JKW-KABUM-01-KA-002-059

Previous Text Back to Volume PageNext Text

ཨོ་རྒྱན་རིན་པོ་ཆེ་ལ་གསོལ་བ་འདེབས་པ་རྡོ་རྗེའི་ཚིག་གི་དོན་བསྡུས་བྱིན་རླབས་གཏེར་ཆེན།

Wylie title	o rgyan rin po che la gsol ba 'debs pa rdo rje'i tshig gi don bsdus byin rlabs gter chen
Location	mkhyen brtse'i bka' 'bum Volume 1, sde tshan 2, Text 59, Pages 248-250 (Folios 95b1 to 96b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	པདྨ་འབྱུང་གནས་ (pad+ma 'byung gnas)
Citation	'jam dbyangs mkhyen brtse'i dbang po. o rgyan rin po che la gsol ba 'debs pa rdo rje'i tshig gi don bsdus byin rlabs gter chen. In 'jam dbyangs mkhyen brtse'i dbang po'i bka' 'bum, Vol. 1: 248-250. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs
Colophon	།ཞེས་པའང་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་སྙིང་ནས་གུས་པའི་གདུང་བས་གསོལ་བ་བཏབ་པ་སྟེ། འདིས་ཀྱང་རང་གཞན་རྣམས་ཀྱི་རྒྱུད་ལ་དཔལ་ཨོ་རྒྱན་ཆོས་ཀྱི་རྒྱལ་པོའི་ཡེ་ཤེས་གཟིགས་པའི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག།
	zhes pa'ang mtsho skyes bla ma dgyes pa'i 'bangs mkhyen brtse'i dbang pos snying nas gus pa'i gdung bas gsol ba btab pa ste/__'dis kyang rang gzhan rnams kyi rgyud la dpal o rgyan chos kyi rgyal po'i ye shes gzigs pa'i byin rlabs myur du 'jug pa'i rgyur gyur cig

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

ཨོ་རྒྱན་རིན་པོ་ཆེ་ལ་གསོལ་བ་འདེབས་པ་རྡོ་རྗེའི་ཚིག་གི་དོན་བསྡུས་བྱིན་རླབས་གཏེར་ཆེན་ཅེས་བྱ་བ་བཞུགས་སོ། །ཨེ་མ་ཧོ། ངོ་བོ་མཁའ་ཁྱབ་འོད་གསལ་ཆོས་ཀྱི་སྐུ། །རང་བཞིན་ཡེ་ཤེས་ལྔ་ལྡན་ལོངས་སྤྱོད་རྫོགས། །ཐུགས་རྗེ་གང་འདུལ་སྒྱུ་འཕྲུལ་སྤྲུལ་པའི་སྐུ། །དུས་གསུམ་རྩ་བརྒྱུད་བླ་མ་ལ་གསོལ་བ་འདེབས། །བསྟན་པའི་སྙིང་པོ་ཟབ་གསང་རྡོ་རྗེའི་ཐེག །གདུལ་བྱ་འདུལ་བྱེད་ཐབས་མཆོག་ཁྱད་པར་ཅན། །ཞིང་འདིར་སྣང་མཛད་སྲས་བཅས་རྒྱལ་བའི་གཙོ། །རིག་འཛིན་པདྨ་བཛྲ་ལ་གསོལ་བ་འདེབས། །འོག་མིན་ཆོས་དབྱིངས་སྙིང་པོར་ཀུན་ཏུ་བཟང་། །བདེ་ཆེན་དག་པའི་ཞིང་ན་རིགས་མཆོག་ལྔ། །བསམ་ཡས་སྒྱུ་འཕྲུལ་དྲྭ་བའི་རྣམ་རོལ་ཅན། །མཚོ་སྐྱེས་རྡོ་རྗེ་འཆང་ཆེན་ལ་གསོལ་བ་འདེབས། །ཆེ་མཆོག་ཡང་དག་གཤིན་རྗེ་རྟ་མགྲིན་དབང་། །རྡོ་རྗེ་གཞོན་ནུ་མངོན་རྫོགས་ཚེ་ཡི་ལྷ། །རྣལ་འབྱོར་མ་སོགས་ཡི་དམ་ཞི་ཁྲོའི་དངོས། །ཁྱབ་བདག་པདྨ་དྲག་པོ་ལ་གསོལ་བ་འདེབས། །སྟོན་མཆོག་ཤཱཀྱའི་རྒྱལ་པོ་དགའ་རབ་རྗེ། །རིགས་གསུམ་སེམས་དཔའ་ལྷ་ཀླུ་མིའི་རིག་འཛིན། །ཡེ་ཤེས་གཅིག་ཉིད་དུ་མར་འཆར་བའི་གཟུགས། །འཆི་མེད་པདྨ་འབྱུང་གནས་ལ་གསོལ་བ་འདེབས། །ལྷོ་ནུབ་རྔ་ཡབ་ཟངས་མདོག་དཔལ་གྱི་རིར། །རང་སྣང་དག་པ་རབ་འབྱམས་གཞལ་མེད་དབུས། །རྩ་གསུམ་ཆོས་སྲུང་རྒྱ་མཚོའི་སྤྱི་དཔལ་ཆེ། །ཨོ་རྒྱན་པདྨ་ཐོད་ཕྲེང་ལ་གསོལ་བ་འདེབས། །རྒྱལ་དང་རིག་འཛིན་ཡོངས་ཀྱི་དགོངས་པའི་བཅུད། །འོད་གསལ་རྫོགས་ཆེན་སྒྱུ་འཕྲུལ་སྒྲུབ་སྡེ་བརྒྱད། །རྡོ་རྗེ་ཚེ་དང་ཤེས་རབ་རྣལ་འབྱོར་མའི། །རྩ་བརྒྱུད་བླ་མ་ཀུན་འདུས་ལ་གསོལ་བ་འདེབས། །གསང་སྔགས་འདུས་རྒྱུད་ཐུན་མོང་ཐེག་པར་བཅས། །ཀུན་གྱི་བཀའ་བབས་སྙན་བརྒྱུད་རྒྱ་མཚོའི་གཞི། །སྣང་གྲག་རྟོག་གསུམ་གཉུག་མའི་ཆོས་ཉིད་དང་། །དབྱེར་མེད་པདྨ་འོད་འབར་ལ་གསོལ༴ སིནྡྷཱུའི་དྭངས་མཚོར་རང་བྱུང་མཚོ་སྐྱེས་རྗེ། །ཨིནྡྲ་བྷཱུ་ཏིའི་རྒྱལ་སྲས་ཐོར་ཅོག་ཅན། །བརྟུལ་ཞུགས་གྲུབ་པ་ཤཱནྟ་རཀྵི་ཏ། །སྤྱོད་འཆང་རྡོ་རྗེ་དྲག་རྩལ་ལ༴ ཤཱཀྱ་སེང་གེ་བློ་ལྡན་མཆོག་སྲེད་རྩལ། །འཆི་མེད་པད་འབྱུང་པདྨ་སཾ་བྷ་ཝ། །པདྨ་རྒྱལ་པོ་ཉི་མ་འོད་ཟེར་དང་། །གསང་བདག་སེང་གེ་སྒྲ་སྒྲོག་ལ༴ ཐོད་ཕྲེང་རྩལ་དང་རྡོ་རྗེ་གྲོ་ལོད་སོགས། །རྡོ་རྗེའི་མཚན་དང་ངོ་མཚར་རྣམ་ཐར་དང་། །རྫུ་འཕྲུལ་བཀོད་པས་འཕགས་བོད་སྲིན་ཡུལ་གྱི། །མཐའ་ཡས་གདུལ་བྱ་འདུལ་མཛད་ལ༴ ཕྱོགས་བཅུ་དུས་བཞིའི་རྒྱལ་བ་སྲས་བཅས་དང་། །སྐུ་གསུང་ཐུགས་ཡོན་ཕྲིན་ལས་དབྱེར་མེད་པ། །གངས་ཅན་བསྟན་འགྲོའི་སྐྱབས་གཅིག་ཨོ་རྒྱན་རྗེ། །ཐུགས་རྗེ་བཀའ་དྲིན་མཚུངས་མེད་ལ༴ དད་གུས་མོས་པའི་གདུང་བས་རྒྱུད་བསྐུལ་ནས། །སྙན་འགྱུར་དབྱངས་ཀྱིས་ཉིན་མཚན་དུས་དྲུག་ཏུ། །རྩེ་གཅིག་གསོལ་བ་འདེབས་པའི་སྐལ་བཟང་ལ། །བྱིན་རླབས་ཆར་ཆེན་འབེབས་མཛད་ལ༴ མདོར་ན་ཁྱོད་ཞལ་དྲན་པའི་མོད་ཉིད་ནས། །གང་འདུལ་མཚན་དང་སྐུ་ཡི་བཀོད་པ་ཡིས། །ཕན་བདེའི་བསམ་པ་ལྷུན་གྱིས་གྲུབ་མཛད་པའི། །ཡིད་བཞིན་དབང་གི་རྒྱལ་པོ་ལ་གསོལ་བ་འདེབས། །དེ་ལྟར་མི་ཕྱེད་གུས་པས་གསོལ་བཏབ་མཐུས། །བྱང་ཆུབ་བར་དུ་འབྲལ་མེད་རྗེས་བཟུང་ནས། །འགལ་རྐྱེན་ཀུན་ཞི་མཐུན་རྐྱེན་ཕུན་སུམ་ཚོགས། །རང་གཞན་དོན་གཉིས་འགྲུབ་པར་བྱིན་གྱིས་རློབས། །ཞེས་པའང་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་སྙིང་ནས་གུས་པའི་གདུང་བས་གསོལ་བ་བཏབ་པ་སྟེ། འདིས་ཀྱང་རང་གཞན་རྣམས་ཀྱི་རྒྱུད་ལ་དཔལ་ཨོ་རྒྱན་ཆོས་ཀྱི་རྒྱལ་པོའི་ཡེ་ཤེས་གཟིགས་པའི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག། །། ༈

[edit]

o rgyan rin po che la gsol ba 'debs pa rdo rje'i tshig gi don bsdus byin rlabs gter chen/_ o rgyan rin po che la gsol ba 'debs pa rdo rje'i tshig gi don bsdus byin rlabs gter chen ces bya ba bzhugs so/__/e ma ho/__ngo bo mkha' khyab 'od gsal chos kyi sku/__/rang bzhin ye shes lnga ldan longs spyod rdzogs/__/thugs rje gang 'dul sgyu 'phrul sprul pa'i sku/__/dus gsum rtsa brgyud bla ma la gsol ba 'debs/__/bstan pa'i snying po zab gsang rdo rje'i theg__/gdul bya 'dul byed thabs mchog khyad par can/__/zhing 'dir snang mdzad sras bcas rgyal ba'i gtso/__/rig 'dzin pad+ma badz+ra la gsol ba 'debs/__/'og min chos dbyings snying por kun tu bzang /__/bde chen dag pa'i zhing na rigs mchog lnga/__/bsam yas sgyu 'phrul drwa ba'i rnam rol can/__/mtsho skyes rdo rje 'chang chen la gsol ba 'debs/__/che mchog yang dag gshin rje rta mgrin dbang /__/rdo rje gzhon nu mngon rdzogs tshe yi lha/__/rnal 'byor ma sogs yi dam zhi khro'i dngos/__/khyab bdag pad+ma drag po la gsol ba 'debs/__/ston mchog shAkya'i rgyal po dga' rab rje/___/rigs gsum sems dpa' lha klu mi'i rig 'dzin/__/ye shes gcig nyid du mar 'char ba'i gzugs/__/'chi med pad+ma 'byung gnas la gsol ba 'debs/__/lho nub rnga yab zangs mdog dpal gyi rir/__/rang snang dag pa rab 'byams gzhal med dbus/__/rtsa gsum chos srung rgya mtsho'i spyi dpal che/__/o rgyan pad+ma thod phreng la gsol ba 'debs/__/rgyal dang rig 'dzin yongs kyi dgongs pa'i bcud/__/'od gsal rdzogs chen sgyu 'phrul sgrub sde brgyad/__/rdo rje tshe dang shes rab rnal 'byor ma'i/__/rtsa brgyud bla ma kun 'dus la gsol ba 'debs/__/gsang sngags 'dus rgyud thun mong theg par bcas/__/kun gyi bka' babs snyan brgyud rgya mtsho'i gzhi/__/snang grag rtog gsum gnyug ma'i chos nyid dang /__/dbyer med pad+ma 'od 'bar la gsol=__sin+d+hU'i dwangs mtshor rang byung mtsho skyes rje/__/in+d+ra b+hU ti'i rgyal sras thor cog can/__/brtul zhugs grub pa shAn+ta rak+Shi ta/__/spyod 'chang rdo rje drag rtsal la=__shAkya seng ge blo ldan mchog sred rtsal/__/'chi med pad 'byung pad+ma saM b+ha wa/__/pad+ma rgyal po nyi ma 'od zer dang /__/gsang bdag seng ge sgra sgrog la=__thod phreng rtsal dang rdo rje gro lod sogs/__/rdo rje'i mtshan dang ngo mtshar rnam thar dang /__/rdzu 'phrul bkod pas 'phags bod srin yul gyi/__/mtha' yas gdul bya 'dul mdzad la=__phyogs bcu dus bzhi'i rgyal ba sras bcas dang /__/sku gsung thugs yon phrin las dbyer med pa/__/gangs can bstan 'gro'i skyabs gcig o rgyan rje/__/thugs rje bka' drin mtshungs med la=__dad gus mos pa'i gdung bas rgyud bskul nas/__/snyan 'gyur dbyangs kyis nyin mtshan dus drug tu/__/rtse gcig gsol ba 'debs pa'i skal bzang la/__/byin rlabs char chen 'bebs mdzad la=__mdor na khyod zhal dran pa'i mod nyid nas/__/gang 'dul mtshan dang sku yi bkod pa yis/__/phan bde'i bsam pa lhun gyis grub mdzad pa'i/__/yid bzhin dbang gi rgyal po la gsol ba 'debs/__/de ltar mi phyed gus pas gsol btab mthus/__/byang chub bar du 'bral med rjes bzung nas/__/'gal rkyen kun zhi mthun rkyen phun sum tshogs/__/rang gzhan don gnyis 'grub par byin gyis rlobs/__/zhes pa'ang mtsho skyes bla ma dgyes pa'i 'bangs mkhyen brtse'i dbang pos snying nas gus pa'i gdung bas gsol ba btab pa ste/__'dis kyang rang gzhan rnams kyi rgyud la dpal o rgyan chos kyi rgyal po'i ye shes gzigs pa'i byin rlabs myur du 'jug pa'i rgyur gyur cig/____//_!