View source for JKW-KABUM-10-THA-004-032

{{Khyentse Metadata
|classification=Tibetan Publications
|subclass=Tibetan Texts
|fulltitletib=རྡོ་རྗེ་ཕག་མོ་དཀར་མོ་ཤེས་རབ་གསལ་བྱེད་མའི་སྒྲུབ་ཐབས་མདོར་བསྡུས་ཡེ་ཤེས་སྣང་བ།
|fulltitle=rdo rje phag mo dkar mo shes rab gsal byed ma'i sgrub thabs mdor bsdus ye shes snang ba
|citation=[['jam dbyangs mkhyen brtse'i dbang po]]. ''rdo rje phag mo dkar mo shes rab gsal byed ma'i sgrub thabs mdor bsdus ye shes snang ba''. In '''jam dbyangs mkhyen brtse'i dbang po'i bka' 'bum'', Vol. 10: 382-387. Khams sde dge rdzong sar dgon: Rdzong sar blo gros phun tshogs, 2020.
|collectiontitle=mkhyen brtse'i bka' 'bum
|collectiontitletib=མཁྱེན་བརྩེའི་བཀའ་འབུམ་
|author='jam dbyangs mkhyen brtse'i dbang po
|editor=rdzong sar blo gros phun tshogs
|authortib=འཇམ་དབྱངས་མཁྱེན་བརྩེའི་དབང་པོ་
|editortib=རྫོང་སར་བློ་གྲོས་ཕུན་ཚོགས་
|tibgenre=Lineage Supplications - brgyud 'debs
|terma=No
|sabcadcategory=Five
|deity=phag dkar
|cycle=rdo rje phag mo dkar mo shes rab gsal byed ma
|cycletib=རྡོ་རྗེ་ཕག་མོ་དཀར་མོ་ཤེས་རབ་གསལ་བྱེད་མ་
|language=Tibetan
|volumenumber=010
|volnumtib=༡༠
|volyigtib=ཐ་
|totalvolumes=25
|textnuminvol=004
|textsubnumber=032
|pagenumbers=382-387
|totalpages=6
|beginfolioline=100b4
|endfolioline=103a2
|totalfolios=4
|multivolumework=No
|rectonotes=sde tshan 4
|versonotes=mkhyen brtse'i bka' 'bum
|colophontib=།ཞེས་པའང་དོན་གཉེར་ཅན་དག་གི་ཤེས་རབ་གསུམ་གྱི་ཨུཏྤལ་ཁ་ཡོངས་སུ་བྱེ་བས་བློ་ལྡན་བྱེ་བའི་ཁེངས་པ་འཕྲོག་པའི་སླད་དུ།  མང་དུ་ཐོས་པའི་བསམ་གཏན་པ་མཉྫུ་གྷོ་ཥས་གྲུབ་པའི་སློབ་དཔོན་ཆེན་པོ་ཀོངྐ་དཱཏྟཱའི་གཞུང་ལས་ཉེ་བར་བསྡུས་པའི་ཟབ་དོན་བདུད་རྩིའི་སྙིང་པོ་སྟེ།  འདིས་ཀྱང་ཡིད་ཅན་ཐམས་ཅད་ཡང་དག་པའི་ཡེ་ཤེས་ཀྱི་སྣང་བ་ལ་འདོད་རྒུར་རྩེན་པའི་རྒྱུར་གྱུར་ཅིག
|colophonwylie=zhes pa'ang don gnyer can dag gi shes rab gsum gyi ut+pal kha yongs su bye bas blo ldan bye ba'i khengs pa 'phrog pa'i slad du/__mang du thos pa'i bsam gtan pa many+dzu g+ho Shas grub pa'i slob dpon chen po kong+ka dAt+tA'i gzhung las nye bar bsdus pa'i zab don bdud rtsi'i snying po ste/__'dis kyang yid can thams cad yang dag pa'i ye shes kyi snang ba la 'dod rgur rtsen pa'i rgyur gyur cig
|pdflink=File:JKW-KABUM-10-THA-004.pdf
}}
{{Header}}
<h1 style="font-size: 24px !important;">Tibetan Text</h1>
<onlyinclude>
{{TibP|༄༅། །རྡོ་རྗེ་ཕག་མོ་དཀར་མོ་ཤེས་རབ་གསལ་བྱེད་མའི་སྒྲུབ་ཐབས་མདོར་བསྡུས་ཡེ་ཤེས་སྣང་བ་ཞེས་བྱ་བ་བཞུགས་སོ།  །ན་མོ་གུ་རུ་བཛྲ་ཝཱ་ར་ཧཱི་པཱ་དཱ་ཡ།  རྡོ་རྗེ་ཕག་མོ་ཤེས་རབ་གསལ་བྱེད་མ་བསྒོམ་པར་འདོད་ན།  སྐྱབས་སེམས་སྔོན་དུ་འགྲོ་བས།  རང་ཉིད་སྐད་ཅིག་ཕག་མོར་གསལ་བ་ཡི།  །སྙིང་གར་ཨྃ་ལས་ཉི་སྟེང་ཧྲཱིཾཿདཀར་པོ།  །དེ་ལས་འོད་འཕྲོས་བླ་མ་ཝཱ་ར་ཧཱི།  །འཁོར་བཅས་མདུན་གྱི་ནམ་མཁར་སྤྱན་དྲངས་གྱུར།  །སྙིང་དབུས་ས་བོན་འོད་ཟེར་ཕྲེང་བ་ལས།  །ཡོངས་ཤར་ཉེར་བཞིའི་ཡུལ་གྱི་རྣལ་འབྱོར་མ།  །གྲི་ཐོད་ཁ་ཊྭཱྃ་མཆོད་སྤྲིན་ཐོགས་པའི་ཚོགས།  །དཔག་མེད་ནམ་མཁའ་ཁྱབ་པས་རབ་ཏུ་མཆོད།  །ཨོཾ་བྷ་ག་ཝ་ཏཱི་བཛྲ་ཝཱ་ར་ཧཱི་ཨརྒྷཾ་ནས།  ཤབྡའི་བར་གྱིས་མཆོད།  སྒོ་གསུམ་གུས་པས་རྟག་ཏུ་ཕྱག་འཚལ་ཞིང་། །སྡིག་སྒྲིབ་ཉེས་ལྟུང་ཚོགས་རྣམས་བཤགས་ཤིང་བསྡམ།  །ལེགས་སྤྱད་ཀུན་ལ་ཡི་རང་དཀོན་མཆོག་གསུམ།  །སྐྱབས་སུ་གསོལ་ཞིང་སྨོན་འཇུག་མཆོག་སེམས་བསྐྱེད།  །རྣམ་དག་ལམ་བསྟེན་བདག་ཉིད་ངེས་པར་འབུལ།  །ཟབ་ཡངས་ཆོས་ཀྱི་འཁོར་ལོ་བསྐོར་བར་བསྐུལ།  །མྱ་ངན་མི་འདའ་ཡུན་དུ་བཞུགས་པར་གསོལ།  །བསོད་ནམས་རྫོགས་པའི་བྱང་ཆུབ་ཆེན་པོར་བསྔོ།  །ཞེས་པ་རྣམས་ཀྱིས་བསོད་ནམས་ཀྱི་ཚོགས་བསག  །སྟོང་པ་ཉིད་ཀྱི་ཡེ་ཤེས་སྒྲུབ་པའི་ཕྱིར་ཐལ་མོ་སྤྱི་བོར་སྦྱར་ཏེ།  ཨོཾ།  དེ་བཞིན་གཤེགས་པ་ཐམས་ཅད་ཀྱི།  །ཕུན་སུམ་ཚོགས་པའི་བདེ་བ་རྣམས།  །དེ་བཞིན་གཤེགས་ཀུན་བྱིན་རླབས་ཀྱིས།  སེམས་ཅན་རྣམས་ལ་འགྲུབ་པར་ཤོག  །ཅེས་བསྐུལ་ནས།  སྭ་བྷཱ་ཝའི་སྔགས་ཀྱིས་མཆོད་བྱ་མཆོད་བྱེད་མཆོད་ཡུལ་སོགས་ཀྱི་ཆོས་ཐམས་ཅད་རྣམ་ཐར་སྒོ་གསུམ་དང་དབྱེར་མེད་པའི་སྟོང་ཉིད་དུ་རྗེས་སུ་དྲན་པས།  སྙིང་གའི་ཧྲཱིཿལས་བྱུང་བའི་འོད་ཀྱིས་སྣང་བའི་དངོས་པོ་ཀུན་འོད་གསལ་དུ་སྦྱང་།  ཤཱུནྱ་ཏས་དེའི་དོན་ལ་རྩེ་གཅིག་ཏུ་བློ་གཞག་པས་ཡེ་ཤེས་ཀྱི་ཚོགས་བསགས་ཏེ།  འོད་གསལ་གྱི་རང་གཟུགས་ལྷར་བསྒོམ་པ་ནི།  སྟོང་པའི་ངང་ལས་པྃ་ལས་པདྨ་དང་།  །ཨོཾ་ལས་ཉི་སྟེང་རང་སེམས་ཧཱུྃ་ཡིག་ལས།  །རྡོ་རྗེ་དཀར་པོ་རྩེ་ལྔའི་ལྟེ་བ་རུ།  །ཉི་མ་ལ་གནས་ཧྲཱིཿཡིག་ཆུ་ཤེལ་མདོག  །དེ་ལས་འོད་འཕྲོས་དོན་གཉིས་མཛད་པ་བསྒྲུབ།  །ཚུར་འདུས་རང་ཉིད་བཛྲ་ཝཱ་ར་ཧཱི།  །རབ་དཀར་ཞལ་གཅིག་ཕྱག་གཉིས་སྤྱན་གསུམ་པ།  །ཕྱག་གཡས་རྡོ་རྗེ་བ་དན་བཅས་པ་འཕྱར།  །གཡོན་པས་ཐོད་པ་ཁྲག་བཀང་ཐུགས་ཀར་བཟུང་།  །མཆན་ཁུང་གཡོན་ན་རྡོ་རྗེའི་ཁ་ཊྭཱྃ་བསྣམས།  །ཐོད་སྐམ་དབུར་བརྒྱན་ཐོད་རློན་དོ་ཤལ་འཕྱང་།  །ཕྱག་རྒྱ་ལྔ་དང་མེ་ཏོག་ཕྲེང་བས་མཛེས།  །གར་དགུའི་ཉམས་ལྡན་གཟི་བྱིན་མཆོག་ཏུ་འབར།  །མི་རོའི་གདན་ལ་གཡས་བརྐྱངས་སྟབས་ཀྱིས་རོལ།  །ཐུགས་ཀར་པདྨ་ཉི་མའི་དཀྱིལ་འཁོར་སྟེང་།  །རྡོ་རྗེ་རྩེ་ལྔའི་ལྟེ་བར་ཉི་སྟེང་ཧྲཱི།  དེ་ལས་འོད་འཕྲོས་སྣོད་བཅུད་དངོས་འཛིན་སྦྱངས།  །འགྲོ་ཀུན་ཕག་མོའི་སྐུར་གྱུར་རང་ལ་ཐིམ།  །ལྟེ་བའི་པད་ཉིར་གནས་པའི་ཧྲཱིཿཡིག་ལས།  །ཡི་གེའི་ཕྲེང་བ་དབུ་མའི་ལམ་ནས་སྤྲོས།  །སྲིད་ཞིའི་དྭངས་བཅུད་བསྡུས་ཏེ་ཧྲཱིཿལ་ཐིམ།  ཡེ་ཤེས་མཆོག་གི་སྣང་བ་རབ་ཏུ་རྒྱས།  །བླ་མ་རྒྱལ་བ་སྲས་དང་བཅས་པ་ཀུན།  །རྡོ་རྗེ་བཙུན་མོའི་རྣམ་པར་སྤྱན་དྲངས་གྱུར།  །ཕཻ་ཞེས་འབར་བའི་རྒྱ་དང་བཅས་ཏེ་ཡེ་ཤེས་པ་སྤྱན་དྲངས་པ་ལ།  ཨརྒྷཾ་སོགས་ཀྱིས་མཆོད།  ཛཿཧཱུྃ་བྃ་ཧོཿས་དགུག་གཞུག་བཅིངས་ཤིང་མཉེས་པར་བསམས་ལ་པད་ཀོར་གྱི་མཐར་འཁྱུད་རྒྱ་དང་བཅས་ཏེ།  ཨོཾ་ཡོ་ག་ཤུདྡྷཿསརྦ་དྷརྨཱཿཡོ་ག་ཤུདྡྷོ྅ཧོ།  ཞེས་པས་ང་རྒྱལ་བཟུང་།  སླར་ཡང་འོད་འཕྲོས་དབང་ལྷ་སྤྱན་དྲངས་ནས།  །རོལ་མོའི་སྒྲ་སྒྲོགས་མེ་ཏོག་ཆར་འབེབས་བཞིན།  །ཡེ་ཤེས་བདུད་རྩིའི་རྒྱུན་གྱིས་དབང་བསྐུར་བས།  །སྐུ་གང་སྒྲིབ་དག་མི་བསྐྱོད་དབུར་བརྒྱན་གྱུར།  །ཨརྒྷཾ་སོགས་ཀྱི་ཕྱི་མཆོད་དང་།  ཨོཾ་ཨཱཿཧཱུྃ་གིས་བདུད་རྩི་མྱང་།  །ལྷ་སྐུའི་གསལ་སྣང་ལ་ཡུན་རིང་དུ་སེམས་འཛིན།  དེས་སྐྱོ་ན་བཟླས་པ་བྱ་བ་ནི།  རང་གི་ལྕེ་ཨྃ་ལས་བྱུང་བའི་པདྨ་དམར་པོ་འོད་གསལ་ཞིང་འབར་བ་ཧྲཱིཿཡིག་གིས་མཚན་པར་བསམས་ལ།  གོང་གི་ལྟེ་བའི་ཧྲཱིཿལས་ཡི་གེའི་ཕྲེང་བ་སྤྲོ་བསྡུའི་དམིགས་པ་དང་བཅས་ཏེ།  ཧྲཱིཿཞེས་ཅི་ནུས་སུ་བཟླ།  ཐུན་ལས་ལྡང་བ་ན་གོང་བཞིན་མཆོད།  བཅོམ་ལྡན་འདས་མ་རྡོ་རྗེ་ཕག་མོ་ཡིས།  །བདག་དང་མཐའ་ཡས་སེམས་ཅན་ཐམས་ཅད་ཀྱི།  །ནད་གདོན་བར་ཆད་སྒྲིབ་གཉིས་ཀུན་ཞི་ཞིང་།  །ཡེ་ཤེས་སྣང་བ་རྒྱས་པར་མཛད་དུ་གསོལ།  །ལྷ་མོ་ཚད་མ་དམ་ཚིག་ཚད་མ་དང་།  །དེས་གསུངས་ཚིག་ཀྱང་ཚད་མའི་མཆོག་ཡིན་པས།  །བདེན་པ་དེ་ཡིས་ལྷ་མོ་དེ་རྣམས་ཀྱིས།  །བདག་ཅག་རྗེས་སུ་འཛིན་པའི་རྒྱུར་གྱུར་ཅིག  །ཅེས་སྨོན་ལམ་བཏབ།  དགེ་བ་འདི་ཡིས་མྱུར་དུ་བདག  །རྡོ་རྗེ་ཕག་མོ་འགྲུབ་གྱུར་ནས།  །སོགས་ཀྱིས་བསོད་ནམས་བྱང་ཆུབ་ཀྱི་རྒྱུར་བསྔོས་ལ།  ཡི་གེ་བརྒྱ་པ་ལན་གསུམ་གྱིས་བདག་དང་སྣང་བ་ཐམས་ཅད་རྗེ་བཙུན་མའི་ལྷ་སྔགས་ཡེ་ཤེས་ཀྱི་རང་བཞིན་དུ་བརྟན་པར་བྱས་ཏེ་སྤྱོད་ལམ་ལ་འཇུག  །ནུབ་མོ་སྔས་མགོར་ཚོགས་ཞིང་རྣམས་བཞུགས་པར་བསམས་ལ་དངོས་སམ་ཡིད་ཀྱིས་མཆོད་པ་དང་ཕྱག་འཚལ་བ་སོགས་བྱས་ཏེ་ལྷར་སྣང་སྒྱུ་མ་ལྟ་བུའི་ངང་དུ་སེང་གེའི་ཉལ་སྟབས་ཀྱིས་གཉིད་ལོག  །ཐོ་རངས་ལྷ་མོས་སྔགས་ཀྱི་གླུས་བསྐུལ་བར་བསམས་ལ་ལྡང་།  བསྙེན་པ་བྱེད་ན།  དུར་ཁྲོད་ལ་སོགས་པ་དབེན་པའི་གནས་སུ་ཇི་སྐད་བཤད་པའི་རྣལ་འབྱོར་ཐུན་གསུམ་མམ་བཞིར་བསྒོམས་ལ།  ཡི་གེ་གཅིག་པ་འབུམ་ཕྲག་བདུན་ལ་སོགས་པར་བཟླས་ན་གཙུག་ལག་ཀུན་དང་ཁྱད་པར་ཟབ་མོའི་དོན་ལ་འཇིགས་པ་མེད་པའི་བློ་གྲོས་ཀྱི་མཐུ་ཕུན་སུམ་ཚོགས་པ་ཐོབ་པར་འགྱུར་བར་གསུངས་སོ།  །ཞེས་པའང་དོན་གཉེར་ཅན་དག་གི་ཤེས་རབ་གསུམ་གྱི་ཨུཏྤལ་ཁ་ཡོངས་སུ་བྱེ་བས་བློ་ལྡན་བྱེ་བའི་ཁེངས་པ་འཕྲོག་པའི་སླད་དུ།  མང་དུ་ཐོས་པའི་བསམ་གཏན་པ་མཉྫུ་གྷོ་ཥས་གྲུབ་པའི་སློབ་དཔོན་ཆེན་པོ་ཀོངྐ་དཱཏྟཱའི་གཞུང་ལས་ཉེ་བར་བསྡུས་པའི་ཟབ་དོན་བདུད་རྩིའི་སྙིང་པོ་སྟེ།  འདིས་ཀྱང་ཡིད་ཅན་ཐམས་ཅད་ཡང་དག་པའི་ཡེ་ཤེས་ཀྱི་སྣང་བ་ལ་འདོད་རྒུར་རྩེན་པའི་རྒྱུར་གྱུར་ཅིག    ། ༈}}
</onlyinclude>
{{TsagliCall}}
<headertabs/>
== Footnotes ==
<references/>
==Other Information==
{{Footer}}
[[Category:JKW-KABUM-10-THA-004]]
[[Category:Khyentse Lineage Project]]
[[Category:JKW-KABUM-Volume-10-THA]]