JKW-KABUM-01-KA-002-015

Previous Text Back to Volume PageNext Text

རྗེ་བཙུན་རིགས་བྱེད་ཌཱ་ཀི་ལ་བསྟོད་པ་ཡིད་འཕྲོག་མཚམས་སྤྲིན་གཞོན་ནུའི་ཕྲེང་བ།

Wylie title	rje btsun rigs byed DA ki la bstod pa yid 'phrog mtshams sprin gzhon nu'i phreng ba
Location	mkhyen brtse'i bka' 'bum Volume 1, sde tshan 2, Text 15, Pages 106-111 (Folios 24b6 to 27a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rje btsun rigs byed DA ki la bstod pa yid 'phrog mtshams sprin gzhon nu'i phreng ba. In 'jam dbyangs mkhyen brtse'i dbang po'i bka' 'bum, Vol. 1: 106-111. Khams sde dge rdzong sar dgon: Rdzong sar blo gros phun tshogs, 2020.
Genre	Verses of Praise - bstod pa
Deity	rigs byed ma
Colophon	།དེ་ལྟར་རྗེ་བཙུན་མྱུར་མཛད་སྒྲོལ་མ་རིགས་བྱེད་ཌཱ་ཀི་ལ་བསྟོད་པའི་རབ་ཏུ་བྱེད་པ་འདི་ནི། དུས་ཀྱི་ཁྱད་པར་བླ་ན་མེད་པའི་སྒོ་འཕར་གསར་དུ་དབྱེ་བའི་ཚེ་གཞོན་ནུ་ཨ་བྷཱ་ཡས་རང་ལོ་བཅུ་བདུན་པར་སྣང་གསལ་གྱི་ངོགས་སུ་ཤར་མར་བཀོད་པ་ཛ་ཡནྟུ།།
	de ltar rje btsun myur mdzad sgrol ma rigs byed DA ki la bstod pa'i rab tu byed pa 'di ni/__dus kyi khyad par bla na med pa'i sgo 'phar gsar du dbye ba'i tshe gzhon nu a b+hA yas rang lo bcu bdun par snang gsal gyi ngogs su shar mar bkod pa dza yan+tu

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

རྗེ་བཙུན་རིགས་བྱེད་ཌཱ་ཀི་ལ་བསྟོད་པ་ཡིད་འཕྲོག་མཚམས་སྤྲིན་གཞོན་ནུའི་ཕྲེང་བ་ཞེས་བྱ་བ། །ན་མོ་ཨཱཪྻ་ཏཱ་རེ་ཀུ་རུ་ཀུལླེ་ཡེ། གཟོད་ནས་འགྱུར་མེད་རྣམ་ཐར་གསུམ་ལྡན་དབྱིངས། །ཡོངས་གྲུབ་སྤྲོས་པ་ལས་འདས་ཡེ་ཤེས་ཀྱང་། །ཚུར་མཐོང་སྣ་ཚོགས་རྟོག་པའི་ཆོས་ཉིད་ངང་། །རྗེས་མཐུན་སྙིང་རྗེའི་རོལ་པར་ཅིར་ཡང་སྣང་། ༡ །མཁའ་དབྱིངས་བཞུ་བའི་རྡུལ་གྱིས་བྱུག་མིན་ཀྱང་། །ཨུཏྤལ་གསར་པའི་འདབ་མཚུངས་ཆུ་གཏེར་དབུས། །སྲིད་ཞིའི་སྐྱོན་བྲལ་ཐིག་ལེའི་མཆོག་མ་ཡི། །མཚར་སྡུག་བརྟན་པ་རབ་འཕྲོག་ཆུ་སྐྱེས་རྩེར། ༢ །ཁམས་གསུམ་རྣམ་པར་གནོན་པའི་སྤྲིང་ཡིག་གིས། །བསྔགས་པའི་འོད་ཟེར་རབ་འབར་ཉིན་མོར་བྱེད། །དབུགས་བྲལ་བམ་རོའི་འཁྲི་ཤིང་ལ་ཆགས་ཏེ། །ཁྱོད་ཀྱི་ཞབས་ཀྱི་འཁོར་ལོའི་འབབས་སྟེགས་གྱུར། ༣ །རྒྱ་སྐྱེགས་གསར་པའི་པདྨོའི་གེ་སར་དང་། །བྱེ་རུའི་ཕུང་པོ་བཞུ་བས་གང་གི་ཞལ། །མཚོན་པ་མ་ཡིན་ཆགས་ཆེན་སྒྱུ་མ་ཡིས། །བཅུ་དྲུག་ལང་ཚོའི་འཇོ་སྒེག་ལ་རོལ་ཕྱིར། ༤ །དམར་སེར་ལི་ཁྲིའི་རྡུལ་གྱིས་བྱུག་པ་ལྟའི། །དབུ་སྐྱེས་ཆུན་པོར་གཡོ་བའི་ཕང་ཕུང་རྩེར། །ཀཻ་ལ་ཤ་ལྟར་རབ་བརྗིད་ཐོད་སྐམ་གྱི། །མེ་ཏོག་རིགས་ལྔའི་རྒྱལ་བའི་ནགས་སུ་འཁྲིགས། ༥ །རྣམ་ཐར་བཞི་ལྡན་ཕྱག་གི་འཁྲི་ཤིང་ན། །ངུར་པ་སྒྲ་འབྱིན་གེ་སར་ཕྲེང་བ་ཡིས། །རབ་མཛེས་མདའ་གཞུ་སྟན་གྱི་དཀྱིལ་འཁོར་དུ། །བཞད་པས་ཁམས་གསུམ་འགྲོ་བའི་ཡིད་དབང་སྡུད། ༦ །ཆགས་ཆེན་སྒྱུ་མའི་མདེའུ་རྣོན་པོ་ཉིད། །གང་ལ་དམིགས་པའི་སྙིང་གར་བསྣུན་པ་ལས། །རབ་མྱོས་ཁྲག་གི་རྦ་རླབས་འཕྱོ་བ་དང་། །ལྷན་ཅིག་བསྟོད་བསྔགས་ངུད་མོས་ལྦུ་ཕྲེང་འཁྲིགས། ༧ །བནྡྷུ་ཀ་ཡི་རྡུལ་ཕྲེང་བགོས་པ་ལྟའི། །ཉིན་བྱེད་འོད་ཀྱིས་རབ་སྨིན་ཨུཏྤལ་དམར། །ཕན་བདེའི་སྦྲང་རྩི་འཇོ་བའི་དགའ་སྟོན་གྱིས། །རྣལ་འབྱོར་གེ་སར་འཛིན་རྣམས་ཚིམ་པར་མཛད། ༨ །གང་ཐུགས་སྙིང་རྗེ་ཆེན་པོའི་མཛའ་ན་མོ། །མཁའ་ཁྱབ་སྲིད་པའི་གྲོང་དུ་རྐང་བཀོད་ནས། །ཟུར་མིག་ཡོན་པོར་གཟིགས་པའི་མཆིལ་པ་ཡིས། །སྐྱེ་རྒུའི་ཡིད་ཀྱི་བརྟན་པ་དབང་མེད་འཕྲོག ༩ །བྲང་སྐྱེས་མཁྲེག་ཅིང་གཞོན་ཤ་ཆགས་པའི་ཉམས། །ཐབས་ཤེས་ཨེ་ཝྃ་འཁོར་ལོའི་གང་བཟང་དུ། །འགྱུར་མེད་བདེ་སྟོང་བདུད་རྩིས་རབ་གཏམས་པས། །གྲུབ་པ་གཉིས་ཀྱི་དགའ་སྟོན་མཆོག་ལ་སྦྱོར། ༡༠ །རྣམ་ཐར་གསུམ་གྱི་ཆུ་སྐྱེས་གསར་པ་ནི། །བདེ་སྟོང་དགའ་བཞིའི་ལང་ཚོ་དང་འགྲོགས་པས། །ཟུང་འཇུག་ཐེམ་སྐས་ལ་འཛེགས་སྐལ་བཟང་ལ། །ས་བཅུ་ལམ་ལྔའི་གོ་འཕང་ཡུད་ཀྱིས་སྦྱིན། ༡༡ །ཞབས་གཉིས་པདྨའི་འཁྲི་ཤིང་གཡོ་བ་ཡང་། །བརྐྱང་བསྐུམ་གར་གྱིས་གདན་ལ་རྣམ་རོལ་པས། །སྲིད་ཞི་གཉིས་ཀྱི་མཐའ་རུ་ལྷུང་མིན་པར། །རྣམ་ཀུན་མཆོག་ལྡན་ངལ་བསོ་བསྟེན་པ་བཞིན། ༡༢ །འདུ་བྱེད་སྲོག་དང་ལྷན་ཅིག་མི་གནས་པའི། །བཅུ་ཕྲག་ལྔ་ཡིས་ཉེར་མཚོན་མགོ་བོའི་ཕྲེང་། །གདུལ་བྱར་རྗེས་ཆགས་ཁྲག་གི་ར་རི་ཡིས། །དོགས་པས་གཏམས་བཞིན་ཁྱོད་ཀྱི་སྐུ་ལ་མཛེས། ༡༣ །སྟོང་ཉིད་དབྱིངས་ལས་རབ་འབར་བསྲེག་ཟའི་ཁྲོད། །བྱམས་པའི་གདུང་སེལ་བདུད་རྩི་འབུམ་འཛག་པས། །ཞི་དང་ཁྲོ་ཆགས་བདེ་བའི་རོལ་པར་གྱིས། །འགྲོ་འདི་སྐལ་བཟང་དཔྱིད་དུ་ལྷགས་པ་བཞིན། ༡༤ །འཆི་མེད་ལྷ་ཡི་ཡུལ་ལས་མ་འོངས་ཤིང་། །དབང་པོའི་གཞུ་ཡི་ཆ་ཤས་འཕྲོག་མིན་པར། །ལྕིད་ཀྱིས་ནོན་སྤངས་རེག་ན་བདེ་བའི་གོས། །འདིས་ནི་ཁྱོད་སྐུའི་ཁེངས་པ་འཕྲོག་ལ་གྲང་། ༡༥ །པུཎྜ་རཱི་ཀའི་མཚར་སྡུག་འཕྲོག་མིན་ཀྱང་། །འཚོ་བའི་བརྟན་པ་རབ་བྲལ་རུས་གང་གི །དྲཱ་བས་རྣམ་པར་སྦྲེལ་བའི་རྒྱན་ཆ་ནི། །ཕ་རོལ་ཕྱིན་མཚོན་ཁྱོད་ཀྱི་སྐུ་ལ་འཁྲིལ། ༡༦ །ཆོས་བརྒྱད་ཁེངས་པའི་རི་མོ་རབ་བཀྲ་ཞིང་། །ཚུལ་མིན་རྨོངས་པའི་སྟོབས་ལྡན་ཤརྡྷུ་ལ། །རབ་ཁྲོས་སྙིང་རྗེའི་མཚོན་གྱིས་གཟིར་བྱས་ཏེ། །སླར་ཡང་གང་སྐུར་དཔྱད་འདི་འོས་སམ་ཅི། ༡༧ །འོད་མཚན་སྟོང་དུ་འབར་བའི་ཉིན་བྱེད་ཡང་། །ཐོར་ཚུགས་ཆུ་སྐྱེས་སར་པ་ལ་ཆགས་ན། །བདེ་ལྡན་ཞིང་གི་བཀོད་པ་མི་བསྐྲུན་པར། །གནས་ཡུལ་ཌཱ་ཀིའི་གྲོང་དུ་ཅི་ཕྱིར་རྒྱུ། ༡༨ །ཐུགས་སྲོག་འོད་སྲུངས་རྒྱུད་ཀྱི་འཛུམ་ཟེར་གྱིས། །ཉེར་བསུས་ཐུན་མཚམས་མཚན་དཔེའི་འཇོ་སྒེག་ཅན། །གང་སྐུའི་སྣང་བ་ཡིད་ལ་དྲན་ཙམ་གྱིས། །སྲིད་ཞིའི་དགེ་ལེགས་འགུགས་ལ་སོམ་ཉི་ཅི། ༡༩ །ཆོས་ཀྱི་འཁོར་ལོ་བཞད་པའི་ཨུཏྤ་ལར། །ཧྲཱིཾ་མཐར་གསང་སྔགས་འབྲུ་བརྒྱད་འཁོར་བ་ཡིས། །གེ་སར་དྲི་བསུང་མངར་པོས་སྲིད་དང་ཞིའི། །ཕུན་ཚོགས་རཿཡིག་གཉིས་པ་སྤྲིན་ལྟར་འདུ། ༢༠ །ཁྱོད་ཀྱི་ཐུགས་རྗེའི་འཇུག་པ་སྨོས་ཅི་འཚལ། །མཚན་གྱི་སྤྲིང་ཡིག་རྣམ་པར་དཔྱངས་པས་ཀྱང་། །ཚངས་དབང་བདེ་འབྱུང་སྤྱི་བོས་རབ་བསྟེན་ཏེ། །ཁམས་གསུམ་སྡུད་པའི་ཚུལ་ལ་སོམ་ཉི་ཅི། ༢༡ །དེས་ན་སྙིང་རྗེའི་རོལ་མཚོ་འཕྱུར་བ་ལས། །དགེ་མཚན་ཟེར་གྱིས་སྤུད་པའི་ཟླ་ཤེལ་གྱིས། །བརྒྱད་གཉིས་འཇིགས་པའི་ཆུ་སྐྱེས་ཟུམ་བྱས་ཏེ། །དགའ་བདེའི་ཀུནྡཱའི་འཛུམ་ཕྲེང་དགོད་པར་ཤོག ༢༢ །འཇིག་རྟེན་ཆེ་དགུའི་ཐོར་ཚུགས་ཆུ་གོས་རྩེར། །རྣམ་པར་བཀོད་པའི་གང་ཞབས་རིན་ཆེན་ལས། །བསོད་ནམས་ཡེ་ཤེས་འདོད་པ་རབ་འཇོ་བས། །ལེགས་ཚོགས་འབྱོར་པའི་ཆུ་གཏེར་རྒྱས་གྱུར་ཅིག ༢༣ །སྤྱན་རས་ཆུ་འཛིན་ཕུང་པོ་རབ་གཡོ་བར། །སྨིན་མ་གློག་ཕྲེང་གཞོན་ནུའི་དོ་ཤལ་དང་། །ལྷན་ཅིག་ཆགས་བྲལ་སྤྲིན་སྒྲའི་ཞགས་པ་ཡིས། །སྲིད་གསུམ་གཉིས་སྐྱེས་ཚོགས་རྣམས་སྡུད་པར་ཤོག ༢༤ །སྤྲོས་བྲལ་འཆི་མེད་གྲུབ་པའི་ཁང་བཟང་དབུས། །སྟོང་ཉིད་སྙིང་རྗེར་རོལ་པའི་ལྷ་དབང་ཆེའི། །དྲག་ཤུལ་རྡོ་རྗེའི་མེ་བོ་ཆེ་སྤྲོས་པས། །ཕས་རྒོལ་རི་བོའི་རྐང་པ་འཇོམས་གྱུར་ཅིག ༢༥ །དངོས་ཀུན་བདེ་བ་ཆེར་བསྡམས་ཀཱ་ལ་ཤར། །གྲུབ་གཉིས་བདུད་རྩིས་གཏམས་པའི་བགོ་བཤར་གྱིས། །ཟུང་འཇུག་མཆོག་གི་ལང་ཚོ་རབ་རྒྱས་ནས། །བྲལ་སྨིན་ཡོན་ཏན་རྒྱ་མཚོར་དབང་འབྱོར་ཤོག ༢༦ །རྨི་ལམ་ཙམ་དུའང་ཁྱོད་ཞལ་མཐོང་གྱུར་ཏེ། །ཐུགས་རྗེའི་རྭ་བ་གཅིག་ཏུ་བཟླུམས་པ་ཡིས། །གེགས་བྱེད་ཉེར་འཚོའི་དཔུང་ཚོགས་དམ་བཅིངས་ཏེ། །རེ་བའི་ཤིང་རྟ་གཡོ་མེད་འགེངས་གྱུར་ཅིག ༢༧ །དེ་ལྟར་རྗེ་བཙུན་མྱུར་མཛད་སྒྲོལ་མ་རིགས་བྱེད་ཌཱ་ཀི་ལ་བསྟོད་པའི་རབ་ཏུ་བྱེད་པ་འདི་ནི། དུས་ཀྱི་ཁྱད་པར་བླ་ན་མེད་པའི་སྒོ་འཕར་གསར་དུ་དབྱེ་བའི་ཚེ་གཞོན་ནུ་ཨ་བྷཱ་ཡས་རང་ལོ་བཅུ་བདུན་པར་སྣང་གསལ་གྱི་ངོགས་སུ་ཤར་མར་བཀོད་པ་ཛ་ཡནྟུ།། །། ༈

[edit]

rje btsun rigs byed DA ki la bstod pa yid 'phrog mtshams sprin gzhon nu'i phreng ba/ rje btsun rigs byed DA ki la bstod pa yid 'phrog mtshams sprin gzhon nu'i phreng ba zhes bya ba/__/na mo AR+Ya tA re ku ru kul+le ye/__gzod nas 'gyur med rnam thar gsum ldan dbyings/__/yongs grub spros pa las 'das ye shes kyang /__/tshur mthong sna tshogs rtog pa'i chos nyid ngang /__/rjes mthun snying rje'i rol par cir yang snang /__1_/mkha' dbyings bzhu ba'i rdul gyis byug min kyang /__/ut+pal gsar pa'i 'dab mtshungs chu gter dbus/__/srid zhi'i skyon bral thig le'i mchog ma yi/__/mtshar sdug brtan pa rab 'phrog chu skyes rtser/__2_/khams gsum rnam par gnon pa'i spring yig gis/__/bsngags pa'i 'od zer rab 'bar nyin mor byed/__/dbugs bral bam ro'i 'khri shing la chags te/__/khyod kyi zhabs kyi 'khor lo'i 'babs stegs gyur/__3_/rgya skyegs gsar pa'i pad+mo'i ge sar dang /__/bye ru'i phung po bzhu bas gang gi zhal/__/mtshon pa ma yin chags chen sgyu ma yis/__/bcu drug lang tsho'i 'jo sgeg la rol phyir/__4_/dmar ser li khri'i rdul gyis byug pa lta'i/__/dbu skyes chun por g.yo ba'i phang phung rtser/__/kai la sha ltar rab brjid thod skam gyi/__/me tog rigs lnga'i rgyal ba'i nags su 'khrigs/__5_/rnam thar bzhi ldan phyag gi 'khri shing na/__/ngur pa sgra 'byin ge sar phreng ba yis/__/rab mdzes mda' gzhu stan gyi dkyil 'khor du/__/bzhad pas khams gsum 'gro ba'i yid dbang sdud/__6_/chags chen sgyu ma'i mde'u rnon po nyid/__/gang la dmigs pa'i snying gar bsnun pa las/__/rab myos khrag gi rba rlabs 'phyo ba dang /__/lhan cig bstod bsngags ngud mos lbu phreng 'khrigs/__7__/ban+d+hu ka yi rdul phreng bgos pa lta'i/__/nyin byed 'od kyis rab smin ut+pal dmar/__/phan bde'i sbrang rtsi 'jo ba'i dga' ston gyis/__/rnal 'byor ge sar 'dzin rnams tshim par mdzad/__8_/gang thugs snying rje chen po'i mdza' na mo/__/mkha' khyab srid pa'i grong du rkang bkod nas/__/zur mig yon por gzigs pa'i mchil pa yis/__/skye rgu'i yid kyi brtan pa dbang med 'phrog__9__/brang skyes mkhreg cing gzhon sha chags pa'i nyams/__/thabs shes e wa~M 'khor lo'i gang bzang du/__/'gyur med bde stong bdud rtsis rab gtams pas/__/grub pa gnyis kyi dga' ston mchog la sbyor/__10_/rnam thar gsum gyi chu skyes gsar pa ni/__/bde stong dga' bzhi'i lang tsho dang 'grogs pas/__/zung 'jug them skas la 'dzegs skal bzang la/__/sa bcu lam lnga'i go 'phang yud kyis sbyin/__11_/zhabs gnyis pad+ma'i 'khri shing g.yo ba yang /__/brkyang bskum gar gyis gdan la rnam rol pas/__/srid zhi gnyis kyi mtha' ru lhung min par/__/rnam kun mchog ldan ngal bso bsten pa bzhin/__12_/'du byed srog dang lhan cig mi gnas pa'i/__/bcu phrag lnga yis nyer mtshon mgo bo'i phreng /__/gdul byar rjes chags khrag gi ra ri yis/__/dogs pas gtams bzhin khyod kyi sku la mdzes/_13_/stong nyid dbyings las rab 'bar bsreg za'i khrod/__/byams pa'i gdung sel bdud rtsi 'bum 'dzag pas/__/zhi dang khro chags bde ba'i rol par gyis/__/'gro 'di skal bzang dpyid du lhags pa bzhin/__14_/'chi med lha yi yul las ma 'ongs shing /__/dbang po'i gzhu yi cha shas 'phrog min par/__/lcid kyis non spangs reg na bde ba'i gos/__/'dis ni khyod sku'i khengs pa 'phrog la grang /__15_/puN+Da rI ka'i mtshar sdug 'phrog min kyang /__/'tsho ba'i brtan pa rab bral rus gang gi__/drA bas rnam par sbrel ba'i rgyan cha ni/__/pha rol phyin mtshon khyod kyi sku la 'khril/__16_/chos brgyad khengs pa'i ri mo rab bkra zhing /__/tshul min rmongs pa'i stobs ldan shar+d+hu la/__/rab khros snying rje'i mtshon gyis gzir byas te/__/slar yang gang skur dpyad 'di 'os sam ci/_17_/'od mtshan stong du 'bar ba'i nyin byed yang /__/thor tshugs chu skyes sar pa la chags na/__/bde ldan zhing gi bkod pa mi bskrun par/__/gnas yul DA ki'i grong du ci phyir rgyu/__18_/thugs srog 'od srungs rgyud kyi 'dzum zer gyis/__/nyer bsus thun mtshams mtshan dpe'i 'jo sgeg can/__/gang sku'i snang ba yid la dran tsam gyis/__/srid zhi'i dge legs 'gugs la som nyi ci/__19__/chos kyi 'khor lo bzhad pa'i ut+pa lar/__/hrIM mthar gsang sngags 'bru brgyad 'khor ba yis/__/ge sar dri bsung mngar pos srid dang zhi'i/__/phun tshogs raHyig gnyis pa sprin ltar 'du/__20_/khyod kyi thugs rje'i 'jug pa smos ci 'tshal/__/mtshan gyi spring yig rnam par dpyangs pas kyang /__/tshangs dbang bde 'byung spyi bos rab bsten te/__/khams gsum sdud pa'i tshul la som nyi ci/__21_/des na snying rje'i rol mtsho 'phyur ba las/__/dge mtshan zer gyis spud pa'i zla shel gyis/__/brgyad gnyis 'jigs pa'i chu skyes zum byas te/__/dga' bde'i kun+dA'i 'dzum phreng dgod par shog__22_/'jig rten che dgu'i thor tshugs chu gos rtser/__/rnam par bkod pa'i gang zhabs rin chen las/__/bsod nams ye shes 'dod pa rab 'jo bas/__/legs tshogs 'byor pa'i chu gter rgyas gyur cig__23_/spyan ras chu 'dzin phung po rab g.yo bar/__/smin ma glog phreng gzhon nu'i do shal dang /__/lhan cig chags bral sprin sgra'i zhags pa yis/__/srid gsum gnyis skyes tshogs rnams sdud par shog__24__/spros bral 'chi med grub pa'i khang bzang dbus/__/stong nyid snying rjer rol pa'i lha dbang che'i/__/drag shul rdo rje'i me bo che spros pas/__/phas rgol ri bo'i rkang pa 'joms gyur cig__25_/dngos kun bde ba cher bsdams kA la shar/__/grub gnyis bdud rtsis gtams pa'i bgo bshar gyis/__/zung 'jug mchog gi lang tsho rab rgyas nas/__/bral smin yon tan rgya mtshor dbang 'byor shog__26_/rmi lam tsam du'ang khyod zhal mthong gyur te/__/thugs rje'i rwa ba gcig tu bzlums pa yis/__/gegs byed nyer 'tsho'i dpung tshogs dam bcings te/__/re ba'i shing rta g.yo med 'gengs gyur cig__27_/de ltar rje btsun myur mdzad sgrol ma rigs byed DA ki la bstod pa'i rab tu byed pa 'di ni/__dus kyi khyad par bla na med pa'i sgo 'phar gsar du dbye ba'i tshe gzhon nu a b+hA yas rang lo bcu bdun par snang gsal gyi ngogs su shar mar bkod pa dza yan+tu//___//__!