JKW-KABUM-19-DZA-001-015

Previous Text Back to Volume PageNext Text

རྟོགས་པ་བརྗོད་པ་དཔག་བསམ་གྱི་འཁྲི་ཤིང་ལས་བཏུས་པ།

Wylie title	rtogs pa brjod pa dpag bsam gyi 'khri shing las btus pa
Location	mkhyen brtse'i bka' 'bum Volume 19, sde tshan 1, Text 15, Pages 143-164 (Folios 72a6 to 82b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rtogs pa brjod pa dpag bsam gyi 'khri shing las btus pa. In 'jam dbyangs mkhyen brtse'i dbang po'i bka' 'bum, Vol. 19: 143-164. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

Tibetan Text

Wylie

[edit]

༄༅། །བྱང་ཆུབ་སེམས་དཔའི་རྟོགས་པ་བརྗོད་པ་དཔག་བསམ་གྱི་འཁྲི་ཤིང་ལས། གང་ཐུགས་དྲི་བྲལ་ཤེལ་ལ་ཆགས་ཚོན་འཛིན་པ་མིན་པ་ཉིད། །ཡིད་ནི་སྙིང་རྗེས་བརླན་པ་གང་གི་སྐྱོན་རྣམས་མ་ལུས་བསྐམས། །གང་གིས་ཁྲོ་བ་མེད་ལ་རང་གིས་འཁོར་བའི་དགྲ་མངོན་བཅོམ། །ཀུན་མཁྱེན་དེ་ཡིས་ཁྱེད་ལ་དགེ་ལེགས་གཡོ་བ་མེད་གྱུར་ཅིག །དམ་པའི་གྲིབ་བསིལ་དང་ལྡན་བརྟན་པའི་ཆོས་ཀྱི་རྩ་བས་བསྐོར་ཞིང་བསོད་ནམས་ར་བར་གནས། །བློ་དང་རིག་པ་སྙིང་རྗེ་ལ་སོགས་ཆུ་ཡིས་རྣམ་མཛེས་རྒྱས་པའི་ཡལ་ག་ཅན། །ཆོག་ཤེས་དྲི་མེད་ཡལ་འདབ་གྲགས་སྙན་མེ་ཏོག་རྟག་ཏུ་དམ་པའི་འབྲས་བུ་ནི། །བསམ་ཀུན་ཡོངས་སུ་རྫོགས་པར་མཛད་པ་དཔལ་ལྡན་མཆོག་གི་ལྗོན་པ་རྣམ་པར་རྒྱལ་གྱུར་ཅིག ། ༈ གང་གིས་ལེགས་པའི་ཡིད་ཅན་རྣམས་ཀྱི་ཡིད་ནི་ཀུན་དགའ་མཉན་ལྡན་རིག་པར་བྱེད། །གང་གི་མཐུ་ཡིས་གདུག་རྣམས་ཀྱི་ཡང་ཡོངས་སུ་འདྲིས་པའི་མུན་པ་ཞི་བར་བྱེད། །གང་གི་བསོད་ནམས་གྲངས་མེད་གྲངས་ཀྱི་ཚིག་གི་ཆད་ཀྱི་ཡུལ་དུ་མི་འགྱུར་བ། །འགྲོ་བ་ཐུལ་བའི་མགོན་པོ་རབ་རྒྱས་མཐུ་ལྡན་དེ་ཉིད་གཅིག་པུ་འབྱུང་བ་ཡིན། ། ༈ གང་གིས་མཆོད་འོས་མཆོད་པར་བསྒྲུབ་ལ་མེ་ཏོག་ལ་སོགས་ཏེ། །སེམས་མེད་རྣམས་ཀྱང་འོས་པའི་སེམས་དང་ལྡན་པ་ཉིད་དུ་འགྱུར། །རྒྱལ་ལ་གུས་པའི་ཁྱད་པར་བསྟེན་པ་རྣམས་ལ་བསྔགས་འོས་ཤིང་། །དད་པ་རབ་རྒྱས་བདུད་རྩིའི་རྒྱུན་ཐིགས་དེ་དག་རྒྱལ་གྱུར་ཅིག ། ༈ བདེ་བ་དྲི་མེད་ཆུ་གང་ཞི་བ་ཡི། །ཁ་བའི་རླབས་ལྡན་རྒྱལ་བ་བསྟེན་པ་དག །ཐོབ་ནས་འཁོར་བའི་མྱ་ངམ་ཐང་ལ་ནི། །ཡོངས་འཁྱམས་སྲིད་པའི་གདུང་བ་གཏོང་བར་བྱེད། ། ༈ རྒྱ་ཆེ་སྡིག་པའི་མུན་པ་འཇུག་པ་དག་ནི་རབ་སྤངས་ནས། །འཕྲལ་ལ་སྙིང་རྗེའི་འོད་ཟེར་སྣང་བ་རབ་ཏུ་རྒྱས་པ་ཡིས། །སྐྱོན་སེལ་ཅི་ཡང་ཡོངས་སུ་གདུང་བ་དག་ཀྱང་འཕྲོག་བྱེད་པ། །སངས་རྒྱས་འོད་སྟོང་ལྡན་པས་དམ་པའི་ལམ་ནི་སྟོན་པར་བྱེད། ། ༈ གཟའ་ཡི་བདག་པོའི་སྣང་བས་རྗེས་བཟུང་བས། །མུན་པའི་ཚོགས་ཀྱིས་རྣམ་པར་ཟུམ་གྱུར་པའི། །འདམ་སྐྱེས་ཆུ་དང་བཅས་པ་རྣམས་དག་ཀྱང། །མཁས་པའི་ཅོད་པན་དུ་འོས་ཉིད་དུ་འགྱུར། ། ༈ ལུས་ཅན་ལུས་དང་དེ་བཞིན་ཡིད་ཀྱི་ནི། །སྲིད་པའི་རང་བཞིན་གནད་ཆེན་འཕྲོག་བྱེད་པ། །འཇིག་རྟེན་ཀུན་གྱི་འཇིག་རྟེན་ཕ་རོལ་གཉེན། །སངས་རྒྱས་བཅོམ་ལྡན་བདུད་རྩིའི་གཏེར་ཉིད་དོ། ། ༈ དམན་པའི་སྦྱིན་པས་སྐྱེ་བོ་དམན་པ་རྣམས་ཀྱི་གདུང་བ་སེལ། །ཚུལ་ཁྲིམས་ཀྱིས་ནི་སྐྱེ་བོ་དམ་པའི་ཡིད་དག་ཚིམ་པར་བྱེད། །ཤེས་རབ་སྟོབས་ཀྱིས་ཀྱང་ནི་དབེན་པ་དང་བྲལ་གཏི་མུག་འཕྲོག །བརྩོན་འགྲུས་ཀྱིས་ནི་འཇིགས་སུ་རུང་བའི་འཇིགས་པ་ཟློག་པར་བྱེད། ། ༈ དོ་ཤལ་རབ་གསལ་གོས་མཆོག་ཅོད་པན་དང་། །གདུགས་དང་རྔ་ཡབ་དཀར་པོ་འཛུམ་པའི་དཔལ། །མཆོག་གི་ལོངས་སྤྱོད་སྐལ་བཟང་དགའ་སྟོན་གྱིས། །བདག་ཉིད་ཆེན་པོའི་ལེགས་བྱས་གསལ་བར་བྱེད། ། ༈ ལེགས་པའི་ལམ་ལ་ཡིད་ལ་རེ་བ་རབ་རྒྱས་འགྲུབ་གྱུར་ཅིག །དམ་པའི་ལེགས་བྱས་དྲི་མེད་འཇུག་ངོགས་གཙང་མ་བསྔགས་པར་འོས། །འཇིགས་རུང་འཁོར་བའི་ཆུ་སྲིན་འབྱུང་གནས་དག་གི་ཟམ་སྟེགས་གྱུར། །དམ་པའི་གྲོགས་ཉིད་དགེ་བ་སྤྲོ་བའི་རང་བཞིན་ཕོ་ཉ་ཡིན། ། ༈ གང་གི་བསམ་པ་བླ་མེད་བྱང་ཆུབ་འདོད། །བདུད་རྩིའི་ཕོ་ཉ་དང་པོ་ཟླ་ཚེས་བཞིན། །བསོད་ནམས་ཀྱིས་ནི་གསར་དུ་འཇུག་བྱེད་པ། །སྙིང་སྟོབས་རྒྱ་མཚོ་སུ་ཞིག་དེར་ཕྱག་འོས། ། ༈ བསོད་ནམས་རབ་འབར་བསམ་པ་དྲི་མེད་རྣམས། །ཡོན་ཏན་ལ་ཆགས་ནམ་ཡང་ནོར་མ་ཡིན། །རྣལ་འབྱོར་ལ་སྤྱོད་ལོངས་སྤྱོད་དག་ལ་མིན། །རྡུལ་གྱི་ཆགས་བྲལ་ལ་དགའ་འདོད་ལ་མིན། ། ༈ མེ་ཏོག་དུས་སུ་རབ་ཞུགས་ཤིང་། །ལང་ཚོ་ཅན་གྱི་བརྟན་འཕྲོག་ཚེ། །སྙེ་མ་དང་འགྲོགས་བུང་པ་ནི། །ཡང་དག་རྒྱུ་བ་སུ་ཡིས་ཟློག ། ༈ ཆོས་ཀྱི་རྒྱལ་པོའི་ཕོ་བྲང་ནི། །བསོད་ནམས་ཁང་པ་བསྔགས་འོས་ཤིང་། །བདེན་དང་བརྟུལ་ཞུགས་སྦྱིན་པ་དང། །བརྩེ་བའི་རང་བཞིན་གྱིས་རྟག་བསྟེན། །གཟི་བརྗིད་ལ་བརྟེན་ལྷ་རྣམས་ཀྱིས། །གང་གི་གྲགས་པ་མངོན་མཆོད་པ། །རབ་གསལ་ཞེས་བྱའི་ས་བདག་དེ། །དེར་ནི་ས་ཡི་ཐིག་ལེར་གྱུར། །ཅེས་སོ། ། ༈ བདུད་རྩིའི་ཆུ་གཏེར་མ་བསྲུབས་ཤིང་། །ནོར་རྒྱས་ཐང་ཡང་མ་བཅད་ལ། །རི་བོ་བསྒྲིལ་བ་མེད་པར་ནི། །གླང་པོ་མཆོག་འདི་སུ་ཡིས་བསྐྲུན། ། ༈ གང་འདིར་བཅད་བརྡར་བསྲེགས་པས་ཀྱང་། །གཞན་གྱི་དོན་ལ་བསླུ་མེད་པ། །འགྲོ་འདིར་བསོད་ནམས་ཙནྡན་གྱི། །རྐང་འཐུང་དེ་དག་རྒྱལ་གྱུར་ཅིག ། ༈ ཇི་སྲིད་ཚ་ཟེར་གྱིས་གདུང་དང་། །ཇི་སྲིད་རླུང་ནི་སྐྱེད་བྱེད་པ། །དེ་སྲིད་གང་གི་བཀའ་དང་ནི། །གྲགས་པ་རབ་ཏུ་གཞོམ་མེད་གྱུར། ། ༈ མི་དམན་ཀུན་ཏུ་དགའ་བའི་གཉེན། །ཧ་རི་ཙནྡན་བཞིན་དུ་བསིལ། །ལྷོ་ཡི་ཕྱོགས་ཀྱི་རླུང་གིས་བཞིན། །དམ་པ་རྣམས་ཀྱི་གདུང་བ་འཕྲོག ། ༈ གང་འདི་རྒྱ་མཚོར་ནོར་བུར་སྟེར། །རིང་ནས་རྣ་བའི་བདུད་རྩི་སྟེ། །སློང་བ་ཡང་དག་འོངས་རྣམས་ཀྱིས། །དེར་ནི་བཏུང་བའང་གཞན་ལས་སོ། ། ༈ རབ་རིབ་ཅན་ལ་སྣང་བ་ཕོངས་པའི་དུག་ལ་ནོར་བུ་ལྷུང་ལ་འཆེལ་བའི་ལག་པ་སྟེ། །སློང་ལ་དཔག་བསམ་ལྗོན་པ་འགྲོ་ལ་རྒྱལ་བའི་ཤིང་རྟ་ལམ་གཞན་དག་གི་ལམ་གྱི་བརྒྱགས། །སྡུག་བསྔལ་ནད་ལ་སྨན་ཆེན་དང་ནི་སྲིད་པའི་འཇིགས་པ་ཀུན་འཁྲུགས་བསམ་པ་དབུགས་འབྱིན་པ། །གདུང་བ་དག་ལ་བརྟེན་པའི་མཛའ་བཤེས་ཆོས་ནི་དམ་པ་རྣམས་ཀྱི་གཉེན། ། ༈ དེ་ནས་དེ་ཡི་རིན་ཆེན་བདུན། །དེ་ཚེ་བྱུང་གྱུར་འཁོར་ལོ་རྟ། །ནོར་བུ་གླང་པོ་བུད་མེད་དང་། །ཁྱིམ་བདག་དམག་དཔོན་སྔོན་འགྲོ་བའོ། །ཞེས་སོ། །དམ་པའི་མཛོད་ན་གནས་པའི་དཔལ། །རྟག་ཏུ་འདི་ཡིས་རབ་སྟེར་ཞེས། །གང་ཞིག་མཐོང་ན་པདྨོ་ཅན། །ཟུམ་པར་རབ་ཏུ་ཕྱོགས་པ་བཞིན། ། ༈ གསལ་བའི་དོན་སྟེར་ཡིད་བཞིན་ནོར། །དཔག་བསམ་ལྗོན་པ་ལ་སོགས་ཡོད། །རྙེད་དཀའི་དོན་ནི་རབ་སྟེར་མཆོག །ཁྱོད་ལྟ་བུ་ནི་ཤིན་ཏུ་ཉུང་། ། ༈ འདབ་ལྡན་འཁྲི་ཤིང་རབ་སྨྲས་པ། །བུང་བ་མྱོས་ཚོགས་སྒྲ་དང་ནི། །ཡལ་འདབ་རབ་ཏུ་གཡོ་བ་ཡི། །ལག་པ་དག་གིས་བཟློག་པ་བཞིན། ། ༈ ཡང་ན་བརྣག་པ་རྒྱ་ཆེ་བའི། །སློང་བ་སུ་ཡིས་ཡོངས་རྫོགས་ཏེ། །ཨ་གསྟྱ་ཡི་ཁྱོར་ཆུ་ཡིས། །ཧུབ་ཏུ་རྒྱ་མཚོ་ཆེན་པོ་སོང་། ། ༈ བདུད་རྩི་ལ་ནི་སུ་ཞིག་སྡང། །ཙནྡན་ལ་ནི་སུ་མི་སྲེད། །ཟླ་བ་ལ་ནི་སུ་གུས་དམན། །དམ་པ་རྣམས་ལ་སུ་མི་འདོད། ། ༈ དགེ་བའི་སྨོན་ལམ་དག་པའི་གཟི་བརྗིད་དང་། །དབེན་པའི་དྲི་མེད་སྣང་བའི་རྟོགས་བྱེད་ལྡན། །གང་ཞིག་ཡོངས་སུ་བསྒྲགས་པ་ཙམ་ཉིད་ན། །སྲིད་པའི་རྨོངས་འཕྲོག་དེ་ཉིད་བསྔགས་པར་འོས། ། ༈ ཀུན་ལ་ཉི་མའི་འོད་ཟེར་སྙོམས། །ཆུ་འཛིན་དག་གིས་ཆར་པ་སྙོམས། །སེམས་ཅན་ཀུན་ལ་ཐུགས་བརྩེ་བ། །བཅོམ་ལྡན་འདས་ཀྱི་གཟིགས་པ་སྙོམས། ། ༈ དེར་ནི་སྙིང་རྗེའི་དཔག་བསམ་ཤིང་། །སྙིང་སྟོབས་མེ་ཏོག་འབྲས་བུ་ཆེ། །རབ་ཏུ་ཞི་བའི་བདུད་རྩི་ཡིས། །ཡང་དག་དྲན་པ་དེ་ཡིས་མཐོང་། ། ༈ བསོད་ནམས་དྲི་བཟང་རྒྱས་གྱུར་ཅིང་། །སྙིང་རྗེའི་གེ་སར་འཁྲིགས་གྱུར་པ། །བཅོམ་ལྡན་ཞལ་གྱི་པདྨོ་ལས། །གསུང་གི་སྦྲང་རྩི་མཆོག་གཅིག་ཐོབ། ། ༈ སྐྱེས་བུ་རྣམས་ཀྱི་དཔྲལ་བ་ཡངས་པའི་རྡོ་ཡི་གླེགས་བུ་ལ། །བདེ་མེད་ལས་ཀྱིས་སྤྲུལ་པ་གསལ་བའི་རྟགས་ཅན་གཟོད་དག་གིས། །སྐྱེ་དང་འཆི་བ་རབ་སྤྲོས་ཡི་གེ་དག་ཏུ་བཀོད་གྱུར་པ། །འདི་དག་རྣམས་ནི་ལག་པས་ཡོངས་སུ་ཕྱིས་པས་བསྐྱོད་པ་མིན། །ཅེས་སོ། ། ༈ གང་གི་སྲང་གི་ཚད་ཀྱིས་ནི། །ལྷུན་པོའི་དེ་ཉིད་གྲངས་རིག་པ། །དེས་ཀྱང་བདེར་གཤེགས་ཡོན་ཏན་གྱི། །དམ་པའི་ལྕི་བ་ཉིད་མི་རྟོགས། ༈ །དེར་ནི་དྲི་མེད་གསལ་ཞིང་མཛེས། །ཆ་ཤས་ཀྱིས་ནི་ཡོངས་སུ་རྫོགས། །མི་དམན་ཀུན་དགའ་རྒྱས་གྱུར་པ། །སུ་ཡི་ཟླ་བ་བཞིན་མ་གྱུར། ། ༈ འཁོར་བར་ནོར་ནི་སྒྲུབ་པ་ལ། །བག་ཆགས་གོམས་ལས་ལུས་ཅན་རྣམས། །རྨོངས་པས་འདིར་ནི་གསེར་གྱི་རི། །ཐོབ་ཀྱང་ཡོངས་སུ་ཚིམ་པ་མེད། ། ༈ གྲགས་པ་འགྲོ་གསུམ་གངྒཱ་དང་། །མཐུ་ཡིས་རྣམ་པར་བརྒྱན་པའི་དཔལ། །འདི་དེ་བསོད་ནམས་འཁྲི་ཤིང་གི། །མེ་ཏོག་རབ་འཐོན་དང་པོ་ཡིན། ། ༈ སྐལ་ལྡན་རྣམས་ལ་མི་ཤེས་པ་ནི་ལེགས་པའི་རང་བཞིན་ལས་བྱུང་དགེ་ཉིད་གྱུར། །རྨོངས་པ་རྣམས་ལ་དགེ་བ་མི་ཕན་ཉིད་འགྱུར་འདི་ནི་རིམ་པ་འདི་ཡིས་མཚོན། །མཚན་བྱེད་སྨག་རུམ་མུན་པ་སྨན་གྱི་ནགས་ལ་མཆོག་ཏུ་མཛེས་པ་རབ་ཏུ་སྟེར། །གང་ཡང་ཉི་མའི་གཟི་བྱིན་ནུབ་འདི་རིགས་ཀྱི་མིག་ནི་ཀུན་ཏུ་ཉམས་པར་བྱེད། ། ༈ ཚེ་ཡི་རྒྱན་ནི་ཡོན་ཏན་ཏེ། །ཡོན་ཏན་རྒྱན་ནི་དབེན་པའོ། །འདི་ཡི་རྒྱན་ནི་རབ་ཞི་སྟེ། །རབ་ཞིའི་རྒྱན་ནི་ཆགས་བྲལ་ལོ། ། ༈ ཨ་མྲྀ་འཁྲི་ཤིང་གཞུ་ལ་གདའ། །བཀོད་པ་ཨ་མྲའི་མཚོན་དང་ལྡན། །རྒྱལ་གྱུར་ཅིག་ཅེས་བདག་དྲེགས་ལ། །སློང་མོ་བ་བཞིན་ཁུ་བྱུག་སྒྲོགས། ། ༈ གླང་པོ་རི་བོའི་སྟེང་དེ་ན། །ལན་བུ་གཡོ་བའི་བུང་བ་ཅན། །རྒྱལ་པོ་དཔྱིད་དང་འགྲོགས་པ་ཡི། །གསར་པ་ཕྲེང་ཅན་མ་དེ་མཛེས། ། ༈ འཁོར་བའི་ནགས་ནང་རྣམ་པར་ཡངས་པ་འདིར། །རང་བཞིན་གྱིས་གཡོ་དུས་ཀྱི་བུང་བ་དག །རང་དགར་འབབས་པས་འགྲོ་སྲོག་མེ་ཏོག་གི། །གེ་སར་ཚོགས་ལ་ཁམ་ཟས་བྱེད་པ་ཉིད། །ལོངས་སྤྱོད་རྦ་རླབས་དག་དང་མཚུངས་ཤིང་རི་དྭགས་འཇིགས་པའི་མིག་ལྟར་གཡོ། །དལ་འབྱོར་སྐད་ཅིག་མཚོན་བྱ་སྐྱེ་བའི་ཆུ་གཏེར་རྣམ་པར་གསལ་བའི་གློག །ལུས་ཀྱི་པདྨ་ལང་ཚོ་གསར་པའི་ཉི་འོད་གཞོན་ནུ་དམར་པོ་གཡོ། །སྲོག་གི་ཐིགས་པ་སྲིད་པའི་མྱ་ངམ་ཐང་ལ་མྱུར་དུ་འཇིག་པར་འགྱུར། ། ༈ དམ་པའི་བདུད་རྩིས་བརླན་པའི་ཞལ་དང་རི་བོང་ཅན་ཟེར་དག །སྡུག་བསྔལ་ཞི་བྱེད་བདེ་བ་ཕུན་སུམ་ཚོགས་པ་སྦྱིན་པར་བྱེད། །སྐྱེ་བོ་རྣམས་ནི་ཡང་དག་འཚོ་བྱེད་རབ་རིབ་འཕྲོག་པར་བྱེད། །དམ་པའི་ཡིད་ཀྱི་མཚོ་ནི་རྣམ་པར་རྒྱས་ཤིང་དགོད་པར་བྱེད། ། ༈ དམ་པའི་སེམས་ལ་གནས་པའི་དམ་པ་རྣམས་ཀྱིས་ཡོངས་འདྲིས་བདུད་རྩི་དག་པས་ཀྱང་། །ཤིན་ཏུ་མཉེས་གཤིན་ཚིག་ནི་སྔ་མ་བས་ཀྱང་མཉན་འོས་སྟོན་ཟླའི་འོད་ཆགས་པས། །སྤྱོད་པའི་ཀུན་དགའི་ཚོགས་སྟེར་གཞན་པ་ཅི་ཞིག་ཡིད་ནི་མེ་ཏོག་པས་ཀྱང་འཇམ། །སྐྱེ་བོ་ལེགས་པའི་ཧ་རི་ཙནྡན་པས་ཀྱང་ཡོངས་གདུང་མཆོག་ཏུ་ཟློག་པར་བྱེད། ། ༈ དེ་ཡིས་དཔུང་རྒྱན་ཅོད་པན་གྱི། །འོད་ཀྱི་ཡལ་འདབ་རྒྱས་གྱུར་པ། །སྤྲིན་གྱི་ཕྲེང་བ་བརྒྱ་བྱིན་གྱི། །གཞུ་ཡིས་ཁྱབ་པ་བཞིན་དུ་མཐོང་། ། ༈ གང་ཞིག་སྙིང་སྟོབས་ལྡན་པའི་སྙིང་སྟོབས་ཀྱི། །ཁྱད་པར་སེམས་ཅན་ཐམས་ཅད་བདེ་བའི་རྒྱུ། །ལུས་ནི་ཞིག་ཀྱང་ཁྲོ་བའི་མེ་རྣམས་ལ། །མཆོག་ཏུ་ཞི་བར་འགྱུར་དེ་རྒྱལ་གྱུར་ཅིག ། ༈ ཞེས་པ་བདེར་གཤེགས་ཞལ་གྱི་པདྨ་ལས་འཁྲུངས་པ། །ཡིད་འོང་སྦྲང་རྩིའི་གཟུགས་བརྙེན་རབ་ཏུ་དང་བའི་གསུང་། །བུང་བའི་ཚོགས་བཞིན་དགེ་སློང་རྣམས་ཀྱིས་རབ་འཐུངས་ནས། །རབ་ཏུ་དགའ་བ་རྒྱས་པ་ཅི་ཡང་བྱུང་བར་གྱུར། ། ༈ འཇིག་རྟེན་དག་ན་མཚོན་བྱེད་པས། །སྐྱེ་བོ་མཆོག་དང་དམན་པར་མཚོན། །ཉི་མས་ཐམས་ཅད་རབ་གསལ་ཞིང་། །སྨག་རུམ་མུན་པས་ཀུན་འཆིང་བྱེད། ། ༈ གང་ཞིག་གཞན་གྱི་བུད་མེད་ལ། །ལུས་ཀྱིས་ཡོངས་འཁྱུད་བདག་གིར་བྱེད། །དེ་ནི་དམྱལ་བའི་མེ་ལྕེ་ལ། །ཕྱེ་མ་ལེབ་བཞིན་སླར་འཁྱུད་ཐོབ། ། ༈ སྦྱིན་པའི་གྲོགས་སུ་སྐད་ཅིག་ཏུ་གྱུར་པ། །དེ་དག་སྦྱིན་བདག་འབྲས་བུ་མཚུངས་པར་ཐོབ། །གཞན་ལ་ཕན་པར་བརྩོན་པས་ཞུགས་རྣམས་ཀྱི། །གྲོགས་སུ་བསོད་ནམས་ལས་མེད་མི་འབྱུང་ངོ་། ། ༈ གྲགས་སྙན་ལྡན་པ་དེ་ཡི་ནི། །སྦྱིན་ཁང་ཀུན་ཏུ་གྲགས་པའི་ཚེ། །དཔག་བསམ་ཤིང་ལ་སྐྱེས་བུ་རྣམས། །གུས་པ་མཆོག་ཏུ་ཆུང་བར་གྱུར། ། ༈ འགྲོ་བའི་ཉོན་མོངས་དུག་གི་སྐྱོན། །འཕྲོག་ཅིང་སྙིང་རྗེ་རྒྱས་པ་ཡི། །བདུད་རྩིས་ཡང་དག་རྫོགས་པའི་ཐུགས། །གང་པོ་ཁྱོད་ལ་ཕྱག་འཚལ་ལོ། ། ༈ ཆོག་ཤེས་འབྱོར་པ་ཐོབ་གྱུར་པས། །སྐལ་བ་བཟང་པོ་མཆོག་ཏུ་མཛེས། །ཡིད་ནི་ཆགས་བྲལ་གྱིས་བརྒྱན་པ། །སེམས་ཅན་དག་པའི་མཚན་ཉིད་ཡིན། ། ༈ གང་ན་ཉི་མས་མུན་སྟེར་ཟླ་བ་ནི། །མེ་ཡི་ཆར་པ་འབེབས་བྱེད་བདུད་རྩི་ལས། །རབ་ཁྲོས་ནག་པོ་བརྩེགས་པ་སྐྱེས་གྱུར་ཀྱང་། །སྨན་མཛད་ཁྱོད་ལས་གཞན་ལ་འཚེ་མི་འབྱུང་། ། ༈ སྙིང་སྟོབས་ཀྱིས་ནི་ཉི་མའི་འོད་ཟེར་མུན་པ་བཞིན་དུ་གསལ། །ཆོས་དག་གིས་ནི་རིན་ཆེན་ཚོགས་རྣམས་མཁའ་ལས་འབབ་པར་འགྱུར། །བརྟན་པ་ཡིས་ནི་རྒུད་པ་ཐམས་ཅད་རབ་ཏུ་ཞི་བར་འགྲོ། །སྦྱིན་པ་ཡིས་ནི་ཕྱོགས་རྣམས་ལོངས་སྤྱོད་སྐལ་བ་བཟང་པོར་འགྱུར། ། ༈ གཞན་ལ་ཕན་པ་འཇེབས་པའི་མཐུ་དང་ནི། །ཀུན་གྱི་ཉེར་འཚོ་འབྱོར་པ་ཆེན་པོ་སྟེ། །འབྲས་བུ་ཆེར་འོས་འདི་དག་དགེ་རྣམས་ཀྱི། །བསོད་ནམས་མྱུ་གུའི་འབྲས་བུ་དང་པོ་ཡིན། ། ༈ སངས་རྒྱས་གཟི་བརྗིད་རྣམ་པར་དག །སྙིང་རྗེ་བདུད་རྩིའི་རྒྱ་མཚོ་སྟེ། །སེམས་ཅན་ཀུན་གྱི་གཉེན་གཅིག་པུ། །རྟག་ཏུ་སད་ལ་ཕྱག་འཚལ་ལོ། ། ༈ གྲྭ་གཉིས་དམར་བ་ཁྱོད་ཀྱི་སྤྱན། །པདྨོའི་འོད་ལྡན་གངྒཱ་བཞིན། །དྲི་མ་འཁྲུད་བཟོད་དག་བྱེད་པ། །འདི་ཡིས་བདག་ལ་རེག་པར་མཛོད། ། ༈ རང་དོན་ལ་འཇུག་ཆགས་པ་དང་བྲལ་ཞིང་། །གཞན་ལ་ཕན་པར་རྟག་ཏུ་བརྩོན་རྣམས་ཀྱིས། །གྲུབ་པ་ཉོན་མོངས་རྣམས་ལ་མི་འཇིགས་ཤིང་། །གདུང་དང་གེགས་བྲལ་གཟིར་བྱེད་མིན་པར་འགྱུར། ། ༈ དེ་གདོང་ཆུ་སྐྱེས་དག་གིས་ཕྲལ་ལ་བཅོམ་པས་མཚན་མོའི་ཡིད་འོང་ཉམས་པ་བསྟེན། །དེ་ཡི་སྨིན་མའི་རྣམ་འཕྲུལ་དག་ལ་ངོ་ཚ་ཡིད་སྲུབས་གཞུ་ནི་གུག་པར་གྱུར། །ཡིད་འོང་ཡལ་འདབ་མདངས་འཕྲོག་དེ་ཡི་མཆུ་སྒྲོས་དམར་བ་དག་གིས་གཟིར་གྱུར་ཏེ། །ཆགས་བྲལ་ཉིད་ཐོབ་བིམྦ་དག་ནི་ནགས་ཀྱི་ས་ལ་ཡང་དག་བརྟེན་ནམ་སྙམ། ། ༈ མཐའ་དག་འཇིག་རྟེན་སྣང་བ་སྤྲོ་སླད་ཉི་མ་འོད་ཟེར་འགྱེད། །བདུད་རྩིའི་ཆར་མཆོག་དབབ་སླད་ཟླ་བ་རྫོགས་པ་ཉིད་དུ་འགྲོ། །སེམས་ཅན་བསྒྲལ་བའི་སླད་དུ་དགེ་བའི་ཟམ་སྟེགས་ཆེན་པོ་ནི། །ཁ་ཅིག་འགྲོ་བ་འདི་སྙེད་བསྔགས་པར་འོས་པའི་སྐྱེ་བ་འཛིན། །ཤཱཀྱའི་གྲོང་ཁྱེར་དག་ཏུ་སྔོན། །རྒྱལ་པོ་དཔལ་ལྡན་ཟས་གཙང་བྱུང་། །གྲགས་པ་རི་བོང་ཅན་བསྐྱེད་པ། །བདུད་རྩིའི་ཆུ་གཏེར་གཞན་པ་བཞིན། ། ༈ འཇིག་རྟེན་དགའ་བྱེད་བྱང་ཆུབ་སེམས། །དེ་ཡི་ལྷུམས་སུ་བཟུང་བ་ནི། །འོ་མཚོའི་རླབས་ཀྱི་ཟླ་བ་བཞིན། །དཀར་བའི་འོད་དང་ལྡན་པར་གྱུར། །བུ་རམ་ཤིང་སྐྱེས་རྒྱལ་པོའི་རྒྱུད། །དེར་ནི་ལྷུམས་ན་གནས་པ་དེར། །གཏེར་དང་ལྡན་པའི་ས་གཞི་བཞིན། །དགེ་བའི་མཚན་ཉིད་ཀྱིས་མཚོན་གྱུར། ། ༈ མཁའ་ཡི་ཆུ་རྒྱུན་གྱིས་བཀྲུས་པ། །དེ་ཡི་གྲགས་པ་དཀར་བའི་གདུགས། །སྙིང་སྟོབས་འཛུམ་པའི་རྔ་ཡབ་བཅས། །དེར་ནི་ལྷ་རྣམས་དག་གིས་བཟུང་། ། ༈ བྱང་ཆུབ་འོ་མའི་རྒྱ་མཚོ་ཆེ། །སྙིང་སྟོབས་དག་པ་འདི་ཡི་ནི། །གསུང་གི་བདུད་རྩི་མཁས་པ་དག །སྐལ་ལྡན་རྣམས་ཀྱི་ཉེར་འཚོར་གྱུར། ། ༈ མཛེས་པའི་སྤྱོད་ཚུལ་དང་ལྡན་ཡོན་ཏན་སྡུད་པར་འོས་གྱུར་ཅིང་། །རིན་ཆེན་འོད་ཟེར་རྣམ་དག་དམ་པའི་སྣང་བ་རྒྱས་པར་བྱེད། །ནད་མེད་མུ་ཏིག་རང་བཞིན་འགྲོ་བའི་རྒྱན་ནི་སྐྱེད་བྱེད་པ། །གང་ཞིག་དགེ་བས་རྗེས་འབྲེལ་མིང་ཆེན་རིགས་དེ་འགའ་ཞིག་ཡིན། ། ༈མི་བདག་གཟུགས་ཅན་སྙིང་པོས་ཨུ་དྲཱ་ཡ་ན་ལ་སྤྲིངས་པ། །བདེ་བར་གཤེགས་པའི་ཞབས་པད་བཀོད་པས་བསོད་ནམས་ཉེ་གྱུར་པ། །སྐབས་གསུམ་གྲོང་གི་ཁྱད་པར་རྒྱ་ཆེ་མ་ག་དྷཱ་ཡུལ་ནས། །དགེ་བ་བྱས་པའི་གཟུགས་ཅན་ས་ཡི་བདག་པོ་གཟུགས་ཅན་སྙིང་། །ཆོས་ཀྱི་གཉེན་གྱིས་ས་གཞིའི་ཐིག་ལེ་ཁྱོད་ལ་རབ་སྨྲས་པ། །རི་བོང་མཚན་མའི་འོད་ལྡན་བཅོམ་ལྡན་སྐུ་གཟུགས་ཆགས་སྡང་དུག་ནི་ཉམས་པར་བྱེད། །སྲེད་པ་ཡང་དག་ཞི་བྱེད་སྲིད་པའི་རྨོངས་ཆེན་ནད་ཀྱི་ཕན་དང་སྨན་པ་དང་། །རབ་དྭངས་མངར་བའི་བསོད་ནམས་བཅུད་ལེན་ཁྱོད་ཀྱི་མིག་གི་སྣོད་དུ་རབ་བླུགས་པ། །འདི་ནི་ཁྱོད་ལ་རབ་སྤྲིངས་སྐལ་ལྡན་མགྲིན་པའི་བར་དུ་རབ་ཏུ་འདོད་པས་འཐུང་། །དམ་པའི་ལམ་ལ་རྣམ་པར་སྦྱོར་ཞིང་ཡོན་ཏན་ཚོགས་རྣམས་འཛིན་པར་རྟག་ཏུ་སློབ། །བྱ་བ་ངན་ལས་རྣམ་པར་བཟློག་ཅིང་བརྟན་པའི་བདེ་བ་འཐོབ་ལ་མཆོག་ཏུ་བསྐུལ། །རྒྱུན་ཆད་མེད་པ་ཉིད་དུ་བདག་ཉིད་ཀུན་གྱི་ཟོལ་མེད་ཕན་པ་སྐྱེད་བྱེད་པ། །དམ་པའི་དགེ་བའི་གྲོགས་ཀྱི་ཡིད་འོང་ཕན་པ་འདི་ལས་མཆོག་ནི་ཅི་ཞིག་བྱ། །ཞེས་སོ། ། ༈ གང་ཞིག་ནགས་སོང་ཤིང་ཤུན་ལྡན་གྱུར་ཀྱང་། །སློང་རྣམས་རྒྱུན་དུ་དོན་རྒྱས་ཉིད་དུ་བྱེད། །སྤྱོད་ཚུལ་མཛེས་ལྡན་དེ་དང་ཙནྡན་གྱི། །ངང་ཚུལ་དག་ནི་སུ་ཡིས་བསམ་མི་བྱ། ། ༈ བསོད་ནམས་མི་དམན་ས་ཡི་དབང་། །སློང་བ་ཀུན་གྱི་དཔག་བསམ་ཤིང་། །ཕོངས་པའི་གདུང་བ་མཆོག་ཏུ་འཕྲོག །སྙིང་སྟོབས་འོ་མའི་རྒྱ་མཚོ་ཐོབ། ། ༈ ལེགས་བཤད་རྣམས་དང་མཐུན་རྣམས་དང་། །དོག་པ་རྣམས་ཀྱང་རྒྱས་པ་ནི། །གསར་པ་ཁོ་ན་ཡིད་འཕྲོག་སྟེ། །བུད་མེད་རྣམས་ཀྱི་ལང་ཚོ་བཞིན། ། ༈ ཁྱོད་ནི་ཡོན་ཏན་ལྡན་པའི་གྲོགས། །སྒྱུ་རྩལ་པདྨོ་ལྡན་པས་མཛེས། །ཤར་ཚེ་སྐྱེ་བོ་མཐའ་དག་ནི། །སྣང་བཅས་ལེགས་པའི་ལམ་དུ་འགྲོ། ། ༈ ས་སྐྱོང་མཁས་ན་རིག་པའི་རྩེ་དགས་སྤྲོ་ལ་མཆོག་ཏུ་རེག་པར་འགྱུར། །དཔའ་ནག་ཡུལ་གྱི་རོལ་པ་དང་འགྲོགས་བརྟུལ་ཞུགས་བརྟུལ་ཞུགས་འཛིན་པར་འགྱུར། །བླུན་ན་རྨོངས་ཤིང་གཡོ་ན་རྣམ་པར་གཡོ་ལ་གདུག་ན་མ་རུངས་སྤྱོད། །གང་གང་ས་བདག་བྱེད་པ་དེ་དེ་མཐའ་དག་སྐྱེ་བོ་བྱེད་པར་འགྱུར། །མེ་ཏོག་འབྱུང་གནས་ལེགས་པ་ཡི། །མེ་ཏོག་རྒྱས་བྱེད་ཉམས་དང་ལྡན། །ས་བདག་རང་ཉིད་མཁས་པ་ནི། །སྐྱེ་རྒུའི་བསོད་ནམས་ཉིད་ཀྱིས་འབྱུང་། ། ༈ རྒྱ་ཆེར་གྲགས་པ་བསྟེན་པའི་བསྔགས་འོས་རི་བོང་ཅན་ལྟར་མཛེས། །གཙུག་གི་ནོར་བུ་གཞན་གྱི་དོན་ལ་སྐྱོ་བ་མེད་པའི་དུང་། །གང་གི་སྲོག་ནི་སོང་བར་གྱུར་ཀྱང་ལེགས་པའི་སྒྲ་ཡི་གནས། །བཀྲ་ཤིས་གཏེར་གྱིས་འཇིག་རྟེན་དག་ནི་དགེ་བ་རྒྱས་པར་བྱེད། ། ༈ གང་དག་མཐོང་བས་ཞེ་སྡང་དུག་གི་ནི། །ཚ་བ་རབ་ཏུ་ཞི་བ་ཉིད་གྱུར་ཅིང་། །བདུད་རྩིའི་རོ་བསིལ་སྐྱེ་བོ་དམ་པ་ཡི། །ཟླ་བ་དེ་དག་སུ་ཡིས་ཕྱག་འོས་མིན། ། ༈ ཕྱོགས་ཀྱི་མཛེས་པའི་རྣ་རྒྱན་དང་། །མཚུངས་པར་ཡོན་ཏན་དམ་པ་བཀོད། །གང་ཞིག་གྲགས་པའི་མཆོད་རྟེན་གྱིས། །འགྲོ་མཛེས་དེ་དག་རྒྱལ་གྱུར་ཅིག ། ༈ རྒུད་པའི་གདུང་བ་ཞི་བྱེད་གཟིགས་པ་རབ་ཏུ་དར་བའི་རོ་དག་གིས། །སྐྱེས་བུ་རྣམས་ནི་ནད་དང་བྲལ་མཛད་སྲིད་པས་ཟིལ་མནན་འཁྲུགས་པའི་སྨན་པ་གང་། །ངེས་པར་དགེ་བ་མཐའ་ཡས་བསྐྱེད་པའི་ནོར་འཛིན་གྲུབ་པའི་བདུད་རྩི་ནི། །རྫོགས་པའི་སྙིང་རྗེ་ནང་དུ་འཛིན་པ་དེ་དག་མི་སྨད་ཕྱག་བྱར་འོས། ། ༈ གཞན་གྱི་ཡོངས་གདུང་མཐོང་གྱུར་ན། །འཕྲལ་ལ་འཕོས་ཏེ་དམ་པ་ཡི། །མེ་ལོང་རྣམས་ནི་གདུང་འགྱུར་ཏེ། །ཉི་མ་མེ་ཤེལ་རང་བཞིན་བཞིན། ། ༈ སྨན་པ་སྐྱོན་མེད་བདེ་ལེགས་བཀའ་དྲིན་དང་། །ཆོས་ཀྱི་མན་ངག་དམ་པའི་སྨན་དག་ཀྱང་། །འཁོར་བ་རིང་པོའི་རིམས་ཀྱིས་བསྐམས་རྣམས་ཀྱི། །དཔུང་གཉེན་ཞི་བའི་བཅུད་ལེན་དེ་དག་ཡིན། ། ༈ ཤིན་ཏུ་རབ་གསལ་གྲགས་པའི་ཚོན་རིས་ཡོན་ཏན་རིན་ཆེན་རྒྱན། །མ་ཉམས་སྦྱིན་པའི་མེ་ཏོག་དང་ལྡན་བདེན་པའི་བྱུག་པ་བྱས། །གང་གི་དཔལ་ནི་ཚུལ་ཁྲིམས་གཙང་མའི་དུ་གུ་ལས་མཛེས་པ། །དེ་ཉིད་གཅིག་བུ་ལེགས་བྱས་ལ་འོས་འཁོར་ལོས་བསྒྱུར་བ་ཡིན། ། ༈ སྦྱིན་ལས་ཕྱིར་ཕྱོགས་རྣམས་ལ་ནོར་གྱིས་ཅི། །སྡང་བས་དབང་བྱས་རྣམས་ལ་ཐོས་པས་ཅི། །ཡོན་ཏན་མཆོག་སྤངས་རྣམས་ལ་གཟུགས་ཀྱིས་ཅི། །ཚུལ་ཁྲིམས་བཏང་བ་རྣམས་ལ་རིགས་ཀྱིས་ཅི། ། ༈ གང་གི་གྲགས་པ་བདུད་རྩི་ཡི། །རྦ་རླབས་ཀྱིས་ནི་ཕྱོགས་ཀུན་ཁེངས། །ཡོན་ཏན་རིན་ཆེན་ཆུ་གཏེར་ཆེ། །དཔལ་ལྡན་རྒྱལ་པོའི་སྲས་པོ་ཡོད། ། ༈ གདེངས་ཅན་གནས་ན་རྙེད་པར་དཀའ། །མི་ཡི་ཡུལ་ན་གཏམ་ཉིད་ཅི། །མཛེས་སྡུག་རྒྱ་འདི་མཐོ་རིས་སུ་འང་། །གསར་དུ་མངོན་པར་འཁྲུངས་སམ་སྙམ། ། ༈ གང་གི་ཚིག་གི་རྒྱ་ཆེ་མཚུངས་པ་ཡང་། །ཅི་ཡང་ཡོད་མིན་ཕུལ་དུ་བྱུང་བའི་སྒྲ། །ནམ་ཡང་ཙུ་ཏའི་ནགས་སུ་བདག་གིས་ནི། །ཐོས་པ་ཁུ་བྱུག་གི་མིན་བུང་བའི་མིན། ། ༈ སྙིང་སྟོབས་ཀྱིས་འཛུམ་རོ་ལྡན་སྙིང་རྗེ་ཟླ་བའི་འོད་ཀྱིས་རེ་བ་སྐོང་། །མཛེས་ཤིང་མཐའ་དག་མུན་པ་ཞི་སླད་དཀར་པོའི་ཕྱོགས་ལ་རྣམ་པར་གནས། །རྟག་ཏུ་ཀུན་དགའ་རྣམ་འགྱུར་མེད་ཅིང་མཆོག་གི་བདུད་རྩི་རྣམ་པར་སྤྲོ། །གདུང་བ་རབ་ཞིའི་གྲོགས་པོ་སངས་རྒྱས་ཟླ་ཉིའི་གཟུགས་ལ་ཕྱག་འཚལ་ལོ། །གང་ཞིག་རྟག་ཏུ་ཡུལ་གྱི་སྐྱོན་ལས་ཕྱི་རོལ་ཕྱོགས་གྱུར་ཅིང་། །རབ་མང་ཕ་རོལ་ཕྱིན་ལ་བརྟེན་པའི་སེམས་ནི་དབང་གྱུར་པ། །གཞན་དག་ཕན་ལ་མཆོག་ཏུ་མངོན་ཞེན་རྟེན་ཅིང་ཀུན་རྟོག་གི། །དཔག་བསམ་ལྗོན་པ་དེ་དག་བདག་ལ་དགེ་བ་སྟེར་གྱུར་ཅིག ། ༈ མ་རིག་པ་ཡི་རྩ་བ་ཅན། །འཁོར་བའི་ལྗོན་པ་རྣམ་བཀྲ་ཀུན། །ཤིས་དང་བརྗོད་དང་གཞོམ་པར་ནི། །ཀུན་མཁྱེན་ལས་གཞན་སུ་ཡིས་ནུས། །ལེགས་རྨོས་ཞིང་ལ་རབ་ཉུང་གང་བཏབ་དང་། །བྱས་ཤེས་དག་ལ་ཕན་པ་གང་བྱས་དང་། །ཡོན་ཏན་དག་གིས་མཐོ་ལ་གང་བྱིན་པ། །དེ་ནི་ལོ་མ་སྟོང་ཕྲག་འབེལ་བར་འགྱུར། ། ༈ བདུད་རྩི་རོ་ཡི་ཆར་བཞིན་མི་འདོད་སེལ། །འདོད་པ་དམ་པའི་གཟིགས་པ་གང་ལྷུང་བས། །ལྷུང་བ་རྣམས་ཀྱང་བསོད་ནམས་ཀྱིས་མཐོ་བའི། །བསྔགས་པར་འོས་པར་མཛད་པ་རྒྱལ་གྱུར་ཅིག ། ༈ ཟླ་བའི་ཀུན་དགའ་ཉི་མའི་རབ་གསལ་དང་། །མེ་ཡི་ཚ་བ་རླུང་གི་མགྱོགས་པ་དང་། །སྙིང་རྗེ་ལ་དགའ་སྐྱེ་བོ་ཆེ་རྣམས་ཀྱི། །གཞན་ལ་ཕན་པ་ལྷན་སྐྱེས་རང་བཞིན་ཡིན། ། ༈ སྟོན་པའི་ཐུགས་རྗེ་བདུད་རྩིའི་ཆུ་བོ་ནི། །མ་ལུས་བདེ་དང་དགེ་བའི་ཕོ་ཉ་སྟེ། །སྲིད་པའི་མྱ་ངམ་གདུང་བསིལ་གྲིབ་མ་དང་། །མ་བཞིན་སྐྱེད་པར་བྱེད་པ་རྒྱལ་གྱུར་ཅིག ། ༈ དགེ་བའི་པདྨོ་ཅན་ནི་རྩ་བ་བཙུགས་ནས་རབ་བསྐྱེད་དང་པོའི་རྒྱུ། །སྣ་ཚོགས་ཕུན་ཚོགས་འཁྲི་ཤིང་གསར་པ་གསང་བའི་རབ་སྐྱེད་སྐྱེད་ཚལ་པ། །སྲེད་པའི་གདུང་བ་རབ་ཏུ་ཞི་བྱེད་ཁ་བའི་འཛུམ་ལྡན་གངྒཱའི་རྒྱུན། །དམ་པའི་ལམ་མཆོག་གསལ་བར་བྱེད་མཁས་སྣང་བ་དག་ནི་བསོད་ནམས་ཉིད། ། ༈ ཐོས་པའི་སྐྱོག་གིས་བཏུང་བྱའི་བདུད་རྩི་སྙན་པ་དག་གི་རྒྱུན། །དྲི་བཟང་ཁང་པ་བཞིན་གྱི་པདྨོའི་གནས་སུ་སྒྲོགས་བྱེད་པ། །བུང་བའི་ན་ཆུང་དང་མཚུངས་ཡབ་ཀྱི་སྐད་ལ་བཏུད་ནས་ནི། །སྙན་ངག་རྒྱ་ཆེའི་ཁྱད་པར་ལྷག་མ་བདག་གིས་རྫོགས་པར་བྱ། ། ༈ གང་གི་དཔག་བསམ་ཤིང་ལས་འཁྲུངས། །རྟག་ཏུ་གསར་པ་གསར་པའི་དཔལ། །གྲགས་པའི་མེ་ཏོག་བསོད་ནམས་ཀྱི། །དྲི་བཟང་རྒྱས་པ་རྣམ་པར་མཛེས། ། ༈ དཔྱིད་ཀྱི་དཔལ་མོ་དག་གི་རྣ་བའི་རྒྱན། །རི་བོའི་ངོས་ལ་མྱ་ངན་མེད་པ་མཛེས། །གྲོང་ཁྱེར་མ་ཡི་རྐང་པས་བསྣུན་པ་ལས། །ཡལ་འདབ་གསར་པ་དག་ལ་ཚོན་འཕོས་བཞིན། ། ༈ ཟླ་བའི་རྩེ་དགར་མངོན་ཕྱོགས་པའི། །ཀུ་མུད་ལྡན་པ་མཐོང་གྱུར་ནས། །ཁྲོ་བས་ཞུམ་བཞིན་པདྨ་ཅན། །གཟི་བྱིན་ཉམས་བཞིན་ཟུམ་པར་གྱུར། ། ༈ ཀྱེ་མ་ནམ་མཁའི་སྐྱེད་མོའི་ཚལ། །རྒྱུ་སྐར་མེ་ཏོག་འཛུམ་ལྡན་པ། །རི་བོང་ཅན་འགྲོགས་དགའ་བ་ཡི། །མཚན་མོ་ཡིས་ནི་གཏོང་མི་བྱེད། ། ༈ འདི་ནི་ནུ་མ་རབ་མཛེས་པ། །དོ་ཤལ་ཁུར་གྱིས་རབ་ཏུ་བསྒྲིབས། །མཛེས་སྡུག་སྒྲིབ་པར་བྱེད་པ་ཡི། །ཤིན་ཏུ་མང་བའི་རྒྱན་གྱིས་ཅི། ། ༈ གྲོགས་མོའི་ལག་པས་བསྐྱོད་པའི་རྔ་ཡབ་རྩེས། །རྣ་བའི་ཨུཏྤལ་ཡལ་འདབ་ལྷུང་གྱུར་པ། །འགྲམ་པར་རེག་པས་སྐད་ཅིག་དེ་རབ་མཛེས། །རྟག་ཡོན་ཟླ་བས་བརྒྱན་པའི་མཚན་མོ་བཞིན། ། ༈ དེ་ནས་ཤར་གྱི་རི་རྩེར་རི་བོང་ཅན། །འོད་ཟེར་ཕྲེང་བ་ཤེལ་གྱི་དྲྭ་བས་བསྡམས། །བ་གམ་ཆེར་འཛེགས་དགའ་སྟོན་ཆེན་པོ་ལ། །གྲུབ་པའི་བུ་མོའི་གར་ལ་བལྟ་བ་བཞིན། ། ༈ དེ་ནས་ཉམས་དགའ་དགའ་སྟོན་ཆེན་པོ་དང་། །ཕྲེང་བ་དོ་ཤལ་རབ་འབར་དབུ་བ་གཡོ། །གྲུབ་པའི་ན་ཆུང་འཇིག་རྟེན་རྣམ་པར་མཛེས། །ཟླ་ཤར་བདུད་རྩིའི་རྒྱ་མཚོ་འཕྱུར་བ་བཞིན། ། ༈ དམ་པའི་སྙིང་སྟོབས་ཆུ་གཏེར་ཁྱོད་ཀྱི་ལུས། །འགྲོ་བའི་མིག་དང་སྲོག་གྱུར་བསྐལ་པར་ནི། །འཇིག་ཀྱང་མི་འཇིག་མངོན་སུམ་རྟེན་བྱེད་ཀྱི། །བདུད་རྩི་ཉེ་འདི་ལེགས་པར་ལྡན་གྱུར་ཅིག ། ༈ དེ་ནས་བྱང་ཆུབ་སེམས་དཔའི་སྤྱི་བོར་ལྷ་ཡི་བདག་པོ་ཡིས། །ལག་པའི་པདྨ་མཛེས་པས་རབ་གཏེར་མེ་ཏོག་རྒྱས་པའི་ཆར། །བུང་བའི་ཚོགས་ཀྱིས་སྒྲ་ཡི་ཡོན་ཏན་བསྟོད་བྱས་སྒྲ་དབྱངས་བཞིན། །འཆི་མེད་དགའ་བའི་ཚོགས་ཀྱིས་ཕྱོགས་ནི་ཡོངས་སུ་གང་བ་བབས། ། ༈ སྐབས་དེར་ཙནྡན་འཁྲི་ཤིང་རླུང་གཞོན་གྱིས། །བསྐྱོད་པའི་ཤུགས་རིང་གླལ་བ་བསྟེན་རྣམས་ལ། །འདོད་པའི་གྲོགས་པོར་གྱུར་པ་དཔྱིད་ཀྱི་དུས། །མངོན་པར་འདོད་པའི་སྐྱོད་ཚུལ་རབ་ཏུ་བརྟན། ། ༈ དེར་ནི་གློ་བུར་འདར་ཞིང་གཡོ་ལྡན་སྒྲ་དག་སྒྲོག་པར་བྱེད་པའི་འོག་པག་ལ། །འཇིགས་པས་རབ་ཏུ་བྱིན་པའི་བཞིན་ཡང་གོས་དག་བྱིན་ནས་ལྐུགས་པར་བྱས། །ངོ་ཚས་མི་སྨྲ་དང་ལྡན་བཞིན་དུད་དེ་ཡི་རྣ་བའི་ཨུཏྤལ་ལྷུང་བ་ལ། །འཁོར་ཞིང་རྒྱུ་བའི་བུང་བ་རྣམས་ཀྱི་སྒྲ་ཡིས་བདག་ལ་ལེགས་པར་འོངས་སམ་བྱས། ། ༈ འདོད་པའི་ཀུ་མུད་ཚལ་གྱི་ཟླ་བའི་རི་མོ་སུ་ཞིག་དེ། །མིག་གི་པདྨོ་རྣམ་པར་རྒྱས་པའི་རྒྱུར་ནི་བདག་གིས་མཐོང་། །གང་གི་མཛེས་པའི་རྣམ་འཕྲུལ་བདུད་རྩིའི་ཆུ་བོ་འཐུངས་པ་ཡིས། །ཚ་བའི་དུག་ཏུ་གསལ་བྱེད་རྨོངས་པ་རྟག་ཏུ་རྒྱས་པར་གྱུར། ། ༈ ཕ་མ་དག་ལ་ཕྱག་འཚལ་དེ་དག་ཞབས་ཀྱི་པདྨོར་གཙུག་གི་ནོར་བུས་ཆགས། །དེ་དག་དགའ་བའི་མཆི་མ་ཟགས་པས་དབུ་མར་དགའ་སྟོན་ལེགས་པར་བསྒྲུབས། །སྙིང་སྟོབས་ཆུ་གཏེར་བསོད་ནམས་ཚོགས་ནི་ཡོངས་རྫོགས་སྤྲིན་གྱི་བཞོན་པས་སྐད་ཅིག་ལ། །གསལ་བར་འཁོར་ལོས་བསྒྱུར་བའི་དཔལ་གྱི་མཚན་མ་རིན་ཆེན་རྣམས་ནི་ཡང་དག་ཐོབ། ། ༈ བསམ་པ་དྲི་མ་མེད་པ་རྣམས་ནི་མཆོག་ཏུ་ཚིམ་བྱེད་ཅིང་། །མཛེས་ཤིང་རབ་དང་སྐལ་བཟང་ལེགས་སྤྱད་དག་དང་རབ་ཏུ་ཀུན། །དེ་བཞིན་གཤེགས་པ་བཅོམ་ལྡན་འདས་ཀྱི་སྐུ་དང་སྙན་ངག་དག །རྣམ་པར་རྒྱས་པ་འདི་ནི་འགྲོ་རྣམས་དགའ་བའི་སླད་གྱུར་ཅིག ། ༈ བྱང་ཆུབ་སེམས་དཔའི་གནས་སྐབས་སུ། །གང་ཞིག་ས་བདག་རབ་གསལ་གྱིས། །གླང་ཆེན་མཐོང་ནས་ཞི་བ་ཐོབ། །དེ་བཞིན་གཤེགས་དེས་ཁྱོད་ལ་སྲུངས། ། ༈ ཀུན་ལས་མཐོ་ཞིང་བདེར་གཤེགས་ཡོན་ཏན་དག་དང་ལྡན། །བཟང་ཞིང་རབ་མང་བརྩོན་འགྲུས་སྟོབས་དང་བཟོད་པ་ཅན། །མི་དགེའི་རྩ་བ་སྲིད་པའི་ལྗོན་པ་རབ་འཇོམས་པ། །རྒྱགས་པ་ཟློག་མཛད་བཅོམ་ལྡན་དེ་ལ་ཕྱག་འཚལ་ལོ། །འཇིག་རྟེན་དུ་ནི་ཇི་སྲིད་སྒྲོལ་མ་སྙིང་རྗེ་དར་བབས་ཀྱིས་གཟིགས་ཤིང་། གྲུབ་སླད་གུས་ལྡན་དགེ་བ་རྣམས་ལ་མ་ཚང་མེད་པའི་འབྲས་བུ་སྒྲུབ། །ཇི་སྲིད་འཇིག་རྟེན་མགོན་པོ་དྲི་མེད་དགེ་བའི་བསམ་གཏན་བློ་ལྡན་པ། །དེ་སྲིད་མཁས་པའི་ཞལ་གྱི་དགའ་བསྐྱེད་སངས་རྒྱས་གཏམ་འདི་གནས་གྱུར་ཅིག །ཇི་སྲིད་སངས་རྒྱས་སྲིད་པ་མཐའ་དག་བསྒྲལ་ནས་རབ་ཏུ་རྒྱས་གྱུར་ཅིང་། །ཇི་སྲིད་ཆོས་ནི་ལེགས་བྱས་ལམ་དག་རབ་གསལ་རིན་ཆེན་སྒྲོན་མར་གྱུར། །ཇི་སྲིད་དགེ་འདུན་ཆགས་སྡང་ཡིད་ལ་དགེ་བའི་ཚོགས་སྦྱིན་དེ་སྲིད་དུ། །དཔག་བསམ་འཁྲི་ཤིང་གསར་པ་རྒྱལ་བའི་ཡོན་ཏན་གཏམ་འདི་གནས་གྱུར་ཅིག །ཇི་སྲིད་ས་གཞི་རབ་མང་ས་འཛིན་ལས་འབབ་གཡོ་བའི་ཆུ་ཡི་ཕྲེང་ལྡན་ལྷག་མ་ཡི། །མགོ་ལ་གདེངས་ཀ་རིན་ཆེན་འོད་ཟེར་རྒྱས་པ་རྨ་བྱའི་གདུགས་ཀྱི་རྗེས་སུ་སྤྱོད། །ཇི་སྲིད་ས་གཞི་པདྨ་དག་ལ་ལྷུན་པོའི་ཟེའུ་འབྲུའི་རྣམ་པའི་མཛེས་པ་འཛིན་བྱེད་པ། །དེ་སྲིད་སྟོན་པའི་གཏམ་འདི་འགྲོ་བའི་རྣ་རྒྱན་དག་ཏུ་རབ་ཏུ་གནས་པ་བསྟེན་གྱུར་ཅིག །ཨེ་ཏི་ཀྵེ་མེནྡྲ་ཤྩ་སོ་མེནྡྲ་བི་ར་ཙི་ཏཱ་ཡཱཾ། ཨཱ་བ་ཏ་ན་ཀལྤ་ལ་ཏཱ་ནཱ་མཱ་ཏ།། །། ༈

[edit]

rtogs pa brjod pa dpag bsam gyi 'khri shing las btus pa/ @#/__/byang chub sems dpa'i rtogs pa brjod pa dpag bsam gyi 'khri shing las/__gang thugs dri bral shel la chags tshon 'dzin pa min pa nyid/__/yid ni snying rjes brlan pa gang gi skyon rnams ma lus bskams/__/gang gis khro ba med la rang gis 'khor ba'i dgra mngon bcom/__/kun mkhyen de yis khyed la dge legs g.yo ba med gyur cig__/dam pa'i grib bsil dang ldan brtan pa'i chos kyi rtsa bas bskor zhing bsod nams ra bar gnas/__/blo dang rig pa snying rje la sogs chu yis rnam mdzes rgyas pa'i yal ga can/__/chog shes dri med yal 'dab grags snyan me tog rtag tu dam pa'i 'bras bu ni/__/bsam kun yongs su rdzogs par mdzad pa dpal ldan mchog gi ljon pa rnam par rgyal gyur cig_/_!_gang gis legs pa'i yid can rnams kyi yid ni kun dga' mnyan ldan rig par byed/__/gang gi mthu yis gdug rnams kyi yang yongs su 'dris pa'i mun pa zhi bar byed/__/gang gi bsod nams grangs med grangs kyi tshig gi chad kyi yul du mi 'gyur ba/__/'gro ba thul ba'i mgon po rab rgyas mthu ldan de nyid gcig pu 'byung ba yin/___/__!_gang gis mchod 'os mchod par bsgrub la me tog la sogs te/__/sems med rnams kyang 'os pa'i sems dang ldan pa nyid du 'gyur/__/rgyal la gus pa'i khyad par bsten pa rnams la bsngags 'os shing /__/dad pa rab rgyas bdud rtsi'i rgyun thigs de dag rgyal gyur cig_/_!_bde ba dri med chu gang zhi ba yi/__/kha ba'i rlabs ldan rgyal ba bsten pa dag__/thob nas 'khor ba'i mya ngam thang la ni/__/yongs 'khyams srid pa'i gdung ba gtong bar byed/___/__!_rgya che sdig pa'i mun pa 'jug pa dag ni rab spangs nas/__/'phral la snying rje'i 'od zer snang ba rab tu rgyas pa yis/__/skyon sel ci yang yongs su gdung ba dag kyang 'phrog byed pa/__/sangs rgyas 'od stong ldan pas dam pa'i lam ni ston par byed/___/__!_gza' yi bdag po'i snang bas rjes bzung bas/__/mun pa'i tshogs kyis rnam par zum gyur pa'i/__/'dam skyes chu dang bcas pa rnams dag kyang/__/mkhas pa'i cod pan du 'os nyid du 'gyur/___/__!_lus can lus dang de bzhin yid kyi ni/__/srid pa'i rang bzhin gnad chen 'phrog byed pa/__/'jig rten kun gyi 'jig rten pha rol gnyen/__/sangs rgyas bcom ldan bdud rtsi'i gter nyid do/___/__!_dman pa'i sbyin pas skye bo dman pa rnams kyi gdung ba sel/__/tshul khrims kyis ni skye bo dam pa'i yid dag tshim par byed/__/shes rab stobs kyis kyang ni dben pa dang bral gti mug 'phrog__/brtson 'grus kyis ni 'jigs su rung ba'i 'jigs pa zlog par byed/___/__!_do shal rab gsal gos mchog cod pan dang /__/gdugs dang rnga yab dkar po 'dzum pa'i dpal/__/mchog gi longs spyod skal bzang dga' ston gyis/__/bdag nyid chen po'i legs byas gsal bar byed/___/__!_legs pa'i lam la yid la re ba rab rgyas 'grub gyur cig__/dam pa'i legs byas dri med 'jug ngogs gtsang ma bsngags par 'os/__/'jigs rung 'khor ba'i chu srin 'byung gnas dag gi zam stegs gyur/__/dam pa'i grogs nyid dge ba spro ba'i rang bzhin pho nya yin/___/__!_gang gi bsam pa bla med byang chub 'dod/__/bdud rtsi'i pho nya dang po zla tshes bzhin/__/bsod nams kyis ni gsar du 'jug byed pa/__/snying stobs rgya mtsho su zhig der phyag 'os/___/__!_bsod nams rab 'bar bsam pa dri med rnams/__/yon tan la chags nam yang nor ma yin/__/rnal 'byor la spyod longs spyod dag la min/__/rdul gyi chags bral la dga' 'dod la min/___/__!_me tog dus su rab zhugs shing /__/lang tsho can gyi brtan 'phrog tshe/__/snye ma dang 'grogs bung pa ni/__/yang dag rgyu ba su yis zlog___/_!_chos kyi rgyal po'i pho brang ni/__/bsod nams khang pa bsngags 'os shing /__/bden dang brtul zhugs sbyin pa dang/__/brtse ba'i rang bzhin gyis rtag bsten/__/gzi brjid la brten lha rnams kyis/_/gang gi grags pa mngon mchod pa/__/rab gsal zhes bya'i sa bdag de/__/der ni sa yi thig ler gyur/__/ces so/___/__!_bdud rtsi'i chu gter ma bsrubs shing /__/nor rgyas thang yang ma bcad la/__/ri bo bsgril ba med par ni/__/glang po mchog 'di su yis bskrun/__/_!_gang 'dir bcad brdar bsregs pas kyang /__/gzhan gyi don la bslu med pa/__/'gro 'dir bsod nams tsan+dan gyi/__/rkang 'thung de dag rgyal gyur cig__/_!_ji srid tsha zer gyis gdung dang /__/ji srid rlung ni skyed byed pa/__/de srid gang gi bka' dang ni/__/grags pa rab tu gzhom med gyur/___/__!_mi dman kun tu dga' ba'i gnyen/__/ha ri tsan+dan bzhin du bsil/__/lho yi phyogs kyi rlung gis bzhin/__/dam pa rnams kyi gdung ba 'phrog__/_!_gang 'di rgya mtshor nor bur ster/__/ring nas rna ba'i bdud rtsi ste/__/slong ba yang dag 'ongs rnams kyis/__/der ni btung ba'ang gzhan las so/___/__!_rab rib can la snang ba phongs pa'i dug la nor bu lhung la 'chel ba'i lag pa ste/__/slong la dpag bsam ljon pa 'gro la rgyal ba'i shing rta lam gzhan dag gi lam gyi brgyags/__/sdug bsngal nad la sman chen dang ni srid pa'i 'jigs pa kun 'khrugs bsam pa dbugs 'byin pa/__/gdung ba dag la brten pa'i mdza' bshes chos ni dam pa rnams kyi gnyen/___/__!_de nas de yi rin chen bdun/__/de tshe byung gyur 'khor lo rta/__/nor bu glang po bud med dang /__/khyim bdag dmag dpon sngon 'gro ba'o/__/zhes so/__/dam pa'i mdzod na gnas pa'i dpal/__/rtag tu 'di yis rab ster zhes/__/gang zhig mthong na pad+mo can/__/zum par rab tu phyogs pa bzhin/___/__!_gsal ba'i don ster yid bzhin nor/__/dpag bsam ljon pa la sogs yod/__/rnyed dka'i don ni rab ster mchog__/khyod lta bu ni shin tu nyung /___/__!_'dab ldan 'khri shing rab smras pa/__/bung ba myos tshogs sgra dang ni/__/yal 'dab rab tu g.yo ba yi/__/lag pa dag gis bzlog pa bzhin/___/__!_yang na brnag pa rgya che ba'i/__/slong ba su yis yongs rdzogs te/__/a gas+t+ya yi khyor chu yis/__/hub tu rgya mtsho chen po song /___/__!_bdud rtsi la ni su zhig sdang/__/tsan+dan la ni su mi sred/__/zla ba la ni su gus dman/__/dam pa rnams la su mi 'dod/___/__!_dge ba'i smon lam dag pa'i gzi brjid dang /__/dben pa'i dri med snang ba'i rtogs byed ldan/__/gang zhig yongs su bsgrags pa tsam nyid na/__/srid pa'i rmongs 'phrog de nyid bsngags par 'os/___/__!_kun la nyi ma'i 'od zer snyoms/__/chu 'dzin dag gis char pa snyoms/__/sems can kun la thugs brtse ba/__/bcom ldan 'das kyi gzigs pa snyoms/___/__!_der ni snying rje'i dpag bsam shing /__/snying stobs me tog 'bras bu che/__/rab tu zhi ba'i bdud rtsi yis/__/yang dag dran pa de yis mthong /___/__!_bsod nams dri bzang rgyas gyur cing /__/snying rje'i ge sar 'khrigs gyur pa/__/bcom ldan zhal gyi pad+mo las/__/gsung gi sbrang rtsi mchog gcig thob/___/__!_skyes bu rnams kyi dpral ba yangs pa'i rdo yi glegs bu la/__/bde med las kyis sprul pa gsal ba'i rtags can gzod dag gis/__/skye dang 'chi ba rab spros yi ge dag tu bkod gyur pa/__/'di dag rnams ni lag pas yongs su phyis pas bskyod pa min/__/ces so/___/__!_gang gi srang gi tshad kyis ni/__/lhun po'i de nyid grangs rig pa/__/des kyang bder gshegs yon tan gyi/__/dam pa'i lci ba nyid mi rtogs/__!_/der ni dri med gsal zhing mdzes/__/cha shas kyis ni yongs su rdzogs/__/mi dman kun dga' rgyas gyur pa/__/su yi zla ba bzhin ma gyur/___/__!_'khor bar nor ni sgrub pa la/___/bag chags goms las lus can rnams/__/rmongs pas 'dir ni gser gyi ri/__/thob kyang yongs su tshim pa med/___/__!_grags pa 'gro gsum gang+gA dang /__/mthu yis rnam par brgyan pa'i dpal/__/'di de bsod nams 'khri shing gi/__/me tog rab 'thon dang po yin/___/__!_skal ldan rnams la mi shes pa ni legs pa'i rang bzhin las byung dge nyid gyur/__/rmongs pa rnams la dge ba mi phan nyid 'gyur 'di ni rim pa 'di yis mtshon/__/mtshan byed smag rum mun pa sman gyi nags la mchog tu mdzes pa rab tu ster/__/gang yang nyi ma'i gzi byin nub 'di rigs kyi mig ni kun tu nyams par byed/___/__!_tshe yi rgyan ni yon tan te/__/yon tan rgyan ni dben pa'o/__/'di yi rgyan ni rab zhi ste/__/rab zhi'i rgyan ni chags bral lo/___/__!_a mr-i 'khri shing gzhu la gda'/__/bkod pa a mra'i mtshon dang ldan/__/rgyal gyur cig ces bdag dregs la/__/slong mo ba bzhin khu byug sgrogs/_____/__!__glang po ri bo'i steng de na/__/lan bu g.yo ba'i bung ba can/__/rgyal po dpyid dang 'grogs pa yi/__/gsar pa phreng can ma de mdzes/___/__!_'khor ba'i nags nang rnam par yangs pa 'dir/__/rang bzhin gyis g.yo dus kyi bung ba dag__/rang dgar 'babs pas 'gro srog me tog gi/__/ge sar tshogs la kham zas byed pa nyid/__/longs spyod rba rlabs dag dang mtshungs shing ri dwags 'jigs pa'i mig ltar g.yo/__/dal 'byor skad cig mtshon bya skye ba'i chu gter rnam par gsal ba'i glog__/lus kyi pad+ma lang tsho gsar pa'i nyi 'od gzhon nu dmar po g.yo/__/srog gi thigs pa srid pa'i mya ngam thang la myur du 'jig par 'gyur/___/__!_dam pa'i bdud rtsis brlan pa'i zhal dang ri bong can zer dag__/sdug bsngal zhi byed bde ba phun sum tshogs pa sbyin par byed/__/skye bo rnams ni yang dag 'tsho byed rab rib 'phrog par byed/__/dam pa'i yid kyi mtsho ni rnam par rgyas shing dgod par byed/___/__!_dam pa'i sems la gnas pa'i dam pa rnams kyis yongs 'dris bdud rtsi dag pas kyang /__/shin tu mnyes gshin tshig ni snga ma bas kyang mnyan 'os ston zla'i 'od chags pas/__/spyod pa'i kun dga'i tshogs ster gzhan pa ci zhig yid ni me tog pas kyang 'jam/__/skye bo legs pa'i ha ri tsan+dan pas kyang yongs gdung mchog tu zlog par byed/___/__!_de yis dpung rgyan cod pan gyi/__/'od kyi yal 'dab rgyas gyur pa/__/sprin gyi phreng ba brgya byin gyi/__/gzhu yis khyab pa bzhin du mthong /___/__!_gang zhig snying stobs ldan pa'i snying stobs kyi/__/khyad par sems can thams cad bde ba'i rgyu/__/lus ni zhig kyang khro ba'i me rnams la/__/mchog tu zhi bar 'gyur de rgyal gyur cig__/__!_zhes pa bder gshegs zhal gyi pad+ma las 'khrungs pa/__/yid 'ong sbrang rtsi'i gzugs brnyen rab tu dang ba'i gsung /__/bung ba'i tshogs bzhin dge slong rnams kyis rab 'thungs nas/__/rab tu dga' ba rgyas pa ci yang byung bar gyur/___/__!_'jig rten dag na mtshon byed pas/__/skye bo mchog dang dman par mtshon/__/nyi mas thams cad rab gsal zhing /__/smag rum mun pas kun 'ching byed/___/__!_gang zhig gzhan gyi bud med la/__/lus kyis yongs 'khyud bdag gir byed/__/de ni dmyal ba'i me lce la/__/phye ma leb bzhin slar 'khyud thob/___/__!_sbyin pa'i grogs su skad cig tu gyur pa/__/de dag sbyin bdag 'bras bu mtshungs par thob/_/gzhan la phan par brtson pas zhugs rnams kyi/__/grogs su bsod nams las med mi 'byung ngo /___/__!_grags snyan ldan pa de yi ni/__/sbyin khang kun tu grags pa'i tshe/__/dpag bsam shing la skyes bu rnams/__/gus pa mchog tu chung bar gyur/___/__!_'gro ba'i nyon mongs dug gi skyon/__/'phrog cing snying rje rgyas pa yi/__/bdud rtsis yang dag rdzogs pa'i thugs/__/gang po khyod la phyag 'tshal lo/___/__!_chog shes 'byor pa thob gyur pas/__/skal ba bzang po mchog tu mdzes/__/yid ni chags bral gyis brgyan pa/__/sems can dag pa'i mtshan nyid yin/___/__!_gang na nyi mas mun ster zla ba ni/__/me yi char pa 'bebs byed bdud rtsi las/__/rab khros nag po brtsegs pa skyes gyur kyang /__/sman mdzad khyod las gzhan la 'tshe mi 'byung /___/__!_snying stobs kyis ni nyi ma'i 'od zer mun pa bzhin du gsal/__/chos dag gis ni rin chen tshogs rnams mkha' las 'bab par 'gyur/__/brtan pa yis ni rgud pa thams cad rab tu zhi bar 'gro/__/sbyin pa yis ni phyogs rnams longs spyod skal ba bzang por 'gyur/___/__!_gzhan la phan pa 'jebs pa'i mthu dang ni/__/kun gyi nyer 'tsho 'byor pa chen po ste/__/'bras bu cher 'os 'di dag dge rnams kyi/__/bsod nams myu gu'i 'bras bu dang po yin/___/__!_sangs rgyas gzi brjid rnam par dag__/snying rje bdud rtsi'i rgya mtsho ste/__/sems can kun gyi gnyen gcig pu/__/rtag tu sad la phyag 'tshal lo/___/__!_grwa gnyis dmar ba khyod kyi spyan/__/pad+mo'i 'od ldan gang+gA bzhin/__/dri ma 'khrud bzod dag byed pa/__/'di yis bdag la reg par mdzod/___/__!_rang don la 'jug chags pa dang bral zhing /__/gzhan la phan par rtag tu brtson rnams kyis/__/grub pa nyon mongs rnams la mi 'jigs shing /__/gdung dang gegs bral gzir byed min par 'gyur/___/__!_de gdong chu skyes dag gis phral la bcom pas mtshan mo'i yid 'ong nyams pa bsten/__/de yi smin ma'i rnam 'phrul dag la ngo tsha yid srubs gzhu ni gug par gyur/__/yid 'ong yal 'dab mdangs 'phrog de yi mchu sgros dmar ba dag gis gzir gyur te/__/chags bral nyid thob bim+ba dag ni nags kyi sa la yang dag brten nam snyam/___/__!_mtha' dag 'jig rten snang ba spro slad nyi ma 'od zer 'gyed/__/bdud rtsi'i char mchog dbab slad zla ba rdzogs pa nyid du 'gro/__/sems can bsgral ba'i slad du dge ba'i zam stegs chen po ni/__/kha cig 'gro ba 'di snyed bsngags par 'os pa'i skye ba 'dzin/__/shAkya'i grong khyer dag tu sngon/__/rgyal po dpal ldan zas gtsang byung /__/grags pa ri bong can bskyed pa/__/bdud rtsi'i chu gter gzhan pa bzhin/___/__!_'jig rten dga' byed byang chub sems/__/de yi lhums su bzung ba ni/__/'o mtsho'i rlabs kyi zla ba bzhin/__/dkar ba'i 'od dang ldan par gyur/__/bu ram shing skyes rgyal po'i rgyud/__/der ni lhums na gnas pa der/__/gter dang ldan pa'i sa gzhi bzhin/__/dge ba'i mtshan nyid kyis mtshon gyur/___/__!_mkha' yi chu rgyun gyis bkrus pa/__/de yi grags pa dkar ba'i gdugs/__/snying stobs 'dzum pa'i rnga yab bcas/__/der ni lha rnams dag gis bzung /___/__!_byang chub 'o ma'i rgya mtsho che/__/snying stobs dag pa 'di yi ni/__/gsung gi bdud rtsi mkhas pa dag__/skal ldan rnams kyi nyer 'tshor gyur/___/__!_mdzes pa'i spyod tshul dang ldan yon tan sdud par 'os gyur cing /__/rin chen 'od zer rnam dag dam pa'i snang ba rgyas par byed/__/nad med mu tig rang bzhin 'gro ba'i rgyan ni skyed byed pa/_/gang zhig dge bas rjes 'brel ming chen rigs de 'ga' zhig yin/_/__!mi bdag gzugs can snying pos u drA ya na la springs pa/__/bde bar gshegs pa'i zhabs pad bkod pas bsod nams nye gyur pa/__/skabs gsum grong gi khyad par rgya che ma ga d+hA yul nas/__/dge ba byas pa'i gzugs can sa yi bdag po gzugs can snying /__/chos kyi gnyen gyis sa gzhi'i thig le khyod la rab smras pa/__/ri bong mtshan ma'i 'od ldan bcom ldan sku gzugs chags sdang dug ni nyams par byed/__/sred pa yang dag zhi byed srid pa'i rmongs chen nad kyi phan dang sman pa dang /__/rab dwangs mngar ba'i bsod nams bcud len khyod kyi mig gi snod du rab blugs pa/__/'di ni khyod la rab springs skal ldan mgrin pa'i bar du rab tu 'dod pas 'thung /__/dam pa'i lam la rnam par sbyor zhing yon tan tshogs rnams 'dzin par rtag tu slob/__/bya ba ngan las rnam par bzlog cing brtan pa'i bde ba 'thob la mchog tu bskul/__/rgyun chad med pa nyid du bdag nyid kun gyi zol med phan pa skyed byed pa/__/dam pa'i dge ba'i grogs kyi yid 'ong phan pa 'di las mchog ni ci zhig bya/__/zhes so/___/__!_gang zhig nags song shing shun ldan gyur kyang /__/slong rnams rgyun du don rgyas nyid du byed/__/spyod tshul mdzes ldan de dang tsan+dan gyi/__/ngang tshul dag ni su yis bsam mi bya/___/__!_bsod nams mi dman sa yi dbang /__/slong ba kun gyi dpag bsam shing /__/phongs pa'i gdung ba mchog tu 'phrog__/snying stobs 'o ma'i rgya mtsho thob/___/__!_legs bshad rnams dang mthun rnams dang /__/dog pa rnams kyang rgyas pa ni/__/gsar pa kho na yid 'phrog ste/__/bud med rnams kyi lang tsho bzhin/___/__!_khyod ni yon tan ldan pa'i grogs/__/sgyu rtsal pad+mo ldan pas mdzes/__/shar tshe skye bo mtha' dag ni/__/snang bcas legs pa'i lam du 'gro/___/__!_sa skyong mkhas na rig pa'i rtse dgas spro la mchog tu reg par 'gyur/__/dpa' nag yul gyi rol pa dang 'grogs brtul zhugs brtul zhugs 'dzin par 'gyur/__/blun na rmongs shing g.yo na rnam par g.yo la gdug na ma rungs spyod/__/gang gang sa bdag byed pa de de mtha' dag skye bo byed par 'gyur/__/me tog 'byung gnas legs pa yi/__/me tog rgyas byed nyams dang ldan/__/sa bdag rang nyid mkhas pa ni/__/skye rgu'i bsod nams nyid kyis 'byung /___/__!_rgya cher grags pa bsten pa'i bsngags 'os ri bong can ltar mdzes/__/gtsug gi nor bu gzhan gyi don la skyo ba med pa'i dung /__/gang gi srog ni song bar gyur kyang legs pa'i sgra yi gnas/__/bkra shis gter gyis 'jig rten dag ni dge ba rgyas par byed/___/__!_gang dag mthong bas zhe sdang dug gi ni/__/tsha ba rab tu zhi ba nyid gyur cing /__/bdud rtsi'i ro bsil skye bo dam pa yi/__/zla ba de dag su yis phyag 'os min/_/_!_phyogs kyi mdzes pa'i rna rgyan dang /__/mtshungs par yon tan dam pa bkod/__/gang zhig grags pa'i mchod rten gyis/__/'gro mdzes de dag rgyal gyur cig__/_!_rgud pa'i gdung ba zhi byed gzigs pa rab tu dar ba'i ro dag gis/__/skyes bu rnams ni nad dang bral mdzad srid pas zil mnan 'khrugs pa'i sman pa gang /__/nges par dge ba mtha' yas bskyed pa'i nor 'dzin grub pa'i bdud rtsi ni/__/rdzogs pa'i snying rje nang du 'dzin pa de dag mi smad phyag byar 'os/___/__!_gzhan gyi yongs gdung mthong gyur na/__/'phral la 'phos te dam pa yi/__/me long rnams ni gdung 'gyur te/__/nyi ma me shel rang bzhin bzhin/___/__!_sman pa skyon med bde legs bka' drin dang /__/chos kyi man ngag dam pa'i sman dag kyang /__/'khor ba ring po'i rims kyis bskams rnams kyi/__/dpung gnyen zhi ba'i bcud len de dag yin/___/__!_shin tu rab gsal grags pa'i tshon ris yon tan rin chen rgyan/__/ma nyams sbyin pa'i me tog dang ldan bden pa'i byug pa byas/__/gang gi dpal ni tshul khrims gtsang ma'i du gu las mdzes pa/__/de nyid gcig bu legs byas la 'os 'khor los bsgyur ba yin/___/__!_sbyin las phyir phyogs rnams la nor gyis ci/__/sdang bas dbang byas rnams la thos pas ci/__/yon tan mchog spangs rnams la gzugs kyis ci/__/tshul khrims btang ba rnams la rigs kyis ci/___/__!_gang gi grags pa bdud rtsi yi/__/rba rlabs kyis ni phyogs kun khengs/__/yon tan rin chen chu gter che/__/dpal ldan rgyal po'i sras po yod/___/__!_gdengs can gnas na rnyed par dka'/__/mi yi yul na gtam nyid ci/__/mdzes sdug rgya 'di mtho ris su 'ang /__/gsar du mngon par 'khrungs sam snyam/___/__!_gang gi tshig gi rgya che mtshungs pa yang /__/ci yang yod min phul du byung ba'i sgra/__/nam yang tsu ta'i nags su bdag gis ni/__/thos pa khu byug gi min bung ba'i min/___/__!_snying stobs kyis 'dzum ro ldan snying rje zla ba'i 'od kyis re ba skong /__/mdzes shing mtha' dag mun pa zhi slad dkar po'i phyogs la rnam par gnas/__/rtag tu kun dga' rnam 'gyur med cing mchog gi bdud rtsi rnam par spro/__/gdung ba rab zhi'i grogs po sangs rgyas zla nyi'i gzugs la phyag 'tshal lo/__/gang zhig rtag tu yul gyi skyon las phyi rol phyogs gyur cing /__/rab mang pha rol phyin la brten pa'i sems ni dbang gyur pa/__/gzhan dag phan la mchog tu mngon zhen rten cing kun rtog gi/__/dpag bsam ljon pa de dag bdag la dge ba ster gyur cig__/_!_ma rig pa yi rtsa ba can/__/'khor ba'i ljon pa rnam bkra kun/__/shis dang brjod dang gzhom par ni/__/kun mkhyen las gzhan su yis nus/__/legs rmos zhing la rab nyung gang btab dang /__/byas shes dag la phan pa gang byas dang /__/yon tan dag gis mtho la gang byin pa/__/de ni lo ma stong phrag 'bel bar 'gyur/___/__!_bdud rtsi ro yi char bzhin mi 'dod sel/__/'dod pa dam pa'i gzigs pa gang lhung bas/__/lhung ba rnams kyang bsod nams kyis mtho ba'i/__/bsngags par 'os par mdzad pa rgyal gyur cig__/_!_zla ba'i kun dga' nyi ma'i rab gsal dang /__/me yi tsha ba rlung gi mgyogs pa dang /__/snying rje la dga' skye bo che rnams kyi/__/gzhan la phan pa lhan skyes rang bzhin yin/___/__!_ston pa'i thugs rje bdud rtsi'i chu bo ni/__/ma lus bde dang dge ba'i pho nya ste/__/srid pa'i mya ngam gdung bsil grib ma dang /__/ma bzhin skyed par byed pa rgyal gyur cig__/_!_dge ba'i pad+mo can ni rtsa ba btsugs nas rab bskyed dang po'i rgyu/__/sna tshogs phun tshogs 'khri shing gsar pa gsang ba'i rab skyed skyed tshal pa/__/sred pa'i gdung ba rab tu zhi byed kha ba'i 'dzum ldan gang+gA'i rgyun/__/dam pa'i lam mchog gsal bar byed mkhas snang ba dag ni bsod nams nyid/___/__!_thos pa'i skyog gis btung bya'i bdud rtsi snyan pa dag gi rgyun/__/dri bzang khang pa bzhin gyi pad+mo'i gnas su sgrogs byed pa/__/bung ba'i na chung dang mtshungs yab kyi skad la btud nas ni/__/snyan ngag rgya che'i khyad par lhag ma bdag gis rdzogs par bya/___/__!_gang gi dpag bsam shing las 'khrungs/__/rtag tu gsar pa gsar pa'i dpal/__/grags pa'i me tog bsod nams kyi/__/dri bzang rgyas pa rnam par mdzes/___/__!_dpyid kyi dpal mo dag gi rna ba'i rgyan/__/ri bo'i ngos la mya ngan med pa mdzes/__/grong khyer ma yi rkang pas bsnun pa las/__/yal 'dab gsar pa dag la tshon 'phos bzhin/___/__!_zla ba'i rtse dgar mngon phyogs pa'i/__/ku mud ldan pa mthong gyur nas/__/khro bas zhum bzhin pad+ma can/__/gzi byin nyams bzhin zum par gyur/___/__!_kye ma nam mkha'i skyed mo'i tshal/__/rgyu skar me tog 'dzum ldan pa/__/ri bong can 'grogs dga' ba yi/__/mtshan mo yis ni gtong mi byed/___/__!_'di ni nu ma rab mdzes pa/__/do shal khur gyis rab tu bsgribs/__/mdzes sdug sgrib par byed pa yi/__/shin tu mang ba'i rgyan gyis ci/___/__!_grogs mo'i lag pas bskyod pa'i rnga yab rtses/__/rna ba'i ut+pal yal 'dab lhung gyur pa/__/'gram par reg pas skad cig de rab mdzes/__/rtag yon zla bas brgyan pa'i mtshan mo bzhin/___/__!_de nas shar gyi ri rtser ri bong can/__/'od zer phreng ba shel gyi drwa bas bsdams/__/ba gam cher 'dzegs dga' ston chen po la/__/grub pa'i bu mo'i gar la blta ba bzhin/___/__!_de nas nyams dga' dga' ston chen po dang /__/phreng ba do shal rab 'bar dbu ba g.yo/__/grub pa'i na chung 'jig rten rnam par mdzes/__/zla shar bdud rtsi'i rgya mtsho 'phyur ba bzhin/___/__!_dam pa'i snying stobs chu gter khyod kyi lus/__/'gro ba'i mig dang srog gyur bskal par ni/__/'jig kyang mi 'jig mngon sum rten byed kyi/__/bdud rtsi nye 'di legs par ldan gyur cig__/_!_de nas byang chub sems dpa'i spyi bor lha yi bdag po yis/__/lag pa'i pad+ma mdzes pas rab gter me tog rgyas pa'i char/__/bung ba'i tshogs kyis sgra yi yon tan bstod byas sgra dbyangs bzhin/__/'chi med dga' ba'i tshogs kyis phyogs ni yongs su gang ba babs/___/__!_skabs der tsan+dan 'khri shing rlung gzhon gyis/__/bskyod pa'i shugs ring glal ba bsten rnams la/__/'dod pa'i grogs por gyur pa dpyid kyi dus/__/mngon par 'dod pa'i skyod tshul rab tu brtan/___/__!_der ni glo bur 'dar zhing g.yo ldan sgra dag sgrog par byed pa'i 'og pag la/__/'jigs pas rab tu byin pa'i bzhin yang gos dag byin nas lkugs par byas/__/ngo tshas mi smra dang ldan bzhin dud de yi rna ba'i ut+pal lhung ba la/__/'khor zhing rgyu ba'i bung ba rnams kyi sgra yis bdag la legs par 'ongs sam byas/___/__!_'dod pa'i ku mud tshal gyi zla ba'i ri mo su zhig de/__/mig gi pad+mo rnam par rgyas pa'i rgyur ni bdag gis mthong /__/gang gi mdzes pa'i rnam 'phrul bdud rtsi'i chu bo 'thungs pa yis/__/tsha ba'i dug tu gsal byed rmongs pa rtag tu rgyas par gyur/___/__!_pha ma dag la phyag 'tshal de dag zhabs kyi pad+mor gtsug gi nor bus chags/__/de dag dga' ba'i mchi ma zags pas dbu mar dga' ston legs par bsgrubs/__/snying stobs chu gter bsod nams tshogs ni yongs rdzogs sprin gyi bzhon pas skad cig la/__/gsal bar 'khor los bsgyur ba'i dpal gyi mtshan ma rin chen rnams ni yang dag thob/___/__!_bsam pa dri ma med pa rnams ni mchog tu tshim byed cing /__/mdzes shing rab dang skal bzang legs spyad dag dang rab tu kun/__/de bzhin gshegs pa bcom ldan 'das kyi sku dang snyan ngag dag__/rnam par rgyas pa 'di ni 'gro rnams dga' ba'i slad gyur cig__/_!_byang chub sems dpa'i gnas skabs su/__/gang zhig sa bdag rab gsal gyis/__/glang chen mthong nas zhi ba thob/__/de bzhin gshegs des khyod la srungs/___/__!_kun las mtho zhing bder gshegs yon tan dag dang ldan/__/bzang zhing rab mang brtson 'grus stobs dang bzod pa can/__/mi dge'i rtsa ba srid pa'i ljon pa rab 'joms pa/__/rgyags pa zlog mdzad bcom ldan de la phyag 'tshal lo/__/'jig rten du ni ji srid sgrol ma snying rje dar babs kyis gzigs shing /__grub slad gus ldan dge ba rnams la ma tshang med pa'i 'bras bu sgrub/__/ji srid 'jig rten mgon po dri med dge ba'i bsam gtan blo ldan pa/__/de srid mkhas pa'i zhal gyi dga' bskyed sangs rgyas gtam 'di gnas gyur cig__/ji srid sangs rgyas srid pa mtha' dag bsgral nas rab tu rgyas gyur cing /__/ji srid chos ni legs byas lam dag rab gsal rin chen sgron mar gyur/__/ji srid dge 'dun chags sdang yid la dge ba'i tshogs sbyin de srid du/__/dpag bsam 'khri shing gsar pa rgyal ba'i yon tan gtam 'di gnas gyur cig__/ji srid sa gzhi rab mang sa 'dzin las 'bab g.yo ba'i chu yi phreng ldan lhag ma yi/__/mgo la gdengs ka rin chen 'od zer rgyas pa rma bya'i gdugs kyi rjes su spyod/__/ji srid sa gzhi pad+ma dag la lhun po'i ze'u 'bru'i rnam pa'i mdzes pa 'dzin byed pa/__/de srid ston pa'i gtam 'di 'gro ba'i rna rgyan dag tu rab tu gnas pa bsten gyur cig__/e ti k+She men+d+ra sh+tsa so men+d+ra bi ra tsi tA yAM/__A ba ta na kalpa la tA nA mA ta//____//_!_