JKW-KABUM-21-ZHA-001-026

Previous Text Back to Volume PageNext Text

རྨ་རྒྱལ་སྤོམ་རའི་གསོལ་མཆོད་འདོད་འབྱུང་དཔྱིད་ཀྱི་རོལ་མོ།

Wylie title	rma rgyal spom ra'i gsol mchod 'dod 'byung dpyid kyi rol mo
Location	mkhyen brtse'i bka' 'bum Volume 21, sde tshan 1, Text 26, Pages 80-83 (Folios 40b6 to 42a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rma rgyal spom ra'i gsol mchod 'dod 'byung dpyid kyi rol mo. In 'jam dbyangs mkhyen brtse'i dbang po'i bka' 'bum, Vol. 21: 80-83. Khams sde dge rdzong sar dgon: Rdzong sar blo gros phun tshogs, 2020.
Genre	Protector Rituals - gsol mchod
Colophon	།ཅེས་པའང་གཞན་ལ་ཕན་པའི་རྟེན་འབྲེལ་གྱིས་སྒོ་འཕར་འདོད་རྒུར་དབྱེ་བའི་སླད་དུ། རྩ་གསུམ་ཀུན་འདུས་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གང་ཤར་སྤེལ་བ་དགེ་ལེགས་སུ་གྱུར་ཅིག
	ces pa'ang gzhan la phan pa'i rten 'brel gyis sgo 'phar 'dod rgur dbye ba'i slad du/__rtsa gsum kun 'dus mtsho skyes bla ma dgyes pa'i 'bangs mkhyen brtse'i dbang pos gang shar spel ba dge legs su gyur cig

Tibetan Text

Wylie

[edit]

རྨ་རྒྱལ་སྤོམ་རའི་གསོལ་མཆོད་འདོད་འབྱུང་དཔྱིད་ཀྱི་རོལ་མོ་ཞེས་བྱ་བ་བཞུགས་སོ། །ན་མོ་གུ་རུ་པདྨ་ཀཱ་རཱ་ཡཱ། །འདིར་མདོ་ཁམས་སྒང་དྲུག་གཙོ་བོར་གྱུར་པའི་བོད་ཡུལ་གཏེར་བདག་ཀུན་གྱི་ནང་ནས་རྒྱལ་མཚན་གྱི་ཏོག་ལྟར་མངོན་པར་མཐོ་བ། རྨ་རྒྱལ་ཡིད་བཞིན་ནོར་བུ་འཁོར་དང་བཅས་པ་ལ་མཆོད་གསོལ་ཕྲིན་ལས་བཅོལ་བར་འདོད་པས་བསང་མཆོད་ཕྱེ་མར་གཏོར་མ་སྐྱེམས་ཕུད་སོགས་ཇི་ལྟར་འབྱོར་པའི་མཆོད་པ་རྣམས་ལ་དམིགས་ཏེ། ཨོཾ་སརྦ་བིཏཱུར་པུ་ར་པུ་ར་སུ་ར་སུ་ར་ཨཱ་བརྟཱ་ཡ་ཨཱ་བརྟ་ཡ་ཧོཿ བཛྲ་སྥ་ར་ཎ་ཁཾ། རྨ་གཡང་ལོངས་སྤྱོད་ཀྱི་སྤྲིན་ཕུང་འདོད་རྒུའི་འབྱོར་པ་རྒྱ་མཚོ་ཟད་མི་ཤེས་པ་ས་དང་བར་སྣང་ནམ་མཁའི་ཁྱོན་ཐམས་ཅད་ཡོངས་སུ་གང་བར་གྱུར། ཅེས་བརྗོད་ཅིང་བསམ་ལ་སྙན་པའི་དབྱངས་དང་རོལ་མོ་དང་བཅས་ཏེ་འདི་སྐད་ཅེས་བསྐུལ་བར་བྱའོ། །ཧྲཱིཿ །རྩ་གསུམ་འདུས་ཞལ་བླ་མའི་བཀའ་སྡོད་ཆེ། །རྣམ་མང་ཐོས་སྲས་སྒྱུ་འཕྲུལ་དྲྭ་བའི་གར། །དབུལ་བའི་གདུང་སེལ་འདོད་འབྱུང་གཏེར་གྱི་བདག །རྨ་གཉན་སྲིད་པའི་ལྷ་ཆེན་དེང་འདིར་དགོངས། །ཀི་ཀིའི་སྒྲ་དང་ལྷ་རྒྱལ་སྙན་པའི་དབྱངས། །ཁུ་བྱུག་འགྲིན་པའི་གླུ་དབྱངས་ལས་ལྷག་པས། །གེ་སར་སྐྱེས་བུའི་སྐུ་ལྷ་དེང་བསྐུལ་ན། །ངོ་མཚར་སྤྲུལ་པའི་གནས་འདིར་གཤེགས་ཤིང་བཞུགས། །ཅི་སྙེད་མཆོད་ཡོན་མེ་ཏོག་བདུག་སྤོས་སྤྲིན། །ཆུ་འཛིན་དང་བྲལ་ཉི་ཟླ་སྒྲོན་མེའི་འོད། །ཇེ་ཞིག་མ་ཡིན་ཉོན་མོངས་གདུང་སེལ་ཆབ། །ཉོ་ཚོང་བཟའ་བཏུང་འབྱོར་པའི་ཕུད་ཀྱི་མཆོད། །ཏི་རའི་ཁྱུ་དང་ཅང་ཤེས་རིན་ཆེན་མཛོད། །ཐུ་བོ་སྲིད་ན་ཆེ་རྒུའི་དཀོར་ཆའི་ཚོགས། །དེ་བཞིན་ཏིང་འཛིན་རོལ་མོས་ཉེར་སྤྲུལ་པའི། །ནོ་བི་ཀ་ཡི་འབྱོར་པས་ཐུགས་དམ་བསྐང་། །པི་ཝཾ་སྙན་པའི་རོལ་མོ་དང་སྦྱར་ཏེ། །ཕུ་ཆུ་ལྟར་འཁྱིལ་ཡོན་ཏན་རྒྱ་མཚོའི་གཏེར། །བེ་ཏ་ལིས་མཚོན་ལོག་འདྲེན་བྱེ་བའི་དཔུང་། །མོ་ཧར་ཕམ་མཛད་ལྷ་ཁྱོད་དྭང་བས་བསྔགས། །ཙཱི་ནའི་ལྗོངས་སོགས་འཛམ་གླིང་གཞི་བདག་དང་། །ཚུ་རོལ་བོད་སྐྱོང་ཡོངས་ཀྱི་གཙོ་བོ་ཆེར། །ཛི་ཏ་སྲས་དང་བཅས་པས་མངའ་གསོལ་ལྟར། །ཝོ་ཛི་ཧྭ་དང་མགྲིན་གཅིག་དབུ་འཕང་བསྟོད། །ཞི་བའི་ཕྲིན་ལས་ནད་མུག་མཚོན་འཁྲུགས་སོལ། །ཟུར་བདུད་སྐྱེས་སོགས་འབྱུང་པོ་ཟིལ་གྱིས་ནོན། །འོ་ཞེས་བསྐུལ་ཚེ་དགྲ་སྡེ་ཆོམས་ལ་ཕོབས། །ཡོ་གའི་འདོད་པའི་རེ་བ་ཡིད་བཞིན་སྒྲུབས། །རི་ཀླུང་རྟ་ཕྱུགས་འབྲུ་ནོར་འབྱོར་པས་བཀང་། །ལུ་མའི་རྫིང་བཞིན་རྨ་གཡང་རྒྱ་མཚོར་བསྐྱིལ། །ཤེ་མུན་ལྟ་བུའི་བརྒྱད་གཉིས་འཇིགས་ལས་སྲུངས། །སོ་སོར་ཕན་བདེའི་དགའ་སྟོན་ཆར་དུ་བསྙིལ། །ཧི་མའི་ཕུང་པོ་ལྟར་དཀར་འཛུམ་ཞལ་ལས། །ཨུ་མའི་བདག་པོའི་རླུང་ཞགས་བཞིན་གཡོ་བའི། །ཧེ་ཞེས་བཞད་སྨྲས་སྲིད་ཞིའི་ཕྱྭ་དང་གཡང་། །ཨོ་རྒྱན་བླ་མའི་བཀའ་བཞིན་གནས་འདིར་ཁུག །འདོད་རྒུའི་དཔལ་སྐྱེད་ཆོས་ནོར་ཕུན་ཚོགས་སྤེལ། །ཐར་ལམ་བྱང་ཆུབ་སྒྲུབ་པའི་བར་ཆད་ཐུལ། །བོད་ཁམས་དུས་ཀྱི་རྒུད་པ་ཞི་བ་དང་། །བསྟན་འགྲོའི་དགེ་མཚན་རྒྱས་པའི་ཕྲིན་ལས་མཛོད། །ཅེས་པའང་གཞན་ལ་ཕན་པའི་རྟེན་འབྲེལ་གྱིས་སྒོ་འཕར་འདོད་རྒུར་དབྱེ་བའི་སླད་དུ། རྩ་གསུམ་ཀུན་འདུས་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གང་ཤར་སྤེལ་བ་དགེ་ལེགས་སུ་གྱུར་ཅིག ། ༈

[edit]

rma rgyal spom ra'i gsol mchod 'dod 'byung dpyid kyi rol mo zhes bya ba bzhugs so/__/na mo gu ru pad+ma kA rA yA/__/'dir mdo khams sgang drug gtso bor gyur pa'i bod yul gter bdag kun gyi nang nas rgyal mtshan gyi tog ltar mngon par mtho ba/__rma rgyal yid bzhin nor bu 'khor dang bcas pa la mchod gsol phrin las bcol bar 'dod pas bsang mchod phye mar gtor ma skyems phud sogs ji ltar 'byor pa'i mchod pa rnams la dmigs te/__oM sarba bitUr pu ra pu ra su ra su ra A brtA ya A brta ya hoH__badz+ra s+pha ra Na khaM/__rma g.yang longs spyod kyi sprin phung 'dod rgu'i 'byor pa rgya mtsho zad mi shes pa sa dang bar snang nam mkha'i khyon thams cad yongs su gang bar gyur/__ces brjod cing bsam la snyan pa'i dbyangs dang rol mo dang bcas te 'di skad ces bskul bar bya'o/__/hrIH__/rtsa gsum 'dus zhal bla ma'i bka' sdod che/__/rnam mang thos sras sgyu 'phrul drwa ba'i gar/__/dbul ba'i gdung sel 'dod 'byung gter gyi bdag__/rma gnyan srid pa'i lha chen deng 'dir dgongs/__/ki ki'i sgra dang lha rgyal snyan pa'i dbyangs/__/khu byug 'grin pa'i glu dbyangs las lhag pas/__/ge sar skyes bu'i sku lha deng bskul na/__/ngo mtshar sprul pa'i gnas 'dir gshegs shing bzhugs/__/ci snyed mchod yon me tog bdug spos sprin/__/chu 'dzin dang bral nyi zla sgron me'i 'od/__/je zhig ma yin nyon mongs gdung sel chab/__/nyo tshong bza' btung 'byor pa'i phud kyi mchod/__/ti ra'i khyu dang cang shes rin chen mdzod/__/thu bo srid na che rgu'i dkor cha'i tshogs/__/de bzhin ting 'dzin rol mos nyer sprul pa'i/__/no bi ka yi 'byor pas thugs dam bskang /__/pi waM snyan pa'i rol mo dang sbyar te/__/phu chu ltar 'khyil yon tan rgya mtsho'i gter/__/be ta lis mtshon log 'dren bye ba'i dpung /__/mo har pham mdzad lha khyod dwang bas bsngags/__/tsI na'i ljongs sogs 'dzam gling gzhi bdag dang /__/tshu rol bod skyong yongs kyi gtso bo cher/__/dzi ta sras dang bcas pas mnga' gsol ltar/__/wo dzi hwa dang mgrin gcig dbu 'phang bstod/__/zhi ba'i phrin las nad mug mtshon 'khrugs sol/__/zur bdud skyes sogs 'byung po zil gyis non/__/'o zhes bskul tshe dgra sde choms la phobs/__/yo ga'i 'dod pa'i re ba yid bzhin sgrubs/__/ri klung rta phyugs 'bru nor 'byor pas bkang /__/lu ma'i rdzing bzhin rma g.yang rgya mtshor bskyil/__/she mun lta bu'i brgyad gnyis 'jigs las srungs/__/so sor phan bde'i dga' ston char du bsnyil/__/hi ma'i phung po ltar dkar 'dzum zhal las/__/u ma'i bdag po'i rlung zhags bzhin g.yo ba'i/__/he zhes bzhad smras srid zhi'i phywa dang g.yang /__/o rgyan bla ma'i bka' bzhin gnas 'dir khug__/'dod rgu'i dpal skyed chos nor phun tshogs spel/__/thar lam byang chub sgrub pa'i bar chad thul/__/bod khams dus kyi rgud pa zhi ba dang /__/bstan 'gro'i dge mtshan rgyas pa'i phrin las mdzod/__/ces pa'ang gzhan la phan pa'i rten 'brel gyis sgo 'phar 'dod rgur dbye ba'i slad du/__rtsa gsum kun 'dus mtsho skyes bla ma dgyes pa'i 'bangs mkhyen brtse'i dbang pos gang shar spel ba dge legs su gyur cig__/__!