟེར་ཀུན་ཏུ་འཕྲོ་བ་དང་བཅས་མངོན་སུམ་བཞིན་དུ་བཞུགས་པར་གྱུར་པར་མོས་ལ་ཧྲཱིཿཅི་རིགས་བཟླ།  རང་གི་ཐུགས་ཀའི་སོགས་གོང་ལྟར་ལ།  ཁོལ་ཞིང་ལུད་པའི་དྭངས་མ་བླ་མའི་ཐུགས་ཀའི་ཧྲཱིཿལ་ཐིམ་པས་འཆི་མེད་ཚེའི་དངོས་གྲུབ་བརྙེས་པར་གྱུར་ཅེས་བརྗོད་ཅིང་བསམས་ལ་རླུང་བུམ་པ་ཅན་འཛིན།  བླ་མའི་ཐུགས་དང་རང་སེམས་དབྱེར་མེད་དུ་བསྲེས་ནས་གནས་ལུགས་མ་བཅོས་པའི་ངང་དུ་མཉམ་པར་གཞག  །ཐུན་ལས་ལྡང་བ་ན།  ཕན་བདེ་འབྱུང་བའི་གནས་གཅིག་པུ་ཞེས་སོགས་སྨོན་ལམ་དང་བཀྲ་ཤིས་བྱའོ།  །ཞེས་པའང་ལོ་ཆེན་བཻ་རོའི་རྣམ་འཕྲུལ་ཀུན་མཁྱེན་པྲཛྙཱ་ར་སྨིའི་ཟབ་གཏེར་ལས་བྱུང་བ་མཁྱེན་བརྩེའི་དབང་པོས་ངག་འདོན་ཁྲིགས་སུ་བསྡེབས་པ་ཨཱ་ཡུརྫྙཱ་ན་པུཥྟིཾ་ཀུ་རུ།།   །། ༈ }}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-14-PHA-012]]
[[Category:Khyentse Lineage Project]]
[[Category:JKW-KABUM-Volume-14-PHA]]