JKW-KABUM-19-DZA-001-054

From Khyentse Lineage - A Tsadra Foundation Project
Revision as of 15:20, 3 March 2022 by Mort (talk | contribs) (Text replacement - "|editortib=རྫོང་སར་བློ་གྲོས་ཕུན་ཚོགས་" to "|editortib=")
(diff) ← Older revision | Latest revision (diff) | Newer revision → (diff)

བདག་ཆེན་བློ་གྲོས་རྒྱལ་མཚན་རྣམ་ཐར་ཚར་ཆེན་པས་མཛད་པ་ལས་བཏུས་པ།
Wylie title bdag chen blo gros rgyal mtshan rnam thar tshar chen pas mdzad pa las btus pa JKW-KABUM-19-DZA-001.pdf
Location mkhyen brtse'i bka' 'bum
Volume 19, sde tshan 1, Text 54, Pages 413-425 (Folios 207a4 to 213a6)
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation 'jam dbyangs mkhyen brtse'i dbang po. bdag chen blo gros rgyal mtshan rnam thar tshar chen pas mdzad pa las btus pa. In 'jam dbyangs mkhyen brtse'i dbang po'i bka' 'bum, Vol. 19: 413-425. Khams sde dge rdzong sar dgon: Rdzong sar blo gros phun tshogs, 2020.
Genre Biographies - Hagiography - rnam thar  ·  History Texts - lo rgyus  ·  Religious History Texts - chos 'byung
[edit]
༄༅། །བདག་ཆེན་བློ་གྲོས་རྒྱལ་མཚན་རྣམ་ཐར་ཚར་ཆེན་པས་མཛད་པ་ཡིད་འཕྲོག་ཨུཏྤལ་དོ་ཤལ་༥༩ལས། སྔོན་དུས་འོད་གསལ་ལྷའི་རིགས་ཆེ་བ་གནམ་ལྷ་སྤྱི་རིང་། བར་པ་གཡུ་རིང་། ཆུང་བ་ཨུ་སེ་གནམ་ལྷ་མཆེད་གསུམ་དུ་གྲགས་པ་ཡུལ་མཐོ་ཞིང་ས་གཙང་བ་མངའ་རིས་སྟོད་ཀྱི་སའི་ཆའམ། བྱང་གི་རྒྱལ་མོ་ཤེལ་ཚའི་འགྲམ་དུ་བབས་པ་འདོད། གང་ལྟར་གཡུ་རིང་གིས་རྨུའི་བུ་མོ་དང་ལྷན་དུ་ཞུགས་པས་སྲས་མ་སངས་སྤུན་བདུན་བྱུང་བའི་ནང་ནས། ཆུང་བ་མ་སངས་རྗེས་མི་ཡུལ་དུ་བཞུགས་པའི་སྲས་ཐོག་ཚ་དཔལ་བོ་སྟག །དེ་སྲས་ཀླུ་ཚ་དཔའ་བོ་ཆེ། དེ་སྲས་གཡའ་སྤང་སྐྱེས། དེ་སྲས་འཁོན་བར་སྐྱེས་ཡིན། འདི་མན་ལ་འཁོན་གྱི་གདུང་དུ་གྲགས། དེ་སྲས་འཁོན་དཔའ་བོ་ཆེ། འདིས་ཆོས་རྒྱལ་ཁྲི་སྲོང་ལྡེའུ་བཙན་གྱི་ནང་བློན་མཛད། དེ་ལ་སྲས་བཞི་བྱུང་བའི་གསུམ་པ་ནི། སད་མི་བདུན་གྱི་ནང་འཁོན་ཀླུ་དབང་སྲུང་བ་དང་། བཞི་པ་ཚེ་འཛིན་གྱི་སྲས་རྡོ་རྗེ་གཉིས་ཀྱི་སློབ་དཔོན་ཆེན་པོར་གཏུགས་ཏེ། སྔགས་རྙིང་མའི་ཆོས་ལ་མཁས་ཤིང་གྲུབ་པར་གྲགས། དེ་ནས་འཁོན་རོག་ཤེར་ཚུལ་ལ་ཐུག་གི་བར་དུ་གདུང་རབས་བཅུ་ཙམ་གྱི་རིང་ཡང་ཕུར་ལ་ཐུགས་དམ་གྱི་མཐིལ་མཛད། བྲག་ལ་ཕུར་པ་བཏབ། རྔ་ལ་ཞོན་ནས་ནམ་མཁར་འགྲོ་བ་སོགས་རྫུ་འཕྲུལ་སྣ་ཚོགས་སྟོན་ནུས། དཀར་བདུད་དང་བརྟན་མ་བཅུ་གཉིས་སོགས་བྲན་དུ་འཁོལ་བ་ཤ་སྟག་བྱུང་། ཤེས་རབ་ཚུལ་ཁྲིམས་ཀྱི་གཅུང་དཀོན་མཆོག་རྒྱལ་མཚན་པས་གསང་སྔགས་ཕྱི་འགྱུར་གྱི་བདག་པོར་གྱུར། འབྲོག་མི་སོགས་མཁས་གྲུབ་དུ་མ་བསྟེན། དགུང་ལོ་བཞི་བཅུ་པར་སངས་རྒྱས་ཀྱི་བསྟན་པ་ཕྲག་བཅུར་གནས་པའི་ཕྲག་བདུན་པ་མངོན་པའི་དུས་ཀྱི་ལྔ་བརྒྱ་ཕྲག་གི་སྟེང་ནས་ལོ་༢༠༧འདས་པ་ཆུ་མོ་གླང་གི་ལོར་ཁྲུམས་སྟོད་ཟླ་བའི་ཡར་ཚེས་ལ་བོད་ཀྱི་རྡོ་རྗེ་གདན་དཔལ་ས་སྐྱའི་གཙུག་ལག་ཁང་བཏབ། འདི་མན་འཁོན་ས་སྐྱའི་གདུང་བརྒྱུད་དུ་གྲགས། དེ་སྲས་གངས་ཅན་གྱི་རྡོ་རྗེ་འཛིན་པ་ཀུན་གྱི་གཙུག་ནོར་ས་སྐྱ་པ་ཀུན་དགའ་སྙིང་པོ་སྟེ། འདི་ནས་ཇོ་བོ་རྗེས་ས་དཀར་པོའི་ལོ་གསལ་དྷཱིཿབདུན་དང་ཧཱུྃ་གཅིག་འདུག་པ་གཟིགས་ནས་དེར་འཇམ་དབྱངས་ཀྱི་སྤྲུལ་པ་བདུན་དང་། ཕྱག་རྡོར་གྱི་སྤྲུལ་པ་གཅིག་སྟེ་བརྒྱད་བྱོན་པར་ལུང་བསྟན་པ་རྣམས་རིམ་གྱིས་བྱོན། སློབ་དཔོན་ཆེན་པོས། ཀུན་དགའ་སྙིང་པོ་ས་སྐྱ་ལོ་ཙཱ་དང་༔ བསོད་ནམས་རྩེ་མོ་གྲགས་པ་རྒྱལ་མཚན་ཞེས༔ རིགས་གསུམ་མགོན་པོའི་སྤྲུལ་པ་གཙང་དུ་འབྱུང་༔ ཞེས་གསུངས། དེ་ལ་སྲས་བཞི་འཁྲུངས་པའི་ཆེ་བ་ཀུན་དགའ་འབར་རྒྱ་གར་རྡོ་རྗེ་གདན་དུ་སྐུ་གཤེགས། གཉིས་པ་བསོད་རྩེ། གསུམ་པ་གྲགས་རྒྱལ། བཞི་པ་དཔལ་ཆེན་འོད་པོར་གྲགས། དེ་ལ་སྲས་གཉིས་ཀྱི་ཆེ་བ་རྗེ་ས་པཎ། ཆུང་བ་སློབ་དཔོན་ཟངས་ཚ་བསོད་ནམས་རྒྱལ་མཚན། དེ་ལ་སྲས་ལྕམ་སྲིང་བརྒྱད་འཁྲུངས་པའི་ཆེ་བ་འགྲོ་མགོན་ཆོས་འཕགས། སྲས་གཉིས་པ་གསང་བདག་རྣམ་འཕྲུལ་འགྲོ་མགོན་ཕྱག་ན། དེ་ཡང་ཡུམ་མི་གཅིག་པའི་མཆེད་ཟླ་སློབ་དཔོན་རིན་ཆེན་རྒྱལ་མཚན་དང་། ཡེ་ཤེས་འབྱུང་གནས་གསུམ་བྱུང་། ཡེ་ཤེས་འབྱུང་གནས་སྲས་བདག་ཉིད་ཆེན་པོ་བཟང་པོ་དཔལ། འདི་རྒྱ་ནག་ཏུ་བྱོན་ནས་རྒྱལ་པོའི་ཉམས་སད་པའི་ཕྱིར་ཧམ་ཆུ་ཟེར་བར་ཡུན་རིང་དུ་བཞུགས་བཅུག །སོ་བདུན་པ་ས་ཁྱི་ལ་ས་སྐྱར་ཕེབས། བཙུན་མོ་བདུན་ཁབ་ཏུ་བཞེས་ཤིང་སྲས་བཅོ་ལྔ་སྲས་མོ་གཉིས་ཏེ་བཅུ་བདུན་འབྱུང་། དགུང་༥༢ལོ་པར་རབ་བྱུང་མཛད། སྲས་ཐོག་མ་གཉིས་གཞོན་ནུ་ནས་གཤེགས། གསུམ་པ་བླ་ཆེན་ཀུན་དགའ་བློ་གྲོས་རྒྱལ་མཚན་དཔལ་བཟང་པོ་སྟེ། དགུང་༡༢ལོ་བར་གོང་མའི་ཏི་ཤྲཱི་མཛད། བླ་མ་བདག་ཉིད་ཆེན་པོར་སྐུ་གཤེགས་རྗེས་གཅུང་རྣམས་ལ་བླ་བྲང་ཁག་བཞིར་བགོས་ནས་གནང་། དེའང་མཁས་བཙུན་ནམ་མཁའ་ལེགས་པ་དང་། གུ་ཤྲཱི་ནམ་མཁའ་རྒྱལ་མཚན་མཆེད་ལ་ཤེལ་ཐམ་དང་བཞི་ཐོག་བླ་བྲང་གནང་། འདི་དག་གི་གདུང་བརྒྱུད་ལ་དང་པོ་གཞི་ཐོག་བླ་བྲང་ཟེར། དེ་ནས་ཆུ་མིག་བླ་བྲང་པ་ཟེར་ཏེ་བདག་ཆེན་བློ་གྲོས་དབང་ཕྱུག་ཡན་གྱིས་གདུང་བརྒྱུད་རྣམས་རྫོགས་ནས་དེང་སང་མི་བཞུགས། ཏི་ཤྲཱི་ཀུན་དགའ་ལེགས་པའི་འབྱུང་གནས་དང་། ཏི་ཤྲཱི་ཀུན་དགའ་རྒྱལ་མཚན་དཔལ་བཟང་ལ་གསེར་ཐམ་དང་། ལྷ་ཁང་བླ་བྲང་གནང་། འདིའི་བརྒྱུད་ལ་དང་པོ་ལྷ་ཁང་བླ་བྲང་པ་དང། དེང་སང་ལ་སྟོད་གཅུང་དང་ཁམས་སུ་བཞུགས་པར་གྲགས། ཏཱ་དབེན་གུ་ཤྲཱི། དེའི་གཅུང་འཇམ་དབྱངས་དོན་ཡོད་རྒྱལ་མཚན། དེའི་གཅུང་ཐམས་ཅད་མཁྱེན་པ་བསོད་ནམས་རྒྱལ་མཚན་མཆེད་ལ་ཤེལ་ཐམ་དང་། རིན་ཆེན་སྒང་གི་བླ་བྲང་གནང་། འདི་ལ་སྔར་རིན་ཆེན་སྒང་བླ་བྲང་པ་དང་། ཕྱིས་སུ་དགེ་སྡིངས་བླ་བྲང་པ་ཞེས་གྲགས། བདག་ཆེན་རྡོ་རྗེ་འཆང་བློ་གྲོས་རྒྱལ་མཚན་ཡན་གྱིས་གདུང་བརྒྱུད་རྫོགས་ནས་དེང་སང་ཆོས་བརྒྱུད་འཛིན་པ་ཤ་སྟག་ཡིན། སའི་ལེན་དབང་ཀུན་དགའ་ལེགས་པའི་རྒྱལ་མཚན་དཔལ་བཟང་པོ་ལ་དུས་མཆོད་བླ་བྲང་དང་གསེར་ཐམ་གནང་། འདི་པའི་སྒོས་ཀྱི་གདུང་བརྒྱུད་ལ་དང་པོ་དུས་མཆོད་བླ་བྲང་པ་དང་། དེང་སང་རྩེ་གདོང་བླ་བྲང་པར་གྲགས་ཤིང་ལུགས་གཉིས་ཀྱི་སྒོ་ནས་དར་ཞིང་རྒྱས་པར་བཞུགས། དེ་ལས་གཞན་པའི་སྲས་རྣམས་ཆུང་ངུ་ལ་གཤེགས། ལྕམ་མོ་རྣམས་ཀྱི་མཚན་མ་སྨོས་སོ། །དེ་ཡང་རིན་ཆེན་སྒང་པའི་བརྒྱུད་པ་ནི། བདག་ཉིད་ཆེན་པོ་དང་། ཞྭ་ལུ་སྐུ་ཞང་མགོན་པོ་དཔལ་གྱི་སྲས་མོ་མ་གཅིག་གཞོན་ནུ་འབུམ། དེ་ལ་སྲས་སྐུ་མཆེད་གསུམ་འཁྲུངས་པའི་ཆེ་བ་ཏཱ་དབེན་ཀུན་དགའ་ཉི་མ་གཞོན་ནུ་སྟེ་གོང་མའི་ཕོ་བྲང་དུ་གཤེགས། དེའི་གཅུང་འཇམ་དབྱངས་དོན་ཡོད། དེའི་གཅུང་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་ཡིན། འཇམ་དབྱངས་དོན་ཡོད་རྒྱལ་མཚན་གྱིས་རབ་བྱུང་མ་མཛད་པའི་གོང་མ་གཅིག་ཞྭ་ལུ་པ་ཡོན་ཏན་དཔལ་འབུམ་ཁབ་ཏུ་བཞེས་པས། སྲས་གཅེན་ཉི་མ་རྒྱལ་མཚན་ཆུང་ངུ་ནས་གཤེགས། གཅུང་ཟླ་བ་རྒྱལ་མཚན་གྱིས་བསྙེན་རྫོགས་མ་མཛད་པའི་གོང་མ་གཅིག་ཞྭ་ལུ་པ་ནམ་མཁའ་རྒྱལ་པོ་ཞེས་པའི་སྲས་ལྕམ་སྲིང་བཞི་འཁྲུངས་པའི་ཆེ་བ་སློབ་དཔོན་པདྨའི་རྣམ་འཕྲུལ་བདག་ཆེན་འཇམ་དབྱངས་ཆེན་པོ་ནམ་མཁའ་རྒྱལ་མཚན་དཔལ་བཟང་པོ། དེའི་གཅུང་བདག་ཆེན་ཞྭ་ལུ་པ་མཐུ་སྟོབས་དབང་ཕྱུག་རྒྱལ་མཚན་དཔལ་བཟང་། ལྕམ་མོ་ཆེ་བ་ཕྱག་རྡོར་འབུམ། ཆུང་བ་དགེ་མའོ། །བདག་ཆེན་འཇམ་དབྱངས་ཆེན་པོས་ས་སྐྱའི་དཔོན་ཆེན་གྱི་བརྒྱུད་པ་ཁམ་མདའ་བ་མ་གཅིག་དཔལ་འབྱུང་རྒྱལ་པོ་ཞེས་པ་ཁབ་ཏུ་བཞེས་པས། སྲས་ལྕམ་སྲིང་དྲུག་བྱུང་བའི་གཅེན་རྒྱ་གར་པ་ཤེས་རབ་རྒྱལ་མཚན། གཅུང་བདག་ཆེན་ཆོས་ཀྱི་རྒྱལ་པོ་བློ་གྲོས་རྒྱལ་མཚན་ཡིན། སྲས་མོ་བཞིའི་ཆེ་བ་སློབ་དཔོན་མ་བསོད་ནམས་དཔལ་འཛོམ། གཉིས་པ་སློབ་དཔོན་མ་ནམ་མཁའ་འབུམ། གསུམ་པ་སློབ་དཔོན་མ་ནམ་མཁའ་བཟང་མོ། བཞི་པ་སློབ་དཔོན་མ་མཁའ་འགྲོ་འཛོམ་མོ། །ཁ་བ་རི་པའི་བསོད་ནམས་པདྨོའི་རྩེར། །སྐབས་གསུམ་བུང་བ་གཞོན་ནུའི་རོལ་རྩེད་ལས། །ཕན་བདེ་སྦྲང་རྩི་གསར་པའི་དུས་སྟོན་གྱིས། །ཐུབ་བསྟན་ལང་ཚོའི་འཛུམ་དཀར་འདི་ན་བཞད། །དཔའ་མཛངས་བློ་གྲོས་ཕུན་ཚོགས་དཔའ་བོ་ཞིག །འཇམ་དབྱངས་འཁོར་ལོས་སྒྱུར་བའི་ཞབས་འབྲིང་མཆོད། །དེ་ཡི་རིགས་ལས་ཁ་བའི་སྨན་ལྗོངས་སུ། །ངུར་སྨྲིག་འཛིན་པའི་ཐོག་མ་ནཱ་གེནྡྲ། །འཇིག་རྟེན་མིག་གྱུར་འཁོན་སྟོན་མཆེད་བཅས་ཀྱིས། །འཛམ་གླིང་བརྟུལ་ཞུགས་གྲུབ་པའི་མཐར་སོན་པ། །ཨོ་རྒྱན་མཁན་པོའི་ཞབས་རྡུལ་གཙུག་གིས་བསྟེན། །གསང་ཆེན་བདུད་རྩིས་ཐུགས་ཀྱི་བུམ་བཟང་གཏམས། །རིགས་ཀྱི་ཐིག་ལེ་གྲུབ་དབང་བལ་པོའི་མཚན། །རིགས་སྔགས་གྲུབ་པའི་སྔགས་འཆང་འཁོན་རོག་སོགས། །ཁྲག་འཐུང་ཡང་ཕུར་ཁྲོས་པའི་ཞལ་མཐོང་ཞིང་། །སྲ་བརྟན་བྲག་ལ་འདམ་བཞིན་ཕུར་པ་འདེབས། །བས་མཐའི་གནས་སུ་མཁའ་ལ་བྱ་ལྟར་ལྡིང་། །དབྱིངས་ཕྱུག་མ་མོ་བདུད་ནག་ཐོད་ཕྲེང་དང་། །གངས་ཅན་སྐྱོང་བའི་བརྟན་མ་བཅུ་གཉིས་སོགས། །བཀའ་ཡི་སྤྲིང་ཡིག་རལ་པའི་རྒྱན་དུ་འཛིན། །དེ་ནས་རྗེ་བཙུན་དཀོན་མཆོག་རྒྱལ་པོ་ཞེས། །མཁས་དང་གྲུབ་པའི་འདབ་བཟང་དབང་པོ་དེས། །གསང་ཆེན་གསར་པའི་པདྨའི་ཆུ་གཏེར་རྙེད། །སྐལ་བཟང་ངང་པའི་བསྟི་གནས་དམ་པར་གྱུར། །གངས་ཅན་རི་བོའི་ཁོངས་འདི་མ་ག་དྷ། །ཆུ་ཤེལ་འཛིན་མའི་སྤོ་ལ་རྡོ་རྗེ་གདན། ། བྱང་ཕྱོགས་འཛིན་མའི་དཔལ་དུ་འཕོས་འདྲ་བའི། །སྲས་བཅས་རྒྱལ་བའི་ཕོ་བྲང་གཙུག་ལག་ཁང་། །གང་དེར་རྗེ་བཙུན་འཇམ་པའི་རྡོ་རྗེ་ཉིད། །གོས་དཀར་ལྕང་ལོའི་ཟོལ་གྱིས་གསང་ཆེན་སྐྱོངས། །ལ་ལར་ངུར་སྨྲིག་འཛིན་པའི་གར་གྱིས་རོལ། །ཐུབ་བསྟན་རྒྱལ་མཚན་སྲིད་རྩེར་འཛིན་པ་ལ། །ས་སྐྱ་པ་ཞེས་སྙན་པའི་རྔ་གསང་ནི། །ཁོར་ཡུག་རི་བོའི་ཁོངས་སུ་ལྷང་ངེ་བ། །ཡོངས་འདུ་དག་ལས་རྐང་འཐུང་གཉིས་པ་བཞིན། །ས་ཆེན་འདི་ན་འགྲན་ཟླས་དབེན་པར་གྱུར། །དེར་ནི་སྟོབས་ལྡན་རྒྱལ་པོ་སེ་ཆེན་གྱིས། །ཤིང་སྒོ་འཛིན་པའི་བོད་ཡུལ་ཆོལ་ག་གསུམ། །ཆོས་ཀྱི་རྒྱལ་པོར་ཕུལ་བས་བྱང་ཕྱོགས་ན། །གང་འདིའི་འབངས་སུ་མ་གྱུར་སུ་ཡོད་སྨོས། །འཕགས་མས་ལུང་བསྟན་མ་དྲོས་ཆུ་མཚོ་ལས། །མཁས་དང་གྲུབ་པའི་གདུང་གི་ཆུ་བོ་བཞི། །དགེ་མཚན་རིན་ཆེན་བྱེ་མ་འདྲེན་བཞིན་དུ། །སྐྱེ་རྒུ་རྒྱ་མཚོའི་དཔལ་དུ་དལ་གྱིས་འབབས། །དེ་ལས་ཆུ་སྐྱེས་ཚལ་ན་པད་དཀར་དང་། །རྒྱུ་སྐར་ཁྲོད་ན་རི་བོང་འཛིན་པ་ལྟར། །རབ་མཆོག་ཕུལ་བྱུང་རིན་ཆེན་སྒང་པ་ཞེས། །ཟླ་མེད་མཐུ་སྟོབས་ནུས་པའི་བདག་ཉིད་བྱུང་། །རྨད་བྱུང་རིགས་ཀྱི་ནོར་བུའི་ཅོད་པན་འདི། །དྲེགས་ལྡན་བྱེ་བས་རལ་པའི་རྒྱན་དུ་མཆོད། །མཁས་དང་གྲུབ་པ་ཡོངས་ཀྱི་སྤྱི་བོས་བཏུད། །སྐལ་བཟང་འགྲོ་བ་ཀུན་གྱི་ཕྱག་གི་གནས། །བ་ལང་ལྟ་བུའི་བླུན་པ་སྐལ་ངན་འགའ། །མ་གཏོགས་རྒྱ་མཚོའི་གོས་ཅན་ཁྱོན་འདི་ན། །གང་གི་རིགས་མཆོག་ཞལ་རྡུལ་གཙུག་རྒྱན་དུ། །འཛིན་པར་མི་བྱེད་ཤེས་ལྡན་སུ་ཞིག་ཡོད། །ཅེས་གསུངས། ཡང་། པདྨའི་རྣམ་འཕྲུལ་འཇམ་དབྱངས་ཆེན་པོ་དང་། །མཚན་ལྡན་ཌཱ་ཀི་དཔལ་འཐུང་རྒྱལ་མོ་ཡི། །སྲས་སུ་འཁྲུངས་ནས་ངོ་མཚར་རོལ་རྩེད་མཛད། །གསང་ཆེན་སྙན་བརྒྱུད་ཐོབ་ལ་ཕྱག་འཚལ་ལོ། །ཞེས་གསུངས། དེ་ཡང་བདག་ཆེན་འདིས་རང་གི་ཡབ་ལས་མགོན་པོའི་སྐོར་དང་། མུས་ཆེན་སེམས་དཔའ་ཆེན་པོ་དཀོན་མཆོག་རྒྱལ་མཚན་ལ་གསུང་ངག་ལམ་འབྲས་སློབ་བཤད་སོགས་གསན་ནས་སྙན་བརྒྱུད་རྒྱ་མཚོའི་གཏེར་མཛོད་དུ་གྱུར། ས་ཆེན་གྱི་སྤྲུལ་པར་གྲགས། དགུང་ལོ་ང་གཉིས་པར་གཤེགས། སློབ་མ་ཡང་ཆོས་རྗེ་སངས་རྒྱས་དཔལ་སོགས་བཀའ་དྲིན་རྗེས་སུ་ནོས་པའི་དམ་པ་བཞི། ཀུན་མཁྱེན་གོ་ཤཱཀ་རྣམ་གཉིས་སོགས་འཛམ་གླིང་ཡོངས་སུ་གྲགས་པའི་མཁས་ཆེན་སོ་ལྔ། བདག་ཆེན་བསོད་ནམས་རྒྱལ་མཚན་སོགས་གངས་ཅན་ཆེན་པོར་གྲགས་པའི་སྐྱེས་བུ་གཉིས། རྡོ་རྗེ་འཆང་སྒོ་རུམ་པ་ཀུན་དགའ་ལེགས་པའི་བློ་གྲོས་སོགས་གསུང་གི་གསང་བ་འཛིན་པའི་དམ་པ་བརྒྱད། ཁྱད་པར་ཡོངས་རྫོགས་སྙན་བརྒྱུད་ཟབ་མོར་མངའ་བདག་རྗེ་བཙུན་རྡོ་རིང་པ་ཆེན་པོ་དང་། གཞན་ཡང་གསུང་ཆོས་ཀྱི་འབྲེལ་བ་ཙམ་ཐོབ་པ་ནི་ཤིན་ཏུ་མང་ངོ་། །དཔལ་ལྡན་བླ་མ་དམ་པ་ཀུན་སྤངས་ཆོས་ཀྱི་རྒྱལ་པོའི་རྣམ་ཐར་ངོ་མཚར་དད་པའི་སྤུ་ལང་གཡོ་བ་ཞེས་ཚར་ཆེན་རིན་པོ་ཆེས་མཛད་པར། རྒྱལ་བ་རྒྱ་མཚོའི་རྨད་བྱུང་ངོ་མཚར་གཏམ། །སྲིད་མཐའི་བར་དུ་དབྱངས་སུ་བསྒྲགས་པ་བས། །འདི་ན་མཚན་ལྡན་རྡོ་རྗེ་སློབ་དཔོན་གྱི། །ཡོན་ཏན་རྟོགས་པ་བརྗོད་པའི་ཆ་ཤས་ཙམ། །བརྗོད་པའང་བསོད་ནམས་བླ་ན་མེད་དོ་ཞེས། །བསླུ་མེད་དམ་པའི་གཏམ་གྱིས་ཡིད་དྲངས་ནས། །གང་གི་ཡིད་ནི་ཚུལ་འདིར་ཞུགས་པར་གྱུར། །ཅེས་སོགས་གསུངས། དེ་ཡང་སྐུའི་སྐྱེ་བ་ནི། དང་པོའི་སངས་རྒྱས་འཁོར་བ་འཇིག །རྒྱ་གར་དུ་ལྭ་བ་པ། བོད་དུ་ཕག་གྲུར་གྱུར་པ་དབུས་སྨྱོན་ཧེ་རུ་ཀས་ལུང་བསྟན། རིག་འཛིན་པདྨ་གླིང་པས་བྲམ་ཟེ་མཆོག་སྲེད་ཀྱི་སྤྲུལ་པར་བསྒྲགས། འཁྲུངས་ཡུལ་ནི། བོད་ཆོས་རྒྱལ་གྱི་གདུང་གི་ནང་ཚན། འོད་སྲུང་གི་བརྒྱུད་པ་ལས་ཡབ་མགོན་པོ་རིན་ཆེན་ནམ། ཕྱིས་སུ་རབ་ཏུ་བྱུང་བའི་མཚན་ཀུན་དགའ་བསོད་ནམས་རྒྱལ་མཚན་དཔལ་བཟང་པོ་ཞེས་བསྐྱེད་རྫོགས་ཀྱི་ཉམས་ལེན་མཐར་སོན་པ་དང་། ཡུམ་སྣ་ནམ་རྡོ་རྗེ་བདུད་འཇོམས་ཀྱི་བརྒྱུད་པ་ས་སྐྱའི་དབོན་ཆེན་དཔལ་འབུམ་བཟང་པོའི་རིགས་ཡེ་ཤེས་མཁའ་འགྲོའི་རྟགས་ཅན་བྱང་སེམས་དབང་མཆོག་རྒྱལ་མོའི་སྲས་སུ་དཔལ་སྣར་ཐང་གི་ཉེ་འདབས། ངོར་ཨེ་ཝྃ་དང་ཉེ་བའི་ས་རྡོ་རིང་བསམ་འགྲུབ་སྨོན་མཁར་དུ་འཁྲུངས། ངོ་མཚར་གྱི་ལྟས་དུ་མ་བྱུང་། དགུང་ལོ་བཅུ་དྲུག་ནས་གཞིས་ཀ་བསམ་འགྲུབ་རྩེར་ལྷ་སྲས་མུ་ཁྲི་བཙན་པོའི་རྣམ་འཕྲུལ་སྤྲུལ་པའི་རྒྱལ་པོ་རིན་སྤུངས་ནོར་བུ་བཟང་པོའི་ཕྱག་ཕྱིར་འབྱོར་ནས་མ་གཤེགས་པར་བཞུགས། ཆུང་ངུའི་དུས་ནས་ཞྭ་ལུ་པ་རྒྱལ་མཚན་དཔལ་བཟང་དང་། རྡོ་རྗེ་འཆང་ཀུན་དགའ་བཟང་པོས་རྗེས་སུ་བཟུང་། དགུང་ལོ་སུམ་ཅུ་ཡན་ལ་རྒྱལ་སྲིད་ཆོས་བཞིན་དུ་སྐྱོང་། རྟེན་སྐྱ་བོར་བཞུགས། སོ་གཅིག་པར་མནལ་ལམ་དུ་ངོར་ཆེན་པས་བསྐུལ་བ་ལྟར་གྲྭ་ཐང་ཆོས་རྗེ་ཤེས་རབ་ཟླ་བར་རབ་ཏུ་བྱུང་ཞིང་། དེ་ནས་བདག་ཆེན་རྡོ་རྗེ་འཆང་ལ་བསྙེན་རྫོགས་བཞེས་པ་ནས་བཟུང་མཉེས་པ་གསུམ་གྱི་བྱ་བས་བསྟེན་ནས་དཔལ་ལྡན་ས་སྐྱ་པའི་སྙན་བརྒྱུད་རྒྱ་མཚོའི་གན་མཛོད་དུ་གྱུར། འདི་དང་རྗེ་ངོར་ཆེན། ཞྭ་ལུ་པ་མཁྱེན་རབ་ཆོས་རྗེ་གསུམ་བཀའ་དྲིན་ཆེ་བའི་བླ་མར་མཛད། གཞན་ཡང་རིས་མེད་ཀྱི་ཡོངས་འཛིན་བདུན་ཅུ་རྩ་གཉིས་བསྟེན་ཏེ། ཟུང་གིས་ལྷག་པའི་ཡོངས་འཛིན་བཅུ་ཕྲག་བདུན། །ལྷག་པར་བཀའ་དྲིན་ཆེ་བའི་བླ་མ་གསུམ། །གཅིག་པུ་འགྲན་ཟླ་བྲལ་བའི་ས་སྐྱ་པ། །མཉེས་པ་གསུམ་གྱི་སྒོ་ནས་བསྟེན་པའི་མཐུས། །འཕགས་ཡུལ་མ་དྲོས་ཆུ་གཏེར་ལས་འོངས་པའི། །རྒྱུད་སྡེ་རྣམ་བཞིའི་ཆུ་ཀླུང་བྱེ་བ་བརྒྱ། །སྙན་བརྒྱུད་བདུད་རྩིའི་ཟེགས་མ་འཐོར་བཞིན་དུ། །ཁྱོད་ཐུགས་རྒྱ་མཚོའི་ལྗོངས་སུ་དལ་གྱིས་ཞུགས། །ཞེས་འབྱུང་། རྙིང་མའི་ཕྱོགས་ཀྱང་ཉི་ཟླ་ལྟ་བུའི་མཁས་གྲུབ་ཀཿཐོག་པ་བླ་མ་ཡེ་ཤེས་འབུམ་པ། འཇའ་ལུས་རྡོ་རྗེའི་སྐུ་མངོན་དུ་མཛད་པ་རྨོག་སྟོན་ཆོས་ཀྱི་རྒྱལ་པོ་རྡོ་རྗེ་བཟང་པོ། ཨོ་རྒྱན་ཆེན་པོས་རྗེས་སུ་བཟུང་བ་རིག་འཛིན་ཀུན་དགའ་གྲགས་པ། རྗེ་གནམ་ལྡིང་པ། མཁའ་རེག་དབོན་དྲུག་པ། རྗེ་ཐང་སྟོང་པ། ག་ཟི་ཀུན་སྤངས་པ། རྗེ་བཙུན་མཚན་ལྡན་མ་སོགས་ལས་བཀའ་གཏེར་གྱི་ཆོས་དཔག་ཏུ་མེད་པ་གསན། ཚ་མོ་བྱང་ཆུབ་རྫོང་། གནམ་ཁའུ་བྲག་རྫོང་། བྱིས་འགྱུར་རྡོ་རྗེའི་བྲག་རྫོང་སོགས་དབུས་གཙང་གི་རི་ཁྲོད་རྣམས་སུ་ཐོས་བསམ་གྱི་སྙིང་པོ་བསྒྲུབས་པ་ལ་འབད་པས་ལྷག་པའི་ལྷ་རབ་འབྱམས་ཀྱིས་ཞལ་གཟིགས། དམ་ཅན་བྲན་དུ་འཁོལ། མཐུ་སྟོབས་དང་ནུས་པའི་ཕ་མཐར་སོན། ཉམས་རྟོགས་ཀྱི་མཛོད་ཀློང་ཆེན་པོ་བརྡོལ་ཏེ། ཀུན་རྟོག་སྦྱངས་གཞིའི་སྣང་ཆ་ཇི་སྙེད་པ། །རང་རིག་སྐད་ཅིག་འཆར་སྒོར་ཐག་ཆོད་ནས། །དེ་ཉིད་རིམ་གཉིས་ཟབ་མོའི་ཏིང་འཛིན་དུ། །བསྒྱུར་ནས་དག་པའི་སྣང་བར་རྒྱས་བཏབ་སྟེ། ལམ་བྱེད་རྣམ་བཞིས་གནད་དུ་བསྣུན་པ་ལས། །གཞི་ལམ་འབྲས་གསུམ་དབྱེར་མེད་དོན་སྨྲ་བའི། །གསང་ཆེན་ཟབ་མོའི་བཅུད་ཀྱི་སྙིང་པོ་འདི། །ཁྱོད་ཉིད་ཁོ་ནས་བདག་གིར་མཛད་པ་སྙམ། །ཞེས་སོགས་སྣང་། ཞལ་སློབ་ཀྱང་ས་སྐྱ་པ་ངག་དབང་གྲགས་པ་རྒྱལ་མཚན། གཉུག་ལ་པཎ་ཆེན་ངག་དབང་གྲགས་པ། ཀུན་མཁྱེན་དོལ་བུ་པའི་གདན་ས་པ་སྒོ་རུམ་པ་ཀུན་དགའ་ལེགས་པའི་བློ་གྲོས། སྤྱན་སྔ་ཤཱཀྱ་རྒྱལ་མཚན། གློ་བོ་པ་ཀུན་དགའ་གྲོལ་མཆོག་སོགས་ཤིན་ཏུ་མང་པོ་དང་། ཁྱད་པར་སྙན་བརྒྱུད་མཐའ་དག་གི་གཏེར་མཛོད་རྗེ་ཚར་པ་ཆོས་རྗེ་སོགས་མང་དུ་བྱོན། དགུང་ལོ་དོན་དྲུག་པ་ཤིང་སྤྲེལ་ལོ་སྨིན་༡ཟླའི་ཉ་ལ་ངོ་མཚར་བའི་ལྟས་དུ་མ་དང་བཅས་ཏེ་གཤེགས་སོ། །རྗེ་ཚར་ཆེན་གྱིས། འདི་ན་ཁུ་བྱུག་ཙ་ཀོ་ར་དང་སྦྲང་རྩི་བྱེད་པས་ཀུན་ནས་གང་བའི་པད་མཚོར་གཉིས་འཐུང་དགའ་བས་རྩེན། ཙུ་ཏ་གསར་པའི་སྙེ་མ་རྒྱས་འགྲམ་ནི་ཙུ་ལ་ཡི་ལན་ཚར་ཁྲོད་ན་ཀ་དམ་མྱོས་པའི་གླུ་དབྱངས་སྒྲོག །ཛཱ་ཏིའི་མེ་ཏོག་ཕྲེང་བ་རྒོད་འཛུམ་རྩེ་ལ་རྐང་དྲུག་ལྡན་པ་ཉིན་བཞིན་རྒྱུ་བ་དེ་བཞིན་དུ། །དམ་པའི་བཀའ་དྲིན་བདུད་རྩིས་མྱོས་པས་ཁོ་བོའི་ཡིད་འདི་དབང་མེད་བསྐྱོད་ནས་རྟོགས་བརྗོད་གཏམ་འདི་གསལ་བར་བསྒྲགས། །ཞེས་དང་། ནོར་བུ་རྙེད་ནས་འཆིང་བུ་འདོར་བ་ལྟར། །ཐུན་མོང་ལམ་གཞན་དག་ཏུ་མི་གོལ་བར། །ལམ་གྱི་སྙིང་པོ་ཟབ་མོ་བླ་མའི་ལམ། །སྙིང་གི་དཀྱིལ་ནས་ཉམས་སུ་ལེན་པར་ཤོག །ཅེས་སོ། ། ༈
[edit]

bdag chen blo gros rgyal mtshan rnam thar tshar chen pas mdzad pa las btus pa/ @#/_/bdag chen blo gros rgyal mtshan rnam thar tshar chen pas mdzad pa yid 'phrog ut+pal do shal 59las/__sngon dus 'od gsal lha'i rigs che ba gnam lha spyi ring /__bar pa g.yu ring /__chung ba u se gnam lha mched gsum du grags pa yul mtho zhing sa gtsang ba mnga' ris stod kyi sa'i cha'am/__byang gi rgyal mo shel tsha'i 'gram du babs pa 'dod/__gang ltar g.yu ring gis rmu'i bu mo dang lhan du zhugs pas sras ma sangs spun bdun byung ba'i nang nas/__chung ba ma sangs rjes mi yul du bzhugs pa'i sras thog tsha dpal bo stag__/de sras klu tsha dpa' bo che/__de sras g.ya' spang skyes/__de sras 'khon bar skyes yin/__'di man la 'khon gyi gdung du grags/__de sras 'khon dpa' bo che/__'dis chos rgyal khri srong lde'u btsan gyi nang blon mdzad/__de la sras bzhi byung ba'i gsum pa ni/__sad mi bdun gyi nang 'khon klu dbang srung ba dang /__bzhi pa tshe 'dzin gyi sras rdo rje gnyis kyi slob dpon chen por gtugs te/__sngags rnying ma'i chos la mkhas shing grub par grags/__de nas 'khon rog sher tshul la thug gi bar du gdung rabs bcu tsam gyi ring yang phur la thugs dam gyi mthil mdzad/__brag la phur pa btab/__rnga la zhon nas nam mkhar 'gro ba sogs rdzu 'phrul sna tshogs ston nus/__dkar bdud dang brtan ma bcu gnyis sogs bran du 'khol ba sha stag byung /__shes rab tshul khrims kyi gcung dkon mchog rgyal mtshan pas gsang sngags phyi 'gyur gyi bdag por gyur/__'brog mi sogs mkhas grub du ma bsten/__dgung lo bzhi bcu par sangs rgyas kyi bstan pa phrag bcur gnas pa'i phrag bdun pa mngon pa'i dus kyi lnga brgya phrag gi steng nas lo 207'das pa chu mo glang gi lor khrums stod zla ba'i yar tshes la bod kyi rdo rje gdan dpal sa skya'i gtsug lag khang btab/__'di man 'khon sa skya'i gdung brgyud du grags/__de sras gangs can gyi rdo rje 'dzin pa kun gyi gtsug nor sa skya pa kun dga' snying po ste/__'di nas jo bo rjes sa dkar po'i lo gsal d+hIHbdun dang hU~M gcig 'dug pa gzigs nas der 'jam dbyangs kyi sprul pa bdun dang /__phyag rdor gyi sprul pa gcig ste brgyad byon par lung bstan pa rnams rim gyis byon/__slob dpon chen pos/__kun dga' snying po sa skya lo tsA dang :__bsod nams rtse mo grags pa rgyal mtshan zhes:__rigs gsum mgon po'i sprul pa gtsang du 'byung :__zhes gsungs/__de la sras bzhi 'khrungs pa'i che ba kun dga' 'bar rgya gar rdo rje gdan du sku gshegs/__gnyis pa bsod rtse/__gsum pa grags rgyal/__bzhi pa dpal chen 'od por grags/__de la sras gnyis kyi che ba rje sa paN/__chung ba slob dpon zangs tsha bsod nams rgyal mtshan/__de la sras lcam sring brgyad 'khrungs pa'i che ba 'gro mgon chos 'phags/__sras gnyis pa gsang bdag rnam 'phrul 'gro mgon phyag na/__de yang yum mi gcig pa'i mched zla slob dpon rin chen rgyal mtshan dang /__ye shes 'byung gnas gsum byung /__ye shes 'byung gnas sras bdag nyid chen po bzang po dpal/__'di rgya nag tu byon nas rgyal po'i nyams sad pa'i phyir ham chu zer bar yun ring du bzhugs bcug__/so bdun pa sa khyi la sa skyar phebs/__btsun mo bdun khab tu bzhes shing sras bco lnga sras mo gnyis te bcu bdun 'byung /__dgung 52lo par rab byung mdzad/__sras thog ma gnyis gzhon nu nas gshegs/__gsum pa bla chen kun dga' blo gros rgyal mtshan dpal bzang po ste/__dgung 12lo bar gong ma'i ti shrI mdzad/__bla ma bdag nyid chen por sku gshegs rjes gcung rnams la bla brang khag bzhir bgos nas gnang /__de'ang mkhas btsun nam mkha' legs pa dang /__gu shrI nam mkha' rgyal mtshan mched la shel tham dang bzhi thog bla brang gnang /__'di dag gi gdung brgyud la dang po gzhi thog bla brang zer/__de nas chu mig bla brang pa zer te bdag chen blo gros dbang phyug yan gyis gdung brgyud rnams rdzogs nas deng sang mi bzhugs/__ti shrI kun dga' legs pa'i 'byung gnas dang /__ti shrI kun dga' rgyal mtshan dpal bzang la gser tham dang /__lha khang bla brang gnang /__'di'i brgyud la dang po lha khang bla brang pa dang/__deng sang la stod gcung dang khams su bzhugs par grags/__tA dben gu shrI/__de'i gcung 'jam dbyangs don yod rgyal mtshan/__de'i gcung thams cad mkhyen pa bsod nams rgyal mtshan mched la shel tham dang /__rin chen sgang gi bla brang gnang /__'di la sngar rin chen sgang bla brang pa dang /__phyis su dge sdings bla brang pa zhes grags/__bdag chen rdo rje 'chang blo gros rgyal mtshan yan gyis gdung brgyud rdzogs nas deng sang chos brgyud 'dzin pa sha stag yin/__sa'i len dbang kun dga' legs pa'i rgyal mtshan dpal bzang po la dus mchod bla brang dang gser tham gnang /__'di pa'i sgos kyi gdung brgyud la dang po dus mchod bla brang pa dang /__deng sang rtse gdong bla brang par grags shing lugs gnyis kyi sgo nas dar zhing rgyas par bzhugs/__de las gzhan pa'i sras rnams chung ngu la gshegs/__lcam mo rnams kyi mtshan ma smos so/__/de yang rin chen sgang pa'i brgyud pa ni/__bdag nyid chen po dang /__zhwa lu sku zhang mgon po dpal gyi sras mo ma gcig gzhon nu 'bum/__de la sras sku mched gsum 'khrungs pa'i che ba tA dben kun dga' nyi ma gzhon nu ste gong ma'i pho brang du gshegs/__de'i gcung 'jam dbyangs don yod/__de'i gcung dpal ldan bla ma dam pa bsod nams rgyal mtshan yin/__'jam dbyangs don yod rgyal mtshan gyis rab byung ma mdzad pa'i gong ma gcig zhwa lu pa yon tan dpal 'bum khab tu bzhes pas/__sras gcen nyi ma rgyal mtshan chung ngu nas gshegs/__gcung zla ba rgyal mtshan gyis bsnyen rdzogs ma mdzad pa'i gong ma gcig zhwa lu pa nam mkha' rgyal po zhes pa'i sras lcam sring bzhi 'khrungs pa'i che ba slob dpon pad+ma'i rnam 'phrul bdag chen 'jam dbyangs chen po nam mkha' rgyal mtshan dpal bzang po/__de'i gcung bdag chen zhwa lu pa mthu stobs dbang phyug rgyal mtshan dpal bzang /__lcam mo che ba phyag rdor 'bum/__chung ba dge ma'o/__/bdag chen 'jam dbyangs chen pos sa skya'i dpon chen gyi brgyud pa kham mda' ba ma gcig dpal 'byung rgyal po zhes pa khab tu bzhes pas/__sras lcam sring drug byung ba'i gcen rgya gar pa shes rab rgyal mtshan/__gcung bdag chen chos kyi rgyal po blo gros rgyal mtshan yin/__sras mo bzhi'i che ba slob dpon ma bsod nams dpal 'dzom/__gnyis pa slob dpon ma nam mkha' 'bum/__gsum pa slob dpon ma nam mkha' bzang mo/__bzhi pa slob dpon ma mkha' 'gro 'dzom mo/__/kha ba ri pa'i bsod nams pad+mo'i rtser/__/skabs gsum bung ba gzhon nu'i rol rtsed las/__/phan bde sbrang rtsi gsar pa'i dus ston gyis/__/thub bstan lang tsho'i 'dzum dkar 'di na bzhad/__/dpa' mdzangs blo gros phun tshogs dpa' bo zhig_/'jam dbyangs 'khor los sgyur ba'i zhabs 'bring mchod/__/de yi rigs las kha ba'i sman ljongs su/__/ngur smrig 'dzin pa'i thog ma nA gen+d+ra/__/'jig rten mig gyur 'khon ston mched bcas kyis/__/'dzam gling brtul zhugs grub pa'i mthar son pa/__/o rgyan mkhan po'i zhabs rdul gtsug gis bsten/__/gsang chen bdud rtsis thugs kyi bum bzang gtams/__/rigs kyi thig le grub dbang bal po'i mtshan/__/rigs sngags grub pa'i sngags 'chang 'khon rog sogs/__/khrag 'thung yang phur khros pa'i zhal mthong zhing /_/sra brtan brag la 'dam bzhin phur pa 'debs/__/bas mtha'i gnas su mkha' la bya ltar lding /__/dbyings phyug ma mo bdud nag thod phreng dang /__/gangs can skyong ba'i brtan ma bcu gnyis sogs/__/bka' yi spring yig ral pa'i rgyan du 'dzin/__/de nas rje btsun dkon mchog rgyal po zhes/__/mkhas dang grub pa'i 'dab bzang dbang po des/__/gsang chen gsar pa'i pad+ma'i chu gter rnyed/__/skal bzang ngang pa'i bsti gnas dam par gyur/__/gangs can ri bo'i khongs 'di ma ga d+ha/__/chu shel 'dzin ma'i spo la rdo rje gdan/____/_byang phyogs 'dzin ma'i dpal du 'phos 'dra ba'i/__/sras bcas rgyal ba'i pho brang gtsug lag khang /__/gang der rje btsun 'jam pa'i rdo rje nyid/__/gos dkar lcang lo'i zol gyis gsang chen skyongs/__/la lar ngur smrig 'dzin pa'i gar gyis rol/__/thub bstan rgyal mtshan srid rtser 'dzin pa la/__/sa skya pa zhes snyan pa'i rnga gsang ni/__/khor yug ri bo'i khongs su lhang nge ba/__/yongs 'du dag las rkang 'thung gnyis pa bzhin/__/sa chen 'di na 'gran zlas dben par gyur/__/der ni stobs ldan rgyal po se chen gyis/__/shing sgo 'dzin pa'i bod yul chol ga gsum/__/chos kyi rgyal por phul bas byang phyogs na/__/gang 'di'i 'bangs su ma gyur su yod smos/__/'phags mas lung bstan ma dros chu mtsho las/__/mkhas dang grub pa'i gdung gi chu bo bzhi/__/dge mtshan rin chen bye ma 'dren bzhin du/__/skye rgu rgya mtsho'i dpal du dal gyis 'babs/__/de las chu skyes tshal na pad dkar dang /__/rgyu skar khrod na ri bong 'dzin pa ltar/__/rab mchog phul byung rin chen sgang pa zhes/__/zla med mthu stobs nus pa'i bdag nyid byung /__/rmad byung rigs kyi nor bu'i cod pan 'di/__/dregs ldan bye bas ral pa'i rgyan du mchod/__/mkhas dang grub pa yongs kyi spyi bos btud/__/skal bzang 'gro ba kun gyi phyag gi gnas/__/ba lang lta bu'i blun pa skal ngan 'ga'/__/ma gtogs rgya mtsho'i gos can khyon 'di na/__/gang gi rigs mchog zhal rdul gtsug rgyan du/__/'dzin par mi byed shes ldan su zhig yod/__/ces gsungs/__yang /__pad+ma'i rnam 'phrul 'jam dbyangs chen po dang /__/mtshan ldan DA ki dpal 'thung rgyal mo yi/__/sras su 'khrungs nas ngo mtshar rol rtsed mdzad/__/gsang chen snyan brgyud thob la phyag 'tshal lo/__/zhes gsungs/__de yang bdag chen 'dis rang gi yab las mgon po'i skor dang /__mus chen sems dpa' chen po dkon mchog rgyal mtshan la gsung ngag lam 'bras slob bshad sogs gsan nas snyan brgyud rgya mtsho'i gter mdzod du gyur/__sa chen gyi sprul par grags/__dgung lo nga gnyis par gshegs/__slob ma yang chos rje sangs rgyas dpal sogs bka' drin rjes su nos pa'i dam pa bzhi/__kun mkhyen go shAka rnam gnyis sogs 'dzam gling yongs su grags pa'i mkhas chen so lnga/__bdag chen bsod nams rgyal mtshan sogs gangs can chen por grags pa'i skyes bu gnyis/__rdo rje 'chang sgo rum pa kun dga' legs pa'i blo gros sogs gsung gi gsang ba 'dzin pa'i dam pa brgyad/__khyad par yongs rdzogs snyan brgyud zab mor mnga' bdag rje btsun rdo ring pa chen po dang /__gzhan yang gsung chos kyi 'brel ba tsam thob pa ni shin tu mang ngo /__/dpal ldan bla ma dam pa kun spangs chos kyi rgyal po'i rnam thar ngo mtshar dad pa'i spu lang g.yo ba zhes tshar chen rin po ches mdzad par/__rgyal ba rgya mtsho'i rmad byung ngo mtshar gtam/__/srid mtha'i bar du dbyangs su bsgrags pa bas/__/'di na mtshan ldan rdo rje slob dpon gyi/__/yon tan rtogs pa brjod pa'i cha shas tsam/__/brjod pa'ang bsod nams bla na med do zhes/__/bslu med dam pa'i gtam gyis yid drangs nas/__/gang gi yid ni tshul 'dir zhugs par gyur/__/ces sogs gsungs/__de yang sku'i skye ba ni/__dang po'i sangs rgyas 'khor ba 'jig__/rgya gar du l+wa ba pa/__bod du phag grur gyur pa dbus smyon he ru kas lung bstan/__rig 'dzin pad+ma gling pas bram ze mchog sred kyi sprul par bsgrags/__'khrungs yul ni/__bod chos rgyal gyi gdung gi nang tshan/__'od srung gi brgyud pa las yab mgon po rin chen nam/__phyis su rab tu byung ba'i mtshan kun dga' bsod nams rgyal mtshan dpal bzang po zhes bskyed rdzogs kyi nyams len mthar son pa dang /__yum sna nam rdo rje bdud 'joms kyi brgyud pa sa skya'i dbon chen dpal 'bum bzang po'i rigs ye shes mkha' 'gro'i rtags can byang sems dbang mchog rgyal mo'i sras su dpal snar thang gi nye 'dabs/__ngor e wa~M dang nye ba'i sa rdo ring bsam 'grub smon mkhar du 'khrungs/__ngo mtshar gyi ltas du ma byung /__dgung lo bcu drug nas gzhis ka bsam 'grub rtser lha sras mu khri btsan po'i rnam 'phrul sprul pa'i rgyal po rin spungs nor bu bzang po'i phyag phyir 'byor nas ma gshegs par bzhugs/__chung ngu'i dus nas zhwa lu pa rgyal mtshan dpal bzang dang /__rdo rje 'chang kun dga' bzang pos rjes su bzung /__dgung lo sum cu yan la rgyal srid chos bzhin du skyong /__rten skya bor bzhugs/__so gcig par mnal lam du ngor chen pas bskul ba ltar grwa thang chos rje shes rab zla bar rab tu byung zhing /__de nas bdag chen rdo rje 'chang la bsnyen rdzogs bzhes pa nas bzung mnyes pa gsum gyi bya bas bsten nas dpal ldan sa skya pa'i snyan brgyud rgya mtsho'i gan mdzod du gyur/__'di dang rje ngor chen/__zhwa lu pa mkhyen rab chos rje gsum bka' drin che ba'i bla mar mdzad/__gzhan yang ris med kyi yongs 'dzin bdun cu rtsa gnyis bsten te/__zung gis lhag pa'i yongs 'dzin bcu phrag bdun/__/lhag par bka' drin che ba'i bla ma gsum/__/gcig pu 'gran zla bral ba'i sa skya pa/__/mnyes pa gsum gyi sgo nas bsten pa'i mthus/__/'phags yul ma dros chu gter las 'ongs pa'i/__/rgyud sde rnam bzhi'i chu klung bye ba brgya/__/snyan brgyud bdud rtsi'i zegs ma 'thor bzhin du/__/khyod thugs rgya mtsho'i ljongs su dal gyis zhugs/__/zhes 'byung /__rnying ma'i phyogs kyang nyi zla lta bu'i mkhas grub kaHthog pa bla ma ye shes 'bum pa/__'ja' lus rdo rje'i sku mngon du mdzad pa rmog ston chos kyi rgyal po rdo rje bzang po/__o rgyan chen pos rjes su bzung ba rig 'dzin kun dga' grags pa/__rje gnam lding pa/__mkha' reg dbon drug pa/__rje thang stong pa/__ga zi kun spangs pa/__rje btsun mtshan ldan ma sogs las bka' gter gyi chos dpag tu med pa gsan/__tsha mo byang chub rdzong /__gnam kha'u brag rdzong /__byis 'gyur rdo rje'i brag rdzong sogs dbus gtsang gi ri khrod rnams su thos bsam gyi snying po bsgrubs pa la 'bad pas lhag pa'i lha rab 'byams kyis zhal gzigs/__dam can bran du 'khol/__mthu stobs dang nus pa'i pha mthar son/__nyams rtogs kyi mdzod klong chen po brdol te/__kun rtog sbyangs gzhi'i snang cha ji snyed pa/__/rang rig skad cig 'char sgor thag chod nas/__/de nyid rim gnyis zab mo'i ting 'dzin du/__/bsgyur nas dag pa'i snang bar rgyas btab ste/__lam byed rnam bzhis gnad du bsnun pa las/__/gzhi lam 'bras gsum dbyer med don smra ba'i/__/gsang chen zab mo'i bcud kyi snying po 'di/__/khyod nyid kho nas bdag gir mdzad pa snyam/__/zhes sogs snang /__zhal slob kyang sa skya pa ngag dbang grags pa rgyal mtshan/__gnyug la paN chen ngag dbang grags pa/__kun mkhyen dol bu pa'i gdan sa pa sgo rum pa kun dga' legs pa'i blo gros/__spyan snga shAkya rgyal mtshan/__glo bo pa kun dga' grol mchog sogs shin tu mang po dang /__khyad par snyan brgyud mtha' dag gi gter mdzod rje tshar pa chos rje sogs mang du byon/__dgung lo don drug pa shing sprel lo smin 1zla'i nya la ngo mtshar ba'i ltas du ma dang bcas te gshegs so/__/rje tshar chen gyis/__'di na khu byug tsa ko ra dang sbrang rtsi byed pas kun nas gang ba'i pad mtshor gnyis 'thung dga' bas rtsen/__tsu ta gsar pa'i snye ma rgyas 'gram ni tsu la yi lan tshar khrod na ka dam myos pa'i glu dbyangs sgrog__/dzA ti'i me tog phreng ba rgod 'dzum rtse la rkang drug ldan pa nyin bzhin rgyu ba de bzhin du/__/dam pa'i bka' drin bdud rtsis myos pas kho bo'i yid 'di dbang med bskyod nas rtogs brjod gtam 'di gsal bar bsgrags/__/zhes dang /__nor bu rnyed nas 'ching bu 'dor ba ltar/_/thun mong lam gzhan dag tu mi gol bar/__/lam gyi snying po zab mo bla ma'i lam/__/snying gi dkyil nas nyams su len par shog__/ces so/___/__!_

Footnotes

Other Information