DKR-KABUM-11-DA-005

From Khyentse Lineage - A Tsadra Foundation Project
Revision as of 12:32, 1 December 2022 by Mort (talk | contribs)
(diff) ← Older revision | Latest revision (diff) | Newer revision → (diff)

བཙན་སྐོར་ལ། བཙན་རྒོད་ཤུ་བ་སྲོག་གཟན་གྱི་གསོལ་མཆོད་དབང་དྲག་གློག་གི་གར་མཁན། སྐྱེས་བུ་ལུང་བཙན་གསོལ་མཆོད་དབང་དྲག་གློག་ཕྲེང༌། ཧྲཱིཿ དབང་དྲག་པདྨའི་བཀའ་ཉན་སོགས། ཧྲཱིཿ བདེ་ཆེན་འབར་བ་སོགས་བཅས།
Wylie title btsan skor la/ btsan rgod shu ba srog gzan gyi gsol mchod dbang drag glog gi gar mkhan/ skyes bu lung btsan gsol mchod dbang drag glog phreng/ hrIH dbang drag pad+ma'i bka' nyan sogs/ hrIH bde chen 'bar ba sogs bcas/ DKR-KABUM-11-DA-005.pdf
Location dil mgo mkhyen brtse bka' 'bum
Volume 11, Text 5, Pages 26-29 (Folios 1a to 4b3)
Author དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation Khyentse, Dilgo. Btsan skor la btsan rgod shu ba srog gzan gyi gsol mchod dbang drag glog gi gar mkhan skyes bu lung btsan gsol mchod dbang drag glog phreng hrIH dbang drag pad+ma'i bka' nyan sogs hrIH bde chen 'bar ba sogs bcas. In Skyabs rje dil mgo mkhyen brtse rin po che'i bka' 'bum, Vol. 11: 26-29. Delhi: Shechen Publications, 1994.
Genre Protector Rituals - gsol mchod
Deity btsan

":Property:textsubnumber|textsubnumber" can not be assigned to a declared number type with value 1.

[edit]
༄༅། །བཙན་རྒོད་ཤུ་བ་སྲོག་གཟན་གྱི་གསོལ་མཆོད་དབང་དྲག་གློག་གི་གར་མཁན་བཞུགས།།

༄༅། །ན་མོ་གུ་རུ་པདྨ་ཀྲོ་དྷ་ཡ། །བཙན་རྒོད་ཤུ་བ་སྲོག་གཟན་མཆོད་གསོལ་འདོད་པས་གཙང་མའི་སྣོད་དུ་མཆོད་གཏོར་དམར་གཏོར་གྲུ་གསུམ་བདུན་ཁྲག་གཙང་མས་བརྒྱན་པ་དང༌། དྲག་པོའི་ཉེར་སྤྱོད། གསེར་སྐྱེམས་ཕུད་རྒོད། འབྱོར་ན་ཤིང་རྩིའི་བསང་བཅས་འདུ་བྱས་ལ། རང་ཉིད་དཔལ་རྟ་མགྲིན་དུ་གསལ་བས། རཾ་ཡཾ་ཁཾ། མཆོད་གཏོར་ཟག་མེད་ཡེ་ཤེས་བདུད་རྩིའི་སྤྲིན་ཕུང་འདོད་ཡོན་རྒྱ་མཚོའི་རོལ་པར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ། རང་དབང་ཆེན་རྟ་མགྲིན་དུ་གསལ་བའི་ཐུགས་ཀའི་འོད་ཀྱིས་བཙན་རྒོད་འཁོར་དང་བཅས་པ་སྐད་ཅིག་གིས་བྱོན་པར་གྱུར། ཀྱཻ། དབང་དྲག་པདྨ་དྲག་པོ་ཡིས། །བཀའ་ཉན་དྲེགས་པ་བཙན་གྱི་རྗེ། །ཤུ་བ་སྲོག་གཟན་འཁོར་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །ཤུ་ལ་ཏྲི་བཛྲ་ས་མ་ཡ་ཛཿ ཛཿཧཱུྃ་བྃ་ཧོ། ས་མ་ཡ་རཀྴན་ཏུ། ཨོཾ་བཛྲ་ཨརྒྷཾ་ནས། ཤབྡ་སརྦ་པཱུ་ཛ་ཧོ། ཨོཾ་ཤུ་ལ་རཱ་ཛ་ས་པ་རི་ཝཱ་ར་ཨི་དམ་བ་ལིཾ་ཏ་ཁཱ་ཧི། ལན་གསུམ། མ་ཧཱ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། ཞེས་ཉེར་སྤྱོད་དང་སྨན་རཀ་གཏོར་མས་མཆོད། བསྟན་པའི་བཀའ་སྲུང་ཆེན་པོ་བཙན་རྒོད་ཤུ་བ་སྲོག་གཟན་མཆེད་བདུན་འཁོར་དང་བཅས་པས་སངས་རྒྱས་ཀྱི་བསྟན་པ་སྲུང་སོགས་ཀྱིས་ཕྲིན་ལས་བཅོལ། བསྟོད་པ་ནི། ཧཱུྃ༔ ཤུ་བ་སྲོག་གཟན་བཙན་གྱི་རྗེ༔ ཡམ་ཤུད་དམར་པོ་མཐུ་སྟོབས་ཅན༔ བསྭེ་ཡི་སྐྱེས་བུ་རབ་འཇིགས་པ༔ སྐུ་མདོག་དམར་རྔམས་ཁྲོས་པ་ལ༔ ཕྱག་ན་མདུང་དམར་ཞགས་པ་འཛིན༔ བསེ་ཁྲབ་གསོལ་ཞིང་རྟ་དམར་ཆིབས༔ དར་དམར་རྡོ་རྗེའི་ཅོད་པན་ཅན༔ ཀླུ་བཙན་འབུམ་གྱི་འཁོར་གྱིས་བསྐོར༔ འདིར་གཤེགས་དམ་རྫས་མཆོད་པ་བཞེས༔ པདྨ་འབྱུང་གནས་བཀའ་བཞིན་དུ༔ སྒྲུབ་པ་པོ་ཡི་ཆོས་སྲིད་སྲུངས༔ ཆོས་སྐྱོང་རྒྱལ་པོའི་བསམ་པ་སྒྲུབས༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་དང༌། གྲངས་བསགས་དགོས་ན། ཧཱུྃ། ཕྱི་ལྟར་ཀླུ་བཙན་ནང་ལྟར་རཱ་ཙའི་ཚུལ། །གསང་བ་གནོད་སྦྱིན་ནོར་བདག་ཚུལ་སྟོན་པ། །འབར་བ་སྤུན་བདུན་སྤྲུལ་འཁོར་ཕོ་ཉར་བཅས། །གསོལ་ལོ་མཆོད་དོ་བཅོལ་བའི་ཕྲིན་ལས་མཛོད། །ཅེས་མི་ཕམ་རིན་པོ་ཆེའི་རྡོ་རྗེའི་གསུང་ངོ༌། །ཅེས་པའང་མཁྱེན་ཡོན་མཚུངས་མེད་ཨ་གྲོ་མཆོག་གི་སྤྲུལ་པའི་སྐུ་ཀརྨ་སྒྲུབ་བརྒྱུད་ངེས་དོན་བསྟན་འཕེལ་ནས་གསུང་བསྐུལ་བཞིན་མཚོ་སྐྱེས་རྒྱལ་བ་གཉིས་པའི་འབངས་མངྒ་ལས་ལྷོ་འབྲུག་སྤ་གྲོ་སྐྱེར་ཆུའི་གཙུག་ལག་ཁང་ནས་བྲིས་པ་སྒྲུབ་བརྒྱུད་སྙིང་པོའི་བསྟན་པ་ཡར་ཟླ་ལྟར་འཕེལ་བའི་རྟེན་འབྲེལ་དུ་སྨོན་བཞིན་འགྲུབ་པར་གྱུར་ཅིག །སུ་ཤྲཱི་ཡེ་བྷ་ཝནྟུ།། །། ༈ སྐྱེས་བུ་ལུང་བཙན་གསོལ་མཆོད་དབང་དྲག་གློག་ཕྲེང་བཞུགས། ཀྱཻ། ཡུལ་ནི་ལྷོ་མོན་ཙནྡན་ལྗོངས། །རི་བྲག་ཚང་ཚིང་བཀོད་པ་མཛེས། །སྤངས་ལྗོངས་མེ་ཏོག་སྨན་འབྲུས་བརྒྱན། །ཆུ་ཀླུང་དལ་བགྲོད་རྩེ་མཐོའི་རི། །བདུད་རྩིའི་སྤྲིན་དང་ན་བུན་གཡོ། །ཉི་ཟླའི་སྣང་བས་ལེགས་སྐྱོང་གཞིར། །བྲག་དཀར་ཤེལ་གྱི་རི་བོ་ལ། །སྲིད་པ་ཆགས་པའི་ལྷ་རབས་ཆེ། །དབང་དྲག་པདྨའི་བཀའ་སྡོད་མཆོག །ཇོ་བོ་སྐྱེས་བུ་ལུང་བཙན་ཞེས། །ཁྲོ་གཏུམ་བསྐལ་པའི་མེ་ལྟར་འབར། །སྤྱན་བགྲད་སྨ་ར་སྨིན་མ་འཁྱུགས། །བསྭེ་རྨོག་བསྭེ་ཁྲབ་བེར་དམར་གསོལ། །ཕྱག་གཡས་དར་དམར་རུ་མཚོན་འཕྱར། །གཡོན་པས་མདུང་དང་ཞགས་པ་ཐོགས། །འཁོར་གསུམ་སྟག་ཆས་ཚེར་ལྟར་རྣོ། །དར་འཕྲུ་མེ་སྟག་ཁྲོམ་ཁྲོམ་འཕྲོ། །རྟ་དམར་རླུང་གཤོག་རྒྱན་ལྡན་ཆིབ། །ཕོ་ཉ་རུ་འདྲེན་རླུང་ལྟར་འཚུབས། །དགྱེས་སྡེ་སྨན་བཙུན་འཁོར་དང་བཅས། །མཆོད་པའི་མགྲོན་དུ་དགྱེས་པས་སྤྱོན། །གཙང་སྦྱར་གཏོར་མ་ཤ་ཁྲག་བརྒྱན། །གསེར་སྐྱེམས་ཕུད་རྒོད་རྒྱ་མཚོ་བསྐྱིལ། །བསང་དང་སྤོས་སྤྲིན་བར་སྣང་ཁེངས། །སྤྱན་གཟིགས་དཀོར་ནོར་མཐུན་རྫས་དང༌། །དགྱེས་བསྐྱེད་ཇ་དར་ནོར་ཕྱུགས་རྟ། །རི་དྭགས་གཡུང་དྭགས་བྱ་རིགས་ཁྱུ། །ཟད་མེད་ཕྱོགས་ཀུན་ཁྱབ་འབུལ་ན། །དགྱེས་བཞེས་འཁོན་དང་ཉམས་ཆགས་སྦྱངས། །གནས་མགྲོན་དམ་ཚིག་མ་བསྙེལ་བར། །དགྱེས་པས་ཉིན་མཚན་བྱ་ར་མཛོད། །ཡུལ་འདིར་བཀྲ་ཤིས་བདེ་ལེགས་ཤིང༌། །མི་ཕྱུགས་ལོ་ལེགས་འབྲུ་དཔལ་སྤེལ། །ནད་མུག་འཁྲུགས་རྩོད་སད་སེར་ཞི། །དཔལ་འབྱོར་ལོངས་སྤྱོད་དགའ་བདེ་འཕེལ། །ཆོས་ལྡན་རྒྱལ་པོའི་མངའ་ཐང་དར། །འབངས་འཁོར་བློན་པོ་ཆོས་ལ་དད། །སྐྱེ་དགུ་བདེ་སྐྱིད་མཐུན་ལ་དར། །སྣོད་བཅུད་ལྷ་བཞིན་དར་རྒྱས་མཛོད། །དགེ་འདུན་འདུས་ཚོགས་འཕེལ་རྒྱས་བརྟན། །སྤང་ཀློག་མཛད་པ་ཡར་ཟླ་བཞིན། །ཁྲིམས་གཙང་ཆོས་བཞིན་སྤྱོད་པ་ཡིས། །དཀོན་མཆོག་གསུམ་གྱི་དབུ་འཕང་བསྟོད། །ཁྱད་པར་དཔལ་ལྡན་ཀརྨ་པ། །རང་བྱུང་རིག་པའི་རྡོ་རྗེ་ཡི། །སྤྱན་སྔར་དམ་བཅས་ཁས་བླངས་བཞིན། །ཕྲིན་ལས་དར་རྒྱས་ཀུན་ཁྱབ་པས། །སྒྲུབ་བརྒྱུད་བསྟན་པའི་ཉིན་བྱེད་ཤར། །དེ་འཛིན་སྐྱེས་བུའི་མཛད་ཕྲིན་རྒྱས། །ཐུགས་ལ་བཞེད་པའི་དོན་འགྲུབ་ཅིང༌། །བཀྲ་ཤིས་བདེ་ལེགས་ཕུན་ཚོགས་མཛོད། །ཅེས་པའང་སྒྲུབ་བརྩོན་བླ་མ་ཀརྨ་བསྟན་འཛིན་རྣམ་རྒྱལ་ནས་གསུང་བསྐུལ་བཞིན་མཚོ་སྐྱེས་རྒྱལ་བ་གཉིས་པའི་ཐུགས་རྗེའི་ཟླ་ཟེར་དད་པས་འཐུང་བའི་ཁམས་པའི་སྔགས་རྒན་མངྒ་ལ་ཤྲཱི་བྷཱུ་ཏིས་སྐུ་རྗེས་རྡོ་རྗེས་བརྩེགས་པའི་ཀེའུ་ཚང་ནས་དགེ་བའི་མཚན་ལྟས་དང་བཅས་ཏེ་བྲིས་པ་ཤུ་བྷཾ་ཛ་ཡནྟུ།། ༈ དབང་དྲག་པདྨའི་བཀའ་སྡོད་རྫིང་བཙན་རྡོ་རྗེ་དགྲ་འདུལ་གྱི་མངའ་གསོལ་ལྷ་དབང་གཡུལ་ལས་རྒྱལ་བའི་དབྱངས་སྙན་ཞེས་བྱ་བ་བཞུགས་སོ། མང་མང་རྒྱལ་ཀུན་མཁྱེན་བརྩེའི་མཁའ་དབྱིངས་སུ། །མྱུར་མྱུར་ཕྲིན་ལས་གློག་ཕྲེང་གཡོས་བ་ལས། །སྙན་སྙན་ཕན་བདེའི་སྙེ་མའི་གཉེན་གྱི་ཆར། །ཡང་ཡང་འབེབས་པས་བརྗོད་དོན་ལྕི་བར་མཛོད། །ཀ་དག་བྱ་རྩོལ་བྲལ་བའི་ཆོས་ཀྱི་དབྱིངས། །འཕོ་འགྱུར་མཚན་རྟོག་འདུ་བྱེད་མ་མཆིས་ཀྱང༌། །ཀུན་ཁྱབ་ཐུགས་རྗེའི་འཆར་ཀའི་ཉིན་བྱེད་ཀྱིས། །མཁའ་ཁྱབ་འགྲོ་འདུལ་ཕྲིན་ལས་རྒྱུན་མི་ཆད། །ཐབས་མཁས་ཆར་ལྡན་སྤྲིན་གྱི་ཕྲེང་བ་ལས། །ཕན་བདེའི་བདུད་རྩིའི་སིམ་ཆར་མི་ཟད་པས། །རྗེས་འཛིན་གདུལ་དཀའི་འགྲོ་སྒྲོལ་བྱེད་ལས་ཅན། །ཚར་གཅོད་གནམ་ལྕགས་མདའ་རྣོན་འབིགས་པའི་ཡུལ། །རང་རྒྱུད་དུག་ལྔའི་ཁོལ་པོར་འཕྱན་ཆེས་པས། །དཀར་མིན་ལས་ཀྱི་རླུང་དམར་བར་མེད་དུ། །ལྡང་བས་གསོད་གཅོད་མི་སྲུན་སྲིན་པོ་ལྟར། །ལག་ན་མཚོན་རྣོན་ཐོགས་པས་རི་སྐྱེས་བཅོམ། །ཉམས་ཆུང་སྲོག་གི་འཇིགས་པས་མ་བཟོད་པར། །གཏིང་ཟབ་ཆུ་སྐྱེས་དབུས་ཀྱི་རྭ་བཅུའི་རོ། །ཤ་ཟན་རྔམས་པས་སྐམ་སར་བཏོན་འདོད་ཀྱི། །ཁྲོ་ཆགས་རྔམ་ཀྱང་སྟོབས་ཀྱིས་མ་ལྕོགས་བཞིན། །ལིང་པ་མིང་སྲིང་ཕྱི་མའི་ལྟད་མོར་ཆས། །བག་ཆགས་རླུང་དམར་གཞན་དབང་རྣམ་ཤེས་དེ། །ཡིད་ལུས་འཁྲུལ་པའི་ཟུག་རྔུས་གདུང་བཞིན་མུན། །རྟག་འཕྱན་གཞན་གནོད་མཚོན་ཆ་ཐོགས་བཞིན་དུ། །འཇིག་རྟེན་ཀུན་ན་རྒྱུ་བའི་བཙན་རྒོད་དེ། །ཐུགས་རྗེ་མྱུར་མགྱོགས་ལྕགས་ཀྱུས་གཟུང་ཡུལ་གྱུར། །གདུལ་བྱའི་རྒྱུད་ཀྱི་གཉེན་པོའི་ཕྲིན་ལས་ཀྱང༌། །དབང་དྲག་བསྐལ་མེ་འབར་བས་སྤ་བཀོང་ནས། །མཐར་ཐུག་ཞི་བསིལ་བདུད་རྩིའི་སིམ་སྟེར་ཕྱིར། །ལས་སྐལ་མཐུན་པས་བཀའ་ཡི་སྲུང་མར་བཀོལ། །སྔོན་གོམས་ལས་མཐའ་ལོག་པའི་ཞུགས་ཕུང་ཀྱང༌། །རྒྱལ་སྲས་སྤྱོད་པའི་འབབ་སྟེགས་ལ་བསྒྱུར་ནས། །ས་བཅུའི་དབང་ཕྱུག་རྒྱལ་བ་རྨོག་ལྕོག་ནས། །བསྟན་མཆོག་རྒྱལ་ཐབས་མེལ་ཚེས་སྐྱོང་བར་གདམས། །རྟེན་འབྱུང་སྒྱུ་མ་སྟོང་ཉིད་དབྱིངས་བཤིག་ཚེ། །འཁྲུལ་བས་སྒྲོ་བཏགས་མིང་ཡང་མེད་པས་ན། །དབང་ཆེན་པདྨའི་ཕྲིན་ལས་དགའ་ཚལ་དུ། །འཇུག་པའི་ལེགས་བྱས་ཤིང་རྟར་ངལ་མེད་འཛེགས། །ཆོས་ཀུན་དག་ཅིང་མཉམ་ཉིད་ར་བ་ལས། །མ་འདས་ཕྱིར་ན་ཞི་མཛད་ཐུགས་རྗེའི་གཏེར། །དབང་ཆེན་རྟ་མཆོག་རོལ་བའི་བཀའ་ཡི་འབངས། །བཙན་རྒྱལ་ཡམ་ཤུད་སྲོག་གི་ཤན་པར་གྲགས། །འཁོར་ལོའི་དབང་ཕྱུག་གར་དབང་བཞད་པ་ཡི། །ཕྲིན་ལས་ཉམས་དགའི་ཚལ་ན་རྩེན་གྱུར་པས། །དོན་གཉིས་བདེ་དགའི་གླིང་བུ་བསྒྱུར་བཞིན་དུ། །རྒྱལ་སྲས་སྤྱོད་པས་བྲེལ་ཁྱོད་མངའ་གསོལ་ལོ། །གསང་བ་རྨད་བྱུང་པདྨ་རྒྱལ་པོའི་བཀའ། །གསང་དོན་རྒྱུད་ལུང་མན་ངག་མཐའ་ཀླས་པའི། །དཔལ་ལ་དད་པས་སྤྱོད་པའི་རྣལ་འབྱོར་གྱིས། །རྒྱབ་དཔུང་སྲུང་མར་སྦྲན་ཕྱིར་མངའ་གསོལ་ལོ། །ས་བཅུའི་དབང་ཕྱུག་རིན་ཆེན་དོ་ཤལ་གྱིས། །ས་གསུམ་སྐྱེ་དགུའི་སྐལ་བཟང་མགུལ་རྒྱན་དུ། །ས་ཆེན་འཕགས་པས་བསྟར་བའི་སྒྲུབ་བརྒྱུད་སྲོལ། །དཔལ་ལྡན་ཤངས་པའི་བཀའ་སྲུང་མངའ་གསོལ་ལོ། །ངོ་བོ་གཞན་ཕན་ཕྲིན་ལས་ལྟེ་བ་ཟླུམ། །རྣམ་པ་བྱང་སེམས་ཕྲིན་ལས་རྩིབས་སྟོང་གིས། །འགྲོ་རྒྱུད་གླིང་བཞིར་ཐར་བའི་རྒྱལ་ཁབ་ཏུ། །འདྲེན་པའི་ཁ་ལོ་པ་རུ་མངའ་གསོལ་ལོ། །ཚངས་ཆེན་ཞིང་གི་དཔལ་གྱི་རིན་ཐང་ཡང༌། །ཆུང་ངུར་བགྱི་བའི་རྒྱལ་བསྟན་ཤངས་པ་ཆེའི། །བཤད་སྒྲུབ་ལས་ཀྱི་འདོད་དགུའི་ཆར་རྒྱུན་གྱིས། །དབུགས་འབྱིན་ནོར་བུའི་རྒྱལ་པོར་མངའ་གསོལ་ལོ། །རབ་འབྱམས་རྒྱུད་སྡེ་རྒྱ་མཚོ་ལས་བྱུང་ཞིང༌། །ཉམས་རྟོགས་དྲོད་རྟགས་རླབས་ཕྲེང་ཆིལ་ཆིལ་གཡོ། །གྲུབ་མཆོག་ལག་ལྡན་བསྒྱིངས་བས་བསྙེན་པའི་ཚལ། །རྒྱས་མཛད་དབྱར་གྱི་ཕོ་ཉར་མངའ་གསོལ་ལོ། །འགྲོ་རྒྱུད་འཕགས་ལམ་ལུས་སྟོབས་ཆེར་རྒྱས་ཕྱིར། །སྙིང་རྗེའི་ནུ་ཞོ་གསར་པ་ཟབ་གསང་བཅུད། །བདུད་རྩིའི་དགའ་སྟོན་སྦྱིན་ལ་མི་ངལ་བའི། །ཕྲིན་ལས་མ་མ་སྡུག་གུར་མངའ་གསོལ་ལོ། །རྣམ་དཀར་སྣང་བ་ཕྲ་ཞིང་ལས་ཉོན་གྱི། །དཔུང་ལ་རྒོལ་བའི་དཔུང་པར་ཆེས་དཔའ་བའི། །དམ་ཆོས་མཚོན་དང་སྒྱུ་རྩལ་ངོམས་པ་ལ། །སྟོབས་ལྡན་དམག་དཔོན་རིན་ཆེན་མངའ་གསོལ་ལོ། །ལུང་སྟོང་དབེན་པར་དཀའ་ཐུབ་དབྱར་སྐྱེས་ཚལ། །རྒྱུ་བས་སྒྲུབ་པའི་སྲོག་འཛིན་སྤོང་བ་པར། །ངོ་མཚར་ཡོན་ཏན་འདོད་དགུ་འཛད་མེད་ཀྱི། །སྐྱེས་སྟེར་ཁྱིམ་བདག་མཛངས་པར་མངའ་གསོལ་ལོ། །དབང་བཞིའི་གླིང་ཉུལ་བསྐྱེད་རྫོགས་རྐང་པ་བཞིས། །རྡོ་རྗེའི་ལམ་གྱི་ཁྱོན་ཀུན་ངལ་མེད་པར། །ཉུལ་ནས་ཟུང་འཇུག་རྒྱལ་ཐབས་ལ་སྦྱོར་བའི། །དཔུང་གྲོགས་རྟ་མཆོག་རྩལ་ལྡན་མངའ་གསོལ་ལོ། །ཟག་མེད་ཡོན་ཏན་འབྱོར་པས་ཕྱུག་པའི་ཁབ། །ནམ་ཡང་རྒུད་བྲལ་རྒྱལ་ཀུན་དབྱིངས་ཆེན་པོར། །ངལ་མེད་སྦྱོར་བའི་མྱུར་ལམ་ཕོ་ཉ་མོ། །གྲོགས་སུ་སྦྱིན་པའི་མེས་པོར་མངའ་གསོལ་ལོ། །ཆོས་དབྱིངས་རང་བྱུང་ཁྱབ་བརྡལ་ཡངས་པའི་མཁར། །གསང་བ་མི་ཟད་རྒྱན་གྱི་འཁོར་ལོའི་ཕུལ། །དབང་ཆེན་གསུང་གི་རྡོ་རྗེ་པདྨའི་གདུང༌། །མེལ་ཚེས་སྐྱོང་བའི་ཁྱིམ་བདག་མངའ་གསོལ་ལོ། །མཐར་ཐུག་ཞི་བ་ཆོས་སྐུའི་དབྱིངས་མནལ་ཡང༌། །རྣམ་འགྱུར་དབང་དང་དྲག་ཤུལ་རོལ་བའི་གར། །སྡིག་ཅན་སྙིང་ལ་བཟོད་དཀའི་རྩེ་དགའ་ཅན། །དབང་པོའི་མཚོན་ལས་རྣོ་ཁྱོད་མངའ་གསོལ་ལོ། །དགྱེས་འཛུམ་ཟླ་བའི་བདུད་རྩིའི་རེག་པ་ལས། །མི་མཐུན་ཉེས་བརྒྱའི་རྙོགས་མ་དཔྱིས་འབྱིན་ཏེ། །དགེ་ལེགས་ཀུ་མུད་ན་ཚོད་དར་བབ་པས། །ཕན་བདེའི་བསུང་ཞིམ་མངར་ཕྱིར་མངའ་གསོལ་ལོ། །ཚེ་བསོད་དཔལ་ཡོན་ཡོངས་འདུས་ལྷ་ཡི་ཤིང༌། །འདོད་དགུའི་མེ་འབྲས་རྒྱས་པའི་གྲིབ་བསིལ་གྱིས། །རྒུད་པའི་གདུང་སེལ་ཕན་བདེའི་དགའ་སྟོན་ཟས། །ནམ་ཡང་ཟད་མེད་འཕེལ་ཕྱིར་མངའ་གསོལ་ལོ། །ཆེ་རྒུའི་ཡིད་ཀྱི་བྷྲཿམ་རའི་འཕུར་ལྡིང༌། །དབང་བྱེད་པདྨའི་ཟིལ་མངར་ལ་ཆགས་པས། །མཆོག་བཟང་བདུད་རྩིའི་སིམ་དང་མཐུན་པའི་རྐྱེན། །རྟག་སྤེལ་ཡིད་ཀྱི་ཆོམས་རྐུན་མངའ་གསོལ་ལོ། །སྡེ་སྣོད་གསུམ་གྱི་རི་གླིང་བཀོད་པ་བཀྲ། །བསླབ་པ་གསུམ་གྱི་རིན་ཆེན་ལྷུན་པོ་བརྗིད། །འཁོར་ལོ་གསུམ་གྱི་ཟླ་ཉི་རྒྱུ་སྐར་ཕྲེང༌། །མི་ཉམས་ཕྱོགས་མཐར་སྤེལ་མཁས་མངའ་གསོལ་ལོ། །སྡུག་བསྔལ་གསུམ་གྱི་ཟུག་རྔུས་མནར་བའི་འགྲོ། །ཐེག་མཆོག་གསུམ་གྱི་སྨན་གྱིས་དབུགས་ཕྱུང་སྟེ། །སྐྱེས་བུ་གསུམ་གྱི་ལམ་ལྔའི་ལང་ཚོ་ཡིས། །སྒོ་གསུམ་དབུགས་འབྱིན་གྲོགས་སུ་མངའ་གསོལ་ལོ། །སྐྱེམས་ཕུད་བཟའ་བཅའ་གཏོར་མ་ལྷུན་པོར་སྤུངས། །མཐུན་རྫས་སྤྱན་གཟིགས་ལྷ་དབང་འདུན་ས་ལྟར། །དངོས་དང་ཏིང་འཛིན་ཆོ་འཕྲུལ་མཐའ་ཡས་བཅས། །མྱུར་མགྱོགས་ཕྲིན་ལས་སྤེལ་ཕྱིར་མངའ་གསོལ་ལོ། །གཞན་དོན་ཤིང་རྟར་འཛེགས་པའི་རྒྱལ་བའི་སྲས། །ལྷག་བསམ་ཡིད་ཀྱི་འཇུག་པ་རྒྱ་ཆེ་ཡང༌། །ནུས་སྟོབས་ལག་ལེན་ཕྲ་བའི་རྣལ་འབྱོར་ཟོལ། །སྟོབས་ནུས་དཔུང་གྲོགས་མཛད་ཕྱིར་མངའ་གསོལ་ལོ། །མཁས་བཙུན་བཟང་པོའི་མཚར་སྡུག་ན་ཚོད་བཀྲ། །འཆད་རྩོད་རྩོམ་པའི་མགྲིན་མིག་མཁའ་ལ་བཏེགས། །དོན་གཉིས་ཟློས་གར་ཐུབ་བསྟན་ཚལ་རྒྱུ་བའི། །ངོ་མཚར་དབྱར་རྔས་བསྐུལ་ཕྱིར་མངའ་གསོལ་ལོ། །སྙིགས་མའི་མུན་སེལ་དམ་ཆོས་གློག་ཞགས་ཀྱིས། །འགྲོ་ཀུན་ཡིད་ཀྱི་དགའ་སྟོན་སྦྱིན་པའི་ཕྱིར། །རྩེ་གཅིག་དད་མོས་གདུང་བས་ཁྱེད་བསྐུལ་ན། །མ་གཡེལ་ཐུགས་རྗེས་སྐྱོང་ཕྱིར་མངའ་གསོལ་ན། །སྔོན་བྱོན་གོང་མའི་རྡོ་རྗེའི་བཀའ་ལུང་ཚིག །མ་བསྙེལ་ཡིད་ཆེས་དགའ་བས་དབུགས་དབྱུང་ལ། །བསྟན་སྲུང་མཚན་སྙན་དོན་གྱིས་ལྕི་བ་ཡི། །དགེ་མཚན་ཕྱོགས་མཐར་ཁྱབ་པའི་དཔལ་སྩོལ་ཅིག །ཅེས་པའང་དམ་པའི་ཡོན་ཏན་བདུད་རྩིས་ཕྱུག་ཅིང་ཐུགས་རྩེའི་གཡར་དམ་མི་ལྷོད་པའི་ཨ་གྲོ་མཆོག་སྤྲུལ་ཀརྨ་སྒྲུབ་བརྒྱུད་ངེས་དོན་བསྟན་འཕེལ་ལམ། མཐུ་སྟོབས་རྣམ་རྒྱལ་གྱིས་རིན་པོ་ཆེའི་རྟེན་བཅས་རིང་ནས་གསུང་གིས་བསྐུལ་བ་རྗེས་སུ་དྲན་པས་ནུབ་ཕྱོགས་པ་རི་སི་གྲོང་ཁྱེར་དུ་ལྷོད་པར་གནས་པའི་འཁྱམས་པོ་མི་རྒན་མངྒ་ལའི་མིང་གིས་བྲིས་ཤིང་སྨོན་པས་མཆོག་སྤྲུལ་རྒྱལ་བའི་མྱུ་གུའི་བསྟན་འགྲོའི་དཔལ་ཡོན་སྤེལ་བའི་ཕྲིན་ལས་ཀྱིས་གསོས་སྨན་དུ་གྱུར་ཅིག །སུ་ཤྲཱི་ཡེ་བྷ་ཝནྟུ། དགེའོ།། །། ༈ ཧྲཱིཿ དབང་དྲག་པདྨའི་བཀའ་ཉན་མཐུ་རྩལ་ཅན། །བསྟན་ལ་རབ་གུས་མཐུ་སྟོབས་རྫུ་འཕྲུལ་བདག །ཕྲིན་ལས་ཐོགས་མེད་རྡོ་རྗེ་བདུད་འདུལ་མཆོག །གསོལ་ལོ་མཆོད་དོ་སྒྲུབ་མཆོག་རྗེས་སྐྱོངས་མཛོད། །ཅེས་གྲོང་སར་བླ་མ་ཡེ་ཤེས་ཀློང་གྲོལ་ནས་འབོད་བསྐུལ་བཞིན་མངྒ་ལས་སྨྲས་པའོ། ༈ ཧྲཱིཿ བདེ་ཆེན་འབར་བ་དབང་གི་ཕོ་བྲང་ནས། །དབང་ཆེན་པདྨའི་བཀའ་ཉན་བཙན་རྒོད་ཆེ། །ཇག་པ་མེ་ལེན་དགྱེས་ཡུམ་སྤྲུལ་འཁོར་བཅས། །གསོལ་ལོ་མཆོད་དོ་དབང་དྲག་ཕྲིན་ལས་མཛོད། །སྒྲུབ་བརྩོན་པདྨ་འགྱུར་མེད་ནས་བསྐུལ་ངོར་མངྒ་ལས་སོ། ༈ ཧཱུྃ། དཔལ་ཆེན་ཀརྨ་ཀཱི་ལ་ཡ། །ཕྲིན་ལས་རིགས་ཀྱི་སྤྱི་དཔལ་ཆེའི། །བཀའ་ཡི་སྲུང་མར་ཞལ་བཞེས་པ། །བསྭེ་ལྕགས་དུང་གི་སྐྱེས་བུ་ནི། །ཕྱི་ལྟར་ལྷ་བཙན་བདུད་ཀྱི་རྒྱལ། །ནང་ལྟར་སྐུ་གསུང་ཐུགས་ཀྱི་སྤྲུལ། །མཐུ་ཆེན་བསྟན་པའི་གཉེར་འཛིན་པ། །འཁོར་དང་བཀའ་སྡོད་འབར་བའི་ཚོགས། །ཀུན་ལ་མཐུན་པའི་དམ་ཚིག་རྫས། །ཕྱི་ནང་གསང་བའི་མཆོད་པ་འབུལ། །ཉམས་ཆགས་ཉེས་ལྟུང་མཐོལ་བཤགས་སྡོམས། །ཕུར་པ་སྒྲུབ་པའི་གྲོགས་མཛོད་ལ། །མཆོག་ཐུན་དངོས་གྲུབ་སྒྲུབ་པ་ཡི། །འགལ་རྐྱེན་བར་ཆད་ཐམས་ཅད་སོལ། །མཐུན་རྐྱེན་བསམ་དོན་ཡིད་བཞིན་སྒྲུབས། །འདོད་དགུའི་ཕྲིན་ལས་རབ་འབྱམས་སྩོལ། །ཅེས་མཁྱེན་རབ་དཔལ་གྱི་བདུད་རྩིས་མཛེས་པའི་ཆོས་རྒྱལ་སྤྲུལ་སྐུ་རིན་པོ་ཆེའི་བཀས་བསྐུལ་བཞིན་འཇིགས་མེད་མཁྱེན་བརྩེའི་འོད་ཟེར་གྱིས་བྲིས་པ་དགེ་ལེགས་འཕེལ།།
[edit]

@#/__/btsan rgod shu ba srog gzan gyi gsol mchod dbang drag glog gi gar mkhan bzhugs// na mo gu ru pad+ma kro d+ha ya/_/btsan rgod shu ba srog gzan mchod gsol 'dod pas gtsang ma'i snod du mchod gtor dmar gtor gru gsum bdun khrag gtsang mas brgyan pa dang*/_drag po'i nyer spyod/_gser skyems phud rgod/_'byor na shing rtsi'i bsang bcas 'du byas la/_rang nyid dpal rta mgrin du gsal bas/_raM yaM khaM/_mchod gtor zag med ye shes bdud rtsi'i sprin phung 'dod yon rgya mtsho'i rol par gyur/_oM AHhU~M ha ho hrIH_lan gsum/_rang dbang chen rta mgrin du gsal ba'i thugs ka'i 'od kyis btsan rgod 'khor dang bcas pa skad cig gis byon par gyur/_kyai/_dbang drag pad+ma drag po yis/_/bka' nyan dregs pa btsan gyi rje/_/shu ba srog gzan 'khor dang bcas/_/gnas 'dir spyan 'dren gshegs su gsol/_/shu la tri badz+ra sa ma ya dzaH_dzaHhU~M ba~M ho/_sa ma ya rak+shan tu/_oM badz+ra ar+g+haM nas/_shab+da sarba pU dza ho/_oM shu la rA dza sa pa ri wA ra i dam ba liM ta khA hi/_lan gsum/_ma hA a mr-i ta khA hi/_ma hA rak+ta khA hi/_zhes nyer spyod dang sman raka gtor mas mchod/_bstan pa'i bka' srung chen po btsan rgod shu ba srog gzan mched bdun 'khor dang bcas pas sangs rgyas kyi bstan pa srung sogs kyis phrin las bcol/_bstod pa ni/_hU~M:_shu ba srog gzan btsan gyi rje:_yam shud dmar po mthu stobs can:_bswe yi skyes bu rab 'jigs pa:_sku mdog dmar rngams khros pa la:_phyag na mdung dmar zhags pa 'dzin:_bse khrab gsol zhing rta dmar chibs:_dar dmar rdo rje'i cod pan can:_klu btsan 'bum gyi 'khor gyis bskor:_'dir gshegs dam rdzas mchod pa bzhes:_pad+ma 'byung gnas bka' bzhin du:_sgrub pa po yi chos srid srungs:_chos skyong rgyal po'i bsam pa sgrubs:_bcol ba'i phrin las 'grub par mdzod:_ces dang*/_grangs bsags dgos na/_hU~M/_phyi ltar klu btsan nang ltar rA tsa'i tshul/_/gsang ba gnod sbyin nor bdag tshul ston pa/_/'bar ba spun bdun sprul 'khor pho nyar bcas/_/gsol lo mchod do bcol ba'i phrin las mdzod/_/ces mi pham rin po che'i rdo rje'i gsung ngo*/_/ces pa'ang mkhyen yon mtshungs med a gro mchog gi sprul pa'i sku karma sgrub brgyud nges don bstan 'phel nas gsung bskul bzhin mtsho skyes rgyal ba gnyis pa'i 'bangs mang+ga las lho 'brug spa gro skyer chu'i gtsug lag khang nas bris pa sgrub brgyud snying po'i bstan pa yar zla ltar 'phel ba'i rten 'brel du smon bzhin 'grub par gyur cig_/su shrI ye b+ha wan+tu//_//__!__skyes bu lung btsan gsol mchod dbang drag glog phreng bzhugs/_kyai/_yul ni lho mon tsan+dan ljongs/_/ri brag tshang tshing bkod pa mdzes/_/spangs ljongs me tog sman 'brus brgyan/_/chu klung dal bgrod rtse mtho'i ri/_/bdud rtsi'i sprin dang na bun g.yo/_/nyi zla'i snang bas legs skyong gzhir/_/brag dkar shel gyi ri bo la/_/srid pa chags pa'i lha rabs che/_/dbang drag pad+ma'i bka' sdod mchog_/jo bo skyes bu lung btsan zhes/_/khro gtum bskal pa'i me ltar 'bar/_/spyan bgrad sma ra smin ma 'khyugs/_/bswe rmog bswe khrab ber dmar gsol/_/phyag g.yas dar dmar ru mtshon 'phyar/_/g.yon pas mdung dang zhags pa thogs/_/'khor gsum stag chas tsher ltar rno/_/dar 'phru me stag khrom khrom 'phro/_/rta dmar rlung gshog rgyan ldan chib/_/pho nya ru 'dren rlung ltar 'tshubs/_/dgyes sde sman btsun 'khor dang bcas/_/mchod pa'i mgron du dgyes pas spyon/_/gtsang sbyar gtor ma sha khrag brgyan/_/gser skyems phud rgod rgya mtsho bskyil/_/bsang dang spos sprin bar snang khengs/_/spyan gzigs dkor nor mthun rdzas dang*/_/dgyes bskyed ja dar nor phyugs rta/_/ri dwags g.yung dwags bya rigs khyu/_/zad med phyogs kun khyab 'bul na/_/dgyes bzhes 'khon dang nyams chags sbyangs/_/gnas mgron dam tshig ma bsnyel bar/_/dgyes pas nyin mtshan bya ra mdzod/_/yul 'dir bkra shis bde legs shing*/_/mi phyugs lo legs 'bru dpal spel/_/nad mug 'khrugs rtsod sad ser zhi/_/dpal 'byor longs spyod dga' bde 'phel/_/chos ldan rgyal po'i mnga' thang dar/_/'bangs 'khor blon po chos la dad/_/skye dgu bde skyid mthun la dar/_/snod bcud lha bzhin dar rgyas mdzod/_/dge 'dun 'dus tshogs 'phel rgyas brtan/_/spang klog mdzad pa yar zla bzhin/_/khrims gtsang chos bzhin spyod pa yis/_/dkon mchog gsum gyi dbu 'phang bstod/_/khyad par dpal ldan karma pa/_/rang byung rig pa'i rdo rje yi/_/spyan sngar dam bcas khas blangs bzhin/_/phrin las dar rgyas kun khyab pas/_/sgrub brgyud bstan pa'i nyin byed shar/_/de 'dzin skyes bu'i mdzad phrin rgyas/_/thugs la bzhed pa'i don 'grub cing*/_/bkra shis bde legs phun tshogs mdzod/_/ces pa'ang sgrub brtson bla ma karma bstan 'dzin rnam rgyal nas gsung bskul bzhin mtsho skyes rgyal ba gnyis pa'i thugs rje'i zla zer dad pas 'thung ba'i khams pa'i sngags rgan mang+ga la shrI b+hU tis sku rjes rdo rjes brtsegs pa'i ke'u tshang nas dge ba'i mtshan ltas dang bcas te bris pa shu b+haM dza yan+tu//__!__dbang drag pad+ma'i bka' sdod rdzing btsan rdo rje dgra 'dul gyi mnga' gsol lha dbang g.yul las rgyal ba'i dbyangs snyan zhes bya ba bzhugs so/__mang mang rgyal kun mkhyen brtse'i mkha' dbyings su/_/myur myur phrin las glog phreng g.yos ba las/_/snyan snyan phan bde'i snye ma'i gnyen gyi char/_/yang yang 'bebs pas brjod don lci bar mdzod/_/ka dag bya rtsol bral ba'i chos kyi dbyings/_/'pho 'gyur mtshan rtog 'du byed ma mchis kyang*/_/kun khyab thugs rje'i 'char ka'i nyin byed kyis/_/mkha' khyab 'gro 'dul phrin las rgyun mi chad/_/thabs mkhas char ldan sprin gyi phreng ba las/_/phan bde'i bdud rtsi'i sim char mi zad pas/_/rjes 'dzin gdul dka'i 'gro sgrol byed las can/_/tshar gcod gnam lcags mda' rnon 'bigs pa'i yul/_/rang rgyud dug lnga'i khol por 'phyan ches pas/_/dkar min las kyi rlung dmar bar med du/_/ldang bas gsod gcod mi srun srin po ltar/_/lag na mtshon rnon thogs pas ri skyes bcom/_/nyams chung srog gi 'jigs pas ma bzod par/_/gting zab chu skyes dbus kyi rwa bcu'i ro/_/sha zan rngams pas skam sar bton 'dod kyi/_/khro chags rngam kyang stobs kyis ma lcogs bzhin/_/ling pa ming sring phyi ma'i ltad mor chas/_/bag chags rlung dmar gzhan dbang rnam shes de/_/yid lus 'khrul pa'i zug rngus gdung bzhin mun/_/rtag 'phyan gzhan gnod mtshon cha thogs bzhin du/_/'jig rten kun na rgyu ba'i btsan rgod de/_/thugs rje myur mgyogs lcags kyus gzung yul gyur/_/gdul bya'i rgyud kyi gnyen po'i phrin las kyang*/_/dbang drag bskal me 'bar bas spa bkong nas/_/mthar thug zhi bsil bdud rtsi'i sim ster phyir/_/las skal mthun pas bka' yi srung mar bkol/_/sngon goms las mtha' log pa'i zhugs phung kyang*/_/rgyal sras spyod pa'i 'bab stegs la bsgyur nas/_/sa bcu'i dbang phyug rgyal ba rmog lcog nas/_/bstan mchog rgyal thabs mel tshes skyong bar gdams/_/rten 'byung sgyu ma stong nyid dbyings bshig tshe/_/'khrul bas sgro btags ming yang med pas na/_/dbang chen pad+ma'i phrin las dga' tshal du/_/'jug pa'i legs byas shing rtar ngal med 'dzegs/_/chos kun dag cing mnyam nyid ra ba las/_/ma 'das phyir na zhi mdzad thugs rje'i gter/_/dbang chen rta mchog rol ba'i bka' yi 'bangs/_/btsan rgyal yam shud srog gi shan par grags/_/'khor lo'i dbang phyug gar dbang bzhad pa yi/_/phrin las nyams dga'i tshal na rtsen gyur pas/_/don gnyis bde dga'i gling bu bsgyur bzhin du/_/rgyal sras spyod pas brel khyod mnga' gsol lo/__/gsang ba rmad byung pad+ma rgyal po'i bka'/_/gsang don rgyud lung man ngag mtha' klas pa'i/_/dpal la dad pas spyod pa'i rnal 'byor gyis/_/rgyab dpung srung mar sbran phyir mnga' gsol lo/__/sa bcu'i dbang phyug rin chen do shal gyis/_/sa gsum skye dgu'i skal bzang mgul rgyan du/_/sa chen 'phags pas bstar ba'i sgrub brgyud srol/_/dpal ldan shangs pa'i bka' srung mnga' gsol lo/__/ngo bo gzhan phan phrin las lte ba zlum/_/rnam pa byang sems phrin las rtsibs stong gis/_/'gro rgyud gling bzhir thar ba'i rgyal khab tu/_/'dren pa'i kha lo pa ru mnga' gsol lo/__/tshangs chen zhing gi dpal gyi rin thang yang*/_/chung ngur bgyi ba'i rgyal bstan shangs pa che'i/_/bshad sgrub las kyi 'dod dgu'i char rgyun gyis/_/dbugs 'byin nor bu'i rgyal por mnga' gsol lo/__/rab 'byams rgyud sde rgya mtsho las byung zhing*/_/nyams rtogs drod rtags rlabs phreng chil chil g.yo/_/grub mchog lag ldan bsgyings bas bsnyen pa'i tshal/_/rgyas mdzad dbyar gyi pho nyar mnga' gsol lo/__/'gro rgyud 'phags lam lus stobs cher rgyas phyir/_/snying rje'i nu zho gsar pa zab gsang bcud/_/bdud rtsi'i dga' ston sbyin la mi ngal ba'i/_/phrin las ma ma sdug gur mnga' gsol lo/__/rnam dkar snang ba phra zhing las nyon gyi/_/dpung la rgol ba'i dpung par ches dpa' ba'i/_/dam chos mtshon dang sgyu rtsal ngoms pa la/_/stobs ldan dmag dpon rin chen mnga' gsol lo/__/lung stong dben par dka' thub dbyar skyes tshal/_/rgyu bas sgrub pa'i srog 'dzin spong ba par/_/ngo mtshar yon tan 'dod dgu 'dzad med kyi/_/skyes ster khyim bdag mdzangs par mnga' gsol lo/__/dbang bzhi'i gling nyul bskyed rdzogs rkang pa bzhis/_/rdo rje'i lam gyi khyon kun ngal med par/_/nyul nas zung 'jug rgyal thabs la sbyor ba'i/_/dpung grogs rta mchog rtsal ldan mnga' gsol lo/__/zag med yon tan 'byor pas phyug pa'i khab/_/nam yang rgud bral rgyal kun dbyings chen por/_/ngal med sbyor ba'i myur lam pho nya mo/_/grogs su sbyin pa'i mes por mnga' gsol lo/__/chos dbyings rang byung khyab brdal yangs pa'i mkhar/_/gsang ba mi zad rgyan gyi 'khor lo'i phul/_/dbang chen gsung gi rdo rje pad+ma'i gdung*/_/mel tshes skyong ba'i khyim bdag mnga' gsol lo/__/mthar thug zhi ba chos sku'i dbyings mnal yang*/_/rnam 'gyur dbang dang drag shul rol ba'i gar/_/sdig can snying la bzod dka'i rtse dga' can/_/dbang po'i mtshon las rno khyod mnga' gsol lo/__/dgyes 'dzum zla ba'i bdud rtsi'i reg pa las/_/mi mthun nyes brgya'i rnyogs ma dpyis 'byin te/_/dge legs ku mud na tshod dar bab pas/_/phan bde'i bsung zhim mngar phyir mnga' gsol lo/__/tshe bsod dpal yon yongs 'dus lha yi shing*/_/'dod dgu'i me 'bras rgyas pa'i grib bsil gyis/_/rgud pa'i gdung sel phan bde'i dga' ston zas/_/nam yang zad med 'phel phyir mnga' gsol lo/__/che rgu'i yid kyi b+h+raHma ra'i 'phur lding*/_/dbang byed pad+ma'i zil mngar la chags pas/_/mchog bzang bdud rtsi'i sim dang mthun pa'i rkyen/_/rtag spel yid kyi choms rkun mnga' gsol lo/__/sde snod gsum gyi ri gling bkod pa bkra/_/bslab pa gsum gyi rin chen lhun po brjid/_/'khor lo gsum gyi zla nyi rgyu skar phreng*/_/mi nyams phyogs mthar spel mkhas mnga' gsol lo/__/sdug bsngal gsum gyi zug rngus mnar ba'i 'gro/_/theg mchog gsum gyi sman gyis dbugs phyung ste/_/skyes bu gsum gyi lam lnga'i lang tsho yis/_/sgo gsum dbugs 'byin grogs su mnga' gsol lo/__/skyems phud bza' bca' gtor ma lhun por spungs/_/mthun rdzas spyan gzigs lha dbang 'dun sa ltar/_/dngos dang ting 'dzin cho 'phrul mtha' yas bcas/_/myur mgyogs phrin las spel phyir mnga' gsol lo/__/gzhan don shing rtar 'dzegs pa'i rgyal ba'i sras/_/lhag bsam yid kyi 'jug pa rgya che yang*/_/nus stobs lag len phra ba'i rnal 'byor zol/_/stobs nus dpung grogs mdzad phyir mnga' gsol lo/__/mkhas btsun bzang po'i mtshar sdug na tshod bkra/_/'chad rtsod rtsom pa'i mgrin mig mkha' la btegs/_/don gnyis zlos gar thub bstan tshal rgyu ba'i/_/ngo mtshar dbyar rngas bskul phyir mnga' gsol lo/__/snyigs ma'i mun sel dam chos glog zhags kyis/_/'gro kun yid kyi dga' ston sbyin pa'i phyir/_/rtse gcig dad mos gdung bas khyed bskul na/_/ma g.yel thugs rjes skyong phyir mnga' gsol na/_/sngon byon gong ma'i rdo rje'i bka' lung tshig_/ma bsnyel yid ches dga' bas dbugs dbyung la/_/bstan srung mtshan snyan don gyis lci ba yi/_/dge mtshan phyogs mthar khyab pa'i dpal stsol cig__/ces pa'ang dam pa'i yon tan bdud rtsis phyug cing thugs rtse'i g.yar dam mi lhod pa'i a gro mchog sprul karma sgrub brgyud nges don bstan 'phel lam/_mthu stobs rnam rgyal gyis rin po che'i rten bcas ring nas gsung gis bskul ba rjes su dran pas nub phyogs pa ri si grong khyer du lhod par gnas pa'i 'khyams po mi rgan mang+ga la'i ming gis bris shing smon pas mchog sprul rgyal ba'i myu gu'i bstan 'gro'i dpal yon spel ba'i phrin las kyis gsos sman du gyur cig__/su shrI ye b+ha wan+tu/_dge'o//_//__!__hrIH_dbang drag pad+ma'i bka' nyan mthu rtsal can/_/bstan la rab gus mthu stobs rdzu 'phrul bdag_/phrin las thogs med rdo rje bdud 'dul mchog_/gsol lo mchod do sgrub mchog rjes skyongs mdzod/_/ces grong sar bla ma ye shes klong grol nas 'bod bskul bzhin mang+ga las smras pa'o/__!__hrIH_bde chen 'bar ba dbang gi pho brang nas/_/dbang chen pad+ma'i bka' nyan btsan rgod che/_/jag pa me len dgyes yum sprul 'khor bcas/_/gsol lo mchod do dbang drag phrin las mdzod/_/sgrub brtson pad+ma 'gyur med nas bskul ngor mang+ga las so/__!_hU~M/_dpal chen karma kI la ya/_/phrin las rigs kyi spyi dpal che'i/_/bka' yi srung mar zhal bzhes pa/_/bswe lcags dung gi skyes bu ni/_/phyi ltar lha btsan bdud kyi rgyal/_/nang ltar sku gsung thugs kyi sprul/_/mthu chen bstan pa'i gnyer 'dzin pa/_/'khor dang bka' sdod 'bar ba'i tshogs/_/kun la mthun pa'i dam tshig rdzas/_/phyi nang gsang ba'i mchod pa 'bul/_/nyams chags nyes ltung mthol bshags sdoms/_/phur pa sgrub pa'i grogs mdzod la/_/mchog thun dngos grub sgrub pa yi/_/'gal rkyen bar chad thams cad sol/_/mthun rkyen bsam don yid bzhin sgrubs/_/'dod dgu'i phrin las rab 'byams stsol/_/ces mkhyen rab dpal gyi bdud rtsis mdzes pa'i chos rgyal sprul sku rin po che'i bkas bskul bzhin 'jigs med mkhyen brtse'i 'od zer gyis bris pa dge legs 'phel//

Footnotes

Other Information